ཤོག་ལྷེབ་ ༡༠༡ ནས་ ༢༠༠ བར།

---

^{[མ་དཔེ་གཟིགས་ན་འདིར་གནོན།]}

འདིར་དམ་ཚིག་ཅན་གྱི་སྐྱེ་བོས་བཏགས་པའི་ལྷའི་ཕྱག་རྒྱ་བཞིས་རྒྱས་གདབ་པའི་དབང་དུ་བྱས་ནས། དམ་ཚིག་སེམས་དཔའི་ཕྱག་རྒྱ་ཆེན་པོས་བསྐྱེད། ཡེ་ཤེས་པ་བཅུག་པ་དེ་ལ་འདེབས། གང་གིས་འདེབས་ན་ཡེ་ཤེས་པའི་ཕྱག་རྒྱ་བཞིས་འདེབས་ཏེ། དེས་བཏབ་པས་དམ་ཚིག་པ་ཡེ་ཤེས་པའི་རང་བཞིན་དུ་འགྱུར་བའོ། །གོ་རིམ་ནི། ཐུགས་དམ་ཚིག་གི་ཕྱག་རྒྱས་བསྒྲུབ། གསུང་ཆོས་ཀྱི་ཕྱག་རྒྱས་བཀོད། ཕྲིན་ལས་ཀྱི་ཕྱག་རྒྱས་ཕྲིན་ལས་ལ་སྦྱར་ནས། ཕྱག་རྒྱ་ཆེན་པོའི་ཚུལ་རབ་ཏུ་གནས་པར་བྱེད་པའོ། །གཉིས་པ་རང་གི་སྡོམ་པ་གནས་པར་བྱ་བ་ལ། རིགས་ཀྱི་རྗེས་སུ་མཐུན་པའི་དམ་ཚིག ། དེའི་མི་མཐུན་ཕྱོགས་ཀྱི་ལྟུང་བ། ཉམས་སུ་བླང་བའི་དམ་ཚིག་གསུམ་ལས། དང་པོ་ནི། རྩེ་མོར། སངས་རྒྱས་ཆོས་དང་དགེ་འདུན་དང་། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །དམ་ཚིག་བརྟན་པོར་གྱུར་པའོ། ༡ །རྡོ་རྗེ་དྲིལ་བུ་༢ཕྱག་རྒྱ་༣ཡང་། །བློ་ཆེན་གྱིས་ནི་བཟུང་བར་བྱ། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །སློབ་དཔོན་དག་ཀྱང་བཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའི། །སྡོམ་པ་དམ་ཚིག་ཡིན་པར་གསུང་། ༢ །རིན་ཆེན་རིགས་མཆོག་ཆེན་པོ་ལ། ཉིན་དང་མཚན་མོ་ལན་

---

^{[མ་དཔེ་གཟིགས་ན་འདིར་གནོན།]}

གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བའི་ཐེག་པ་གསུམ། ཉན་རང་བྱང་སེམས། །དམ་ཆོས་ཁྱོད་ཀྱིས་བཟུང་བར་བྱ། །འདི་ནི་པདྨའི་རིགས་དག་gཔའི། །དམ་ཚིག་སྡོམ་པ་ཡིན་པར་གསུངས། ༤ །ལས་ཀྱི་རིགས་མཆོག་ཆེན་པོ་ལ། སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་གྱིས། མཆོད་པའི་ལས་ཀྱང་ཅི་ནུས་བྱ། །གཉིས་པ་ལ། རྩ་བ་དང་། དེའི་རྗེས་སུ་མཐུན་པ་ཡན་ལག་གི་ལྟུང་བ་གཉིས་ལས། དང་པོ་ནི། དཀོན་མཆོག་གསུམ་དང་། རྡོར་དྲིལ་ཕྱག་རྒྱ་སློབ་དཔོན་བཞི། སྦྱིན་པ་རྣམ་བཞི། ཐེག་པ་གསུམ། སྡོམ་པ་དང་མཆོད་པ་སྟེ་བཅུ་བཞི་པོ་སྤང་ཞིང་དོར་བར་སློབ་དཔོན་ཀུན་སྙིང་བཞེད་དོ། །གཉིས་པ་ནི། རྩེ་མོ་ལས། །ཉིན་དང་མཚན་མོ་ལན་གསུམ་དུ། །ཉིན་རེ་བཞིན་དུ་བཟླ་བར་བྱ། །གང་ཚེ་ཉམས་གྱུར་རྣལ་འབྱོར་པས། །ཁ་ན་མ་ཐོ་སྦོམ་པོར་འགྱུར། །ཁྱོད་ཀྱིས་སྲོག་ཆགས་བསད་མི་བྱ། །མ་བྱིན་པར་ཡང་མི་བླང་ངོ་། །འདོད་པས་ལོག་པར་མི་སྤྱོད་ཅིང་། །བརྫུན་དུ་སྨྲ་བར་མི་༤ བྱའོ། །ཕུང་དཀྲོལ་ཀུན་གྱི་རྩ་བ་ཡི། །ཆང་ནི་རྣམ་པར་སྤང་བར་བྱ། །སེམས་ཅན་གདུལ་ཕྱིར་མ་གཏོགས་པ། །བྱ་བ་མ་ཡིན་ཐམས་ཅད་སྤང་༡༠། །དམ་པ་ཉེ་བར་བསྟེན་པར་བྱ༧། །རྣལ་འབྱོར་པ་རྣམས་བསྙེན་བཀུར་བྱ། །ལུས་ཀྱི་ལས་ནི་

---

^{[མ་དཔེ་གཟིགས་ན་འདིར་གནོན།]}

རྣམ་གསུམ་དང་། །ངག་གི་རྣམ་པ་བཞི་དག་དང་། །ཡིད་ཀྱི་རྣམ་པ་གསུམ་རྣམས་ནི། །ཅི་ནུས་པར་ནི་རྗེས་སུ་སྐྱོངས༩། །ལྷ་དང་ལྷ་མིན་གསང་བ་པ། །ཁྱོད་ཀྱིས་བརྙས་པར་མི་བྱ་ཞིང་། །ཕྱག་རྒྱ་བཞོན་པ་མཚོན་ཆ་དང་། །ཕྱག་རྒྱ་འགོམ་པར་མི་བྱའོ། །འདི་དག་དམ་ཚིག་ཡིན་པར་བཤད། །ཁྱོད་ཀྱིས་རྟག་ཏུ་བསྲུང་བར་བྱ། །རྗེས་མཐུན་སྡོམ་པ་རྒྱ་ཆེར་ནི། །གསང་བའི་རྒྱུད་ལས་རབ་ཏུ་བཤད། ཅེས་པ་ལྟར་བཅུ་གཅིག་སྟེ་དེ་དང་འགལ་ན་རྩ་བའི་ལྟུང་བ་དང་རྗེས་སུ་མཐུན་པའོ། །རྣལ་འབྱོར་གྱི་རྒྱུད་སྡེ་སྟོང་ཕྲག་དྲུག་ཏུ་དགག་བསྒྲུབ་རྩ་བ་དང་ཡན་ལག་གི་དམ་ཚིག་དང་ལྟུང་བ་མ་ཕྱེ་བར་ཅི་རིགས་པར་གསུངས་པ་དེ་དག་དང་རྗེས་སུ་མཐུན་པར་སྦྱར་ཏེ་ཤེས་པས་བསྲུང་བར་བྱའོ། །གང་ཞེ་ན་རྩེ་མོ་ལས། སངས་རྒྱས་ཆོས་དང་དགེ་འདུན་ཏེ། །གཙོ་བོ་དེ་དག་ལྷུར་བླང་བྱ། ཞེས་དང་། རྟག་པ་ཐམས་ཅད་བསྡུས་པར། །སྲོག་གི་ཕྱིར་ཡང་བྱང་ཆུབ་སེམས། །ཡོངས་སུ་གཏང་བར་མི་བྱ་ཞིང་། ཞེས་དང་། དཔལ་མཆོག་ལས། བྱང་ཆུབ་སེམས་ནི་བཏང་མི་བྱ། ཞེས་སོགས་རྒྱ་ཆེར་གསུངས་སོ། །གསུམ་པ་ནི། རྡོར་སེམས་ལ། རྩ་རྒྱུད་ལས། སྐུ་དང་གསུང་དང་ཐུགས་གསང་བ། །མཁས་པས་དམ་ཚིག་བསྲུང་བར་བྱ། ཞེས་དང་། པདྨའི་དེ་ཉིད་བསྡུས་པར། །གང་དག་འདོད་ཆགས་སྙོམས་འཇུག་

---

^{[མ་དཔེ་གཟིགས་ན་འདིར་གནོན།]}

པ། དེ་ནི་འདོད་ཆགས་ཉིད་ཀྱིས་སྦྱང་། ཞེས་དང་། དེ་བཞིན་གཤེགས་པར། སྔ་མར། སེམས་ཅན་དོན་ཕྱིར་ཁྲོ་བ་ཡང་། །ཁྲོ་བོ་ཆེན་པོ་སྟོན་པར་མཛད། །འདི་ནི་རྡོ་རྗེ་རིགས་ཆེན་གྱི། །དམ་ཚིག་འདའ་བར་དཀའ་བའོ། །ཞེས་དང་། པདྨ་དང་ནི་རིན་ཆེན་ལ། །རང་བཞིན་དག་པར་ཤེས་ནས་ནི། །དགོས་པ་དེ་དང་དེ་དག་བྱེད། །འདི་ནི་པདྨའི་རིགས་ཅན་གྱི། །དམ་ཚིག་འདའ་བར་དཀའ་བའོ། །ཞེས་གསུངས་པ་ལྟར་སོ་སོའི་རིགས་ཅན་སྦྱིན་པར་བྱ་བའི་དམ་ཚིག་གོ །ཉམས་ན་ཕྱིར་བཅོས་པ་ནི། བཟླས་པ་དང་། ཞི་བའི་སྦྱིན་སྲེག་དང་། དབང་ནོད་པ་སོགས་ཀྱིས་འཆོས་པ་དང་། གཞན་ཡང་སྙིང་པོ་རྒྱན་ལས་གསུངས་པ་དག་ཇི་ལྟར་རིགས་པར་སྦྱར་རོ། །གསུམ་པ་འབྲས་བུ་ཐོབ་པར་བྱེད་པའི་ཐབས་ལ། ཐུན་མོང་དང་། འདས་པའི་དངོས་གྲུབ་སྒྲུབ་བྱེད་དབང་པོ་རབ་དང་། བསྒོམ་པས་སྐྲག་ཅིང་བྱ་བ་ལ་ཞེན་པའི་དབང་པོ་དམན་པ་རྣམས་རྗེས་སུ་འཛིན་པའི་ཐབས་དང་གསུམ་ལས། དང་པོ་ནི། ཐབས་ཀྱི་གཙོ་བོ་དང་པོར་སྦྱོར་བ་དང་། དཀྱིལ་འཁོར་རྒྱལ་མཆོག་དང་། ལས་རྒྱལ་མཆོག་སྟེ་ཏིང་འཛིན་གསུམ་ཡིན་ལ། དེ་བསྒོམ་ནུས་པའི་སློབ་མའི་དབང་དུ་བྱས་ནས། དཔལ་མཆོག་འགྲེལ་པར། དེ་ཁོ་ན་ཉིད་རྣམ་པ་ལྔ་བསྒོམས་པས་བདག་ཉིད་རང་གི་ལྷའི་ངོ་བོ་ཉིད་དུ་བསྐྱེད་པ་བསྒོམ་པ་ནི། རྣལ་འབྱོར་

---

^{[མ་དཔེ་གཟིགས་ན་འདིར་གནོན།]}

ཞེས་བྱའོ། །ཡེ་ཤེས་སེམས་དཔའ་བཅུག་ནས་དེ་དང་ལྷན་ཅིག་ཏུ་གྱུར་པར་ལྷག་པར་མོས་པ་ནི་རྗེས་སུ་རྣལ་འབྱོར་ཞེས་བྱའོ། །རྒྱུ་བ་དང་མི་རྒྱུ་བ་ལ་སོགས་པ་ཐམས་ཅད་ངོ་བོ་ཉིད་ཀྱི་རང་བཞིན་དུ་བདག་ཉིད་བསྒོམ་པ་ནི་ཐམས་ཅད་ཀྱི་རྣལ་འབྱོར་ཞེས་བྱའོ། །རྣལ་འབྱོར་དང་རྗེས་སུ་རྣལ་འབྱོར་དང་། ཐམས་ཅད་ཀྱི་རྣལ་འབྱོར་རྣམས་བསྒོམས་པས་སེམས་རྩེ་གཅིག་ཏུ་གྱུར་པ་གང་ཡིན་པ་དེ་ནི་ཤིན་ཏུ་རྣལ་འབྱོར་ཞེས་བྱའོ། །ཞེས་སོ། །སློབ་དཔོན་གྱི་དབང་དུ་བྱས་ནས་རྣལ་འབྱོར་ཆེན་པོའི་ཐུགས་ཀར་དཀྱིལ་འཁོར་བསྒོམ་པ་སྟེ་ལྔའོ། །དེ་རྣམས་ཀྱི་ངོ་ནས་དངོས་གྲུབ་རབ་འབྲིང་ཐ་གསུམ་པ་སྒྲུབ་པའོ། །གཉིས་པ་ནི། རང་གི་དམ་ཚིག་ལ་གནས་པས་གཟུགས་བརྙན་དང་འདྲ་བ་ཉིད་དུ་རྟོགས་ནས། མཆོད་པ་དང་། ཕྱག་རྒྱ་བསྒྲུབ་པ་དང་། ངེས་པ་བསྐྱེད་ནས་བསྒྲུབས་པས་མཚན་མ་ཐོབ་པ་དང་མངོན་ཤེས་བསྒྲུབ་སྟེ་སངས་རྒྱས་ལ་སོགས་པའི་ཆ་ལུགས་འཛིན་པའི་བརྟུལ་ཞུགས་ཀྱིས་རིགས་ཐམས་ཅད་མཉེས་ཤིང་དབང་དུ་བྱས་ནས་བསྒྲུབ་ལ། ལན་བདུན་བསྒྲུབས་ཀྱང་མ་གྲུབ་ན་ལྷ་བསད་པའི་ཆོ་ག་བྱས་ལ་བསྒྲུབ་བོ། །གསུམ་པ་ནི། དམན་པ་ལ་དཀྱིལ་འཁོར་མཐོང་བའི་དུས་ཀྱི་ངེས་པ་དང་། སྔགས་བཟླས་པའི་གྲངས་དང་། རས་རིས་དང་། ཉེར་སྤྱོད་དང་། ཕྱག་རྒྱའི་མཆོད་པ་དང་། སྐྱིལ་ཀྲུང་ལ་སོགས་

---

^{[མ་དཔེ་གཟིགས་ན་འདིར་གནོན།]}

པའི་ངེས་པ་དང་ལྡན་པས་བཟླས་པ་བྱ་བ་ལ། ཚིག་དང་རྡོ་རྗེའི་བཟླས་པ་གཉིས་ལས། ཕྱི་མ་སློབ་དཔོན་སངས་རྒྱས་གསང་བས། ཀུན་རྫོབ་དམིགས་བཅས་དང་། དོན་དམ་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་གཉིས་སུ་གསུངས་ཤིང་། དེ་བཞིན་དུ་རྩེ་མོ་ལ་སོགས་པ་རྣམས་སུ་གསུངས་པ་ཡང་ཤེས་པར་བྱའོ། །ཐབས་གསུམ་པོ་དེ་རྣམས་ཀྱིས་གནས་སྐབས་ཀྱི་འབྲས་བུ་ནོར་གྱི་དངོས་གྲུབ་དང་རིག་པ་འཛིན་པ་སོགས་འགྲུབ་ལ། དེ་ནས་གྲུབ་པའི་འབྲས་བུ་དེ་དག་ཀྱང་ཐབས་རྒྱུད་དུ་བསྡུས་སོ། །བཞི་པ་འབྲས་བུ་རྣམ་པར་བཞག་པ་ནི། མངོན་བྱང་ལྔས་མངོན་པར་རྫོགས་པར་སངས་རྒྱས་ཏེ། རིགས་བཞིས་བསྡུས་པའི་དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་དང་སྤྱོད་པ་མཐའ་ཡས་པ་མི་ཟད་པ་བཀོད་པ་སྟོན་པའི་རྒྱུད་ཕྱི་མར་གྲུབ་པའོ། །དེ་ཡང་རྒྱུ་རྒྱུད་དེ་ཉིད་བག་ཆགས་དང་བཅས་པའི་དྲི་མ་མ་ལུས་པ་དང་བྲལ་བས་འཁོར་བའི་ཕ་རོལ་དུ་སོན་པ་ནི་རྒྱུད་ཕྱི་མའམ། འབྲས་རྒྱུད་དེ། ས་རྣམས་ཀྱི་མཐར་ཕྱིན་པའི་རྒྱལ་བའི་སྐུ་བཞི་འཕྲིན་ལས་དང་བཅས་པ་རྒྱུད་ཆགས་པས་ན་རྒྱུད། ངེས་ཚིག་ནི། སྲིད་པའི་བཙོན་ར་ལས་བརྒལ་བར་གྱུར་པའི་དོན་གྱིས་ན་ཕྱི་མ་སྟེ་འབྲས་རྒྱུད་དོ། །རྩེ་མོར། ཅི་ཕྱིར་རྒྱུད་དང་ཕྱི་མ་ཡིན། ས་མཐར་ཕྱིན་པའི་རྒྱལ་བ་མཆོག །སྲིད་པའི་བཙོན་ར་ལས་བརྒལ་ཡིན། ཞེས་སོ། །

---

^{[མ་དཔེ་གཟིགས་ན་འདིར་གནོན།]}

ཡང་ན། ཨུཏྟ་ར་བླ་མ་སྟེ། སྔར་གནས་ཀྱི་རྒྱུན་ཡན་ལག་ཕུལ་དུ་བྱུང་བའི་དོན་གྱིས་ན་རྒྱུད་བླ་མའོ། །བཞི་པ་རྣལ་འབྱོར་ཆེན་པོ་བླ་ན་མེད་པའི་རྒྱུད་དུ་བཀྲི་བའི་ཚུལ་ལ་སྨིན་པར་བྱེད་པ་དབང་། གྲོལ་བར་བྱེད་པ་ལམ། བོགས་འདོན་སྤྱོད་པ། མཐར་ཐུག་པའི་འབྲས་བུ་བཞི་ལས། དང་པོ་ལ། གང་ལ་ནོད་པའི་སློབ་དཔོན། གང་གིས་ནོད་པའི་སློབ་མ། གང་དུ་ནོད་པའི་དཀྱིལ་འཁོར། ཇི་ལྟར་ནོད་པའི་ཆོ་ག །གང་ནོད་པའི་དབང་གི་བསླབ་བྱ་བཤད་པ་སྟེ། །ལྔ་ལས། དང་པོ་ནི། དུས་འཁོར་ལས་དྲང་དོན་གྱི་དམ་ཚིག་དང་བསྐྱེད་རིམ་གྱི་དེ་ཁོ་ན་ཉིད་གོམས་པར་བྱེད་པ་དབང་བདུན་དང་། ངེས་དོན་གྱི་དམ་ཚིག་དང་རྫོགས་རིམ་གྱི་དེ་ཉིད་ཤེས་པ་མཆོག་དབང་གོང་མས་ཁྲིད་པར་ནུས་པའི་ཡོན་ཏན་ཅན་དང་། དགྱེས་རྡོར་ལས། རབ་མཐོང་སྔགས་ཀྱི་ཕ་རོལ་སོན། །རང་འདོད་ལྷ་དང་མཉམ་སྦྱོར་བ། །ཞེས་གསུངས་པ་ལྟ་བུའོ། །གཉིས་པ་ནི། དུས་འཁོར་ལས་ཕྱག་རྒྱ་ཆེན་པོ་མཆོག་དང་། འཇིག་རྟེན་པ་ཐུན་མོང་བའི་དངོས་གྲུབ་དོན་དུ་གཉེར་བ་གཉིས་དང་། གསང་འདུས་འགྲེལ་པར་སྣོད་ཀྱི་དབྱེ་བ་རྣམ་པ་ལྔ་གསུངས་སོ། །གསུམ་པ་ནི། དུས་འཁོར་ལ་འཇིག་རྟེན་པའི་དངོས་གྲུབ་ཀྱི་སླད་དུ་རྡུལ་ཚོན་དང་། མཆོག་སྒྲུབ་པའི་དོན་དུ་དཀྱིལ་འཁོར་རྣམ་པ་གསུམ་གསུངས་སོ། །བཞི་པ་ནི། དང་པོར་བསྙེན་པ་

---

^{[མ་དཔེ་གཟིགས་ན་འདིར་གནོན།]}

བྱས་ནས་དཀྱིལ་འཁོར་དུ་བདག་འཇུག་ཟིན་པའི་མཐར་སློབ་མ་གཞུག་པའི་དོན་དུ་གསོལ་བ་བཏབ་པ་ཡན་ཆད་བྱེད་པ་སློབ་དཔོན་སྨིན་པའི་ལམ་ཡིན་ལ། དེ་ནས་སློབ་མ་རྣམས་དང་པོར་རྡུལ་ཚོན། དེ་ནས་ཀླུལུས་དཀྱིལ། དེ་ནས་བྷ་ག །དེ་ནས་བྱང་སེམས་ཀྱི་དཀྱིལ་འཁོར་དུ་བཅུག་ནས། སློབ་དཔོན་བཞི་ནི། རྡོ་རྗེ་སློབ་དཔོན་དང་། མ་དང་། ཕྱག་རྒྱ་དང་། རང་སེམས་བཞི་ལ་རྩོད་མེད་ཞལ་བཞེད་དོ། །དེ་ལྟར་ཡང་། སཾ་ཊར། སློབ་དཔོན་སྨིན་པའི་ལས་ཀྱིས་ནི། །སློབ་མ་ཡོངས་སུ་སྨིན་པར་བྱ། །ཞེས་སོ། །ལྔ་པ་བསྲུང་བྱ་རྩ་ལྟུང་བཅུ་བཞི་ཡན་ལག་དང་བཅས་པ། བསྒྲུབ་བྱ་རིགས་དྲུག་གི་དམ་ཚིག་ཉམས་སུ་བླང་བ་དང་འགྲེལ་པའི་དམ་ཚིག །ཉམས་ན་ཕྱིར་བཅོས་དང་བཞི་ལས། དང་པོ་ནི། རྩ་བ་དང་ཡན་ལག་གཉིས་ལས། དང་པོ་ནི། བླ་མ་ལ་སྨོད་སོགས་བཅུ་བཞི་སྟེ། དེའི་གཉིས་པ་རྡོ་རྗེ་སྤུན་ལ། སྤྱི་རིང་ནང་འདྲེས་ཀྱི་མཆེད་རྣམས་སློབ་དཔོན་ལཱ་སྱ་བཛྲའི་རྗེས་སུ་འབྲང་ལ། ལྔ་པ་བྱང་ཆུབ་སེམས་དོར་བ་ལ་ཀུན་རྫོབ་དང་དོན་དམ་གཉིས་སུ་ཕྱེ་སྟེ། བརྟག་གཉིས་ལས། ཀུན་རྫོབ་ཀུནྡ་ལྟ་བུ་ཉིད། །དོན་དམ་བདེ་བའི་གཟུགས་ཅན་ནོ། །ཞེས་བཤད་ཅིང་དམ་པ་དང་པོའི་རྒྱུད་ལས་ཀྱང་ལྷག་པར་བསྟན་ཏོ། །དེ་དག་ཀྱང་སྙིང་པོ་རྒྱན་གྱི་དགོངས་པ་ལྟར། དེ་དག་རེ་རེ་བཞིན། ཡུལ། བསམ། སྦྱོར་བ།

---

^{[མ་དཔེ་གཟིགས་ན་འདིར་གནོན།]}

དུས། ཉེས་པ། ལན་གྲངས་ཏེ་དྲུག་གིས་བསྒྱུར་བས་། དེ་ཡང་ལྕི་འབྲིང་ཡང་གསུམ་གྱིས། བསྒྱུར་བས་རིག་པ་འཛིན་པའི་ཁྲིམས་གཉིས་བརྒྱ་ང་གཉིས་ཞེས་བྱའོ། །གཉིས་པ་ནི་དམ་ཚིག་དང་མི་ལྡན་པའི་རིག་མ་བསྟེན་པ་སོགས་བརྒྱད་དོ། །གཞན་ཡང་ཕྲ་མོར་བཤད་པ་ཡང་ངོ་། །གཉིས་པ་ནི། རིགས་དྲུག་གི་དམ་ཚིག་ལ་དྲང་ངེས་མ་ཕྱེ་བ་དང་ཕྱེ་སྟེ་དུས་ཀྱི་འཁོར་ལོ་ལས་འདི་སྐབས་འདོད་པའི་རྡོ་རྗེ་ཞེས་རྡོ་རྗེ་རྩེ་ལྔ་པ་སྟེ་མི་བསྐྱོད་པའི་མཚོན་བྱེད་དུ་བཤད། གཉིས་སུ་གསུངས་སོ། །གཞན་ཡང་བདེ་མཆོག་རྩ་རྒྱུད་ལས་དེའི་དབྱེ་བ་བརྒྱད་དུའང་གསུངས་སོ། །སྤྱིར་དམ་ཚིག་ཅེས་པ། རྒྱས་པར། ས་མ་ཡ་མཉམ་ཇི་བཞིན་སྤྱོད།། ༈ །།གྲུབ་པའི་མཐའ་དང་ཕུན་སུམ་ཚོགས། །ཁྲིམས་བཅའ་གཞན་ཡང་རྒྱས་པར་བསྟན། །བརྡ་དང་དུས་སྐད་རྣམས་ལའོ། །ཞེས་དོན་བཅུར་འཇུག་པར་གསུངས། དེ་ཡང་དག་པ་ངོ་བོ་ཉིད་ཀྱི་སྐུ་དང་ཡེ་ཤེས་གཅིག་ཏུ་བསྡོམས་པ་རྒྱལ་བ་མཆོག་གི་འདུས་པ་དག་པའི་རྣལ་འབྱོར་དང་། ཐུགས་དང་ཆོས་ཀྱི་སྐུ་གཅིག་ཏུ་བསྡོམས་པ་རྒྱལ་བ་མཆོག་གི་འདུས་པ་ཆོས་ཀྱི་རྣལ་འབྱོར་དང་། གསུང་དང་ལོངས་སྤྱོད་རྫོགས་སྐུ་གཅིག་ཏུ་བསྡོམས་པ་རྒྱལ་བ་མཆོག་གི་འདུས་པ་སྔགས་ཀྱི་རྣལ་འབྱོར་དང་། སྲིད་པ་གསུམ་གྱི་མཆེད་སྐུ་དང་སྤྲུལ་པ་གཅིག་ཏུ་བསྡོམས་པ་རྒྱལ་བ་མཆོག་གི་འདུས་པ་དབྱིབས་ཀྱི་རྣལ་འབྱོར་ཏེ། །ས་མ་ཡ་

---

^{[མ་དཔེ་གཟིགས་ན་འདིར་གནོན།]}

འདུས་པའམ་ཚོགས་པ་ལ་འཇུག་པས་སོ། །དེ་ལྟར་སྡོམ་འབྱུང་ལས། །སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་ཡི་གེ་ལ་རབ་གནས། །སྐུ་དང་གསུང་མཆོག་ཐུགས་ཀྱི་ལས། །རྣམ་པ་ཀུན་མཆོག་སྡོམ་པའོ། །ཞེས་གསུངས་སོ། །ཡང་ན་ཉེར་བསྒྱུར་སམ་དོན་ལས་མི་འགྱུར་བའི་བདེ་བ་རྫོགས་པའོ། །གསུམ་པ་དུས་འཁོར་ལས་གསུངས་པའི་བརྟུལ་ཞུགས་ཉེར་ལྔ་དང་མངོན་བརྗོད་བླ་མ་ལས་མཆོད་པའི་དེ་ཁོ་ན་ཉིད་དགུ་སོགས་དང་། གུར་ལས་དཀོན་མཆོག་གསུམ་མི་སྤང་བ་སོགས་བཅུ་བཞི་དང་། གཞན་ཡང་འབུམ་སྡེ་ནི་མཚོན་པར་བྱེད་པ་སྟེ་སེམས་ཅན་ལ་རྣམ་པར་རྟོག་པའི་བྱེ་བྲག་བསམ་གྱིས་མི་ཁྱབ་པས་གཉེན་པོ་འདུལ་བྱེད་ཀྱི་དམ་ཚིག་ཀྱང་དེ་རྙེད་དུ་གསུངས་སོ། །བཞི་པ་ནི། རྡོ་རྗེ་སྙིང་པོ་རྒྱན་གྱི་རྒྱུད་སོགས་ལས་རྒྱས་པར་བསྟན་པ་བཞིན་ནོ། །གཉིས་པ་གྲོལ་བྱེད་ཀྱི་ལམ་ནི་རིམ་པ་གཉིས་འཁོར་དང་བཅས་པ་སྟེ། དང་པོ་ནི་ཟབ་དང་མི་ཟབ་པ་ལས་ནང་དང་ཕྱིའི་དབྱེ་བ་སོགས་གསུང་ལ། རྫོགས་རིམ་ལ་ཇོ་བོ་མི་མཆོག་པས། །གཏུམ་མོ་ལམ་གྱི་གཞི་མར་མཛད་ནས། །གཅིག་ཆར་བ་ཡི་བསྲེ་སྐོར་གསུམ། །ཐུགས་ཀྱི་བདག་ཉིད་ཆོས་ཀྱི་སྐུ། །ཐོད་རྒལ་བ་ཡི་བསྲེ་སྐོར་གསུམ། །ལོངས་སྐུ་སྐུ་ཡི་བདག་ཉིད་ཅན། །རིམ་སྐྱེས་པ་ཡི་བསྲེ་སྐོར་གསུམ། །སྤྲུལ་པ་གསུང་གི་བྱེད་པར་འགྱུར། །ཞེས་སོ། །དེ་ཡང་གསུང་ལས་རླུང་

---

^{[མ་དཔེ་གཟིགས་ན་འདིར་གནོན།]}

ཉི་མའི་སྟེང་བཅིང་པའི་བྱེད་ལས་ཀྱི་རྩ་རྣམ་པར་དག་པ་སྤྲུལ་པའི་སྐུ་མངོན་དུ་བྱེད་པ་རིམ་སྐྱེས་པའི་བསྲེ་བ་གསུམ་སྐུ་རྡོ་རྗེའི་རྣལ་འབྱོར། རྩ་རྣམ་པར་དག་པས་ལས་རླུང་དབུ་མར་ཟོས་པ་སྲོག་གི་གཟུགས་ལོངས་སྐུ་གསུང་རྡོ་རྗེར་བྱེད་པ་ཐོད་བརྒལ་བའི་བསྲེ་སྐོར་གསུམ་གསུང་རྡོ་རྗེའི་རྣལ་འབྱོར་དང་། ཐུགས་ཐིག་ལེ་འཕོ་བ་འཛག་མེད་དུ་འཆིང་བས་རིག་མའི་སྐྱེས་བུ་ཆོས་ཀྱི་སྐུར་བྱེད་པ་ཅིག་ཅར་བའི་བསྲེ་བ་གསུམ་ཐུགས་ཀྱི་རྣལ་འབྱོར་ཏེ། སྒོ་གསུམ་གསང་གསུམ་དུ་བསྲེ་བས་ན་བསྲེ་བ་སྟེ། དེ་ཉིད་མ་དག་པའི་སྣང་བ་དག་པར་འཕོ་བའི་ཕྱིར་འཕོ་བ། དེ་ལྟ་བུའི་གནད་ཀྱིས་རྒྱུ་སེམས་ཅན་འབྲས་བུ་སངས་རྒྱས་སུ་མཚམས་སྦྱོར་བས་བསྲེ་འཕོ་གནད་ཀྱི་མཚམས་སྦྱོར་ཞེས་གསུངས་སོ། །གསུམ་པ་བོགས་འདོན་སྤྱོད་པ་ལ། ངོ་བོ་ནི། ནཱ་རོ་འགྲེལ་ཆེན་ལས། སྤྱོད་པ་ཞེས་བྱ་བ་ནི་རྡོ་རྗེའི་སྤྱོད་པ་ཕྱག་རྒྱ་ཆེན་མོ་དང་ལྷན་ཅིག་སྐྱེས་པ་སྟེ། རྡོ་རྗེ་པདྨ་དག་གིས་མི་འཛག་པའི་བདེ་བ་ཐོབ་པའོ། །ཞེས་སོ། །དབྱེ་ན། ཀུན་བཟང་། གསང་བ། ཚོགས་སམ་རིག་པ་བརྟུལ་ཞུགས། ཕྱོགས་ལས་རྣམ་རྒྱལ་གྱི་སྤྱོད་པ་སྟེ་བཞིའོ། །གསང་འདུས་ལས་སྤྲོས་བཅས་སྤྲོས་མེད་ཤིན་ཏུ་སྤྲོས་མེད་གསུམ་དུ་གསུངས་སོ། །བཞི་པ་མཐར་ཐུག་གི་འབྲས་བུ་ནི། དེ་ཡང་མི་ཟབ་པའི་བསྐྱེད་རིམ་བསྒོམ་ནས་ཡེ་ཤེས་ཀྱི་ཕྱག་རྒྱ་ཙམ་བསྟེན་

---

^{[མ་དཔེ་གཟིགས་ན་འདིར་གནོན།]}

པས་འོག་མིན་དང་། ལས་རྒྱ་བསྟེན་པས་འདོད་ལྷའི་ལུས་ཙམ་དུ་འགྱུར་བའི་ཕྱིར་འཇིག་རྟེན་པའི་དངོས་གྲུབ་དང་། འཇིག་རྟེན་ལས་འདས་པའི་དངོས་གྲུབ་མི་འགྱུར་བའི་བདེ་བ་ཆེན་པོས་འགྱུར་བའི་བག་ཆགས་བཅོམ་པ་ལས་འདོད་ཆགས་ལ་སོགས་པ་གསུམ་གྱི་བདག་ཉིད་མ་རིག་པ་འགགས། དེ་འགགས་པས་འདུ་བྱེད་ནས་རྒ་ཤིའི་བར་འགགས་ལ། དེ་འགགས་པས་ཕྱི་རོལ་དུ་ཁྱིམ་བཅུ་གཉིས། ཞག་སུམ་བརྒྱ་དྲུག་བཅུ། ཆུ་ཚོད་༢༡༤༠༠སོགས་འགག་ཅིང་། ནང་དུའང་དུས་སྦྱོར་སོགས་ཀྱི་འཕོ་བ་བཅུ་གཉིས་སོགས་འགག་གོ །དེ་འགགས་པས་ལུས་འགགས་ཏེ། དེ་ལྟར་ཡན་ལག་བཅུ་གཉིས་འགགས་པས་ཁམས་བཅོ་བརྒྱད་ཀྱི་རྣམ་འགྱུར་དང་བྲལ་བའི་བདེ་བ་ཆེན་པོའི་སྐུ་བརྙེས་པ་ལ་འགག་པ་ཡིན་ནོ། །དེ་ཉིད་འགྱུར་བ་མེད་པ་ལྷན་ཅིག་སྐྱེས་པའི་ས་དང་། གཉིས་སུ་མེད་པ་ཆོས་ཀྱི་སྐུ་དང་། མི་ཟད་ཅིང་གཞོམ་དུ་མེད་པའི་སྒྲའི་བདག་ཉིད་ལོངས་སྤྱོད་རྫོགས་པའི་སྐུ་དང་། ཞི་དྲག་ལ་སོགས་པའི་དབྱིབས་ཏེ་རྫུ་འཕྲུལ་གྱིས་བགྲོད་པ་ཅན་སྤྲུལ་པའི་སྐུའོ། །དེ་ཡང་ཐམས་ཅད་མཁྱེན་པ་དང་། ཡེ་ཤེས་སྐུ་དང་། ཉིན་མོར་བྱེད་པ་དང་། པདྨ་འདབ་མ་རྒྱས་པའི་སྤྱན་ཞེས་ཀྱང་བྱའོ། །དེ་ཉིད་ཚེ་འདི་ཉིད་ལ་འགྲུབ་པའང་དུས་འཁོར་ལས། །གདོལ་པ་སྨྲིག་མ་མཁན་ལ་སོགས། །མཚམས་མེད་ལྔ་ནི་བྱེད་པ་རྣམས།

---

^{[མ་དཔེ་གཟིགས་ན་འདིར་གནོན།]}

སྔགས་ཀྱི་སྤྱད་པ་རྗེས་སྤྱད་ན། སྐྱེ་འདི་ཉིད་ལ་འཚང་རྒྱ་འགྱུར། ཞེས་དང་། དེར་མ་གྲུབ་ཀྱང་བར་དོར་འགྲུབ་སྟེ། རྒྱུད་དུ། ཟུང་གི་རླུང་དག་འགག་པ་ན་ནི་གཙུག་ཏོར་ཕུག་ནས་མཆོག་གི་གྲོང་ཁྱེར་དག་ཏུ་འགྲོ་བར་འགྱུར། །དེ་ལྟར་ཡིད་ལ་རྡོ་རྗེ་རབ་ཏུ་སད་པས་ཡུལ་དང་བཅས་པ་མཁའ་ལ་སྤྱོད་པ་ཉིད་དུ་འགྱུར། ཞེས་སོ། །དྲི་མེད་འོད་ལས། ཅི་སྟེ་གང་གི་ཚེ་ལམ་དུ་རབ་ཏུ་ཞུགས་པ་རྣལ་འབྱོར་མ་ཐོབ་པར་འཆི་བར་འགྱུར་ན་དེའི་ཚེ་འཛིན་པ་སྟེ་བག་ཆགས་སྤྱི་ལ་སླར་ཡང་མིའི་སྐྱེ་བ་གཞན་ལ་ཐམས་ཅད་ཐོབ་པར་འགྱུར་ཏེ། སྐྱེ་བ་བདུན་གྱི་མཐར་ཐུག་པས་བརྩོན་འགྲུས་དང་མི་ལྡན་པར་གྱུར་ཅིང་ཡེ་ཤེས་མ་བསྒོམས་ཀྱང་ངོ་ཞེས་པའི་ངེས་པའོ། །ཞེས་གསུངས་སོ། །རྩེ་མོར། སྐྱེ་དང་སྐྱེ་བ་ཐམས་ཅད་དུ། །རྡོ་རྗེ་ཅན་ནི་མངོན་བརྩོན་འགྱུར། །སྐྱེ་བ་བཅུ་དྲུག་མཐར་ཐུག་པས། །ཞི་བ་སངས་རྒྱས་ཉིད་ཐོབ་འགྱུར། ཞེས་སོ། ཤུ་བྷཾ། །ལུས་ངག་ཡིད་གསུམ་ཐབས་དང་ཤེས་རབ་ཟབ་མོའི་བདག་ཉིད་ཅན་དུ་བསྡམས་པའི་ཚུལ་ཁྲིམས་སྔགས་སྡོམ་གྱི་མཚན་ཉིད་ཡིན་ཏེ། བྱ་བའི་རྒྱུད་ཕྱག་རྡོར་དབང་བསྐུར་བ་ལས། གང་གི་ཚེ་བྱང་ཆུབ་སེམས་དཔའ་སྔགས་ཀྱི་སྒོ་ནས་སྤྱད་པ་སྤྱོད་པས་བདག་ཉིད་ལྷའི་གཟུགས་བྱས་ལ། ཐེ་ཚོམ་མེད་པའི་ཡིད་ཀྱི་ང་རྒྱལ་བསྐྱེད་ཅིང་འགྲོ་ཡང་རུང་། འགྲེང་ཡང་རུང་།

