སྐྱབས་མགོན་རྫོགས་ཆེན་ལྔ་པ་རིན་པོ་ཆེའི་ཞབས་བརྟན་གསོལ་འདེབས་འཆི་མེད་གྲུབ་པའི་བདེན་ཚིག
སྐྱབས་མགོན་རྫོགས་ཆེན་ལྔ་པ་རིན་པོ་ཆེའི་ཞབས་བརྟན་གསོལ་འདེབས་འཆི་མེད་གྲུབ་པའི་བདེན་ཚིག་ཅེས་བྱ་བ་བཞུགས་སོ། །བརྟན་གཡོའི་དྭངས་བཅུད་སྙིང་པོར་དྲིལ་བའི་སྲོག །ཁ་སྦྱོར་བདུན་ལྡན་མཐའ་ཀླས་དཀྱིལ་འཁོར་བདག །ཚེ་དང་ཡེ་ཤེས་དངོས་ཀུན་སྩོལ་བའི་ལྷས། །རིང་པོར་འཚོ་བའི་དཔལ་གྱི་སྐབས་དབྱེ་ཤོག །ཀུན་བཟང་རྡོ་རྗེ་འཆང་དབང་པདྨ་འབྱུང་། །གྲུབ་པའི་རིག་འཛིན་མཆོག་ཏུ་རོལ་པའི་གར། །བསྟན་འགྲོར་རྗེས་སུ་བརྩེ་བའི་ཡ་མཚན་ཕུལ། །རིམ་བྱོན་སྐྱེ་བའི་ཕྲེང་བར་གསོལ་བ་འདེབས། །རྒྱལ་དབང་པདྨའི་རིང་ལུགས་བཀའ་གཏེར་གྱི། །ཐེག་མཆོག་བསྟན་པ་འཛིན་ལ་ཟླ་བྲལ་བ། །འཇིགས་མེད་ཕྱོགས་ལས་རྣམ་རྒྱལ་གྲུབ་པའི་སྡེ། །བསྐལ་བརྒྱར་ཞབས་བརྟན་ཆོས་འཁོར་བསྐོར་གྱུར་ཅིག །ཚུལ་གནས་གསན་བསམ་སྒོམ་པའི་ཡོན་ཏན་རྫོགས། །མདོ་སྔགས་རབ་འབྱམས་འཆད་རྩོད་རྩོམ་པ་དང་། །མཁྱེན་བརྩེ་ནུས་པའི་སྣང་བས་ས་གསུམ་ཁྱབ། །མཁས་བཙུན་བཟང་པོའི་ཕྲིན་ལས་རྒྱས་གྱུར་ཅིག །སྣ་ཚོགས་ཤེས་བྱའི་ཆོས་ཚུལ་མཐའ་ཀླས་པ། །མཁྱེན་པའི་མེ་ལོང་གཙང་མར་ལེགས་འཕོས་ནས། །ཇི་སྙེད་གདུལ་བྱ་འདྲེན་པའི་རྣམ་ཐར་གཟི། །བསྐལ་མཐའི་བར་དུ་ཉམས་མེད་ཞབས་བརྟན་གསོལ། །ཟབ་དང་རྒྱ་ཆེའི་ཆོས་ཀྱི་ཡང་ཞུན་མཆོག །ངེས་གསང་གདམས་པའི་དྲོད་རླངས་འཐུལ་བའི་བཅུད། །ཉམས་བཞེས་དགོངས་པའི་གྲུབ་གཉིས་དགའ་སྟོན་གྱིས། །བསྟན་འགྲོའི་
ཕན་བདེའི་སྤེལ་ཕྱིར་ཞབས་བརྟན་གསོལ། །མཆོག་གསུམ་རྒྱ་མཚོའི་ཐུགས་རྗེའི་འོད་སྣང་གིས། །བསྟན་འགྲོའི་རྒུད་མུན་མིང་མཐར་ཡོངས་བཏང་ནས། །རྫོགས་ལྡན་མགྲོན་དུ་འགུགས་བའི་དགེ་མཚན་གྱིས། །བསྟན་འགྲོའི་དབུ་འཕང་སྲིད་པའི་བླར་མཐོ་ཤོག །རང་བཞིན་ཡེ་དག་ཆོས་ཉིད་བདེན་པའི་སྟོབས། །བསླུ་མེད་ཆོས་ཅན་རྟེན་འབྲེལ་དགེ་བའི་མཐུས། །ཇི་ལྟར་སྨོན་པ་ཇི་བཞིན་ཡོངས་གྲུབ་ནས། །ལེགས་དགུའི་དཔལ་གྱིས་ཀུན་ནས་ཤིས་གྱུར་ཅིག །ཅེས་བསྐལ་བཟང་རྣམ་འདྲེན་ཡོངས་ཀྱི་ཕྲིན་ལས་གཅིག་ཏུ་བསྡུས་པ་མདོ་ཁམས་པ་རྫོགས་ཆེན་ལྔ་པ་རིན་པོ་ཆེའི་ཞབས་བརྟན་གསོལ་འདེབས་འདིའང་མཁས་མཙུན་གྲུབ་པའི་དབང་ཕྱུག་ནམ་མཁའ་ཚེ་དབང་མཆོག་གྲུབ་ཀྱི་རྡོ་རྗེའི་བདེན་ཚིག་བྱིན་རླབས་ཀྱི་སྤྲིན་ཕུང་འཕྲོ་བ་ལ། མཚན་གསར་འབུལ་དང་འབྲེལ་བར་སྐབས་སུ་བབས་པའི་ཚིགས་བཅད་ཟུང་གིས་ཁ་བསྐང་སྟེ་ཤཱཀྱའི་དགེ་སྦྱོང་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོ་པདྨ་མདོ་སྔགས་གླིང་པའི་སྡེས་གསོལ་བ་བཏབ་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། །