ཤོག་ལྷེབ་ ༤༠༡ ནས་ ༥༠༠ བར།

---

^{[མ་དཔེ་གཟིགས་ན་འདིར་གནོན།]}

ཉིན་བྱེད་ཆེན་པོར་གདོད་མ་ནས་གྲུབ་པས། ཆེས་མི་མཁས་ཤིང་མ་སྦྱངས་པའི་སོ་སྐྱེ་ཐ་ཤལ་བ་ཙ་ན་ཀའི་སྲིན་བུ་ཕྲ་མོའི་འདུ་ཤེས་ཅན་ལ་མཁྱེན་བཞིན་དུ་རྨེད་པའི་བཀའ་འཕྲིན་ནོར་བུའི་ཅོད་པན་སྤྱི་བོར་སྩལ་བ་ནི་འཕགས་རྣམས་དམན་ལས་ཆེས་དམན་པ་ལ་བརྩེ་བ་ཆོས་ཉིད་ཀྱི་ངང་ཚུལ་ནི་འདི་ལྟ་བུའོ་ཞེས་མཚོན་པ་ལས་གཞན་དུ་མ་དམིགས་མོད། དེ་ལྟ་ནའང་རང་ངོས་ནས་ཀྱང་བྱིས་པ་མའི་གམ་དུ་སྨྲ་བ་ལྟར་སྐལ་བ་བཟང་པོར་ཤེས་ནས་གང་དྲན་ཅལ་ཅོལ་དུ་གསོལ་བ་ནི་འདི་ཡིན་ཏེ། ༈ །།དང་པོ་ཚོགས་ཆེན་འདུས་པའི་ཡབ་ཡུམ་ཁྲོ་མཁར་རྣམས་ཀྱི་དོན། འདི་དང་སྒྲུབ་ཆེན་བཀའ་བརྒྱད་ཀྱི་སྨན་སྒྲུབ་སྐབས་སྦྱོར་བ་བརྒྱད་ལྡན་གསུངས་པ་རྣམས་གནད་གཅིག་པས། སྤྱིར་ཞེ་སྡང་ལ་བརྟེན་ནས་གཙོ་བོར་སྒྲོལ་བ་ལམ་དུ་བྱེད་པ་མ་ཧཱ། འདོད་ཆགས་ལ་བརྟེན་ནས་གཙོ་བོར་སྦྱོར་བ་ལམ་དུ་བྱེད་པ་ཨ་ནུ། གཏི་མུག་ལ་བརྟེན་ནས་གཙོ་བོར་འོད་གསལ་རྣམ་པར་མི་རྟོག་པའི་ཡེ་ཤེས་ལམ་དུ་བྱེད་པ་ཨ་ཏི་ཡོ་ག་ཞེས་རྒྱུད་ཀྱི་རྡོ་རྗེའི་གནས་དང་མཆོག་གཟིགས་རྣམས་ལ་གྲགས་པ་བརྟན་པ་དང་། སྒྲུབ་སྡེ་བརྒྱད་ཀྱི་བདུད་རྩི་ཡོན་ཏན་གྱི་སྐོར་རྣམས་ཀྱང་གཙོ་བོར་ལུང་གི་ཆོས་སྐད་དང་ཉེ་ཞིང་། ཨ་ནུའི་སྐོར་གསར་མ་དང་བསྟུན་ན་ཆོས་སྐད་ཕལ་ཆེར་མ་རྒྱུད་འཁོར་ལོ་སྡོམ་པ་སོགས་དང་མཐུན་ཤས་ཆེ་བས། དོན་འདི་ལ་དགོངས་

---

^{[མ་དཔེ་གཟིགས་ན་འདིར་གནོན།]}

ནས་ཐམས་ཅད་མཁྱེན་པ་པྲ་ཛྷཱ་ར་སྨིས་ཀྱང་ཨ་ནུ་དང་མ་རྒྱུད་ཀྱི་ལམ་རིམ་སྦྱར་ཏེ་སྨོན་ལམ་དུ་མཛད་པ་ཡིན་ལ། རྒྱུ་མཚན་དེས་ན་མ་རྒྱུད་བདེ་མཆོག་འཁོར་ལོར་རྫོགས་རིམ་གྱི་གཙོ་བོ་ཐབས་ལམ་ཟབ་མོ་གཏན་ལ་འབེབས་པའི་སྐབས་སུ། ཇི་ལྟར་འཇིག་རྟེན་ན་འདོད་པའི་སྒྱུ་རྩལ་དྲུག་ཅུ་རྩ་བཞི་འམ། འཁྲིག་ཐབས་དྲུག་ཅུ་རྩ་བཞི་དང་། དེ་རྣམས་ཀྱི་གཙོ་བོའང་རོལ་ཐབས་མི་འདྲ་བ་བརྒྱད་དུ་འདུས་པས་བྱང་སེམས་བཙན་ཐབས་སུ་དབབ་པའི་འཁྲུལ་འཁོར་ཀྱང་དེ་ཙམ་དུ་འདུས་པར་དགོངས་ནས་རོལ་ཐབས་དྲུག་ཅུ་རྩ་བཞིའམ། ཁ་སྦྱོར་བརྒྱད་དུ་གསུངས་ཤིང་། དེ་མཚོན་པའི་སླད་བདེ་མཆོག་ལུ་ནག་སོགས་ཀྱི་མཆོད་པའི་སྐབས་སུ། གསང་བ་སྙོམས་འཇུག་གི་མཆོད་པར་ཁ་སྦྱོར་བརྒྱད་ཀྱི་མཆོད་པ་གསུངས་པ་སོགས་རྒྱུད་དང་མན་ངག་རྣམས་ལས་རྣམ་བཞག་རྒྱ་ཆེར་གསུངས་པ་ལྟར། སྐབས་འདིར་ཡང་སྦྱོར་བ་ལམ་དུ་བྱེད་པ་ལ་གཙོ་བོར་དགོངས་ནས་ཡེ་ཤེས་པའི་ཐུགས་རྒྱུད་བདེ་བ་ཆེན་པོའི་གཟི་བྱིན་ལྷག་པར་བསྐུལ་བའི་ཕྱིར་བདེ་སྟོང་གི་ལྷ་སྐུ་ཁྲོ་མཁར་གྱི་ཚུལ་དུ་བསྒོམ་པ་དང་། བྱེ་བྲག་ཏུ་ཡུམ་ཞལ་ཡབ་ཀྱི་རྡོ་རྗེར་སྦྱོར་བའང་རྗེས་ཆགས་ཀྱི་ཉམས་ཆེས་ཆེར་བསྐུལ་བ་མཚོན་ལ། ཁྱད་པར་བདུད་རྩི་སྨན་གྱི་སྐབས་སུ། བྱང་ཆུབ་སེམས་ཀྱི་བདུད་རྩི་དམ་ཚིག་པའི་ཚུལ་དུ་འཁྱིལ་པར། ཡེ་ཤེས་པའི་བྱང་སེམས་རྡོ་རྗེ་

---

^{[མ་དཔེ་གཟིགས་ན་འདིར་གནོན།]}

བདེ་བ་ཆེན་པོའི་རྒྱུན་འབེབས་ལ། ཁ་སྦྱོར་བརྒྱད་ཀྱི་སྒོ་ནས་དབབ་པས་བྱང་སེམས་འབེབས་འཕུལ་ལྷག་པར་ཆེ་བ་ལ་དགོངས་ནས་དེ་ལྟ་བུའི་རྣམ་པར་གཞག་པ་གསུངས་སོ་སྙམ་པ་ནི་བདག་གི་རྣམ་པར་རྟོག་པ་སྟེ། ཞིབ་པར་གསར་འགྱུར་མ་རྒྱུད་ཀྱི་གཞུང་སྤྱི་དང་བྱེ་བྲག་སྒྲོལ་མ་རྣལ་འབྱོར་མའི་རྒྱུད་སོགས་དང་སྦྱར་ཏེ་དཔྱད་པ་ཞིབ་མོས་བཙལ་ན་ངེས་ཤེས་ཁྱད་པར་ཅན་སྐྱེ་བར་འགྱུར་རམ་སྙམ་ལགས།། ༈ །།གཉིས་པ་སློབ་དཔོན་སངས་རྒྱས་གསང་བའི་ལམ་རིམ་ལེའུ་གཉིས་པ་རང་གནས་མཐོང་བའི་ལེའུ་ཞེས་རྒྱུ་ཤེས་པའི་མཚན་ཉིད་ལྟ་བ་གཏན་ལ་འབེབས་པའི་སྐབས། ཐོས་བསམ་གྱི་ལྟ་བ་མཐར་ཕྱིན་པའི་ཚད། རྒྱ་མཚོ་དྭངས་བའི་གཟུགས་བརྙན་ལྟར། སོགས་ཀྱི་དོན། དཔེར་ན་རྒྱ་མཚོ་དྭངས་པའི་ནང་དུ་ཉི་ཟླ་གཟའ་སྐར་གྱི་གཟུགས་བརྙན་འཆར་བ་ལྟར། ཚིག་སྒྲ་ལ་བརྟེན་ནས་དོན་སྤྱིའི་རྣམ་པ་ཙམ་ཡིད་ལ་བྱེད་པ་མིན་པར་དོན་རང་གི་མཚན་ཉིད་རང་རིག་པའི་མངོན་སུམ་དུ་རྟོག་པས་དམིགས་པའི་ཡུལ་དང་བྲལ་བར་རྟོགས་པ་ནི་སེམས་རང་གསལ་དུ་མཐོང་ཞིང་སྒྲོ་སྐུར་ལུང་མ་བསྟན་གསུམ་དང་བྲལ་བའམ། བལྟ་བའི་ཡུལ་ལྟ་བྱེད་ཀྱི་མཁན་པོ། ལྟ་བའི་དངོས་པོ་སྟེ་འཁོར་གསུམ་དང་བྲལ་ཞིང་གྲུབ་མཐའ་གཞན་རྐྱེན་གྱིས་མི་བསྐུལ་བར། །ངེས་པར་བློའི་གདིང་རྟོགས་ཤིང་གདིངས་སུ་གང་བྱས་

---

^{[མ་དཔེ་གཟིགས་ན་འདིར་གནོན།]}

པ་དེ་ནི། དང་པོར་རྒྱུ་ཐོས་བསམ་ལ་བརྟེན་པའི་ལྟ་བ་མཐར་ཕྱིན་པའོ། །ཞེས་པའི་དོན་དུ་སྔ་རབས་ཀྱི་མཁས་པ་ཆེན་པོ་དངོས་གྲུབ་བརྙེས་པ་དག་གིས་བཀྲལ་གདའ། ལར་གསང་སྙིང་གི་སྤྱི་དོན་མཐའ་ཆོད་པར་ཤེས་པ་ལ་ལམ་རིམ་འདི་མ་ཤེས་ཀ་མེད་དུ་སྣང་ཞིང་། དེའང་ཚིག་དོན་ཐད་ཀར་བརྡ་རྙིང་དུ་སོང་བ་སོགས་ཅུང་རྟོགས་དཀའང་། བུ་འབོར་བ་མཁས་གྲུབ་ཡེ་ཤེས་རྒྱལ་མཚན་གྱི་འགྲེལ་པ་དང་། ཀཿཐོག་པ་ཤཱཀྱ་རྡོ་རྗེའི་མཆན་འགྲེལ་སོགས་སྦྱར་ན་ཕལ་ཆེར་ཤེས་པར་སླ་སྙམ་མོ།། ༈ །།གསུམ་པ་ལོངས་སྐུའི་གླེང་གཞི་སྐབས། དུས་བཞིས་གོ་ཕྱེ་ནས་དབང་པོ་བཞི་བསྐྱེད་ལུགས་ནི། སྐབས་འདིའི་ཆོས་སྐད་དམིགས་བསལ་བ་སྟེ། རྔམས་གློག་ལས། འདས་པ་ནི་དཔྱིད་ཀྱི་དུས་ཏེ་དྷཱུ་པེ་མའོ། །ཞེས་སོགས་སྦྱར་བའི་དོད། རེ་ཞིག་ལོ་གཅིག་ལ་མཚོན་ཏེ་དུས་བཞིར་ཕྱེ་བའི་སྐབས། དབྱར་དུས་རྩི་ཤིང་མེ་ཏོག་སོགས་རྒྱས་པ་དུས་ཀྱི་དངོས་གཞིར་བྱས་སྟེ་ད་ལྟ་བ་དང་། དེ་ལ་ལྟོས་ནས་སྟོན་དཔྱིད་གཉིས་དེའི་སྦྱོར་མཇུག་ཡིན་པས་འདས་པ་དང་། མ་འོངས་པ། དགུན་གསུམ་ཀ་ཡོད་ལ་མ་ཚོགས་པས་མ་ངེས་པར་བཞག་ཅིང་། དེ་ལྟ་བུའི་དུས་བཞིའི་ཡུལ་ལ་ཉེ་བར་ལོངས་སྤྱོད་པའི་རྣམ་ཤེས་ཀྱི་ཆེར་དབང་པོ་ཡིན་པས་བསྐྱེད་པའི་སྒྲས་སྨོས་པ་ཙམ་ལས་སོ་སོར་སྦྱར་དུ་མེད་པར་སེམས་མོད། ཡེ་ཤེས་གཟིགས་པས་ཞིབ་

---

^{[མ་དཔེ་གཟིགས་ན་འདིར་གནོན།]}

ཏུ་བཙའ་བར་བྱ་བའི་འོས་སོ།། ༈ །།བཞི་པ་དགོངས་པའི་རྩལ་བདུན་གྱིས་ནམ་མཁའ་ལ་རྒྱས་གདབ་ཅེས་པའི་རྩལ་བདུན་ནི་གསེར་གྱི་བྱང་བུ་བྲི་གཞི་ཕུན་སུམ་ཚོགས་པར་དགོངས་པ། བེཟླུརླ་ཞུན་མས་བྲིས་པ་རྒྱུ་༢ཕུན་སུམ་ཚོགས་པར་དགོངས་པ། རིན་པོ་ཆེ་སྣ་ཚོགས་པའི་སྒྲོམ་བུ་༣སྣོད་ངོ་མཚར་བར་དགོངས་པ། ནམ་མཁའ་འབྱུང་བཞིས་མི་འཇིག་པས་གཏེར་གནས་༤ ཕུན་སུམ་ཚོགས་པར་དགོངས་པ། མ་དང་མཁའ་འགྲོ་རྣམས་ཡེ་ཤེས་ཀྱི་སྤྱན་དང་ལྡན་པས་གཏེར་སྲུང་(ཁྱད་པར་ཅན་དུ་དགོངས་པ། ཆོས་བདག་རྒྱལ་པོ་ཛལས་ཅན་དབང་པོ་ཡང་རབ་རྟོགས་གྲོལ་དུས་མཉམ་དུ་དགོངས་པ། །སྐྱེ་འཕགས་བྱང་སེམས་ལ་གནས་པ་སོགས་གྲུབ་བརྙེས་བརྒྱུད་༧འཛིན་དར་རྒྱས་འབྱུང་བ་ལ་དགོངས་པ་སྟེ། ཇི་སྐད་དུ་བློ་གྲོས་ཐབས་ལྡན་ཚུལ་དེས་ནམ་མཁའ་རུ། །གསེར་གྱི་གླེགས་བམ་བྲི་གཞི་ཕུན་སུམ་ཚོགས། །རིན་ཆེན་བཻཌཱུརྨ་ཡི་ཞུན་མ་རྒྱུ། །རིན་ཆེན་སྣ་ཚོགས་སྒྲོམ་བུ་གཏེར་སྣོད་དེ། །མཁའ་དབྱིངས་འབྱུང་བཞིས་མི་འཇིག་གཏེར་གནས་མཆོག །ལྷ་དང་དེར་གནས་གཏེར་སྲུང་ཕུན་སུམ་ཚོགས། །ཨིནྡྲ་བོ་དྷི་ལས་ཅན་ཆོས་བདག་ཉིད། །བརྒྱུད་འཛིན་གྲུབ་བརྙེས་དར་རྒྱས་འབྱུང་བར་དགོངས། གཞི་༡རྒྱུ་༢སྣོད་༣གནས་༤སྲུང་(མ་བདག་༦ཉིད་དང་། །འཛིན་༧བྱེད་དགོངས་པའི་རྩལ་ལྡན་བདུན་རྫོགས་པས། །

---

^{[མ་དཔེ་གཟིགས་ན་འདིར་གནོན།]}

ཏནྟྲ་སྦས་པ་རྒྱལ་པོའི་ཁང་སྟེང་བབས། །ཞེས་གསུངས་ཤིང་གཞན་དུ་ན་ས་མ་ཡ་དམ་ཚིག་གི་མནའ་རྒྱ་སོགས་བདུན་ལ་བཞེད་པར་སྣང་ནའང་སྐབས་འདིར་སྔ་མ་ཉིད་གཟིགས་པ་ལྔ་སོགས་དང་བརྡ་ཁྱད་མཐུན་ཅིང་སྔ་འགྱུར་བཀའ་མའི་གཞུང་ལ་གྲགས་ཆེ་བས་དབང་བཙན་པར་སེམས་ལ། ཡིག་རྙིང་ཁ་ཅིག་ལས་སྐུ་གསུང་ཐུགས་ཡོན་ཏན་ཕྲིན་ལས་དབྱིངས་ཡེ་ཤེས་ཏེ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པའི་རིག་རྩལ་གྱི་ཕྱག་རྒྱས་གདབ་སྟེ། དེ་མཚོན་པ་རྟགས་ཀྱི་རྒྱ་བདུན་དང་བཅས་ཏེ་སྦས་སོ། །ཞེས་འབྱུང་བའང་། ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྒྱ་བདུན་གྱིས་གདབ་པར་གསུངས་པ་དང་ཚུལ་མཐུན་པས་འདིའང་ལེགས་པར་བཤད་པའི་རྣམ་གྲངས་སུ་བཟུང་དུ་རུང་ངམ་སྙམ་མོ།། ༈ །།ལྔ་པ་རྒྱུད་ལྔ་བསྒྲལ་བའི་ཁྲག་ཅེས་པ་ནི། སྤྱི་དོན་ལྟར་ན། ལྷ་མ་ཡིན་སྟོད་རིས་ལྷ་དང་སྨད་རིས་དུད་འགྲོར་བསྡུ་བའི་ལྷག་མ་འགྲོ་བ་རྒྱུད་ལྔ་ཐུགས་རྗེ་ཆེན་པོའི་ཐབས་ཀྱིས་བསྒྲལ་བའི་ཁྲག་ཅེས་པ་དང་། སྦས་དོན་ལྟར་ན། དེ་རྣམས་སུ་སྐྱེ་བའི་ལྷན་ཅིག་བྱེད་རྐྱེན་རླུང་ལྔ་ལ་རྒྱུད་ལྔར་བཏགས་ཏེ་དེ་ཉིད་དབུ་མར་འཆིང་བ་ལ་བསྒྲལ་བ་དང་། དྭངས་མ་སྟོབས་སུ་གྱུར་པར་ཁྲག་གི་སྒྲས་སྨོས་པ་དང་། མཐར་ཐུག་གི་དོན་ལྟར་ན། འགྲོ་བ་རྒྱུད་ལྔར་འཁོར་བའི་རྒྱུ་དུག་ལྔ་འོད་གསལ་གྱི་དབྱིངས་སུ་བསྒྲལ་བ་ལས་ཡེ་ཤེས་ལྔ་སྟོབས་སུ་

---

^{[མ་དཔེ་གཟིགས་ན་འདིར་གནོན།]}

གྱུར་པ་ཁྲག་གིས་སྨོས་པར་འགྲེལ་དུ་རུང་ངམ་སྙམ་པ་ལགས།། ༈ །།དྲུག་པ་ངེས་དོན་རིན་པོ་ཆེའི་རྩ་རླུང་ཁྲིད་དང་སྙིང་ཏིག་གི་འཁྲུལ་འཁོར་སྐབས། སྒྲ་ཐལ་འགྱུར་རྩ་བའི་རྒྱུད་ཀྱི་ལུང་དྲངས་པ་ཚིག་རྣམས་ཅུང་མི་མཐུན་ཙམ་བྱུང་ནའང་། སྙིང་ཏིག་གི་དགོངས་པ་ལྟར་ན། ལྡེམ་པས་འགགས་ལ་བཙིར་བས་འཆིང་། །མནན་པས་གནད་ལ་གཅུས་པས་གསལ། །ཞེས་བའི་དོན། ཀྱེ་རྡོར་བརྟག་གཉིས་ལས་ཀྱང་ལོངས་སྤྱོད་ཀྱི་ནི་རླབས་གཉིས་ལ། །རང་གི་གཡས་དང་ལག་གཞན་གྱི། །མཐེ་བོང་དང་ནི་སྲིན་ལག་གིས། །དེ་ནི་རྣལ་འབྱོར་པ་ཡིས་བཙིར། །དེ་ནས་ཡེ་ཤེས་སྐྱེ་བར་འགྱུར། །ཅེས་སོགས་གསུངས་པ་ལྟར་གསུང་ངག་རིན་པོ་ཆེའི་འཁོར་འདས་དབྱེར་མེད་ཀྱི་ལྟ་བའི་སྐབས་ལོངས་སྤྱོད་ཀྱི་རླབས་ལ་བརྟེན་ནས་བདེ་བ་བསྒོམ་པས་བརྗོད་བྲལ་ལ་ངེས་ཤེས་བསྐྱེད་པར་གསུངས་པ་དང་ཚུལ་མཐུན་པ་སྟེ། མགྲིན་པ་ན་རྩ་འདྲ་བ་གསུམ་ཡོད་པའི་བདུད་རྩི་དང་ཁྲག་རྒྱུ་བའི་རྩ་བོར་ནས། ཐོག་མར་རླུང་རྒྱུ་བའི་རྩ་མནན་པས་སྣང་བ་མ་འགག་ལ་རྟོག་པ་འགགས་པ་ལ་སོགས་པའི་གསལ་སྟོང་བརྗོད་བྲལ་གྱི་ཉམས་མྱོང་སྐྱེ་བར་འགྱུར་ལ། དེ་ཡང་ལག་ཡ་གཅིག་གི་མཐེབ་སྲིན་གྱིས་ལྟེམ་༡པའི་ཐབས་ཀྱིས་ཡུལ་ལྔའི་རྟོག་པ་འགགས་པ་རྣམ་ཤེས་སྣང་བ་ལ་ཐིམ་པ་སྟོང་པའི་ཉམས། ལག་གཉིས་ཀས་བཙིར་༢བ་

---

^{[མ་དཔེ་གཟིགས་ན་འདིར་གནོན།]}

འཆིང་བའི་ཐབས་ཀྱིས་སྣང་བ་མཆེད་པ་ལ་ཐིམ་པ་ཤིན་ཏུ་སྟོང་པའི་ཉམས། སླར་ཡང་དྲག་ཏུ་མནན་༣པས་གནད་ལ་བོར་པའི་ཐབས་ཀྱིས་མཆེད་པ་ཉེར་ཐོབ་ལ་ཐིམ་པ་སྟོང་པ་ཆེན་པོའི་ཉམས། དེ་ཉིད་དར་ཟབ་ལྟ་བུའི་ཐག་པས་གཅུད་༤པའི་ཐབས་ཀྱིས་ཉེར་ཐོབ་འོད་གསལ་ལ་ཐིམ་པས་རབ་ཏུ་སྟོང་པའི་ཉམས་རྣམས་རིམ་བཞིན་འཆར་བར་བཞེད་པར་མངོན་ལ། ངེས་དོན་རིན་པོ་ཆེས་ལུང་གི་འཕྲོར་གཅུན་པས་རྒལ་བ་དྲངས་པར་ཤེས། ཞེས་འདུག་པ་ཡི་གེ་ཉམས་པའི་སྐྱོན་མིན་ན་རྦ་རླབས་རེངས་པའི་དོན་དུ་གོ་ཞིང་། ཕུར་པ་གཏོད་ལ་དྲག་ལ་གཟིར། ཞེས་པ་ནི་གོང་གི་གཅུད་པའི་དོན་གསལ་བར་བྱས་པ་སྟེ། དར་ཟབ་ལྟ་བུའི་ཐག་པའི་སྣེ་ཕུར་བ་ལ་གཏོད་ཅིང་གཅུས་ཏེ་བསྐོར་བའི་དོན་དང་། དེ་ལྟར་རྩ་ཡི་གནད་ཀྱིས་ཀྱང་། སངས་རྒྱས་ཉིད་ནི་མཚོན་པའོ། །ཞེས་པ་ནི། དེ་ལྟར་རྩ་གཉིད་ལོག་ལྟེམ་པའི་གནད་ཀྱིས་ཀྱང་། རང་བཞིན་བརྒྱད་ཅུའི་རྟོག་པ་རགས་རིམ་དབྱིངས་སུ་འགགས་པའི་གསལ་སྟོང་རྣམ་པར་མི་རྟོག་པའི་ངང་དུ། སངས་རྒྱས་ཀྱི་དེ་ཁོ་ན་ཉིད་མཚོན་བྱ་དོན་གྱི་ཡེ་ཤེས་གང་ཡིན་པ་དེ་ནི་མཚོན་བྱེད་དཔེའི་ཚུལ་གྱིས་མཚོན་པའོ། །ཞེས་པའི་དོན་དུ་འགྱུར་སྙམ་ཞིང་། འདི་ལ་སྙིང་ཏིག་གི་ཁྲིད་གཞུང་སོགས་སུ་རྡོ་རྗེའི་རྦ་རླབས་ཞེས་གསུངས་ནའང་། ལམ་འབྲས་པའི་ལུགས་ཀྱི་དབང་བཞི་པའི་ལམ་རྡོ་རྗེའི་

---

^{[མ་དཔེ་གཟིགས་ན་འདིར་གནོན།]}

རྦ་རླབས་དང་ནི་མིང་གཅིག་པ་ཙམ་ལས་དོན་ཐ་དད་པ་ལགས། དེ་ལྟར་གོང་འོག་གི་ཟབ་མོའི་དོན་རྣམས་ལ་བདག་ལྟ་བུ་སོ་སྐྱེ་ལས་དང་པོ་པ་རྣམ་ཤེས་ཤིན་ཏུ་ལྐོག་ཏུ་གྱུར་པའི་རིགས་ཅན་གྱིས་མ་རྟོགས་པ་དང་ལོག་པར་རྟོག་པ་ཁོ་ན་ལས་ཕྱོགས་ཙམ་རྟོགས་པའང་མི་སྲིད་ན། དོན་དང་འགལ་བའི་ཕུང་པོ་ཆེན་པོའི་ཉེས་པ་མཐའ་དག་ཡེ་ཤེས་གཟིགས་པ་དམ་པས་བཟོད་པར་བཞེས་པ་དང་། བླུན་པོའི་སྤྱི་བརྟོལ་གྱི་ཚིག་ལ་སླར་ཡང་བརྩེ་བ་མཆོག་གི་སྤྱན་རས་ཀྱིས་རྣམ་ཀུན་རྗེས་སུ་བཟུང་བའི་རྒྱུར་འགྱུར་བར་ཅི་གནང་། སརྦ་དཱ་མངྒ་ལཾ་བྷ་བ་ཏུ།། ༈ །།ཨོཾ་སྭ་སྟི། བཀའ་འདྲི་དང་པོ། དཔལ་འཁོར་ལོ་བདེ་མཆོག་སྡོམ་པ་འབྱུང་བའི་རྒྱུད་ཀྱི་རིམ་པར་ཕྱེ་བ་པོ་གསུམ་པ་ལས། །གང་ཚེ་དེ་ཉིད་ལ་རེག་པ། །བསམ་པ་ཐམས་ཅད་བསམ་དུ་མེད། །གང་ཚེ་བསམ་དུ་མེད་སེམས་པ། །དེ་ཚེ་བསམ་མི་ཁྱབ་པར་འགྱུར། །སེམས་ཅན་ཇི་ལྟར་བསམ་མེད་དེ། །བསམ་མེད་ཇི་ལྟར་རྒྱལ་བའང་དེ། །གང་ཕྱིར་བསམ་བྲལ་སངས་རྒྱས་ཀྱིས། །བསམ་པ་འདི་ནི་རབ་ཏུ་བཤད། །བསམ་གྱིས་མི་ཁྱབ་སེམས་དེ་ལ། །བསམ་པ་ཀུན་གྱིས་བགྲོད་པས་འདས། །སྣ་ཚོགས་རྟོག་པའི་སྒྲོ་འདོགས་མེད། །ཅེས་སོགས་གསུངས་པའི་དོན། པཎ་གྲུབ་ཆེན་པོ་རཏྣ་རཀྵི་ཏའི་དཀའ་འགྲེལ་པདྨ་ཅན་ལས། རྫོགས་པའི་རིམ་པའི་ལེའུ་མདོར་བསྟན་པ་

---

^{[མ་དཔེ་གཟིགས་ན་འདིར་གནོན།]}

དང་། དེ་ཁོ་ན་ངེས་པར་བསྟན་པའི་ལེའུ་རྒྱས་པར་བཤད་པ་སྟེ་འདི་ནི་ཤིན་ཏུ་རྒྱས་པར་བཤད་པའོ། །བསམ་པ་ཐམས་ཅད་བསམ་དུ་མེད། ཅེས་པ་སེམས་ཅན་ཐམས་ཅད་བསམ་གྱིས་མི་ཁྱབ་པས་སོ། །བསམ་དུ་མེད་ཅེས་པ་བསམ་པ་དང་བྲལ་བས་སོ། །ཇི་ལྟར་ཞེས་པ་སེམས་ཅན་ཐམས་ཅད་དང་རྣལ་འབྱོར་པའི་སེམས་དང་དེ་བཞིན་གཤེགས་པ་རྣམས་ཀྱི་ཁྱད་པར་མེད་པའི་ཕྱིར་རོ། །བསམ་དུ་མེད་པས་ཞེས་པས་སེམས་མེད་པས་སོ། །བསམ་གྱིས་མི་ཁྱབ་སེམས་པ་དེས། ཞེས་པ་བསམ་དུ་མེད་པར་སེམས་པའོ། །སྣ་ཚོགས་སྒྲོ་འདོགས་མིན་ཞེས་པ་སྒྲོ་འདོགས་དང་བཅས་པ་མེད་ལ་སྒྲོ་འདོགས་དང་བྲལ་བའང་མེད་པའོ། །འདིར་གདམས་ངག་འདི་ཡིན་ཏེ། བསྐྱེད་པའི་རིམ་པ་སྔོན་དུ་སོང་ཞིང་རྡོ་རྗེ་བཟླས་པའི་རིམ་པས་མཐར་ཐུག་པ་ལེགས་པར་གོམས་པའི་རྣལ་འབྱོར་པས་ཕྱོགས་འགའ་ཞིག་ཏུ་སྐྱིལ་ཀྲུང་བཅས་ལ་འདུག་སྟེ། ཁམས་གསུམ་པ་ལ་དེས་དངོས་པོར་གྲུབ་པ་ཅུད་ཟད་ཀྱང་མེད་ཅིང་ཤེས་རབ་དང་ཐབས་ཀྱི་བདག་ཉིད་ཅན། དཔལ་རྡོ་རྗེ་ཕག་མོ་དང་བདེ་མཆོག་གི་རང་བཞིན་གྱིས་ཁྱབ་པའོ་ཞེས་རབ་ཏུ་བསྟན་པར་བྱ་སྟེ། ཡོད་པ་མ་ཡིན་པའི་རྣམ་པར་རྟོག་པ་མཐའ་དག་བསལ་ནས་དེ་ཁོ་ན་ལྟར་བླ་མའི་གདམས་ངག་ལས་འོད་གསལ་གྱི་རིམ་པས་རྣམ་པར་རྟོག་པ་མེད་པར་གནས་ན་༢། ཡུན་མི་རིང་བར་རྣམ་པར་མི་

---

^{[མ་དཔེ་གཟིགས་ན་འདིར་གནོན།]}

རྟོག་པའི་ཡེ་ཤེས་གསལ་བར་འགྱུར་རོ། །ཞེས་པའོ། །ཞེས་གསུངས་པའི་དོན། སྤྱིར་འཁོར་ལོ་བདེ་མཆོག་ལ། མ་རྒྱུད་རང་རྐང་ལྟར་བཀྲལ་བ་སངས་རྒྱས་མཉམ་སྦྱོར། གསང་འདུས་འཕགས་ལུགས་དང་མཐུན་པར་བཀྲལ་བ་བདེ་མཆོག་སྡོམ་འབྱུང་། དུས་ཀྱི་འཁོར་ལོ་དང་མཐུན་པར་བཀྲལ་བ་མཁའ་འགྲོ་རྒྱ་མཚོ། རྣལ་འབྱོར་གསང་མཐའ་ཐུན་མོང་མ་ཡིན་པ་ལྟར་བཀྲལ་བ་ལཱུ་དྲིལ་ནག་གསུམ་ཕྲན་དང་བཅས་པ་ཞེས་གྲགས་པའི་ནང་ནས། སྡོམ་འབྱུང་ནི་རྒྱུད་དང་མན་ངག་གི་བསྟན་དོན་ཕལ་ཆེར་གསང་འདུས་འཕགས་ལུགས་དང་མཐུན་པས་ན། རིམ་པར་ཕྱེ་བ་འདིའང་སྤྱིར་རྫོགས་རིམ་སྟོན་པའི་གཞུང་། དེ་ལའང་མདོ་རྒྱས་གཉིས་ལས་རྒྱས་པར་བཤད་པའི་སྐབས། དེ་ལའང་རིམ་པ་ལྔ་ལས་སྐབས་འདི་ནི། ལུས་དབེན་དང་རྡོ་རྗེའི་བཟླས་པ་སྔོན་དུ་སོང་ནས། སེམས་དབེན་ཐུགས་རྡོ་རྗེའི་རྣལ་འབྱོར་སྟོན་པའི་སྐབས་ཡིན་པས། སྤྱིའི་གོ་དོན་རྒྱས་པ་ནི་གསང་འདུས་རིམ་ལྔའི་སེམས་དབེན་གྱི་སྐབས་ལས་མཁྱེན་དགོས་པ་ལས་བཤད་བྱ་རྒྱ་ཆེ་བའི་ཕྱིར་བྲིར་མ་ལྡང་ལ། ཚིག་དོན་ཙམ་ནི་གང་གི་ཚེ་སྒྲུབ་པ་པོ་ཆེས་ཐམས་ཅད་ཀྱི་དེ་ཁོ་ན་ཉིད་སེམས་དབེན་ཐུགས་རྡོ་རྗེའི་རྣལ་འབྱོར་ལ་རེག་པ་སྟེ་ལྷག་པར་སྤྱོད་པ་རྣམས་ཀྱིས་ནི། བསམ་པར་བྱ་བའི་ཡུལ་སེམས་ཅན་ཐམས་ཅད་རང་བཞིན་གྱིས་རྣམ་པར་དག་པའི་ཕྱིར་། །

---

^{[མ་དཔེ་གཟིགས་ན་འདིར་གནོན།]}

བསམ་གྱིས་མི་ཁྱབ་པས་ན། གཉིས་འཛིན་གྱི་བློས་བསམ་དུ་མེད་པ་ཡིན་ནོ། །གང་གི་ཚེ་བསམ་དུ་མེད་པར་སེམས་པ་སྟེ་དེ་ཁོ་ན་ཉིད་ཉམས་སུ་མྱོང་བ་དེའི་ཚེ་ན་ཆོས་ཐམས་ཅད་བསམ་གྱིས་མི་ཁྱབ་པའི་ངོ་བོ་ཉིད་དུ་རྟོགས་པར་འགྱུར་ཏེ་ཤེས་བྱའི་ཡུལ་དང་། ཤེས་བྱེད་ཀྱི་བློ་གཉིས་ཀ་བསམ་གྱིས་མི་ཁྱབ་པ་ཉིད་ཀྱི་ཕྱིར་རོ། །དེ་བས་ན་ཡུལ་སེམས་ཅན་ཐམས་ཅད་ཀྱི་ཆོས་ཉིད་རང་བཞིན་གྱིས་བསམ་དུ་མེད་པ་ཇི་ལྟ་བར་ཡུལ་ཅན་རྣལ་འབྱོར་པའི་སེམས་ཀྱི་དེ་ཁོ་ན་ཉིད་ཀྱང་བསམ་དུ་མེད་ལ། རྣམ་འབྱོར་པའི་སེམས་ཀྱི་དེ་ཁོ་ན་ཉིད་བསམ་དུ་མེད་པ་ཇི་ལྟ་བར་རྒྱལ་བ་སྟེ་དེ་བཞིན་གཤེགས་པ་རྣམས་ཀྱི་ཐུགས་ཀྱི་གསང་བ་བསམ་གྱིས་མི་ཁྱབ་པའི་དེ་ཁོ་ན་ཉིད་ཀྱང་བསམ་དུ་མེད་པ་སྟེ། མདོར་ན་གཞི་སེམས་ཅན་གྱི་ཆོས་ཉིད། ལམ་རྣལ་འབྱོར་པའི་ཉམས་མྱོང་། འབྲས་བུ་དེ་བཞིན་གཤེགས་པའི་ཐུགས་ཀྱི་གསང་བ་ཐམས་ཅད་བསམ་གྱིས་མི་ཁྱབ་པས་ན། གང་གི་ཕྱིར་སྒྲུབ་པ་པོ་སེམས་དབེན་གྱི་རྣལ་འབྱོར་ལ་མཆོག་ཏུ་གཞོལ་བ་རྣམས་ཀྱི་དོན་དུ། བསམ་པ་དང་བྲལ་བའམ་བསམ་གྱིས་མི་ཁྱབ་པའི་དགོངས་པ་ཟབ་མོ་གང་ཡིན་པ་སངས་རྒྱས་རྣམས་ཀྱིས། བསམ་པ་སྟེ་སོ་སོ་རང་རིག་པའི་ཡེ་ཤེས་ཀྱིས་ཉམས་སུ་མྱོང་བའི་ཚུལ་གྱིས་ཉམས་སུ་བླང་བའི་འདི་ནི་རབ་ཏུ་བཤད་དེ། དོན་དམ་པར་བསམ་གྱིས་མི་ཁྱབ་པའི་སེམས་དབེན་ཐུགས་