---

^{[མ་དཔེ་གཟིགས་ན་འདིར་གནོན།]}

འདུག་ཀྱང་རུང་། རྟག་ཏུ་དུས་ཐམས་ཅད་དུ་བསྐྱོང་ཅིང་མི་གཡོ་བ་དེའི་ཚེ་ཞི་བའི་བློ་གྲོས། བྱང་ཆུབ་སེམས་དཔའི་སྤྱོད་པ་སྔགས་ཀྱི་སྒོར་སྤྱོད་པའི་བྱང་ཆུབ་སེམས་དཔའ་ཆེན་པོ་ཚུལ་ཁྲིམས་དང་ལྡན་པ་ཡིན་ནོ། །ཞེས་དང་། རྣམ་སྣང་མངོན་བྱང་ལས། ཐབས་དང་ཤེས་རབ་ལྡན་པ་ལ། །བསླབས་ནས་བླ་མེད་བྱང་ཆུབ་ནི། །འདུས་མ་བྱས་པ་དེ་འཐོབ་བོ། །ཐབས་དང་མི་ལྡན་ཡེ་ཤེས་དང་། །བསླབ་པ་དག་ཀྱང་བཤད་པ་ནི། །དཔའ་བོ་ཆེན་པོས་ཉན་ཐོས་རྣམས། དེ་ལ་གཟུད་པའི་ཕྱིར་བཤད་དོ། །ཞེས་དང་། རྣལ་འབྱོར་གྱི་རྒྱུད་ལས། །འདི་ནི་རྡོ་རྗེའི་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་ནི། །དེ་ཉིད་དུ་ནི་འབབས་པར་ཤོག །ཅེས་དང་། རྣལ་འབྱོར་བླ་མེད་ཀྱི་རྒྱུད་ལས། །སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་རྣམ་པར་རབ་ཏུ་གནས། ཞེས་གསུང་པས་སོ།། ༈ །།ཐར་པ་ནི་མྱ་ངན་ལས་འདས་པ་ངེས་པར་འབྱུང་བའིts ཡིན་ལ། སོ་སོ་བ་ནི་དེའི་རྒྱུ་དགེ་སློང་གི་སྡོམ་པ་ལ་སོགས་པ་སྟེ། དེ་གཙོ་བོར་བསྟན་པ་ཡིན་པས་མི་ཟད་པའམ་གྲངས་མེད་པའི་བསྡུ་བ་བྱས་པས། པྲ་ཏི་མོཀྵ། སོ་སོར་ཐར་པ་སྟེ་ཐེག་དམན་གྱི་ཉམས་ལེན་གཙོ་བོར་གྱུར་པ་ཡིན་ལ། སྡོམ་པ་དང་བར་མའི་ཚུལ་ཁྲིམས་ཀྱིས་བསྡུས་པའོ། །གཞན་དོན་དུ་རྫོགས་བྱང་ཐོབ་འདོད་ཀྱི་བློ་ནི་ཀུན་རྫོབ་སེམས་བསྐྱེད་ཡིན་ལ།

---

^{[མ་དཔེ་གཟིགས་ན་འདིར་གནོན།]}

དེ་ཉིད་སྤོང་བའི་སེམས་ཀྱིས་སྤོང་བའི་སེམས་ནི། ཟིན་པ་ལས་བྱང་སྡོམ་དུ་བཞག་པ་སྟེ། རྒྱུ་ཕ་རོལ་ཏུ་ཕྱིན་པའི་ཐེག་པའི་ཉམས་ལེན་གྱི་གཙོ་བོར་གྱུར་པ་ཡིན་ལ། སྨོན་པ་དང་འཇུག་པས་བསྡུས་པའོ། །རིག་པ་ནི་ཐབས་ཤེས་ཟུང་འཇུག་གི་སེམས་ཡིན་ལ། འཛིན་པ་ནི་དེ་ལ་གནས་ཏེ། དེས་སྒོ་གསུམ་བསྡམས་པས་ན་སྡོམ་པ་སྟེ། རིག་པ་འཛིན་པའི་སྡོམ་པ་ཞེས་བྱ་བ། འབྲས་བུ་རྡོ་རྗེ་ཐེག་པའི་ཉམས་ལེན་གྱི་གཙོ་བོར་གྱུར་པ་ཡིན་ལ། དོན་དམ་པའི་བྱང་ཆུབ་སེམས་ཀྱིས་བསྡུས་པའོ། །ཚུལ་འདི་ལས་ཀྱང་འབྲས་བུ་ལམ་བྱེད་ཀྱི་གནད་གོ་བར་འགྱུར་རོ། །དོན་དམ་པར་དེ་ཡང་། རྒྱུད་སྡེའི་དབང་གིས་དུ་མར་གྱུར་ཀྱང་ཐབས་དང་ཤེས་རབ་ཟུང་དུ་འཇུག་པའི་ཡེ་ཤེས་མིང་ཙམ་རྣམ་པར་བཞག་པ་ནི་མི་སྔར་ལུང་དྲང་ལས་གསལ། མཐུན་པ་ཡིན་ནོ།། ༈ །།མཁས་གྲུབ་རྗེའི་རྒྱུད་སྡེ་སྤྱི་རྣམ་དུ། བྱ་རྒྱུད་དེ་བཞིན་གཤེགས་པའི་རིགས་ཀྱི་དབང་བསྐུར་བ་ཐོབ་ན་རིགས་གཞན་གཉིས་ཀའི་ལྷ་སྔགས་བསྒོམ་བཟླས་དང་། རྒྱུད་ཉན་པ་ཙམ་དབང་ཡང་། འོན་ཏེ་ལྷ་དེ་ཡི་ལུང་རྗེས་གནང་ཙམ་ཐོབ་དགོས་པར་ལེགས་གྲུབ་ལས་བཤད་ཅིང་། གཞན་ལས པདྨའི་རིགས་ལ་རྡོ་རྗེ་དང་། རྡོ་རྗེའི་རིགས་ལ་ཁོ་རང་ལས་མི་དབང་བར་གསུངས། བྱ་སྤྱོད་ལ་བྱང་སེམས་ལས་ཐུན་མིན་གྱི་སྡོམ་པ་མེད་པར་བཞེད། དམ་ཚིག་བསྡུས་པ་ངོ་བོས་མཛད་པ་བཞེད་དེ་བདག་

---

^{[མ་དཔེ་གཟིགས་ན་འདིར་གནོན།]}

བསྐྱེད་ཡོད་པར་འདོད།། ༈ །།བྱང་སྡོམ་སྐྱེ་རྒྱུ་ལ་རྐྱེན་བཞི་སྟེ། བྱང་ཆུབ་སེམས་དཔའི་མཐུ་དཔག་ཏུ་མེད་པ་མཐོང་བ་དང་ཐོས་པ། བྱང་ཆུབ་སེམས་དཔའི་སྡེ་སྣོད་ཐོས་ཤིང་དད་པ། བྱང་ཆུབ་སེམས་དཔའི་ཆོས་ནུབ་ཏུ་ཉེ་བ་དང་། དུས་སྙིགས་མའི་མཐུས་ཡིད་དབྱུང་བ་སྟེ་བཞིའོ། །གཉིས་པ་རྒྱུ་བཞི་སྟེ་རིགས་ཕུན་སུམ་ཚོགས་པ། དགེ་བའི་བཤེས་གཉེན་གྱིས་ཟིན་པ། སེམས་ཅན་ལ་སྙིང་རྗེ་བ། དཀའ་བ་སྤྱད་པ་ལ་མི་འཇིགས་པའོ། །སྟོབས་བཞི་སྟེ། རང་གི་མཐུས་བླ་ན་མེད་པའི་བྱང་ཆུབ་འདོད་པ་ནང་གི གཞན་མ་མཐུས་བསྐུལ་བས་གཞན་གྱི་སྔོན་ཐེག་ཆེན་ལ་གོམས་པས་ད་ལྟ་བྱང་སེམས་རྩོལ་མེད་དུ་སྐྱེ་བ་རྒྱུའི། ཚེ་འདི་ཉིད་ལ་ཐེག་པ་ཆེན་པོའི་བཤེས་གཉེན་བསྟེན་ཅིང་སྡེ་སྣོད་ལས་སྦྱངས་པ་སྦྱོར་བའི་སྟོབས་ཏེ་བཞིའོ།། ༈ །།ཀླུ་སྒྲུབ་ཀྱི་ལུགས་ལ་བསླབ་པ་ཡོངས་སུ་སྦྱོང་བས་ཚུལ་ཁྲིམས་ཕུན་སུམ་ཚོགས་པར་བྱ་བའི་ཐབས་ལ། བསླབ་བཏུས་ལས། སེམས་ཅན་ཀུན་ལ་བཏང་བ་དང་། །དེ་བསྲུང་དག་པ་སྤེལ་བའོ། །ཞེས་སོ། ༧ དེ་ལ་བཏང་བ་ནི། སེམས་ཅན་ཀུན་ལ་རང་གི་མགོ་དང་རྐང་ལག་ལ་སོགས་པ་ལུས། བུ་དང་ཆུང་མ་སོགས་ལོངས་སྤྱོད། དུས་གསུམ་གྱི་དགེ་བའི་ཚོགས་སྟེར་བའོ། ༧ །གཉིས་པ་སྲུང་བ་ལ་གསུམ། ལུས། ལོངས་སྤྱོད། དགེ་བའོ། །དང་པོ་ལ་ནོར་བཟང་གི་རྣམ་ཐར་ལྟར་བཤེས་གཉེན་

---

^{[མ་དཔེ་གཟིགས་ན་འདིར་གནོན།]}

མི་གཏོང་བ་དང་༡། བྱང་ཆུབ་སེམས་དཔའི་བསླབ་བྱ་མདོ་སྡེ་དག་ལས་འབྱུང་བ་སྟེ་དེ་དག་ཚུལ་བཞིན་དུ་ཐོས་བསམ་བྱ་བ་དམ་པའི་ཆོས་འཛིན་ལ། གནོད་པར་འགྱུར་བ་སྤོང་བ་སྟེ། དེ་ཡང་། ལུས་ངག་ཡིད་གསུམ་མ་བསྡོམས་པ་དང་བདུད་ཀྱི་ལས་མི་དགེ་བའི་ཆོས་ཀྱི་རྗེས་སུ་འཇུག་པ། མི་དགེ་བའི་བཤེས་བསྟེན་པ། སྨོན་སེམས་བརྗེད་པ། སེམས་ཅན་ཡོངས་སུ་མ་སྨིན་པ་ལ་དམ་པའི་ཆོས་ཟབ་མོ་སྟོན་པ་སོགས་བྱང་ཆུབ་སེམས་དཔའི་འཁྲུལ་པ་དང་། ཆོས་དང་མཐུན་པའི་ཆོས་ཉན་པ་དང་། དེ་བཞིན་གཤེགས་པ་ལ་ཞལ་ཏ་བྱ་བ་ལས་ཕྱིར་ཕྱོགས་པ་གནོད་པ་དང་། གཞན་རབ་བྱུང་བ་སོགས་ལ་བར་དུ་གཅོད་པ། མི་དགེ་བ་བཅུའི་ལས་ལ་འཇུག་པ། དགེ་བའི་རྩ་བའི་བར་གཅོད་བྱེད་པ། བྱང་ཆུབ་སེམས་དཔའ་ལ་ཕྲག་དོག་བྱེད་པ། བྱང་ཆུབ་སེམས་དཔའ་ལ་སྐུར་པ་བཏབ་པ། ལས་ཀྱི་སྒྲིབ་པ་བསགས་པ། བྱང་ཆུབ་སེམས་དཔའ་བརྙས་པ། དམ་པའི་ཆོས་སྤོང་པ། །ཆོས་སྨྲ་བ་སྤང་བ། ཤེས་རབ་ལས་གཞན་གྱི་ཕ་རོལ་ཏུ་ཕྱིན་པའི་ཐབས་ཁྱད་དུ་གསོད་པ་སྟེ་བཅོ་བརྒྱད་དྲན་པ་དང་ལྡན་པས་སྤོང་བ་དང་། གང་གིས་བདག་བརྟགས་པ་དང་། མཐོང་བ་དང་། ཐོས་པས་འཇིག་རྟེན་མ་དད་པའི་ཆ་ཐམས་ཅད་སྤོང་བ་དང་། གཏན་དུ་བའི་སྨན་དང་། ན་བའི་སྨན་དང་། གོས་དང་། གནས་མལ་སོགས་ལོངས་སུ་

---

^{[མ་དཔེ་གཟིགས་ན་འདིར་གནོན།]}

སྤྱོད་པར་བྱ་བའི་གཞི་རྣམས་ལ། །སྦྱིན་པ་པོ་ལ་ཕན་གདགས་པ་དང་། ལུས་ཀྱི་སྲིན་བུ་གསོ་བ་དང་། སེམས་ཅན་གྱི་དོན་སྒྲུབ་སྟེ་གནས་གསུམ་དུ་དྲན་པ་ཉེ་བར་བཞག་སྟེ་ཟ་བ་དང་། གཞན་ཡོངས་སུ་སྤྱད་ནད་སྨན་སོགས། པ་ཐམས་ཅད་ཀྱང་སེམས་ཅན་གྱི་དོན་དུ་བྱིན་གྱིས་བརླབ་པ་སོགས་སོ། །གཉིས་པ་ལོངས་སྤྱོད་སྲུང་བ་ནི། བདག་གཞན་གྱི་བྱང་ཆུབ་ཀྱི་ཕྱོགས་དང་ཐོས་སོགས་ཀྱི་བར་ཆད་དུ་འགྱུར་བའི་གཏོང་བའམ་མི་གཏོང་བ་གཉིས་ཀ་བསྲུང་བའོ། །གསུམ་པ་ནི། རང་གི་དགེ་བ་སྤྱོད་པ་ལ་མངོན་མཐོ་དང་མྱང་འདས་ལ་སོགས་པའི་རྣམ་སྨིན་འདོད་པ་དང་། སྦྱིན་བ་སོགས་ཟིན་པ་ལ་འགྱོད་པ་དང་། གཞན་ལ་ངོར་སོགས་བསྒྲགས་པ་རྣམས་བསྲུང་བར་བྱའོ། །རྙེད་པ་ཐོབ་པ་དང་བཀུར་སྟི་ལ་སོགས་པ་ཆགས་པས་བདག་གིར་བྱ་བ་སྤང་ཞིང་། རྟག་ཏུ་ཁེངས་པ་བསྐྱུངས། བྱང་ཆུབ་སེམས་དཔའ་ལ་དད་པར་བྱ། མདོ་སྡེ་དག་ཐོས་པའམ་མ་ཐོབ་པ་དག་ལའང་ཐེ་ཚོམ་མི་བྱ་སྟེ། མདོར་བསྡུ་ན་དགེ་བའི་རྩ་བ་ཐམས་ཅད་ཀྱང་བྱང་ཆུབ་ཡོངས་སུ་བསྔོ་བར་བྱའོ། ༧ །གསུམ་པ་དག་པ་ལའང་གསུམ། དང་པོ་ལུས་དག་པར་བྱ་བ་ནི། སྡིག་པ་སྟོབས་བཞིས་སྦྱོང་བ་དང་། ཉོན་མོངས་པ་སྦྱོང་བའི་ཕྱིར། ཐོག་མར་བཟོད་པ་བསྒོམ། དེ་ནས་ཐོས་པ་བཙལ། དེ་ནས་ནགས་སུ་བརྩོན་འགྲུས་བརྩམས་ཏེ། མི་སྡུག་པ་དང་།

---

^{[མ་དཔེ་གཟིགས་ན་འདིར་གནོན།]}

བྱམས་པ་དང་། རྟེན་འབྲེལ་བསྒོམས་ནས་སེམས་ལས་སུ་རུང་བ་དྲན་པ་ཉེ་བར་བཞག་པ་བཞི་ལ་འཇུག་ཅིང་། དེས་སེམས་འོས་སུ་གྱུར་པ་ན་སྟོང་པ་ཉིད་ལ་འཇུག་གོ །གཉིས་པ་ལོངས་སྤྱོད་དག་པ་ནི། ཚུལ་འཆོས་དང་ཁ་གསག་སོགས་ཁ་ན་མ་ཐོ་བ་དང་བྲལ་བའི་རྙེད་པ་ལ་ཞེན་མེད་དུ་ལོངས་སྤྱོད་པའོ། །དགེ་བ་དག་པར་བྱ་བའི་ཕྱིར། ཤེས་རབ་ཀྱི་ཡེ་ཤེས་ཀྱིས་ནི་སེམས་ཅན་ཐམས་ཅད་ཀྱི་ཉོན་མོངས་པ་ཡོངས་སུ་འདོར་ཞིང་། ཐབས་ཀྱི་ཡེ་ཤེས་ནི་སྒྱུ་མའི་མཚན་ཉིད་ཅན་གྱིས་སེམས་ཅན་ཐམས་ཅད་ཡོངས་སུ་མི་གཏོང་བ་སྟེ། སྦྱིན་སོགས་ལྔ་ཤེས་རབ་ཀྱི་ཕ་རོལ་ཏུ་ཕྱིན་པས་ཟིན་པར་སྤྱོད་པ་སྟེ། བསླབ་བཏུས་ལས། སྟོང་ཉིད་སྙིང་རྗེའི་སྙིང་པོ་ཅན། །སྤྱོད་པས་བསོད་ནམས་དག་པར་འགྱུར། །ཞེས་སོ། །བཞི་པ་སྤེལ་བ་ལའང་གསུམ་ལས། ལུས་སྤེལ་བ་ནི། སྟོབས་བཅུ་བསྐྱེད་ཅིང་ལེ་ལོ་མེད་པར་རྟག་ཏུ་བརྩོན་འགྲུས་བརྩམས་ཏེ། དེ་ལ་དང་པོ་ནི། ལུས་སྲོག་གི་ཕྱིར་ཡང་དམ་ཆོས་མི་གཏོང་བ་དང་། ང་རྒྱལ་དང་། ཁོང་ཁྲོ་བ་སྤང་བ་དང་། བཀྲེས་པ་རྣམས་ལ་ཟས། འཇིགས་པ་རྣམས་ལ་མི་འཇིགས་པ་དང་། ནད་པ་རྣམས་གསོ་བ། དབུལ་པོ་རྣམས་ལ་ལོངས་སྤྱོད་སྦྱིན་པ། མཆོད་རྟེན་རྡོ་ཐལ་གྱིས་སྐུད་པ། སེམས་ཅན་དགའ་བའི་ཚིག་དང་། ཆད་པ་རྣམས་ཁུར་ཁྱེར་བ་རྣམས་སོ། །གཉིས་པ་ལོངས་སྤྱོད་

---

^{[མ་དཔེ་གཟིགས་ན་འདིར་གནོན།]}

སྤེལ་བ་ནི། སྟོང་ཉིད་སྙིང་རྗེའི་སྙིང་པོ་ཅན། །སྦྱིན་པས་བསོད་ནམས་འཕེལ་བར་འགྱུར། ཞེས་དང་། དེའི་དོན་རྡོ་རྗེ་གཅོད་པར། བྱང་ཆུབ་སེམས་དཔའ་གང་ལ་ཡང་མི་གནས་པར་སྦྱིན་པ་སྦྱིན་པ་དེའི་བསོད་ནམས་ཀྱི་ཕུང་པོ་ཚད་བཟུང་བར་སླ་བ་མ་ཡིན་ནོ་ཞེས་སོ། །གསུམ་པ་དགེ་བ་སྤེལ་བ་ནི། བརྩོན་འགྲུས་དང་། བསམ་གཏན་པ་སྔོན་དུ་འགྲོ་བས་སྙིང་རྗེ་ཆེན་པོའི་བློས་བསོད་ནམས་སྤེལ་བ་བཟང་པོ་སྤྱོད་པའི་ཆོ་ག་བཞིན་བྱ་བ་སྟེ། དེ་ཡང་། འཇམ་དཔལ་དཔའ་བོས་སོགས་བློ་ཀ་གཉིས་སོ། །མདོར་ན་དད་སོགས་བསྒོམས་ཤིང་། བྱམས་པ་དང་། དཀོན་མཆོག་གསུམ་རྗེས་སུ་དྲན་པ་དང་། དུས་ཀུན་ཏུ་སེམས་ཅན་གྱི་དོན་བྱ་བ་དང་། ཆོས་སྦྱིན་པ་དང་། བྱང་ཆུབ་ཀྱི་སེམས་རྣམས་ནི་བསོད་ནམས་འཕེལ་བའི་རྒྱུའོ། །ཞེས་སོ།། ༈ །།གཉིས་གཉིས་འཁྱུད་པའི་འཁྲིག་བདེ་ནི་འཐབ་བྲལ་མན་ཆད་དུ་བཞག་གོ །དཔལ་ལྡན་ཆོས་སྐྱོང་གིས་བདག་མེད་མའི་དབང་བསྐུར་བ་ཐོབ་མ་ཐག་ཏུ། ས་དང་པོ་རྒྱུད་ལ་སྐྱེས་པས་ཀྱང་། དབང་གི་དུས་སུ་ལྷག་མཐོང་སྐྱེ་བར་གྲུབ་སྟེ། བདག་མེད་ཀྱི་དཀྱིལ་འཁོར་དུ་དབང་མ་ཐོབ་ཀྱི་དུས་སུ་སེམས་ཙམ་པ་ཡིན་པས་ཐོས་བསམ་གྱིས་གཏན་ལ་ཕབ་པའི་སྤྲོས་བྲལ་གྱི་ལྟ་བ་མེད་པའི་ཕྱིར་རོ།། ༈ །།རུས་པའི་རྒྱན་དྲུག་ནི། མགུལ་རྒྱན་སྦྱིན་པ་གདུ་བུ་ཚུལ་ཁྲིམས་ཏེ། །རྣ་ཆ་བཟོད་པ་དཔུང་

---

^{[མ་དཔེ་གཟིགས་ན་འདིར་གནོན།]}

བརྒྱན་ཏིང་ངེ་འཛིན། །བཏང་སྙོམས་སེ་མོ་དོ་དང་སྐ་རགས་ནི། །བསམ་གཏན་མཆོད་ཕྱིར་ཐོགས་པ་ཤེས་རབ་བོ། །ཞེས་པ་ལས་གཞན་གོ་སླ། སེ་མོ་དོ་ནི་རུས་པའི་ཕྲེང་བ་ནུ་མའི་བར་དུ་སླེབས་པ་དང་། མཆོད་ཕྱིར་ཐོགས་ནི་རུས་པའི་ཚངས་སྐུད་སེ་རལ་ཁར་བྱས་པའོ། །མཆོད་སྦྱིན་བྱེད་པའི་ཚེ་འཆང་བར་འོས་པའི་རྒྱན་ཡིན་པས་དེ་སྐད་དོ།། ༈ །།མི་བསྒོམ་མི་མནོ་ཡིས་དཔྱད་ཅིང་། །མི་བསྒོམ་མི་སེམས་རང་བབས་བཞག །ཅེས་སོ། །ཁ་ཅིག་སྡོམ་པ་གཉིས་ཀྱི་བཅས་པ་ལ་དགོས་ཆེད་དུ་འདའ་བ་ཞེས་པ་སྦྱིན་སྲེག་གི་ཚེ་ལ་མེ་ལ་དུས་དྲན་དང་། འབྲུ་ལ་རུང་བ་མི་བྱེད་པ་ལྟ་བུ་ལ་ཟེར་མོད། དཔྱད་ན་སྦྱིན་སྲེག་ནི་དགོས་པའི་ཆེད་དུ་ཡིན་པས་མཚན་གཞིར་སྲེག་པ་ཡང་མི་འཐད་ལ། ཡང་དྲག་པོའི་སྦྱིན་སྲེག་གི་ཚེ་སྲོག་གཅོད་པ། སྒོར་དགུག་པའི་སྦྱིན་སྲེག་གི་ཚེ་ལ་བྱིན་ལེན་གྱི་རུང་བའང་བྱེད་དགོས་པར་ཐལ་བར་འགྱུར་རོ།། ༈ །།ཨོཾ་སྭ་སྟི། གཡུ་ཐོག་སྙིང་ཏིག་གི་ཐད་སྐྱབས་རྗེ་དེ་ཞབས་རིན་པོ་ཆེ་འཇམ་པའི་རྡོ་རྗེ་མངོན་སུམ་པའི་ཡེ་ཤེས་གཟིགས་པས་མ་ཁྱབ་པ་ཞིག་སོ་སྐྱེ་ཆེས་ཐ་ཤལ་བློ་གྲོས་ཀྱི་མིག་གཉིས་ཀ་ལོང་བས་མཐོང་བའི་ཚུལ་གྱིས་རྒྱུ་མཚན་ཞུ་ན་ཧ་ཅང་ཐལ་པ་ལས་མ་འདས་རུང་། བླ་སློབ་ནང་ལུགས་བུས་ཕ་མའི་གམ་དུ་སྨྲ་བ་ལྟར་གང་དྲན་རང་གར་ཞུ་ན། སྤྱིར་གཞུང་འདི་ལ་སྨིན་གྲོལ་ཆ་ལག་

---

^{[མ་དཔེ་གཟིགས་ན་འདིར་གནོན།]}

གསུམ། གྲོལ་བྱེད་ལ་བསྐྱེད་རྫོགས་གཉིས། བསྐྱེད་རིམ་ལ། ཕྱི། ནང་། གསང་། དྲིལ། ཞར་བྱུང་བཅས་ལྔ། ཞར་ལས་བྱུང་བ་ལ། མཁའ་འགྲོའི་སྒོས་སྒྲུབ། གསང་སྒྲུབ། ཐུན་མོང་མ་ཡིན་པ་བླ་མའི་རྣལ་འབྱོར་སྙན་བརྒྱུད་སོགས་སུ་མཆིས་པ་ལས། སྟན་ཐོག་གཅིག་ཏུ་ཉམས་སུ་ལེན་པའི་ཚེ། སྔོན་འགྲོ་ཕྱི་སྒྲུབ་ཀྱིས་རྒྱུད་སྦྱངས། དངོས་གཞི་ནང་སྒྲུབ་རྒྱུད་སྡེ་བཞི་དང་འབྲེལ་བའི་ཉམས་ལེན་གྱི་ས་བོན་གདབ། གསང་སྒྲུབ་བླ་མེད་ཐུན་མོང་མ་ཡིན་པའི་སྒྲུབ་པ་དང་དྲིལ་སྒྲུབ་རྒྱུན་གྱི་ཉམས་ལེན་གྱིས་བསྐྱེད་བསྲིང་བས་དངོས་གྲུབ་ཀྱི་འབྲས་བུ་མངོན་དུ་བྱེད་པ་སྟེ། རིམ་བཞིན་བསྙེན་པ། སྒྲུབ་པ། སྒྲུབ་པ་ཆེན་པོའི་ཚུལ་ལམ། བསྙེན་སྒྲུབ་ལས་གསུམ་མམ། བསྐྱེད་རིམ་ཁོ་ནར་བསྙེན་སྒྲུབ་ཡན་ལག་བཞིར་དབྱེ་ན། ནང་སྒྲུབ་སྐབས་རྒྱུད་སྡེ་འོག་མ་གསུམ་དང་སྒོ་བསྟུན་པའི་ཉམས་ལེན་རྣམས་ཉེ་བསྙེན་དང་། བླ་མེད་ཀྱི་ཉམས་ལེན་སྒྲུབ་པར་བཞག་ཀྱང་རུང་། བསྐྱེད་རྫོགས་གཉིས་ཀ་བསྙེན་སྒྲུབ་བཞིའི་སྒོ་ནས་འདོན་པའི་དབང་དུ་བྱས་ནས། སྔོན་འགྲོ་ཕྱི་སྒྲུབ་བསྙེན་པ། ནང་སྒྲུབ་ཉེ་བསྙེན། གསང་སྒྲུབ་སྒྲུབ་པ། རྫོགས་རིམ་སྐུ་གསུམ། རང་ཤར་ལས་སྦྱོར་རྣམས་གཙོ་བོར་ཚོགས་ལམ། སྦྱོར་ལམ་དྲོད་རྩེ་བཟོད། ཆོས་མཆོག་ཆེན་པོའི་ངོ་སྐལ་གྱི་ཉམས་ལེན་ཏེ། ཆོས་མཆོག་གི་རྟེན་དེས་རླུང་སེམས་ཀྱི་ལྷ་སྐུ་སྒྲུབ་པས་

---

^{[མ་དཔེ་གཟིགས་ན་འདིར་གནོན།]}

རྡོ་རྗེ་གསུམ་གྱི་རྫོགས་རིམ་ཟབ་མོའི་ཉེ་རྒྱུས་མཆོག་གི་དངོས་གྲུབ་འོད་གསལ་གྱི་ལྷ་སྐུ་མངོན་དུ་བྱས་ཏེ། སློབ་པ་དང་མི་སློབ་པའི་ཟུང་འཇུག་གི་གོ་འཕང་བགྲོད་ཚུལ་རྒྱ་ཆེར་སྦྱར་དུ་ཡོད་པར་སེམས་ནའང་བློ་གྲོས་ཕུར་ཁུང་ཐུག་པས་དེ་ཙམ་ལས་ཞུ་རྔོ་མ་ཐོགས། བྱེ་བྲག་ནང་སྒྲུབ་སྐབས། ཐུན་ཁྱད་གཉིས། དང་པོ་ལ། རང་ཐ་མལ་པའི་ངང་ནས་ངག་ནས་ཧཱུྃ་ཞེས་བརྗོད་པའི་རྐྱེན་གྱིས་སྐད་ཅིག་གིས་ལྷ་སྐུར་དྲན་པ་ཙམ་བྱས་ཏེ་གནས་གསུམ་བྱིན་གྱིས་བརླབས་པ་ནི། བྱ་རྒྱུད་ཀྱི་ཉམས་ལེན་དང་སྒོ་མཐུན་པ་སྟེ། སྤྱིར་བྱ་རྒྱུད་ལ་བདག་བསྐྱེད་ཡོད་མེད་སོགས་རྩོད་གཞི་ཆེའང་། རྙིང་མ་རང་ལུགས་ལ་ཁྱད་པར་བར་བདག་གི་རྣལ་འབྱོར་བཞེད་པར་མ་ཟད། བདག་བསྐྱེད་མི་བཞེད་པའི་ཕྱོགས་ལ་རང་སྔགས་དང་ཕྱག་རྒྱ་སོགས་ཀྱིས་གཞི་ལུས་བྱིན་གྱིས་བརླབ་པར་བཤད་པས། སྐབས་འདིར་ཡང་གཞི་ལུས་བྱིན་གྱིས་བརླབ་པའི་ཕྱིར་ལྷར་དྲན་པ་ཙམ་ལས་བསྐྱེད་རིམ་དངོས་གཞི་མ་ཡིན་པའི་ཕྱིར་འགལ་བ་མེད། དེ་ནས་སྲུང་འཁོར་བསྒོམ་པ་སོགས་ཀྱི་རྗེས་ཡེ་ཤེས་པ་སྤྱན་དྲངས་ཏེ། དེའི་འོད་ཟེར་གྱིས་རང་ལུས་ལྷར་དྲན་པའི་གསལ་སྣང་སྔར་ལས་གསལ་ཞིང་བརྟན་པར་བསྒོམ་པ་སྤྱོད་རྒྱུད་ཀྱི་ཉམས་ལེན། ཡེ་ཤེས་པ་རང་ལ་ཐིམ་ནས་གནས་ལྔར་འབྲུ་ལྔས་རྒྱས་གདབ་པ་རྣལ་འབྱོར་རྒྱུད་ཀྱི་ཉམས་ལེན། སྙིང་མགོ་ཐུར་དུ་བལྟ་

---

^{[མ་དཔེ་གཟིགས་ན་འདིར་གནོན།]}

བ་བློས་གྱེན་དུ་བསློང་པའི་པདྨ་འདབ་བརྒྱད་ཀྱི་དབུས་དང་འདབ་མར་རྡོ་རྗེའི་ཆོ་ག་གསུམ་བསྐྱེད་ཚུལ་གྱིས་སྨན་བླ་དགུ་དང་། དེ་བཞིན་གནས་གཞན་གྱི་ལྷ་བསྒོམ་པ་དང་། དེ་རྣམས་ལ་སེམས་འཛིན་པ་དང་། བསྐྱེད་རིམ་ལ་ལྟས་པའི་རྫོགས་རིམ་ལྷ་སྐུ་བདེ་གསལ་སྟོང་ཉིད་དུ་བསྒོམ་པ་སོགས་བླ་མེད་ཀྱི་ཉམས་ལེན། ཁྱད་པར་བ་ནང་སྒྲུབ་ཞལ་གདམས་དངོས་གྲུབ་རྫིང་བུ་ལྟར་སྦྱར་བ་རྣམས་དཀྱུས་ལྟར། འོན་ཀྱང་སྤར་མ་འདི་དཔེ་ཧ་ཅང་མི་དག་པ་ཆེ་བས་དེ་ཕྱོགས་བྲིས་མ་དཔེ་རྙིང་ཁུངས་དག་ཡོད་སྲིད་ཚེ་གཟིགས་པ་བཙའ་བ་གལ་ཆེ་སྟེ། དཔེར་ན་ནང་སྒྲུབ་སྐབས། ལྡེབ་༤ ༨་༢བར་གང་གི་པདྨའི་འདབ་མ་བརྒྱད་ལ། ཕྱག་མཚན་བརྒྱད་ལ་སོགས་པ་ལས། ལྷ་བརྒྱད་རིམ་པ་བཞིན་ཀྲོང་བསྐྱེད་བྱ་སྟེ། རང་ལྷར་གསལ་བའི་སྙིང་ག་ཆོས་འཁོར་པདྨ་འདབ་བརྒྱད་ལྟེ་བ་དང་བཅས་པ་ལ་སྨན་བླ་དགུ་བསྒོམ། ཞེས་གསུངས་རྒྱུར། གང་གི་པདྨའི་ཨོ་རྒྱན་གྱི་པདྨ་འདབ་བརྒྱད་ལ་སོགས་བྲིས་ངན་བླུན་པོའི་ལག་རྗེས་སོར་བཞག་སྤར་དུ་བརྐོས་པས་ཅིའང་འབྲེལ་མེད་དུ་སོང་བས་མཚོན། ལས་བྱང་གི་སྐབས་མཆན་དཀྱུས་ཤོར་སོགས་ཐ་ན་ཐད་ཀར་འདོན་ཡང་མི་ལོ་བ་མང་པོ་འདུག་པ་ལྟར་ལས། གསང་སྒྲུབ་ནི་ཏིང་ངེ་འཛིན་གསུམ་གྱིས་ཁོག་ཕུབ་ནས། རྟེན་དང་བརྟེན་པའི་དཀྱིལ་འཁོར་བསྐྱེད་པ་སོགས་རྣལ་འབྱོར་བླ་མེད་ཐུན་མོང་མ་ཡིན་

---

^{[མ་དཔེ་གཟིགས་ན་འདིར་གནོན།]}

པའི་བསྐྱེད་རིམ་གྱི་ལུས་ཡོངས་སུ་རྫོགས་ཤིང་། ལས་བྱང་ཡང་འདི་དང་མཐུན་པ་བཅས་བསྙེན་སྒྲུབ་སྐབས་ཀྱི་ཉམས་ལེན་གཙོ་བོར་སེམས་ཤིང་། དྲིལ་སྒྲུབ་ནི། བསྙེན་སྒྲུབ་སྔོན་དུ་སོང་བའམ། མ་སོང་ཡང་རུང་སྟེ། རྒྱུན་གྱི་ཉམས་ལེན་འཇུག་བདེ་སྙིང་པོར་དྲིལ་བ་ལ་དེ་སྐད་དུ་ཐ་སྙད་བཏགས་པ་ལས། ཕྱི་ནང་གསང་བའི་དོན་དངོས་སུ་ཚང་བའི་དྲིལ་སྒྲུབ་ནི་མིན་པར་སེམས། འོན་ཀྱང་ཉམས་རྟགས་གསལ་བྱེད་དང་སྦྱར་ན། ཕྱི་ནང་གསང་བའི་བསྙེན་སྒྲུབ་རྒྱས་པར་སྔོན་དུ་སོང་ནས། དྲིལ་སྒྲུབ་ཁོ་ན་ལ་གནད་དུ་བསྣུན་ཅིང་སྤོག་ཆོག་གི་ཚུལ་དུ་ཉམས་སུ་བླངས་པས་གྲུབ་པའི་རྟགས་མཐར་དབྱུང་བའི་ཚུལ་དུ་གསལ། གཞན་ཡང་རྗེ་དྷརྨ་སྭ་མཱིས་གཡུ་ཐོག་སྙིང་ཏིག་གི་མ་ཚང་བ་ཁ་སྐོང་བའི་ཚུལ་དུ་ཆོས་ཚན་འགའ་ཞིག་མཛད་པའི་ནང་ནས་གེགས་སེལ་གྱི་རིམ་པ་ལ། འབྱུང་བ་ལུས་འཁྲུགས་ཀྱི་གེགས་སེལ། ཏིང་ངེ་འཛིན་སེམས་འཁྲུགས་ཀྱི་གེགས་སེལ། བར་ཆད་བདུད་ཀྱི་གེགས་སེལ། དེ་རྣམས་ཐུན་མོང་གི་གེགས་སེལ་དང་བཞིར་མཛད་ཅིང་། དང་པོ་རང་གཞུང་དུ་ཚིག་ལྷུག་པ་ས་བཅད་བཅོ་ལྔ་པ་དང་། དེ་ལས་རྒྱས་པར་འཕྲོས་ཏེ་བྱེ་བ་རིང་བསྲེལ་ཞེས་པའི་གསོ་དཔྱད་ཀྱི་གཞུང་འདི་བྱུང་། ནང་སྒྲུབ་ཀྱི་ལུས་དཀྱིལ་ནི། ཐུན་མོང་བ་ལུས་ལ་ལྷ་བཀོད་པ་ཙམ་ལས། རྫོགས་རིམ་ཐུན་མོང་མ་ཡིན་པའི་སྨིན་བྱེད་དུ་འགྲོ་

