ཡེ་ཤེས་ཀྱི་སྐུ་ཅན་སུམ་ལྡན་བླ་མ་དོན་སླད་མཚན་སྨོས་ན་འཇིགས་མེད་མཁྱེན་བརྩེའི་ཟློས་གར་རིན་པོ་ཆེ་ལ་ཞབས་བརྟན་འབུལ་བ།
ཡེ་ཤེས་ཀྱི་སྐུ་ཅན་སུམ་ལྡན་བླ་མ་དོན་སླད་མཚན་སྨོས་ན་འཇིགས་མེད་མཁྱེན་བརྩེའི་ཟློས་གར་རིན་པོ་ཆེ་ལ་ཞབས་བརྟན་འབུལ་བ་ནི། ཨེ་མ་ཧོ། དུས་གསུམ་རྒྱལ་བའི་མཁྱེན་བརྩེ་གཅིག་བསྡུས་པ། །རྒྱལ་ཀུན་དབང་ཕྱུག་ཨོ་རྒྱན་རིན་པོ་ཆེ། །དབྱེར་མེད་དྲིན་ཅན་རྩ་བའི་བླ་མ་མཆོག །སྐུ་ཚེ་མི་འགྱུར་རྡོ་རྗེ་ལྟར་བརྟན་ཤོག །བླ་མའི་སྐུ་ནི་མཚན་དང་དཔེ་བྱད་ལྡན། །བསླབ་པ་གསུམ་གྱི་རྒྱན་གྱིས་རྣམ་པར་མཛེས། །མཐོང་ཐོས་དྲན་རེག་ཐར་པའི་ཞིང་དུ་བཀོད། །ཁྱོད་སྐུ་ཉིན་བྱེད་འབུམ་ལྟར་ཞབས་བརྟན་ཤོག །བླ་མའི་གསུང་ནི་ཡན་ལག་དྲུག་ཅུར་ལྡན། །སྡེ་སྣོད་བཅུ་
གཉིས་བདུད་རྩིའི་རྒྱུན་ལྟར་འབེབས། །སྐལ་བཟང་དད་པའི་རྒྱ་མཚོར་བསྐྱིལ་མཛད་པ། །བྱིན་རླབས་ཐུགས་རྗེའི་གཏེར་མཛོད་ཞབས་བརྟན་ཤོག །བླ་མའི་ཐུགས་ནི་སྤངས་རྟོགས་ཡོན་ཏན་ལྡན། །ཡེ་ཤེས་ལྔ་ལྡན་རྡོ་རྗེ་འཆང་དང་མཉམ། །བསྟན་འགྲོ་ཀུན་གྱི་མངའ་བདག་རིན་པོ་ཆེ། །མི་འགྱུར་མི་ཤིགས་གཡུང་དྲུང་ཚེ་ཐོབ་ཤོག །བླ་མའི་ཡོན་ཏན་ཕྱི་ཡི་རྒྱ་མཚོ་འདྲ། །མ་ཟད་མི་ཟད་གོང་ནས་གོང་དུ་འཕེལ། །འདོད་དགུའི་འབྱུང་གནས་ཡིད་བཞིན་ནོར་བུ་ཁྱེད། །ངེས་པ་ལྔ་ལྡན་སྐུ་ལྟར་བརྟན་པར་བཞུགས། །བླ་མའི་ཕྲིན་ལས་ནམ་མཁའི་མཐའ་བཞིན་རྒྱས། །མཛད་པ་ཕྲིན་ལས་མ་ལུས་ལྷུན་གྱིས་གྲུབ། །བསྟན་པའི་བདག་པོ་འགྲོ་བ་ཡོངས་ཀྱི་མགོན། །ཚེ་མཐའ་ཡས་པའི་སྐུ་བཞིན་བཞུགས་པར་ཤོག །ཆོས་དབྱིངས་འདུས་མ་བྱས་པའི་བྱིན་རླབས་དང་། །རྟེན་འབྲེལ་བསླུ་མེད་བདེན་ཚིག་ཟབ་མོ་དང་། །བདག་གིས་སྒོ་གསུམ་གུས་པས་གསོལ་བཏབ་མཐུས། །མཚུངས་མེད་དྲིན་ཅན་བླ་མ་ཞབས་བརྟན་ཤོག །ཅེས་པའང་དམ་པ་གང་གི་སློབ་འབངས་སུ་གྱུར་པ་འགྱུར་མེད་བསྟན་འཕེལ་བཟང་པོས་གསོལ་བ་རྩེ་གཅིག་ཏུ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག། །།