ལྷ་རྩེ་དབོན་བླ་མ་མཆོག་གིས་གསུངས་ངོར།
འཕགས་ཡུལ་གྲུབ་པའི་དབང་ཕྱུག་ཀུ་ཀུ་རི། །གངས་ཅན་རྣལ་འབྱོར་སྤྱོད་པ་ཐང་སྟོང་རྒྱལ། །དེང་འདིར་སུམ་ལྡན་རྡོ་རྗེ་འཛིན་པའི་ཚུལ། །ཡེ་ཤེས་རྒྱ་མཚོའི་ཞབས་ལ་གསོལ་བ་འདེབས། །སྐྱེ་ཞིང་སྐྱེ་བར་མགོན་པོ་མཆོག་ཁྱོད་ཀྱིས། །རྗེས་བཟུང་དམ་ཆོས་སྒྲུབ་པའི་བར་ཆད་ཞི། །ཉམས་རྟོགས་ཡོན་ཏན་ཡེ་ཤེས་གོང་འཕེལ་ནས། །འགྲོ་ཀུན་ཕྱམས་གཅིག་རྡོ་རྗེའི་སར་འགོད་ཤོག །ཅེས་པའང་ལྷ་རྩེ་དབོན་བླ་མ་མཆོག་གིས་གསུངས་ངོར་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ། །།འཇམ་པའི་དབྱངས་སོགས་སྲས་བཅས་རྒྱལ་ཀུན་གྱི། །མཁྱེན་བརྩེ་ནུས་པའི་ཡེ་ཤེས་གཅིག་བསྡུས་པ། །མཁས་གྲུབ་དབང་པོ་རྗེ་བཙུན་བླ་མ་མཆོག །བསྐལ་བརྒྱར་ཞབས་བརྟན་ཆོས་འཁོར་བསྐོར་གྱུར་ཅིག །དཔལ་ལྡན་བླ་མ་མཆོག་ལ་གསོལ་བཏབ་མཐུས། ཚེ་རབས་ཀུན་ཏུ་འབྲལ་མེད་རྗེས་བཟུང་ནས། །རང་གཞན་དོན་གཉིས་ལྷུན་གྱིས་གྲུབ་པ་དང་། །ཕན་བདེའི་དཔལ་འབྱོར་རྒྱས་པར་བྱིན་གྱིས་རློབས། །ཞེས་པའང་ལྷ་རྩེ་དབོན་བླ་མ་དམ་པས་གསུངས་ངོར་མཁྱེན་བརྩེའི་དབང་པོས་རང་ཉིད་ཀྱིས་སྨྲས་པ་དགེ་ཞིང་བཀྲ་ཤིས།། །།