ཤོག་ལྷེབ་ ༢༠༡ ནས་ ༣༠༠ བར།
བྷྱཿ རིམ་དགུའི་ཐེག་པ་ཡོངས་རྫོགས་བརྗོད་བྱར་བྱས་པ་སྐོང་བཤགས་རྡོ་རྗེའི་ཐོལ་གླུ་ལས། ཉན་ཐོས་ཀྱི་དཀྱིལ་འཁོར་ལྔ་ནི། གཙོ་བོ་ཤཱཀྱའི་རྒྱལ་པོ་ལ། དུས་བཟང་གི་ལྷ་གསུམ་དང་། དུས་གསུམ་སངས་རྒྱས་ཀྱིས་བསྐོར་བ། ༡ འཁོར་རྣམ་པ་བཞིས་དགེ་སློང་ཕ་མ། དགེ་བསྙེན་ཕ་མ། བསྐོར་བ། ༢ ཡང་འཁོར་རྣམ་པ་བཞི། ཉན་ཐོས་མཆོག་བརྒྱད། རང་རྒྱུད་པ་བརྒྱད་དེ་བཅུ་དྲུག་གིས་བསྐོར་བ། ༣ མཆོག་བརྒྱད་དང་ཉན་ཐོས་བཅུ་དྲུག་གིས་བསྐོར་བ། ༤ །གནས་བརྟན་བཅུ་དྲུག་གིས་བསྐོར་བའི་དཀྱིལ་འཁོར་ཏེ་ལྔའོ།། ༈ །།རང་རྒྱལ་གྱི་དཀྱིལ་འཁོར་ནི། གཙོ་བོ་བཅོམ་ལྡན་འདས་ལ། བསེ་རུ་ལྟ་བུ་དང་། ༡ ནེ་ཙོ་ལྟ་བུ་དང་། ༢ ཚོགས་སྤྱོད་ཆེ་ཆུང་གི་སྤྲུལ་པ་རང་རྒྱུད་པས་བསྐོར་བ་དང་། ༣ རྟེན་འབྲེལ་བཅུ་གཉིས་བསྐོར་བ་སྟེ་བཞིའོ།། ༈ །།བྱང་སེམས་ཀྱི་དཀྱིལ་འཁོར་ནི། གཙོ་བོ་ཐུབ་དབང་ལ། ཡུམ་ཆེན། ཕྱག་རྡོར། ཤཱ་རིའི་བུ། སྤྱན་རས་གཟིགས་ཀྱིས་བསྐོར་བ། ༡ ཕྱོགས་བཅུའི་སངས་རྒྱས་ཀྱིས་བསྐོར་བ། ༢ ཡང་ནང་གི་པད་འདབ་བཞི་ལ་ཡུམ་ཆེན་སོགས་སྔར་ལྟར་དང་། ཕྱིའི་པད་འདབ་བརྒྱད་ལ། སངས་རྒྱས་དང་། སེམས་མ་བཞི་བཞིས་བསྐོར་བ། ༣ ལིང་ཚེ་དགུར་བཅད་པའི་དབུས་སུ་ཐུབ་དབང་ལ་རིགས་བཞིའི་སངས་རྒྱས་དང་། འཁོར་ལོ་རྩིབས་བཅུར་
ཕྱོགས་བཅུའི་སངས་རྒྱས་རེ་རེ་འཁོར་སེམས་དཔའ་བཞི་རེ་དང་། གྲུ་ཆད་ལ་སྒེག་སོགས་བརྒྱད། ཁྱམས་ལ་སེམས་དཔའ་བཅུ་དྲུག །འདོད་སྣམ་ལ་བཀྲ་ཤིས་ལྷ་མོ་བཅུ་དྲུག །སྒོ་བཞིར་སྒོ་མ་བཞི་བཅས་ཀྱིས་བསྐོར་བའི་དཀྱིལ་འཁོར་ཏེ། ༤ འདི་བཞི་ལ་གཙོ་བོ་ཐུབ་པ་དང་ཡུམ་ཆེན་མོ་གོ་བརྗེས་པས་དཀྱིལ་འཁོར་བརྒྱད་དུ་འགྱུར་ལ། ༨ དེ་སྟེང་གཙོ་བོ་རྡོ་རྗེ་སེམས་དཔའ་སྟེ་ངོ་བོ་ཐུབ་པ་ལ། དགའ་བའི་སྤྱན་སོགས་བརྒྱད་དང་། རྩིབས་དྲུག་གི་བྱང་ཤར་གྱི་རྩིབས་དབུས་སུ་ཐུབ་པ་ལ་ཡུམ་ཆེན་སོགས་བརྒྱད། ཤར་ལྷོར་རྣམ་སྣང་ལ་ཟླ་འོད་སོགས་བརྒྱད། ལྷོར་རིན་འབྱུང་ལ་གསེར་འོད་སོགས་བརྒྱད། ལྷོ་ནུབ་ཏུ་ཤཱཀྱ་སེངྒེ་ལ་དྲི་མ་མེད་པའི་སྒྲ་སོགས་བརྒྱད། ནུབ་བྱང་དུ་སྣང་མཐའ་ལ་ངེས་པར་ཤེས་པ་སོགས་བརྒྱད། བྱང་དུ་དོན་གྲུབ་ལ་དགེ་བའི་བཤེས་སོགས་བརྒྱད། གྲྭ་བཞིར་སྒེག་སོགས། ལྷ་སྣམ་ལ་སེམས་དཔའ་བཅུ་དྲུག །འདོད་སྣམ་ལྷ་མོ་བརྒྱད། སྒོ་བ་བཞི་དང་བཅས་པས་བསྐོར་བ། ༩ དབུས་སུ་ཐུབ་པ་དང་ཡུམ་ཞལ་སྤྲོད། ཕྱོགས་མཚམས་སུ་གླང་པོ་དམ་པ་སོགས་བརྒྱད། ཕྱོགས་མཚམས་སྟེང་འོག་གི་པདྨར་མྱ་ངན་མེད་པ་སོགས་སངས་རྒྱས་བཅུ་ལ། ཆོས་ཀྱི་རྒྱལ་མཚན་སོགས་བྱང་ཆུབ་སེམས་དཔའ་བརྒྱད་རེས་བསྐོར་བ། གྲུ་བཞིར་སྣ་ཚོགས་སོགས། ལྷ་སྣམ་ལ་ཕྱོགས་སྐྱོང་བཅུ། སྒོ་བཞིར་
རྒྱལ་ཆེན་བཞི་དང་བཅས་པས་བསྐོར་བའི་དཀྱིལ་འཁོར་ཏེ་༡༠བཅུའོ།། ༈ །།བྱ་རྒྱུད་ཀྱི་དཀྱིལ་འཁོར་ནི་རིགས་གསུམ་མགོན་པོ་སོ་སོའི་དཀྱིལ་འཁོར་གྱི་གཙོ་བོར་བྱས་པ་ལ། སྒེག་མོ། ཕྲེང་བ། གླུ། གར་མ་སྟེ་བཞི་རེས་བསྐོར་བ། ༣ ཡང་སྐུ་གསུང་ཐུགས་ཀྱི་དཀྱིལ་འཁོར་ཞེས། འཇམ་དཔལ། སྤྱན་གཟིགས། ཕྱག་རྡོར་གསུམ་ལ་འཁོར་གྲངས་མ་ངེས་པས་བསྐོར་བའི་དཀྱིལ་འཁོར་ཏེ་དྲུག་ཟླ གོ། ༣ ༈ །།སྤྱོད་རྒྱུད་ཀྱི་དཀྱིལ་འཁོར་ནི། རྒྱ་མཚོ་ཞེས་པའི་སྒྲས་རྣམ་པ་གཅིག་ཏུ་ན་བྱ་བ་དང་། རྣལ་འབྱོར་གྱི་རྒྱུད་གཉིས་ཀར་གཏོགས་པས་དཀྱིལ་འཁོར་ལོགས་སུ་མི་བྱེད་པའི་དབང་དུ་བྱས་ན་གྲངས་མང་བ་དང་། གཞན་དུ་སོ་སོར་བྱེད་པ་ལྟར་ན་བཞིར་བཟུང་སྟེ། རྒྱ་མཚོ་ཆེན་པོ་བཞིས་མངོན་པར་བརྗོད་པའོ། །དེ་ཡང་རྣམ་སྣང་ལ་རིགས་བཞིས་བསྐོར་བའི་ལྷ་ལྔ། དེ་སྟེང་སྒེག་སོགས་བརྒྱད་བསྣན་པའི་བཅུ་གསུམ་མ། ༢ དེ་སྟེང་བཀྲ་ཤིས་ཀྱི་ལྷ་མོ་བརྒྱད་བསྣན་པའི་ཉེར་གཅིག་པ། ༣ དེ་སྟེང་ཕྱི་རོལ་དུ་དཔལ་མགོན་བདུན་ཅུ་བསྣན་པའི་གོ་དྲུག་མ་སྟེ། ༤ འོན་ཀྱང་རྒྱས་འབྲིང་བསྡུས་པ་དང་ཤིན་ཏུ་བསྡུས་པའི་དབྱེ་བ་ཙམ་ལས་དཀྱིལ་འཁོར་ཐ་དད་མ་ཡིན་ནོ།། ༈ །།རྣལ་འབྱོར་རྒྱུད་ཀྱི་དཀྱིལ་འཁོར་ནི། ལིང་ཚེ་དགུའི་དབུས་སུ་རྣམ་སྣང་ཀུན་ཏུ་ཞལ། ཤར་ནས་བརྩམས་ཏེ་ཕྱོགས་བཞིར་མི་བསྐྱོད་པ་སོགས་
རིགས་བཞི་ལ། འཁོར་དུ་རྡོར་སེམས་སོགས་བཞི་རེས་བསྐོར་བ། མཚམས་བཞིར་ཡུམ་བཞི། གྲུ་ཆད་ཀྱི་ཕྱིར་དུ་སྒེག་སོགས་བརྒྱད། སྒོ་བཞིར་ལྕགས་ཀྱུ་མ་སོགས་བཞི། །ཕྱིའི་ལྷ་སྣམ་ལ་བྱམས་པ་སོགས་བྱང་སེམས་བཅུ་དྲུག་གིས་བསྐོར་བའི་རྡོ་རྗེ་དབྱིངས་ཀྱི་དཀྱིལ་འཁོར་རོ།། ༈ །།མ་ཧཱ་ཡོ་གའི་དཀྱིལ་འཁོར་ནི། འོག་ཏུ་ཁྲོ་བོའི་དཀྱིལ་འཁོར་སྒོ་སྦྲགས་བཅུ་གཅིག་པ་དང་། དེའི་སྟེང་ཁར་རེག་ལ་མ་འབྱར་བའི་ཞི་བའི་དཀྱིལ་འཁོར་ཏེ། དེ་ཡང་ལྷ་ནི། ཞི་དཀྱིལ་ལ་གཙོ་བོ་ཀུན་བཟང་ཡབ་ཡུམ། རིགས་ལྔ། སེམས་དཔའ་ཡབ་ཡུམ་བཅུ་དྲུག །བྱ་བྱེད། ཐུབ་དྲུག །སྒོ་བ་ཡབ་ཡུམ་བརྒྱད་དོ། །ཁྲོ་བོའི་དཀྱིལ་འཁོར་དང་པོ་དབུས་མར་ཆེ་མཆོག་ཧེ་རུ་ཀ་ཡབ་ཡུམ་ལ། དབང་མཆོག་ཡབ་ཡུམ། རྒྱུད་ལུང་གི་ཁྲོ་བོ་ཡབ་ཡུམ་བརྒྱད། ཁྲོ་མོ་བརྒྱད་སྒོ་མ་བཞི། རྣམས་ཀྱིས་བསྐོར་བ། དཀྱིལ་འཁོར་གཉིས་པར་སྦྱོར་མ་བརྒྱད། གསང་ཡུམ་བཞི། གསུམ་པར་དབང་མོ་ཉེར་བརྒྱད་དེ་རྩ་བའི་དཀྱིལ་འཁོར། བཞི་པར་མཁའ་འགྲོ་མ་སོ་གཉིས། ཕྲ་མེན། ལྔ་པར་མ་བདུན་སྲིང་བཞི། དྲུག་པར་གིང་ཆེན་བཅོ་བརྒྱད་དེ་མཁའ་འགྲོ་ལས་ཀྱི་དཀྱིལ་འཁོར། བདུན་པ་ཁྲོ་བོ་ཁྲོ་མོ་དྲུག་ཅུ་སྟེ་ཁྲོ་བོ་རོལ་པའི་དཀྱིལ་འཁོར། བརྒྱད་པར་ཕོ་ཉ་ཉིས་བརྒྱ་བཞི་བཅུ་སྟེ་མགྱོགས་འགྲོ་ཡིད་ཀྱི་དཀྱིལ་འཁོར། དགུ་པར་མ་མོ་དྲུག་ཅུ་སྟེ་དམ་ཚིག་ཆེན་པོའི་དཀྱིལ་
འཁོར། བཅུ་པར་བཀའ་བརྒྱད་ཀྱི་ལྷ་ཚོགས་བདུན་བརྒྱ་ཉེར་ལྔ་དང་། ལྷ་མི་ནས་བཟུང་ཨ་ཏིའི་བར་གྱི་ཐེག་པ་བཅུ་གཅིག་གི་དཀྱིལ་འཁོར། བཅུ་གཅིག་པར་ཡོ་ག་གསུམ་གྱི་བརྒྱུད་པའི་བླ་མ་རིག་འཛིན་རྩལ་འཆང་གི་ལྷ་ཚོགས་ཏེ། དྲིལ་བས་དཀྱིལ་འཁོར་བཅུ་གཉིས་སོ། །ལ་ལ་དག་འདི་ཉིད་ཨ་ནུའི་དཀྱིལ་འཁོར་དུ་བཤད་པས་མ་ཧཱར་དྲངས་པ་ཇི་ལྟར་འབྲེལ་ཅེ་ན། དཀྱིལ་འཁོར་དགུ་པོ་ཨ་ནུ་ཡིན་ཡང་། བཅུ་པ་མ་ཧཱ་དང་། བཅུ་གཅིག་པ་ཐུན་མོང་ཡིན་པའི་ཕྱིར་མ་ཁྱབ་བོ། །ལ་ལ་དག་མ་ཧཱ་ལ་རྒྱུད་ལུང་གཉིས་ལས། རྒྱུད་སྡེ་སྒྱུ་འཕྲུལ་ལ་ཞི་ཁྲོའི་དཀྱིལ་འཁོར་གཉིས། དེ་གཉིས་གཅིག་ཏུ་དྲིལ་བ་དོང་སྤྲུགས། །སྒྲུབ་སྡེ་བཀའ་བརྒྱད་སོ་སོ་དང་། དེ་གཅིག་ཏུ་དྲིལ་བ་སྟེ་བཅུ་གཉིས་སོ། །ཞེས་ཟེར་ཏེ་ཁུངས་དང་འབྲེལ་ན་ལེགས་སོ།། ༈ །།བསྐྱེད་རིམ་སྐབས་ཀྱི་ཟིན་བྲིས་ཉུང་གསལ་དགེ །ཐོག་མར་གཉིད་༡སད་པའམ། མཉམ་བཞག་ལས་ལྡང་བ་ན། སྣོད་བཅུད་ལྷ་དང་གཞལ་ཡས་སུ་དག་པ་དྲན་པའི་ངང་། རང་ཉིད་ཡི་དམ་གྱི་སྐུར་ལྡངས་རྗེས། རིག་པ་བྱང་ཆུབ་སེམས་ཀྱི་ངང་དུ་བསྡུས་ལྡངས་ནས་བསྔོ་སྨོན་སོགས་བྱ། དེ་ཚུནས་མཚན་གུང་གི་ལྟུང་བཤགས་འདོན་ཞིང་ཕྱག་འཚལ། སླར་མལ་དུ་ཞུགས། ཐོར་༢ཐུན་བསྡམས། ཚོགས་ཞིང་གསལ་འདེབས་དང་། བློ་ལྡོག་རྣམ་བཞི་བསྒོམ་པ་དང་རྗེས་འབྲེལ་སྐྱབས་སེམས་ཡན་