---

^{[མ་དཔེ་གཟིགས་ན་འདིར་གནོན།]}

བའི་ལུས་དཀྱིལ་དངོས་མ་ཡིན་ཏེ། འདི་ཙམ་རྣལ་འབྱོར་རྒྱུད་དུའང་རྙིང་མའི་བདག་འཇུག་ལ་དགོངས་པའི་ལུས་དཀྱིལ་ཙམ་པོ་པ་ཞིག་གསུངས་པ་དང་། སྒོ་མཐུན་པའི་ཕྱིར་གསང་སྒྲུབ་ཀྱི་ཞལ་གདམས་ལས་གསུངས་པའི་ལུས་དཀྱིལ་ནི། ལྷ་ཉིད་སྔགས་ཀྱི་གཟུགས་ཀྱིས་ནི། །སྒྲུབ་པ་པོ་ལ་དངོས་གྲུབ་སྟེར། ཞེས་པ་ལྟར་ངོ་བོ་ལྷ་ལ་རྣམ་པ་ཡི་གེར་བསྒོམ་པའི་ཟབ་མོའི་ལུས་དཀྱིལ་ཕྲ་ཐིག་སོགས་བསྐྱེད་རིམ་ལ་ལྟོས་པའི་རྫོགས་རིམ་རྣམས་དང་སྒོ་མཐུན་པར་སེམས་ལགས། བསྙེན་སྒྲུབ་སྔོན་དུ་སོང་བས། ཆ་ལག་ཕྱི་འཇིགས་པ་བརྒྱད་སོགས་སེལ་བའི་སྲུང་འཁོར། ནང་འབྱུང་བ་ལུས་འཁྲུགས་ཀྱི་བར་ཆད་སེལ་བ། གསང་བའི་བར་ཆད་བདུད་ཀྱི་གེགས་སེལ། བཀྲ་ཤིས་ཚེ་དང་། ཕྲིན་ལས་མེ་དང་། བསྟན་སྲུང་ཆོས་སྐྱོང་དང་། མངོན་ཤེས་པྲའི་སྒྲུབ་པ་སོགས་སོ། །དེ་ལྟར་གང་དྲན་གསོལ་བ་ལ། །ཉེས་པའི་ཚོགས་ཀུན་སྙིང་ནས་བཤགས། །ལེགས་པའི་དགེ་བས་ལེགས་བཤད་ཆར། །རྒྱ་ཆེར་འབེབས་པའི་རྒྱུར་གྱུར་ཅིག །མངྒལཾ།། ༈ །།ལམ་འབྲས་ཀྱི་ཐོག་མར་འཁོར་བའི་ཉེས་དམིགས་བཤད་པ་ནི། འདུལ་བ་མདོ་རྩ་བར། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ། ཞེས་ཐམས་ཅད་གྱི་སྔོན་དུ་ངེས་འབྱུང་འགྲོ་དགོས་པར་བཤད་པ་དོན་མཚུངས་ཏེ། ལམ་འོག་མ་ཐམས་ཅད་ངེས་འབྱུང་མཚན་ཉིད་པས་ཟིན་པས། ཐར་

---

^{[མ་དཔེ་གཟིགས་ན་འདིར་གནོན།]}

ལམ་རྣལ་མར་འགྱུར་བའི་ཕྱིར་རོ། ༈ །།སྣང་གསུམ་གྱི་བསྒོམ་རིམ་མདོར་བསྡུས་པ་ནི་འདི་ཡིན་ཏེ། དབེན་པའི་གནས་སུ་བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འདུག་སྟེ། ཅུང་ཟད་ངལ་བསོ། དེ་ནས་སྦྱོར་བ་སྐྱབས་གསོལ་སོགས་ཀྱིས་དྭང་བའི་དད་པ་དྲངས། དངོས་གཞིར་སྡུག་བསྔལ་རྣམ་གསུམ་དྲན་པས་སྐྱོ་ཤས་དང་ངེས་འབྱུང་བསྐྱེད། དལ་འབྱོར་རྙེད་དཀའ་དང་འཆི་བ་མི་རྟག་པས་ལྕག་བྱས། ལས་འབྲས་དྲན་པས་ངོ་ཚ་དང་ཁྲེལ་བསྐྱེད། ཕ་མ་སེམས་ཅན་འདི་ཀུན་གནས་ལུགས་ཟབ་མོ་མ་རྟོགས་པས་མེད་བཞིན་དུ་འཁྲུལ་པའི་རྗེས་སུ་འབྲང་བས་སྡུག་བསྔལ་བསམ་གྱིས་མི་ཁྱབ་པས་མནར་བ་ལ་བལྟས་ཏེ། བདེ་བ་དང་ལྡན་འདོད་ཀྱི་བྱམས་པ། སྡུག་བསྔལ་དང་བྲལ་འདོད་སྙིང་རྗེ། དེའི་ཆེད་དུ་རང་ཉིད་རྫོགས་བྱང་ཐོབ་འདོད་ཀྱི་བསམ་པ་ལྷང་ངེ་བ་སྨོན་པ་དང་། བདག་དང་སེམས་ཅན་མཉམ་པ་དང་། བརྗེ་བ་སྟེ་འཇུག་པའི་སེམས་རྣམས་རིམ་བཞིན་དུ་བསྐྱེད་ལ་རང་སེམས་གསལ་རིག་ངོས་བཟུང་དང་བྲལ་བའི་ངང་དུ་མ་བཅོས་པར་འཇོག་ཅིང་། རྗེས་ཐོབ་དགེ་བ་བསྔོ་ཞིང་སྨོན་ལམ་གདབ་པར་བྱའོ།། ༈ །།དབུ་མ་བཞི་བརྒྱ་པ་ལས། བསོད་ནམས་མིན་པ་དང་པོར་ཟློག །བར་དུ་བདག་ནི་ཟློག་པ་དང་། །ཐ་མ་ལྟ་གཞི་ཀུན་ཟློག་པ། །གང་གིས་ཤེས་ཏེ་མཁས་པ་ཡིན། །ཅེས་

---

^{[མ་དཔེ་གཟིགས་ན་འདིར་གནོན།]}

བསོད་ནམས་མིན་པ་བཟློག་པ་ནི། གཙོ་བོར་ལས་འབྲས་དང་འཁོར་བའི་ཉེས་དམིགས་སོགས་བསྒོམ་པའི་ཚུལ་ཇི་སྙེད་པ་ཡིན་ཏེ། ཀླུ་སྒྲུབ་ཀྱིས། རེ་ཞིག་ཉེས་ཀུན་འབྱུང་བའི་རྒྱུ། །མེད་ཉིད་རྣམ་པར་བཟློག་ཟིན་གྱི། ཞེས་སོ། །བདག་ཟློག་པ་ནི། ཀླུ་སྒྲུབ་ཀྱིས་སྔ་མའི་འཕྲོར། རིག་པ་གང་གིས་ཡོད་ཉིད་ཀྱང་། །ཟློག་པར་བྱ་བས་མཉན་པར་གྱིས། །ཞེས་གསུངས་པའི་བདག་འཛིན་གྱི་སྤྲོས་པ་གཅོད་པའི་ཚུལ་ནི། འདི་ལྟར་འཁོར་བ་སྤོང་བ་ལ་འཁོར་བའི་རྒྱུ་ཡི་གཙོ་བོ་ངོས་ཟིན་དགོས་པས། འཁོར་བར་འཁྱམས་པའི་རྒྱུ་ཡི་གཙོ་བོ་ནི། རྟག་ཆད་ཀྱི་ལྟ་བ་ངན་པའི་གནས་སུ་གྱུར་པའི་རང་རྒྱུད་ཀྱི་ཕུང་པོ་ལྔ་པོ་ལ་བདེན་པར་འཛིན་པའི་བདེན་འཛིན་འདི་ཁོ་ན་ཡིན་ཏེ་བདེན་འཛིན་དེ་ལ་བརྟེན་ནས་རང་སྡེ་དངོས་སྨྲ་བ་ནས་ཕྱི་རོལ་པའི་བར་གྱི་སྙིང་ལ་ཞུགས་པའི་རྟག་ཆད་ཀྱི་ལྟ་བ་ངན་པ་དེ་བྱུང་། དེ་ལས་ཕུང་པོ་ལས་བདག་ཏུ་འཛིན་པའི་འཇིག་ལྟ་དང་། དེ་ལས་ཆགས་སོགས་ཉོན་མོངས་དང་། དེས་ལས་ངན་བསགས་པས་འཁོར་བར་འཁྱམས་པ་ཡིན་ཏེ། རིན་ཆེན་ཕྲེང་བར། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཀྱང་ནི་སྐྱེ་བ་ཡིན། །ཅེས་སོ། །དེ་ལྟར་དགག་བྱ་ངོས་ཟིན་ནས། དེ་ཇི་ལྟར་འགོག་པའི་ཚུལ་ནི། རྒྱུ་མཚན་མ་རྙེད་པར། ཕུང་པོ་བདེན་

---

^{[མ་དཔེ་གཟིགས་ན་འདིར་གནོན།]}

པར་མ་གྲུབ་སྙམ་དུ་བཟུང་བས་མི་ཆོག་གི །དེ་བདེན་པར་མ་གྲུབ་པའི་སྒྲུབ་བྱེད་དོན་དམ་དཔྱོད་པའི་རིག་ཤེས་ཚད་མས་རྙེད་ཀྱི་སྒྲུབ་བྱེད་རྣམ་དག་ཅིག་དགོས་ཤིང་། །དེ་ཡང་རིག་པ་དྲུག་ཅུ་པར། །། དངོས་པོར་ཁས་ལེན་ཡོད་ན་ནི། །འདོད་ཆགས་ཞེ་སྡང་འབྱུང་བ་ཡི། །ལྟ་བ་མི་ཟད་མ་རུང་འབྱུང་། །དེ་ལས་བྱུང་བའི་རྩོད་པར་འགྱུར། །དེ་ནི་ལྟ་བ་ཀུན་གྱི་རྒྱུ། དེ་མེད་ཉོན་མོངས་མི་སྐྱེ་སྟེ། །དེ་ཕྱིར་དེ་ནི་ཡོངས་ཤེས་ན། །ལྟ་བ་ཉོན་མོངས་ཡོངས་སུ་འབྱངས། །གང་གིས་དེ་ཤེས་འགྱུར་སྙམ་ན། །བརྟེན་ནས་འབྱུང་བ་མཐོང་བས་ཏེ། །བརྟེན་ནས་སྐྱེས་པ་མ་སྐྱེས་བར། །དེ་ཉིད་མཁྱེན་པ་མཆོག་གིས་གསུངས། །ཞེས་རྟེན་འབྲེལ་གྱི་རིག་པ་ཉིད་རིག་པ་ཐམས་ཅད་ཀྱི་རྒྱལ་པོར་གསུངས་ཏེ། སྣང་བས་བཏགས་པའི་ཕུང་སོགས་ཀྱི་ཆོས་འདི་ཀུན་བདེན་པར་གྲུབ་ན། རྒྱུ་རྐྱེན་གང་ལའང་ལྟོས་པ་མེད་པར་ཐོག་མ་ནས་གྲུབ་པ་ཡིན་དགོས་པ་ལ། འདི་དག་རེ་རེ་ནས་རྒྱུ་རྐྱེན་ཚོགས་པ་ལས་སྐྱེས་པ་འབའ་ཞིག་ཏུ་མཐོང་བས་ཐོག་མ་སེམས་འཁྲུལ་པའི་བག་ཆགས་ཀྱིས་བསླད་པའི་འཁྲུལ་སྣང་ཁོ་ན་ཡིན་གྱི་དོན་དམ་པར་རང་བཞིན་གྱིས་གྲུབ་པ་རྡུལ་ཙམ་ཡང་མེད་པའི་སྟོང་པ་ཉིད་དོ། །ལྟ་གཞི་ཀུན་ཟློག་པ་ནི། དེ་ལྟར་བདེན་མེད་དུ་གཏན་ལ་ཕབས་རྗེས་ཡུལ་ཆོས་ཐམས་ཅད་བདེན་མེད་ཡིན་པ་དེ་ཡང་དགོས་པ་མ་ཡིན་ཏེ། རྩོད་ཟློག་ལས།

---

^{[མ་དཔེ་གཟིགས་ན་འདིར་གནོན།]}

རང་བཞིན་མེད་པ་ཉིད་ཟློག་ན། །རང་བཞིན་དུ་ནི་རབ་འགྲུབ་འགྱུར། །ཞེས་པའི་རིག་པས་གནོད་པའི་ཕྱིར། དེ་བས་ན། བདེན་མེད་དུ་འཛིན་པའི་ཡུལ་ཅན་གྱི་བློ་ཉིད་དགག་དགོས་ཏེ། གཉིས་སྣང་དང་བཅས་པའི་བློ་ཡི་སྤྱོད་ཡུལ་དུ་མ་གྱུར་པའི་ཕྱིར། ཞི་བ་ལྷས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་སོ། །དེ་བས་ན། རྟེན་འབྲེལ་གྱི་རྟགས་ལས་ཆོས་ཐམས་ཅད་བདེན་མེད་དུ་གྲུབ་རྗེས། བདེན་མེད་དོ་སྙམ་པའི་བློ་དེའང་རང་བཞིན་གྱིས་མ་དམིགས་པའི་ཚུལ་ཤེས་པ་སྟེ། ཞི་ལྷས། ཅི་ཡང་མེད་ཅེས་གོམས་པ་ལས། །དེ་ཡང་ཕྱིས་ནས་སྤོང་པར་འགྱུར། །ཞེས་སོ།། ༈ །།སྤྱིར་འཁོར་འདས་དབྱེར་མེད་ཙམ་དབུ་མའི་སྐབས་སུའང་བཤད་མོད། འདིར་སེམས་ཀྱི་ཆོས་ཅན་རྣམ་པར་རྟོག་པ་གསལ་སྟོང་ཟུང་འཇུག་ངོ་འཕྲོད་པ་ཙམ་མ་ཡིན་པར། སེམས་ཀྱི་ཆོས་ཉིད་རང་བཞིན་གྱིས་འོད་གསལ་བ། ཕྱི་རོལ་པའི་བདག་ཤེས་རིག་ལྟ་བུ་རྟག་བརྟན་བདེན་གྲུབ་དང་། དགག་བྱ་བཅད་ཙམ་གྱི་སྟོང་པ་དང་། ཉི་ཚེ་བའི་སྟོང་པ་དང་། སྟོང་པ་ཐལ་བྱུང་དང་། ཆད་སྟོང་ལ་སོགས་པ་མ་ཡིན་པར་གཟོད་མ་ནས་གཟུང་འཛིན་གྱི་རྙོག་མ་དང་བྲལ་བའི་ཡེ་ཤེས་ཉམས་སུ་མྱོང་ཡང་བསམ་བརྗོད་འདས་པར་ཤེས་པ་སྟེ། དེ་ཡང་ལྟ་བ་ལ་ཐོས་བསམ་གྱིས་སྒྲོ་འདོགས་ཆོད་པས་མ་རིག་པའི་དུག་ཐོན། ལྟ་བ་དེ་

---

^{[མ་དཔེ་གཟིགས་ན་འདིར་གནོན།]}

བསྒོམ་པའི་ཉམས་མྱོང་དང་འབྲེལ་བས་རྣམ་རྟོག་རྒྱུན་ཆགས་རྩོལ་བའི་དུག་ཐོན། །ཉམས་མྱོང་དེ་ཡང་ལྟ་བ་ལྷག་མཐོང་གིས་ཟིན་པས་ཉམས་སྐྱོན་ཅན་གྱི་དུག་ཐོན། དུག་གསུམ་གྱིས་མ་སྦགས་པའི་ལྟ་བ་འདི་ཉམས་ལེན་གྱི་སྙིང་པོར་བཟུང་དགོས་པ་ཡིན་ཏེ། དང་པོ་ནི་ཐོས་བསམ་གྱིས་སྒྲོ་འདོགས་གཅོད་པ། གཉིས་པ་ནི་ཞི་གནས་ཀྱི་ཉམས་མྱོང་དང་བསྲེ་བ། གསུམ་པ་ནི་ཞི་ལྷག་ཟུང་འཇུག་གི་ཚུལ་ལོ།། ༈ །།རྩ་བའི་འགྲོས་ཐིམ་སོགས་གསུངས་པ། རྩ། ཡི་གེ །བདུད་རྩི། རླུང་རྣམས་སེམས་ཉིད་གསལ་སྟོང་ཟུང་འཇུག་གི་ལྡོག་ཆ་ལས་མ་འདས་པས། དེ་དང་དེར་སྣང་བའི་རིགས་པ་གློ་བུར་པའི་འགྲོས་རྣམས་ཕྲ་བ་གཉུས་མའི་ཡེ་ཤེས་སུ་ཐིམ་པས་སྐུ་བཞིའི་ངོ་བོར་གྱུར་པ་ནི། རྟེན་གནས་གྱུར་ཀྱི་སྐུ་བཞི་ཞེས་བྱ་སྟེ། མདོར་ན་འགྲོས་ཞེས་པ་གློ་བུར་བའི་དྲི་མ་ལ་དགོངས་སོ།། ༈ །།ཐོག་མར་ལྟ་བ་འཁོར་འདས་དབྱེར་མེད་ལ་ཐོས་བསམ་གྱིས་སྒྲོ་འདོགས་ཆོད་ནས། ཉམས་མྱོང་ཅི་རིགས་པ་ཤར་བ་ན་བསྐྱེད་རིམ་སོགས་ལ་འཇུག་པས་བསྐྱེད་རིམ་འཁོར་འདས་དབྱེར་མེད་སོགས་འགྱུར་ཏེ། ལུགས་ལ་འགྱུར་རྩིས་ཐེབས་པས་དངོས་པོ་གང་བཅོས་ཀྱང་གསེར་དུ་སྣང་བ་བཞིན་ནོ།། ༈ །།སྤྱིར་ལྟ་བ་དང་། རྟོག་པ་ཙམ་ལ་ལྟ་བར་བཞག་པ་རྒྱུ་དུས་ཀྱི་ལྟ་བ་ཐོས་བསམ་གྱིས་བསྡུས་པ་དང་། ཉམས་མྱོང་ཏིང་ངེ་

---

^{[མ་དཔེ་གཟིགས་ན་འདིར་གནོན།]}

འཛིན་ལ་ལྟ་བར་བཞག་པ་བུམ་དབང་གི་ལྟ་བ་ངོ་བོ་ཉིད་གསུམ་སོགས་བཞི་སྟེ། ངོ་བོ་ཉིད་གསུམ་ནི། བསྒོམ་བྱའི་ལྷ་ཡི་རྣམ་པར་སེམས་ཟིན་པ་སྣང་ཕྱོགས། རྣམ་པར་དེས་དབེན་པའི་སྟོང་ཉམས་སུ་སོང་། བ་སྟོང་ཕྱོགས། འོད་གསལ་དུ་སོགས་ཀྱི་ཉམས་ཤར་བ་ཟུང་འཇུག་གི་ཏིང་ངེ་འཛིན་ནོ། །སྔ་མ་གཉིས་སྒྲོ་སྐུར་དང་བཅས་པའི་ཕྱིར་སྐྱོན་ཅན་དང་། ཕྱི་མར་དེ་མེད་པས་སྐྱོན་མེད་དོ། །དེ་ཡང་ངོ་བོ་ནི་རྣམ་པ་དང་། སྟོང་པ་དང་། འོད་གསལ་གྱི་ཉམས་གསུམ་ཡིན་ལ། ཉིད་ཅེས་པ་ནི། རང་རང་གི་ཉམས་དེ་ལ་ཡིད་ཀུན་བརྟག་གི་འཁྲུལ་རྟོག་གཞན་གྱིས་སྟོང་པ་སྟེ། དེས་མ་བསླད་པར་སེམས་ཟིན་པ་ལ་བྱའོ། །ལམ་གྱི་བགྲོད་ཚུལ་ནི། བསྐྱེད་རིམ་གྱི་གསལ་སྣང་དང་པོར་ཤར་བ་ནས། སྟོང་ཕྱོགས་ཀྱི་ངོ་བོ་ཉིད་ཀྱི་བར་ནི་ཚོགས་ལམ་རང་རྐྱང་དང་ཉམས་སྐྱོན་ཅན་ཞེས་བྱ། ཟུང་འཇུག་གི་ཏིང་ངེ་འཛིན་སྐྱེས་ནས་སྦྱོར་ལམ་དྲོད་ཀྱི་སྣེ་ཟིན་པ་ཡིན་ཏེ། སྐྱོན་མེད་ཀྱི་ཉམས་དེ་བསྐྱངས་པས་མཚོན་བྱེད་དཔེ་ཡི་ཡེ་ཤེས་འདྲེན་ནུས་པའི་ཕྱིར་རོ། །སྔགས་ཀྱི་ཕྱག་ཆེན་མཚན་ཉིད་པའང་འདི་ནས་འཇོག་གོ །དེ་སྤྱོད་པས་བོགས་དབྱུང་བས་དྲོད་གསུམ་རིམ་བཞིན་དུ་ཐོབ་ནས། དྲོད་ཆེན་པོའི་སྐབས་ལུང་བསྟན་པའི་ཕྱག་རྒྱ་པདྨ་ཅན་དང་ཀུན་ཏུ་བཟང་པོའི་སྤྱོད་པ་སྤྱད་པས་དབུ་མའི་མདུད་པ་དང་པོ་གྲོལ། གྲུབ་མཐའ་འཁོར་འདས་དབྱེར་མེད་

---

^{[མ་དཔེ་གཟིགས་ན་འདིར་གནོན།]}

སྙོགས། ས་དང་པོ་རབ་དགའ་ཐོབ་པ་ནི་གནས་སྐབས་ལམ་གྱི་འབྲས་བུ་དང་། དེ་ནས་ས་ལམ་གྱི་ལྷག་མ་རིམ་གྱིས་བགྲོད་པས། ལུས་རྩ་ཡི་འགྲོས་ཐིམ་རྩ་གནས་གྱུར་སྤྲུལ་པའི་སྐུ་མངོན་དུ་བྱས་པ་ནི་མཐར་ཐུག་གི་འབྲས་བུ་མཚན་ཉིད་པའོ། །དེས་ན་གྲུབ་མཐའ་འཁོར་འདས་དབྱེར་མེད་ཅེས་པའང་། སྔར་བླ་མས་རྒྱུ་དུས་ཀྱི་དབང་གི་སྐབས་སོགས་ངོ་སྤྲོད་ཅིང་། ཐོས་བསམ་དང་ཉམས་མྱོང་གིས་བརྟགས་པ་ཙམ་རིམ་གྱིས་སྐྱེས་པ་འདིར་དངོས་སུ་མཐོང་བ་ལ་བྱ་སྟེ། ལྟ་བ་རང་གི་ངོས་ནས་དབྱེ་བ་མེད་ཀྱང་། རྟོགས་ཚུལ་གྱི་སྒོ་ནས་དབྱེའོ།། ༈ །།དངོས་གྲུབ་ལེན་པའི་དུས་བཞི་སྟེ། དབང་གསུམ་པའི་དུས་དང་། རྨི་ལམ་དང་། འཆི་བའི་འོད་གསལ་དང་། བར་དོའོ། །གནད་དུ་ཆེ་བ་བཞི་སྟེ། ཚེ་འདིར་གྲུབ་མཐའ་སྙོགས་པ་ལ་འཁྲུལ་འཁོར། འཆི་ཁར་སྙོགས་པ་ལ་འདའ་ཀ་མ། བར་དོར་སྙོགས་པ་ལ་དྲན་པ་སྐྱེ་བ་བརྒྱུད་ནས་སྙོགས་པ་ལ་དམ་ཚིག་མ་ཉམས་པས་སྨོན་ལམ་རྣམ་པར་དག་པ་གནད་དུ་ཆེའོ། །འདའ་ཀ་མ་གསལ་མ་ཐེབ་ན་བར་དོ་དང་། དེའི་ཚོད་འཛིན་དང་སེམས་ཀྱི་བདེན་འཛིན་བཤིགས་པ་ལ་རྨི་ལམ། ལམ་དེ་གྲུབ་པའི་རྩ་བ་དང་ལུས་ཀྱི་བདེན་འཛིན་བཤིགས་པ་ལ་སྒྱུ་ལུས་ཀྱང་ལམ་སོ་སོར་བཤད་དོ། །གསང་དབང་གི་ལམ་ལ་ཁྱབ་བྱེད་རླུང་དང་། ཁྱབ་བྱ་གཏུམ་མོ་གཉིས། དང་པོར།

---

^{[མ་དཔེ་གཟིགས་ན་འདིར་གནོན།]}

ལྡང་འཇུག་གནས་གསུམ་དབྱེར་མེད་བཞི་ལམ་དུ་བྱེད་པ་ལ་རླུང་སྦྱོར་རོ། །གཏུམ་མོ་ལས། འཁོར་ལོའི་གནད་ལ་༢བརྟེན་པ་དང་། མ་༡བརྟེན་པ། གཞན་མན་ངག་གི་གནད་ལ་བརྟེན་པ་གསུམ་ལས་ཕྱེ་བ་ཉིད་བཅོ་བརྒྱད་དོ། །འདི་ལ་རླུང་སེམས་འདུས་པའི་ཚུལ་ལས་ལྟ་བ་རང་བྱུང་གི་ཡེ་ཤེས་བཞི་ལས། ཕྱི་མ་གསལ་ཞིང་ཡང་ལ་མི་རྟོག་པའི་རང་བྱུང་གི་ཡེ་ཤེས་སྐྱེས་ནས་སྤྱོད་པས་བོགས་དབྱུང་བས་ཡེ་ཤེས་མངོན་དུ་བྱེད། ཤེར་དབང་གི་ལམ་ལ་ཡེ་ཤེས་ཀྱི་ཕྱག་རྒྱའི་དབང་དུ་བྱས་ན། རིག་མ་དག་པ་ནི་མཚན་ཉིད་དང་ལྡན་པའོ། །ལུས་ངག་མཉམ་པ་ནི་ལྷ་སྔགས་སུ་གསལ་བའོ། །བྱིན་རླབས་མཉམ་པ་ནི་མཁའ་གསང་བསྣོལ་མར་བརླབ་པའོ། །འདོད་པ་མཉམ་པ་ནི་ལྷན་སྐྱེས་པ་སྐྱེད་འདོད་པ་སྟེ་སྐུ་གསུམ་ལམ་བྱེད་དོ། །མན་ངག་གི་གནད་ལ་བྱང་ཆུབ་སེམས། དབབ་བཟུང་། བཟློག །ཁྱབ་མི་ཉམས་པར་བསྲུང་བའོ། །དེ་ལས་སྐྱེས་པའི་ལྟ་བ་ནི་དགའ་བ་བཞི་སྟེ། ཕྱི་མ་ཞུ་བདེ་ལས་བྱུང་བའི་རང་བཞིན་ལྷན་སྐྱེས་ཉིད་སྤྱོད་པས་བོགས་དབྱུང་ངོ་། །ཤེས་རབ་ཡེ་ཤེས་པ་གཉིས་ལ་གྲུབ་མཐའ་བདེ་སྟོང་རྒྱ་ཆུང་བ་སྟེ། སྣང་བ་འཁོར་བའི་ཆ་ཙམ་བདེ་སྟོང་དུ་འཆར་བའོ།། ༈ །།དབང་བཞི་པའི་ལམ་རྡོ་རྗེའི་རྦ་རླབས་ལ། སྲོག་རྩོལ་སོགས་དྲུག་ལྷག་པར་སྦྱངས་ནས་སླར་ཁ་སྦྱོར་དུ་བསྒོམ་པ་སྟེ་འོག་རླུང་བསྐྱོད་པ་ལུས་ཀྱི་རྦ་རླབས།

---

^{[མ་དཔེ་གཟིགས་ན་འདིར་གནོན།]}

ངག་འདྲེན་པ་ཞི་དྲག་གི་རྦ་རླབས། ཏིང་ངེ་འཛིན་སེམས་ཀྱི་རྦ་རླབས་ལ། རོ་རྐྱང་དབུ་གསུམ་གྱིས་ལམ་སྦྱངས་པ་ལ་བརྟེན་ནས་གཟུང་དང་། འཛིན་པ་དང་། གཉིས་ཀའི་རྦ་རླབས་རེངས་སྲོག་རྩོལ་གནས་གསུམ་གྱི་རླུང་ལ་དབང་ཐོབ་པས་རྣམ་ཐར་སྒོ་གསུམ་མངོན་དུ་བྱས་པའོ། །དེ་ལྟ་བུ་ཡབ་ཡུམ་གཉིས་ཀ་ལ་སྦྱར་རོ། །ལྟ་བ་ནི་མས་བརྟན་གྱི་དགའ་བ་བཞི་ཕན་འདོགས་ཀྱི་སྒོ་ནས་སྐྱེ་བ་ལས། ཐ་མ་འཁོར་འདས་ཐམས་ཅད་བདེ་སྟོང་དུ་འཆར་བ་ཉིད་སྤྱོད་པས་བོགས་དབྱུང་ངོ་།། ༈ །།སྤྱོད་པ་ཆེན་པོ་ཡང་དག་སྤོང་བ་བཞི་ལ་བརྟེན་ནས། གསང་གནས་ཀྱི་དབུ་མ་ལ་མདུད་པ་བཞི་ཡོད་པའི་དང་པོ་གྲོལ་བས་ས་དང་པོ་ཐོབ། གསང་གནས་ཀྱི་མདུད་པ་ཕྱི་མ་གསུམ། ལྟེ་སྙིང་གི་རྩ་མདུད་དྲུག་གཉིས་རྣམས་ཀྱི་གསུམ་གསུམ་གྲོལ་བས་ས་རེ་ཐོབ་པས་བུམ་དབང་ས་དྲུག་པ་ལ་གྲུབ་མཐའ་འཁོར་འདས་དབྱེར་མེད་སྙོགས། མགྲིན་སྨིན་གྱི་རྩ་མདུད་དྲུག་གཉིས་གྲོལ། གསང་དབང་ས་བཞི་ལ་གྲུབ་མཐའ་མ་འདྲེས་ཡོངས་རྫོགས་སྤྱི་བོའི་རྩ་མདུད་བཞི་ལས་དང་པོ་གསུམ་གྲོལ་བས་ས་བཅུ་གཅིག་དང་། ཕྱི་མ་གྲོལ་བས་ས་བཅུ་གཉིས། ཤེས་དབང་གྲུབ་མཐའ་བདེ་སྟོང་རྒྱ་ཆུང་སྙོགས། འདི་ཡན་གྱིས་ནང་གི་ཡུལ། དེ་ནས་མཐར་ཐུག་བླ་མ་ངོ་བོ་ཉིད་སྐུ་ལས་ཉེ་རྒྱུའི་ཉམས་ལེན་སྐད་ཅིག་བདུན་ལྡན་གྱི་འབྲས་བུའི་དབང་

---

^{[མ་དཔེ་གཟིགས་ན་འདིར་གནོན།]}

བླངས་པས་བཅུ་གསུམ་ཕྱེད་འོག་མ་ལུང་སྒོ་བསྟུན་གྱི་མཐར་ཕྱིན་པའི་ལམ་བཞི་པས་ཕྱེད་ཁེལ་བ་དེར་སླེབས། གཙུག་ཏོར་ཕྱེད་འཕགས་ཉམས་ལེན་བྱེད་བཞིན་པས་འཁོར་འདས་ཐམས་ཅད་བདེ་སྟོང་ཆེན་པོར་ཤར་བའི་གྲུབ་མཐའ་བདེ་སྟོང་རྒྱ་ཆེན་སྙོགས། སྐད་ཅིག་ཕྱི་མར་ས་བཅུ་གསུམ་པ་ཕྱེད་ཕྱི་མ་ཡོངས་སུ་རྫོགས་ནས་རྡོ་རྗེ་འཛིན་པའི་གོ་འཕང་མངོན་དུ་འགྱུར་བའོ།། ༈ །།བིར་སྲུང་ཕྱི་མའི་སྐབས་སུ། །འཇམ་མགོན་ཀུན་བསོད་ཀྱི་ཟིན་ཐོར། །བིར་སྲུང་ཐུན་མོང་བ་འདི་ཉིད། །ཉམས་ལེན་བྱེད་ཚེ་རང་གི་མདུན། །རྣལ་འབྱོར་དབང་ཕྱུག་བསྐྱེད་དགོས་པས། །དེ་ལ་ཡེ་ཤེས་པ་འཇུག་དུས། །བླ་མ་དང་ནི་བིར་བ་པའི། །རྣམ་པར་ཐིམ་ཞིང་སངས་རྒྱས་དང་། །བྱང་སེམས་ཐམས་ཅད་ཀྱེ་རྡོ་རྗེའི། རྣམ་པས་མདུན་བསྐྱེད་དེ་ཡི་ཐུགས། །ཞུགས་པར་བསྒོམ་པ་ཡིན་ཞེས་པའི། །བླ་མའི་གསུང་དེ་འདིར་བྲིས་སོ། །ཞེས་དང་། མངའ་རིས་པ་ཚུལ་འོད་ཀྱིས། རྡོ་རྗེ་རྩེ་གསུམ་པས་སྲུང་བའི་སྐབས་ཕོ་བྲང་ལྔ་ཡི་གཙོ་བོ་རྣམས་བསྐྱེད་ནས་སྔགས་བརྗོད་ཅིང་ཕྱག་རྒྱས་རེག་པའི་ཚེ་ལྷ་རྣམས་གསལ་གདབ་ཅེས་བཤད་དོ།། ༈ །།ལམ་འབྲས་ཀྱི་ལམ་དུས་ངག་འདོན་བྱ་བྲལ་མ་ཡིན་ན། བདག་ཆེན་གྱི་ལམ་དབང་དང་། མཁྱེན་བརྩེའི་བསྐྱེད་རིམ་ཟིན་བྲིས་ཀྱི་དབུ་ནས་འབྱུང་བའི་སློབ་བཤད་པའི་ཁྱད་ཆོས་ཀྱིས་ཟུར་བརྒྱན། མཛེས་རྒྱན་

---

^{[མ་དཔེ་གཟིགས་ན་འདིར་གནོན།]}

ལྟར་ནའང་སློབ་བཤད་སྐབས་དེར་མ་གསལ་བའི་སྦྱང་གཞིའི་རྣམ་གྲངས་སྨོས། དེ་གཉིས་ཀ་ལས་ཡེ་ཤེས་པ་བཅུག་པའི་རྐྱེན་གྱིས་ལུས་དཀྱིལ་གསལ་གདབ་པ་དང་། སློབ་བཤད་ལ་ལུས་དཀྱིལ་རིགས་ལྔ་སོ་སོའི་རྣམ་པར་བསྒྱུར་ཏེ་དབང་ལེན་པར་མཛད། བརྟན་བྱེད་ཆུ་དབང་རྣམས་ཀྱང་ཆུ་རྒྱུན་གཅིག་ལ་དབང་བཞི་ཐོབ་པ་དམིགས་པ་དགོས། དབང་བཞི་ལ། བདག་ཉིད་ལུས་དཀྱིལ་ལྷ་དང་བཅས་པ་ཞེས་སྒྱུར། བརྡ་ཚིག་བརྒྱུད་ཐོབ་པས་དབང་བཞིའི་བརྡ་ལྔ་བསྡུས་རྩེ་མོ་གནོན་པ་སོགས་བརྗོད་ཅིང་། ཐུན་མོང་བ་ཐོབ་པས་རྩ་བ་དང་ཡན་ལག་གི་ལུས་ངག་གི་བརྡ་དང་། ཐུན་མིན་ཐོབ་པས་ཡི་གེའི་བརྡ་བཅས་ཆགས་མེད་བྱེད། རླུང་སྦྱོར་གཏུམ་མོ་འཁོར་ལོ་བཞི་ཆགས་མེད་དང་། ཕྲེང་བ་གསར་པ་ལ་བྱིན་རླབས་ཉི་ཟེར་ནས་འབྱུང་པ་ལྟར་འགྱུར་སྔགས་བཟླས། རྒྱུན་དུ་བཟླས་པའི་གོང་དེ་བཟླ། ཡིད་ངག་ལུས་དང་ལྕེ་བྱིན་རླབས་ཀྱི་སྔགས་ཀྱང་བཟླ་བར་མཛད་འདུག །རྒྱུན་པར་ཞལ་བརྒྱད་ཁོ་ནར་བསྡུས་ནས་གཙོ་བོ་ཡབ་ཡུམ་གྱི་ང་རྒྱལ་བྱ། གཏོར་བསྔོ་མི་བཏང་ན་རྡོར་གླུ་བཀྲ་ཤིས་སྨོན་ལམ་སྐྱེ་མཆེད་སྐུ་གསུང་ཐུགས་བྱིན་རླབས་བསྔོ་སྨོན་བཀྲ་ཤིས་རྣམས་བྱ། རྣལ་འབྱོར་དགུའི་རྣམ་བཞག་ནི་རྣམ་བཤད་དུ་གསལ་བ་ལྟར་རོ། །ལམ་ཟབ་ཕྱི་མ་མུས་ཆེན། དཀོན་མཆོག་ལྷུན་གྲུབ། བདག་ཆེན་ལྔ་པ། ས་སྐྱ་

---

^{[མ་དཔེ་གཟིགས་ན་འདིར་གནོན།]}

པ་ཀུན་དགའ་བཀྲ་ཤིས་རྣམ་རྒྱལ་གྱིས་མཛད། འདི་སྤྱིར་ཕྱི་ནང་གསང་གསུམ་གྱི་ལམ་ཟབ་ལས་གསང་བ་ཡིན་ཀྱང་། ལུས་དཀྱིལ་མེད་པས་ཕྱི་མར་མིང་བཏགས། སློབ་བཤད་ལ་གཞལ་ཡས་ཁང་བསྒོམ་ཚུལ། སྐྱབས་ཡུལ་བསྒོམ་ལུགས། བདུད་རྩི་འཕུལ་ཚུལ། དབང་ལེན་ལུགས་སོགས་བདག་ཆེན་གསུང་སོར་བཞག་གོ །བིར་སྲུང་ཕྱི་མ་འཕགས་པ། ངོར་ཆེན། ཚུལ་འོད། པཎ་ཆེན། ཀུན་བཀྲས་རྣམས་ཀྱིས་མཛད། ནཱ་རོ་མཁའ་སྤྱོད། དཀོན་མཆོག་ལྷུན་གྲུབ། ཚར་ཆེན། ཀུན་བཀྲས། ཐུན་མོང་མ་ཡིན་པ་གནས་གསར་བས་མཛད་པ་རྣམས་སོ། །ལམ་ཟབ་ནང་མ། ར་ཆེན། ཀླུ་སྒྲུབ། ཨ་མེས་ཞབས། ལྔ་པ། ཀུན་བཀྲས་རྣམས་ཀྱིས་མཛད། བིར་སྲུང་ནང་མ་ངོར་ཆེན་དང་ཀུན་བཀྲས་ཀྱིས་མཛད།། ༈ །།འཇམ་མགོན་ཨ་མེས་ཞབས་ཀྱིས། །དེ་ལྟར་སྣང་གསུམ་རྒྱུད་གསུམ་གྱི། །ཉམས་ལེན་ཐམས་ཅད་མདོར་བསྡུ་ན། །སྣང་གསུམ་རྒྱུད་གསུམ་གཉིས་སུ་འདུ། །སྣང་གསུམ་ལམ་གྱིས་གཞི་བཅས་ཏེ། །ཉམས་བླངས་རྒྱུད་གསུམ་དག་གིས་ཤེས། །དེ་ཡང་སྟན་ཐོག་གཅིག་ཉིད་དུ། །ཉམས་སུ་ལེན་ན་འདི་ལྟར་ཡིན། །ཤེས་བྱའི་གནས་ལུགས་ཐམས་ཅད་ཀྱང་། །རྣལ་འབྱོར་རང་གི་སེམས་སུ་བསྡུ། །སེམས་ཉིད་སྤྲོས་བྲལ་ངང་ནས་ནི། །བསྐྱེད་རྫོགས་ཏིང་འཛིན་གསལ་བར་བསྒོམ། །དྲོད་ཀྱི་ཏིང་

