བཀྲ་ཤིས་གང་ཞིང་དཔལ་ལྡན་བླ་མ་སོགས།
ཤྲཱི་བཱི་ཤྲཱི་སྭསྟི་བི་ཛ་ཡནྟུ། བཀྲ་ཤིས་གང་ཞིང་དཔལ་ལྡན་བླ་མ་དང་། །དབྱེར་མེད་རབ་འབྱམས་དཀྱིལ་འཁོར་ལྷ་ཚོགས་ཀྱིས། །རོལ་མོའི་སྒྲ་དང་མེ་ཏོག་ཆར་འབེབས་བཞིན། །ཁྱོད་ལ་རྟག་ཏུ་དགེ་ལེགས་སྦྱིན་གྱུར་ཅིག འཇམ་པའི་དབྱངས་བཞིན་བློ་གྲོས་མཆོག་གྱུར་པས། །ཆོས་ཀྱི་དབང་པོ་སྐལ་པ་ཕུན་སུམ་ཚོགས། །བདེ་ཆེན་འཆི་མེད་གྲུབ་པའི་དཔལ་དང་ལྡན། །བཟང་པོའི་ལེགས་མཛད་རྟག་ཏུ་འཕེལ་བར་ཤོག །སྲིད་ལས་ངེས་འབྱུང་སོ་ཐར་ཁྲིམས་ཀྱིས་བཙུན། གཞན་ཕན་བྱང་ཆུབ་སེམས་གཉིས་གཏིང་ནས་འབྱོངས། གསང་ཆེན་དབང་ཐོབ་དམ་ཚིག་རྣམ་པར་དག །རྡོ་རྗེ་འཛིན་པའི་མཆོག་ཏུ་གྲུབ་གྱུར་ཅིག །བཀའ་དྲིན་སུམ་ལྡན་རྗེ་བཙུན་བླ་མ་རྣམས། །བསམ་དང་སྦྱོར་བས་ཚུལ་བཞིན་བསྟེན་པ་ལས། །བྱིན་རླབས་བདུད་རྩིའི་རང་བཞིན་ལྷན་སྐྱེས་ཀྱི། །ཡེ་ཤེས་ཆེན་པོའི་དེ་ཉིད་མངོན་གྱུར་ཤོག །བསྐྱེད་རིམ་ཐབས་ཀྱིས་ཐ་མལ་སྣང་ཞེན་སྦྱངས། །རྫོགས་རིམ་ཟབ་མོས་རླུང་སེམས་དབུ་མར་ཐིམ། །བདེ་སྟོང་མཆོག་གི་དགྱེས་པའི་གར་མཛད་པས། །སྤྱོད་དང་ཉེ་རྒྱུའི་བརྟུལ་ཞུགས་རྫོགས་གྱུར་ཅིག །ཞི་སོགས་ལས་དང་གྲུབ་པ་ཆེན་པོ་བརྒྱད། །དབང་ཕྱུག་ཡོན་ཏན་དུ་མའི་སྒེག་འཆང་བས། །རིག་འཛིན་བྱེ་བའི་ཚོགས་དང་ལྷན་ཅིག་ཏུ། །ལམ་ལྔ་ས་བཅུ་མིག་འཕྲུལ་ལྟར་བགྲོད་ཤོག །མཐར་ཐུག་སྐུ་དང་ཡེ་ཤེས་དབྱེར་མེད་པ། །ཁ་སྦྱོར་བདུན་ལྡན་དཔལ་ལ་
རོལ་པ་དང་། །རྣམ་མང་སྤྲུལ་པའི་སྒྱུ་འཕྲུལ་དྲྭ་བ་ཡིས། །འགྲོ་ཀུན་བྱང་ཆུབ་ལམ་ལ་འགོད་གྱུར་ཅིག །མཁའ་འགྲོ་ཆོས་སྲུང་རྒྱ་མཚོའི་ཚོགས་ཀྱིས་སྐྱོངས། །ལམ་མཆོག་བསྒྲུབ་པའི་འགལ་རྐྱེན་ཀུན་བསལ་ནས། །མཐུན་རྐྱེན་རྒྱལ་བ་དགྱེས་པའི་དགེ་མཚན་གྱིས། །སྲིད་ཞིའི་ལེགས་ཚོགས་རྒྱས་པའི་བཀྲ་ཤིས་སྩོལ། །ཅེས་བོད་ཆེན་པོར་ལྗོངས་ཀྱི་བསྟན་འགྲོ་མཐའ་དག་ལ་བླ་ན་མེད་པའི་བཀའ་དྲིན་ཅན་ཤཱཀྱའི་སྲས་པོ་རྒྱལ་བའི་མྱུ་གུ་མཆོག་ཉིད་རྡོ་རྗེ་འཛིན་པའི་རྒྱལ་ཐབས་ཆེན་པོར་མངའ་གསོལ་བའི་སྐབས་་བཀྲ་ཤིས་པའི་ལྷ་རེག །ཐབས་ཤེས་ཟུང་འཇུག་དམ་ཚིག་གི་རྡོ་རྗེ་དང་དྲིལ་བུ། འཆི་མེད་བདུད་རྩིའི་བཅུད་ཀྱིས་གཏམས་པའི་བཞེས་སྤྱད་བཅས་རིག་པ་འཛིན་པའི་མིང་གིས་སྙན་པ་འཇམ་དབྱངས་མཁྱེན་བརྩེའི་དབང་པོས་བསམ་པ་དག་ཅིང་སྦྱོར་བ་གུས་པས་ཕུལ་དོན་དང་ལྡན་པར་བླ་མ་དང་དཀྱིལ་འཁོར་གྱི་ལྷ་ཚོགས་རྣམས་ཀྱིས་བྱིན་གྱིས་བརླབ་ཏུ་གསོལ།། །།