རྟོགས་པ་བརྗོད་པའི་ཚིགས་སུ་བཅད་པ་གཞན་གསོས་མགྲིན་གླུ།
རྟོགས་པ་བརྗོད་པའི་ཚིགས་སུ་བཅད་པ་གཞན་གསོས་མགྲིན་གླུ་ཞེས་བྱ་བ། ཤྲཱི་བཱི་ཛ་ཡནྟུ། རིང་མོ་ཉིད་ནས་བསོད་ནམས་དཔག་ཡས་ཡེ་ཤེས་དམ་པའི་མཐུས་བཟུང་ནས། །འཇམ་མགོན་བླ་མའི་བྱིན་རླབས་དཔྱིད་ཀ་གཟུགས་ཅན་བཞིན་དུ་དར་བ་ན། །མཁས་པས་བསྔགས་འོས་གང་གི་རྒྱུད་མང་རྣམ་དཔྱོད་འགྱུར་ཁུག་སྟོང་ལྡན་པས། །ཆོས་ཀྱི་མདུན་ས་ལྷག་པར་མཛེས་སྟེར་ཚུལ་འདི་སུ་ཡིས་ཕྱག་འོས་མིན། །དྲི་མེད་འོ་མཚོ་བསྲུབས་པའི་ཟླ་བ་ཡང་། །ཤིང་རྟའི་ཕྱི་བཞིན་འགྲོ་བ་གཞན་ཡིན་ཏེ། །ཞི་བས་མི་འཕྲོག་སྙིང་རྗེས་བརླན་པའི་ཡིད། །སྲིད་ན་འཇུག་འདི་སུ་ཡིས་ཕྱག་འོས་མིན། །བསླབ་གཞིའི་ས་ཧཱ་ཀ་རའི་ནགས་ཀླུང་དང་། །འགྲོགས་པའི་ཐོས་མང་ག་བུར་འདབ་མའི་རྡུལ། །གང་དུ་འབབས་པས་གདུང་བ་ཀུན་འཕྲོག་པའི། །སྨན་མཛད་མཆོག་འདི་སུ་ཡིས་ཕྱག་འོས་མིན། །ཕྱི་ནང་གཙུག་ལག་རྒྱ་མཚོ་གང་དང་གང་། །དེ་དེར་རིག་ཚུལ་དྲི་མེད་བཏུང་བ་ན། །
ཚིག་དང་དོན་བཅས་འཁྲུལ་མེད་དཔྱད་པའི་མཐའ། །བདེ་བླག་རྫོགས་འདི་སུ་ཡིས་ཕྱག་འོས་མིན། །ནང་གི་ལམ་ནས་སྲིད་པའི་ཕྲ་རྒྱས་ཀུན། །ཏིང་འཛིན་མཐུ་ཡིས་ཟིལ་མནན་ཉིན་མོར་བྱེད། །ཟག་མེད་ཆོས་ཁམས་རྒྱ་མཚོ་འདུ་བྱེད་པའི། །སྣང་སྟེར་མཆོག་འདི་སུ་ཡིས་ཕྱག་འོས་མིན། །གང་ཡང་ཚངས་པའི་བུ་མོའི་ཏམྦུར། །མགྲིན་པའི་པདྨོར་ལྷན་སྐྱེས་ཉིད་གྱུར་པས། །སྙན་འགྱུར་མཐའ་དག་རྫོགས་པའི་ལེགས་བཤད་གཏམ། །འཛད་མེད་འཇོ་འདི་སུ་ཡིས་ཕྱག་འོས་མིན། །ཨེ་མ་ཚིག་གི་ཟེག་མ་རེར། །དོན་བཟང་ཟིལ་དངར་འབུམ་འཇོ་བས། །འདི་ཡང་ཉེ་བའི་ཨུཏྤ་ལ། །གདུང་སེལ་དམ་པའི་དཔྱིད་དུ་སྤྲོས། །སརྦ་དཱ་མངྒ་ལཾ་བྷ་ཡེ་ཏ།།