ཀུན་བཟང་འཇིགས་མེད་བསྟན་པའི་ཉི་མ་ཕྲིན་ལས་ཀུན་ཁྱབ་དཔལ་བཟང་པོའི་ཞབས་བརྟན།
ཨོཾ་སྭསྟི་སིདྡྷཾ། ཀུན་བཟང་འཇིགས་མེད་གྲུབ་པའི་ཡེ་ཤེས་འཕྲུལ། །བསྟན་པའི་ཉི་མ་རྒྱལ་བའི་མྱུ་གུ་ཆེ། །ཕྲིན་ལས་ཀུན་ཏུ་ཁྱབ་པའི་དཔལ་ལྡན་པ། །མཁས་བཙུན་བཟང་པོའི་མཆོག་ཏུ་འཚོ་གཞེས་གསོལ། །རྡོ་རྗེའི་གཟུགས་སྐུ་འཆི་མེད་མགོན་པོར་བརྟན། །ཕྱོགས་ལས་རྣམ་རྒྱལ་ལེགས་གསུང་སྲིད་ན་སྙན། །ཡིད་བཞིན་འདོད་པ་འཇོ་བའི་འཁོར་ལོའི་ཐུགས། །བསྐལ་པ་རྒྱ་མཚོར་མི་གཡོ་བརྟན་པར་བཞུགས། །ཚུལ་གནས་གསན་བསམ་སྒོམ་པའི་མཐར་སོན་ཅིང་། །རབ་འབྱམས་འཆད་རྩོད་རྩོམ་པའི་དགེ་མཚན་གྱིས།
ཐུབ་པའི་བསྟན་ལ་སྟོན་པ་གཉིས་པ་ཡི། །ལེགས་མཛད་ས་གསུམ་རྒྱས་པའི་བཀྲ་ཤིས་སྩོལ། ཅེས་གྲུབ་དབང་བླ་མ་རིན་པོ་ཆེའི་མཆོག་གི་སྤྲུལ་པའི་སྐུ་པདྨ་དཀར་པོ་ལྟ་བུར་བཞད་པ་ལས། །ཀུན་བཟང་འཇིགས་མེད་བསྟན་པའི་ཉི་མ་ཕྲིན་ལས་ཀུན་ཁྱབ་དཔལ་བཟང་པོ་ཞེས་པའི་མཚན་འབུལ་བརྟན་བཞུགས་དང་འབྲེལ་བའི་ཚིགས་སུ་བཅད་པ་བཀྲ་ཤིས་པའི་ལྷ་རྫས་དཀར་པོ། འཆི་མེད་སྐུ་གསུམ་ཐུགས་རྡོ་རྗེའི་སྣང་བརྙན། བཅས་དབང་བཅུའི་གྲངས་ལྡན་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་ཕུལ་བ་ཇི་ལྟར་སྨོན་པའི་དོན་ཐམས་ཅད་ཡོངས་སུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། །