འཇམ་པའི་དབྱངས་ཀརྨ་ངག་དབང་ཡོན་ཏན་རྒྱ་མཚོའི་ཞབས་བརྟན་གསོལ་འདེབས་འཆི་མེད་གྲུབ་པའི་བདེན་ཚིག།
འཇམ་པའི་དབྱངས་ཀརྨ་ངག་དབང་ཡོན་ཏན་རྒྱ་མཚོའི་ཞབས་བརྟན་གསོལ་འདེབས་འཆི་མེད་གྲུབ་པའི་བདེན་ཚིག་ཅེས་བྱ་བ་བཞུགས་སོ། །ཨོཾ་སྭསྟི་སིདྡྷཾ། འཕགས་མཆོག་ཐུགས་རྗེའི་གཏེར་ཆེན་ཀརྨ་ཀའི། །ཕྲིན་ལས་སྣང་བས་ས་གསུམ་ཁྱབ་མཛད་པ། །ངག་གི་དབང་ཕྱུག་ཡོན་ཏན་རྒྱ་མཚོའི་གཏེར། །མཚུངས་མེད་བསྟན་པའི་ཉི་མ་ཞབས་བརྟན་གསོལ། །སྒོ་གསུམ་འདོད་དགུར་འཆར་བའི་རིག་བྱེད་དང་། །རྣམ་འགྱུར་གསོ་དང་གཅིག་ཤོས་རིང་གནས་པའི། །གཙུག་ལག་གཞུང་བརྒྱའི་བདུད་རྩིའི་ཆར་འབེབས་པ། །འཇམ་དབྱངས་ཆོས་ཀྱི་ཟླ་བ་ཞབས་བརྟན་གསོལ། །གང་ཟག་ཉིད་དུ་ལྟ་བ་རིང་སྤངས་ཤིང་། །རྡུལ་དང་སྐད་ཅིག་བཏགས་ཡོད་རྣམ་རིག་དང་། །སྟོང་པ་ཙམ་ལས་ཕ་རོལ་སོན་པའི་ཕུལ། །ངེས་དོན་དབུ་མ་སྨྲ་ཁྱོད་ཞབས་བརྟན་གསོལ། །གཞན་གནོད་གཞིར་བཅས་སྤངས་པའི་ས་བོན་ནི། །བྱང་ཆུབ་སེམས་གཉིས་བདུད་རྩིས་བསྐྱེད་བསྲིངས་པས། །ཆོས་ཀུན་བདེ་སྟོང་སྡོམ་པའི་འབྲས་འབར་བ། །རྡོར་འཛིན་བྱེ་བའི་གཙུག་རྒྱན་ཞབས་བརྟན་གསོལ། །ཚོགས་ཟུང་མོས་པས་སྤྱོད་དང་བདེན་དོན་ལ། །སྦྱོར་བའི་ངེས་འབྱེད་ཆ་མཐུན་རབ་གོམས་པས། །མཐོང་དང་སྒོམ་པའི་མཐར་སོན་མི་སློབ་པའི། །དཔག་ཡས་ཡོན་ཏན་མངོན་གྱུར་ཞབས་བརྟན་གསོལ། །ཤིན་ཏུ་ཞི་བ་འོད་གསལ་ཆོས་སྐུའི་དབྱིངས། །ཡེ་
ཤེས་སྒྱུ་འཕྲུལ་དྲྭ་བའི་སྤྲིན་འཕྲོ་ཞིང་། །ཕྲིན་ལས་སྲས་བཅས་རྒྱལ་དང་མི་ཕྱེད་པའི། །རིགས་བརྒྱའི་ཁྱབ་བདག་ཆེན་པོ་ཞབས་བརྟན་གསོལ། །མདོར་ན་ཡོངས་རྫོགས་བསྟན་འགྲོའི་མགོན་གཅིག་པུར། །ཞབས་པད་རྡོ་རྗེའི་ཁམས་སུ་འཚོ་གཞེས་ཤིང་། །ཟབ་རྒྱས་ཆོས་ཀྱི་སྣང་བས་འཇིག་རྟེན་ན། །ཕན་བདེའི་པདྨོ་རྒྱས་པའི་བཀྲ་ཤིས་སྩོལ། །ཅེས་པའང་གཙུག་ལག་གཞུང་མང་འཆང་བའི་མཁས་དབང་རྡོ་རྗེ་འཛིན་པ་ཆེན་པོ་ཀརྨ་ངེས་དོན་དང་། དད་དམ་བློ་གྲོས་ཀྱི་ནོར་ཅན་དགེ་སྦྱོང་དྷརྨ་ཝནྡྷ་ནས་སྔ་ཕྱིར་ནན་ཏན་དུ་བསྐུལ་བས་མཚམས་སྦྱར་ཏེ། རང་ཉིད་ཀྱིས་ཀྱང་མི་ཕྱེད་པའི་དད་འདུན་དགེ་བ་དང་བཅས་འཇམ་དབྱངས་མཁྱེན་བརྩེའི་དབང་པོས་བྲིས་ཤིང་། ཤིང་མོ་ཡོས་ཀྱི་གནམ་ལོ་གསར་དུ་འཆར་བའི་ཆོ་འཕྲུལ་གྱི་ཟླ་བའི་དཀར་པོའི་ཕྱོགས་ཀྱི་དགའ་བ་དང་པོའི་ཉི་ཤར་ལ་རྩེ་གཅིག་ཏུ་གུས་པས་གསོལ་བ་བཏབ་པ་སིདྡྷི་རསྟུ།། །།