ཤོག་ལྷེབ་ ༣༠༡ ནས་ ༤༠༠ བར།

---

^{[མ་དཔེ་གཟིགས་ན་འདིར་གནོན།]}

དབུལ་གྱུར་རྒྱལ་གྱུར་ཅིག །ཅེས་དང་། །སྐྱེ་བ་སྔ་མར་བྱས་པའི་ལས་ཀྱི་རྒྱུ་ལས་ནི། །སེམས་དེ་འདི་རུ་སྐྱེ་བ་ཡོངས་སུ་ལེན་ཅིང་འགྲོ། །དེ་ཡི་རྒྱུ་ཡིས་མ་ལུས་འདི་དག་ཐམས་ཅད་ནི། །བག་ཆགས་བཅས་པའི་སེམས་ཀྱིས་ཉེ་བར་བརྩམ་པར་འགྱུར། །ཞེས་གསུངས་ཤིང་། འདི་ཉིད་ཞི་བཟང་དང་། འགོས་ཀྱིས་བསྒྱུར་པའོ།། ༈ །།ཌོམྦྷི་ཧེ་རུ་ཀས་མཛད་པའི་ལྷན་ཅིག་སྐྱེས་གྲུབ་ལས། །ལེའུ་དང་པོར་ལྷན་ཅིག་སྐྱེས་པ་བསྟན་པ་ལས། །དགའ་བ་ཅུང་ཞིག་བདེ་བ་སྟེ། །རབ་དགའ་དེ་ལས་ལྷག་པ་ཡིན། །དགའ་བྲལ་དགའ་བ་ཆགས་བྲལ་ཏེ། །ལྷན་ཅིག་སྐྱེས་དགའ་ལྷག་མ་ཉིད། །དང་པོ་རིག་པར་འདོད་པ་སྟེ། །གཉིས་པ་བདེ་བར་འདོད་པ་ཡིན། །གསུམ་པ་ཆག་པ་མཉམ་ཉིད་ཕྱིར། །བཞི་པ་དེར་ནི་བསྒོམ་བྱ་ཡིན། །དང་པོ་ཤེས་རབ་དྲོ་བ་སྟེ། །གཉིས་པ་དུ་བར་ལྡན་པ་ཡིན། །གསུམ་པ་མེ་སྟག་འཕྲོ་བ་སྟེ། །བཞི་པ་དེ་བཞིན་འབར་བ་ཡིན། །ཞེས་དང་། ལེའུ་གཉིས་པ་དེ་ཁོ་ན་ཉིད་བསྟན་པར། །གང་ཞིག་སྲིད་གསུམ་འགྱུར་བ་ཡི། །འགྲོ་ཀུན་ལྷན་ཅིག་སྐྱེས་པར་ལྡན། །འགྲོ་བའི་རང་བཞིན་གཞན་མི་སྣང་། །ཐམས་ཅད་དེ་ཉིད་ཀྱིས་ཁྱབ་ཡིན། །ཞེས་སོ། །ལེའུ་གསུམ་པ་སྤྱོད་པའི་དེ་ཁོ་ན་ཉིད་བསྟན་པར། །སོ་སོ་རང་རིག་བདེ་ཆེན་པོ། །གང་གིས་སོ་སོ་རང་རིག་བསྒོམ། །རང་གི་དངོས་གྲུབ་འབྱུང་བར་འགྱུར། །

---

^{[མ་དཔེ་གཟིགས་ན་འདིར་གནོན།]}

ཞེས་སོ།། ༈ །།ཨོ་རྒྱན་གྱི་ས་སྤྱོད་དབང་པོའི་བློས་མཛད་པའི་ལྷན་ཅིག་སྐྱེས་གྲུབ་ལས། །རྟོག་དང་བྲལ་ཞིང་མངོན་སུམ་པ། །རྒྱལ་བས་ཡིད་ནི་ནང་གནས་གསུངས། །རྟག་དང་ཆད་པ་བྲལ་བ་ཉིད། །མཚོན་དང་མཚན་གཞི་སྤངས་པ་ཉིད། །ཅེས་དང་། དེ་ཉིད་སྲོག་ཆགས་རྣམས་ཀྱི་སྲོག །དེ་ཉིད་མཆོག་ཏུ་མི་འགྱུར་བ། །དེ་ཉིད་ཀུན་ལ་ཁྱབ་པ་ཡི། །ལུས་ཀུན་ལ་ནི་རྣམ་པར་གནས། །ཞེས་དང་། བདག་ཏུ་འཛིན་པའི་མཐར་གནས་པ། །གླེན་པ་རྨོངས་པས་མི་ཤེས་སོ། །མཆོག་གི་གོ་འཕང་མི་ཤེས་ཕྱིར། །རྨོངས་པ་ཐམས་ཅད་ཉོན་མོངས་འགྱུར། །བསྐལ་པ་གསུམ་དུ་གདུང་བྱས་ལ། །བདག་ཉིད་གཅིག་པུ་འདུལ་བའོ། །རྣམ་པ་ཀུན་ཏུ་འདི་དག་མིན། །ཉན་ཐོས་པ་ཡི་བྱང་ཆུབ་འདོད། །དབུ་མའི་འདོད་ལུགས་གཞུང་གི་ཚུལ། །དེ་ནི་རྩོད་པ་ཀུན་ལ་མོས། །བསྐལ་པའི་ཡལ་གར་ངལ་བྱས་ཀྱང་། །དེ་ཡིས་ཀུན་ནས་མི་ཤེས་སོ། །ཐེག་ཆེན་ཤིན་ཏུ་ཡངས་པ་ལ། །རྒྱལ་བ་མཆོག་གིས་སྔོན་གསུངས་པ། །འདི་ལྟར་གཅིག་པུ་ཉིད་ཀྱིས་ནི། །ཡང་དག་རྫོགས་པའི་བྱང་ཆུབ་མཆོག །ཅེས་དང་། །ཁ་ཅིག་དངོས་གྲུབ་དབང་གཉིས་སྐྱེས། །བྱིས་པ་ཡུན་རིང་རྒན་སོགས་ཀྱིས། །འབད་པ་ཡིས་ནི་ཐོབ་མི་འགྱུར། །ཞེས་སོགས་ལྷན་སྐྱེས་འདོད་པ་གཞན་ཐམས་ཅད་བཀག་ཅིང་། བྱིས་པའི་བརྗོད་པ་དག་དང་བྲལ། །བརྗོད་བྱ་རྗོད་བྱེད་

---

^{[མ་དཔེ་གཟིགས་ན་འདིར་གནོན།]}

སྤངས་པ་ཉིད། །ལྷན་ཅིག་སྐྱེས་པ་དེ་ལྟ་བུར། །བླ་མ་མཆོག་གིས་སྔོན་དུ་གསུངས། །ཞེས་དང་། །ཟ་བའམ་ནི་འཁྲིག་པ་ན། །གནས་སྐབས་ཀུན་ལ་ཐམས་ཅད་དུ། །གསང་བ་མེད་ཅིང་འཇིག་པ་སྤངས། །ཡེ་ཤེས་ཆེན་པོ་རང་གིས་རིག །ཅེས་གསུངས་སོ། །གཞུང་འདི་ཟླ་བའི་མགོན་པོ་དང་། །པྲཛྙཱ་ཀཱིརྟིས་བསྒྱུར་བ་སྟེ། །ཉེར་མཁོའི་དུམ་བུ་ཅུང་ཟད་ཙམ་མོ། །འདི་ལ་གཞུང་མཛད་པ་པོ་རྒྱལ་པོ་ཨིནྡྲ་བྷུ་ཏི་རང་གི་བླ་མར་གྱུར་པའི་ལྷ་ལྕམ་ལཀྵིའམ་དཔལ་མོས་མཛད་པའི་འགྲེལ་པ་ཉུང་ངུ་རྣམ་གསལ་ཞིག་བཞུགས་འདུག་གོ། ༈ །།སློབ་དཔོན་ཆེན་པོ་ཀེར་ལི་པས་མཛད་པའི་དེ་ཁོ་ན་ཉིད་གྲུབ་པར། དཔེར་ན་དུག་གི་དེ་ཉིད་ཤེས། །དུག་ཟོས་ཀྱང་ནི་གནོད་མི་འགྱུར། །དེ་བཞིན་ཡུལ་གྱི་དེ་ཉིད་ཤེས། །འདོད་པ་སྤྱོད་པས་གནོད་པ་མེད། །ཅེས་དང་། ཇི་ལྟར་འདམ་གྱི་པདྨ་ནི། །འདམ་ལ་གནས་ཀྱང་དེས་མི་གོས། །དེ་ཉིད་རིག་པས་རྟག་ཏུ་ནི། །འདོད་པ་རོལ་པས་སྤྱད་པར་བྱ། །ཞེས་དང་། །དེ་ཕྱིར་དངོས་གྲུབ་མཆོག་གཉེར་ན། །དཀའ་ཐུབ་བརྟུལ་ཞུགས་སྤྱད་མི་བྱ། །ཇི་ལྟར་བདེ་བ་དེ་བཞིན་མནོས། །བདེ་བ་སྤངས་ན་དངོས་གྲུབ་མེད། །ཅེས་དང་། །མི་གཡོ་སྒྲིབ་བྲལ་ཕྲ་བ་ཡི། །ཐིག་ལེའི་གཟུགས་ཅན་རྟོག་པ་མེད། །ཐོག་མཐའ་མེད་པའི་དེ་ཉིད་ནི། །མ་བྱུང་མ་བྱས་མཆོག་ཡིན་ནོ། །ཞེས་དང་། །རྒྱུ་ལ་འབྲས་བུས་

---

^{[མ་དཔེ་གཟིགས་ན་འདིར་གནོན།]}

རྒྱས་གདབ་ཅིང་། །འབྲས་བུ་ལ་ཡང་རྒྱུས་རྒྱས་གདབ། །རྒྱུ་འབྲས་གཅིག་ཏུ་རྒྱས་གདབ་པས། །ཕྱག་རྒྱ་ཆེན་པོ་སྐྱེ་བར་འགྱུར། །ཞེས་སོགས་གསུངས་སོ། །དེ་ལྟར་རྒྱུད་སྡེ་སྤྱིའི་དགོངས་འགྲེལ་དུ་གྱུར་ཅིང་།། ལྷན་ཅིག་སྐྱེས་པ་གཙོ་བོར་སྟོན་པའི་བསྟན་བཅོས། འཕགས་ཡུལ་གྱི་རྣལ་འབྱོར་མཆོག་རྣམས་ཀྱི་དགོངས་བཅུད་སྙིང་པོར་དྲིལ་བ། གྲུབ་པ་སྡེ་བརྒྱད་ལས། རང་དང་གཞན་དག་གི་ཆེད་དུ་ལུང་གི་དུམ་བུ་ཅུང་ཟད་ཙམ་བཏུས་པ་སྟེ་དཔལ་ཨེ་ཝཾ་ཆོས་ལྡན་གྱི་རི་ཁྲོད་དུའོ། །ཇི་ལྟར་སྦྲང་རྩིའི་དོག་པས་བརླན་གྱུར་པདྨའི་ནགས། །མཐོང་བས་དགའ་བའི་རཡིག་གཉིས་པ་ཇི་བཞིན་དུ། །ངེས་དོན་གཞུང་བཟང་དྲི་མེད་སྙིང་ལ་བཟུང་བའི་ཚེ། །ཚུལ་འདི་མཐོང་ནས་རང་གཞན་དོན་དུ་ཉེ་བར་བསྡུས། ཤུ་བྷ་སིདྡྷ།། ༈ །།སློབ་དཔོན་ཀླུ་སྒྲུབ་ཀྱིས་མཛད་པའི་ཕྱག་རྒྱ་བཞི་གཏན་ལ་དབབ་པ་ལས། དེ་ལ་ལས་ཀྱི་ཕྱག་རྒྱ་བརྟག་པར་བྱ་སྟེ། ལས་ཀྱི་ལུས་དང་། ངག་དང་། ཡིད་ཀྱི་བསམ་པ་སྟེ་གཙོ་བའོ། །ཕྱག་རྒྱ་ནི་བརྟག་པའི་རང་བཞིན་ཡིན་ནོ། །ལས་ཀྱི་ཕྱག་རྒྱ་དེ་ལ་ཡང་སྐད་ཅིག་མའི་དབྱེ་བས་དགའ་བ་བཞི་དག་སྐྱེ་བར་འགྱུར་རོ། །སྐད་ཅིག་ཤེས་པའི་དེས་ཡེ་ཤེས། །ཨེ་ཝཾ་ལ་ནི་རབ་ཏུ་གནས། །ཞེས་དང་། ཡང་ཆོས་ཀྱི་ཕྱག་རྒྱ་མ་ཤེས་པར་ལས་ཀྱི་ཕྱག་རྒྱ་བཅོས་མ་འབའ་ཞིག་ལས་ལྷན་ཅིག་སྐྱེས་པའི་རང་བཞིན་

---

^{[མ་དཔེ་གཟིགས་ན་འདིར་གནོན།]}

བཅོས་མ་མ་ཡིན་པ་ཇི་ལྟར་འགྱུར་ཞིང་སྐྱེ་བར་འགྱུར། རིགས་མཐུན་པའི་རྒྱུ་ལས་རིགས་མཐུན་པའི་འབྲས་བུ་སྐྱེ་བར་འགྱུར་གྱི་རིགས་མི་མཐུན་པ་ལས་ནི་མ་ཡིན་ནོ། །ཇི་ལྟར་འབྲས་སཱ་ལུའི་ས་བོན་ལས་སཱ་ལུའི་མྱུ་གུ་སྐྱེ་བར་འགྱུར་གྱི། དྲུག་ཅུ་པ་ལས་ནི་མ་ཡིན་ནོ། །དེ་བཞིན་དུ་མ་བཅོས་པའི་ཆོས་ཀྱི་ཕྱག་རྒྱའི་རང་བཞིན་ལས་མ་བཅོས་པའི་ལྷན་ཅིག་སྐྱེས་པ་འབྱུང་ངོ་། །ཞེས་དང་། སངས་རྒྱས་རིན་ཆེན་ཟ་མ་ཏོག །ཅེས་པའི་དོན་དུ། ཟ་མ་ཏོག་ནི་གནས་སམ་གཞིའོ། །ཞེས་བཀྲལ། ཡང་། ཨོ་ཆོས་ཀྱི་ཕྱག་རྒྱ་ནི། ཆོས་ཀྱི་དབྱིངས་ཀྱི་རང་བཞིན་ཏེ། སྤྲོས་པ་དང་བྲལ་བ། མི་རྟོག་པ། མ་བཅོས་པ། སྐྱེ་བ་དང་བྲལ་བ། སྙིང་རྗེའི་རང་བཞིན་མཆོག་ཏུ་དགའ་བས་གཅིག་ཏུ་མཛེས་པའི་ཐབས་སུ་འགྱུར་བ། རྒྱུན་གྱིས་རྟག་པ་ལྷན་ཅིག་སྐྱེས་པའི་རང་བཞིན་གྱི་ཤེས་རབ་དང་ལྷན་ཅིག་སྐྱེས་པ་ལས་འབྱུང་བ། དབྱེར་མེད་པ་གང་ཡིན་པ་དེ་ནི་ཆོས་ཀྱི་ཕྱག་རྒྱར་རིག་པར་བྱའོ། །ཞེས་དང་། ཆོས་ཀྱི་ཕྱག་རྒྱ་ནི་ཕྱག་རྒྱ་ཆེན་པོ་དབྱེར་མེད་པའི་རྒྱུར་གྱུར་པའོ། །ཞེས་དང་། ཨ ཕྱག་རྒྱ་ཆེན་པོ་ཞེས་བྱ་བ་ནི། ཕྱག་རྒྱ་ཡང་ཡིན་ལ་ཆེན་པོའང་ཡིན་པས་ཕྱག་རྒྱ་ཆེན་པོ་སྟེ། །རང་བཞིན་མེད་པ་ཉིད་ཤེས་བྱ་ལ་སོགས་པའི་སྒྲིབ་པ་སྤངས་པ། །སྟོན་ཀའི་ཉི་མ་ཕྱེད་ཀྱི་ནམ་མཁའ་ལྟར་དྲི་མ་མེད་པ། །ཕུན་སུམ་ཚོགས་པ་ཐམས་ཅད་

---

^{[མ་དཔེ་གཟིགས་ན་འདིར་གནོན།]}

ཀྱི་གཞིར་གྱུར་པ། །འཁོར་བ་དང་མྱ་ངན་གྱི་མཐའ་ལས་འདས་པས་གཅིག་པའི་རང་བཞིན། །དམིགས་པ་མེད་པའི་སྙིང་རྗེའི་ལུས་བདེ་བ་ཆེན་པོའི་རང་བཞིན་ནོ། །དེ་བཞིན་དུ་ཡིད་ལ་བྱེད་པ་མེད་པའི་ཆོས་དགེ་བའོ། །ཡིད་ལ་བྱེད་པའི་ཆོས་མི་དགེ་བའོ་ཞེས་གསུངས་པ་དང་། །ཀུན་ཏུ་རྟོག་པས་མ་བརྟགས་པ། །རབ་ཏུ་མི་གནས་པ་ཡི་ཡིད། །དྲན་པ་མེད་ཅིང་ཡིད་བྱེད་མེད། །དམིགས་པ་མེད་ལ་ཕྱག་འཚལ་འདུད། །ཅེས་བྱ་བ་གང་ཡིན་པ་ཕྱག་རྒྱ་ཆེན་པོར་རིག་པར་བྱའོ། །དེའི་ཕྱིར་ཕྱག་རྒྱ་ཆེན་པོ་བསམ་གྱིས་མི་ཁྱབ་པའི་རང་བཞིན་ལས། དམ་ཚིག་ཕྱག་རྒྱ་མཆོག་གི་འབྲས་བུ་སྐྱེ་བར་འགྱུར་རོ། །ཞེས་དང་། ཧཱུྃ། དམ་ཚིག་གི་ཕྱག་རྒྱ་ཞེས་བྱ་བ་ནི། ལོངས་སྤྱོད་རྫོགས་པ་དང་སྤྲུལ་པའི་སྐུའི་རྣམ་པའི་རང་བཞིན་དང་པོའི་ངོ་བོ་ཉིད་སེམས་ཅན་གྱི་དོན་གྱི་ཕྱིར་རྡོ་རྗེ་འཛིན་པ་ཧེ་རུ་ཀའི་རྣམ་པར་སྤྲོས་པ། དེ་ནི་དམ་ཚིག་གི་ཕྱག་རྒྱར་འདོད་དོ། །ཞེས་སོགས་གསུངས་སོ། །གཞུང་འདི་བླ་མ་དྷི་རི་ཤྲཱི་ཛྙཱ་ན་དང་། ལོ་ཙཱ་བ་རྨ་བན་ཆོས་འབར་གྱིས་བསྒྱུར་བ་ལས་སོ། །འདི་ལ་ཊཱི་ཀ་ཕྱག་རྒྱ་བཞིའི་འགྲེལ་པ་རིན་པོ་ཆེའི་སྙིང་པོ་ཞེས་བྱ་བ་རྒྱ་གར་གྱི་མཁན་པོ་བྷི་ཏ་ཀརྨས་མཛད་པ་ཤིན་ཏུ་ལེགས་པ་གཅིག་བཞུགས་སོ།། ༈ །།སློབ་དཔོན་དེ་བ་ཙནྡྲས་མཛད་པའི་ཤེས་རབ་ཡེ་ཤེས་གསལ་བ་ལས། དེ་བས་ན་འདོད་ཆགས་ཅན་གྱི་སེམས་ཅན་

---

^{[མ་དཔེ་གཟིགས་ན་འདིར་གནོན།]}

རྣམས་འདོད་ཆགས་བྲལ་བ་ལ་འཛུད། འདོད་ཆགས་བྲལ་བ་རྣམས་འདོད་ཆགས་བར་མ་ལའོ། །འདོད་ཆགས་བར་མ་རྣམས་འདོད་ཆགས་ཆེན་པོ་ལ་དགོད་དོ། །དེ་བས་ན་སེམས་ཅན་མཆོག་ཏུ་གྱུར་པའི་དབང་དུ་མཛད་ནས། བླ་ན་མེད་པ་ཤིན་ཏུ་ཟབ་མོའི་ཤེས་རབ་ཡེ་ཤེས་འདི་བསྟན་ནོ། །ཞེས་དང་། ཡེ་ཤེས་གྲུབ་པ་ལས་ཀྱང་། དཔེར་ན་བཅུད་ཀྱིས་ཕུག་པའི་ཟངས་མཛེས་པའི་གསེར་དུ་འགྱུར་བ་བཞིན། ཡེ་ཤེས་བཅུད་ཀྱིས་ཕུག་པ་ན། །ཉོན་མོངས་དགེ་བར་བྱེད་པ་ཡིན། །ཞེས་དང་། མ་སྐྱེས་པ་དང་། མི་འཛིན་པ་དང་། རང་བཞིན་མེད་པ་ཤེས་པ་ཤེས་རབ་ཅེས་བརྗོད་དོ། །ཞེས་དང་། དེ་ཁོ་ན་ཉིད་འཇུག་པ་ལས། གང་ཞིག་སྤྲོས་བཅས་ཀུན་གྱི་ཡུལ་མིན་པས། །དེ་ནི་ངག་གི་ཡུལ་ཡང་མ་ཡིན་ནོ། །རྡོ་རྗེ་འཛིན་པས་རིག་པ་དེ་ཉིད་ལ། །ཤེས་རབ་ཅེས་བྱར་ཡོངས་སུ་བསྒྲགས་པ་ཡིན། །ཞེས་གསུངས་སོ། །དེ་ཉིད་ཀྱི་ཕྱིར། རྟེན་ཅིང་འབྲེལ་བར་འབྱུང་བའི་སེམས་སྣ་ཚོགས་པ་བདེ་བ་ཆེན་པོ་རང་རིག་པ་ཙམ་སྟེ། དམིགས་པ་མེད་པའི་སྙིང་རྗེ་ཆེན་པོ་ཞེས་བྱ་བ། མིང་གཞན་པ་ཅན་གྱི་ཡེ་ཤེས་ཡིན་ནོ། །ཤེས་རབ་ཀྱང་དེ་ཡིན་ལ་ཡེ་ཤེས་ཀྱང་དེ་ཡིན་པས་ཚིག་བསྡུས་པའོ། །ཞེས་དང་། དེ་ཡང་ཁོ་བོའི་བླ་མའི་ཞལ་སྔ་ནས། །ཕྱག་རྒྱ་ཆེན་པོ་མི་ཤེས་པར། །ལས་ཀྱི་ཕྱག་རྒྱ་གཅིག་བསྒྲུབས་པ། དེ་

---

^{[མ་དཔེ་གཟིགས་ན་འདིར་གནོན།]}

ཉིད་བརྒྱུད་པ་ལས་ཉམས་ནས། །རྣལ་འབྱོར་པ་དེ་ངུ་འབོད་འགྲོ། །ཞེས་གསུངས་སོ། ཞེས་དང་། །བླ་མ་དམ་པའི་མན་ངག་འདི་ཡང་། །ལས་ཀྱི་ཕྱག་རྒྱ་ལེགས་བསྒྲུབས་ནས། །ཆོས་ཀྱི་ཕྱག་རྒྱ་རྣམ་པར་བསྒོམས། །དེ་སྟེང་ཕྱག་རྒྱ་ཆེན་པོ་སྟེ། །གང་ལས་དམ་ཚིག་འབྱུང་བའོ། །ཞེས་གསུངས་སོ། །ཞེས་དང་། ལས་ཀྱི་ཕྱག་རྒྱ་རྣམ་སྣ་ཚོགས། །རྣམ་སྨིན་ལས་བྱུང་ཆོས་ཕྱག་རྒྱ། །མཚན་ཉིད་བྲལ་བ་ཕྱག་རྒྱ་ཆེ། །རྣམ་ཉིད་དམ་ཚིག་ཕྱག་རྒྱ་ཡིན། །ཞེས་དང་། དེ་ལྟ་བས་ན་མཆོག་དགའ་དང་དགའ་བྲལ་གྱི་དབུས་ན་གནས་པ། བཙན་ཐབས་དང་ལོག་པའི་དབང་སྤངས་པ། འདོད་ཆགས་དང་འདོད་ཆགས་བྲལ་བས་དབེན་པའི་སྟོང་ཉིད་དང་། སྙིང་རྗེ་དབྱེར་མེད་པའི་ལྷན་ཅིག་སྐྱེས་བ་དེ་བླ་མ་དམ་པའི་ཞལ་ནས་ཉམས་སུ་མྱོང་བ་ལས་ཁོང་དུ་ཆུད་པར་བྱའོ། །ཞེས་དང་། དེ་ནས་ཡང་ཕ་རོལ་ཏུ་ཕྱིན་པའི་ཐེག་པ་རྣམས་ཀྱི་གྲུབ་མཐའ་ནི་འདི་ཡིན་ཏེ། གང་དག་བསྐལ་པ་གྲངས་མེད་པར་རྫོགས་པའི་སངས་རྒྱས་སུ་འགྱུར་རོ། །སྔགས་ཀྱི་ཚུལ་ནི་ཚེ་འདི་ལ་སངས་རྒྱས་སམ་རྡོ་རྗེ་སེམས་དཔར་འགྱུར་རོ། །ཞེས་རྟོག་པ་རྣམས་ཡན་ལག་བདུན་དང་ལྡན་པའི་བསྒྲུབ་བྱར་འདོད་དེ། ཞེས་དང་། ཡན་ལག་བདུན་དང་ལྡན་པ་སྟོང་ཉིད་དང་སྙིང་རྗེ་དབྱེར་མེད་པའི་ཡེ་ཤེས་ལ་འཐད་པར་འགྱུར་ཏེ། འདི་ལྟར་ལོངས་སྤྱོད་རྫོགས་པ་སྟེ་ཉམས་

---

^{[མ་དཔེ་གཟིགས་ན་འདིར་གནོན།]}

སུ་མྱོང་བ་རྟེན་ཅིང་འབྲེལ་བར་འབྱུང་བ་ལས་རྣམ་པ་ཐམས་ཅད་དུ་སྣང་བ་ཡིན་ནོ། །ཁ་སྦྱོར་ནི་སྟོང་པ་ཉིད་དང་སྙིང་རྗེ་དབྱེར་མེད་པར་ཡང་དག་པར་སྦྱོར་བའི་ཕྱིར་རོ། །བདེ་བ་ཆེན་པོ་ནི་ཡོད་པ་དང་མེད་པ་ལ་སོགས་པའི་རྟོག་པ་ཐམས་ཅད་སྤངས་པའི་ཕྱིར་རོ། །རང་བཞིན་མེད་པ་ནི་སྐྱེ་བ་མེད་པའོ། །སྙིང་རྗེས་ངེས་པར་གང་བ་ནི་སྙིང་རྗེ་ཆེན་པོའི་བདག་ཉིད་ཡིན་པའི་ཕྱིར་རོ། །རྒྱུན་མི་འཆད་པ་ནི་རྒྱུན་གྱིས་རྟག་པ་ཡིན་པའི་ཕྱིར་རོ། །འགག་པ་མེད་པ་ནི་ཆད་པ་མེད་པ་ཡིན་པའི་ཕྱིར་རོ། །ལས་ཀྱི་ཡན་ལག་མའི་ཡེ་ཤེས་ལ་ནི་ཁྱད་པར་ཅན་དུ་གྱུར་པ་དེ་དག་ཡོད་པ་མ་ཡིན་ནོ། །ཞེས་སོགས་ཕར་ཕྱིན་སྔགས་ཀྱི་བསྒྲུབ་བྱ་མཚུངས་པའི་ཕྱོགས་སྔ་བཀོད་ནས། སླར་དེ་ཉིད་འགེགས་པའི་ལུང་རིག་རྒྱས་པ་དང་། ཡང་། དོན་གཅིག་ན་ཡང་མ་རྨོངས་དང་། སོགས་ལའང་དེ་མཚུངས་ཀྱི་ཕྱོགས་སྔ་དགོད་པ་དང་། དེ་འགོག་པ་བཅས་གསལ་བར་ཡོད་དོ། །ཡང་། ལས་ཀྱི་ཕྱག་རྒྱ་དང་བྲལ་ན། །ཕྱག་རྒྱ་ཆེན་པོ་ཡོད་མ་ཡིན། ཞེས་དང་། ཡང་། དབང་པོ་གཉིས་སྙོམས་པར་འཇུག་པ་མེད་པར་བདེ་བའི་རྣམ་པ་ཅན་ཉིད་མི་རྟོགས་པའི་ཕྱིར་རོ། །དེ་མེད་པར་ནི་བདེ་བ་ཆེན་པོའི་ངོ་བོ་ཉིད་ཅན་གྱི་ལོངས་སྤྱོད་པའི་སྐུ་འགྲུབ་པར་མི་འགྱུར་བ་ཉིད་དེ། ཞེས་དང་། དེ་ལྟར་བསྐྱེད་པའི་རིམ་པ་དང་མི་འགལ་བར་རང་བྱིན་བརླབས་པ་

---

^{[མ་དཔེ་གཟིགས་ན་འདིར་གནོན།]}

བསྒོམས་ནས། སྣ་ཚོགས་ཉིད་ལྷའི་བདག་ཉིད་ཀྱི་དཀྱིལ་འཁོར་འཁོར་ལོའི་ལྷན་ཅིག་སྐྱེས་པ་གྲུབ་པ་ཡིན་ཏེ། དེ་སྐད་དུའང་ཀླུ་སྒྲུབ་ཀྱིས། འདི་ནི་གཞལ་ཡས་ཁང་མིན་ཁམས་གསུམ་པོ་མིན་ཡུལ་མིན་དབང་པོ་འབྱུང་བ་མིན། །གཟུགས་ལ་སོགས་པ་མ་ཡིན་སྲོག་ཆགས་མིན་ཞིང་མི་མིན་འདི་ནི་རྒྱལ་བ་སྟེ། །འཁོར་ལོ་གཙོ་བོ་ཆོས་ཉིད་བདག་ཉིད་ཡིན་ཏེ་དེས་ནི་དཀྱིལ་འཁོར་མ་ཡིན་ལ། །ཁམས་གསུམ་པོ་འདི་སྣ་ཚོགས་འཁོར་ལོར་ཤེས་ན་སེམས་ནི་ཅི་སྟེ་འཁྲུལ་བར་བྱེད། །ཅེས་གསུངས་པ་ལ་དགྱེས་པ་རྡོ་རྗེ་ལས་ཀྱང་། སྔགས་བཟླས་མེད་ཅིང་དཀའ་ཐུབ་སྦྱིན་སྲེག་མེད། །དཀྱིལ་འཁོར་པ་མེད་དཀྱིལ་འཁོར་ཉིད་ཀྱང་མེད། དེ་ནི་སྔགས་བཟླས་དཀའ་ཐུབ་སྦྱིན་སྲེག་དེ། །དེ་ཉིད་དཀྱིལ་འཁོར་པ་དང་དཀྱིལ་འཁོར་ཉིད། །མདོར་བསྡུས་སེམས་སུ་འདུས་པའི་ཚུལ་ཅན་ནོ། །ཞེས་དང་། དེ་ཁོ་ན་ཉིད་དེ་ཡང་རྒྱལ་བའི་དབང་པོས་ཕ་རོལ་ཏུ་ཕྱིན་པའི་ཐེག་པར་ལུང་དང་། རིགས་པ་དག་གིས་གསུངས་པའི་ཕྱིར་རོ། །འོ་ན་རང་རིག་པའི་སྒྲུབ་ཐབས་ཀྱི་དེ་ཁོ་ན་ཉིད་ནི། སྔགས་ཀྱི་ཚུལ་ལས་མངོན་དུ་བྱེད་པ་མ་ཡིན་ནམ། དེའི་ཕྱིར་དོན་གཅིག་ཡིན་ན་ཡང་བཅོམ་ལྡན་འདས་ཀྱིས་རྒྱུ་ཡི་བསྟན་བཅོས་ཞེས་ཕ་རོལ་ཏུ་ཕྱིན་པ་ལོགས་སུ་བསྟན་ཏོ།. །རྡོ་རྗེ་ཐེག་པ་འདི་ནི་འབྲས་བུའི་བསྟན་བཅོས་ཏེ། འབྲས་བུ་སྟོན་པའི་ཕྱིར་རོ། །

---

^{[མ་དཔེ་གཟིགས་ན་འདིར་གནོན།]}

སྨྲ་མཁས་པས་གཉི་ག་ལ་རྨོངས་པ་མི་འབྱུང་ངོ་ཞེས་ཟེར་བ་དེ་ཡང་། གང་གི་ཕྱིར་དུག་གི་དེ་ཉིད་ཤེས་པས་དུག་དང་བསྲེས་ཏེ་བཟའ་བ་དང་། སྦྲུལ་གྱི་རྒྱན་བྱེད་པ་དང་། ཁ་ཅིག་དུག་གིས་མི་ཚུགས་པ་བཞིན་ནོ། །དོན་དམ་པ་དེ་རྟོགས་པ་ལས་གཞན་མེད་དོ་སྙམ་པའི་ཡིད་ཅན་ནི་རྨོངས་པར་མི་འགྱུར་རོ། །ཞེས་དང་། དེ་བཞིན་དུ་ཕ་རོལ་ཏུ་ཕྱིན་པས་ཀྱང་གང་དག་རྣམ་པ་སྣ་ཚོགས་པ་ལ་སོགས་པའི་སྐད་ཅིག་མ་བཞི་དང་ལྡན་པའི་དགའ་བ་བཞི་ཉམས་སུ་མྱོང་བ་དང་བྲལ་བའི་ཕྱིར། །མཚན་ཉིད་དང་བྲལ་བའི་སྐད་ཅིག་མ་མངོན་དུ་མ་གྱུར་པས། ལྷན་ཅིག་སྐྱེས་པའི་ངོ་བོ་ཉིད་མ་ཤེས་པར་མངོན་པར་བྱང་ཆུབ་པ་ཆེན་པོ་མངོན་སུམ་བྱེད་པར་མི་ནུས་ཀྱི། སྔགས་ཀྱི་ཐེག་པ་ནི་དེ་བཞིན་གཤེགས་པས་རྣམ་པར་དག་པས་སོ་སོ་སྐྱེ་བོའི་བག་ཆགས་དང་བྲལ་བའི་ཕྱིར་རོ། །ལྷའི་ང་རྒྱལ་དང་ལྡན་པའི་རྣལ་འབྱོར་དམ་ཚིག་ཐམས་ཅད་ལ་སྤྱོད་པས་རོ་མཉམ་པ་མངོན་དུ་བྱས་ནས། ཕྱག་རྒྱ་བཞི་ལ་སོགས་པའི་སྒྲུབ་ཐབས་ཀྱི་ཡན་ལག་བདུན་དང་ལྡན་པའི་ཡང་དག་པར་རྫོགས་པའི་སངས་རྒྱས་རང་རིག་པའི་མངོན་སུམ་ཚེ་འདི་ཉིད་ལ་མངོན་དུ་བྱེད་པའི་ཕྱིར། ལས་ཀྱི་ཕྱག་རྒྱ་ལ་སོགས་པའི་བདག་བྱིན་གྱིས་བརླབས་པ་ནི་ཐབས་མང་བའོ། །བཅོམ་ལྡན་འདས་ཀྱིས་ཀྱང་། ཐབས་གཞན་གྱིས་ནི་སངས་མི་རྒྱ། །ཞེས་གསུངས་སོ། །

---

^{[མ་དཔེ་གཟིགས་ན་འདིར་གནོན།]}

ཞེས་དང་། སངས་རྒྱས་ཐམས་ཅད་མཉམ་པར་སྦྱོར་བའི་རྒྱུད་ལས་ཀྱང་། །བསྐལ་པ་བྱེ་བ་གྲངས་མེད་ཀྱིས། །སངས་རྒྱས་ཀུན་དངོས་མི་ཐོབ་སྟེ། །ཕྱག་རྒྱའི་ཆོ་ག་འདི་ཡིས་ནི། །ཚེ་འདི་ཉིད་ལ་ཐོབ་པར་འགྱུར། །ཞེས་སོ། །དེའི་དགོངས་པ་ནི་འདི་ཡིན་ཏེ། གཞན་གང་གིས་ཀྱང་སངས་རྒྱས་ཙམ་ལས་ཡང་དག་པར་རྫོགས་པའི་སངས་རྒྱས་ཐོབ་པ་མ་ཡིན་ཏེ། ཕྱག་རྒྱ་ཆེན་པོ་བདེ་བའི་ངོ་བོ་ཉིད་ཀྱི་ཁ་སྦྱོར་བ་མེད་པའི་ཕྱིར་རོ། །ཞེས་དང་། དེས་ན་འདོད་ཆགས་ཆེན་པོའི་ཚུལ་འདིར་རྡོ་རྗེ་སེམས་དཔའ་གྲུབ་པར་བྱ་བའི་ཕྱིར་ཁ་སྦྱོར་བསྟན་པ་ཡིན་ནོ། །དེ་ཉིད་ཀྱི་ཕྱིར་སངས་རྒྱས་ཉིད་འདིར་ཁྱད་པར་ཡོད་པའི་ཕྱིར་རྡོ་རྗེ་འཆང་ཞེས་བྱའོ། །ཞེས་དང་། སྔགས་ཀྱི་ཐེག་པ་ནི་མཚམས་མེད་པ་ལྔ་བྱེད་པར་ཡང་རིགས་ལ་སོགས་པའི་རྐྱེན་དང་ལྡན་པ་དེ་ཡིས་དགེ་བའི་བཤེས་གཉེན་དམ་པ་བསྟེན་པ་ལས། ལས་ཀྱི་ཕྱག་རྒྱའི་ཐབས་ཀྱིས་ཇི་བཞིན་པའི་དོན་བསྒྲུབས་ནས། ཇི་བཞིན་པའི་མན་ངག་ཅན་སྡིག་པ་མི་དགེ་བའི་ལས་སྤངས་པ་དེས། དགེ་བའི་སྤྱོད་པ་དང་ཐབས་ལ་མཁས་པའི་ཁྱད་པར་གྱིས་སེ་གོལ་གཏོགས་པ་ཙམ་གྱིས་སྦྱིན་པ་ལ་སོགས་པ་བླ་ན་མེད་པའི་བསོད་ནམས་ཀྱི་ཚོགས་རྫོགས་ཏེ་ཚེ་འདི་ཉིད་ལ་སངས་རྒྱས་རྡོ་རྗེ་འཆང་ཉིད་ཐོབ་པར་འགྱུར་བ་ནི་ཁྱད་པར་རོ། །ཞེས་དང་། རྡོ་རྗེ་ཨཱ་ར་ལིའི་རྒྱུད་ལས་དྲངས་པ། །ཐེག་པ་