---

^{[མ་དཔེ་གཟིགས་ན་འདིར་གནོན།]}

རྡོ་རྗེའི་གནས་ལུགས་དེ་ལ། ཀུན་རྫོབ་བསམ་པ་ཀུན་གྱིས་བགྲོད་དུ་མེད་པས་ཡུལ་ཡུལ་ཅན་ཐམས་ཅད་རོ་གཅིག་པའི་བསམ་མི་ཁྱབ་པའི་རྫོགས་རིམ་གྱི་རྣལ་འབྱོར་ལ་གོམས་པས། གཉིས་སྣང་གི་རྟོག་པ་ཐམས་ཅད་དབྱིངས་སུ་ཐིམ་པས་གཟུང་འཛིན་སྣ་ཚོགས་པའི་རྣམ་པར་རྟོག་པའི་སྒྲོ་འདོགས་མེད་ལ། དེའང་གདོད་མ་ནས་མེད་པའི་ཕྱིར་སྒྲོ་འདོགས་དང་བྲལ་བ་རང་མེད་དེ། ཞེས་པའི་དོན་ལགས། འགྲེལ་པར་དེའི་གདམས་ངག་ནི་འདི་ཡིན་ཏེ་ཞེས་སོགས་མན་ཆད་སེམས་དབེན་ཇི་ལྟར་བསྒོམ་པའི་ཚུལ་སྟོན་པ་སྟེ་མཁྱེན་པར་སླའོ།། ༈ །།གཉིས་པ་མཛོད་འགྲེལ་བདེན་གཉིས་ཤིང་རྟར་ལམ་རྒྱུད་ལྔའི་བཤད་པ། རྨི་ལམ་གྱི་ལམ་སོགས་ཀྱི་དོན་སྤྱིར་ལམ་རྒྱུད་ལྔ་ལ། འགའ་ཞིག་གིས་འགྲོ་བ་རྒྱུད་ལྔ་དང་གཅིག་པར་མཛད་ནས་ལྷ་མ་ཡིན་སྟོད་རིས་ལྷ་དང་། སྨད་རིས་དུད་འགྲོར་བསྡུས་པའི་ལྷག་མ་ལྔར་བཞག་པ་དང་། དེ་ལའང་། ལྷ་གཡེང་བའི་ལམ། མི་གདམས་པའི་ལམ། དུད་འགྲོ་མུན་པའི་ལམ། ཡི་དྭགས་འགོག་པའི་ལམ། དམྱལ་བ་གདུང་བའི་ལམ་ཞེས་པའི་ཐ་སྙད་བཏགས་པ་དང་། གཞན་དག་འགྲོ་བ་རིགས་དྲུག་ཏུ་འགྲོ་བའི་ལས་ལམ་གྱི་རྒྱུ་ཉོན་མོངས་པ་ལྔར་སྤྱོད་པའི་གང་ཟག་ལ་བཞག་པ་སོགས་བཤད་ཚུལ་མང་ནའང་། སྐབས་དོན་རྨི་ལམ་གྱི་ལམ་ནི་རྨི་ལམ་དུ་ཡིད་ཀྱི་ལུས་ལ་བརྟེན་ནས་

---

^{[མ་དཔེ་གཟིགས་ན་འདིར་གནོན།]}

བདེ་སྡུག་སྣ་ཚོགས་སྤྱོད་པ་དང་། བག་ཆགས་ཀྱི་ལམ་ནི་ཉིན་པར་བག་ཆགས་སྤྱིར་ལུས་རྟེན་རགས་པ་ལ་བརྟེན་ནས་བདེ་སྡུག་རགས་པར་སྤྱོད་པ་དང་། ལས་སྤྱི་མཐའི་ལམ་ནི་མྱོང་བར་ངེས་པའི་འབྲས་བུ་ལ་སྤྱོད་པ་དང་། འཁྲུལ་འཁོར་མ་ངེས་པའི་ལམ་ནི་རིགས་དྲུག་སྤྱིའི་འཁྲུལ་སྣང་དང་། རྒྱུ་དང་འབྲས་བུ་སོ་སོར་མ་ངེས་པའི་ལམ་ནི་བར་དོའི་ཡིད་ལུས་ཀྱི་འཁྲུལ་སྣང་ལ་བཞག་པ་སྟེ། དེ་ཙམ་གྱིས་འགྲོ་བ་རིགས་དྲུག་གི་རྒྱུ་དང་འབྲས་བུ་བསྡུས་པར་དགོངས་ཤིང་འཆད་པའང་སྣང་མོད་དེ། མདོ་རྒྱུད་ཀྱི་ཁུངས་གང་ཡིན་བཙལ་ནས་ཞིབ་མོར་དཔྱད་པ་རིགས་སོ།། ༈ །།གསུམ་པ་ཡོན་ཏན་རིན་པོ་ཆེའི་མཛོད་ཀྱི་ལེའུ་བཅུ་པས། དེ་ཡང་སྔགས་སྡོམ་ཡིན་ན་དམ་ཚིག་འདྲེས། །དམ་ཚིག་ཡིན་ན་སྡོམ་པ་འདྲེས་མི་འགྱུར། །ཞེས་པའི་དོན་འགྲེལ་པས་མ་བཀྲལ་བས་དགོངས་པ་དངོས་ཇི་ལྟར་ཡིན་ཤེས་དཀའ་རུང་ཐད་ཀར་གོ་བ་བླངས་ན་ནི། དེ་ཡང་གནང་བཀག་ལ་དཔྱད་ནས་འཇུག་ལྡོག་གཉིས་སུ་བྱེད་དགོས་པ་མཐའ་དག་སྡོམ་པར་བཞག་པས་ན། སྔགས་ཀྱི་སྡོམ་པ་ཡིན་ན་དམ་ཚིག་ཀྱང་དེའི་ནང་དུ་འདྲེས་པའམ་འདུས་པ་ཡིན་ཏེ། དེ་འཇུག་ལྡོག་གི་ཟླས་ཕྱེ་བའི་ལྡོག་པའི་ཆ་ཡིན་པའི་ཕྱིར། དམ་ཚིག་ཡིན་ན་དེའི་ནང་དུ་སྡོམ་པ་མི་འདུ་སྟེ། སྨོན་འཇུག་གཏོང་བ་ལ་སོགས་པ་འདའ་བར་མི་རུང་པའི་ཆ་ཐམས་ཅད་དམ་ཚིག་ཡིན་

---

^{[མ་དཔེ་གཟིགས་ན་འདིར་གནོན།]}

པས་ན། དེའི་ནང་ན་འཇུག་པའི་ཆ་མི་འདུ་བའི་ཕྱིར། ཞེས་དགོངས་པར་གསལ་ཏེ། དམ་ཚིག་འདའ་བར་བྱ་བ་མ་ཡིན་ལ། ཞེས་སོགས་སྤྱི་བཤད་པའི་སྐབས་ལ་དཔྱད་པས་ཤེས། གཞན་དུ་ན་སྡོམ་པའི་ནང་དུ་དམ་ཚིག་འདུ་སྟེ། དམ་ཚིག་ནི་སྔགས་ཀྱི་ཀུན་སྤྱོད་ཕྲ་མོ་ཐམས་ཅད་ལ་བཞག་སྟེ། དཔེར་ན་སྦྱིན་སྲེག་སྐབས་སུ་ལག་པ་པུས་མོའི་ཕྱིར་མི་འདའ་བ་ལྟ་བུ་དེ། སྡོམ་པའི་ཡན་ལག་ཡིན་ཏེ། རྩ་ལྟུང་གི་དབང་དུ་བྱས་ན་བདེ་གཤེགས་བཀའ་འདས་ཀྱི་རྩ་ལྟུང་ལྟ་བུར་འདུ་བའི་ཕྱིར། དམ་ཚིག་ནང་དུ་སྡོམ་པ་མི་འདུ་སྟེ། སྔགས་ཀྱི་ཀུན་སྤྱོད་ཉི་ཚེ་བའི་ནང་དུ་སྔགས་ཀྱི་སྡོམ་པ་རྫོགས་པ་མི་འདུ་བའི་་ཕྱིར། དཔེར་ན་ནས་ཁལ་གཅིག་གི་ནང་དུ་འདོང་གང་འདུ་མོད་དེ། འདོང་གང་གི་ནང་དུ་ཁལ་གཅིག་མི་འདུ་བ་བཞིན་ཞེས་བཤད་པའང་སྣང་ཞིང་། ལར་ཡང་དམ་ཚིག་དང་སྡོམ་པ་གཅིག་མི་གཅིག་གི་དཔྱད་པ་ཤིན་ཏུ་མང་མོད་ཀྱང་། སྐབས་འདིའི་བཞེད་པ་ནི་གོང་དུ་སྨོས་པ་ལྟར་འཐད་དོ་སྙམ།། ༈ །།བཞི་པ་དཔལ་ཀྱེ་རྡོ་རྗེ་རྩ་བའི་རྒྱུད་བརྟགས་པ་གཉིས་པའི་བརྟག་པ་ཕྱི་མའི་ལེའུ་བཞི་པ་རྡོ་རྗེའི་གླུ་གར་གྱི་སྐབས་ཀྱི་ལུང་། དེ་ལ་དྲིས་ནི་མཚོན་པར་བྱ། །སྒོག་པའི་དྲི་ནི་དང་པོ་སྟེ། །དེ་བཞིན་ཡང་ནི་རྒྱ་རྒོད་དེ། །ག་བུར་མ་ལ་ཡཾ་ཛེ་ཉིད། ངང་པ་དང་ནི་བུང་པའི་སྒྲ། །གླུ་ཡི་མཐའ་ནས་མཉན་པར་བྱ། །བ་

---

^{[མ་དཔེ་གཟིགས་ན་འདིར་གནོན།]}

ལང་འཚོ་བའི་སྒྲ་ཡང་ནི། །ཕྱི་རོལ་ཚལ་དུ་མཚོན་བྱ་བ། །གླུ་ཡི་བྱིན་རླབས་མཚན་ཉིད་དོ། །ཞེས་པའི་དོན། ཚོགས་ཀྱི་འཁོར་ལོ་ལ་སོགས་པའི་སྐབས་སུ་རྡོ་རྗེའི་གླུ་བླངས་ཤིང་གར་བྱས་པས་དཔའ་བོ་མཁའ་འགྲོ་རྣམས་འདུ་ཞིང་བྱིན་གྱིས་རློབ་པར་འགྱུར་ཏེ། དེ་ལ་བྱིན་རླབས་ཀྱི་མཚན་མ་ཆུང་འབྲིང་ཆེ་བ་ནི་དྲི་དང་སྒྲས་མཚོན་པར་བྱ་སྟེ། སྒོག་པའི་དྲི་ལྟ་བུ་ནི་དང་པོ་སྟེ་ཆུང་བ་ཉིད་དང་། དེ་ནས་གཞན་ཡང་རྒྱ་རྒོད་ཀྱི་དྲི་ལྟ་བུ་ནི་འབྲིང་དང་། ག་བུར་དང་། མ་ལ་ཡཾ་ཛེ་སྟེ་མ་ལ་ཡར་སྐྱེས་པའི་ཙནྡན་གྱི་དྲི་ལྟ་བུ་ནི་ཆེ་བ་ཉིད་དང་། སྒྲས་མཚོན་པ་ནི་ངང་པའི་སྐད་ལྟ་བུ་དང་། བུང་བའི་སྒྲ་ལྟ་བུ་འབྱུང་བ་སྟེ། །དེ་དག་རང་གིས་གླུ་བླངས་པའི་མཐའ་མ་སྟེ་རྗེས་ནས་མཉན་པར་བྱ་ཞིང་། དེ་བཞིན་དུ་བ་ལང་འཚེ་ཡི་སྟེ་ཅེ་སྤྱང་གི་སྒྲ་ལྟ་བུ་ཡང་ནི་ཚོགས་ཁང་དེ་ཉིད་ཀྱི་ནང་ངམ། དེ་དང་ཉེ་བའི་ཕྱི་རོལ་གྱི་སྐྱེད་མོས་ཚལ་སོགས་གང་དུ་བྱུང་ནའང་བྱིན་གྱིས་བརླབས་པའི་ལྟས་སུ་མཚོན་པར་བྱ་བ་སྟེ། གླུ་ཡི་བྱིན་རླབས་ཀྱི་མཚན་ཉིད་དོ། །ཞེས་པའི་དོན་ལགས་ཤིང་། དེའང་སྒྲ་ཇི་བཞིན་པ་ལས་གཞན་པའི་གོ་བ་བཙལ་དུ་མེད་དེ། ནུས་པ་དང་ལྡན་པས་ཚོགས་ཀྱི་འཁོར་ལོ་སོགས་ཀྱི་སྐབས་རྡོ་རྗེའི་གླུ་དང་གར་བྱེད་པའི་ཚེ་དེ་ལྟ་བུའི་དྲི་དང་། སྒྲ་བྱུང་ན་དཔའ་བོ་དང་མཁའ་འགྲོས་བྱིན་གྱིས་བརླབས་པའི་ལྟས་སུ་ཤེས་པར་བྱ་བ་ཉིད་དོ། །

---

^{[མ་དཔེ་གཟིགས་ན་འདིར་གནོན།]}

ལྔ་པ་ས་དང་པོའི་རྗེས་ཐོབ་མཐོང་ལམ་དུ་གཏོགས་ཏེ། མཐོང་ལམ་འཁོར་དང་བཅས་པ་ཞེས་འབྱུང་བའི་འཁོར་ཡིན་པའི་ཕྱིར། མཉམ་བཞག་ནི་མཐོང་ལམ་དངོས་ཡིན་ལ། རྗེས་ཐོབ་དེའི་ཡན་ལག་གམ་འཁོར་ཡིན་པས་ན། མཉམ་བཞག་གིས་མཐོང་ལམ་གྱི་གོ་མི་ཆོད་པའི་སྐྱོན་ཀྱང་མེད་དོ།། ༈ །།དྲུག་པ་ཡིད་དང་སྒོ་ལྔའི་ཤེས་པ་འཇུག་པ་དང་ཐིམ་པ་གཉིས་ཀའི་སྐབས། ཀུན་གཞི་ལས་ཡིད། དེ་ལས་སྒོ་ལྔའི་ཤེས་པ་རིམ་པར་སྐྱེ་ཞིང་། ཐིམ་པ་ནའང་ལུགས་ལྡོག་ཏུ་རིམ་པར་ཐིམ་པར་རྒྱུད་དང་མན་ངག་ཐམས་ཅད་ལས་གསུངས།། ༈ །།བདུན་པ་བདེ་གཤེགས་ཀུན་འདུས་རི་ཆོས་ལུང་རྒྱུན་ཙམ་མ་གཏོགས། ཟུར་དུ་ཁྲིད་རྒྱུན་འདྲ་ནི་མི་བཞུགས་པས། ཞལ་ཤེས་ཀྱི་དཔེ་དང་། སྙན་བརྒྱུད་མ་འཚལ་ཞིང་། རྩ་ཁྲིད་ཀྱི་གསུང་རྡོ་རྗེ་དང་། ཐུགས་རྡོ་རྗེའི་སྐབས་སུ་ཟིན་བྲིས་ཕྲན་བུ་རེ་ཙམ་སྣང་།། ༈ །།བརྒྱད་པ་ཆོས་སྐྱོང་སྲུང་མ་ལྟ་བུ་མདུན་བསྐྱེད་གཙོར་བཏོན་ལ་རྫོགས་སྨིན་སྦྱང་གསུམ་སྦྱར་བ་མ་མཐོང་ཞེ་ན། ལྷག་པར་ལམ་གོང་མའི་སྨིན་བྱེད་དུ་འགྲོ་བ་ལ་ནི། རང་གི་རྡོ་རྗེའི་ལུས་ཉིད་ལྷར་བསྒོམ་པ་ལས་གཞན་ལ་སྦྱར་དུ་མེད། སྤྱིར་ཡང་མདུན་བསྐྱེད་སྒྲུབ་མཆོད་སོགས་བསྐྱེད་རིམ་གྱི་ཡན་ལག་ཡིན་གྱི། དངོས་གཞི་མ་ཡིན། ལམ་ངེས་རྫོ་བ་ས་ཀྱི་དབང་དུ་བྱས་ན། ཐོག་མར་བདག་ལྷར་བསྐྱེད་པའི་རྣལ་འབྱོར་ལ་

---

^{[མ་དཔེ་གཟིགས་ན་འདིར་གནོན།]}

གསལ་སྣང་མཐར་ཕྱིན་པར་བསླབ། །དེ་ནས་བསྙེན་སོགས་ལས་སུ་རུང་བར་བྱས། དེ་རྗེས་རང་གཞན་གྱི་དོན་གྲུབ་པའི་ཕྱིར་དཀྱིལ་འཁོར་འབྲི་སྒྲུབ་སོགས་ལ་འཇུག་པས་ན། བསྐྱེད་རིམ་གྱི་གཙོ་བོ་བདག་ཊྛ བསྐྱེད་ཡིན་ནོ།། ༈ །།དགུ་པ་དར་གྱི་རྒྱན་ལ། གསར་མའི་ཕྱོགས་ཕལ་ཆེར་ལ་དངོས་སུ་སྟོད་གཡོགས་དང་། སྨད་དཀྲིས་གཉིས་ཁོ་ན་གསུང་། རྙིང་མའི་ཕྱོགས་ལ་དར་གྱི་རྒྱན་ལྔ་ཞེས་པ་ལའང་འདྲེན་ཚུལ་མང་མོད་དེ། སྨིན་གླིང་པ་ཆེན་པོ་སོགས་ཀྱི་གསུང་ལྟར་ན། དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་ཞེས་པ། རྒྱུ་དར། ཁ་དོག་དཀར་པོ། དེ་ལ་གསེར་གྱི་ངང་རིས་ཏེ་རི་མོ་རྩིང་པོ་ཡོད་པའི་ཡུག་གོན་གྱི་སྟོད་གཡོགས། ཚི་གུ་ཞེས་ཁ་དོག་སྣ་ཚོགས་པའི་སྨད་དཀྲིས། དབུ་རྒྱན་ལས་འཕྱང་བའི་ཅོད་པན། ཟི་ལྡིར་ཞེས་པ་རྒྱུ་དར་མཐིང་ཁྲ། དབྱིབས་འཕན་གྱི་རྣམ་པ་ལྟག་པ་ནས་འཕྱང་བ་སྟེ། དོན་དུ་དེང་སང་གར་པ་རྣམས་ཀྱི་རྒྱབ་འཕེན་དེ་ཀ་ལགས། གར་གྱི་བུ་དུང་ནི་གར་ལ་འཇུག་པ་སོགས་ཀྱི་གོས་ཡིན་པ་དང་། རྣམ་པ་ཕུ་དུང་མ། དབྱིབས་གོས་ཐུང་ལྟ་བུ་ལས་ཕུ་དུང་པུས་མགོ་ཙམ་ལས་མི་སླེབ་པའི་ཐུང་ངུ་ཞིག་ཡིན། དོན་དུ་ཕུ་དུང་རིང་ཐུང་མ་གཏོགས་དེང་སང་གར་པ་རྣམས་ཀྱི་གར་གོས་འདི་ཀ་ལགས་ཤིང་། ཁ་དོག་ནི་རིགས་སོ་སོའི་མདོག་དང་མི་ཟློས་པ་ཞིག་ལས་དམིགས་བསལ་མ་གསུངས།

---

^{[མ་དཔེ་གཟིགས་ན་འདིར་གནོན།]}

འདི་རིགས་ལ་གསུང་ལུགས་སྣ་ཚོགས་མཛད་ཀྱང་། སྔོན་གྱི་བྲིས་སྐུ་རྙིང་པ་དང་གསང་རྒྱུན་འཁྲུལ་མེད་ཡིད་རྟོན་ཕེར་བ་ལགས།། །།བཅུ་པ་རིགས་སོ་སོའི་སྐྱིལ་ཀྲུང་ནི། རྡོ་རྗེའི་རིགས་ལ་རྡོར་སྐྱིལ། གཤེགས་རིགས་ལ་སེམས་སྐྱིལ། རིན་པོ་ཆེའི་རིགས་ལ་གཡས་བརྐྱངས་པའི་ཕྱེད་སྐྱིལ། པད་རིགས་ལ་ལོང་བུ་བསྣོལ་བ་ཙམ་གྱི་སྐྱིལ་ཀྲུང་། ལས་རིགས་ལ་གཡོན་བརྐྱངས་པའི་ཕྱེད་སྐྱིལ་ཏེ་སོ་སོར་རྒྱུ་མཚན་དང་བཅས་ཏེ་གསུངས། རིགས་སོ་སོའི་ཁུ་ཚུར་ཡོ་གའི་སྐབས། རྡོ་རྗེ་ཁུ་ཚུར་ལས་མཐེ་བོང་བརྐྱང་པ་རྡོ་རྗེའི། མཛུབ་མོ་བརྐྱང་པ་རིན་ཆེན་གྱི། གུང་མོ་བརྐྱང་པ་གཤེགས་རིགས་ཀྱི། སྲིན་ལག་བརྐྱང་པ་པདྨའི། མཐེའུ་ཆུང་བརྐྱང་པ་ལས་རིགས་ཀྱི་ཁུ་ཚུར་དུ་བཤད་ཅིང་ཕྱག་ལེན་ལའང་མཛད་དོ།། ༈ །།བཅུ་གཅིག་པ་ལྷག་མཐོང་གི་སྐབས། གློད་རབ་བསྒོམ་རབ་ཞེས་གསུངས་པ། གཤིས་སྐྱེ་མེད་ཀྱི་ངང་དུ། བློ་བྱར་མེད་དུ་རང་སོར་འཇོག་པ་ལ་དེའི་ཐ་སྙད་བཏགས་པ་ལས། དང་པོ་བསྒྲིམ། དེ་ནས་གློད་པ་སོགས་རྣམ་རྟོག་གིས་འདུ་བྱས་པ་ལ་ཟེར་བ་མ་ལགས་པས། མ་བཅོས་པ་འཆོས་པའི་སྐྱོན་མི་འཇུག །ཞི་གནས་ཀྱང་པའི་སྐབས་ན། ཆེད་དུ་བཅོས་པའི་སྒོ་ནས་སེམས་གནས་ཆ་བཙལ་བ་སྟེ་འདི་དང་མི་གཅིག་པ་གཞིར་བཅས།། ༈ །།བཅུ་གཉིས་པ། ཡི་དྭགས་འཇུར་གེགས་ལ་ཆུ་སྦྱིན་གྱི་

---

^{[མ་དཔེ་གཟིགས་ན་འདིར་གནོན།]}

ནང་དུ་ཟན་བཅུག་པ་མི་རུང་བར་གསུངས་ཏེ། སྡོམ་གསུམ་རབ་དབྱེ་ལས། །འགའ་ཞིག་ཆུ་སྦྱིན་ནང་དུ་ཟན། །འཇུག་པའི་ལག་ལེན་བྱེད་པ་ཐོས། །འཇུར་གེགས་ཅན་གྱི་ཡི་དྭགས་ཀྱིས། །ཆུ་སྦྱིན་ནང་དུ་ཟན་མཐོང་ན། །འཇིགས་པ་ཆེན་པོ་འབྱུང་བར་གསུངས། །དེ་ན་ཆུ་སྦྱིན་ནང་དུ་ཟན། །འདེབས་པ་ཆོ་ག་ཉམས་པ་ཡིན། ཞེས་གསུངས་པའི་ཕྱིར།། ༈ །།བཅུ་གསུམ་པ་དེ་བཞིན་དུ། ཡི་དྭགས་ཀྱི་ཆུ་སྦྱིན་ལ་འོ་མ་བསྲེ་བའང་མི་རུང་སྟེ་རགས་པའི་ཟས་སུ་འགྱུར་བའི་ཕྱིར།། ༈ །།བཅུ་བཞི་པ་ཆུ་གཏོར་བཏོང་སྐབས་མིག་ར་ལྟ་བུའི་གདོང་འགེབས་གོན་པ་ནི་དགེ་ལུགས་པ་རྣམས་ཀྱིས་ཕྱག་ལེན་དུ་མཛད། དགེ་བཤེས་རྣམས་ཀྱིས་གཏོར་མའི་ཁྲིད་ཀྱི་སྐབས་རྒྱུ་མཚན་གསུངས་པ་ན། ཡི་དྭགས་ཕྲ་མོ་སོགས་མགྲོན་རིགས་འགའ་ཞིག་མིའི་གདོང་པ་མཐོང་ན་ཤིན་ཏུ་འཇིགས་ཤིང་སྐྲག་པས་དཔག་ཚད་མང་དུ་འབྲོས་པར་འགྱུར་བས་ན། དེ་རྣམས་ཀྱི་འཇིགས་པ་སྐྱོབ་པའི་ཆེད་ཡིན་གསུངས་པ་ཙམ་ལས་རྒྱུ་མཚན་གཞན་མི་སྣང་ལགས།། ༈ །།པཎ་ཆེན་ཤཱཀྱ་མཆོག་ལྡན་པའི་རྣམ་ཐར་ཞིབ་མོ་རྣམ་འབྱེད་ཅེས་གྲོལ་མཆོག་གིས་མཛད་པ་ལས། སེ་རར་གུང་རུ་རྒྱལ་མཚན་དཔལ་བཟང་ལས་དབུ་མ་གསན་སྐབས་དགག་བྱ་བཀག་ཤུལ་གྱི་འཛིན་སྟངས་སྦྱོར་བ་འདི་མཁས་གྲུབ་དགེ་ལེགས་པ་རང་གིས་རྩལ་བཤད་བྱས་པའི་ཁ་འཛིན་

---

^{[མ་དཔེ་གཟིགས་ན་འདིར་གནོན།]}

རི་བོ་དགེ་ལྡན་པའི་ཆར་གཏོགས་ཡོངས་ཀྱི་སྒྲོགས་པར་སྣང་། རྗེ་རིན་པོ་ཆེ་དང་བླ་མ་རྗེ་བཙུན་རེ་མདའ་པ་གཉིས་དགག་བྱའི་ངོས་འཛིན་ཕྲ་ཞིབ་དཔྱོད་ཚུལ་བག་རྩིང་ཞི་བ་ལས། མཉམ་བཞག་འཇོག་ཚུལ་འདྲ། ལར་རང་ཡང་མདོ་སྡུད་པ་ལས། རྩ་དང་ཤིང་ལས་མེ་བྱུང་བས་ནི་དེ་ཉིད་བསྲེག །ཅེས་ཤིང་དགྲ་མེ། མེ་དགྲ་ཤིང་ཡིན་ཞིང་། ཤིང་བསྲེག་པ་ལ་མེ་དགོས། མེ་སྦར་བ་ལ་ཤིང་དགོས། ཤིང་ཟད་མཐར་མེ་འཆི། ཕན་ཚུན་མེད་ན་མི་འབྱུང་བའི་ལྟོས་ཆོས་རྟེན་འབྲེལ་ཡིན་དངོས་སུ་གསུང་ལས་ཐོས། ཞེས་དང་། པཎ་ཆེན་ནགས་རིན་པ་རྩེ་ཆེན་གྲུབ་ཆེན་ཀུན་བློ་ལས་སྦྱོར་དྲུག་གསན་ཀྱང་། ཕྱིས་དེའི་བརྒྱུད་པ་གསང་ནས་ཤ་བ་རིལ་བ་སྙེགས་ཚུལ། གསེར་མདོག་ཅན་འདི་སྔོན་རྒྱལ་བ་གཡུང་སྟོན་པའི་སྒྲུབ་གནས། དེ་ཡང་རྟ་དྲེའུ་ཁ་དོག་དཀར་པོ་དང་། དངུལ་བྲེ་ཆེན་གཅིག་བྱིན་པ་དེ་ཉོས་ནས་གང་ཕུག་ཏུ་སྒྲུབ་པ་མཛད་པས་ཉམས་རྟོགས་ཕུལ་བྱིན་འཁྲུངས། རིན་བཅལ་བ་དེ་རི་བར་དགོངས་ནས་ཟི་ལུང་ཞེས་བཏགས། ཕྱིས་རྗེ་དོན་ཡོད་དཔལ་བའི་དུས་ཀྱང་ཟི་ལུང་ཞེས་སྒྲོགས། པཎ་ཆེན་ཉིད་དགུང་ལོ་ཞེ་བཞི་ཡོས་ལོ་རྟ་པ་ཟླ་བའི་ཆོ་འཕྲུལ་གྱི་ཡར་ཚེས་ལ་ཕེབས་ནས་གསེར་མདོག་ཅན་ཞེས་བཏགས་པར་སྣང་། ༧ པཎ་ཆེན་ཉིད་ཀྱིས་ཐུགས་རྩོམ་རིགས་ལ་འཇུག་པའི་ཚེ། སྨན་ཐང་པས་བཞེངས་པའི་

---

^{[མ་དཔེ་གཟིགས་ན་འདིར་གནོན།]}

འཇམ་དཀར་གྱི་མདུན་མཆོད་པ་གསར་པ་རེ་བཤམས། རེ་ཞིག་དབུ་བཏུམས་ནས་ཐུགས་དམ་བཟླས་བརྗོད་ཀྱི་ཚུལ་རེ་དང་། དེ་ནས་ཤ་ཤ་དྷ་ར་དང་རི་བོང་འཛིན་པ་ལྟར་དཀར་སོགས་སྐད་གཉིས་སྤེལ་བའི་འཇམ་དཀར་གྱི་བསྟོད་པ་དེ་གསུངས་ནས་གསུང་རྩོམ་ལ་ཤར་གྱིས་འཇུག ༧ །ལྷ་སའི་ཇོ་བོ་རིན་པོ་ཆེའི་ཕྱག་ཏུ་ལྷུང་བཟེད་ཕུལ་བའི་རྟེན་འབྲེལ་ལས། རང་རེ་ཡོ་ཟས་ཕྱིར་ཐོས་བསམ་སྒོམ་གསུམ་ཡོ་རང་ཤོར་བ་འདི་བྱུང་བ་ཡིན་ནོ། །ཞེས་དང་། དགུང་ལོ་རེ་གཅིག་པའི་སྟེང་ཆོས་འཁོར་ཆེན་མོ་མཛད་པའི་སྔོན་ལ་བཀྲ་ཤིས་པའི་གསོ་སྦྱོང་གནང་། ༧ ངེད་ད་ལྟ་གཙང་ཕྱོགས་སུ་གྲས་གསར་འཛུགས་བཏབ་པ་འདི་ལ། མདོ་ཀུན་མཁྱེན་རོང་སྟོན་དང་། སྔགས་ངོར་པ་རྡོ་རྗེ་འཆང་རང་གི་གསུང་རྒྱུན་ཕྱག་བཞེས་མ་ཉམས་པ་རང་ཞིག་བྱེད་དགོས། ༧ པཎྜི་ཏ་ལོ་ཀོཏྟ་ར་སོགས་ཀྱི་ཕྱག་ན་སྤྱོད་འཇུག་རང་འགྲེལ་རྒྱ་དཔེ་གཟིགས་ཚུལ་སྣང་། ༧ རྒྱུན་དུ་ཌར་དྲིལ་ཀུན་རིང་གནང་བཀའ་ལས་ཀྱང་། ཌཱ་མ་རུ་འཁྲོལ་དུས་ན། མཁའ་འགྲོ་མ་ཚོ། མཁའ་འགྲོ་མ་ཚོ། དུར་ཁྲོད་གནས་སུ་ཨེ་འགྲོ་མི་འགྲོ། འགྲོ་ན་ད་འགྲོ་འགྲོ་ན་ད་འགྲོ་ཟེར་བ་ཞིག་དགོས་པས་ཡོང་གི་ཨེ་སྣང་གསུང་ཞིང་། བརྟགས་ན་སྒྲ་དེ་ཉིད་ཁོ་ནར་འབྱུང་ཟེར་རོ། ༨ །ལ་ལ་དག་ཆོས་རྗེ་བོ་དོང་པ་ཐམས་ཅད་མཁྱེན་པ་ཕྱོགས་ལས་རྣམ་རྒྱལ་ཀླུ་དཀར་རྒྱལ་གྱི་སྐྱེ་

---

^{[མ་དཔེ་གཟིགས་ན་འདིར་གནོན།]}

ཡིན་ནོ། །རྒྱུ་མཚན་དྲིས་པས་ཆོས་འཆད་དུས་མེ་ཏོག་གི་ཆར་བབས་པས་ཟེར། གློ་བོ་སྟེང་ཆེན་ན་བོ་དོང་པའི་རྣམ་ཐར་ཞིང་བཀོད་དུ་བྲིས་པ་ཐམས་ཅད་ཆུ་དྲོན་མོས་བཀྲུས་སོ། །ཨ་ཙ་མ་ཆོས་སྤོང་གི་ལས་ལ་ཞེ་རང་འཇིགས་སོ། ༧ །རྗེ་རོང་ཆེན་ཕར་ཕྱིན་གསུང་བ་ན། གང་བློ་མའི་རྗེས་སུ་ཉན་ཐོས་ཞི་འཚོ་ལ་སོགས་གསུང་། རྣམ་འགྲེལ་གསུང་བ་ན། ཕ་རོལ་ཀུན་ཏུ་རྒྱུ་བ་བྲམ་ཟེའི་བུ། །ཚུ་རོལ་བསྟན་པའི་པད་ཚལ་སོགས་འོངས་ནས། །ཡང་དག་རིག་པའི་ལྷ་ལམ་གསལ་པོར་གཟིགས། །སྡེ་བདུན་མཛད་པ་དེ་ལ་ཕྱག་འཚལ་ལོ། །ཞེས་དང་། དབུ་མ་གསུང་བ་ན། གང་ཞིག་གཉིས་མེད་ཡེ་ཤེས་གསུང་བའི་ཚོགས། །ཞེས་སོགས་གསུང་། མངོན་པ་གསུང་བ་ཡིན་ན། འཇིག་རྟེན་ཀུན་ལ་ཕན་ཕྱིར་ཐོགས་མེད་ཅེས་བྱ་བ། །སོགས་གསུང་། སྨར་སྟོན་རིན་རྒྱལ་བས་འདུལ་བ་གསུང་བ་ན་གང་བློ་མའི་རྗེས་ལ། ཟའདུལ་བ་རྒྱ་མཚོའི་གཏིང་མཐའ་ཕ་རོལ་བརྙེས་གྱུར་ཅིང་། སོགས་གསུང་། ༧ བླ་མའི་དུས་མཆོད་དེ་བཤད་ཉན་རང་གིས་འཛིན་དགོས། རྣམ་པ་ཐམས་ཅད་དུ་ཆོས་ཡོངས་སུ་བརྟགས་པས་སངས་རྒྱས་མཉེས་པ་དང་། ཟེར་བ་འདི་མ་བརྗེད་པར་གྱིས་ཤིག གཞི་གསུམ་གྱི་ལག་ལེན་འདི་མི་ལ་ཡོད་ན་སྨོན་རྒྱུ་དང་། རང་ལ་ཡོད་ན་ངོམ་རྒྱུ་ཡིན། སངས་རྒྱས་ཀྱི་བསྟན་པའི་རྩ་བ་རང་ཡིན་པས་མདོ་སུས་འདོན་

---

^{[མ་དཔེ་གཟིགས་ན་འདིར་གནོན།]}

ཀྱང་འོང་། གསོ་སྦྱོང་ལ་ཡོང་བ་མ་ཆགས་པའི་ཁུར་ལེན་གལ་ཆེའོ། ༧ །ཞྭ་ལུ་རི་ཕུག་སྒྲ་པ་གནས་བརྟན་ལེགས་རྒྱལ་བ་དང་མཇལ་བས། ས་སྐྱའི་གནས་དང་གང་ཟག་ལ་བསྟོད་པ། གོ་གོ་ཞེས་པ་དོན་། དགུར་འཇུག་པའི་དབང་དུ་བྱས་ནས། གླང་ཆེན་དཀར་པོས་བཏེགས་པའི་ཁྲི་སྟེང་དུ་ཞེས་སྐད་དོད་ནོར་ཚུལ་ཕེབས་པར་དེ་མ་ཐག །བ་མཆོག་དཀར་མོས་བརྒྱན་པའི་མཚོ་དབུས་སུ། ཞེས་བཅོས་ཚུལ་ཡོད། ༧ ཕར་ཕྱིན་དང་རྗེས་འབྲེལ་ཤོག་བུ་མདའ་ཚད་མ་ལྔ་བརྒྱ་ཅན་གྱི་པོད་ཆེན་བཅུ་གཉིས། མདོ་སྔགས་སྤེལ་པའི་དབུས་པ་གདོང་འདོན་པོད་གྲངས་བཞི། བསྟོད་ཚོགས་ཆབ་ཤོག་ལས་སྐྱ་གྲས་ཀྱི་པོད་གཉིས་སྟེ་ཁྱོན་པོད་གྲང་བཅོ་བརྒྱད་བཞུགས་སོ།། ༈ །།སློབ་དཔོན་རིན་པོ་ཆེའི་སྐུ་ཆས། ནང་དུ་མདུང་མའམ་གསང་གོས་དཀར་པོའམ། མཐིང་ག །དབྱིབས་རྡུལ་ལེན་ལྟ་བུ་དེ་སྟེང་ཕོད་ཁ་མཐིང་ནག་དང་། ལ་ལར་མཐིང་ཁྲ། དེ་སྟེང་ཆོས་གོས་དམར་པོ་ལེའུ་ལ་གསེར་གྱི་ཧཱ་སྟེ་མེ་ཏོག་གི་རི་མོ་ཡོད་པ། ལ་ལར་པ་ཏྲའང་གསུངས་ཏེ། སྤྱི་འདུས་ཀྱི་ཤོག་སེར་ལའང་རྩ་མཆན་གྱི་ཚུལ་དུ་གཉིས་ཡོད་སྐད། དེ་སྟེང་ཟ་འོག་ཅེས་གོས་ཆེན་ཁ་དོག་སྣ་ཚོགས་ལྷུག་འཐགས་བྱས་པའི་ཁྲི་སེར་མནབས་པའོ། །འོན་ཀྱང་གཏེར་གཞུང་རྣམས་སུ་འདྲ་མིན་ཅི་རིགས་འབྱུང་བས་མཐའ་གཅིག་ཏུ་བཟུང་དཀའ། །ཀླུ་སྨན་ཐམས་ཅད་ལ་སྲོ་

---

^{[མ་དཔེ་གཟིགས་ན་འདིར་གནོན།]}

མ་ལེགས་ཚུལ་སྟག་ཤམ་རྣམ་ཐར་དང་གཞན་དུའང་སྣང་མོད་གང་ཡིན་དཔྱད། ཨ ས་དང་། ན་རྩིས་ཞེས་འབར་བ་དང་། ཆེར་འབར་བ་ལ་འཇུག །ཕྱི་མ་ཚིག་ཕྲད་ཀྱིས་ཨ་ཕྱིས་པ་བཞེད། །མ་ཧཱ་སནྟི་ལ་ལར་མ་ཧཱ་ས་མ་དྷི་ཟུར་ཆག་པས་ཏིང་འཛིན་ཆེན་པོ་ཞེས་པར་བཞེད། ཡང་སྒྲུབ་ཀྱིས་དམ་པ་འཛིན་པ་ཆེན་པོ་དང་། ཡང་ན་མཉམ་པའི་བློ་ཆེན་པོར་བསྒྱུར། ཞི་ཁྲོའི་ས་ནི་དུག་གི་ཕ་སོགས་ཀྱི་དོན། གནས་སྐབས་ཀུན་ཏུ་འབྱུང་བ་ལྔ་ལ་རྟེན་དང་བརྟེན་པའི་ཚུལ་གྱིས་དུག་གསུམ་བསྐྱེད་པ་ལ་དགོངས། །ཐམས་ཅད་ས་ཡི་རང་བཞིན་སོགས་ཀྱི་དོན། རགས་པའི་འབྱུང་བ་དང་རྫས་འགལ་བ་གཉུག་སེམས་དང་ལྷན་ཅིག་པའི་འབྱུང་བཞི་ཡུལ་བཞིའི་ངོ་བོར་བཞུགས་པ་ལས་རང་ཤར་བའི་ཞིང་ཁམས་ལ་དགོངས། བཏགས་གྲོལ་རྒྱུན་དུ་འཆང་བ་ཙམ་ལ་འགལ་བ་མེད་འདྲ། ཇི་ལྟར་ཡང་དབུགས་ལ་ངེས་པར་སླེབས་དགོས་པ་རྒྱུད་སྡེའི་དགོངས་པ་ཡིན། མ་བསྒོམས་སངས་རྒྱས་ཆོས་ལྔའམ་དྲུག་གི་ངོས་འཛིན་འདྲ་མིན་མང་སྟེ། མཐོང་གྲོལ་སྐུ་ཚབ་དང་། ཙཀྲ། མེ་ལོང་སོགས་ལ་བརྟེན་པ་དང་། ལ་ལར་ཐོད་རྒལ་གྱི་ངོ་སྤྲོད་ཐོས་གྲོལ་བཏགས་གྲོལ་གྱི་གསང་སྔགས་བཀླག་པ་དང་། ཁྲེགས་ཆོད་ཀྱི་ངོ་སྤྲོད། རེག་གྲོལ་པདྨ་ཅན་ལ་སྦྱོར་བ་དང་། ལ་ལར་རྫས་ཀྱི་སྦྱོར་བའང་གསུང་། སྤྱིར་གྲོལ་བ་ཙམ་ལ་རྣམ་གྲངས་