---

^{[མ་དཔེ་གཟིགས་ན་འདིར་གནོན།]}

འཛིན་སྐྱེས་པ་ན། །སྤྱོད་པ་བོགས་དབྱུང་ཉེ་རྒྱུ་ཡིས། །མཚམས་སྦྱོར་ས་ལམ་ལེགས་བགྲོད་ནས། །མཆོག་གི་གོ་འཕང་ཐོབ་པར་འགྱུར། །ཅེས་སོ།། ༈ །།རྣལ་འབྱོར་མའི་སྐྱབས་ཡུལ་ཐུན་མིན་ལྟར་ན་དཔའ་བོ་རྡོ་རྗེ་ཆོས་སུ་བསྒོམ་པར་མཛད་གསུངས། ལུས་དཀྱིལ་གྱི་སྔགས་གཡོན་དུ་ཡ་ལྗང་གུ། རྒྱབ་ཏུ་ར་དམར་པོ། གཡས་སུ་ལ་སེར་པོ། མདུན་དུ་ཝ་དཀར་པོ་བསྒོམ་པ་འབྱུང་བཞིའི་ས་བོན་དང་ཁ་དོག་མཐུན་པས་ལེགས། གོ་ཆའི་སྔགས་ཟླ་བ་ལ་མར་མེའི་སྡོང་བུ་བཙུགས་པ་ལྟར་ལེགས་འདྲ་སྟེ། ལྷ་སྔགས་གཞི་མཐུན་པའི་ཕྱིར། ལྷ་བསྒོམ་པ་ན་དེ་ལྟར་བསྒོམ་པ་ལས་འོས་མ་མཆིས་སྙམ་དུ་དགོངས་པའོ།། ༈ །།རྒྱུད་དང་མན་ངག་གི་དཀྲི་ཚུལ་ལམ་གྱི་ཚུལ་སྤྱིར་འདྲ་བ་ལ། བཤད་པ་དང་ཉམས་ལེན་གཙོ་བོར་བཏོན་པའི་དབང་གིས་ཅུང་ཟད་ཁྱད་པར་དུ་ཕྱེ་བ་སྟེ། དཔེར་ན། སྔགས་ཀྱི་རིམ་པ་ཀུན་ཤེས་ནས། ཞེས་བཤད་པ་གཙོར་བཏོན། ཉམས་ལེན་གྱི་སྐབས་སུ། རྒྱུད་གསུམ་གྱིས་བཀྲི་བ་ལ་འཚང་རྒྱ་བའི་ལམ་མཐའ་དག་ཚང་བའི་ཕྱིར། རྒྱུད་སྡེ་འོག་མའི་ལམ་རིམ་བསྒོམ་མི་དགོས་པ་བཞིན་ནོ།། ༈ །།སྔ་འགྱུར་ལུགས་ཀྱི་བསྐྱེད་རིམ་ཕལ་ཆེར་བདག་མདུན་དབྱེར་མེད་དུ་སྒྲུབ་པ་སྟེ། དེ་ཡང་དངོས་གཞིའི་ཏིང་འཛིན་གསུམ་ནས་བཟུང་། རྫས། བསྒྲུབ་གཞི། བསྒྲུབ་བྱ་ཐམས་ཅད་བདག་མདུན་དབྱེར་

---

^{[མ་དཔེ་གཟིགས་ན་འདིར་གནོན།]}

མེད་དམ་ཚིག་དཀྱིལ་འཁོར་གཅིག་གིས་བསྡུས་པར་བསྒོམ་པ་སྟེ། འདི་ལྟར་འཆི་བ་སྦྱོང་ཞིང་ཆོས་སྐུ་ལམ་བྱེད་རྫོགས་རིམ་གྱི་འོད་གསལ་ཀ་དག་གི་ཡེ་ཤེས་འཆར་བའི་རྒྱུར་ཆོས་ཐམས་ཅད་མདོ་མང་ནས་རང་བཞིན་གྱིས་རྣམ་པར་དག་པའི་སྟོང་ཉིད་སྤྲོས་བྲལ་རང་བྱུང་གི་ཡེ་ཤེས་གནས་ལུགས་མ་བཅོས་པའི་ངང་དུ་བློ་འཇོག་པ་དེ་བཞིན་ཉིད་ཀྱི་ཏིང་འཛིན། བར་དོ་སྦྱོང་ཞིང་ལོངས་སྐུ་ལམ་བྱེད་རྫོགས་རིམ་དུས་སྟོང་ཉིད་ལས་ཟུང་འཇུག་གི་དཀྱིལ་འཁོར་དུ་སད་བྱེད་སྙིང་རྗེ་ཆེན་པོ་རང་བྱུང་དུ་འཆར་བའི་རྒྱུད། དེ་ལྟར་མ་རྟོགས་པའི་སེམས་ཅན་ཀུན་ལ་སྙིང་རྗེ་སྒྱུ་མ་ལྟ་བུ་མཁའ་ཁྱབ་ཏུ་བསྒོམ་པ་ནི་ཀུན་སྣང་གི་ཏིང་འཛིན། སྐྱེ་བ་འཛིན་པར་ཕྱོགས་པའི་དྲི་ཟའི་སེམས་ཀྱི་ནཱ་ད་སྦྱོང་ཞིང་སྤྲུལ་སྐུའི་སྣང་བ་ལམ་བྱེད་རྫོགས་རིམ་འོད་གསལ་ལས་སྙིང་རྗེའི་འཕེན་པས་ཟུང་འཇུག་གི་དཀྱིལ་འཁོར་དུ་འཆར་བའི་རྒྱུར། སྟོང་ཉིད་སྙིང་རྗེ་ཟུང་འཇུག་གི་རིག་གདངས་ཡི་གེའི་རྣམ་པར་བསྒོམ་པ་རྒྱུའི་ཏིང་འཛིན་ཏེ། དེ་ལས་ཐམས་ཅད་ཀྱི་བག་ཆགས་སྦྱོང་ཞིང་། སངས་རྒྱས་ཀྱི་ཚེ་རྣམ་པར་དག་པའི་ཞིང་ཁམས་ལམ་བྱེད། རྫོགས་རིམ་དུ་རྩ་འཁོར་འབྱུང་བའི་ཁམས་དང་བཅས་པ་དྭང་མར་སྒྲུབ་ཕྱིར་རྒྱུ་ཏིང་ངེ་འཛིན་ལས་འབྱུང་ལྔ་རིམ་བརྩེགས་གཞལ་ཡས་ཁང་དང་བཅས་པ་བསྒོམ་པ། སྐྱེ་གནས་སུ་བཞུགས་པ་ནས་ལུས་རྫོགས་པའི་བར་སྦྱོང་ཞིང་། སྤྲུལ་པའི་

---

^{[མ་དཔེ་གཟིགས་ན་འདིར་གནོན།]}

ལྷུམས་སུ་ཞུགས་པ་ནས་བལྟམས་པའི་བར་ལམ་བྱེད། རྫོགས་རིམ་དུས་བདེ་བ་ཆེན་པོ་ཟུང་འཇུག་གི་ལྷ་སྐུར་ལྡང་བའི་སྨིན་བྱེད་གཙོ་བོ་བསྒོམ་པ། བྱིས་པ་དེ་ཉིད་ལང་ཚོ་རྫོགས་ནས་བུ་ཚ་འཁོར་གཡོགས་སོགས་འདུས་པའི་བག་ཆགས་སྦྱོང་ཞིང་། འབྲས་བུ་སྤྲུལ་སྐུའི་འཁོར་སྡུད་པ་ལམ་བྱེད་དང་། རྫོགས་རིམ་ཟུང་འཇུག་གི་ལྷ་སྐུ་རྒྱ་ཆེར་སྤྲོ་བའི་ཕྱིར་འཁོར་བསྒོམ་པ། བྱིས་པ་དེ་སྒོ་གསུམ་གྱི་ནུས་པ་སྟོབས་འཕེལ་བ་སྦྱང་ཞིང་། འབྲས་བུ་རྡོ་རྗེ་གསུམ་ལམ་བྱེད། རྫོགས་རིམ་དུ་ཁུ་རྡུལ་རླུང་གསུམ་གྱི་དྭང་མ་སྟོབས་སུ་བྱ་བའི་ཕྱིར་གནས་གསུམ་བྱིན་བརླབས། ཚོར་འདུ་རྫོགས་པས་རྒན་པ་རྣམས་དང་བློ་གྲོས་མཉམ་པ་སྦྱོང་ཞིང་། འབྲས་བུ་སངས་རྒྱས་ཐམས་ཅད་ཀྱི་ཡེ་ཤེས་མཉམ་པ་ཉིད་དུ་གྱུར་པ་ལམ་བྱེད། རྫོགས་རིམ་སྐབས་འཁོར་འདས་དབྱེར་མེད་ཀྱི་ཡེ་ཤེས་བསྐྱེད་ཕྱིར། ཡེ་ཤེས་པ་སྤྱན་དྲངས་བསྟིམ། བློ་གྲོས་རྫོགས་པས་རིགས་མཐུན་གྱི་ལས་ལ་དབང་བསྒྱུར་བ་སྦྱོང་ཞིང་། འབྲས་བུར་སངས་རྒྱས་ཐམས་ཅད་ཀྱིས་དབང་བསྐུར་བ་དང་། རྫོགས་རིམ་དུ་རླུང་སེམས་གཙུག་ཏོར་དུ་ཐིམ་པའི་ཆེད་དབང་བསྐུར་བ། དབང་པོ་རྒྱས་པས་འདོད་ཡོན་ལོངས་སྤྱོད་པ་སོགས་སྦྱོང་ཞིང་། སངས་རྒྱས་ཀྱི་ཚེ་ཡེ་ཤེས་ཆེན་པོའི་མཆོད་བསྟོད་རྒྱུན་མི་འཆད་པ་དང་། རྫོགས་རིམ་དུ་རིག་པ་བརྟུལ་ཞུགས་ཀྱི་སྤྱད་པ་སྤང་བླང་མེད་

---

^{[མ་དཔེ་གཟིགས་ན་འདིར་གནོན།]}

པར་སྤྱོད་པའི་ཆེད་མཆོད་བསྟོད་བྱ་བ། དེ་ནས་བསྐྱེད་རིམ་གྱི་གཙོ་བོ་ལྷ་ཡི་སྣང་ཞེན་ལ་བསླབ་པ་སྟེ། སྔགས་ལམ་གྱི་སྤྱད་བྱར་གྱུར་པའི་སྡུག་བསྔལ་ནི་དོན་དུ་ཐ་མལ་གྱི་སྣང་ཞེན་ཉིད་ཡིན་ལ། དེ་ཡང་སྣང་བ་ནི་སེམས་འཁྲུལ་པའི་སྣང་བ་མ་དག་པའི་སྣོད་བཅུད་འདི་ཡིན་ལ། ཞེན་པ་ནི་ཡུལ་སྔ་མ་ལ་ཕྱི་མ་མུ་མཐུད་པའི་རྟོག་པའི་ལུ་གུ་རྒྱུད་དེ་ཡིན་ཅིང་རྟོག་པ་ལ་མཚམས་སྦྱོར་བཅོལ་ནས་དེའི་ངང་ལ་རང་སར་བཞག་པ་ནི་སྣང་ཆ་ལྷར་བསླང་བ་ཡིན་ལ། མཚམས་སྦྱོར་གྱི་རྟོག་པ་དེ་ལ་ནང་གི་ཡིད་བྱེད་ཕྲ་མོ་ཟེར་ཡང་མི་མཐུད་པའི་ཕྱིར་རྟོག་པ་ཕལ་པ་མིན་ནོ། །དེ་ལྟར་ན་མ་དག་པའི་སྣང་བ་ཐམས་ཅད་དེ་ཏིང་གིས་སྟོང་ཉིད་དུ་སྦྱངས་པའི་ངང་ལས་རྩལ་སྙིང་རྗེའི་འཕེན་ཤུགས་ལྷ་སྐུའི་གསལ་སྣང་ལམ་མེ་བར་གསལ་བ་ལ་སེམས་བཟུང་ཞིང་དེ་ལྟར་མི་གསལ་ན་བྱིང་རྒོད་ཀྱི་མཐར་བརྟག་ནས། བྱིངས་ནམས་རིམ་དང་རྒོད་ན་ཡས་རིམ་གྱིས་སྐུ་ཡི་ཆ་ཤས་ལ་སེམས་བཟུང་ནས་མཐར་ཅིག་ཅར་དུ་གསལ་བ་ལ་སྦྱངས་པས་དང་པོ་ཡིད་ཀྱི་ཡུལ་དུ་ལྷ་ཡི་རྣམ་པ་ཝ་ལ་ཝ་ལ་འཆར། དེ་ནས་རེག་མཐོང་གི་མཚན་མ་ཡོད་པ་ལྟར་དབང་པོའི་མངོན་སུམ་དུ་གསལ། དེ་ནས་རབ་ལུས་ཀྱིས་མཚོན་པའི་མ་དག་པའི་སྣང་བ་ཐམས་ཅད་ནུབ་ནས་ལྷ་ཡི་གསལ་སྣང་དང་ང་རྒྱལ་ལ་རྩེ་གཅིག་ཏུ་གནས་པ་འབྱུང་། དེ་གསུམ་ལ་ཡིད་ཀྱི་ཡུལ། སྣང་བའི་ཡུལ།

---

^{[མ་དཔེ་གཟིགས་ན་འདིར་གནོན།]}

ཞེན་པའི་ཡུལ་དུ་གསལ་བ་ཟེར། དེ་ལྟར་ཡུལ་གསུམ་གསལ་ནས་སྐུ་ཡི་ཆ་ཤས་དང་རྒྱན་ཕྲ་མོ་རེ་རེ་ནས་ཀྱང་གསལ་སྣང་འདོན་ཅིང་། ལྷ་སྐུ་ཆེ་ཆུང་མ་ངེས་པ། མང་ཉུང་ཐུན་རིང་ཐུང་སོགས་མ་ངེས་པ་ལ་རྩལ་སྦྱངས་པས་ལྷ་གྱད་དུ་མྱུར་བ་ཞེས་བྱ་སྟེ། ཇི་ལྟར་བསྒོམས་ཀྱང་བདེ་བར་འགྱུར་པའི་ཚུལ་ལ་བསླབ་ཅིང་། ཚུལ་དེས་རྟེན་དང་བརྟེན་པའི་གསལ་སྣང་ཐོན་པ་ནི། སེམས་ཉིད་གདོད་ནས་ལྷར་ཀ དག་པ་ལས་གཞན་ནས་བཙལ་དུ་མེད་པ་དང་། སེམས་དང་ལྷ་སྐུ་དབྱེར་མེད་དེ་ཡང་གསལ་སྟོང་འཛིན་མེད་དུ་ཤེས་པ་ནི་གནད་དམ་པའོ། །དེས་སྐྱོ་ན་ཐུགས་དམ་བསྐུལ་བའི་ཕྱིར་བཟླས་པ་བྱ་བ་ནི། ངག་གི་ཞེན་པ་དང་སྒྲ་དོན་འདྲེས་འཛིན་གྱི་རྟོག་པ་སྦྱོང་། འབྲས་དུས་ཆོས་འཁོར་བསྐོར་བ་དང་། རྫོགས་རིམ་དུས་རླུང་དབུ་མར་ཐིམ་པར་བྱེད་པའོ། །ཐུན་མཐར་དཀྱིལ་འཁོར་བསྡུ་བ་ནི། འདུ་བྱེད་ཀྱི་ཐ་མ་འཇ ག་པ་སྦྱོང་། འབྲས་དུས་གཟུགས་སྐུ་ཆོས་སྐུར་ཐིམ་པ་དང་རྫོགས་རིམ་དུ་འོད་གསལ་གྱི་ཡེ་ཤེས་འཆར་བའི་རྒྱུའོ། །དེ་ལས་ལྷར་ལྡང་བ་ནི། འཆི་སྲིད་ལས་བར་དོར་ལྡང་བ་སྦྱོང་ཞིང་། ཆོས་སྐུ་ལས་གཟུགས་སྐུར་བཞེངས་པ་དང་། རྫོགས་རིམ་སྐབས་འོད་གསལ་ལས་ཟུང་འཇུག་གི་སྐུར་ལྡང་བའི་རྒྱུའོ།། ༈ །།བར་དོའི་རྣམ་བཞག་ལ། ངོ་བོ། སྒྲ་དོན། དབྱེ་བ། སོ་སོའི་ཁྱད་པར་དང་བཞི། དང་པོ་ནི། གཞི་

---

^{[མ་དཔེ་གཟིགས་ན་འདིར་གནོན།]}

དབྱིངས་ཀ་དག་ལས་གཞན་དུ་སྣང་བ་ཐམས་ཅད་བར་དོའི་གནས་སྐབས་ཡིན་ཏེ། གཞི་སྣང་ཡེ་ཤེས་སུ་ཤར་བ་དག་པ་ཆོས་ཉིད་བར་དོ། །འཁྲུལ་སྣང་འགྲོ་དྲུག་གིས་བསྡུས་སོ་ཅོག་ནི་མ་དག་པ་འཁྲུལ་བའི་བར་དོ་ཡིན་ཏེ། དེ་ཡང་དབྱིངས་ཀ་དག་ལས་ཤར་ཞིང་། འཆར་གཞིའི་དབྱིངས་སུ་མ་རྫོགས་ཀྱི་བར་གྱི་སེམས་པ་ས་བོན་དང་བཅས་པ་ནི་བར་དོའོ། །གཉིས་པ་སྒྲ་དོན་ནི། སྔ་མ་དང་ཕྱི་མ་དག་གི་བར་གྱི་ཆ་ལས་བཏགས་པ་སྟེ་བར་དོ་དང་པོ་གཉིས་ཀྱི་དབང་དུ་བྱས་ན་སྔ་མས་འཕང་ཞིང་ཕྱི་མ་མ་གྲུབ་པའི་བར་གྱི་ཆ་ལས་བར་དོ་དང་། ཕྱི་མ་གཉིས་ཀྱི་དབང་དུ་ན་མཛོད་ལས། འདི་གང་འཆི་དང་སྐྱེ་བ་ཡི། །སྲིད་པའི་བར་དུ་འབྱུང་བའོ། །བགྲོད་པའི་ཡུལ་དུ་མ་ཕྱིན་ཕྱིར། སྲིད་པ་བར་མ། ཞེས་པས་འདི་ནས་ཤི་སྟེ་ཕ་རོལ་ཏུ་སྐྱེ་སྲིད་མ་གྲུབ་དེ་སྲིད་ལ་བར་དོ། །ཞེས་བྱའོ། །དབྱེ་བ་ནི། ཐལ་འགྱུར་ལས། དབྱེ་བ་རྣམ་པ་བཞི་དག་ལས། ཞེས་པའི་དང་པོ་སྐྱེ་ཤི་བར་དོ་ནི། མི་མངལ་དུ་སྐྱེ་བ་གྲུབ་ནས་འཆི་ནད་ཀྱིས་བཏབ་ཚུན་དང་། གཉིས་པ་འཆི་ཁའི་བར་དོ་ནི། འཆི་བ་ལ་ཕྱོགས་ནས་ནང་དབུགས་ཐིམ་ཚུན་ཆད་དང་། གསུམ་པ་ཆོས་ཉིད་ཀྱི་བར་དོ་ནི། ནང་དབུགས་ཆད་ནས་ལྷུན་གྲུབ་གྱི་སྣང་བ་ཐིམ་པ་ཚུན་ཆད་དང་། བཞི་པ་སྲིད་པ་བར་དོ་ནི། ལྷུན་གྲུབ་གྱི་སྣང་བ་ཐིམ་ནས་ཕྱི་མའི་སྐྱེ་སྲིད་གྲུབ་ཚུན་ཆད་དོ། །

---

^{[མ་དཔེ་གཟིགས་ན་འདིར་གནོན།]}

བཞི་པ་སོ་སོའི་ལམ་ཁྱེར་ནི། དཔེ་དོན་གཉིས་ཀྱིས་སྟོན་ཏེ། དཔེ་སྐྱེ་གནས་ཀྱི་བར་དོ་ལ་སྒྲོ་འདོགས་ཆོད་པ་རྒྱ་ཁྲ་ནང་དུ་འཇུག་པ་ལྟ་བུ་སྟེ། དོན་དམ་བླ་མ་ལ་བརྟེན་ནས། དེས་བསྟན་པའི་གདམས་ངག་ལ་ཐོས་བསམ་སྒོམ་པ་ནན་ཏན་ལྷུར་བྱས་ནས་སྒྲོ་འདོགས་ཆོད་པ་བྱའོ། །དེ་བཞིན་དུ་འཆི་ཁ་བར་དོ་གསལ་གདབ་པ་སྒེག་མོའི་མེ་ལོང་བལྟ་བ་ལྟ་བུ་ནི་སྔར་གོམས་པའི་གདམས་ངག་རྣམས་སྐབས་འདིར་བློ་ལ་གསལ་ཐེབས་པའོ། །ཆོས་ཉིད་ཀྱི་བར་དོར་རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུ་ནི་གདམས་ངག་གི་དོན་ཉམས་འོག་ཏུ་ཆུད་པས་ཆོས་ཉིད་ཀྱི་སྣང་ཆ་ཇི་ལྟར་ཤར་ཡང་འཇིགས་པ་མེད་པར་རང་སྣང་ཡེ་ཤེས་ཀྱི་རོལ་པར་གདེང་ཚུད་པའོ། །སྲིད་པ་བར་དོར་ལས་ཀྱི་འཕྲོ་མཐུད་པ་ཡུར་བ་རྐང་ཆག་ལ་ཝ་འཛུགས་པ་ལྟ་བུ་ནི་འཁྲུལ་སྣང་འཇིགས་སྐྲག་ཤར་ཡང་སྔར་གོམས་པ་དང་གཞན་རྐྱེན་གྱི་གསལ་འདེབས་ལ་བརྟེན་དག་པའི་སྐྱེ་སྲིད་ཀྱི་ལམ་དུ་འཇུག་པའོ།། ༈ །།གཅོད་ཡུལ་ཟེར་བ་འདི་ལ་གོ་བ་ལེན་ཚུལ་མང་ནའང་། ཤིང་གཅོད་པའི་ཡུལ་ས་གཞི་ཡིན་པ་ལྟར། བཅད་བྱ་གཟུང་འཛིན་གྱི་རྟོག་པ་གཅོད་པའི་ཡུལ་སྟོང་ཉིད་སྤྲོས་པ་དང་བྲལ་བའི་ཡེ་ཤེས་ཏེ། དོན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བཞིར་ཕྱེ་བའི་གཞི་ཤེར་ཕྱིན་གང་ཡིན་པ་སྟེ། དེའི་ནང་དུ་བྱེད་པའི་གཞུང་ལའང་དེ་ཡི་སྒྲས་སྨོས་པའོ། །

---

^{[མ་དཔེ་གཟིགས་ན་འདིར་གནོན།]}

ཞེས་བཞེད་དོ།། ༈ །།སློབ་དཔོན་རིན་པོ་ཆེ་འཁྲུངས་ཡུལ་ཨོ་རྒྱན་གྱི་ཡུལ་གྱི་ནུབ་བྱང་མཚམས་ཞེས་པ་སྲིན་པོའི་ཡུལ་དུ་བཞེད་པའང་ཡོད་དེ། དེའི་ཡུལ་གླིང་དགུ་བཤད་པ་ན། ལྷོ་ནུབ་མཚམས་ན་སྲིན་པོའི་གླིང་ཞེས་ཡོད། ཅེས་གསུངས་པ་ལ་དགོངས། དེ་ལྟར་ན། ལྷོ་ནུབ་སྲིན་པོའི་ཡུལ་ཞེས་པ་ལ་རྩོད་པ་མི་འབྱུང་བ་ཡིན། སྔོན་གྱི་བསྐལ་པ་དང་པོ་ལ། ཞེས་པའི་སྤྱིར་བཏང་དུས་བཞིའི་ཟླས་ཕྱེ་བ་ལྟ་བུ་མ་ཡིན་པར། དང་པོ་སྐུ་འཁྲུངས་བའི་དུས་དེ་ཙམ་ལ་སྔོན་གྱི་བསྐལ་པ་ཞེས་རྣམ་པར་བཞག་སྟེ། འདི་ལྟ་བུ་མང་ངོ་།། ༈ །།སྡེ་གསུམ་པོའང་ཆོས་སྐད་མི་མཐུན་པ་ཙམ་མང་མོད། མཐར་ཐུག་གི་ལྟ་བ་ལ་ཁྱད་པར་མེད་ཅིང་། ཐབས་ཀྱིས་ཁྱད་པར་འཕགས་པ་ཙམ་དུ་ཁས་བླངས་ན་བདེ་ཞིང་། སྤྱིར་སེམས་སྡེས་ཟབ་པའམ་སྟོང་ཉིད། ཀློང་སྡེས་གསལ་བའམ་འོད་གསལ། མན་ངག་སྡེས་ཟབ་གསལ་དབྱེར་མེད་ཙམ་དུ་བཏོན་ནས་འཆད་པ་དང་། དེ་དང་དེའི་ཐབས་ཀྱང་། གཉུག་མ་རང་སར་འཇོག་པ་ཙམ་དང་། རླུང་དང་ལྟ་སྟངས་ཀྱིས་བོགས་འདོན་པ་དང་། ཐོད་རྒལ་གྱིས་རླུང་སེམས་དབྱིངས་སུ་འཇུག་པའི་ཐབས་ཁྱད་པར་ཅན་གྱིས་འབྲས་བུ་ལ་སྦྱོར་བའི་ཚུལ་ལའང་མྱུར་དུ་བྱུང་བར་བཞེད་དོ།། ༈ །།སློབ་དཔོན་བི་མ་ལས་གཡུའི་ཐང་མ་གྲས་དགུ་ལས། །བྱ་བྱེད་ཀྲི་ཡི་དོན་དམ་དུ། །ཀུན་ཀྱང་དག་པ་ཆོས་ཉིད་ལ། །མཐའ་ཡི་

---

^{[མ་དཔེ་གཟིགས་ན་འདིར་གནོན།]}

དྲི་མ་ཡེ་ནས་མེད། །ཀུན་རྫོབ་རང་བཞིན་རིགས་གསུམ་སྐུ། །ཀུན་ཀྱང་དག་ཕྱིར་དུག་གསུམ་གསུམ། །ལྷ་ཡི་དཀྱིལ་འཁོར་ཡིན་པར་འདོད། །ཅེས་སོ།། ༈ །།བྱང་གཏེར་སྔོན་འགྲོ་གཟེར་ལྔ་སྦྱངས་སྐབས། རྒྱལ་ཆེན་ཐོ་འཛུག་སོགས་བསྙེན་སྒྲུབ་ལྟ་བུའི་སྤྲོས་པ་མ་དགོས་རུང་། མིའི་རྒྱུ་འགྲུལ་བཅད་པ་སོགས་དབེན་པའི་སླད་སྒོ་རྩར་མཚམས་ཐོ་དཀྱུས་འགྲེ་བཙུག །ཐུན་བཞིའི་རིམ་པས་དང་པོ་སྐྱབས་འགྲོ་སེམས་བསྐྱེད་སྦྲགས་མ་འབུམ་ཐེར་སྐབས། ཐུན་གྱི་སྔོན་འགྲོ་ལུས་ངག་ཡིད་གསུམ་རྣལ་དུ་དབབ། སྐྱབས་སེམས་མདོར་བསྡུས། བདག་དང་ཁམས་གསུམ་སོགས་ལན་གསུམ། བླ་མ་ལ་གསོལ་བ་གདབ་ཅིང་རང་ལ་བསྟིམ། སྐྱབས་ཡུལ་དང་། སྐྱབས་སུ་འགྲོ་མཁན། ཇི་ལྟར་སྐྱབས་སུ་འགྲོ་བའི་ཚུལ་རྣམས་གསལ་ལེགས་པར་གདབ་ལ། སྐྱབས་སེམས་མདོར་བསྟན། ཀྱེ་མ་ཁམས་གསུམ་སོགས་ལན་གསུམ། རྒྱས་པ། ཡོན་ཏན་ཀུན་འབྱུང་བརྒྱ་ཚར་ཙམ། དེ་ནས་མདོར་བསྟན་ཁམས་གསུམ་འཁོར་བར་སོགས་སུམ་བརྒྱ་ཙམ་གྱི་མཐར། འབུམ་ཐེར་གསོག་རྒྱུ་དེའམ། དེ་ལས་ཀྱང་བསྡུ་ན། བདག་དང་ཁམས་གསུམ་ཐུན་རེར་ཅི་ལྕོག་གིས་གྲངས་བཟུང་། ཐུན་བསྡུ་བ་ན་སྐྱབས་ཡུལ་མ་བསྡུས་པར་མཎྜལ་གྱི་རྟེན་དུ་བྱས་ནས། ཐོག་མར་མཎྜལ་རྒྱས་པ་སོ་བདུན་མ་ཡོངས་གྲགས་ཚར་གཅིག་ཕྱི་ནང་

---

^{[མ་དཔེ་གཟིགས་ན་འདིར་གནོན།]}

གསང་བའི་མཎྜལ་ཚར་གསུམ། ས་གཞི་སྤོས་བྱུགས་ཉེར་གཅིག་ཙམ་གྱི་མཐར། ཚོགས་ཞིང་བསྡུ་ཚུལ་སྐྱབས་སེམས་ལྟར།། ༈ །།རྡོར་སེམས་བསྒོམ་བཟླས་དམིགས་པ་ངག་འདོན་དཀྱུས་གསལ་ལྟར་ཡིག་བརྒྱ་ཉེར་གཅིག་ཙམ། ཡིག་བདུན་ཕྲེང་སྐོར་ཙམ་གང་ལྕོག་མཐར་མགོན་པོ་བདག་ནི་སོགས་བཤགས་སྡོམ་དང་བཅས་རྡོར་སེམས་རང་ལ་བསྟིམ། མི་རྟག་རྒྱུད་བསྐུལ་གསལ་ལེགས་པར་བཏབ་ལ་ཚར་གཅིག་གསུམ་སོགས་བློ་འཐུལ་ངེས་སུ་བརྗོད། བླ་མའི་རྣལ་འབྱོར་བརྒྱུད་འདེབས་ཁྲིད་བརྒྱུད་ཁ་སྐོང་བཅས་གཞུང་གསལ་མཐར། གས་བདུན་གསོལ་འདེབས་བརྒྱ་རྩའམ་ཉེར་གཅིག་ཙམ་གསོག །སྤྲོ་ན་༡ ལེའུ་བདུན་མ་སོགས་གསོལ་འདེབས་གང་རུང་ཀྱང་བྱ། མཐར་བླ་མ་རང་ལ་བསྟིམས་ནས་ཐུགས་ཡིད་བསྲེས་པ་དར་གཅིག་མཉམ་བཞག་རྗེས་རང་གི་གཞི་ལུས་སྟོང་པར་སྦྱངས། དེའི་ངང་ལས་ཧཱུཾ་ཧཱུཾ་ཞེས་སོགས་དཔའ་བོ་གཅིག་པའི་བདག་བསྐྱེད་བླངས་ལ་ཧཱུཾ་སུམ་བརྒྱ་ཉེར་གཅིག་གི་བཟླས་པའི་མཐར་བསྔོ་སྨོན་བཀྲ་ཤིས་བཅས་སྤྱོད་ལམ་ལ་འཇུག་གོ །རྒྱུན་དུ་ཆགས་མེད་སྐབས་སུའང་སྐྱབས་སེམས་ཉེར་གཅིག་ཙམ་གྱིས་ཆོག་པ་ལས་ངག་འདོན་འདི་སོར་བཞག་བྱ། དེ་ལྟར་ཐུན་བཞིའི་རིམ་པས་དང་པོ་སྐྱབས་སེམས་བསྡུས་པ་འབུམ་ཐེར་དང་ཁྲི་ཕྲག་ལྷག་བཅས་འགྲོ་ངེས་བྱ་བ་འབུམ་ཐེར་དང་པོའོ།། ༈ །།མཎྜལ་སྐབས་

---

^{[མ་དཔེ་གཟིགས་ན་འདིར་གནོན།]}

སྐྱབས་སེམས་ཉེར་གཅིག་ཙམ་དང་། དངོས་གཞི་མཎྜལ་སོ་བདུན་མ་ཉེར་གཅིག་གམ་བདུན་སོགས། ཕྱི་ནང་གསང་བའི་མཎྜལ་བརྒྱ་རྩ་ལས་མི་ཉུང་བ། ས་གཞི་སྤོས་བྱུགས་ལ་གྲངས་བཟུང་ནས་ཐུན་རེར་གང་ཚར། རྡོར་སེམས་མཎྜལ་གང་ལྟར་ཤར་བསྒོམ། དེ་ལྟ་བུས་མཎྜལ་བསྡུས་པ་འབུམ་ཐེར་ཁ་སྐོང་བཅས་འགྲོ་ངེས་བྱ་བ་འབུམ་གཉིས་པ།། ༈ །།རྡོར་སེམས་སྐབས་ཀྱང་སྐྱབས་སེམས་མཎྜལ་༥ མདོར་བསྡུས། རྡོར་སེམས་ཡིག་བརྒྱ་ཐུན་གྱི་དངོས་གཞི་དང་། ཐུན་མཐར་ཡིག་བདུན་གང་ལྕོགས་ཙམ། མཐར་བཤགས་སྡོམ་དང་བཅས་རང་ལ་བསྟིམ། དམིགས་པ་གཙོ་བོར་ངག་འདོན་དཀྱུས་གསལ་དང་། ཐུན་མཐར་དུག་ལྔ་གནས་སྦྱོང་གི་དམིགས་པའང་ནན་ཏན་དུ་བྱ། བླ་མའི་རྣལ་འབྱོར་མན་གོང་གསལ་ལྟར། མཚམས་ཀྱི་སྐབས་བཤགས་སྡོམ། ཐུགས་རྗེ་ཆེན་པོ་བཅོམ་ལྡན་འདས་རྡོ་རྗེ་སེམས་སོགས་དྲི་མེད་བཤགས་རྒྱུད་སྨེ་བཤགས་གྲུབ་ན་ལེགས། དེ་ལྟ་བུས་ཡིག་བརྒྱ་འབུམ་ཐེར་ཁ་སྐོང་བཅས་ས་གྲུབ་ན་ལེགས། དེ་ལྟ་བུས་ཡིག་བརྒྱ་འབུམ་ཐེར་ཁ་སྐོང་བཅས་འགྲོ་ངེས་བྱ་བ་འབུམ་གསུམ། ༈ །།ཕྱག་འབུམ་ཐེར་རྡོར་སེམས་ཀྱི་ཐུན་མཚམས་སུ་ན་རག་སྐོང་བཤགས་ཀྱི་ཕྱག་འཚལ་དང་། ཡིག་བརྒྱ། ལྟུང་བཤགས་བཅས་ངག་ཏུ་འདོན་ཅིང་གང་ལྕོག་བྱ་བའམ། ཡང་ན་ལོགས་སུ་མཚམས་བཅད་ནས་འབུམ་ཐེར་བྱུང་ནའང་ཆོག་པ་བཅས་འབུམ་བཞི།། ༈ །།བླ་མའི་རྣལ་འབྱོར་

---

^{[མ་དཔེ་གཟིགས་ན་འདིར་གནོན།]}

ལ་བརྒྱུད་འདེབས་ཆར་གསུམ་རེ་ཙམ། ལེའུ་བདུན་མ་ཚང་བའམ་འདོན་རེས། ཚིག་བདུན་གསོལ་འདེབས་འབུམ་ཐེར་ཁ་སྐོང་དང་བཅས་འགྲོ་ངེས་སུ་བྱས་ན་འབུམ་ལྔ་ཞེས་གྲགས་པའི་གྲངས་ཚང་བར་འགྱུར་རོ།། ༈ །།དེ་ནས་བདག་བསྐྱེད་དཔའ་བོ་གཅིག་པ་དང་འབྲེལ་བའི་ཧཱུྃ་བསྙེན་ལས་བཞི་བདུན་ཕྲག་བཞིས་བསྙེན་ཚད་གཅིག་རྫོགས་པ་སོགས་རིག་འཛིན་པད་ཕྲིན་བསྙེན་ཡིག་ལྟར་ཉམས་སུ་བླངས། འདི་སྐབས་རྒྱལ་ཆེན་ཐོ་འཛུགས་དང་། ནུབ་རེ་རེ་ཙམ་ལ་ལས་བྱང་འབྲིང་པོ་བཀའ་སྲུང་མཆོད་པ། ཚོགས་མཆོད་བཅས་བྱ་དགོས་པ་གཞིར་བཅས།། ༈ །།དེ་རྗེས་ཐུགས་རྗེ་ཆེན་པོ་མ་ཡིན་པའི་སྔོན་འགྲོའམ་སེམས་འཛིན་སྐུ་གསུང་ཐུགས་བཅས་ལ་སྦྱངས་པ་གང་ལྕོག་གི་ངོས་དངོས་གཞིའི་ཞི་གནས་སེམས་འཛིན། ལྷག་མཐོང་སེམས་འཚོལ། མཐར་ཞི་ལྷག་ཟུང་འཇུག་རང་ངོར་འཇོག་པ་སོགས་རིག་ཐོག་ཏུ་བརྡར་ཤ་བཅད་ནས་རིག་པ་ངོ་འཕྲོད་ཕན་ཆད་མཚམས་བྱས་མིན་ལ་མ་ལྟོས་པར་དྲན་ཤེས་ཀྱི་གསལ་འདེབས་བཅས། འདི་ལྟར་ཡིད་ཀྱི་ཡུལ་དུ་འགྱུ་བ་ཡིས། ཞེས་སོགས་གསུངས་པ་ལྟར་འགྱུ་བ་རང་ཐོག་ཏུ་བཞག །རིག་པའི་རང་ངོ་དང་བསྐྱང་བ་ཁོ་ན་ཉམས་ལེན་གྱི་སྙིང་པོ་དང་། མདོར་ན་མི་རྟག་ངེས་འབྱུང་། བྱང་ཆུབ་ཀྱི་སེམས། བླ་མའི་མོས་གུས། རིག་པ་མ་བཅོས་པར་མཉམ་པར་འཇོག་པ་བཞི་ལ་ཧྲིལ་གྱིས་

