ཞབས་བརྟན་རང་བྱུང་གདོད་མ།
༈ །།ཤྲཱི་བཱི་ཤྲཱི་སིདྡྷི་ཛ་ཡནྟ། རང་བྱུང་གདོད་མའི་སངས་རྒྱས་ཆོས་ཀྱི་སྐུ། །འོད་གསལ་ཡེ་ཤེས་ལྔ་ལྡན་ལོངས་སྤྱོད་རྫོགས། །གང་འདུལ་རྣམ་པར་འཕྲུལ་པས་དོན་མཛད་པ། །རིགས་བརྒྱའི་
ཁྱབ་བདག་ཆེན་པོ་ཞབས་བརྟན་གསོལ། །སངས་རྒྱས་ཀུན་དངོས་དམ་ཆོས་འབྱུང་བའི་གནས། །འཕགས་ཚོགས་རིས་སུ་མ་ཆད་འདྲེན་པ་སྟེ། །མཆོག་གསུམ་ཀུན་འདུས་སུམ་ལྡན་བཀའ་དྲིན་ཅན། །ཐར་ལམ་སྣང་བའི་སྒྲོན་མེ་ཞབས་བརྟན་གསོལ། །རྒྱུད་གསུམ་བླ་མ་ཀུན་དངོས་བྱིན་རླབས་གཏེར། །དཀྱིལ་འཁོར་རྒྱ་མཚོའི་དབང་ཕྱུག་འཁོར་ལོའི་མགོན། །ཕྲིན་ལས་རབ་འབྱམས་བདག་ཉིད་མཁའ་འགྲོའི་གཙོ། །མཚོ་སྐྱེས་རྡོ་རྗེའི་ངོ་བོར་ཞབས་བརྟན་གསོལ། །སྨྲ་བའི་དབང་ཕྱུག་རྗེ་བཙུན་མཁྱེན་པའི་གཏེར། །བརྩེ་ཆེན་ཐུགས་རྗེའི་བདག་ཉིད་འགྲོ་བའི་མགོན། །གསང་བདག་ཧེ་རུ་ཀ་དཔལ་ཆེ་བའི་མཆོག །རིགས་གསུམ་གཅིག་བསྡུས་ཉིད་དུ་ཞབས་བརྟན་གསོལ། །གངས་ཅན་མཁས་པ་ཀུན་གྱི་གཙུག་གི་རྒྱན། །རིག་འཛིན་གྲུབ་ཐོབ་རྒྱ་མཚོའི་ཚོགས་ཀྱི་རྗེ། །ལུང་རྟོགས་བསྟན་པའི་ཤིང་རྟ་ཟླ་མེད་པ། །ཁྱད་པར་ལྷ་མིན་གདུག་པའི་མུན་པ་ཀུན། །འཇོམས་བྱེད་ཡེ་ཤེས་སྣང་བའི་གཟི་བརྗིད་ཅན། །སྙིགས་མའི་འགྱུར་བ་ཐུགས་བསྐྱེད་སྨོན་ལམ་རྒྱུན། །མི་བརྟུལ་དམ་བཅའི་གོ་ཆ་རྩལ་བསྐྱེད་ནས། །འགྱུར་མེད་རྡོ་རྗེ་ལྟ་བུར་བཞུགས་སུ་གསོལ། །བསམས་བཞིན་སྲིད་པ་བཟུང་བའི་འཕགས་རྣམས་ཀྱིས། །གདུལ་བྱའི་ཞིང་ཁམས་འདོར་བ་མི་སྲིད་ཅིང་། །དད་མོས་ཅན་གྱི་རེ་བ་མི་གཅོག་ཕྱིར། །གསོལ་བཏབ་འབྲས་བུས་ལྕི་
བར་མཛད་དུ་གསོལ། །ཚེ་དབང་འཆི་མེད་པདྨའི་བྱིན་རླབས་དང་། །ཚེ་བདག་རྣམ་པར་རྒྱལ་མས་དངོས་གྲུབ་སྩོལ། །ཚེ་སྦྱིན་ཡིད་བཞིན་འཁོར་ལོའི་ནུས་མཐུ་ཡིས། །དགེ་ལེགས་རྟག་བརྟན་བཀྲ་ཤིས་དཔལ་། འབར་ཤོག །སརྦ་ཐཱ་ཨ་མཱ་ར་ཎི་ཛི་བནྟུ།། །།