---

^{[མ་དཔེ་གཟིགས་ན་འདིར་གནོན།]}

མང་ཞིང་། མི་འཁྲུགས་པའི་གཟུངས་སྔགས་མཐོང་གྲོལ་དང་། པདྨོཊྛིཏྟིའི་སྔགས་དུང་ལ་བཏབ་ནས་ཐོས་གྲོལ། དེ་ཉིད་ཀྱི་དུ་བས་བདུགས་པའི་ཆོས་གོས་ཀྱིས་རེག་གྲོལ། དབང་པོ་རབ་འབྲིང་གི་ཁྱད་ཡིན། །སོར་འབྲང་མའི་འཁོར་ལོས་བཏགས་གྲོལ། དོན་ཞགས་སོགས་ཀྱི་རིལ་བུ་བསྒྲུབས་པ་དང་། ལན་བདུན་པའི་མྱོང་གྲོལ་སོགས་གསར་མའི་རྒྱུད་དང་མན་ངག་ལས་རྒྱ་ཆེར་བཤད་པས་རྙིང་མ་གཅིག་པུར་དོགས་འཚང་མི་དགོས་ཤིང་། དེས་རྒྱུ་བྱས་ནས་སྐྱེ་བ་ཕྱི་མར་མྱོང་འགྱུར་ངན་སོང་གི་སྡུག་བསྔལ་ལས་གྲོལ་ནས། རིམ་གྱིས་མཐོ་རིས་ཀྱི་རྟེན་ལས་རྣམ་པར་གྲོལ་བའི་གོ་འཕང་ཐོབ་པ་ལ་དགོངས་པའི་ཕྱིར་རོ།། ༈ །བླ་མའི་རྣལ་འབྱོར་དང་། སྐྱབས་ཡུལ་སོགས་བདག་མདུན་གྱི་ཚུལ་དུ་བསྒོམ། རྡོར་སེམས་བདག་བསྐྱེད་རིགས་བདག་གི་ཚུལ་དུ་བསྒོམ། ༈ །།སེམས་འཁྲིད་ཀྱི་སྐོར་རྣམས་བླ་མའི་བྱིན་རླབས་ཀྱི་རིམ་པ་ལ་ལྟོས་ནས་རང་རྒྱུད་ལ་ཤུགས་འབྱུང་གི་ཚུལ་དུ་རིམ་གྱིས་སྐྱེ་བ་མ་གཏོགས། ཚིག་སྐམ་གྱི་བཤད་པ་མང་པོས་ཉམས་ལེན་ལ་བྱ་ཤོར་དུ་འགྲོ་བས་གཏན་ནས་མི་བྱེད་དོ། །འོན་ཏེ་དགེ་ཕྱོགས་ཀྱི་གནད་བཞིའི་དཔྱད་པས་ལྟ་བ་བཙལ་ཚུལ་སོགས་དབང་པོ་རྟུལ་པོ་དང་། ལས་དང་པོ་པའི་རིགས་ལ་བློ་སྦྱོང་བའི་ཐབས་དང་། བག་ཆགས་འཇོག་ཐབས་ལེགས་པར་བཞེད་ཅེས་སྣང་ངོ་།། ༈ །།ཀུ་རུ་ཀུལླེ་ཞེས་པའི་སྒྲ། །

---

^{[མ་དཔེ་གཟིགས་ན་འདིར་གནོན།]}

བཞི་ཌཱཀྲྀཧུ་བྱེད་པ་ལ་ཧི་དང་། ཀུ་ལ་ཚོགས་པ་ལ་གྷཉ་སྦྱར་མཐར་ཨཱི་པྲ་བྱིན་པས་གྲུབ་པ་དང་། བོད་སྐད་དུ་ཆགས་བྱེད་མར་འགྱུར་ཚུལ་སོགས་སྣང་ཡང་དཔྱད་བྱའི་གནས་དང་། རྡོ་རྗེ་སྙིང་འགྲེལ་དུ་ངེས་ཚིག་གི་བཤད་པ་ཡོད་པ་ལྟར་ལེགས། ༈ །མཐོང་སྤོང་ནི་མཐོང་བའི་ལམ་གྱི་སྤང་བྱའི་ངོ་སྐལ་དུ་གྱུར་པ་སྟེ། ཉོན་མོངས་མངོན་གྱུར། བསྒོམ་སྤང་ནི་དེ་ཉིད་ཀྱིས་སྤང་བྱ་བག་ཉལ་རྣམས་སོ། །བྱང་ཕྱོགས་སོ་བདུན་འཁྲིད་རིམ་དང་སྦྱར་ན། དལ་འབྱོར་རྙེད་དཀའ། འཆི་བ་མི་རྟག་པ། འཁོར་བའི་ཉེས་དམིགས་རྣམས་ཚོགས་ལམ་ཆུང་ངུ་། ལས་རྒྱུ་འབྲས་བསྟན་པ་ཚོགས་ལམ་འབྲིང་པོ། །སྐྱབས་སེམས་སྔ སྒྲོན་དུ་འགྲོ་བས་ལྷ་དང་མི་ཡི་སེམས་འཛིན་སོགས་ཚོགས་ལམ་ཆེན་པོ། ཕར་ཕྱིན་དྲུག་གི་ཉམས་ལེན་རྒྱས་པར་བཤད་པ་སྦྱོར་ལམ་དྲོད་རྩེ། ཁྱད་པར་ཕར་ཕྱིན་ཐ་མ་གཉིས་ལ་སྙིང་པོར་དྲིལ་བ་བཟོད་ཆོས། ཐ་མའི་དངོས་འབྲས་བདེན་པ་མཐོང་བ་མཐོང་ལམ་དེའི་རྒྱུན་གོམས་པར་བྱེད་ཅིང་རང་གཞན་གཉིས་ཀའི་དོན་སྤྱོད་པ་སྒོམ་ལམ། དེའི་དངོས་འབྲས་མི་སློབ་པའི་ལམ་མོ། །སྔགས་དང་སྦྱར་ན། རྡོ་རྗེ་ཐེག་པའི་ཉམས་ལེན་ཐམས་ཅད་ཕར་ཕྱིན་དྲུག་ཏུ་བསྡུ་བའི་ཚུལ་གྱིས་སོ། །དེ་ལྟར་ནའང་བྱ་སྤྱོད་གཉིས་ཀྱི་ཉམས་ལེན་ནི། རྒྱུ་དང་འབྲས་བུའི་རྣལ་འབྱོར་ལམ་དུ་བྱེད་པ་སྟེ། རྒྱུ་ཚོགས་གཉིས་བསགས་པ་སྔོན་དུ་འགྲོ་

---

^{[མ་དཔེ་གཟིགས་ན་འདིར་གནོན།]}

བས། འབྲས་བུ་མདུན་ནམ་རང་ལྷར་བསལ་བ་གཟུགས་སྐུ་དང་། མཐར་བྱས་ཡེ་ཤེས་པ་གཤེགས་བསྡུ་སོགས་ཆོས་སྐུའོ། །རྣལ་འབྱོར་རྒྱུད་ཀྱི་ཉམས་ལེན་ནི། ལར་ཐར་པའི་འདྲ་འབགས་རྫོགས་པའི་སངས་རྒྱས་དང་པོར་ཐུགས་བསྐྱེད་པ་ནས་མཐར་གྱིས་ལོངས་སྤྱོད་རྫོགས་པ་དང་སྤྲུལ་པའི་སྐུའི་སངས་རྒྱས་མཛད་པ་དང་བཅས་པར་རྗེས་སུ་མཐུན་པའོ། །བླ་མེད་ནི་མར་འཁོར་བའི་འདྲ་འབགས་ལམ་དུ་བྱེད་པས་གནས་བསྒྱུར་བའི་ཚུལ་གྱིས་བསྒོམ་པ་སྟེ། སྐྱེ་བ་སྔ་མའི་འཆི་ཁའི་འོད་གསལ་ནས། ད་ལྟའི་འཆི་བའི་འོད་གསལ་གྱི་བར་མངོན་རྟོགས་གཅིག་གིས་སྦྱངས་ཤིང་སྒྱུར་བར་བྱེད་པའོ། །གནད་དེ་རྣམས་ལ་ལེགས་པར་དཔྱད་པས་ཟབ་པ་དང་། མི་ཟབ་པའི་ཚུལ་ཀྱང་ཤེས་པར་སླའོ།། ༈ །།ལྟ་བ་ནི། །གནས་སྐབས་ཁས་བླངས་པའི་དབང་དུ་བྱས་ན། དབུ་མ་ཐལ་འགྱུར་བ་ཁོ་ན་དང་མཐུན་པར་སྨྲ་སྟེ། དེ་ལ་ནི་སྐྱོན་གྱི་གཞི་མ་གྲུབ་པའི་ཕྱིར་རོ། །མཐར་ཐུག་མཉམ་པར་བཞག་པའང་དེ་ཉིད་ཀྱི་ཁས་ལེན་དང་བྲལ་བར་གཅིག་ཏུ་འབབ་ས་མོད། འོན་ཏེ་གྲུབ་མཐའི་མིང་འདོགས་པས་ཅི་ཡང་བྱར་མེད་དོ། །གནད་འདི་ཤེས་ན་དགག་སྒྲུབ་མང་པོ་སྲང་མདོའི་ཁྱི་འཛིང་དང་འདྲ་བས་ཐུགས་བདེ་འབོལ་གྱིས་བཞུགས་ཤིག །ད་དུང་ཡིད་མ་ཆེས་ན་ཤེར་ཕྱིན་སྟོང་ཕྲག་བརྒྱ་པ་ལ་དྲིས་ཤིག །དེས་ཀྱང་ཡིད་མ་ཆེས་ན་ཐེག་པ་

---

^{[མ་དཔེ་གཟིགས་ན་འདིར་གནོན།]}

ཆེན་པོའི་ནང་ནས་བཞེངས་ཤིག། ༈ །།རྡོར་ཕྲེང་སོགས་ཀྱིས་སྐབས། མ་ཧ་རཱཀྟ་སོགས་བོད་སྐད་དུ་བསྒྱུར་ན། དགའ་བ་ཆེན་པོ་ཤིན་ཏུ་བརྟན། །ཤིན་ཏུ་དགྱེས་དང་ཤིན་ཏུ་བདེ། །རྡོ་རྗེ་སེམས་དཔའ་དེ་རིང་ནི། །གྲུབ་པར་མཛོད་ཅིག་བདག་ལའོ། །ཞེས་ས་བཟང་མ་ཏི་པཎ་ཆེན་གྱི་འགྱུར་རོ།། ༈ །།མཁའ་སྤྱོད་མའི་ཁྲིད་ཀྱི་སྐབས་གཉིས་སྐྱེས་མཆོག་གཉིས་ནི། རཏྣ་རཀཱི་ཏ་དང་། མ་ན་ཀ་ཤཱི། གཉིས་བྲལ་འཆད་དུས་ཞལ་ཤེས་གསུམ་ཞེས་པ། བསྐྱེད་རྫོགས་གཉིས་ཟུང་འབྲེལ་དུ་འཆད་སྐབས། བསྐྱེད་རིམ་ལ་བླ་མ་བསྐྱེད་བསྟིམ། རྫོགས་རིམ་བསམ་མི་ཁྱབ་ཐུན་མིན་བཅས་གསུམ་མོ། །གཉིས་བྲལ་ཆིག་བརྒྱུད་ཀྱི་དོན་དུ་འདོད་པ་དང་། དབུ་མར་ངོས་འཛིན་པ་སོགས་སྣང་ངོ་།། ༈ །།རྒྱུན་གྱི་ཉམས་ལེན་གྱི་སྙིང་པོ་ནི། ལྷ་སྐུ་སྣང་སྟོང་དབྱེར་མེད་དང་རང་རིག་པ་མ་བཅོས་པ་མཉམ་ཁད་ཀྱིས་འདྲེས་པའི་ངང་ལས་སྔགས་ཡིད་བཟླས་བྱ་བ་ཁོ་ནའོ།། ༈ །།ཁ་ཅིག་རྙིང་མའི་སྔགས་ལ་བོད་སྐད་མང་དུ་འདྲེས་པ་སོགས་ཀྱིས་བྱིན་རླབས་གཡེལ་བར་སེམས་པ་དག་སྣང་མོད། དེ་ནི་བློ་གྲོས་ཕུར་ཁུང་ཐུག་པ་སྟེ། གྲུབ་པའི་སློབ་དཔོན་པདྨ་སཾ་བྷ་བ་ལ་སོགས་པ་སྔགས་འབྲས་བྱིན་གྱིས་རློབ་པའི་མཐུ་དང་ལྡན་པ་རྣམས་ཀྱིས་དེ་ལྟར་བྱིན་གྱིས་བརླབས་པས་ན་འགལ་བ་ཅུང་ཟད་ཙམ་ཡང་མེད་དོ། །དེ་ཡང་མི་འདོད་ན།

---

^{[མ་དཔེ་གཟིགས་ན་འདིར་གནོན།]}

གསར་པའི་རྒྱུད་སྡེའི་སྔགས་རྣམས་ལས་ཀྱང་དེ་བཞིན་གཤེགས་པའི་བརྡ་དང་། མཁའ་འགྲོའི་སྐད་དང་། ཟུར་ཆག་དང་། འགྲོ་ལྡིང་པའི་སྐད་ལ་སོགས་པ་ཇི་སྙེད་ཅིག་འབྱུང་བས་ན་ལེགས་སྦྱར་ཁོ་ནས་མ་ཁྱབ་ཅིང་། ཟུར་ཆག་ལ་སོགས་པ་འདྲེས་པས་བྱིན་རླབས་མི་ཉམས་པ་དང་། བོད་ཡུལ་ཁོ་ནའི་སྐད་ཀྱིས་དེ་ལས་ལྡོག་པའི་རྒྱུ་མཚན་ཅི་ཡང་མེད་པའི་ཕྱིར་རོ།། ༈ །།ལ་ལ་དག་ལམ་འབྲས་དང་། རྫོགས་ཆེན་གྱི་གཞུང་ཁ་ཅིག་སོགས་ལས་སྣང་བ་སེམས་སུ་གསུངས་པས་སེམས་ཙམ་བར་འདོད་མོད། དེ་ནི་མ་ཡིན་ཏེ། འོག་མ་དག་རིམ་གྱིས་བློ་དྲང་བའི་ཕྱིར་དུ་གསུངས་པས་ཐབས་ལ་མཁས་པ་ཁོ་ནའི་ཁྱད་པར་གྱི་ཆོས་སྟེ། གཞན་དུ་ན་གདུལ་བྱ་ལ་དབང་པོ་མཆོག་དམན་ལ་སོགས་པའི་དབྱེ་བ་བསམ་གྱིས་མི་ཁྱབ་པ་ཡོད་པའི་ཕྱིར་ཐམས་ཅད་ལམ་གཅིག་གིས་བཀྲི་མི་ཤེས་པར་འགྱུར་བའི་ཕྱིར་རོ། །རང་རང་གི་བཞེད་པ་དངོས་ནི་སེམས་ཙམ་པར་ནམ་དུའང་གནས་མི་སྲིད་དེ། དགོངས་པ་མཐར་ཐུག་པ་བརྗོད་བྲལ་དང་། བློ་འདས་ཀྱི་གནད་ལ་ཐུག་པའི་ཕྱིར་དབུ་མ་ཐལ་འགྱུར་བའི་དེ་ཁོ་ན་ཉིད་དང་ཚིག་ཙམ་མ་ཡིན་པར་མཐུན་ཏེ། སློབ་དཔོན་ཀླུས། ང་ལ་ཁས་ལེན་མེད་པས་ན། ང་ནི་སྐྱོན་མེད་ཁོ་ན་ཡིན། །ཞེས་གསུངས་པའི་ཁས་ལེན་མེད་པ་དང་བརྗོད་བྲལ་གཉིས་དོན་གཅིག་ཅིང་། དེ་ཡི་ངོ་བོ་བློ་འདས་ཡིན་པའི་ཕྱིར་རོ། །

---

^{[མ་དཔེ་གཟིགས་ན་འདིར་གནོན།]}

རྫོགས་ཆེན་གྱི་གཞུང་ཆེན་པོ་དག་ལས། སྣང་བ་སེམས་སུ་འདོད་པ་ང་ལས་གོལ་བ་ཡིན། །ཞེས་སོགས་གསུངས་པ་ནི་མཐར་ཐུག་གི་དོན་ལ་དགོངས་ཀྱི། གནས་སྐབས་ལམ་སྟེགས་ཙམ་དུ་ཁས་བླངས་ལ་འགལ་བ་མེད་པའང་ཤེས་དགོས་སོ།། ༈ །།ཐང་སྟོང་གི་རྒྱལ་པོ་ལུང་སྟོང་གི་སྨྱོན་པ་ཞེས་གྲུབ་ཐོབ་རང་གི་གསུངས་ཟུར་ལ་དཔགས་ན། ཐང་གི་སྐད་དོད། སྦྲ་ནི་འོས་འདུག །བོན་ལ་དངོས་གནས་སུའང་འཇིག་རྟེན་པ་དང་། མྱང་འདས་ཀྱི་ཐེག་པར་ཁྱད་ཆེ་བར་མ་ཟད། ཕྱི་ནང་གི་ཁྱད་འབྱེད་གྲགས་ཆེ་བའི། ཕྱི་པའི་དབང་དུ་བྱས་ན། ཏཱིནྡྲ་ཀ །ནང་པའི་དབང་དུ་བྱས་ན་དྷརྨ་ཞེས་འཇོག་འོས་སྨོན་རྒྱལ་ཀུན་གྲོལ་ནས་ཀྱང་རྣམ་བཤད་རིག་པའི་ལུང་དོན་དང་སྦྱར་སྣང་ཞུ། གྱད་ཀྱི་ཁམ་ཟས་ཞེས་པ་ཧབ་ཆེར་རོལ་པའི་དོན་ཡིན་ཕྱིར་སྐབས་དེར་ཐབས་ཤེས་བཟའ་བཏུང་མཆེད་ལྕམ་གྱིས་རོལ་པའི་དོན་འདུག །གཏེར་ཚག་ལ་སྟག་ཤམ་རྡོ་རྗེའི་དག་སྣང་དུ། ཐིག་ལེ་ཐབས་ཤེས་གཉིས་དང་ཟླ་ཚེས་དབྱེར་མེད་ཟུང་འཇུག་གི་མཚོན་དོན་ཡིན་གསུངས་འདུག་པས་འདི་སྒོར་ནས། ༔ འདི་བཞིན་དག་པར་བརྩི་འདུག །སྨིན་གླིང་པར་མར། འདི་བཞིན་སྣང་བ་དགོངས་པ་མཁའ་ལྟར་མཐའ་གཅིག་ཏུ་ཁ་ཚོན་ཆོད་པ་མེད་དམ་སྙམ།། ༈ །།ཤ་ལྔ་ལ་འཆད་ཚུལ་མི་འདྲ་བ་མང་དུ་ཡོད་པའི་རྒྱུ་མཚན། དུས་འཁོར་རྒྱུད་

---

^{[མ་དཔེ་གཟིགས་ན་འདིར་གནོན།]}

འགྲེལ་དུ། ཡུལ་གང་ན་ཟ་བ་པོ་ཡོད་ན་གསོད་པ་པོ་ཡོད་པས། བ་ལང་གི་ཤ་ཟ་བའི་ཡུལ་དུ་བ་ལང་གི་ཤ་ནི་ཁ་ན་མ་ཐོ་བའི་ཤར་གསུངས་པ་དང་མཐུན། སྔ་འགྱུར་གྱི་གཞུང་འགའ་ཞིག་ཏུ། བོད་ཡུལ་གྱི་དབང་དུ་བྱས་ཏེ། བ་ལང་གི་ཚབ་ཏུ་རྨ་བྱ་དང་། ཁྱི་ཤའི་ཚབ་ཏུ་སེང་གེའི་ཤ་བཞག་པ་སོགས་སྣང་ངོ་།། ༈ །།ཨཱ་ར་ལི་ཞེས་པ་ཐད་འགྱུར་རོལ་པ་དང་། བརྡ་སྐད་ལྟར་ན། ཨ་ནི་ཨ་བ་དྷ་ཏི་སྟེ་དབུ་མ། ར་ནི་རཱ་ས་ན་སྟེ་རོ་མ། ལ་ནི་ལ་ལན་སྟེ་རྐྱང་མ་སྟེ། དབུ་རྐྱང་རོ་གསུམ་གྱི་བརྡས་བསྟན་པའི་མཁའ་སྤྱོད་ས་སྤྱོད་ས་འོག་སྤྱོད་དེ་གནས་གསུམ་གྱི་དཔའ་བོ་དང་མཁའ་འགྲོ་མ་རྣམས་འབོད་པའི་དོན་དུ་སྦྱར་བའོ།། ༈ །།ཙི་པ་ཊ་ནི་མི་སྣ་ལེབ་ཅན་གྱི་མིང་སྟེ། སྲོག་ཆགས་ཟུར་པ་མིན་ནོ།། ༈ །།ཏི་ར་ཞེས་པ། ཏི་རས་སྟེ་དུད་འགྲོ་ལ་འཇུག །སྔ་འགྱུར་རྣམས་སུ་མི་ལ་འཇུག་པར་མཛད་པ་ནི། མ་ཧཱ་ཏི་རས་ཕྱུགས་ཆེན་པོ་ཞེས་མི་ལ་འཇུག་པའི་དབང་དུ་བྱས་པ་སྟེ། རབ་ཞེས་བཤེས་གཉེན་གྱིས་མཛད་པའི་མཉམ་སྦྱོར་གྱི་འགྲེལ་པ་ལས། དཔལ་ཧེ་རུ་ཀའི་གཏོར་མ་ཆོ་ག་ལ་ཕྱུགས་ཆེན་པོ་ཞེས་གསུངས་པའང་བག་ཟན་ལས་བཅོས་པའི་མིའི་གཟུགས་བརྙན་ཡིན་པར་ཤེས་དགོས་སོ།། ༈ །།ཌོ་མི་ནི་ལ། རྙིང་མའི་གཞུང་རྣམས་སུ་སྨྲ་ཤ་ནི་ཞེས་གསུངས་པ་ནི། ཟླ་ཤཱ་ནཱི་ཟུར་ཆག་པ་རིགས་ངན་གྱི་བུ་མོ་རོ་སྲེག་མཁན་

---

^{[མ་དཔེ་གཟིགས་ན་འདིར་གནོན།]}

གྱི་མིང་ངོ་།། ༈ །།དབང་ཕྱུག་ཉེར་བརྒྱད་ཀྱི་མིང་། མ་ནུ་རཀྟ། མིའི་སྲིན་མོ། བྲཧྨ་ཎི། ཚངས་མ། རོ་ཏི། དྲག་མོ། ཀུ་མཱ་རཱི། གཞོན་ནུ་མ། ཨིན་ཎཱི། དབང་མོ། ཡང་། ཨིནྡྲ་སྟེ་རྒྱུ་ཞགས་འཛིན་མར་ཡང་བཤད། བཛྲ་པིངྒ་ལཱི། རྡོ་རྗེ་སེར་མོ། ཨ་མྲྀ་ཏཾ། སྤྱིར་དོན་མང་ཡང་། བདུད་རྩི་མར་བསྒྱུར། སོ་མྱ། ཞི་བ་མའམ། ཟླ་བ་མ། དཎྜ་དེ། དོན་མང་ནའང་། སྔར་བེ་ཅོན་མར་བསྒྱུར། རཀཱ་སཱི། སྲིན་མོ། བྷཀྵ་སཱི། ཟ་བ་མ། ར་ཏི་བཛྲ། དགའ་བ་མར་བསྒྱུར། དོན་དུ་དགའ་བའི་རྡོ་རྗེ་ཞེས་སོ། །རུ་དྷི་ར་མཱཏྟ། ཁྲག་འཐུང་། ཨེ་ཀ་ཙ་རི་ཎཱི། གཅིག་སྤྱོད་མར་བསྒྱུར་མོད། །ཨེ་ཀ་གཙོ་བོ་སོགས་ལའང་འཇུག །མ་ནོ་ཧ་ར། ཡིད་འཕྲོག་སྟེ། འདོད་པ་མར་བསྒྱུར་བ་དོན་འགྱུར། སིདྡྷི་ཀཾ །གྲུབ་པ་མོར་བསྒྱུར་དགོས་པར་སྣང་ནའང་། ནོར་སྲུང་ཞེས་བསྒྱུར་སྣང་། བཱ་ཡ་བེ། རླུང་ལྷ་མོ། མ་ཧཱ་མ་ར་ཎ་བཛྲ། རྡོ་རྗེ་གསོད་བྱེད་ཆེན་མོ། ཨགྣི། མེ་མོ་སྟེ། མི་མོ་ཞེས་པ་ནི་མ་དག་པའོ། །སྐྱིན་ཞེས་པ་སྐྱིན་གཡག་དང་། གཙོང་པར་འདོད། གསལ་ཞིང་ཞེས་པ་མེ་སྒྲོན་ནོ། །བ་ར་ཧཱི། ཕག་མོ། གླུ ཙ་མུཎྜི། རྒན་བྱེད་མ་སྟེ། དགའ་བྱེད་ཅེས་པ་ནི་ཡིག་ནོར། དེ་ཡང་ཙ་མུནྟཱིར་སྔ་རབས་པ་རྣམས་ཀྱིས་རྒན་རབ་བྱེད་དུ་བསྒྱུར། དོན་ལ་བལ་ཡུལ་སོགས་གསོན་འདྲེ་མོ་མཐུ་ཆེན་ལྟ་བུའི་མིང་ཡིན། སུ་ར་ནཱི།

---

^{[མ་དཔེ་གཟིགས་ན་འདིར་གནོན།]}

སྔར་སྣ་ཆེན་དུ་བསྒྱུར། ཝ་རུ་ཎཱི། ཆུ་ལྷ་མོ། བཛྲ་མ་ཧཱ་ཀ་ལཱི། རྡོ་རྗེ་ནག་མོ་ཆེན་མོ། བཛྲ་ཙཱ་ཀ་ལ། རྡོ་རྗེ་ར་མོ་ཆེན་མོར་བསྒྱུར་མོད། དེ་ལྟར་ན། ཚ་ག་ལ་ཀཱ། ཞེས་ཡོད་དགོས་ལ་ལར། ད་ཤ་གྲི་ཝཱ། སྟེ་མགྲིན་བཅུ་སེར་ནག་ཅེས་པའང་སྣང་། བཛྲ་ཀུནྡྲ་ཀརྞ། རྡོ་རྗེ་བུམ་རྣ་ཞེས་པ་སྟེ། བུམ་སྣ་ཞེས་བྲིས་པ་ནི་ཡི་གེ་མ་དག་པའོ། །བཛྲ་ལསྤྲོ་ད་ར། ཨུ་དཱ་ར་མཚམས་སྦྱར། གསུས་འཛིན་དུ་བསྒྱུར་མོད། དེ་ལྟ་ན། ལམྦྷ་དྷཱ་ར་ཞེས་ཡོད་དགོས། སྔ་མ་ལྟར་ན། རྡོ་རྗེ་གསུས་འཕྱོང་ངོ་། །འོན་ཀྱང་གཏེར་གཞུང་རྣམས་སུ་ཟུར་ཆག་ཤས་ཆེ་བས་དེ་ལྟར་ལས་ལེགས་སྦྱར་གྱི་རྒྱས་བཀབ་པའི་ཞུ་དག་གི་དལ་བས་བྱིན་རླབས་ཉམས་པར་འགྱུར་བས་མི་བྱའོ། །བྷྱོ༔ཞེས་པ་ནི། དཔལ་མཆོག་རྡོ་རྗེ་རིགས་ཀྱི་ཟློག་པ་ལས། དེ་ནས་མ་མོ་རྣམས་ཀྱི་བཅོམ་ལྡན་འདས་ལ་ཕྱག་འཚལ་ཏེ། དང་པོ་ནས་མགྲིན་གཅིག་ཏུ་ཐམས་ཅད་འགུགས་པ་དང་། གཞུག་པ་དང་། བསད་པ་དང་། བསྒྲུབ་པའི་དམ་ཚིག་ཅེས་བྱ་བ་རང་གི་དེ་ཁོ་ན་ཉིད་ཀྱི་སྙིང་པོ་འདི་ཕུལ་ལོ། །བྷྱོ༔ དེ་ནས་འདིའི་དཀྱིལ་འཁོར་བཤད་པར་བྱ་སྟེ། ཞེས་སོ། །དེས་ན་སྤྱན་འདྲེན་སོགས་ཚིག་གི་མགོར་བྱུང་བའི་ཚེ་བསྒྲུབ་པའི་དམ་ཚིག་སྟེ་བོད་པ་དང་བསྐུལ་བའི་དོན་ལ་འཇུག་ཅིང་། སྙིང་ལ་བྷོ། ཞེས་པ་ལྟ་བུ་བསད་པའི་དོན་ཅན་ཏེ། གསུང་དོན་ལ་དཔག་ན་ཉི་བྷ་འཇིགས་ལའོ། །

---

^{[མ་དཔེ་གཟིགས་ན་འདིར་གནོན།]}

ཞེས་པ་ལས་བསྒྲུབས་ཀྱང་རུང་མོད། འོན་ཀྱང་རྐྱེན་སོགས་འོལ་ཚོད་ཀྱིས་བཤད་དུ་མི་བཏུབ་བོ། །ཏིཥྛ་ལྷན་ནི་ཏིཥྛན། བརྟན་པར་གྱུར་ཅིག་ཅེས་ལའི་སྐད་དོད་ཟུར་ཆག་པ་དང་། ཨ་ཏི་པུ་ཧོ་། ནི། ཨ་ཏི་བྷ་ཧོ། །ངོ་མཚར་བྱུང་། ཞེས་པ་ཟུར་ཆག་པར་གསལ་ལོ། །ཏན་གྷན་ཞེས་པ། ཏ་ན། བུད་མེད་ཀྱི་ནུ་མ་དང་། གྷ་ན་མཁྲེག་བ་སྟེ། ནུ་མ་མཁྲེགས་པའི་ཚོགས་ཞེས་ན་ཆུང་གཞོན་ནུའི་མིང་ཟུར་ཆག་པའོ།། ༈ །།རཀྟ་ཚར་གསུམ་ནི། དྭངས་མ་ཡེ་ཤེས་ཀྱི་བདུད་རྩི། ཁུ་བ་ཞིང་བཅུའི་ཁྲག་རྩིག་མ་ཞིང་བཅུའི་དུག་གསུམ་ངོ་བོ་ཤ་ཁྲག་རུས་པའི་དངོས་པོ་སྟེ་ཆ་གསུམ་མོ། །ཁཱ་རམ་ནི། ཁཱ་ཏྲི་ཟ་བ་ལ། ཡང་ཡང་ལ་ཎམ་འོས་ཎམ་རྐྱེན་སྦྱར་བའི། ཁཱ་དམ། ཟུར་ཆག་པ། ཡང་ཡང་ཟོ། ཁཱ་ཧི། ཟོ་ཞིག་པའོ། །དཔལ་དང་དུར་ཁྲོད་ཀྱི་ཆས་བརྒྱད་འདི་ལ་འདྲ་མིན་ཤིན་ཏུ་མང་བས་སྐབས་ཐོབ་བརྩི་བ་གལ་ཆེ། ༈ །འཇམ་དཔལ་རྩ་རྒྱུད་ལས། །ཟུར་ཆག་ལེགས་སྦྱར་སྒྲ་ཉམས་ཀྱང་། །དོན་ནི་རབ་ཏུ་བརྟགས་པ་ཡིན། །མི་གསལ་གསལ་བ་མེད་པ་དང་། །ཡི་གེ་ཉམས་ཀྱང་འདོད་པ་ཡིན། །འགྲོ་བ་ཡུལ་ལྟུ དང་རྣམ་བྲལ་བ། །དེ་ལ་སྔགས་ནི་གྲུབ་པར་མཛད། །ཅེས་དང་། དྲི་མེད་འོད་ལས་ཀྱང་དེ་ཁོ་ན་ལྟར་གསུངས་པས་ཟུར་ཆག་སོགས་ལས་སྔར་འབྲས་མི་བསླུ་བར་གྲུབ་བོ། །དྲ་བྱ་ཞེས་པ་གསེར་སོགས་

---

^{[མ་དཔེ་གཟིགས་ན་འདིར་གནོན།]}

དབྱིག་གི་ཚོགས་རིན་ཐང་ཆེན་པོར་འཇུག །གྷ་ན་ཞེས་པ་སྟུག་པོ་སྟེ་བར་མཚམས་མེད་པའི་དོན། རྟ་བྲོ་ནི། སྔོན་རྟ་ཕག་གིས་རུ་ཏྲ་བཏུལ་བའི་ཚེ། རུ་ཏྲའི་ཕུང་པོའི་སྟེང་དུ་ཞབས་ཀྱི་མཐིལ་ནས་རྟའི་རྨིག་པ་ཕྱུངས་ནས་རྔམས་པའི་བྲོ་བརྡུངས་པ་ཡིན་པས་དེའི་ཚུལ་ལོ། །དཔལ་རྟ་མགྲིན་གྱི་རྟ་བྲོའི་བསྐྱེད་རྫོགས་ངོ་མཚར་ཅན་ཞིག་པད་དཀར་བཀའ་འབུམ་དུ་ཡོད། རྟ་བྲོའི་གླུའི་དོན་རཏ་གླིང་ཐུགས་སྒྲུབ་འགྲེལ་པར་ཡང་བཞུགས། འོན་ཀྱང་འདི་ལ་ངེས་དོན་གྱི་བཤད་པ་རྒྱ་ཆེར་ཡོད། ༈ །ཐོད་ཕྲེང་རྩལ་གྱི་དོན། བཛྲ་ནི་རྡོ་རྗེ་སྟེ་སྟོང་པ་ཉིད་ཀྱི་ཡེ་ཤེས། གུ་རུ་ནི་གུ་རྒྱ་གསང་བ་སྟེ་བདེ་བ་ཆེན་པོའི་ཡེ་ཤེས། རུ་ཀ་རུ་ཎ་ཐུགས་རྗེ་ཆེན་པོ་སྟེ། ཚིག་གསལ་དུ་བྱས་ན། བདེ་ཆེན་སྟོང་པ་ཉིད་ཀྱི་ཡེ་ཤེས་སྙིང་རྗེ་ཆེན་པོ། ཞེས་པའོ། །པདྨ་ནི་ཤེས་རབ་སྟོང་པ་ཉིད། ཐོད་ཕྲེང་རྩལ་ཞེས་པ། ཀ་པཱ་ལ་ཨཀྵ་བེ་ག་ཞེས་པ་སྟེ། ཀ་བདེ་བ། པཱ་ལ་སྐྱོང་བ། ཨཀྟ་མི་འགྱུར་བ་སྟེ། འཆི་མེད་ཕྲེང་བ་ལས། ཨོ་བདག་འཕོ་མེད་ཨཀྵ་ར། ཡི་གེ་བར་པ་ཨཀྵ་ར། པེ་ག །ཤུགས་སམ་རྩལ་ཚིག་གསལ་དུ་བྱས་ན། སྟོང་པ་ཉིད་བདེ་སྐྱོང་མི་འགྱུར་བའི་ཤུགས། ཞེས་པའོ། །དེ་ལྟར་ན་ལམ་རྫོགས་པའི་རིམ་པ་ཐམས་ཅད་ཀྱི་རྩ་ཚིག་དང་། འབྲས་བུ་བདེ་བ་ཆེན་པོའི་ཡེ་ཤེས་རོལ་པའི་དཀྱིལ་འཁོར་ཐམས་ཅད་གསལ་བར་བསྟན་པ་ངེས་དོན་གྱི་

---

^{[མ་དཔེ་གཟིགས་ན་འདིར་གནོན།]}

བཤད་པའོ། །དལ་ཞེས་པ་བསྡུ་ཡིག་གི་བརྡ་མ་བྱེད་པར་གསུངས་མོད། དཀྱིལ་འཁོར་གྱི་སྐད་དོད། མཎྜལ་ཟུར་ཆག་པ་སྟེ། དཀྱིལ་འཁོར་གྱི་དོན་དུ་གོ་བ་ཉིད་ཀྱིས་ཆོག་གོ །མདུན་བསྐྱེད་སྒྲུབ་ཚུལ་ལ། བདག་མདུན་གཉིས་ཆོ་ག་སོ་སོས་མི་འདྲ་བར་བསྒྲུབ་པ་དང་། ཆོ་ག་གཅིག་གིས་བདག་མདུན་སོ་སོར་མེ་ལོང་བྱད་བཞིན་ལྟར་གཅིག་གྲུབ་པ་དང་མཉམ་དུ་གཅིག་ཤོས་གསལ་འདེབས་པ་མེ་རི་འདབས་འབྱོར་གྱི་ལུགས་དང་། བདག་མདུན་དབྱེར་མེད་དུ་བསྒྲུབས་ཏེ་བསྙེན་པའི་སྐབས་ཕཊ་ཛས་འཛབ་ཕྱེ་ཞེས་བདག་མདུན་སོ་སོར་ཕྱེ་བ་དང་བསྒྲུབ་ཚུལ་དེ་ལྟ་བུ་ལ་དཀྱིལ་འཁོར་བདག་རྫོགས་དང་མདུན་དུ་དམ་ཚིག་པ་བསྐྱེད་ཟིན་ནས་བདག་མདུན་བསྲེ་བའི་ཞུགས་སྒྲུབ་སོགས་ཀྱི་རྣམ་བཞག་མང་ངོ་།། ༈ །།གཏེར་གཞུང་ལ་ལར། ཚིག་སྦྱོར་མི་མཛེས་པ་དང་། སྡེབ་སྦྱོར་ཆད་ལྷག་དང་། རྐང་པ་མི་འགྲིགས་པ་སོགས་སྣ་ཚོགས་སྣང་བ་ནི་དེ་དང་དེ་ལ་མཆོག་ཏུ་རློམས་པའི་མངོན་པའི་ང་རྒྱལ་ཅན་རྣམས་གཞོམ་པར་བྱ་བའི་ཆེད་དུ་སྟེ། དུས་འཁོར་འགྲེལ་ཆེན་དུ་གསུངས་པས་མཚོན་ནོ། །ཡང་དོན་འགལ་བ་ལྟར་སྣང་བ་ནི་མཐའ་དྲུག་དང་ཚུལ་བཞིས་རྒྱས་བཏབ་པས་གོ་བ་གཞན་དུ་ལེན་དགོས་པ་ཤ་སྟག་སྟེ། རྣམ་ཤེས་མནར་མེད་གནས་སུ་མཱ་ར་ཡ། ཞེས་པ། མནར་བ་ནི་སྡུག་བསྔལ་དང་། དེ་མེད་པ་ནི་ཐར་