---

^{[མ་དཔེ་གཟིགས་ན་འདིར་གནོན།]}

དྲིལ་ནས། ལྷ་སྔགས་ཆོས་སྐུར་རྩལ་སྦྱོང་བ་ནི་ལམ་གྱི་སྙིང་པོ་ཁོ་ན་ཡིན་ནོ།། ༈ །།དགེ་ལྡན་སྙན་བརྒྱུད་ཀྱི་མན་ངག་སྲད་རྒྱུད་ལུགས་ཀྱི་བླ་མའི་རྣལ་འབྱོར་དགའ་ལྡན་ལྷ་བརྒྱ་མའི་འཁྲིད་ལ། །ཁྲིད་ཡིག་དངོས་གཞི་འཇམ་དབྱངས་བདེ་བའི་རྡོ་རྗེས་མཛད་པ་དེ་སོར་བཞག་ནས། ཞལ་ཤེས་ཀྱི་སྐོར་ཟུར་དུ་འབྲི་བ་ལ། སྐྱབས་འགྲོའི་སྐབས་བདུད་རྩི་འབེབས་སྦྱང་ལམ་ཁྲིད་ལྟར། མཐར་གནང་བ་བྱིན་ནས་སྨིན་མཚམས་ནས་རང་ལ་ཐིམ་པར་བསམ། མཆོད་པ་བྱིན་རླབས་བླ་མཆོད་ལྟར་རམ། བདེན་སྟོབས་ཀྱི་སྒོ་ནས་བྱ། བྱམས་མགོན་གྱི་ཞིང་དང་སྐུ་དང་ཤེར་མདོའི་ཆོས་དངོས་སུ་གསུངས་སྙམ་པ་དང་བཅས་གསལ་བཏབ། སྤྱན་འདྲེན་པའི་ཚེ་རྗེ་ཡབ་སྲས་གསུམ་གྱིས་མངོན་སུམ་དུ་གསན། ཕན་ཚུན་རང་ཉིད་སྨིན་གྲོལ་ལ་འགོད་པའི་གསུང་གླེང་དང་བཅས་ཏེ་བྱོན་པར་བསམ། དེ་དག་སྐྱབས་གནས་ཀུན་འདུས་ནོར་བུ་ལུགས་སུ་བྱེད་པ་དང་། འོད་ཟེར་གྱི་སྣེ་ལས་བརྒྱུད་པ་གསུམ་གྱི་བླ་མ་ཡི་དམ་སངས་རྒྱས་བྱང་སེམས་ཆོས་སྲུང་ནོར་ལྷའི་ཚོགས་དཔག་ཏུ་མེད་པ་སྤྲོ་བ་གང་ཡང་རུང་། གང་ལྟར་ཡང་རྗེ་བླ་མ་སྲིད་ཞི་ཀུན་ཁྱབ། བརྟན་གཡོ་ཀུན་གྱི་རང་བཞིན་ཡེ་ཤེས་ཀྱི་སྐུ་ཅན་དུ་གསལ་བ་ནི་ཤིན་ཏུ་གལ་ཆེ། ཕྱི་མཆོད་སོགས་གང་གི་ཚེའང་ཐུགས་རྒྱུད་ཟག་མེད་ཀྱི་བདེ་བས་མཉེས་ཤིང་སྟོང་ཉིད་ལ་ཞུགས་པར་

---

^{[མ་དཔེ་གཟིགས་ན་འདིར་གནོན།]}

བསམ་པ་ནི་སྔགས་དང་། མདོ་ཆོག་ཏུ་ཐུགས་རྒྱུད་མཉེས་པ་ཙམ་བསམ་གསུངས། བཤགས་པའི་སྐབས་འོད་ཟེར་འཕྲོ་བས་ལུས་ལ་ཐིམ་པ་དང་། ཆོས་འཁོར་བསྐོར་བའི་ཚེ་ཞལ་གྱིས་བཞེས་པ་དང་། བསྔོ་བའི་ཚེ་དེ་དག་གི་རྒྱུར་བསྔོས་ཤིང་བྱིན་གྱིས་བརླབ་པར་བསམ། རྒྱས་པར་ན་དཔལ་ལྡན་ས་གསུམ་མ་བཏོན་ནས། མཆོག་གི་དངོས་གྲུབ་བརྙེས་ལ་གསོལ་བ་འདེབས། ཞེས་པའི་མཚམས་དམིགས་བརྩེ་མ་བཟླ། དེ་ཡང་དོན་དྲན་བཞིན་པས་འདོན་དགོས། དོན་དྲན་ཚུལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་རིགས་གསུམ་མགོན་པོར་འདུས་ཤིང་དེའི་ཡོན་ཏན་ཀྱང་མཁྱེན་བརྩེ་ནུས་གསུམ་ལ་འདུས། དེ་ཐམས་ཅད་རྗེ་བླ་མ་ལ་ཚང་ཞིང་། རྗེ་ཉིད་རིགས་གསུམ་མགོན་པོའི་སྤྲུལ་པ་ཡིན་ཚུལ་བཀའ་གདམས་གླེགས་བམ་གྱི་ལུང་དང་། ཡུམ་གྱི་མནལ་ལྟས་སུ་ལྕང་ལོ་ཅན་ནས་རྡོ་རྗེ་འཕང་པ་དང་། བལྟམས་པའི་དུས་སུ་བཙུན་པ་མང་པོས་སྤྱན་རས་གཟིགས་ལ་བསུ་བ་བྱེད་ཟེར་བ་སོགས་མ་མཐའ་འང་འདི་ཙམ་དྲན་དགོས། དེ་ཡང་བཞི་སྐོར་བྱེད་པའི་ལུགས་ཏེ། ལྔ་སྐོར་ལ། བསྟན་པའི་བདག་པོ་ཐུབ་དབང་བཅོམ་ལྡན་འདས། ཞེས་དང་། དྲུག་སྐོར་ལ། རིགས་བརྒྱའི་ཁྱབ་བདག་དྲུག་པ་རྡོ་རྗེ་འཆང་། ཞེས་དེ་འོག་ཏུ་བསྣན་པ་ལྟར་དང་། ཡང་ན། དངོས་གྲུབ་ཀུན་འབྱུང་ཐུབ་དབང་རྡོ་རྗེ་འཆང་། ཞེས་དང་། དགུ་སྐོར་

---

^{[མ་དཔེ་གཟིགས་ན་འདིར་གནོན།]}

བྱེད་ན། རྗེ་རིན་པོ་ཆེའི་དཔྲལ་བར་སྤྱན་རས་གཟིགས་ཕྱི་སྒྲུབ་ཕྱག་བཞི་པ། དེའི་ཐུགས་ཀར་ནང་སྒྲུབ་རྡོ་རྗེ་ཆོས་འོག །དེའི་ཐུགས་ཀར་བླ་མེད་ནས་བཤད་པའི་སྤྱན་རས་གཟིགས་རྒྱལ་བ་རྒྱ་མཚོ། མགྲིན་པར་འཇམ་དབྱངས་ཕྱི་ནང་གསང་གསུམ་འཇམ་དབྱངས་ཆོས་སྐོར་ལྟར་དང་། ཐུགས་ཀར་ཕྱག་རྡོར་གོས་སྔོན་ཅན། གཏུམ་པོ། འཁོར་ཆེན་རྣམས་གསལ་བཏབ་པ་ན་སྐུ་ནོར་བུ་མཛོད་འཛིན། གསུང་ཉི་མ་སྣང་བྱེད། ཐུགས་གསང་བ་མཛོད་འཛིན། ཡང་ན་རྗེའི་ཐུགས་ཀར་འཇམ་དབྱངས། རྒྱལ་ཚབ་རྗེའི་ཐུགས་ཀར་སྤྱན་རས་གཟིགས། མཁས་གྲུབ་རྗེའི་ཐུགས་ཀར་ཕྱག་རྡོར་བསྒོམས་ཀྱང་རུང་། འཆད་རྩོད་རྩོམ་གསུམ་གྱི་ཞལ་ཤེས་ལ། བདུད་རྩི་འབེབས་སྦྱང་འདྲ། རྡོ་རྗེའི་རྡུལ་ཕྲ་རབ་ཀྱིས་ལུས་གང་བར་བསམ་པ་དང་། འཆད་པ་དངོས་ཀྱི་ཚེ། རང་གི་སྤྱི་བོར་རྗེ་བླ་མ་བསྒོམས་ལ། བདུད་རྩི་འབེབས་སྦྱང་དང་། ཁྱད་པར་རང་གི་ལྕེ་སྟེང་སྣ་ཚོགས་རྡོ་རྗེ་རེ་རེ་བསྒོམ། སྤྱི་བོའི་བླ་མའི་སྐུ་ལས་བདུད་རྩིས་སློབ་མའི་ལུས་ཀྱང་སྣ་ཚོགས་རྡོ་རྗེ་གང་བར་བསྒོམས་པས་ཕན་ཐོགས་ཆེ་གསུང་། རྩོད་ཚེ་རང་གི་ལྕེ་སྟེང་དུ་གཞུང་གི་འཁོར་ལོ་གཡས་དང་ཡིག་འབྲུ་གཡོན་དུ་འཁོར་བས་ཕྱིར་རྒོལ་གྱི་ལྕེ་དུམ་བུར་བཅད་པར་བསམ། འོན་ཀྱང་ཕྲན་ཚེགས་ལ་གཞུང་གི་དེ་གས་འཐུས། རྩོམ་པ་ལ་གླེགས་བམ་རྣམས་གང་བརྩམ་

---

^{[མ་དཔེ་གཟིགས་ན་འདིར་གནོན།]}

རྒྱུའི་བརྗོད་བྱ་ཅན་གྱི་ཚིག་དོན་ཕུན་ཚོགས་པར་གསལ་འདེབས། བདུད་རྩི་འབེབས་སྦྱང་སྤྱི་གཙུག་ནས་ཡར་གཞལ་བའི་སོར་བཞི་ཙམ་གྱི་མཚམས་ནས་མྱུ་གུ་གསུམ་འདྲེས་པར་བྱེད་ཅིང་། མཐར་སྦུ་གུ་ཡང་རང་ལ་ཐིམ་པ་ཡིན། མཇུག་ཏུ་དཔལ་ལྡན་རྩ་བའི་བླ་མ་ཚར་གསུམ་བརྗོད་པ། གཅིག་བརྗོད་པའི་ཕྱི་མ་གཞུང་ལྟར། དང་པོ་བདག་གི་སྤྱི་བོར་ཞེས་པའི་སྐབས་ཡབ་སྲས་གཅིག་ཏུ་གྱུར། གཉིས་པའི་སྐབས་རང་གི་སྤྱི་བོར་བྱོན། གསུམ་པའི། བདག་གི་སྙིང་གར་ཞེས་བརྗོད་པ་ན་སྙིང་ག་ཡན་གྱི་དབུ་མ་གསལ་འདེབས། སྙིང་གའི་རྩེ་མོར་རྡོ་རྗེའི་དབུས་ཧཱུྃཧཱུྃ་གང་རུང་གསལ་བཏབ་སྟེ། བདུད་རྩི་འབེབས་སྦྱང་ཞི་ཁྲོ་སྦྲགས་སྒྲུབ་ལྟར་དང་། སྙིང་གི་སྟེང་དུ་ཨ་ར་པ་ཙ་གཡས་སྐོར་དང་། དམིགས་བརྩེ་མས་གཡོན་དུ་དཀྲི་བ་དང་། དབུ་མའི་ཕྱི་ལ་ཡང་སྔགས་དང་དམིགས་བརྩེ་མས་དཀྲི། དེང་ནས་བརྩམས་ཏེ་སོགས་སྨོན་ལམ་གྱིས་མཐའ་བརྒྱན་ཅིང་། ཐུན་མཚམས་ཀྱི་སྐབས་སུ་ཟས་གོས་སོགས་སྙིང་གའི་བླ་མ་དང་རང་སེམས་དབྱེར་མེད་ལ་ཕུལ་བ་སོགས་བློ་དང་འཚམས་པར་སྤྱད། འདི་ལ་ཐུན་བཞི་སོགས་ཆིག་དྲིལ་དུ་བྱེད་ན། དང་པོ་གསུམ་གྱི་ཚེ་རང་འདྲ་གཉིས་པ་རེ་ཆད་ནས་ཐིམ་པའི་དམིགས་པ་བྱེད། དེའི་ཚེ་སྙིང་གི་པདྨ་བུམ་སྐུའི་ཁ་ལྷོད་ཀྱིས་གྲོལ་ནས་སྔར་ཡོད་ལ་ཐིམ། སླར་ཁ་བསྡུ། རྗེས་མ་རྣམས་ལ་ཡན་ལག་

---

^{[མ་དཔེ་གཟིགས་ན་འདིར་གནོན།]}

བདུན་པ་སོགས་ཐུན་དང་པོ་ལྟར་དགོས། གསར་དུ་སྤྱན་དྲངས་པ་རྣམས་སྔར་ཡོད་ལ་བསྟིམ། ལས་ཚོགས་བཅུ་གཅིག་སོགས་སྒྲུབ་པ་ལ་སྔོན་དུ་བསྙེན་པ་འབུམ་ཕྲག་ལྔའམ་གསུམ་དང་མ་མཐའ་ཡང་འབུམ་ཕྲག་གཅིག་དགོས་ཀྱང་། ཤེས་རབ་དང་ཚེ་སྒྲུབ་པ་སོགས་གྱི་དམིགས་པ་དང་པོ་ནས་བྱས་ན་ཆོག །སྤྱིར་ཤེས་རབ་ལ། ཕྱག་གི་གླེགས་བམ་དབུ་ཕར་སོགས་གང་འདོད་ཡི་གེའི་རང་སྒྲ་སྒྲོགས་པ་འོད་ཟེར་གྱི་རང་བཞིན་དུ་གསལ་བཏབ། ཚེ་སྒྲུབ་ལ་གཡས་ཆོས་འཆད། གཡོན་མཉམ་བཞག་ཚེ་བུམ། དེ་ལས་བདུད་རྩི་བབས། སྤྱི་བོ་ནས་ཞུགས། ཚེའི་བར་ཆད་དང་། །འཆི་མེད་ཐོབ་པར་བསམ། བུམ་ནང་དུ་ཟླ་བ་ལ་སྔགས་ཕྲེང་བཀོད་དེ་ཚེ་གཟུངས་དང་དམིགས་བརྩེ་མ་སྤེལ་ནས་བཟླ། ནོར་སྒྲུབ་ལ་གཡས་མཆོག་སྦྱིན། གཡོན་མཉམ་བཞག་རིན་ཆེན། དེ་ལས་འདོད་དགུའི་ཆར་འབེབས་པ། མངོན་སྤྱོད་ལ་སྐུ་ལས་མེ་དཔུང་སྤྲོས་པས་བསྲེགས་པ་དང་། ཁྲོ་བོ་སྤྲོ་བ་སོགས་བྱ། སྐུ་ལུས་སྤྲོས་པའི་རྡོ་རྗེའི་མེ་རེ་ཁཱ་ཕྲ་མོ་སྤྲོས་ཏེ་ཕྱི་རོལ་ཐམས་ཅད་ཡེ་ཤེས་ཀྱི་མེས་བསྲུང་། མདོར་ན། ཞི་བ་དཀར་པོ་པད་དཀར་འཛིན། སོགས་རྒྱས་སེར་རལ་གྲི་གླེགས་བམ་དང་། སོགས། དབང་དམར་ཚེ་བུམ་དམར་པོ་དང་། སོགས་འཇམ་དབྱངས་ཆོས་སྐོར་ལས་འབྱུང་བའི་མན་ངག་རྣམས་ཀྱང་འདིར་བྱའོ། །ཤུབྷཾ།། ༈ །།གཉན་སར་

---

^{[མ་དཔེ་གཟིགས་ན་འདིར་གནོན།]}

འགྲོ་གནས་བརྟགས་ལ་འགྲོ་ངེས་པ་དང་གསང་ཞིང་གཞན་ལ་ཁ་འཕངས་ཏེ་འགྲོ། སྐྱབས་འགྲོ་སེམས་བསྐྱེད་བླ་མ་ལ་གསོལ་བ་དྲག་ཏུ་གདབ། ལམ་དུ་ཞུགས་དུས་རང་གི་འོད་ཟེར་གྱིས་གཉན་སའི་ལྷ་འདྲེ་རྒྱལ་བློན་འབངས་ཅད་རྩ་ལག་བཅས་བསྡུས་ནས་རང་ལ་བསྟིམ། འདུག་སར་སླེབ་པ་དང་རང་ཉིད་གཉན་སར་བསྟིམས་ལ་དབྱེར་མེད་དུ་བཞག་གོ །གཉན་ཐོག་གཉན་དབབ། མེ་བཙའ་ཨ་ན་ཚུགས་སུ་བཞག །གཉན་སའི་དབྱིབས་རྫས་དང་། གཟུགས་དང་། མ་ངེས་པ་དང་། འཆོལ་བའོ། །འཁོར་ལོའམ་དཔལ་བེའུའི་ལྟེ་བ། གདུགས་དང་རྒྱལ་མཚན་གྱི་ཏོག །གཅན་གཟན་ཁ་སྡེར། འདབ་ཆགས་སྙིང་། །དུད་འགྲོའི་རྭ། གཞན་གཙུག་དང་རྐེད་པ། ལྷ་ཁང་སྟོང་པའི་སྒོ། མཆོད་རྟེན་དྲུང་། ལམ་སྲང་མདོ། རི་རྩེ་གཅིག་རྩེ་མོ། གཉིས་པའི་སྒང་། རྒྱུད་རིང་བའི་འབུར་བ། རི་ངོས་འབུར་བའི་སྐམ། སྐམ་གྱི་འབུར་འབོ། །ལུང་མདོ། ཐང་དཀྱིལ། ཤིང་རྩ། རི་སུལ། ནགས་ཚལ་མཐུག་པའི་སྲབ། སྲབ་པའི་མཐུག རྩུབ་པའི་སྲབ། སྲབ་པའི་རྩུབ། ན་བ་དང་མཚོ་སྟོད། ཆུ་ཆེན་འགྲམ། ཆུ་དམར་འདུས་མདོ། ཟླ་གམ་སྟེ། ཟླུམ་པའི་ཁུག །འཁྱོགས་པའི་ཁུག །ཆུ་མིག་མགོ་གཅིག་འོག །མགོ་མང་འདུས་སོ། །ཕ་བོང་དང་བྲག་སྟེང་། ཤིང་གི་ཡལ་ག་བཅད་ལ་ཞབས་སུ་བཏིང་། གངས་རི་བརྡལ་

---

^{[མ་དཔེ་གཟིགས་ན་འདིར་གནོན།]}

ལ་རྩེར་བསྡད་དམིགས། གཉན་དམིགས་མང་ན་ཤིང་ས་རྡེའུ་བླངས་ལ་ཞབས་སུ་གཞུག །ས་དམིགས་མ་སྙེད་ན་གཅེར་བུ་ཌཱ་དྲིལ་དཀྲོལ་གར་སྟབས་བྱས་པས་སྐྱི་གཟིངས་ཉམས་དགའ་བྱུང་སར་བསྡད། ཟབ་གཏིབ་ཕྱམ་གཤའ་ཆུ་སྣ་དགྲ་དེ་རྣམས་སྤངས། གཉན་དམིགས་སྙེད་ནས་སྦྲ་གུར་མལ་ས་བྱས་ལ་མ་ཆོད་བར་དུ་མི་སྤྲོ། ངག་ཏུ། འཁོར་བ་མ་སྟོང་གི་བར་འདིར་འདུག་གི་གཞན་དུ་མི་འགྲོ། བརྗོད། དེས་མགོ་བསྐོར་མི་འོང་། ཕྱོགས་བཞིར་ཐོ་བཞི་ཡུམ་ཆེན་བཞིར་བསྒོམ། དེས་མནན་བྲོས་དབང་མེད་པར་བསམ། དེ་ནས་བླ་མའི་རྣལ་འབྱོར་བསྒོམ་རྗེས། སྟོང་པའི་ངང་ལས་རང་ཉིད་ཡུམ་ཆེན་མོ་སྐུ་མདོག་སྔོ་ནག་ཞལ་གཅིག་ཕྱག་གཉིས་སྤྱན་གསུམ། ཞལ་མཆེ་བ་གཙིགས་པ། དབུ་སྐྲ་དམར་སེར་གྱེན་དུ་འབར་བ། ཕྱག་གཡས་གྲི་གུག་ནམ་མཁའ་འཕྱར་བ། གཡོན་ཐོད་ཁྲག་ཐུགས་ཀར་འཛིན་པ། གྲུ་མོ་ན་ཁ་ཊཾ་ག་ཡོད་པ། རུས་པའི་རྒྱན་ལྔ་དང་ལྡན་པ། སྟག་གི་པགས་པའི་ཤམ་ཐབས་ཅན། སྐུ་ལ་ཡེ་ཤེས་ཀྱི་མེ་འབར་བ། ཞབས་གཉིས་གར་སྟབས་ཁྱུག་ཁྱུག་བྱེད་པ། ཤིན་ཏུ་འཇིགས་སུ་རུང་བ་གཅིག་བསྒོམ། ངག་ཏུ་ཨཱརིང་པོ་བརྒྱ་རྩ་བརྒྱད་ལ་སོགས་པ་བརྗོད། ཡིད་ཀྱི་ཕོ་ཉ་ཕྱག་རྒྱ་བཞི་འཛིན་པ་གྲངས་མེད་སྤྲོས་ནས་སྤྱིར་སྟོང་གསུམ། སྒོས་འཛམ་བུ་གླིང་། ཁྱད་པར་གཉན་སའི་ལྷ་འདྲེ་རྩད་

---

^{[མ་དཔེ་གཟིགས་ན་འདིར་གནོན།]}

འབྲེལ་ཐམས་ཅད་རང་དབང་མེད་པར་བཀུག་ནས་བསྒོམ་པའི་ས་གཞི་ལ་བསྟིམ་ནས་རང་གི་ལུས་ཆེན་པོར་གྱུར་ནས་མནན་པར་བསམས་ལ་ཉལ་ལོ། །ཞག་གསུམ་དེ་ལྟར་བྱས་པས་ཚར་ཚད་མྱུར་བའི་དགོས་ཊྛ པ་ཡོད་དོ། །རབ་ཀྱིས་གཉིས་མེད་དོན་ལ་བཞག །འབྲིང་གིས་དེ་ལ་གཏད་དེ་བསྒོམ། །ཐ་མལ་ཕུང་པོ་གཟན་དུ་བསྒྱུར། དབང་པོ་ཐ་མས་ཆོ་འཕྲུལ་འཇིགས་སྐྲག་བྱུང་བ་ན་ལུས་སེམས་ཕྲལ་ལ། སེམས་དངོས་མེད་ནམ་མཁའ་དང་འདྲ་བས། འདྲེ་ཁྱོད་བས་དུས་གསུམ་སངས་རྒྱས་ཀྱིས་ཀྱང་མ་གཟིགས་མི་གཟིགས་གཟིགས་པར་མི་འགྱུར་བས་འཇིགས་པའི་ཡུལ་དུ་མ་གྲུབ་པས། ལུས་བེམ་པོ་ས་རྡོ་དང་འདྲ་བ་འདི་ལ་འཇིགས་པའི་རྒྱུ་མེད་པས། དེས་ནི་བདག་ཏུ་མི་བཟུང་། མི་མ་ཡིན་ཁྱེད་རྣམས་ལ་ཅི་དགའ་བ་ཁྱེར་ཅིག །སྤྱིར་སྣང་ཞིང་སྲིད་པའི་ལྷ་འདྲེ། བཀའ་ལྷ་མ་སྲིད་སྡེ་བརྒྱད། བགེགས་རིགས་སྟོང་ཕྲག་བརྒྱད་ཅུ། དྲེགས་ཆེན་བཅོ་བརྒྱད། བྱིས་པའི་གདོན་ཆེན་བཅོ་ལྔ། ཕོ་གདོན་རྒྱལ་པོ། །མོ་གདོན་འདྲེ་མོ། ཀླུ་གདོན་ཐེའུ་རང་། གཟའ་བདུད་རྒྱལ་པོ་རཱ་ཧུ་ལ། ཡུམ་གདོང་མོ་བཞི། ཀླུ་བདུད་རྒྱལ་པོ་ཉ་ནག་མདོང་། མཆེད་རིགས་སུམ་བརྒྱ་དྲུག་ཅུ་ལ་སོགས་པ་ས་དང་ནམ་མཁའ་བར་སྣང་ལ་གནས་ཤིང་རྒྱུ་བའི་བགེགས་ཐམས་ཅད་ལ་འབུལ་ལོ། །སྒོས་བདག་ཅག་འཁོར་དང་བཅས་པ་རྣམས་ལ་གནོད་ཅིང་

---

^{[མ་དཔེ་གཟིགས་ན་འདིར་གནོན།]}

འཚེ་བར་བྱེད་པའི་ལོག་འདྲེན་ཐམས་ཅད་ལ་འབུལ་གྱི། ཤ་ལ་དགའ་བས་ཤ་ཟོ། ཁྲག་ལ་དགའ་བས་ཁྲག་འཐུང་། རུས་ལ་དགའ་བས་རུས་པ་མུར། ཏིལ་འབྲུ་ཙམ་ཡང་མ་ལུས་པར་མཛོད་ཅིག ། ཅེས་ངག་ཏུ་བརྗོད་ལ་ཡིད་ཀྱིས་བསམ་མོ། །སེམས་ཀྱི་རེ་དོགས་འཁྲི་བ་མ་ཆོད་ཀྱི་བར་ནན་ཏན་དུ་བྱའོ།། ༈ །།ལྷ་འདྲེ་འཇིང་ཆེ་ནས་སློང་མ་ཐུབ་པ་ལ་མཐའ་གཏད་བྱ་སྟེ། ཕྱི་ཡི་མཐའ་གཏད་དུས་སུ་ཆོ་འཕྲུལ་མ་བྱུང་ན། །ཡིད་ཀྱིས་རི་ཡི་རྩེ་ནས་བསྙིལ་པ། བྲག་བཤིག་པ། ཤིང་གཅོད་པ། མཚོ་དཀྲུག་པ། ཆུ་མིག་ཁ་གཏིང་བཟློག་པ། ན་བཀྲལ་བ། ས་བརྐོ་བ། ཟབ་གཏིང་བ་སོགས་གཉེན་ས་དེར་འོས་པའི་བརྟུལ་ཞུགས་བྱས་པར་བསྒོམ། དེས་ཀྱང་མ་སློང་ན་དངོས་སུ་མི་རྟག་ཙམ་གྱི་བརྟུལ་ཞུགས་སྤྱོད་པ་ཕྲན་ཚེགས་བྱའོ། །དེས་ཀྱང་མ་སློང་ན་ལུས་གཅེར་བུར་གོང་གི་ཏིང་ངེ་འཛིན་གྱི་སྤྱོད་པ་དངོས་སུ་བྱ། དབྱིངས་རིག་བསྲེ་ལ་བདག་འཛིན་མེད་པར་ངར་གདགས། །ཤེས་པ་ཧུར་ཕྱུང་། གང་ལའང་ཉམ་ང་བག་ཚ་མེད་པར་མི་ཕོད་ཐོག་རྩིས་བྱའོ།། ༈ །།ནང་གི་མཐའ་གཏད་ནི་གཉེན་ཆེན་མཐའ་ལ་གཏད་པ་སྟེ། །གཉན་ནི་ང་དང་བདག་ཏུ་འཛིན་པས་གཉན། །མཐའ་ནི་དེ་ཡི་རང་བཞིན་སྟོང་པ་ཉིད། །གཏད་ནི་དེའི་ངང་ལ་བཞག་པའོ།། ༈ །།གསང་བའི་མཐའ་གཏད་བེམ་རིག་ཕྲལ་ལ་ལུས་ཚོགས་བྱ།

---

^{[མ་དཔེ་གཟིགས་ན་འདིར་གནོན།]}

རིག་པའི་ངོ་བོ་རིགས་ལྔའི་ཌ་དྲིལ་རུས་རྒྱན་ཅན་དཔག་མེད་ནམ་མཁའ་ས་གཞི་གང་བས་གར་སྟབས་ཀྱིས་རི་བྲག་ཁོང་སེང་ཐམས་ཅད་ཕཊ་སྒྲས་གཡེང་ནས་རང་དབང་མེད་པར་སློང་བར་བསམ། རྗེས་ཐམས་ཅད་གཉིས་མེད་ངང་ལ་མཉམ་པར་བཞག ༈ །ནད་པའམ་གདོན་ཆེན་ཅན་ལ་མཐའ་གཏད་ནི། ཆོ་འཕྲུལ་དྲག་པོ་འོང་བའི་སྒང་ལ་མཐའ་གཏད་བྱ། གཅེར་པུར་ཕུད་ལ་རེ་དོགས་གཟུང་འཛིན་བློས་བཏང་ལ། ངག་ཏུ། གཟའ་བདུད་རྒྱལ་པོ་རཱ་ཧུ་ལ། ཀླུ་བདུད་ཀྱི་རྒྱལ་པོ་ཉ་ནག་མདོང་། གཞན་ཡང་སྣང་ཞིང་སྲིད་པའི་ལྷ་འདྲེ་བཀའ་མ་ལྷ་སྲིན་སྡེ་བརྒྱད་དམག་དཔུང་དང་བཅས་པ། ཁྱད་པར་དུ་ཡང་གཉན་ས་འདིར་གནས་པའི་ལྷ་འདྲེ་རྒྱལ་བློན་འབངས་གསུམ་དུ་གཏོགས་པ་ཐམས་ཅད་ཉོན་ཅིག །བདག་རྣལ་འབྱོར་པས་དོན་ཤེས་རབ་ཀྱི་ཕ་རོལ་ཏུ་ཕྱིན་པའི་ལམ་བསྒོམ། རིག་པ་བྱང་ཆུབ་ཀྱི་སེམས་ཀྱིས་རྩལ་སྦྱོང་། ང་བདག་གཉིས་འཛིན་གྱི་གཞི་རྩ་གཅོད། ལུས་བེམ་པོ་སྦྱིན་པར་བཏང་། མ་རིག་པའི་ལྷ་འདྲེའི་འཁྲུལ་པ་བསལ། དམ་པ་ཆོས་ཀྱི་འབྲེལ་པ་འཇོག །ཐེག་པ་ཆེན་པོའི་ལམ་ལ་བཀོད། མཐར་ཐུག་རྣམ་མཁྱེན་སངས་རྒྱས་ཀྱི་ས་ལ་བཞག་པའི་ཆེད་དུ་གནས་འདིར་འོང་བ་ཡིན་པས། །ཆེ་གེ་མོ་ལ་སོགས་པ་བདག་ཅག་རྣམས་ཀྱི་ཕུང་པོ་ལུས་གདོན་དང་བཅས་པ་ཁྱེད་རྣམས་ལ་གཏད་པས་ད་ལྟ་ཉིད་དུ་ལོངས་ཤིག །

---

^{[མ་དཔེ་གཟིགས་ན་འདིར་གནོན།]}

སྒྲ་ཡི་རྩེ་མོ་མན་ཆད། རྐང་པའི་མཐིལ་ཡན་ཆད། ཕྱི་ཤ་ནང་ཁྲོལ། སྐྲ་དང་བ་སྤུ་ཚུན་ཆད་ཏིལ་འབྲུ་ཙམ་ཡང་མ་ལུས་པར་ཁྱེར་ཅིག །ཁྱེར་མ་ནུས་ན་ཁྱེད་རྣམས་ཞན། སྟེར་མ་ནུས་ན་རྣལ་འབྱོར་པ་ཞན། ཁྱེད་རྣམས་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པའི་བཀའ་དང་དམ་ལ་མ་འདའ་ཞིག །མཁའ་འགྲོའི་ཚོགས་དང་ལྷ་འདྲེ་ལ་དམར་འགྱེད་དྲག་ཏུ་བྱའོ། །རྗེས་ལྷ་འདྲེས་གཙོར་བྱས་སེམས་ཅན་ཐམས་ཅད་ལ་བསྔོ་སྨོན་རྒྱ་ཆེན་བྱའོ། །སྐག་ན་སྐྲག་ཐོག །ཡ་ང་ན་ང་ཐོག །སྐྱུག་བྲོ་ན་བྲོ་ཐོག་སྐྱུག །སྙེམས་གང་ལ་ཞུགས་པ་ན་དེར་ཕར་བསྲེ་ལ་བསྒོམ། འགོས་ནད་ལྟ་བུ་ལའང་དེ་ལ་ལུས་ངག་ཡིད་གསུམ་བསྲེ། དེ་ལྟ་བུའི་མི་འདོད་པ་གང་བྱུང་ཡང་དེ་ལྟར་བྱའོ། །ཚར་ཚད་རྫོགས་འཕྲལ་ཕྱི་རོལ་ཐོག་སེར་བྱུང་ན་དྲག་ཏུ་མི་གཅུན། གཅུན་ན་ལྡོག་པས་མི་ལྡོག་སྒོ་གཏན་ཉམས་སུ་བླང་།། ༈ །།མི་ལྡོག་སྒོ་གཏན་ལྟ་བུ་ནི། སྐྲག་ཅིང་སྤངས་ཀྱང་མི་བྲོས་སོ། །ཆོ་འཕྲུལ་འཇིག་སྐྲག་སྔངས་གསུམ་ཅི་བྱུང་ཡང་། །འཕྲལ་འཕྲིག་སྙེམ་ཚོལ་མེད་པར་ཉལ་ལ་སྡད། །ངག་ཏུ། ཆོ་འཕྲུལ་གདུག་རྩུབ་མི་བཟད་པ་ཆེན་པོ་ཉིན་མཚན་མེད་པར་ཤོག་ཅིག །བདག་གི་ཕུང་པོ་རྣམ་རྟོག་བདག་འཛིན་དང་བཅས་པ་ད་ལྟ་ཉིད་དུ་ཐལ་བར་གྱིས་ཤིག །ཆོ་འཕྲུལ་མ་བྱུང་ན་ཁྱོད་ཞེན་ནོ། །སྡོད་མ་ནུས་ན་ཁོ་བོའི་སྐྱོན་ཡིན་པས་བྱང་ཆུབ་མ་

---

^{[མ་དཔེ་གཟིགས་ན་འདིར་གནོན།]}

ཐོབ་ཀྱི་བར་དུ་མི་འགྲོའོ། །ངག་ཏུ་བརྗོད་ཅིང་ཡིད་ཀྱིས་བསམ་མོ། །ཚར་ཚད་རྫོགས་ཀྱང་དམིགས་པ་གློད་ལ་ཞག་གྲངས་ཅི་རིགས་པར་བསྡད། དེ་ནས་སྤོ་དུས་སྲོག་སྙིང་གཏའ་མར་བཟུང་ལ་སྦྲུལ་ཆིང་བྱའོ།། ༈ །།ཆོ་འཕྲུལ་ལ་གསུམ། རབ་མངོན་སུམ། འབྲིང་གཟི་བྱིན། ཐ་མ་རྨི་ལམ། རྒྱུན་དུ་རྨི་བའི་རྨི་ལམ་ནི་བག་ཆགས་དང་ལུས་གདོན་རྨི་ལྟས་ནི་ཆོ་འཕྲུལ་ཡིན་གྱི་སློབ་དཔོན་ནི། གཞན་ལས་གནས་གདོན་ལུས་གདོན་གཉིས་ཀ་གཟེངས་ན་སྔར་མེད་པའི་ཆོ་འཕྲུལ་འོང་བ་སློང་ཚད་དོ། །གཉན་སའི་ཆོ་འཕྲུལ་ལས་ལུས་གདོན་ཆོ་འཕྲུལ་མ་བྱུང་ན་བོགས་ཆེ། སྲོད་གཉན་ས། ཐོ་རེངས་ལུས་གདོན་ཆོ་འཕྲུལ་གཉན་ས་འབྲིང་། ལུས་གདོན་ལས་གཉན་སའི་ཆོ་འཕྲུལ་མ་བྱུང་ན་གཉན་ས་ཆུང་བས་འཇམ་ཆོས་བྱ།། ༈ །།ཕྱི་སློང་ལྷ་འདྲེའི་ཆོ་འཕྲུལ། ནང་སློང་ལུས་ཀྱི་ན་ཚ། གསང་སློང་སེམས་ཀྱི་ཟུག་རྔུ་ངོས་ཟིན་པར་བྱ་བ་ལམ་ཁྱེར་བྱ། དེ་དག་གི་སྐབས་སུ་རྫི་གྲིབ་ཆོ་འཕྲུལ་རྣམས་འབྱུང་སྟེ། རྫི་སེམས་ལ་འབྱུང་། གྲིབ་ལུས་ངག །ཆོ་འཕྲུལ་ཕྱི་རོལ་ཡུལ་ལ་འབྱུང་བའོ།། ༈ །།གདོན་ལ་གསུམ། ཉོན་མོངས་པ་ལ་གསུམ། དཀར་ཕྱོགས་ལ་གསུམ།། ༈ །།ཕོ་གདོན་ཞེ་སྡང་ལས་བྱུང་བའི་ལུས་ངག་སེམས་ལའོ། །དེ་བཞིན་མོ་གདོན་འདོད་ཆགས། ལྷ་གདོན་ལ་གཏི་མུག །ཀླུ་གདོན་ལ་གཏི་མུག་དང་ཁྱད་པར་དུག་

---

^{[མ་དཔེ་གཟིགས་ན་འདིར་གནོན།]}

གསུམ་ལས་འབྱུང་།། ༈ །།ཉོན་མོངས་པ་ལ་གཅོད་པ་སྔ་མས་ཡུལ་ལ་བརྟེན་ནས་དུག་གསུམ་ལམ་དུ་མ་སློང་ནས་དེའི་གྲིབ་གནས་ལ་ཕོག་པས་གཅོད་པ་ཕྱི་མ་དེའི་རྫི་གྲིབ་ཆོ་འཕྲུལ་འབྱུང་། དུག་གསུམ་ལུས་ངག་ཤེད་ཤིན་ཏུ་ཆེ་བ་འབྱུང་།། ༈ །།དཀར་ཕྱོགས་གཅོད་པ་སྔ་མའི་ལུས་ངག་ཡིད་ཀྱི་དགེ་སྦྱོར་ཟག་བཅས་སོང་བ་ལ་དེ་ལྟ་བུའི་རྫི་གྲིབ་ཆོ་འཕྲུལ་འབྱུང་། དེ་རྣམས་ཤིན་ཏུ་ངོས་ཟིན་པར་བྱས་ལ་དེ་དག་གི་དབང་དུ་མ་སོང་བར་བྱ།། ༈ །།ཚར་ཚད་ལ་ཐུན་མོང་དང་ཁྱད་པར་མཆོག་གསུམ། ཐུན་མོང་ལ་དངོས་གྲུབ་ནད་དང་གདོན་གསུམ། དང་པོ་ཟས་ནོར་ལོངས་སྤྱོད་སྟེར། གཉིས་པ་རྣག་ཁྲག་གཤང་གཅི་ཐོན། གསུམ་པ་ལ་དྲག་པོ་གཏུམ་པོ་བསད་དང་ལུས་ལས་ཐོབ།། ༈ །།ཆོ་འཕྲུལ་འདྲ་བའི་ཚར་ཚད་མཛོ་གཡག་གིས་བརྡུང་། གཅན་གཟན་གྱིས་ཟོས་དང་ཁྱེར་བ། དམག་བརྒྱབ། མཚོན་ཕོག་ཤུལ་རྨ་དང་ཁྲག་འབྱུང་བའོ།། ༈ །།ཚར་ཚད་འདྲ་བའི་ཆོ་འཕུལ་ནི། མཚོན་བརྒྱ་པ་རྨ་མེད། ཁྲབ། འབྲུ་ནག་ཤ་ཁྲག་བུ་རམ་ཚྭ་བཙོད་འབུལ་བ། མེ་ཏོག་དམར་པོ་ཐུ་བ་གོས་དམར་གྱོན་པའོ།། ༈ །།འཁོར་ལོའི་རིགས་བསྐོར་བ་མགོ་འཁོར་བརྟགས་སོ།། ༈ །།ཁྱད་པར་ལ་དབང་འདུས། དམ་ཐོག །སྒྲིབ་དག་གསུམ། དབང་འདུས་འགྲོ་བ་དབང་དུ་འདུས་པས་དགའ་བྲོད་བདུད་ལ་ཟིན་བྱ། དམ་ཐོག་ཆོས་