ལག་བདུན་པ་སོགས། དེ་ནས་རྡོར་སེམས་སྒོམ་བཟླས་དང་འབྲེལ་བར་དབང་བཞི་ལེན་པ་སོགས་བྱེད་པའམ། མིན་ཀྱང་ཚོགས་ཞིང་ལས་དབང་བཞི་བླངས་རྗེས། ཚོགས་ཞིང་རྣམས་སྤྱི་བོ་ནས་བསྟིམས་ཏེ་སྒོ་གསུམ་དང་དབྱེར་མེད་དུ་གྱུར་པའི་ངང་། ཏིང་འཛིན་རྣམ་གསུམ་རང་རང་ལ་བརྟན་པ་མ་ཐོབ་བར་རིམ་གྱིས་བསྒོམས་པས་དྲན་པ་ཉེར་གཞག་བཞི་སོགས་སྔགས་ཀྱི་ཚོགས་ལམ་ཆུང་ངུ་ཆེན་པོ་རྣམས་བགྲོད།རྗེས་འོད་གསལ་དུ་བསྡུ་ཞིང་སྒྱུ་མའི་ལྷ་སྐུར་ལྡང་བ། ལྟུང་བཤགས་འདོན་པ་སོགས་འདྲ། ཞོག་ཇ་བཏུང་སྔ་ཐུན་༣གཉིས་དེ་བཞིན། གུང་ཐུན་གྱི་ཆ་ལ་གཏོར་མ་བཏང་བ་དང་། གུང་ཚིགས་དང་འབྲེལ་བའི་ཁ་ཏོན་དགོས་རིགས་རྣམས་བྱ། དེ་རྗེས་ཕྱི་ཐུན་༤ ཡང་གུང་ཐུན་དང་འདྲ་བ་ལ། དམིགས་བསལ་ཚོགས་མཆོད་ཡོད་ན་ཡང་། གཏོར་བསྔོ་སོགས་བྱ། དགོངས་ཇ་བཏུང་། མཚན་ཐུན་དང་པོ་སྲོད་ཐུན་༥ནི། ལུས་སྦྱིན་དང་འབྲེལ་བ་ལས་ཐུན་དངོས་ཐོར་ཐུན་དང་འདྲ། ལྟུང་བཤགས་སོགས་ཀྱང་དེ་བཞིན། མཚན་གུང་༦གི་ཐུན་ལ། འོད་གསལ་ཟིན་པའི་ཆེད་སྐུ་གསུམ་ཞིང་ཁམས་སྦྱོང་བའི་གསོལ་འདེབས་དང་འབྲེལ་བར་གཉིད་ཀྱི་འོད་གསལ་ལ་འཇུག་དང་ལྡང་བ་སོགས་བྱ། དེ་དག་ནི་བསྙེན་པའི་སྐབས་སུ་ཐུན་དྲུག་གཅོད་ཚུལ་ལོ།། ༈ །།ཉེ་བསྙེན་གྱི་སྐབས་སུ་གཞན་འདྲ། ཐུན་གྱི་དངོས་གཞི་རྣམས་སུ་བསྐྱེད་
རིམ་ཕྱག་རྒྱ་གཅིག་པའི་སྒོམ་བཟླས་དང་འབྲེལ་བར། རྫོགས་རིམ་དབེན་གསུམ་སོགས་གསང་དབང་གི་ལམ་གཏུམ་མོའི་རྣལ་འབྱོར་ཟུང་འབྲེལ་དུ་བསྒོམ་པ་ནི་ཁྱད་པར་རོ།། ༈ །།སྒྲུབ་པ་དང་། །སྒྲུབ་ཆེན་གྱི་སྐབས་སུ། བསྐྱེད་རིམ་ཕྲ་བ་ཕྱག་རྒྱ་སྤྲོས་བཅས་དང་འབྲེལ་བར། རྫོགས་རིམ་དབང་གོང་མ་གཉིས་ཀྱི་ལམ་དང་རིམ་བཞིན་ཟུང་འབྲེལ་དུ་བསྒོམས་པས་དབང་པོ་ལྔ་དང་སྟོབས་ལྔས་བསྡུས་པའི་སྦྱོར་ལམ་བཞི་བགྲོད་དེ། རྒྱུད་ལས། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་ནོ། །ཞེས་གསུངས་པའི་ཕྱིར། དེ་ལྟ་བུའི་ཏིང་ངེ་འཛིན་གྱིས་མཐོང་ལམ་རྣམ་སྨིན་རིག་འཛིན་དང་། ཚེ་དབང་། མཐར་ལམ་ལྷུན་གྲུབ་རིག་འཛིན་རྣམས་རིམ་གྱིས་ཐོབ་སྟེ་འབྲས་བུ་ལ་སྦྱོར་བའི་ཚུལ། ཇི་སྐད་དུ། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་བ། །རིག་འཛིན་རྒྱལ་བའི་ཞིང་དུ་གྲགས། །ཞེས་རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་འཛིན། བསྐྱེད་རིམ་ཡན་ཏིང་འཛིན། ལག་བཞི། ལམ་གྱུར་འབྲས་བུའི་མཚན་ཉིད་རིག་འཛིན་རྣམ་པ་བཞི། ལམ་རྒྱུད་ཀྱི་དངོས་པོ་ཐམས་ཅད་མཚན་ཉིད་གསུམ་དུ་བསྡུ་བའི་ཚུལ་དཔལ་ལྡན་ཟུར་པའི་བཤད་སྲོལ་ལས་རྒྱ་ཆེར་ཕྱེ་བ་ལྟར་རོ། །བསྐྱེད་རིམ་མཆོག་ཏུ་གཅེས་པའི་ཚུལ། །
གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་སྟོང་འཛིན་གྱི་བློ། བཏུལ་ནས་སུ། །སྔགས་དང་བསྐྱེད་རིམ། ཕྱག་རྒྱ་རབ་བརྟན་ནས། དངོས་གྲུབ་ཡ་མཚན་ཆེན་པོར་འགྱུར། ཞེས་སོ། །མངྒ་ལཾ།། ༈ །།སྤྱོད་འཇུག་ལས། སྟོང་ཉིད་བག་ཆགས་གོམས་པས་ནི། །དངོས་པོའི་ངར་འཛིན་པ། བག་ཆགས་སྤོང་འགྱུར་ཞིང་། བློ་བྲལ། ཅི་ཡང་མེད་ཅེས་གོམས་པས་ནི། །དེ་ཡང་ཕྱིས་ནས་སྤོང་བར་འགྱུར། །ཞེས་དང་། བརྟག་བྱའི་དངོས་པོ་མི་དམིགས་པ། །དེ་ཚེ་དངོས་མེད་རྟེན་བྲལ་བས། །བློ་ཡི་མདུན་ན་ཅི་ལྟར་གནས། །གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་དང་། སྒྱུ་དྲྭར། གང་གིས་དམིགས་མེད་མི་ཤེས་པས། །དེ་ཡིས་ཆོས་ཀྱི་དབྱིངས་མི་ཤེས། །དེ་ཕྱིར་དངོས་དང་དངོས་མེད་པ། །འཇིག་པའི་དམིགས་མེད་ཤེས་པར་གྱིས། །དབུ་མ་ཐལ་འགྱུར། ཞེས་སོ།། ༈ །།རྣམ་རྟོག་ཅི་ཤར་ཡང་རྡོ་ཚན་གྱི་སྟེང་དུ་ཁ་བ་བབས་པ་ལྟ་བུ་ཞིག་དགོས། རྣམ་ཤེས་སྟོང་པ་ནི་ཁོ་རང་གི་གནས་ཚུལ་ཙམ། རིག་པ་སྟོང་པ་ནི་ལྟ་བས་ངེས་པ་རྙེད་པ། རྣམ་ཤེས་གསལ་བ་ནི་ཡུལ་རྐྱེན་དང་འཕྲད་ཚེ་བསླད་པ། རིག་པ་གསལ་བ་ནི་སྟོང་པའི་གོ་མ་འགགས་བཞིན་ལ་ཡུལ་རྐྱེན་གྱིས་མ་གོས་པ་སྟེ་ཆུ་དང་དངུལ་ཆུ་ས་ལ་ལྷུང་བ་ལྟ་བུའོ། །རྣམ་རྟོག་སྔ་
ཕྱི་བར་གསུམ་ཅི་ཤར་ཡང་མེ་ལོང་དྭངས་པའི་ངོས་ལ་གཟུགས་བརྙན་འཆར་བ་ལྟ་བུ་སྟེ། ད་ལྟར་གཟུགས་ཤར་ཡང་ཤར་དུས་ནས་རང་བཞིན་མེད་པ་ལྟ་བུའོ།། ༈ །།ཐོད་རྒལ་གྱི་སྐབས། ནང་གི་རིག་པ་ཆུ་ལྟ་བུ། ཉི་ཟེར་ཕོག་པས་ཆུའི་འོད་ལོགས་སུ་ཕོག་པ་ལྟར་སྒྲོན་མ་མཐོང་བའོ། །ཐིག་ལེ་ཁྲིག་གེར་བརྟན་དུས་རླུང་སེམས་དབུ་མར་ཚུད་པའོ། །ཡིད་བཞིན་རིན་པོ་ཆེའི་མཛོད་འགྲེལ་ལས། འཇིག་རྟེན་ན་ཡུལ་རྫུན་པ་དངོས་མེད་མེད་སྣང་བ་ཉིད་བློ་འཁྲུལ་པར་འཇོག་པ་ཡིན་ཏེ། རྨི་ལམ་གྱི་ཤེས་པ་བཞིན་ནོ། །དངོས་པོར་སྣང་བ་ཉིད་མ་འཁྲུལ་བར་འཇོག་པ་ཡིན་ཏེ་སད་པའམ་ཟླ་བ་གཅིག་འཛིན་གྱི་ཤེས་པ་བཞིན་ནོ། །དེ་བས་ན་སྔོ་སོང་ཆོན། སེམས་ཉིད་མ་ཡིན་ཏེ་དོན་དུ་སྣང་བའི་ཕྱིར་རོ། །ཁྱབ་པ་མེད་ན། དོན་དུ་སྣང་བ་འཁྲུལ་ལམ་མ་འཁྲུལ། མ་འཁྲུལ་ན་དེ་སེམས་སུ་མི་རུང་སྟེ། མ་འཁྲུལ་བ་ཐམས་ཅད་ཀྱི་ཡུལ་དེ་ཁོ་ན་ལྟར་འཛིན་པས་ན་དོན་སྣང་ཉིད་དོན་དངོས་སུ་བདེན་པའི་ཕྱིར་རོ། །འཁྲུལ་ན་སེམས་སུ་མི་འཐད་དེ་དོན་སྣང་རྫུན་ཞིང་། རྫུན་པ་དངོས་མེད་ཡིན་པས་དངོས་པོ་ཙམ་ཁེགས་པས་སེམས་ཀྱི་དངོས་པོ་མི་སྲིད་པའི་ཕྱིར་རོ། །ཞེས་དང་། གཅིག་དང་ཐ་དད་དུ་མི་འཐད་པ་ནི་ཤེས་པ་དང་རྣམ་པ་སོ་སོར་བདེན་པར་མི་རུང་སྟེ། ཡུལ་མ་རིག་པ་ལ་ཤེས་པའི་མཚན་ཉིད་མེད་པའི་ཕྱིར་དང་།
རྣམ་ཤེས་ལུས་ཀྱི་ཕྱིར་ཐོན་པས་ཤི་བར་ཐལ་བའི་ཕྱིར་དང་། སེམས་མིག་གིས་མཐོང་བ་དང་སྲང་དུ་གཞལ་དུ་རུང་བར་ཐལ་བའི་ཕྱིར་དང་། རི་དང་ཤིང་ལ་སོགས་པས་ཚུར་རང་རང་རིག་པར་ཐལ། རང་གིས་དེ་དག་རིག་པའི་ཕྱིར། ཁྱབ་པ་མེད་ན་རི་ལ་སོགས་པ་རང་གི་ཤེས་པ་ཡིན་པ་ཉམས་སོ། །ཞེས་དང་། ཚུལ་འདིས་སྣང་བ་སེམས་སུ་འདོད་པ་དང་། འགྲོ་བ་ཐམས་ཅད་ཤེས་རྒྱུད་གཅིག་པར་སྨྲ་བའི་གཏི་མུག་ཅན་རྣམས་བཀག་པ་ཡིན་ནོ། །ཁོ་བོ་ཅག་ནི་འཁྲུལ་ངོར་སྣང་བ་འདི་ཉིད་ཇི་ལྟར་སྣང་བཞིན་པའི་རྟེན་འབྲེལ་དུ་སྣང་བ་ཉིད་ཀྱིས་སེམས་དང་སེམས་ལས་གཞན་དུའང་ཅུང་ཟད་བདེན་པར་མི་འདོད་དེ་རྨི་ལམ་བཞིན་ནོ། །ཞེས་སོ། ༈ །ལས་སྒྲིབ་རྣམ་སྦྱོང་གི་གཟུངས་ལས། གང་ཞིག་སྙིང་རྗེ་ཆེན་པོས་ནོན་ཏེ། རི་དྭགས་བྱ་དང་མི་མ་ཡིན་པ་རྣམས་ཀྱང་རུང་སྟེ། འཆི་བའི་རྣ་ཁུང་དུ་བརྗོད་ན་དེ་ངན་སོང་དུ་འགྲོ་བར་མི་འགྱུར་རོ། །ཞེས་དང་། མཚམས་མེད་པ་ལྔ་བྱེད་པའམ། དམ་པའི་ཆོས་སྤོང་བའམ། འཕགས་པ་ལ་སྐུར་པ་བཏབ་པ་ཡང་རུང་སྟེ། འཆི་ཀར་རྩིག་པ་ལ་གཟུངས་སྔགས་འདི་བྲིས་པ་མཐོང་ནས་དེའི་ལས་ཀྱི་སྒྲིབ་པ་ཐམས་ཅད་ཟད་པར་འགྱུར་ན། འདོན་པ་དང་བཟླས་བརྗོད་བྱེད་པ་ལྟ་ཅི་སྨོས་ཏེ། དེ་བཞིན་གཤེགས་པ་དེ་ཉིད་བྱོན་ནས་འདི་སྐད་དུ། རིགས་ཀྱི་བུ་ཚུར་ངའི་གན་དུ་ཤོག་ཅེས་ཀྱང་
