ཞབས་བརྟན་རྣམ་རྒྱལ་མའི་སྔགས་དོན་དང་འབྲེལ་བ།
༈ ཨོཾ་གྱི་རང་བཞིན་འགྱུར་མེད་བདེ་ཆེན་གྱི་རྡོ་རྗེ། །པདྨ་གར་དབང་ཆེན་པོའི་རྣམ་རོལ་ཏུ་ཤར་བའི། །བཀྲ་ཤིས་མཚན་དཔེའི་གཟུགས་སྐུ་བགྲང་ཡས་ཀྱི་བསྐལ་པར། །ཞབས་པད་བརྟན་པར་མཛོད་ཅིག་གཙུག་ཏོར་གྱི་ལྷ་མོ། །ཨ་མྲྀ་ཏ་ཞེས་ཚངས་བྱུང་ཆེར་སྙེམས་ཀྱི་རྒྱུད་མང་། །གྲུབ་པའི་ལང་ཚོའི་མཐུ་ཡིས་རང་དབང་དུ་མཛད་པ། །ལེགས་གསུང་བདུད་རྩིའི་ཟླ་ཟེར་དྲི་མེད་ཀྱི་གཟི་ཡིས། །ས་གསུམ་སྣང་བ་སྤེལ་ཅིག་གཙུག་ཏོར་གྱི་ལྷ་མོ། །ཨཱ་ཡུར་འཕོ་མེད་ཐིག་ལེར་གདོད་མ་ནས་གྲུབ་པའི། །བློ་གྲོས་ཕ་མཐའ་ཡས་པའི་མཁྱེན་གཉིས་ཀྱི་ཐུགས་མཆོག །གངས་ཅན་གདུལ་བྱའི་ཚོགས་ལ་དུས་གསུམ་དུ་གཟིགས་པའི། །ངོ་མཚར་རྟེན་འབྲེལ་སྒྲིགས་ཤིག༔ དཱ་དེ་ངག་ལ་དབང་བསྒྱུར་རྒྱལ་ཀུན་གྱི་ཡབ་གཅིག །ཡོན་ཏན་རྒྱ་མཚོའི་གཟུགས་ཀྱིས་སྐལ་བཟང་གི་འགྲོ་ལ། །ཕན་བདེའི་དངོས་ཀུན་སྦྱིན་མཛད་ཡིད་བཞིན་གྱི་ནོར་བུ། །རྡོ་རྗེའི་སྲོག་རྩ་སྒྲུབས་ཤིག སཱ་ཧཱ་ཕྲིན་ལས་ཀུན་ཁྱབ་ལེགས་བྲིས་ཀྱི་གཞི་མ། །སྲིད་ཞིའི་དགེ་ལེགས་དུས་སྟོན་ཡིད་འོང་དུ་ཚུགས་པས། །དཔལ་ལྡན་བསྐལ་པ་བཟང་པོའི་དུས་སྟོན་གྱི་རོལ་མོ། །བསྐལ་བརྒྱར་སྙན་པར་སྒྲོགས་ཤིག་གཙུག་ཏོར་གྱི་ལྷ་མོ། །ཤིན་ཏུ་དད་པའི་གདུང་དབྱངས་བཅོས་མིན་དུ་ཐལ་ན། །རིགས་བརྒྱའི་ཁྱབ་བདག་རྣམ་པར་སྣང་མཛད་ཀྱི་སྐུ་ཚེ། །མི་འགྱུར་རྟག་པ་དམ་པའི་དངོས་གྲུབ་ཅིག་སྩལ་ཏེ། །བསྟན་འགྲོའི་དགེ་མཚན་རྒྱས་པའི་
བཀྲ་ཤིས་ཤིག་ཞུའོ། །དེ་ལྟར་འཇམ་མགོན་རྡོ་རྗེ་འཆང་ཆེན་པོའི་སྐུ་ཚེ་ཡུན་རིང་བརྟན་པའི་ཆེད་དུ་ལྷག་པའི་ལྷ་མོ་གཙུག་ཏོར་རྣམ་རྒྱལ་མའི་ཐུགས་དམ་རྒྱུད་བསྐུལ་གྱི་གསོལ་འདེབས་འདིའང་མཁྱེན་བརྩེའི་དབང་པོས་གསོལ་བ་བཏབ་པ་སིདྡྷི་རསྟུ།། །།