---

^{[མ་དཔེ་གཟིགས་ན་འདིར་གནོན།]}

ཞུ་ཕྱག་བསྐོར་བྱེད། སྒྲིབ་དག་གྱེན་སྐས་འཛེགས། མཁར་འཕུར། ཁྲུས་གོས་དཀར་ནམ་ལངས་ཉི་ཟླ་ཤར་བ། མཆོད་རྟེན་བསྐོར། དར་ཕྱར་དུང་འབུད་མེ་ཏོག་དཀར་སེར་འཐུ། རང་གི་རོ་བསྲེག་པ། །རུས་པ་དཀར་སིལ་སོང་བ།། ༈ །།མཆོག་ལ་མངོན་སུམ། གཟི་བྱིན། རྨི་ལམ་གསུམ། མངོན་སུམ་ཆོ་འཕྲུལ་བྱུང་མ་ཐག་ལུས་རྣལ་ཕེབས་དགེ་སྦྱོར་སྟེང་དུ་འཕེལ་བའོ། །རྨི་ལམ་ཆོ་འཕྲུལ་རྨི་ལམ་ཟིན་ནས་ཏིང་ངེ་འཛིན་ངང་དུ་སོང་བ་ཡིན་ཀྱང་གཞན་ལ་གསང་། སྟོང་རྟགས་རྡོ་རྗེ་ལྟ་བུའི་ཏིང་ངེ་འཛིན་རྒྱུད་ལ་སྐྱེ་བར་འགྱུར་རོ། ༈ །།སྲིད་པའི་འདྲེ་དགུ་ནི། ནག་རྩིས་ཀྱི་གཏོ་བཅོས་སྐབས། མི་ལ། བསེ་རག །འགོང་པོ། གྲི་བོ། གོད་འདྲེ། ནད་འདྲེ། དམུག་འདྲེ། ཐེའུ་རང་། མི་ཁ་དང་དགུ་ཡིན་པར་བཤད་ཅིང་། སྲིད་པའི་འདྲེ་དགུ་སྐྱས་འདེབས་ཞེས་གསུངས།། ༈ །།གཙུག་ལག་གི་གདོན་བཅུ་ཤིན་ཏུ་གསལ་བར་བཤད་པའི་ཁུངས་མ་མཐོང་ཡང་། ནག་རྩིས་ཀྱི་གཏོ་བཅོས། སྣང་སྲིད་སིལ་བུའི་གཏོ་ཕྲན་ཞིག་ཏུ། །གཙུག་ལག་ཁང་གི་ཕུང་བྱེད་གདོན། །བཤིག་བྱེད་འཕུང་བྱེད་ཤི་བའི་འདྲེ། །ད་ངན་པར་བྱེད། །དབུལ་བྱེད་རྨོངས་བྱེད་མཐར་བྱེད་པ། །ལོག་པར་བྱེད་པའི་འདྲེ་གདོན་རྣམས། ཞེས་ས་བྱེད་མཐར་བྱེད་པ། །ལོག་པར་བྱེད་པའི་འདྲེ་གདོན་རྣམས། ཞེས་གསུངས་པ་ལྟར། གཙུག་ལག་ཁང་བཤིག་པར་བྱེད་པའི་གདོན། །ཡུལ་འདྲེ། །

---

^{[མ་དཔེ་གཟིགས་ན་འདིར་གནོན།]}

འདུག་མཁན་ཐམས་ཅད་འཕུང་བར་བྱེད་པའི་གདོན། །དུར་སྲི། དེའི་མི་ཐམས་ཅད་ཤི་བར་བྱེད་པའི་གདོན། །ཤི་འདྲེ། ཁང་པ་དེ་སྟོང་པར་བྱེད་པའི་གདོན། །འགོང་འདྲེ། དེར་འཁོད་ཐམས་ཅད་འཇིགས་པ་ཆེན་པོ་བསྐྱེད་པའི་གདོན། །བགེགས་རྒྱལ། སྐྱེ་བོ་ཐམས་ཅད་མི་རྒྱུ་ངན་པར་བྱེད་པའི་གདོན། །བཙོགས་འདྲེ། ཐམས་ཅད་དབུལ་པོ་རྐྱང་པར་བྱེད་པའི་གདོན། །དབུལ་འདྲེ། མི་ཐམས་ཅད་རྨོངས་པར་བྱེད་པའི་གདོན། །རྨོངས་འདྲེ། མཐའ་རྗེས་བུད་མེད་ཀྱིས་གཟུང་བར་བྱེད་པའི་གདོན། །སྒབ་སྲི། དེར་སྐྱེས་པའི་མི་ཐམས་ཅད་ལོག་པ་མི་དགེ་བ་ཁོ་ན་ལ་གཞོལ་བར་བྱེད་པའི་གདོན་ཏེ། དམ་སྲི། དེ་ལྟར་ཁང་ཆེན་གཙུག་ལག་གི་བདག་པོ་བྱེད་མཁན་ལ། མི་ཤིས་པར་བྱེད་པའི་གདོན་བཅུ་ཨེ་ཡིན་སྙམ།། ༈ །།མགུར་ལྷ་བཅུ་གསུམ་ཞེས་པ། བོད་ཀྱི་རྒྱལ་པོ་གཉའ་ཁྲི་བཙན་པོ་ནས་བཟུང་ཐམས་ཅད་ཀྱིས་མགུར་དུ་མཆོད་ཅིང་བསྟེན་པའི་གཞི་བདག་སྟེ། གཉེན་ཐང་ལྷ། ཡར་ལྷ་ཤམ་པོ། དགྲ་ལྷ་འབྲང་ནམ། སྒྱོགས་ཆེན་གདོང་ར། རྫུ་འཕྲུལ་ཅན་འོད། དགེ་ལྷ་བྱང་རྩེ། ཅོག་ལ་མཚལ་རྩེ། དབྱིབས་ཆེནཎནེ་རིང་གཉེན་པོ།འབྲི་ཆེན་སྡོང་དུར། རྩེ་ལྷ་བྱས་ཡག །སྐུ་ལྷ་མཁའ་རི། བོད་ཀྱིས་དྷུ་དང་བཅུ་གསུམ་དུ་མཁས་པ་ཚེ་དབང་གྲགས་ཀྱིས་ཟིན་ཐོར་བཤད། གཞན་མི་འདྲ་བ་ཡང་ཁ་ཤས་སྣང་།། ༈ །།ལྷ་གཤོག་པ་ཅན་ལ་མཇུག་

---

^{[མ་དཔེ་གཟིགས་ན་འདིར་གནོན།]}

མ་ཡོད་པ་ནི། །རད་གླིང་ཕུར་པ་གསང་སྒྲུབ་ལ་མཇུག་མ་ཡོད་པར་བཤད་ཅིང་། ༈ །ལྷ་ཕུར་ཤམ་ཅན་ལ་གཤོག་པ་མེད་པ་ནི། ཕུར་སྒྲུབ་ཐམས་ཅད་ཀྱི་སྲས་མཆོག་ལ་གཤོག་པ་མེད་ཅིང་། ཞལ་གསུམ་ཕྱག་དྲུག་ཅན་གཤོག་པ་མེད་པ་ནི། བཀའ་མའི་ཡང་དག དཔྱད། ས་ཕུར། ཇོ་མོ་ལུགས་ཕུར་པ། རོང་ཟོམ་ལུགས་ཕུར་པ། གཏེར་མ་ཞང་ཁྲམ་གྱི་ཚེ་བདག་ལྕགས་འདྲ། ལྕགས་སྡིག །ཡང་ཟློག ། ཀློང་གསལ་སྙིང་པོའི་ཡེ་ཤེས་རབ་འབར་སོགས་གཤོགས་པ་མེད་པ་མང་པོ་སྣང་། ༈ །ཨེ་ཝཾ་གྱི་དོན་ཚིག་ལེའུ་བྱས་པ། །རྡོ་རྗེ་ཅན་ལ་ཕྱག་འཚལ་ལོ། །ཡི་གེ་གཉིས་ཀྱི་སྦྱོར་བ་ནི། །ཐབས་ཤེས་ཟུང་འཇུག་སྟོན་པ་སྟེ། །དེ་སླད་ཆོས་ཕུང་བརྒྱད་ཁྲི་དང་། །བཞི་སྟོང་ཀུན་གྱི་འབྱུང་གནས་ཆེ། །ཡིན་ཕྱིར་ལྷའི་བུའི་ཞུས་མདོ་ལས། །ཆོས་ཀྱི་ཕུང་པོ་བརྒྱད་ཁྲི་དང་། །བཞི་སྟོང་དག་གི་གྲངས་རྙེད་ཀྱང་། །ཀུན་གྱི་གཞི་དང་ཕ་མ་ནི། །ཡི་གེ་གཉིས་སུ་དེར་རབ་བསྟན། །ཡི་གེ་ཨེ་ནི་མ་འགྱུར་ལ། །ཝཾ་ནི་ཕ་ཞེས་བྱ་བར་གྲགས། །ཐིག་ལེ་དེ་གཉིས་སྦྱོར་བ་སྟེ། །སྦྱོར་དང་ཤིན་ཏུ་རྨད་བྱུང་པའོ། །ཞེས་གསུངས་དེ་ཡང་འདི་སྐད་ཅེས། །མདོ་རྣམས་ཀུན་གྱི་གླེང་གཞིར་གསུངས། །རྒྱུ་མཚན་ཨེ་ནི་ཨ་ལི་དང་། །ཝཾ་ནི་ཀཱ་ལིའི་ཡི་གེ་སྟེ། །དེ་འདུས་པ་ལས་མིང་དང་ཚིག །ཚིགས་སུ་བཅད་དང་ལེའུ་ནས། །གླེགས་བམ་བར་དུ་

---

^{[མ་དཔེ་གཟིགས་ན་འདིར་གནོན།]}

རྒྱུན་ཆགས་ཕྱིར། ཁྱད་པར་སྔགས་ལ་བརྗོད་པ་སྒྲས། །བྲིས་པ་གཟུགས་དང་མཚོན་པ་བརྡ། །གནས་ལུགས་དོན་གྱི་ཨེ་ཝཾ་བཞི། །དང་པོ་སྟོང་ཉིད་མཚོན་བྱེད་པར། །ཨེ་ཡི་མིང་གི་རྣམ་གྲངས་གཞན། །ནམ་མཁའ་གསང་ཆེན་པདྨ་སོགས། །བདེ་ཆེན་ཝཾ་གྱི་མངོན་བརྗོད་ཀྱང་། །བདེ་ཆགས་སྙིང་རྗེ་ཐིག་ལེ་སོགས། །དེ་སྐད་དུའང་དུས་འཁོར་ལས། །ཨེ་དང་གསང་ཆེན་ནམ་མཁའི་ཁམས། །བྷ་ག་ཆོས་འབྱུང་ཆུ་སྐྱེས་དང་། །སེངྒེའི་ཁྲིར་བཞུགས་རྡོ་རྗེ་ཅན། །ཝཾ་དང་རྡོར་འཛིན་རྡོ་རྗེ་སེམས། །དུས་ཀྱི་འཁོར་ལོ་ཧེ་རུ་ཀ །རྒྱུད་རྣམས་ཀུན་གྱི་གནས་སུ་གསུངས། ཡུལ་ཅན་དུ་མའི་མིང་རྣམས་དང་། །སེམས་ཅན་དུ་མའི་བསམ་པའོ། །ཞེས་གསུངས་གཉིས་པ་གཟུང་སྒྲུབ་ཕྱིར། །དབུས་སུ་ཨ་ཡིག་གྲི་གུག་དབྱིབས། །ཤར་དུ་ཨེ་ཡིག་དབྱུག་པ་དང་། །ལྷོ་རུ་རི་ཡིག་ཚེགས་དྲག་སྟེ། །ནུབ་ཏུ་ལི་ཡིག་དགྲ་ལྟར་བཏགས། །བྱང་དུ་ཨོ་ཡིག་ཐིག་ལེར་བྲི། །ཨ་ལ་ལི་བྱིན་མགོ་བོར་འགྱུར། །ཨེ་བྱིན་གཡོན་ཕྱོགས་ཨེ་ཉིད་དེ། །མི་བྱིན་ཟླ་ཆོས་ཨོ་བྱིན་པས། །ཀླད་ཀོར་དུ་འགྱུར་སྟོང་ཆེན་གྱི། །ཡི་གེ་ལྔ་འདུས་ཨེ་ཝཾ་གྲུབ། །དེ་སྐད་དུ་ཡང་རྩ་རྒྱུད་ལས། །ཡི་གེ་ཨེ་དབུས་ཡི་གེ་ཝཾ། །སངས་རྒྱས་ཀུན་གྱི་བདེ་བའི་གནས། །སྐུ་གསུང་ཐུགས་ཀྱི་སྦྱོར་བ་ཡིས། །ནམ་མཁའི་ཁམས་སུ་རྡོ་རྗེ་སེམས། །ཟླ་བ་ས་བོན་ཡི་གེ་ལུས། །ཉི་མ་རྡུལ་

---

^{[མ་དཔེ་གཟིགས་ན་འདིར་གནོན།]}

དང་ཚེགས་དྲག་དང་། །སེམས་ཀྱི་རྣམ་པ་ཡི་གེ་ལས། །ཨེ་ཝཾ་ནམ་མཁའི་ཁམས་སུ་གནས། །ཞེས་གསུངས་གསུམ་པ་ཐབས་ཤེས་དང་། རྡོ་རྗེ་དྲིལ་བུ་ཞལ་སྦྱོར་སོགས། །ཆོས་རྣམས་བདེ་སྟོང་མཚོན་བྱེད་པའོ། །བཞི་པ་བདེ་སྟོང་ཟུང་འཇུག་ཕྱི། །ལྷན་ཅིག་སྐྱེས་པའི་ཡེ་ཤེས་ལས། །དེ་ཉིད་རབ་ཏུ་བརྗོད་པ་ཡིན། །རྒྱས་པར་ཀཱ་ལ་ཙཀྲ་དང་། །སྡོམ་འབྱུང་སོགས་ལས་རྟོགས་པར་བྱོས། །མདོར་བསྡུས་འདི་བྲིས་དགེ་བ་ཡིས། །སྣོད་བཅུད་ཐབས་ཤེས་འཁོར་ལོར་དང་། །རླུང་སྔགས་ཨེ་ཝཾ་ཐིག་ལེར་རྫོགས། །བདེ་སྟོང་ཐུགས་སུ་སྨིན་གྱུར་ཅིག །ཅེས་པའང་མཁྱེན་བརྩེའི་དབང་པོས་སོ། །སརྦ་མངྒ་ལཾ། ༈ །།བླ་མ་ས་སྐྱ་པ་ཆེན་པོས། །བསྐྱེད་རིམ་རྟོག་པ་ཡིན་མོད་ཀྱི། །རྟོག་པའི་ངོ་བོ་སེམས་ཡིན་ཏེ། །སེམས་ཀྱི་མཚན་ཉིད་གསལ་རིག་ཉིད། །གསལ་རིག་རང་བཞིན་སྟོང་པ་ཡིན། །སྟོང་པ་གདོད་ནས་ཆོས་ཀྱི་དབྱིངས། །འཁྲུལ་པ་ཆོས་ཀྱི་དབྱིངས་ཉིད་དུ། །ཤེས་པས་རྟོག་པ་ཐམས་ཅད་ཀྱང་། །ཇི་ལྟར་བསྒོམས་ཀྱང་མི་རྟོག་ཉིད། །བཙལ་ཡང་འཁྲུལ་པ་ག་ལ་སྲིད། །ཅེས་དང་། དེ་ལྟར་ཆོས་ཀྱི་དབྱིངས་གོ་ན། །མཚན་བཅས་དགེ་སྦྱོར་མི་སྲིད་དེ། །དེ་ཡིས་བསྐྱེད་རིམ་བསྒོམས་ན་ཡང་། །མཚན་མ་མེད་པའི་དགེ་སྦྱོར་ཡིན། །ཅེས་སོ།། ༈ །།ཨོཾ་སྭ་སྟི་སིདྡྷཾ། འདིར་འབྲལ་སྤང་མའི་རྟེན་བཞེངས་ཚུལ་ལ། ཐུགས་རྟེན་རྣམ་

---

^{[མ་དཔེ་གཟིགས་ན་འདིར་གནོན།]}

རྒྱལ་ལྟ་བུ་ཕྱག་ཚད་དང་ལྡན་པ་སོར་བརྒྱད་པའི་ནང་དུ། སངས་རྒྱས་ཀྱི་འཕེལ་གདུང་འཁྲུལ་མེད། སྡོམ་པ་གསུམ་གྱི་བླ་མ་བརྒྱུད་པའི་མཚན་སྔགས། རྡོ་རྗེ་སློབ་དཔོན་གོང་མ་ཞི་བར་གཤེགས་པ་མཚན་ཉིད་དང་ལྡན་པའི་གདུང་རུས་སཱཙྪར་བསྒྲུབས་པ་དང་། དབུ་ལོ། ཕྱག་སེན་བཅས། ཁྱད་པར་གསུང་རྟེན་རྒྱུད་སྡེ་བཞིའི་རིགས་གཙོ་བསྡུས་ཀྱི་སྔགས་དང་། སྡེ་སྣོད་དང་རྒྱུད་སྡེ་ཐམས་ཅད་ཀྱི་སྙིང་པོ་ཡེ་དྷརྨ་དང་། ཐུབ་པའི་སྔོན་གྱི་གསོ་སྦྱོང་། སྡིག་པ་ཅི་ཡང་མི་བྱ་ཞིང་། སོགས་མཐིང་ཤོག་ལ་གསེར་གྱིས་བྲིས་པ། གདན་ཁྲིའི་མཚམས་སུ་ཆོས་སྲུང་ནོར་ལྷ་སྤྱིའི་སྙིང་པོ་དང་། བཀྲ་ཤིས་དང་འདོད་གསོལ་བློ་ཀ་གང་རིགས་བཅུག །བུམ་སྒོར་སྐུ་རྟེན་སྟོན་པའི་སྐུ་ཆུང་དུ་ཕྱག་ཚད་དང་ལྡན་པ་ཞིག་གི་མཛོད་སྤུར་རིང་བསྲེལ་གྱི་ཕྲས་བཏབ་པ་ཞིག་བཞག་སྟེ། དེ་ལྟར་སྐུ་གསུང་ཐུགས་ཡོངས་སུ་རྫོགས་པའི་རྟེན་དེ་ཉིད་ཟག་པ་ཆེ་ཆུང་འདོར་སྐབས་མ་གཏོགས་ལུས་ལ་བཅངས་ཤིང་བླ་མ་མཆོད་པ་དང་། སེམས་བསྐྱེད། གསོ་སྦྱོང་སོགས་ཀྱི་རྟེན་ཐམས་ཅད་འདིས་རུང་བས་ཤིན་ཏུ་གལ་ཆེ་བ་ཡིན་ནོ། །ཞེས་རབ་འབྱམས་སྨྲ་བ་སུམ་ཏིའི་གསུང་རྒྱུན་ལྟར་བྲིས་པའོ།། ༈ །།མཎྜལ་འབུལ་བའི་འབྲུ་ལ་རླན་ཡོད་པ་གལ་ཆེ་སྟེ། ངེས་འབྱུང་དང་བྱང་ཆུབ་ཀྱི་སེམས་སྐྱེ་བའི་རྟེན་འབྲེལ་ཁྱད་པར་ཅན་ཡིན། རྡུལ་ཕྱི་བ་ཡང་དག་པའི་ལྟ་

---

^{[མ་དཔེ་གཟིགས་ན་འདིར་གནོན།]}

བ་སྐྱེ་བའི་རྟེན་འབྲེལ། མགྲོན་བུ་བསྲེ་བ་སྔགས་ཀྱི་སྐབས་ཞིང་སྔགས་ལྷན་སྐྱེས་ཀྱི་མཁའ་འགྲོ་འདུ་བའི་རྟེན་འབྲེལ་ཏེ། བདེ་སྟོང་གི་ཡེ་ཤེས་སྐྱེ་བའི་ཉེར་ལེན་ནོ། །མདའ་རྒྱུ་དམར་པོ་བསྲེ་བ་ཤེས་རབ་ཆེ་བའི་རྟེན་འབྲེལ་དུ་བཞེད་གསུངས་སོ།། ༈ །།ཆོས་གྲྭར་ཚོགས་པའི་ཚེ། མཆིལ་ལྷམ་ཕུད། རྐང་པ་བཀྲུ། ཁ་བཤལ། ཤིན་ཏུ་གུས་པས་ཡན་ལག་སྨད་ལྔ་ས་ལ་རེག་པའི་ཕྱག་གསུམ་དལ་བུར་བྱ། དེ་ནས་བསླབ་གྲལ་དང་མཐུན་པར་རང་གི་གདིང་བ་བཏིང་། ཆོས་གོས་ཡོད་ན་བཞེས། མེད་ན་གཟན་ཕབས་ཏེ་སྡོད། བླ་མ་ལ་གདོང་ཕྱོགས་པས་པུས་མོ་བཙུགས། ཐལ་མོ་སྦྱར་བ་སྔོན་དུ་འགྲོ་བས་མཎྜལ་སོགས་ལ་འཇུག་པ་སྟེ། འདི་དག་གི་རྣམ་བཞག་ཞིབ་པར་བླ་མ་ལྔ་བཅུ་པ་རྩ་འགྲེལ་སོགས་ལས་ཤེས་པར་བྱ་བ་གལ་ཆེའོ།། ༈ །།བཙན་དྲྭས་ར། སྒོ་སྟེང་དུ་ཚུལ་ཤིང་། གཡས་གཡོན་དུ་རྒྱལ་ཆེན་བཞི་དང་། སོ་སོར་ཁ་བྱང་ཚིག་རིང་བི་བརྟ་བཅས། གཡས་སྒོའི་ལྟག་ཏུ་གནོད་སྦྱིན་དང་། དེའི་གཤམ་འབྱུང་པོ་གང་དག་སོགས་ཚིགས་བཅད་སུམ་བིད། སྒོ་སྟེང་དུ་རྟེན་འབྲེལ་བཅུ་གཉིས་འགགས་ཚུལ་ཚིག་ལྷུག་དང་། ཆོས་རྣམས་གང་དག་སོགས་ཚིགས་བཅད། གཡས་སྒོའི་འོག་ཏུ་སྲིད་པ་འཁོར་ལོ་ཆ་ལྔ་པའི་སྟེང་གི་གཡས་གཡོན་དུ་ཐུབ་དབང་འཁོར་ལོ་དཀར་པོ་རྩིབས་བརྒྱད། གཤམ་དུ། བརྩམ་པར་བྱ་

---

^{[མ་དཔེ་གཟིགས་ན་འདིར་གནོན།]}

ཞིང་སོགས་སུམ་བིད། གཡོན་སྒོའི་སྟེང་དུ་བཀྲ་ཤིས་གང་ཞིག་སོགས་དང་། ཕུན་སུམ་ཚོགས་པ་མངའ་བ་སོགས་ཚིགས་བཅད། ལྟག་ཏུ་གནོད་སྦྱིན་ལག་ན་གཞོང་ཐོགས་དང་། འོག་ཏུ་སྣོད་བཅུད་ཆགས་ཚུལ། ཞལ་ནང་ལྟའི་གཡས་སུ་ཆེད་བརྗོད་ཚིགས་བཅད་དང་། གཡོན་དུ་ཚིག་ལྷུག་པ་རྣམས་བྲིའོ། །གོང་སྨོས་ཕལ་ཆེར་འདུལ་བ་གནས་མལ་གྱི་གཞི་ལས་ཇི་ལྟར་འབྱུང་བའི་མཚན་ཉིད་དང་བཀོད་པ་ཕུན་སུམ་ཚོགས་པ་དཔྱོད་ལྡན་ཡོད་ན་འདི་ཁོ་ནས་ཀྱང་དད་པའི་པདྨོ་རྒྱས་པར་སྣང་ངོ་། །འོན་ཀྱང་བླུན་པོ་གསེར་དངུལ་གྱིས་མིག་བྲིད་པ་རྣམས་ཀྱིས་ནི་རྟོག་དཔྱོད་ཙམ་ཡང་ག་ལ་ཡོད།། ༈ །།ས་སྐྱ་པ་ཀུན་དགའ་བསོད་ནམས་ཀྱིས་མཛད་པའི་ལམ་འབྲས་ཁོག་ཕུབ་ལས་འབྲོག་མིའི་རྣམ་ཐར་དུ། དེ་དུས་བོད་ན་རྙིང་མ་དར་བས་ཇི་ཙམ་དྲིས་ཀྱང་མ་རྙེད་པ་ལ། རྡོ་རྗེ་གདན་གྱི་སྒོ་གོང་ན་རུ་ལུ་འབྲུ་བརྒྱད་པ་ཞིག་བྲིས་འདུག་པ་ཅི་ཡིན་དྲིས་པས་ཤེས་པ་མ་བྱུང་ཞིང་། ཡང་པཎྜི་ཏ་གཅིག་གི་དཔེ་གསེབ་ན་ཡང་ཕུར་གྱི་དུམ་བུ་འདུག་པ་ཁོ་རང་གིས་ཀྱང་མ་ཤེས་པར་འདུག་གསུང་། ཞེས་སྣང་ངོ་།། ༈ །།ཐུགས་གཏེར་གྱི་ཁུངས། མདོ་ལས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འབྱུང་བ་ཆེན་པོ་བཞི་ནི་ནམ་མཁའི་གཏེར་ནས་འབྱུང་གི །དེ་བཞིན་དུ་ཆོས་ཐམས་ཅད་རྒྱལ་བའི་ཐུགས་ཀྱི་གཏེར་ལས་འབྱུང་བས་

---

^{[མ་དཔེ་གཟིགས་ན་འདིར་གནོན།]}

གཏེར་གྱི་དོན་ལ་ལོངས་སྤྱོད་པ་ཤེས་པར་གྱིས་ཤིག །ཅེས་དང་། ཡེ་ཤེས་གསང་བའི་རྒྱུད་ལས། སུ་ཞིག་ཐུགས་ཀྱི་དཀྱིལ་འཁོར་དུ། །གཏེར་དང་ལྡན་ན་ཁྱད་པར་ཆེ། །ཞེས་དང་། སྒྱུ་དྲྭར། ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །ཞེས་སོ། །དེ་ལ་བརྒྱུད་པ་མེད་ཟེར་ན། རྒྱལ་བས་དགོངས་པ་ཉིད་ཀྱི་ཚུལ། །དགོངས་པས་བབས་པ་དབང་གི་མཆོག །ཅེས་སོགས་དྲངས།། ༈ །།ནེ་ཙོ་འདི་དག་དང་། རྒྱལ་བའི་ཉན་ཐོས་པ་དག་སོགས་དོན་ལ་མང་ཚིག་ཡིན། བྱེད་པ་པོ་དང་། སྟོན་པ་པོ་ལྟ་བུ་ལ། ཀྲྀཏའི་བྱེད་པ་པོའི་རྐྱེན་བྱིན་པའི་རྗེས་ལས་སྐད་དོད་ལོགས་སུ་མི་དགོས་ཏེ། ཀཚྭ་དང་། ཤཱསྟི། ཞེས་པ་ལྟ་བུའོ།། ༈ །།གསང་བའི་རྗེའུ་ཆུང་ནི་རུ་ཏྲའི་དཔྱི་ལས་གྲུབ་པ་དང་། རེའུ་ཆུང་ནི་སྔ་རབས་པ་རྣམས་ཀྱི་བྲིས་ཆར་རྔ་ཆུང་བྲིས་སྣང་། གནོད་གདུག་ཟློག་བྱེད་དཔའ་བོ་ལྗགས་ཀྱི་ཆས། །ཞེས་པ་ལྗགས་སྟེང་དུ་རྡོ་རྗེ་རྒྱ་གྲམ་བྲི་སྲོལ་སྣང་།། ༈ །།ཚངས་སྐུད་ནི་སྐུད་པ་སེ་རལ་ཁ་བྱས་པ་སྟེ། འདི་ལ་མཆོད་ཕྱིར་ཐོགས་ཞེས་པའི་རྒྱུ་མཚན་མཆོད་སྦྱིན་གྱི་ཚེ་འཆང་བར་འོས་པའི་ཡོ་བྱད་ཡིན་པའི་ཕྱིར་རོ།། ༈ །།རྒྱལ་སྲིད་སྣ་བདུན་གྱི་ཁུངས་མངོན་འབྱུང་། ལྷ་རྫས་ལས་གྲུབ་སོགས། དང་རྒྱ་ཆེ་རོལ་པ་ལས་བཤད། ཉེ་བའི་རིན་ཆེན་བདུན་ཡང་མངོན་འབྱུང་གི་མདོ་ལས་གསུངས་ཏེ།

---

^{[མ་དཔེ་གཟིགས་ན་འདིར་གནོན།]}

འོད་ཟེར་གྱིས་སྔོ་རལ་གྲི་པགས་པ་འཇམ། །དགའ་བའི་ནགས་ཚལ་གོས་ནི་ཡིད་རྗེས་འགྲོ། །མཐུ་ལྡན་མཆིལ་ལྷམ་ཁང་ཁྱིམ་གཞལ་དུ་མེད། །རེག་འཇམ་གཟིམས་ཆ་འདི་ཡིས་ཐོབ་པར་འགྱུར། །ཅེས་སོ།། ༈ །།རེག་ཟིག་ཅེས་པ་ཟིན་བྲིས་ཀྱི་བརྡ་རྙིང་། དོན་བློ་ལ་གང་ཟིན་ཙམ་བྲིས་པའོ།། ༈ །།མཧཱ་པཉྩའི་རྣམ་ཐར་དུ། དགྱེས་རྡོར་བསྙེན་ཆེན་མ་སོང་བར་སློབ་བཤད་མི་གནང་ཚུལ་སྣང་། སྔོན་ཙཱ་ནའི་རྒྱལ་པོ་ཡོང་ལོའུས་ཐང་ཀ་ཞིག་བྲིས། དེ་རྒྱས་བཏབ་ནས་འདི་སུས་བཤིགས་པའི་དུས་རྒྱལ་ས་འཆོར་བས་མ་བཤིགས་ཞེས་ཁ་ཆེམས་སུ་བཞག་པས་མི་རབས་བདུན་ཙམ་བར་བཤིགས་མཁན་མ་བྱུང་རུང་། ཁྲུང་རྩི་རྒྱལ་པོས་བཤིགས་པས་མན་ཇུའི་མི་ལ་རྒྱ་ནག་གིས་ཟས་འདྲེན་ཅིང་འདུད་པའི་ཚུལ་འདུག་པས། དེ་འདྲའི་རྟེན་འབྲེལ་གྱིས་རྒྱལ་ས་ཤོར་བ་སོགས་གླེང་ཚུལ་སྣང་།། ༈ །།ཀུན་སྙིང་རྣམ་ཐར་དུ། མཁན་ཆེན་ལུང་རིག་རྒྱ་མཚོར་ལམ་རིམ་དང་། མི་ཏྲ་ཁྲིད་དྲུག་དང་། སྦྱོར་དྲུག་ཇོ་ལུགས་དང་། བུ་ལུགས་གཉིས་ཀ །ཕག་མོ་སྒོམ་དྲུག་དང་། གྲུབ་ཐོབ་ཆོས་དྲུག་སོགས་གསན་ཚུལ། བྲག་སྟོད་པར། བསྲེ་འཕོ། ཚལ་པའི་སྐོར། ཡང་དགོན་སྐོར། མེ་ཏྲི་བཅུ་གསུམ་མ། ཐོད་པ། བསྙེན་སྒྲུབ་དང་། ཁྱད་པར་རྔོག་དཀྱིལ་བདུན་གསན་པས་བྱིན་རླབས་ཀྱི་ཚན་ཀ་ཐོབ་ཚུལ། ལམ་རིམ་

---

^{[མ་དཔེ་གཟིགས་ན་འདིར་གནོན།]}

དང་ནི་གུའི་ཁྲིད་ངག་ནས་བཤད། ལྷག་མ་ཁྲིད་བརྒྱ་ལུང་ཁྲིད་ཀྱི་ཚུལ་དུ་རྫོགས་པར་གནང་ཚུལ། མདོ་རྒྱན་ཐོགས་མེད་ཊཱི་ཀ་དང་། འགྱེད་གཉིས་རོང་ཊིཀ་ལྟར་གསན། དུས་འཁོར་ལྷ་དགུ་ལ་བརྟེན་ནས་རྒྱུད་སྡེ་གཞན་གྱི་རུང་མཐུན་སྦྱར་བའི་བསྙེན་པ་གནང་། སྦྱོར་དྲུག་ཟླ་བ་གསུམ་བསྒོམས་པས་སོར་སྡུད་མཐར་ཕྱིན་བུདྡྷ་གུལྟར་ཕྱག་རྒྱ་བཞིའི་སྙིང་པོ་ཞེས་བྱ་བའི་བླ་མའི་རྣལ་འབྱོར་དེ་ཆོས་འབྲེལ་ཐོག་མར་གསན། དེ་ནས་ཕག་མོའི་སྐོར་མང་པོ། ཛ་ལནྡྷ་རའི་དོ་ཧའི་བཤད་པ་གསན། སྒྲོལ་མ་རྣལ་འབྱོར་མ་གསན་པའི་སྟ་གོན་ནུབ་མནལ་ལྟས་ཁྱད་པར་ཅན་བྱུང་། མི་གཡོ་བའི་བྱིན་རླབས་གསན། རྒྱུད་ཁྲིད་ཐོག་མར་སྲུང་འཁོར། གཏོར་མ། མཎྜལ་སོགས་བྱེད་པ་སྒྲོས་རྙིང་རང་ཡིན་པའི་ངེས་པ་མེད་གསུང་། རྭ་བསྒྲེངས་རྒྱ་དཔེ་མེ་ཐུབ་མའི་གྲས། ཤཱནྟི་པའི་བརྟག་གཉིས་འགྲེལ་པ་སོགས་ཀྱི་གཤམ་ན། བྷཾ་ག་ལ་པཎྜི་ཏ་བྷིཀྵ་དཱི་པཾ་ཀཱ་ར་ཤྲཱི་ཛྙཱ་ན་སྱ་པུསྟ་ཀཾ །ཞེས་འདུག་པ་ཇོ་བོའི་ཕྱག་དཔེར་ངེས་པ་རྙེད་གསུངས། གླང་ཐང་དུ་གསེར་མདོག་པཎ་ཆེན་མཇལ་ནས་ཞུ་ལན་བྱུང་བའི་རྡོ་རྗེའི་ཚིག་འགྲེལ་ཟུར་ན་ཡོད་ཚུལ། དགེ་སློང་ཡེ་ཤེས་དབང་པོར་གསང་འདུས་འགོས་ལུགས་རྙིང་མ་ས་སྐྱའི་རྗེ་བཙུན་དཀར་པོ་རྣམ་གསུམ་ཡང་བརྒྱུད་པ་ལ་བཞུགས་པ་གསན་ཞིང་བསྔགས་བརྗོད་མཛད། གྲོལ་མཆོག་བཀའ་འབུམ་པོད་བཞི།

---

^{[མ་དཔེ་གཟིགས་ན་འདིར་གནོན།]}

སྐྱེས་རབས་བརྒྱ་རྩ་རྒྱན་གྱི་མེ་ཏོག་གི་ལུང་གནང་ཚུལ། འབྲུག་གསར་གྱི་ཡིག་ཆར་ཐུགས་མ་མགུ་ཚུལ་དང་། ཕྱག་ཆེན་ལ་རྣམ་བདུན་དཔྱད་པའི་རིགས་པ་དང་། འཇུག་པའི་གཏན་ཚིགས་སྦྱོར་བ་སོགས་ལ་ཐུགས་མ་རངས་པར་གནང་། སྒྲུབ་ཐབས་རྒྱ་མཚོའི་ནང་འགའ་ཞིག་མ་ཚང་བ་ཐར་པ་ནས་རྒྱ་དཔེ་བླངས་ཏེ་གསར་དུ་བསྒྱུར་ཚུལ། གསུང་རྩོམ་ཆེ་ཁག་ཐམས་ཅད་ལ། གསོལ་བ་ཡུན་རིང་བཏབ་ཅིང་གནང་བའི་མཚན་མ་དངོས་སུ་བྱུང་བའམ། ལྟས་བཟང་རེ་ངེས་པར་མ་བྱུང་བར་མི་མཛད་ཚུལ་སྣང་། དུས་འཁོར་བསྐྱེད་རིམ་དང་། དབང་གི་རྣམ་བཤད་མཛད་དུས་རྟགས་ངེས་པར་བྱུང་། ལུ་ཧི་པའི་སྒྲུབ་ཐབས་ལ་རྩ་རྐྱང་ལུགས་དང་འགྲེལ་པ་ལུགས་གཉིས་ལས། ཕྱི་མ་ལྔ་བའི་འགྲེལ་པ་ལས་པྲཛྙཱ་རཀཱིཏས་ལོགས་སུ་བཀོལ་བའི་ཆོས་བཞིའི་དགོངས་པ་བཞིན་དཀྱིལ་ཆོག་དཱ་རི་ཀ་ཆུང་བའི་ལུགས་དང་། དྲིལ་བུ་དབང་ཆོག་རྒྱ་གཞུང་ལ་ཁ་སྐོང་རྒྱས་བསྡུས་གཉིས་ལས་བསྡུས་པ་དང་། ནག་པོའི་སྒྲུབ་ཐབས་བཅོས་དགོས་རྣམས་བཅོས་ཤིང་། དཀྱིལ་ཆོག་གཞུང་གི་དགོངས་པ་ཇི་ལྟ་བར་སྦྱར་ཏེ། དེའི་ཚེ་མནལ་ལྟས་ཆེས་ཁྱད་པར་ཅན་བྱུང་གསུང་། ཞི་སྦས་ལུགས་ཀྱི་དགྱེས་རྡོར་ཉེ་བརྒྱུད་ཅན། བློ་སྦྱོང་ཐུན་གཅིག་མ་དང་། ཚིག་རྐང་བརྒྱད་མ་སོགས། བཤེས་སྤྲིངས་ཀྱི་ལམ་གྱི་འགྲེལ་བསྒྲིགས་སོགས་སྔོན་མེད་པའི་

