རྗེ་བཙུན་བརྟན་པའི་འཁོར་ལོ་དང་བླ་མ་དམ་པ་དབྱེར་མེད་དུ་ཤེས་པའི་སྒོ་ནས་གསོལ་བ་འདེབས་པ་དད་གསུམ་སར་སྒྲོག་མྱོས་པའི་གྲེ་འགྱུར།
རྗེ་བཙུན་བརྟན་པའི་འཁོར་ལོ་དང་བླ་མ་དམ་པ་དབྱེར་མེད་དུ་ཤེས་པའི་སྒོ་ནས་གསོལ་བ་འདེབས་པ་དད་གསུམ་སར་སྒྲོག་མྱོས་པའི་གྲེ་འགྱུར་ཞེས་བྱ་བ་བཞུགས་སོ། །ན་མོ་གུ་རུ་ཤྲཱི་ར་ཙཀྲ་ཡ། སྐྱབས་གསུམ་ཐུགས་རྗེའི་གདུགས་དཀར་འཁོར་བའི་ཁོང་། །
བདག་སོགས་འགྲོ་ཀུན་གཏན་གྱི་གནས་འཆའ་ཞིང་། །བདེ་དང་ཕན་པའི་ཟིལ་མངར་མཆོག་ཐོབ་ཕྱིར། །བྱང་ཆུབ་སྤྱོད་པའི་ཆུ་གཏེར་བསྒྲུབ་པར་བགྱི། །ཀུན་གསལ་དཀྱིལ་འཁོར་ཡངས་པར་དད་གསུམ་གྱི། །རང་གཟུགས་སེང་ཁྲི་པད་ཟླ་བརྩེགས་པའི་སྟེང་། །བཀའ་དྲིན་མཉམ་མེད་ཀུན་མཁྱེན་ཆོས་ཀྱི་རྗེ། །རྣམ་པ་རྗེ་བཙུན་བརྟན་པའི་འཁོར་ལོའི་སྐུ། །མཚན་བཟང་དཀྱིལ་འཁོར་ལྷམ་མེ་ལྷན་ནེ་བ། །ལྷང་ངེར་སྣང་བའི་གནས་གསུམ་ཨོཾ་ཨཱཿཧཱུྃ། །འཁོར་ལོ་སྔགས་དང་བཅས་ལས་འོད་འཕྲོས་པས། །མཆོད་འོས་མ་ལུས་སྤྱན་དྲངས་དབྱེར་མེད་གྱུར། །རྒྱལ་ཀུན་ཡེ་ཤེས་སྤྱི་གཟུགས་འཇམ་པའི་དབྱངས། །མཁྱེན་བརྩེའི་ཆ་ཤས་རབ་རྫོགས་མཁས་པའི་དབང་། །བློ་གསལ་རྒྱུ་སྐར་ཕྲེང་པའི་བདག་པོ་རུ། །རྣམ་པར་ཟློས་པའི་ཞབས་ལ་གུས་ཕྱག་འཚལ། །རང་ལུས་ལོངས་སྤྱོད་དུས་གསུམ་ལེགས་བསགས་བཅས། །ཀུན་བཟང་མཆོད་པའི་སྤྲིན་དུ་བསམ་གྱིན་སྟོབ། །བཅས་རང་ཁ་ན་མ་ཐོའི་རྙོག་མ་ཀུན། །སྟོབས་བཞིའི་ཀེ་ཏ་ཀ་ཡིས་འབད་དེ་བསྲུང་། །འཕགས་བཞི་སོ་སྐྱེའི་བསོད་ནམས་པདྨོའི་ཚལ། །རྗེས་སུ་ཡི་རང་ཉི་གཞོན་འོད་ཀྱིས་འབྱེད། །མ་རྣམས་དཀྲི་པའི་གཡར་དམ་ཆེས་བརླིང་བས། །བསྐུལ་མི་འཚལ་ཡང་ཚངས་པའི་རྗེས་སུ་བཟླས། །ཞི་དབྱིངས་བསྔགས་པ་སྲིད་ན་སྙན་མོད་ཀྱང་། །བརྟན་པར་བཞུགས་