---

^{[མ་དཔེ་གཟིགས་ན་འདིར་གནོན།]}

པའི་གོ་འཕང་སྟེ། དེར་དབུགས་དབྱུང་བ་ལ་གེགས་བྱེད་པའི་རྣམ་ཤེས་ཏེ་གཟུང་འཛིན་གྱི་རྟོག་པ་ཆོས་དབྱིངས་སུ་སྒྲོལ་བའི་དོན་ནོ། །འདི་ལྟ་བུ་མདོ་ལས། ཕ་དང་མ་ནི་བསད་བྱ་ཞིང་། སོགས་དང་། རྒྱུད་ལས། ཁྱོད་ཀྱིས་སྲོག་ཆགས་བསད་པར་བྱ། ཞེས་སོགས་ཤིན་ཏུ་མང་ངོ་། །བྷུ་སུ་ཀུ་ཞེས་པ། བྷུ་ཛ་ཟས་སྤྱོད་པ། སུ་ཏཱ་ན་གཉིད་ལོག་པ། ཀུ་ཏ་སཱ་ར་བཤང་གཅི་འདོར་བ་སྟེ་མི་བྱར་མི་འདོད་པའི་ལས་གསུམ་ལས་སྤྲོས་པ་གཞན་སྤང་བ་ཞིག་ལ་བཞག་གོ། ༈ །།སྔོན་གྱི་བསྐལ་པ་དང་པོ་ལ། ཞེས་སོགས་ཀྱི་དོན། གཏེར་གཞུང་ལ་ལར། མ་འཁྲུལ་སྔོན་གྱི་བསྐལ་པ་དང་པོ་ལ༔ ཞེས་འབྱུང་བས། གཞི་ཀ་དག་འཁྲུལ་པའི་དྲི་མ་དང་བྲལ་བའི་སྔོན་གྱི་བསྐལ་པ་དང་པོ་ལ། ལྷུན་གྲུབ་སྒོ་བརྒྱད་ཀྱི་ཐུགས་རྗེའི་འཆར་ཚུལ་མ་འགགས་པའི་རྩལ་ལས་གདུལ་བྱའི་ཞིང་ཁམས་དང་། འདུལ་བྱེད་ཀྱི་སྟོན་པ་རང་ཤར་བའི་ཚུལ་གྱིས་ཨོ་རྒྱན་ཡུལ་སོགས་སུ་འཆད་དགོས་སོ། །དེས་ན་དུས་གསུམ་དུས་མེད་ཀ་དག་གི་དུས་ཆེན་པོར་སྔོན་གྱི་བསྐལ་པའི་སྒྲས་སྨོས་པར་ཟད་དོ། ༈ །།པདྨ་བཀའ་ཐང་སོགས་ཀྱི་ཚིག་སྦྱོར་གོ་དཀའ་བ་ཕལ་ཆེར། སྔོན་གྱི་ཡུལ་སྐད་རྙིང་པ་མང་དུ་འདྲེས་པས་ཡིན་ཏེ། རྡོ་རིང་གི་ཡི་གེ་སོགས་གོ་ཤིན་ཏུ་དཀའ་བར་སྣང་བས་མཚོན་ནོ། །དེ་ཡང་ཡུལ་སྐད་དུ་སོང་བ། དཔེར་ན་གསོལ་ཟས་ན་བཟའ་ལུས་གང་

---

^{[མ་དཔེ་གཟིགས་ན་འདིར་གནོན།]}

འཐེབ་རེ་ཕུལ། ཞེས་པ། ན་བཟའ་ལུས་གང་སྟེ་སྐུ་ཆས་ཆ་ཚང་རེ་དང་། ཡང་འཐེབ་པ་རེ་སྟེ་ལྷག་པོ་རེ་རེ་དོན་ན་བཟའ་ཚེ་གཉིས་རེ་ཕུལ་ཟེར་བ་ཡིན་པ་བཞིན་ནོ།། ༈ །།དུར་ཁྲོད་གྱི་ཆས་བརྒྱད་ནི། རྒྱལ་བྱེད་དཔའ་རྟགས་ཀྱི་རྒྱན་ཏེ། དེ་ལའང་བགོ་བའི་གོས་གསུམ། གདགས་པའི་རྒྱན་གཉིས། བྱུག་པའི་རྗེས་གསུམ་སྟེ་བརྒྱད་ལས། དང་པོ་ནི་ཞིང་༡གླང་༢གི་སྟོད་གཡོགས་དང་། སྟག་ལྤགས་༣ཀྱི་ཤམ་ཐབས་སོ། །གཉིས་པ་ནི། སྦྲུལ་དང་། ཐོད་ཕྲེང་སྟེ། དང་པོ་ལའང་། རྒྱལ་རིགས་དཀར་པོས་དབུ་བརྒྱན། རྗེའུ་རིགས་སེར་པོས་སྙན་ཆ། བྲམ་ཟེའི་རིགས་དམར་པོས་སེ་མོ་དོ་དང་མགུར་ཆུ། གདོལ་པ་ནག་པོས་ཕྱག་ཞབས་ཀྱི་གདུ་བུ། དམངས་རིགས་ལྗང་གུས་སྐ་རགས་དང་དོ་ཤལ་བྱས་པའོ། །ཐོད་རྒྱན་ལའང་། སྐམ་པོའི་དབུ་རྒྱན། རློན་པའི་དོ་ཤལ། ཚལ་བུའི་དབུ་རྒྱན་ལ་ལར་སེ་རལ་ཁ། ཏེ་ཚར་གསུམ་མོ། །གསུམ་པ་ནི། དཔྲལ་བར་ཐལ་ཆེན་གྱི་ཚོམ་བུ། སྨིན་མཚམས་སུ་རཀྟའི་ཐིག་ལེ། ཨོ་ཀོར་ཞག་གི་ཟོ་རིས་སོ།། ༈ །།དཔལ་གྱི་ཆས་བརྒྱད་ནི། དཔལ་ཆེན་པོའི་སྐུ་ལ་ཡེ་ནས་རང་ཆགས་སུ་གནས་པའི་ཕྱིར་དཔལ་གྱི་ཆས་ཏེ་རྟོག་པ་ལྷ་རྒྱུད་ལས། དབུ་སྐྲ་གྱེན་བརྫེས་འཁོར་བ་རུ་ཟློག་ཆས། །རྡོ་རྗེའི་ཁྱུང་གཤོག་ཐབས་དང་ཤེས་རབ་ཆས། །མཐིང་དམར་ཅོད་པན་རྟག་ཆད་ཟིལ་གནོན་ཆས། །

---

^{[མ་དཔེ་གཟིགས་ན་འདིར་གནོན།]}

སྤྱི་གཙུག་རྡོ་རྗེ་ལྷག་པ་རིག་པའི་ཆས། །དབང་གི་བསེ་ཁྲབ་གཟི་འབར་བགྲོད་པའི་ཆས། །གཉིས་མེད་སྦྱོར་བ་ཤེས་རབ་ཡུམ་གྱི་ཆས། །གནོད་གདུག་ཟློག་བྱེད་དཔའ་བོ་ལྤགས་ཀྱི་ཆས། །ཉོན་མོངས་སྲེག་བྱེད་རྡོ་རྗེ་མེ་ཡི་ཆས། །ཞེས་སོ། །བདེ་མཆོག་སོགས་ལ་མཎྜལ་ཚོམ་བུ་གཡོན་སྐོར་དང་། མཆོད་པའང་དེ་མཚུངས་གཡོན་པའི་ཀུན་སྤྱོད་གཙོ་བོར་གསུངས།། ༈ །།གནས་སྐབས་ཀྱི་སྤྲོས་པ་གཅོད་བྱེད་ལྟ་བ་གང་ཁས་བླངས་ཀྱང་མཐར་ཐུག་བརྗོད་བྲལ་དུ་ངེས་པ་ནི་མཁས་གྲུབ་ཐམས་ཅད་ཀྱི་བཞེད་པ་ངོ་མ་སྟེ། འདི་ལ་ལུང་རིག་བསམ་གྱིས་མི་ཁྱབ་པ་བཞག་ཏུ་ཡོད་དོ།། ༈ །།སྐུ་ཚབ་གཏེར་ལྔ་ཞེས་པའི་སྐུ་ཚབ་ནི། ཐོག་མར་སློབ་དཔོན་ཉིད་ཀྱིས་བཙུན་མོ་འོད་འཆང་མ་ལ་གནང་། ཕྱིས་ཁྲ་འབྲུག་ཏུ་ཡེ་ཤེས་ཀྱི་མཁའ་འགྲོ་མ་མནྡཱ་ར་བས་ཨུ་རྒྱན་སྤྲིན་ནག་འདུས་པའི་དུར་ཁྲོད་ནས་བླངས་ཏེ་གཏེར་དུ་སྦས་པ། མངའ་བདག་ཉང་གིས་སྤྱན་དྲངས་ཏེ་དེང་སང་བསམ་ཡས་རྫོང་དུ་བཞུགས་པའི་གུ་རུ་མཚོ་སྐྱེས་རྡོ་རྗེ་འདི་ཀ་ཡིན། དེ་ལ་ཐང་ཡིག་ཏུ། ང་དང་མ་འཕྲད་མ་འོངས་སེམས་ཅན་རྣམས༔ མ་རིག་མུན་པའི་སྒྲོན་མ་སྐུ་འདྲས་བྱེད། ཅེས་སོགས་རྒྱ་ཆེར་བསྔགས་པ་གུ་རུའི་སྐུ་སྤྱི་དང་། ཁྱད་པར་འདི་ལ་དགོངས། གཏེར་ལྔ་ནི་དབུས་གཏེར་ཟུག་པ་རྩ་བ། ཤར་གཏེར་འདྲིལ་བ་སྡོང་བོ། ལྷོ་གཏེར་གྱེས་པ་ཡལ་ག །ནུབ་གཏེར་

---

^{[མ་དཔེ་གཟིགས་ན་འདིར་གནོན།]}

གཅིག་གསལ་བ་མེ་ཏོག །བྱང་གཏེར་སྨིན་པ་འབྲས་བུ་རྣམས་སོ། །ཡང་། སྐུ་ཚབ་ཉེར་ལྔ་ཞེས་དངོས་ཀྱི་ཞལ་སྐྱིན་གྲུབ་ཆེན་རྗེ་འབངས་ཉེར་ལྔ་ལ་བཞེད་པ་དང་། ལ་ལས་སྐུ་ཚབ་རིགས་མི་འདྲ་བ་ཉེར་ལྔ་སོགས་སུ་བཞེད་པའང་སྣང་ངོ་།། ༈ །།དེང་སང་བོད་ན་གསར་མར་གྲགས་པའི་རྗེས་གནང་སྐོར་ལ། གཙོ་བོར་སྒྲུབ་ཐབས་རྒྱ་མཚོ། བརྒྱ་རྩ། ཇོ་བོ་ལུགས། ཁ་ཆེ་པཎ་ཆེན་སོགས་ནས་བརྒྱུད་པ་ཁྲོ་ཕུ་ལུགས་བཞི་གཙོ་ཆེ་ཞིང་། ཕྱག་ལེན་ཀྱང་སོ་སོར་ཡོད། དེ་ལ་རྒྱ་མཚོ་ལ་སྐུ་གསུང་ཐུགས་དང་། བརྒྱ་རྩར་ལུགས་གསུམ། ཇོ་ལུགས་དང་ཁ་ཆེ་ལུགས་སོགས་སྐུ་གསུང་ཐུགས་ཀྱི་ཆིངས་ཅུང་འདྲ་མིན་རེ་ཡོད་ཅིང་། བརྒྱ་རྒྱམ་སོགས་ཀྱི་རྒྱུན་བཤགས་གུར་གྱི་ཡན་ལག་བདུན་པ་དང་། ཇོ་ལུགས་སོགས་འགའ་ལ་བཟང་སྤྱོད་ཀྱི་ཡན་ལག་བདུན་པ། བརྒྱ་རྒྱམ་གྱི་སྐྱབས་འགྲོ་བཞི་སྐོར་ཚིག་ལྷུག་དང་། ཇོ་ལུགས་སྐྱབས་སེམས་སངས་རྒྱས་ཚོགས་དང་། པཎ་ཆེན་ལུགས་སོགས་ལ་འགྲོ་རྣམས་བསྒྲལ་འདོད་མ་སྦྱར་བས་མཚོན་ནོ།། ༈ །།རྣམ་ཤེས་འཕོ་བའི་སྒོ་དགུ་སོགས་ཀྱི་ངོས་འཛིན་རྒྱུད་དང་བསྟན་བཅོས་རྣམས་ལས་མི་མཐུན་པ་མང་དུ་འབྱུང་། འཕོ་བའི་དུས་ལའང་བཞེད་པ་མི་མཐུན་པ་མང་མོད། མ་ཤི་གོང་དུ་འཕོས་ན་གོང་ལྟར་ཡང་དུས་མིན་ལྷ་བསད་པའི་ཉེས་པ་འབྱུང་བས། རྣམ་ཤེས་འོད་གསལ་ཐིམ་པའི་ཚེ་

---

^{[མ་དཔེ་གཟིགས་ན་འདིར་གནོན།]}

སྦྱངས་སྟོབས་ཀྱིས་འཕོ་དགོས། དེ་ལ་གང་དུ་ལེགས་པར་འབྱོངས་པ་གཅེས་པས། སྦྱོང་བ་དང་། ལས་ལ་སྦྱར་བ་གཉིས་སུ་བསྟན་ནོ། །འཕོ་བའི་ཚེ་ཡི་གེ་ཧི་ཀྲ་དང་། ཕཊ་སོགས་ཀྱི་སྦྱོར་བ་གསུངས་ཏེ། །སྔ་མ་ནི། སེམས་ཀྱི་རྩ་ནི་དེ་བཞིན་ཧི་ཀྲ། སྟེང་དང་འོག་དང་དེ་བཞིན་སྟེང་། ཡི་གེ་ཕྱེད་དང་གཉིས་ཀྱིས་སྦྱངས། ཞེས་གདན་བཞིའི་བཤད་རྒྱུད་ལས་གསུང་། སྤྱིར་འཆི་བའི་དུས་ལ་བབ་པ་ན་འཁོར་བ་ལ་མངོན་པར་སྐྱོ་བས་ཆགས་སྡང་གདུང་སེམས་ཀྱི་འཁྲི་བ་ཐམས་ཅད་བཅད། འདུ་ཤེས་བཅུ་བསྟན་པ་དང་། འདའ་ཀ་ཡེ་ཤེས་ཀྱི་དོན་ལ་འདྲིས་པར་བྱ། བློ་སྦྱོང་པ་ཡིན་ན་སྟོབས་ལྔའི་འཕོ་བ་དང་། གང་ལྟར་ཡང་བྱང་ཆུབ་སེམས་གཉིས་མངོན་དུ་བྱས་ཏེ། བདེ་ཀྱེ་སོགས་ལམ་ཟབ་མོ་གང་ལ་གོམས་པའི་རྣལ་འབྱོར་གསལ་བཏབ། ལམ་འབྲས། རྣལ་འབྱོར་མ། ཆོས་དྲུག །ཚེམ་བུ་དམར་ཁྲིད། འོད་དཔག་མེད་ཀྱི་འཕོ་བ་སོགས་གསར་མ་དང་། རྫོགས་པ་ཆེན་པོའི་རྒྱུད་ཉི་ཟླ་ཁ་སྦྱོར་གྱི་མན་ངག་སོགས་ཐུན་མོང་མ་ཡིན་པ་དང་། ཐུན་མོང་བ་ཇི་ལྟར་གོམས་འདྲིས་ཡིད་ཆེས་བྱས་པ་ཞིག་གི་རྣལ་འབྱོར་གྱིས་བདེ་བ་ཆེན་པོའི་གྲོང་ཁྱེར་དུ་འཇུག་པར་བྱའོ། །གཞན་ཡང་བློ་སྦྱོང་སོགས་ལས་གསུངས་པའི་རྫས་ཀྱི་འཕོ་བ་དང་། གཟུངས་སྔགས་ཟབ་མོ་དང་། སངས་རྒྱས་ཀྱི་མཚན་བསྒྲགས་པས་མཚོན་ཐབས་ཀྱི་ཆ་རྣམས་ལ་སྐུར་

---

^{[མ་དཔེ་གཟིགས་ན་འདིར་གནོན།]}

བ་མི་འདེབས་པར་རང་གཞན་གྱི་བློ་ཚོད་དང་འཚམས་པར་ཕན་གདགས་པའི་ཚུལ་ལ་མཁས་པ་གཅེས་སོ།། ༈ །།མདོ་སྔགས་ཀྱི་ཕྱག་ཆེན་སོ་སོར་བཞེད་པར་མར་མི་སོགས་ཀྱི་ལུང་གི་སྒྲུབ་བྱེད་དང་རྣལ་འབྱོར་བཞིའི་ས་ལམ་དངོས་བཏགས་ཀྱི་དབྱེ་བ་ལའང་དེ་མཚུངས་ལུང་གི་སྒྲུབ་བྱེད། གལ་ཏེ་མདོའི་ཕྱག་ཆེན་བཞེད་ན། དེ་དང་དབུ་མ་ཁྱད་པར་ཡོད་མེད་བཅས་ཀྱི་ལུང་རིགས་ཚད་ལྡན་སླར་བཙལ་བར་ཟླ བྱའོ།། ༈ །།བོ་དོང་པཎ་ཆེན་གྱི་གསུང་ལས་བདེ་བ་ཅན་ལྟ་བུའི་བ་ཡིག་ཐམས་ཅད། ཝ་ཞེས་བྲི་བ་ཐམས་ཅད་ཚུལ་ཡོད་སྣང་། འདི་བཀླགས་ཚུལ་ལ་དཔྱད་ན་ཐུགས་མེད་པ་འདྲ་སྙམ།། ༈ །།སྒྲ་མཐུན་སྒྱུ, དོན་དཔག་ནི། སངས་རྒྱས་འོད་སྲུང་དང་། ཉན་ཐོས་འོད་སྲུང་ལྟ་བུ་མཚན་མཐུན་ཀྱང་དོན་འཕགས་པའོ།། ༈ །།འཇམ་དཔལ་རྩ་རྒྱུད་ལས། ཁྱུ་མཆོག་ཁྱུ་མཆོག་བཟང་པོ་དང་། ཞེས་པ་ནས། འོད་ལྡན་ཉིད་ནི་ཕྱི་མ་ཡིན། ཅེས་པའི་བར་གྱིས་སྲོང་བཙན་ནས་འོད་སྲུང་གི་བར་ལུང་བསྟན་ཅེས་བཞེད།། ༈ །།མདུན་དུ་སྒྲོལ་མ་དཀར་མོ་ལ། །སྒྲོལ་མ་ཉེར་གཅིག་གིས་བསྐོར་བ། །གསལ་འདེབས་དེ་ལ་སེམས་གཏད་ན། །འཇིགས་པ་ཀུན་ལས་ཐར་བར་འགྱུར། །རྟགས་མཚན་ལ་སོགས་གཞན་ལ་བཤད། །དེ་ཡིས་ཕྱི་ནས་སྒྲིབ་པར་འགྱུར། །ཞེས་གསུངས། །ཀུན་མཁྱེན་བུ་སྟོན་རིན་པོ་ཆེས། །དེ་ནས་

---

^{[མ་དཔེ་གཟིགས་ན་འདིར་གནོན།]}

རྒྱལ་ཆེན་བཞི་སོགས་ལྷ་རྣམས་ཀྱིས། །སྲིད་གསུམ་རྒྱལ་པོར་དབང་བསྐུར་ལྕང་ལོ་ཅན། །ཕུལ་ནས་རྣམ་མང་ཐོས་པའི་སྲས་ཞེས་བསྟོད། །རྣམ་ཐོས་སྲས་སུ་གྲགས་ལ་ཕྱག་འཚལ་བསྟོད། །ལྷ་མིན་སྒྲ་གཅན་ལྷ་ལ་འཐབ་པའི་ཚེ། །ཁྱེད་སྐུ་རི་རབ་སྐེད་པར་ངལ་གསོ་བའི། །གཟི་བརྗིད་མ་བཟོད་ངལ་གསོས་ཕྱག་མཚལ་ཞེས། །བསྟོད་པས་ངལ་གསོས་གྲགས་ལ་ཕྱག་འཚལ་བསྟོད། །མགུལ་ཕྲེང་དམག་གིས་ལྷག་ནས་འཕྲོག་པའི་ཚེ། །ཁྱོད་སྐུ་གསེར་གྱི་གོ་བགོས་སེང་གེར་ཞོན། །ལྷ་གནས་སྲུང་བས་གནས་སྲུང་ཕྱག་འཚལ་ཞེས། །བསྟོད་པས་གནས་སྲུང་གྲགས་ལ་ཕྱག་འཚལ་བསྟོད། །རབ་སྨོད་དམག་གིས་ལྷ་གནས་འཕྲོག་པའི་ཚེ། །ཁྱོད་སྐུ་སྔོན་པོའི་གཟི་བརྗིད་མ་བཟོད་ནས། །ལུས་ངན་འདི་འདྲས་བདག་ཅག་བཏུལ་ལོ་ཞེས། །བསྟོད་པས་ལུས་ངན་གྲགས་ལ་ཕྱག་འཚལ་བསྟོད། །ཞེས་སོགས་གསུངས།། ༈ །།དོན་ཏིག་འགྲོ་བ་ཀུན་གྲོལ་ལས། གཟུགས་སྐུ་མཐོང་གྲོལ། གསུང་མཆོག་ཐོས་གྲོལ། རིག་པ་བཏགས་གྲོལ། དགོངས་པ་རེག་གྲོལ། འདོད་ཡོན་ཚོར་གྲོལ། ཐུགས་རྗེ་མྱོང་གྲོལ་ཅེས་སོ་སོར་རྒྱས་པར་གསུང་།། ༈ ། རྙིང་མའི་ཆོས་ཉིད་བར་དོའི་སྣང་བ་འཆར་ཚུལ་དང་ཆ་འདྲ་བ་བཀའ་གདམས་གླེགས་བམ་རིན་པོ་ཆེར་ཡོད།། ༈ །།དམ་པའི་ཆོས་ཐར་ལས། དམ་པ་གཤེགས་རྗེས་ཨཱ་ཙརླ་གསུམ་བྱུང་ནས། དམ་པ་སྐྱེ་

---

^{[མ་དཔེ་གཟིགས་ན་འདིར་གནོན།]}

བདུན་ཡིན་པས་དེའི་ཤ་ཁྲག་སུའི་ལྟོར་སོང་བ་སངས་རྒྱས་པ་ཡིན་ཚུལ་སོགས་དང་།། ༈ །།བརྟག་གཉིས་ཀྱི་འགྲེལ་པ་རིན་ཆེན་རྒྱན་འདྲ་ལས། སྐྱེ་བདུན་གྱི་ཤའི་ལོ་རྒྱུས་ཐང་ཡིག་སོགས་དང་ཆ་འདྲ་བར་བཤད་སྣང་ངོ་། །བཞུགས་སོ་ཞེས་པའི་སྐད་དོད་ལ། བི་ཛ་ཧཱ་རམ་ནི་ཉེར་བསྒྱུར་བ་སྔོན་མའི་ཧྲི་ཧྥ་འཕྲོག་པ་ལ་ལྐོག་གྱུར་གྱི་ཎ་ལ་བྱིན་བ་སྟེ། རྒྱུད་སྡེ་རྣམས་ཀྱི་རྡོ་རྗེ་བཙུན་མོའི་བྷ་ག་ལ་བཞུགས་སོ་ཞེས་པའི་རྒྱ་དཔེར་འདི་ཡོད་པས། ཚུར་མཐོང་གི་སྤྱོད་ཡུལ་མ་གྱུར་པའི་དབྱིངས་སུ་བཞུགས་པའི་དོན་ཡིན་པས་དཔེ་ཆའི་སྐད་དོད་སོགས་ལ་སྦྱོར་མི་རིགས། དེས་ན་ཉེར་བསྒྱུར་བི་སྔོན་མའི་ཧྲི་ཉ་འཕྲོག་པ་ལ་ད་ལྟར་བའི་ཏི་པ་དང་། སྨ་ཡིས་འདས་པ་ལའོ་ཞེས་པས་སྨྲ་སྦྱར་བ། བི་ཧར་ཏི་སྨྲ་ཞེས་འབྱུང་བ་ཁོ་ན་ལེགས། གཞན་དུ། ཨ་སྟི་དང་། ཀ་བེ་སོགས་ཀྱང་སྦྱོར་རུང་ངོ་། །པྲ་སྟ་ར་ཞེས་པའི་པྲ་ཐུང་ངུ་ཟ ཡིན།། ༈ །།ཉན་ཐོས་པའི་ལུགས་ཀྱི་མཐར་ཐུག་གི་འབྲས་བུ་ཕུང་པོ་ལྷག་མེད། རྟོགས་བྱ་གང་ཟག་བདག་མེད། དེ་ཡང་རང་རིག་གཅིག་པུ། །གཞན་ཀླུ་སྒྲུབ་ཀྱིས་ནང་གི་ཤེས་པ་ཁོ་ན་དང་། བྱམས་པ་[ དང་ཐོགས་མེད་ཀྱིས་ཉེར་ལེན་ཕུང་པོ་བཅས་ལའོ། །དེ་གཉིས་དགོངས་པ་མཐུན། མངོན་རྟོགས་རྒྱན་ཕར་ཕྱིན་ཐབས་དང་། དབུ་ངས་པ་མཐུན། མངོན་རྟོགས་རྒྱན་ཕར་ཕྱིན་ཐབས་དང་། དབུ་མ་ཤེས་རབ་གཙོ་བོར་སྟོན་པས་དེ་གཉིས་ཟུང་དུ་འབྲེལ་བ་ཐེག་ཆེན་གྱི་ལམ་།

---

^{[མ་དཔེ་གཟིགས་ན་འདིར་གནོན།]}

ཡོངས་སུ་རྫོགས། རབ་དབྱེའི་ཆོས་སྐད་ཐེག་ཆེན་ཤས་ཆེ། ཐེག་ཆེན་སོ་ཐར་གྱི་སྡོམ་པ་འཆི་བའི་ཚེ་ན། ལུས་ཀྱི་སྡོམ་པ་གཏོང་། ཡིད་སྡོམ་མི་གཏོང་། གཟུགས་མེད་ཁམས་ལ་རགས་གཟུགས་མེད། ཡིད་གཟུགས་ཡོད། རྒྱུད་སྡེ་འོག་མར་བློ་ཡི་རིམ་པས་ལྷ་བསྐྱེད་པ་མ་གཏོགས། བསྐྱེད་པའི་རིམ་པས་ལྷ་བསྐྱེད་པ་མེད། མརྒ་པིཎྜ་རང་གི་ཉམས་ལེན་ལ་ཞག་འཆད་བྱུང་ཡང་སྐྱོན་མེད། ༈ །གཞི་སྟོང་པ་ཉིད། ལམ་མཚན་མེད། འབྲས་བུ་སྨོན་མེད། ཞེས་སོགས་རྒྱས་པར་གསུངས།། ༈ །།མ་ཧཱ་པཎྜི་ཏའི་བཞེད་པས། གཞི་ཀ་དག་དང་ལྷུན་གྲུབ། ལམ་ཁྲེགས་ཆོད་དང་ཐོད་རྒལ། འབྲས་བུ་སྐུ་དང་། ཡེ་ཤེས་ཞེས་རྣམ་པར་བཞག་པའི། ཕྱོགས་དང་པོ་སྟོང་ཆ་འཁོར་ལོ་བར་བ་དང་གསལ་ཆ་ཕྱི་མའི་རྗེས་སུ་འབྲངས་ནས་དེ་གཉིས་ཟུང་འཇུག་ཏུ་སྦྱོར་བ་སྔགས་ཀྱི་ཁྱད་ཆོས་སུ་བཤད། གཉིས་པ་ནི། ཐལ་འགྱུར་ལས། ཤེས་རབ་ཕ་རོལ་ཕྱིན་པའི་མཐའ། །སྣང་བ་ཐད་དཀར་གཅོད་ལ་འདུས། །ཞེས་གསུངས་པ་ལྟར། གྲོལ་ལུགས་བཞིའི་སྒོ་ནས་ད་ལྟའི་རིག་པ་རྗེན་པའི་ངང་དུ་སྤྲོས་པ་ཐད་ཀར་གཅོད་པ་སྟེ་རང་རིག་དྲི་མེད་གཟོད་ནས་སྤྲོས་པའི་ཆོས་ཀྱིས་གོས་མ་མྱོང་བས་འཁོར་བའི་རྒྱུ་ཟད་པ་གཞི་ལྟ་བུ། ཡེ་གྲོལ། དེ་ལྟར་ཡིན་པས་གདོད་གཉེན་པོས་བསྐྱར་དུ་གྲོལ་མི་དགོས་པར། གང་ཤར་ཐམས་ཅད་སྦྲུལ་

---

^{[མ་དཔེ་གཟིགས་ན་འདིར་གནོན།]}

མདུད་བཞིན་རང་གིས་གྲོལ་བ་རང་གྲོལ། ལམ་སྒོམ་པ། ཇི་ལྟར་སྣང་བའི་ཆོས་ཐམས་ཅད་རིག་སྟོང་སྐད་ཅིག་མའི་ངང་དུ་བརྡར་ཤ་ཆོད་པས་གཟུང་འཛིན་གྱི་སྣང་བ་ཐར་ཀར་གཅོད་པ་ཅེར་གྲོལ། སྤྱོད་པ། དུས་གསུམ་དང་ཤེས་བྱ་སོགས་བློ་དང་ལྷན་ཅིག་མི་གནས་པས་མཐའ་འབྲས་བུ། གྲོལ་ལོ། །རིམ་འཇུག་ལ་མ་ལྟོས་པར་རིག་གདངས་མངོན་སུམ་མཐོང་བས་ལམ་ཐོད་རྒལ་དུ་བགྲོད་པའི་ཉམས་ལེན་ནི། སྒྲོན་མ་བཞི་ལ། གནད་དྲུག་ལམ། གིས་ཉམས་སུ་བླངས་པས་རང་འབྲས་སྣང་བ་བཞི་འབྲས་བུ་མཐར་ཕྱིན་པ་སྟེ། སེམས་ཀྱི་ཆོས་ཉིད་རང་བཞིན་གྱིས་རྣམ་པར་དག་པས་ཅིར་ཡང་འཆར་དུ་རུང་བ་ཤེས་རབ་རང་བྱུང་སྙིང་ནས་མིག་ཏུ་འབྲལ་བའི་རང་བྱུང་གསང་བ་ཆེན་པོའི་རྩ་རྒྱང་ཞགས་ཆུ། སྤྲིན་བྲལ་ནམ་མཁའ་མཐིང་ཞུན་ལྟ་བུའི་འོད་ཟླུམ་དག་པ་དབྱིངས། རྡོ་རྗེ་ལུ་གུ་རྒྱུད་གསེར་སྐུད་ལྡིང་བ་ལྟ་བུ་ཐིག་ལེ་སྟོང་པའི་སྒྲོན་མ་ཞེས་ངེས་པར་བྱས་ནས། བཅའ་བ་རུས། འཁྲིད་པ་དབྱིངས། འགྲོ་འོང་རླུང་། འཆར་བྱེད་སྒོ། འཆར་བྱ་ཡུལ། རྩ་བ་སེམས་ཀྱི་གནད་རྡོ་རྗེ་སློབ་དཔོན་གྱི་གསུང་གི་བདུད་རྩིས་ཇི་ལྟར་སྐབས་དབྱེ་བ་བཞིན་བརྩོན་པས། མངོན་སུམ་བཞི་ཀའི་མཚན་ཉིད་ཅན་རིག་པ་རྡོ་རྗེ་ལུ་གུ་རྒྱུད་མཐོང་བ་ཆོས་ཉིད་མངོན་སུམ། སྣང་བ་མཆེད་པ་ཉམས་གོང་འཕེལ། དེ་ཉིད་ལ་བརྟན་པ་ཐོབ་པས་སྐུ་དང་ཡེ་ཤེས་ཀྱི་རྣམ་

---

^{[མ་དཔེ་གཟིགས་ན་འདིར་གནོན།]}

རོལ་བསམ་གྱིས་མི་ཁྱབ་པ་རིག་པ་ཚད་ཕེབས། དེ་འོད་གསལ་གྱི་དབྱིངས་སུ་འཇུག་པ་ཆོས་ཉིད་ཟད་ས། དེ་ལས་སླར་ཟུང་འཇུག་གི་སྐུར་འཕོ་བ་ནི་མཐར་ཐུག་གི་འབྲས་བུའོ། །གསུམ་པ་ནི། རྟེན་སྐུ་ཀྵ གསུམ། བརྟེན་པ་ཡེ་ཤེས་ལྔ། མཛད་པ་ཕྲིན་ལས་དང་བཅས་པ་སྟེ། ཟུང་འཇུག་གི་ཡེ་ཤེས་གཅིག་གི་ཉམས་ཀྱིས་ཚུར་མཐོང་གི་ངོར་སྤྲོས་པ་དུ་མའི་གར་མཛད་པ་སྟེ། ཀུན་སྤྱོད་ལས། གང་དུ་བདེ་ཆེན་ཞེས་བྱ་གཅིག་པུ་ཉིད། །གཅིག་པུའི་ཉམས་ཀྱིས་དུ་མའི་གར་མཛད་དོ། །ཞེས་སོ། །འདི་རྣམས་ས་བོན་ཙམ་སྟེ། དེ་ལས་འཕྲོས་པའི་ལུང་རིག་མན་ངག་གི་འཐད་པ་བསམ་གྱིས་མི་ཁྱབ་པ་དང་བཅས་ཏེ་བཀའ་སྩལ་བས་བློ་གྲོས་ཀྱི་པདྨ་མཆོག་ཏུ་རྒྱས་པར་མཛད་དོ། །སརྦ་གམྦྷི་རཱ་རྦ་བོདྨ་ནྟུ། ཤུ་བྷཾ། ༈ །མ་ཧཱ་པཎྜི་ཏ་ཚེ་དབང་ཀུན་ཁྱབ་ནི་འབེ་རྫ་ཉིན་དམ་ཐོག་སྒང་དུ་འཁྲུངས། རང་གི་མེས་པོ་སངས་རྒྱས་རིན་ཆེན་ནམ་འབེ་འཇམ་དབྱངས་པར་གྲགས་པ་ལས། སྒྲ་ཀ་ལཱ་པ། སྙན་ངག་མེ་ལོང་། སྡེབ་སྦྱོར་རིན་འབྱུང་། གསོ་རིག་གི་སྐོར་སོགས་གསན། རྗེ་སྟོད་པ་ཚེ་དབང་གྲགས་པ་ལས་སྐར་ནག་རྩིས་དང་དབྱངས་འཆར་བཅས། ཀུན་མཁྱེན་དྷ་རྨ་ཀ་ར་ལས། ཐ་སྙད་རིག་ལམ་རྒྱ་མཚོ་ལྟ་བུའི་གསན་བསམ་དོགས་གཅོད་སྤྱི་དང་། ཁྱད་པར་ཙཱནྡྲ་པ་ཚར་ལྔ། འགྲེལ་པ་འདོད་འཇོ་ཚར་གསུམ། སྙན་དངགས་མེ་

---

^{[མ་དཔེ་གཟིགས་ན་འདིར་གནོན།]}

ལོང་། ཀ་ལཱ་པའི་ཏི་སོགས་གསོ་རིག་དང་རྒྱ་རྩིས་གསར་འགྱུར། འབྲས་རྩིས་མྱུར་རྟོགས། མངོན་མཛོད། དབུ་མ་འཇུག་པ། དབུ་མ་རྒྱན། མདོ་རྒྱན་པད་དཀར་སྡོམ་གསུམ། ཟབ་མོ་ནང་དོན། རྣམ་ཤེས་ཡེ་ཤེས་འབྱེད་པ། སྙིང་པོ་བསྟན་པ། དཀྱིལ་འཁོར་གྱི་ཐིག་རྩ། ཁྱད་པར་གྲུབ་མཐའ་བཞི་དང་དབུ་མ་གཞན་སྟོང་གི་ཟབ་གནད་སོགས་གསན་ནས་བྱང་ཆུབ་པར་མཛད། ཕག་མོ། བདེ་མཆོག ། འཇིགས་བྱེད་མལ་ལུགས་ལྷ་དགུ་ཇོ་ལུགས་དུས་འཁོར། ཆོས་དབྱིངས་གསུང་དབང་། བདེ་མཆོག་སྟོད་འགྲེལ། དྲིལ་བུ་ལུས་དཀྱིལ། ཕྱག་བཞི་པ་སོགས་ཀྱི་དབང་། ཕྱག་ཆེན། སྦྱོར་དྲུག །རྫོགས་ཆེན། རྭ་ཁྲིད་སྙན་བརྒྱུད་སོགས་འཁྲིད་ཀྱི་རིམ་པ་བསམ་གྱིས་མི་ཁྱབ་པ་གསན་ཅིང་ཟིན་བྲིས་ཀྱང་འགའ་ཞིག་མཛད། རྗེ་དཔའ་བོ་ལས། ཞི་སྦས་ལུགས་ཀྱི་དགྱེས་རྡོར། གཤེད་ནག །བདེ་མཆོག་ནག་པོ། ནི་གུའི་བདེ་མཆོག་ལྷ་ལྔ། འཇིགས་བྱེད་རོ་ལངས་བརྒྱད་སྐོར། སྒྲོལ་མ་རྣལ་འབྱོར་མ་སོགས་ཀྱི་དབང་། སྒྲོལ་མ་དང་། བཀའ་བབས་བདུན་གྱི་འཁྲིད་ཡེ་ཤེས་རྒྱ་མཚོའི་རིག་ཟིག་སྟེང་ནས་ཇོ་ལུགས་བདེ་མཆོག་རྩ་རྒྱུད་ཀྱི་བཤད་པ་སོགས་གསན། དཔོན་ཀརྨ་ལས། ཆོས་དབྱིངས་གསུང་དབང་མ་གཏོགས་པའི་རྔོག་དཀྱིལ། གཤེད་དམར་ལྷ་ལྔ་རྣམས་གསན། འབྲུག་ཡོངས་འཛིན་ལས། པཎ་ཆེན་ནགས་རིན་

---

^{[མ་དཔེ་གཟིགས་ན་འདིར་གནོན།]}

ནས་བརྒྱུད་པའི་རྡོར་ཕྲེང་། གསང་འདུས་མི་བསྐྱོད་པ། གཤེད་དམར་གྱད་ཆེན། རྒྱ་ཡེ་ཤེས་རྡོ་རྗེའི་སྤྲུལ་སྐུ་ལས། བདེ་མཆོག་འཇམ་རྡོར་དང་། མེ་ཏྲི་༡ ༣མ་སོགས། ཁམས་སྤྲུལ་ལས་དུས་འཁོར་སྡོམ་g,ཆེན་སོགས་རྒྱུད་སྡེའི་དབང་བཀའ་ལ་ཐུགས་རྩོལ་ཆེར་མཛད། རྒྱལ་རོང་ནས་ཀུན་བཟང་དབང་པོའི་དཔོན་བླ་མ་ཀུན་དགའ་རྣམ་རྒྱལ་ལས་ཇོ་ནང་ཏཱ་ར་ནཱ་ཐའི་བཀའ་འབུམ་ཡོངས་རྫོགས་ཀྱི་ལུང་གསན།གསུང་རྩོམ་སྐོར་ལ། རང་ཉིད་ཀྱི་བླ་མ་དྷརྨ་ཀ་རའི་གསུང་འབུམ་གྱི་ཞལ་སྐོང་སོགས་སྤར་དུ་འཁོད་རིགས་དང་། གཞན་རྗེ་རང་ཉིད་ཀྱི་རྟོགས་བརྗོད་རིན་ཆེན་ཕྲེང་བ། ཀ་ལཱ་པའི་བཤད་སྦྱར་ཟླ་ཟེར། སྙན་ངག་མེ་ལོང་དང་། མངོན་བརྗོད་འདོད་འཇོའི་ཟིན་བྲིས། མུ་ཏིག་ཕྲེང་བའི་འགྱུར་བཅོས། སྡེབ་སྦྱོར་ཀུན་ཏུ་རབ་ཏུ་འཇུག་པ། འཇང་པ་ཐར་མཆོག་ལས་རྒྱ་རྩིས་སྐོར་དང་། ས་དཔྱད་སོགས་ཤིན་ཏུ་མང་བ་གསན་ནས་གསར་འགྱུར་སྒྲའི་བྱིངས་ལས་བཅས་ལས་མེད་ཀྱི་འཕྲོས་དོན། བཙོང་ཁ་པའི་བི་བརྟའི་རྒྱུ་མཚན། ཚེ་དཔག །ཀུན་རིག །ཆབ་གཏོར་རྣམས་ཀྱི་ཟིན་བྲིས། གསོ་རིག་གི་ཆོས་འབྱུང་ཁྱད་འཕགས། སྟག་ཤམ་ཡི་དམ་དགོངས་འདུས་ལས་བྱང་འགྲེལ་པ། གཡུ་ཐོག་སྙིང་ཏིག་ལས་བྱང་འགྲེལ་པ་དང་བསྙེན་དམིགས། ཟུར་ལུགས་ཕྱག་བཞི་བའི་མདོས་ཆེན། གཅོད་སྐོར། གསལ་སྒྲོན་གྱི་གཏོ་