---

^{[མ་དཔེ་གཟིགས་ན་འདིར་གནོན།]}

ཆེན་པོ་འདི་ནི་འདི་ལྟ་བུ་སྟེ། །རྒྱུ་དང་འབྲས་བུའི་དངོས་པོ་ཕ་རོལ་ཏུ་ཕྱིན་པའི་ཐེག་པ་དང་། སྔགས་ཀྱི་ཐེག་པ་གཉིས་བསྟན་ནོ། །ཞེས་དང་། དེའི་ཕྱིར་གཙོ་བོ་མ་ཡིན་པར་འགྱུར་བའི་ཐབས་ཅུང་ཟད་ཙམ་གྱིས་ལས་ཀྱི་ཕྱག་རྒྱ་ལ་སོགས་པ་ཐབས་ཁྱད་པར་ཅན་དང་བྲལ་ནས། ཐབས་མང་ལ་གཉི་ག་ལ་མཚུངས་པ་མ་ཡིན་ནོ། །དེ་ཁོ་ན་དཀའ་བ་མེད་པར་གང་གིས་འདོད་པའི་ཡོན་ཏན་ལྔ་ལ་ལོངས་སྤྱོད་པ་ཉིད་ཀྱིས་དུས་མི་ཆང་གི་ངོ་བོ་ཉིད་འབྲས་བུ་ཆེན་པོ་ཐོབ་པར་འགྱུར་བའི་ཕྱིར་རོ། །དཀའ་ཐུབ་བརྟུལ་ཞུགས་ཀྱིས་བརྟུལ་བས། །སྡུག་བསྔལ་གྱུར་ནས་ལུས་བསྐམས་ཤིང་། །སྡུག་བསྔལ་ཉིད་ཀྱིས་སེམས་གཡེང་སྟེ། །གཡེང་བས་བྱང་ཆུབ་གཞན་དུ་འགྱུར། །ཞེས་དང་། ཡང་། དབང་པོ་རྣོན་པོ་ནི་སྔགས་ཀྱི་ཐེག་པ་འདི་ལ་སོ་སོ་སྐྱེ་བོ་ཉིད་ཀྱིས་ཀྱང་སྔགས་ཀྱི་དེ་ཁོ་ན་ཉིད་རྟོགས་པར་ནུས་ཏེ། དགྱེས་པའི་རྡོ་རྗེ་དང་འཇམ་པའི་རྡོ་རྗེ་ལ་སོགས་པའི་ང་རྒྱལ་ལ་གནས་པས་སློབ་བཞིན་པའི་གནས་སྐབས་སུ་ཡང་། དེ་ལྟ་བུ་ལ་བསྟེན་པར་འགྱུར་བ་སྲིད་པའི་ཕྱིར། རྒྱུ་དང་འབྲས་བུ་འདུས་པར་བྱས་ནས་ཕྱིར་མི་ལྡོག་པར་ཐོབ་པར་འགྱུར་རོ། །གང་གི་ཕྱིར་ཕ་རོལ་ཏུ་ཕྱིན་པའི་ཐེག་པའི་རྗེས་སུ་འབྲང་བ་རྣམས་ནི། ས་བརྒྱད་པ་ལས་ཕྱིར་མི་ལྡོག་པ་སྟེ། དེ་སྐད་དུ། ཕྱི་ནས་ས་བརྒྱད་པ་ལ་ནི། །དོགས་པ་

---

^{[མ་དཔེ་གཟིགས་ན་འདིར་གནོན།]}

བཟློག་པར་འགྱུར་བ་ཡིན། །ཞེས་སོ། །དེ་ལ་སྔགས་ཀྱི་ཐེག་པ་ཆེན་པོ་བསྟན་པ་ནི་གཉིས་ཏེ། །བསྐྱེད་པའི་རིམ་པ་དང་རྫོགས་པའི་རིམ་པའོ། །བསྐྱེད་པའི་རིམ་པ་ལ་གཉིས་ཏེ། །ཕྱི་རོལ་བསྐྱེད་པའི་རིམ་པ་དང་། །ཟབ་མོ་བསྐྱེད་པའི་རིམ་པའོ། །རྫོགས་པའི་རིམ་པ་ལ་གསུམ་སྟེ། རྫོགས་པ་དང་། ཡོངས་སུ་གྲུབ་པ་དང་། ངོ་བོ་ཉིད་ཀྱི་རིམ་པའོ། །ཞེས་གསུངས། དང་པོ་ནི་བསྐྱེད་པའི་རིམ་པ་སྤྱི་དང་། ལྷག་མ་བཞི་ནི། ལས་དང་། ཆོས་དང་། དམ་ཚིག་དང་། ཕྱག་རྒྱ་ཆེན་པོ་བཞིར་སྦྱར་ནས་རྒྱས་པར་འཆད་སྣང་སྟེ་ཡི་གེའི་ངལ་བས་དེ་ཙམ་མོ། །གཞུང་འདི་བཛྲ་པཱ་ཎི་དང་། །དྷ་རྨ་ཀཱིནྡྲིས་བསྒྱུར་བ་སྟེ། །དེ་ལས་བཏུས་པའི་དུམ་བུ་ཅུང་ཟད་དོ། །ཤུ་བྷཾ། །གནས་པ་བསྡུས་པ་ཞེས་བྱ་བ་སློབ་དཔོན་ལྷན་སྐྱེས་རྡོ་རྗེས་མཛད་པ་ལས། །མདོ་སྡེ་བྱེ་བྲག་སྨྲ་རྣམ་རིག །དབུ་མའི་རིམ་བཞིན་གསལ་བ་ཡི། །ཞེས་དང་། སྲིད་པ་སྡུག་བསྔལ་བདེན་པ་སྟེ། །དེ་ནི་འབྲས་བུར་ཤེས་པར་བྱ། །རྒྱུ་ནི་ཀུན་འབྱུང་བདེན་པ་སྟེ། །ལས་དང་ཉོན་མོངས་བདག་ཉིད་དོ། །བདེན་པ་དེ་གཉིས་ཟག་བཅས་ཏེ། །ཕྱི་མ་གཉིས་ནི་ཟག་པ་མེད། །ཅེས་དང་། རང་སངས་རྒྱས་ཀྱི་བསྒོམ་པ་ཡང་། །ལུང་བསྟན་པ་ལ་མི་ལྟོས་པར། །རང་གི་སྔོན་གྱི་སྨོན་ལམ་གྱིས། །དོན་མཐོང་བྱས་ནས་མྱ་ངན་འདའ། །ཞེས་དང་། ཡང་དག་རྫོགས་པའི་བྱང་

---

^{[མ་དཔེ་གཟིགས་ན་འདིར་གནོན།]}

ཆུབ་སེམས། །ཚོགས་མ་རྫོགས་ན་ཡོད་མ་ཡིན། །མངོན་དུ་བྱེད་པ་མི་བྱ་སྟེ། །བྱས་ན་ཐེག་པ་དམན་པར་འགྱུར། །ཞེས་དང་། སྣ་ཚོགས་གསལ་བ་དེ་ཉིད་ཀུན་ཏུ་བརྟགས་པ་སྡུག་བསྔལ་ཏེ། །ཀུན་འབྱུང་གི་ནི་བག་ཆགས་གཞན་གྱི་དབང་གི་རང་བཞིན་ནོ། །སྦྱིན་པ་ལ་སོགས་ལམ་ཉིད་ཡོངས་སུ་རྫོགས་པ་འགོག་པ་སྟེ། །རྫོགས་པར་ཡོངས་སུ་གྲུབ་པ་རྣམ་མེད་རྣམ་པར་རིག་པ་ཙམ། །ཞེས་དང་། ཤིན་འགཏུའང་འགོག་པར་གྱུར་པ་ན། །དམ་པའི་རྣམ་ཐར་མངོན་སུམ་དོན། །ཞི་དང་སྡུག་བསྔལ་ཟད་པ་ཡིན། །འཕགས་ལམ་ཡན་ལག་བརྒྱད་དེ་ནི། །གོམས་པ་ངེས་པར་འབྱིན་པའི་མཆོག །ཅེས་དང་། དེ་བཞིན་ཉིད་དང་ཆོས་ཀྱི་དབྱིངས། །ཤེས་རབ་ཕ་རོལ་ཕྱིན་པའི་མཆོག །ཡང་དག་མཐའ་དང་སྐྱེ་བ་མེད། །མི་དམིགས་པ་དང་མྱ་ངན་འདས། །སྟོང་ཉིད་མཚན་མ་མེད་པ་དང་། །སྨོན་པ་མེད་དང་འདུས་མ་བྱས། །རྨི་ལམ་སྒྱུ་མ་ལ་སོགས་དཔེ། །དེ་ཉིད་རྒྱལ་བ་རྣམས་ཀྱིས་བསྒྲུབས། །ཞེས་དང་། གང་ཕྱིར་ཇི་ལྟར་མེ་ལོང་ནང་དུ་གཟུགས་བརྙན་མཐོང་། །རིགས་པས་བརྟགས་པའི་སྟོབས་ཀྱིས་དེ་མེད་དེ་མཐོང་མེད། །ཕྱི་ཡི་དོན་མེད་འདི་ཡང་མེད་དེ་རྣམ་པ་སྣ་ཚོགས་སེམས། །འོན་ཀྱང་རྟེན་འབྲེལ་དག་ལས་རིག་པས་འགལ་བ་མེད། །ཅེས་དང་། དེ་ཉིད་ཕ་རོལ་ཕྱིན་པའི་ཚུལ། །ཕྱག་རྒྱ་བཞི་ཡི་རང་བཞིན་ལུང་། །སྔགས་ཀྱི་ཚུལ་ལ་

---

^{[མ་དཔེ་གཟིགས་ན་འདིར་གནོན།]}

བརྟེན་ནས་སུ། །བླ་མའི་ཁྱད་པར་མྱོང་བ་ཡིན། །ཞེས་དང་། ཆགས་བྲལ་ལས་ནི་སྡིག་པ་མེད། །བདེ་བ་མཆོག་ལས་བསོད་ནམས་མེད། །དེ་ཕྱིར་མི་འགྱུར་བདེ་བའི་སེམས། །རྟག་ཏུ་དེར་གནས་མོས་པར་བྱ། །འཕོ་བ་ལས་ནི་ཆགས་བྲལ་འབྱུང་། །ཆགས་བྲལ་ལས་ནི་སྡུག་བསྔལ་འབྱུང་། །ཞེས་དང་། ཇི་ལྟར་ལྕགས་ནི་གསེར་གྱུར་ན། །ནམ་ཡང་ནག་པོར་འགྱུར་བ་མིན། །དེ་བཞིན་སེམས་ཉིད་རྟོགས་པ་ཡང་། །ནམ་ཡང་བག་ཆགས་འགྱུར་བ་མིན། །ཞེས་དང་། ཐ་མས་བསྐྱེད་རིམ་བསྒོམ་པ་སྟེ། །ལས་ཀྱི་ཡན་ལག་དང་བྲལ་འབྲིང་། །རབ་ཀྱིས་ཀྱང་ནི་བསམ་བྱ་བ། །མྱུར་དུ་རྫོགས་པའི་དཀྱིལ་འཁོར་ཟླ རོ། །ཞེས་སོགས་གྲུབ་མཐའ་བཞི་དང་། གསང་སྔགས་བཅས་པའི་རྣམ་གཞག་རྒྱ་ཆེར་སྣང་ངོ་། །འདི་སྔོན་ཆད་རྨ་ཆོས་འབར་དང་། ཕྱིས་མཚུར་ལོ་ཙཱ་བས་བསྒྱུར་བར་སྣང་ངོ་།། ༈ །།སློབ་དཔོན་ཏོག་རྩེ་བས་མཛད་པའི་བསམ་གྱིས་མི་ཁྱབ་པའི་རིམ་པ་ཞེས་བྱ་བར། གཉིས་མེད་ཡེ་ཤེས་རྣལ་འབྱོར་ཆེ། །བདེ་བ་ཆེན་པོ་གཅིག་ཉིད་དུ། །བརྟན་དང་གཡོ་བའི་དངོས་པོ་ཀུན། །གཉིས་སུ་མེད་པའི་རྣམ་སྤངས་པ། །ཞེས་དང་། གཉིས་མེད་བདེ་བ་ཆེན་པོ་ཉིད། །གང་ཡང་བསམ་མེད་རང་བཞིན་ཉིད། །སངས་རྒྱས་བློ་ཡི་སྤྱོད་ཡུལ་མིན། །ཐམས་ཅད་དེ་ཡི་རང་བཞིན་ཉིད། །ཅེས་དང་། །ཐབས་དང་ཤེས་རབ་རྣལ་འབྱོར་

---

^{[མ་དཔེ་གཟིགས་ན་འདིར་གནོན།]}

ཆེ། །རོ་གཅིག་གཉིས་སུ་མེད་པར་བརྗོད། །འདོད་ཆགས་འདོད་ཆགས་བྲལ་བ་སྤངས། །དབང་བསྐུར་དམིགས་པར་མི་འགྱུར་རོ། །ཞེས་དང་། སྤྲོས་པ་ཐམས་ཅད་རྣམ་བྲལ་ཞིང་། །ནམ་མཁའ་ལྟ་བུར་དྲི་མ་མེད། །རྟོག་པའི་དྲི་མ་རྣམ་གཅོད་ཅིང་། །བསམ་གྱིས་མི་ཁྱབ་གཉིས་མེད་མཆོག །ཅེས་དང་། མ་སྐྱེས་པ་དང་མི་འཇིག་པ། །མི་འགྱུར་བ་དང་མི་གནས་པ། །གཉིས་སུ་མེད་པའི་ཡེ་ཤེས་མཆོག །འདི་ནི་ཕྱག་རྒྱ་ཆེན་པོ་ཉིད། །ཅེས་དང་། ཤིན་ཏུ་དྲི་མེད་ཆེས་དག་ཅིང་། །སྒོམ་པ་པོ་དང་བསྒོམ་བྱ་སྤངས། །དཔལ་ལྡན་བདེ་བའི་འབྱུང་གནས་ཀུན། །རྣམ་རྟོག་མེད་པས་ངེས་མཐོང་འགྱུར། །༣ ཞེས་དང་། ཀུན་མཁྱེན་གནས་ཀྱི་སྦྱོར་བ་འདི། །བསམ་གྱིས་མི་ཁྱབ་མི་རྟོག་པ། །ཀུན་ཏུ་བཟང་པོ་ཞེས་བྱའི་ལྷ། །ཡིད་བཞིན་ནོར་བུ་བཞིན་དུ་འབྱུང་། །ཞེས་དང་། ཡི་གེ་དང་ནི་མིང་བརྗོད་པ། །སྦྱོར་བའི་ཚིག་ཏུ་རབ་ཏུ་བསྟན། །གཞན་དུ་ངག་གི་ལམ་འདས་ཕྱིར། །སྨྲ་བ་ཉིད་དེ་མི་ནུས་སོ། །ཞེས་དང་། ཐོག་མ་དབུས་དང་ཐ་མ་བྲལ། །བསྐྱེད་པ་དང་ནི་རྫོགས་པ་སྤངས། །བསམ་དང་སེམས་པ་དང་བྲལ་བ། །གཉིས་སུ་མེད་པའི་ཡེ་ཤེས་མཆོག །ཅེས་དང་། རྣལ་འབྱོར་སྐྱེས་བུར་བཤད་པ་སྟེ། །རྗེས་སུ་རྣལ་འབྱོར་རིག་པའི་མཆོག །གཉིས་འདས་ཤིན་ཏུ་རྣལ་འབྱོར་ཏེ། །གཉིས་མེད་ཡེ་ཤེས་རྣལ་འབྱོར་ཆེ། །

---

^{[མ་དཔེ་གཟིགས་ན་འདིར་གནོན།]}

ཞེས་དང་། ཉི་ཟླ་གཟའ་ཡིས་ཟིན་པ་ན། །ཤེས་རབ་རྡོ་རྗེའི་སྦྱོར་བ་ལས། །ཞུ་བ་གཉིས་མེད་ཡེ་ཤེས་ཀྱིས། །སྐྱེ་བ་འདིར་ནི་སངས་རྒྱས་ཉིད། །ཅེས་དང་། རྒྱ་མཚོ་དང་ནི་རི་ཤིང་དང་། །རྩ་ལྕག་གེལ་པ་ལ་སོགས་པ། །གཉིས་མེད་ཡེ་ཤེས་ལས་བྱུང་བ། །འདི་ལ་ཐེ་ཚོམ་ཡོད་མ་ཡིན། །ཞེས་གསུངས་སོ། །གཞུང་འདི་བདེ་བའི་མྱུ་གུ་དང་འགོས་ཀྱི་འགྱུར་རོ།། ༈ །།སློབ་དཔོན་གཉིས་མེད་རྡོ་རྗེས་མཛད་པའི་ལྟ་བ་ངན་སེལ་ལས། །བ་ལྕི་ཆུ་དང་བཅས་པ་སྦྱིན་པ་སྟེ། །ལེགས་པར་བྱུགས་པ་ཚུལ་ཁྲིམས་བཟོད་པ་ནི། །སྲོག་ཆགས་ཕྲ་མོ་སེལ་བར་བྱེད་པ་ཡིན། །བརྩོན་འགྲུས་བྱ་བ་དག་ལ་འཇུག་པའོ། །བསམ་གཏན་དེ་ཟླདུས་རྩེ་གཅིག་བྱེད་པའི་སེམས། །ཤེས་རབ་ཚོགས་སོགས་ལེགས་པར་མཛེས་པ་ཡིན། །ཐུབ་པ་རྣམས་ཀྱི་དཀྱིལ་འཁོར་བྱས་པ་ཡིས། །ཕ་རོལ་ཕྱིན་པ་དྲུག་ནི་དེས་ཐོབ་ཤོག །ཅེས་སོ།། ༈ །།སློབ་དཔོན་གཉིས་མེད་རྡོ་རྗེས་མཛད་པའི་རབ་ཏུ་མི་གནས་པ་གསལ་པར་བསྟན་པ་ལས། །ཆོས་རྣམས་ཀྱི་ནི་སྐྱེ་བ་མེད། །རང་རིག་གཉུག་མ་བསམ་མི་ཁྱབ། །དེ་ཉིད་སྟོང་པ་ཉིད་ཅེས་བརྗོད། །ཆད་པའི་རྗེས་འགྲོ་མ་ཡིན་ནོ། །རབ་ཏུ་མི་གནས་ས་བོན་ལས། །འབྲས་བུ་རབ་ཏུ་མི་གནས་འབྱུང་། །སྐྱོབ་པ་དེ་ཉིད་དམ་པ་སྟེ། །བཅོས་མའི་བཅོས་མ་དེ་བཞིན་ནོ། །ཞེས་སོ། །བཛྲ་པཱ་ཎི་དང་ནགས་ཚོའི་འགྱུར་རོ།། ༈ །།གཉིས་

---

^{[མ་དཔེ་གཟིགས་ན་འདིར་གནོན།]}

མེད་རྡོ་རྗེའི་དེ་ཉིད་བཅུ་པར། །དེ་བཞིན་ཉིད་ནི་ཤེས་འདོད་པས། །རྣམ་བཅས་མ་ཡིན་རྣམ་མེད་མིན། །བླ་མའི་ངག་གིས་མ་བརྒྱན་པའི། །དབུ་མའང་འབྲིང་པོ་ཙམ་ཉིད་དོ། །ཞེས་སོ། ༈ ། སློབ་དཔོན་ཨ་བ་དྷ་ཏཱིའི་ཟུང་འཇུག་རབ་ཏུ་གསལ་བར། །ཟུང་འཇུག་ཕྱིར་ན་རང་བཞིན་མེད། །རྐྱེན་ལས་བྱུང་བ་མི་འགགས་ཉིད། །དངོས་དང་དངོས་མེད་ཉམས་པས་ན། །ཟུང་འཇུག་རབ་ཏུ་སྣང་བར་འགྱུར། །ཞེས་སོ། ༈ །།མེ་ཏྲི་པའི་དགའ་གཙུགས་ལྔ་པར། །མཚན་ཉིད་ཐམས་ཅད་ཡང་དག་རྫོགས། །མཐའ་གཉིས་རྣམ་པར་སྤངས་པ་སྟེ། །དངོས་པོ་ཀུན་གྱི་ངོ་བོ་ཉིད། །རང་བཞིན་མེད་པར་རྟག་ཏུ་ཤར། །ཞེས་སོ། །དེའི་མི་ཕྱེད་ལྔ་པར། །སངས་རྒྱས་རྟོགས་ན་འགྲོ་བ་དག །སངས་རྒྱས་རྟོགས་པ་ཅན་རྩ་ལག །ཨེ་མའོ་སངས་རྒྱས་གཟོད་ནས་དག །སངས་རྒྱས་བསྟན་པ་ཇི་ལྟར་རྟོགས། །ཞེས་སོ།། ༈ །།གཉིས་མེད་རྡོ་རྗེས་མཛད་པའི་བདེ་ཆེན་གསལ་བར། བདེ་ཆེན་ངོ་བོ་ཉིད་འདོད་གང་། །བདེ་བ་མེད་ན་བྱང་ཆུབ་མིན། །ཡོད་ནའང་ཆགས་པ་ཆེན་པོ་སྟེ། །འཁོར་བར་སྐྱེ་བའི་རྒྱུ་ཉིད་དོ། །ཞེས་དང་། ཡང་། །རྟེན་ཅིང་འབྲེལ་འབྱུང་བདེ་བ་གང་། །གཟོད་ནས་དག་པར་ཤེས་པར་བྱ། །ཞེས་སོ།། ༈ །།དེ་ཉིད་རབ་ཏུ་བསྟན་པར། །དེ་བཞིན་ཟག་པ་མེད་ཆོས་རྣམས། །ལོངས་སྤྱོད་སྤྲུལ་

---

^{[མ་དཔེ་གཟིགས་ན་འདིར་གནོན།]}

པའི་སྐུ་དག་གི །རྟེན་འབྲེལ་སྨོན་ལམ་དག་གིས་ནི། །སེམས་ཅན་དོན་དུ་རབ་ཏུ་འཇུག །ཅེས་སོ། །དེ་བཞིན་གཤེགས་པ་ལྔའི་ཕྱག་རྒྱ་རྣམ་པར་བཤད་པར། །སྤྲོས་པ་མེད་ཅིང་སྣང་བ་མེད། །ཐུབ་པ་ཆེན་པོ་ཆོས་ཀྱི་སྐུ། །དེ་ལས་གཟུགས་སྐུ་གཉིས་བྱུང་བ། །རྗེས་ཐོབ་སྒྱུ་མ་བཞིན་དུ་གནས། །ཞེས་དང་། ཡང་འདི་ལྟར། འཇམ་དཔལ་ལ་དེ་བཞིན་གཤེགས་པས་དྲིས་པ། འདི་བསམ་གྱིས་མི་ཁྱབ་པའི་དབྱིངས་གང་ཡིན། འཇམ་དཔལ་གྱིས་གསོལ་པ། ཁམས་གང་བསམ་དུ་མེད་པའི་སེམས་དེ་བརྗོད་དུ་མེད་པ་དང་། སེམས་ཀྱི་གཞལ་བྱ་མ་ཡིན་པ་དང་། སེམས་ཀྱིས་སེམས་མེད་པ་རབ་ཏུ་བསམ་པར་བྱ་སྟེ། འདི་ནི་བསམ་གྱིས་མི་ཁྱབ་པའི་དབྱིངས་ཞེས་བྱའོ། །དེ་ལྟར་ན་བཅོམ་ལྡན་འདས་སེམས་ཉིད་བསམ་གྱིས་མི་ཁྱབ་པའི་དབྱིངས་སོ། །ཅིའི་ཕྱིར་ཞེ་ན། བསམ་གྱིས་མི་ཁྱབ་པའི་དབྱིངས་ལ་སེམས་ཡོད་པ་མ་ཡིན་ཏེ། གང་གི་ཕྱིར་སེམས་ནི་བསམ་དུ་མེད་ལ། དོན་ཇི་ལྟ་བ་བཞིན་དུ་རྟོགས་པའི་སེམས་སོ། །འོན་ཀྱང་བཅོམ་ལྡན་འདས་རྣམ་པ་ཐམས་ཅད་བསམ་གྱིས་མི་ཁྱབ་པའི་དབྱིངས་སོ། །ཞེས་དྲངས་སྣང་ངོ་། །སློབ་དཔོན་གཉིས་མེད་རྡོ་རྗེས་མཛད་པའོ།། ༈ །།དབང་གི་བྱ་བ་མདོར་བསྡུས་པ་ལས། དེ་ལ་རྣམ་པར་རྒྱལ་བའི་བུམ་པ་ནི་མཆུ་ཡོ་བ་མེད་པ། རྩ་བ་ནག་པོ་མེད་པ། གསུས་པ་ཆེ་བ། མགྲིན་པ་རིང་པ།

---

^{[མ་དཔེ་གཟིགས་ན་འདིར་གནོན།]}

མཚན་མ་ལེགས་པར་བྲིས་པ། གོས་གཙང་མས་མགྲིན་པ་དཀྲིས་པ། བུ་ཏ་ཏ་བ་བ་ལ་སོགས་པས་ཁ་བརྒྱན་པ། གསེར་དང་། །དངུལ་དང་། རྭ་ཛ་བརྟི་དང་། མུ་ཏིག་དང་། བྱུ་རུ་དང་། ནས་དང་། གྲོ་དང་། སོ་བ་དང་། ཏིལ་དང་། མ་ཤ་དང་། ཤྲཱི་ཧ་ཏི་དང་། ཀཎྜཀ་རཱི་དང་། ཤཱི་ཏ་ཨ་པ་ར་ཛི་ཏ་དང་། དཎྜིཏྤལ་དང་། ཧ་ས་དེ་བ་དང་། རིན་ཆེན་སྣ་ལྔ་དང་། འབྲུ་ལྔ་དང་། སྨན་ལྔ་བུམ་པའི་ནང་དུ་བླུགས་ལ། དྲིའི་ཆུས་ཡོངས་སུ་བཀང་སྟེ། དེ་ལ་དཀྱིལ་འཁོར་བསམས་ནས་མཆོད་ཡོན་དང་ཞབས་བསིལ་ལ་སོགས་པ་ཕུལ་ལ། ཡེ་ཤེས་ཀྱི་བདུད་རྩིར་ཞུ་བའི་གཟུགས་སུ་བཞག་གོ །དེའི་རྗེས་ལ་མེ་ཏོག་གི་ཕྲེང་བས་ཉེ་བར་མཛེས་པའི་རྡོ་རྗེ་སྟེང་དུ་ཡང་དག་པར་བཞག་སྟེ། རང་རིག་པའི་ལྷ་ཡི་སྔགས་བརྒྱ་རྩ་བརྒྱད་དམ། བདུད་རྩི་འཁྱིལ་བའི་སྔགས་ཀྱིས་མངོན་པར་བསྔགས་སོ། །ཞེས་དང་། ལས་ཐམས་ཅད་ལ་ནི་རྡོ་རྗེ་སེམས་དཔའམ། བདུད་རྩི་འཁྱིལ་བ་བྲི་བར་བྱའོ། །ཞེས་དང་། དེའི་རྗེས་སུ་བདུད་རྩི་འཁྱིལ་བའི་སྔགས་ཀྱི་མངོན་པར་བཟླས་པའི་མ་གས་པ་དང་། འབུས་མ་ཟོས་པའི་ཨ་ཤཏྠའི་ཤིང་ལ་སོགས་པ་སོར་བཅུ་གཉིས་པའི་ཚད་ལ། རྩེ་མོར་མེ་ཏོག་གི་ཕྲེང་བས་བཅིངས་པའི་སོ་ཤིང་སློབ་མ་ལ་སྦྱིན་པར་བྱའོ། །ཞེས་དང་། ཀུ་ཤ་ལ་བདུད་རྩི་འཁྱིལ་བའི་སྔགས་ཀྱིས་མངོན་པར་

---

^{[མ་དཔེ་གཟིགས་ན་འདིར་གནོན།]}

བསྔགས་ཏེ། སྔས་དང་སྟན་དུ་སྦྱིན་པར་བྱའོ། །ཞེས་དང་། དེས་མངོན་པར་བསྔགས་པའི་སྐུད་པ་སུམ་བསྒྲིལ་མདུད་པ་གསུམ་བྱས་ལ་བསྲུང་བའི་དོན་དུ་དཔུང་པ་གཡས་པར་བཅིང་བར་བྱའོ། །ཞེས་དང་། དེ་ནས་མེ་ཏོག་ལྷུང་བས་དམན་པ་དང་། འབྲིང་དང་། མཆོག་གི་དངོས་གྲུབ་མཚོན་པར་བྱའོ། །དེ་ལག་ལ་ཏེ་སངས་རྒྱས་རྣམས་ཀྱི་དབུའམ། མཛོད་སྤུའམ། གཙུག་ཏོར་ལ་ལྷུང་ན་ཕྱག་རྒྱ་ཆེན་པོའི་དངོས་གྲུབ་སྟེར་རོ། །མཆོག་གི་ཡན་ལག་ལས་ནི་མཆོག་གོ །འབྲིང་གི་ཡན་ལག་ལས་ནི་འབྲིང་ངོ་། །མཐའ་མའི་ཡན་ལག་ལས་ནི་མཐའོ། །གཟུགས་བརྙན་དང་རིང་བ་ལས་ནི་ཤིན་ཏུ་ཡུན་རིང་བ་ནའོ། །ཉེ་བ་ལས་ནི་མྱུར་བའི་དངོས་གྲུབ་བོ། །ལྷ་རྣམས་ཀྱི་རིགས་ནི་རེའུ་མིག་ལ་སོགས་པ་རྣམ་པར་བཅད་པ་ལས་ཤེས་པར་བྱའོ། །གལ་ཏེ་ལྷ་གཉིས་པོའི་བར་དུ་ལྷུང་ན། དེ་ཡང་གང་གི་ཉེ་བ་དེའི་རིགས་སུ་འགྱུར་རོ། །དཀྱིལ་འཁོར་གྱི་ཕ་རོལ་དུ་ལྷུང་ན་དམན་པའི་དངོས་གྲུབ་བོ། །གལ་ཏེ་འོག་ལ་ལྷུང་ན་སླར་འཕང་ངོ་། །ལན་གསུམ་བར་དུ་དེ་ཉིད་དུ་ལྷུང་ན་དངོས་གྲུབ་མེད་དོ། །སྙིང་ག་ལ་ལྷུང་ན་ཤིན་ཏུ་དཀའོ། །ཞེས་སོ། །ཡང་། །སྐད་ཅིག་ཤེས་པའི་ཡེ་ཤེས་གང་། །ངག་གི་སྤྱོད་ཡུལ་ལམ་ལས་འདས། །ཞེས་དང་། བདེ་ཆེན་རྒྱལ་པོ་གཅིག་ཤེས་པ། །འགྲོ་བའི་རྒྱུད་ལ་རྟག་ཤེས་པར། །གང་གིས་ཀྱང་ནི་སྟོན་པའི་

---

^{[མ་དཔེ་གཟིགས་ན་འདིར་གནོན།]}

དུས། །ཐམས་ཅད་མཁྱེན་པའང་ཚིག་ཕོངས་འགྱུར། །ཞེས་སོ། །འདི་ཡང་སློབ་དཔོན་གཉིས་མེད་རྡོ་རྗེས་མཛད་པའོ།། ༈ །།ཡང་དེས་མཛད་པའི་རང་བཞིན་ལྔ་པར། དེ་ཉིད་རྒྱུ་དང་འབྲས་བུའི་བདག་ཉིད་རྣམ་པ་ཐམས་ཅད་མཆོག་དང་ལྡན་པའི་སྟོང་པ་ཉིད་ཀྱི་མཚན་ཉིད་འདུས་མ་བྱས་ཤིང་། དེ་བཞིན་ཉིད་ཀྱི་བདག་ཉིད་ཡིན་པའི་ཕྱིར་ཆོས་སྐུའོ། །རབ་ཏུ་སྣང་བ་ཙམ་ཡིན་པའི་ཕྱིར་ལོངས་སྤྱོད་རྫོགས་པའི་སྐུ། བརྟགས་པའི་རྣམ་པར་ཤེས་པའི་ངོ་བོ་ཉིད་ཡིན་པའི་ཕྱིར་སྤྲུལ་པའི་སྐུའོ། །དེ་སྐད་དུའང་། །འདུས་མ་བྱས་སེམས་ཆོས་ཀྱི་སྐུ། །རྟག་པ་ལོངས་སྤྱོད་རྫོགས་མཚན་ཉིད། །སྣ་ཚོགས་དེ་ཉིད་སྤྲུལ་པའོ། །གཉུག་མ་ཀུན་གྱི་རང་བཞིན་ནོ། །ཞེས་སོ།། ༈ །།སློབ་དཔོན་གཉིས་མེད་རྡོ་རྗེ་མཛད་པའི་ཐིག་ཆེན་ཉི་ཤུ་པར། བྱང་ཆུབ་ཉོན་མོངས་ཐ་དད་མེད། །ཉོན་མོངས་བྱང་ཆུབ་ལས་མི་འབྱུང་། །འཁྲུལ་པས་ཉོན་མོངས་རྟོག་པ་སྟེ། །འཁྲུལ་པའི་ངོ་བོ་དྲི་མ་མེད། །ཅེས་དང་། ནམ་མཁའ་དང་མཉམ་ཞི་བ་དང་། །ཐོག་མ་དབུས་དང་ཐ་མ་སྤངས། །བསམ་གྱིས་མི་ཁྱབ་སེམས་ཉིད་ནི། །དངོས་པོ་ཀུན་གྱི་རང་བཞིན་ནོ། །ཞེས་སོ། །དེ་བ་ཀ་ར་ཙནྡྲ་དང་། ཤཱཀྱ་བརྩོན་འགྲུས་ཀྱི་འགྱུར། ༈ །ཡིད་ལ་མི་བྱེད་པ་སྟོན་པ་ཞེས་བྱ་བ་སློབ་དཔོན་མེ་ཏྲི་པས་མཛད་པ་ལས། འཕགས་པ་སངས་རྒྱས་ཐམས་ཅད་ཀྱི་ཡུལ་

---

^{[མ་དཔེ་གཟིགས་ན་འདིར་གནོན།]}

ལ་འཇུག་པ་ཡེ་ཤེས་སྣང་བ་རྒྱན་གྱི་མདོ་ལས། ཡིད་ལ་མི་བྱེད་པའི་ཆོས་རྣམས་དགེ་བའོ། །ཡིད་ལ་བྱེད་པའི་ཆོས་རྣམས་མི་དགེ་བའོ། །ཞེས་དང་། རྣམ་པར་མི་རྟོག་པ་ལ་འཇུག་པའི་གཟུངས་ལས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྟོག་པ་ཐབས་ཀྱི་མཚན་མ་ནི་སྣང་བ་ལ་རྟོག་པ་སྟེ། ཡིད་ལ་མི་བྱེད་པའི་ཡོངས་སུ་སྤང་བའོ། །ཞེས་དང་། ཧེ་བཛྲ་ལས་གསུངས་པ། །ངོ་བོ་ཉིད་ཀྱིས་སེམས་མེད་ཅིང་། །སེམས་ལས་བྱུང་བའང་མེད་པའོ། །ཞེས་དང་། གང་ཕྱིར་ཡིད་ཀྱིས་མ་བསྒོམ་པར། །འགྲོ་བ་ཐམས་ཅད་བསྒོམ་པར་བྱ། །ཞེས་སོགས་དྲངས་ནས་མདོ་སྔགས་གཉི་གའི་ལུང་གིས་སྒྲུབ་ཅིང་། བར་འདིར་དགག་པ་གཉིས་ཀྱི་སྒོ་ནས་རྒྱས་པར་བཤད་མཐར། ཨི་ཡིག་གཙོ་བོར་མི་འགྱུར་བའི་ཡིད་ལ་བྱེད་པ་ནི་ཡིད་ལ་མི་བྱེད་པ་སྟེ། ལོ་མའི་རྒྱལ་པོ་བཞིན་དུ་ཚིག་དབུས་མ་ཕྱིས་པའི་བསྡུ་བའོ། །དེ་གང་གིས་ན་ཡིད་ལ་བྱེད་པ་གང་ཡིན་པ་ཐམས་ཅད་ནི་ཨ་སྟེ་སྐྱེ་བ་མེད་པའི་དོན་ཏེ། །ཞེས་སོགས་རྒྱས་པར་དང་། ཡང་ན་ཨ་ཞེས་བྱ་བ་ནི་འོད་གསལ་བའི་ཚིག་གོ །ཡིད་ལ་མི་བྱེད་པ་ནི་བདག་བྱིན་གྱིས་བརླབས་པའི་ཚིག་གོ །འདིར་ཨ་ཡང་ཡིན་ལ་ཡིད་ལ་མི་བྱེད་པའང་ཡིན་པས་ཡིད་ལ་མི་བྱེད་པའོ། །འདིས་ནི་ཡིད་ལ་མི་བྱེད་པའི་གནས་བསམ་གྱིས་མི་ཁྱབ་པ་འོད་གསལ་བ་བདག་ལ་བྱིན་གྱིས་བརླབས་

---

^{[མ་དཔེ་གཟིགས་ན་འདིར་གནོན།]}

པའི་བདག་ཉིད་སྟོང་པ་ཉིད་དང་སྙིང་རྗེ་དབྱེར་མེད་པ་ཟུང་དུ་འཇུག་པ་གཉིས་སུ་མེད་པའི་རྒྱུན་ཡང་དག་པར་རིག་པ་སྐྱེ་བར་འགྱུར་རོ། །ཞེས་དང་། མ་ཕྱིས་བསྡུ་བ་བྱས་པས་ཡིད་ལ་མི་བྱེད་པ་དང་། ཡིད་ལ་མི་བྱེད་པ་སྟེ། པགས་པའི་སྙིང་པོ་དང་། པགས་པའི་སྙིང་པོའོ། །ཞེས་སྣང་ལ། གཞུང་འདི་བཛྲ་པཱ་ཎི་དང་། གཉན་ཆུང་གིས་བསྒྱུར་བའོ།། ༈ །།སློབ་དཔོན་གཉིས་མེད་རྡོ་རྗེ་མཛད་པའི་དེ་ཁོ་ན་ཉིད་ཐེག་ཆེན་ཉི་ཤུ་པར། །རྣམ་པ་ཀུན་གྱི་མཆོག་ལྡན་པ། །དངོས་དང་དངོས་མེད་གཟུང་དང་འཛིན། །རྣམ་པར་ཤེས་པས་པོར་པའི་སེམས། །དམིགས་པ་མེད་ཅིང་བླ་ན་མེད། །དག་ཅིག་ཞི་བ་སྣང་བ་མེད། །རིག་པ་ཤེས་རབ་ཅེས་སུ་གྲགས། །ཞེས་དང་། སེམས་ཀྱི་འདོད་པ་སེམས་མ་ཡིན། །རང་གི་རིག་པ་སེམས་མིན་ཏེ། །རིག་པ་བླ་མ་ལ་ལྟོས་འགྱུར། །དངོས་མེད་ཀུན་གྱི་ངོ་བོ་ཉིད། །ཅེས་སོ།། ༈ །།སློབ་དཔོན་མེ་ཏྲི་པས་མཛད་པའི་དབང་བསྐུར་ངེས་པར་བསྟན་པར། གཉེན་པོའི་ཕྱོགས་ལ་མི་གནས་ཤིང་། །དེ་ཉིད་ལ་ཡང་མི་ཆགས་པ། །གང་གི་འབྲས་བུའང་མི་འདོད་པ། །དེ་ཡིས་ཕྱག་རྒྱ་ཆེན་པོ་ཤེས། །ཞེས་སོ། །འདི་ཀྲྀཥྛ་པ་དང་། ཚུལ་ཁྲིམས་རྒྱལ་བས་བསྒྱུར་ཞིང་། དེའི་འགྲེལ་པ་སློབ་དཔོན་དགའ་བ་སྐྱོང་གིས་མཛད་པ་ལས། ཨེ་ཝཾ་གྱི་དོན་རྒྱས་པར་བཤད་འདུག་ཅིང་། ཡང་། དེ་བཞིན་

