དབུས་ཕེབས་སྐབས་ཕུལ་བ་བདག་གི་སྐྱབས་གཅིག
ན་མོ་གུ་རུ་བྷུ བདག་གི་སྐྱབས་གཅིག་འཁོར་ལོའི་མགོན། །བཀའ་དྲིན་སུམ་ལྡན་བླ་མ་མཆོག །གཅིག་ཆོག་རྒྱལ་པོ་རིན་པོ་ཆེ། །འཇིགས་མེད་མཁྱེན་བརྩེའི་ཟློས་གར་ཁྱེད། །སྐུ་ན་ཤིན་ཏུ་ཕྲ་
གྱུར་ཀྱང་། །འཇིག་རྟེན་ཕལ་པའི་ཚུལ་ལས་འདས། །ཆོས་ཀྱི་ཚུལ་ཙམ་འཛིན་པ་ལའང་། །གུས་པས་ཕྱག་གིས་བཏུད་པར་མཛད། །དག་པ་རབ་འབྱམས་དེ་ལས་ཅི། །སྔོན་དུས་རྒྱལ་བ་ཀརྨ་པས། །ཚོགས་པའི་གྲལ་གདན་ཞབས་སུ་ནི། །དབུ་གཏུགས་ཟེར་བ་བདག་གིས་ཐོས། །དེ་ཀ་དམ་པ་ཆེན་པོའི་ཕུལ། །སྙམ་ནས་སྙིང་ལ་དད་པ་འཕེལ། །གཞན་དུ་ཉམས་རྟོགས་ཁོང་ནས་བརྡོལ། །ཤེས་རབ་གསུམ་གྱི་ཡོན་ཏན་རྒྱས། །མ་བསྒོམས་དབུ་མའི་རྩ་མདུད་གྲོལ། །རྡོ་རྗེའི་མགུར་གླུ་ཐོགས་པ་མེད། །སྡོམ་པ་གསུམ་དང་རྒྱུད་སྡེ་བཞི། །རིམ་དགུའི་ཐེག་པའི་དགོངས་དོན་ཀུན། །གཅིག་ཅར་རྟོགས་པའི་སྤོབས་པ་ཐོབ། །ཁྱད་པར་སྙིང་ཐིག་བསྟན་པའི་ཉི། །འོད་ཟེར་འབུམ་གྱིས་འཁྱུད་པ་བཞིན། །བསྟན་འགྲོའི་བསོད་ནམས་ལས་འཁྲུངས་པ། །ཨེ་མ་རྫོགས་ལྡན་བསྐལ་པ་ཤར། །ཚོམ་བུ་འབུམ་གྱི་ཚོགས་དང་བཅས། །མངོན་སུམ་ཉིད་དུ་འཚང་རྒྱ་འཐོབ། །ཁྱེད་ནི་བསྟན་འགྲོའི་མགོན་ཡིན་ཕྱིར། །སྙིང་པོའི་བསྟན་པ་སྤེལ་དགོས་པས། །རིག་གནས་སློབ་སྦྱོང་ག་ལ་རིགས། །འདུ་འཛི་སྤངས་ལ་དབེན་ས་བསྟེན། །ལས་ཅན་མཚོ་ལ་ངང་པ་བཞིན། །མ་བསྡུས་ན་ཡང་སྤྲིན་བཞིན་འདུ། །འབྲེལ་ཚད་དོན་དང་ལྡན་པ་འབྱུང་། །དགའ་རབ་འཇམ་དཔལ་ཤྲཱི་སེང་། །པད་འབྱུང་བི་མ་ཀློང་ཆེན་དང་། །རིག་འཛིན་འཇིགས་
མེད་གླིང་པ་ཡི། །དགོངས་པ་རྒྱ་མཚོའི་གཏེར་མཛོད་ཀུན། །དུས་གསུམ་སངས་རྒྱས་བཀའ་བགྲོས་ནས། །འབྱེད་པའི་ལྡེའུ་མིག་ཁྱེད་ལ་གནང་། །དེ་ལ་ཐུགས་ཀྱིས་ལེགས་དགོངས་ནས། །འགྲོ་དོན་ལྷུན་གྲུབ་མཛོད་ཅིག་གུ །མཐའ་ཡི་མཁས་བཙུན་ཐམས་ཅད་ཀུན། །དབུས་སུ་བྱོན་ནས་བསྟན་པ་སྤེལ། །སྲོང་བཙན་བཀའ་ལས་བྱུང་བ་བཞིན། །ནམ་མཁའ་ལྟ་བུའི་འཕགས་ཆེན་རྣམས། །མ་ལུས་ཀུན་གྱི་འབྱུང་གནས་ཡིན། །རྒྱལ་བའི་དབང་པོ་ཙོང་ཁ་པས། །བསྟན་པ་རིན་ཆེན་སྤེལ་བ་བཞིན། །ཁྱེད་ཀྱང་ཉི་མ་དབུས་སུ་བྱོན། །ཀུན་མཁྱེན་ཆེན་པོའི་མཛད་པ་བཞིན། །དེང་འདིར་ཁྱེད་ཀྱིས་གྲུབ་པར་མཛོད། །སྐུ་ཚེ་ཕྲིན་ལས་འཕེལ་རྒྱས་འོང་། །བཀྲ་ཤིས་ཉི་མ་དགུང་ནས་ཤར། །ཁྱེད་འདྲའི་སྐྱེས་བུ་ས་སྟེང་དཀོན། །བདག་ཀྱང་དེང་ནས་བྱང་ཆུབ་བར། །མི་འབྲལ་སྤྱི་གཙུག་ཁྱེད་ཞབས་བསྟེན། །མཉེས་པ་གསུམ་གྱིས་ཞབས་ཏོག་སྒྲུབ། །ཡེ་ཤེས་སྐུ་ཅན་བླ་མ་མཆོག །བདག་གི་སྙིང་གི་དཀྱིལ་དུ་ཞུགས། །ཁམས་གསུམ་འཁོར་བ་དོང་སྤྲུགས་ནས། །ཕྱམ་གཅིག་གདོད་མའི་སར་འགོད་ཤོག །ཇི་སྙེད་འཁོར་བའི་སེམས་ཅན་ཀུན། །དེ་སྲིད་སངས་རྒྱས་མ་ཐོབ་བར། །བླ་མའི་འགྲོ་དོན་མི་རྫོགས་པས། །བདག་ཀྱང་ཞབས་ཕྱིར་འབྲེངས་ནས་ཀྱང་། །མཉེས་པའི་ཞབས་ཏོག་བསྒྲུབ་པར་ཤོག །དེ་སྐད་ཞུ་མཆིད་པད་དཀར་ཕྲེང་། །གང་ཤར་
བཅོས་བསྒྱུར་མེད་པ་རུ། །བསྟན་གཉིས་ཞེ་ཆེན་དར་རྒྱས་གླིང་དགོན་ནས། །མཚམས་པ་རྒན་པོ་གྱི་ན་བ། །འགྱུར་མེད་བསྟན་འཕེལ་བཟའ་པོའམ། །མིང་གཞན་གར་དབང་དགྱེས་པ་ཡི། །རྡོ་རྗེ་ཞེས་པས་གུས་པ་ཡིས། །ཞབས་པད་གཙུག་ཏུ་བཀོད་དེ་ཕུལ། །དོན་འདི་ཇི་བཞིན་འགྲུབ་པ་རུ། །དཀོན་མཆོག་བླ་མས་བྱིན་གྱིས་རློབས། །དགེའོ།། །།