---

^{[མ་དཔེ་གཟིགས་ན་འདིར་གནོན།]}

སྒྲོམ་ས་བདག་ཉེས་པ་ཀུན་སེལ་སོགས་ཀྱི་ཟིན་བྲིས། ཟབ་མོ་ནང་དོན་ཟིན་བྲིས། སྦྱིན་སྲེག་གི་རྫས་སྔགས་ཀྱི་རྒྱུ་མཚན། བུམ་རྫས་ཀྱི་ངོས་འཛིན་གྲུབ་མཐའི་སྐོར་གྱི་ཟིན་བྲིས་ཚིག་བཅད་ལྷུག་མང་ཙམ། པཎ་ཆེན་བློ་བཟང་དཔལ་ལྡན་ཡེ་ཤེས་དང་འབེལ་གཏམ་གྱི་ཟིན་བྲིས། དྲུག་བཅུ་པའི་ཟིན་བྲིས་དཀྱིལ་འཁོར་བློས་བསླངས་སོགས་ཀྱི་ཐིག་རྩ། བདེ་མཆོག་ནམ་མཁའ་ལྡིང་གི་ཆར་འབེབས། རྡོ་རྗེ་གདན་བཞིའི་ཡུམ་བཀའི་ཆུའི་སྦྱིན་སྲེག །བཛྲ་གུ་རུ་དང་ཐོད་ཕྲེང་རྩལ་གྱི་ངེས་དོན་བཤད་པ། ཨརྩི་ཀ་གི་རྣམ་བཤད་གསང་དོན་ཀུན་གསལ། ཀུན་མཁྱེན་དྷརྨ་ཀ་རའི་གསུང་རྒྱུན་སྣ་ཚོགས་ཟིན་བྲིས། རྫོགས་ཆེན་སྙིང་ཏིག་དང་རྭ་ལུགས་འཇིགས་མཛད་སྙན་བརྒྱུད་ཟིན་བྲིས། ཕུག་ལུགས་ནག་རྩིས་ཀྱི་ལོ་མགོ་དང་། ཟླ་དུས་ཞག་གི་བརྒལ་བརྟག །རྩིས་རིག་སྨྲ་བ་རྣམས་ལ་སྤྲིངས་པའི་འཇའ་ས།། ༈ །།ལྡེབ་༣༦༢བཞི་ཡིས་ཚངས་པའི་བསོད་ནམས་བསྐྱེད། ཅེས་པ་ནི་སྟག་ལོ་རང་གི་རིག་གནས་ཀུན་ཤེས་རྩ་བར། བཞི་ནི་ཚངས་པའི་བསོད་ནམས་སྐྱེད་བྱེད་དེ། །སྔར་མེད་གནས་སུ་རྒྱལ་བའི་རིང་བསྲེལ་མཆོག ། གཞུག་པའི་མཆོད་རྟེན་རྩིག་པར་བྱེད་པ་དང་། །དགེ་འདུན་ཀུན་ར་ལོངས་སྤྱོད་དང་བཅས་བྱེད། དགེ་འདུན་བྱེ་བ་ལེགས་པར་བསྡུམས་པ་༢དང་། །བྱམས་སོགས་ཚད་མེད་བཞི་པོ་བསྒོམ་པའོ། །ཞེས་

---

^{[མ་དཔེ་གཟིགས་ན་འདིར་གནོན།]}

གསུངས་ཏེ། རྫས་ལས་བྱུང་བའི་བསོད་ནམས་བདུན་གྱི་དང་པོ། །ཀུན་དགའ་ར་བ་དང་། གཙུག་ལག་ཁང་བཞེངས་པ། གཞན་དགེ་འདུན་བྱེ་བ་བསྡུམ་པ། བྱམས་སོགས་ཚད་མེད་བཞི་བསྒོམ་པ་སྟེ་བཞི། གནས་སྐབས་ཚངས་པའི་བསོད་ནམས་བསྐྱེད་པས་རྣམ་སྨིན་མཉམ་པར་གསུངས་པ། ལུང་དེའང་འདུལ་ལུང་རང་ཡིན། མངོན་བརྗོད་སྐབས་དངོས་ཀྱི་ཚུལ་གསུམ་དང་། བཏགས་པའི་ཚུལ་ལྔའི་གྲངས་ངོ་མ་བགྲངས་པ་ཆོས་རྣམ་པའི་བསྡུས་ར་སོགས་སུ་ནི་མི་སྣང་། གཞན་དཔེ་མེད།། ༈ །།ཟློས་གར་ཁམས་འགྲེལ་དེ་བསབས་ཡོད་ཀྱང་། རྣམ་གྲངས་ཙམ་མ་གཏོགས་རྒྱས་བཤད་དང་དོན་གྱི་ཆིངས་སོགས་ནི་མི་འདུག། ༈ །།༡༡༢་པར་འཆད་ཚུལ་དྲུག །སྐུ་དྲང་པོར་བསྲངས། སྨིན་མ་༢གཟེངས་གཏོད། སྤྱན་ཟིམ་བུར་༣གཟིགས། ཞལ་གྱི་ཡོན་ཏན་༤ཕྱེ། དུང་གི་ཚེམ་༥བར་ན། ལྗགས་ཀྱི་དབང་པོ་༦བརྐྱངས་ཏེ་ཚངས་པའི་དབྱངས་སུ་གསུངས་སོ་ཟེར་བ་དེ་ཡིན་ནོ། །སྔ་འགྱུར་རང་གི་ཟུར་སྐད་དུ་སྣང་ཞིང་། རྒྱུད་ཀྱི་ཁུངས་ངེས་པ་གང་ཡོད་པ་རྟག ༈ ༡༥༨ པར། ཇོ་བོ་རྗེས་སྦྱོང་རྒྱུད་སྤེལ་ཚུལ་དཀྱུས་སུ་གསུངས་པ་དེ་ལས། གཞན་རྡོར་དབྱིངས་སོགས་ཡོ་གའི་གཞུང་ཆེན་པོར་གསུངས་ཚུལ་དམིགས་བསལ་མི་སྣང་།། ༈ །།༡༥༩ པར་དཔྱལ་ལོ་དེ་ཤེས་འོད་པའི་སྒོམ་པ་འཆི་མེད་བདུད་རྩི་ཡང་ཡོད། དོན་དུ་དཔྱལ་

---

^{[མ་དཔེ་གཟིགས་ན་འདིར་གནོན།]}

འཕགས་པ་དཔལ་དང་། དཔྱལ་ཀུན་མཁྱེན་ཆེན་པོ་སོགས་ནས་བརྒྱུད་པའི་ཕུར་པ་དཔྱལ་ལུགས་སོགས་ད་ལྟའི་བར་བྱུང་། དཔྱལ་ལོའི་གདན་ས་ཐར་ལོ་སོགས་ཀྱིས་ཀྱང་རྙིང་མའི་རྒྱུད་གསང་སྙིང་འགྱུར་བཅོས་ཀྱིས་གཙོས་སྔ་འགྱུར་ལ་ཞེ་ཁེལ་བར་མཛད། དཔྱལ་ཀུན་མཁྱེན་འདི་བུ་སྟོན་དང་དུས་མཉམ། སྔ་འགྱུར་གྱི་ཡིག་ཆ་མཛད་པ་ཡང་མང་། དེར་མ་ཟད་རྒྱལ་ལོ་ཆེན་ཨེ་མོ་གྷས་ཀྱང་པཎ་ཆེན་ཤཱཀྱ་། ཤཱི་ལ་ཡང་དག་མེ་གཅིག་གསན་པ་སོགས་སྨན་ལུང་གི་དཔྱལ་བའི་གདུང་རབས་སྔ་མ་ནས་རྙིང་མ་གཙོ་བོར་མཛད་པར་གསལ་ནའང་ལོ་རྒྱུས་རྒྱས་པ་མ་མཇལ། ཐར་པ་ཆ་མཐུན་ལྔའི་རྒྱས་བཤད་མ་རྙེད་ཅིང་། །ལར་ཀུན་མཁྱེན་ཆེན་པོའི་གསུང་རབ་ལས་བརྡ་ཁྱད་ཟུར་གསལ་ཞིག་རྙིང་མའི་གཞུང་དང་བསྟུན་པས་ཆོས་ཀྱི་སྐད་ཀྱིས་འཆད་དཀའ་བ། དཔེར་ན་ཡིད་བཞིན་མཛོད་ཀྱི་གཟུགས་ཁམས་སོ་སོར་རིན་པོ་ཆེའི་ནམ་མཁའ་རེ་བཤད་པ། སློབ་དཔོན་རིན་པོ་ཆེའི་མུ་ཏིག་ཕྲེང་བའི་རྒྱུད་འགྲེལ་དུ་སྣང་བ་ལས་གཞན་མདོ་རྒྱུད་གང་ལའང་དེ་འདྲ་མ་གསུངས་པས་མཚོན། དེང་སང་ཀུན་མཁྱེན་གསར་རྙིང་གི་གཞུང་ལྗགས་@བྱང་བར་ཀློག་པ་རྣམས་ཀྱིས་ཀྱང་། རྒྱུ་མཚན་འཆད་དུ་མེད་པར་མང་བར་སྣང་།། ༈ །།༨༧༥འཇིག་རྟེན་ཕྱིན་ཅི་ལོག་གི་རྣམ་རྟོག་བརྒྱད་པ་སྡེའི་དཔེ་འདིར་ཡང་མེད་པ་སོགས་ཀྱིས་མ་རྙེད། ༈ །༤༤༦ཆོས་

---

^{[མ་དཔེ་གཟིགས་ན་འདིར་གནོན།]}

ལྔའི་མིང་གི་དབྱེ་བསྡུ་སྐབས། ཇོ་ནང་ཐེག་མཆོག་དབུ་མའི་གཞུང་རང་དུ། །དངོས་པོའི་མིང་དང་དེ་བཞིན་འབྲེལ་༢པའི་མིང་། །བསྡུས་༣དང་ཐ་དད་གྲགས་དང་མ་གྲགས་༦ཏེ། །མིང་གི་དབྱེ་བ་དྲུག་ཏུ་མ་འདུས་མེད། ཅེས་གསུངས། ཡེ་ཤེས་རྒྱ་མཚོའི་ཟིན་བྲིས་དཔེ་དོད་ཙམ་ཡོད་ཀྱང་། ཐ་དད་པའི་བཤད་པ་ཆད། གཞན་འདི་རིགས་ཀྱི་བཤད་པ་མང་པོ་མཐོང་ནའང་མིང་གི་རྣམ་གྲངས་དྲུག་ཏུ་བསྡུས་པའི་དམིགས་བསལ་མ་མཛད། དོན་གྱི་འབྲེལ་དཔྱད་ན་ནི། འདུས་པ་ལ་ལྡོག་པ་ཐ་དད་པའི་མཚན་ཉིད་ཨེ་ཡིན། དེ་ལྟར་ན་ཐ་དད་པའི་མིང་ནི་དེ་ལས་ལྡོག་པ་སྟེ། བུམ་པ་འདི་རྣམས་ནི། གསེར་དང་། དངུལ་དང་། ཟངས་ཀྱི་བུམ་པའོ། །ཞེས་ཁྱད་གཞི་གཅིག་ལས། བྱེ་བྲག་ཐ་དད་པར་སྣང་བའི་སྒྲ་སྤྱི་ལྟ་བུ། ཞེས་སྦྱར་ན་ཅི་འགྱུར་གཟིགས།། ༈ །།རྙིང་མའི་སྒྱུ་འཕྲུལ་ཁྲག་འཐུང་རྩ་འཚམས་ཀྱི་ཁུངས་སོགས་ལོ་ཆེན་རིན་པོ་ཆེའི་གསུང་རབ་ཀུན་བཟང་རོལ་པ་འདིར་རགས་རིམ་གསུངས་འདུག་པ་ལྟར། ཁུངས་དང་ལག་ལེན་གྱི་སྡོམ་ཚིག་ཙམ་བཀོད་ན་ཤིན་ཏུ་ལེགས་པས་ལྡེབ་གཅིག་ཙམ་འབྲི་རྒྱུ་མཛད་ན་ལགས། དེང་སང་ཕལ་ཆེར་ནས་ཁ་སྐད་དུ། ས་སྐྱའི་ཕུར་འཆམས་འདི་སློབ་དཔོན་རིན་པོ་ཆེས་བསམ་ཡས་ས་འདུལ་མཛད་དུས་རྡོ་རྗེ་ཕུར་པའི་སྒོ་ནས་ནམ་མཁའ་ནས་རྡོ་རྗེའི་འགྲོས་ཀྱིས་ས་གཞི་བྱིན་གྱིས་

---

^{[མ་དཔེ་གཟིགས་ན་འདིར་གནོན།]}

བརླབས་པའི་ཕྱག་ལེན་གྱི་རྒྱུན་འཁོན་རིགས་བརྒྱུད་པའི་ཕྱག་གཞེས་བར་མ་ཆད་པ་ཡིན་ཚུལ་དང་། འདི་ལ་བརྟེན་ནས་རྙིང་མའི་སྒྱུ་འཕྲུལ་བཀའ་བརྒྱད་ཀྱི་རྩ་འཆམས་སོགས་མཛད་སྐད་བཤད་མཁན་མང་ནའང་། སློབ་དཔོན་རིན་པོ་ཆེས་ཕུར་པ་ལ་བརྟེན་ནས་རྡོ་རྗེའི་འགྲོས་ཀྱིས་ས་གཞི་བྱིན་གྱིས་བརླབས་པ་དང་། དེའི་རྒྱུན་ཅི་རིགས་པ་བྱུང་ཡོད་པ་གཞིར་བཅས། འོན་ཀྱང་ད་ལྟའི་ཕྱག་ལེན་འདི་ནི་བླ་མ་དམ་པ་བསོད་ནམས་རྒྱལ་མཚན་ནས་སྒྱུ་འཕྲུལ་རྩ་འཆམས་ལ་བརྟེན་ནས་ཕུར་པའི་རྩ་འཆམས་མཛད་པ་སོགས་ལོ་ཆེན་རིན་པོ་ཆེས་ཇི་ལྟར་གསུངས་པ་བཞིན་ཡིན་ངེས་སོ། །ལར་ཟློས་གར་གྱི་རིགས་རྒྱ་བལ་དུ་གྲགས་པ་དངོས་ནི་བོད་འདིར་མ་དར་ནའང་། ཐུན་མོང་གི་དབང་དུ་བྱས་ན་ཨ་ལྕེ་ལྷ་མོ་རྩེ་བ་སོགས་ཀྱང་ཟློས་གར་ལས་མ་འདས་ཤིང་། ཐུན་མོང་མ་ཡིན་པའི་དབང་དུ་ན། ཁྲག་འཐུང་རྩ་འཆམས་སོགས་སྔོན་བྱུང་སྟོན་པའི་རྣམ་འཕྲུལ་རྗེས་འཇུག་གདུལ་བྱའི་ཉམས་ལེན་ལ་སྦྱར་བའི་འཕྲིན་ལས་ཀྱི་བྱང་བུ་དང་མཐུན་པར་ཟློས་གར་གྱིས་གདུལ་བྱའི་རྒྱུད་ལ་མངོན་སུམ་ལྟ་བུའི་ངེས་ཤེས་འདྲེན་པར་མཛད་པ་དང་། གཞན་གསར་རྙིང་གི་རྒྱུད་སྡེ་ཀུན་ལ་ཡོངས་སུ་གྲགས་པའི་གར་གྱི་རྣམ་བཞག་ཐམས་ཅད་ཀྱང་སྒེག་པ་ལ་སོགས་པའི་ཉམས་འགྱུར་དུ་མས་ཁྱད་པར་དུ་བྱས་པའི་ཟློས་གར་ཁོ་ན་ཡིན་པར་མ་ཟད། མུར་

---

^{[མ་དཔེ་གཟིགས་ན་འདིར་གནོན།]}

གར་རྒྱས་པ་སོགས་ཀྱི་འགྲོས་དང་། ཟློས་གར་གྱི་འཆམས་སྦྱོང་བའི་ཡན་ལག་ལྔ་སོགས་ཞིབ་ཏུ་སྦྱོང་རྒྱུ་ཡོད་པར་སྣང་།། ༈ །།སྒྲུབ་སྡེ་བརྒྱད་ཀྱི་དགོངས་པའི་བཤད་པ་སྐབས་འདིར་མདོར་བསྡུས་འདི་ཙམ་གྱིས་འཐུས་སྙམ། གཞན་དུ་བདེ་འདུས་ཀྱི་སྒོས་རྒྱུད་དང་། རྡོ་རྗེ་ཆོས་ཀྱི་ལུང་ལྔ་སོགས་ཕན་ཚུན་ལྟོ་སྦྱར་ནས་བཤད་ན་ཞིབ་ཏུ་འཆད་རྒྱུ་ཡོད་སྙམ་ནའང་དཔེ་མེད་པས་དཀྲིགས་ཆ་མ་འཚལ། གཏེར་གསར་བཀའ་བརྒྱད་བདེ་གཤེགས་ཀུན་འདུས་ཞེས་འདི་ལོར་འབེབས་པ་འདི་ལའང་འདི་སྦྱོར་བའི་བཤད་པ་རྒྱས་པར་འོང་རིགས་སུ་སྣང་། སྐུ་གསུང་ཐུགས་རྡོ་རྗེ་བརྩེགས་པའི་རྒྱུད་དུ་རྩ་ཚིག་རགས་རིམ་ཞིག་འདུག་ནའང་། རྒྱུད་དེའི་འགྲེལ་པ་འདྲ་ནི་བཞུགས་སྐད་མ་ཐོས། རྫོང་འཕྲང་སོགས་སུ་ཐོར་བུའི་བཤད་པ་མང་ནའང་། ཕྱོགས་གཅིག་ཏུ་རྐང་ཚུགས་པ་ནི་མེད། གང་ལྟར་འདི་རིགས་སྒྲུབ་སྡེའི་གཞུང་ལམ་གྱི་ཆོས་སྐད་ཆེན་པོར་སོང་བས་རྐང་ཚུགས་པའི་སྤྱི་དོན་ཉུང་གསལ་འདྲ་བྱུང་ན་ཤིན་ཏུ་དོན་གལ་ཆེ་བར་སྣང་།། ༈ །།རང་སྣང་ལོངས་སྐུ་ཆེན་པོ་དངོས་དང་། ཕྱེད་སྣང་ལོངས་སྐུ་ཕྱེད་གདུལ་བྱ་གཞན་གྱི་སྣང་བས་བསྡུས་པས་སྔ་མ་ལ་འོས་ནས་བཏགས་པ་འདི་ཁྱད་དུ་ཕྱེས་ན་ལེགས་སོ།། ༈ །།མཛོད་ཀྱི་རྒྱུ་དྲུག །རྐྱེན་བཞི་ལ་བྱེ་མདོ་རང་གི་ལུགས་ལྟར་ན་དཔེའམ་མཚན་གཞི་རེ་རེས་དམིགས་བསལ་ལྟར་ན་ཁྱབ་ཆུང་

---

^{[མ་དཔེ་གཟིགས་ན་འདིར་གནོན།]}

བ་ལྟ་བུའི་སྐྱོན་འབྱུང་བ་ཡིན་ནོ། །དེ་འདྲ་སྦྱར་བ་མ་མཇལ་རུང་། གང་ལྟར་ཡང་འདི་དང་ཉན་ཐོས་བསྒོམ་ལམ་པ་གང་ལ་བསྟེན། མཐོང་སྤང་དབྱེ་བ་སོགས་མཆིམས་མཛོད་འདི་ཚད་ཐུབ་ཀྱི་འགྲེལ་པར་སྣང་བས་འདིའི་རྗེས་སུ་འབྲངས་ཏེ་གསལ་ཁ་རེ་མཛད་རྒྱུ་བྱུང་ན་ཤིན་ཏུ་ལེགས།། ༈ །།གསང་འདུས་སྟོངས་ཐུན་གྱི་དོན་བསྡུས་འདི་ཁུངས་མང་ནའང་། སྔ་རབས་པའི་བཤད་སྲོལ་འཁྲུལ་མེད་རྗེས་སུ་ཟློས་པས་ལེགས་ཤིང་ལར་འདི་འདྲ་ཞིག་མ་གཏོགས། འདུས་པ་རང་གི་རྒྱུད་ཀྱི་སྤྱི་དོན་ལྟ་བུ་ནི་གཏན་ནས་མ་མཇལ་བས་ཅི་བྱ་མེད། མན་ངག་གི་དབང་དུ་བྱས་ན། རིམ་ལྔ་ཤེས་ན་འདུས་པའི་རྒྱུད་དོན་ཁྲོལ་བས། ཐོག་མར་རིམ་ལྔའི་ཁྲིད་འབོགས། གཟོད་རྒྱུད་ཀྱི་བཤད་པ་བྱེད་པ་སྔ་རབས་པ་ཐམས་ཅད་ལ་ཡོངས་སུ་གྲགས་ཤིང་འཕགས་འོད་དང་། བུ་སྟོན་རིན་པོ་ཆེ་མཇལ་དུས་ཀྱི་རྣམ་ཐར་གྱིས་ཀྱང་ཤེས། བཤད་ཐབས་ཙམ་ནི་རྒྱན་བདུན་གྱིས་བསྡུས་པ་སྒྲོན་གསལ་ལས་རྒྱ་ཆེར་བཤད་པ་ལྟར་རོ།། ༈ །།སོ་ཐར་ལམ་རིམ་བུ་སྟོན་རིན་པོ་ཆེའི་གསུང་འདི་བཞིན་ལས། སྤྱི་བབས། དགེ་སློང་དག་ཚུལ་ཁྲིམས་དག་པར་བྱས་ན་སེམས་ལས་སུ་རུང་བར་འགྱུར་རོ། །སེམས་ལས་སུ་རུང་ན་ཤེས་རབ་ཀྱི་མིག་སྐྱེ་བར་འགྱུར་རོ། །ཤེས་རབ་ཀྱི་མིག་སྐྱེས་ན་སེམས་ཟག་པ་ལས་གྲོལ་བར་འགྱུར་རོ། །ཞེས་འགྱོད་པ་

---

^{[མ་དཔེ་གཟིགས་ན་འདིར་གནོན།]}

མེད་པའི་ཚུལ་ཁྲིམས་ཀྱིས་སེམས་ལས་སུ་རུང་ཞིང་ཏིང་ངེ་འཛིན་འགྲུབ་སླ། དེས་ཤེས་རབ་ཀྱི་དབང་པོ་སྐྱེས་ཏེ་ལམ་ཐམས་ཅད་རྫོགས་པའི་ཚུལ་བཤད་པ་རྒྱ་ཆེར་སྣང་ནའང་། སོ་ཐར་གྱི་ཚུལ་ཁྲིམས་གཅིག་པུས་ལམ་ཐམས་ཅད་བགྲོད་པའི་ཚུལ་སོགས་ལམ་གྱི་རིམ་པར་གཟིགས་པ་དེ་འདྲ་ནི་མ་མཇལ་བས། བུ་སྟོན་རིན་པོ་ཆེའི་གསུངས་འདི་ཀ་སོར་བཞག་ན་ལེགས།། ༈ །།ཐོག་མར་བཤེས་གཉེན་བསྟེན་ཚུལ་ལ་ཐུག་པས་བཤེས་གཉེན་བསྟེན་པའི་ཕན་ཡོན་དང་། མ་བསྟེན་པའི་ཉེས་དམིགས་བསམ་པ། རྩ་བ་དད་པ་སྦྱང་བ། བཀའ་དྲིན་རྗེས་དྲན་གྱི་གུས་པ་གཉིས་ཀྱི་སྒོ་ནས་བསམ་པས་བསྟེན་ཚུལ་དང་། མཉེས་པ་གསུམ་གྱི་སྒོ་ནས་མཉེས་པར་བྱ་བ་སྦྱོར་བས་བསྟེན་ཚུལ་ལ་འབད་དེ་ལམ་གྱི་རྩ་བ་ཚུགས་པ་ཞིག་བྱ། དེ་ནས་དལ་འབྱོར་རང་གི་ངོ་བོ་ངོས་བཟུང་བ་དང་། གནས་སྐབས་དང་མཐར་ཐུག་ལ་ལྟོས་ནས་དོན་ཆེ་བ་དང་། དཔེ་དང་། ངོ་བོ་དང་། རྒྱུའི་སྒོ་ནས་རྙེད་པར་དཀའ་བའི་ཚུལ་རྣམས་སོ་སོར་རྟོག་པའི་ཤེས་རབ་ཀྱིས་དཔྱད་ནས་རྒྱུ་མཚན་དུ་མའི་སྒོ་ནས་ཡུན་རིང་དུ་བསམས་པས་སྐད་ཅིག་རེར་ཡང་དོན་མེད་དུ་བཏང་མི་ཕོད་པར་སྙིང་པོ་ལེན་འདོད་ཀྱི་བསམ་པ་བརྟན་པོ་བསྐྱེད། སྙིང་པོ་ལེན་ལུགས་ནི་སྐྱེས་བུ་གསུམ་གྱི་ལམ་ལ་རིམ་གྱིས་བློ་སྦྱོང་བ་སྟེ། དེ་ཡང་དལ་འབྱོར་གྱི་རྟེན་ཕུན་

---

^{[མ་དཔེ་གཟིགས་ན་འདིར་གནོན།]}

སུམ་ཚོགས་པ་འདི་ལྟ་བུ་ཐོབ་པའང་རིང་དུ་མི་གནས་པས་ངེས་པར་འཆི་བ་དང་། ནམ་འཆི་ལ་ངེས་པ་མེད་པ་དང་། འཆི་བའི་ཚེ་ཆོས་མ་གཏོགས་གཞན་གང་གིས་ཀྱང་མི་ཕན་པའི་ཚུལ་རྣམས་རྒྱུ་མཚན་དུ་མའི་སྒོ་ནས་བསམས་ཏེ་ཚེ་འདིའི་བྱ་བ་གང་གིའང་དབང་དུ་མི་གཏོང་བར་སྙིང་གི་ཐིག་ལེའི་གདམས་པ་ཟབ་མོ་འདི་བསྒོམ་པ་ལ་ཆིག་བསྒྲིལ་དུ་འབད་པར་ཐག་བཅད་པ་དང་། དེ་ནས་ངན་འགྲོའི་སྡུག་བསྔལ་ལ་བསམས་ཏེ་སྙིང་ནས་འཇིགས་པས་དཀོན་མཆོག་གསུམ་ལ་དེ་ལས་སྐྱོབ་པའི་ནུས་པ་ཡོད་པར་ཡིད་ཆེས་རྙེད་པ་བྱུང་བ་ན་སྐྱབས་འགྲོ་བསླབ་བྱ་དང་བཅས་པ་ལ་འབད། དེ་ལྟར་སྐྱེས་བུ་ཆུང་ངུའི་ལམ་ལ་སྦྱངས་པས་ཚེ་འདི་ལས་བློ་ལོག་སྟེ་འཇིག་རྟེན་ཕྱི་མའི་དོན་འབའ་ཞིག་སྒྲུབ་པར་སེམས་སྐྱེས་པ་ན་སྲིད་པ་མཐའ་དག་གི་ཉེས་དམིགས་དཔྱད་ཅིང་བསམས་ཏེ་བཙོན་རར་ཆུད་པའི་མི་གནས་དེ་ལས་ཐར་བར་འདོད་པ་དང་། མཚོལ་གནས་པའི་བྱ་རྣམས་མཚོ་དེ་འཁྱགས་པར་མཐོང་ན་གནས་དེ་ལ་སྐད་ཅིག་ཀྱང་མི་ཆགས་པར་གཞན་དུ་འགྲོ་བར་འདོད་པ་ཇི་ལྟར་བར་སྲིད་པ་མཐའ་དག་ལ་ཞེན་པ་གཏིང་ནས་ལོག་སྟེ་ཉིན་མཚན་ཀུན་ཏུ་ཐབས་གང་བྱས་ན་འཁོར་བའི་བཙོན་ར་འདི་ལས་ཐར་སྙམ་དུ་ཐར་པ་དོན་གཉེར་གྱི་བསམ་པ་འབའ་ཞིག་ངམ་ངམ་ཤུགས་ཀྱིས་སྐྱེ་བ་དང་། ཐར་པ་ཐོབ་པ་ལ་ལམ་བསླབ་པ་གསུམ་

---

^{[མ་དཔེ་གཟིགས་ན་འདིར་གནོན།]}

ལ་བསླབ་དགོས་པས། དེ་རྣམས་ཀྱི་གྲངས་དང་། གོ་རིམ་ངེས་པ། ངོ་བོ་མ་ནོར་བ་རྣམས་ལ་ངེས་པ་གཏིང་ཚུགས་པ་ཞིག་རྙེད་པར་བྱ་བ་དང་། ལྷག་པར་ཐེག་པ་གསུམ་གྱི་ཡོན་ཏན་ཐམས་ཅད་ཚུལ་ཁྲིམས་དག་པའི་མཐུ་ལ་ལྟོས་པར་ངེས་པ་བརྟན་པོ་རྙེད་པར་བྱས་ཏེ་བཅས་རང་གི་ཉེས་པ་ཕྲ་མོས་ཀྱང་མ་གོས་པའི་ཚུལ་ཁྲིམས་རྣམ་པར་དག་པ་ཞིག་ལ་སྐྱེས་བུའི་རྩལ་ཅི་ཡོད་ཀྱིས་འབད། དེ་ལྟར་སྐྱེས་བུ་འབྲིང་གི་ལམ་ལ་བློ་སྦྱངས་པས་འཁོར་བ་མཐའ་དག་ལས་བློ་ལོག་སྟེ་ཐར་པ་དོན་གཉེར་གྱི་འདུན་པ་ཤུགས་དྲག་པོ་སྐྱེས་པ་ན། རང་ཉིད་ཇི་ལྟ་བར་མཁའ་མཉམ་གྱི་སེམས་ཅན་ཐམས་ཅད་འཁོར་བའི་བཙོན་རར་ཚུད་ནས་སྡུག་བསྔལ་བརྒྱ་ཕྲག་གིས་གཟིར་བའི་ཚུལ་ལ་ཤས་མི་བཟོད་པའི་བརྩེ་བ་ཆེན་པོ་བསྐྱེད་དེ་ཐེག་པ་ཆེན་པོའི་ལམ་ཐམས་ཅད་ཀྱི་རྩ་བ་ནི་སྙིང་རྗེ་ཆེན་པོ་ལ་ཐུག་པས་སྙིང་རྗེ་ཆེན་པོ་བསྐྱེད་པ་ལ་འབད་དགོས་ཤིང་། དེ་བསྐྱེད་པ་ལ་ཡིད་འོང་གི་བྱམས་པ་བསྐྱེད་དགོས་ལ། དེ་བསྐྱེད་པ་ལ་མན་ངག་ལུགས་གཉིས་ཏེ། ཤེར་ཕྱིན་གྱི་མདོའི་དགོངས་པ་ལྟར་སེམས་ཅན་ཐམས་ཅད་ཕ་མ་དྲིན་ཅན་དུ་བལྟས་ནས་བསྐྱེད་པ་དང་། མདོ་སྡེ་ཕལ་པོ་ཆེའི་དགོངས་པ་ལྟར་སེམས་ཅན་ཐམས་ཅད་གནས་སྐབས་དང་མཐར་ཐུག་གི་ཡོན་ཏན་ཐམས་ཅད་བསྐྱེད་པའི་རྒྱུར་བལྟས་ནས་ཡིད་འོང་གི་བྱམས་པ་བསྐྱེད་ཚུལ་གཉིས་ལས་

---

^{[མ་དཔེ་གཟིགས་ན་འདིར་གནོན།]}

འདིར་གདམས་ངག་གཉིས་ཀའི་རྒྱུན་བསྲེས་ཏེ་བསྒོམ་པ་ཡིན་པས། ཐོག་མར་ཡིད་འོང་གི་བྱམས་པ་སྐྱེ་བའི་གཞི་སེམས་ཅན་ཐམས་ཅད་ལ་སེམས་སྙོམས་པའི་བཏང་སྙོམས་བསྒོམ། དེ་ནས་དེ་ཐམས་ཅད་ཚེ་རབས་དུ་མར་རང་གི་ཕ་མ་ལན་མང་དུ་བྱས་པའི་དྲིན་ཅན་ཤ་སྟག་ཡིན་པ་དང་། དེ་དང་དེའི་སྐབས་སུ་དྲིན་གྱིས་ཇི་ལྟར་བསྐྱངས་པའི་ཚུལ་དང་། དེ་དག་ལ་དྲིན་བཟོ་བྱ་དགོས་པའི་ཚུལ་རྣམས་སྒོ་དུ་མ་ནས་བསམས་ཏེ། ཡིད་འགྱུར་གྱི་མྱོང་བ་བརྟན་པོ་མ་སྐྱེས་པའི་བར་དུ་བསྒོམ། དེ་ཡང་བདག་གཅེས་འཛིན་གྱི་སྐྱོན་དང་། གཞན་གཅེས་འཛིན་གྱི་ཕན་ཡོན་སྒོ་དུ་མ་ནས་བསམས་ཏེ་རང་གཅེས་འཛིན་གྱི་བློ་ངན་འདི་རྒུད་པ་ཐམས་ཅད་ཀྱི་འབྱུང་གནས་དང་། གཞན་གཅེས་འཛིན་ཡོན་ཏན་ཐམས་ཅད་ཀྱི་འབྱུང་གནས་སུ་ངེས་པ་བརྟན་པོ་རྙེད་པ་ཞིག་བྱ། དེ་ནས་མཁའ་ཁྱབ་ཀྱི་སེམས་ཅན་ཐམས་ཅད་ཀྱི་གནས་སྐབས་དང་མཐར་ཐུག་གི་བདེ་བ་ཐམས་ཅད་བསྐྱེད་པ་དང་། དམྱལ་བའི་སྡུག་བསྔལ་ནས་དགྲ་བཅོམ་པ་རྣམས་དབུ་བསྙུང་བ་ལྟ་བུའི་སྡུག་བསྔལ་ཕྲ་མོ་ཡོད་པ་དང་། ས་བཅུ་བའི་བྱང་ཆུབ་སེམས་དཔའ་རྣམས་ཀྱི་ཐུགས་རྒྱུད་ལ་གཉིས་སྣང་ཕྲ་མོ་ཡོད་པའི་བར་གྱི་སྡུག་བསྔལ་ཐམས་ཅད་གཏན་ནས་བྱང་བར་འདོད་པ་དང་། དེ་ཡང་སྨོན་པའི་ཡུལ་ཙམ་དུ་མ་བཞག་པར་རང་ཉིད་ཁོ་ནའི་ཁུར་དུ་འཁྱེར་བའི་གཞན་

---

^{[མ་དཔེ་གཟིགས་ན་འདིར་གནོན།]}

དོན་དོན་གཉེར་གྱི་བློ་དང་། དེ་ལྟ་བུའི་གཞན་དོན་རླབས་པོ་ཆེ་སྒྲུབ་པ་ལ་རང་ངོས་ནས་སྐྱོན་ཀུན་ཟད་ཡོན་ཏན་ཀུན་རྫོགས་སངས་རྒྱས་ཀྱི་གོ་འཕང་དེ་ངེས་པར་ཅི་ནས་ཀྱང་ཐོབ་དགོས་པར་འདུག་སྙམ་པའི་ངེས་པའི་ཤེས་པ་བརྟན་པོ་བསྐྱེད་པ་བྱང་ཆུབ་དོན་གཉེར་གྱི་ཚུལ་ལ་བློ་གཞན་རྐྱེན་གང་གིས་ཀྱང་འཕྲོག་ཏུ་མི་ནུས་པ་བསྒོམ་པར་བྱའོ། །དེ་ནས་ལམ་ཕ་རོལ་ཏུ་ཕྱིན་པ་དྲུག་དང་། ཁྱད་པར་ཞི་གནས་ལྷག་མཐོང་བསྒོམ་པ་ལ་རྩལ་དུ་འདོན་དགོས་ཏེ། དེའི་ཚུལ་ཡང་། དབུ་མ་རིག་ཚོགས་ནས་གསུངས་པའི་རིགས་པས་བདག་མེད་གཉིས་གཏན་ལ་ཕབ་སྟེ། དེ་ཉིད་ཡུལ་དུ་བྱས་ཏེ་དེའི་སྟོང་སེམས་འཇོག་པ་སོགས་སེམས་གནས་དགུ་ལ་བརྟེན་ནས་བྱིང་རྒོད་གང་གིས་ཀྱང་མི་གཡེང་བར་ཅི་འདོད་དུ་འཇོག་ནུས་པའི་ཏིང་ངེ་འཛིན་ཁྱད་པར་ཅན་ཞིག་འབད་པས་བསྒྲུབ། དེ་གྲུབ་པ་ན་སེམས་རྩེ་གཅིག་ཏུ་གནས་བཞིན་པའི་ངང་ནས་སོ་སོར་རྟོགས་པའི་ཤེས་རབ་ཁྱད་པར་ཅན་གྱིས་སེམས་ཀྱི་གནས་ལུགས་ལ་དཔྱད་དེ་ངེས་པ་འདྲེན་པ་དང་། ངེས་པའི་དོན་ལ་རྩེ་གཅིག་འཇོག་པ་དང་། རྗེས་ཐོབ་ཏུའང་གང་སྣང་ཐམས་ཅད་སྒྱུ་མ་དང་རྨི་ལམ་ལྟ་བུར་བལྟ་ཞིང་སྣང་བ་རྟེན་འབྲེལ་དུ་འཆར་ཞིང་སྟོང་པར་འཆར་བ་དང་། སྣང་བས་ཡོད་མཐའ་སེལ་ཞིང་སྟོང་པས་མེད་མཐའ་སེལ་བ་བདེན་གཉིས་ཟུང་འཇུག་གི་ཚུལ་ངེས་པ་ཐག་ཆོད་པ་ཞིག་རྙེད་

---

^{[མ་དཔེ་གཟིགས་ན་འདིར་གནོན།]}

པར་བྱའོ། །དེ་ལྟར་སྐྱེས་བུ་ཆེན་པོའི་ལམ་ལ་བློ་སྦྱངས་པས་རང་དོན་ཡིད་བྱེད་མཐའ་དག་ལ་བློ་ལོག་སྟེ་གཞན་ཕྱིར་སངས་རྒྱས་ཐོབ་འདོད་ཀྱི་བློ་བཅོས་མིན་སྐྱེས་པ་ན། མྱུར་བ་མྱུར་བར་སངས་རྒྱས་ཀྱི་གོ་འཕང་ཐོབ་པའི་ཕྱིར་གསང་སྔགས་རྡོ་རྗེ་ཐེག་པའི་སྒོར་ཞུགས་པར་བྱ་སྟེ། དེ་ཡང་རྒྱུད་མ་སྨིན་པ་སྨིན་པར་བྱེད་པ་དབང་དང་། དབང་གི་སྲོག་དམ་ཚིག་དང་སྡོམ་པ་དང་གྲོལ་བར་བྱེད་པ་བསྐྱེད་རྫོགས་ཀྱི་ལམ་འཁོར་དང་བཅས་པ་ལ་བརྩོན་པར་བྱའོ། །དེ་ལྟར་འབད་པས་སྐྱེས་བུ་ཆུང་ངུའི་ལམ་ལ་སྦྱངས་པའི་ལག་རྗེས་སུ། ཚེ་འདིའི་བྱ་བ་ཐམས་ཅད་བྱིས་པའི་སྤྱོད་ཚུལ་དང་སྨོན་པའི་ཟློས་གར་ལྟ་བུར་མཐོང་ནས་ཚེ་འདི་ལ་མ་ཆགས་པར་འཇིག་རྟེན་ཕྱི་མའི་དོན་སྒྲུབ་པར་འདོད་པའི་བསམ་པ་བརྟན་པོ་ཞིག་སྐྱེ་བ་འབྱུང་། དེ་ནས་སྐྱེས་བུ་འབྲིང་གི་ལམ་ལ་སྦྱངས་པའི་ལག་རྗེས་ལ་སྲིད་རྩེ་ནས་མནར་མེད་བར་གྱི་ཁམས་གསུམ་འཁོར་བའི་གནས་ཐམས་ཅད་བཙོན་ར་དང་མེ་འབར་བའི་འོབས་ལྟར་མཐོང་ནས་སྲིད་པ་མཐའ་དག་ལ་ཞེན་པ་གཏིང་ནས་ལོག་སྟེ་ཉིན་མཚན་ཀུན་ཏུ་ཐར་པ་དོན་གཉེར་གྱི་བསམ་པ་བརྟན་པོ་སྐྱེས་ནས་ཐར་པ་ཐོབ་པའི་ཐབས་དམ་པ་བསླབ་པ་རིན་པོ་ཆེ་རྣམ་པ་གསུམ་ལ་ལྡོག་ཏུ་མེད་པའི་ངེས་ཤེས་དང་བརྩོན་འགྲུས་རྩོམ་ནུས་པ་ཞིག་འབྱུང་། དེ་ནས་སྐྱེས་བུ་ཆེན་པོའི་ལམ་ལ་སྦྱངས་པའི་ལག་རྗེས་ལ་འགྲོ་ཀུན་

---

^{[མ་དཔེ་གཟིགས་ན་འདིར་གནོན།]}

ཕ་མ་དྲིན་ཅན་དུ་མཐོང་ནས་ཉིན་མཚན་ཀུན་ཏུ་བྱམས་སྙིང་རྗེ་ངམ་ངམ་ཤུགས་ཀྱིས་སྐྱེ་ཞིང་རང་དོན་ཡིད་བྱེད་ཀྱི་བསམ་པ་ལས་ལོག་སྟེ་ཅི་བྱེད་གཞན་དོན་ཁོ་ནར་སྤྱོད་པ་དང་། བདག་བས་གཞན་གཅེས་ཀྱི་བྱང་ཆུབ་ཀྱི་སེམས་རིན་པོ་ཆེ་ལྡོག་ཏུ་མེད་པ་སྐྱེས་ནས་དེས་ཀུན་ནས་བསླངས་ཏེ་སྒོ་གསུམ་གྱི་གཡོ་བ་ཐམས་ཅད་ཕར་ཕྱིན་དྲུག་ལས་མི་འདའ་བ་ཞིག་འབྱུང་། དེ་ནས་འགྲོ་བ་སྒྲོལ་བའི་སྙིང་སྟོབས་ཇེ་ཆེར་འཕེལ་ཏེ་གསང་སྔགས་ཀྱི་སྒོར་ཞུགས་པ་ནས་དམ་ཚིག་དང་སྡོམ་པ་སྲོག་ལས་ཀྱང་གཅེས་པར་སྲུང་བ་གཞིར་བཞག་ནས་རིམ་པ་དང་པོ་ལ་བསླབས་པས་ཡིད་ངོར་ཐ་མལ་གྱི་སྣང་ཞེན་འགོག་ཐུབ་པ་དང་། གང་ཤར་ཐམས་ཅད་དག་པ་རབ་འབྱམས་སུ་འཆར་བ། རྫོགས་རིམ་ཡོངས་རྫོགས་སྐྱེ་བའི་རྒྱུད་སྨིན་པ་ཞིག་འབྱུང་། དེ་ནས་རིམ་པ་གཉིས་པ་ལ་བསླབས། ལས་རླུང་གི་རྒྱུ་པ་དྷཱ་ཏིར་འགགས་ནས་འོད་ཙ གསལ་འཆར་བ་དང་། དེ་ལས་ལྡང་བ་ན་མཚན་དཔེས་སྤྲས་པའི་དངོས་གནས་ལས་ཐོན་ཏེ་སྔགས་ལམ་གྱི་བསྒྲུབ་བྱ་མཐར་ཐུག་ཟབ་གསལ་གཉིས་མེད་ཀྱི་ཡེ་ཤེས་ཟུང་འཇུག་གི་སྐུ་འགྲུབ། སྐུ་དེའི་རིགས་འདྲའི་རྒྱུན་ལས་སྐུ་གསུམ་ཡེ་ཤེས་ལྔ་ལྡན་གྱི་གོ་འཕང་འགྲུབ་སྟེ། དེ་ཐོབ་ནས་ཕྲིན་ལས་ཉི་ཤུ་རྩ་བདུན་གྱི་སྒོ་ནས་འགྲོ་ཀུན་མོས་ངོར་དང་འཚམས་པའི་སྤྲུལ་པས་ཕྲིན་ལས་རྒྱུན་མི་འཆད་པར་འབྱུང་བ་ཡིན་ནོ། །

---

^{[མ་དཔེ་གཟིགས་ན་འདིར་གནོན།]}

ཤུ་བྷཾ། ༈ །ལམ་སྒྲོན་འགྲེལ་པ་ཕུལ་བྱུང་དགྱེས་པའི་མཆོད་སྤྲིན་ལས། སྐྱེས་བུའི་སྐད་དོད་པུ་རུ་ཥ་ནུས་ལྡན་ལ་འཇུག་པས། ཚེ་ཕྱི་མ་ཕན་ཆད་ཀྱི་དོན་བསྒྲུབ་ནུས་ཞིག་སྐབས་འདིར་བསྟན་གྱི་སྐྱེས་བུ་ཞེས་བྱ། དེ་ལའང་ཚེ་འདིའི་ཞེན་པ་ལོག་ནས་ཕྱི་མའི་འཁོར་བ་དེའི་ཆེད་དུ་ལས་འབྲས་ཀྱི་བླང་དོར་བསྒྲུབ་ནུས་པ་དང་། འཁོར་བ་མཐའ་དག་ལ་ཞེན་པ་ལོག་ནས་དེ་ལས་ཐར་པའི་ཆེད་དུ་ལམ་བསླབ་པ་ཆ་གསུམ་བསྒྲུབ་ནུས་པ་དང་། སྲིད་ཞིའི་སྐྱོན་མཐོང་ནས་འགྲོ་ཀུན་སངས་རྒྱས་ཀྱི་ས་ལ་འགོད་པའི་ཁུར་འཁྱེར་ནུས་པ་སྟེ་ཆུང་འབྲིང་ཆེན་པོའོ། །སོ་སོའི་མཚན་ཉིད་ནི། ཕྱི་མ་ཕན་ཆད་སྒྲུབ་ནུས་ཀྱི་སྐྱེས་བུ་གང་ཞིག །སྦྱོར་བསམ་ཐབས་ཀྱི་ཁྱད་པར་སྡིག་སྤོང་དགེ་སྒྲུབ། བསམ་གཟུགས་བརྒྱད་སོགས་ཀྱི་དབྱེ་བ་གང་དག་གིས། འབྲས་བུའི་ཁྱད་པར་ལྷ་མིའི་གནས་ལུས་ལོངས་སྤྱོད་ཀྱིས་བསྡུས་པའི་སྲིད་པ་འཁོར་བའི་མངོན་མཐོའི་བདེ་བ་ཙམ་ལ་དམིགས་ནས། བསམ་པའི་ཁྱད་པར་རང་ཉིད་ཁོ་ནའི་དོན་དུའམ་ཆེད་དུ་དམིགས་ནས་དོན་དུ་གཉེར་བར་བྱེད་པ། འདིར་སྲིད་པའི་བདེ་བ་ཙམ་ཞེས་པས་ཐར་ལམ་སྒྲུབ་པའི་རྟེན་དོན་དུ་གཉེར་བའི་སྐྱེས་བུ་འབྲིང་གཅོད། རང་ཉིད་ཅེས་པས་བྱང་སེམས་ཀྱིས་གཞན་དོན་དུ་གཉེར་པ་གཅོད་ལ། འདིའི་ལམ་གྱི་དངོས་གཞི་མི་རྟག་པ། ཉེས་དམིགས། སྐྱབས་འགྲོ། ལས་འབྲས་བཅས་

---

^{[མ་དཔེ་གཟིགས་ན་འདིར་གནོན།]}

དམིགས་སྐོར་བཞི་དང་། བཤེས་གཉེན་བསྟེན་པ་དང་། དལ་འབྱོར་གྱི་ཆོས་སྐོར་གྱི་གསུམ་ཀའི་ལམ་གྱི་གཞི་རྟེན་དུ་བྱས་ནས། སྔོན་གྱི་ལམ་སྒྲོན་འགྲེལ་བ་རྣམས་སུ་རྒྱས་པར་གསུངས། གཉིས་པ་ནི། སྐྱེས་བུ་གང་ཞིག་བསམ་པའི་ཁྱད་པར་སྲིད་རྩེ་ནས་མནར་མེད་པར་ལས་ཉོན་གྱི་གཞན་དབང་དུ་སོང་བའི་སྡུག་བསྔལ་ཅན་འབའ་ཞིག་ཏུ་མཐོང་ནས། སྲིད་པ་དེ་རྨི་ལམ་ཙམ་དུའང་འདོད་པ་མེད་པར་རྒྱབ་ཀྱིས་ཕྱོགས་ཤིང་། སྦྱོར་བའི་ཁྱད་པར་བསམ་པ་དེའི་སྟོབས་ཀྱིས་སྒོ་གསུམ་གྱི་སྡིག་པའི་ལས་འཁོར་བ་དང་བཅས་པ་ལས་ལྡོག་པའི་བདག་ཉིད་ཅན་གྱི་བསླབ་གསུམ་གྱི་ཉམས་ལེན་ཅི་རིགས་ལ་གནས་པ་དང་། འབྲས་བུའི་ཁྱད་པར་རང་ཉིད་གཅིག་པུ་སྡུག་ཀུན་ཉེ་བར་ཞི་བའི་མྱང་འདས་ཙམ་དུ་གཉེར་བ་འབྲིང་པོ། འདིར་སྲིད་པའི་བདེ་ལ་རྒྱབ་ཕྱོགས་ཞེས་པས་སྡུག་བདེན། སྡིག་པའི་ལས་ལས་ཞེས་པས་ཀུན་འབྱུང་། རང་ཞི་ཙམ་ཞེས་པས་འགོག་བདེན། ལྡོག་པའི་བདག་ཉིད་ཅེས་པས་ལམ་བདེན། དེས་ན་སྐྱེས་བུ་འབྲིང་ལ་ཐེག་པའི་སྒོ་ནས་ཉན་རང་གཉིས། བསྒོམ་བྱའི་སྒོ་ནས་བདེན་བཞི་དང་རྟེན་འབྲེལ་གཉིས། གང་ཟག་གི་བདག་མེད་ཐུན་མོང་བ་དང་། ཕྲ་མོ་སྒོམ་པ་གཉིས། རྣལ་འབྱོར་སྤྱོད་པའི་དབུ་མ་རང་རྒྱུད་པ་སོགས་ལྟར་ན་གཉིས་སྟོང་སྒོམ་པ་ཞིག་དང་གསུམ་ཡོད་དོ། །གསུམ་པ་སྐྱེས་བུ་གང་ཞིག་རང་ཉིད་སྡུག་

---

^{[མ་དཔེ་གཟིགས་ན་འདིར་གནོན།]}

བསྔལ་གྱིས་མནར་ཚུལ་རྒྱུད་སྟེང་དུ་ལེགས་པར་རྟོགས་ནས། ཚུལ་དེར་དཔག་པའི་བློས་སེམས་ཅན་གཞན་རྣམས་ཀྱང་དེ་དང་འདྲ་བར་སྡུག་བསྔལ་བ་ལ་མི་བཟོད་པའི་སྙིང་རྗེའི་སྟོབས་ཀྱིས་གཞན་གྱི་སྡུག་བསྔལ་རྒྱུ་དང་བཅས་པ་ཀུན། ཐབས་སྣ་ཚོགས་པ་ཀུན་གྱི་སྒོ་ནས་ཟད་པར་འདོད་པ་དེ་ནི་མཆོག་གོ །དགེ་བཤེས་ཚུལ་སེང་པའི་ཊི་ཀར། ཡང་ན་གསང་ཕུབས་རང་རྒྱུད་གཏོགས་པ་སྟེ་བདག་གི་རྒྱུད་དུ་གཏོགས་པའི་སྡུག་བསྔལ་གྱིས་སེམས་ཅན་མ་ཟད་བར་དུ་སྡུག་བསྔལ་ཐམས་ཅད་འཁུར་བར་འདོད་པ་སྨོན་པའི་སེམས་བསྐྱེད་ཅེས་སོགས་གསུངས། འདི་ལ་ལྟ་བའི་སྒོ་ནས་དབུ་སེམས། ཐེག་པའི་སྒོ་ནས་མདོ་སྔགས་གཉིས་སོ། །སྒོམ་རིམ། འཇུག་པ། དབུ་མ་རྒྱན། བསླབ་བཏུས། བེ་བུམ་སྔོན་པོ་སོགས་སུ་ལམ་གྱི་ཆིངས་མི་འདྲ་བ་དུ་མ་ཞིག་མཛད་ཀྱང་། འདིར་སེམས་བསྐྱེད་ཆོག་དང་བཅས་པ། སེམས་བསྐྱེད་ནས་སྤྱོད་པ་ལ་སློབ་ཚུལ། བསླབས་པའི་འབྲས་བུ་ངོས་བཟུང་བ་གསུམ་དུ་བསྡུ་བར་མཛད་དོ། །ཆུང་ངུ་འབྲིང་དང་མཆོག་གྱུར་པའི། སྐྱེས་བུ་གསུམ་དུ་ཤེས་པར་བྱ། ཞེས་དང་། གང་ཞིག་ཐབས་ནི་གང་དག་གིས་འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །སྐྱེས་བུ་དེ་ནི་ཐ་མར་ཤེས། །སྲིད་པའི་བདེ་ལ་རྒྱབ་ཕྱོགས་ཤིང་། །སྡིག་པའི་ལས་ལས་ལྡོག་བདག་ཉིད། །

---

^{[མ་དཔེ་གཟིགས་ན་འདིར་གནོན།]}

གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཤེས་བྱ། རང་རྒྱུད་གཏོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་དག །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་སོ།། ༈ །།རྒྱ་སྐད་སྨོས་པ་ལ། བྱས་པ་ཤེས་ཤིང་དྲིན་དུ་བཟོ་བ། ཆོས་ཁུངས་བཙུན་པར་ཤེས་པ། ལེགས་སྦྱར་གྱི་སྐད་ཤེས་པ་དང་པོ་ནི། སྤྲང་པོ་ལའང་ཨཱ་ཙརླ་ཞེས་འབོད། གཉིས་པ་ནི། །ཁམས་གསུམ་ཨཱ་ཙརླའི་གཏམ་རྒྱུད་ཀྱིས་ཤེས། གསུམ་པ་ནི། མུ་རུབ་ལོ་ཙཱ་བས་མདོ་སྡེ་མང་པོའི་མཚན་གྱི་སྐད་དོད་ལ་བརྟེན་ནས་ལོ་ཙཱ་བ་ཤེས།། ༈ །།སྐྱེས་བུ་ཆུང་ངུ་དང་ཐུན་མོང་བའི་ལམ་ལ་བློ་འབྱོངས་པ་ཞིག་བྱུང་ན་ཚེ་བློས་བཏང་གི་གང་ཟག་ཟེར་བ་ཡིན། དེ་ལའང་གཏད་པ་བཞི། རྡོ་རྗེ་གསུམ། བུད་སྙེགས་ཐོབ་གསུམ་གྱི་བསམ་སྦྱོར་དགོས། བློ་ཕུག་ཆོས་ལ་གཏད་དགོས་ཏེ། འཆི་བའི་ས རྩ་བ་གསུམ་བསམ་དགོས་པའི་ཕྱིར། ཆོས་ཕུག་སྤྲང་ལ་གཏད་དགོས་ཏེ། དེ་ཡང་སྤྲང་འཁྱམ་བྱེད་པ་ཙམ་མ་ཡིན་ཏེ། འདོད་པའི་བློ་སྣ་བཟློག་དགོས་པ་ལ་ཟེར། དེས་ཕྱི་མ་ཕན་ཆད་ཀྱི་སྐྱིད་མགོ་ཚུགས་པའི་ཕྱིར། དེས་ན་ཆོས་འཇིག་རྟེན་གཉིས་ཀ་མཉམ་དུ་གྲུབ་པའི་དཔེ་མེད། སྤྲང་ཕུག་ཤི་ལ་གཏད་དགོས་ཏེ། འབྱོར་དབུལ་གཉིས་ཀ་འཆི་ཡང་། ཆོས་བྱས་ནས་འཆི་བ་ནི་ཁྱད་པར་ཆེ། འདིར་སྣང་གི་འཁྲི་བ་

---

^{[མ་དཔེ་གཟིགས་ན་འདིར་གནོན།]}

བཅད་པས་སྤྲང་ལ་ཐུག་ཀྱང་ཆོས་མི་གཏོང་། སྤྲང་ཐ་ཤི་ལ་ཐུག་ཀྱང་ཆོས་མི་གཏོང་བ་ཞིག་དགོས་པའི་ཕྱིར། ཤི་ཕུག་བྲག་པོ་སྐམ་པོ་ལ་གཏད་དགོས་ཏེ། ཚེ་འདིའི་འབྱོར་འཁོར་བུན་ལང་གིས་ཤི་ཚེ་གནོད་མ་གཏོགས་ཕན་མི་བཏགས་པའི་ཕྱིར། དེའང་ཡིན་ཏེ། བདག་ཅག་གི་སྟོན་པས་རབ་ཏུ་བྱུང་བ་དང་། འཚོ་བ་དཀའ་ཐུབ་ལ་བརྟེན་པ་དང་། ལོ་དྲུག་ཏུ་དཀའ་ཐུབ་ལས་གཞན་པའི་འཚོ་ཐབས་མི་མཛད་པ་དང་བཞུགས་གནས་ཆུ་བོ་ནེ་རཉྫནའི་འགྲམ་ཙམ་ལ་བརྟེན་པས་དེ་དང་དེ་གྲུབ་པའི་ཕྱིར། ཐེབ་མེད་རྡོ་རྗེ་སྔོན་ལ་བཏང་མི་འགྱུར་བ། དགོས་པར་གྲུབ་སྟེ། རྒྱལ་པོ་སོགས་ཀྱིས་བཤོལ་ཐབས་མེད་པ་དང་། ཁྲེལ་མེད་རྡོ་རྗེ་རྗེས་ལ་འཇོག་དགོས་ཏེ། རྒྱལ་པོ་འཁོར་བཅས་མྱ་ངན་གྱིས་གདུང་ཡང་མ་གཟིགས་པ་དང་། ཡེ་ཤེས་བཤོལ། རྡོ་རྗེ་རང་དང་འགྲོགས་དགོས་པར་གྲུབ་སྟེ། ལོ་དྲུག་ཏུ་མཁའ་ཁྱབ་ཀྱི་ཏིང་འཛིན་ལ་སྙོམས་པར་ཞུགས་པའི་ཕྱིར། གཞན་ཡང་རྒྱལ་པོའི་སྲིད་སྤངས་ནས་གཅིག་པུར་ཐོབ་པས་མི་གྲལ་ནས་བུད། ནེ་རཉྫནའི་འགྲམ་དུ་དཀའ་ཐུབ་ཀྱིས་འདའ་བའི་ཚེ་ཕྱུགས་རྫི་སོགས་ཀྱིས་འཕྱང་བས་ཁྱི་གྲལ་དུ་སྙེགས་པ་དང་། མཐར་སངས་རྒྱས་ནས་ལྷ་དང་བཅས་པའི་ཚོགས་ཀྱི་དབུས་ན་མངོན་པར་མཐོ་བ་སྟོན་པ་ཡང་དག་པ་མཉམ་མེད་ཤཱཀྱའི་རྒྱལ་པོ་ཉིད་དོ།། ༈ །།ལམ་སྦྱང་བསྟན་ཞེས་གྲགས་

---

^{[མ་དཔེ་གཟིགས་ན་འདིར་གནོན།]}

པའི་ལམ་ནི། ཚོགས་སྦྱོར་མཐོང་སྒོམ་བླ་ན་མེད་པའི་ཁྱད་པར་བྱང་ཆུབ་བར་ཆད་མེད་ལམ་སྟེ་དྲུག་གོ །སྦྱངས་ནི་སྤྱིར་སྡིག་པ་དང་ལམ་ཕྱི་མ་གཉིས་ལ་སྒྲིབ་གཉིས་སྦྱང་བའོ། །བསྟན་པ་ནི་ཁྱད་པར་གྱི་ལམ་བདེ་བ་ཅན་དུ་གནས་སྤོར་བ་མངོན་མཐོའི་ལམ་དང་། བར་ཆད་མེད་པའི་ལམ་བྱང་ཆུབ་ཆེན་པོར་གནས་སྤོར་བ་ངེས་ལེགས་ཀྱི་ལམ་བསྟན་པའོ། །ཡང་གཞུང་དང་སྦྱར་ན། དཀོན་མཆོག་རིན་ཆེན་དཔལ་ཞེས་པ་ནི་བདག་མདུན་གྱི་དཀྱིལ་འཁོར། དཀོན་མཆོག་རིན་ཆེན་ལས་བྱུང་བ། ཞེས་པ་ནི། དེ་དག་མཆོད་བསྟོད་སོགས་བྱས་པས་བསོད་ནམས་ཀྱི་ཚོགས་གསོག །དཀོན་མཆོག་རིན་ཆེན་འོད་ཟེར་གྱིས། ཞེས་པ་ནི། དེ་དག་གི་བྱིན་རླབས་སོ། །རིན་ཆེན་ཕྲེང་བ་རྣམ་དག །ཅེས་པ་ནི། དེ་དག་གི་བྱིན་རླབས་ལ་བརྟེན་ནས་སྒྲུབ་པ་པོའི་རྒྱུད་ཡོངས་སུ་དག་པས། གཞན་དོན་བྱེད་པའི་མཐུ་དང་ལྡན་པའོ། །དེ་དག་ནི་གཞན་དོན་རྒྱུ་རྐྱེན་ཚོགས་པའི་ཚོགས་ལམ་མོ། །བརྟེན་བསྐྱེད་ནས་ཕྱག་གི་བར་གྱིས་ནི། གཞན་དོན་རྒྱ་ཆེན་པོ་ལ་སྦྱོར་བས་སྦྱོར་ལམ་མོ། །དེ་ནས་དཀྱིལ་འཁོར་བསྟན་ནས་རྟེན་དང་བརྟེན་པའི་དཀྱིལ་འཁོར་མཐོང་བ་ནི་མཐོང་ལམ་མོ། །དེ་ནས་མཐོང་ཟིན་གྱི་དོན་ཡིད་ལ་བསྒོམ་པ་སྒོམ་ལམ་མོ། །གང་ཟག་གི་བདག་མེད་བསྟན་ནས་རྒྱལ་བའི་སྐུ་གསུམ་ཡེ་ཤེས་ལྔ་ལྡན་དུ་སྤོར་པ་ནི་ཁྱད་པར་གྱི་ལམ་མོ། །

---

^{[མ་དཔེ་གཟིགས་ན་འདིར་གནོན།]}

དེ་ནས་ཕུང་ཁམས་སྒྱུ་མ་ལྟ་བུའི་གང་ཟག་དེ། འདུན་པ་སྨོན་ལམ་གྱིས་མཚམས་སྦྱར་ནས་བདེ་བ་ཅན་དུ་གནས་སྤོར་བ་ནི་ཁྱད་པར་གྱི་ལམ་མོ། །དེ་ནས་ཕུང་ཁམས་སྐྱེ་མཆེད་ཀྱི་བག་ཆགས་མ་ལུས་པ་ཡེ་ཤེས་ཀྱི་མེས་བསྲེགས་ནས་རྒྱལ་བའི་སྐུ་གསུམ་ཡེ་ཤེས་ལྔ་ལྡན་དུ་བསྒྱུར་བ་འདི་ནི་བྱང་ཆུབ་བར་ཆད་མེད་པའི་ལམ་མོ། །ཞེས་གཙུག་དགུ་ནས་འབྱུང་བ་ལས་ཟུར་དུ་བཀོལ་བའོ།། ༈ །།སློབ་དཔོན་རབ་ཏུ་དགའ་བའི་རྡོ་རྗེས་མཛད་པའི་མཉམ་སྦྱོར་གྱི་འགྲེལ་པར། ཐེག་པ་ཆེན་པོའི་ཡོན་ཏན་རྒྱས་པ་མ་ལུས་པས་དུས་གསུམ་དུ་རྒྱལ་བ་ཐམས་ཅད་ལ་བསྟོད་པར་བྱའོ། །དེ་ཡང་མཉམ་ཉིད་མི་གཡོ། ཞེས་པ་ནས། མཆོག་ཆོས་ཅན། ཞེས་པའི་བར་གྱིས་མེ་ལོང་ལྟ་བུའི་ཡེ་ཤེས་ཀྱི་སྒོ་ནས་བསྟོད་པ་དང་། ཡོན་ཏན་ཤིན་ཏུ་ཕྲ་བའི་ཆ། ཞེས་པ་ནས། ངེས་པར་སྩོལ་གྱི་བར་དུ་མཉམ་པ་ཉིད་ཀྱི་ཡེ་ཤེས་ཀྱི་སྒོ་ནས་བསྟོད་པ་དང་། རྟག་ཏུ་དྲི་མ་མེད་པ། ཞེས་པ་ནས། རྟག་ཏུ་རྣམ་པར་སྣང་། ཞེས་པའི་བར་སོ་སོར་རྟོག་པའི་ཡེ་ཤེས་ཀྱི་སྒོ་ནས་བསྟོད་པ་དང་། ཚད་མེད་ཚད་དང་བྲལ་བའི། ཞེས་བྱ་བ་ནས། ཡོངས་སུ་མི་འགྱུར་ཞེས་བྱ་བའི་བར་གྱིས་བྱ་བ་ནན་ཏན་གྱི་ཡེ་ཤེས་ཀྱི་སྒོ་ནས་བསྟོད་པ་དང་། ཨེ་མ་ཧོ་ཤིན་ཏུ་བཟང་པོའི་ཞེས་པ་ནས། བདག་ལ་སྩོལ་ཞེས་པའི་བར་གྱིས་ཆོས་དབྱིངས་ཡེ་ཤེས་ཀྱི་སྒོ་ནས་བསྟོད་པ་

---

^{[མ་དཔེ་གཟིགས་ན་འདིར་གནོན།]}

ཡིན་ནོ། །ཞེས་གསུངས།། ༈ །།མཉྫགྷོ་ཥ་པུཎྜུ་ནི་རཱ་བྷོ་གས། རྩ་རྒྱུད་ལས། ངོ་བོས་གཟུགས་མེད་སོགས་ཀྱི་དོན། རྗེ་བཙུན་མཆེད་ཀྱིས། སེམས་མེད་ཅེས་པའི་དོན་འཆད་པ་ན། རྣལ་འབྱོར་སྤྱོད་པ་རྣམས་ནི་རྣམ་པར་ཤེས་པའི་ཚོགས་དྲུག་པོ་ཙམ་ལ་འདོད་དོ། །ཞེས་སློབ་དཔོན་ཤཱནྟི་པས་མུ་ཏིག་ཕྲེང་བར། གཟུང་བ་ཀུན་བརྟགས་ཕྱིའི་སྐྱེ་མཆེད་དྲུག་ངོ་བོས་མེད་དེ། བྱིས་པས་དངོས་པོར་བརྟགས་པ་ལྟར་གཅིག་དང་དུ་མའི་རང་བཞིན་དང་བྲལ་བའི་ཕྱིར་རོ། །འཛིན་པ་ཀུན་བཏགས་ནི་རྟེན་དབང་པོ་དྲུག་དང་། རྣམ་པར་ཤེས་པ་དྲུག་ལ་འཛིན་པར་བརྟགས་པ་ཉིད་ཡིན་ལ། དེ་ཡང་ཇི་ལྟར་བརྟགས་པ་དེ་ལྟར་ངོ་བོ་མེད་དེ། གཟུང་བ་མེད་ན་འཛིན་པ་མེད་པའི་ཕྱིར་རོ། །ཞེས་སེམས་སྤྱི་ལུགས་ཏེ། རྣམ་ཤེས་ཚོགས་དྲུག་གི་འཛིན་པ་ཀུན་བརྟགས་ཀྱི་ཆ་རྣམས་ངོ་བོས་མ་གྲུབ་པ་དང་། དབང་པོ་དྲུག་ལ་འཛིན་པར་བཏགས་པའི་ཆ་རྣམས་ཀྱང་ངོ་བོ་མེད་པར་འཆད་པ་ཡིན་གྱི། རྣམ་ཤེས་ཚོགས་དྲུག་ཉིད་ངོ་བོས་མ་གྲུབ་པའམ་རྫས་སུ་མ་གྲུབ་པར་འདོད་པ་མ་ཡིན་ནོ། །སྤྱི་ལྟར་ན་གཞན་དབང་ལ་སྐྱེ་བ་ངོ་བོ་ཉིད་མེད་ཅེས་བཏགས་པའི་རྗེས་སུ་འབྲངས་ཏེ་ཚོགས་བརྒྱད་ཀའི་ཀུན་བརྟགས་ཀྱི་ཆ་ངོ་བོས་མེད་ཅེས་བཤད་དུ་རུང་བར་སེམས། གང་ལྟར་ཚོགས་དྲུག་སོགས་ངོ་བོས་གྲུབ་པ་ཡིན་གྱི། དེ་དག་གི་ཀུན་ཏུ་བརྟགས་པའི་ཆ་ནི་

---

^{[མ་དཔེ་གཟིགས་ན་འདིར་གནོན།]}

གཉིས་སྣང་འཁྲུལ་པའི་ཚུལ་དུ་རྫ་ས་སུ་གྲུབ་ཀྱི། ངོ་བོས་གྲུབ་པ་མ་ཡིན་ནོ། །ཞེས་བཞེད་པ་ལགས།། ༈ །།ཆོས་རྗེ་རྣམ་རྒྱལ་དཔལ་བཟང་གི་དྲིས་ལན་དུ། །རྔོག་ལོའི་སྤྲིངས་ཡིག་ལས། །རྨི་ལམ་གྲོང་ཁྱེར་ཞིག་གོ་ཞེས། །འཛིན་པའི་རྣམ་རྟོག་གང་ཡིན་དེས། །བཏགས་དོན་གྲོང་གི་ཞིག་པ་ཉིད། །གྲོང་ཉིད་མེད་ན་མེད་པ་ལྟར། །ཡང་དག་ཉིད་དུ་དངོས་མེད་ཅེས། །འཛིན་པའི་བློ་ཡིས་བཏགས་པའི་དོན། །ཡང་དག་བཀག་པ་མེད་ཉིད་ཀྱང་། །ཡང་དག་དངོས་པོར་མེད་པ་མིན། །འདི་ལྟར་ཡུལ་མེད་པ་ལ་ནི། །དགག་པ་འཇུག་པར་སྲིད་མ་ཡིན། །དེས་ན་མེད་ཅེས་ངེས་བྱ་བ། །དགག་པའི་དངོས་པོ་མ་གྲུབ་པས། །དེ་ཚེ་བཀག་པ་རྟེན་བྲལ་བས། །བློ་ཡི་མདུན་ན་གནས་མི་འགྱུར། །དེ་ལྟར་དངོས་པོ་ཡོད་མིན་ལ། །དེ་བཀག་པ་ཡང་མ་གྲུབ་ན། །དེ་གཉིས་ལས་འདས་དོན་འགའ་ཡང་། །འཛིན་པའི་ཡུལ་དུ་འགྲོ་མི་སྲིད། ཅེས་གསལ་བར་གསུངས་པའི་ཕྱིར་དང་། བདེན་གཉིས་འགྲེལ་པར་དོན་དམ་ཤེས་བྱ་མ་ཡིན་པར་འཆད་པས་ན། རྗེ་བཙུན་ས་སྐྱ་པའི་བཞེད་པ་སྙིང་པོའི་དགོངས་པ་རང་བཞིན་མེད་པའི་སྟོང་ཉིད་ལ་བཞེད་པ་གཉིས་དགོངས་པ་གཅིག་གོ །གལ་ཏེ་མེད་དགག་ལ་བཞེད་སྙམ་ན། མ་ཡིན་ཏེ། དེ་ལྟར་ན་དོན་དམ་ཤེས་བརྗོད་ཀྱི་ཡུལ་དུ་བཞེད་དགོས་ཏེ། གཞན་སེལ་མེད་དགག་གི་མ་རྟོག་པའི་དངོས་ཡུལ་ཡིན་

---

^{[མ་དཔེ་གཟིགས་ན་འདིར་གནོན།]}

པའི་ཕྱིར་རོ། །འོ་ན། ཚད་མས་རྣམ་གནས་དོན་གྱི་ཆ་ལ་རྣམ་དཔྱོད་བློས། །དོན་དེ་བཀག་ནས་གཞན་སྒྲུབ་མེད་ཅེས་ངེས་པར་བཟུང་། ཞེས་གསུངས་པ་ཅི་ཞེ་ན། འདི་ནི་གཞན་སེལ་གྱི་དགག་སྒྲུབ་བྱེད་། པའི་སྐབས་ཀྱི་རྣམ་གྲངས་པའི་དོན་དམ་སྟོན་པའི་སྐབས་ཡིན་པས་དོན་དམ་རྣལ་མ་དང་མི་འདྲའོ།། ༈ །།རང་ལུགས་ཀྱི་བླ་མ་གོང་མ་འགས་བདེ་གཤེགས་སྙིང་པོ་དེ་ཆོས་ཅན་གསལ་བའི་ལྡོག་ཆར་འཆད་ཀྱང་། དེ་ལྟ་ན་རང་བཞིན་གནས་རིགས་ལ་ཡང་ཆོས་ཅན་གསལ་བའི་ལྡོག་པ་ནས་བཤད་པ་ཡོད་དགོས་པར་ཐལ་བའི་ཕྱིར། འདིར་ནི། ཟུང་འཇུག་སྤྲོས་བྲལ་ཁོ་ནའི་ལྡོག་པ་ནས་སྙིང་པོའི་མཐར་ཐུག་སྟོན་པར་འདོད་དེ། ངེས་དོན་གྱི་ལྟ་བ་རྙེད་ཅིང་སྤྲོས་བྲལ་དུ་གཏན་ལ་ཕབ་ནས། རྗེས་ཐོབ་ཕྱིན་དྲུག་གིས་བསྡུས་པའི་དགེ་བ་ཐམས་ཅད་དང་ཁྱད་པར་བསྔོ་བ་ལྟ་བུ་ཡང་དམིགས་མེད་ཤེས་རབ་ཀྱི་རྒྱས་བཏབ་སྟེ། བསྔོ་བྱའི་དགེ་བ་ཉིད་ཀྱང་ཡོད་མེད་ལས་འདས་པར་ཤེས་པར་བྱ་སྟེ། ཡོངས་སུ་མི་བསྔོ་བའི་ཚུལ་གྱིས་བསྔོ་བའི་ཚེ། ཆོས་ཉིད་དོན་དམ་བདེ་གཤེགས་སྙིང་པོ་ལ་ཡོད་པར་འཛིན་པ་ལྟ་ཅི་སྨོས། ཆོས་ཅན་ཐམས་ཅད་ཀྱང་ཡོད་མེད་ལས་འདས་པར་ཤེས་པའི་ངང་། དེ་དག་ཉམས་སུ་ལེན་པ་མི་འདོར་བ་སྒྱུ་མ་ལྟ་བུའི་ངང་ནས་ཀུན་ཏུ་སྤྱོད་པ་ནི་ཟུང་འཇུག་ཏུ་ཉམས་སུ་ལེན་པ་སྟེ། སྒྱུ་མའི་རྟ་གླང་དུ་ཤེས་པའི་གང་

---

^{[མ་དཔེ་གཟིགས་ན་འདིར་གནོན།]}

ཟག་གིས། སྒྱུ་མའི་རྟ་གླང་དེ་དག་ཡོད་མེད་གང་དུའང་རང་གི་བློ་ནས་ཁས་མི་ལེན་པ་བཞིན་ནོ། །འོན་ཀྱང་གང་ཟག་དེས་གཞན་དང་རྗེས་སུ་མཐུན་པའི་ཐ་སྙད་བཞག་པའི་ཚེ། འདི་ནི་རྟའོ། །འདི་ནི་གླང་པོའོ། །ཞེས་སོགས་གཞན་ལ་བརྗོད་དུ་རུང་བ་ལྟར། གོང་དུ་བསྟན་པའི་ལྟ་བ་རྙེད་པའི་གང་ཟག་དེ་དག་གིས་ཀྱང་། མཉམ་གཞག་ལྟ་ཞོག །རྗེས་ཐོབ་ཏུ་སྣང་བ་འདི་ཡང་། རང་གི་ཤེས་རབ་ཀྱི་ངོས་ནས་ཡོད་མེད་ཀྱི་ཐ་སྙད་མི་འདོགས་ཤིང་། འཛིན་པ་གང་ཡང་མི་བྱེད་མོད་ཀྱི། གཞན་ལ་གོ་བར་བྱ་བའི་ཆེད་དུ་ནི། མེད་ཀྱང་ཡོད་དོ་ཞེས། འཇིག་རྟེན་ངོར་བྱས་བདག་ནི་སྨྲ་བར་བྱེད། ཅེས་བཤད་པ་ལྟ་བུ་ཐ་སྙད་སྣ་ཚོགས་འདོགས་པར་བྱེད་དོ། །དེས་ན་ཉམས་ལེན་གྱི་མཐར་ཐུག་འདི་ལྟ་བུ་དང་བསྟུན་ན། ཆོས་ཉིད་དོན་དམ་ཡོད་པའི་དགེ་བར་ཁས་བླངས་ནས། བསྔོ་བ་བྱེད་པ་སོགས་དབུ་མའི་ཉམས་ལེན་གྱི་གནད་བཅོས་པ་སྟེ། འཁོར་འདས་དབྱེར་མེད་ཀྱི་ལྟ་བས་མ་ཟིན་པའི་བསྔོ་བ་ལ་མཆོག་ཏུ་བཟུང་བའི་ཕྱིར་རོ། །འདིར་ཆོས་ཐམས་ཅད་ཡོད་མེད་ལས་འདས་པར་འཆད་པའི་སྐབས་ཡིན་ཀྱང་། ཆོས་ཉིད་དམ་སྙིང་པོ་ཡོད་པ་དྲང་དོན་དུ་འཆད་པ་ནི། ཀུན་རྫོབ་བདེན་པ་མེད་ཀྱང་དོན་དམ་བདེན་པར་ཡོད་པར་འདོད་པ་དག་གི་ལོག་རྟོག་འགོག་པའི་སྐབས་ཡིན་པས་སོ། །འདི་ཙམ་ཞིག་གོ་ནའང་སྡོམ་གསུམ་གྱི་སྙིང་པོ་

---

^{[མ་དཔེ་གཟིགས་ན་འདིར་གནོན།]}

འཆད་པའི་སྐབས་ཀྱི་དོགས་པ་ཐམས་ཅད་རང་གྲོལ་ཏུ་འགྲོའོ།། ༈ །།རྒྱུད་སྡེ་སྤྱི་རྣམ་དུ། ལམ་གཅིག་ལ་འབྲས་བུ་གསུམ་དུ་འདོད་པ་ཟླ་བའི་ལུགས་སུ་བཤད་ནས། དེ་ཉིད་དགོངས་པ་ཅན་དུ་བསྟན་པ་ནི། ཟླ་བས་ཐེག་ཆེན་གཅིག་ཁོ་ནས་རིགས་ཅན་གསུམ་ཀ་གྲོལ་བར་བཤད་པ། དེའི་ལམ་གྱི་ཕྱོགས་བལྟ་བའི་ཆ་ཁོ་ནས་གྲོལ་བར་དགོངས་པ་ཡིན་ཏེ། གཞན་དུ་ན་རྒྱུད་སྨིན་བྱེད་ལམ་གསུམ་སོ་སོར་གསུངས་པའི་ཕྱིར་རོ། །དེས་ན་གྲོལ་བྱེད་རྟོགས་པའི་ལྟ་བ་ཁོ་ན་ཡིན་པར་དགོངས་སོ། །འདིར་ནི་མཐར་ཐུག་གི་འབྲས་བུར་ལྟོས་པའི་ཐེག་ཆེན་གྱི་ལམ་ཁོ་ན་འཆད་པ་ཡིན་ཏེ། དེའི་ཚེ་མཐར་ཐུག་གི་འབྲས་བུ་ཐབས་ཤེས་ཟུང་འཇུག་གཅིག་ཡིན་པ་ལྟར་དུ། དེ་ལ་ལྟོས་པའི་ཐེག་ཆེན་གྱི་ལམ་ཡང་ཐབས་ཤེས་ཡ་བྲལ་མ་ཡིན་པར་ཟུང་དུ་འཇུག་པའི་ལམ་གཅིག་ཉིད་ཡིན་ཅེས་སྟོན་པ་ན། སྤྱི་རྣམ་ལས་ཀྱང་ལམ་གཅིག་ལ་འབྲས་བུ་གཅིག་ཏུ་འདོད་པ་དང་། གནས་སྐབས་ལམ་གསུམ་ལ་མཐར་ཐུག་འབྲས་བུ་གཅིག་ཏུ་འདོད་པ་གཉིས་དོན་གཅིག་པར་གསུངས་པའི་དགོངས་པ་ཡང་གྲུབ་བོ། །མདོར་ན་སློབ་དཔོན་ཟླ་བས་རིགས་ཅན་གསུམ་ཀ་ཐེག་པ་ཆེན་པོའི་ལམ་གཅིག་གིས་གྲོལ་བར་བཤད་པ་དེ་སྒྲ་ཇི་བཞིན་བ་མ་ཡིན་གྱི་ལམ་གྱི་ཕྱོགས་གཅིག་ལྟ་བའི་ཆས་གྲོལ་བ་ལ་དགོངས་ཞེས་པའོ། །དེའང་ཕྱོགས་རེ་བ་མ་ཡིན་ཏེ། རང་རང་

---

^{[མ་དཔེ་གཟིགས་ན་འདིར་གནོན།]}

གི་སྨིན་བྱེད་དང་བཅས་པས་སོ། །འོ་ན་ཉན་ཐོས་རྣམས་ལ་ཐེག་ཆེན་གྱི་ལྟ་བ་ཡོད་དམ་ཞེ་ན། ཐེག་ཆེན་གྱི་གང་ཟག་གི་རྟོགས་པ་དང་མཚུངས་པའི་རྟོགས་ཚུལ་ཉན་རང་འཕགས་པ་རྣམས་ལ་ཡང་ཡོད་པས་ཐེག་ཆེན་གྱི་ལྟ་བ་ཡོད་ཅེས་བཏགས་སོ། །གཞན་ཡང་ཟླ་བས་ཉན་རང་དགྲ་བཅོམ་ལྷག་མེད་དུ་མྱ་ངན་ལས་འདས་པ་ཕྱིན་ཆད་སྐྱེ་བ་གཏན་མི་བཞེས་པ་ལྟ་བུར་གསུངས་པའང་དགོངས་པ་ཅན་ཏེ་མཐར་ཐུག་ཐེག་པ་གསུམ་དུ་འགྲོ་བའི་ཕྱིར་རོ།། ༈ །།ཀུན་སྤྱོད་ལས་ཕག་མོའི་ཕྱག་མཚན་རྡོ་རྗེ་ཀྱང་པ་ལ་གྲི་གུག་མེད་པ་ལྟ་བུ་ནི་འགྱུར་མ་ཐོན་པ་ཡིན་ནོ། ༈ །མངོན་པའི་ལུགས་དང་། །ཕྱི་རོལ་པ་འདོད་པའི་གངས་ཅན་མཐུན་ཀྱང་། ཕྱི་མར་མ་དྲོས་པའི་ཐ་སྙད་མ་བཤད་ལ། ཆུ་བོ་བདུན་གྱིས་གཞི་དེ་མ་དྲོས་པར་བྱེད་དམ་སྙམ། ཏི་སེ་ལ། ཀེ་ཏཱ་ར་ཞེས་ཟེར་བ་ནི། ཁ་ཆེ་དང་འབྲི་ལིའི་མཚམས་ཀྱི་གནས་ཆེན་དེར་གྲགས། པུ་ལི་རཱ་མ་ཞེས། སྐྱེས་བུའི་རྟགས་ལ་དགའ་བ་ཞེས་ཡུལ་དེ་སྨད་འཚོང་མས་གང་བ་ཞིག་གོ་ཞེས་རྒྱ་གར་བ་འགའ་རེ་ཟེར། པུཎྜ་ནི་རི་དང་གཅིག་པའི་དབང་དུ་བྱས་ན། གང་བའི་རིའོ། །བྲེ་ཏ་པུ་རི་སཾ་གྷ་ཊ། ཞེས་པ། རབ་འོངས་དགེ་འདུན་དུ་བསྒྱུར་ནས། དགེ་སློང་བཞི་ཚོགས་པར་དགེ་འདུན་ཟེར་བ་བཞིན། རོ་བཞི་ཡན་ཆད་ཚོགས་པ་ལ་བཞེད་པ་མར་ལུགས་པ་འདོད་ཀྱང་། འགོས་འགྱུར་

---

^{[མ་དཔེ་གཟིགས་ན་འདིར་གནོན།]}

དུ། ཡིད་བཏགས་མཆོག་འདུས་ཆུ་བོའི་འགྲམ། ཞེས་བསྒྱུར་བ་ལེགས་སམ་སྙམ་མོད་དཔྱད་པར་བྱའོ། ༈ །དྲིས་ལན་དོན་གསུམ་གསལ་བྱེད་ལས། སེམས་ཅན་ཐམས་ཅད་ལ་སྙིང་པོ་ཡོད་པར་བསྒྲུབས་པ་ཙམ་གྱིས་སྐྱོན་ལྔ་སྤོང་མི་ནུས་ཀྱི། མཚན་དཔེ་གསལ་རྫོགས་ཚུལ་གྱིས་ཡོད་པས་སྤང་དགོས། ཀྱེ་རྡོར་ལས། ཡུལ་དང་ཡུལ་ཅན་སོགས་ཕུང་ཁམས་སྐྱེ་མཆེད་ཐམས་ཅད་ཡོད་པར་གསུངས་པ། རང་བཞིན་གདོད་ནས་སོགས་ཀྱིས་ཡོད་པར་གསུངས་པའི་དགོངས་གཞི་ནི་སྣང་ཚོད་ཙམ་དུ་གྲུབ་པས་རྫུན་པ་མ་ཡིན་པ་ལ་དགོངས། དགོས་པ་ནི་རིལ་བོ་དང་། གཟུགས་དང་། གཟུགས་སེམས་གཉིས་ཀ་ལ་བདག་ཏུ་འཛིན་པའི་གཉེན་པོར་གསུངས། དངོས་ལ་གནོད་བྱེད་ནི། དེ་ཐམས་ཅད་ཀྱང་རྡུལ་ཕྲ་རབ་གཅིག་ལ་རྡུལ་དྲུག་འདུས་པའི་རིག་པ་དང་། སྐད་ཅིག་མའང་ཆ་ཤས་གསུམ་དུ་བྱེ་བའི་རིག་པས་བརྟགས་ན་མི་རྙེད་པས་བདེན་པ་མ་ཡིན་ཏེ། དེ་དག་ནི་དཔེར་ན་ཆུ་ཟླ་བཞིན་ནོ། །མདོར་ན་ཡོད་མེད་དུ་གསུངས་པ་ཐམས་ཅད་དགོངས་པ་ཅན་དུ་ཤེས་ན་དབུ་མའི་དོན་ལ་ཉེའོ། །ཐ་སྙད་ལ་གནས་ནས་བདེན་གཉིས་ཀྱི་རྣམ་གཞག་བྱེད་པའི་ཚེ། རང་བཞིན་ལྷན་སྐྱེས་དང་། དཔེ་དགུས་བསྟན་པའི་གཤེགས་སྙིང་གཉིས་ཀ་དོན་དམ་དུ་འཆད་ལ། ངེས་དོན་ལ་གནས་ནས་འཆད་པའི་ཚེ། དེ་གཉིས་རང་གི་ངོ་བོས་མ་གྲུབ་པས་

---

^{[མ་དཔེ་གཟིགས་ན་འདིར་གནོན།]}

ཡོད་པར་གསུངས་པ་དགོངས་པ་ཅན་ནོ་ཞེས་འཆད་དགོས། འདི་ལ་མྱང་འདས་ཀྱི་ལུང་གིས། དེ་བཞིན་གཤེགས་པའི་སྙིང་པོ་སྒྱུ་མ་ཙམ་དུ་སྒྲུབ་པ་དྲང་དོན་དུ་བཤད་པ་ཡོད། གཤེགས་སྙིང་གི་དགོངས་གཞི་སྟོང་ཉིད་ཡིན་ཞེས་གསུངས་པ་ནི། རང་བཞིན་སྤྲོས་བྲལ་སྟོང་པ་ཉིད་ལས་སྣ་ཚོགས་སུ་འབྱུང་དུ་རུང་བའི་རྟེན་ཅིང་འབྲེལ་འབྱུང་སྐྱེ་བ་མེད་པ་ཉིད་ཀྱི་ཆ་ནས་སྟོན་གྱི་ཆོས་ཉིད་སྤྲོས་བྲལ་གྱི་ཆ་ནས་ཁས་ལེན་དུ་མི་རུང་སྟེ། དེ་ནི་ཡོད་མེད་ལས་འདས་པའི་ཕྱིར། གངས་ལས་བྱུང་བའི་ཆུ་ལ་གངས་ཆུ་ཞེས་སྒྲ་བསྡུས་པ་ལྟ་བུའོ། །རང་གི་གོ་ཚོད་ལ་སྤྲོས་བྲལ་སྙིང་པོར་བཤད་ནས། དེ་དོན་དམ་དུ་ཡོད་མེད་ལས་འདས་པ་དང་། ཐ་སྙད་དུ་ཡོད་པའི་སྒྲུབ་བྱེད་དང་། གཞན་གྱི་འདོད་པ་ལྟར་ཡོད་པ་ལ་ཐ་སྙད་དུའང་གནོད་བྱེད་དེ་རིམ་པ་གསུམ་དུ་བཤད་ན་གཞུང་དང་འགྲིགས་གམ་སྙམ་མོ། །འདིའི་ཚེ་སྤྲོས་བྲལ ཉིད་སྙིང་པོ་སྒྲ་གཞན་གྱི་ཚུལ་གྱིས་ཡོད་པར་གསུངས་པ་དགོངས་གཞིར་ཁས་བླང་ཆོག་གོ། ༈ །།ཀུན་གཞི་རྒྱུ་རྒྱུད་ནི། གནས་ལུགས་སྟོང་པ་ཉིད་ལ་མི་འདོད་དེ། དེ་རྟེན་འབྲེལ་གྱི་རང་བཞིན་ཡིན་ཀྱང་། དེའི་རང་བཞིན་རྟེན་འབྲེལ་ལས་འདས་ལ། སྐབས་འདིར་ནི་རྟེན་འབྲེལ་ལྔའི་ཡིག་ཆུང་ལས་དོན་བྱེད་ནུས་པའི་དངོས་པོར་བཤད་པའི་ཕྱིར་རོ། །དངོས་སྨྲའི་གཞུང་ལས་བཤད་པ་དེའང་མིན་ཏེ། དེ་དག་གིས་

---

^{[མ་དཔེ་གཟིགས་ན་འདིར་གནོན།]}

འདོད་པ་ལྟར་གྱི་ཀུན་གཞི་ཡོད་པར་མི་འགྲུབ་པས་སོ། །དེས་ན་སེམས་ཀྱི་རང་བཞིན་གསལ་བ་དང་། རྟོག་གེའི་གཞུང་ནས་བཤད་པའི་རང་རིག་མངོན་སུམ། ཚོགས་བརྒྱད་ཀྱི་ནང་ཚན་ཀུན་གཞིའི་རྣམ་ཤེས་ཏེ། དེ་ནི་དུས་དང་གནས་སྐབས་ཐམས་ཅད་དུ་ཤེས་པ་ཐམས་ཅད་ལ་ཁྱབ་ཅིང་རྗེས་སུ་འགྲོ་བ་རྒྱུན་མི་འཆད་པ་རང་རིག་པ་ནི་སྐབས་འདིའི་ཀུན་གཞིའི་རྒྱུ་རྒྱུད་དེ། མདོར་ན་འཁོར་འདས་ཀྱི་སྣང་ཆ་ཐམས་ཅད་ཀུན་གཞི་གཅིག་གི་རྣམ་རོལ་ཏུ་གོ་ཞིང་། དེའང་རང་བཞིན་གྱིས་སྤྲོས་པ་དང་བྲལ་བའི་ཆ་དེ་ཉིད་དེ་ལྟར་ཤར་བ་ཡིན་ཕྱིར་ཐམས་ཅད་གནད་གཅིག་ཏུ་གོ་བར་བྱའོ། །འོན་ཀྱང་ཀུན་གཞིའི་རྣམ་ཤེས་དེའང་མངོན་པའི་གཞུང་ནས་བཤད་པ་ལྟར་ཁས་མི་ལེན་ཏེ། དེ་ནི་ལས་ཀྱི་མཚན་ཉིད་སྟེང་ནས་འཇོག་པས་རྒྱུན་འཆད་པ་སྲིད་ལ། འདིར་རྒྱུན་ཆད་པ་མི་སྲིད་དེ། དེ་ལྟར་འདོད་ན་ལང་གཤེགས་ལས་འཆད་ལྟར་བཤད་པ་དང་འགལ་ཞིང་། དེས་ན་མངོན་པ་ནས་ཟག་བཅས་ཀྱི་སྟེང་ནས་འཇོག་པ་ཁོ་ནར་བསམས་ནས། ཀུན་གཞིའི་རྣམ་ཤེས་ཟག་མེད་དུ་སྨྲ་བ་འགལ་ཞེས་བརྗོད་པ་ནི་གནད་འདི་མ་རྟོགས་པའོ།། ༈ །།བྱང་བ་མཆོད་གནས་པའི་དྲིས་ལན་ལས། རིག་གཏེར་དུ་རང་རྒྱལ་སློབ་པ་མེད་པར་བཤད་པ་དང་། དགོངས་གསལ་དུ་དེའི་ལམ་ལྔ་བཤད་པ་འགལ་ལོ་ཞེ་ན་མི་འགལ་ཏེ། སྔ་མ་འདུལ་མཛོད་

---

^{[མ་དཔེ་གཟིགས་ན་འདིར་གནོན།]}

ཀྱི་རྗེས་སུ་འབྲངས་ཏེ། རང་རྒྱལ་གྱི་རིགས་ཅན་ཞིག་གིས་དྲོད་ནས་བཟུང་ནས་ཟད་དང་མི་སྐྱེ་ཤེས་པའི་བར་སྟན་ཐོག་གཅིག་ལ་མངོན་དུ་བྱེད་པའི་ཚེ། ལམ་སྔ་མ་སྐྱེས་ནས། ཕྱི་མ་མ་སྐྱེས་པའི་བར་ལ། སྦྱོར་མཐོང་སྒོམ་ལམ་པ་རྣམས་དོན་གྱིས་ཐོབ་ཀྱང་། ལམ་འཇུག་པ་མྱུར་བས་དེ་འདྲའི་ཐ་སྙད་མ་གསུངས་པ་དང་། རང་སངས་རྒྱས་མངོན་དུ་མ་བྱས་པར་རང་སངས་རྒྱས་ཀྱི་ཐ་སྙད་མི་འཇུག་པས་རང་རྒྱལ་སློབ་པའི་རྣམ་གཞག་མི་བྱེད་དོ། ཕྱི་མ་ནི་རང་སངས་རྒྱས་ཀྱི་རིགས་ཅན་ཞིག་གིས་བྱང་ཆུབ་མ་ཐོབ་པའི་གནས་སྐབས་སུ་དེ་ཐོབ་པར་བྱེད་པའི་ལམ་བསྒོམ་པ་ལ་དེའི་ཐ་སྙད་གཞག་པ་ཡིན་པས་མི་འགལ་ལོ།། ༈ །།གླེགས་བམ་ལས་མངོན་རྟོགས་ཚུལ་བཅོ་ལྔ་གསུངས་པ་ནི། ཟླ་ཟེར་ལས་དག་ལྡན་དུ། མན་ངག་ལུགས་ཀྱི་མངོན་རྟོགས་ཚུལ་བཅུ་བཞི་དང་། མ་སྦས་པ་མི་ཐུབ་ཟླ་བའི་ལུགས་ཀྱི་འཁྲུགས་ཅན་ཏེ་བཅོ་ལྔའམ། ཡང་བདག་མེད་མའི་མངོན་རྟོགས་ལ་ཚུལ་བཅོ་ལྔར་བགྲངས་པའང་འཐད་ལ། རང་ལུགས་དག་ལྡན་ལས་གསུངས་པའི་མན་ངག་ལུགས་ཀྱི་ཚུལ་བཅུ་གསུམ་ལ། རྟོགས་པ་དམན་པས་སྐད་ཅིག་གིས་བསྐྱེད་པ་ཕྱི་དཀྱིལ་རྐྱང་པ་བསྒོམ་པ་དང་། རྟོགས་པ་མཆོག་ཏུ་གྱུར་པས་དེ་ཉིད་ལུས་དཀྱིལ་དང་མ་འབྲེལ་བར་བསྒོམ་དུ་མི་རུང་བས་བཅོ་ལྔའོ། །སྙམ་མོ། །དེའི་ཕྱིར་གླེགས་བམ་ལས།

---

^{[མ་དཔེ་གཟིགས་ན་འདིར་གནོན།]}

དེའང་ཞིབ་པར་དབྱེ་ན་བཅོ་ལྔར་སྣང་མོད། ཅེས་པས་གསལ་ལོ།། ༈ །།སྦས་པའི་རྩ་ལྔའི་བཤད་པ་རྡོ་རྗེ་འཆང་གིས་ལོ་ཙཱ་བ་རྡོ་རྗེ་དཔལ་གྱི་དྲིས་ལན་དུ་ཡོད། ཞིབ་པར་བརྗོད་དུ་མི་བཏུབ་བོ། །ཡུལ་སྤྲོས་བྲལ་གྱི་ཆ་ནས་ལྟ་བར་བཞག་པའི་ཚེ་མདོ་སྔགས་གཉིས་མཉམ་ལ། དེ་རྟོགས་བྱེད་པའི་བློ་ཡུལ་ཅན་ཡེ་ཤེས་ལ་ལྟ་བར་བཞག་པའི་ཚེ་ཁྱད་པར་ཤིན་ཏུ་ཆེ་སྟེ། དབང་གི་ཡེ་ཤེས་ཀྱི་ལྟ་བའི་སྤྲོས་བྲལ་རྟོགས་ཚུལ། ཕར་ཕྱིན་གྱི་མཐོང་ལམ་ལ་ཡང་མེད་པའི་ཕྱིར་རོ། །རྟགས་གྲུབ་སྟེ་དབང་གོང་མའི་ཡེ་ཤེས་རྣལ་མ་རྒྱུད་ལ་སྐྱེས་པ་དེ་ནང་གི་རྟེན་འབྲེལ་གྱི་འདུ་འཕྲོད་ལས་བདེ་ཆེན་གྱི་རྣམ་པར་སྐྱེ་ཞིང་། མཐོང་ལམ་རྐྱང་པ་ལ་ཆོས་ཉིད་མངོན་སུམ་དུ་མཐོང་བ་ཡོད་ཀྱང་ཁྱད་ཆོས་དེ་དག་མེད་པའི་ཕྱིར་རོ།། ༈ །།སྤྱིར་སྨོན་སེམས་གཏོང་བ་ལ་རྩ་ལྟུང་དུ་འཇོག་ཀྱང་། ཀུན་སྤངས་པས་ཀྱང་དེར་འགྱུར་བ་ཞིག་ཡོད།། ༈ །།གཞུང་བཤད་ལས་སློབ་ལམ་ས་བཅུ་གཉིས་དང་། མན་ངག་ལས་ཕྱེད་དང་བཅུ་གསུམ་ཞེས་པ་ནི། ཕྱི་མས་བཅུ་གཉིས་པའི་མཇུག་དང་། བཅུ་གསུམ་པའི་སྦྱོར་བའི་གནས་སྐབས་ལ་དེ་དང་དེར་བཏགས་པར་ཟད་ཀྱི། ས་བཅུ་གསུམ་པ་ཐོབ་ཟིན་པ་ཞིག་ལ་ཕྱེད་ཚལ་དུ་བཏང་ནས་སློབ་མི་སློབ་ལ་སྦྱར་བ་གཏན་མི་སྲིད། འོ་ན་མི་སློབ་ལམ་གྱི་སྦྱོར་བ་ལ་མི་སློབ་ལམ་དུ་འདོད་པ་མི་འཐད། ཞེ་ན། མི་འགལ་ཏེ། དེ་ལ་སེམས་བསྐྱེད་པ་དང་པོ་

---

^{[མ་དཔེ་གཟིགས་ན་འདིར་གནོན།]}

གསུམ་ནི་སྦྱོར་བ་དང་དངོས་གཞི་དང་མཇུག་གི་སྒོ་ནས་སངས་རྒྱས་ཀྱི་སས་བསྡུས་སོ། །ཞེས་དང་། ས་བཅུ་པར་སངས་རྒྱས་ཀྱི་སར་བཤད་པ་བཞིན་ནོ།། ༈ །།འཚོ་བྱེད་ཆོས་སྐྱོང་དཔལ་བཟང་གི་དྲིས་ལན་ལས།། ༈ །།རྡོར་སེམས་བསྒོམ་བཟླས་ཐུན་མཚམས་སུ་དགོས་པ། སྔོན་འགྲོར་སྦྱར་ན་མི་འགལ་ཏེ། སྐྱབས་འགྲོ་སེམས་བསྐྱེད་རྡོར་སེམས་བསྒོམ། གསུམ་ནི་སྤྱི་ཡི་སྔོན་འགྲོ་ཡིན། ཅེས་གསུངས་པས་མངོན་པར་རྟོགས་པའི་ཉམས་ལེན་ཐུན་གཅིག་ལའང་སྡོམ་གསུམ་གྱི་ཉེས་ལྟུང་སོར་ཆུད་པའི་ཉམས་ལེན་རེ་སྔོན་དུ་སྦྱོར་བ་སྤྱིའི་ཕྱག་ལེན། ཀྱེ་རྡོར་ལ་བླ་མ་གོང་མས་མ་བཤད་ཀྱང་། ཕྱི་མ་སྐྱེརྣམས་ཀྱིས་དུས་དང་བསྟུན་ནས་གསལ་བར་བྱས་པ་ཡིན་པས་ཕུན་སུམ་ཚོགས་པའི་ཡན་ལག་གོ། ༈ །།ཤཱ་ནྱ་ཏཱའི་སྔགས་ཀྱིས་སྦྱངས་པའི་སྟོང་པ་དེའི་ངང་ལས་སྣང་བའི་ལྡོག་ཆ་ལྷར་བསྒོམ་པ་ཡིན་གྱི། འབྲི་གུང་པ་ལྟར་ལྷ་ཡོངས་གྲུབ་ཏུ་ཡོད་པ་ཞིག་བསྒོམ་པའམ། རྙིང་མ་པ་ལྟར་ཀུན་རྫོབ་ལྷ་རུ་ལྟ་བ་ལྟ་བུ་མ་ཡིན་ཏེ། དེ་དག་ནི་འཇམ་དབྱངས་བླ་མའི་དགག་བྱ་ཡིན་པའི་ཕྱིར་རོ། །དེ་ཡང་། དང་པོ་མི་འཐད་དེ། དེ་ཁོ་ན་ཉིད་སྤྲོས་ཀུན་བྲལ་ཞིང་། ཡོད་མེད་སོགས་གང་དུའང་འཕགས་པ་རྣམས་ཀྱིས་མ་གཟིགས་པས་གང་དུའང་བསྒོམ་པར་བྱ་བ་མ་ཡིན་ཞིང་། སོ་སྐྱེའི་བློས་རྗེས་དཔག་གིས་འཆད་པའི་སྐབས་སུའང་

---

^{[མ་དཔེ་གཟིགས་ན་འདིར་གནོན།]}

ཡོད་མེད་ལས་འདས་པར་འཆད་དགོས་པས། དེ་ཡོད་པར་བྱ་བ་བཟུང་ནས་ལྷར་བསྒོམས་ན་དམིགས་མེད་དམིགས་པར་བྱས་པའི་ཕྱིར་རོ། །ཕྱི་མ་ལའང་མི་འཐད་དེ། ལྟ་བའི་ངོས་ནས་ལྷ་དང་ལྷ་མ་ཡིན་པ་སོགས་གང་དུའང་མི་བལྟ་ཞིང་། བསྒོམ་པའི་ངོས་ནས་ཀུན་རྫོབ་ཀྱི་སྣང་བ་སྒྱུ་མ་ལྟ་བུ་འདི། རྣལ་འབྱོར་གྱི་རྒྱུད་མན་ཆད་དུ་སྒྱུ་མ་ཙམ་དུ་བལྟ་བའང་། བླ་མེད་ཀྱིས་སྣང་བའི་འཁོར་ལོ་ཐམས་ཅད་ལྷར་གསལ་བཏབ་སྟེ་བསྒོམ་རྒྱུ་ཡིན་པས། སྤྲོས་བྲལ་གྱི་ཆ་ནས་ལྷར་མི་བསྒོམ་གྱི་སྣང་བའི་ཆ་ནས་ལྷར་བསྒོམ་པ་ཡིན། སྤྱིར་ཡང་ལྟ་བ་ཞེས་པ་ནི་ཡུལ་དངོས་པོའི་གནས་ལུགས་སྒྲོ་འདོགས་ཆོད་པའི་བློ་ནས། ཟླ འཕགས་པའི་མཉམ་གཞག་ཡུལ་དང་བཅས་པའི་བར་ཡིན་ཞིང་། དེ་ནི་སྔར་སྨོས་པ་ལྟར་རོ། །གཞན་ཡང་སྟོང་པ་ཉིད་ལྷར་བསྒོམ་པ་དང་། དེའི་ངང་ལས་བསྒོམ་པ་ཡིད་བྱེད་པ་སོགས་འཁྲུལ་པ་མང་། རང་བཞིན་གྱི་དཀྱིལ་འཁོར་ཀྱང་རྡུལ་ཚོན་སོགས་བཅོས་མར་ལྟོས་ན་ཚེགས་ཆུང་བས་དེ་ལྟར་བཤད་ཀྱི་གཞན་མ་ཡིན་ལ། རང་བཞིན་ལྷུན་གྲུབ་ནི། དང་པོ་ནས་ཡོད་པ་ཞིག་ལ་མི་ཟེར་གྱི་སེམས་ཀྱི་རང་བཞིན་ལ་འཕོ་འགྱུར་མེད་པས་ན་དེར་བཏགས་སོ། །གལ་ཏེ་དོན་དམ་ལྟར་བསྒོམས་ན་གོང་འཕེལ་དུ་འགྱུར་དགོས་ལ། དེས་ན་རང་བཞིན་གནས་འགྱུར་དུའང་ཁས་ལེན་དགོས་སོ། །དེ་བླངས་ན། རང་བཞིན་གྱི་སྒོ་

---

^{[མ་དཔེ་གཟིགས་ན་འདིར་གནོན།]}

ནས་གནས་འགྱུར་མེད་པ་དང་། ཡོན་ཏན་གྱི་སྒོ་ནས་ཡོད་པར་གསུངས་པའང་མི་འཐད་དོ།། ༈ །།དངོས་དབང་རབ་བྱུང་གིས་བསྐུར་བ་རྒྱུད་དང་འགྲེལ་བྱེད་ཚད་ལྡན་གྱིས་མ་བཤད་དེ། རླུང་ནུས་ཙམ་ཐོབ་ཀྱང་ཀུན་གཏོང་བར་ནི་འདྲ་བས། དེ་ཙམ་གྱིས་ལྟུང་བར་འགྱུར་བའི་ཕྱིར་རོ། །སྙམ། རྒྱ་གར་གྱི་རབ་བྱུང་འགའ་ཞིག་གིས་མཛད་པར་བཤད་ཀྱང་། དེ་ཕྱིན་ཆད་དེའི་རྟགས་དོར་ཏེ་སྤྱོད་པ་ལ་ཞུགས་པ་ཡིན་པས་མི་མཚུངས་སོ།། ༈ །།མགོན་པོ་རྒྱལ་མཚན་གྱི་དྲིས་ལན་ལས། ཉི་མའི་སྙིང་པོ་དང་། ཟླ་བའི་སྙིང་པོའི་མདོ། གླང་རུ་ལུང་བསྟན། ལི་ཡུལ་ལུང་བསྟན། དགེ་འདུན་འཕེལ་གྱི་ལུང་བསྟན། དགའ་བའི་བཤེས་གཉེན་གྱི་རྟོགས་བརྗོད་རྣམས་ལས་འབྱུང་བའི་དོན། རྒྱལ་པོ་མྱ་ངན་མེད་ཀྱི་སྲས་རྣམ་ཐོས་སྲས་ཀྱིས་མཆོད་རྟེན་ཐམས་ཅད་བསྐོར་ཞིང་བྱོན་སའི་དུས་བཙས་པ་ཞེས་བྱ་བས་དང་པོར་བཟུང་། རྒྱ་ནག་རྒྱལ་པོར་བུ་སྟོང་དུ་གཅིག་གིས་མ་ཚང་བ་ལ་བྱིན། དེར་རྒྱལ་པོ་བྱེད་དུ་མ་འདོད་དེ། དམག་སྟོང་ཕྲག་བཅུ་དང་སྦྲགས་ནུབ་ཕྱོགས་སུ་ཡུལ་འཚོལ་བར་ཕྱིན། མྱ་ངན་མེད་པའི་བློན་པོ་ཡ་ཤཞེས་པ་དམག་བདུན་སྟོང་ཁྲིད་ནས་འོང་བའང་ནུབ་ཕྱོགས་ཐེན་གྱི་ཤེལ་ཆབ་གོང་མར་འཛོམ། དེར་རྒྱལ་བློན་རྒྱས་ཏེ། ཡུལ་གསར་དུ་བཀོད། རྒྱ་གར་དང་རྒྱ་ནག་གི་མི་རིགས་འདྲེས་མར་བཀོད།

---

^{[མ་དཔེ་གཟིགས་ན་འདིར་གནོན།]}

ཡི་གེ་དང་ཆོས་ལུགས་ཕལ་ཆེར་རྒྱ་གར་དང་མཐུན་ཅིང་། འཇིག་རྟེན་གྱི་ལུགས་ཕལ་ཆེར་རྒྱ་ནག་དང་མཐུན་པར་གྱུར། དེའི་བུ་རྒྱལ་པོ་བི་ཛ་ཡ་སཾ་བྷ་བས་འཇམ་དབྱངས་ཀྱི་སྤྲུལ་པ་དགེ་སློང་བེ་རོ་ཙ་ན་སྤྱན་དྲངས། ཙར་མ་ཞེས་བྱ་བའི་གཙུག་ལག་ཁང་དང་མཆོད་རྟེན་མང་དུ་བརྩིགས་ཏེ་དམ་པ་ཆོས་ཀྱི་དབུ་བརྙེས། གནས་བརྟན་བཅུ་དྲུག་ཀྱང་བྱོན། ཁ་ཆེའི་ཡུལ་ན་དེ་བཞིན་གཤེགས་པ་བདུན་གྱི་སྐུ་གདུང་བཞུགས་པའི་མཆོད་རྟེན་ཀྱང་རྫུ་འཕྲུལ་གྱིས་ནམ་མཁའ་ནས་གདན་དྲངས་ཏེ་ཙརྨའི་གཙུག་ལག་ཁང་དུ་བཞུགས། དེ་ན་བྱམས་པའི་སྤྲུལ་པ་རྒྱལ་པོ་ལི་རྗེ་བི་ཛ་ཡབྷ་རི་ཡ་ཞེས་པས་རྒྱ་གར་གྱི་དགྲ་བཅོམ་བཞི་མཆོད་གནས་སུ་བཀུར། ཀེའུ་དོ་ཤན་གྱི་རི་བོ་ན་སངས་རྒྱས་འོད་སྲུང་གི་སྐུ་གདུང་བཞུགས་པའི་མཆོད་རྟེན་གོ་མ་ས་ལ་གནྡྲ་སྟེ་ཙནྡན་ས་མཆོག་གི་དྲིའི་མཆོད་རྟེན་ཅེས་བྱ། འདི་ལ་དད་པས་མཆོད་པ་ཀུན་ཕྱིར་མི་ལྡོག་པར་གསུངས། །བ་ཤའི་ཡུལ་ཞེས་པའང་ལི་ཡུལ་གྱི་ནང་ཚན་དྲོན་ཏི་ཞེས་བྱ་བ་ལ་འདོད། སྤྱིར་ནི་མི་གཅིག་གོ །གཞན་ཡང་དེར་གཙུག་ལག་ཁང་ཆེན་༦༨པོ། འབྲིང་༣༥། ཆུང་ངུ་༡༤ར། ཕྱི་རོལ་གྱི་ཁོར་ཡུག་ཚུན་ཆད་བརྩིས་ན་སྟོང་ཕྲག་བརྒྱ་བརྒྱད་ཅུ་རྩ་བརྒྱད་དུ་ཡོད་པར་བཤད། ཡང་རྒྱལ་པོ་བི་ཛ་ཡ་བིརླས་རི་གླང་མགོའི་སྟེང་དུ་ཧཱུཾ་ཏོ་ཤན་གྱི་གཙུག་ལག་ཁང་ཆེན་པོ་བརྩིགས། དེར་ཐུབ་ཆེན་

---

^{[མ་དཔེ་གཟིགས་ན་འདིར་གནོན།]}

བཞུགས། དེ་དག་གི་སྲུང་མ་རྣམ་སྲས། ཡང་དག་ཤེས་ཀླུའི་རྒྱལ་པོ་མ་དྲོས་པ་རྣམས་ཡིན་པར་བཤད། འདི་དང་བལ་ཡུལ་མི་གཅིག་སྟེ། སྒྲོལ་མ་རལ་པ་གྱེན་བརྫེས་ཀྱི་རྒྱུད་ལས། བལ་ཡུལ་དེ་བཞིན་མང་ཡུལ་དང་། རྒྱ་ནག་ཆེ་དང་ལི་ཡུལ་ཀྱི། དེ་དག་མ་ལུས་གྲུབ་པའི་ཞིང་། ཞེས་བསྔགས་ཤིང་། བསོད་རྩེས་ཀྱང་། ལིའི་ཡུལ་དང་། བལ་ཡུལ་ཅེས་ཐ་དད་དུ་བཤད་པ་སོགས་ལུང་རིགས་ཀྱིས་གནོད། གོ་མ་ས་ལ་ག་དང་ཤིན་ཀུན་ཡང་མི་གཅིག་སྟེ། སྔ་མ་འོད་སྲུང་གི་དུས་སུ་བྱུང་ལ། ཕྱི་མ་བལ་བོའི་རྒྱལ་པོ་འོད་ཟེར་གོ་ཆས་བརྩིགས་པར་ལམ་འབྲས་ཞྭ་མ་ལུགས་ཀྱི་གཏམ་རྒྱུད་ལས་འབྱུང་ངོ་། །འོ་ན་དེ་ཕྱོགས་གང་དུ་ཡོད་ཅེ་ན། དེང་སང་དངོས་སུ་མཐོང་བ་སོགས་མི་འདུག་པས་འཆད་དཀའ་ཡང་། ལུང་ལས་རྗེས་སུ་དཔགས་ན། རྒྱ་ནག་དང་བོད་ཡུལ་དབུས་ནས་གཞལ་བའི་ནུབ། རྡོ་རྗེ་གདན་གྱི་ནུབ་བྱང་གི་མཚམས་ན་ཡོད་པར་གྲུབ་སྟེ། དང་པོ་ནི། ལི་ཡུལ་ལུང་བསྟན་ལས། དམག་སྟོང་ཕྲག་བཅུ་དང་བཅས་ཏེ་ནུབ་ཕྱོགས་སུ་ཡུལ་ཚོལ་དུ་ཕྱིན་ཏེ། ཅེས་པས་གྲུབ་ལ། གཉིས་པ་ནི། ཀ་ལིངྐ་ཡི་ཡུལ་དེར་ཡོད་པར་བཤད་པ། དེ་གུ་གེ་མང་ནང་གི་རྒྱབ། རྡོ་རྗེ་གདན་ནས་དཔག་ཚད་དྲུག་ཅུ་རྩ་གཉིས་ན་ཡོད་པར་བཤད་པས་སོ།། ༈ །།ཁ་ཤའི་ཡུལ་ཅེས་པ་འཐུང་སྤྱོད་ཀྱི་ཡ་གྱལ་གཅིག་ཡོད་

