ཨོ་རྒྱན་རབ་དགའ་ལ་གནང་བའི་གསོལ་འདེབས་རང་རིག་གཉུག་མ།

༈ ཨེ་མ་ཧོ༔ རང་རིག་གཉུག་མའི་དབྱིངས་ལས་ཡེ་ཤེས་སྐུ། །རིགས་ཀུན་ཁྱབ་བདག་པདྨ་མདོ་སྔགས་གླིང་། །གུ་རུ་བདེ་བ་ཆེན་པོའི་རྣམ་པར་ཤར། །སྤྱི་བོའི་པདྨོར་འབྲལ་མེད་རྟག་ཏུ་བཞུགས། །བདག་ལ་སྐྱབས་གནས་ཁྱེད་ལས་མ་དམིགས་ཕྱིར། །སྙིང་ནས་གསོལ་བ་འདེབས་པའི་དད་ལྡན་ལ། །ཕ་ཡིས་བྱིན་གྱིས་རློབས་ཤིག་བླ་མ་རྗེ། །བུ་ལ་མོས་གུས་སྩོལ་ཅིག་ཐུགས་རྗེའི་གཏེར། །འདི་ཕྱི་བར་དོ་ཀུན་ཏུ་རྗེས་སུ་ཟུངས། །དོན་གཉིས་ལྷུན་གྱིས་གྲུབ་པར་མཛད་དུ་གསོལ། །ཨོཾ་ཨཱཿཧཱུྃ་བཛྲ་གུ་རུ་མ་ཧཱ་སུ་ཁ་སིདྡྷི་ཧཱུྃ། ཞེས་པའང་སྙིང་པོའི་སྒྲུབ་ལ་གཞོལ་བའི་རྣལ་འབྱོར་པ་ཨོ་རྒྱན་རབ་དགའི་བཞེད་པས་ནན་ཏན་དུ་བསྐུལ་བ་ལྟར་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག། །།