---

^{[མ་དཔེ་གཟིགས་ན་འདིར་གནོན།]}

དུ་རྣམ་པར་ཉེད་པ་ནི་ཆོས་ཀྱི་སྐུའོ། །རྣམ་པར་སྨིན་པ་ནི་ལོངས་སྤྱོད་རྫོགས་པའོ། །རྣམ་པ་སྣ་ཚོགས་ནི་སྤྲུལ་པའོ། །མཚན་ཉིད་དང་བྲལ་བ་ནི་ངོ་བོ་ཉིད་སྐུའོ། །ཞེས་དང་། ཡན་ལག་བདུན་དང་ལྡན་པ་ནི་ཊྛ བསྒྲུབ་བྱར་འདོད་པར་འགྱུར་རོ། །དེ་ལ་ཡན་ལག་བདུན་ནི། ལོངས་སྤྱོད་རྫོགས་པའི་ཚོར་བ་དང་། །ཁ་སྦྱོར་སྙོམས་པར་འཇུག་པ་དང་། བདེ་བ་ཆེན་པོ་བདེ་བའི་ངོ་བོ་ཉིད་དང་། རང་བཞིན་མེད་པ་རྟོག་པ་བྲལ་བ་དང་། སྙིང་རྗེས་ངེས་པར་གང་བ་སྔོན་གྱི་སྨོན་ལམ་གྱི་དབང་གིས་ལོངས་སྤྱོད་རྫོགས་པ་ལ་སོགས་པས་སེམས་ཅན་གྱི་དོན་མཛད་པ་དང་། རྒྱུན་མི་འཆད་པར་རབ་ཏུ་འཇུག་པས་རྒྱུན་ཆད་པ་མེད་པ་ཟླ དང་། འགོག་པ་མེད་པས་རྒྱུད་རྒྱུན་ཆད་མེད་པའོ། །ཞེས་དང་། གང་གིས་ཕྱིར་བདག་མེད་རྣལ་འབྱོར་མའི་འཁོར་ལོ་སྒོམ་པ་ཡང་སངས་རྒྱས་ཉིད་ཀྱི་རྒྱུ་མ་ཡིན་ནམ། འདིར་ཡན་ལག་བདུན་གྱི་སྒྲུབ་ཐབས་ཀྱི་རྣལ་འབྱོར་མ་ཡིན་ཏེ། ཁ་སྦྱོར་མེད་པའི་ཕྱིར་རོ། །ཞེས་ཕྱོགས་སྔ་བཀོད་ནས། དེ་ལ་ཡང་ཁ་ཊཾ་གའི་ཐབས་དང་ཁ་སྦྱོར་བ་ཡོད་དེ། དེ་སྐད་དུ། ཁ་ཊཾ་ག་དང་སྦྱོར་ལྷ་མོ། །ལོངས་སྤྱོད་རྫོགས་པ་ལ་སོགས་ལྡན། །བདག་མེད་རྣལ་འབྱོར་མ་འཁོར་ལོར། །རྟོགས་པ་ཅི་ཡི་ཕྱིར་མི་འགྲུབ། །ཅེས་དགག་པར་མཛད་དོ། །ཡང་། གཉེན་པོའི་ཕྱོགས་ལ། ཞེས་པ་ནི། རང་བཞིན་དང་། ཡོན་ཏན་དང་། སྙིང་པོ་ལ་

---

^{[མ་དཔེ་གཟིགས་ན་འདིར་གནོན།]}

ངེས་པར་སྤྱོད་པ་སྟེ། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་བདག་ཉིད་ཅན། གཉེན་པོའི་ཕྱོགས་ལ་དཔྱོད་པའི་རྣམ་པར་རྟོག་། པའི་ཚོགས་ཡིད་ལ་མི་བྱེད་པས་སྤང་བའོ། །མི་གནས་ཤིང་། ཞེས་བྱ་བ་ནི་གཉེན་པོའི་ཕྱོགས་ལ་ངེས་པར་དཔྱོད་པའི་རྣམ་པར་རྟོག་པའི་ཚོགས་རབ་ཏུ་སྤངས་པའི་ཟག་པ་དང་བཅས་པའི་གཟུགས་ལ་སོགས་པའི་ཉེ་བར་ལེན་པའི་ཕུང་པོ་ལྔ་ལ་སོགས་པའི་བདག་ཉིད་མི་མཐུན་པའི་ཕྱོགས་ལ་ངེས་པར་དཔྱོད་པའི་རྣམ་པར་རྟོག་པའི་ཚོགས་རབ་ཏུ་སྤངས་པར་ཡང་བལྟ་བར་བྱའོ། །ཞེས་དེ་མེད་པའི་ཕྱིར་འདི་དག་ངེས་པར་མེད་པ་ཉིད་དོ། །དེ་ཉིད་ལ་ཡང་མི་ཆགས་པ། ཞེས་བྱ་བ་ནི། ངོ་བོ་ཉིད་ལ་སོགས་པ་ལ་ངེས་པར་དཔྱད་པ་ཉིད་ཀྱིས་སྟོང་པ་ཉིད་དང་། ཡང་དག་པའི་མཐའ་དང་། དེ་བཞིན་ཉིད་ཀྱི་བདག་ཉིད་ལ་དེ་ཁོ་ན་ཉིད་ངེས་པར་དཔྱོད་པ་རྣམ་པར་རྟོག་པའི་ཚོགས་ཀྱི་ཏིང་ངེ་འཛིན་ལའང་མ་ཆགས་པའོ། །གང་གིས་འབྲས་བུའང་འདོད་པ་མེད། ཅེས་བྱ་བ་ནི། ས་དང་པོ་ལ་སོགས་པ་དང་། རྣམ་པ་ཐམས་ཅད་མཁྱེན་% པ་ཉིད་དེ་ཐོབ་པ་ལ་ངེས་པར་དཔྱོད་པའི་ཚོགས་ཀྱི་འབྲས་བུ་ལ་འདོད་པ་སྟེ། དེ་ལ་རེ་བ་འགའ་ཡང་མེད་དོ། །དེ་ཡིས་ཕྱག་རྒྱ་ཆེན་པོ་ཤེས། །ཞེས་བྱ་བ་ནི་ཐོབ་པའོ། །དེ་དག་གིས་འགྲོ་བའི་བདག་ཉིད་མི་

---

^{[མ་དཔེ་གཟིགས་ན་འདིར་གནོན།]}

གནས་ཤིང་སྒྲོ་མ་བཏགས་པ། མི་མཐུན་པའི་ཕྱོགས་གཉེན་པོ་དང་། དེ་ཁོ་ན་ཉིད་དང་། འབྲས་བུའི་ཚོགས་ལ་ཆགས་པ་སྤངས་བས་ཆགས་པ་ཐམས་ཅད་ལས་རྣམ་པར་གྲོལ་བ་ནི་ཕྱག་རྒྱ་ཆེན་པོ་ཐོབ་པ་ཞེས་བྱའོ། །གལ་ཏེ་དེ་ལྟར་ན་ཕྱག་རྒྱ་ཆེན་པོ་ལ་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་མེད་པ་ཞིག་གམ་ཞེ་ན། མ་ཡིན་ཏེ། དེ་ནི་ཕ་རོལ་ཏུ་ཕྱིན་པ་ལ་སོགས་པའི་བདག་ཉིད་ཅན་བསོད་ནམས་དང་ཡེ་ཤེས་ཀྱི་ཚོགས་གཉིས་གྱི་ངོ་བོ་ཡིན་པའི་ཕྱིར་རོ། །དེ་སྐད་དུ་ཡང་། ཚངས་པ་ཁྱད་པར་སེམས་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་ལས། གང་ཉོན་མོངས་པ་ཐམས་ཅད་སྤངས་པ་དེའི་དོན་ནི་སྦྱིན་པའོ། །གང་མངོན་པར་འདུ་བྱེད་པ་མེད་པ་དེ་ནི་ཚུལ་ཁྲིམས་སོ། །གང་མཚན་ཉིད་དང་བྲལ་བ་དེ་ནི་བཟོད་པའོ། །གང་རྣམ་པར་དཔྱོད་པ་མེད་པ་དེ་ནི་བརྩོན་འགྲུས་སོ། །གང་རབ་ཏུ་མི་གནས་པ་དེ་ནི་བསམ་གཏན་འ། ནོ། །གང་སྤྲོས་པ་མེད་པ་དེ་ནི་ཤེས་རབ་བོ། །དེ་ལྟར་གནས་མེད་པ་སྤྲོས་པ་མེད་པའི་ངོ་བོ་ཉིད་ནི། ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་དང་། ཤེར་ཕྱིན་བདུན་བརྒྱ་པ་ལས་ཀྱང་ལུང་མང་བར་དྲངས་མཐར། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་དེ་ཆོས་གང་ཅུང་ཟད་འཕེལ་བར་འགྱུར་བའམ། འགྲིབ་པར་འགྱུར་བ་ནི་མ་མཆིས་སོ། །བཅོམ་ལྡན་འདས་དེ་ནི་ཤེས་རབ་ཀྱི་ཕ་རོལ་ཏུ་

---

^{[མ་དཔེ་གཟིགས་ན་འདིར་གནོན།]}

ཕྱིན་པ་བསྒོམ་པར་རིག་པར་བྱའོ། །ཞེས་དང་། བཅོམ་ལྡན་འདས་གང་ཅི་ལ་ཡང་མི་གནས་པ་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པའོ། །ཞེས་དང་། བཅོམ་ལྡན་འདས་ཆོས་གང་ཅུང་ཟད་འཕེལ་བའམ་འགྲིབ་པ་ལ་རབ་ཏུ་གནས་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་མ་ལགས་ཏེ། སོ་སོ་སྐྱེ་བོའི་ཆོས་ཀྱང་མི་སྤོང་ལ། སངས་རྒྱས་ཀྱི་ཆོས་ཀྱང་ཡང་དག་པར་མི་ལེན་ཏོ། །ཞེས་དང་། མགོན་པོ་བྱམས་པས། སྟོང་པ་ཉིད་དེ་མདོར་བསྡུ་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་སྟེ། །ཆོས་ཀྱི་དབྱིངས་ནི་རྣམ་གྲངས་སོ། །ཞེས་སོ། ཡང་། བསྐྱེད་རྫོགས་ཀྱི་རྣམ་གྲངས་ལྔ་པོ་ཤེས་རབ་གསལ་བ་དང་མཐུན་པར། ཕྱི་བསྐྱེད་པའི་རིམ་པ་དང་། ནང་ཟབ་མོའི་བསྐྱེད་རིམ་དང་། རྫོགས་པ་དང་། ཡོངས་སུ་གྲུབ་པ་དང་། ངོ་བོ་ཉིད་ཀྱི་རིམ་པ་ལྔ་པོ་རིམ་ལྔ་དང་སྦྱར་ཏེ། འདི་ལྟར་མདོར་བསྡུས་པ་དང་། རྡོ་རྗེའི་བཟླས་པ་དང་། བདག་བྱིན་བརླབས་པ་དང་། མངོན་པར་བྱང་ཆུབ་པ་དང་། ཟུང་དུ་འཇུག་པའི་མིང་གཞན་ཡིན་པར་བཤད་ཅིང་། དེ་ཉིད་ཀྱང་ཕྱག་རྒྱ་བཞིར་བསྡུ་ཚུལ་བསྟན་ནས། ཕྱག་རྒྱ་ཆེན་པོ་ཡིད་ཀྱིས་ཏེ། །དམ་ཚིག་ཕྱག་རྒྱ་ཀུན་ཏུ་འགྲོ། ཆོས་ཀྱི་ཕྱག་རྒྱ་ངག་ལས་ཏེ། །ལས་ཀྱི་ཕྱག་རྒྱ་ལུས་ཀྱིའོ། །ཞེས་སོ། །ཡང་ཟླ་གྲགས་སྒྲོན་གསལ་ལུང་། གསང་

---

^{[མ་དཔེ་གཟིགས་ན་འདིར་གནོན།]}

སྔགས་སྐུ་ནི་རབ་བསྒྲུབ་ཕྱིར། །སྐྱེས་པའི་རིམ་པ་དང་པོ་ཡིན། །སེམས་ལ་དམིགས་པ་ཙམ་ཞིག་ནི། །རིམ་པ་གཉིས་པ་ཞེས་བརྗོད་དོ། །ཀུན་རྫོབ་བདེན་པ་སྟོན་པ་ནི། །ཡིད་འོང་རིམ་པ་གསུམ་པའོ། །ཀུན་རྫོབ་བདེན་པ་དག་པ་ནི། །རིམ་པ་བཞི་པ་ཞེས་བརྗོད་དོ། །བདེན་གཉིས་སྦྱོར་བ་གང་ཡིན་པ། །ཟུང་དུ་འཇུག་ཅེས་ལྔ་པ་སྟེ། །འདི་ནི་སྒྲུབ་པའི་ཡན་ལག་མཆོག །རྒྱུད་ཀུན་གྱི་ནི་མདོར་བསྡུས་པའོ། །ཞེས་དང་། །སྔགས་དང་སེམས་དང་ལུས་དང་ནི། །རྣམ་དག་དང་ནི་ཟུང་འཇུག་སྟེ། །རིམ་པ་ལྔ་ཡིས་བསྡུས་པའི་དོན། །ཤེས་ན་མཐའ་དྲུག་ལ་འཇུག་ཡིན། །ཞེསདང་། འཕགས་པ་ལྷས། སྔགས་དང་། ཕྱག་རྒྱ་དང་། བདག་དང་། ཆོས་དང་། ལྷ་ཡི་དེ་ཁོ་ན་ཉིད་དེ་ལྟར་གསུངས་སོ། །གཞུང་འདི་ས་མནྟ་བྷ་དྲ་དང་། ནགས་ཚོས་བསྒྱུར་བའོ།། ༈ །།པཎྜི་ཏ་ལྷན་ཅིག་སྐྱེས་པའི་རྡོ་རྗེས་མཛད་པ་དེ་ཁོ་ན་ཉིད་བཅུ་པའི་རྒྱ་ཆེར་འགྲེལ་ལས། དེ་ལྟར་རང་གི་ངོ་བོ་མ་རྟོགས་པས་ཕྱིན་ཅི་ལོག་གི་ངོ་བོར་བཞག་པ་ཡང་ཉོན་མོངས་པ་དང་། ལས་དང་སྐྱེ་བ་རྣམས་ཀྱིས་འཁོར་བ་འབྱུང་བའི་ཕྱིར་རྟོག་པ་རྣམས་སོ་སོར་སྣང་བར་འགྱུར་ཏེ། འདི་རྣམས་རང་གི་ངོ་བོ་མ་རྟོགས་པ་ནི་གློ་བུར་གྱི་དྲི་མ་ཞེས་བརྗོད་དོ། །ཞེས་དང་། གློ་བུར་འདི་དག་ཤིན་ཏུ་སྤངས་པ་ནི་རྣམ་པར་དག་པ་བཞེད་དོ། །དེ་སྐད་དུ་མགོན་པོ་བྱམས་པས། །

---

^{[མ་དཔེ་གཟིགས་ན་འདིར་གནོན།]}

ཀུན་ནས་ཉོན་མོངས་མེད་རྣམ་དག །དེ་ནི་དྲིར་བཅས་དྲི་མ་མེད། །ཆུ་ཁམས་གསེར་དང་ནམ་མཁའ་བཞིན། །དག་པ་བཞིན་དུ་དག་པར་འདོད། །གལ་ཏེ་རྣམ་དག་དེ་མ་འགྱུར། །ལུས་ཅན་ཐམས་ཅད་གྲོལ་བར་འགྱུར། །གལ་ཏེ་ཉོན་མོངས་དེ་མ་འགྱུར། །འབད་པ་འབྲས་བུ་མེད་པར་འགྱུར། །ཞེས་པའོ། །དེ་ལྟར་ཐམས་ཅད་འདིར་བསྒྲུབ་པར་བྱ་བ་དང་། སྒྲུབ་པར་བྱེད་པའི་ཐ་སྙད་ཉིད་ནི་ཀུན་རྫོབ་ཉིད་དོ། །སངས་རྒྱས་དང་རྡོ་རྗེ་འཛིན་པ་ཉིད་ནི་ཀུན་རྫོབ་ལ་རབ་ཏུ་བསྒྲུབ་པར་བྱའོ། །དོན་དམ་པར་དེ་ལ་དེ་བཞིན་ཉིད་ནི་ཉོན་མོངས་པ་དང་ལྡན་པ་མ་ཡིན་ལ། །རྣམ་པར་དག་པའང་མ་ཡིན་ཏེ། །དེ་སྐད་དུ་ལ༑ ཡང་དེ་ཉིད་ཀྱིས། །ཉོན་མོངས་མ་ཡིན་མི་མོངས་མིན། །དེ་ཉིད་དག་དང་མ་དག་མིན། །ཞེས་པའོ། །ཞེས་སོགས་དང་། ཇི་སྐད་དུ། །ཏིང་ངེ་འཛིན་གྱི་རྒྱལ་པོ་ལས། །ངེས་པ་དོན་གྱི་མདོ་སྡེའི་བྱེ་བྲག་ཤེས། །བདེ་གཤེགས་ཇི་ལྟར་བསྟན་པའི་སྟོང་པ་ཉིད། །སླར་ཡང་གང་ཟག་སེམས་ཅན་སྐྱེས་བུ་རྣམས། །ཆོས་རྣམས་ཐམས་ཅད་དྲང་བའི་དོན་དུ་ཤེས། །ཆོས་བདག་མེད་ལ་སོ་སོར་རྟོག་པར་བྱེད། །སོ་སོར་རྟོག་པས་གལ་ཏེ་སྒོམ་པར་བྱེད། །དེ་ལ་རྒྱུ་ཡིས་མྱ་ངན་འདས་ཐོབ་འགྱུར། །གང་ཡང་བདག་གཞན་ཞི་བའི་རྒྱུར་མི་འགྱུར། །ཆོས་ཀུན་རང་བཞིན་རྟག་ཏུ་སྟོང་པ་ཉིད། །རྒྱལ་སྲས་ཉོན་མོངས་རྣམ་པར་

---

^{[མ་དཔེ་གཟིགས་ན་འདིར་གནོན།]}

བསྒོམ་པ་ནི། །ཀུན་གྱིས་ཀུན་ཏུ་ཐམས་ཅད་སྟོང་པར་འགྱུར། །ཉི་ཚེའི་སྟོང་ཉིད་མུ་སྟེགས་ཅན་རྣམས་ཀྱི། །ཞེས་དང་། དབུ་མ་འཇུག་པར། དེ་ལྟར་གང་ཕྱིར་ཤིན་ཏུ་ཟབ་མོའི་དངོས་པོ་ནི། གང་གིས་མི་ཤེས་དེ་ནི་རབ་ཏུ་བརྟེན་བྱ་བ། །ཀུན་གཞི་ཡོད་ཅིང་གང་ཟག་སྟོང་ཉིད་ཡོད། །ཕུང་པོ་འདི་དག་ལ་ནི་འབའ་ཞིག་དང་། །འཇིག་ཚོགས་ལྟ་བ་སྤངས་པའི་སངས་རྒྱས་ཀྱིས། །ང་དང་བདག་ཅེས་ཇི་ལྟར་སྟོན་པ་ལྟར། །དེ་ལྟར་དངོས་པོ་ཐམས་ཅད་རང་བཞིན་གྱིས། །མེད་པ་དྲང་པའི་དོན་ནི་སྟོན་པར་འགྱུར། །ཞེས་དང་། འོད་གསལ་བ་ཞེས་བྱ་བ་ནི། རང་བཞིན་གྱིས་དྲི་མ་སྤངས་པའི་རང་རིག་པ་སྟེ། རབ་ཏུ་ཤེས་རབ་རང་བཞིན་རྟོགས་པས་སྒྲོ་འདོགས་དང་སྐུར་པ་འདེབས་པ་དག་སྤངས་པའི་དབུ་མ་རབ་ཏུ་མི་གནས་པ་རྟོགས་པའོ། །ཤེས་རབ་ཀྱིས་ནི་སྒོ་འདོགས་པ་སྤོང་བའི་ཕྱིར་རོ། །ཐབས་ཀྱིས་ནི་སྐུར་པ་འདེབས་པ་སྤོང་བའི་ཕྱིར་རོ། །ཞེས་དང་། ཟུང་དུ་འཇུག་པ་དེ་བཞིན་ཉིད་ཀྱི་བདག་ཉིད། བླ་མ་དམ་པའི་མན་ངག་གིས་རིག་པ། དེ་ཉིད་སྟོང་པ་ཉིད་དང་། སྙིང་རྗེ་དབྱེར་མེད་པ་དོན་དམ་པ་བྱང་ཆུབ་སེམས་ཀྱི་མཚན་ཉིད་དོ། །ཞེས་སོ། །ཡང་རྟོག་གེ་སྐམ་པོ་འབའ་ཞིག་བྱིས་པའི་དམིགས་པ་ནི་མ་ཡིན་ཏེ། དེ་ཁོ་ན་ཉིད་ཤེས་པའི་སྐལ་བ་མེད་པའི་ཕྱིར་རོ། །དེ་

---

^{[མ་དཔེ་གཟིགས་ན་འདིར་གནོན།]}

ཉིད་ཡང་འདིར་རྟོག་གེ་ངན་པས་ཞེས་བྱ་བར་བསྟན་ཏོ། །དེ་སྐད་དུའང་བཅོམ་ལྡན་འདས་ཀྱིས། རང་བཞིན་མ་ཡིན་བརྟགས་པ་མིན། །དངོས་པོ་མ་ཡིན་ཀུན་གཞི་མིན། །གང་ལ་བྱིས་པའི་རྟོག་པས་བརྟགས། །རྟོག་གེ་ངན་པ་རོ་དང་འདྲ། །ཞེས་བྱ་བ་ལ་སོགས་པའོ། །དེའི་ཕྱིར་རྟོག་གེའི་སྤྱོད་ཡུལ་ཡང་མ་ཡིན་ནོ། །རྟོག་གེ་སྐམ་པོ་རྣམ་པར་སྤངས། །ཞེས་བྱ་བ་ལ་སོགས་པའོ། །ཞེས་སོ། །འདི་པཎྜི་ཏ་ཀ་ལྱཱ་ཎ་བརྨ་དང་། ལོ་ཙཱ་བ་ཛྙཱ་ནཱ་ཀ་ར་མཚུར་གྱིས་བསྒྱུར་བའོ།། ༈ །།སློབ་དཔོན་བཛྲ་པཱ་ཎིས་མཛད་པའི་རྡོ་རྗེའི་ཚིག་ཅེས་བྱ་བར། །དགའ་བ་དང་པོ་འགྲོ་བ་སྟེ། །མཆོག་ཏུ་དགའ་བའང་འགྲོ་བ་ཉིད། །དགའ་བྲལ་དགའ་བ་འགྲོ་བ་ཉིད། །ལྷན་ཅིག་སྐྱེས་པ་གསུམ་མི་དམིགས། །ཞེས་དང་། རང་རིག་པ་ཡི་ཡེ་ཤེས་འདི། །ངག་གི་སྤྱོད་ཡུལ་ལམ་ལས་འདས། །བྱིན་གྱིས་བརླབས་པའི་རིག་པ་གང་། །ཀུན་མཁྱེན་ཡེ་ཤེས་དེ་རང་བཞིན། །ཞེས་དང་། སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་རྣམ་པར་རབ་ཏུ་གནས། །གཅིག་པུའི་རྣམ་པའི་བདེ་ཆེན་པོ། །ཡང་དག་དབང་བསྐུར་ལས་ཤེས་བྱ། །ཞེས་དང་། ཨེ་ཡི་ཆ་བྱད་བཟང་པོ་གང་། །དབུས་སུ་ཝཾ་གྱིས་རྣམ་པས་བརྒྱན། །བདེ་བ་ཐམས་ཅད་འབྱུང་བའི་གནས། །སངས་རྒྱས་རིན་ཆེན་དཀོན་མཆོག །ཟ་མ་ཏོག །ཅེས་སོ། །སློབ་དཔོན་དེ་

---

^{[མ་དཔེ་གཟིགས་ན་འདིར་གནོན།]}

ཉིད་དང་། མཚུར་གྱིས་བསྒྱུར་བའོ། །ཇི་ལྟར་དྲི་མེད་སྦྲང་རྩིའི་བཅུད། །བཏུང་བས་མྱོས་པའི་བུང་བ་བཞིན། །ཡང་དག་ཡེ་ཤེས་རོས་ཚིམས་པའི། །རྣལ་འབྱོར་མཆོག་གི་ཚུལ་འདིའོ། །ཤུ་བྷ་མསྡུ་སརྦ་ཛ་ག་ཏཱམ།། ༈ །།སློབ་དཔོན་བྷི་དྷི་ཀརྨས་མཛད་པའི་ཕྱག་རྒྱ་བཞི་༢ ༣གཏན་ལ་དབབ་པའི་འགྲེལ་པ་རིན་པོ་ཆེའི་སྙེ་མ་ཞེས་བྱ་བ་ལས། ཕྱག་རྒྱ་ནི་མི་འདའ་བའི་དོན་ཏོ། །དཔེ་དང་། ཡོད་པ་དང་། ཡིན་པས་མི་འདའ་བའོ། །དེ་ཡང་ནམ་མཁའ་ལྟ་བུ་དང་། གྱད་ཀྱི་ནོར་བུ་ལྟ་བུ་དང་། སྡུག་བསྔལ་གྱིས་བརྟུལ་བ་ལྟ་བུ་ཡིན་ལ། ཆེན་པོ་ནི་ལས་དང་ཆོས་དང་དམ་ཚིག་དང་གསུམ་གྱི་མཆོག་ཏུ་གྱུར་པའི་ཕྱིར་ཟླ ཡང་ཡིན་པས་ན་ཕྱག་རྒྱ་ཆེན་པོའོ། །ཞེས་དང་། ཕྱག་རྒྱ་ཆེན་པོ་ལ་འབྲས་བུར་བཞག་པའི་རྒྱུ་མཚན་གང་ཡིན་ན། རང་བཞིན་མེད་པའི་ངོ་བོ་ཉིད་སྒྲོ་སྐུར་གྱིས་དབེན་པ། ཞེས་བྱ་བ་སྟེ། རང་བཞིན་མེད་ཝཱ པ་ནི། རྣམ་པ་སྣ་ཚོགས་པ་དང་། རྣམ་པར་སྨིན་པ་དང་། རྣམ་པར་ཉེད་པའི་གནས་སྐབས་གསུམ་ནི་དྲི་མ་དང་བཅས་པ་སྟེ། དེ་དག་གི་རང་བཞིན་མེད་པའོ། །དེ་ལྟ་བུའི་ངོ་བོ་ཉིད་ནི་དགག་སྒྲུབ་སྒྲོ་སྐུར་གྱི་དྲི་མ་དབེན་པའོ། །འོ་ན་ཕྱག་རྒྱ་ཆེན་པོ་ཉིད་ཇི་ལྟ་བུ་ཞེ་ན་རེ་བ་བཅད་པ་སྟེ། ཤེས་བྱ་ལ་སོགས་པའི་སྒྲིབ་པ་སྤངས་པ། ཞེས་པ་སྟེ། ཤེས་བྱའི་སྒྲིབ་པ་ནི་ཉོན་མོངས་པ་བག་ལ་ཉལ་ཤིན་ཏུ་ཕྲ་བ་རྣམས་སོ། །

---

^{[མ་དཔེ་གཟིགས་ན་འདིར་གནོན།]}

སོགས་པ་ནི་དེ་ལས་གཞན་པའི་རགས་པ་སྤོང་སླ་བ་རྣམས་ཀྱང་ངོ་། །སྤངས་པ་ནི་སེར་སྣའི་གཉེན་པོར་སྦྱིན་པ་ལ་སོགས་པའི་ཕྱོགས་ཀྱིས་སྤོང་འདོད་མེད་པར་གྱུར་པ་ནི་གཉེན་པོ་ལ་རེ་བ་མེད་པའོ། །བསྐྱེད་རྫོགས་ཀྱིས་སྦྱངས་པ་ལས་འབྲས་བུ་ཞིག་ཐོབ་སྙམ་པ་མེད་པ་ནི་དེ་ཁོ་ན་ཉིད་ལ་རེ་བ་མེད་པའོ། །འབྲས་བུ་རྫོགས་པའི་སངས་རྒྱས་ཞིག་གུད་ན་ཐོབ་པའི་བློ་མེད་པ་ནི་འབྲས་བུ་ལ་རེ་བ་མེད་པའོ། །དེ་ཡང་ཉོན་མོངས་པ་ལམ་དུ་སློང་བ་ཆོས་ཐམས་ཅད་ཀྱི་དེ་བཞིན་ཉིད་བསྒོམ་དུ་མེད་པ་དང་། བདེ་བ་ཆེན་པོ་རང་ཆས་སུ་ཡོད་པའི་ཕྱིར་རོ། །དེ་ཡང་ཆོས་ལྔ་ལྡན་ཏེ། སྟོན་ཀའི་ཉི་མ་ཕྱེད་ཀྱི་ནམ་མཁའ་ལྟར་དྲི་མ་མེད་པ། ཞེས་པས་བསྟན། དེ་ལ་སྟོན་ཀའི་ཉི་མ་ཕྱེད་ཀྱི་ནམ་མཁའ་ནི་སྤྲིན་དང་། འཇའ་ཚོན་དང་། ན་བུན་དང་། ཁུག་སྣ་དང་། རླུང་གིས་མ་དཀྲུགས་བདག་ནི་མ་སྐྱེས་ཤིང་། རང་བཞིན་མེད་པ། འདས་པ་དང་མ་འོངས་པ་དང་ད་ལྟར་གྱི་དུས་སུ་ཁྱབ་པ་དང་། གདོད་མ་ནས་མི་འགྱུར་བ་དང་། འཁོར་བ་ཐམས་ཅད་ལ་ཁྱབ་བཞིན་དུ་ཕྱག་རྒྱ་ཆེན་པོ་ཡང་ངོ་བོ་ཉིད་ཀྱིས་མ་སྐྱེས་པ་དང་། མཐའ་བཞིའི་རང་བཞིན་མེད་པ་དང་། འཁོར་བའི་དུས་དང་། སྦྱངས་པ་དང་། ཁྱད་པར་དུ་སྦྱངས་པ། བླ་ན་མེད་པ་དང་། མངོན་དུ་གྱུར་པའི་དུས་རྣམས་སུ་ཕྱག་རྒྱ་ཆེན་པོ་ལས་མི་འགྱུར་ཏེ། དཔེར་ན་ནམ་མཁའ་ལ་སྤྲིན་

---

^{[མ་དཔེ་གཟིགས་ན་འདིར་གནོན།]}

ལ་སོགས་པ་སྣང་ཡང་ནམ་མཁའ་ལས་མི་འགྱུར་བ་དང་། ཡུངས་ཀར་ལ་མར་གྱིས་ཁྱབ་པ་བཞིན་དུ་འཁོར་བ་ལ་ཁྱབ་པའོ། །དེ་ལ་སྐུའི་བྱེ་བྲག་ཇི་ལྟར་བཞག་ཅེ་ན། ཡོན་ཏན་ཐམས་ཅད་ཀྱི་འབྱུང་གནས། །ཞེས་བྱ་ལ། ཡོན་ཏན་ནི་སྐུ་བཞིའོ། །དེ་ཡང་རང་གི་ཉམས་སུ་མྱོང་བ་ལ་གནས་ཏེ། སྒྲོ་སྐུར་དང་བྲལ་བ་དང་། ཉམས་སུ་མྱོང་བ་དང་། སྣ་ཚོགས་སུ་ཤར་བ་དང་། གཉུག་མའི་ངོ་བོར་གཅིག་པའོ། །དེ་ལྟ་བུའི་ཡེ་ཤེས་ནི། ཕུན་སུམ་ཚོགས་པ་ཐམས་ཅད་ཀྱི་གཞིར་གྱུར་པ། ཞེས་གསུངས། དེ་ཡང་། ཕུན་སུམ་ཚོགས་པ་ནི་ཇི་ལྟར་འདོད་པའི་བདེ་བ་ཚོགས་པའོ། །ཐམས་ཅད་ནི་འཁོར་འདས་ཐམས་ཅད་ཀྱི་བདེ་བའོ། །གཞིར་གྱུར་པ་ནི་འབྱུང་བའི་གནས་སུ་གྱུར་པའོ། །དེ་ཡང་ཇི་ལྟར་ལྟ་ཞེ་ན། ལྷུན་གྱིས་གྲུབ་པ་སྟེ་གདོད་མ་ནས་སངས་རྒྱས་པ་ནི་དག་པའོ། །བདེ་སྟོང་ཟུང་འཇུག་ནི་རྟག་ཆད་ཀྱི་མཐའ་ལས་བྲལ་བ་སྟེ་དམ་པའོ། །བསམ་གྱིས་མི་ཁྱབ་པ་ནི་ཡེངས་པའི་མུ་དང་བྲལ་བའོ། །དེ་ལས་གཞན་དོན་འབྱུང་ངམ་ཞེ་ན། དམིགས་པ་མེད་པའི་སྙིང་རྗེ་ཆེན་པོའི་ལུས་ཞེས་བྱ་བ་ལ། །དམིགས་པ་མེད་པའི་སྙིང་རྗེ་ཆེན་པོ་དང་། སྨོན་ལམ་ཐུན་མོང་མ་ཡིན་པའི་སྟོབས་ཀྱིས། ལུས་གཟུགས་སྐུ་རྣམ་པ་གཉིས། སྣང་བ་ཤིན་ཏུ་རྣམ་པར་དག་པ་དང་། དག་པ་ལས་འབྱུང་ངོ་། །ལུས་དེ་ཁོ་ན་ཉིད་ལས་གཞན་ནམ་ཞེ་ན་བསྟན་

---

^{[མ་དཔེ་གཟིགས་ན་འདིར་གནོན།]}

པར་བྱ་སྟེ། བདེ་བ་ཆེན་པོའི་རང་བཞིན་གང་ཡིན་པའི་ངོ་བོ་ཉིད་དོ། །ཞེས་བྱ་བ་སྟེ། བདེ་བ་ཆེན་པོ་ནི་སྒྲོ་སྐུར་དང་བྲལ་བ། ཡིད་ལ་མི་བྱེད་པ་ཉིད་ཀྱི་སྐུའོ། །དེ་དག་གི་རང་བཞིན་གང་ཡིན་པ་ནི་གཟུགས་ཀྱི་སྐུ་སྟེ་ངོ་བོ་ཉིད་དོ། །ཞེས་སོ། །འདི་རྣམས་ཕྱག་རྒྱ་ཆེན་པོའི་རང་བཞིན་ཅུང་ཟད་རྒྱས་པར་བཤད་པར་སྟེ་གཞུང་དེ་ཉིད་ལས་བཏུས་པའོ། །ས་ར་ཧའི་དོ་ཧ་མཛོད་ཀྱི་བཀའ་འགྲེལ་སློབ་དཔོན་ཆེན་པོ་དཔལ་གཉིས་སུ་མེད་པའི་རྡོ་རྗེས་༢༧མཛད་པ། དངུལ་ཆུ་བྲི་བེ་རོ་ཙ་ནས་བསྒྱུར་བ་ལས། དགེ་ཚུལ་ནི་བསླབ་པའི་གནས་བཅུ་པའོ། །དགེ་སློང་ནི་བསླབ་པའི་གནས་ཉིས་བརྒྱ་ལྔ་བཅུ་པའོ། །གནས་བརྟན་ནི་བསྙེན་པར་རྫོགས་ནས་ལོ་བཅུ་ལོན་པའོ། །བནྡེ་ནི་དེ་རྣམས་ལ་གཞན་གྱིས་ཕྱག་འཚལ་བའི་ཆེད་དུ་རབ་ཏུ་བྱུང་བར་ཁས་བླངས་ནས་བསོད་སྙོམས་དང་། བསླབ་པ་སློབ་ཀྱང་མཆོག་ནི་མ་ཡིན་ཏེ། དེ་ཉིད་མི་ཤེས་པའི་ཕྱིར། ཞེས་སོགས་གསུངས། །ཡུལ་རྣམས་བསྟེན་པས་ཡུལ་གྱིས་ནི། །གོས་པར་འགྱུར་བ་མ་ཡིན་ཏེ། །ཇི་ལྟར་ཆུ་ལས་ཨུཏྤལ་བླངས་ཀྱང་ཆུ་ཡིས་མ་རེག་བཞིན། ཞེས་གསུངས་ཏེ། ཇི་ལྟར་ཆུ་ཡི་ནང་དུ་གྲུ་ལ་ཞུགས་ནས་ཨུཏྤལ་བླངས་ཀྱང་ཆུ་ཡིས་མ་གོས་པ་བཞིན་དུ། དེ་ཁོ་ན་ཉིད་ཤེས་པའི་རྟོགས་པ་ཡོད་ན་འདོད་པའི་ཡོན་ཏན་ལྔ་ལ་ལོངས་སྤྱོད་ཀྱང་ཉོན་མོངས་པས་གོས་

