གུ་ཎ་སཱ་གར་རཏྣའི་ཞབས་བརྟན།
༈ གུ་ཎ་སཱ་གར་རཏྣའི་ཞབས་བརྟན་བཞུགས། ཤྲཱི་ཤྲཱི་ཤྲཱི་ཛཱི་པཾ་ཏིཥྛནྟུ། གཟོད་ནས་རྣམ་གྲོལ་བསོད་ནམས་མཐའ་ཀླས་མཚན་དཔེའི་ཕུང་པོར་སྨིན་པའི་སྐུ། །མི་ཤིགས་རྡོ་རྗེ་ནཱ་དའི་དབྱངས་སྙན་ཆོས་ཕུང་རྒྱ་མཚོར་འཆར་བའི་གསུང་། །ཤིན་ཏུ་ཕྲ་བ་གཉུག་མའི་ལང་ཚོར་མཁྱེན་བརྩེའི་ཉམས་བརྒྱས་རོལ་པའི་ཐུགས། །དཔལ་ལྡན་བླ་མ་རིགས་ཀུན་ཁྱབ་བདག་བསྐལ་པ་རྒྱ་མཚོར་འཚོ་གཞེས་གསོལ། ༡ །ཟག་མེད་ཡོན་ཏན་བྱེ་བའི་གཞིར་གྱུར་བསླབ་གཞིའི་སྨན་ལྗོངས་ཉམས་དགའ་བར། །སྐྱེས་ཐོབ་འཇམ་དཔལ་མཁྱེན་པའི་ས་བོན་སྦྱོར་བརྩོན་བརླན་གྱིས་བསྐྱེད་བསྲིངས་པས། །གསན་བསམ་སྒོམ་པའི་མེ་ཏོག་མཛེས་འབར་འཕགས་ལམ་ཡེ་ཤེས་འབྲས་དུད་པ། །
སྔོན་མེད་དཔག་བསམ་ལྗོན་པ་གཅིག་པུ་རྟག་པ་དམ་པར་ཞབས་བརྟན་ཤོག ༢ །སྒོ་གསུམ་ཉམས་འགྱུར་འདོད་དགུར་འཆར་ཞིང་སྡེ་བཞི་འཚོ་ཐབས་ཆོ་གས་བསྐྲུན། །བྱེད་དངོས་ལས་གསུམ་སྨྲ་ལ་ཟླ་བྲལ་གནས་གསུམ་གཞལ་བྱའི་དེ་ཉིད་གཟིགས། །གང་ཟག་ཉིད་དང་ཆོས་སུ་ལྟ་བའི་སྤྲོས་ཀུན་དབུ་མར་བསྙིལ་མཁས་པ། །རྩོད་དུས་ཀུན་མཁྱེན་གཉིས་པའི་ཕྲིན་ལས་འཇིག་རྟེན་གསུམ་ན་གསལ་གྱུར་ཅིག ༣ །བྱ་སྤྱོད་ཆོ་གས་ལུས་སེམས་ཤིན་སྦྱང་རྣལ་འབྱོར་མཆོག་གིས་ཡེ་ཤེས་དྲངས། །བསྐྱེད་རྫོགས་ཟབ་མོའི་དེ་ཉིད་མངོན་གྱུར་འཆད་རྩོད་རྩོམ་པའི་ཕ་རོལ་སོན། །ཆེས་ཆེར་མཁས་ཤིང་ཤིན་ཏུ་གྲུབ་པ་རི་བོའི་ཁོངས་སུ་ཟླ་བྲལ་བ། །འཆི་མེད་གྲུབ་པའི་རྒྱལ་རྔ་བརྡུངས་པས་ཡིད་སྲུབས་དཔུང་བཅས་ཕམ་པར་ཤོག་༤ །མདོར་ན་ཡོངས་རྫོགས་བསྟན་འགྲོའི་སྐྱབས་གཅིག་སངས་རྒྱས་རིན་ཆེན་ཟ་མ་ཏོག །བསྐལ་བརྒྱར་ཞབས་བརྟན་ཆོས་འཁོར་དང་བཅས་ཕྲིན་ལས་མཁའ་དང་སྙོམས་འཇུག་བཞིན། །ལུང་རྟོགས་བསྟན་དང་ཡིད་ཅན་རྒྱ་མཚོར་ཕན་བདེའི་དངོས་པོ་ཀུན་འཇོ་བས། །སྨོན་པའི་ཤིང་རྟ་རྫོགས་པར་འགེངས་པའི་དགེ་ལེགས་ཉི་མ་གསར་འཆར་ཤོག །ཤུབྷཾ།། །།