གསུང་བར་འགྱུར་རོ། །ཞེས་ཐོས་གྲོལ་དང་། མཐོང་གྲོལ་བསྟན། གཞན་ཡང་དོན་ཞགས་ཀྱི་ཆོ་ག་ཞིབ་མོ་དང་། སྒྲོལ་མ་རལ་པ་གྱེན་བརྫེས་ཀྱི་རྟོགས་པ་སོགས་ལས་བྲིས་སྐུའི་ཆོ་ག་དང་། །རིལ་བུ་དང་། རྫས་ལ་བརྟེན་ནས་རིག་འཛིན་སྒྲུབ་པའི་ཚུལ་སོགས་ཤིན་ཏུ་མཐའ་ཡས་པ་བསྟན། སོར་འབྲང་མའི་མདོ་ལས་བཏགས་གྲོལ་དང་། ཇོ་བོ་རྗེའི་གྲོང་ཁྱེར་རྒྱུན་གཅོད་ཀྱི་འཁོར་ལོར་གྲགས་པའི་མཐའ་གྲོལ་སོགས་རྒྱ་ཆེར་གསུངས། ཁྱད་པར་དོན་ཞགས་ཀྱི་ཆོ་ག་ཞིབ་མོ་ལས། གསང་སྔགས་ཨོཾ་ཞེས་བྱ་བ་དྲན་ནས་ཚེ་འཕོས་པ་ནི་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར། ཞེས་སོགས་ཡི་གེ་གཅིག་པ་ནས་བཅུ་པའི་བར་གྱི་ཕན་ཡོན་རྒྱ་ཆེར་བསྟེན་པ་ལས་ཡི་གེ་བཅུ་པ་ནི། ཨོཾ་པདྨ་ཊཱི་ཥ་བི་མ་ལེ་ཧཱུཾ་ཕཊ། གསང་སྔགས་སྙིང་པོ་ཡི་གེ་བཅུ་པ་འབུམ་བཟླས་བརྗོད་བྱས་ན་ཕྱིར་མི་ལྡོག་པ་ཉིད་དུ་ས་བཅུ་པ་ལ་གནས་པར་འགྱུར་ཞིང་། ལྷ་དང་མིའི་སྐྱེ་དགུ་དག་འདི་ནི་དེ་བཞིན་གཤེགས་པའོ། །ཞེས་བརྗོད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར། ཞེས་སོགས་དང་། སྙིང་པོ་བཅུ་པོ་ལན་གཅིག་དྲན་ནམ། ཀློག་གམ། མིང་བཟུང་པའང་དྲན་ནམ། ལག་ན་རྡོ་རྗེ། དུས་ཚིགས་གཅིག་ཏུ་དྲན་པ་ཙམ་གྱིས་ཀྱང་། དེའི་མཚམས་མེད་བྱེད་པ། མནར་མེད་གཞོལ་བ། བསྐལ་
པར་གནས་པ་ཡང་དེས་ཐམས་ཅད་རྣམ་པར་དག་པར་འགྱུར་ལ། སྡིག་པ་དང་སྒྲིབ་པ་ཐམས་ཅད་ཟད་པར་འགྱུར་ལུས་ཡོངས་སུ་དག་ཅིང་དྲི་མ་མེད་པར་འགྱུར། སྒྲིབ་པ་དང་སྡིག་པ་བྲལ་བར་འགྱུར། ཚེ་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་བརྫུས་ཏེ་སྐྱེ་བར་འགྱུར། ཚེ་རབས་སུ་ཚེ་རབས་དྲན་པར་འགྱུར། ནམ་ཡང་ངན་འགྲོར་འགྲོ་བར་མི་འགྱུར། ཞེས་སོགས་རྒྱ་ཆེར་གསུངས་པ་དང་། ལག་ན་རྡོ་རྗེ། དེ་བས་ན་སེམས་ཅན་ཐམས་ཅད་ཀྱི་དོན་དུ་ཉིན་རེ་བཞིན་གཞན་མི་སྨྲ་བར་ལན་བདུན་དྲན་པར་བྱའོ། །སེམས་ཅན་གང་ལ་ལ་སེམས་ཅན་དམྱལ་བར་གཞོལ་བ་ཤི་བ་དང་། དགེ་སློང་ལ་ལ་བསླབ་པའི་སྡོམ་པ་དང་། ཚུལ་ཁྲིམས་ཀྱི་སྡོམ་པ་རལ་བ་དང་། མཁན་པོ་དང་སློབ་དཔོན་ལ་གུས་པར་མ་བྱས་པ་ཤི་བ་དེའི་དོན་དུ་བྱེ་མ་གཙང་མ་བླངས་ལ་ལན་བདུན་བཟླས་བརྗོད་བྱས་ནས། དུར་ཁྲོད་དམ། རོ་བསྲེགས་སའམ། མཆད་པ་དེར་བྱེ་མ་གཏོར་བར་བྱའོ། །གང་དང་གང་ན་སེམས་ཅན་གང་དག་གི་རུས་པ་ཡོད་པར་བྱེ་མ་གཏོར་མ་ཐག་ཏུ་དེ་དང་དེར་བྱེ་མ་བབས་པའི་སེམས་ཅན་དམྱལ་བའམ། ཡི་དྭགས་སམ། ཤ་ཟར་སྐྱེས་པའམ། སྲིན་པོའི་སྐྱེ་གནས་སུ་སྐྱེས་ན་དེའི་མོད་ལ་ཚེ་བརྗེས་ནས་མཐོ་རིས་སུ་གཞོལ་བར་འགྱུར་ཞིང་། ནམ་ཡང་སེམས་ཅན་དམྱལ་བར་གཞོལ་བར་མི་འགྱུར་རོ། །ཡང་ན་གྲོ་ག་ལ་བྲིས་ནས་
མཆོད་རྟེན་གྱི་ནང་དུ་བཅུག་པའི་གནས་དེར་རྐང་གཉིས་པའམ། རྐང་པ་བཞི་པ་དག་ཉེ་བར་འོངས་པ་དེ་དག་ཐམས་ཅད་གྲིབ་མ་ཕོག་པ་ཙམ་གྱིས་སྡིག་པ་དང་སྒྲིབ་པ་ཐམས་ཅད་རྣམ་པར་དག་ཅིང་། །ཐམས་ཅད་མཐོ་རིས་སུ་གཞོལ་བར་འགྱུར་རོ། །ཐ་ན་རི་དྭགས་དང་། བྱ་དང་། ཐ་ན་ལྡང་སྐོ་སྐ་དང་། ནེའུ་ལེ་དང་། སྡིག་པ་དང་། སྦྲུལ་དང་། ཁྱི་དང་། རུ་སྦལ་དང་། ལག་འགྲོ་དང་། དཀྱིལ་འཁོར་དེ་ལ་གྲིབ་མ་བབས་པ་ཙམ་གྱིས་ཐམས་ཅད་ཀྱི་ལས་ཀྱི་སྒྲིབ་པ་རྣམས་རྣམ་པར་དག་པར་འགྱུར་ཞིང་། དེ་དག་ཐམས་ཅད་མཐོ་རིས་ཀྱི་འཇིག་རྟེན་དུ་གཞོལ་བར་འགྱུར་རོ། །དུང་ལ་ལན་བདུན་བཟླས་། བརྗོད་བྱས་ནས་གནས་མཐོན་པོར་བུས་ན་དུང་དེའི་སྒྲ་ཐོས་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། རི་དྭགས་དང་། བྱ་དང་། དུད་འགྲོའི་སྐྱེ་གནས་སུ་གཏོགས་པ་དེ་དག་ཐམས་ཅད་མཐོ་རིས་ཀྱི་འཇིག་རྟེན་དུ་གཞོལ་བར་འགྱུར་རོ། །གང་དག་ཚུལ་ཁྲིམས་ཡོངས་སུ་དག་པ་དང་། སེམས་ཅན་སྦྱིན་པ་ལ་དགའ་བ་དང་། གང་དག་བསྙེན་གནས་ལ་ཉེ་བར་གནས་པ་དང་།། གང་དག་སྐྱབས་གསུམ་བཟུང་བ་དང་། གང་དག་བྱང་ཆུབ་སེམས་དཔའི་སྡོམ་པས་བསྡམས་པ་དེ་དག་ཀྱང་། དུང་གི་སྒྲ་ཐོས་ནས་སེམས་ཅན་དེ་ཐམས་ཅད་ཕྱིར་མི་ལྡོག་པར་འགྱུར་ཞིང་། བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཐོབ་པར་འགྱུར་ལ། ཚེ་བརྗེས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། ཚེ་རབས་སུ་ཚེ་རབས་དྲན་པར་འགྱུར་རོ། །ཙནྡན་ལ་ལན་བདུན་བཟླས་བརྗོད་བྱས་ནས་དགེ་འདུན་གྱི་ཀུན་དགའ་ར་བའམ། མཆོད་རྟེན་གྱི་འཁོར་སའམ། དགེ་འདུན་གྱི་ནང་ངམ། སྐྱེ་བོ་མང་པོའི་ནང་ངམ། རྒྱལ་པོའི་ཕོ་བྲང་དུ་བདུགས་ན། གང་དག་དེར་དྲི་མནམས་པའི་སེམས་ཅན་དེ་དག་ཐམས་ཅད་སངས་རྒྱས་ཀྱི་སྐུ་ཡོངས་སུ་རྫོགས་པར་འགྱུར་རོ། །ཆོས་གོས་ལ་བདུགས་ནས་གང་གི་ལུས་ལ་གྱོན་པ་དེའི་སྡིག་པ་དང་སྒྲིབ་པ་ཐམས་ཅད་རྣམ་པར་འཇིག་པར་འགྱུར་རོ། །ལུས་ལ་བབས་པ་ཙམ་གྱིས་དྲི་མ་དང་། སེར་སྣ་དང་། སྐྱོན་ཐམས་ཅད་སྤོང་བར་འགྱུར་རོ། །གོས་བཅངས་བ་ཙམ་གྱིས་འཇིག་རྟེན་ཐམས་ཅད་དབང་དུ་འགྱུར་རོ། །བདག་ཉིད་ཀྱི་གོས་དེས་བདུགས་ནས་རྒྱལ་པོའི་ཕོ་བྲང་དུ་ཞུགས་ན། རྒྱལ་པོ་དང་། བཙུན་མོ་དང་། འཁོར་དང་བཅས་པ་དབང་དུ་འགྱུར། མཆོད་གནས་ཆེན་པོར་འགྱུར། འཇིག་རྟེན་ཐམས་ཅད་ཀྱི་བླ་མར་ཡང་འགྱུར་རོ། །འཕགས་པའི་དགེ་འདུན་གྱི་ནང་དུ་ཞུགས་ན་དགེ་སློང་ཐམས་ཅད་ཀྱི་མཆོད་གནས་ཆེན་པོར་འོས་པར་འགྱུར་རོ། །སྐྱེ་བོ་མང་པོའི་ནང་དུ་ཞུགས་ན་ནོར་ཆེན་པོ་འཕེལ་བར་འགྱུར་ཞིང་། མཆོད་པ་ཆེན་པོའི་འོས་སུ་འགྱུར་རོ། །ཞེས་སོགས་དང་ཐུན་མོང་གི་ལས་སྒྲུབ་པ་རྒྱ་ཆེར་
གསུངས་ཤིང་། གྲོང་ཁྱེར་གྱི་སྒོ་བཞིར་བདུགས་ན་ནད་ཡམས་འཁྲུག་རྩོད་སོགས་ཆད་པ་དང་། འབྲོག་དགོན་པར་བདུགས་ན་གཅན་གཟན་དང་། ཆོམ་རྐུན་སོགས་ཀྱི་འཇིགས་པ་ལས་གྲོལ་བ་དང་། རིམས་ཐམས་ཅད་ལ་བདུགས་ན་དེ་ལས་ཐར་པའི་བར་ཕན་ཡོན་བསམ་གྱིས་མི་ཁྱབ་པ་བསྟན་ལ། གཞན་ཡང་། གང་ཞིག་རིལ་བུ་དེ་དག་བརྟེན། །རིལ་བུ་ཐིག་ལེ་རྟག་བྱེད་པ། །དེ་བཞིན་གཤེགས་ཀུན་ཀླུ དགོངས་པར་མཛད། །འཕགས་པ་སྤྱན་རས་གཟིགས་ཀྱི་དབང་། །དེ་ཉིད་རིག་ལ་རྟག་ཏུ་ནི། །མཆོག་སྦྱིན་དུས་ཀུན་གཟིགས་པར་མཛད། །བསོད་ནམས་ཕུང་པོ་སྟོང་དག་ནི། །ཉི་མ་རེ་རེ་སོག་པར་བྱེད། །འཇིག་རྟེན་པ་ཡི་བདེ་སྤྱད་ཅིང་། །འཇིག་རྟེན་ཕ་རོལ་ཤིན་ཏུ་བདེ། །ཞེས་སོགས་རིལ་བུ་དང་། ཐིག་ལེ་དང་། མི་སྣང་བ་དང་། ནམ་མཁའ་ལ་འགྲོ་བ་དང་། སྦྱིན་སྲེག་དང་། མིག་འཕྲུལ་དང་། དཀྱིལ་འཁོར་དང་། གཏོར་མ། བྲིས་སྐུ་དང་། ཕྱག་རྒྱ་དང་། སྔགས་ཀྱི་ཆོ་ག་མཐའ་ཡས་པར་གསུངས་སོ། །རས་རིས་ཀྱི་ཆོ་ག་ལས། དབུས་སུ་འཕགས་པ་སྤྱན་རས་གཟིགས་དབང་ཕྱུག་ཚངས་པའི་ཆ་བྱད་འཆང་བ་པདྨ་རྒྱས་པས་ཡོངས་སུ་བསྐོར་བར་བྱ་སྟེ། ཁོར་ཡུག་ཏུ་འོད་འདོམ་གང་པ་ཀུན་ནས་འབར་བའི་ཕྲེང་བ་ཅན་ཕྱག་བཞི་པ། ཞལ་གསུམ་པ་རལ་པའི་ཅོད་པན་གྱིས་བརྒྱན་པ། ཟླ་བ་ཚེས་པས་སྤྲས་པ།