---

^{[མ་དཔེ་གཟིགས་ན་འདིར་གནོན།]}

པར་མི་འགྱུར་རོ། །ཞེས་སོགས་གསུངས་ཏེ། འདི་འགྲེལ་༡༨༧ཤིན་ཏུ་ལེགས་པར་༢༧ཡོད་༢༨དོ།། ༈ །།སློབ་དཔོན་མེ་ཏྲི་པ་གཉིས་མེད་རྡོ་རྗེས་མཛད་པའི་མི་ཟད་པའི་གཏེར་མཛོད་ཡོངས་སུ་གང་བའི་གླུ་ཞེས་བྱ་བ་གཉུག་མའི་དེ་ཉིད་རབ་ཏུ་སྟོན་པའི་རྒྱ་ཆེར་བཤད་པ་ཞེས་བྱ་བ། རྣལ་འབྱོར་བསོད་སྙོམས་པ་པྲ་ཛྷཱ་ཤྲཱི་ཛྙཱ་ན་ཀཱིརྟིས་རང་འགྱུར་སུ་མཛད་པ་དེར། རི་ཁྲོད་ཀྱི་མུ་སྟེགས་རྣལ་འབྱོར་སྤྱོད་པ་རྣམས། རྣལ་འབྱོར་པ་ཆེན་པོ་ཏེ་ལོ་པ་ཞེས་བྱ་བ་དཔལ་ཧེ་རུ་ཀ་བཟང་པོའི་བརྟུལ་ཞུགས་ལ་ཞུགས་ཏེ་གྲུབ་པ་ཐོབ་པ། མུ་སྟེགས་པ་ཀི་ན་ཉི་ཞེས་བྱ་བས་མཐོང་ནས་དེ་དང་ཆོས་མཚུངས་པར་འཁྲུལ་པར་སྤྱོད་པའི་རྗེས་འབྲང་ལས་བྱུང་བ་སོགས་སོ་སོའི་འཁྲུལ་ཚུལ་རྒྱས་པར་བཤད་འདུག་གོ །དེའི་གཤམ་དུ། །སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །སྣང་བ་ལྷན་ཅིག་སྐྱེས་པ་ཆོས་སྐུའི་འོད། །སྣང་སྟོང་དབྱེར་མེད་ལྷན་ཅིག་སྐྱེས་པ་སྟེ། །དེ་ཉིད་ཆོས་སྐུའི་དགོངས་པ་ཆོས་སྐུ་ཉིད། ཅེས་སོགས་གསུངས་སོ།། ༈ །།སློབ་དཔོན་ཐར་པའི་འབྱུང་གནས་སྦས་པས་དོ་ཧ་མཛོད་ཀྱི་བཀའ་འགྲེལ་༢༡། རྒྱལ་བའི་ལྷ་༢༦༤ དང་། རྒྱ་ལོ་ཙཱ་བས་བསྒྱུར་༢༨ ༣བ་ཡང་ཡོད་དོ། །འདི་གསུམ་ཀ་མགོར། དོ་ཧ་མཛོད་གྱི་གླུ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དུག་སྦྲུལ་ལྟ་བུའི་སྐལ་མེད་ནི། སོགས་ནས་དེ་ཁོ་ན་ཉིད་རྣལ་

---

^{[མ་དཔེ་གཟིགས་ན་འདིར་གནོན།]}

དུ་མཚོན་པ་དོན་དམ་པའི་ཡི་གེ་རྫོགས་སོའི་མཐའ་ཅན་དེ་གའི་འགྲེལ་པ་ཁོ་ནར་སྣང་ནའང་། གཞུང་གི་ཟུར་ཅུང་ཟད་མི་འདྲ་བ་དེར་བཅོས་པར་སྣང་ངོ་། །མངྒ་ལཾ།། ༈ །།ད་ནི་དཀྱིལ་འཁོར་ཆེན་པོ་བཀོད་པའི་རྗེས་སུ་འབྲངས་ནས་ས་ཙྪ་གདབ་པའི་ཆོ་ག་བཤད་པར་བྱ་སྟེ། ན་མསྶ་མནྟ་བུདྡྷ་ནཱཾ། ཨོཾ་བཛྲ་ཨཱ་ཡུ་ཥེ་སྭཱ་ཧཱ། འཇིམ་པ་བླང་བའི་སྔགས་སོ། །ཨོཾ་བཛོད་བྷ་བཱ་ཡ་སྭཱ་ཧཱ། འབི་འབི་བྱ་བའི་སྔགས་མཚིག་སོ། །ཨོཾ་ཨ་ར་ཛེ་བི་ར་ཛེ་སྭཱ་ཧཱ། སྣུམ་བསྐུ་བའི་སྔགས་སོ། །ཨོཾ་བཛྲ་དྷརྨ་དྷཱ་ཏུ་གནྡྷེ་སྭཱ་ཧཱ། རྒྱར་གཞུག་པའི་སྔགས་སོ། །ཨོཾ་བཛྲ་མུད་ར་ཨཱ་ཀོ་ཊ་ཡ་སྭཱ་ཧཱ། གདབ་པའི་སྔགས་སོ། །ཨོཾ་དྷརྨ་ཨཱ་ཡུ་ཥེ་སྭཱ་ཧཱ། སྤྱན་དྲངས་པའི་སྔགས་སོ། །ཨོཾ་སུ་པྲ་ཏིཥྛ་བཛྲ་ཡ་སྭཱ་ཧཱ། བཞུགས་སུ་གསོལ་བའི་སྔགས་སོ། །ཨོཾ་སརྦ་ཏ་ཐཱ་ག་ཏ་མ་ཎི་ཤ་ཏ་དཱི་པ་ཏེ་ཛཱ་ལ་ཛཱ་ལ་དྷརྨ་དྷཱ་ཏུ་གནྡྷེ་སྭཱ་ཧཱ། རབ་ཏུ་གནས་པའི་སྔགས་སོ། །ཨོཾ་སྭ་བྷཱ་བ་བི་ཤུདྡྷེ་ཨ་ཧ་ར་ཨ་ཧ་ར་ཨཱ་གཙྪ་ཨཱ་གཙྪ་དྷརྨ་དྷཱ་ཏུ་གནྡྷེ་སྭཱ་ཧཱ། གཤེགས་སུ་གསོལ་བའི་སྔགས་སོ། །ཨོཾ་ཨཱ་ཀ་ཤ་དྷརྨ་དྷ་ཏུ་གནྡྷེ་སྭཱ་ཧཱ། བཟོད་པར་གསོལ་བའི་སྔགས་སོ། །དེ་ལྟ་བུ་ནི་སཙྪ་གདབ་པའི་སྔགས་སོ། །ན་མོ་བྷ་ག་ཝ་ཏེ་བེ་རོ་ཙ་ན་པྲ་བྷ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྒ་ཏེ། སཾམྱཀྑཾ་བུདྡྷ་ཡ། ཏདྱ་ཐཱ། ཨོཾ་སུམྦྷེ་སུམྦྷེ། ས་མ་ཡེ་པྲ་ས་མ་ཡེ། ཤཱནྟེ་ཤཱནྟེ། ས་མ་རོ་པེ། ཨ་ན་ལནྡྷེ། ཏཐཱ། ཡ་ཤོ་བ་ཏི།

---

^{[མ་དཔེ་གཟིགས་ན་འདིར་གནོན།]}

མ་ཧཱ་ཏེ་ཛ་ནི་རྐུ་མེ། ནིརྭ་ན། སརྦ་བུདྡྷ་ཨདྷིཥྛན་ཨདྷིཥི་ཏེ་སྭཱ་ཧཱ། ཞེས་བྱ་བའི་གཟུངས་འདི་འཇིམ་པའམ། བྱེ་མ་ལ་ལན་ཉི་ཤུ་རྩ་གཅིག་གི་བར་དུ་བཟླས་ཏེ། མཆོད་རྟེན་བྱས་ན། དེ་ལ་རྡུལ་ཕྲན་བ་ཇི་སྙེད་ཡོད་པ་དེ་སྙེད་ཀྱི་བྱེ་མ་སྙེད་ཀྱི་འགྱུར་གྱི་མཆོད་རྟེན་བྱས་པའི་བསོད་ནམས་ཐོབ་པར་འགྱུར་རོ། །ས་བཅུའི་དབང་ཕྱུག་ཏུ་འགྱུར་རོ། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་རོ་ཞེས་བཅོམ་ལྡན་འདས་རྣམ་པར་སྣང་མཛད་ཀྱིས་གསུངས་ཏེ། གཟུངས་འདི་ནི་ཕན་ཡོན་དཔག་ཏུ་མེད་དོ། །ཡེདྷརྨཱ་ཧེ་ཏུ་པྲ་བྷ་བ་ཧེ་དུནྟེ་ཥཱན་ཐཱ་ག་ཏོ་ཧྱ་བ་ད་ཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿ ཚིགས་སུ་བཅད་པས་རབ་གནས་བྱས་ལ། ན་མོ་བྷ་ག་ཝ་ཏེ་རཏ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡཱ་ཧརྟེ་སཾམྱཀཾ་བུདྡྷཱ་ཡ། ཏདྱ་ཐཱ། ཨོཾ་རཏྟེ་རནྡྷེ་མ་ཧཱ་རཏྣ་བོ་དྷི་སྭཱ་ཧཱ། ཞེས་བྱ་བའི་གཟུངས་ལ་སོགས་པ་འདི་བརྗོད་ཅིང་མཆོད་རྟེན་ལ་ཕྱག་འཚལ་བ་སོགས་བྱས་ན། མཆོད་རྟེན་གཅིག་ལ་ཕྱག་བྱས་པས། མཆོད་རྟེན་བྱེ་བ་ལ་ཕྱག་ལ་སོགས་པ་བྱས་པར་འགྱུར་རོ། །འཇིམ་པ་ལ་སོགས་པ་ལ་མཆོད་རྟེན་བྱ་བའི་ཆོ་གའོ། །ཞེས་དང་། འགྲོ་བའི་ལས་འདི་བདག་གིས་བྱས་པ་ཡིས། རིང་པོར་མི་ཐོགས་འཇིག་རྟེན་སངས་རྒྱས་ནས། །འགྲོ་ལ་ཕན་ཕྱིར་ཆོས་ནི་སྟོན་བྱེད་ཅིང་། །སྡུག་བསྔལ་མང་པོས་མནར་བའི་སེམས་ཅན་གྲོལ་

---

^{[མ་དཔེ་གཟིགས་ན་འདིར་གནོན།]}

གྱུར་ཅིག །ཅེས་དང་། ཁ་ཟས་ཀྱི་བྱ་བ་ཟིན་རྗེས། །རྒྱལ་པོ་དང་ནི་ཡོན་བདག་དང་། །སེམས་ཅན་ཕུང་པོ་གཞན་དག་ཀྱང་། །ཚེ་དང་ནད་མེད་ཕུན་སུམ་ཚོགས། །རྟག་ཏུ་བདེ་བ་ཐོབ་གྱུར་ཅིག །ཅེས་བརྗོད་དོ། །ཞེས་དང་། །དཀྱིལ་འཁོར་ལ་སོགས་ཆོ་ག་ཡིས། །ཡང་དག་ཤེས་རབ་ཕ་རོལ་ཕྱིན། །རྟག་ཏུ་མཆོད་ཅིང་བཀླག་པར་བྱའོ། །ཚིགས་བཅད་གཅིག་དང་ཚིགས་བཅད་བཞི། །ཚིགས་བཅད་གཉིས་དང་སྒོ་དྲུག་པའི། །གཟུངས་དང་བཟང་པོ་སྤྱོད་པ་དང་། །ཕུང་པོ་གསུམ་པ་དུས་གསུམ་དུ། །ཡི་གེ་གཅིག་ནས་ཉེར་བཟུང་ནས། །གསུམ་གྱི་བར་དུ་མཉམ་བཞག་པས། །ཡི་དམ་ཉམས་པ་མེད་པ་ཡིས། །བློ་ལྡན་ཇི་ལྟར་རྙེད་པ་བཀླག །ཅེས་སོ། །འདི་དག་སློབ་དཔོན་གཉིས་མེད་རྡོ་རྗེས་མཛད་པའི་ལྟ་བ་ངན་སེལ་ལས་བཏུས་པའོ། །ཇི་ལྟར་དག་པའི་ཨུཏྤལ་མིག་སྨན་མདངས། །ཆུ་མཚོར་བརྟེན་ཀྱང་ཉམས་པ་མེད་པ་ལྟར། །འདོད་པའི་ཡུལ་རྣམས་བདག་གིར་མཛད་པའི་མོད། །ཆགས་བྲལ་བརྟུལ་ཞུགས་མཆོག་ཏུ་གྲུབ་དེས་སྲུངས། །སརྦ་མངྒ་ལཾ་ཤུ་བྷཾ་བྷ་བནྟུ།། ༈ །།སློབ་དཔོན་སྐྱེས་རབས་སྤྲིངས་ཡིག །ས་འཚོ་བྱིན་གྱིས་མཛད་པའི་ཆོས་སྨྲ་བ་དང་དམ་པའི་ཆོས་ཉན་པ་ལ་༡གུས་པར་བྱ་བའི་གཏམ་༤ལས། །བཅོམ་ལྡན་འདས་ཀྱིས་བཀའ་སྩལ་ཞིང་འདི་སྐད་དུ་གསུངས་སོ། །དགེ་སློང་གང་ཟག་

---

^{[མ་དཔེ་གཟིགས་ན་འདིར་གནོན།]}

གཉིས་པོ་འདིས་བསོད་ནམས་མང་པོ་བསྐྱེད་དེ་སྡིག་པའི་རྩ་བ་འབྱིན་ཞིང་བདུད་དང་གཡུལ་འགྱེད་པར་བྱེད། བདུད་ཀྱི་རྒྱལ་མཚན་སྙལ་བར་བྱེད། ཆོས་ཀྱི་རྒྱལ་མཚན་སྒྲེང་བར་བྱེད། དེ་བཞིན་གཤེགས་པའི་ཆོས་ཀྱི་འཁོར་ལོ་སྐོར་བར་བྱེད་དོ། །གཉིས་གང་ཞེ་ན་གང་གུས་པར་བྱས་ཏེ་ཆོས་འཆད་པ་དང་། གང་འདི་ན་གུས་པར་བྱས་ཏེ་ཆོས་ཉན་པའོ། །དེ་བས་ན་ཁྱེད་ཀྱིས་གུས་པས་ཆོས་བཤད་པར་བྱ་ཞིང་བླ་མ་རྣམས་ལ་གུས་པས་ཆོས་མཉན་པར་བྱའོ། །ཞེས་དང་། ཡང་འདི་སྐད་དུ། མཁས་པས་ནད་ལ་སྨན་པ་བཞིན། །ཐོག་མར་དམ་པ་བསྟེན་པར་བྱ། །ནད་སོས་བྱ་ཕྱིར་འབད་པ་ཡིས། །སྨན་ནི་སྨན་པ་ལ་ཉན་ལྟར། །དམ་པའི་ཆོས་ནི་མཉན་པར་བྱ། །བློ་དང་ལྡན་པའི་སྐྱེས་བུ་ཡིས། །སྨན་དེ་རྣམས་ནི་ཐོས་ནས་སུ། །གུས་པས་བསྟེན་པར་བྱེད་པ་ལྟར། །དེ་བཞིན་བྱས་པས་འཆི་མེད་འགྲུབ། །བདུད་རྩི་དེ་ནི་འཐུང་བ་ཡིས། །མཆོག་ནི་ཐོབ་པར་བྱེད་པ་ཡིན། །ཞེས་སོ། ༈ །ཆེད་དུ་བརྗོད་པའི་གཏམ་དྲང་སྲོང་ཆེན་པོ་ཟླ་བས་མཛད་པར། དེང་སང་སྐྱེ་བོ་ཕལ་ཆེར་རྙེད་དང་བཀུར་སྟིས་འཆིང་ཞིང་བདུད་དབང་སོང་། །ངན་སོང་རྒྱ་མཚོ་འཕེལ་ཞིང་དཀར་པོའི་ཕྱོགས་འགྲིབ་ལྷ་རྣམས་སྨྲེ་སྔགས་འདོན། །སྡོམ་བརྩོན་ཅན་དག་བསླབ་པ་ལྷོད་ཅིང་ཁྱིམ་པ་དག་གི་ཕོ་ཉར་འགྲོ། །ལྷ་མིན་ཕྱོགས་འཕེལ་ནག་པོ་ཀླུ་ཡིས་ནད་

---

^{[མ་དཔེ་གཟིགས་ན་འདིར་གནོན།]}

རྣམས་སྣ་ཚོགས་གཏོང་བར་འགྱུར། །ཞེས་གསུངས་སོ། ༈ །མི་རྟག་པའི་དོན་གྱི་གཏམ་སློབ་དཔོན་དགའ་བའི་དབང་པོས་མཛད་པར། །གང་ཕྱིར་འདུས་བྱས་ཐམས་ཅད་ནི། །རྐྱེན་གྱིས་གཞན་དུ་འགྱུར་བ་སྟེ། །རྩྭ་རྩེ་རླུང་གིས་བསྐྱོད་པ་ཡི། །ཐིམ་པ་བཞིན་དུ་མི་རྟག་གོ །ཞེས་དང་། གཟུགས་དང་ལོངས་སྤྱོད་ཐོས་པ་དང་། །ཚུལ་ཁྲིམས་ལ་སོགས་རྟག་མིན་ཏེ། །གང་ཡང་འདོད་ཆགས་བྲལ་བ་ཡང་། །ཀུན་ཏུ་གནས་པ་མ་མཐོང་ངོ་། །ཞེས་སོ།། ༈ །།ལེགས་པའི་ལམ་བསྟན་པ་སློབ་དཔོན་དཔའ་བོས་མཛད་པར། དེ་ལ་ཚུལ་ཁྲིམས་ཞེས་བྱ་བ་འདི་ནི་ཁ་ན་མ་ཐོ་བ་སྤང་བ་ཉིད་ཀྱི་བདེ་བ་ཉམས་སུ་མྱོང་བ་དང་ལྡན་པས་ན་ཚུལ་ཁྲིམས་སོ། །ཡང་ན་འདིས་འགྱོད་པ་མེད་པའི་བདེ་བ་བསྟེན་ཅིང་ཡོན་ཏན་གཅིག་ནས་གཅིག་ཏུ་བརྒྱུད་པའི་བསྔགས་པ་ལེན་པའི་ཕྱིར་ཚུལ་ཁྲིམས་ཏེ་དེ་ནི་ལེན་པའོ། །ཡང་ན་ཚུལ་ཁྲིམས་དང་ཏིང་ངེ་འཛིན་ལ་སྐད་ཀྱི་བྱིངས་ལས་ཚུལ་ཁྲིམས་སུ་འགྱུར་ཏེ། ལུས་དང་ངག་དང་ཡིད་ཀྱི་ལས་ཡང་དག་པར་སྡོམ་པ་ཞེས་བྱ་བའི་ཐ་ཚིག་གོ །དེ་ལ་བྲམ་ཟེའི་ལུགས་ཀྱི་ལེགས་པར་སྤྱོད་པ་རྣམ་གསུམ་གྱི་ཆོས་ལ་སྤྱོད་པར་འགྱུར་རོ། །ངག་གིས་ནི་བཞིའོ། །ཞེས་བྱ་བ་ལ་སོགས་པ་ཇི་སྐད་དུ་གསུངས་པ་ལྟ་བུའོ། །ཡང་ན་བསིལ་བར་གྱུར་བའི་ཚུལ་ཁྲིམས་ཏེ། དེ་ཡང་འཆི་བའི་མཐར་ཐུག་པའི་བར་

---

^{[མ་དཔེ་གཟིགས་ན་འདིར་གནོན།]}

གྱི་སེམས་ཀྱི་གདུང་བ་རབ་ཏུ་ཞི་བར་བྱེད་པའི་དོན་གྱིས་སོ། །ཞེས་དང་། སོ་སོར་ཐར་པ་ཞེས་བྱ་བ་ནི་སོ་སོར་ཐར་པས་ན་སོ་སོར་ཐར་པ་སྟེ། ལམ་འདི་ནི་སོ་སོར་ཐར་པར་འགྲོ་བས་སོ་སོར་ཐར་པ་སྟེ། དཔེར་ན་གྲོང་ཁྱེར་དུ་འགྲོ་བའི་ལམ་ལ་གྲོང་ཁྱེར་གྱི་ལམ་ཞེས་པ་དང་འདྲའོ། །ཡང་ན་སྡིག་པ་ལས་སོ་སོར་ཐར་པས་ན་སོ་སོར་ཐར་པའམ་སྡོམ་པ་ཞེས་བྱ་བ་ལ་སློབ་པར་བྱེད་པས་ན་དག་ཅིང་གྲོལ་བར་བྱེད་པ་ཡིན་པའམ། བསོད་ནམས་ཕུན་སུམ་ཚོགས་པ་ལ་ལྷག་པར་མོས་པ་མི་གཏོར་བར་བྱེད་པ་ཞེས་བྱ་བའི་ཐ་ཚིག་གོ །ཡང་ན་སྲུང་ཞིང་ཐར་པར་བྱེད་པས་ན་སྲུང་ཐར་ཅེས་བྱ་སྟེ། ཉེས་པར་སྤྱོད་པའམ་ཀུན་ནས་ཉོན་མོངས་པ་རྣམས་དང་ངན་འགྲོ་རྣམས་ལས་སྲུང་བར་བྱེད་པའི་ཕྱིར་རོ། །ཞེས་སོགས་ཤིན་ཏུ་མང་བར་བཤད་ཅིང་། དེ་ལ་ལྟུང་བའི་ཚོགས་ནི་རྣམ་པ་བདུན་ཏེ། ཕས་ཕམ་པ་དང་། དགེ་འདུན་གྱི་ལྷག་མ་༧ དང་། དེ་གཉིས་ཀའི་ཉེས་བྱས་སྦོམ་པོ་དང་། ལྟུང་བྱེད་དང་། སོ་སོར་བཤགས་པ་དང་། བཤགས་པར་བྱ་བ་དང་། བསྡམ་པར་བྱ་བའི་ཉེས་བྱས་ཞེས་བྱའོ། །དེ་ལ་ལྟུང་བ་འདིས་ཕས་ཕམ་པར་འགྱུར་བར་སྤྱོད་པས་ན་ཕས་ཕམ་པའོ། །ལྟུང་བ་འདི་འབྱུང་བར་འགྱུར་ན་མལ་སྟན་དང་ཁ་ཟས་ལ་སོགས་པ་དགེ་འདུན་རྒན་པོ་དང་བར་མ་དང་གཞོན་ནུའི་རྗེས་ལ་ལྷག་མར་སྤྱོད་པས་ན་དགེ་འདུན་ལྷག་མའོ། །

---

^{[མ་དཔེ་གཟིགས་ན་འདིར་གནོན།]}

བཤགས་པར་བྱ་བའི་ཉེས་པ་ཐམས་ཅད་ཀྱི་ནང་ནས་འདི་ཆེས་རགས་པས་ན་ཉེས་པ་སྦོམ་པོའོ། །མང་བའི་ཕྱིར་དང་རང་བཞིན་དང་བཅས་པའི་སྤང་བར་བྱ་བ་སྣ་ཚོགས་པ་ཉིད་ཡིན་པའི་ཕྱིར་སྤོང་བ་ལ་འབད་པས་གནས་པ་ཡིན་པས་ལྟུང་བའོ། །ངེས་པར་བཤགས་པར་བྱ་བ་ཡིན་པས་ན་སོ་སོར་བཤགས་པར་བྱ་བ་ཡིན་པའམ། སོ་སོར་བཤགས་པར་བྱ་བར་འོས་པ་ཡིན་པས་སོ་སོར་བཤགས་པར་བྱ་བའོ། །བཤགས་པས་སླར་བཅོས་པར་བྱ་བའི་ཉེས་བྱས་ཡིན་པས་བཤགས་པར་བྱ་བའི་ཉེས་བྱས་སོ། །སླར་དེ་ལྟར་མི་བགྱིད་དོ་ཞེས་ཡང་དག་པར་སྡོམ་པར་བྱེད་པས་སླར་གསོ་བ་ཡིན་པས་ན་བསྡམ་པར་བྱ་བའོ། །འདི་དག་ནི་ལྟུང་བའི་ཚོགས་བདུན་ཡིན་ནོ། །ཞེས་དང་། དཀའ་ཐུབ་ནགས་ཚལ་གནས་ལ་རྙེད་བཀུར་ཏེ། །མཛའ་པའི་སྒོ་ནས་དགྲ་བོ་འོངས་པ་ཡིན། །ཟླ་བའི་ཟེར་གྱིས་པདྨ་ཇི་བཞིན་དུ། །ལེགས་པར་རབ་འཇོམས་བརྟུལ་ཞུགས་ལྷོད་པར་བྱེད། །ཅེས་དང་། །ཚུལ་ཁྲིམས་རྒྱུ་ནི་དབང་པོ་སྡོམ་པ་ཡིན་པར་བཤད། །ཕུན་སུམ་ཚོགས་དེས་ཚུལ་ཁྲིམས་དྲི་མེད་དང་ལྡན་འགྱུར། །དེ་བས་ཐོས་པའི་རང་བཞིན་བལྟ་ལ་ངེས་དམིགས་ཏེ། །རང་གི་དབང་པོ་ཡུལ་ལ་འཕྱན་ལས་བསྲུང་བར་བྱ། །ལྕགས་ཀྱི་ཐུར་མ་རབ་ཏུ་འབར་བ་ཡིས། །མིག་ལ་བྱུགས་པར་གྱུར་པ་ཆེས་བླ་ཡི། །རང་གི་ངན་འགྲོའི་ལས་ནི་རྩོལ་བྱེད་པ། །

---

^{[མ་དཔེ་གཟིགས་ན་འདིར་གནོན།]}

གཟུགས་ལ་ཆགས་དང་སྡང་བས་བལྟ་མི་བྱ། །ལྕགས་ཁུ་འབར་བས་རྣ་བ་བཀང་བླ་ཡི། །བག་མེད་ཆགས་དང་དྲེགས་པ་འཕེལ་བྱེད་པ། །རྔོན་པའི་ཁོང་གླུ་དག་པས་ལྷག་པའི་སྒྲ། །ཉན་པ་བདག་ལ་ཕན་པས་ཐོས་མི་རུང་། །སྣ་ལ་བལྟས་ཏེ་སྤུ་གྲི་རྣོན་པོ་ནི། །བདར་བ་གཙང་བའི་ནད་ནི་བརྣག་བླ་ཡི། །བདག་ཉིད་སྡུག་བསྔལ་སྣ་ཚོགས་འཕེལ་བྱེད་པ། །དྲིར་ཆགས་དགྲ་བོ་རྣམ་པར་འཕེལ་མི་རུང་། །མེ་ལྕེ་འབར་བའི་མཚོན་ནི་རྣོན་པོ་ཡིས། །ལྕེ་ནི་མངོན་དུ་བཅད་པར་འགྱུར་བླ་ཡི། །སྐྱེ་བའི་སྡུག་བསྔལ་ལམ་ནི་སྐྱེད་བྱེད་པ། །རོ་ལ་ཆགས་པའི་སྡིག་བྱེད་དེ་ལྟ་མིན། །མཁས་པས་རང་ལུས་དགྲ་སྟ་རྣོན་པོ་ཡིས། །རྣམ་པར་གཏུབས་པས་འཇིག་པར་འགྱུར་བླ་ཡི། །དྲེགས་པ་སྣ་ཚོགས་སྲེད་པས་གདུངས་གྱུར་པས། །ཡུན་རིང་དམྱལ་བར་སྐྱེ་བར་འགྱུར་མི་རུང་། །གང་ཕྱིར་ཅི་དགའ་སྤྱོད་ལས་ཡི་དམ་བསྲུངས། །སྡུག་བསྔལ་མཐའ་ཡས་སྐྱེད་པའི་སྡིག་པ་སོགས། །དབང་པོ་ལྷག་མ་སྡོམ་པའང་ཡོད་མ་ཡིན། །དེ་ཕྱིར་མཁས་པས་དེ་ཉིད་བསྲུང་བའི་རིགས། །མཁས་པས་འདོད་ཆགས་ཉེས་ལ་མི་སྡུག་བསྟེན། །སྡང་ལ་བྱམས་དང་བརྩེ་གོམས་ཡོན་ཏན་གྱིས། །རྨོངས་ལ་མི་རྟག་འདུ་ཤེས་འཆི་བ་ནི། །རྗེས་སུ་དྲན་དང་བག་ཡོད་བསྟེན་པས་བསྲུང་། །ཞེས་དང་། །ཚུལ་ཁྲིམས་ཡང་དག་བསྲུང་བར་གྱུར་ན་ནི། །འགྱོད་པའི་མེ་ནི་ཞི་བར་

---

^{[མ་དཔེ་གཟིགས་ན་འདིར་གནོན།]}

འགྱུར་བ་ཡིན། །དགའ་དང་རབ་གུས་སད་པར་བྱེད་པའི་རྒྱུས། །ལུས་དང་ངག་གི་དགེ་བ་སྐྱེད་པར་བྱེད། །ཐར་པའི་གྲོང་དུ་འཇུག་པའི་ལམ་ཉིད་དང་། །མི་དང་ལྷ་དབང་གྲུབ་ལམ་གཉིས་པ་མེད། །གྲགས་དང་སྙན་དང་བདེ་བ་སྐྱེད་པའི་རྒྱུས། །འཚེ་དང་སྨོད་པས་ཚུགས་པ་མེད་པ་ཡིན། །བླ་མ་སློབ་མ་མཛའ་བཤེས་དོར་མི་འགྱུར། །མ་སྨད་བདེ་བའི་སྒོར་ནི་གྱུར་པ་ཡིན། །སྐྱེ་བོ་དམ་པ་དང་འདྲ་འདྲེན་པར་བྱེད། །ཡོན་ཏན་སྐྱོད་པའི་ཆོ་གར་གྱུར་པ་ཡིན། །འདི་དང་ལྡན་ན་མཁས་པའི་ཡོན་ཏན་ནི། །ཆེན་པོ་རྣམས་ཀྱི་སྣོད་དུ་གྱུར་པ་ཡིན། །ཚུལ་ཁྲིམས་འཆལ་བའི་ཕོངས་པ་ཅི་ཡོད་པ། །ཉེས་པ་དེ་དང་དེར་ནི་རྣམ་པར་སྤོང་། །དམ་པའི་ཆོས་ཀྱིས་བགྲང་བར་འགྱུར་བ་དང་། །ཡོན་ཏན་ལ་དགའ་བར་ཡང་གོ་བར་བྱེད། །ཁྱད་པར་རྟོགས་པའི་སྐལ་བར་ལྡན་པ་དང་། །བདག་ཉིད་ཡོན་ཏན་དག་གིས་བསྔགས་འོས་འགྱུར། །སྐྱེ་བོ་དམ་པ་རྣམས་དང་སྐལ་མཉམ་གྱི། །རང་གི་ཡོན་ཏན་རྒྱ་ཆེན་དམན་དང་ནི། །ཚུལ་ཁྲིམས་འཆལ་བའི་ཉེས་པས་མི་གོས་ཤིང་། །དེ་ལས་བྱུང་བའི་སྡུག་བསྔལ་ཐོབ་མི་འགྱུར། །མི་ཡི་བདག་པོ་སུམ་ཅུ་རྩ་གསུམ་བདག །གལ་ཏེ་འདོད་ན་སྲིད་པ་ཟད་པ་ཉིད། །ཚུལ་ཁྲིམས་རྣམ་དག་དེས་ནི་ཐོབ་འགྱུར་བ། །སྨོན་ལམ་གྲུབ་པའི་རྩ་བའང་ཚུལ་ཁྲིམས་ཡིན། །ཞེས་གསུངས་སོ། །ཡང་། དེ་ལ་སྦྱངས་

---

^{[མ་དཔེ་གཟིགས་ན་འདིར་གནོན།]}

པའི་ཡོན་ཏན་བཅུ་གཉིས་ནི་འདི་དག་ཡིན་ཏེ། དགོན་པ་ཉིད་དང་། ཕྱག་དར་ཁྲོད་པ་ཉིད་དང་། བསོད་སྙོམས་པ་ཉིད་དང་། །སྟན་གཅིག་པ་ཉིད་དང་། ཙོག་པུ་པ་ཉིད་དང་། ཟས་ཕྱིས་མི་ལན་པ་ཉིད་དང་། ཆོས་གོས་གསུམ་པ་ཉིད་དང་། ཕྱིང་པ་བ་ཉིད་དང་། གཞི་ཇི་བཞིན་པ་ཉིད་དང་། དུར་ཁྲོད་པ་ཉིད་དང་། ཤིང་དྲུང་པ་ཉིད་དང་། བླ་གབ་མེད་པ་ཉིད་དོ། །ཞེས་དང་། །དགོན་༡པར་གནས་ལ་མངོན་དགའ་ཏིང་ངེ་འཛིན། །ཐོབ་པའམ་ཡོངས་སུ་བསྲུང་བར་ནུས་པ་ཡིན། །གྲོང་ནང་གནས་རྣམས་གཡེང་བའི་ཉེས་པ་ཡིས། །སེམས་ནི་རྣམ་བཅོམ་ཉེར་ཞི་ཐོབ་མི་འགྱུར། །ཞེས་སོགས་དང་། དགོན་པར་༤གནས་ཤིང་ཆོག་ཤེས་སེམས་ཀྱིས་ནི། །གོས་ནི་དམན་ལས་རབ་དམན་གྱོན་བྱེད་ལ། །འདི་ལ་ལྟོས་པ་དྲེགས་པ་མི་འབྱུང་ཞིང་། །འཇིགས་དང་འཁྲུགས་དང་རྨོངས་པར་འགྱུར་མ་ཡིན། །ཡང་། ང་རྒྱལ་༣སྦྱོང་ཞིང་བརྙས་པ་བཟོད་བྱེད་ལ། །རང་གི་ལུས་ནི་སྐྱེ་བ་བཟོད་བྱེད་ཅིང་། །མགྲོན་པོས་པ་ཡིས་བསྡམས་པའི་སྡུག་བསྔལ་ནི། །སློང་མོའི་སྤྱོད་ལ་ཞུགས་ལ་ཡོད་མ་ཡིན། །དང་། གང་༤ཞིག་ཟོས་ནས་སྟན་དེ་ལས་ལངས་སམ་མ་ལངས་ཀྱང་ལྷུང་བཟེད་བཀྲུས་པའི་ཆུ་བླངས་ནས་སླར་ཟ་བར་མི་བྱེད་པ་དང་། ཁ་ཟས་སོ་སོར་ཐོབ་ནས་ཁམ་གྱི་ཐ་མ་ཟོས་ནས་ཡང་སླར་མི་ཟ་བ་དེ་ནི་ཟས་ཀྱི་མཐའ་ཡིན་ནོ།

---

^{[མ་དཔེ་གཟིགས་ན་འདིར་གནོན།]}

ཞེས་དང་། ཡང་དང་ཡང་དུ་ཟ་བའི་ཉེས་པ་ཡིས། །སྟན་གཅིག་རང་གི་བྱ་བ་སྤོང་མི་བྱེད། །ནད་ཉུང་གནོད་པ་ཆུང་ཞིང་ལུས་སྲབ་འགྱུར། །རྣལ་འབྱོར་ལྡང་བ་ཡང་བར་འདིས་འགྱུར་རོ། །ཞེས་དང་། །གཉིད་ཀྱི་མུན་པ་སྟུག་པོས་མི་ནོན་ཅིང་། །སེམས་ནི་མལ་སྟན་བདེ་བའི་དབང་མི་འགྲོ། །འདི་ཡིས་ལུས་སུ་འཛིན་པ་སྲབ་པ་དང་། །འདི་ལས་མཉམ་པར་འཇོག་པ་བདེར་གསལ་འགྱུར། །དང་། ཕྱིས་ནས་བ་མ་སྤང་བ་ཡི། །དམ་བཅའ་བླངས་པར་གྱུར་པ་ཡིས། །བརྐམ་ཆགས་མེད་ཅིང་ཆོག་ཤེས་དང་། །དད་པའི་ཚུལ་དང་རྗེས་མཐུན་འགྱུར། །དང་། །ཆོས་གོས་གསུམ་པོ་ཙམ་གྱིས་ནི། །ཆོག་ཤེས་ཡང་བ་ལ་འཇུག་ཅིང་། །མང་པོ་ལ་སྲེད་ཉེར་བཅས་པ། །གོས་སོག་པ་ནི་སྤངས་པ་ཡིན། །འདབ་ཆགས་ལྟ་བུར་བླངས་ནས་ནི། །གང་དུ་དགའ་བར་འགྲོ་བར་བྱེད། །སྤོང་བའི་གནང་བ་དང་བྲལ་ཞིང་། །དེ་ལས་དགེ་སློང་ཉོན་མོངས་མེད། །དང་། །དག་པར་རསྤངས་པའི་ཡོན་ཏན་ནི། །བལ་བསྡུས་པ་ལས་བྱས་པའི་གོས། །རྣལ་མ་མེད་པས་ཆོག་ཤེས་པས། །བཟང་པོ་སྲེད་ལས་བྱུང་བ་ཡི། །དེ་ཚོལ་བ་ཡི་ཉོན་མོངས་མེད། །དང་། ཇི་བཞིན་བཏིང་བས་མགུ་བའི་ཕྱིར། །སྡོམ་བརྩོན་ཤིན་ཏུ་མཛེས་པ་ཡིན། །དགེ་སློང་གསར་བུ་མལ་སྟན་ན། །བདེ་ལ་གནས་པ་རྗེས་སུ་བསྲུང་། །དང་། རྩ་བཏིང་བའམ་ས་ལ་

---

^{[མ་དཔེ་གཟིགས་ན་འདིར་གནོན།]}

ཉལ་བ་ན། །ཇི་བཞིན་གཞི་ལས་གྱུར་པའི་བདེ་བ་ནི། །ནོར་བུ་འབར་བའི་གཞལ་མེད་ཁང་སྟེང་ན། །ཆོག་ཤེས་མེད་པའི་སེམས་ལ་དེ་ཡོད་མིན། །དང་། དུར་ཁྲོད་དུ་ནི་རྒྱུན་དུ་འཆི་ངན་པས། །སྐྱོ་འགྱུར་ཊྛདེ་ལས་བག་མེད་འགྱུར་མ་ཡིན། །མི་གཙང་སྣ་ཚོགས་མཚན་མ་རྣམས་མཐོང་བཞེས། །འདི་ཡི་འདོད་པའི་འདོད་ཆགས་འཕེལ་མི་འགྱུར། །དང་། གང་ཞིག་ཤིང་དྲུང་བཟང་པོ་དག་ཏུ་ནི། །མལ་སྟན་དག་གི་སེམས་མགུའི་འབྱོར་པར་ལྡན། །ཕྱོགས་རྣམས་ཀུན་ཏུ་ཐོགས་པ་མེད་པར་འགྲོ། །དེ་ནི་དམ་ཆོས་ཕུན་སུམ་ཚོགས་པའི་ལམ། །དེར་ནི་ཆོས་ཀྱང་རྣམ་པར་འཕེལ་འགྱུར་ཞིང་། །བདུད་ཀྱི་སྟོབས་ཀྱི་དྲེགས་ཟླཔ་ལྡོག་པར་བྱེད། །དང་། མལ་སྟན་ཚོལ་དང་བསྲུང་དང་སྤྲུགས་པ་ཡིས། །ཡོངས་སུ་ཉལ་བའི་གཞིར་གྱུར་མ་ཡིན་ཞིང་། །བླ་གབ་མེད་ལ་བསྒྲུབ་པར་ཁས་བླངས་ལ། །འདུ་འཛི་མེད་པས་ཤིན་ཏུ་མཛེས་པ་ཡིན། །སོགས་ཡོན་ཏན་རྒྱ་ཆེར་བསྟན་ཏོ། །ཡང་། དེ་དག་ལ་སོགས་པའི་ཡོན་ཏན་གྱི་ཚོགས་ཡང་དག་པར་འབྱོར་བས་ན་སྦྱངས་པའི་ཡོན་ཏན་ཅེས་བྱ་བ་དང་། ཉེས་པ་རྣམས་སྦྱོང་བར་བྱེད་པས་ན་སྦྱོང་བའི་ཡོན་ཏན་ཅེས་བྱ་སྟེ། ཞེས་དང་། དེ་ལ་ཏིང་ངེ་འཛིན་ཞེས་བྱ་བ་ནི་བྱིང་བ་དང་། ཞུམ་པ་དང་། རྣམ་པར་གཡེང་བ་དང་། མི་མཉམ་པ་སྤང་བའི་ཕྱིར་སེམས་དང་སེམས་ལས་བྱུང་བ་དམིགས་པ་གཅིག་

