བླ་བོ་དགོན་གྱི་དགེ་འདུན་རྣམས་ལ་གནང་བའི་ཞལ་གདམས།
ཕྱོགས་བཅུའི་སངས་རྒྱས་ཆོས་དང་འཕགས་པའི་ཚོགས། །རྩ་གསུམ་སྲུང་མ་ཀུན་འདུས་ངོ་བོ་ཉིད། །རིགས་ཀུན་ཁྱབ་བདག་དྲིན་ཅན་བླ་མ་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །དལ་འབྱོར་རྙེད་དཀའ་ནམ་འཆི་ངེས་མེད་དྲན། །བློ་སྣ་ཆོས་ལ་འགྱུར་བར་བྱིན་གྱིས་རློབས། །ལས་འབྲས་བསླུ་མེད་འཁོར་བའི་ཉེས་དམིགས་མཐོང་། །དམ་ཆོས་ལམ་དུ་འགྲོ་བར་བྱིན་གྱིས་རློབས། །བྱམས་དང་སྙིང་རྗེ་སྨོན་འཇུག་བྱང་སེམས་འབྱོངས། །ལམ་གྱི་འཁྲུལ་པ་ཞི་བར་བྱིན༔ གཟུང་འཛིན་ལས་འདས་དོན་དམ་བྱང་སེམས་རྟོགས། །འཁྲུལ་སྣང་དབྱིངས་སུ་ཐིམ་པར་བྱིན༴ སེམས་དང་སེམས་བྱུང་འཇུག་པ་དབྱིངས་སུ་ཞི། །རྩེ་གཅིག་
ཏིང་འཛིན་བརྟན་པར་བྱིན༴ ཉམས་སུ་མྱོང་ཡང་མཚོན་བརྗོད་ལས་འདས་པའི། །སྤྲོས་བྲལ་གནས་ལུགས་མཐོང་བར་བྱིན༔ སྣང་སེམས་དབྱེར་མེད་འོད་གསལ་ཕྱག་རྒྱ་ཆེ། །རོ་གཅིག་མངོན་དུ་འགྱུར་བར་བྱིན༴ མཉམ་རྗེས་ལས་འདས་ཁོར་ཡུག་ཆོས་སྐུའི་ཀློང་། །སྒོམ་མེད་འབྲས་བུ་འགྲུབ་པར་བྱིན༴ མདོར་ན་བདག་སོགས་མཐའ་ཡས་སེམས་ཅན་ཀུན། །ཚེ་འདིར་ཚེ་རིང་ནད་མེད་ཉམས་རྟོགས་འཕེལ། །ཕྱི་མ་བདེ་བ་ཅན་གྱི་ཞིང་སྐྱེས་ནས། །མྱུར་དུ་བྱང་ཆུབ་ཐོབ་པར་བྱིན་གྱིས་རློབས། །ཞེས་པའང་སྒྲུབ་བརྒྱུད་སྙིང་པོའི་རིང་ལུགས་འཛིན་པ་བླ་བོ་དགོན་གྱི་བླ་མ་དགེ་འདུན་རྣམས་ནས་གསུང་ངོར། ཞལ་གདམས་གསོལ་འདེབས་སྨོན་ལམ་དང་འབྲེལ་བ་འདིའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དོན་དང་ལྡན་པར་གྱུར་ཅིག། །།