འོད་དཔག་མེད་ཀྱི་ཅོད་པན་འཆང་བ། མདུང་རྩེ་གསུམ་འཆང་བ། པདྨའི་འདབ་མ་རྣམ་པར་བཀྲ་བའི་པདྨའི་ཞགས་པ་འཆང་བ། ཕྱག་གཡོན་པ་པདྨ་འཆང་བ། པདྨའི་སྟེང་དུ་པདྨ་གཙུག་ཏོར་བྱའོ། །ཊྛའདབ་མ་ཕྱེད་ཁ་བྱེ་བའི་དབུས་ཀྱི་འདབ་མ་ལ། འཕགས་པ་སྤྱན་རས་གཟིགས་དབང་ཕྱུག་མགུལ་ཡན་ཆད་ཙམ་ཅོད་པན་འཆང་བ། དབུ་འབར་བའི་སྙིང་པོར་ཡོད་པ་བྲི་བར་བྱའོ། །ཕྱག་གཅིག་ནི་དབུགས་འབྱིན་པ་འཆང་ཞིང་རིན་པོ་ཆེའི་ཆར་འབེབས་པ། །འབར་བའི་སྙིང་པོ་ཅན་རྒྱན་ཐམས་ཅད་ཀྱིས་རྣམ་པར་བརྒྱན་པ་སྣ་ཚོགས་པའི་གོས་འཆང་བར་བྱའོ། །ཞེས་སོགས་ནས། མཐོང་བ་ཙམ་གྱི་མོད་ལ་སྡུག་བསྔལ་དང་སྡིག་པ་དང་ངན་འགྲོ་ཐམས་ཅད་རྣམ་པར་ཉམས་པར་བྱེད་དོ། །ཐམས་ཅད་རབ་ཏུ་ཞི་བར་འགྱུར་རོ། །འགྲོ་བ་ཐམས་ཅད་གཅོད་པར་འགྱུར་རོ། །ཉེས་པ་ཐམས་ཅད་འཇོམས་པར་འགྱུར་རོ། །སྡིག་པ་དང་སྒྲིབ་པ་ཐམས་ཅད་དང་མཚམས་མེད་པ་ལྔ་ལས་རྣམ་པར་ཐར་པར་བྱེད་དོ། །མཐོང་བ་ཙམ་གྱི་མོད་ལ་དོན་ཡོད་པའི་དངོས་གྲུབ་སོ་སོར་ཐོབ་བོ། །ཞེས་སོགས་རྒྱ་ཆེར་གསུངས་སོ། །ཕྱག་རྒྱའི་ལེའུ་ལས། སྡིགས་མཛུབ་ཡོངས་སུ་དཀྲིས་པ་ལ་མཐེ་བོང་གི་སོར་མོ་དང་། གུང་མོའི་སོར་མོ་རབ་ཏུ་བརྐྱངས་ལ་ལྕགས་ཀྱུའི་རྣམ་པར་བཀུག་སྟེ་མིང་མེད་དང་། མཐེའུ་ཆུང་ལག་པའི་ནང་དུ་བཅུག་ནས་རྟག་
ཏུ་སྙིང་གའི་གནས་སུ་བཞག་པར་བྱ་སྟེ། འདི་ནི་དོན་ཡོད་པ་པདྨ་གཙུག་ཏོར་གྱི་རྩ་བའི་གསང་སྔགས་དང་ཕྱག་རྒྱར་བརྗོད་དོ། །ཞེས་རྩ་བའི་དམ་རྒྱ་དང་། ཕྱག་རྒྱ་འདི་ཉིད་ལས་གཡས་པའི་འཛུབ་མོ་བརྐྱངས་ཏེ་རྩ་བའི་གསང་སྔགས་ལན་གཅིག་བརྗོད་དོ། །ཞེས་ལས་སྒྲུབ་པའི་ཕྱག་རྒྱ་དང་། ཕྱག་རྒྱ་འདི་ཉིད་ལས་མཛུབ་མོའི་སོར་མོ་གཉིས་བརྐྱངས་ལ་ལྕགས་ཀྱུའི་རྣམ་པ་ཙམ་དུ་བཀུག་པ་འདི་ནི། ཞེས་སྤྱན་དྲངས་པ་ནས་གཤེགས་སུ་གསོལ་བའི་བར་ཐམས་ཅད་ཀྱི་ཕྱག་རྒྱར་གསུངས་སོ། །སྔགས་ཀྱི་ལེའུ་ལས། ཨོཾ་ཨ་མོ་གྷ་ཧྲི་ད་ཡ་པདྨོ་ཊཱི་ཥ་སཱ་དྷ་ཡ། བྷ་ར་བྷ་ར་སཾ་བྷ་ར། མ་ཧཱ་པདྨེ་སྭཱ་ཧཱ། སྐུལ་བ་དང་སྤྱན་དྲང་པ་དང་གཤེགས་སུ་གསོལ་པའི་སྔགས་སོ། །ཞེས་དང་། ཨོཾ་པདྨ་ཊཱི་ཨ་མོ་གྷ་ཛ་ལེ་སྭཱ་ཧཱ། ཁྲུས་བྱ་བའི་སྔགས། ཨོཾ་བཛྲ་ཨ་དྷིཥྛ་ཎ་པདྨེ་ཧཱུྃ། བྱིན་གྱིས་བརླབ་པའི་སྔགས་སོ། །ཨོཾ་པདྨ་ཊཱི་ཥ་ཨ་མོ་གྷ་ཨ་བྷི་ཥིཉྩ་ཨཱཏྨ་ཤུདྡྷེ་ཧཱུཾ། དབང་བསྐུར་བའི་སྔགས་སོ། །ཨོཾ་ཨ་པ་རི་མི་ཏཱ་ཛྭ་ལ་པདྨེ་ཧཱུཾ། བགྲང་ཕྲེང་གི་སྔགས་སོ། །ཨོཾ་ཤ་ཏ་ས་ཧ་སྲ་ཛྭ་ལི་ཏ་པདྨེ་དྷ་ར་དྷ་ར་ཧཱུཾ། བཟླས་བརྗོད་ཀྱི་སྔགས་སོ། །ཞེས་སོགས་རྒྱ་ཆེར་གསུངས་སོ།། ༈ །།ལྭ་ནག་དྲིལ་གསུམ་གྱི་སྔོན་འགྲེལ་བཤད་པའི་ཟིན་བྲིས་བདེ་ཆེན་ཞལ་གྱི་ཐིགས་ཕྲེང་ལས། མདོ་ཞེས་པས་གཞི་ཚུལ་ཁྲིམས་ལ་གནས་ནས་གྲུབ་མཐའ་སྨྲ་བ་བཞིར་རིམ་
བཞིན་དུ་འཇུག་པར་བསྟན། བྱ་བ་སོགས་ཀྱིས་རྒྱུད་སྡེ་བཞི་དང་། གསང་བ་ཞེས་པས་སྔགས་སྤྱི་དང་། གསང་བའི་མཐས་བྱེ་བྲག་བདེ་མཆོག་བསྟན་པར་བཞེད་དེ། །ཚུལ་གནས་གྲུབ་མཐའ་བཞི་ལ་ལེགས་བསླབས་ནས། །བྱ་སྤྱོད་རྣལ་འབྱོར་རྣལ་འབྱོར་ཆེན་པོ་ཡི། །ཐེམ་སྐས་ལ་འཛེགས་རྣལ་འབྱོར་གསང་མཐའ་ཡི། །གཞལ་མེད་ཁང་དུ་བདེར་སོན་སྐལ་བ་བཟང་། ཞེས་གསུངས་དེ་ལྟ་བུའི་ལམ་སྲོལ་འཆད་པ་ལ། སྤྱི་དོན་གྱི་སྒོ་ནས་ཁོག་ཕུབ་པ་དང་། གཞུང་དོན་གྱི་སྒོ་ནས་ཉམས་ལེན་མངོན་རྟོགས་སུ་བསྒྲིགས་པའོ། །དང་པོ་ལ། རྒྱུད་གསུང་བ་པོའི་སྟོན་པ་བྱོན་ཚུལ། བྱོན་ནས་རྩ་བཤད་ཀྱི་རྒྱུད་གསུངས་ཚུལ། འགྲེལ་བྱེད་མཁན་པོ་རྣམས་ཀྱིས་ཇི་ལྟར་བཀྲལ་ཚུལ་བྱེ་བྲག་ལམ་སྲོལ་དང་བཅས་པ། སྙིང་པོར་གྱུར་པའི་ལམ་སྲོལ་ངོས་བཟུང་བ་བཞི། དང་པོ་ལ། སྟོན་པ་ཐམས་ཅད་མཁྱེན་པ་དང་། སྟོན་པ་ཧེ་རུ་ཀའི་བྱོན་ཚུལ་གཉིས་ནི་སྤྱི་ལྟར། གཉིས་པ་ནི། རྩ་རྒྱུད་ལ། རྒྱ་གར་དུ། ཕྱག་རྡོར། ཨིནྡྲ་བྷཱུ་ཏི། དཀར་རྒྱལ་ཟླ་བ། པི་ཙུ་ར་ཙཎཱ། བྷ་བ་བྷ་དྲ། ཀོང་ཀ་ན་རྒྱལ་བཟང་། དེའི་འགྲེལ་བཤད་ལྡན་གྲགས་པ་དང་། དེ་གཉིས་ཀྱི་བཤད་སྦྱར་ཏ་ཐཱ་ག་ཏ་རཀྵི་ཏས་མཛད་པ། ལངྐ་རྒྱལ་བཟང་། ལྭ་ཝ་པ། ལྷ་སྦས། སུ་མ་ཏི་ཀཱིརྟིས་མཛད་པ་སྟེ་བཅུ་གཉིས། བཤད་རྒྱུད་མངོན་འབྱུང་ལ་པཎྜི་ཏ་ཟླ་གཞོན། རྡོ་རྗེ་མཁའ་འགྲོ་
ལ་ནོར་བཟང་དང་བྷ་བ་བྷ་དྲ། ཀུན་སྤྱོད་ལ་སྨི་ཏི། ཁ་སྦྱོར་ལ་ཨིནྡྲ་བྷུ་ཏི། ཨ་བྷི་དྷ་ན་ལ་ཛྙཱ་ན་བཛྲ་དང་། ཤུ་རང་ཝ་རྨས་མཛད་པ་རྣམས་སོ། །འོ་ན་རྩ་རྒྱུད་འདི་ལ་ལམ་སྲོལ་འགྲེལ་ཚུལ་ཇི་ཙམ་ཞེ་ན། དུས་འཁོར། འཕགས་ལུགས། མ་རྒྱུད་སྤྱི། གསང་མཐའ་ལྟར་བཀྲལ་བ་བཞི། དང་པོ་ནི། རྩ་རྒྱུད་དང་མཁའ་འགྲོ་རྒྱ་མཚོ་གཉིས་རྩ་བཤད་དུ་སྦྱར་ནས་བཤད་པ། འདི་ལ་དཀྱིལ་འཁོར་བཞི་སྦྲག་གི་ལྷ་སྣམ་ལ་དཔའ་བོ་དང་རྣལ་འབྱོར་མ་ལྔ་བརྒྱ། དབུས་སུ་ཤཱཀྱ་སེངྒེ། མགྲོན་ཐབས་སུ་བསྐལ་བཟང་གི་སངས་རྒྱས་སྟོང་ལ་གཉིས་སམ་བཞི་མ་ཚང་བར་བཀོད། ལམ་བསྐྱེད་རིམ་ཏིང་འཛིན་གསུམ། རྫོགས་རིམ་སྦྱོར་དྲུག །གྲོགས་སྤྱོད་པ་གཉིས་ཀྱིས་མཚམས་སྦྱར་ནས་འབྲས་བུ་མཆོག་དང་ཐུན་མོང་གི་དངོས་གྲུབ་སྒྲུབ་པར་བྱེད་པའི་ལམ་སྲོལ་ཡོངས་སུ་རྫོགས་པའོ། །གཉིས་པ་ནི། བདེ་མཆོག་སྡོམ་འབྱུང་དང་རྩ་བཤད་དུ་སྦྱར་བ་སྟེ། གཙོ་བོར་རྡོར་སེམས་ཞལ་གསུམ་ཕྱག་དྲུག་པ་ལ་འཁོར་ལྷ་བཅུ་གཉིས་ཀྱིས་བསྐོར་བའི་དཀྱིལ་འཁོར། བསྐྱེད་རིམ་ཏིང་འཛིན་གསུམ། རྫོགས་རིམ་རིམ་ལྔ། གྲོགས་སྤྱོད་པ་གཉིས་ཀྱིས་མཚམས་སྦྱར་ནས་འབྲས་བུ་མཆོག་དང་ཐུན་མོངས་ཀྱི་དངོས་གྲུབ་སྒྲུབ་པར་བྱེད་པའི་ལམ་སྲོལ་ཡོངས་སུ་རྫོགས་པ་ཞིག་ཡོད་དོ། །གསུམ་པ་ནི། སངས་རྒྱས་མཉམ་སྦྱོར་དང་རྩ་བཤད་དུ་སྦྱར་
ནས་འཆད་པ་སྟེ། འདི་ལ་མཁའ་འགྲོ་རྒྱ་མཚོ་དང་སྡོམ་འབྱུང་ལྟ་བུའི་ཁྱད་ཆོས་གང་ཡང་མེད། ཀྱེ་རྡོར་སོགས་ལམ་རིམ་ཀུན་མཐུན་པར་སྦྱིན་བྱ་བཞི་སྦྱིན། བསླབ་བྱ་གཉིས་བསླབ། གྲོགས་སྤྱོད་པ་གཉིས་འགྲེལ་པ་ལུགས། ཀྱིས་མཚམས་སྦྱར་ཏེ་འབྲས་བུ་འགྲུབ་པར་བྱེད་དོ། །བཞི་པ་ནི། དཀར་རྒྱལ་ཟླ་བས། འབྱུང་དང་མཁའ་འགྲོ་ཀུན་སྤྱོད་དང་། །ཁ་སྦྱོར་རྒྱུད་དང་བླ་མ་སྟེ། །བཤད་རྒྱུད་རྣམ་པ་ལྔ་རུ་འདོད། །ཅེས་བཤད་རྒྱུད་ལྔས་རྩ་རྒྱུད་ཀྱི་དགོངས་པ་བཀྲལ་བའི་ལམ་སྲོལ་རྨད་དུ་བྱུང་བ་ལ་ཚོགས་སློབ་ཀྱི་བཤད་མན་ངག་ལུགས། སྲོལ་གཉིས་ལས། དང་པོ་ནི་ནཱ་རོ་པ་ནས་པྲཛྙཱ་རཀྟི་ཏ། མ་ན་ཀ་ཤཱི། ཀ་ན་ཀ་ཤི། སུ་མ་ཏི་ཀཱིརྟི། དེས་མར་པ་དོ་པ་དང་པུ་རོང་ལོ་ཆུང་གཉིས་ལ་གནང་། བུ་ལུགས་དམར་ཕྱོགས་ནས་བུ་དགེར་བབས། གཉིས་པ་ནི། ནཱ་རོ་པ་དང་ཕམ་མཐིང་མཆེད། །གློག་སྐྱ་མལ་ལོ་ས་སྐྱ་པ། །ཞེས་སོ། །སྔ་མ་ནི་གྲུབ་ཆེན་གྱི་གཞུང་གི་དངོས་བསྟན་ལ་འགྲེལ་པ་དང་བསྟན་བཅོས་གཞན་ནས་ཁ་བསྐངས་ཏེ་མཁའ་འགྲོའི་ཞལ་གྱི་གདམས་པ་ལ་སྐྱོན་ཅུང་ཟད་ཞུགས་པ་ཡིན་ལ། ཕྱི་མ་ནི་ནཱ་རོ་རྩ་རྐྱང་གི་མན་ངག་བྱ་བ་གྲུབ་ཆེན་ལཱུ་ནག་དྲིལ་གསུམ་གྱི་གཞུང་གི་དངོས་བསྟན་ལ་བླ་མའི་མན་ངག་དང་རྩ་བཤད་ཀྱི་རྒྱུད་ཀྱིས་ཁ་སྐོང་ཅུང་ཟད་བྱས་ཏེ། མཁའ་འགྲོའི་ཞལ་གདམས་ལ་སྐྱོན་མ་ཞུགས་པ་ཡིན་པས་གཞན་ལས་ཆེས་
