བསླབ་པར་བྱ་བའི་གཏམ་ཀུ་མུད་གསར་པའི་ཆུན་པོ།
བསླབ་པར་བྱ་བའི་གཏམ་ཀུ་མུད་གསར་པའི་ཆུན་པོ་ཞེས་བྱ་བ། ཀ་ཡེ་གསོན་དང་ཐར་པར་བརྩོན་པ་དང་། །ཁ་ཙམ་མ་ཡིན་དམ་ཆོས་སྒྲུབ་འདོད་ན། །གངྒཱས་འདྲེན་པའི་གསེར་གྱི་བྱེ་མ་ལྟར། །ང་བདག་འདུལ་བའི་ལམ་བཟང་བརྟན་པར་བྱོས། ༡ །ཅ་ཅོ་སྨྲ་བ་མང་པོ་གཡེང་བའི་རྒྱུ། །ཆ་ལུགས་བསླབ་པ་གསུམ་དང་མཐུན་པ་གཅེས། །ཇ་ཆང་ཉོན་མོངས་རོ་ལ་རབ་ཆགས་ཀྱང་། །ཉ་མོ་འདམ་གྱིས་བསྡམས་འདྲའི་སྡུག་བསྔལ་འབྱུང་། ༢ །ཏུ་རུའི་ཚེར་མ་ལྟར་རྣོ་ཚིག་རྩུབ་དང་། །ཐ་མལ་ཉོན་མོངས་འཁྲུལ་པའི་གཡེང་བ་དག །ད་ནས་བཟུང་
སྟེ་ཀུན་ཏུ་བག་ཡོད་ཀྱི། །ན་མར་སྤངས་ལ་སྒོ་གསུམ་དགེ་བར་འབུངས། ༣ །པཱ་ར་མི་ཏ་དྲུག་པའི་སྙིང་པོ་ནི། །ཕ་རོལ་སྨན་པར་འདོད་པའི་བྱང་སེམས་ཏེ། །བ་ལང་ལྟ་བུའི་རྨོངས་པའི་དགྲ་ཟླ་ཡིས། །མ་དག་འཁོར་བར་བཅིངས་པར་མཁྱེན་འཚལ་ལོ། ༥ །ཙཱ་རུའི་ཞལ་ཟས་ལ་སོགས་མཆོད་པའི་རྒྱུ། །ཚ་གྲང་གདུང་བ་བཟོད་པར་རབ་བཞེངས་ཏེ། །ཛ་ཧུའི་རྒྱུན་བཞིན་ཐོག་མཐའ་བར་གསུམ་དུ། །ཝ་ལྟར་ཉུལ་ནས་སྐྱོན་རྣམས་བསལ་བར་བྱ། ༥ །ཞྭ་གོས་མཛེས་པར་རེར་ཡང་རྒྱགས་བའི་རྒྱུ། །ཟ་འོག་ཐག་ཏུ་བཏགས་ཀྱང་གཡེང་བའི་ལས། །འ་ཅག་ཕན་བར་མི་བགྱིད་དེ་ཡི་ཕྱིར། །ཡ་བྲལ་ལས་འདས་དབུ་མའི་དོན་ལ་བལྟ། ༦ །རྭ་ལྟར་མཐོ་བའི་རྒྱལ་སར་མ་སླེབས་ཀྱང་། །ལ་ཀླུང་ཉུལ་བའི་མུ་ཏོར་སླར་འགྱུར་ན། །ཤ་ཤཱ་ད་ནའི་རེག་བྱ་ལྟར་འཇམ་པའི། །ས་དང་ཕ་རོལ་ཕྱིན་པའི་ལམ་ལ་བསྙེན། ༧ །ཧ་ཅང་མི་འགྲུབ་བསྒྲུབ་པའི་དམ་བཅའ་བ། །ཨ་མཚར་ཙམ་དུ་མི་དགེར་ཕྱོགས་པ་ཡང་། །སོ་སོ་སྐྱེ་བོ་རྣམས་ཀྱི་ཁྱད་ཆོས་ཏེ། །ཐར་འདོད་དག་གིས་ཡུན་དུ་སྤངས་ན་ལེགས། ༨ །དེ་སྐད་བསླབ་པར་བྱ་བའི་ཟླ་ཤེལ་གྱིས། །མོས་ལྡན་ཐར་པའི་ཀུ་མུད་བཞད་པ་ལས། །ཕན་དང་བདེ་བའི་སྦྲང་རྩིའི་དོག་པ་ཡིས། །འགྲོ་ཀུན་སྲིད་ལས་ངལ་བསོ་བསྟེན་པར་ཤོག ༩ །སརྦ་མངྒ་ལཾ།།