ཨེ་ཝཾ་མཁན་ཆེན་བྱམས་པ་ཀུན་དགའ་བསྟན་པའི་རྒྱལ་མཚན་ནས་རྗེ་བླ་མར་གསོལ་བ་འདེབས་པ་གཟོད་ནས་སྤྲོས་བྲལ།
༈ ཨོཾ་སྭསྟི། །གཟོད་ནས་སྤྲོས་པའི་ཕ་རོལ་ལས་བརྒལ་ཏེ། །རྣམ་འདྲེན་ཞི་བ་དམ་པའི་སྐུ་བརྙེས་ཀྱང་། །སླར་ལ་སུམ་ལྡན་མཆོག་གི་སྐུར་བཞེངས་པ། །བསྐལ་པ་རྒྱ་མཚོའི་བར་དུ་འཚོ་གཞེས་གསོལ། །འགྲོ་འོང་སྲོག་དང་རྩོལ་བའི་རྒྱུ་བ་དག །ཁ་སྦྱོར་དབུ་མའི་དབྱིངས་སུ་བསྡམས་པ་ལས། །ལུང་རྟོགས་ཆོས་ཀྱི་འབྱུང་གནས་གཅིག་པུ་པ། །གསུང་གི་རྡོ་རྗེ་རྟག་པར་འཚོ་གཞེས་གསོལ། །མཐའ་བཞི་བྲལ་བ་ངེས་དོན་དབུ་མའི་ལམ། །ཇི་བཞིན་གཟིགས་པའི་ཤེས་རབ་རྨད་བྱུང་བ། །འགྱུར་མེད་བདེ་བ་ཆེན་པོ་དང་འགྲོགས་ནས། །འཆི་མེད་རྟག་པའི་ངོ་བོར་འཚོ་གཞེས་གསོལ། །གང་ན་སྤངས་
རྟོགས་ཡོན་ཏན་ནོར་བུའི་ཚོགས། །མི་ཟད་ནམ་མཁའི་མཛོད་ལ་དབང་བསྒྱུར་བའི། །གྲགས་སྙན་འོད་ཀྱིས་ས་གསུམ་ཁྱབ་བཞིན་དུ། །བསྐལ་པ་རྒྱ་མཚོའི་བར་དུ་འཚོ་གཞེས་གསོལ། །གཞན་ཕྱིར་ཞི་རྒྱས་དབང་དྲག་དང་འབྲེལ་བའི། །རྨད་བྱུང་ཕྲིན་ལས་ཉིན་མོར་བྱེད་པའི་གཟིས། །ཕན་བདེའི་པད་ཚལ་རྒྱས་པར་མཛད་བཞིན་དུ། །ཚེ་མཐའ་ཡས་པའི་ངོ་བོར་རྟག་བཞུགས་གསོལ། །མདོར་ན་ཡོངས་རྫོགས་བསྟན་པའི་རྒྱལ་ཐབས་ལ། །དབང་བསྒྱུར་བསྟན་འདིར་སྟོན་པ་གཉིས་པ་ཁྱོད། །འཚོ་གཞེས་བདུད་རྩིའི་སྤྲིན་ཕུང་དཀྲིགས་པ་ལས། །འཆད་རྩོད་རྩོམ་པའི་གྲུ་ཆར་དབབ་ཏུ་གསོལ། །བདག་ཀྱང་དེང་ནས་བྱང་ཆུབ་མ་ཐོབ་བར། །མགོན་པོ་ཁྱོད་ཀྱི་རྗེས་སུ་རབ་ཞུགས་ནས། །ནམ་ཞིག་བྱང་ཆུབ་བརྙེས་པའི་ཚུལ་བསྟན་ཚེ། །འདུས་པ་དང་པོའི་འཁོར་དུ་སྨིན་གྱུར་ཅིག །འཆི་མེད་མགོན་པོ་ཚེ་མཐའ་ཡས་པ་དང་།. །འཆི་མེད་བདུད་རྩིའི་རབ་དགྱེས་རྣམ་རྒྱལ་མ། །འཆི་མེད་ཡིད་བཞིན་འཁོར་ལོར་བཅས་པ་ཡིས། །འཆི་མེད་ཤིས་པའི་མེ་ཏོག་བསྙིལ་གྱུར་ཅིག །ཅེས་ཁ་ཙམ་མིན་པར་སྙིང་ནས་གསོལ་བ་འདེབས་པའི་གཏམ་གྱི་རྒྱུད་མང་དལ་གྱིས་བསྒྲེང་བ་ཇི་ལྟར་འདོད་པའི་དོན་ཐམས་ཅད་འབད་མེད་དུ་འགྲུབ་པར་བྱིན་གྱིས་བརླབ་ཏུ་གསོལ། །ཤུ་བྷ་མསྟུ་སརྦ་ཛཱ་ག་ཏཱཾ།། །།ཞེས་ངོར་ཨེ་ཝཾ་པའི་མཁན་ཆེན་ཐམས་ཅད་མཁྱེན་གཟིགས་བྲང་ཏི་བ་བྱམས་པ་ཀུན་དགའ་བསྟན་པའི་རྒྱལ་མཚན་གྱིས་སྩལ་བའོ།།