ཟབ། དེའི་བརྗོད་བྱ་ཡང་། གཞི་དྲི་བཅས། ལམ་དྲི་མ་སེལ་བྱེད། འབྲས་བུ་དྲི་མ་དག་པའི་འཁོར་ལོ་བདེ་མཆོག་སྟེ་རྒྱུད་གསུམ་དུ་འདུས།་ཉུང་ངུའི་རྒྱུད་ལ་འགྲེལ་ཚུལ་རྣམ་བཞི་ལས། །གསང་མཐའ་ལྟར་དུ་བཀྲལ་ལ་འགྲེལ་པ་དང་། །མན་ངག་ལུགས་གཉིས་ཕྱི་མ་མཁའ་འགྲོ་ཡི། ཞལ་གདམས་སྐྱོན་མེད་རྩ་རྐྱང་ཞེས་སུ་འདོགས། །ཞེས་སོ། །བཞི་པ་སྙིང་པོར་གྱུར་པའི་ལམ་སྲོལ་ངོས་བཟུང་བ་ལ། ལུ་ནག་དྲིལ་གསུམ་ནཱ་རོ་མཁའ་སྤྱོད་དང་བཞི། དེ་ཡང་མར་པ་དོ་དང་པུ་ཧྲང་པ་སོགས་རྟེན་གྱི་གང་ཟག་གཉིས་དང་། རྗེ་བཙུན་ས་སྐྱ་པས་གཅིག་ལ་སྦྱོར་ཏེ། དེ་ཡང་། གང་ཟག་ལས་དང་པོ་པ་དང་སྐྱེ་གནས་མངལ་སྐྱེས་ཀྱི་དྲི་མ་སྦྱོང་བའི་ཕྱིར་ནག་པོ་པའི་ཆོས་སྐོར་གྱིས་འཁྲིད་པར་བྱེད། གང་ཟག་འབྲིང་དུ་ན་འཕོས་པ་དང་སྒོང་སྐྱེས་སྦྱོང་བྱེད་ལཱུ་ཧི་པ། གང་ཟག་རབ་དང་རྫུས་སྐྱེས་སྦྱོང་བྱེད་དྲིལ་བུ་པ། ཡང་རབ་ཚེ་གཅིག་མཁའ་སྤྱོད་ཆེ་ཆུང་གང་རུང་ཐོབ་འདོད་ལ་ནཱ་རོ་མཁའ་སྤྱོད་དོ། །བཤད་སྲོལ་ཀུན་གྱི་མཆོག་འདི་ལ་བརྟེན་པ་བླ་མ་གོང་མ་རྣམས་ཀྱི་ཉམས་ལེན་ཡང་འདི་ལ་བརྟེན་ནས་མཛད་ཅིང་གྲུབ་པའང་ཐོབ་པ་ཡིན་ནོ། །དེས་ན་རྩ་རྒྱུད་ནག་པོ་པའི། བཤད་རྒྱུད་ལུ་ཧི་པའི། ཟབ་དོན་དྲིལ་བུ་པའི། ཡང་རྩེ་ནཱ་རོ་མཁའ་སྤྱོད་ཀྱི་སྐོར་དང་བཞིར་གྲགས། དང་པོ་ནི། ས་ཆེན་གྱིས་ནག་པོ་རས་
བྲིས། གཉན་གྱིས་མུ་ཏིག་ཕྲེང་བ། རྗེ་བཙུན་གྱིས་ནག་པོ་བཤད་སྦྱར་རྣམས་ལས། སྦྱིན་བྱ་བཞི་བསླབ་བྱ་གཉིས་གྲོགས་སྤྱོད་པ་གཉིས་ཀྱིས་མཚམས་སྦྱར་ནས་འབྲས་བུ་འགྲུབ་པར་གསུངས་པའི་ཕྱིར། རྩ་རྒྱུད་དང་ཧེ་རུ་ཀ་མངོན་འབྱུང་ལ་གཙོ་བོར་བརྟེན་ནས། ནག་པོ་པས་དཀྱིལ་ཆོག་གི་གཞུང་འདི་མཛད། འདི་ལག་ཏུ་བླང་བར་ས་ཆེན་གྱི་ནག་པོ་རས་བྲིས་དང་། རྗེ་བཙུན་གྱི་རྡུལ་ཚོན། འཕགས་པའི་དཀྱིལ་ཆོག་རྣམས་སོ། །ཆོ་ག་འདིའི་འགྲོས་ལཱུ་ཧི་པ་ལ་ཡང་སྦྱོར་བས། སྒྲུབ་ཐབས་གཉིས་ལ་དཀྱིལ་ཆོག་གཅིག་གིས་བྱ་བ་དེའོ། །བསྐྱེད་རིམ་ལ། རྩ་རྒྱུད་དང་རྡོ་རྗེ་མཁའ་འགྲོ་གཉིས་ལ་གཙོ་བོར་བརྟེན་ནས། ནག་པོ་པས་སྒྲུབ་ཐབས་ཀྱི་གཞུང་མཛད། དེ་ལག་ཏུ་བླང་བར་ས་ཆེན་གྱི་ནག་འབུམ། འཕགས་པའི་སྒྲུབ་ཐབས་རིམ་པ་གསལ་བ་སོགས་སོ། །རྩ་རྒྱུད། སཾ་ཊ། རྡོ་རྗེ་མཁའ་འགྲོ་གསུམ་ལ་བརྟེན་ནག་པོ་པས་སྦྱིན་སྲེག་གི་ཆོ་གའི་གཞང་མཛད། འདི་ལ་རྗེ་བཙུན་གྱིས་ཡིག་སྣ་མདོར་བསྡུས་དང་། འཕགས་པ་རིན་པོ་ཆེས་ལས་བཞིའི་སྦྱིན་སྲེག་དང་། དེ་ལ་ཞང་དཀོན་མཆོག་དཔལ་གྱི་དྲིས་ལན་སོགས་མང་ངོ་། །རྫོགས་རིམ་ལ། གསང་འདུས་དང་ཐུན་མོང་དུ་གསང་བའི་དེ་ཁོ་ན་ཉིད་རབ་ཏུ་གསལ་བ། ཀྱེ་རྡོར་དང་ཐུན་མོང་དུ་ཨོ་ལ་པ་ཏི། གསང་མཐའ་ཐུན་མིན་དཔྱིད་ཐིག་དང་གསུམ། དེ་
ལྟར་ནག་པོ་གཞུང་དྲུག་གོ །གཉིས་པ་ལ། རྩ་རྒྱུད་དང་རྣལ་འབྱོར་མ་ཀུན་སྤྱོད་ལ་རྒྱལ་པོ་ཌ་གི་པ་དང་། བློན་པོ་དྷཱ་རི་ཀ་པའི་ཆེད་དཔལ་མངོན་པར་རྫོགས་པའི་གཞུང་འདི་མཛད། འདིའི་ཚིག་དོན་གསལ་བྱེད་ཚིག་འགྲེལ་གཉན་གྱི་འབྲུ་འབུམ། ལག་ལེན་གྱི་དོན་གསལ་བྱེད་རྗེ་བཙུན་གྱི་དོན་འགྲེལ། འཕགས་པ་རིན་པོ་ཆེའི་སྒྲུབ་ཐབས། རྗེ་བཙུན་གྱི་ཀུན་སྤྱོད་ཡིག་སྣ་སོགས་མང་ངོ་། །རྫོགས་རིམ་ལ་བསྡུ་བ་གསུམ་རྩ་དབུ་མ། བདེ་མཆོག་དཀར་པོའི་ཁྲིད་རྣམས་སོ། །དྲིལ་བུའི་སྐོར་ལ། རྩ་བཤད་ཀྱི་རྒྱུད་ཀུན་ལ་བརྟེན་ནས་དྲིལ་བུ་སྐོར་གསུམ་མཛད། འདིའི་དོན་ལག་ཏུ་བླང་བར་རྩེ་མོའི་དྲིལ་བུའི་དཀྱིལ་ཆོག །སྐུ་མཆེད་གཉིས་ཀྱི་སྒྲུབ་ཐབས། འཕགས་པའི་སྒྲུབ་ཐབས། རྗེ་བཙུན་རིན་པོ་ཆེའི་རིམ་ལྔའི་འཁྲིད་སོགས་མང་ངོ་། །བཞི་པ། རྩ་རྒྱུད་ལེའུ་ཞེ་བརྒྱད་པ་དང་། ཞེ་གཉིས་པ་ནས་རྣལ་འབྱོར་མའི་ཕྱོགས་གཅིག་སོ་གཉིས་པར། རྡོ་རྗེ་ཕག་མོ་དེ་ཡི་ནི། །སྐུ་མདོག་མཚོན་ཆ་འཆང་ལ་གཟིགས། །ཅེས་པས་ལྷ་བསྟན། ནཱ་རོ་པས་གཞུང་ཆུང་དང་། ས་ཆེན་གྱི་མངོན་རྟོགས་སྐོར་བཅུ་གཅིག །བསྐྱེད་རྫོགས་ཡན་ལག་དང་བཅས་སྟོན་པ་ཕག་མོ་ལས་བཅུའི་གཞུང་རྣམས་མཛད། རྫོགས་རིམ་ནི་རྩ་རྒྱུད་ལེའུ་དང་པོར་བརྟེན་ནས་ཕྱག་ཆེན་གཅེས་བཏུས་དང་མན་ངག་གཅེས་བསྡུས་ཀྱི་ནང་ན་འཐོར་ནས་བཞུགས།
སྙིང་པོར་གྱུར་པ་གསང་མཐའི་ལམ་སྲོལ་ནི། །ལུ་ནག་དྲིལ་གསུམ་མཁའ་སྤྱོད་སྐོར་དང་བཞི། །རེ་རེའང་རྒྱུད་དང་གྲུབ་པའི་གཞུང་བཟང་དང་། །གསལ་བྱེད་གོང་མའི་ཡིག་སྣས་རྟགས་པར་བྱ། །གསང་མཐའ་ཉིད་རྒྱུད་སྡེ་གཞན་ལས་ཟབ་ཁྱད་ནི་སྣ་ཚོགས་སུ་འདོད་ཀྱང་རང་ལུགས་ནི། རྗེ་རྡོ་རྗེ་འཆང་གིས། འཛམ་གླིང་ན་ཞིང་སྐྱེས་ཀྱི་སྤྲུལ་སྐུ་རྣམས་སྒྲུབ་པ་པོའི་རྒྱུད་བྱིན་གྱིས་རློབས་ཕྱིར་བཞུགས་ཀྱང་། བྱིན་རླབས་དེ་འགུགས་པའི་གདམས་ངག་མེད་ན་མི་ཡོང་བས། དེ་འགུགས་བྱེད་ཕོ་ཉ་གསུམ་བསྲེ་བ་འདི་གསང་མཐའི་ཟབ་ཁྱད་དེ། རྩ་རྒྱུད་ལས། དེ་བཞིན་ཕོ་ཉ་ལེགས་བསྲེས་པས། །སྒྲུབ་པ་པོས་ནི་དངོས་གྲུབ་ཐོབ། །ཅེས་སོ། །ཕོ་ཉ་གསུམ་ནི། རྒྱ་མཚོ་ལས། རྣལ་འབྱོར་མ་ནི་རྣམ་གསུམ་སྟེ། །ཞིང་སྔགས་ལྷན་ཅིག་སྐྱེས་རང་ངོ་། །ཞེས་སོ། །བསྲེ་ཚུལ་ནི། སྨིན་བྱེད་དབང་གི་སྐབས་དཔའ་བོ་བསྐུལ་བའི་ཚེ་བསྲེ། བསྐྱེད་རིམ་ལཱུ་ཧི་པས་དོན་འགྲེལ་ལས་གསུངས་པ་ལྟར་དང་། ནག་དྲིལ་གཉིས་ལ་བརྗོད་པ་གསུམ་དང་དྲན་པ་གསུམ་གྱི་སྐབས་བསྲེ། རྣལ་འབྱོར་མ་ལ་ཡེ་ཤེས་པ་གཞུག་པ་དང་འགྲོ་བ་དག་པའི་ཚེ་བསྲེ། རྫོགས་རིམ་ལ་ལས་རྒྱ་ལ་བརྟེན་ནས་བསྲེ་བས་ཆོས་ཀྱི་ཕྱག་རྒྱ་ལ་ཡང་བསྲེ་བ་སྐབས་ཐོབ་ཡིན་ནོ། །དེ་ལྟར་ཕོ་ཉ་བསྲེ་བའི་གདམས་ངག་གི་སྒོ་ནས་ཡི་དམ་གྱི་བྱིན་རླབས་རང་རྒྱུད་ལ་བསྡུས་ཏེ་བསྒོམས་
པས་བྱིན་རླབས་མྱུར་དུ་འཇུག །དེ་ལ་བརྟེན་ནས་ཏིང་ངེ་འཛིན་མྱུར་དུ་སྐྱེ། དེ་ལ་བརྟེན་ནས་ས་ལམ་མྱུར་དུ་བགྲོད་པ་ཡིན་ཏེ། རྩ་རྒྱུད་ལས། དེ་ཀུན་འདོད་པའི་གཟུགས་ཅན་ཏེ། །ཡིད་ཀྱི་ཤུགས་ཀྱིས་འཇུག་པར་བྱེད། །ཅེས་སོ། །སྐོར་ཚོ་བཞིའི་ནང་གསེས་ཀྱི་ཟབ་ཁྱད་ནི། རང་ལུགས་ཆོས་རྗེ་སངས་རྒྱས་དཔལ་བཟང་གི་གསུང་ལས། སྦྱང་གཞི་ལ་གནད་དུ་བསྣུན་ཚུལ་གྱི་སྒོ་ནས་ཟབ་ཁྱད་འདོན་གྱི། ལྷ་གྲངས་ཀྱི་སྒོ་ནས་མ་ཡིན་ནོ། །ནག་པོ་པས་ནི་ཕྱི་རྟོག་བརྟན་ནས་སེམས་ལ་གཙོ་བོར་གནད་དུ་བསྣུན། ནང་ལུས་ལ་ཞར་བྱུང་གི་ཚུལ་གྱིས་གནད་དུ་བསྣུན་པས་མི་ཟབ་སྟེ། ས་སྐྱ་པས། འདི་ནི་ཕྱི་གཙོ་བོ་ལ་ནང་ཞར་བྱུང་གི་ཚུལ་གྱིས་གནད་དུ་བསྣུན། ཅེས་གསུངས། མུས་ཆེན་གྱིས། ཕྱི་བསྐྱེད་རིམ་ནི་རྟོག་བརྟགས་སེམས་ལ་གནད་དུ་བསྣུན་པས་མི་ཟབ། ལུས་དཀྱིལ་ནི་ལུས་ངག་ལ་གནད་དུ་བསྣུན་པས་ཟབ་པ་ཡིན་གསུངས། ལཱུ་ཧི་པས་ནི་སྒྲ་ཚུལ་གྱི་སྒོ་ནས་ཕྱི་ནང་གཉིས་ཀ་ལ་ཆ་མཉམ་དུ་བསྣུན་པས་འགྲིགས། དྲིལ་བུ་པས་ནི་ཕྱིའི་སྤྲོས་པ་ཐམས་ཅད་ཆོད་དེ་ནང་ལུས་འབའ་ཞིག་ལ་གནད་དུ་བསྣུན་པས་ཤིན་ཏུ་ཟབ། ནཱ་རོ་མཁའ་སྤྱོད་ནི་དབང་བཞིའི་དོན་ཐམས་ཅད་བསྐྱེད་རིམ་གྱི་སྟེང་དུ་ཚང་བར་ཉམས་སུ་ལེན་པས་ཤིན་ཏུ་ཟབ་པ་ཡིན་ཏེ། ཆོས་རྗེ་རྡོ་རྗེ་འཆང་ཆེན་པོས། དབང་བཞིའི་དོན་ལྡན་བསྐྱེད་རིམ་ཟབ་