---

^{[མ་དཔེ་གཟིགས་ན་འདིར་གནོན།]}

ལ་གཏོད་པས་ཏིང་ངེ་འཛིན་བྱ་བའམ། སེམས་དང་སེམས་ལས་བྱུང་བ་དམིགས་པ་གཅིག་ལ་ཡང་དག་པར་བསྡུས་པས་ན་ཏིང་ངེ་འཛིན་ཡིན་པའམ། ཕྱིན་ཅི་མ་ལོག་པ་ཡིན་པས་ཏིང་ངེ་འཛིན་འདི་ལ་གཏོད་ཅིང་འཇོག་པ་ན་ཕུན་སུམ་ཚོགས་པའི་ཡེ་ཤེས་དང་མཐོང་བ་དེ་དང་དེ་བསྐྱེད་པའི་ཕྱིར་ཏིང་ངེ་འཛིན་ཏོ། །ཞེས་དང་། དེའི་རྣམ་གྲངས་ལ། འདི་ལྟ་སྟེ་བསམ་གཏན་བཞི་དང་། དེའི་ཉེར་བསྡོགས་གསུམ་དང་། གཟུགས་མེད་པ་རྣམ་པ་བཞི་དང་། རྗེས་སུ་དྲན་པ་དྲུག་དང་། ཚད་མེད་པ་བཞི་དང་། དབུགས་འབྱུང་བ་དང་རྔུབས་པ་རྗེས་སུ་དྲན་པ་དང་། འདུ་ཤེས་བཅུ་དང་། ཟད་པར་གྱི་སྐྱེ་མཆེད་བཅུ་དང་། ཟིལ་གྱིས་ནོན་པའི་སྐྱེ་མཆེད་བརྒྱད་དང་། རྣམ་པར་ཐར་པ་བརྒྱད་དང་། ཟིལ་གྱིས་གནོན་པ་དང་། འདུ་ཤེས་མེད་པའི་སྙོམས་པར་འཇུག་པ་དང་། སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་ལ་སོགས་པའི་ཏིང་ངེ་འཛིན་གསུམ་དང་། རྗེས་སུ་མཐུན་པ་ལ་རྗེས་སུ་མཐུན་པར་འདུ་ཤེས་པ་ལ་སོགས་པ་སྙོམས་པར་འཇུག་པ་དང་། སྟོང་པ་ཉིད་གསུམ་དང་། ཡན་ལག་ལྔ་དང་། ཤེས་པ་ལྔ་དང་ལྡན་པའི་ཏིང་ངེ་འཛིན་རྣམས་སོ། །ཞེས་དང་། དམ་པ་རང་གི་ཡོན་ཏན་གྱིས། །མཐོ་བ་རིང་པོ་ནས་ཀྱང་མཐོང་། །དྲི་མེད་ས་ཕྱོགས་མཛེས་པ་ཡི། །སྟོན་ཀ་ཡི་ནི་རིང་པོར་མཚུངས། །ཞེས་སོ། །འདི་དཱི་

---

^{[མ་དཔེ་གཟིགས་ན་འདིར་གནོན།]}

པཾ་ཀཱ་ར་དང་རཏྭེ་བྷ་དྲའི་འགྱུར།། ༈ །།དགེ་བ་བཅུའི་ལས་ཀྱི་ལམ་བསྟན་པ་ལས། དེ་ལ་དགེ་བ་བཅུ་པོ་འདི་དག་ནི་མངོན་པར་མཐོ་བ་དང་། ངེས་པར་ལེགས་པ་ཐམས་ཅད་ཀྱི་རྒྱུ་ཡིན་པས་ན་སངས་རྒྱས་ཀྱི་སློབ་མ་རྣམས་ཀྱིས་འདི་ལ་བསླབ་པར་བྱའོ། །ཞེས་དང་། གང་བདག་གི་དོན་ལ་ཅུང་ཟད་ཙམ་ཡང་རྗེས་སུ་བལྟ་བ་མེད་པར། བྱེད་པ་གཞན་གྱི་དོན་འབའ་ཞིག་འདོད་ཅིང་ཐམས་ཅད་དུ་སྙིང་རྗེ་ལྡན་པ་དག་གིས་ནི། ཡིད་ཀྱི་ཉེས་པར་སྤྱོད་པ་གསུམ་མ་གཏོགས་པའམ། ལོག་པར་ལྟ་བ་ཉིད་མ་གཏོགས་པ་དག་ལ་ལར་རྗེས་སུ་གནང་བ་སྣང་སྟེ། དེ་ཡང་བྱང་ཆུབ་སེམས་དཔའི་སྡེ་སྣོད་གཏན་ལ་ཕབ་པའི་གཙུག་ལག་ལ་བལྟའོ། །ཞེས་བཙུན་པ་རབ་འབྱོར་དབྱངས་ཀྱིས་མཛད་པ་ལས་སོ།། ༢༣་བར། ༈ །།སློབ་དཔོན་རྟ་དབྱངས་ཀྱིས་མཛད་པའི་མྱ་ངན་བསལ་བར། །འདི་ལྟར་ཐམས་ཅད་སྐྱེ་བ་ཡི། །མདུན་ན་གནས་པ་འཆི་བ་སྟེ། །ཀུན་ཀྱང་འགྲོ་བར་སྣང་བའི་ཕྱིར། །མྱ་ངན་བྱ་བར་འོས་པ་མིན། །མཛའ་དང་འགྲོགས་ལ་བརྐམ་པ་ཡི། །སྐྱེ་བོ་མྱ་ངན་གྱིས་གདུང་བ། །རྔ་ཉིད་དག་ལ་ཆགས་པའི་འབྲི། །རྔོན་པས་ནགས་ཀྱི་ནང་དུ་བཞིན། །གང་ཚེ་ཀུན་གྱིས་བགྲོད་བྱ་ཞིང་། །དེ་དང་དེར་ནི་འགྲོ་བ་ཡི། །སྔ་ནས་དེ་དེར་སོང་བ་ལ། །ཅི་ཡི་ཕྱིར་ན་མྱ་ངན་བྱེད། །མི་བཟད་འཆི་བའི་བདག་པོ་ལ། །རབ་ཏུ་མྱོས་པའི་སྐྱེ་བོ་འདི། །

---

^{[མ་དཔེ་གཟིགས་ན་འདིར་གནོན།]}

ནགས་ན་གསོད་བྱེད་སེང་གེ་ཡི། །མདུན་ན་རི་དྭགས་གནས་པ་བཞིན། །འཆི་བ་བཟློག་པར་བྱ་བ་ཡི། །གང་ཚེ་ཐབས་ཀུན་མེད་པས་ན། །སྤྲོ་བསྲིང་བ་དག་མི་བསྐྱེད་པར། །ཆུ་ལ་ཉ་བཞིན་ཅི་ཞིག་འགྲེ། །སའམ་ཅི་སྟེ་མཐོ་རིས་ན། །སྐྱེས་ནས་ལ་ལ་མ་ཤི་བ། །འགའ་ཞིག་ཁྱོད་ཀྱིས་མཐོང་བའམ། །ཐོས་སམ་འོན་ཏེ་ཐེ་ཚོམ་ཟ། །ཁམས་གསུམ་འདི་དག་ཐམས་ཅད་ལ། །མི་རྟག་མེ་ཡིས་སྲེག་གྱུར་པ། །དགོན་པར་མེ་ནི་འབར་བ་ཡིས། །དགོན་པའི་མེ་ནི་ཇི་ལྟར་བཞིན། །རྟག་པར་འདུ་ཤེས་རྣམ་ལོག་ན། །སྲིད་རྩེ་ལས་ཀྱང་འགྲོ་བ་རྣམས། །འཆི་བའི་ཞགས་པས་དྲངས་གྱུར་པ། །ཞགས་པས་གླང་པོ་བཞིན་དུའོ། །བསམ་གཏན་ལས་སྐྱེས་བདེ་བ་མྱོང་། །ཚངས་པ་ཚངས་པའི་གནས་ལས་ཀྱང་། །མི་རྟག་ཕྱིར་ནི་ལྷུང་གྱུར་པ། །ཆུ་ཡི་ཀླུང་གི་འགྲམ་པ་བཞིན། །བརྒྱ་བྱིན་དག་ནི་སྟོང་རྣམས་དང་། །འཁོར་ལོས་སྒྱུར་བ་བརྒྱ་དག་ཀྱང་། །དུས་ཀྱིས་འཆི་བར་འགྱུར་བ་ནི། །མར་མེ་འབར་བ་རླུང་གིས་བཞིན། །དྲང་སྲོང་ཆེན་པོ་ལྔ་མངོན་ཤེས། །མཁའ་ལ་རྒྱང་རིང་འགྲོ་བ་ཡང་། །གང་ན་སྤྱོད་ཡུལ་འཆི་མེད་པ། །དེར་ནི་འགྲོ་བར་ནུས་པ་མེད། །གང་དུ་ས་རྣམས་སྲེག་འགྱུར་ཏེ། །ལྷུན་པོའང་ཐལ་བར་འཇིག་པ་དང་། །རྒྱ་མཚོའི་ཆུ་ཡང་སྐོམ་འགྱུར་ན། །ལུས་ཅན་དེ་དག་ལྟ་ཅི་སྨོས། །ཅི་སྟེ་སངས་རྒྱས་རྣམས་

---

^{[མ་དཔེ་གཟིགས་ན་འདིར་གནོན།]}

ཀྱི་སྐུ། །མཚན་དང་དཔེ་བྱད་ཀྱིས་བརྒྱན་པ། །རྡོ་རྗེའི་སྐུ་ཡང་མི་རྟག་ན། །ཆུ་ཤིང་སྙིང་པོ་མེད་འདྲ་བའི། །ལུས་ཅན་གཞན་རྣམས་སྨོས་ཅི་དགོས། །ཞེས་དང་། ཡང་དང་ཡང་དུ་དམྱལ་བ་ན། །ཟངས་ཞུན་བསྐོལ་བ་གང་འཐུངས་པ། །རྒྱ་མཚོ་ནང་གི་ཆུ་ལ་ཡང་། །དེ་ཡི་ཚད་ཙམ་ཡོད་མ་ཡིན། །ཞེས་དང་། མཛའ་བཤེས་དག་དང་བྲལ་བ་ཡིས། །འཁོར་བའི་གནས་སུ་གང་ངུས་པ། །མིག་གི་མཆི་མའི་ཐིགས་པ་ཡི། །སྣོད་དུ་རྒྱ་མཚོའང་རུང་མ་ཡིན། །ཞེས་གསུངས་སོ། །ཡང་དེ་ཉིད་ཀྱིས་རྒྱལ་པོ་ཀ་ནིཥ་ལ་སྤྲིང་བར། །འཆི་བདག་བུ་དང་མི་བཤེས་པ། །གློ་བུར་དག་ཏུ་འབབ་འགྱུར་བས། །སང་དག་བྱ་ཞེས་མ་བཞེས་པར། །དམ་པའི་ཆོས་ལ་བསྟུན་ཏེ་མཛོད། །འདི་སང་དེང་འདིར་འདི་བྱ་ཞེས། །བྱ་བ་མི་ལ་བཟང་པོ་མིན། །ནམ་ཞིག་ཁྱོད་ནི་མེད་འགྱུར་བའི། །སང་དེ་གདོན་མི་ཟ་བར་འོང་། །ཞེས་སོགས་དང་། ལན་བརྒྱ་ཡང་ན་སྟོང་དག་ཏུ། །འཇིག་རྟེན་དག་ཏུ་མི་མ་བགྱིས། །འདི་མ་བགྱིས་སླད་བྱིས་པ་ཡིས། །ཡང་དང་ཡང་དུ་བགྱིད་འཚལ་བས། །ཐོག་མ་མེད་པའི་ལུས་ཅན་འདི། །ད་དུང་དུ་ཡང་མ་ལོག་གོ ། ཞེས་སོ།། ༈ །།སེམས་རིན་པོ་ཆེ་རྣམ་པར་སྦྱོང་བའི་སྤྲིང་ཡིག་ཅེས་པ་དེ་ལས་དོན་བཏུས་ཏེ་བརྗོད་པར་བྱ་བ་སྟེ། འདི་ནི་མཆོག་ཏུ་ཉམས་སུ་བླང་བྱར་རིགས་སོ། །འདིར་སེམས་ནི་རང་བཞིན་གྱིས་འོད་

---

^{[མ་དཔེ་གཟིགས་ན་འདིར་གནོན།]}

གསལ་བ་རྟག་ཏུ་རྣམ་པར་མི་རྟོག་པའི་རང་བཞིན་ཡིན་མོད་ཀྱི། ལུས་དང་ངག་བྲན་ལྟ་བུ་དང་བཅས་པ་གློ་བུར་གྱི་ཉོན་མོངས་པ་དང་ཉེ་བའི་ཉོན་མོངས་པ་དག་གིས་དཀྲུགས་པ་སྟེ། དེའི་ཕྱིར་འདི་དག་རྣམ་པར་སྤངས་ཏེ་ནོར་བུ་ཆུ་ཤེལ་གྱི་འོད་ལྟར་རབ་ཏུ་འོད་གསལ་བའི་རང་བཞིན་དཀྲུགས་མ་དང་བྲལ་བར་བསྐྱེད་དེ། འདི་ཙམ་ནི་མི་གནས་པའི་མྱ་ངན་ལས་འདས་པའོ། །དེས་ན་འདིར་བསྟན་སེམས་དེ་དཀྲུགས་པས་རྟོག་པ་ཅན་དུ་བྱེད་ཅིང་། ལུས་དང་ངག་བྲན་ལྟར་འཁོལ་བ་ནི་རྣམ་པ་བཞི་སྟེ། ཐམས་ཅད་ཀྱི་རྒྱུ་རྣམ་པར་རྟོག་པ་མང་བ་དང་། འདོད་ཆགས་དང་། ཞེ་སྡང་དང་། གཏི་མུག་ཤས་ཆེ་བའོ། །དེ་ལ་གང་རྣམ་པར་རྟོག་པ་མང་བ་དེས་ནི་རླུང་གི་ཏིང་ངེ་འཛིན་ལ་དམིགས་པས་དེ་སྤང་བར་བྱ་སྟེ། བགྲང་བ་རྗེས་འགྲོ་འཇོག་པ་དང་། །རྟོག་པ་དང་ནི་བསྒྱུར་བ་དང་། །ཡང་དག་རྣམ་པ་དྲུག་ཏུ་འདོད། །དེ་ལ་དང་པོ་བགྲང་བ་ནི། དབུགས་རྔུབས་པ་དང་འབྱུང་བ་དག་ལ་སེམས་གཏད་ནས་མངོན་དུ་འདུ་བྱ་བ་མེད་པར་ལུས་སེམས་རྣལ་དུ་བཞག་སྟེ་དྲན་པ་ཙམ་གྱིས་གཅིག་དང་གཉིས་ནས་བཅུའི་བར་དུ་བགྲང་བར་བྱེད་པའོ། །སེམས་མངོན་པར་བསྡུས་པ་དང་རྣམ་པར་གཡེང་བར་དོགས་པས་ཧ་ཅང་མང་བ་དང་ཉུང་ངུར་ནི་མ་ཡིན་ནོ། །དེ་ལ་སྐྱོན་གསུམ་སྟེ། གཅིག་ལ་གཉིས་སུ་བགྲང་བ་སོགས་ལྷག་པ་དང་།

---

^{[མ་དཔེ་གཟིགས་ན་འདིར་གནོན།]}

གཉིས་ལ་གཅིག་ཏུ་འཛིན་མ་ཚང་བ་དང་། རྔུབས་པ་ལ་འབྱིན་པར་འཛིན་པ་སོགས་ལ་འཆོལ་བ་སྟེ་སྤང་ངོ་། །བར་སྐབས་སུ་སེམས་རྣམ་པར་གཡེང་ན། ཡང་མགོ་ནས་ཇི་སྲིད་ཏིང་ངེ་འཛིན་མ་ཐེབ་བར་དུ་བགྲང་བར་བྱའོ། །གཉིས་པ་རྗེས་སུ་འགྲོ་བ་ནི། །ཇི་སྲིད་ཅིག་འབྱུང་ངམ་འཇུག །ཅི་འདི་དག་ལ་ལུས་ཐམས་ཅད་ལ་ཁྱབ་པ་དག་གཅིག་གམ་ཕྱོགས་འགའ་ཞིག་ནས་རྒྱུ་བ་དག་ཡིན་ཞེས་མངོན་པར་འདུ་བྱ་བ་མེད་པར་དབུགས་རྔུབས་བ་དང་། །དབུགས་འབྱུང་བའི་རྗེས་སུ་འགྲོ་བ་དང་། །དེ་འཇུག་པ་ན་ལྐོག་མ་དང་། སྙིང་ག་དང་། ལྟེ་བ་དང་། རྐེད་པ་དང་། བརླ་དང་། བྱིན་པར་འཇུག་པའི་རིམ་གྱིས་རྐང་པ་གཉིས་ཀྱི་བར་དུ་རྗེས་སུ་འགྲོ་ལ། འབྱུང་བ་ན་མཐོ་གང་དང་འདོམ་གང་གི་བར་དུ་འབྱུང་ངོ་། །གཞན་དག་ན་རེ་རླུང་གི་དཀྱིལ་འཁོར་དང་རྣམ་པར་འཐོར་བྱེད་ཀྱི་རླུང་གི་བར་དུའོ། །ཞེས་ཟེར་ཏེ། འདི་ནི་དེ་ཁོ་ན་ཉིད་ཡིད་ལ་བྱེད་པའི་ཕྱིར་རིགས་པ་མ་ཡིན་ནོ། །གསུམ་པ་འཇོག་པ་ཞེས་བྱ་བ་ནི། ནོར་བུའི་ཐགས་པ་བཞིན་དུ་སྣའི་རྩེ་མོ་ནས་རྐང་པའི་མཐེ་པོའི་བར་དུ་གནས་པར་ལྟ་ཞིང་ཅི་འདི་བདག་ལ་ཕན་པར་བྱེད་པ་ཞིག་གམ། གནོད་པར་བྱེད་པ་ཞིག་གམ། གྲང་ངམ་དྲོ་བ་ཞིག་ཅེས་རྟོག་པའོ། །བཞི་པ་ཉེ་བར་རྟོག་པ་ཞེས་བྱ་བ་ནི། འདི་དག་ནི་རླུང་འབའ་ཞིག་མ་ཡིན་གྱི་འབྱུང་བ་ཆེན་པོ་བཞི་པོ་དག་དང་འབྱུང་

---

^{[མ་དཔེ་གཟིགས་ན་འདིར་གནོན།]}

བ་དག་མངོན་པར་གྲུབ་པའི་རྒྱུར་བྱས་པའི་གཟུགས་དང་། དེ་དག་ལ་བརྟེན་པའི་སེམས་དང་སེམས་བྱུང་རྣམས་ཀྱང་ཡོད་དོ་ཞེས་ཕུང་པོ་ལྔ་ཉེ་བར་རྟོག་པའོ། །ལྔ་པ་སྒྱུར་བ་ཞེས་བྱ་བ་ནི། རླུང་ལ་དམིགས་ནས་བློ་བསྒྱུར་ཏེ་ཆོས་ཀྱི་མཆོག་གི་བར་དུ་བློ་གོང་ནས་གོང་དུ་དགེ་བའི་རྩ་བ་རྣམས་ལ་ཡང་དག་པར་སྦྱོར་པའོ། །ཡོངས་སུ་དག་པ་ནི་མཐོང་བའི་ལམ་ལ་སོགས་པ་ལ་འཇུག་པའོ། །གཞན་དག་ན་རེ་གླུ བསྒྱུར་བ་ནི་དྲན་པ་ཉེ་བར་བཞག་པ་ནས་རྡོ་རྗེ་ལྟ་བུའི་ཏིང་ངེ་འཛིན་གྱི་བར་ཡིན་ལ། དྲུག་པ་རྣམ་པར་དག་པ་ནི་ཟད་པ་ཤེས་པ་ལ་སོགས་པ་ཡིན་ནོ་ཞེས་ཟེར་རོ། །འདི་ལྟ་བུ་ནི་སློབ་དཔོན་དབྱིག་གཉེན་གྱི་རྗེས་སུ་འབྲང་སྟེ་བཤད་པའོ། །དེ་ཡང་སའི་སྙིང་པོ་འཁོར་ལོ་བཅུ་པའི་མདོ་ལས། ཇི་ལྟར་དྲན་པའི་དབང་གིས་ཡང་དག་པ་ཇི་ལྟ་བ་བཞིན་དུ་དབུགས་ཕྱི་ནང་དུ་རྒྱུ་བ་མ་རྟོགས་ཞེ་ན། ཡང་དག་པ་ཇི་ལྟ་བ་བཞིན་དུ་བགྲང་༡བ་དང་། རྗེས་སུ་༢འགྲོ་བ་དང་། ཞི་གནས་༣དང་། ལྷག་མཐོང་༤དང་། འཇུག་པ་༥དང་། ཡོངས་སུ་དག་པ་༦ལ་རྟོག་གོ །དེ་ལ་བགྲང་༡པས་ནི་བྱ་བའི་ལས་ཀྱི་དངོས་པོ་རྣམ་པ་གཉིས་སུ་བྱེད་པར་འགྱུར་ཏེ། རྟེན་དུ་གྱུར་པས་རྣམ་པར་རྟོག་པ་དང་རྣམ་པར་དཔྱོད་པ་གཉིས་ཐུལ་བས། དབུགས་ཕྱི་ནང་དུ་རྒྱུ་བའི་མཚན་ཉིད་འཛིན་པར་ནུས་པའོ། །རྗེས་སུ་འགྲོ་བས་ཀྱང་བྱ་བའི་ལས་ཀྱི་དངོས་

---

^{[མ་དཔེ་གཟིགས་ན་འདིར་གནོན།]}

པོ་རྣམ་པ་གཉིས་སུ་བྱེད་པར་འགྱུར་ཏེ། ཡང་དག་པར་འབྱུང་བ་ལ་བརྟེན་ཅིང་། རྣམ་པར་རྟོག་པ་དང་བྲལ་བ་དང་། དབུགས་ཕྱི་ནང་དུ་རྒྱུ་བའི་འཇུག་པའི་མཚན་ཉིད་ལ་མཁས་པར་འགྱུར་རོ། །ཞི་གནས་༢ཀྱིས་ཀྱང་བྱ་བའི་ལས་ཀྱི་དངོས་པོ་རྣམ་པ་གཉིས་སུ་བྱེད་པར་འགྱུར་ཏེ། དབུགས་ཕྱི་ནང་དུ་རྒྱུ་བ་འབྲི་བར་མངོན་དུ་སྟོན་པ་དང་། ཏིང་ངེ་འཛིན་གྱི་མཆོག་ལ་གནས་པར་ནུས་སོ། །ལྷག་མཐོང་གིས་ཀྱང་བྱ་བའི་ལས་ཀྱི་དངོས་པོ་རྣམ་པ་གཉིས་སུ་བྱེད་པར་འགྱུར་ཏེ། དབུགས་ཕྱི་ནང་དུ་རྒྱུ་བ་ཟད་པར་མངོན་དུ་སྟོན་པ་དང་། སེམས་དང་སེམས་ལས་བྱུང་བའི་ཆོས་སོ་སོར་རྟོག་པ་གནས་པའོ། །འཇུག་པས་ཀྱང་བྱ་བའི་ལས་ཀྱི་དངོས་པོ་རྣམ་པ་གཉིས་སུ་བྱེད་པར་འགྱུར་ཏེ། ཉེ་བར་ལེན་པའི་ཕུང་པོ་སྤོང་བའི་སྦྱོར་བ་ལ་མཁས་པ་དང་། འཕགས་པའི་སར་འཇུག་པ་ལ་སྦྱོར་བའོ། །ཡོངས་སུ་དག་པས་ཀྱང་བྱ་བའི་ལས་ཀྱི་དངོས་པོ་རྣམ་པ་གཉིས་སུ་བྱེད་པར་འགྱུར་ཏེ། ཀུན་ནས་ཉོན་མོངས་པ་སྤོང་བ་དང་། ལྟ་བ་ཡོངས་སུ་དག་པའོ། །ཞེས་སོ། །དེ་ཡང་གཞུང་ལས། ཇི་ལྟར་ཞེ་ན་རབ་ཏུ་གདུལ་དཀའ་བའི་སེམས་ཞེས་བརྗོད་པ་དེ་ནི་རླུང་ལས་གུད་དུ་མ་དམིགས་པའི་ཕྱིར་ཏེ། དེ་བས་ན་སེམས་ཞེས་བྱ་བ་དེ་ནི་རླུང་དུ་བརྗོད། ཅིས་ཀྱང་ངོ་། །གཉིས་པ་འདོད་ཆགས་ཀྱི་གཉེན་པོ་ནི་རུས་གོང་ཡིད་ལ་བྱ་བ་ཡིན་ཏེ། ཀེང་རུས་ཆགས་

---

^{[མ་དཔེ་གཟིགས་ན་འདིར་གནོན།]}

ཅན་ཐམས་ཅད་ལ། ཞེས་བཤད་པའི་ཕྱིར་རོ། །ཇི་ལྟར་ཞེ་ན། རུས་པ་རྒྱ་མཚོའི་བར་དུ་ནི། །སྤྲོ་ཞིང་སྡུད་པས་ལས་དང་པོ། །རྐང་རུས་དག་ནས་ཐོད་ཕྱེད་པར། །བཏང་བས་སྦྱང་བ་བྱས་པར་བཤད། །སྨིན་མའི་བར་དུ་སེམས་འཛིན་པས། །ཡིད་ལ་བྱེད་པ་རྫོགས་པ་ཡིན། །ཞེས་བཤད་པའི་རིམ་པས་སོ། །གཞན་ཡང་བྱིས་པ་རྣམས་ནི་ཕལ་ཆེར་ཁ་དོག་དང་། དབྱིབས་དང་། རེག་པ་འཇམ་པ་དང་། བསྙེན་བཀུར་ལ་ཆགས་ཏེ། དེ་དག་གི་གཉེན་པོར་ནི་རྣམ་པར་སྔོས་པ་དང་། རྣམ་པར་དམར་བ་དང་། རྣམ་པར་ཚིག་པ་དག་ཡིད་ལ་བྱེད་པས་ཁ་དོག་དང་། རྣམ་པར་རྣག་པ་དང་། རྣམ་པར་ཟོས་པ་དང་། རྣམ་པར་འཐོར་བ་དག་ཡིད་ལ་བྱེད་པས་དབྱིབས། རྣམ་པར་འབུས་གཞིགས་པ། རུས་གོང་རྒྱུས་པས་འབྲེལ་བ་དག་ཡིད་ལ་བྱེད་པས་ནི་རེག་བྱ་འཇམ་པ་ལ་ཆགས་པ་སེལ་ཏོ། །རྣམ་པར་བམ་པའི་མི་རོ་གཡོ་བ་རྐྱལ་སྟོང་ཕུས་བཏབ་པ་ལྟ་བུ། རྡོ་ལྟར་བསྙེན་བཀུར་བྱེད་པ་དང་བྲལ་བ་ཡིད་ལ་བྱེད་པས་ནི་རྐང་པ་བཀྲུ་བ་ལ་སོགས་པའི་བསྙེན་བཀུར་ལ་ཆགས་པ་སེལ་བར་བྱེད་དོ། །གཞན་ཡང་རྣམ་པར་ཕྱེ་སྟེ་བརྗོད་ན། སྔོ་སངས་སོགས་ཁ་དོག་ལ་ཆགས་ན་རྣམ་པར་སྔོས་པ་ཡིད་ལ་བྱའོ། །དེ་བཞིན་དུ་ཙནྡན་སོགས་དྲིས་བྱུགས་པའི་ལུས་ལ་ཆགས་པར་བརྣག་པ། མཚན་སྤྲད་པའི་རེག་བྱར་ཆགས་ན་འབུས་གཞིགས་པ།

---

^{[མ་དཔེ་གཟིགས་ན་འདིར་གནོན།]}

དབྱིབས་ཕུན་སུམ་ཚོགས་པར་ཆགས་ན་བམ་པ། རྒྱན་གྱིས་མཛེས་པའི་ལུས་ལ་ཆགས་པར་དམར་བ། ཤ་རྒྱས་པའི་ལུས་ལ་ཆགས་ན་ཟོས་པ། འཁྱུད་པ་དང་འོ་བྱས་པ་སོགས་རྩེད་འཇོར་ཆགས་ན་འཐོར་བ། ཁ་དོག་དང་དབྱིབས་ཕུན་སུམ་ཚོགས་པ་ལ་ཆགས་པར་ཚིག་པ། སོ་རྣམས་དཀར་བ་ལ་ཆགས་པའི་ཚེ་ན་རུས་གོང་གི་ཡིད་ལ་བྱེད་པས་ཞི་བར་འགྱུར་ཏེ། དེ་རྣམས་ནི་མི་སྡུག་པ་དགུ་བསྒོམ་པ་ཞེས་བྱའོ། །གསུམ་པ་ཞེ་སྡང་གི་གཉེན་པོ་བྱམས་པ་བསྒོམ་པར་བྱ་སྟེ། དེ་ཡང་ཐོག་མར་རང་གི་མའམ། ཕའམ། བུའམ། བུ་མོའམ། འབྲེལ་པ་གཉིས་སམ། གང་ཡང་རུང་བ་གཅིག་ལ་བདེ་བ་མ་ལུས་པ་ལ་ཕྲད་པར་གྱུར་ཅིག་སྙམ་པ་དང་། བདག་གིས་དེ་དང་ཕྲད་པར་བྱའོ་ཞེས་པ་དང་། ནུས་པ་ལྟ་ན་དེ་དངོས་སུ་སྒྲུབ་པ་དང་། ཕྲད་པ་ལ་ཕྲག་དོག་མེད་པར་ཉི་མ་འགའ་ཞིག་ལ་གུས་པར་བསྒོམ་མོ། །དེ་ནས་དེ་བས་ཅུང་ཟད་མི་གཅུགས་པ་དང་། །རིམ་གྱིས་བར་མ། དགྲ་བོ་དམན་པ། དགྲ་བོ་བར་མ། དགྲ་བོ་མ་རུངས་པ་ལའོ། །དེ་རྣམས་མ་ལ་སོགས་པ་དང་མཉམ་པ་ཐོབ་པ་ན་གྲོང་དང་གྲོང་ཁྱེར། དེ་ནས་ཡུལ་ལྗོངས་དང་། གླིང་གཅིག་དང་གཉིས་སོགས་ནས་སྟོང་གི་སྤྱི་ཕུད་དང་། སྟོང་གཉིས་པ་བར་མ་དང་། སྟོང་གསུམ་གྱི་སྟོང་ཆེན་པོ་དང་། ཕྱོགས་བཅུའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་སོགས་

---

^{[མ་དཔེ་གཟིགས་ན་འདིར་གནོན།]}

པར་བྱམས་པས་ཁྱབ་པར་བྱས་ཏེ། དེ་ནས་གཞུང་དེ་བཞིན་དུ་སྡུག་བསྔལ་དང་བྲལ་བ་འགྱུར་ཅིག་ཅེས་པ་དང་། སྡུག་བསྔལ་བྲལ་བ་ལ་དགའ་བ་དང་། དེ་དག་འཇིག་རྟེན་ལས་འདས་པའི་ཐར་ལམ་ལ་དགོད་པར་བྱའོ། །ཞེས་བྱ་བའི་རིམ་པས་སྙིང་རྗེ་དང་དགའ་བ་དང་བཏང་སྙོམས་རྣམས་བསྒོམ་མོ། །དང་པོ་སྙིང་དུ་སྡུག་ཅིང་ཡིད་དུ་འོང་བའི་མཚན་ཉིད་ཀྱི་བྱམས་པ་ཡིད་ལ་མ་བྱས་པར་ནི་སྡུག་བསྔལ་དང་བྲལ་བའི་སྙིང་རྗེ་ག་ལ་འཇུག་སྟེ། དེ་ལྟར་རིམ་པ་གཞན་ཡང་ངོ་། །བཞི་པ་གཏི་མུག་གི་གཉེན་པོར་རྟེན་འབྲེལ་བསྒོམ་སྟེ། རྟེན་ཅིང་འབྲེལ་བར་འབྱུང་བ་ཇི་ལྟ་བུ་ཞེ་ན། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །དེའི་རྐྱེན་གྱིས་རེག་པ། དེའི་རྐྱེན་གྱིས་ཚོར་བ། དེའི་རྐྱེན་གྱིས་སྲིད་པ། དེའི་རྐྱེན་གྱི་ལེན་པ། དེའི་རྐྱེན་གྱིས་སྲིད་པ། དེའི་རྐྱེན་གྱིས་སྐྱེ་བ། དེའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུགས་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་འདི་འབའ་ཞིག་འབྱུང་བར་འགྱུར་རོ། །ཞེས་ཤེས་རབ་ཀྱི་མིག་གིས་བལྟ་བར་བྱས་ཏེ། རྒྱུ་མེད་པ་ལ་སོགས་པ་

---

^{[མ་དཔེ་གཟིགས་ན་འདིར་གནོན།]}

བསལ་ལོ། །དོན་འདི་ནི་འཕགས་པ་བྱང་ཆུབ་སེམས་དཔའི་སྡེ་སྣོད་ལས། །གང་དུ་མ་རིག་སྐྱེ་འགྱུར་པ། །ཉོན་མོངས་རྒྱུ་ནི་ཚུལ་བཞིན་མིན། །དེ་ཡི་རྐྱེན་ནི་འདུ་བྱེད་དེ། །སྡུག་བསྔལ་བར་དུ་སྐྱེ་བར་འགྱུར། །ཞེས་སོ། །དེ་ལྟར་སྲིད་པ་འབྱུང་བའི་རིམ་པ་ལ་ཡིད་ཆེས་པར་བྱས་ནས། ཡང་མ་རིག་པ་འགགས་པ་ནས་སྡུག་བསྔལ་གྱི་ཕུང་པོ་འདི་འབའ་ཞིག་འགག་པར་འགྱུར་རོ། །ཞེས་བྱ་བའི་བར་དུ་ཡིད་ལ་བྱའོ། །དེ་ནས་རྟག་པ་མ་ཡིན་པ་དང་། ཆད་པ་མ་ཡིན་པ་དང་། འཕོ་བ་མ་ཡིན་པ་དང་། དེ་དང་འདྲ་བའི་རྒྱུད་དུ་འཇུག་པ་དང་། རྒྱུ་ཆུང་ངུ་ལས་འབྲས་བུ་ཆེན་པོ་འབྱུང་བ་ཞེས་ངེས་པར་བཟུང་སྟེ། ཕྱི་རོལ་ས་བོན་ཏོག་དང་། དེ་ལས་འབྲས་བུ་འབྱུང་ཞིང་རྒྱུ་དེ་དག་དང་རྐྱེན་འབྲེལ་བར་འབྱུང་བ་ཁམས་བཞི་དང་དུས་ཀྱི་ཁམས་ཏེ། རྣམ་པ་བཅུ་གཉིས་པོ་འདི་དག་ཙམ་མོ་ཞེས་འབྱུང་བ་དང་། འགགས་པ་ལས་རྒྱུ་མེད་པ་དང་། མི་མཐུན་པའི་རྒྱུ་སྤངས་ཏེ་འདིར་ནི་མདོར་བསྡུས་ནས་རྟེན་ཅིང་འབྲེལ་བར་འབྱུང་བ་ཡིད་ལ་བྱས་པས་རིག་པ་བསྐྱེད་པ་དང་། མ་རིག་པའི་ངོ་བོའམ་དེ་ལས་བྱུང་བའི་ལོག་པར་ལྟ་བ་སྤངས་པའོ། །གལ་ཏེ་རྒྱས་པར་ཡིད་ལ་བྱེད་པ་ལྟ་ཞིག་ན་རང་རང་གི་མཚན་ཉིད་དང་། མིང་དོན་དང་། ལས་ཐ་དད་པ། ཡན་ལག་ལྔས་ཡང་དག་པར་བསྡུས་

---

^{[མ་དཔེ་གཟིགས་ན་འདིར་གནོན།]}

པ་དང་། གསུམ་ལས་གཉིས་འབྱུང་བ་དང་། གཉིས་ལས་བདུན་འབྱུང་བ་དང་། བདུན་ལས་གསུམ་འབྱུང་བ་དང་། དུས་གསུམ་པའི་ངོ་བོར་བཞག་པ་དང་། རྐྱེན་དང་འབྲེལ་བ་དག་ཡིད་ལ་བྱའོ། །དེ་ལྟར་ཡང་། རང་དང་གཞན་དང་གཉིས་ཀ་ལས་སྐྱེས་དང་། རྒྱུ་མེད་འབྱུང་ཞེས་སྨྲ་བ་གང་ལགས་པ། །འདི་དག་ལོག་པར་ལྟ་བ་ཕུང་ཀྲོལ་བ། །ལེགས་པར་སྤྱད་ཀྱང་འབྲས་བུ་མི་འདོད་འབྱིན། །སོགས་ཀྵ དང་། དྲི་མེད་མེ་ལོང་ངོས་ལ་སྐྱེས་པའི་བཞིན་གྱི་གཟུགས་བརྙན་གང་། །གལ་ཏེ་ཡང་དག་གནས་ན་རྐྱེན་ལ་རག་ལས་མི་འགྱུར་ཞིང་། །སླར་འདི་རྣམ་པར་འཇིག་འགྱུར་གོ་སྐབས་ཅན་དུ་ག་ལ་འགྱུར། །རྒྱུ། དེ་ཕྱིར་དངོས་མེད་རྐྱེན་ལ་རག་ལས་གཅིག་པུ་རྣམ་པར་སྤང་། །ཇི་ལྟར་གནས་པའི་རང་བཞིན་འདི་ཡང་ལེགས་པར་རྣམ་དཔྱད་ན། །རབ་ཏུ་ཕྲ་རྡུལ་བར་དུ་འགྱུར་ཞེས་དམ་པས་དང་པོར་གསུངས། །གལ་ཏེ་དངོས་ཡོད་དེ་དག་ཤེས་རབ་ཅིས་མི་འབབ། །དེ་ཕྱིར་དེ་ཡང་ཕྱོགས་ཆའི་བྱེ་བྲག་དག་གིས་ག་ལ་གནས། །རིན་ཆེན་སེམས་ཀྱི་ཁྱད་པར་འགའ་ཞིག་སྣ་ཚོགས་སྣང་ཞེ་ན། །དེ་ཕྱིར་འདི་ལའང་སྐད་ཅིག་ཅེས་བྱ་རབ་ཕྲ་དམ་པས་གསུངས། །སྐད་ཅིག་སྐད་ཅིག་ཅེས་བྱའི་གང་དག་ཕྲ་ལ་རྣམ་པར་རྨོངས། །དེ་ཡང་ཇི་ལྟར་ཐོག་མ་དབུས་མཐའ་དག་ཏུ་ལྟ་མི་ནུས།། ༈ །།དེ་ལྟར་འདི་དག་ཕྱི་དང་ནང་དུ་བཅས་པ་གཅིག་