---

^{[མ་དཔེ་གཟིགས་ན་འདིར་གནོན།]}

ལེགས་བཤད་གསར་པ་དུ་མས་བརྒྱན་ཏེ་བཤད་པར་སྡེ་པ་ཕུན་ཚོགས་རྣམ་རྒྱལ་གྱིས་ཟིན་བྲིས་བྱས་པ་ལེགས་པོ་བྱུང་ཚུལ་སྣང་། བདུད་རྩི་རིལ་བུར་ཆོས་རྒྱུན་སྣ་ཚོགས་པའི་བྱིན་རླབས་རྟེན་དེ་ངོ་ཏི་བཟང་ཡང་། བརྒྱུད་པའི་སེལ་དུ་འགྲོ་གསུངས་ནས་བསྲེ་བར་མི་མཛད་པ་བླ་མ་གོང་མ་བརྒྱུད་པ་ནས་བརྒྱུད་པའི་མྱོང་གྲུབ་ཡིན། སློབ་དཔོན་པཱུརྞ་བཛྲ་དང་གསུང་གླེང་ལ་བསླབ་བཏུས་ཀྱི་ནམ་མཁའི་སྙིང་པོའི་བཤགས་པའི་འཕྲོས་གཅིག་བྱུང་། དེ་ཡོང་བ་ལ་དེང་སང་ནམ་མཁའི་སྙིང་པོ་ལ་བསྙེན་པ་བྱེད་དགོས་གསུང་གིན་འདུག །དེ་རྗེས་གཅིག་ལ་བཅོམ་ལྡན་འདས་འཕགས་པ་ནམ་མཁའི་སྙིང་པོའི་མཚན་བརྒྱ་རྩ་བརྒྱད་ཀྱི་ལུགས་ཀྱི་བསྙེན་པ་ཞིག་ཀྱང་བྱས། མདོ་ལས་འབྱུང་བ་ལྟར། ཐོ་རངས་ཀྱི་དུས་སྐྱ་རེངས་ལ་གསོལ་བ་འདེབས་པ་དེ་ནུབ་བདུན་བསྟུད་ནས་བྱས་པའི་རྟིང་མ་ལ་རྟགས་མཚན་བྱུང་ཚུལ་གསུང་སྣང་།། ༈ །།ཀུན་མཁྱེན་ཆེན་པོར་གསོལ་བ་བཏབ་པས་འཕགས་པ་ཆོས་འཕགས་ཡིན་སྙམ་པའི་བྱང་སེམས་ཞིག་དང་མཇལ་བས། རྣམ་པར་བཞག་བྱ་འཇོག་བྱེད་དང་། །རྣམ་བཞག་ཐམས་ཅད་རྫུན་པ་ཡིན། །བློ་ལ་སྣང་བ་འཁྲུལ་པ་སྟེ། །བདེན་པའི་དོན་ལ་གོས་པ་མེད། །གསུངས་པ་ཞིག་བྱུང་བས་གཞན་སྟོང་གི་ལྟ་བ་ལ་ངེས་པ་རྙེད་ཚུལ་གསུངས། དེ་ལ་བརྟེན་ནས་གཞན་སྟོང་སྙིང་པོའི་རྒྱན་ལུང་སྦྱོར་དང་

---

^{[མ་དཔེ་གཟིགས་ན་འདིར་གནོན།]}

བཅས་པ་མཛད་དོ། །མངྒ་ལཾ།། ༈ །།སྔ་འགྱུར་རྙིང་མའི་བསྙེན་སྒྲུབ་སྤྱིའི་ཆིངས་ལས། སྤྱིར་ཐོར་ཐུན་ལ་མཆོད་པ་བྱིན་རླབས་ཡན་རྒྱས་པ་དང་། སྔ་ཕྱིའི་ཐུན་གཉིས་ལ་ཏིང་འཛིན་གསུམ་ནས་བཟུང་བསྟོད་པ་ཡན་རྒྱས་པར་བྱ། སྲོད་ཐུན་ལ་ཚོགས་སྐོར་སོགས་རྗེས་ཆོག་རྣམས་རྒྱས་པར་བྱ། ཐོར་ཐུན་ལ་དངོས་གཞི་དང་རྗེས་ཀྱི་བྱ་བ། སྔ་ཕྱིའི་ཐུན་གཉིས་ལ་སྔོན་རྗེས། སྲོད་ཐུན་ལ་སྔོན་དངོས་རྣམས་བསྡུས་པ་རེས་ཆོག །དེ་ཡང་དངོས་གཞི་བསྡུ་སྐབས། ཏིང་འཛིན་གསུམ་ནས་བཟུང་ལྷ་བསྐྱེད་ཡོངས་རྫོགས་བསྐྱེད་རིམ་ལ་དབང་འབྱོར་བ་མ་གཏོགས། རྣལ་འབྱོར་པ་གསར་བུ་དག་གིས་བསྡུས་ན་གསལ་མི་ཐེབས་པས་གཞུང་སོར་བཞག་དང་། དེ་འཕྲོས་སྤྱན་འདྲེན་བཞུགས་གསོལ་ཕྱག་མཆོད་རྣམས་སྔགས་ཚིག་ཙམ་དང་། བསྟོད་པའང་ཚིགས་བཅད་བསྡུས་པ་མདོ་ཙམ་གྱིས་འཐུས། ཐུན་སྒང་དུ་གཏམ་སོགས་ཀྱང་མི་རུང་སྟེ། གསང་སྔགས་ཆུ་བོའི་རྒྱུན་བཞིན་བར་མ་ཆད་པར་བཟླ་དགོས་པར་གསུངས་པའི་ཕྱིར་རོ། །སྲིད་པ་དང་ལུད་པ་འདོར་བ་སོགས་མི་བྱེད་ཀ་མེད་བྱུང་ན། བར་ཆོད་ཡུན་རིང་ཐུང་དང་བསྟུན་པའི་བཟླས་པ་སྔོན་སོང་གི་ནང་ནས་ཕྲེང་རྡོག་གང་འོས་ཕྱིར་ཕྱུང་། ཐུན་མཚམས་སུ་བཟླས་པ་ཅི་འགྲོ་བྱ་སྟེ་བཟླས་པ་དངོས་གཞིའི་གྲངས་སུ་མི་བརྩི། དེང་སང་འགའ་ཞིག་གིས་སྟབས་བདེའི་ཕྱིར་ཚོགས་མཆོད་

---

^{[མ་དཔེ་གཟིགས་ན་འདིར་གནོན།]}

དང་གཏོར་བསྔོས་སོགས་ཕྱི་ཐུན་དང་སྲོད་ཐུན་ཀྱི་མཚམས་སུ་མཛད་སྲོལ་འདུག་ཀྱང་། སྲོད་ཐུན་གྱི་ནང་དེར་འོད་གསལ་ལ་ཞུགས་ནས་ཐུན་མཚམས་ཀྱི་ལྷ་སྐུར་མ་ལྡང་བའི་བར་དུ་བྱ་བ་ལེགས་གསུངས།མཚམས་ཁང་ནས་ཀ་ཅ་ཕྱིར་མི་བཏང་། ནང་དུ་ལེན་དགོས་རྣམས་ཀྱང་ཞག་མ་འདའ་བར་མ་ཡིན། ལེན་དུས་ཀྱང་ལྷའི་ང་རྒྱལ་བརྟན་པོས་བགེགས་བསྐྲད་ཅིང་བྲབས་བདུག་བྱ། མཚམས་ལ་འཇུག་པའི་དུས་ནི། དེང་སང་མར་ངོ་ནས་འཇུག་པ་ཤས་ཆེ། རྒྱུད་ལས། དུས་ནི་ཡར་ངོའི་བརྒྱད་ལ་བརྩམ། །ཤིན་ཏུ་སྐར་མ་རྒྱལ་རྣམས་ལ། །བྱང་ཆུབ་སྤྱོད་པ་ཆེར་སྤྱོད་པས། །གསང་མཆོག་དངོས་གྲུབ་ཐོབ་པའི་ཕྱིར། །གཟའ་སྐར་ཤིས་པས་བླང་བར་བྱ། ཞེས་དང་། རྔམས་གློག་ལས། །བཀྲ་ཤིས་ལྷ་ཡི་ཉི་མ་དང་། །འབྱོར་དང་དུས་ཚོད་བཟང་བར་ནི། །མཚན་མའི་རྟོག་པ་ཡིན་མོད་ཀྱང་། །བརྟགས་ན་དངོས་གྲུབ་མཚན་མ་འབྱུང་། །ཞེས་གསུངས་པ་ལྟར་རོ།། ༈ །།ཐུན་བཞིའི་རྣལ་འབྱོར་གྱི་ཚུལ་ལས། ཐོ་རངས་ལྡང་བའི་རྣལ་འབྱོར་གྱིས་ལྡང་། གནས་ལུགས་མ་བཅོས་པའི་ངང་ལས། རང་གཉུག་མའི་ཡི་དམ་གྱི་སྤྱི་བོར་བླ་མ་བསྒོམ། རླུང་རོ་དགུ་ཕྲུགས་སུ་བུས། འབྲུ་གསུམ་རྡོ་རྗེའི་བཟླས་པ་ཅུང་ཟད་བྱ། རྟེན་སྙིང་དབྱངས་གསལ་རྣམས་ཉེར་གཅིག་བཟླ། འདིས་ཉིན་ཞག་ཕྲུགས་གཅིག་གི་རླུང་ཐམས་ཅད་རྡོ་རྗེའི་བཟླས་པར་

---

^{[མ་དཔེ་གཟིགས་ན་འདིར་གནོན།]}

འགྱུར་བ། སྔགས་བྱེ་སྙེད་དུ་འགྱུར་བ་སོགས་ཕན་ཡོན་དཔག་ཏུ་མེད། དེ་ནས་རྡོར་སེམས་སྒོམ་བཟླས་དང་། སྐྱ་རེངས་ལ་ཕྱག་འཚལ་བླ་མའི་རྣལ་འབྱོར་གནད་དུ་བསྣུན། ཐུན་གྱི་དངོས་གཞིར་རྒྱུན་གྱི་ཡི་དམ་བསྒོམ། བཟླས་པ་ཅི་ནུས་མཐར་དབྱངས་གསལ་རྟེན་སྙིང་གིས་ཁ་བསྐང་། བུམ་ཅན་བཟུང་། རྩ་འཁོར་ཀུནས་གང་བར་བསམ། བདུད་རྩི་རིལ་བུ་བཟའ། ལྷ་སྐུ་ནཱ་དར་གཞི་ལ། ཉམས་ལེན་དམིགས་བསལ་ཡོད་ན་ཅུང་ཟད་གཉིད་ལོག་ལ་རྨི་ལམ་ངོས་བཟུང་། ཤེས་པ་འཇུར་པའི་མན་ངག་ཀྱང་བྱ། ཐུན་གཉིས་པ། ནམ་ལངས་འཕྲལ་ཆབ་བླང་། ཡན་ལག་བདུན་པ་དང་ལྟུང་བཤགས་བཀླག་ཅིང་ཕྱག་འཚལ། རྒྱུད་སྡེ་བཞི་དང་འབྲེལ་བའི་སྒོམ་བཟླས་ཇི་རིགས་དང་གཟུངས་སྔགས་ཁྱད་ཅན་མང་དུ་བཟླ།་གཏོར་མ་བཏང་། དཀར་བསུར་བསྔོ། དེ་ནས་རྒྱུན་གྱི་ཡི་དམ་ལ་འཇུག །གུང་ཚིགས་དུས་ཕུད་མཆོད་བྱ། དངོས་གཞི་ཚོགས་འཁོར་དུ་རོལ། རྗེས་ཡོན་སྦྱོང་གཟུངས་དང་མདོ་བསྔོ་བྱ། ཐུན་གསུམ་པར། ཉི་མ་ཕྱི་ཆའི་དུས་ལུས་ལྟ་སྟངས་སམ་འཁྲུལ་འཁོར། ངག་བཟླས་བརྗོད་དམ་སྲོག་རྩོལ། ཡིད་བསྐྱེད་རིམ་མམ་མཉམ་བཞག་བྱ། ནམ་མཁའ་དང་དུས་ཐོད་རྒལ་གཟིར། ཉི་མའི་མདངས་སྡུད་པར་ཉེ་བ་ན། བདག་བསྐྱེད་སྔོན་དུ་འགྲོ་བས་གཏོར་ཚོགས་རྒྱས་པར་བྱ། ཉི་མའི་མདངས་སྡུད་པ་ན་

---

^{[མ་དཔེ་གཟིགས་ན་འདིར་གནོན།]}

ཤེར་ཟློག་དང་། སྔགས་ཟློག་བྱ། ཐུན་བཞི་པ་སྲོད་དུས། ལྷ་དྲག་པོའི་བཟླས་སྒོམ་གང་ལྕོགས་དང་། ཁྱད་པར་ཧཱུྃ་བཟླས་བྱ། ཙཎྜ་ལཱི་བསྒོམ། དེ་མཐར་ཕུང་པོ་མཆོད་སྦྱིན་དང་སྨོན་ལམ་རྣམ་པར་དག་པས་རྒྱས་བཏབ། ཉལ་བའི་རྣལ་འབྱོར་གྱིས་ཉལ་ཞིང་འོད་གསལ་དང་རྨི་ལམ་ངོས་ཟིན་པར་བྱ། མདོར་ན་དུས་རྒྱུན་དུ། བླ་མ་ལ་མོས་གུས། ཡེངས་མེད་ཀྱི་དྲན་པ། སེམས་ཅན་ལ་སྙིང་རྗེ་རྣམས་དང་མ་བྲལ་བའི་ངང་། ཉོན་མོངས་པ་གང་ཤར་འབུར་འཇོམས་སུ་བྱས་ལ་ཤེས་པ་སྤྲོ་བསྡུ་དང་བྲལ་བའི་ངང་དུ་ལྷོད་ཀྱིས་ཀློད་ལ་བཞག་གོ། ༈ །།སྤྱིར་སྔགས་མཚམས་སྦྱར་འོས་པ་རྣམས་སྦྱར་ནས་བཀླག་པ་དག་པར་བཞེད་དེ། དག་ལྡན་ལས། བཀླག་པའི་ཚེ་ཁ་ཕྲལ་བར་མི་བྱའོ། །ཞེས་གསུངས་པའི་ཕྱིར། བྱེ་བྲག་ཏུ་ཚེ་འབྲུ་༡༠༨གཟུངས་དང་། ཨཊྚ་༡༢༥ལྟ་བུ་གྲངས་ངེས་ཡོད་པ་རྣམས་ཕྲལ་ན་ཡི་གེ་ལྷག་པའི་སྐྱོན་དུ་འགྱུར་ཏེ། དཔེར་ན་ཚེ་གཟུངས་ཀྱི་མི་ཏཱ་ཡུར་དང་། ག་ཏཱ་ཡཱདྷ་ཏེ་ཕྲལ་ན་ཡི་གེ་བརྒྱ་དང་བརྒྱད་པའི་དམ་བཅའ་མས་པར་འགྱུར་ཏེ། བརྒྱ་དང་བཅུར་འགྱུར་བའི་ཕྱིར། ཞེས་འདོད་པའང་སྣང་མོད་དཔྱད་པར་བྱའོ། །རྒྱུད་སྡེའི་སྔགས་བཏུ་ཡོད་པ་རྣམས་དེ་ཁོ་ནར་བསྟུན་པ་ལེགས། བྱེ་མདོ་གཉིས་ཀྱི་ལུགས་སུ། བདག་ཅག་གི་སྟོན་པ་ཡུམ་གྱི་ལྷུམས་སུ་ཞུགས་པའི་ཚེ་རྒྱལ་པོའི་སྲས་མཚན་དཔེ་གོས་དང་

---

^{[མ་དཔེ་གཟིགས་ན་འདིར་གནོན།]}

བཅས་པའི་རྣམ་པར་ཞུགས་པར་བཞེད། རྒྱུད་བླ་དབུ་མ་རང་རྒྱུད་དུ་བཞེད་པ་ལེགས་ཚུལ་ཀུན་ཚུལ་བས་བཤད། ལྷ་བབས་དུས་ཆེན། ཟླ་དགུ་ཚེས་ཉེར་གཉིས་ལ་འདོད་པ་ནི་དུས་དངོས་དང་། ཡང་ཟླ་དགུ་ཚེས་བཅོ་ལྔ་ལ་འདོད་པ་ནི། ཚེས་ཉེར་གཉིས་ལ་ཕེབས་པར་འགྱུར་ཞེས་གཏམ་ཐོས་པའི་གཏམ་སྙན་གྱི་དུས་ཆེན་ཡིན་ནོ། །ཝཱ་རཱ་ཎ་སཱིར་ལྔ་སྡེར་ཆོས་གོས་ཟླུམ་པོར་བགོ་བ་སོགས་གསུངས་པ་དེ་༡༥ སྣམ་སྦྱར་སོགས་སུ་འདོད་ཅིང་། དེའང་འཚོ་བྱེད་ཀྱིས་ཕུལ་བའི་རས་ལ་དྲས་དྲུབ་བྱས་པར་བཤད་མོད་དེ། དེའི་སྔོན་དུའང་དྲས་དྲུབ་ཡོད་པར་གསལ་ཅེས་འདོད་སྣང་ནའང་དཔྱད་གཞིའོ། །ཉི་མ་བྱང་བགྲོད་༣ མཐར་ཐུག་པའི་ཚེ་དཔག་ཚད་བརྒྱད་ཁྲི་དྲུག་སྟོང་གིས་མཐོ་བ་དང་། ལྷོ་བགྲོད་མཐར་ཐུག་ཚེ་དཔག་ཚད་བདུན་ཁྲི་ལྔ་སྟོང་གིས་དམའ་བར་བཞེད། ཨ་བྷ་ཡས། བུམ་པའི་སྟེང་དུ་ཀུ་ཤའི་འཐོར་ཡབ་འཇོག་པར་བཤད་པ་ལས་རྒྱུད་ཚིག་དངོས་མ་མཐོང་ཡང་དོན་དུ་མེ་ཏོག་དང་འབྲས་བུར་བཅས་པའི་ཤིང་གིས་ཁ་བརྒྱན་པར་བཤད་པས། བོད་འདིར་དགུན་དུས་དེ་འདྲ་མི་འབྱོར་བས། དེའི་མཚོན་བྱེད་དང་དག་བྱེད་ཀྱི་རྫས་ཡིན་པ་སོགས་ཀྱི་རྒྱུ་མཚན་དུ་མས་བོད་ཀྱི་རྡོ་རྗེ་འཛིན་པ་ཆེན་པོ་རྣམས་ཀྱིས་དེ་ལྟར་མཛད་དོ།། ༈ །།ཆུ་སྦྱིན་སྐབས། ཆུ་ཡི་སྦྱིན་པ་རྒྱ་ཆེན་པོ་འདི་ལ་བརྟེན་ནས་སོགས་ཀྱི་དོན། ཡི་དྭགས་

---

^{[མ་དཔེ་གཟིགས་ན་འདིར་གནོན།]}

རྣམས་ལ་ཆུའི་སྦྱིན་པ་རྒྱ་ཆེན་པོ་བགྱིས་པ་འདི་ལ་བརྟེན་ནས། ཆུ་དེའི་བདག་པོ་ཀླུ་ཡིན་པས་ཀླུའི་རྒྱལ་པོ་དགའ་བོ་དང་། ཉེ་དགའ་བོ་ལ་སོགས་པ་མདོར་ན་སྲིད་པ་འདི་ན་རླན་ཤིང་གཤེར་བ་ཆུ་ཀླུང་། ཆུ་མིག །རྫིང་བུ་སོགས་ཀྱི་བདག་པོ་རྣམས་དམིགས་ཡུལ་དུ་བྱས་ནས། དགེ་བའི་རྩ་བ་དེས་སྦྱིན་པའི་བདག་པོ་དང་ཀླུ་རྣམས་ལམ་ལྔ་རིམ་གྱིས་བགྲོད་ནས་སངས་རྒྱས་ཀྱི་གོ་འཕང་ཐོབ་པའི་སྨོན་ལམ་གདབ་པ་སྟེ། དེའང་། སྦྱིན་པ་དམ་པ་ནི་ཚོགས་ལམ་ཡིན་ཏེ། དེའི་སྐབས་སུ་ཞི་གནས་དང་། ལྷག་མཐོང་དང་། བསོད་ནམས་དང་ཡེ་ཤེས་ཀྱི་ཚོགས་འཇིག་རྟེན་པ་ལམ་མ་ཞུགས་པ་རྣམས་ལས་ཆེས་ཁྱད་པར་དུ་འཕགས་པའི་ཚོགས་བསགས་ཚུལ་ཡོད་པའི་ཕྱིར་རོ། །སེམས་ཀྱི་རྒྱན་ནི་སྦྱོར་ལམ་གྱི་སྐབས་ཡིན་ཏེ། དེའི་སྐབས་ཀྱི་དགེ་རྩ་ཐམས་ཅད་མྱ་ངན་ལས་འདས་པའི་རྒྱུར་འགྱུར་ངེས་པས། སྤོས་ཀྱི་གླང་པོ་ཆེ་ལ་གསེར་གྱི་དྲ་བས་གཡོགས་པ་ལྟར་རྣལ་འབྱོར་པའི་སེམས་ལ་ཤིན་ཏུ་མཛེས་པ་བསྐྱེད་པའི་ཕྱིར་རོ། །སེམས་ཀྱི་ཡོ་བྱད་ནི་མཐོང་ལམ་གྱི་གནས་སྐབས་ཡིན་ཏེ། དེའི་ཚེ་ཆོས་ཉིད་སྤྲོས་བྲལ་གྱི་གནས་ལུགས་མངོན་སུམ་དུ་རྟོགས་པས་ཚོགས་གཉིས་དངོས་སུ་འབྲེལ་བའི་སྟོབས་ཀྱིས་ཡང་དག་པའི་ལྟ་བ་ལ་སོགས་པས་རྣལ་འབྱོར་པའི་སེམས་རབ་ཏུ་ཕྱུག་པར་བྱེད་པའི་ཕྱིར་རོ། །རྣལ་འབྱོར་གྱི་ཚོགས་ནི་སྒོམ་ལམ་གྱི་

---

^{[མ་དཔེ་གཟིགས་ན་འདིར་གནོན།]}

གནས་སྐབས་ཡིན་ཏེ་དེའི་ཚེ་ཞི་གནས་དང་ལྷག་མཐོང་ཟུང་དུ་འབྲེལ་བའི་རྟོགས་པ་ཁྱད་པར་ཅན་གོང་ནས་གོང་དུ་གོམས་པར་བྱེད་ཅིང་། ཡང་དག་པའི་རྟོག་པ་ལ་སོགས་པ་རྣལ་འབྱོར་པའི་ཏིང་ངེ་འཛིན་གྱི་ཚོགས་ཀུན་ནས་འཕེལ་བར་བྱེད་པའི་ཕྱིར་རོ། །དོན་གྱི་མཆོག་ནི། མཐར་ཕྱིན་པའི་ལམ་གྱི་སྐབས་ཡིན་ཏེ། རང་བཞིན་གྱི་དོན་གཉིས་ལྷུན་གྲུབ་ཏུ་འབྱུང་བའི་སྐུ་གསུམ་ཕྲིན་ལས་དང་བཅས་པ་ལ་དབང་ཐོབ་ཅིང་ཡུན་རིང་པོ་ནས་འབད་པར་བྱས་པའི་དོན་ཐམས་ཅད་གྱི་ཕུལ་དུ་ཕྱིན་པ་ཕན་པའི་ཕྱིར་རོ། །ཞེས་ཁྲོ་ཕུ་ལོ་ཙཱ་བ་བྱམས་པའི་དཔལ་གྱི་གསུང་རབ་ལས་འབྱུང་ཞིང་། ཡང་མངོན་པ་ནས། སྦྱིན་པ་དམ་པ་སེམས་ཀྱི་རྒྱན་རྫུ་འཕྲུལ། སེམས་ཀྱི་ཡོ་བྱད་འཕགས་ལམ་བརྒྱད་དང་། རྣལ་འབྱོར་གྱི་ཚོགས་ཏིང་ངེ་འཛིན་གྱི་ཚོགས་དང་། དོན་གྱི་མཆོག་མྱང་འདས་ལ་བཤད་དོ།། ༈ །།སྤྱན་རས་གཟིགས་བརྒྱ་རྩ་ལས། །དེ་ལྟར་རིང་ནས་ལམ་གོམས་པའི། །བློ་ལྡན་དུས་ལས་འདས་གྱུར་ཚེ། །འཕགས་པ་ངན་སོང་སྦྱོང་དཔལ་གྱི། །ཆོ་གས་བདུན་ཕྲག་བདུན་དུ་སྦྱང་། །རོའམ་རུས་པ་གོས་སམ་མིང་། །རྟེན་དེའི་མདུན་དུ་བཞག་ནས་སུ། །མ་དག་པ་དང་དག་པ་ཡི། །དཀྱིལ་འཁོར་གཉིས་ལ་རྟེན་གཉིས་བཞག །བརྡེག་དང་བསྲེག་དང་བཀྲུ་བ་ཡིས། །དྲི་མ་གཞིག་གཞོམ་དད་པ་དག །དཀྱིལ་འཁོར་ནག་པོ་བྱ་བས་ཏེ། །

---

^{[མ་དཔེ་གཟིགས་ན་འདིར་གནོན།]}

བརྟེན་དང་དབང་བསྐུར་བྱ་བ་ལའོ། །ཡུངས་ཀར་བྱེ་མ་ཐལ་ཆེན་ལ། །རིག་པ་བཟླས་ནས་བསྣུན་བྱ་ཞིང་། །སྦྱིན་སྲེག་ཆོ་གའི་བྱ་བ་ཡིས། །རྟེན་བཅས་བག་ཆགས་འབད་དེ་བསྲེག །ངན་སོང་སྦྱོང་བའི་སྐུ་གསུང་ཐུགས། །བཞུ་བའི་ཆུས་བཀང་བུམ་པར་བླུགས། །རྡོ་རྗེའི་གླུ་བླངས་རིག་པ་བཟླ། །མ་ལུས་དྲི་མ་བཀྲུ་བར་བྱ། །ཨོཾ་ཨཱ ཤྲཱི་སརྦ་དུརྒ་ཏི་པ་རི་ཤོ་དྷ་ནེ་རཱ་ཛཱ་ཡ། ཨ་མུ་ཀེ་ཀཱ་ཡ་ཝཱ་ཀ་ཙིཏྟ་སརྦ་པཱ་པཾ་ཏོ་ཥ་པ་ར་ཎ་བྷཾ་ག་བྷཾ་ག་དྲ་ཧ་དྲ་ཧ་བཱ་ར་ཙྪ་བཱ་ར་ཙྪ། ཤོ་དྷ་ཡ་ཤོ་དྷ་ཡ་ཕཊ་ཕཊ་སྭཱ་ཧཱ། དེ་རྗེས་དྲི་མ་དག་པའི་སེམས། །ལྷག་པའི་ལྷ་ལ་བཅུག་ནས་ནི། །ཇི་བཞིན་དབང་བསྐུར་བྱས་ཏེ་མཆོད། །དགའ་སྟོན་ཆེན་པོ་སྦྱིན་པར་བྱ། །ཞེས་སོ། །གཞན་ཡང་འདི་སྐོར་ལ་ལས་ཀྱི་ཚོགས་ཁྱད་པར་དུ་འཕགས་པ་ཡོད།། ༈ །།མཚམས་ཀྱི་སྐབས། མི་གདོང་གསར་སོགས་ཡོང་རྒྱུའི་སྔོན་དུ་གྲིབ་བྱུང་ན་འགྲུལ་སྣ་ཡིན་པས་སྲུང་འཁོར་ནན་ཆེར་བསྒོམ། རྗེས་སུ་བྱུང་ན་གྲིབ་ཡིན་པས་ཁྲུས་ཀྱི་རྣལ་འབྱོར་བྱ། གཞན་ཡང་གདན་མི་སྤྲུགས། ཁ་མི་བཤལ། མཚོན་རྩེ་ཁར་མི་འཇུག །སྐྲ་སེན་ཁ་སྤུ་མི་བྲེག །གདན་ཁར་གཞན་མི་གཏོང་། སྔགས་ཕྲེང་ལ་གཅེས་སྤྲས་ཆེ་བར་བྱ། གལ་ཏེ་ཉམས་ན་རུ་རྟ་དང་སྤོས་དཀར་གྱི་ཆུས་བཀྲུ། ལྕེ་དང་མཚེར་པ་མི་ཟ། ལན་ཚྭ་ལ་ཕུག་སྒོག་བཙོང་ཤ་རུལ་ཆང་སྐྱུར་རྣམས་སྤང་ཐུབ་ན་ལེགས། མ་གྲུབ་ན་ཟ་དུས་

---

^{[མ་དཔེ་གཟིགས་ན་འདིར་གནོན།]}

དབྱངས་གསལ་བཟླ། མཆིལ་མ་འགྲིམ་ལམ་དུ་མི་འདོར། གཞན་དུ་འགྲོ་དགོས་བྱུང་ན་གདན་གྱི་ཁར་ཕྲེང་བ་སྦྲུལ་མདུད་ཀྱིས་བཞག་པ་སོགས་སྤང་བླང་རྒྱས་པ་སྔགས་སྡེབ་སོགས་ལས་འབྱུང་བ་ལྟར་ཤེས་པར་བྱའོ།། ༈ །།ཚེ་རྟེན་ཨ་ལ་སྲོག་རྟེན་ནཱཾ། བསོད་ནམས་བློ་ལ་དབང་ཐང་ཛ༔ ཞེས་སོ།། ༈ །།ཞི་བ་སྤྱིའི་རྒྱན་ཆས་ཕྱི་འགྱུར་གྱི་སྐབས་སུ། དར་གྱི་རྒྱན་དང་། རིན་པོ་ཆེའི་རྒྱན་བརྒྱད་ལས། དང་པོ་ལ། སྟོད་གཡོགས་ནི། དཀར། དར་ལྗང་། བཟང་པོ། སྨུག ཁ་དོག་ལྔ་ལྗང་། ལྡན་གྱི་ཆོས་གོས་ལྕགས་རི་མེད་པ་གཅིག་གིས་རྐེད་པ་ཡན་གྱི་སྐུ་སྟོད་ཁེབས་ཤིང་དཔུང་པའི་ཐད་ཀར་རླུང་གིས་བསྐྱོད་པའི་སྟོབས་ཀྱིས་ཕུར་མ་ལྷབ་ལྷུབ་ཏུ་འབྱུང་བའོ། །སྨད་གཡོགས་ནི། དར་གྱི་ཤམ་ཐབས་ལྟ་བུ་ཞིག་གིས་རྒྱབ་མདུན་དུ་དཀྲིས་པའོ། །གཉིས་པ་ལ། དབུ་རྒྱན་ནི། རིན་པོ་ཆེའི་སྲོག་ཞུ་རིམ་པ་གསུམ་ལྡན་དབུ་སྐྲ་གྱེན་དུ་བཅིངས་པའི་སྟེང་མནབས་པ། རིན་པོ་ཆེའི་རྩེ་བྲན་ལྔའི་དབུས་སུ་རིགས་ལྔ་བཞུགས་པ། རྣ་བའི་ལྟག་ཏུ་ཨུཏྤལ་རྒྱས་པའི་རྣ་རྒྱན་གཉིས་ལས་དར་དཔྱངས་འཕྱང་པའོ། །རྣ་རྒྱན་༢ནི། རིན་པོ་ཆེའི་རྣ་གོར་རིན་པོ་ཆེ་སྣ་ཚོགས་ཀྱི་ཕྲས་མཛེས་པ། མགུལ་རྒྱན་༣ནི། གཡས་གཡོན་དབུས་གསུམ་དུ་རིན་པོ་ཆེའི་གཞུང་གསུམ་བྱས་པའི་བར་རྣམས་རིན་པོ་ཆེའི་དྲྭ་བ་སྦྲེལ་བ་མགུལ་པར་འཁྱིལ་བ་

---

^{[མ་དཔེ་གཟིགས་ན་འདིར་གནོན།]}

ལས་འཕྱང་འཕྲུལ་ཅུང་ཟད་དང་བཅས་པ། ལག་གདུབ་༤ནི། རིན་པོ་ཆེའི་གཞུང་གསུམ་གྱི་བར་དུ་རིན་པོ་ཆེའི་ཕྲེང་བས་སྦྲེལ་བ། ཆེ་བ་གཉིས་ཀྱིས་དཔུང་པ་དང་། ཆུང་བ་གཉིས་ཀྱིས་མཁྲིག་མ་གཉིས་བརྒྱན་པ། རྐང་གདུབ་༥ནི། ལག་གདུབ་དང་འདྲ་བ་ལས། ཐ་མ་གཉིས་སུ་རིན་པོ་ཆེའི་ཟ་ར་ཚག་མང་པོ་འཕྱང་བ། སྐེ་རགས་༦སམ་འོག་ལྤགས་སམ་རྐེད་རྒྱན་ནི། དབུས་དང་གཡས་གཡོན་རྣམས་སུ་རིན་པོ་ཆེའི་གཞུང་ལྔ་གྱེན་དུ་བྱས་པའི་བར་རྣམས་སུ་དྲ་བས་སྦྲེལ་ཞིང་སྨད་དུ་ཟ་ར་ཚག་མང་པོ་འཕྱང་བས་མདུན་ཕྱོགས་ནས་ཕྱིར་རྐེད་པར་བརྒྱན་པ། དོ་ཤལ་༧ནི་རིན་པོ་ཆེའི་ཕྲེང་བ་ཆེ་ཆུང་སྦེལ་བས་མགུལ་ནས་ལྟེ་འོག་ཡན་ཆད་འཁོར་བ། སེ་མོ་དོ་རནི། རིན་པོ་ཆེའི་ཕྲེང་བ་དེ་ལས་ཐུང་བ་ནུ་མའི་བར་སླེབས་པའོ།། ༈ །།སྔ་འགྱུར་གྱི་གཞུང་རྣམས་སུ། །དར་དཀར་པོ་གསེར་གྱི་ངང་པའི་རི་མོ་ཡོད་པ་ཅན་གྱི་སྟོད་གཡོགས། ཚི་གུ་ཞེས་ཁ་དོག་སྣ་ཚོགས་སུ་འཆར་བའི་དར་གྱི་སྨད་དཀྲིས། དར་སྣ་ཚོགས་རྣ་རྒྱན་ལས་འཕྱངས་པའི་ཅོད་པན། དར་ཤམ་གྱི་སྟེང་དུ་སུལ་ཐུང་མཐིང་ག་ནི་ཟི་སྡིར། ཡང་གཞན་དག་དར་མཐིང་ཁྲའི་འཕན་དབྱིབས་ལྟག་པ་ནས་ཕྱིར་འཕྱང་བའོ། །ཞེས་པར་བཞེད། གར་གྱི་ཕུ་དུང་འདི་ལ་ལར་ཕོད་ཀ་འདྲ་བ་བྲིས་སྣང་ནའང་དཔྱད། ཞེས་དར་དཔྱངས་ཀྱི་གར་གྱིས་ཕྱག་གཉིས་ལ་དཀྲིས་པ་བཅས་དར་གྱི་རྒྱན་

---

^{[མ་དཔེ་གཟིགས་ན་འདིར་གནོན།]}

ལྔ། དེ་སྟེང་སྔར་གྱི་རིན་པོ་ཆེའི་རྒྱན་བརྒྱད་བསྣན་པས་རྒྱན་ཆས་བཅུ་གསུམ་མོ།། ༈ །།སྦྱང་ཆས་བྱང་བུ་སོགས་ཀྱི་གཡས་ནས་རིམ་བཞིན། གཏོར་མ༡། ཏིང་ལོ་ཆང་བུ་སོགས་རེ་རེ་ནས་བཤམ། རྟེན་ལ་བསྐོར་དུས་དང་པོ་དབུས་དང་དེ་ནས་གཡས་གཡོན་ལེན། སློབ་དཔོན་གྱིས་གཡས་མཆོག་སྦྱིན་དང་གཡོན་སྐྱབས་སྦྱིན་གྱི་ཕྱག་རྒྱ་དང་བཅས་ནམ་མཁའ་མཛོད་ཀྱི་སྔགས་བརྗོད། ཏིལ་སྦྱང་སྐབས། ཏིལ་དེ་ཉིད་ལས་རྡོར་གྱིས་རྡོ་རྗེ་ཁུ་ཚུར་གྱིས་བཟུང་ལ། རྟེན་ལ་ལག་གཡས་ཀྱིས་གཡས་དང་། གཡོན་པས་གཡོན། གཉིས་ཀས་གཡས་སུ་བསྐོར་ལ། མཐར་ལག་གཉིས་བསྣོལ་ནས་མེ་ཆུར་དོར། ལས་རྡོར་གྱིས་བསྙེན་པ་མ་སོང་ན་དཀྱིལ་འཁོར་ལ་ཁྲུས་བྱ་བར་མི་རུང་བས་ངེས་པར་བསྙེན་པ་རྫོགས་པས་བྱ། ༈ །སྐྱབས་གསོལ་སོགས་ཀྱི་སྐབས། བདག་གིས་དང་། ཚེ་འདས་ཞེས་བརྗོད་པ་གང་ཡང་མི་འགལ་ཏེ། སྔ་མ་ནི་རྗེས་ཟློས་བྱེད་པའི་དབང་དུ་བྱས་ལ། ཕྱི་མ་ནི་སློབ་དཔོན་རང་ཉིད་ཀྱིས་ངོ་ཆེན་གྱི་ཚུལ་དུ་དཀྱིལ་འཁོར་གྱི་ལྷ་ལ་སྐྱབས་སུ་འགྲོ་བ་ཡིན་ནོ། །འོན་ཀྱང་དམིགས་རྣམ་དང་བརྡའ་སྤྲོད་ལུགས་མ་ནོར་བ་གལ་ཆེ། འདོད་ཡོན་བསྔོ་བར། གཟུགས་ལ་མེ་ལོང་སྟེང་རྡོ་རྗེ་བཞག་པ། སྒྲར་ཏིང་ཤག །དྲི་ལ་བཏུང་བའི་རིགས་དང་རྣམ་རྒྱལ་བུམ་ཆུ་བསྲེས་པ། རོ་ལ་བཟའ་བཅའི་རིགས། རེག་