མོའི་ལམ། །ཐུན་བཞིར་བསྒོམ་ཞིང་གུས་པས་གསོལ་བཏབ་པས། །སྐུ་བཞིའི་དབྱེར་མེད་ཟུང་འཇུག་བདེ་བའི་རྒྱུ། །མཁའ་སྤྱོད་སྐུ་ཡི་བྱིན་གྱིས་བརླབ་ཏུ་གསོལ། །ཞེས་གསུངས། ལམ་རིམ་ནི། བརྒྱུད་པའི་ཁྱད་པར་གཉིས་ལྡན་གྱི་སེམས་བསྐྱེད་སྔོན་དུ་འགྲོ་བས། སྦྱིན་བྱ་བཞི་ལེགས་པར་བྱིན་ནས་ཡེ་ཤེས་པ་འབེབས་ཐང་གསུམ་གྱི་སྒོ་ནས་ཕོ་ཉ་གསུམ་ལེགས་པར་འདྲེས་པའི་དབང་དང་། རྩ་ལྟུང་དང་སྦོམ་པོ་སྟེ་ཐུན་མོང་གི་དམ་ཚིག་ཉེར་གཉིས་དང་། རིགས་དང་མཐུན་པའི་ཕྱག་རྒྱ་བསྟེན་པ་སོགས་ཁྱད་པར་གྱི་དམ་ཚིག་བརྒྱད་དེ་གཞི་དམ་ཚིག་ལ་གནས་པར་བྱས་ནས། ལམ་ཉམས་སུ་ལེན་པའི་ཐོག་མར། ལྟ་བའི་སྒོ་ནས་འཁོར་འདས་ཀྱི་ཆོས་ཐམས་ཅད་མཐའ་བྲལ་དུ་གཏན་ལ་ཕབ། ཕབ་དོན་དུ་རྩེ་གཅིག་མཉམ་པར་བཞག་པ་ལ་ལྟ་བའི་མིང་འདོགས་ལྟ་བ་གཏན་ལ་ཕབས་ཚད་བསྐྱེད་རིམ་གྱི་སྒོ་ནས་ཡི་དམ་གྱི་ལྷར་བསྒོམ། ལྷར་བསྒོམས་ཚད་རྫོགས་རིམ་གྱི་སྒོ་ནས་ཡེ་ཤེས་སུ་བསྒྱུར་ཏེ་སྐུ་དང་ཡེ་ཤེས་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་དུ་བགྲོད་པར་བྱེད་པ་ནི་གཞི་ལམ་འབྲས་གསུམ་མོ།། ༈ །།ཨོཾ་སྭསྟི་པྲ་ཛ་བྷུ ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་ཚིགས་སུ་བཅད་པ། །ཤར་ཕྱོགས་ཟ་ཧོར་རྒྱལ་པོའི་སྲས་སུ་བལྟམས། །ཕྱི་ནང་རིག་པའི་གནས་རྣམས་ཀུན་ལ་མཁས། །བསླབ་གསུམ་རྣམ་དག་གནས་བརྟན་འདུལ་
བ་འཛིན། །རྩ་བའི་སྡེ་བཞི་གྱེས་པ་བཅོ་བརྒྱད་ཀྱི། །ལུགས་རྣམས་སོ་སོར་མ་འདྲེས་ཐུགས་ཆུད་པས། །ཀུན་གྱིས་བཀུར་ཅིང་ཁྱོད་གསུང་ཚད་མར་ལེན། །རྣམ་གནོན་ངང་ཚུལ་ལ་སོགས་མ་ག་དྷཱའི། །གཙུག་ལག་ཁང་ཆེན་ཀུན་གྱི་བདག་པོ་མཛད། །ཡི་དམ་དཔག་ཏུ་མེད་པའི་ཞལ་གཟིགས་ཤིང་། །སྡེ་སྣོད་རྒྱུད་སྡེའི་ཆོས་ལ་མི་མཁྱེན་མེད། །གསེར་གླིང་ཞལ་གྱི་བུམ་བཟང་ལས་འོངས་པའི། །བྱང་ཆུབ་སེམས་ཀྱི་བདུད་རྩི་རྫོགས་པར་གསོལ། །སྒྲུབ་དང་སུན་འབྱིན་རིགས་པའི་ང་རོ་ཡིས། །རྒོལ་བ་ངན་པའི་གླང་ཆེན་མྱོས་མཛད་ཅིང་། །སྐལ་བར་ལྡན་རྣམས་རང་རང་བསམ་པ་དང་། །མཐུན་པར་དམ་པའི་ཆོས་ཀྱིས་ཚིམས་པར་མཛད། །བསྐལ་པ་བཟང་པོའི་བྱང་ཆུབ་སེམས་དཔའ་ཞེས། །ཇོ་མོས་ལུང་བསྟན་དཔལ་ལྡན་ནཱ་རོ་པས། །བསྟན་པའི་བདག་པོ་ཉིད་དུ་མངའ་གསོལ་བ། །དེ་ནི་དཔལ་ལྡན་མར་མེ་མཛད་དཔལ་ལ། །ལྔ་བརྒྱ་པ་ཡི་ཐམས་ཅད་མཁྱེན་པ་དེ། །ལྷ་རིགས་དགེ་སློང་བྱང་ཆུབ་སེམས་ལྡན་པས། །དགེ་སློང་ཚུལ་ཁྲིམས་རྒྱལ་བ་རབ་མངགས་ཏེ། །དཀའ་བ་དུ་མས་བོད་དུ་སྤྱན་དྲངས་ཚེ། །ཆུ་ཕོ་རྟ་ལ་མགོན་པོ་བོད་དུ་བྱོན། །མེ་མོ་ཕག་ལ་བསམ་ཡས་གནས་སུ་ཕེབས། །ས་མོ་གླང་ལ་ར་ས་འཕྲུལ་སྣང་དང་། །ཡེར་པ་ལྷ་རི་སྙིང་པོའི་མགུལ་དུ་བཞུགས། །ལྕགས་ཕོ་སྟག་ལ་སྙེ་ཐང་འོར་དུ་ཕེབས། །
ལོ་སྐོར་གཅིག་གི་བར་དུ་བོད་ཡུལ་དུ། །ཟབ་ལ་རྒྱ་ཆེའི་ཆོས་ཀྱི་འཁོར་ལོ་བསྐོར། །ཐམས་ཅད་མཐོ་རིས་བྱང་གྲོལ་ལམ་ལ་བཀོད། །དེ་ནས་བླ་མ་རྗེ་བཙུན་ཆེན་པོ་དེས། །བསྟན་པ་རྒྱལ་བའི་འབྱུང་གནས་ལ་གཏད་ནས། །ཤིང་ཕོ་རྟ་ལ་དགའ་ལྡན་གནས་སུ་གཤེགས། །དེར་ནི་ནམ་མཁའ་དྲི་མ་མེད་པར་གྲགས། །དེ་ནས་ལོ་ངོ་བཅུ་ཡི་བར་དག་ཏུ། །དགེ་བཤེས་སྟོན་པས་ཚོགས་ཀྱི་དཔོན་མཛད་དེ། །ཇོ་བོའི་གདན་ས་དཔལ་གྱི་རྭ་སྒྲེངས་བཏབ། །ཡོངས་སུ་དག་པའི་འཁོར་སློབ་སྨིན་པར་མཛད། །དེ་ནས་ལོ་གྲངས་ཉི་ཤུ་ལྷག་ཙམ་ན། །སྐུ་མཆེད་གསུམ་གྱི་ཕྲིན་ལས་ཀློང་བརྡོལ་ཏེ། །དབུ་རུ་བྱང་དུ་བཀའ་གདམས་ཉི་མ་ཤར། །གངས་ཅན་མ་ལུས་འོད་ཀྱིས་ཁྱབ་པར་མཛད། །དྲང་སྲོང་ཆེན་པོ་པུ་ཏོ་བ་ལ་ནི། །ལྟ་སྤྱོད་ཡོངས་སུ་དག་པའི་སློབ་མ་ནི། །དུས་རེ་ལ་ཡང་ཉིས་སྟོང་ལྷག་ཙམ་དང་། །སྤྱན་སྔ་བ་ལ་བརྒྱད་བརྒྱ་དགུ་བརྒྱ་འདུས། །ཕུ་ཆུང་པ་ཡིས་ཚོགས་པ་མ་བསྐྱངས་ཀྱང་། །སྦས་པའི་ཚུལ་དུ་དཔག་མེད་སྨིན་པར་མཛད། །ཁམས་པ་ལུང་པའི་ཐུན་བརྒྱད་མ་ལ་ཡང་། །རྣམ་གྲོལ་དོན་གཉེར་བརྒྱད་བརྒྱ་འདུས་པར་གྲགས། །སྐུ་མཆེད་གསུམ་གྱིས་ལེགས་པར་བསྐྱངས་པའི་སྲས། །གླང་ཐང་པ་ལ་སྟོང་ཕྲག་རེ་ཙམ་དང་། །དགེ་བཤེས་ཆེན་པོ་ཤ་ར་བ་ལ་ནི། །རྣམ་ཐར་གཙང་བས་སུམ་སྟོང་ལྷག་རེ་འདུས། །དགེ་བཤེས་
སྤང་གད་པ་ལ་སྟོང་ལྷག་དང་། །བྱ་ཡུལ་བ་ལ་ཉིས་སྟོང་བདུན་བརྒྱ་སོགས། །ཕྲིན་ལས་སྐྱོང་བའི་བཤེས་གཉེན་མཐའ་ཡས་ཏེ། །དེ་དུས་ཁོ་ན་བསྟན་པའི་གདལ་ཆེའོ། །ཞེས་བཀའ་གདམས་ཆོས་འབྱུང་ལས་གསུངས་སོ། ༈ །མཁས་གྲུབ་ཁྱུང་པོ་ནི། རང་གི་གསུང་ལས། །བན་ཆུང་བདག་གི་སྐྱེ་ས་གངས་དཀར་མདའ། །སྙེ་མོ་ར་མང་རྗེ་རིགས་ཁྱུང་པོ་ཡིན། །ཕ་རུ་སྨོས་པ་ཁྱུང་རྒྱལ་སྟག་སྐྱེས་དང་། །མ་རུ་སྨོས་པ་མགོ་བཟའ་བཀྲ་ཤིས་སྐྱིད། །དེ་ཉིད་ལྷུམས་སུ་བདག་ཉིད་ཞུགས་པའི་ཚེ། །ཕ་མ་ཡུལ་མི་བདེ་སྐྱིད་ལྡན་པར་གྱུར། །སྟག་གི་ལོ་ལ་མ་ཡི་རུམ་ནས་བཙས། །ཞེས་དང་། ལོ་བཅུ་ལོན་ནས་ཡིག་རྩིས་མཁས་པ་ཤེས། །བཅུ་གཉིས་ལོ་ལ་ཕ་མེས་བག་ཆགས་ཀྱིས། །སེམས་ཕྱོགས་བོན་བསླབ་དེ་རྗེས་རྫོགས་ཆེན་བསླབ། །ཅེས་དང་། དེ་ནས་རིན་ཆེན་གསེར་ཕྱེ་ཕངས་མེད་ཁྱེར། །གཅེས་པའི་སྲོག་ལ་མ་བལྟས་དཀའ་སྤྱད་ནས། །རྒྱ་དང་བལ་པོའི་ཡུལ་དུ་ལན་བདུན་ཕྱིན། །རྒྱ་གར་མཁས་པ་བརྒྱ་དང་ལྔ་བཅུ་བསྟེན། །ཁྱད་པར་མཁས་ཤིང་གྲུབ་ཐོབ་ལྔ་བཅུ་དང་། །རྩ་བའི་བླ་མ་ཁྱད་འཕགས་རྣམ་བཞི་བསྟེན། །ལོངས་སྐུ་དྲུག་པ་རྡོ་རྗེ་འཆང་ཆེན་ལ། །དངོས་སུ་ཆོས་གསན་ཡེ་ཤེས་མཁའ་འགྲོ་གཅིག །མཉེས་པར་བྱས་ནས་མཐར་ཐུག་གདམས་ངག་ཞུས། ཞེས་སོ།། ༈ །།མ་བྱོན་སངས་རྒྱས་རབ་
གསལ་གྱི་རྣམ་འཕྲུལ་བུ་སྟོན་རིན་ཆེན་གྲུབ་ནི། ཤབ་སྨད་སྒོམ་གནས་ཞེས་བྱ་བར། གདུང་རུས་བྲག་པ། ཡབ་བྲག་སྟོན་རྒྱལ་མཚན་དཔལ་བཟང་ཞེས་བྱ་བའི་དབོན་པོ་བླ་མ་བྲག་སྟོན་པ་ཞེས་སྔགས་རྙིང་མའི་རིགས་དང་། ཡུམ་སློབ་དཔོན་མ་བསོད་ནམས་འབུམ་གྱི་སྲས་སུ་ལྕགས་ཕོ་རྟའི་ལོ་དཔྱིད་འབྲིང་མར་ངོའི་ཚེས་དགུ་ལ་ངོ་མཚར་བའི་ལྟས་དང་བཅས་ཏེ་བལྟམས། ཆེར་སྐྱེས་པ་ན་འཇམ་དབྱངས་ཀྱི་ཞལ་གཟིགས། དགུང་ལོ་བདུན་པར་སེམས་དཔའ་ཆེན་པོ་ཁྲོ་ཕུ་པའི་དྲུང་དུ་སེམས་བསྐྱེད་ཀྱི་གདམས་པ་ཞུས་པས་བདག་བས་གཞན་གཅེས་ཐུགས་ལ་འཁྲུངས། བརྒྱད་པར་བླ་མ་དེ་ཉིད་ལས་བདེ་མཆོག་དྲིལ་བུ་པ་དང་། མན་ངག་བརྒྱ་རྩ་སོགས་ཞུས། མེས་པོ་ཚུལ་ཁྲིམས་དཔལ་བཟང་ལ་གསང་སྙིང་དགོངས་འདུས་སོགས་རྙིང་མའི་ཆོས་སྐོར་མང་པོ་དང་། ཞི་བྱེད་ཀྱི་རྒྱུད་ཕྱི་མ། གུ་རུའི་གཏོར་མའི་དོན་སོགས་ལ་མཁས་པ་ཕུལ་ཕྱིན་དུ་མཛད། བཟླས་བརྗོད་དང་བསྐྱེད་རྫོགས་བསྒོམས་པས་དྲོད་ཚད་ཐོབ། བཅོ་བརྒྱད་པར་མཁན་ཆེན་བཟང་པོ་དཔལ་ལས་དགེ་ཚུལ་གྱི་སྡོམ་པ་བཞེས། དེ་ཉིད་ལ་ཕར་ཕྱིན་ལོ་ངོ་གཉིས་ཀྱི་བར་དུ་འབད་རྩོལ་གྱིས་སྦྱངས་པས་ཤིན་ཏུ་མཁས། ཉི་ཁྲི་སྣང་བ། བརྒྱད་སྟོང་འགྲེལ་པ། ས་སྡེ་ལྔ། སྡོམ་གཉིས། པྲ་ཀ་ར་ཎ་སྡེ་བརྒྱད་སོགས་ལའང་བྱང་ཆུབ། གཞན་ཡང་སྤྱོད་འཇུག་སོགས་མདོ་
