འཇམ་མགོན་བླ་མ་ངག་གི་དབང་ཕྱུག་ཆེན་པོ་ལ་གསོལ་བ་འདེབས་པ་བྱིན་རླབས་ཀྱི་རོལ་མཚོ།
འཇམ་མགོན་བླ་མ་ངག་གི་དབང་ཕྱུག་ཆེན་པོ་ལ་གསོལ་བ་འདེབས་པ་བྱིན་རླབས་ཀྱི་རོལ་མཚོ་ཞེས་བྱ་བ་བཞུགས་སོ། །འཇིག་རྟེན་དབང་ཕྱུག་དཔལ་ལྡན་ཀརྨ་པའི། །བཤད་སྒྲུབ་བསྟན་པའི་མངའ་བདག་ངག་གི་དབང་། །རིག་གྲོལ་ཡོན་ཏན་རྒྱ་མཚོའི་བདག་ཉིད་ཆེ། །བློ་གྲོས་ཕ་མཐའ་ཡས་ལ་གསོལ་བ་འདེབས། །འོག་མིན་ཞིང་ན་རྣམ་སྣང་འཇམ་པའི་དབྱངས། །འཕགས་ཡུལ་དམ་ཆོས་མཛོད་འཛིན་ཀུན་དགའ་བོ། །གངས་རིའི་ཁྲོད་དུ་ལོ་ཆེན་བཻ་རོའི་ཞབས། །དབྱེར་མེད་དཔལ་ལྡན་བླ་མར་གསོལ་བ་འདེབས། །ཚུལ་གནས་གསན་བསམ་སྒོམ་པས་རང་རྒྱུད་གྲོལ། །འཆད་རྩོད་རྩོམ་ལ་འགྲན་པའི་ཟླ་དང་བྲལ། །མཁྱེན་བརྩེ་ནུས་མཐུ་རྨད་བྱུང་བསྟན་འགྲོའི་མགོན། །འབྲེལ་ཚད་དོན་ལྡན་ཆེན་པོར་གསོལ་བ་འདེབས། །མགོན་ཁྱོད་ཞིང་འདིའི་གདུལ་
བྱའི་གཉེན་གཅིག་པུར། །ངེས་པ་ལྔ་ལྡན་ངོ་བོར་འཚོ་གཞེས་ཤིང་། །ཕྲིན་ལས་སྣང་བས་ས་གསུམ་ཁྱབ་པ་དང་། །ཕན་བདེའི་དགེ་མཚན་འཕེལ་བར་མཛད་དུ་གསོལ། །བདག་ཅག་རྣམས་ཀྱང་བྱང་ཆུབ་སྙིང་པོའི་བར། །འབྲལ་མེད་རྗེས་བཟུང་འགལ་རྐྱེན་ཀུན་ཞི་ཞིང་། །ཆོས་མཐུན་བསམ་སྦྱོར་ཡིད་བཞིན་འགྲུབ་པ་དང་། །སྲིད་ཞིའི་ལེགས་ཚོགས་རྒྱས་པར་བྱིན་གྱིས་རློབས། །ཞེས་པའང་དད་ལྡན་མངྒ་ལས་བསྐུལ་ངོར། བསྟོད་ཡུལ་དམ་པ་གོང་དེའི་ལེགས་གསུང་གི་བདུད་རྩིས་འཚོ་བའི་བཀའ་འབངས་ཀྱི་ཐ་ཆུང་བྱ་བྲལ་བ་མཁྱེན་བརྩེའི་དབང་པོས་རྩེ་གཅིག་གུས་པས་གསོལ་བ་བཏབ་པ་དོན་དང་ལྡན་པར་གྱུར་ཅིག། །།