ཁྱབ་བདག་འཁོར་ལོའི་མགོན་པོ་ལ་བསྔགས་པའི་གཏམ་ཉིན་མོར་བྱེད་པའི་འཁྲི་ཤིང་།
ཁྱབ་བདག་འཁོར་ལོའི་མགོན་པོ་ལ་བསྔགས་པའི་གཏམ་ཉིན་མོར་བྱེད་པའི་འཁྲི་ཤིང་ཞེས་བྱ་བ་བཞུགས་སོ། །ཀ་དག་གཟོད་ནས་རབ་ཞིའི་ཡེ་ཤེས་ཀྱང་། །ཁ་ཙམ་མ་ཡིན་ངེས་པ་ལྔ་ལྡན་སྐུར། །གུ་ལ་པ་དེར་བཞེངས་པའི་མཁྱེན་བརྩེའི་མཐུས། །ང་བདག་གདུང་སེལ་ཁྱབ་བདག་བླ་མར་འདུད། ༡ །ཅ་ཅོ་བྲལ་བའི་ངེས་གསང་མཐའ་དྲུག་རྒྱུ། །ཆ་མཐུན་མཁྱེན་པའི་སོར་མོས་བཀྲལ་བ་ལས། །ཇ་ཧོང་ལས་ལྡོག་བདེན་པ་གཉིས་ཀྱི་ཆོས། །ཉ་རྒྱས་ཀུ་མུད་འཛུམ་བཞིན་སྩོལ་ལ་འདུད། ༢ །ཏ་ལའི་ལྗོན་པའི་གྲིབ་བསིལ་ཡངས་པ་ལྟར། །ཐ་དད་མོས་པའི་རྗེས་འགྲོ་གཟུགས་སྐུའི་ཀླས། །ད་གཟོད་འཁྲུལ་པའི་མུན་པ་ཀུན་བཅོམ་སྟེ། །ན་མར་ཐར་པའི་ཨུཏྤལ་དཀར་པོ་བཞད། ༣ །པ་སངས་ལྟར་དཀར་སྨོན་འཇུག་བདུད་རྩིའི་རོས། །ཕ་རོལ་ཕྱིན་ལམ་ཆུ་སྐྱེས་ལ་བྲན་པས། །བ་མོར་ཉི་བཞིན་གཟུང་འཛིན་འཁྲུལ་པའི་དྲི། །མ་ལུས་སྦྱངས་པའི་འཛུམ་ཕྲེང་གསར་པར་དགོད། ༤ །ཙ་རི་ཏྲ་སོགས་གནས་ཡུལ་ཀུན་རྫོགས་པའི། །ཚ་གྲང་ཉི་ཟླ་མཉམ་རོལ་དབུ་མའི་མཐར། །ཛ་ཧུའི་རྒྱུན་ལྟར་ཞུ་བདེའི་བདུད་རྩི་ཡིས། །ཝ་ལྟར་ཉུལ་པའི་རླུང་
སེམས་དྷུ་ཏིར་རོལ། ༥ །ཞྭ་ཐོད་སྤངས་ཤིང་རལ་པའི་ཟུར་ཕུད་བྲལ། །ཟ་ལྟར་རྩུབ་པའི་དྲག་སྔགས་བཟླས་མིན་ཀྱང་། །འ་འུར་རྟོག་ཚོགས་ཀུན་བྲལ་བདེ་སྟོང་རོས། །ཡ་མཱནྟ་ཀ་ལ་སོགས་དམ་འོག་བཅུག ༦ །ར་ས་ན་སོགས་ཐབས་ཤེས་རྩ་མདུད་ཀུན། །ལ་ཀླུང་བྲལ་བའི་དབུ་མའི་ལམ་ཞུགས་པས། །ཤ་ཁྲག་འདུས་བྱས་ཟད་པའི་འོད་གསལ་སྐུར། །ས་བཅུའི་མངོན་པར་རྟོགས་པ་ཡོངས་སུ་རྫོགས། ༧ །ཧྭ་རིའི་ཙནྡན་གསར་པའི་ནགས་ཀླུང་ལྟར། །ཨ་ཏི་ཁྲེགས་ཆོད་སྐྱེ་མེད་རབ་ཞིའི་དོན། །ཟུང་འཇུག་ཆོས་ཀྱི་ཐིག་ལེར་རོ་གཅིག་པས། །སྲིད་པའི་ལམ་དུ་དུབ་ཀུན་ངལ་བསོར་བསྟེན། ༨ །དེ་སྐད་ཁྱབ་བདག་༼ འཁོར་ལོའི་མགོན་པོ་ལ། །བསྟོད་ཚིག་ཉིན་བྱེད་གཞོན་ནུའི་འཁྲི་ཤིང་གིས། །སྐལ་བཟང་དད་པའི་ཆུ་སྐྱེས་རབ་བཞད་དེ། །ཕན་བདེའི་དགའ་སྟོན་མཆོག་ལ་སྤྱོད་པར་ཤོག ༩ །སརྦ་སིདྡྷིན།།