---

^{[མ་དཔེ་གཟིགས་ན་འདིར་གནོན།]}

མིན་ཞིང་། །དེ་ཉིད་ཕྱིར་ན་དེ་ཡི་རང་བཞིན་རྣམ་བསགས་དུ་མའང་མིན། །འདི་དག་ལས་དབེན་དངོས་པོ་ཤེས་རབ་མིག་གིས་འགའ་མ་དམིགས། །དེས་ན་འདི་དག་མཐའ་གཉིས་བྲལ་བར་དམ་པས་གསུངས། །དེ་བཞིན་གཅིག་གིས་གཅིག་ཉིད་བསྐྱེད་པ་མངོན་སུམ་འགལ་མཐོང་སྟེ། །རབ་ཏུ་ཕྲ་བའི་འབྲས་བུ་རྒྱུ་ནི་གཅིག་མིན་ལ་ལྟོས་པར། །འགྲོ་བའི་མངོན་སུམ་ཉིད་དུ་སྟོན་པ་བཞིན་དུ་ངེས་པར་གནས། །དེ་བཞིན་གཅིག་གིས་གཅིག་མིན་འགྱུར་སོགས་ཐམས་ཅད་གནོད་པར་བཅས། །དངོས་རྣམས་ཐུག་མེད་མ་ལུས་སླར་སྐྱེ་འགྱུར་འདི་བཟློག་དཀའི་ཕྱིར། །ཡོད་པ་འབའ་ཞིག་སྐྱེ་ཞེས་འདི་ནི་སུས་ཀྱང་སྨྲ་མི་ནུས། །གང་མེད་འགའ་ཞིག་སྐྱེ་ན་ཞེས་པའི་ཐ་སྙད་སུ་ཞིག་འཛེག །དེ་ཕྱིར་བདག་ལས་སྐྱེ་སོགས་འདི་དག་མཁས་པས་རྩ་ནས་བཏོན། །དེ་ལྟར་ཁྱོད་ཀྱི་ཤེས་རབ་སྤྱན་གསལ་དྲི་མེད་རྣམ་རྒྱས་པས། །རྟེན་ཅིང་འབྲེལ་འབྱུང་མཚན་ཉིད་འདི་ལ་ཡུན་རིང་འགགས་པ་ན། །ཐོག་མེད་སྲིད་རྒྱུད་བསགས་པའི་བསྙེངས་གནས་རབ་ཏུ་ཕྲ་བ་ཡང་། །གང་ནའང་གནས་པར་འབྱུང་འདི་གཟིགས་མིན་མི་བདག་གང་གིས་ཞུམ། །ཞེས་གསུངས་སོ། །ཨི་ཏི་ཨཱ་ཙརྱ་ཛེ་ཏཱ་རི་ཀྲྀ་ཏི་ཤུ་བྷཾ། ཡང་། གཙང་སྤྱོད་པ་ཡི་ལྕི་བ་ནི། །ཆུ་དང་ཞོ་མ་འོ་དང་མར། །ཐམས་ཅད་དེ་ལས་བྱུང་བ་དག །སྣོད་གཙང་བཀོལ་ཏེ་ཆུ་རྣམས་དབོ། །ཚིག་མ་དོར་ཏེ་

---

^{[མ་དཔེ་གཟིགས་ན་འདིར་གནོན།]}

དབུས་ཀྱི་ཆས། །དབྱིབས་ཅི་དགའ་བའི་མཎྜལ་ནི། །ས་བདག་ཁྲུ་གང་ཡན་ཆད་སར། །གསང་སྔགས་དོན་ལ་གཞོལ་བར་བྱུགས། །དེ་ནས་དེ་ནི་གུས་པ་ཡིས། །རྒྱལ་བ་སྲས་དང་བཅས་ལ་དབུལ། །འདི་སློབ་དཔོན་དུ་ལོ་བ་དང་། །དྷ་རྨ་པྲཛྙཱས་བསྒྱུར། ༈ །བླ་མ་ལ་སྤྲིང་བ་ལེ་ལ་དགེ་སློང་དགོན་པ་བས་མཛད་པར། །འདོད་པ་རྣམས་ལས་མྱ་ངན་སྐྱེ། །འདོད་པ་རྣམས་ལས་འཇིགས་པ་འབྱུང་། །འདོད་པ་དག་ནི་རྣམ་སྤངས་ན། །མྱ་ངན་མེད་ཅིང་འཇིགས་པ་མེད། །ཅེས་དང་། མགར་བ་ཡིས་ནི་རྡུལ་བཞིན་དུ། །བློ་གྲོས་ལྡན་པས་རིམ་པ་བཞིན། །སྐད་ཅིག་ཐང་ཅིག་ཅུང་ཟད་ཙམ། །རང་གི་དྲི་མ་བསལ་བར་བྱ། །ཞེས་དང་། །གལ་ཏེ་བདེ་བ་ཀུན་འདོད་ན། །འདོད་པ་ཐམས་ཅད་ཡོངས་སུ་སྤངས། །འདོད་པ་ཐམས་ཅད་ཡོངས་སྤངས་པས། །མཆོག་ཏུ་བདེ་བ་ཐོབ་པར་འགྱུར། །ཞེས་དང་། བསམ་བརླག་འདོད་ལ་སྲེད་པ་ཡིས། །བདག་ཕུང་གཞན་ཡང་ཕུང་བར་བྱེད། །ལྷ་ཡིས་འདོད་པའི་ཆར་ཕབ་ཀྱང་། །འདོད་ལྡན་རྣམས་ལ་ངོམས་མི་འགྱུར། །ཞེས་དང་། ནོར་བུའི་རྣ་ཆ་བུ་དང་ཆུང་མ་ལ། །ཡོངས་སུ་ཆགས་སེམས་གང་ཡིན་ལ་ལྟོས་ན། །ལྕགས་ཤིང་དྲེས་མ་ལས་བྱས་ཆིངས་མ་གང་། །དེ་དག་དམ་པོ་མིན་ཞེས་འཕགས་པས་གསུངས། །ཞེས་སོགས་དང་། གང་དག་རྣམ་རྟོག་ཉེ་བར་ཞི་དགའ་ཞིང་། །མི་སྡུག་སྒོམ་

---

^{[མ་དཔེ་གཟིགས་ན་འདིར་གནོན།]}

པ་རྟག་ཏུ་དྲན་བྱེད་པ། །དེ་ཡིས་སྲེད་པ་རབ་ཏུ་སྤངས་བ་ཡིན། །རང་གི་འཆིང་བ་དེ་དག་གཏུབས་པར་འགྱུར། །ཞེས་དང་། གང་ཞིག་འཇིག་རྟེན་སྤང་དཀའ་བའི། །སྲིད་པའི་བུད་མེད་འདིར་བསྟེན་པ། །དེ་ཡི་མྱ་ངན་འཕེལ་འགྱུར་ཏེ། །རྩ་ལ་ཆར་པ་བབས་པ་བཞིན། །གང་ཞིག་འཇིག་རྟེན་སྤང་དཀའ་བའི། །སྲིད་པའི་བུད་མེད་འདི་སྤང་བ། །དེ་ནི་མྱ་ངན་ལྡོག་འགྱུར་ཏེ། །པདྨ་ལ་ནི་ཆུ་ཐིགས་བཞིན། །ཞེས་དང་། དཔེར་ན་ལྗོན་ཤིང་རྩ་ནས་མ་བཏོན་ན། །བཅད་ཀྱང་ཕྱིར་ཞིང་སྐྱེ་བ་ཁོ་ན་ཟད། །དེ་བཞིན་སྲིད་པའི་ཕྲ་རྒྱས་མ་བཏོན་ན། །ཡང་དང་ཡང་དུ་སྡུག་བསྔལ་འདི་མི་ལྡོག །ཅེས་དང་། བག་ཡོད་འཆི་མེད་གནས་ཡིན་ཏེ། །བག་མེད་པ་ནི་འཆི་བའི་གནས། །བག་ཡོད་འཆི་བར་མི་འགྱུར་ཏེ། །བག་མེད་པ་ནི་རྟག་ཏུ་འཆི། །ཞེས་དང་། བརྩོན་པ་ལྡན་ཞིང་དྲན་དང་ལྡན་པ་དང་། །སྤྱོད་པ་གཙང་ཞིང་ཚོ བརྟགས་ནས་བྱེད་པ་དང་། །ཡང་དག་སྡོམ་དང་ཆོས་ཀྱིས་འཚོ་བ་དང་། །བག་ཡོད་རྣམས་ཀྱི་གྲགས་པ་མངོན་པར་འཕེལ། །ཞེས་དང་། འཇིག་རྟེན་པ་ཡི་ཡང་དག་ལྟ། །ཆེན་པོ་གང་ལ་ཡོད་གྱུར་པ། །དེ་ནི་ཚེ་རབས་སྟོང་དུ་ཡང་། །ངན་འགྲོར་འགྲོ་བར་མི་འགྱུར་རོ། །ཞེས་དང་། བག་མེད་ཕ་རོལ་བུད་མེད་བསྟེན་བྱེད་པའི། །མི་གང་ཡིན་ལ་གནས་སྐབས་འདི་བཞི་འབྱུང་། །བསོད་ནམས་མིན་འཐོབ་བདེ་བར་

---

^{[མ་དཔེ་གཟིགས་ན་འདིར་གནོན།]}

མི་ཉལ་དང་། །དམ་པས་སྨོད་ཅིང་ལུས་ཞིག་ངན་འགྲོར་སྐྱེ། །ཞེས་དང་། རྟག་ཏུ་ལེགས་པར་བརྩམས་པ་དང་། །བྱ་བ་མ་ཡིན་མི་བྱེད་ཅིང་། །རྒྱུན་དུ་བྱ་བ་བྱེད་པ་དག །དྲན་དང་ཤེས་བཞིན་ལྡན་པ་དེའི། །ཟག་པ་རྣམས་ནི་ཟད་པར་འགྱུར། །ཞེས་དང་། ཇི་ཙམ་མང་དུ་སྨྲ་བྱེད་པ། །དེ་དག་དམ་ཆོས་འཛིན་པ་མིན། །གང་དག་འདི་ན་ཐོས་ཉུང་ཡང་། །ཡིད་ཀྱི་ཆོས་དག་མངོན་སུམ་བྱས། །གང་དག་གླུ ཆོས་ལ་བག་བྱེད་པ། །དེ་དག་དམ་ཆོས་འཛིན་པ་ཡིན། །ཅེས་དང་། ཉོན་མོངས་རྣམས་ནི་བདག་འཇོམས་སེམས་ཅན་འཇོམས་ཤིང་ཚུལ་ཁྲིམས་འཇོམས། །ཉམས་བཅས་རྙེད་པས་དམན་ཞིང་སྲུང་དང་དེ་བཞིན་སྟོན་པས་སྤངས། །རྩོད་བཅས་མི་སྙན་དེ་ནི་གཞན་དུ་མི་ཁོམས་རྣམས་སུ་སྐྱེ། །ཐོབ་དང་མ་ཐོབ་ཉམས་བྱས་འཇིགས་དང་སྡུག་བསྔལ་ཆེན་པོ་ཐོབ། །ཅེས་དང་། ཉོན་མོངས་དེ་དག་སྤང་སླད་དུ། །ཞི་གནས་ལྷག་མཐོང་བསྒོམ་པ་དང་། །མི་སྡུག་བྱམས་ཁམས་རྟེན་འབྲེལ་དང་། །དབུགས་རྔུབས་དབུགས་དབྱུང་དྲན་པར་མཛོད། །ཅེས་གསུངས་སོ། །སློབ་དཔོན་བི་ནཱ་ཡ་ཙནྡྲ་དང་། དྷ་རྨ་པཱ་ཛྷཱས་བསྒྱུར།། ༈ །། བུ་ལ་སྤྲིང་པ་པཎྜི་ཏ་པྲ་ཛྙཱ་ན་ཞེས་པས་མཛད་པར། །འདོད་པའི་འདམ་དུ་འགྲོ་བ་འདི་དག་བྱིང་། །དཔེར་ན་གླང་ཆེན་འདམ་དུ་ཆུད་པ་བཞིན། །འདོད་པ་ལས་ནི་འཇིགས་དང་སྡུག་བསྔལ་དང་། །མྱ་ངན་དང་ནི་

---

^{[མ་དཔེ་གཟིགས་ན་འདིར་གནོན།]}

འཚེ་བ་སྣ་ཚོགས་འབྱུང་། །གསོད་དང་བཅིངས་དང་ཡན་ལག་གཅོད་པ་དང་། །མེ་དང་ཆུ་དང་གཡང་སར་འདོར་བར་བྱེད། །འདོད་པ་བརྐམས་པས་སེམས་ཅན་དམྱལ་བ་དང་། །ཡི་དྭགས་དུད་འགྲོ་རྣམས་སུ་སྡུག་བསྔལ་རྙེད། །ཅེས་དང་། དམ་ཆོས་ཕྱིར་ནི་ཕ་མ་ཡལ་དོར་ནས། །ནོར་བཟང་བཞིན་དུ་ཡུལ་གཞན་རྒྱུ་འོས་ཀྱང་། །འདོད་པའི་དོན་དུ་ཕ་མ་ཡལ་དོར་ནས། །སྨད་པའི་དོན་དུ་རྒྱུ་བར་ག་ལ་རིགས། །སོགས་དང་། ནོར་ལ་ཆགས་པས་འདིར་གདུང་ཕྱི་མར་གདུང་། །གཉིས་ཀར་གདུང་སྟེ་དེས་ན་བདག་ཉིད་ཀྱི། །ལས་རྣམས་སྨིན་མཐོང་དེ་གདུང་རབ་ཏུ་གདུང་། །འགྲོ་བ་དམན་པར་སོང་བས་ཕྱིར་ཞིང་གདུང་། །བསགས་དང་བསྲུང་དང་བརླག་པའི་གདུང་བ་ཡི། །ནོར་ནི་ཕུང་ཁྲོལ་མཐའ་ཡས་ཤེས་པར་བྱ། །ནོར་ལ་ཆགས་པས་གཡེང་བར་གྱུར་པ་རྣམས། །སྲིད་པའི་སྡུག་བསྔལ་ལས་གྲོལ་སྐབས་མེད་དོ། །ཞེས་དང་། འདི་ན་གསེར་དང་དངུལ་དང་བཻཌཱུརྨ། །མུ་ཏིག་བྱེ་རུ་ཨ་སྨྲ་གནྡཱ་དང་། །ཀཱནྡྲ་པ་ཎ་ལ་སོགས་ཆར་འབབས་ཀྱང་། །ནོར་ཚོལ་རྣམས་ནི་ངོམས་པར་འགྱུར་བ་མེད། །སོགས་དང་། །བུ་ཁྱོད་གལ་ཏེ་ནོར་འཚོལ་ན། །འཕགས་པའི་ནོར་བདུན་བསྟེན་པར་གྱིས། །རྒྱལ་པོ་རྐུན་པོས་མི་འཕྲོག་ཅིང་། །སྲིད་པའི་དབུལ་བ་སེལ་བར་འགྱུར། །ཞེས་དང་། བུད་མེད་ཕུང་བར་བྱེད་པ་སྟེ། །འཇིག་རྟེན་འདི་

---

^{[མ་དཔེ་གཟིགས་ན་འདིར་གནོན།]}

དང་ཕ་རོལ་ཕུང་། །རྣམ་པ་ཀུན་ཏུ་ནོར་འཇིག་དང་། །ངན་སོང་རྩ་བ་བུད་མེད་ཡིན། །དང་། བུད་མེད་ཁ་ཟས་ཉིས་འགྱུར་ཏེ། །གཡོ་སྒྱུ་དག་ནི་བཞི་འགྱུར་ཡིན། །ཕྲག་དོག་ཤས་ནི་དྲུག་འགྱུར་ཏེ། །འདོད་པ་བརྒྱ་འགྱུར་ཡིན་པར་བྱ། །ཤིང་རྣམས་ཀྱིས་ནི་མེ་དང་ནི། །ཆར་གྱིས་རྒྱ་མཚོ་ཆེན་པོ་དང་། །འབྱུང་པོ་ཀུན་གྱིས་གཤིན་རྗེ་ལྟར། །སྐྱེས་པ་བུད་མེད་ངོམས་མི་འགྱུར། །ཡང་། གལ་ཏེ་ཆུང་མ་བསྟེན་ན་ཡང་། །དེ་ཡི་ཉེས་དམིགས་དྲུག་ཅུ་ལྔ། །དྲག་ཤུལ་ཅན་གྱི་མདོ་ལས་གསུངས། །དེའི་ཕྱིར་བུད་མེད་སྤང་བྱའོ། །ཞེས་སོ། །གང་ཞིག་འཐུང་ན་ར་རོ་གློ་ནས་གོམས་ཚུགས་དབང་མེད་འདོར། །ཡུལ་གྲོང་མ་འདྲིས་སར་ཡང་འཁྱམས་ཤིང་བརྡེག་འཆོས་འགྱུར། །བཟའ་དང་མི་བཟའ་དཔྱད་མེད་དུག་དང་འདྲེས་པ་བཟའ། །དེ་བས་རྟག་ཏུ་བུ་ཁྱོད་མྱོས་འགྱུར་ཁུ་བ་སྤོངས། །གང་འཐུང་ན་ནི་བདག་ལ་བརྟན་མེད་བློ་ཉམས་ཤིང་། །ཕྱུགས་དང་འདྲ་བར་མཛའ་བོས་སྤངས་ཤིང་དགྲ་བོས་འཕྱ། །འདུས་བ་བྲོ་གར་བྱེད་ཅིང་གླུ་ལེན་འཁར་རྔ་བརྡུང་། །དགེ་ལེགས་གྲགས་ཉམས་རྒྱུ་དེ་སུ་ཞིག་འཐུང་བར་བྱེད། ཅེས་སོགས་དང་། །གང་ཞིག་འཐུང་ན་དཔལ་གྱི་གཞིར་འགྱུར་རིང་། །ཇེ་མཐོ་ཇེ་མཐོ་གྱུར་པའང་བརླག་བྱེད་པ། །ནོར་གྱི་དབྱིག་ལྡན་ཁྱིམ་ཡང་ཕུང་འགྱུར་བ། །ཉེས་མང་གཞི་རྩ་དེ་ནི་སུ་ཞིག་འཐུང་། ཞེས་

---

^{[མ་དཔེ་གཟིགས་ན་འདིར་གནོན།]}

དང་། །དེ་འཐུང་ཡིད་ནི་རབ་ཏུ་འཁྲུགས་གྱུར་ནས། །བརྩེ་བའི་ཕ་དང་མ་ཡང་གསོད་འགྱུར་ཞིང་། །ཉེས་མེད་དགེ་སྦྱོང་བྲམ་ཟེ་དྲང་སྲོང་གསོད། །ཆོམ་རྐུན་དང་ནི་ལོག་གཡེམ་སྨད་པར་བྱེད། །རྫུན་དང་ཕྲ་མ་ཚིག་རྩུབ་འཆལ་པ་སྨྲ། །བརྣབ་སེམས་གནོད་སེམས་ལོག་ལྟའི་མུན་པ་འཛིན། །མི་དགེའི་རྩ་བ་དེ་ནི་བཏུང་མི་བྱ། །གང་ཞིག་བཏུང་ན་ཚུལ་ཁྲིམས་ཏིང་འཛིན་དང་། །ཤེས་རབ་ལྟ་བ་འཚོ་བ་ཆོ་ག་དང་། །དྲན་པ་ཤེས་བཞིན་དད་པ་བརྩོན་འགྲུས་ཉམས། །དགེ་ཆོས་ཆུད་གཟོན་དེ་ནི་བཏུང་མི་བྱ། །ཞེས་དང་། ཐུབ་པས་དགའ་བ་ཅན་གྱི་མདོ་ལས་ནི། །མྱོས་འགྱུར་ཉེས་པ་སུམ་ཅུ་རྩ་ལྔ་གསུངས། །དེ་ཕྱིར་བུ་ཁྱོད་བདག་ལ་ཕན་འདོད་ན། །ཉེས་ཀུན་རྩ་བ་དེ་ནི་བཏུང་མི་བྱ། །ཞེས་གསུངས་སོ། །ཀཤྲཱི་རའི་མཁན་པོ་མ་ཧཱ་ཛྙཱ་ན་དང་། །ལོ་ཙཱ་བ་མར་པ་དྷརྨེ་ཤྭ་༧༠རས་འགྱུར་རོ།། ༈ །།དྲི་མ་མེད་པ་རིན་པོ་ཆེའི་སྤྲིང་ཡིག་ཁོ དཱི་པཾ་ཀཱ་ར་ཤྲཱི་ཛྙཱ་ན་ཀྲྀ་ཏ། །རང་སྐྱོན་རྟོག་ལ་མིག་བཞིན་བྱ། །གཞན་སྐྱོན་རྟོག་ལ་ལོང་བ་བཞིན། །དྲེགས་དང་ང་རྒྱལ་མེད་པ་དང་། །སྟོང་ཉིད་རྟག་ཏུ་བསྒོམ་པར་བྱ། །བདག་གི་ཉེས་པ་བསྒྲག་བྱ་ཞིང་། །གཞན་གྱི་ཡོན་ཏན་བསྒྲག་པར་བྱ། །རྙེད་དང་བཀུར་སྟི་སྤང་བྱ་ཞིང་། །ཁེ་གྲགས་རྟག་ཏུ་སྤང་བར་བྱ། །སོགས་དང་། སོས་ཀའི་ཁུ་བྱུག་གཞོན་ནུ་སྐད་སྙན་སྒྲོགས་ཞེས་ཏེ། །རྨ་བྱ་གཞོན་ནུ་སྐད་མི་སྙན་པ་མི་

---

^{[མ་དཔེ་གཟིགས་ན་འདིར་གནོན།]}

སྒྲོགས་སམ། །མཁས་པ་མང་པོས་ལེགས་པར་གསུངས་པ་ཡོད་མོད་ཀྱིས། །རྒྱལ་པོའི་གདུང་བ་བཅད་ཕྱིར་བདག་གིས་བྲིས་པ་ཡིན། །ཞེས་སོ།། ༈ །།རྒྱལ་པོ་ཟླ་བ་ལ་སྤྲིང་པར། ལོངས་སྤྱོད་ཅི་འདྲ་ཁྱིམ་གྱི་སྦྲང་། །བཤེས་པ་ཅི་འདྲ་ཚོང་ཁང་མི། །སྡང་སྡེ་རྨི་ལམ་གནོད་པ་བཞིན། །རང་ལུས་ཅི་འདྲ་སྦྲུལ་གྱི་ལྤགས། །འདུ་འཛི་ཅི་འདྲ་ནད་གཞི་བཞིན། །ཚེ་སྲོག་ཅི་འདྲ་རི་གཟའ་ཆུ། །ཞེས་སོགས་དང་། །ལྷ་གཅིག་ཇི་ལྟར་ཁྱོད་འབྱོར་ཀྱང་། །གཤེགས་ནས་འཇིག་རྟེན་གཞན་བཞུད་ཚེ། །མྱ་ངན་ཐང་ལ་དགྲས་བཅོམ་ལྟར། །གཅིག་པུ་སྲས་མེད་བཙུན་མོ་མིན། །ན་བཟའ་མ་མཆིས་བཤེས་མ་མཆིས། །རྒྱལ་སྲིད་མ་མཆིས་ཁབ་མ་མཆིས། །དཔག་མེད་མཐུ་དཔུང་མངའ་ལགས་ཀྱང་། །གཟིགས་སུ་མ་མཆིས་གསན་མ་མཆིས། །གཅིག་ཙམ་ཉིད་གཅིག་ཕྱི་ཐག་གི །རྗེས་སུ་འབྲང་བའང་མི་མངའོ། །མདོར་ན་ཉིད་ཀྱི་མཚན་ཙམ་ཡང་། །དེ་ཚེ་མེད་ན་གཞན་ཅི་སྨོས། །ཞེས་མི་ཏྲ་ཛོ་ཀིས་མཛད་པ་ལས་༧༣སོ།། ༈ །།སློབ་དཔོན་ནཱ་གཱ་རྫུ་ནས་མཛད་པའི་བཤེས་སྤྲིང་གི་རྒྱས་འགྲེལ་ཚིག་གསལ་ཅེས་སློབ་དཔོན་བློ་གྲོས་ཆེན་པོས་མཛད་པར། རྗེས་དྲན་དྲུག་གི་སྐབས། སངས་རྒྱས་རྗེས་སུ་དྲན་པ་ནི་དེ་བཞིན་གཤེགས་པ། དགྲ་བཅོམ་པ་སོགས་ནས། དགེ་འདུན་རྗེས་སུ་དྲན་པའི་མཐར་ཐུག་པའི་བར་སྦྱར་ནས་དེ་གསུམ་ནི་

---

^{[མ་དཔེ་གཟིགས་ན་འདིར་གནོན།]}

གཞན་རྒྱུད་ལ་བཞུགས་པའི་ཡོན་ཏན་དང་། གཏོང་བ་རྗེས་སུ་དྲན་པ་ནི། འདིར་རང་གི་རྒྱུད་དུ་གཏོགས་པའི་སྦྱིན་པའི་ཡོན་ཏན་སེར་སྣའི་དྲི་མ་སངས་པ། །སྦྱིན་པའི་ངང་ཚུལ་ཅན། ལུས་ཀྱིས་བརྩོན་འགྲུས་བརྩམས་པ། དངོས་པོ་ཡོངས་སུ་གཏོང་བ། དེ་ལ་མངོན་པར་དགའ་བ་ཞེས་བྱ་བ་རྣམས་བསྟན་ཏོ། །ཚུལ་ཁྲིམས་ཀྱི་ཡོན་ཏན་ནི་བདག་གི་ཚུལ་ཁྲིམས་ནི་མ་ཉམས་པ། སྐྱོན་མེད་པ། མ་འདྲེས་པ། མ་གོས་པ། རང་དབང་ཡོད་པ། མཁས་པས་བསྔགས་པ། ཏིང་ངེ་འཛིན་སྒྲུབ་པ་དག་ཡིན་ནོ། །ལྷའི་ཡོན་ཏན་ནི། རྒྱལ་ཆེན་རིགས་བཞི་པའི་ལྷ་དག་དང་། སུམ་ཅུ་རྩ་གསུམ་པ་ནས་གཞན་འཕྲུལ་དབང་བྱེད་ཀྱི་བར་དག་ཡོད་དོ་ཞེས་བྱ་བ་ཡིན་ཏེ། ལྷ་དེ་དག་རྣམས་དང་བདག་ཉིད་ཀྱི་ཡོན་ཏན་རྗེས་སུ་དྲན་པར་བྱེད་པ་ཡིན་ནོ། །དེ་ལ་སྐྱེས་པའི་ལྷ་རྣམས་ཀྱི་སྐྱེ་བའི་རྒྱུར་གྱུར་པའི་ཡོན་ཏན་དང་། བདག་ཉིད་ཀྱི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱི་ཡོན་ཏན་རྣམས་ནི་ལྷའི་ཡོན་ཏན་ནོ། །ཞེས་བཤད་དོ། །དོན་དུ་ན་འདིར་རང་གི་ཡོན་ཏན་རྣམས་ཁོ་ན་ལྷའི་ཡོན་ཏན་དང་མཚུངས་པར་བྱས་ནས་དྲན་པ་ནི་རྗེས་སུ་དྲན་པ་ཞེས་བྱ་བར་བཤད་དོ། །ཞེས་དང་། ཡང་། རྗེས་སུ་དྲན་པའི་གནས་དྲུག་ནི་སེམས་དྭངས་པར་བྱེད་པའི་ཕྱིར་དང་། བསོད་ནམས་ཆེན་པོའི་རྒྱུ་ཡིན་པའི་ཕྱིར་དང་པོ་ཉིད་དུ་བསྟན་ནས།

---

^{[མ་དཔེ་གཟིགས་ན་འདིར་གནོན།]}

ཞེས་འབྱུང་ངོ་། །དེ་ཡང་སངས་རྒྱས་སོགས་ཡོན་ཏན་རྣམས་རྗེས་སུ་དྲན་པ་དེ་དག་རྗེས་སུ་དྲན་པར་བྱ་ཞིང་ཡིད་ལ་བྱའོ། །དེ་ཡང་སངས་རྒྱས་ལ་སོགས་པ་དེ་རྣམས་རང་རང་གི་ཡོན་ཏན་གྱི་ཚོགས་རྣམས་ཀྱིས་རྗེས་སུ་དྲན་པར་བྱ་སྟེ། །དེ་ལ་ཡོན་ཏན་གྱི་ཚོགས་ནི་གང་ཡིན་ཞེ་ན། འདི་ལྟར་དེ་ནི་བཅོམ་ལྡན་སོགས་སོ།། ༈ །།སྒྲིབ་པ་བཅུ་པོ་ལྔར་མཛད་པ་ནི་ངོ་བོ་མཐུན་པས་ཏེ། གཡོ་བ་དང་། བླུན་པ་ཉིད་དུ་མཐུན་པའི་ཕྱིར་ཏེ། །རྒོད་འགྱོད་གཉིས་ཀ་གཡོ་བ་དང་། །རྨུགས་གཉིད་གཉིས་ཀ་བླུན་པ་ཡིན་པའི་ཕྱིར་རོ།། ༈ །།ཉིན་ཞག་གཅིག་གི་གསོ་སྦྱོང་གིས་འདོད་པ་ན་སྤྱོད་པའི་ལྷའི་གནས་སུ་སྐྱེ་བར་ཀླུའགྱུར་རོ།། ༈ །།རྣམ་གསུམ་མར་མེའི་སྣང་བ་ནི། སྒོ་གསུམ་གྱི་ལེགས་སྤྱོད་དམ། སྦྱིན་ཚུལ་བསྒོམས་པ་ལས་བྱུང་བའི་བསོད་ནམས་སུ་བསྟན་ཏོ། །རྟེན་འབྲེལ་བཅུ་གཉིས་སཱ་ལུ་ལྗང་བའི་མདོ་ནས་གསལ། ཟབ་མོ་ཞེས་པ་ནི། བདག་གཞན་གཉིས་ཀ་རྒྱུ་མེད་རྣམས་ལས་མ་སྐྱེས་ཤིང་མ་བྱས་པའི་ཕྱིར་རོ། །ཚུལ་ཁྲིམས་སྐྱོན་ཅན་ནི་མོད་དམའ་པའོ། །འདྲེས་པ་ནི་མི་དགེ་བའོ། །སྤགས་པ་ནི་སྲིད་པའི་དོན་དུ་བསྔོས་པའོ། །དེ་དག་མེད་པས་མེད་མི་དམའ་སོགས་སོ། །མི་ནི་ཨ་མྲའི་འབྲས་བུ་སོགས་ཀྱི། དང་པོ་ཕྱི་སྨིན་ལ་ནང་མ་སྨིན་པ་ནི་སྦྱོར་བ་ཕུན་སུམ་ཚོགས་ཀྱང་བསམ་པ་དམན་པའོ། །ཀི་མ་པའི་འབྲས་བུ་ནི་ཤུན་པ་

---

^{[མ་དཔེ་གཟིགས་ན་འདིར་གནོན།]}

བཟང་ལ་ནང་ངན་པའོ། །སྦྲང་རྩི་ལྟ་བུའི་ཚིག་ནི་སྙན་པ། མེ་ཏོག་ལྟ་བུ་ནི་བདེན་པ། མི་གཙང་བ་ལྟ་བུ་ནི་ལོག་པའོ།། ༈ །།དབང་ཕྱུག་པས་ཀྱང་། ཕྲ་ཞིང་བསམ་གྱིས་མི་ཁྱབ་རབ་ཏུ་སྲབ་བྱེད་ཀུན་རིག་ཐམས་ཅད་བྱེད། །རྣལ་འབྱོར་གོམས་པས་ཐོབ་པའི་བློ་ཅན་བསམ་གཏན་པ་ཡི་ཡུལ། །ཉི་མ་ཟླ་བ་ཆུ་མེ་རླུང་ཕྱོགས་ནམ་མཁའི་ལུས་ཅན་ཏེ། །ཞི་བའི་བདེ་དགའ་འགྲུབ་པར་འདོད་པ་རྣམས་ཀྱིས་དབང་ཕྱུག་རྟག་ཏུ་བསྒོམ། ཞེས་བཤད་དོ།། ༈ །།ལུང་མ་བསྟན་པ་བཅུ་བཞི་ནི། འཇིག་རྟེན་རྟག་པ་དང་། འཇིག་རྟེན་མི་རྟག་པ་དང་། རྟག་པ་ཡང་ཡིན། མི་རྟག་པ་ཡང་ཡིན་པ་དང་། རྟག་པ་ཡང་མ་ཡིན། མི་རྟག་པ་ཡང་མ་ཡིན་པ་དང་། འཇིག་རྟེན་མཐའ་དང་ལྡན་པ་དང་། འཇིག་རྟེན་མཐའ་དང་མི་ལྡན་པ་དང་། མཐའ་དང་ལྡན་པ་ཡང་ཡིན། མཐའ་དང་མི་ལྡན་པ་ཡང་ཡིན་པ་དང་། མཐའ་དང་ལྡན་པ་ཡང་མ་ཡིན། །མཐའ་དང་མི་ལྡན་པ་ཡང་མ་ཡིན་པ་དང་། དེ་བཞིན་གཤེགས་པ་ཤི་ཕན་ཆད་ཡོད་པ་དང་། མེད་པ་དང་། ཡོད་ཀྱང་ཡོད་ལ་མེད་ཀྱང་མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན། སྲོག་གང་ཡིན་པ་དེ་ལུས་ཡིན་པ་དང་། སྲོག་ཀྱང་གཞན་ལ་ལུས་ཀྱང་གཞན་ཞེས་བྱ་བ་ཡིན་ནོ། །དངོས་པོ་བཅུ་བཞི་པོ་འདི་དག་ནི་དྲིས་ན་ལུང་མི་བསྟན་པ་ཡིན་པའི་ཕྱིར་ལུང་དུ་མ་བསྟན་པ་ཞེས་བཤད་དེ། འདི་ཉིད་

---

^{[མ་དཔེ་གཟིགས་ན་འདིར་གནོན།]}

བཞག་པའི་དྲི་བ་ཡིན་པར་བསྟན་ཏོ། །གནས་འདི་དག་ཡིད་ལ་བྱེད་པས་ནི་སེམས་ཞི་བར་མི་གནས་པའི་ཕྱིར་བསམ་བྱ་མ་ཡིན་ནོ། །ཞེས་བཤད། ས་ཆུ་མེ་རླུང་ཉི་ཟླ་ནི་ཕྱི་རོལ་པའི་ཐར་པ་སྟེ་དེ་དང་བྲལ་བ་ཐོབ་པར་མཛོད་ཅེས་པའོ། །འདི་སརྦ་ཛྙཱ་དེ་བ་དང་། བནྡེ་དཔལ་བརྩེགས་ཀྱིས་བསྒྱུར་རོ༡༡༢།། ༈ །།སློབ་མ་ལ་སྤྲིང་བའི་ཊི་ཀ་སློབ་དཔོན་བཻ་རོ་ཙ་ན་རཀྵི་ཏས་༡༡༢མཛད་པའི་༡༢༡བཀའ་འགྲེལ་སུ་ག་ཏ་ཤྲཱི་མི་ཏྲ་དང་། ཚུལ་ཁྲིམས་རྒྱལ་མཚན་གྱིས་བསྒྱུར་བ།། ༈ །།ཡང་དེའི་འགྲེལ་པ་༡༢༡རྒྱས་པ་སློབ་དཔོན་ཤེས་རབ་འབྱུང་གནས་བློ་གྲོས་ཀྱིས་མཛད་པ་ཤིན་ཏུ་གསལ་བ་བི་ནཱ་པ་༡༣༣ཙནྡྲ་。དང་། ཆོས་ཀྱི་ཤེས་རབ་ཀྱིས་བསྒྱུར་བའོ།། ༈ །།གནས་བརྟན་སྤྱན་དྲངས་པ་ལས། གསེར་རིའི་དཀྱིལ་ནས་བསིལ་བའི་ཆུ་འབབ་པ། །ཆུ་ལ་ཟླ་བའི་གཟུགས་བརྙན་འབྱུང་འགྱུར་ཞིང་། །ཟླ་བའི་འོད་ཀྱིས་ཀུ་མུད་ཁ་ཕྱེ་སྟེ། །ཀུ་མུད་ཚལ་ན་སྐད་སྙན་ངང་པ་གནས། །ངང་མོ་མཚེའུ་ན་སྒྲ་སྐད་སྙན་པར་འབྱིན། །རི་ངོགས་རྨ་བྱ་གར་བཅས་རྒྱགས་པར་གནས། །རྨ་བྱ་རྒྱགས་སྒྲས་རི་སུལ་སྙན་པ་གྲགས། །རི་སུལ་ཡལ་ག་ལྷག་པས་རི་རྩེ་འཁྲིགས། །རི་རྩེ་སྟོད་རྣམས་ན་ནི་སྤྲིན་ཆགས་ལ། །ལང་ལིང་སྤྲིན་གྱིས་སྨན་ལྗོངས་ཁྲ་ཁྲོ་སྣང་། །སྨན་ལྗོངས་སྐྱེས་པའི་ནོར་བུ་ལྡུམ་བུ་གསལ། །ལྡུམ་བུ་ལས་བྲུལ་ལྷུང་བའི་

