ཆབ་མགར་པུཎྱ་རཱ་ཛ་ལ་གནང་བའི་ཞལ་གདམས་གསོལ་འདེབས་བཀྲ་ཤིས་མཚན་གྱི་སྣང་བ།
ཨོཾ་སྭ་སྟི། བཀྲ་ཤིས་མཚན་གྱི་སྣང་བ་ཆ་རེས་ཀྱང་། །སྲིད་ཞིའི་རྒུད་པའི་མུན་པ་དྲུང་འབྱིན་པའི། །བསྐལ་བཟང་སྒྲོན་མེ་བཞི་པ་ཤཱཀྱའི་ཏོག །ཐུབ་མཆོག་དོན་ཀུན་གྲུབ་ལ་ཕྱག་འཚལ་ལོ། །འདི་ནས་བཟུང་སྟེ་རྣམ་མཁྱེན་སྙིང་པོའི་བར། །གུས་པས་སྐྱབས་མཆི་ལུས་དང་ལོངས་སྤྱོད་འབུལ། །སྡིག་ལྟུང་ཀུན་བཤགས་དགེ་ལ་རྗེས་ཡི་རངས། །ཆོས་འཁོར་བསྐོར་བཞིན་རྟག་པར་བཞུགས་གསོལ་འདེབས། །འགྲོ་ཀུན་དོན་དུ་སྨོན་འཇུག་མཆོག་སེམས་བསྐྱེད། །བདག་དང་མཐའ་ཡས་སེམས་ཅན་མ་ལུས་རྣམས། །བཅོམ་ལྡན་ཁྱེད་ཀྱིས་བརྩེ་བས་རྗེས་བཟུང་ནས། །ཚེ་རབས་ཀུན་ཏུ་བྱིན་གྱིས་བརླབས་པ་དང་། །སྔོན་ཚེ་གདུལ་བྱའི་དོན་དུ་ཐུགས་བསྐྱེད་ནས། །སྨོན་ལམ་ཆེན་པོ་ལྔ་བརྒྱ་བཏབ་པ་ཡི། །བདེན་པའི་འབྲས་བུ་མངོན་སུམ་སྣང་མཛད་དེ། །བདག་གཞན་རྒྱུད་ལ་འབྱོར་པར་བྱིན་གྱིས་རློབས། །གནས་སྐབས་ཆོས་བཞིན་སྤྱོད་པའི་འགལ་རྐྱེན་ཞི། །ཚེ་བསོད་དཔལ་འབྱོར་ལུང་རྟོགས་ཤེས་རབ་འཕེལ། །མཐར་ཐུག་བདེ་བ་ཅན་གྱི་ཞིང་སྐྱེས་ནས། །མྱུར་དུ་བྱང་ཆུབ་གོ་འཕང་ཐོབ་པར་ཤོག །ཅེས་པའང་སྐབས་གསུམ་དབང་པོའི་སྣ་ཚོགས་ལས་
པ་དང་རྗེས་སུ་མཐུན་པའི་སྒོ་ནས་སྤྲུལ་པའི་སྐུའི་འདུ་བྱེད་ལ་མཁས་པ་པུཎྱ་རཱ་ཛ་སོགས་ཀྱིས་ངོས་ནས་ཕུལ་པའི་སྟོན་མཆོག་ཐུབ་པའི་དབང་པོའི་སྣང་བརྙན་རྒྱ་གར་མ་ཡིད་བཞིན་བསམ་འཕེལ་ལ་ཕྱག་མཆོད་གསོལ་བ་འདེབས་པའི་ཆེད་དུ་བསྐུལ་བ་ལྟར་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དགེ་ལེགས་འཕེལ།། །།