གསོལ་རྩུབ་མོའང་འགོག་མི་རུང་། །ཟབ་དང་རྒྱ་ཆེའི་ཚོགས་བསགས་ལྕགས་ཀྱི་ཁམས། །ཡོངས་བསྔོའི་རྩི་ཡིས་ས་ཟླའི་ཕུང་པོར་བསྒྱུར། །བདག་གཞན་དགེ་དང་འབྱོར་པ་རྒྱུར་བྱས་པའི། །རི་གླིང་ཆུ་གཏེར་བཅས་པའི་འཇིག་རྟེན་ཁམས། །ལྷ་མིའི་འབྱོར་པས་བཀང་བའི་མཎྜལ་དབུལ། །བདག་གིར་མཛད་དེ་བྱིན་གྱིས་བརླབ་ཏུ་གསོལ། །མགོན་དེས་གནས་གསུམ་ཡི་གེ་ལས་འཕྲོས་པའི། །འོད་ཟེར་འབྲུ་གསུམ་ཕྲེང་བ་རང་སྒྲར་བཅས། །རང་གི་གནས་གསུམ་ལ་ཐིམ་སྒྲིབ་ཀུན་དག །དབང་དང་དངོས་གྲུབ་གཅིག་ཅར་ཐོབ་པར་གྱུར། །སྐུ་འཇམ་འགྲོ་བློའི་དཔལ་གྱུར་གཞོན་ནུའི་ཚུལ། །གསུང་འཇམ་རྣ་བའི་བདུད་རྩི་ཚངས་པའི་དབྱངས། །ཐུགས་འཇམ་འདྲེན་པའི་ཡེ་ཤེས་རྡོ་རྗེ་དངོས། །ཕྲིན་ལས་རྒྱུན་ཆགས་བརྟན་པའི་འཁོར་ལོས་སྐྱོངས། །མདོ་རྒྱུད་རྒྱ་མཚོ་མཐའ་དྲུག་ཚུལ་བཞི་ཡིས། །འཆད་པའི་སྤོབས་པ་ཐོགས་མེད་དེང་འདིར་སྩོལ། །རིག་གཞུང་རྒྱ་མཚོ་ཆེ་ལ་གནས་བཅས་ཏེ། །ཕས་རྒོལ་འཇོམས་པའི་བློ་གྲོས་དེང= བློ་གསལ་རྒྱ་མཚོའི་ཡིད་དབང་འཕྲོག་ནུས་པའི། །སྡེབ་ལེགས་རྩོམ་པའི་རྣམ་དཔྱོད་དེང་འགྲོ་བ་རྒྱ་མཚོའི་གཟུང་འཛིན་རྟོག་པའི་མུན། །སེལ་བྱེད་ཡེ་ཤེས་སྣང་བ་དེང་ཟ རྒྱལ་བ་རྒྱ་མཚོ་དགྱེས་པར་བསྐྱེད་ནུས་པའི། །གཞན་ཕན་ལྷག་བསམ་འོད་དཀར་དེང་༴ རྒྱལ་སྲས་རྒྱ་མཚོའི་རྣམ་ཐར་ལ་
འཁུ་བའི། །རླབས་ཆེན་བྱང་ཆུབ་སྤྱོད་པ་དེང་ཟ གྲུབ་རིགས་རྒྱ་མཚོས་བསྔགས་ཤིང་ཉེར་བསྟེན་པའི། །རིམ་གཉིས་ཏིང་འཛིན་བདུད་རྩི་དེང་འདིར་སྩོལ། །ལུས་ཅན་རྒྱ་མཚོའི་རྟེན་དང་དཔལ་འོས་པའི། །ས་དང་ལམ་གྱི་ཡོན་ཏན་རིམ་གྱིས་སྩོལ། །སྐུ་དང་ཡེ་ཤེས་རྒྱ་མཚོ་ལྷུན་གྲུབ་པའི། །རྡོ་རྗེ་འཛིན་སར་བགྲོད་པར་བྱིན་གྱིས་རློབས། །གཞན་ཡང་ཇི་ལྟར་ཤེས་ཤིང་ལྕོགས་པའི་གསོལ་འདེབས་དང་། །ཐུན་མཚམས་སུ་ཞབས་ཏོག་ལ་བརྩོན་པ་ཙམ་གྱིས་དོན་ཆེན་པོ་འགྲུབ་པ་ཐེག་ཆེན་སྤྱི་སྦས་ཀྱི་དགོངས་པ་གཞན་དང་མ་འདྲེས་པའོ། །ཚུལ་འདིས་ནི་ཡན་ལག་དང་པོའི་ཕྱག་འཚལ་བའི་ཚིགས་བཅད་བསྒྱུར་བ་ཙམ་གྱིས་རང་གི་བླ་མ་གཞན་ལ་གསོལ་བ་འདེབས་པའི་ཚུལ་ཡང་འཐུས་སོ། །ཞེས་པ་འདིའང་ཚུལ་ཁྲིམས་རྒྱ་མཚོ་སོགས་ཀྱི་འདོན་བྱར་ངག་དབང་ལེགས་གྲུབ་ཀྱིས་བྲིས་པའོ།།