བློ་གསལ་བསླབ་བྱ་ལ་སྐུལ་པའི་གཏམ་གཞན་ལ་ཕན་པའི་བདུད་རྩི།
བློ་གསལ་བསླབ་བྱ་ལ་སྐུལ་པའི་གཏམ་གཞན་ལ་ཕན་པའི་བདུད་རྩི་ཞེས་བྱ་བ། ན་མོ་གུ་རུ་བྷུ ཀྭ་ཡེ་གསོན་དང་བློ་ལྡན་གྲོགས་པོ་དག །ཁ་
ཙམ་མ་ཡིན་དམ་ཆོས་བསྒྲུབ་འདོད་ན། །ག་རུ་མཆིས་ཀྱང་ལམ་སྟོན་བཤེས་གཉེན་མཆོག །ང་རྒྱལ་སྤངས་ཤིང་རྩེ་གཅིག་གུས་པས་བསྙེན། །ཅ་ག་ཟང་ཟིང་ནོར་གྱིས་མི་མཚོན་པའི། །ཆ་ལུགས་ཆོས་མཐུན་དལ་འབྱོར་རྟེན་ཐོབ་ནས། །ཇ་ཆང་འདོད་ཡོན་འདུ་འཛིར་མ་ཆགས་པར། །ཉ་གང་ཟླ་བཞིན་ཡོན་ཏན་རྫོགས་པར་མཛོད། །ཏཱ་ལའི་ནགས་འདབས་ལ་སོགས་དབེན་པ་དང་། །ཐ་དད་སྤྱོད་ཡུལ་གྲོང་དུ་གནས་ཀྱང་རུང་། །ད་གཟོད་ཙ་ན་ནམ་འཆི་ངེས་མེད་ཅེས། །ན་མར་འདུས་བྱས་ངང་ཚུལ་དྲན་པར་བྱ། །པཱ་ར་མི་ཏའི་དམ་ཆོས་མ་བསྒྲུབས་ན། །ཕ་རོལ་ལས་ཀྱི་རྗེས་སུ་འབྲང་བའི་ཕྱིར། །བ་མཆོག་དཔག་བསམ་ཤིང་དང་བུམ་བཟང་ལྟར། །མ་ལུས་འདོད་འབྱུང་བསོད་ནམས་རྒྱ་ཆེར་སྤེལ། །ཙ་ཀྲ་ལྟ་བུར་འཁོར་བའི་ཁམས་གསུམ་འདིར། །ཚ་གྲང་ལ་སོགས་སྡུག་བསྔལ་མི་ཟད་པས། །ཛ་ཧུའི་རྒྱུན་བཞིན་ངེས་པར་འབྱུང་བའི་སེམས། །ཝ་ལྟར་རི་སུལ་འགྲིམས་ནས་རྟག་ཏུ་བསྒོམ། །ཞྭ་བཞིན་བླ་མ་དཀོན་མཆོག་གཙུག་ཏུ་བཀུར། །ཟ་ལྟར་རྩུབ་པའི་བསམ་སྦྱོར་རིང་དུ་སྤོངས། །འ་ཅག་ཁོ་ན་ཙམ་མིན་གཞན་དོན་ཕྱིར། །ཡ་བྲལ་མ་ཡིན་བྱང་ཆུབ་སེམས་གཉིས་བསྐྱེད། །ར་མ་ཎ་བཞིན་སྙིང་སྟོབས་ཆེར་བཟུང་ནས། །ལ་ལ་ཙམ་མིན་རྣམ་ཀུན་ཆོས་སྤྱོད་བཅུ། །ཤ་སྟག་འབད་ན་དལ་འབྱོར་དོན་ལྡན་ཞིང་། །ས་གསུམ་
སྙན་པའི་རོལ་མོས་ཁྱབ་པར་འགྱུར། །ཧ་ཅང་ཚིག་དོན་སྦྱོར་བ་མ་མཆིས་མོད། །སྙིང་ནས་ཕན་པའི་བསམ་པས་གདམས་པ་འདིས། །ཨ་ཡིག་སྐྱེ་མེད་དོན་གྱི་འཇམ་པའི་དབྱངས། །མཐའ་ཀླས་ཡིད་ཅན་ཀུན་ཟླ |གྱིས་རྟོགས་གྱུར་ཅིག །ཅེས་པ་འདི་ཡང་བྱ་བྲལ་བ་མཁྱེན་བརྩེའི་དབང་པོས་རང་ཉིད་ལ་ལྟོས་པ་རྣམས་ཀྱི་ཆེད་དུ་སྙིང་ནས་ཕན་པའི་ཡིད་ཀྱིས་གདམས་པ་དགེ་ལེགས་སུ་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་སྟུ།། །།