བདུད་འདུལ་ནུས་ལྡན་རྡོ་རྗེའི་ཡེ་ཤེས་སྒྱུ་འཕྲུལ་དྲྭ་བའི་རྣམ་རོལ་རྗེ་དབོན་མཆོག་གི་སྤྲུལ་པའི་སྐུ་རིན་པོ་ཆེའི་ཞབས་བརྟན།
ཨོཾ་སྭསྟི་སིདྡྷཾ། ཀུན་ཏུ་བཟང་མོའི་རྡོ་རྗེའི་རྒྱལ་ཐབས་ལ། །དབང་བསྒྱུར་འཇིགས་མེད་ཆོས་ཀྱི་ཉི་མ་ཆེ། །ཕྲིན་ལས་ས་གསུམ་ཀུན་ཁྱབ་དཔལ་བཟང་པོའི། །ཞབས་པད་རྡོ་རྗེའི་ཁམས་སུ་བརྟན་གྱུར་ཅིག ༡ །ཚུལ་གནས་གསན་བསམ་སྒོམ་པའི་ཕ་མཐར་སོན། །མཁས་བཙུན་གྲུབ་པའི་ཡོན་ཏན་སྲིན་ན་བརྗིད། །འཆད་རྩོད་རྩོམ་པའི་རྣམ་ཐར་རྨད་བྱུང་བཞིན། གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༢ །དེ་ལྟར་གུས་པས་གསོལ་བ་བཏབ་པ་དང་། །རྩ་གསུམ་ཆོས་སྲུང་རྒྱ་མཚོའི་བྱིན་རླབས་ཀྱིས། །བསྟན་འཛིན་ཞབས་བརྟན་བཤད་སྒྲུབ་བསྟན་པ་རྒྱས། །ཕན་བདེའི་དགེ་མཚན་རྟག་ཏུ་སྣང་གྱུར་ཅིག ༣ །ཅེས་བདུད་འདུལ་ནུས་
ལྡན་རྡོ་རྗེའི་ཡེ་ཤེས་སྒྱུ་འཕྲུལ་དྲྭ་བའི་རྣམ་རོལ་རྗེ་དབོན་མཆོག་གི་སྤྲུལ་པའི་སྐུ་རིན་པོ་ཆེ་གང་ཉིད་ཕུན་སུམ་ཚོགས་པ་རྣམ་པ་ལྔའི་སྒོ་ནས་ལྷར་བཅས་བསྟན་འགྲོའི་དཔལ་མགོན་དམ་པར་སྤྱན་དྲངས་ཤིང་མངའ་གསོལ་བའི་སྐབས། བཀྲ་ཤིས་པའི་ལྷ་རེག །འཆི་མེད་སྐུ་གསུམ་ཐུགས་རྡོ་རྗེའི་སྣང་བརྙན། ༠ བཅས་རྟེན་འབྱུང་གི་རྫས་སུ་ཕུལ་བ་དང་། ཀུན་བཟང་འཇིགས་མེད་ཆོས་ཀྱི་ཉི་མ་ཕྲིན་ལས་ཀུན་ཁྱབ་དཔལ་བཟང་པོ་ཞེས་པའི་མཚན་འབུལ་ཞབས་བརྟན་སྨོན་ཚིག་དང་འབྲེལ་བ་འདིའང་། །མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གསོལ་བ་བཏབ་པ་ཇི་ལྟར་སྨོན་པའི་དོན་ཐམས་ཅད་ཡོངས་སུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ།། །།