སྡེའི་དགོངས་འགྲེལ་སྐོར། མདོ་རྩ་མེ་ཏོག་ཕྲེང་རྒྱུད་སོགས་འདུལ་བ། ཚད་མ་ཀུན་བཏུས་སོགས་ཚད་མ། མངོན་པ་ཀུན་བཏུས། གཞན་ཡང་རྒྱུད་སྡེ་བཞིའི་དབང་བཀའ་དང་། བཤད་བཀའ་མཐའ་ཀླས་པ་གསན། ཉེར་གཅིག་པར་དབུས་གཙང་གཉིས་སུ་གྲྭ་སྐོར་མཛད་པས་ཀུན་གྱི་ཡིད་འཕྲོག །ཉེར་གསུམ་པར་མཁན་ཆེན་གྲགས་པ་གཞོན་ནུ་ལས་བསྙེན་པར་རྫོགས་ཤིང་། སོ་ཐར་གྱི་མདོ། ཀརྨ་ཤ་ཏཾ་སོགས་ཀྱི་བཤད་པ་གསན། དེ་ནས་ཐར་ལོའི་དྲུང་དུ་ཀ་ཙཱ་ན་འགྲེལ་བཅས་ལ་སྦྱངས་པས་ལོ་ཙ་བ་ཆེན་པོར་གྱུར། འགྱུར་ཡང་མང་དུ་མཛད། དེ་ཉིད་ལས་སྦྱོར་དྲུག་གསན་ནས་བསྒོམས་པས་ཉམས་རྟོགས་ཁྱད་པར་ཅན་འཁྲུངས། བླ་མ་དེ་ལ་སངས་རྒྱས་དངོས་ཀྱི་འདུ་ཤེས་ལས་ཐ་མལ་གྱི་སྣང་བ་སྐད་ཅིག་ཀྱང་མ་སྐྱེས་གསུངས། གཞན་ཡང་སྙན་ངག་དང་སྡེབ་སྦྱོར་སོགས་གསན། བླ་མ་དཔལ་ལྡན་སེང་གེ་ལས་དུས་འཁོར་སོགས་རྒྱུད་སྡེ་བཞི་ཀའི་དབང་བཤད་བཀའ་སོགས་བོད་དུ་རྒྱུན་ཡོད་དོ་ཅོག་ལྟ་བུ་དང་། བླ་མ་རྡོ་རྗེ་རྒྱལ་མཚན་དཔལ་བཟང་གི་དྲུང་དུ་དུས་འཁོར་གྱི་སྐོར་མཐའ་ཆོད་པ་སོགས་གསན། དགུང་ལོ་སོ་གཅིག་པར་རྒྱལ་པོ་རྣམ་ཐོས་སྲས་ཀྱི་རྣམ་འཕྲུལ་སྐུ་ཞང་ཆེན་པོ་གྲགས་པ་རྒྱལ་མཚན་གྱིས་ཞ་ལུ་གསེར་བཀང་གི་གདན་སར་སྤྱན་དྲངས་ཏེ་མདོ་སྔགས་ཀྱི་བཤད་གྲྭ་ཆེན་པོ་བཙུགས།
སློབ་དཔོན་འཕགས་པའི་སྦུགས་སུ་སྤྱན་དྲངས་གསང་འདུས་ཀྱི་སྨིན་གྲོལ་གསན་པས་འདུས་པ་ལྷ་སོ་གཉིས་ཀྱི་ཞལ་གཟིགས། འོད་གསལ་མ་བསྒོམས་ཀྱང་ཟིན། དག་པའི་ཞིང་དུ་བྱོན་པ་སོགས་ལམ་རྟགས་རང་བྱུང་དུ་ཤར། རྒྱུད་སྡེ་བཞིའི་བསྟན་པའི་བདག་པོར་གྱུར། སྐུ་གསུང་ཐུགས་རྟེན་བསམ་གྱིས་མི་ཁྱབ་པ་བཞེངས། ཁྱད་པར་དུ་བཀའ་བསྟན་བཞེངས་པའི་ཚེ་མ་ཚང་བ་བཅུག །ལྷག་པ་བཏོན་པ་སོགས་དག་ཐེར་འགྲན་ཟླ་བྲལ་བ་མཛད། ཆོས་སྡེ་ཆེན་པོར་དགེ་འདུན་སུམ་སྟོང་བརྒྱད་བརྒྱ་དང་། རི་སྦུག་ཏུ་སྡེ་སྣོད་འཛིན་པ་འདག་སྦྱར་ཆུ་བུག་སྒོ་ལ་བཞུགས་པའི་དགེ་བཤེས་ལྔ་བརྒྱ་ཙམ་རེ་འདུས། བཤད་སྒྲུབ་ཐམས་ཅད་ཀྱི་ཆུ་གཏེར་དུ་གྱུར། ས་སྐྱ་བླ་མ་དམ་པས་སྤྱན་དྲངས་ཏེ་ཡོངས་འཛིན་དུ་བཀུར། སྙན་གྲགས་ཀྱིས་ས་སྟེང་ཐམས་ཅད་ཁྱབ་པས་རྒྱ་ནག་རྒྱལ་པོ་ཐོ་གོན་ཐེ་གུར་ཁཱན་དང་། རྒྱ་གར་ཆོས་ཀྱི་རྒྱལ་པོ་པུཎྱ་མཱ་ལ་ལ་སོགས་པས་ཀྱང་བསྔགས་པའི་སྤྲིངས་ཡིག་གིས་མཆོད། རེ་གཉིས་པར་གཡའ་ཕག་གཉིས་འཁྲུགས་པར་འདུམ་པར་དབུས་སུ་བྱོན་ཅིང་། ལམ་བར་དུ་ཆེན་པོ་ཐམས་ཅད་ཀྱིས་ཞབས་ནས་བཏེགས། རེ་གསུམ་པར་རི་སྦུགས་སུ་བྱང་ཆུབ་མཆོད་རྟེན་ཆེན་མོ་བཞེངས། རེ་བཞི་པར་ས་སྐྱར་ཕེབས་ཤིང་ཏི་ཤྲིར་བཀུར། རེ་ལྔ་པར་སླར་ཉིད་ཀྱི་གདན་སར་ཕེབས་ཤིང་ཡང་བསྐྱར་ས་སྐྱར་བྱོན། དེ་
ནས་གདན་སར་ཐུགས་སྲས་ལོ་ཙཱ་བ་རིན་ཆེན་རྣམ་རྒྱལ་བསྐོ་བར་གནང་། ཉིད་ཀྱིས་རི་སྦུགས་སུ་ཀུན་སྤོང་མཛད་དེ་ཐུགས་དམ་ཟབ་མོ་ལ་གཞོལ་པར་མཛད། རྗེ་བཙུན་གྲགས་པ་ལན་གཉིས་སུ་ཞལ་མཇལ་ཞིང་ཆོས་ཀྱི་དག་ཐེར་གྱིས་ཤིག་པའི་གནང་བ་ཐོབ། །རྒྱུད་སྡེ་བཞི་དང་འབྲེལ་བའི་འཆད་ཉན་བསམ་གྱིས་མི་ཁྱབ་པ་མཛད། མདོར་ན་འཁོར་ལོ་གསུམ་གྱི་བྱ་བ་རེ་རེ་ལ་འདི་ཁོ་ན་སྐུ་ཚེ་ཧྲིལ་པོར་མཛད་དམ་སྙམ་པ་ཡོད། དམ་པའི་ཆོས་མ་བསྒྱུར་བ་རྣམས་བསྒྱུར། བསྒྱུར་པ་རྣམས་ཞུ་ཆེན་བྱས། ཧོལ་ཁང་བསབས། འགྲེལ་བཤད་ཀྱིས་བཀྲལ། ཐུན་མོང་དང་ཐུན་མོང་མིན་པའི་ཆོས་ཐམས་ཅད་ཕས་བུ་གཅིག་པུ་ལ་སྟེར་པ་ལྟ་བུར་མཛད་པས་བསྟན་པ་སྤྱི་ལ་བཀའ་དྲིན་བསམ་གྱིས་མི་ཁྱབ། མཐར་དགུང་ལོ་དོན་ལྔ་པ་ཤིང་འབྲུག་ཟླ་བ་དྲུག་པའི་ཉི་ཤུ་གཅིག་ལ་དགའ་ལྡན་ཆོས་ཀྱི་འདུན་ས་ཆེན་པོར་གཤེགས་སོ། །ཞལ་སློབ་ཀྱི་རིམ་པ་ནི་རྒྱ་དཀར་ནག་བོད་བལ་སོག་པོ་སོགས་སྨོས་ཀྱིས་མི་ལང་། ལེགས་བཤད་གསུང་རྩོམ་གྱི་དབང་དུ་བྱས་ན་སྒྲ་ཚད་དབུ་ཕར་རྒྱུད་སྡེ་རྣམ་བཞི་དང་འབྲེལ་བའི་བསྟན་བཅོས་པོད་ཆེན་ཉེར་བརྒྱད་ཀྱིས་མཚོན་མཐའ་ཀླས་སོ།། ༈ །།རྒྱལ་སྲས་ཐོགས་མེད་པ་ནི། དཔལ་ས་སྐྱའི་ལྷོ་ནུབ་ཕུལ་བྱུང་བྲག་སྐྱེ་ཞེས་བྱ་བར། ཡབ་ དཀོན་མཆོག་དཔལ་དང་། ཡུམ་འབུམ་སྒྲོན ་གྱི་སྲས་སུ་ཤིང་
ལུག་ལོར་འཁྲུངས། ངེས་འབྱུང་དང་། སྙིང་རྗེ། ཤེས་རབ་རྣམས་རང་བརྡོལ། བཅུ་གཉིས་པར་དཔལ་འབར་བར་རབ་ཏུ་བྱུང་། མཚན་བཟང་པོ་དཔལ་དུ་བཏགས། དགུང་ལོ་བཅོ་ལྔ་པར་བོ་དོང་ཨེར་བྱོན་ནས་ཀུན་བཏུས་གསན་ཅིང་། རྣམ་དཔྱོད་ཆེ་བས་ཐོགས་མེད་གཉིས་པར་གྲགས། གཞན་ཡང་དབུ་ཕར་ཚད་མ་སོགས་མདོ་ཕྱོགས་ཐམས་ཅད་ལ་བྱང་ཆུབ་པར་མཛད། ཉེར་གསུམ་པར་གཙང་ཕྱོགས་སུ་གྲྭ་སྐོར་ལ་བྱོན། སུམ་ཅུ་པར་མཁན་པོ་བྱང་སེམས་རིན་མགོན་ལས་རབ་ཏུ་བྱུང་། སོ་གཉིས་པར་བཀྲ་ཤིས་བོ་དོང་རྟ་རའི་གདན་ས་ལོ་བདུན་མཛད། དགུང་ལོ་ཞེ་གསུམ་པ་ནས་གྲུ་འཛིན་གཉིས་པ་དངུལ་ཆུ་ཆོས་རྫོང་དུ་བྱོན། ལོ་ཉི་ཤུ་རྩ་གྲངས་བར་ཐུགས་དམ་ཁོ་ནར་བཞུགས། མདོར་ན་དང་པོ་བཤེས་གཉེན་བཅུ་ཕྲག་བཞི་དང་། འགྲན་ཟླ་དང་བྲལ་བ་གཉིས་བསྟེན་ནས་མདོ་སྔགས་ཀྱི་ཆོས་བོད་དུ་འགྱུར་རོ་ཅོག་མ་གསན་པ་མེད་པ་ལྟ་བུར་གྱུར། བར་དུ་དེ་དག་གི་དོན་འཆད་ཅིང་རྩོད་པས་བཤེས་གཉེན་མཐའ་ཀླས་པ་སྤེལ། མདོ་རྒྱན། རྒྱུད་བླ་མ། སྤྱོད་འཇུག་སོགས་ཀྱི་འགྲེལ་པས་མཚོན་ལེགས་བཤད་རྩོམ་པའང་མང་དུ་མཛད། བྱང་ཆུབ་ཀྱི་ཤུ་རྩ་གཅིག་ཙམ་དུ་སྒྲུབ་པ་སྙིང་པོར་དྲིལ། སྒྲུབ་པ་མཐར་ཕྱིན་ནས། རེ་གསུམ་ནས་རེ་བདུན་པའི་བར་སྟོན་ཟླ་གསུམ་ལ་སྐུ་མཚམས་གྲོལ་ནས་
གཞན་དོན་མཛད། རེ་བདུན་པར་ཏཱ་སི་ཆེན་པོས་དབུས་ཕྱོགས་སུ་གདན་དྲངས་ནས་གཞན་དོན་རྒྱ་ཆེན་མཛད། དགུང་ལོ་དོན་ལྔ་བཞེས་པ་ས་བྱ་ཟླ་བ་བཅུ་པའི་ཚེས་ཉི་ཤུའི་དགོངས་མོ་ངོ་མཚར་བའི་ལྟས་དུ་མ་དང་བཅས་ཏེ་མྱ་ངན་ལས་འདས། འདིའི་ཞལ་སློབ་འགྲོ་མགོན་དཔལ་ཡེ་པས་བློ་སྦྱོང་ཟིན་བྲིས་ཆེན་མོ་དང་། པུ་ཏོ་བའི་དཔེ་ཆོས་རིན་སྤུངས་ཀྱི་ཟུར་འདེབས་གཏམ་རྒྱུད་རིན་ཆེན་ཕྲེང་བ་མཛད།། ༈ །།རྗེ་བཙུན་རེད་མདའ་བ་ནི། ས་སྐྱ་དང་ཉེ་བའི་རེད་མདའ་མཁན་པོ་འགར་སྟོང་བཙན་ཡུལ་བཟུང་གི་རྒྱུད་དུ་ཡབ་བཀྲ་ཤིས་རྒྱལ་མཚན་དང་། ཡུམ་དབང་ཕྱུག་སྐྱིད་ཀྱི་སྲས་སུ་ས་གླང་ལོར་འཁྲུངས། བཅོ་བརྒྱད་པར་ས་བཟང་པཎ་ཆེན་ལས་དགེ་ཚུལ་བཞེས། མཚན་བཟང་པོ་དཔལ་དུ་བཏགས། དེ་ནས་མཁས་པའི་དབང་པོ་ཉ་དབོན་ཀུན་དགའ་དཔལ་དང་། ལུང་རིགས་སྨྲ་བ་མཁན་ཆེན་སངས་རྒྱས་དཔལ་གཉིས་ལས། ཚད་མ་ལ་ཤིན་ཏུ་མཁས་པར་སྦྱངས། དེ་ནས་རིམ་པར་རྒྱན་ལ་སོགས་པ་ཕར་ཕྱིན་གྱི་སྐོར་དང་། མངོན་པ་གོང་འོག་སོགས་གསན། མཁན་ཆེན་ཀུན་དགའ་བཟང་པོའི་དྲུང་དུ་བསྙེན་པར་རྫོགས་ཤིང་འདུལ་བ་གསན། ཆོས་རྗེ་བྱང་སེང་བ་ལས་དབུ་མའི་སྐོར་སོགས་གསན། ལོ་ཆེན་སྐྱབས་མཆོག་དཔལ་བཟང་ལས་གསང་འདུས་བཤད་པ་སོགས་གསན་ཅིང་མཁས་པར་གྱུར།
