རྗེ་བླ་མ་ལ་གསོལ་འདེབས་བློ་གསལ་བསྟན་སྐྱོང་གིས་མཛད་པ་ཕུན་ཚོགས་པདྨ་རཱ་ག
ཨོཾ་སྭསྟི། ཕུན་ཚོགས་པདྨ་རཱ་གའི་ལྷུན་པོ་ལ། །ཉི་གཞོན་བྱེ་བས་འཁྱུད་པའི་གཟི་འོད་ཅན། །མཚན་ཙམ་ལྷུང་བས་ཉི་བུའི་དབྱུག་པ་ཡང་། །ཕྱེ་མར་འཐག་མཛད་ཚེ་ཡི་མགོན་པོས་སྲུངས། །འཇམ་དབྱངས་སྒྱུ་འཕྲུལ་དྲྭ་བ་ལས་འཐོན་པའི། །མཁྱེན་བརྩེའི་འོད་ཟེར་ཡངས་
སུ་དཀྲིགས་པ་ཡིས། །སྙིགས་དུས་བསྟན་པའི་པདྨོ་ཕྱོགས་བརྒྱ་རུ། །བཞད་བྱེད་སྨྲ་བའི་དབང་པོ་ཞབས་བརྟན་ཤོག །ཡིད་བཞིན་འཁོར་ལོ་རྣམ་པར་རྒྱལ་མ་སོགས། །མི་འགྱུར་ཚེ་ཡི་དངོས་གྲུབ་སྟེར་བའི་ལྷས། །བདུད་རྩིའི་བུམ་པས་མགོན་ཁྱོད་བསྐལ་བརྒྱའི་བར། །རྡོ་རྗེའི་ཆོས་བདུན་རྫོགས་པར་དབང་བསྐུར་ཅིག །ཕྱག་དྲུག་གུར་ཞལ་འདོད་ཁམས་དབང་མོ་སོགས། །དམ་ལྡན་མཐུ་སྟོབས་ཡེ་ཤེས་སྤྱན་བཀྲ་བ། །དཔལ་ལྡན་སྲུང་མའི་ཚོགས་ཀྱིས་དུས་ཀུན་ཏུ། །གང་གི་གསང་གསུམ་ཕྲིན་ལས་སྤེལ་སྲུང་མཛོད། །ཅེས་པ་འདིའང་རྗེ་བླ་མ་འདི་ཉིད་མདོ་ཁམས་སུ་ཆིབས་བསྐྱོད་པའི་ཚེ། བཙུན་པ་བློ་གསལ་རི་ཁྲོད་པས་གསོལ་བ་བཏབ་པ་སརྦ་དཱ་མངྒ་ལཾ།། །།