---

^{[མ་དཔེ་གཟིགས་ན་འདིར་གནོན།]}

ལ་གོས་ལིང་དར་སོགས་བཤམས་པར་བཤད་ནའང་པར་བཀབ་མེད། བྱང་སྲེག་སྐབས་བདག་མདུན་གྱི་འོད་ཟེར་སྤྲོ་བསྡུ་སོགས་ནི་རིག་བཟོ་ཙམ་སྟེ། ཆོས་ཐམས་ཅད་བདག་མེད་པའི་གནས་ལུགས་ལ་བློ་བཞག་པ་ཁོ་ནས་འཐུས། ཞག་གསུམ་ལྟ་བུའི་ཚེ་ཆོ་ག་དང་འཕོ་བ་སྦྲེལ་མ་བྱེད་ན། ཕུང་པོ་ཉིད་བསང་སྦྱང་ནས་ཟས་གཏད་པར་དཀྱུས་ལྟར་གསལ་འདེབས་དང་། འཕོ་བ་སོགས་དཀྱུས་ལྟར་དང་། ཡང་བགེགས་སྦྱང་བ་ཙམ་སྔོན་དུ་འགྲོ་བས་དབང་བསྐུར་མཐར་འཕོ་བ་མཛད་པའི་སྲོལ་གཉིས་ཡོད། རྣམ་པར་དཔྱད་ན་ཞག་གསུམ་ཚུན་རྣམ་ཤེས་ཕུང་པོར་གནས་པའི་དབང་དུ་བྱས་ཚེ་རྣམ་ཤེས་དགུག་བསྟིམ་སོགས་མི་འོས་ཀྱང་། སྡིག་པ་སྦྱང་བ་ནི་ངེས་པར་འོས་པས་གསོན་པོ་ལ་བྱ་བ་བཞིན་ཕྱིར་ལྡོག་དབང་དང་བཅས་པའི་མཐར་འཕོ་བ་སོགས་མཛད་ན་ལེགས་སོ། །བྱང་བུ་མི་སྲེག་ན་ཟས་གཏད་ཀྱི་རྗེས་སུ་ཚེ་འདས་ཀྱི་རྣམ་ཤེས་རྡོ་རྗེ་སེམས་དཔར་གསལ་བ་མདུན་གྱི་ནམ་མཁར་སྤར་ནས་ལམ་བསྟན། བྱང་བུ་སྲེག་ན། རྣམ་ཤེས་ནམ་མཁར་སྤུར་རྗེས་བྱང་བུ་བསྲེག །དེ་ནས་ལམ་བསྟན། ཕུང་པོ་ཡོད་ཚེ་རྣམ་ཤེས་སྤྱི་བོའི་འོད་དཔག་མེད་ཀྱི་ཐུགས་ཀར་འཕོ་ཚར་ནས་ལམ་བསྟན། ལམ་བསྟན་སྦྱང་གཉིས་སྔོན་རྗེས་སྣ་ཚོགས་སུ་སྣང་ནའང་རང་རང་གི་ལུགས་དེ་ལས་འགལ་བ་མེད། བྱང་བུ་བསྲེགས་ནས་སཱཙྪ་ཚུལ་བཞིན་

---

^{[མ་དཔེ་གཟིགས་ན་འདིར་གནོན།]}

དུ་བྱས་པ་ཉིད་བཟླས་ཡུངས་དང་བྱེ་མ་བཅས་རྒྱ་མཚོར་འབབས་པའི་ཆུ་བོར་སྤྱན་འདྲེན་པ་ལེགས། བདུན་ཚིགས་ཀྱི་དོན། ཤི་ནས་ཞག་བདུན་གྱི་ཚེ་བདུན་དང་པོ་སོགས་རིམ་པར་འཛིན་པའི་ཁུངས། སྦྱོང་རྒྱུད་ལས། ལྷ་ཡི་བུ་ནོར་བུ་དྲི་མ་མེད་པ་ཤི་ནས་ཞག་བདུན་ནས་ངན་སོང་དུ་སྐྱེ་བར་གསུངས་པ་དང་འབྲེལ། གཞན་དག་ཞག་གསུམ་པར་རྣམ་ཤེས་ཕུང་པོར་གནས་པས། བདུན་ཚིགས་ཀྱི་མགོ་ཞག་བཞི་པ་ནས་འཛིན་པར་མཛད་དོ། །ཀུན་བཏུས་ལས། ཇི་ལྟར་ཐོགས་ན་ཞག་བདུན་གནས་ཏེ། ཞེས་དང་། གལ་ཏེ་མ་རྙེད་ན་ས་སྡེ་ལས། ལུས་བརྗེས་ནས་ཡང་ཞག་བདུན་བར་དུ་གནས་སོ། །ཤིན་ཏུ་བུལ་བ་རྣམས་ཀྱིས་སྐྱེ་བའི་རྐྱེན་མ་རྙེད་ན་ཞག་བདུན་ཕྲག་བདུན་གྱི་བར་དུའང་གནས་སོ། །དེ་ཕན་ཆད་ནས་སྐྱེ་བའི་རྐྱེན་རྙེད་པར་འགྱུར་རོ། །ཞེས་གསུངས་པ་སྤྱིར་བཏང་གི་དབང་དུ་མཛད་པ་ལས། དམིགས་བསལ་ལ་ནི་ངེས་པ་མེད་དེ། མདོ་སྡེ་དག་ལས་ལོ་དང་བསྐལ་པར་གནས་པའང་བཤད་ཕྱིར། དགེ་རྒྱུན་ནར་མར་བཏང་བ་ནི་བར་དོར་ཡུན་རིང་དུ་གནས་པ་ལ་ཕན་གདགས་པ་དང་། གལ་ཏེ་ངན་སོང་སོགས་སུ་སྐྱེས་ནའང་དེའི་ཆེད་དུ་ལས་བྱས་པས་སྒྲིབ་པ་དག་པའི་ཕྱིར་ཏེ། རྒྱུད་ལས། སྦྱིན་སྲེག་མངོན་པར་དབང་བསྐུར་ན། །གདོན་མི་ཟ་བར་བདེ་འགྲོར་སྐྱེ། །ཞེས་སོ། །མདོར་ན་རྡོ་རྗེ་སློབ་དཔོན་

---

^{[མ་དཔེ་གཟིགས་ན་འདིར་གནོན།]}

རབ་ཀྱིས་ལམ་བསྟན་ན་གྲོལ་བར་ནུས་པ་དང་། འབྲིང་གིས་ཀྱང་ངན་སོང་གི་སྐྱེ་བ་ལས་ལྡོག་པར་འགྱུར་བ་དང་། ཐ་མས་ཀྱང་ཆོ་ག་ཚུལ་བཞིན་དུ་བྱས་པས་ཅི་རིགས་པའི་སྨན་ཡོན་དུ་འགྱུར་བས་ན་བསྙེན་པ་ལས་སུ་རུང་བས་ཆོ་ག་ཚད་ལྡན་གྱིས་རྗེས་སུ་འཛིན་པ་ཤིན་ཏུ་གལ་ཆེའོ། ༈ །འོད་དཔག་མེད་ཀྱི་སྒོ་ནས་འཕོ་བའི་རྣལ་འབྱོར་ཟབ་མོའི་དམིགས་རིམ། རང་དང་གཞན་གང་ལའང་རུང་སྟེ། ལུས་ཕྱི་བལྟས་ནང་གསལ་འོད་ཀྱི་རང་བཞིན་ཅན་གྱི་དབུས་དྲང་པོར་ལྟེ་བ་ནས་སྤྱི་གཙུག་བར་རྩ་དབུ་མ་པདྨའི་སྣལ་མ་ལྟར་ཕྲ་བ། ཆུ་ཤིང་གི་སྡོང་པོ་ལྟར་དྲང་བ། རྒྱ་སྐྱེགས་ཀྱི་མེ་ཏོག་ལྟར་དམར་ཞིང་སྣུམ་པ། ཏིལ་གྱི་མར་མེ་ལྟར་གསལ་དྭངས་འོད་ཀྱི་རང་བཞིན་ཅན་ཏེ་ཆོས་བཞི་ལྡན་སྦོམ་ཕྲ་གྲོ་སོག་འབྲིང་པོ་ཙམ་མམ་མདའ་སྨྱུག་འབྲིང་པོ་ཙམ་གང་བདེ་བསྒོམས་པའི་སྙིང་གའི་ཐད་དུ་རླུང་སེམས་འཇུག་པ་གཅིག་ཏུ་འདུས་པའི་ངོ་བོ་ཨ་ཡིག་དཀར་པོ་འོད་ཀྱི་རང་བཞིན་ཅན་ཞིག་བསམས་ཏེ། ངག་ཏུ་ཨ་ཞེས་སྐད་གདངས་རིང་པོར་བརྗོད་པས་སྙིང་གའི་ཨ་ཡིག་དེ་ཉིད་འདར་ཁྲི་ལི་ལི་ཡར་འཕར་ལ་ཁད་པ་ཞིག་གསལ་བཏབ་ལ། ཕྲཊ་ཅེས་དྲག་ཏུ་བརྗོད་པས་ཨ་དེ་ཉིད་སྐར་མདའ་འཕངས་པ་བཞིན་འོད་དཔག་མེད་ཀྱི་ཐུགས་ཀར་ཐིམ་པར་བསམས་ལ་མཉམ་པར་བཞག །སླར་མར་ཕབ་པ་སོགས་སྤྱི་ལྟར། ཚེ་འདས་ལ་འོད་དཔག་མེད་

---

^{[མ་དཔེ་གཟིགས་ན་འདིར་གནོན།]}

ཀྱི་ཐུགས། རང་སེམས། ཚེ་འདས་ཀྱི་རྣམ་ཤེས་བཅས་དབྱེར་མེད་དུ་ཅུང་ཟད་རེ་མཉམ་པར་བཞག །ཡང་སྔར་ལྟར་ཨ་ཡིག་ཞིག་གསལ་བཏབ་ལ་འཕོ་བ་སོགས་ལན་གསུམ་མམ་ཡིད་ཆེས་མ་སྐྱེས་བར་བསྐྱར། ཡང་ན། ཨ་ཕྲཊ་ཚར་གསུམ་གྱི། དང་པོས་ཨ་ཡིག་དེ་སྙིང་ག་ནས་མགྲིན་པར། གཉིས་པས་སྤྱི་བོར། གསུམ་པས་འོད་དཔག་མེད་ཀྱི་ཐུགས་ཀར་འཕོ་བ་ཡང་ཡོད་དེ་གང་བདེ་བྱའོ། །འདི་རྣམས་ཞལ་གྱི་གདམས་པ་སྟེ་གཞན་གཞུང་ལྟར་རོ།། ༈ །།དཀོན་བརྩེགས་ཉེ་བར་འཁོར་གྱིས་ཞུས་པའི་ལེའུ་ལས། ཕུང་པོ་གསུམ་པའི་ཆོས་ཀྱི་རྣམ་གྲངས་ཉིན་ལན་གསུམ་མཚན་ལན་གསུམ་བརྗོད་པས་ཉེས་པ་བགྱིད་པའི་གནས་ལས་ངེས་པར་འབྱུང་ཞིང་ཏིང་ངེ་འཛིན་ཀྱང་ཐོབ་པར་འགྱུར་རོ། །ཞེས་སོགས་རྒྱ་ཆེར་གསུངས་སོ།། ༈ །།དོན་ཞགས་ཀྱི་ཆོ་ག་ཞིབ་༡༨༠མོར། ཨོ་པདྨོ་རྞཱི་ཥ་བི་མ་ལེ་ཧཱུཾ་ཕྲཊ། གསང་སྔགས་ཀྱི་སྙིང་པོ་ཡི་གེ་བཅུ་པ་འབུམ་བཟླས་བརྗོད་བྱས་ན་ཕྱིར་མི་ལྡོག་པ་ཉིད་དུ་གྱུར་ནས་ས་བཅུ་པ་ལ་གནས་འགྱུར། ཅེས་སོགས་དང་། དུང་ལ་ལན་བདུན་བཟླས་བརྗོད་བྱས་ནས་གནས་མཐོན་པོར་བུས་ན་སེམས་ཅན་གང་དག་དུང་དེའི་སྒྲ་ཐོས་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། རི་དྭགས་དང་། བྱ་དང་། དུད་འགྲོའི་སྐྱེ་གནས་སུ་གཏོགས་པ་དེ་དག་ཐམས་ཅད་མཐོ་རིས་ཀྱི་

---

^{[མ་དཔེ་གཟིགས་ན་འདིར་གནོན།]}

འཇིག་རྟེན་དུ་གཞོལ་བར་འགྱུར་རོ། །ཞེས་དང་། ཙན་དན་ལ་ལན་བདུན་བཟླས་བརྗོད་བྱས་ནས་དགེ་འདུན་གྱི་ཀུན་དགའ་ར་བའམ། མཆོད་རྟེན་གྱི་འཁོར་སའམ། དགེ་འདུན་གྱི་ནང་ངམ། སྐྱེ་བོ་མང་པོའི་ནང་ངམ། རྒྱལ་པོའི་ཕོ་བྲང་དུ་བདུགས་ན་གང་དག་དེར་དྲི་མནམས་པའི་སེམས་ཅན་དེ་ཐམས་ཅད་སངས་རྒྱས་ཀྱི་སྐུ་ཡོངས་སུ་རྫོགས་པར་འགྱུར་རོ། །ཆོས་གོས་ལ་བདུགས་ནས་གང་གི་ལུས་ལ་གྱོན་པ་དེའི་སྡིག་པ་དང་སྒྲིབ་པ་ཐམས་ཅད་རྣམ་པར་འཇིག་པར་འགྱུར་རོ། །ཞེས་སོགས་རྒྱ་ཆེར་གསུངས་ཤིང་དེའི་ཐིག་ལེའི་ཆོ་གར། །གང་ཞིག་རིལ་བུ་དེ་དག་བརྟེན། །རིལ་བུ་ཐིག་ལེ་རྟག་བྱེད་ལ། །དེ་བཞིན་གཤེགས་ཀུན་དགོངས་པར་མཛད། །འཇིག་རྟེན་ཕ་རོལ་ཤིན་ཏུ་བདེ། །ཚེ་བརྗེ་བ་ནི་འཕོས་ནས་སུ། །བདེ་བ་ཅན་དུ་མོད་ལ་འགྲོ། །གང་དང་གང་དུ་སྐྱེ་བར་ནི། །ཚེ་རབས་རྟག་ཏུ་ཚེ་རབས་དྲན། །ལག་ན་རྡོ་རྗེ་གནོད་སྦྱིན་ཆེ། །གནོད་སྦྱིན་བྱེ་བས་ཡོངས་བསྐོར་ཞིང་། །དུས་ཀུན་དུ་ནི་བསྲུང་བ་དང་། །སྐྱོབ་དང་སྲེད་དང་སྲུང་བར་བྱེད། ཅེས་སོགས་གསུངས་ཤིང་། རིལ་བུ་གསང་སྔགས་འབུམ་བཟླས་པས་བསྒྲུབ་པར་གསུངས་སོ། །ཡང་དེ་ཉིད་ལས་གླེགས་བམ་མཐོང་བ་ཙམ་གྱིས་ཕྱིར་མི་ལྡོག་པ་སོགས་རྒྱ་ཆེར་བསྟན་ཏོ། ༈ །།སློབ་དཔོན་ངག་དབང་གྲགས་པས་འཆི་བདག་བསླུ་བའི་རྟོག་པར། །

---

^{[མ་དཔེ་གཟིགས་ན་འདིར་གནོན།]}

འཆི་བདག་ཀུན་ཏུ་བསླུ་བ་ནི། །གྲོལ་བ་ཉིད་ལ་རིགས་པ་ཡིན། །མ་གྲོལ་བ་ནི་ཐམས་ཅད་ཀྱི། །ཅུང་ཟད་དུས་སུ་བསྲིང་བ་ཡིན། །ཚེ་དང་དབང་པོ་རྣམས་དང་སེམས། །འགག་པ་འཆི་བའི་མཚན་ཉིད་དེ། །ཐབས་ཀྱིས་ཡུན་རིང་འཚོ་བ་ནི། །འཆི་བ་བསླུ་བ་ཞེས་བཤད་དོ། །ཆོས་སྤྱོད་དབང་པོ་ཐུལ་བ་ནི། །འཁོར་བ་རུ་ནི་ཇི་སྲིད་འཚོ། །དེ་སྲིད་བསོད་ནམས་ལ་སོགས་ཚོགས། །བྱང་ཆུབ་སྒྲུབ་བྱེད་རབ་ཏུ་སྐྱེ། །འཁོར་བར་སྲོག་ལས་གཅེས་པ་ནི། །ཅི་ཡང་ཡོད་པ་མ་མཐོང་སྟེ། །དེ་བས་མྱུར་དུ་ཐབས་མང་པོས། །འཆི་བ་བསླུ་བ་ཀུན་ཏུ་སྤྱད། །ཅེས་སོགས་ནས་བརྩམས་ཏེ་ཕྱི་དང་། །ནང་གི་འཆི་ལྟས་བརྟག་པ་དང་། །ཕྱི་དང་ནང་གི་ཐབས་ཀྱིས་བསླུ་བ་སྟེ་ལེའུ་བཞིར་མཛད་དོ། །དེའི་ལེའུ་གསུམ་པ་ལས། །ཕྱི་དང་ནང་གི་བདག་ཉིད་ཀྱི། །འཆི་ལྟས་ཚོགས་ནི་ཤེས་བྱས་ནས། །ཕྱི་དང་ནང་གི་བདག་ཉིད་ལའང་། །བསླུ་བའི་བསྡུས་པ་ཤེས་པར་བྱ། །ལུས་དང་ངག་གི་ལས་ཀྱི་ཕྱི། །བསམ་གཏན་ལས་ཀྱི་ནང་གི་ཡིན། །ནོར་བུ་སྨན་སོགས་ཕྱི་ཡིན་ཏེ། །རྣལ་འབྱོར་ནུས་པ་ནང་གིའོ། །ཞེས་དང་། ཕྱིའི་འཆི་བསླུ་བཤད་པར། །དད་པ་སྔོན་དུ་འགྲོ་བས། །བྱ་དང་ཉ་དང་རི་དྭགས་སྦྲུལ། །རྐུན་པོ་གསད་པའི་ཕྱོགས་གཏོགས་རྣམས། །སྲོག་བསྐྱབས་པ་ཡིས་འཕྲལ་དུ་ནི། །ཚེ་ཐུང་བ་ཡང་ཚེ་རིང་འགྱུར། །ཅེས་སྲོག་

---

^{[མ་དཔེ་གཟིགས་ན་འདིར་གནོན།]}

བསྐྱབ་པ་དང་། དེ་བཞིན་དུ་བསླབ་གཞི་བསྲུང་བ། འཇིགས་པ་ལས་བསྐྱབ་པ། ཚུལ་གནས། མཆོད་པ། མཆོག་ལ་བཀུར་བ། འདོད་པའི་ལྷ་ལ་གུས་པ། །མཆོད་རྟེན་སོགས་འཇིག་པ་གསོ་བ། རྟེན་བཞེངས་པ། དགེ་འདུན་མཆོད་པ། མདོ་བཀླག་པ། གཟུངས་བཟླ་བ། དཀྱིལ་འཁོར་མཆོད་པ་སོགས་ཚོགས་སྤེལ་བའི་ལས་དང་། །ནོར་བུ་སྔགས་དང་སྨན་གྲུབ་དང་། །བཅུད་ལེན་སྟོབས་ཀྱིས་རང་ཉིད་ནི། །འཆི་བདག་ཕ་རོལ་གནོན་མཐོང་སྟེ། །རིག་འཛིན་གྲུབ་པ་ཇི་བཞིན་ནོ། །རིན་ཆེན་བརྟག་པའི་བསྟན་བཅོས་གང་། །རྟོག་ལ་མཁས་པས་རྡོ་རྗེ་འཆང་། །ཚེ་ཡི་ནོར་བུ་འཆང་བའང་རུང་། །དེ་བཞིན་ནོར་བུ་སྣ་ཚོགས་འཆང་། །ཨིནྡྲ་ནཱི་ལ་རིན་ཆེན་སོགས། །ནོར་བུ་ཆེན་པོ་གཞན་དག་ཀྱང་། འཆང་བར་བྱེད་པས་འཆི་བདག་ཀུན། །ཟློག་པར་འགྱུར་བར་ཐེ་ཚོམ་མེད། །ཅེས་སོགས་དང་། དབེན་པའི་གནས་སུ་རས་རིས་སོགས། །མདུན་དུ་མཆོད་པ་བྱས་ནས་ཀྱང་། །སྔགས་རྣམས་བཟླས་པ་ཙམ་གྱིས་ཀྱང་། །འཆི་བ་བསླུ་བ་འབྱུང་བར་འགྱུར། །ཅེས་མཚམས་སྦྱར་ནས། ཨ་རོ་ལི་ཀ་དང་། སྒྲོལ་དཀར། སྤྱན་མ། དེ་བཞིན་གཤེགས་པའི་ཡི་གེ་བརྒྱ་པ། སོར་འབྲང་སོགས་དང་། གྲུབ་པའི་སྨན་ནི་གཞན་དག་ཀྱང་། །ངེས་པར་བསྟེན་པར་གྱུར་པ་ཡིས། །ཚེ་འཕེལ་ནད་དང་རྒས་པ་ཡིས། །ཟད་པའི་

---

^{[མ་དཔེ་གཟིགས་ན་འདིར་གནོན།]}

འཆི་བ་མི་མཐོང་ངོ་། །ཅེས་སོགས་བཅུད་ལེན་གྱི་སྦྱོར་བ་སྟེ། རིན་པོ་ཆེ་དང་། སྔགས་དང་། སྨན་གྱི་བཅུད་ལེན་རྣམས་རིམ་པར་བཤད་ཅིང་། འབྲས་བུ་གསུམ་ནི་སྤྱིར་བསྡུས་པའམ། སོ་སོ་བྷིངྒ་རཱ་ཛར་བཅས། །རྣལ་འབྱོར་པ་ཡིས་རྟག་སྤྱད་ན། །ཕན་ཞིང་བདུད་རྩིར་འགྱུར་བ་ཡིས། གཉེར་མ་སྐྲ་དཀར་རྣམས་དང་བྲལ། །རྡོ་རྗེའི་ལུས་ཀྱི་གཟུགས་བཟང་ལྡན། །བསྐལ་པ་ཡི་ནི་གྲངས་སྙེད་དུ། །འཆི་བ་ངེས་པར་བཟློག་པ་ཡིན། །ཅེས་དང་། ནང་གི་འཆི་བསླུ་ལ། ཐོག་མར་སྲུང་བའི་སླད་བགེགས་དགྲའི་གསང་སྔགས་འབུམ་བཟླ་བ་དང་། དེ་ནས་རིགས་ལྔ། འཇིག་རྟེན་དབང་ཕྱུག །སྒྲོལ་དཀར། །ཡུམ་བཞི། འཆི་མེད་རྡོ་རྗེ་ལྷ་མོ། །སྤྱི་བོར་ཟླ་དཀྱིལ་བསྒོམ་པ། ལྕེ་ཆུང་གི་བདུད་རྩི་མྱང་བ་སོགས་དང་། འཇུག་པའི་རླུང་ནི་བགྲང་བྱ་ཞིང་། །རིམ་གྱིས་འབུམ་སོགས་གྲངས་ཀྱིས་ནི། །རྩེ་གཅིག་སེམས་ཀྱི་ཆོ་ག་བཞིན། །སྒྲ་མེད་པ་ཡི་བཟླས་པར་བཤད། །སྒྲ་མེད་བཟླས་པ་འབུམ་དུ་ནི། །ཆོ་ག་བཞིན་དུ་རྫོགས་གྱུར་ན། །མི་ནི་ཚེ་ཉམས་གྱུར་པ་ཡང་། །ལོ་ལྔའི་བར་དུ་འཚོ་བར་ངེས། །སོགས་དང་། ནང་པར་ལངས་ནས་སྟོང་ཕྲག་གཅིག །རྟག་ཏུ་ལེགས་པར་བསྒྲུངས་ན་ནི། །ནད་རྣམས་ཀུན་ལས་ངེས་གྲོལ་ཞིང་། །ཉི་ཟླ་གནས་ཀྱི་བར་དུ་འཚོ། །ཞེས་དང་། ཡང་བུམ་ཅན་དང་། ནམ་མཁའི་བ་འཇོ་བ་སོགས་

---

^{[མ་དཔེ་གཟིགས་ན་འདིར་གནོན།]}

གསུངས་མཐར། །མཁས་པས་དངོས་པོ་མི་བསམ་ཞིང་། །དངོས་པོ་མེད་པའང་མི་བསམ་མོ། །དངོས་དང་དངོས་མེད་རྣམ་པར་སྤངས། །སྒོམ་པ་དེ་ནི་བསྒོམ་དང་བྲལ། །རྣམ་པ་ཀུན་གྱི་མཆོག་ལྡན་པ། །སྟོང་ཉིད་འཛིན་པ་རྣམ་སྤངས་པའི། །སྟོང་པ་ཉིད་ནི་རྟག་བསྒོམས་ན། །འཆི་བདག་གིས་ནི་མཐོང་མི་འགྱུར། །ཅེས་དང་། འཆི་བ་ཞེས་བྱའི་རྣམ་རྟོག་འདི། །དངོས་པོ་ཀུན་ལ་ཡོད་མིན་ཏེ། །སོ་སོ་སྐྱེ་བོའི་རྣམ་འཕྲུལ་གྱིས། །རྣམ་པར་རྟོག་པས་བཅོས་པ་ཡིན། །རྣམ་རྟོག་སྡུག་བསྔལ་ཐམས་ཅད་དེ། །རྣམ་པར་རྟོག་པ་བདུད་ཅེས་བཤད། །དེ་བས་རྣམ་པར་རྟོག་གཞོམ་ཞིང་། །རྣམ་པར་མི་རྟོག་ཉིད་དུ་བྱ། །ཞེས་སོགས་རྒྱ་ཆེར་གསུངས་སོ།། ༈ །།ཛམ་བྷ་ལར་ཕུལ་བའི་ཆུ་སྦྱིན་དེ་ལོངས་སྤྱོད་འབྱུང་བའི་རྟེན་འབྲེལ་དུ་ཆུར་སོགས་སུ་བླུགས་པ་ཕྱག་ལེན་ནོ། །འཕྲོག་མ་ལ་ཅུང་སེང་སྟེར་བ་ཞེས་པ་ཆང་བུའི་བརྡའ་རྙིང་། ཆུ་སྦྱིན་སྐབས་ཐོག་མར་རང་ཉིད་ཁ་ས་ཎིར་གསལ་བ། ཀཾ་ཀ་ནིའི་སྐབས་མི་འཁྲུགས་པ་དང་། ཛྙཱ་ན་ཨ་བེའི་སྐབས་ཡེ་ཤེས་སྐར་མདའ་སྔོན་པོ། །གཡས་དེ་བཞིན་གཤེགས་པའི་ཁུ་ཚུར་བཅངས་པ་སྙིང་གར་བཞག་པ། གཡོན་མཆོག་སྨིན་གྱི་ཕྱག་རྒྱས་ནོར་གཞོང་འདེགས་པར་གསལ། འབྲོག་གནས་མཆེད་ལྔ་ནི། ནོར་བུ་བཟང་པོ། གང་བ་བཟང་པོ། ཡང་དག་ཤེས། རྒྱལ་བ་ཁྱུ་མཆོག །སྲེད་སྤོང་། །

---

^{[མ་དཔེ་གཟིགས་ན་འདིར་གནོན།]}

དང་ལྔའོ། །གསང་སྔགས་རྗེས་འཛིན་གྱི་འགྲེལ་པར་འཕྲོག་མའི་བུ་དགའ་བྱེད་ལ་སོགས་པ་བརྒྱ། འཕྲོག་མའི་བུ་མཐའ་རྟགས་དང་དབང་ཕྱུག་ལ་སོགས་པ་བརྒྱ། འཕྲོག་མའི་བུ་དབུ་མ་ཁྱབ་འཇུག་ལ་སོགས་པ་བརྒྱ། འཕྲོག་མའི་བུ་གང་བ་དང་འོག་མ་ལ་སོགས་པ་བརྒྱ། འཕྲོག་མའི་བུ་སྐྱེ་དགུའི་བདག་ལ་སོགས་པ་བརྒྱ་སྟེ་ལྔ་བརྒྱའོ། །ལམ་རྒྱུད་ལྔ། ལྷ་གཡེང་བའི་ལམ། མི་གདམས་པའི་ལམ། །དུད་འགྲོ་མུན་པའི་ལམ། ཡི་དྭགས་འགོགས་པའི་ལམ། དམྱལ་བ་གདུང་བའི་ལམ་རྣམས་ཞེས་བཤད་ཀྱང་དཔྱད་པར་བྱའོ།། ༈ །།འབྱུང་བཞིའི་འཆི་བསླུ་ལ། སའི་འཆི་བསླུར་སཙྪ་ལོ་གྲངས་བཏབ་པའི་ནང་དུ་ཚེའི་སྔགས་ཚེ་གེགས་ཞི་བ་དང་། །ཚེ་བསོད་འཕེལ་བའི་སྤེལ་ཚིག་ཅན་བཅུག །ཁྲིའི་ནང་། ཚེ་ལ་བར་དུ་གཅོད་པ་ཐམས་ཅད་མཱ་ར་ཡ་ནན། ཧཱུཾ་བྷ་ཡ་ནན། ཅེས་བྲིས་པ་གཞུག །ཁམས་མཐུན་གྱི་ན་བཟའ་གསོལ། བུམ་ནང་ཚེ་ལྷ་རབ་འབྱམས་དང་། ཁྲིའི་ནང་ལྕགས་ཀྱི་འབྲུབ་ཁུང་རྒྱ་ཆེ་ཞིང་གཏིང་ཟབ་པར་ཚེ་ལ་བར་དུ་གཅོད་པ་ཐམས་ཅད་ཕྱག་རྒྱ་བཞིས་བཅིངས་ཏེ་ཁ་རྡོ་རྗེ་རྒྱ་གྲམ་དང་རི་རབ་ཀྱིས་བཅད་པར་བསམ། རབ་གནས་སྤྱི་ལྟར་བྱ། གྲུབ་ན་རྣམ་རྒྱལ་མཆོད་རྟེན་མཚན་ཉིད་ཚང་བ་བཞེངས་པའི་ནང་དུ་གཞུག །མ་གྲུབ་ན་བྲག་སྐྱིབས་སོགས་གནོད་པ་བྲལ་བའི་དབེན་གནས་སུ་བསྐྱལ། གཞན་ཡང་དྲི་

---

^{[མ་དཔེ་གཟིགས་ན་འདིར་གནོན།]}

མེད་ཀྱི་ཆོ་གས་སཙྪ་གདབ་པ་དང་། ཇོ་བོའི་ལུགས་ཀྱི་སཙྪ་དགུ་མ་དང་། ལྔ་མ་སོགས་གདབ་པ་དང་། རྟེན་གསུམ་གསར་བཞེངས་དང་ཉམས་པ་གསོ་བ། སྲོག་བསླུ། ཉེའུ་འདོན། ལམ་འཕྲང་བཅོས་པ། ཟམ་པ་འཛུགས་པ། མཆོད་རྟེན་ལ་སྐུ་དཀར་གསོལ་བ་སོགས་ཀྱང་འདིའི་ཁོངས་སུ་འདུའོ། །མེའི་འཆི་བསླུ་ནི། ཚེ་གེགས་ཞི་བ་དང་། ཚེ་བསོད་རྒྱས་པ་ལ་དམིགས་ནས་ཞི་རྒྱས་ཀྱི་སྦྱིན་སྲེག་བྱ་བ། ཁྱད་པར་ཚེ་ལྷ་གང་རུང་གི་སྒོ་ནས། དུརྦའི་མྱུ་གུ་རློན་པའི་སྦྱིན་སྲེག་འབུམ་དུ་ཚང་བར་བྱ་བ་དང་། གཞན་ཡང་སྐྲ་སེན་སྲེག་པའི་ཆོ་གས་སྡིག་སྒྲིབ་དང་ཚེ་གེགས་ཞི་ཞིང་། ཚེ་བསོད་རྒྱས་པར་སྤེལ་བ། མར་མེ་འབུལ་བ། དཀར་གསུར་གྱི་མཆོད་སྦྱིན་གཏང་བ། དམར་གསུར་ལ་བརྟེན་ནས་འཆི་བ་བསླུ་བ་སོགས་ཀྱང་ངོ་། །ཆུའི་སྒོ་ནས་འཆི་བ་བསླུ་བ་ནི། ཆུ་གཏོར་གཏང་བ། ཉེའུ་གསོ་བ། ཆུ་སྦྱིན་སྟོང་ཟློག་གི་ཆོ་ག་སོགས་སོ། །རླུང་གི་སྒོ་ནས་འཆི་བ་བསླུ་བ་ནི། མན་ངག་ལྟར་གྱི་རླུང་འཁོར་བསྐོར་བ། ཁམས་མཐུན་གྱི་དར་རས་ལ་ཚེ་ལྷའི་གཟུངས་སྔགས་སྤེལ་ཚིག་དང་བཅས་པ་བྲིས་པའི་རྒྱལ་མཚན་ཟླ་རེ་བཞིན་ཡར་ངོ་ལ་ལྷ་བསང་དང་བཅས་ཏེ་རི་མཐོན་པོའི་རྩེར་འཛུགས་པ་དང་། ནང་གི་རླུང་སྦྱོར་སོགས་མཐའ་ཀླས་སོ། །གཞན་ཡང་ཚེ་མདུད། ཚེ་འཁོར། ཚེའི་ཟ་ཡིག །བཅུད་ལེན་ཕྱི་ནང་གསང་གསུམ།

---

^{[མ་དཔེ་གཟིགས་ན་འདིར་གནོན།]}

འཆི་བསླུ་ཕྱི་ནང་གསང་གསུམ་གྱི་མན་ངག་སོགས་དང་། བླ་ཚེ་འགུགས་པ། འཆི་བདག་གི་ཟློག་མདོས་སོགས་རྟེན་འབྲེལ་མང་དུ་གསུངས་སོ།། ༈ །།སྲུང་མདུད་ནི། དར་རམ་སྲད་བུ་གཡོན་གྱི་སོར་མོ་ལ་ལན་གཉིས་སུ་དཀྲིས་པའི་བར་དུ་སྣེ་གཅིག་བཅུག་ནས་འཐེན་པས་མདུད་པ་རྡོ་རྗེ་རྩེ་གསུམ་པ་ལྟ་བུ་འབྱུང་། དེ་ལྷར་བསྐྱེད་ལ་རང་སྔགས་ཀྱིས་གདབ་ཅིང་། ཞུ་བའི་མདུད་པར་བསམས་ལ་བསྲུང་བྱར་གདགས། ཁུངས་ནི་སློབ་མ་ལྷག་གནས་ཀྱི་སྐབས་དང་གཞན་ཡང་མང་ངོ་།། ༈ །།རབ་གནས་ཤིན་ཏུ་བསྡུས་པར། རང་ལྷར་གསལ། བགེགས་སྦྱང་བ་སྔོན་དུ་འགྲོ་བས་གནས་བྱ་རང་རང་གི་དམ་ཚིག་པའམ། རྡོར་སེམས་སུ་བསྐྱེད། ཡེ་ཤེས་སྤྱན་དྲང་རྒྱས་གདབ་དབང་བསྐུར་མཆོད་བསྟོད་སྤྱན་དབྱེ་བྱ། ལྷ་དེའི་སྔགས་དང་། སུ་པྲ་ཏིཥྛས་མེ་ཏོག་འཐོར་བརྟན་བཞུགས་དང་ཤིས་པ་བརྗོད་དོ།། ༈ །།སྔོན་གྱི་བསྐལ་པའི་དང་པོ་ལ། ཞེས་པ་འདིར་རཏྣ་གླིང་པས། ནང་དོན་ཁྱད་པར་ཅན་ཞིག་ལ་དགོངས་ཙམ་ལས་གསལ་བར་མ་གསུངས་མོད། གཏེར་གཞུང་འགའ་ལས། མ་འཁྲུལ་སྔོན་གྱི་བསྐལ་པ་དང་པོ་ལ༔ ཀུན་གཞི་མ་བཅོས་སྙིང་པོ་ཡེ་སངས་རྒྱས༔ ཞེས་སོགས་སྣང་བས། རྫོགས་ཆེན་གྱི་གཞུང་རྣམས་སུ་གཞིའི་སྐབས་དུས་བཞིར་ཕྱེ་ནས། རིག་པ་ཀ་དག་གི་ཡེ་གཞི་གཟོད་ནས་འཁྲུལ་མ་མྱོང་བ་ལ་རྫོགས་ལྡན་ནམ། སྔ་

---

^{[མ་དཔེ་གཟིགས་ན་འདིར་གནོན།]}

ན་གྱི་བསྐལ་པའི་སྒྲས་སྨོས་པ་དང་། དེ་དང་མཚུངས་པར་དཔལ་སམྦུ་ཊི་ལས། །བསྐལ་པ་ཀུན་གྱི་སྔོན་རོལ་ནས། །སློབ་དཔོན་ཆེན་པོ་གདོད་ནས་གྲུབ། །ཆོ་ག་འདི་ཡིས་སེམས་ཅན་ཀུན། །རྒྱལ་བར་འགྱུར་བ་ཐེ་ཚོམ་མེད། །ཅེས་གསུངས་པ་ལྟར། འདིར་ཡང་། ནང་གསལ་ཆོས་སྐུའི་ཡེ་ཤེས་འཁྲུལ་པའི་མཚན་མ་ཆ་དང་བཅས་པ་ཤིན་ཏུ་ཞི་བའི་སྔོན་གྱི་བསྐལ་པ་དང་པོའི་ངང་ལས། ཕྱིར་གསལ་ལྷུན་གྲུབ་སྒོ་བརྒྱད་ཀྱི་ཐུགས་རྗེའི་འཆར་ཚུལ་མ་འགགས་པར་ཤར་བ་ལས། ཞིང་དང་། སྟོན་པ་དང་གདུལ་བྱ་སོགས་མིག་འཕྲུལ་ལྟ་བུའི་སྤྲིན་བཀོད་པའི་ཚེ་ན། རེ་ཞིག་ཚེ་ལོ་བརྒྱ་པའི་དུས་འདིར་ཛམ་བུའི་གླིང་པ་རྣམས་ཀྱི་ཚུ་རོལ་གྱི་སྣང་པའི་ངོར་འདུལ་བྱེད་མཆོག་གི་སྤྲུལ་པའི་སྐུར་བཞེངས་པའི་ཚུལ་ནི། ཨོ་རྒྱན་ཡུལ་གྱི་ནུབ་བྱང་མཚམས༔ ཞེས་སོགས་རིམ་པར་འཆད་དོ།། ༈ །།ཆོས་ཉིད་ཟད་ས་ཞེས་པ་ལྟོས་གཞིའི་ཆོས་ཅན་ཟད་པས། དེ་ལ་ལྟོས་པའི་ཆོས་ཉིད་དུ་འཛིན་པའང་ཟད་པའི་དོན་ནོ།། ༈ །།ཆོས་ཟད་འཇའ་ལུས་སྐབས་སྐྲ་སེན་ཙམ་ལྷག་མར་བཞག་ཅེས་གསུངས་པར། ལ་ལས་སྐྲ་སེན་ལུས་ཀྱི་ཆ་ཤས་མ་ཡིན་པས་སོ་ཟེར། ཁ་ཅིག་གཞན་དོན་ལ་དགོངས་ཞེས་གསུང་ནའང་། དོན་དུ་སྐྲ་སེན་ངེས་པར་འཇོག་དགོས་པའི་ཁྱབ་པ་ཁས་མ་བླངས་པའི་ཕྱིར་དེ་ཙམ་གྱི་དོགས་པ་མི་དགོས་འདྲ་གསུངས།། ༈ །།ན་མོ་གུ་རུ་