---

^{[མ་དཔེ་གཟིགས་ན་འདིར་གནོན།]}

མེ་ཏོག་ལྡན། །མེ་ཏོག་རྒྱས་པའི་དཔག་བསམ་ཤིང་ཚལ་མཛེས། །མཛེས་པའི་ལྷ་མོ་གསེར་གྱི་ཕག་སྐད་དྲུང་། །གསེར་གྱི་ཕག་སྐད་སྒྲས་ནི་བྱ་འདྲོགས་ཤིང་། །བྱ་ཚོས་ཤིང་ཏོག་རྩ་ལས་ཆད་ཅིང་བྲུལ། །རྩ་འཕྱང་ཁུ་བ་ཟག་པ་སྤོས་ཀྱི་དྲི། །སྤོས་གླང་དབང་པོ་དྲེགས་བྲག་དྲི་རབ་ཞིམ། །དྲི་རབ་ཞིམ་པའི་ལི་ཤི་རི་འཁོར་མང་། །བན་གླང་མོ་རྒྱགས་དྲག་འགྲོ་ལང་ལོང་གྱུར། །བུང་བའི་ཁྱུ་ཡིས་མེ་ཏོག་ཟེག་གྱུར་ཅིང་། །ཡལ་ག་མེ་ཏོག་རྒྱས་པས་གད་པ་དཀར། །གད་པ་ཆད་པས་ནོར་བུའི་ལྡུམ་བུ་བསྣད། །མེ་ཏོག་མགོ་ལྕོག་བྲལ་བས་རྣམ་པར་བཀྲ། །ནོར་བུ་སིལ་མ་མང་པོས་རི་ཞོལ་སྤྲས། །མེ་ཏོག་ཟེགས་པའི་ཤིང་གི་ཡལ་གར་གནས་པའི་བུང་བ་དགའ་བས་འཕུར་རྣམས་དང་། །ཟླ་བའི་འོད་ཟེར་དཀར་པོ་ངང་པ་ལྟ་བུས་ཉེ་འཁོར་རྡོ་བ་ཆག་ཆག་བཏབ། །ལྷུན་པོ་མཐོ་བའི་རི་ལ་ཐུབ་པ་གང་དག་རབ་ཏུ་ཞི་བའི་ཐུགས་འི ཀྱིས་བཞུགས། །དེ་དག་དྲི་མེད་ཟླ་འདྲའི་གྲགས་ལྡན་འདི་ཡི་སྦྱིན་པའི་གནས་ལ་བརྟེན་དུ་གསོལ། །ཞེས་དང་། གང་ཡང་འོད་ཟེར་རྣམས་ཀྱིས་མཁའ་ལ་སྐར་མའི་འཁོར་ལོ་ཟིལ་མནན་ཅིང་། །ཀུ་མུ་དྭ་ཡི་རྫོང་ཡངས་རྣམས་སུ་དཔལ་ནི་རབ་ཕྱེ་ནས། གླང་པོའི་མཆེ་བའི་དཔལ་དང་ལྡན་ཞིང་མཚན་མོ་ཤིན་ཏུ་རབ་མཛེས་པ། །དེ་ཡང་ངེས་པར་སྦྱིན་པ་ཉིད་ཀྱི་འབྲས་བུ་རོ་བྲོ་མང་པོ་ཡིན། །སོགས་དང་། རྒྱལ་

---

^{[མ་དཔེ་གཟིགས་ན་འདིར་གནོན།]}

མཚན་རྩེར་བཏགས་རིན་ཆེན་འོད་ཟེར་སྣང་བས་ནམ་མཁའ་དམར་གྱུར་ཅིང་། །རྟ་རྨིག་འདོར་བས་མཁའ་ལ་སྤྲིན་གྱི་ཕྲེང་བ་དག་ཀྱང་དྲལ་བྱེད་ལ། །རྔ་ཡབ་དཀར་པོ་གཡབ་ཅིང་འཁོར་ལོས་སྒྱུར་བར་སོང་བ་གང་ཡིན་པ། །འདོད་པའི་འབྲས་བུ་དེ་ཡང་སྦྱིན་པས་བསྒྲུབས་ཞེས་ཐུབ་པས་བཀའ་སྩལ་ཏོ། །ཞེས་སོགས་དང་། སྲིད་པའི་འདོད་ཆགས་ཉོན་མོངས་ཞགས་པ་བསལ་ཞིང་སྲེད་མེད་པ། །ཆུ་ཡི་ཀླུ ཆུ་གཏེར་ལྟ་བུར་ཡོན་ཏན་རྣམས་ཀྱི་གནས་གཅིག་པུ། །ཐུབ་པའི་སྲས་མཆོག་དགེ་འདུན་རྣམས་ནི་བདག་གིས་གུས་པས་སྤྱན་དྲངས་པས། །དེ་རིང་དགེ་བ་གང་བསགས་དེས་ནི་བྱང་ཆུབ་ཐོབ་གྱུར་ཅིག །ཇི་སྲིད་མཁའ་ལ་འོད་འཕྲོ་འོད་ཀྱིས་གསལ་བས་རྣམ་པར་སྣང་བྱེད་ཅིང་། །རི་དྭགས་རྟགས་ཅན་འོད་ཀྱིས་རལ་པའི་དཀྱིལ་འཁོར་ལྡན་ལ་འཆར་བ་དང་། །རྒྱ་མཚོ་རྒྱས་པར་གནས་པ་དེ་སྲིད་ལྷ་དང་ལྷ་མིས་ཕྱག་བྱས་པའི། །བདེ་བར་གཤེགས་ཀྱི་བསྟན་པ་ཐོགས་པ་མེད་པར་གནས་པར་ཤོག །ཅེས་གསུངས་སོ། །འདི་སློབ་དཔོན་བྷ་༡༥༣བ་སནྣ་༢༥པས་༡༦༠མཛད་བར་ཅིང་། ཛི་ན་མི་ཏྲ་དང་། ཛྙཱ་ན་སེ་ནས་བསྒྱུར་རོ། །ཤུ་བྷཾ། །བསྙེན་པའི་ཚེ། དབང་ཐོབ་ཅིང་དམ་ཚིག་ལ་གནས་པས། ཚུལ་ཁྲིམས་དང་གཙང་སྦྲ་ཁྱད་པར་ཅན་དགོས་ཏེ། དེ་མེད་ན་དཔུང་བཟང་ལས། མི་ནི་ཚུལ་ཁྲིམས་གཙང་སྦྲར་མི་

---

^{[མ་དཔེ་གཟིགས་ན་འདིར་གནོན།]}

ལྡན་ཡང་། །གསང་སྔགས་ལྷ་ནི་ནམ་ཡང་གནོང་མི་མཛད། །ལྷ་དེའི་འཁོར་དུ་གཏོགས་པ་གང་ཡིན་པ། །མི་ཡི་གླགས་མཐོང་ནས་ནི་ཕུང་བར་བྱེད། །ཅེས་དང་། ཡང་། སྔགས་ཀྱི་རྩ་བ་དང་པོ་ཚུལ་ཁྲིམས་ཏེ། །དེ་ནས་བརྩོན་འགྲུས་དང་ནི་བཟོད་པ་དང་། །རྒྱལ་བ་ལ་ནི་དད་ཅིང་བྱང་ཆུབ་སེམས། །གསང་སྔགས་དག་ཅིང་ལེ་ལོ་མེད་པའོ། །ཞེས་གསང་སྔགས་སྒྲུབ་པའི་རྩ་བ་འདི་བདུན་ལ་དང་པོ་ནས་ནན་ཏན་དུ་བྱ་བ་དང་། ཡང་སྒྲུབ་པ་ཀུན་ལ་དང་པོ་ཁོ་ནར་ནི། །ལྷ་བཤོས་གཏོར་མ་ཕལ་ཆེར་དབུལ་བར་བྱ། །སྔགས་པ་ལས་གྲུབ་ནས་ཀྱང་དུས་ཀུན་ཏུ། །རང་གི་ཉམས་ཀྱིས་ཇི་སྙེད་དབུལ་བར་བྱ། །ཞེས་སྦྱོར་མཇུག་ཏུ་མཆོད་གཏོར་རྒྱ་ཆེར་བྱ་དགོས། དེ་ལྟར་བསླབ་གཞི་ལ་གནས་ནས་ལྷའི་སྐུ་བསྒོམ་པར་བྱ་སྟེ། ཕྱག་རྡོར་དབང་བསྐུར་རྒྱུད་ལས། ལྷའི་གཟུགས་དེ་དང་ཐ་མི་དད་པའི་རྣལ་འབྱོར་ལ་བརྩོན་ཞིང་། གང་གི་བསླབ་པའི་གཞི་རྣམས་ཀྱང་ཡོངས་སུ་བཟུང་སྟེ། ཐེག་པ་ཆེན་པོ་སྤྱོད་པ་དེའི་ཚེ་གསང་སྔགས་པ་རྣམས་ལ་དངོས་གྲུབ་ཐོབ་བོ། །ཞེས་གསུངས། དེ་ནས་བཟླས་པའི་ཡུལ་ཕྲེང་བ་ནི་སྤྱིར་པུ་ཏྲ་ཛཱི་བ་ཀ་དང་། བྱེ་བྲག་ཏུ་སྡོམ་པ་སོགས་ལ་ཐོད་ཕྲེང་བསྔགས་ཏེ་མངོན་བརྗོད་ལས། དུང་ཆེན་ཕྲེང་བ་བླངས་ནས་སུ། ལག་གཡོན་མཐེ་བོང་སྲིན་ལག་གིས། གསང་སྔགས་དག་ནི་བཟླས་པར་བྱ། ཞེས་སོ། །བཟླ་བྱའི་

---

^{[མ་དཔེ་གཟིགས་ན་འདིར་གནོན།]}

སྔགས་གཙོ་བོ་ལ་བཞི་འབུམ། འཁོར་ལ་བཞི་ཁྲི་རེ་བཟླ། དམིགས་པ་སོ་སོའི་གཞུང་ལས་ཤེས། དེའི་ཚེ་མྱུར་ན་ཟུར་འཆད། བུལ་ན་གྲངས་མི་འགྲོ། སྒྲ་ཆེ་ན་བར་ཆད་འབྱུང་། ཆུང་ན་དངོས་གྲུབ་བུལ། ནོར་བ་དང་ཆད་ན་དངོས་གྲུབ་ལོག་སྟེ། སྐྱོན་ལྔ་པོ་འདི་ཅིས་ཀྱང་སྤང་དགོས། །གཞན་ཡང་། འཇམ་དཔལ་རྩ་རྒྱུད་དུ། གང་ཞིག་ཤེས་རབ་ཚུལ་ཁྲིམས་ལྡན། །སྙིང་རྗེ་ཆེ་ཞིང་ལས་ཅན་དང་། །གཙང་སྦྲ་སྤྱོད་ལ་དགའ་བ་སྟེ། །སྔགས་རྣམས་ཀུན་ཏུ་འགྲུབ་པར་འགྱུར། །ཅེས་དང་། སངས་རྒྱས་ཐོད་པ་ལས། ཇི་ལྟར་ཕན་ཚུན་སྨྲས་པས་བཟླས་ན་དངོས་གྲུབ་གཞན་དུ་འགྱུར་རོ། །ཞེས་དང་། ཧཱུྃ་མཛད་ཀྱི་རྒྱུད་དུའང་སྟན་གྱི་དྲོད་མ་ཡལ་བ་དང་། མི་ཚིག་གིས་བར་མ་ཆོད་པར་དགོས་པར་བཤད་ལ། ལེགས་གྲུབ་ལས་ཟློས་ཚེ་ཅི་ཡང་མི་སྨྲ་ཞིང་། ཡན་ལག་འགྱུར་བར་མི་བྱའོ། །ཞེས་པས་གལ་ཆེའོ། །སྔགས་ཀྱི་རིང་ཆ་སོགས་མ་ཆད་པ་དང་། ཁྱད་པར་གུག་སྐྱེད་ཆད་ལྷག་ཏུ་གྱུར་པ་ཤིན་ཏུ་མི་རུང་སྟེ། དཔུང་བཟང་ལས། ཆོ་ག་ཉམས་ཤིང་ཡི་གེ་གུག་སྐྱེད་མེད། །མཆོད་པ་མེད་ཅིང་མི་གཙང་བཟླས་བརྗོད་བྱས། །གུག་སྐྱེད་ཡི་གེ་ལྷག་པར་གྱུར་པ་ཡི། །གསང་སྔགས་དངོས་གྲུབ་རྒྱ་ཆེན་མི་སྟེར་རོ། །ཞེས་བཤད། དེའི་མཚན་མ་བཟང་ངན་ཅི་བྱུང་ཡང་། དངོས་པོ་ལ་མངོན་པར་མ་ཞེན་པའི་མཚན་མེད་ཀྱི་ལྟ་

---

^{[མ་དཔེ་གཟིགས་ན་འདིར་གནོན།]}

བས་རྒྱས་ཐེབས་ན་སྒོམ་སྐྱོན་ཐམས་ཅད་དེས་སེལ་ལོ་ཞེས་དཔལ་ལྡན་ས་སྐྱ་པཎྜི་ཏས་བཀའ་གདམས་པ་ནམ་མཁའ་འབུམ་གྱི་དྲིས་ལན་ལས་གསུངས་སོ། །བསྙེན་རྟགས་ནི་མཚམས་དངོས་དང་། ཁ་སྐོང་གི་སྦྱིན་སྲེག་གི་དུས་སུ་འབྱུང་ལ། དེས་མ་བྱུང་ན་དེའི་འཕྲོ་ནས་སཱཙྪ་མང་དུ་བཏབ་པས་ཀྱང་འབྱུང་བ་ཡོད་ཅེས་མན་ངག་རིག་པ་རྣམས་གསུངས། འདི་དག་གི་བསླབ་བྱ་ནི་བྱ་བ་སྤྱིའི་རྒྱུད་སྡེ་༤དང་། འཇམ་དཔལ་རྩ་རྒྱུད་སོགས་ལས་འབྱུང་བ་ལྟར་ཤེས་པར་བྱ་ཞིང་། ཕྲེང་བ་དང་དམིགས་པ་སོགས་རང་རང་གི་གཞུང་ལྟར་རོ། །ཤུདྡྷཾ།། ༈ །།ཨོཾ་སྭ་སྟི་སིདྡྷཾ། མཁན་ཆེན་ཐམས་ཅད་མཁྱེན་པ་ངག་དབང་ཆོས་གྲགས་ཀྱིས་མཛད་པའི་དྲིས་ལན་སྐོར་ལས། ཀྱེ་རྡོར་གྱི་དབང་གི་དོགས་པའི་དྲི་བའི་རང་ལན་མཁས་པའི་རྣ་རྒྱན་དུ། སྟ་གོན་སྐབས། ལས་ཐམས་ཅད་པའི་མཆོད་པ་ཞེས་པ་སྤྱི་མཆོད་སྒོས་མཆོད་དངོས་སུ་གསལ་བ་རྣམས་ལ་མ་གཏོགས་པའི་ལས་གར་དགོས་ཐམས་ཅད་ཐུན་མོང་དུ་དབུལ་རྒྱུའི་མཆོད་པའོ། །འདི་ལ་ཉེར་སྤྱོད་ལྔའམ། ཆུ་བཞི་བཤམ་ཐུབ་ནའང་ལེགས། དེ་ཡང་དཔེར་ན་བདག་མདུན་འབྲེལ་བའི་ཚེ་བདག་བསྐྱེད་ཀྱི་བཟླས་པའི་རྗེས་སུ་འབུལ་བ་རྩེ་མོའི་དབང་ཆུ་ལས་གསུངས་པ་དང་། དེ་བཞིན་བདག་མདུན་གྱི་ཡེ་ཤེས་པ་དང་། དབང་ལྷ་སྤྱན་དྲང་པ། བུམ་བསྐྱེད་མཆོད་པ། ཡི་དམ་གྱི་གཏོར་བསྔོ་

---

^{[མ་དཔེ་གཟིགས་ན་འདིར་གནོན།]}

སོགས་མདོར་ན་དངོས་སུ་མ་བཤམས་པ་ཐམས་ཅད་ཀྱི་སྐབས་སུ་དྲན་པར་བྱའོ།། ༈ །།རས་བྲིས་སྐབས་ས་ཆོག་མི་དགོས་པ་སྤྱིར་གྲགས་མོད། འཕགས་པའི་བདག་འཇུག་གཉིས་སོགས་ལས་དེ་ལྟར་བཤད་པ་ནི། རྒྱ་ཧོར་སོགས་སྔར་ས་གཞི་ཡེ་བྱིན་གྱིས་མ་བརླབས་པ་ལ་ཐུབ་ན་ལེགས་སོ། ༈ །ས་ཆོག་དང་། ས་ལྷ་སྟ་གོན་གཉིས་ལ་ཁྱད་ཆེ་མོད། སྔ་མ་ནི་དཔང་པོའི་ཚུལ་ཙམ་དང་། ཕྱི་མ་ནི་ཀླུ གནང་བཞུ་བའི་དོན་ལགས། ༧ བརྒྱད་གསུམ་ཉེར་བཞིའི་གཏོར་མ་ལ་འབྱུང་པོ་སྤྱི་གཏོར་ཞེས་བཏགས་པ་ལ་རྒྱུ་མཚན་ཡོད་དེ། སྲིད་པ་གསུམ་གྱི་འབྱུང་པོ་ཐམས་ཅད་དེ་རྣམས་ལ་བསྟིམ་པའི་ཕྱིར་དང་། ལྷོལུང་གིས་ཀྱང་གྲུབ་བོ། ༧ །སྔོན་འགྲོ་གཏོར་མ་ལ་གསང་སྤྱོད་ལྟ་བར་དབང་བའི་དཀར་ཕྱོགས་དང་། མི་དབང་བའི་ནག་ཕྱོགས་གཉིས་ཀ་ཡོད་པར་འཕགས་པའི་དཔལ་འབྱུང་མ་ལས་བཤད། ༧ གྷནྡྷེར་ཎི་ཚར་གསུམ་བརྗོད་པ། མཆོད་ཡུལ་སྤྱན་དྲང་། གནས་དང་མཆོད་པ་བྱིན་རླབས་གསུམ་དུ་འདོད་པ་མི་འཐད་དེ། གོང་མའི་གསུང་གིས་མ་ཟིན་པ་དང་། སྔ་མ་ནི་འོག་ཏུ་འབྱུང་བ། ཕྱི་མ་གཉིས་ནི་ཟུར་དུ་གསལ་བའི་ཕྱིར། དེས་ན་འདི་ནི་མཆོད་པ་བྱིན་དབབ་བམ་རོལ་མོ་བྱིན་དབབ་སྟེ། བྱིན་རླབས་མ་ཡིན་ཅིང་། རྒྱུ་མཚན་རྩེ་མོའི་དབང་ཆུར་བཤད་དོ།། ༈ །།དངོས་གཞི་སྒྲུབ་མཆོད་སྐབས། མདུན་

---

^{[མ་དཔེ་གཟིགས་ན་འདིར་གནོན།]}

བསྐྱེད་རྒྱས་པར་རྟེན་ལ་བདུན་བསྲེས་ཚེ་སྔོན་ལ་རྡུལ་ཚོན་སྟོང་པར་སྦྱངས་པས་བསྲེག་ཞི་དང་བསྲེ་རྒྱུ་གཅིག་ཏུ་ཐལ་བར་འགྱུར་རམ། མ་ཡིན་ཏེ། བདེ་ཆེན་རྒྱ་མཚོ་ལས། བློ་ངོར་རྡུལ་ཚོན་སྟོང་པར་སྦྱངས་ཟིན་པས་གསར་དུ་བསྐྱེད་པ་དང་བསྲེ་བའི་གཞི་མེད་པར་འདོད་ན་ནི་ལྷ་མོ་བརྒྱད་ལ་ཡང་མཚུངས་པས་ལྔ་བསྲེས་མ་ཚང་བར་ཐལ་བའི་ཕྱིར་རོ། །འོ་ན་བྲིས་པ་དང་བསྐྱེད་པ་གཉིས་ལ་བསྲེ་བའི་དོན་ཇི་ལྟར་གནས་སྙམ་ན། །སྔར་རྡུལ་ཚོན་སྟོང་པར་སྦྱངས་ནས་ཕྱིས་རྡུལ་ཚོན་དེ་ཉིད་གཞལ་ཡས་ཁང་གི་རྣམ་པར་བསྒོམ་པ་བསྲེ་བའི་དོན་ཡིན་ཏེ། ལྷ་མོ་བརྒྱད་ལ་ཡང་གདན་གྱི་སྟེང་དུ་མངལ་འབྱིན་གྱི་ལྷ་མོ་བཞག་པ་ཉིད་ལ་བྲིས་པ་དང་བསྲེ་བའི་དོན་ཚང་བ་ཡིན་ནོ། །ཞེས་སོ། །ཕྱི་རོལ་གཏོར་མའི་རྒྱུ་མཚན་འགའ་བཤད་ཀྱང་། རང་ལུགས། གཏོར་མགྲོན་ཉེར་བཞི་པོར་གསང་སྤྱོད་ལྟ་བར་དབང་བ་འགའ་ཡང་ཡོད་མོད། * ཕལ་ཆེར་མི་དབང་བ་ཤས་ཆེ་བས་ཕྱི་རོལ་གཏོར་མ་སྐབས་སུ་བབ་ཅིང་། དེར་གསང་སྤྱོད་ལྟ་བར་མི་དབང་བའི་འབྱུང་པོ་ཀུན་ཀྱང་འོང་ཉན་པས་གཏོར་མ་ཐོབ་འགྲོ་བའི་ཕན་ཡོན་ཡོད་པ་ལགས། ༧ གཏོར་མགྲོན་གྱི་འབྱུང་པོའི་ནང་ན་སྤྲུལ་པས་འགྲོ་དོན་མཛད་པ་ཡང་སྲིད་མོད། གཙོ་ཆེར་རང་རྒྱུད་པ་ཡིན་ཏེ། ས་ཆེན་གྱིས་མངོན་རྟོགས་དཀའ་འགྲེལ་ལས། འབྱུང་པོ་བརྒྱད་གསུམ་ཉི་ཤུ་རྩ་བཞི་ནི་བསྟན་པ་ལ་

---

^{[མ་དཔེ་གཟིགས་ན་འདིར་གནོན།]}

ཞུགས་པའི་བྱང་ཆུབ་སེམས་དཔའི་དགེ་འདུན་ཡིན་པས། ཞེས་གསུངས་པའི་ཕྱིར། སྔགས་ལའང་ཞུགས་མ་ཞུགས་ཅི་རིགས་ཡོད་དེ། དཀར་ཕྱོགས་ཡིན་ཀྱང་སྔགས་ཀྱི་གདུལ་བྱ་མ་ཡིན་པ་ཡོད་པའི་ཕྱིར། སྲིད་གསུམ་འབྱུང་པོ་ཐམས་ཅད་འདུས་པ་ཡིན་ཞིང་དེ་ལྟར་བསྒོམ་དགོས། དེ་ཡང་སྐུ་རྡོ་རྗེ་སོགས་ཀྱི་རྣམ་པར་བསམས་པས་ཚོགས་རྫོགས་ཆེ། མཆོད་བསྟོད་ཀྱང་རུང་། ངོ་བོ་སེམས་ཅན་ཡིན་ཀྱང་རྣམ་པ་ལྷར་བསྐྱེད་ནས་གཏོར་མ་ཕུལ་བས་ཕན་ཡོན་ཆེ་བ་ཡིན་ཏེ། པཎ་ཆེན་གྱིས་གཏོར་མས་འབྱུང་པོ་ཐམས་ཅད་སངས་རྒྱས་སུ་བསྒོམས་ལ་མཆོད་ཅེས་དང་། དེ་ལྟར་བྱས་ན་སངས་རྒྱས་ཀྱང་མཉེས་། འབྱུང་པོའང་ཚིམ་པའི་རྟེན་འབྲེལ་ཡོད། ཅེས་གསུངས། དེ་ཡང་། ས་འོག་ས་སྟེང་ས་བླའི་སེམས་པ་ཀུན། །ཆོས་འབྱུང་གསུམ་གྱི་འདབ་མར་གཏོར་མགྲོན་དུ། །བསྐྱེད་པ་གུར་གྱི་དགོངས་པ་ཡིན་པས་ན། །འབྱུང་པོ་རང་རྒྱུད་པ་རུ་འཐད་པ་ཡིན། །གཏོར་མགྲོན་ངོ་བོ་འབྱུང་པོའི་ཚོགས་ཡིན་ཀྱང་། །རྡོ་རྗེ་གསུམ་གྱི་འདྲ་འབག་ལྟ་བུ་རྣམ་པར་གསལ་བཏབ་ནས། །མཆོད་བསྟོད་གཏོར་མ་འབུལ་བའི་གནད་ཟབ་མོ། །ཤེས་པར་གྱིས་ལ་ཤེས་ལྡན་སྙིང་དབུས་ཆོངས། འདི་ཀུན་མཁྱེན་གྱིས་ནང་མཆོད། ཆུ་ཆང་དང་། དབང་ཆུར་ཆུ་ཆང་། མཛེས་རྒྱན་དུ་ཆབ་ཀྱིས་བྲན་པར་གསུངས་པ་གནད་ཤེས་ན་མི་འགལ་ལོ།། ༈ །།ཕས་

---

^{[མ་དཔེ་གཟིགས་ན་འདིར་གནོན།]}

ཕམ་བཅུ་བཞི་ནི། ཁྱོད་ཀྱིས་སྲོག་ཆགས་བསད་མི་བྱ། ཞེས་སོགས་ཉེས་སྤྱོད་སྡོམ་པ་དང་འགལ་བ་ལྔ་སྟེ། བྱ་བ་མ་ཡིན་སྤང་ན་གོང་གི་ལྔ་པོ་དེ་སེམས་ཅན་གྱི་དོན་ཕྱིར་དགག་དགོས་ཡོད་ན་སྤང་བླང་བྱ་བའི་ཚིག་སྟེ་སྤྱི་ལ་ཁྱབ་པའོ། །དམ་པ་ཉེ་བར་བསྟེན་པ་སོགས་དགེ་བ་ཆོས་སྡུད་དང་འགལ་བ་ལྔ། ཐེག་དམན་ལ་འདོད་པ་མི་བྱ་བ་སོགས་སེམས་ཅན་དོན་བྱེད་དང་འགལ་བ་བཞིའོ། །སྤང་ཞེས་པ་ནི་ཐེག་དམན་ལ་འདོད་པ་སོགས། དོར་བ་དམ་པ་ཉེ་བར་བསྟེན་པ་སོགས་དགག་བསྒྲུབ་ཀྱི་ཕྱོགས་ནས་སོ། ༧ །ཕྱི་འཇུག་གི་སྔོན་འགྲོ་ནི་མཎྜལ་ནས་བཟུང་ཧཱུྃ་ཛ་ཧཱུཾ་བར་ཡོལ་བའི་ཕྱི་རོལ་ལམ་དཀྱིལ་འཁོར་གྱི་ཁང་པའི་ཕྱི་རོལ་ཏུ་བྱ་རྒྱུ་ཡིན་ལ། ཕྱི་འཇུག་གི་དངོས་གཞིའམ་ནང་དུ་འཇུག་པ་ནི་མིག་དར་དང་བཅས་དཀྱིལ་འཁོར་གྱི་ཁ་དོག་དང་དབྱིབས་སོགས་མི་གསལ་བར་ཅུང་ཟད་མཐོང་བར་མོས་གྱི་ལུས་ངག །པ་ཡིན་ལ། དངོས་གཞི་ནི་ཡེ་ཤེས་དབབ་ནང་སེམས་འབྱོང་། པ་ཡིན་ནོ། །འདི་ལ་གོ་དོན་གལ་ཆེར་ཡོད་དོ།། ༈ །།བཀྲ་ཤིས་ཚེ་བུམ་པ་གཉིས་ནམ་མཁར་བཏེགས་པའི་དུས། དབང་ལྷ་མདུན་བསྐྱེད་ལས་སྤྲུལ་པའམ། སྐད་ཅིག་གིས་ནམ་མཁར་བྱོན་ནས་དབང་བསྐུར་བའི་གྲབ་མཛད་ཅིང་བཀྲ་ཤིས་བརྗོད་པར་བསམ། ལས་བུམ་མ་བཏེགས་ཀྱང་རུང་མོད། བཏེགས་

---

^{[མ་དཔེ་གཟིགས་ན་འདིར་གནོན།]}

ཚེ་ཁྲོ་བོ་ཁྲོ་མོས་བགེགས་སྐྱོད་པ་དང་འབྲེལ་ལོ། ༧ །རིག་དབང་ནི་རྣམ་བུམ་སྟ་གོན་སྐབས་ཀྱི་དེ་ག་ཡིན་མོད། འོན་ཀྱང་དེ་དུས་ལྷ་ཚང་མ་བསྐྱེད་ནས་སྤྱིར་བཏང་བུམ་ཆུ་ནུས་ལྡན་དུ་ཟིན་ཀྱང་། འདིར་དམིགས་བསལ་མི་བསྐྱོད་པར་བསྐྱེད་པ་འབྲེལ། ཅོད་པན་སོགས་ཀྱི་དབང་གི་ཚེ་བརྟན་བྱེད་ལས་དངོས་མ་ཡིན་པས་ཚོར་སོགས་མི་བསྐྱོད་པ་རུ་བྱིན་གྱིས་དམ་རྩི་ལྟར། རློབ་པར་མི་འགྱུར། འོད་དཔག་མེད་ཀྱི་རྡོ་རྗེ་དང་། མི་བསྐྱོད་པའི་དམ་ཚིག་རྡོ་རྗེ་བཟུང་པ་མི་གཅིག་སྟེ། སྔ་མས་མཚན་མ་རྫས་དང་། ཕྱི་མ་ངེས་དོན་ལ་བཞག་བས་སོ། ༧ །ཚོར་སོགས་རིན་འབྱུང་སོགས་སུ་བྱིན་གྱིས་བརླབས་པ་གཙོ་བོར་སྨོས་ཀྱི་དེ་ཁོ་ན་ཉིད་མི་བཟུང་སྟེ། འདོད་ན་གཟུགས་སོགས་དམིགས་བཅས་སུ་ཐལ་བའི་ཕྱིར། ༧ ལམ་འབྲས་གླེགས་བམ་དབང་ཆུ་མ་ནུབ་པར་བསྐུར་བའི་ཡི་གེར། དབང་བདུན་འཁོར་གསུམ་ཡང་དག་བཞིས་རྒྱས་འདེབས་པར་གསུངས་པ། ལྷའི་ངོ་བོར་ལམ་བྱེད་རྣམ་པ་བཞིས་རྒྱས་འདེབས་པ་ལ་དགོངས། དེས་ན་ཡང་དག་བཞི་པོ་འདི་ཡན་ལག་བཞི་རྫོགས་དང་། ལམ་བྱེད་བཞིར་འཇུག་པའི་སྐབས་གཉིས་ཡོད་པར་ཤེས་པར་བྱའོ། ༧ །དབང་ཆུར། དེ་ལྟ་བུ་རིག་པའི་དབང་ལྔ་ཐོབ་ཕྱིན་ཆད་ཁྱེད་ཀྱི་དེ་བཞིན་གཤེགས་པ་རིགས་ལྔ་སྤྱིའི་དམ་ཚིག་ཚུལ་ཁྲིམས་ཀྱི་བསླབ་པ་སོགས་སྲུང་བ་དང་བསྟེན་པ་ལ་

---

^{[མ་དཔེ་གཟིགས་ན་འདིར་གནོན།]}

བསླབ་པར་བྱའོ། །ཞེས་བཤད་པ་ལ། སྤྱི་དང་ཁྱད་པར་གྱི་དམ་ཚིག་ཅེས་བྲིས་པ་ནི་ཡི་གེ་མ་དག་པ་སྟེ། རིགས་ལྔ་སྤྱིའི་དམ་ཚིག་ནི་ཚུལ་ཁྲིམས་གསུམ་སྟེ། དེ་འདིར་ཐོབ་པ་དང་འབྲེལ་ཏོ། ༧ །སྡོམ་པ་བསྒྲག་བཟུང་གིས་ནི་སྡོམ་པ་དངོས་ཐོབ་པ་མ་ཡིན་ཏེ། ཁྱོད་ཀྱིས་སླར་དབང་དེ་བསྐུར་ཚར་བའི་རྗེས་སུ་བསླབ་བྱ་ལ་སྤྱིའི་དམ་ཚིག་རྣམས་བཟུང་དགོས་སོ་ཞེས་གདམས་པ་ཡིན། སྔར་དེའི་སྐབས་སུ་བཟུང་རྒྱུ་ཡང་སེམས་བསྐྱེད་དང་ཚུལ་ཁྲིམས་ཟབ་མོ། །དབང་གི་ཆོ་གའི་ནུས་པ་ལས་གང་ཐོབ་ན། རྒྱས་གདབ་ལྔ་དང་སོགས་སོ།། ༈ །།ཐུན་མོང་མ་ཡིན་པའི་བརྟུལ་ཞུགས་ནི། ཕྱག་རྒྱ་སྐུའི་དམ་ཚིག་ཕྱག་རྒྱ་དང་མཉམ་པར་སྦྱོར་བའི་བདེ་བ་ཉིད་དོ། ༧ །དེ་བུམ་པའི་དབང་བླ་མེད་ཐུན་མིན་དངོས་སོ།། ༈ །།མི་ལྡོག་འཁོར་ལོའི་དབང་ནི་དམ་ཚིག་གསུམ་སྦྱིན་པ། དཀྱིལ་འཁོར་དང་ད་ལྟའི་དེ་ཁོ་ན་ཉིད་ཀྱི་དག་པ་བརྗོད་པ། སློབ་དཔོན་ཕྲིན་ལས་ནི། བཛྲ་ཧེ་ཏུ་ཚིགས་སོགས། དམ་ཚིག་དང་སྡོམ་པ་བླ་མེད་ནི། སློབ་དཔོན་སྨད་པར་མི་བྱ་ཞིང་། སོགས་དབུགས་དབྱུང་ཡིན། འདི་བུམ་དབང་གི་མཐར་སྦྱོར་བས་བུམ་དབང་བཅུ་གཅིག་ཏུ་གྲགས་ཀྱང་། དེང་སང་དབང་བཞི་སྟན་ཐོག་གཅིག་ཏུ་བསྐུར་བས་ཤེར་དབང་གི་མཐར་སྦྱོར་བའོ། ༧ །རྡོ་རྗེའི་བརྟུལ་ཞུགས་ཀྱིས་སྒོ་གསུམ་ལྷར་གྱིས་ཤིག་པར་གདམས་པ་དང་།

---

^{[མ་དཔེ་གཟིགས་ན་འདིར་གནོན།]}

དམ་ཚིག་གསུམ་གྱིས་སྒོ་གསུམ་སྐུ་གསུང་ཐུགས་སུ་ངོ་སྤྲོད་པ་ཡིན་པས་ཁྱད་ཆེ། ༧ །རྡོ་རྗེའི་དབང་ནི། སློབ་མའི་སེམས་ངེས་དོན་གྱི་རྡོ་རྗེ་ཡིན་སྙམ་པ་ཡན་དང་། རྡོ་རྗེ་ཐུགས་ཀྱི་དམ་ཚིག་ནི་རྡོ་རྗེའི་དེ་ཁོ་ན་ཉིད་བརྗོད་པ་ཡིན་ཏེ། གཞན་གཉིས་ལའང་འགྲེལ། ༧ །རྒྱུ་རྡོ་རྗེ་འཆང་སྐུ་མདོག་དཀར་སྔོ་གང་ཡང་རུང་ལ། འབྲས་བུ་རྡོ་རྗེ་འཆང་གཙོ་བོར་སྔོན་པོར་བཤད། འཕགས་པ་དང་མུས་ཆེན་གྱིས་ཕྱག་རྒྱ་སྐུའི་དམ་ཚིག་སྐབས་སུ་རྡོ་རྗེ་འཆང་སྔོན་པོར་བཤད་པའང་འགལ་བ་མེད། ༧ །ཀླུ་བྱང་གི་དཀྱིལ་ཆོག་ཉི་ཤུ་པ་ནས་གླིང་མ། ཛ་ཡ་སེ་ནའི་མཁའ་འགྲོ་རྒྱ་མཚོའི་དཀྱིལ་ཆོག་སོགས་རྒྱ་གཞུང་འགར། དཀྱིལ་འཁོར་གྱི་ལྷ་ངོ་བསྟན་པའི་སྐབས་དག་པ་བཤད་པ་ནི་དགོངས་པ་ཅན་གྱི་ཕྱག་ལེན་དཀྲུགས་པ་སྟེ། འདོད་ན། རྒྱུད་ལས། དབང་བསྐུར་ནས་ནི་དེ་ཉིད་བསྟན། ཞེས་སོགས་གསུངས་པ་དང་འགལ་ཏེ། དབང་མ་བསྐུར་བར་དག་པ་བསྟན་མི་རུང་བས་སོ། །དེས་ན་འཕགས་པས། དེ་དག་གི་དགོངས་པ་ནི་ཐ་སྙད་ཟོར་ཡང་བའི་ཆེད་དུ་སྐབས་འདིར་དེ་ཁོ་ན་ཉིད་བསྟན་ཀྱང་། ལག་ལེན་ལ་སློབ་དཔོན་གྱི་རྗེས་ལ་མར་འཐེན་ནས་བྱའོ། །ཞེས་གསུངས།། ༈ །ལམ་འབྲས་དྲིས་ལན་དཔྱོད་ལྡན་རྣ་བའི་བདུད་རྩི་ལས། གཞུང་དུ་ལུས་ལ་བརྟེན་ནས་བདེ་ཆེན་གྱི། སྒྲིབ་པ་ཞེས་གསུངས་དྲུག་པའི་སྒྲས་

---

^{[མ་དཔེ་གཟིགས་ན་འདིར་གནོན།]}

བསྙད་བཞི་མཐུན་མིན། ཀྱང་། །སྙོམས་པར་འཇུག་པའི་སྒྲིབ་སྐྱེ་བའི་གེགས་བྱེད། དང་དོན་མཚུངས་ཕྱིར། །གཞུང་དང་བཤད་པ་འགལ་བའི་སྐྱོན་མེད་སེམས། །ཞེས་གསུངས། ༧ རྩ་མི་མངོན་དང་མདུད་པ་མེད་ཅེས་པ། །སངས་རྒྱས་ཉིད་ལ་བཤད་པས་འཕགས་གཞན་ལ། །རྩ་མདུད་ཡོད་ཅེས་མགྲིན་པ་ཅུང་ཟད་འདེགས། ༧ འགགས་རྒྱུའི་རླུང་ནི་ཟག་བཅས་བེམ་པོའི་རླུང་སྟེ། ཉིན་ཞག་གཅིག་ལ་ཉི་ཁྲི་ཆིག་སྟོང་དྲུག་བརྒྱ་རྒྱུ་བའི་ནང་ཚན་སྟོང་བརྒྱད་བརྒྱ་པ་རེ་འགགས་པ་ལ་སོར་རེའི་བརྡས་བསྟན། ༧ ནང་རྟགས་སྲོག་རྩོལ་དབུ་མར་འཇུག་ཅེས་པ། །སྤྱི་གཙུག་མཆོག་གི་དབུ་མར་མཁས་རྣམས་བཞེད། །སྤྱིར་བཏང་དབུ་མར་སྦྱོར་ལམ་བཟོད་མཆོག་ནས། །བཅུ་གཉིས་བར་དུ་རླུང་སེམས་འཇུག་འདི་འཐད། ༧ རླུང་ཕྲ་ཞིང་ཐིག་ལ་རགས་པས་དེ་འགགས་པར་ནང་ཕྱིའི་རྟགས་སུ་བཤད་དམ་སྙམ།། ༈ །།ས་དང་པོ་ཐོབ་སྐབས་བདེ་བས་བརྒྱལ་ནས་རང་གཞན་ངོ་མི་ཤེས་པ་འབྱུང་གསུངས་པ་ནི་མཐོང་སྤང་གིས་བསྡུས་པའི་གཟུང་འཛིན་སྤངས་པའི་དོན་ལགས། ༧ ཐིག་ལེ་གསང་གནས་ཕྱེད་གང་ཞེས་པ། ཕྱི་དབྱིབས་ཀྱི་ཕྱེད་དམ། རྩ་གྲངས་ཀྱི་ཕྱེད་གང་ཡིན་དཔྱད། ༧ གསང་འདུས་མི་བསྐྱོད་པའི་དབང་གི་གསར་རྙིང་གི་དོགས་དཔྱོད་བློ་གསལ་ཉེར་མཁོའི་ལེགས་བཤད་ལས། དབང་བཀའ་གསར་རྙིང་གི་ལུགས་སྲོལ་

