ཞབས་བརྟན་དགེ་ལེགས་རྟག་པ་དམ་པ།
༈ དགེ་ལེགས་རྟག་པ་དམ་པའི་སྣང་བ་ཡིས། །ཕུན་ཚོགས་ཚེ་ཡི་ཨུཏྤལ་རྒྱས་པ་དང་། །ཡེ་ཤེས་མཆོག་གི་འབྲས་བུ་དར་མཛད་པ། །འཆི་མེད་མགོན་
པོས་རྟག་ཏུ་སྐྱོངས་གྱུར་ཅིག ༡ །གང་ཞིག་གཟོད་ནས་རབ་ཞིའི་བདུད་རྩི་དང་། །མི་ཕྱེད་བྱང་ཆུབ་སྙིང་པོར་རོ་གཅིག་ཀྱང་། །རྒྱལ་བའི་མྱུ་གུ་གཞོན་ནུའི་ཚུལ་འཆང་བ། །བསྐལ་པ་རྒྱ་མཚོར་འཚོ་གཞེས་བརྟན་གྱུར་ཅིག ༢ །བསོད་ནམས་བྱེ་བའི་ཆ་ཤས་ཡོངས་རྫོགས་པའི། །མཚན་དཔེ་ཟླ་བ་ནོར་བུའི་སྒེག་འཆང་བ། །སྲིད་ཞིའི་བདེ་འབྱུང་རལ་པའི་ནགས་ཀླུང་དུ། །འཆི་བ་མེད་པའི་དགེ་མཚན་༧ བརྙེས་གྱུར་ཅིག ༣ །ཚིག་ལ་སྒྲ་དང་དོན་ལ་གཏན་ཚིགས་ཀྱི། །དཔྱད་པས་གཙང་བར་བྱས་པའི་ལེགས་བཤད་ཀྱི། །སྤྲིང་ཡིག་སྲིད་པ་གསུམ་ན་རབ་སྙན་པས། །རྒྱལ་བསྟན་ཉིན་ལས་ཉིན་མོར་མཛད་གྱུར་ཅིག ༤ །རང་བཞིན་ཇི་ལྟའི་གནས་ལུགས་མངོན་གྱུར་བཞིན། །རྣམ་པ་ཇི་སྙེད་ཤེས་བྱ་ཀུན་གཟིགས་པའི། །ཐུགས་རྗེའི་འཇུག་པ་ཞིང་འདིའི་གདུལ་བྱ་ལ། །ལྷག་པར་དུས་ལས་ཡོལ་མེད་དགོངས་གྱུར་ཅིག ༥ །ཡོན་ཏན་རྒྱ་མཚོའི་དཔལ་གྱིས་འབྱོར་པ་དང་། །ཕྲིན་ལས་རྟག་ཁྱབ་ལྷུན་གྱིས་གྲུབ་པ་དང་། །དེས་ཀྱང་བསྟན་འགྲོར་ཕན་བདེའི་མཆོག་སྦྱིན་པའི། །ངོ་མཚར་ནམ་ཡང་ནུབ་པ་མེད་གྱུར་ཅིག ་༦ །མདོར་ན་རྒྱལ་བསྟན་སྤྱི་དང་སྙིང་པོའི་ལམ། །སྣང་མཛད་ཆོས་ཀྱི་ཉི་མ་གཅིག་གྱུར་ཏེ། །བསྐལ་བརྒྱར་ཞབས་བརྟན་བྱང་ཆུབ་སྤྱོད་མཆོག་གི །བཀྲ་ཤིས་སྣང་བས་ས་གསུམ་ཁྱབ་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །།