སྐྱེ་ཕྲེང་གསོལ་འདེབས་བྱིན་རླབས་དཔལ་སྟེར།
སྐྱེ་ཕྲེང་གསོལ་འདེབས་བྱིན་རླབས་དཔལ་སྟེར་ཅེས་བྱ་བ་བཞུགས་སོ། །གདོད་ནས་སྐུ་བཞིའི་ངོ་བོར་བྱང་ཆུབ་ཀྱང་། །གདུལ་བྱའི་སྣང་ངོར་འཇམ་དབྱངས་གཞོན་ནུའི་ཚུལ། །མཁྱེན་བརྩེའི་སྒྱུ་འཕྲུལ་དྲྭ་བའི་སྐུར་སྟོན་པ། །རྒྱལ་སྲས་བྱེ་བའི་དབང་པོར་
གསོལ་བ་འདེབས། །སྐུ་ཡི་རིག་འཛིན་མཉྫ་ཤྲཱི་མི་ཏྲ། །རྡོ་རྗེའི་སྐུ་བརྙེས་དྲི་མེད་བཤེས་གཉེན་སོགས། །དངོས་གཅིག་དུ་མའི་ཚུལ་སྣང་འཕགས་ཡུལ་གྱི། །པཎ་གྲུབ་རྒྱ་མཚོར་ཤར་ལ་གསོལ་བ་འདེབས། །གངས་ཅན་བསྟན་པའི་ཤིང་རྟ་ཁྲི་སྲོང་ཞབས། །རྗེ་བཙུན་གྲགས་པ་རས་ཆུང་རྡོ་རྗེ་གྲགས། །ཉང་རལ་ཆོས་དབང་ཀུན་མཁྱེན་ཆོས་རྗེ་སོགས། །བསྟན་འཛིན་དུ་མར་སྣང་ལ་གསོལ་བ་འདེབས། །མདོར་ན་དག་པའི་རྣམ་རོལ་བགྲང་ཡས་ལས། །རིས་མེད་བསྟན་པ་རྒྱ་མཚོའི་སྲོག་བཟུང་ཞིང་། །འགྲོ་ལ་ཕན་བདེ་སྩོལ་བའི་ཕྲིན་ལས་ཅན། །དཔལ་ལྡན་བླ་མའི་ཞབས་ལ་གསོལ་བ་འདེབས། །དེ་ལྟར་མི་ཕྱེད་གུས་པས་གསོལ་བཏབ་མཐུས། །འཇམ་དབྱངས་བླ་མས་རྟག་ཏུ་རྗེས་བཟུང་ནས། །བར་ཆད་ཀུན་ཞི་བསམ་སྦྱོར་ཆོས་བཞིན་འགྲུབ། །རང་གཞན་དོན་གཉིས་འཕེལ་བའི་བཀྲ་ཤིས་ཤོག །ཅེས་པའང་དད་ལྡན་ཆབ་མདོ་དབུ་མཛད་བསོད་ནམས་རྒྱལ་པོས་ཆེད་དུ་བསྐུལ་བའི་ངོར། རང་ལ་སྔོན་གྱི་གནས་རྗེས་སུ་དྲན་པའི་མངོན་པར་ཤེས་པ་མ་མཆིས་ཀྱང་། དུས་གསུམ་ཀུན་མཁྱེན་པདྨ་སཾ་བྷ་ཝ་དང་། འཇིག་རྟེན་དབང་ཕྱུག་ཀརྨ་པ་བཅུ་བཞི་པ་སོགས་སྐྱེས་བུ་དམ་པ་རྣམས་ཀྱིས་དགོངས་པ་ཅན་གྱིས་རྡོ་རྗེའི་གསུང་གིས་དབུགས་དབྱུང་བའི་རྗེས་སུ་འབྲངས་ཏེ་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོ་རང་ཉིད་ཀྱིས་སྨྲས་པ་དོན་དང་ལྡན་པར་གྱུར་ཅིག།