---

^{[མ་དཔེ་གཟིགས་ན་འདིར་གནོན།]}

སོ་སོར་ངོས་བཟུང་བ་དང་། བར་སྐབས་སུ་བསྲེ་བསླད་བྱུང་ཚུལ་དང་། རང་ལུགས་གང་དང་མཐུན་དཔྱད་པའོ། །དང་པོ་ནི། འགྱུར་སྔ་མ་ཀླུ་སྒྲུབ་ཀྱི་དཀྱིལ་ཆོག་ཉི་ཤུ་པ་ལ་བརྟེན་ནས་འགོས་རྔོག་གི་བརྒྱུད་འཛིན་རྣམས་ལ་བྱུང་། དེ་ཡང་འགོས་ལོའི་སྟོང་ཐུན་ཆེན་མོ་དང་། ངོར་ཆེན་དབང་གྲགས་དང་། རྔོག་ཨཱརྱ་དེ་བའི་དཀྱིལ་ཆོག་སོགས་ནས་གསལ། གསར་མ་ནི་ཀླུ་བྱང་གི་དཀྱིལ་ཆོག་ཉི་ཤུ་བར་བརྟེན། གཉིས་པ་ནི་བུ་སྟོན་གྱིས་འཕགས་འོད་ལ་དབང་བཀའ་བདུན་པོ་གཅིག་ཏུ་བསྲེས་པའི་དབང་རྒྱས་པ་གསན། དེ་ལ་སྲིད་པ་ཀུན་བློའི་ཡི་གེར། བཀའ་བབས་བདུན་ལྡན་གྱི་དབང་འདི་ས་སྐྱ་བའི་སྐྱེ་ཨ རྡོར་བཀའ་བབས་ལྟར་བརྒྱུད་པའི་ལུགས་སོ་སོར་མ་འདྲེས་པ་ཞིག་དགོས་པ་ལ། ད་ཞྭ་ལུ་བས་གཅིག་ཏུ་བསྲེས་ཚར་འདུག་པས་དགག་སྒྲུབ་མང་ན་དབང་བཀའ་གཅིག་པོ་འདི་ཡང་མ་བྱུང་དོགས་འདུག་ཅེས་རྗེ་རྡོ་རྗེ་འཆང་ཀུན་དགའ་བཟང་པོས་གསུངས་བར་བཤད། གསུམ་པ་ནི། རང་ལུགས་རྗེ་རྡོ་རྗེ་འཆང་གིས་མཛད་པའི་རྒྱ་མཚོ་དགུ་སྐོར་དུ་གྲགས་པའི་དཀྱིལ་ཆོག་ནི། བུམ་དབང་མཐའ་རྟེན་དང་བཅས་པ་ཡན་ཀླུ་བྱང་གི་དཀྱིལ་ཆོག་ཉི་ཤུ་པ་དང་། དབང་གོང་མ་གསུམ་དཀྱིལ་ཆོག་ཉི་ཤུ་པ་ནས་མི་གསལ་བར་ཟུང་འཇུག་གསལ་བ་ནས་ཁ་བསྐངས། ལུས་དཀྱིལ་སོགས་སྤྲོ་ན་གསལ་གྱི་དབང་གི་སྐབས་ནས་འབྱུང་

---

^{[མ་དཔེ་གཟིགས་ན་འདིར་གནོན།]}

བའི་དོན་ཐམས་ཅད་ཀྱང་ཚང་བར་བཀོད་པས་ན་བསྡུས་པ་མ་ཡིན། རྒྱ་གཞུང་དཀྱིལ་ཆོག་གི་གཞུང་གཉིས་པོ་ལོ་པཎ་གཉིས་ཀྱིས་གསར་དུ་བསྒྱུར་ནས་སྲོལ་བཏོད་པས་ན་འདི་སྨོས་ཏེ་སྔར་བྱུང་བ་རྣམས་དབང་བཀའ་རྙིང་མར་བཞག་ཅིང་། དེ་ནས་གསར་རྙིང་གི་བརྡ་ཆད་འདི་ས་སྐྱ་པ་ལ་བྱུང་ཞིང་། དེས་ན་བརྒྱུད་པ་གཙོ་བོར་གསར་མ་འདྲེན་པར་འཐད་མོད། འོན་ཀྱང་རྙིང་པའང་ས་པཎ་གྱིས་ལེགས་པར་གསན་པས། དེའི་བརྒྱུད་པ་རྣམས་ལ་ཚིག་གི་བརྒྱུད་པ་ཇི་ལྟ་བ་བཞིན་མ་བཞུགས་ཀྱང་དོན་ཇི་བཞིན་བཞུགས་པ་ཡིན་ཏེ། གཉིས་ཀ་མི་བསྐྱོད་པའི་དབང་བརྒྱུད་དུ་མཚུངས་པའི་ཕྱིར་རོ། །གྲུབ་ཆེན་ནག་པོ་པའི་གསང་བའི་དེ་ཁོ་ན་ཉིད་རབ་ཏུ་གསལ་བ་ལས། །བསྲེགས་དང་བཅད་དང་བརྡར་བ་ཡི། །མཁས་པ་དག་ནི་གསེར་བཞིན་དུ། །ཡིད་ཆེས་རྣམ་པ་བཞི་ཡིས་ནི། །ལྷན་ཅིག་སྐྱེས་པ་བརྟན་པོར་བཟུང་། །ཐམལ་སེམས་ཅན་གཅིག་ཤོས་ཀྱིས། །ཡིད་ཆེས་རྣམ་པ་བཞི་ཡིན་ཏེ། །ལུང་ལ་ཡིད་ནི་ཆེས་པ་དང་། །དེ་བཞིན་གཞན་ལ་ཡིད་ཆེས་དང་། །བདག་ཉིད་ལ་ནི་ཡིད་ཆེས་དང་། །དེ་བཞིན་བླ་མ་ལ་ཡིད་ཆེས། །ཡིད་ཆེས་རྣམས་ནི་ཐམས་ཅད་ལས། །བླ་མ་ཡིད་ནི་བྱེད་པོར་འགྲོ། །བླ་མ་དམ་པ་གནས་ཡིན་ནོ། །ཞེས་སོ།། ༈ །།བཟང་སྤྱོད་འགྲེལ་པ་ཤཱཀྱ་བཤེས་གཉེན་དེ་ལ་འོད་དཔག་མེད་ཀྱི་གནས་རབ་ཐོབ་པར་ཤོག་དང་།

---

^{[མ་དཔེ་གཟིགས་ན་འདིར་གནོན།]}

ཀླུ་སྒྲུབ། ཕྱོགས་གླང་། རྒྱན་བཟང་རྣམས་ལ་ཕན་པ་མང་བྱེད་ཤོག་ཡན་སྣང་། ནམ་བསོད་ཀྱིས་རྗེས་ཀྱི་ཤ་ལོ་ཀགསུམ་པོ་གཞན་གྱིས་བཅུག་པར་བཤད་མོད། དེང་སང་འདོན་པའི་ཚིགས་བཅད་རྗེས་མ་འདི་གཞན་གྱིས་བཅུག་པ་ལས། ལྷག་མ་ཤཱཀྱ་བཤེས་གཉེན་གྱི་རྒྱ་འགྲེལ་དུ་སྣང་བས་སོ།། ༈ །།འཕགས་པ་ཀླུ་སྒྲུབ་རྨ་བྱ་གྲུབ་བདེ་ཆེན་དུ་གཤེགས། འཇམ་དཔལ་རྩ་རྒྱུད་ལས་ས་དང་པོ་ཐོབ་པ་དང་། ཟླ་གྲགས་ཚིག་གསལ། ཀྱིས་ས་དྲུག་པ་བརྙེས་པ་དང་། ཇོ་བོ་རྗེས་དབུ་མ་རིན་པོ་ཆེའི་ཟ་མ་ཏོག་ཁ་ཕྱེ་བ་ལས་མདོ་ལས་ས་བརྒྱད་པའི་ལུང་བསྟན་ཡོད་པར་བཤད། སྤྲིན་ཆེན་པོའི་མདོ་ལས་མྱ་ངན་ལས་འདས་ནས་བཞི་བརྒྱ་ན་འབྱུང་བ་དང་། རྫོགས་པའི་སངས་རྒྱས་ཡེ་ཤེས་འབྱུང་གནས་འོད་དུ་ལུང་བསྟན།། ༈ །།མདོ་ཀུན་བཏུས་ལས། སངས་རྒྱས་འབྱུང་བ། མིར་གྱུར་བ། དལ་བ་ཕུན་ཚོགས། དད་པ་ཕུན་ཚོགས། བྱང་ཆུབ་ཀྱི་སེམས། སྙིང་རྗེ་ཆེན་པོ། ཚུལ་ཁྲིམས་རྣམ་དག །ཐོས་པ་རྣམ་དག །བསམ་པ་རྣམ་དག །རྒྱ་ཆེན་པོ་ལ་མོས་པ་རྣམས་རྙེད་པར་དཀའ་བ། ཞེས་ས་བཅད་བཅུའོ།། ༈ །།ངག་ཆོས་པའི་ལམ་འབྲས་དཀའ་གནད་ཀྱི་རང་ལན་དྲང་པོའི་གཏམ་སྐྱེས་བདུད་རྩིའི་ཐིགས་ཕྲེང་ལས། སྣང་གསུམ་སྐབས་བླ་མ་རྡོ་རྗེ་འཆང་དུ་བསྒོམ་པ་མི་འགལ་ཏེ། སློབ་མ་དེ་སྔགས་ལམ་ལ་འཇུག་འདོད་དང་། རྡོ་རྗེ་འཆང་གི་གོ་

---

^{[མ་དཔེ་གཟིགས་ན་འདིར་གནོན།]}

འཕང་ཐོབ་འདོད་ཡོད་པས་མ་མཐའ་ཚང་ཞིང་། འགའ་ཞིག་དབང་བསྐུར་བ་ཙམ་མམ། ཁྲིད་ཡོངས་རྫོགས་ཀྱིས་སྨིན་པའང་ཡོད་པའི་ཕྱིར། དེའང་མི་འཐད་ན། སློབ་མ་རྗེས་འཛིན་དང་། བསགས་སྦྱོང་གི་དམིགས་པ་སོགས་ཀྱང་མི་འཐད་པར་འགྱུར་ཏེ། དབང་མ་བསྐུར་བར་མཚུངས་པའི་ཕྱིར། དེས་ན་སྔགས་ལམ་ལ་འཇུག་པའི་སྔོན་འགྲོ་ཡིན་གྱི། ཕར་ཕྱིན་རང་རྐང་མིན་པས་སྐྱོན་མེད། ༡༽ །སློབ་མ་རྗེས་འཛིན་སོགས་དང་བསགས་སྦྱོང་སོགས་ཀྱང་སྔགས་ལམ་གྱི་སྔོན་འགྲོ་ཡིན་པས་མི་འགལ་བར་བཤད་མ་ཐག་པས་གྲུབ། ༢༽ ཐུན་མོང་དང་། ཐུན་མོང་མ་ཡིན་པའི་རྣལ་འབྱོར་ནི་ཕར་ཕྱིན་ཐེག་པ་ཙམ་ཉམས་སུ་ལེན་པ་དང་། རྡོ་རྗེ་ཐེག་པའི་ལམ་ཉམས་སུ་ལེན་པ་ལ་འཇོག་པ་ཆོས་སྤྱི་སྐད་ཡིན། འོན་ཀྱང་སྣང་གསུམ་གྱི་སྐབས་སུ་དེ་སྐད་གསུངས་པ་ཅི་སྙམ་ན། སྔར་དབང་བསྐུར་བ་མ་ཐོབ་པ་དང་། ཐོབ་པ་ལ་དེ་འདྲའི་ཐ་སྙད་བཞག་གམ་སྙམ། སྣང་གསུམ་གྱི་སྔོན་དུ་ངེས་པར་དབང་བསྐུར་བ་དགོས་ཞེས་པ་མི་འཐད་ཀྱི་གཏན་ནས་དགག་པ་མིན། ༣༽ སྔགས་ལམ་ཉམས་སུ་ལེན་པ་ཙམ་ཐུན་མོང་མ་ཡིན་པའི་རྣལ་འབྱོར་མ་ཡིན་ཏོ། །རྟེན་སྐྱོན་མེད་པ། ཐོས་བསམ་དང་བསླབ་པ་དག་པ། དབང་གིས་རྒྱུད་སྨིན་པ། ཉམས་རྒྱུད་ལ་སྐྱེས་པ་ཞེས་ཁྱད་ཆོས་བཞི་ལྡན་དུ་གསུངས་པས། ཉམས་རྒྱུད་ལ་མ་སྐྱེས་པ་རྣམས་

---

^{[མ་དཔེ་གཟིགས་ན་འདིར་གནོན།]}

གང་དུ་བསྡུ་སྙམ་ན། ཐུན་མོང་ཐུན་མིན་གཉིས་སུ་ཕྱེ་བའི་ཐུན་མིན་གྱི་ཁོངས་སུ་བསྡུ་སྟེ། བླ་མེད་ཀྱི་ལམ་ཉམས་སུ་ལེན་པའི་ཕྱིར། ༤༽ གདམས་ངག་དྲུག་དང་སྲུང་བ་སུམ་བཅུ་ལ་འཁོར་འདས་ཐུན་མོང་ཞེས་འཇོག་པའི་རྒྱུ་མཚན། ལྟ་བའི་དུག་དབྱུང་བ་སོགས་འཇིག་རྟེན་གྱི་ལམ་ཁོ་ན་ཡིན་ཀྱང་། བསམ་གཏན་གྱི་དུག་དབྱུང་ཉམས་སྐྱོན་ཅན་སྲུང་བ་ནི་ཚོགས་སྦྱོར་ནས་ས་བཅུ་གསུམ་ཕྱེད་སོན་པའི་མ བང་དུ་ཡོད་པ་སོགས་ཀྱིས་མི་འགལ། ༥༽ དོན་བསྡུས་པར་འདི་དག་འཇིག་རྟེན་གྱི་ལམ་དུ་འཇོག་པ་ནི་ཤས་ཆེ་བ་ལ་དགོངས་སོ། ༦༽ །འཇིག་རྟེན་པའི་ལམ་དུ་བླ་མ་ན་མི་འཕོ་བས་གཙོ་ཆེ་བས་བཞག་གི ། ཁྱབ་མཐའ་མི་འཛིན་ཏེ་འདུས་པ་གསུམ་པར་སྤྲུལ་སྐུ་ལས་དབང་ནོད་པའི་ཕྱིར། ༧༽ རྒྱུ་ལྷན་སྐྱེས་ཀྱི་སྐབས། རྐྱང་མ་ཐབས་དང་། རོ་མ་ཤེས་རབ་རྩར་བཞག་པ་གཞུང་སྤྱི་དང་འགལ་བ་སྤོང་བ་ནི། འདི་དག་རིགས་མཐུན་བསྡེབས་བའི་ཚུལ་རྒྱས་པར་བཤད་དུ་ཡོད། དེ་བཞིན་དུ་ཨོཾ་ཨཱཧཱུྃ་གསང་དབང་སྦྱར་བ་ནི། སྤྱི་ཙམ་དུ་ཨཱའོས་ཀྱང་། ནང་དུ་རྡོ་རྗེའི་ལུས་ལ་དེ་ལྟར་གྱི་ངེས་པ་རང་མེད་དེ། སྤྱི་བབས་སུ་འཇུག་གནས་ལྡང་གསུམ་འབྲུ་གསུམ་ལ་སྦྱར་ཀྱང་། མ་ཧཱ་མཱ་ཡཱར་དེ་ལས་གོ་ལྡོག་པ་བཞིན་ནོ། ༩༽ །ལུས་སེམས་གྲུབ་བདེ་རྫས་གཅིག་ཏུ་མི་འཐད་པར་མུ་སྟེགས་རྒྱང་འཕེན་པ་དང་མཚུངས་སོ་སྙམ་ན།

---

^{[མ་དཔེ་གཟིགས་ན་འདིར་གནོན།]}

དེ་ནི་མ་ཡིན་ཏེ། སྔ་མས་ལུས་གྲུབ་པ་ན་སེམས་གྲུབ་ཅིང་། དེ་འགགས་པ་ན་འགགས་ལ་མ་འགགས་པར་རྒྱུན་གྱི་རྫས་གྲུབ་དུ་འདོད་ལ། འདིར་ཇི་སྲིད་ལུས་སེམས་ཚོགས་ཙམ་གྱི་ཚེ་མེ་ཏོག་དང་དྲིའི་ཚུལ་ལྟར་གནས་པར་འདོད་པས་ཤིན་ཏུ་མི་མཐུན་ནོ། ༡༠༽ །འབྲས་བུ་འཁོར་འདས་དབྱེར་མེད་ཀྱི་ཚེ་འཁོར་བ་ཡོད་དམ་སྙམ་ན་ཡོད་དེ། དཔེར་ན་སངས་རྒྱས་ཀྱི་ཚེ་ཀུན་རྫོབ་བདེན་པ་མེད་ཀྱང་། བདེན་གཉིས་ཟུང་འཇུག་གི་ཀུན་རྫོབ་བདེན་པ་ཡོད་དེ། ཟུང་འཇུག་ལ་ཡ་གྱལ་དགོས་པའི་ཕྱིར་རོ། །ཞེས་གསུངས། ༡༡༽ ལུས་དཀྱིལ་ལྷ་ལ་ཡེ་ཤེས་པ་གཞུག་མི་དགོས་ན། རིགས་བདག་ཀྱང་མི་དགོས་པར་ཐལ་ལོ་སྙམ་ན། མ་ཡིན་ཏེ། ཡེ་ཤེས་གཞུག་མི་དགོས་པའི་སངས་རྒྱས་མཚན་ཉིད་པ་རྣམས་ལ་ཡང་རིགས་བདག་རང་ཆས་སུ་བཞུགས་ཏེ། སྤྱན་རས་གཟིགས་བཞིན་ནོ། ༡༢༽ །ཡུམ་གྱི་ལུས་དཀྱིལ་ལ་ཕོ་བྲང་ལྔའི་ལུས་དཀྱིལ་དང་། ཡུལ་ཉེར་བཞིའི་ལུས་དཀྱིལ་གཉིས་ཀ་མ་ཆད་པར་བསྒོམ་དགོས། དེའི་ཚེ་སྙིང་གའི་རྩ་དབུ་མའི་ནང་གི་ཁམས་དེ་ཐུགས་རྡོ་རྗེ། དེའི་མདུན་ངོས་ཀྱི་ཕྱི་ཤུན་རྩ་དེ་མཱ་མ་ཀཱི། རྒྱབ་ངོས་ཀྱི་ཕྱི་ཤུན་གྱི་རྩ་དེ་བདག་མེད་མ། དེའི་ཐད་ཀྱི་རོ་རྐྱང་གཉིས་ཀྱང་བདག་མེད་མར་བསྒོམས་པས་བདག་མེད་མ་གསུམ་མམ། ཡང་ན་རོ་རྐྱང་ལའང་མདུན་རྒྱབ་གཉིས་སུ་ཕྱེ་བས་ལྔའོ། །སྙིང་གའི་ནང་སྐོར་

---

^{[མ་དཔེ་གཟིགས་ན་འདིར་གནོན།]}

གྱི་འདབ་མ་བརྒྱད་ཀྱི་མདུན་གྱི་མཚམས་གཉིས་སུ་མཁའ་སྤྱོད་མ། རྒྱབ་ཕྱོགས་ཀྱི་མཚམས་གཉིས་སུ་ས་སྤྱོད་མ་རེ་རེ་བསྒོམ། ༡༣༽ ལུས་དཀྱིལ་རྐྱང་པ་བསྒོམས་པས་དབང་བཞིའི་ཉམས་མྱོང་ཀུན་འདྲེན་ནུས་པ་སྲས་དོན་མ་སོགས་ལས་བཤད་པས། བསྐྱེད་རིམ་ཙམ་གྱིས་འཚང་རྒྱ་བ་དང་། བསྐྱེད་རྫོགས་ཟུང་འཇུག་མི་དགོས་པར་ཐལ་ལོ་སྙམ་ན། དེ་ནི་མ་ཡིན་ཏེ་ལུས་དཀྱིལ་བསྐྱེད་རིམ་ཁོ་ནའི་ལམ་མིན་ཅིང་། སྒོམ་མཁན་གྱི་གང་ཟག་ཀྱང་རྒྱུ་དུས་ཀྱི་དབང་བཞི་རྫོགས་པ་དང་། ལུས་དཀྱིལ་གྱི་དབང་རྫོགས་པར་ཐོབ་པ་ཞིག་དགོས་ལ། ཕྱི་བསྐྱེད་རིམ་ནི་བུམ་དབང་ཙམ་ཐོབ་པས་ཀྱང་བསྒོམ་དུ་རུང་བའི་ཕྱིར་དང་། ལུས་དཀྱིལ་ལ་དབང་བཞིའི་ལམ་དང་རྗེས་སུ་མཐུན་པའི་རྟེན་འབྲེལ་ལམ་བྱེད་ཡོད་ལ། ཕྱི་དཀྱིལ་ལ་དེ་མེད་པ་སོགས་ཁྱད་པར་ཆེའོ། ༡༤༽ །ལམ་དུས་ཀྱི་དབང་ལེན་པའི་གསལ་བྱེད་ཀྱི་ཡི་གེར། དམིགས་རྒྱ་ཆེ་ཆུང་འབྲིང་གསུམ་བཤད། དེའི་རྒྱ་ཆེའི་ཚེ་གཙོ་བོ་ཡབ་ཡུམ་གྱི་མཱ་མ་ཀཱི་ལས་དེ་འདྲ་བ་གཅིག་ཆད་དེ། ཕྱིའི་ཧེ་རུ་ཀའི་ཡུམ་ལ་ཐིམ་པར་བསམ་པ་ནི་ཕྱག་རྒྱ་གཏད་པའོ། ༡༥༽ །ཁྲིད་ཡིག་སྤྱི་ལས་དཀར་ལམ་སྔོན་དང་། དམར་ལམ་རྗེས་ལ་འཆར་བར་བཤད། ལམ་འབྲས་པས་ཀྱང་ཕལ་ཆེར་དུ་དེ་ལྟར་བཤད། ཀླུ་སྒྲུབ་པས་དེ་ལས་གོ་ལྡོག་སྟེ་ཤིན་ཏུ་རྒྱས་པར་བཤད། འོན་ཀྱང་རྐྱང་

---

^{[མ་དཔེ་གཟིགས་ན་འདིར་གནོན།]}

མའི་ནུས་པ་སྔོན་ལ་ཉམས་ན་དཀར་ལམ་དང་། རོ་མའི་ནུས་པ་སྔོན་ལ་ཉམས་ན་དམར་ལམ་ཐོག་མར་འཆར། དེ་གཉིས་དུས་གཅིག་ཏུ་ཉམས་ན་གཅིག་ཅར་འཆར་བའང་སྲིད་མོད། དེ་རྟགས་རླུང་ཕྱིར་འབྱུང་བ་རོ་མ་དང་། ནང་དུ་རྡུབས་པ་རྐྱང་མའི་བྱེད་ལས་ཡིན་པས་གང་སྔོན་ལ་འགགས་ན་ཤེས་ཀྱང་། ཕལ་ཆེར་འཇུག་པའི་ནུས་པ་སྔོན་ལ་ཉམས་པ་ཁོ་ན་མཐོང་། ༡༦༽ བསྣམ་བྱ་ལྔ་ཞེས་པའི་དོན། བར་དོར་ལོངས་སྤྱད་བྱའི་གཙོ་བོ་ནི་དྲི་ཡིན་ཞིང་། དྲིའི་ཁ་དོག་ལྔའི་ཚུལ་དུ་འབྱུང་བ་ལ་བསྣམ་བྱ་ལྔར་འཆད་པ་ཡིན་ཞེས་འཕགས་པའི་གཞུང་བཤད་ལས་འབྱུང་། བླ་མ་དམ་པའི་གཞུང་བཤད་ལས་འདོད་ཡོན་ལྔ་ལ་བཤད་པས། དེ་ལྟ་ན་རྣམ་ཆ་ལྔ་ཞེས་དགོས་པར་སྣང་། ༡༧༽ གཏུམ་མོ་འཁོར་ལོ་བཞི་པའི་སྐབས་ལྟེ་བའི་མེ་ཡི་རྩ་རྣམས་དངོས་མེད་དུ་བསྲེག་པ་མ་ཡིན། ལྕགས་བསྲེགས་པ་བཞིན་དུ་ཚ་བའི་རང་བཞིན་ཅན་དུ་བྱེད་ཅིང་སྙིགས་མ་རྣམས་སྐམས་ནས་རྩ་ནང་གི་སྦུབས་སྟོང་སང་ངེ་བར་བསྒོམ་པའོ། ༡༨༽ །སྦྲེལ་ཞི་ཞེས་པ་བརྡ་རྙིང་ཡིན། འདིའི་རྩ་བཞིའི་ངོས་འཛིན་འདིར་གནས་ཀྱི་ངེས་པ་མེད་ཅེས་སྲས་དོན་མ་ལས་བཤད། ༼༡༩ ༢༠ ༢༡ ༢༢༽ བྷ་གའི་ཡི་གེ་བཅུ་བཞི་ལ་དཔེ་རིས་སོགས་མི་མཐུན་པ་སྣ་ཚོགས་འབྱུང་བ་ནི། གང་ཟག་སོ་སོའི་རྡོ་རྗེའི་ལུས་ཀྱི་གནས་ཚུལ་བསམ་གྱིས་མི་ཁྱབ་པས་འགལ་

---

^{[མ་དཔེ་གཟིགས་ན་འདིར་གནོན།]}

བར་མི་འདུའོ། ༢༣༽ །མཛེས་རྒྱན་དང་། ཀླུ་སྒྲུབ་པའི་ཁྲིད་ཡིག་སོགས་ལས། གཟུང་འཛིན་གཉིས་ཀའི་རྦ་རླབས་རེངས་པས། སྟོང་མཚན་སྨོན་མེད་མངོན་སུམ་བྱེད་ཅེས་བཤད་པ་གསུང་རབ་སྤྱི་སྐད་དང་མཐུན་ལ། གཉགས་མ་སོགས་སུ་དེ་ལས་༢༠ལྡོག་པར་གསུངས་པ་ནི། རྡོ་རྗེའི་ཚིག་རྐང་རང་ལུགས་ཡིན་གྱི་མི་འགལ། ༢༤ ༢༥༽ དོན་བསྡུས་མ་ཞེས་པ་ཚིགས་བཅད་ཉུང་ངུ་འདི་ནི་རྒྱན་དང་འདྲ་སྟེ་རྣམ་འགྲེལ་གྱི་གྲས་སུ་མི་བགྲང་། རྣམ་འགྲེལ་ཨ་སེང་མ་ནི་འདི་ཁོག་རྐྱལ་དུ་གཞུག་པའི་འགྲེལ་པ་རྒྱས་ཙམ་ཞིག་ཡོད་དོ། ༢༦༽ དབང་ནི་རྒྱུ་དབང་། འཁྲིད་ནི་སྔགས་ལམ། གཞུང་བཤད་ནི་རྣམ་འགྲེལ་དང་སྦྱར་བའི་བཤད་པ། གདམས་ངག་ནི་གེགས་སེལ་གྱི་མན་ངག་སྦྱིན་པ་ཡིན། ས་ཆེན་ཡན་གཞུང་བཤད་དང་འཁྲིད་སྟབས་གཅིག་ཏུ་མཛད་རིང་བརྒྱུད་ཀྱི་ལམ་འབྲས་རྫོགས་པར་མ་ཐོབ་པ་ལ་སྒྲུབ་པ་ལུང་སྦྱིན་མི་རུང་། རྫོགས་པར་ཐོབ་པའི་ཚད་ནི། སྣང་རྒྱུད་ཡོངས་རྫོགས། རྒྱུ་ལམ་དབང་། བདག་མེད་མའི་བྱིན་རླབས། བརྡ་ཚིག་བརྒྱུད། གཞུང་རྒྱས་བསྡུས་ཅི་རིགས་སམ་མ་མཐའ་རྣམ་འགྲེལ་སྨྱུ གྱི་བཤད་ལུང་ཙམ། གླེགས་བམ་ཕྲ་མོ་དང་བཅས་པ་ཐོབ་པའོ། །སྒྲུབ་ལུང་ཐོབ་ནས་བསྙེན་པ་སོགས་ཚད་དུ་འཁྱོལ་ན་ཕྱིས་འཆད་རུང་ངོ་། ༢༧ ༢༨༽ ཆོས་སྣ་དྲུག་ཅུ་ཞེས་པ་བདག་ཆེན་རྡོ་རྗེ་འཆང་གི་

---

^{[མ་དཔེ་གཟིགས་ན་འདིར་གནོན།]}

དཀར་ཆག་ན་༥༩གསལ་བ་སྟེ། རྡོ་རྗེའི་ཚིག་རྐང་དང་། རྟོགས་གསལ་གྱི་དཔེ་བྲིས་རྣམས་གཅིག་ཏུ་བསྡོམས་པར་བཞེད། ཀླུ་སྒྲུབ་པས་མཆན་དཀྱུས་སུ་ཤོར་བ་ཙམ་ལས་རྗེ་བཙུན་གྱི་དཀར་ཆག་ན་དམིགས་g བསལ་མེད་ཅིང་། ངོར་ཆེན་གྱི་གསན་ཡིག་ཏུ་ངོས་བཟུང་མི་འབྱུང་བས་པར་བཀབ་མེད་གསུངས། དབང་ཕྱུག་དཔལ་བཟང་པས། གཉགས་མ་ནས་གསལ་བྱེད་དང་བཅས་པ་ནས། རྒྱ་བོད་ཀྱི་ལོ་རྒྱུས། ལུང་འདི་ཉིད་དང་ཞིབ་ཏུ་སྦྱར་བའི་༥༨བར། ལུས་མཐའ་དག་དང་ཞིབ་ཏུ་སྦྱར་བ་དང་མན་ངག་ཕྲ་མོ་རྣམས་གཅིག་ཏུ་བསྡོམས་པས་དྲུག་ཅུའོ། །ཞེས་བཞེད། ༢༩༽ ༈ །།གསེར་མདོག་པཎ་ཆེན་དང་། ས་ངོར་གྱི་བཞེད་པ་མི་མཐུན་པ་མང་སྟེ། རྒྱུད་གསུམ་གནོད་འཇོམས་ལས་རྡོ་རྗེ་ཐེག་པའི་ལྟ་བ་རྣམ་རིག་ཡིན་ན། སྟོན་པས་གདུལ་བྱ་རྣམས་ལོག་ལམ་ལ་བཅུག་པར་འགྱུར་རོ། །ཞེས་བཀོད་པ། དྲིས་ལན་ལས། །རང་རིག་རང་གསལ་བདེན་གྲུབ་ཁས་ལེན་པའི། །དབུ་མའི་ལུགས་འདི་གསང་བ་འདུས་པ་དང་། །ཀྱེ་རྡོར་རྒྱུད་གསུམ་བྱང་ཆུབ་སེམས་དཔའ་ཡི། གཞུང་འགྲེལ་སྐོར་གསུམ་དག་ན་གསལ་བར་བཞུགས། ཞེས་སྨྲ། ༡ དབུ་སེམས་ལྟ་བ་ཐ་དད་པས་ཆོ་ག་ཐ་དད་པའི་སྒྲུབ་བྱེད་བཀོད་པར། དོན་དམ་རྣམ་རིག་སྨྲ་བའི་ལྟ་བ་དང་། དབུ་མའི་ལྟ་གྲུབ་འགལ་ཅེས་ཟེར་བ་དང་། ཞེས་སྨྲ། ༡ སེམས་

---

^{[མ་དཔེ་གཟིགས་ན་འདིར་གནོན།]}

བདེན་པར་ཤེས་ན་སྡུག་བསྔལ་བདེན་པ་འབྱུང་བར་བཤད་པར། ཡེ་ཤེས་ཚོགས་བསགས་ཐོགས་མེད་གཞུང་དང་མཐུན་ཅེས་བཤད། ༣ ཟུང་འཇུག་རྡོ་རྗེ་འཆང་གིས་མཚམས་བཞག་པར། མ་དག་པའི་ལུས་ཁོ་ན་འཇའ་ལུས་སུ་གནས་འགྱུར་བར་བཤད། དྲིས་ལན་ལས༣།། མ་དག་པའི་ཕུང་པོ་ལྷག་པའི་ལྷར་བསྒོམ་པ་མ་ཡིན་ཏེ། དེ་མ་རིག་པ་ཀུན་རྫོབ་ཀྱི་བདེན་པ་ཡིན་ལ། ལྷ་དོན་དམ་གྱི་བདེན་པ་ཡིན་པའི་ཕྱིར། ཞེས་སྨྲ། ༤ ས་པཎ་གྱིས། གཞི་ལམ་འབྲས་གསུམ་དབྱེར་མེད་དོན་སྨྲ་བས། སོགས་ལ། རྒྱུ་རྒྱུད་སྦྱང་གཞིར་བཤད་པ་མ་བལྟས་ཤིང་། །གཞི་མི་སྤོང་བའི་འཐད་པ་མ་བཀླགས་པར། །སྦྱང་གཞི་སྦྱོང་བྱེད་དབྱེ་བ་མེད་དོ་ཞེས། །གོང་མའི་དགོངས་པ་སྙོགས་རྣམས་རན་པར་སྨྲོས། །ཞེས་སྨྲས། ༥ དྲིལ་བུ་ལུས་དཀྱིལ་རྡོ་རྗེ་འཆང་གི་དཀར་གནད་ལས། ལུས་དཀྱིལ་བསྐྱེད་གཞི་དོན་དམ་བདེ་གཤེགས་སྙིང་པོ་འཁོར་ལོ་བདེ་མཆོག་གི་དཀྱིལ་འཁོར་ཡིན་པ་བཀག་ནས་རང་གི་རྩ་ཁམས་ཉིད་ཡིན་པར་བཤད་པ། དྲིས་ལན་ལས༤༠། ཐ་མལ་པའི་ལུས་ཀྱི་སྤྱི་བོ་ནི། ཀུན་བརྟགས་དང་། རྣམ་པར་བརྟགས་པ་དང་། ཆོས་ཉིད་ཀྱི་སྤྱི་བོ་གསུམ་ལས། སྔ་མ་གཉིས་སྣ་ཚོགས་རྡོ་རྗེར་མི་རུང་སྟེ། ཡེ་ནས་མ་གྲུབ་པའི་ཕྱིར་དང་། །གཟུང་འཛིན་གྱིས་བསྡུས་པས་གནས་འགྱུར་གྱི་མཐར་ཐུག་འདོད་

---

^{[མ་དཔེ་གཟིགས་ན་འདིར་གནོན།]}

དགོས་པའི་ཕྱིར་རོ། །དེས་ན་མ་དག་པའི་ལུས་ཀྱི་དབང་དུ་བྱས་པའི་སྤྱིའི་ཆོས་ཉིད་གཟུང་འཛིན་གཉིས་མེད་ཀྱི་ཡེ་ཤེས་ཉིད་སྣ་ཚོགས་རྡོ་རྗེར་བསྒོམ་པ་ཡིན་ཞེས་བཤད། ༦ གཞན་ཡང་འགྱུར་བཅོས་པ། །ཡོད་ལ་མི་རྟག་གིས་ཁྱད་པ། ཅེས་དང་། །ཆོས་ཀྱི་དབྱིངས་ནི་མང་ཉུང་གིས། །སྤྲོས་པ་བྲལ་བ་ཡིན་ཕྱིར་རོ། །ཞེས་དང་། ཡོད་ན་དོན་བྱེད་ནུས་ཕྱིར་རོ། །ཞེས་དང་། དེས་ན་སོགས་རྒྱུའི་དགེ་བ་ནས། །རང་གིས་བྱས་པའི་དགེ་ཡིན་ཕྱིར། །གནས་ཀྱི་སྨོན་ལམ་དག་ཏུ་འདོད། །ཅེས་དང་། ཟབ་མོ་བཀྲོལ་རིན་ཕྲེང་ཊཱི་ཀ་ལས་བཀོལ་ཞེས་བཤད། བའི་དོན་དང་ལྡན། ཅེས་དང་། འཕགས་པ་དཀོན་མཆོག་འབྱུང་བ་ལས། ཞེས་དང་། དེ་ཚེ་འཇམ་པའི་རྡོ་རྗེ་ཡིས། ཞེས་སོགས་མང་དུ་བཅོས་ཡོད་དོ། །ཤུ་བྷཾ། རང་ལུགས། འཁོར་ལོ་བར་པས་ཆོས་ཀུན་ཟབ་མོ་སྟོང་པ་ཉིད་དུ་གཏན་ལ་ཕབ་ནས། གསུམ་པས་དེའི་སྟོང་འཛིན་སེལ་བའི་ཕྱིར་མཐའ་གཉིས་སྤངས་པའི་དབུ་མའི་ལམ་སྲོལ་བཏོད་དེ། ཀླུ་ཐོགས་གཉིས་ཀྱང་དོན་དམ་པའི་གནས་ལུགས་ལ་གཅིག་ཀྱང་། རིག་པས་སྤྲོས་པ་གཅོད་ཚུལ་མ་མཐུན་པས་དབུ་སེམས་གཉིས་སུ་གྱེས་པའོ། ༈ །ཨོཾ་སྭ་སྟི། གང་གི་ཚེ་ཡེ་ཤེས་ཤིན་ཏུ་རྣམ་པར་དག་པས་ཆོས་དང་ཆོས་ཅན་རོ་གཅིག་ཏུ་གཟིགས་པའི་གོ་འཕང་ཐམས་ཅད་མཁྱེན་པའི་མཚན་གྱི་སྣང་བས་ས་གསུམ་ན་ཁྱབ་པ་བསྟན་པའི་