གསུང་གི་དབེན་གནས་དཔལ་གྱི་བསམ་ཡས་མཆིམས་ཕུ་ལ་བསྔགས་པའི་གཏམ་རྡོ་རྗེ་སྒྲ་མའི་གླུ་དབྱངས།
༈ གསུང་གི་དབེན་གནས་དཔལ་གྱི་བསམ་ཡས་མཆིམས་ཕུ་ལ་བསྔགས་པའི་གཏམ་རྡོ་རྗེ་སྒྲ་མའི་གླུ་དབྱངས་ཞེས་བྱ་བ། ན་མོ་གུ་རུ་པདྨ་ཀྲོ་དྷ་ཡ། སྲོག་རྩོལ་བྱེད་པ་དྷུ་ཏིར་སིམ་པས་གཞོམ་དུ་མེད་པའི་ནཱ་དའི་དབྱངས། །རྒྱལ་བ་རྣམས་ཀྱི་གསུང་གི་མངོན་བརྗོད་ཟུང་འཇུག་རྡོ་རྗེའི་སྣང་བརྙན་ཅན། །འོད་གསལ་སྙིང་པོའི་དཔྱིད་དཔལ་ལ་ཆགས་བརྟན་གཡོ་ཀུན་ལ་ཁྱབ་པའི་ཚུལ། །འོག་མིན་དཔལ་གྱི་མཆིམས་ཕུ་ཉིད་ཅེས་བསྔགས་བརྗོད་མེ་ཏོག་ཉིན་བཞིན་འཐོར། ༡ །གྲུབ་པའི་ཅོད་པན་ནོར་བུའི་མེ་ལོང་གིས། །ཞབས་ཀྱི་པདྨོ་མཛེས་བྱས་རིག་འཛིན་མཆོག །སངས་རྒྱས་གཉིས་བའི་བྱིན་རླབས་སྣང་བ་ཡིས། །ངོ་མཚར་བཀོད་པ་དུ་མའི་དགེ་མཚན་འབར། ༢. །ལྷག་པར་རྒྱུ་ཡི་སྟོབས་ཅན་སྐལ་བཟང་ཚོགས། །ཡེ་ཤེས་ཀློང་དགུའི་ཕྱག་རྒྱར་ངལ་འཚོ་བའི། །རང་བྱུང་རྡོ་རྗེའི་བྲག་གི་ཀེའུ་ཚང་། །དཔལ་ཆེན་འཁོར་བཅས་དགྱེས་པའི་ཕོ་བྲང་དངོས། ༣ །གཡས་གཡོན་ཡེ་ཤེས་ཌཱ་ཀའི་ཚོགས་ཀྱི་
དཔྱིད། །བདེ་སྟོང་བརྟུལ་ཞུགས་བདུད་རྩིས་བསྐྱེད་བསྲིངས་པའི། །གནས་འདི་ཉི་ཤུ་རྩ་བཞིའི་ཡུལ་མཆོག་དང་། །མཚུངས་པའི་བསྔགས་བརྗོད་རྡོ་རྗེའི་དབྱངས་སུ་སྙན། ༤ །གཞན་ཡང་དབང་ཆེན་གྲུབ་པའི་སློབ་དཔོན་དང་། །དཔལ་གྱི་སེང་གེ་རིན་ཆེན་མཆོག་ལ་སོགས། །རྫུ་འཕྲུལ་མཆོག་བརྙེས་དུ་མའི་རྣམ་པར་ཐར། །སྲིད་ན་སྙན་པའི་གཏམ་གྱི་ཡི་གེས་བརྗིད། ༥ །སླད་ནས་ཡེ་ཤེས་སྐུ་ཅན་ཀློང་ཆེན་པས། །འོད་གསལ་སྙིང་ཏིག་སེང་གེའི་སྒྲ་བསྒྲགས་པའི། །མོད་ལ་དབང་པོ་རྣོན་བོའི་གདུལ་བྱའི་ཚོགས། །སྣང་བཞིའི་ཕ་མཐར་གཤེགས་པའི་བརྟུལ་ཞུགས་བཟུང་། ༦ །དེ་སླད་ཕྱི་ལྟར་སྤྲུལ་པའི་ས་སྤྱོད་དེ། །ནང་ལྟར་འཆི་མེད་པདྨ་དྲྭ་བའི་ཞིང་། །གསང་བ་འོག་མིན་ཆོས་དབྱིངས་ཕོ་བྲང་དང་། །དབྱེར་མེད་བསྔགས་བརྗོད་ནོར་བུའི་རྒྱུད་མང་འཁྲོལ། ༧ །གང་ཕྱིར་དད་པའི་དཔྱིད་ཀས་བཟུང་བ་ཡི། །བུང་བ་གཞོན་ནུའི་གཟུགས་ཀྱང་ཕྱོགས་འདི་རུ། །འབད་པས་བསྙེན་དང་མཆོད་པའི་སྤྲིན་ཕུང་གིས། །རྩ་གསུམ་རྒྱ་མཚོའི་ཚོགས་རྣམས་དགྱེས་པ་བསྐྱེད། ༨ །ལྷག་པར་ཟུང་འཇུག་ཡེ་ཤེས་དཔལ་ཆེན་པོ། །སྒྲུབ་སྡེ་བརྒྱད་ཀྱི་རྡོ་རྗེའི་རྣལ་འབྱོར་དང་། །ཕྱི་ནང་གཞན་གསུམ་མཆོད་ཅིང་བསྙེན་པ་ཡི། །སྐལ་བ་དགེ་བའི་ཕུན་ཚོགས་མངོན་དུ་གྱུར། ༩ །དེ་ལས་རྣམ་པར་དཀར་བའི་ས་བོན་ནི། །བྱང་
ཆུབ་སྙིང་པོའི་ཚལ་དུ་སྨིན་པ་ལས། །ཕན་བདེའི་འབྲས་བུར་རྫོགས་པའི་གྲགས་སྙན་གྱིས། །སྲིད་པ་གསུམ་ན་ཀུན་ཏུ་མཛེས་གྱུར་ཅིག ༡༠ །ཅེས་པའང་རིག་འཛིན་གྲུབ་པས་བརྟེན་པའི་སྨན་ལྗོངས་ཉམས་དགའ་བ་དེ་ཉིད་དུ་རྒྱལ་ཁམས་ཕྱོགས་མེད་ཉུལ་བའི་བུང་བ་གཞོན་ནུ་ཞིག་གིས་གསོལ་བ་བཏབ་པ་ཤུབྷོ།།