སྐུ་ཡི་དབེན་གནས་བསྒྲགས་ཡང་རྫོང་དུས་དགྲའི་དབང་པོའི་ཕོ་བྲང་ལ་བསྔགས་པའི་གཏམ་རྡོ་རྗེ་སྒྲ་མའི་ཏམྦུ་ར།
སྐུ་ཡི་དབེན་གནས་བསྒྲགས་ཡང་རྫོང་དུས་དགྲའི་དབང་པོའི་ཕོ་བྲང་ལ་བསྔགས་པའི་གཏམ་རྡོ་རྗེ་སྒྲ་མའི་ཏམྦུ་ར་ཞེས་བྱ་བ། ན་མོ་གུ་རུ་མཉྫ་གྷོ་ཥ་ཀྲོ་དྷཱ་ཡ། གཟུང་འཛིན་སྤྲོས་པའི་ཡིད་སྲུབས་མཐར་མཛད་རྡོ་རྗེ་ཡེ་ཤེས་འབར་བའི་སྐུ། །ལན་གཅིག་སྣང་ཆར་འཛུམ་པའི་མོད་ནས་གྲུབ་པ་གཉིས་ཀྱི་མཆོག་སྦྱིན་པ། །ཧེ་རུ་ཀ་དཔལ་དུས་དགའི་དབང་པོའི་བྱིན་རླབས་ཉི་གཞོན་འཆར་ཀའི་གཟིས། །རྟེན་དང་བརྟེན་པའི་ངོ་མཚར་རབ་རྫོགས་རིག་འཛིན་དགྱེས་པའི་དགའ་ཚལ་འདིར། ༡ །འཆི་མེད་མཚོ་སྐྱེས་རྡོ་རྗེ་ཡབ་ཡུམ་དང་། །རྣམ་པར་སྣང་མཛད་སྲང་བ་ལ་སོགས་པའི། །འཕགས་རྣམས་ཞབས་སེན་བཀྲ་ཤིས་འཁོར་ལོས་མཚན། །བཀོད་པས་ངོ་མཚར་དཔྱིད་ཀྱི་དུས་སྟོན་རྫོགས། ༢ །ཁྱད་པར་འཇམ་དཔལ་ཁྲོས་པའི་ཡེ་ཤེས་ནི། །གཟུགས་ཅན་བཞིན་དུ་རྒྱུ་བའི་བརྟུལ་ཞུགས་ཅན། །གནུབས་ཆེན་ཞབས་ཀྱིས་སྲ་མཁྲེགས་བྲག་རིའི་ངོས། །ཕུར་པ་བཏབ་པའི་རྗེས་ཤུལ་ལམ་མེར་གསལ། ༣ །སླད་ནས་བདེ་སྟོང་འཕོ་མེད་གྲུབ་པའི་སྲོག །
ཟུང་འཇུག་མེ་ལོང་འཆང་བའི་རྡོ་རྗེ་ཅན། །འོད་གསལ་སྙིང་པོར་གཤེགས་པའི་གཟིམས་སྐྱིལ་གང་། །མཐོང་བའི་མོད་ནས་ཚེ་འདིའི་སྣང་ཞེན་འགགས། ༤ །གཞན་ཡང་ཆོས་ཀུན་སྡོམ་པ་གཅིག་པུའི་དབྱིངས། །དུ་མའི་གར་དུ་སྣང་བའི་རོལ་མོ་ནི། །ཚུར་མཐོང་བྱིས་བློའི་ངོར་ཡང་མི་སྦེད་པར། །རྡོ་རྗེ་གསུམ་གྱི་ཕྱག་རྒྱར་གཅིག་ཏུ་འབར། ༥ །དེ་སླད་མི་ཕྱེད་དད་པའི་བདུད་རྩི་ཡི། །རབ་བརླན་སྐལ་བཟང་གཞོན་ནུའི་ཨུཏྤ་ལས། །དངོས་ཡིད་མཆོད་པའི་སྤྲིན་གྱི་མཚར་སྡུག་གིས། །སྲས་བཅས་རྒྱལ་ཀུན་དགྱེས་པ་བསྐྱེད་པ་དང་། ༦ །གཉིས་སྣང་དྲེགས་པ་སྡེར་བཅས་དྷཱ་ཏིའི་དབྱིངས། །འཇོམས་བྱེད་ཁྲག་འཐུང་དབང་པོའི་དཀྱིལ་འཁོར་དུ། །བདེ་སྟོང་ཚོགས་ཀྱི་འདུ་བས་ཕྱི་ནང་གཞན། །དབྱེར་མེད་མཆོད་པའི་རྣལ་འབྱོར་གཡར་དམ་བླངས། ༧ །དེ་ལས་བསོད་ནམས་དྲི་མེད་རྫོགས་པའི་ཟླ། །ཅུང་ཟད་ཐོབ་པས་ཡིད་ཅན་མ་ལུས་ཀུན། །གནས་སྐབས་མཐར་ཐུག་བདུད་བཞིའི་མུན་བཅོམ་ནས། །གཤིན་རྗེ་མཐར་བྱེད་ཚེ་འདིར་འགྲུབ་གྱུར་ཅིག །གཞན་ཡང་གངས་ཅན་རི་བོའི་སྨན་ལྗོངས་འདིར། །དུས་ཀྱི་རྒུད་པ་མཐའ་དག་ཉེར་ཞི་ནས། །བསྟན་དང་འགྲོ་བའི་བདེ་སྐྱིད་རྫོགས་ལྡན་སྤྲིན། །རྒྱས་པར་དཀྲིགས་པའི་དུས་སྟོན་ཡོལ་མེད་ཤོག ༩ །གང་ཞིག་འཕོ་བའི་རླནོ དང་བྲལ་ཡང་ཁ་སྦྱོར་བདུད་རྩིས་
བཏང་མིན་པས། །སྲིད་པའི་སྦྱོར་བ་མཐར་བྱས་པ་ཡང་ཞི་བའི་ཕ་རོལ་ལས་འདས་པ། །ཧེ་རུ་ཀ་དཔལ་ཡེ་ཤེས་ལུས་ཅན་གྲོང་ཁྱེར་གསུམ་གྱི་ཐོར་ཚུགས་རྩེར། །འཇམ་དང་འབར་རྒྱས་ཆགས་པའི་གར་གྱིས་ལྷ་དགེ་མཚན་སྣང་བ་རྫོགས་གྱུར་ཅིག ༡༠ །ཅེས་པའང་རྒྱལ་ཁམས་ཉུལ་བའི་བྱ་བྲལ་བ་གཞོན་ནུ་ཨ་བྷཱ་ཡས་གྲུབ་པའི་གྲོང་ཁྱེར་ཆེན་པོ་དེ་ཉིད་དུ་གནས་འབྲེལ་ལ་ལྷགས་པའི་ཚེ་གསོལ་བ་བཏབ་པ་སིདྡྷི་རསྟུ།།