---

^{[མ་དཔེ་གཟིགས་ན་འདིར་གནོན།]}

པར་བཤད་པའི་མོན་ཡུལ་དེར་བཞག་ནས། དེ་ལས་གཞན་པའི་ལི་ཡུལ་ཞིག་ཡོད་པར། བུ་སྟོན་གྱིས་བཅུ་གཉིས་བཤད་ཀྱང་ཧ་ཅང་ཐུང་སྙམ། མཆན། ས་པཎ་གྱིས། ཁ་ཆེ་དང་ནི་ཁ་ཤ་སོགས། མ་ཁ་དང་ནི་ལི་ཡི་ཡུལ། ཅེས་གསུངས། འདི་ན་སྔར་དགྲ་བཅོམ་ཞིག་རི་དྭགས་རུ་རུ་གསེར་གྱི་མདོག་ཅན་ཞིག་ཏུ་སྤྲུལ་ཏེ་འབྱོན་པས་ཡུལ་གྱི་མིང་ལའང་དེ་སྐད་བཏགས་པར་བཤད། དོན་མོན་ཡུལ་ལ། རྒྱ་གར་གྱི་སྐད་དུ། ཀཱི་ར་དང་། ཀོ་ར། ཕལ་སྐད་དུ་ཁ་ཤ་ཞེས་ཟེར་རོ།། ༈ །།སྟོན་པ་ཡུམ་གྱི་ལྷུམས་སུ་ཞུགས་པ་དང་། དེའི་ཚེ་གསོ་སྦྱོང་བླངས་པ་འགལ་ཅེ་ན། དེ་ནི་འཇིག་རྟེན་གྱི་སྣང་ངོ་ཙམ་ལས། རྒྱལ་པོ་ཟས་གཙང་དང་། ཡུམ་སྒྱུ་འཕྲུལ་མའི་ཁམས་གཉིས་ལས་གྲུབ་པ་མ་ཡིན་ཏེ། དེ་ལྟར་གྲུབ་པ་ཐམས་ཅད་དྲང་དོན་དུ་བལྟ་བར་བྱའོ། །དེ་སྐད་དུ་འཇིག་རྟེན་མཐུན་འཇུག་གི་མདོ་ལས། །དེ་བཞིན་གཤེགས་པ་རྣམས་ཀྱི་སྐུ། །འཁྲིག་པ་ལས་ནི་བྱུང་མིན་ལ། །ཡབ་དང་ཡུམ་ཡང་སྟོན་པར་མཛད། །འདི་ནི་འཇིག་རྟེན་མཐུན་འཇུག་ཡིན། །ཞེས་འཇིག་རྟེན་གྱི་མི་རིགས་ལ། ཤཱཀྱའི་སྲས་ཞེས་བརྗོད་པའང་མི་འགལ་ཏེ། སྐྱ་བསེང་གི་བུ་ལྔ་བཞིན་ནོ། །དེ་ནི་ཡབ་ལ་མ་ལྟོས་པར་ཡུམ་གྱི་ལྷུམས་སུ་ཞུགས་པ་ཡིན་ལ། དེའི་གསོ་སྦྱོང་ཡང་སྔོན་གྱི་རིག་བྱེད་ལས་འབྱུང་བ་ལྟར་ཚུལ་ཁྲིམས་ཡན་ལག་ལྔ་པ་དང་། བརྒྱད་བསྟེན་བཞིན་དུ་འཁྲིག་པ་

---

^{[མ་དཔེ་གཟིགས་ན་འདིར་གནོན།]}

སྤྱོད་པ་ཙམ་གྱིས་བསླབ་པ་དང་མི་འགལ་ཏེ། དེར་ལོག་གཡེམ་སོང་བར་གསུངས་པའི་ཕྱིར་རོ།། ༈ །།སྲས་སྒྲ་གཅན་འཛིན་མངོན་འབྱུང་སོགས་ལས་གྲགས་འཛིན་མ་དང་། སོར་འབྲང་སོགས་ལས་ས་མཚོ་མར་འཁྲུངས་པར་བཤད། ཁ་ཅིག་དེ་གཉིས་གཅིག་པར་འདོད་ཀྱང་། ལུང་གཞི་ལས། སྔ་མ་ཤཱཀྱ་ལག་ན་བེ་ཅོན་དང་། ཕྱི་མ་དྲིལ་བུའི་སྒྲའི་བུ་མོ་ཡིན་པར་བཤད་པས་ཐ་དད། དེས་ན་དེ་གཉིས་ཀའི་བསམ་ངོ་དང་མཐུན་པར། གཉིས་ཀར་བལྟམས་པའི་ཚུལ་མཛད་པ་ཡིན་པས་མི་འགལ་ལམ་སྙམ་ལགས།། ༈ །།བོད་ཀྱི་རྒྱལ་རིགས་ནི། འཇམ་དཔལ་རྩ་རྒྱུད་ཤཱཀྱ་བློ་གྲོས་ཀྱི་འགྱུར་ལས། །ལྷ་ཡུལ་ལྡན་ཞེས་བྱ་བ་ནས། །གངས་ཅན་ཡུལ་གྱི་ནང་གནས་པར། །རྒྱལ་པོ་མི་ལི་ལྷ་ཞེས་པ། །ལི་ཙཱ་བཱི་ཡི་རིགས་སུ་འབྱུང་། །ཞེས་དང་། ཆོས་ཀྱི་ཤེས་རབ་ཀྱི་འགྱུར་དུ། །ཁ་བའི་རླབས་ཅན་ནང་གནས་པར། །ང་རྒྱལ་བྲལ་བའི་རྒྱལ་པོ་ལྷ། །རྒྱལ་བའི་ཤཱཀྱ་ཆེན་པོའི་རིགས་རིགས་སུ་འབྱུང་བ་སྟེ། ཞེས་བཤད་པས། ཕྱི་མ་དག་གམ་སྙམ་སྟེ། ལྷ་བླ་མ་ལ་སོགས་པའི་ཡིག་ཚང་རྙིང་པ་ཤིན་ཏུ་དག་པ་རྣམས་དང་མཐུན་པས་སོ།། །།དྲི་མེད་ལུང་། དར་བར་འགྱུར་དང་། རྒྱས་པར་འགྱུར་གཉིས་ཕྱི་མ་འཐད་དམ་སྙམ་སྟེ། ས་པཎྜི་ཏས། ང་ནི་མྱ་ངན་འདས་གྱུར་ནས། །ལོ་ནི་ཉིས་སྟོང་ལྔ་བརྒྱ་ན། །དམ་ཆོས་རྒྱས་པར་འགྱུར་ཞེས་གསུངས།

---

^{[མ་དཔེ་གཟིགས་ན་འདིར་གནོན།]}

ཞེས་བཤད་ཅིང་། རལ་པ་ཅན་གྱི་དུས་ཁོ་ནར་འགྲིགས་པར་སེམས། གདོང་དམར་ཅན་གྱི་ཡུལ། རྒྱ་ནག་ཡིན་པར་སྦ་བཞེད་དང་། བོད་ཡིན་པར་ལི་ཡུལ་ལུང་བསྟན་དུ་འབྱུང་ཡང་། དེ་གཉིས་དག་ཁུངས་ཐུབ་པའི་ཤེས་བྱེད་མི་སྣང་། འོན་ཀྱང་བུ་མོ་དྲི་མ་མེད་པས་ཞུས་པའི་མདོའི་ལུང་དམ་པ་རྣམས་ཀྱིས་ཚད་མར་མཛད་པས། དེ་ལྟར་ན་བོད་དུ་འཐད་དོ།། ༈ །།དགོངས་གསལ་ལས། ངོ་བོ་གཅིག་ཡིན་ན། །དོན་དམ་པ་ལ་ངོ་བོ་གྲུབ་པར་ཐལ་བ་དང་། གཅིག་པོ་བཀག་པ་ཡིན་ན་དོན་དམ་དངོས་མེད་དུ་ཐལ་བའི་ཕྱིར་སྐྱོན་ཡོད་དོ། །ཞེས་པ་ངོ་བོས་གྲུབ་པར་འདོད་པ་དང་དོན་དམ་དངོས་མེད་དུ་འདོད་ན་སྐྱོན་དེ་ཡོད་མོད། འབུམ་ལས། མཚན་ཉིད་མེད་པར་མཚན་ཉིད་གཅིག་པའོ། །ཞེས་སོགས་གསུངས་པ་གཞན་སེལ་གྱི་སྒོ་ནས་ལེགས་པར་འཆད་ཤེས་ན་སྐྱོན་མེད་མོད། མ་ཤེས་ན་འཁྲུལ་ལོ། །དེས་ན་རང་ལུགས། དོན་དམ་པར་གཅིག་དང་ཐ་དད་ཀྱི་སྤྲོས་པ་དང་བྲལ་བ་ཡིན་ཏེ། དགོངས་འགྲེལ་ལས། ཀུན་རྫོབ་ཁམས་དང་དོན་དམ་དེ་བཞིན་ཉིད། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོག་པ། །དེ་དག་ཚུལ་མིན་ལྟ་ལ་ཞུགས་པ་ཡིན། ཅེས་གསུངས། ཐ་སྙད་ཀྱི་རྣམ་གཞག་ནི། གཞན་སེལ་གྱི་ངོར་ངོ་བོ་དབྱེར་མེད་ལྡོག་པ་ཐ་དད་ཅེས་བྱ་བའི་དེ་ཉིད་དུ་གཞན་དུ་བརྗོད་དུ་

---

^{[མ་དཔེ་གཟིགས་ན་འདིར་གནོན།]}

མེད་པའོ། །ཞེས་གསུངས་སོ། །ལྗོན་ཤིང་ལྟར་ན། ཡུལ་གཅིག་གི་སོ་སྐྱེའི་སྣང་བའི་ཆ་ནས་ཀུན་རྫོབ་དང་། འཕགས་པའི་བློས་དེ་ཉིད་རང་བཞིན་མེད་པར་ཤེས་པ་དོན་དམ་ཞེས་འདོགས་ཀྱི། ཀུན་རྫོབ་སྣང་བའི་ཆ་དེ་ལས་རང་བཞིན་མེད་པ་ལོགས་སུ་དབྱེར་མེད་པས། དེ་ཙམ་ལ་ངོ་བོ་དབྱེར་མེད་ཅེས་བྱ་ཞིང་། དེ་ཙམ་ལ་གཅིག་པའི་ཐ་སྙད་བཏགས་པ་མི་འགལ་ཏེ། གཅིག་གི་ཆོས་ཉིད་གང་ཡིན་པ། དེ་ནི་ཀུན་གྱི་ཆོས་ཉིད་ཡིན། ཞེས་སོ། །་དགེ་སོགས་བདེན་གཉིས་ངོ་བོ་གཅིག་ཏུ་བཞེད་པར་གོ་རམ་པས་བཀག་ཀྱང་། སྔ་མས་སྒྲས་ཟིན་དུ་ཁས་བླངས་པ་མེད་དམ་སྙམ།། །།།ལམ་སྐོར་ཕྱི་མ་བརྒྱད་ལས། བསམ་མི་ཁྱབ་པ་སཾ་ཊ་དང་། འགྲེལ་པ་ལུགས་གང་རུང་། མཚོ་སྐྱེས་ལ་དེ་ཉིད། ལྷན་ཅིག་སྐྱེས་གྲུབ་ལ་འགྲེལ་པ་ལུགས། གཏུམ་མོ་ལམ་རྫོགས་དང་། ཡོན་པོ་སྲོང་བ་བདེ་གསང་གང་རུང་། མཆོད་རྟེན་དྲུང་ཐོབ་ལ་གསང་འདུས། ཡི་གེ་མེད་པ་ལ་གསང་འདུས་བདག་མེད་གང་རུང་། དབང་ཡོན་ཏན་རིམ་པ་གསང་དགོས་ཞེས་ཀུན་དགའ་དབང་ཕྱུག་བཞེད། གཤེགས་སྙིང་། རང་བཞིན་གནས་རིགས། ཀུན་གཞི་རྒྱུ་རྒྱུད་སོགས་ངོ་བོའི་སྒོ་ནས་མི་འདྲ་བ་མེད་པས་གཅིག་པར་དགོངས་ཏེ། རང་སེམས་སྤྲོས་པ་དང་བྲལ་བ་དེ་གློ་བུར་གྱི་དྲི་མས་བསྒྲིབས་པའི་ཆ་ནས་རྒྱུ་རྒྱུད། དེའི་སྤྱི་མཚན་གྱིས་ཐམས་

---

^{[མ་དཔེ་གཟིགས་ན་འདིར་གནོན།]}

ཅད་ལ་ཁྱབ་པའི་ཆ་ནས་གཤེགས་སྙིང་། ཆོས་སྐུའི་རྒྱུ་བྱེད་པའི་ཆ་ནས་གནས་རིགས་ཞེས་བཏགས། དེས་ན་རྒྱུ་རྒྱུད་པའི་གནས་སྐབས་ལ་མ་དག་པའི་སྣང་བ་སྣ་ཚོགས་ཡོད་པའི་ཆ་ནས་སྦྱང་གཞིར་འགྱུར་ཞིང་། དེ་ལ་མ་དག་པའི་སྣང་བ་ཞེས་བཤད། རང་གི་ངོ་བོ་སྦྱང་རྒྱུ་མེད་པས་སྦྱང་གཞིར་མི་འགྱུར། དེས་ན་ངོ་བོ་ལ་ལྟོས་ན་གནས་འགྱུར་མེད་ཅིང་། ཡོན་ཏན་ལ་ལྟོས་ནས་ཡོད་པར་འགྱུར་བ་ཁོ་ནས་ཤེས།རྒྱས་པར་འཇམ་རྡོར་ཊི་ཀར་བལྟ།། ༈ །།སློབ་མ་ཁ་འཆལ་སྐྱེད་ལ་ཉེས་བྱས་ཟེར་བ་ནི་འདུལ་བས་སྔགས་ལ་རྒྱས་བཀབ་པས་མི་འཐད།། ༈ །།སྣང་གསུམ་འདི་ལམ་གྱི་གཞི་བཅའ་ལ་སྦྱར་ན་ཕར་ཕྱིན་དང་༼ ཐུན་མོང་བ་ཡིན་ཞིང་། ལམ་ཡོངས་རྫོགས་ལ་སྦྱར་ཚེ། མ་དག་པའི་སྣང་བ་ནས་བདེ་མཆོག་སྒྱུ་མའི་བར་དཀྲི་ཞིང་དབང་བསྐུར་བ་ལན་ཆད་རྒྱུ་རྒྱུད། ཉམས་སྣང་ཐབས་རྒྱུད། དག་སྣང་འབྲས་རྒྱུད་དུ་འགྱུར་བས་མངོན་རྟོགས་ལྗོན་ཤིང་དང་ཡང་མཐུན་པས་ཀུན་མཁྱེན་པས་དེ་སྐད་བཞེད།། ༈ །།རྒྱུད་བཞིའི་བླ་མ་རྡོ་རྗེ་འཆང་གིས་རྒྱུད་ཀྱི་བྱུང་ཚུལ་ལས་འཕགས་པ་ཆོས་སྣང་ཉིད་ལ་བགྲངས། དེ་ནས་ས་ཆེན་ལ་འཆད་པར་མ་བཤད་པ་གཞུང་རྙིང་ལྟར་མཛད། གསན་ཡིག་ཐོས་པ་རྒྱ་མཚོར། ཡང་ན་མཆིམས་ལོ་ཙཱ་བ། འཁོན་དཀོན་མཆོག་རྒྱལ་པོ། རྗེ་ས་སྐྱ་པ་ཆེན་པོ་ཞེས་དག་གོ་ཞེས་རྒྱལ་ཚབ་དམ་པ་བཞེད་པས་

---

^{[མ་དཔེ་གཟིགས་ན་འདིར་གནོན།]}

དཔྱད་དགོས།། ༈ །།གངས་རི་རྡོ་རྗེའི་དཀའ་འགྲེལ་གྱི་རྒྱ་དཔེ་ངོར་ན་ཡོད། འོན་ཀྱང་དེའི་ཁ་ཡིག་ཏུ། ཀ་མ་ལ་ཀཱུ་ལི། ཞེས་སྣང་བས། ཕྱག་ལེའི་དྲིས་ལན་ལས། གཞན་དགེས་པ་རྡོ་རྗེའི་འགྲེལ་པ་སློབ་དཔོན་ནག་པོ་པ་དང་། སློབ་དཔོན་ཀ་མ་ལ་ཀཱ་ལི་ཤས་མཛད་པ་དང་། ཅེས་སྣང་བ་དེ་ཡིན་ནམ་སྙམ། དེ་ལྟ་ན་པདྨ་རྡོ་རྗེ་ཤེས་པར་འགྱུར་མོད། འོན་ཀྱང་སློབ་དཔོན་མཚོ་སྐྱེས་ནི་མ་ཡིན་ཏེ། དེའི་སྐད་དོད་ལ། ས་ཏོ་ཛ་དང་། པདྨ་བཛྲ་ཞེས་ཡོད་པའི་ཕྱིར་རོ། །དཔྱལ་སེ་བསོད་ནམས་རྒྱལ་མཚན་ཏེ། སེ་དཔྱལ་ཞེས་མ་དག །ཞང་སྟོན་རྒྱལ་པོའི་ཊཱི་ཀ་སྔ་ཕྱི་གཉིས་ལས། སྔ་མ་ལ་ཇོ་ནང་པའི་གྲུབ་མཐའ་འགའ་བསྲེས་ཤིང་། ཕྱི་མར་ཤིན་ཏུ་མང་བ་བསྲེས་པ་ཡོད།། ༈ །།སྦྱོར་ལམ་ངེས་འབྱེད་རྣམས་དགོངས་གསལ་ལས་རང་རིག་མངོན་སུམ་དུ་བཤད་པ་འདི་ཀ་འཐད།། ༈ །།ལྗོན་ཤིང་ལས་ཀུན་བཏུས་མདོ་སྡེ་བའི་མཚན་གཞིར་འཇོག་པ་ལ། དེ་སེམས་ཙམ་ཡིན་པས་རྗེ་བཙུན་ཀྱང་སྡེ་སྣོད་ལ་མི་མཁས་ཞེས་ཕྱི་རབས་པ་དག་སྒྲོགས་མོད། དེ་ནི་མ་ཡིན་ཏེ། སྤྱིར་ཀུན་བཏུས་སེམས་ཙམ་ཡིན་ཀྱང་། དེ་ལས་ཕྱི་དོན་ཁས་བླངས་པ་སོགས་མདོ་སྡེ་པ་དང་མཐུན་པ་མང་པོ་གསུངས་པ་དང་། མཛོད་རང་འགྲེལ་བྱེ་སྨྲ་བའི་ལུགས་ཡིན་ཀྱང་སྐབས་དེར་མདོ་སྡེ་པ་བཞེད་པ་སྟེ། དཔེར་ན། ཁ་ཅིག་ཏུ་ཕྱི་དོན་དང་། །

---

^{[མ་དཔེ་གཟིགས་ན་འདིར་གནོན།]}

ལ་ལར་སེམས་ཙམ་སྟོན་པ་ཆོས་གྲགས་ཀྱི་རྣམ་འགྲེལ་ལྟ་བུ་སྟེ། གཞུང་གཅིག་གི་ནང་དུ་གྲུབ་མཐའ་དུ་མ་སྟོན་པ་ལ་དགོངས་སོ། །དེས་ན་ཀུན་བཏུས་པའི་མདོ་སྡེའི་སྐབས་རྣམས་དེའི་མཚན་གཞིར་བཞག་པ་སྟེ། ཡ་གྱལ་གྱི་མིང་ཚོགས་པ་ལ་བཏགས་ཀྱི། རིལ་པོར་མདོ་སྡེ་པར་བཞེད་པ་ག་ལ་ཡིན། དེས་ན་གངས་ཅན་དུ་མདོ་སྡེ་བའི་གཞུང་རང་རྐང་ཚུགས་པ་ནི་སུས་ཀྱང་མི་རྙེད་དོ།། ༈ །།ཡུམ་གྱི་འགྲེས་རྐང་བཞུགས། །ཕུང་པོ་ལྔ་དང་ཡུལ་དྲུག་དང་། །དབང་པོ་དྲུག་དང་རྣམ་ཤེས་དྲུག །རེག་བ་དྲུག་དང་ཚོར་བ་དྲུག །ཐུན་མོང་འགྲེས་རྐང་སོ་ལྔའོ། །རྟེན་འབྲེལ་བཅུ་གཉིས་ཁམས་དྲུག་སྟེ། །མ་གཏོགས་འཁོར་དྲིས་བཅོ་བརྒྱད་ཡིན། །བྱང་ཆུབ་ཀྱི་ནི་ཕྱོགས་ལ་བདུན། །བསམ་གཏན་བཞི་གཅིག་ཚད་མེད་གཅིག །གཟུགས་མེད་བཞི་གཅིག་རྣམ་ཐར་བརྒྱད་གཅིག །སྙོམས་འཇུག་དགུ་གཅིག་སྒོ་གསུམ་གཅིག ། བདེན་པ་རྣམ་བཞི་གཅིག་ཏུའོ། །ཕྱིན་དྲུག་སྟོང་ཉིད་བཅོ་བརྒྱད་དོ། །སོ་སོར་བགྲངས་པས་ཞེས་གསུམ་ལ། །ཐབས་ཀྱི་འགྲེས་རྐང་ཞེ་གསུམ་ཟེར། །མངོན་པར་ཤེས་དང་ཏིང་འཛིན་དང་། །གཟུངས་ཀྱི་སྒོ་དང་སྟོབས་བཅུ་དང་། །མི་འཇིགས་བཞི་དང་སོར་རིག་བཞི། །བྱམས་པ་ཆེ་དང་སྙིང་རྗེ་ཆེ། །མ་འདྲེས་པ་ནི་བཅོ་བརྒྱད་དང་། །ཐམས་ཅད་ཤེས་དང་ལམ་ཤེས་དང་། །རྣམ་པ་ཐམས་ཅད་མཁྱེན་པ་

---

^{[མ་དཔེ་གཟིགས་ན་འདིར་གནོན།]}

དང་། །འབྲས་བུའི་འགྲེས་རྐང་བཅུ་གཉིས་སོ། །དེ་ལྟར་འགྲེས་རྐང་བརྒྱ་རྩ་བརྒྱད། །ཤེས་ན་འབུམ་དོན་བཀླགས་ཆོག་ཡིན། །དང་ཞེས་བྱ་བའི་འབྱེད་ཚིག་རྣམས། །སོ་སོར་ཆོད་ལ་ཚིག་ཚིག་རྣམས། །དོན་མང་ཡོད་ཀྱང་བསྡོམས་ལ་བགྲངས། །ཞེས་པའང་རོང་སྟོན་གྱི་རྣམ་བཤད་ལྟར་བྲིས་བ་ཤུ་བྷཾ།། ༈ །།རྗེ་བཙུན་མི་ལས། ཐམས་ཅད་ཡོད་ཀྱང་སྔགས་པ་ཀུན་རྫོབ་ཏུ་བསྟན། འཁོར་འདས་གང་ཡང་མཐར་ཐུག་གི་དོན་ལ་མ་གྲུབ་པར་བསྟན་ནོ། །དང་པོ་ནི། ཀུན་རྫོབ་བདེན་པའི་དབང་དུ་ནི། །འཁོར་བ་དང་ནི་མྱ་ངན་འདས། །ཐམས་ཅད་ཡོད་ཅེས་ཐུབ་པས་གསུངས། །ཞེས་སོ། །གཉིས་པ་ནི། དངོས་དང་དངོས་མེད་ཟུང་འཇུག་སྟེ། རང་གི་ངོ་བོ་ཐ་སྙད་ལས་འདས་ཀྱང་། བློ་ཡི་ཡུལ་དུ་ཟུང་འཇུག་དང་གནས་ལུགས་ཞེས་མིང་དུ་བཏགས་ལ། གཉིས་མེད་དེའི་ངང་ལས་འཁོར་འདས་གང་ཡང་ཁས་ལེན་དང་བྲལ་བ་སྟེ། དོན་དམ་བདེན་པའི་དབང་དུ་ནི། བགེགས་པས་སངས་རྒྱས་ཉིད་ཀྱང་མེད། །ཅེས་སོགས་གསུངས་སོ། །འོ་ན་དེ་ཁོ་ན་ཉིད་རྟོགས་སོ་ཞེས་པའི་ཐ་སྙད་གང་ལ་བཞག་སྙམ་ན། གཉིས་སུ་མེད་པའི་དོན་མཐོང་བ་ལ་ཐ་སྙད་ཙམ་བཏགས་པ་སྟེ། གཉིས་སུ་མེད་པའི་དོན་རྟོགས་ན། ལྟ་བའི་མཆོག་ཀྱང་དེ་ལ་བྱ། ཞེས་སོ། །འོ་ན་གཉིས་མེད་ཀྱི་ཡེ་ཤེས་དེ་དོན་ལ་གྲུབ་བམ་སྙམ་ན་མ་གྲུབ་སྟེ།

---

^{[མ་དཔེ་གཟིགས་ན་འདིར་གནོན།]}

ནང་འགྱུ་བའི་ཡིད་ཀྱི་རྣམ་ཤེས་འདི། །མ་རྟོགས་དུས་ན་མ་རིག་པ། །ལས་ཉོན་ཀུན་གྱི་གཞི་རྩ་ཡིན། །རྟོགས་ན་རང་རིག་ཡེ་ཤེས་ཏེ། །དཀར་པོའི་ཡོན་ཏན་རྫོགས་པར་འགྱུར། །མཐར་ཐུག་དོན་ལ་ཡེ་ཤེས་མེད། །ཆོས་རྣམས་ཟད་སར་སྐྱོལ་ལོ་གསུངས། །ཞེས་སོ། །དེས་ན་གཞི་འཁོར་འདས་གཉིས་གདོད་མ་ནས་གྲོལ་བ་སྟེ། འཁོར་བ་རང་གྲོལ་གཞི་ཡི་གནད། །སྙིང་པོའི་དོན་ལ་ངོ་སྤྲོད་ཀྱིས། །ཞེས་སོ། ། དེ་ཉིད་གཟུང་འཛིན་གྱི་སྒྲིབ་གཡོགས་བྲལ་བའི་ཚུལ་གྱིས་མངོན་དུ་གྱུར་པ་ནི་མཉམ་པར་བཞག་པའི་ལམ་གྱི་དངོས་གཞི་སྟེ། ང་རིག་པ་རྟེན་མེད་གཅེར་བུ་འདི། །འགྱུ་བ་དྭངས་པ་ལྟ་བའི་གདེངས། །འོད་གསལ་སྟོང་པར་བློ་ཐག་ཆོད། །ཅེས་སོ། །དེ་ཉིད་དུས་རྟག་ཏུ་གཡོ་བ་མེད་པར་ཕྲིན་ལས་ལྷུན་གྲུབ་ནི་འབྲས་བུ་སྟེ། དེའི་དོན་ལ་མ་གཡོས་ན། འབྲས་བུའི་མཆོག་ཀྱང་དེ་ལ་བྱ། ཞེས་སོ། །འོ་ན་འདི་དག་གི བསྒོམ་པས་ཉམས་སུ་བླང་བྱ་ཡིན་ན། འདིར་འདི་ལྟར་བཞེད་ཅེས་བརྗོད་མི་རུང་ངོ་སྙམ་ན། མ་ཡིན་ཏེ། གྲུབ་མཐའི་ལྟ་བས་བློ་ཡི་ཡུལ་ལ་སྒྲོ་འདོགས་མ་ཆོད་ན། ཡང་དག་པའི་ལྟ་བ་དུག་མེད་རྟོགས་མི་སྲིད་པས། ངེས་དོན་གྱི་གསུང་རབ་ཐམས་ཅད་ཀྱང་། རག་པའི་ལམ་ནས་དྲངས་པའི་གནད་ཀྱང་དེ་སྟེ། ཀླུ་སྒྲུབ་ཀྱིས། ཐ་སྙད་ལ་ནི་སོགས་དང་། འདི་ཉིད་ཀྱིས། གྲུབ་མཐའ་མི་ཤེས་པའི་ལྟ་བ་དཀའ།

---

^{[མ་དཔེ་གཟིགས་ན་འདིར་གནོན།]}

ནུས་པ་མ་ཐོབ་པའི་སྤྱོད་པ་དཀའ། །ཞེས་གསུངས་པའི་ཕྱིར་རོ། །དེས་ན་གཞི་ལམ་འབྲས་གསུམ་ཐམས་ཅད་གནས་ལུགས་ཟུང་འཇུག་གཅིག་ཉིད་ལ། སྒྲིབ་གཡོགས་བཅས་པ་དང་། ཅུང་ཟད་བྲལ་བ་དང་། མཐའ་དག་བྲལ་བའི་རིམ་པ་མ་གཏོགས་གཞི་ལམ་འབྲས་གསུམ་ངོ་བོ་དབྱེར་མེད་དུ་སྨྲ་བ་འདི་ནི། རྣལ་འབྱོར་དབང་ཕྱུག་མར་མི་དང་། རྗེས་བཙུན་ས་སྐྱ་པ་ཡབ་སྲས་ཀྱི་བཞེད་པ་མཐུན་ཏེ། །རང་བཞིན་རྒྱུ་ལ་བསམ་ན་ལྷུན་གྲུབ་སྟེ་འགྱུར་བ་མེད་པ་དང་། མཐའ་ཡས་པའི་ཡོན་ཏན་གནས་འགྱུར་དུ་བཤད་པ་འདི་གཉིས་ཁོ་ན་ལ་དཔྱད་པས་བདེ་གཤེགས་སྙིང་པོ་ཡོད་པར་འདོད་པ་སོགས་ཀྱི་ལོག་རྟོག་ཐམས་ཅད་ཁེགས་པར་འགྱུར་ལ། །ས་པཎྜི་ཏས། རྟོགས་རྒྱུ་མེད་པའི་དོན་རྟོགས་ན། །གྲོལ་རྒྱུ་མེད་པའི་སེམས་ཉིད་གྲོལ། །ཤེས་བྱ་མེད་པའི་ཤེས་བྱ་ཤེས། །འཆད་རྒྱུ་མེད་པར་འཆད་ལ་མཁས། །འདོད་པ་མེད་པར་འདོད་དོན་འགྲུབ། །ཅེས་ཟུང་འཇུག་རབ་ཏུ་མི་གནས་པའི་དབུ་མ་ལ་འཕགས་བོད་པའི་པཎ་གྲུབ་ཐམས་ཅད་ཞལ་མཐུན་པ་ཡིན་ལ། རྒྱས་པར་སྤྲོས་པས་ཆོག་གོ། ༈ །།རྩ་བའི་བླ་མ་ནི། རང་ལ་ཆོས་དངོས་སུ་སྟོན་ནས། སྐུ་བཞིའི་ས་བོན་འདེབས་པ་པོ་ཁོ་ནར་འཇོག་སྟེ། སྙེ་མོ་སྒོམ་ཆེན་གྱི་དྲི་ལན་དུ་དེ་ལྟར་བཤད་དོ།། ༈ །།སངས་རྒྱས་ཕལ་པོ་ཆེ་ལས་སྟོང་གསུམ་དར་ཡུག་ཆེན་པོའི་དཔེས་བསྟན་པའི་

---

^{[མ་དཔེ་གཟིགས་ན་འདིར་གནོན།]}

དགོངས་པ་ལ། ལོ་ཙཱ་བས། དར་ཡུག་གི་རི་མོ་རྡུལ་ཕྲན་ལ་ཡོད་པ་བཞིན་དུ། སངས་རྒྱས་ཀྱི་ཡེ་ཤེས་སེམས་ཅན་ཀྱི་སེམས་ལ་ཡོད་པ་དེ་གང་ཡིན་ཞེ་ན། ཆོས་ཀྱི་དབྱིངས་སོ། །དེ་ཇི་ལྟར་ཡེ་ཤེས་ཡིན་ཞེ་ན་བཅོམ་ལྡན་འདས་ཀྱིས་ཆོས་ཐམས་ཅད་མཚན་ཉིད་མེད་པར་སྐད་ཅིག་དང་ལྡན་པའི་ཤེས་རབ་ཀྱིས་མཁྱེན་པས་ན། ཤེས་རབ་དེ་ཤེས་བྱ་དང་རྣམ་པར་དབྱེ་བ་མེད་དོ། །དེས་ན་དོན་དམ་པར་ཆོས་དབྱིངས་དེ་ཉིད་རིག་པའི་ཡེ་ཤེས་ཡིན་ལ། དེ་ཡང་སེམས་ཅན་ཐམས་ཅད་ལ་ཚང་བར་གནས་པས། དཔེ་དོན་དེ་ཤིན་ཏུ་འཐད་དོ། །ཞེས་གསུངས་ལ། འདིའི་དགོངས་པ་ནི། སངས་རྒྱས་ཀྱི་ཡེ་ཤེས་དང་། ཆོས་ཀྱི་དབྱིངས་དབྱེ་བ་མེད་ཅིང་། ཆོས་དབྱིངས་ལ་ཡེ་ཤེས་ཀྱི་ཡོན་ཏན་མཐའ་ཡས་པ་འབྱུང་བའི་ནུས་པ་ཚང་བས། རང་བཞིན་ནམ་རྒྱུ་ལ་བསམ་ན་ལྷུན་གྲུབ་ཅེས་བཤད་པ་དང་འགལ་བ་མེད་དོ། །བདེ་གཤེགས་སྙིང་པོ་དེ་ཐ་སྙད་དུ་ཡོད་པས་འཁོར་འདས་ཀྱི་སྣང་ཆ་སྣ་ཚོགས་འབྱུང་བས་ཀུན་གཞི་སོགས་ཀྱི་སྒྲའང་འཇུག་ལ། དོན་དམ་པར་སྤྲོས་པ་དང་བྲལ་བས་ཅིར་ཡང་འཆར་དུ་རུང་བའང་ལུང་རིགས་ཀྱིས་གྲུབ་བོ། །དེ་ནི་ས་པཎ་གྱི་དགོངས་པ་ངོ་མའོ། །ཀླུ་སྒྲུབ་ཀྱིས་ཀྱང་སྔ་མ་བསྟོད་ཚོགས་དང་། ཕྱི་མ་རིགས་ཚོགས་སུ་རྒྱས་པར་བཀྲལ། སྡོམ་གསུམ་གྱི་དགོངས་གཞི་སྔ་མ་ཡིན། ངོ་བོ་ཕྱི་མ་ཡིན། འདི་ཁྱད་པར་ཤིན་

---

^{[མ་དཔེ་གཟིགས་ན་འདིར་གནོན།]}

ཏུ་གལ་ཆེ།། ༈ །།ནག་པོའི་རིམ་གཉིས་ཀྱི་ཟིན་བྲིས་བཞུགས་སོ། །རྣལ་འབྱོར་དབང་ཕྱུག་སྤྱོད་པའི་རྡོ་རྗེའི་ལུགས་ཀྱི་འཁོར་ལོ་བདེ་མཆོག་གི་ལམ་གྱི་རིམ་པ་ལ། སྐལ་བ་དང་ལྡན་པའི་གང་ཟག་སྦྱིན་བྱ་བཞི་བྱིན་ནས་བསླབ་བྱ་གཉིས་ལ་བསླབས་ཏེ་གྲོགས་སྤྱོད་པ་གསུམ་གྱིས་མཚམས་སྦྱར་བས་འབྲས་བུ་སྐུ་གསུམ་ཡེ་ཤེས་ལྔ་འགྲུབ་པ་ཞིག་བཞེད་དོ། །དེ་ལ་དང་པོ་ནི། ཕར་ཕྱིན་ནས་རིམ་པར་ཞུགས་པའམ། དང་པོ་ནས་འདིར་ཞུགས་པའི་གཅིག་ཅར་པ་གང་ཡང་རུང་བའོ། །གཉིས་པ་ནི། འཁོར་ལོ་བདེ་མཆོག་ལྷ་མང་ལ་༦༢སྐྱེས་ཀྱི་དཀྱིལ་འཁོར་དུ་དབང་བཞི་ཚུལ་བཞིན་ཐོབ་པའོ། །གསུམ་པ་ནི། རིམ་པ་གཉིས་ལ་བསླབ་པ་སྟེ། འདི་ལ་སྔོན་འགྲོ་དང་དངོས་གཞི་གཉིས། དང་པོ་ནི། ཚོགས་གསོག་པར་བྱེད་པ་མཎྜལ། བྱིན་རླབས་འཇུག་པར་བྱེད་པ་བླ་མའི་རྣལ་འབྱོར། སྡིག་སྒྲིབ་སྦྱོང་བྱེད་རྡོར་སེམས་སྒོམ་བཟླས་གསུམ་མོ། །གཉིས་པ་ལ་གཉིས། དང་པོ་བསྐྱེད་རིམ་ནི་སྐྱབས་སེམས་ནས་བཟུང་དག་དྲན་པར་ཚང་བར་བསྒོམས་ལ། རྟེན་དང་བརྟེན་པར་བཅས་པ་ལ་སེམས་འཛིན་འཇུག་བཟླས་ཅུང་ཟད་བཅས་དཀྱིལ་འཁོར་གྱི་འཁོར་ལོ་སྣ་བུག་གཉིས་ནས་བསྡུས་ཏེ། གོ་ཆ་གསུམ་དང་ཚམ་རྔམས་ཀྱི་སྔགས་ཀྱིས་བསྲུངས་ལ་རྗེས་སྤྱོད་ལ་འཇུག་སྟེ། སྣང་བའི་དངོས་པོ་ཐམས་ཅད་ལྷར་མ་ཤར་གྱི་བར་དུའོ། །

---

^{[མ་དཔེ་གཟིགས་ན་འདིར་གནོན།]}

དེའི་ལམ་གྱི་རིམ་པའང་འདི་ཡིན་ཏེ། སྔོན་འགྲོ་ལ་གཞན་ལཱུ་ཧི་པ་དང་འདྲ། དག་པ་གསུམ་ལ་ངག་དང་ཡིད་དང་ལུས་དག་པ་རིམ་བཞིན་བསྒོམ། མཉམ་བཞག་གི་རྣལ་འབྱོར་བསྐྱེད་རྫོགས་གཉིས་ལས། སྔ་མར། དང་པོ་སྦྱོར་བ། དཀྱིལ་འཁོར་རྒྱལ་མཆོག་ལས་རྒྱལ་མཆོག་གོ། །དང་པོ་ལ་གཉིས་ཏེ། སྔོན་འགྲོ་དང་། དངོས་གཞིའོ། །དང་པོ་ལ་ཚད་མེད་བཞི་མི་བསྒོམས་པ་མ་གཏོགས། བསོད་ནམས་དང་ཡེ་ཤེས་ཀྱི་ཚོགས་བསགས་པ་འདྲ། གཉིས་པ་རྟེན་བསྐྱེད་པ་དང་། བརྟེན་པ་བསྐྱེད་པའོ། །དང་པོ་ལ་སྲུང་བའི་འཁོར་ལོ་ལ་ཕོ་ཉ་རྣམས་ཀྱིས་བགེགས་བཀུག་སྟེ་ཕུར་བུས་གདབ། ལྷའི་ས་གཞི་སོགས་ཟློ བསྒོམས་ལ། དེ་ལྟ་བུའི་སྲུང་འཁོར་གྱི་དབུས་སུ་ཨེ་ལས་ཆོས་འབྱུང་གྲུ་གསུམ་གྱི་དབུས་སུ། ས་ཆུ་མེ་རླུང་རླུང་མེ་ཆུ་སའི་དཀྱིལ་འཁོར་གྱི་སྟེང་དུ་རི་རབ་དང་གཞལ་ཡས་ཁང་གདན་དུར་ཁྲོད་དང་བཅས་པ་ནི བསྒོམ་པའོ། །གཉིས་པ་ལ། བསྙེན་པ། ཉེར་སྒྲུབ། སྒྲུབ་པ། སྒྲུབ་ཆེན་བཞི། དང་པོ་ལ་རྒྱུ་དང་། འབྲས་བུའི་རྡོ་རྗེ་འཛིན་པ་བསྐྱེད་པའོ། །དང་པོ་ནི། ཡེ་ཤེས་ལྔའི་ངོ་བོ་ཟླ་ཉི་ཕྱག་མཚན་ས་བོན་དང་བཅས་པ་རོ་གཅིག་ཏུ་འདྲེས་པ་ལས་སྐུ་ཡོངས་སུ་རྫོགས་པ་བདེ་མཆོག་དཀར་པོ་རྡོ་རྗེ་ཕག་མོ་དང་བཅས་པ་བསྐྱེད་པའོ། །གཉིས་པ་ནི། མཁའ་གསང་བྱིན་རླབས་སྔོན་དུ་འགྲོ་བས་སྙོམས་འཇུག་གི་སྒྲས་། །