མདོ་རྒྱན། མངོན་པ་གོང་འོག །མདོ་རྩ། རྩ་འཇུག་བཞི་གསུམ། རྒྱུད་བླ། བཤེས་སྤྲིངས། ཀུན་བཏུས། གསང་འདུས་རྩ་རྒྱུད་རྣམས་ལ་ཊི་ཀའང་མཛད་དེ། གསུང་ལས། སྐྱེ་རྒུའི་གཙུག་རྒྱན་ཆོས་རྗེ་བསོད་རྒྱལ་དང་། །རྒྱལ་བའི་སྲས་པོ་ཐོགས་མེད་བཟང་པོ་དཔལ། །མ་ཏི་པཎ་ཆེན་པཎ་ཆེན་བྱང་རྩེ་དང་། །མཁས་པའི་དབང་པོ་ཉ་དབོན་ཀུན་དགའ་སོགས། །བཀའ་དྲིན་ནོས་པའི་བླ་མ་བཅུ་ཕྲག་གཉིས། །ཡུན་རིང་འབད་དེ་གུས་པའི་གཙུག་གིས་བསྟེན། །ཞེས་གསུངས་ཤིང་། བར་སྐབས་སུ་བྱ་བ་ལས་དང་ཀློག་པ་ཐོས་བསམ་འཆད་སྤེལ་གྱི་བྱ་བ་རྒྱ་ཆེ། མཐར་གཡུ་ལུང་རྡོ་རྗེ་རྫོང་དུ་ལོ་ལྔའི་བར་དུ་སྒྲུབ་པ་རྩེ་གཅིག་མཛད་པས་མཆོག་གི་དངོས་གྲུབ་ཐོབ། དགུང་ལོ་རེ་བཞི་པ་ཆུ་འབྲུག་ཟླ་བ་བཅུ་གཉིས་པའི་ཉི་ཤར་ལ་གཟུགས་སྐུའི་བཀོད་པ་ངོ་མཚར་བའི་ལྟས་དང་བཅས་ཏེ་བསྡུས་སོ། །དེའི་སློབ་མ་ནི། །ཀུན་མཁྱེན་ཤེར་འོད་བློ་བཟང་གྲགས་པ་སོགས། །གཞུང་ལུགས་རབ་འབྱམས་དགེ་བའི་བཤེས་གཉེན་བདུན། །བཀའ་བཅུ་ལེགས་པར་སྨྲ་བ་བཅུ་ཕྲག་གཅིག །ཕར་ཚད་ཤེས་པའི་སློབ་མ་བརྒྱ་ཕྲག་བརྒལ། །ཞེས་དང་། སྦྱངས་པའི་མཆོག་གྱུར་ཀུན་མཁྱེན་ཤེར་འོད་དང་། །སྲས་ཀྱི་མཆོག་གྱུར་བློ་བཟང་གྲགས་པའི་དཔལ། །ཉམས་ལེན་མཆོག་གྱུར་ཀུན་དགའ་དཔལ་བཟང་པོ། །ཤེས་རབ་མཆོག་གྱུར་ཉི་མ་རྒྱལ་
མཚན་དང་། །བརྩེ་ལྡན་མཆོག་གྱུར་དཔལ་འབྱོར་ཤེས་རབ་དང་། །འཆད་མཁས་མཆོག་གྱུར་བསོད་ནམས་ཤེས་རབ་དང་། །རྩོད་པ་མཆོག་གྱུར་དར་མ་རིན་ཆེན་ཏེ། །གཞུང་ལུགས་རབ་འབྱམས་སྨྲ་བའི་བཤེས་གཉེན་བདུན། །ཞེས་སོ།། ༈ །།བློ་བཟང་གྲགས་པ་ནི། བོ་དོང་པ་ཕྱོགས་ལས་རྣམ་རྒྱལ་གྱིས། །ཐུབ་བསྟན་ཉི་མ་ནུབ་རིར་ལྟུང་གྱུར་ཅིང་། །ཤེས་ལྡན་རྐང་དྲུག་ལྡན་པ་མྱ་ངན་འདས། །ལོག་སྨྲ་འབྱུང་པོའི་བྱ་ཚོགས་རྒྱུ་དུས་འདིར། །སྨྲ་བའི་ཟླ་བ་བློ་བཟང་གྲགས་པ་ཤར། །ཅེས་དང་། མི་བསྐྱོད་རྡོ་རྗེས། བྱང་ཕྱོགས་འདི་ན་རྒྱལ་བའི་བསྟན་པ་ལ། །ཕལ་ཆེར་ལོག་པ་འབའ་ཞིག་སྤྱོད་པའི་སྐབས། །འཁྲུལ་མེད་བྱི་དོར་མཛད་པའི་ཙོང་ཁ་པ། །རི་བོ་དགའ་ལྡན་པ་ལ་བསྟོད་པར་བགྱི། །ཞེས་དང་། སྟག་ཚང་ལོ་ཙཱ་བས། ཁྱོད་བློ་གཞོན་ནུ་ཉིན་མོའི་དུས་ཀྱི་ཚེ། །མདོ་དང་རྒྱན་གྱི་པད་ཚལ་རྒྱས་མཐོང་ནས། །བདག་བློ་ཁེངས་པའི་ཀུ་མུད་ལྷག་པར་ཟུམ། །ཟབ་ཡངས་མཁྱེན་པའི་གཏེར་ལ་གསོལ་བ་འདེབས། །ཞེས་དང་། འབྲུག་པ་པདྨ་དཀར་པོས། དགེ་ལེགས་ཆུ་གཏེར་ཆེན་པོའི་འཇིག་རྟེན་ལ། །བློ་བཟང་ཉིན་མོར་བྱེད་པ་ཁྱོད་བྱོན་ཚུན། །ས་འདི་རྨོངས་པའི་མུན་ལས་རྣམ་རྒྱལ་ཞེས། །གྲགས་པའི་གཞིར་གྱུར་དེ་ལ་ཕྱག་འཚལ་ལོ། །ཞེས་སོགས་ཀྱིས་བསྔགས་པ་ལྟར། མདོ་སྨད་ཀྱི་ཡུལ་ཙོང་ཁ་ཞེས་
པར། ཡབ་ཀླུ་འབུམ་དང་། ཡུམ་ཤིང་ཟ་ཨ་ཆོས་ཀྱི་སྲས་སུ་མེ་བྱ་ལོར་ཟླ་བ་དང་པོའི་ཚེས་བཅུར་ངོ་མཚར་བའི་ལྟས་དང་བཅས་ཏེ་འཁྲུངས། དེ་མ་ཐག་རྡོ་རྗེ་འཇིགས་བྱེད་ཀྱི་གྲུབ་བརྙེས་མཁས་གྲུབ་ཆེན་པོ་དོན་གྲུབ་རིན་ཆེན་གྱིས་འཇིགས་བྱེད་ཀྱི་སྤྲུལ་པར་ལུང་བསྟན། དགུང་ལོ་གསུམ་པར་ཆོས་རྗེ་རོལ་རྡོར་པར་དགེ་བསྙེན་མཛད། མཚན་ཀུན་དགའ་སྙིང་པོར་གསོལ། བདུན་པར་ཆོས་རྗེ་དོན་རིན་པས་རབ་ཏུ་བྱུང་ནས་མཚན་བློ་བཟང་གྲགས་པར་གསོལ། བཅུ་བདུན་ནས་ཆོས་རྗེ་དོན་རིན་པས་བསྐུལ་ཏེ་དབུས་སུ་ཕེབས། འབྲི་གུང་སྤྱན་སྔར་ཐུགས་བསྐྱེད་དང་ཕྱག་ཆེན། ཚལ་གུང་ཐང་དུ་གསོ་རིག །བདེ་བ་ཅན་དུ་རྒྱན་རྩ་འགྲེལ་སོགས་ལ་སྦྱངས་ཤིང་། བྱམས་ཆོས་ཕྱི་མ་རྣམས་ཀྱང་གསན། བླ་མ་དམ་པ་ལའང་ཆོས་འབྲེལ་ཞུས། གཙང་དུ་ལོ་ཙཱ་བ་རིན་ཆེན་རྣམ་རྒྱལ། ས་བཟང་པཎ་ཆེན། སྒྲ་གསན། བོ་དོང་ཕྱོགས་ལས་རྣམ་རྒྱལ། སྤྱི་བོ་ལྷས་པའི་མཁན་པོ་རྣམས་ལའང་བཀའ་ཆོས་ཅི་རིགས་གསན། ས་སྐྱ། བཟང་ལྡན་སོགས་སུ་གྲྭ་ཕར་ཕྱིན། སྐོར་མཛད། རྩེ་ཆེན་དུ་ཉ་དབོན་ལ་ཕར་ཕྱིན་དང་། རེད་མདའ་བ་ལས་མཛོད་སོགས་གསན། སྐྱོར་མོ་དབུ་མ། ལུང་དུ་བཀའ་བཞི་པ་བློ་གསལ་ལ། མདོ་རྩ། ས་སྐྱར་རེད་མདའ་པར་མངོན་པ་ཀུན་བཏུས། ཚད་མ་རྣམ་འགྲེལ་གསན། ས་སྐྱར་རྣམ་འགྲེལ། མདོ་རྩ།
མངོན་པ་གོང་འོག་གཉིས་ཏེ་ཀ་ཆེན་བཞིའི་གྲྭ་སྐོར་མཛད། ལོ་ཙཱ་བ་ནམ་མཁའ་བཟང་པོ་ལས་སྙན་ངག །རེད་མདའ་བར་དབུ་ཚད་ཕར་ཕྱིན་སོགས་གསན། ཡར་ཀླུང་རྣམ་རྒྱལ་དུ་ཚོགས་ཆེན་མཁན་པོ་ཚུལ་རིན་པར་བསྙེན་པར་རྫོགས། གདན་ས་ཐེལ་དུ་སྤྱན་སྔ་རིན་པོ་ཆེ་གྲགས་བྱང་པ་ལས་ཆོས་དྲུག་སོགས་གསན། མོན་མཁར་བཀྲ་ཤིས་གདོང་དུ་རྒྱ་སྐད་བཅོ་ལྔའི་དབུ་དུས་གཅིག་བཙུགས་ནས་བཤད་པ་མཛད་པ་སོགས་འཆད་ཉན་མང་དུ་མཛད། སླར་གཙང་དུ་གོང་གསུམ་པ་ཆོས་དཔལ་བར་དུས་འཁོར། ཁྱུང་པོ་ལྷས་པ་ལ་འདུས་པ་སོགས་རྒྱུད་སྡེ་བཞིའི་དབང་ལུང་དཔག་ཏུ་མེད་པ། ཡོ་ག་པ་གྲགས་པ་རྒྱལ་མཚན་ལ་ཡོ་གའི་རྒྱ་གཞུང་མཐའ་ཀླས་པའི་ལུང་སོགས་གསན། དགུང་ལོ་སོ་དྲུག་པར་འཁོར་དག་པ་རྣམ་བརྒྱད་ཁྲིད་དེ་བྱ་བྲལ་བ་མཛད། སོ་དགུ་པར་ལྷོ་བྲག་ཕྱག་རྡོར་བ་ལས་ལམ་རིམ་སོགས་གསན། དྭགས་པོ་ལྷ་སྡིང་དུ་མནལ་ལམ་ན་འཕགས་པ་ཡབ་སྲས་ལྔ་དང་མཇལ། སློབ་དཔོན་སངས་རྒྱས་བསྐྱངས་ཀྱིས་བྱིན་གྱིས་བརླབས་ནས། འགྲེལ་པ་བུདྡྷ་པཱ་ལི་ཏར་བརྟེན་ཐལ་འགྱུར་པའི་ལྟ་བ་ཐུན་མོང་མ་ཡིན་པ་ཐུགས་ལ་འཁྲུངས། ས་མོ་གླང་ལོར་ལྷ་སར་སྨོན་ལམ་བཙུགས་ཤིང་དགེ་འདུན་ཁྲི་རྭ་ཅན་ལ་བསྙེན་བཀུར་མཛད། དེའི་དཔྱིད་ཀར་ལྷ་དང་བླ་མའི་ལུང་གིས་སྐབས་ཕྱེས་ནས་འབྲོག་དགེ་
ལྡན་རྣམ་པར་རྒྱལ་བའི་གླིང་བཏབ། གནས་ངེས་མེད་དུ་མདོ་ཕྱོགས་གཙོ་བོར་གྱུར་པའི་མཆོད་ཉན་བཤད་སྒྲུབ། ལམ་རིམ་རྣམ་གཉིས་ཀྱིས་གཙོས་པའི་ལེགས་བཤད་གསུང་རྩོམ་པོད་ཆེན། ༡༨ གསང་བདེ་འཇིགས་གསུམ་གྱི་བསྐྱེད་རྫོགས་ཀྱིས་མཚོན་ཉིན་ཞག་ཕྲུགས་རེའི་ཐུགས་དམ་ཉམས་བཞེས་སོགས་བསམ་གྱིས་མི་ཁྱབ། མཐར་དགུང་ལོ་རེ་གསུམ་པ་ས་ཕག་ཧོར་ཟླ་བཅུ་པའི་ཚེས་ལ་ངོ་མཚར་བའི་ལྟས་དང་བཅས་གཟུགས་སྐུའི་བཀོད་པ་བསྡུས། རང་གི་བླ་མ་གསུམ། སྔ་ཚར་བཞི། འཁོར་དག་པ་རྣམ་བརྒྱད། ཁྱད་པར་འཕགས་པའི་འཁོར་གསུམ། ནང་ཐུགས་ཀྱི་མཁས་གྲུབ་སྲས་གཅིག །སྲས་ཀྱི་ཐུ་བོ་གཉིས་རྒྱལ་ཚབ་འདུལ་འཛིན། ཕྲིན་ལས་ནམ་མཁའ་དང་མཉམ་པའི་སྲས་ཆེན་བཞི་འཇམ་དབྱངས་ཆོས་རྗེ། ཆོས་རྗེ་རྒྱལ་མཚན་བཟང་པོ། རྗེ་ཤེས་རབ་སེང་གེ །དགེ་འདུན་གྲུབ། སོགས་མཁས་ཤིང་གྲུབ་པའི་སློབ་མ་ནམ་མཁའི་སྐར་ཚོགས་ཙམ་བྱོན།། ༈ །།རྟོགས་ལྡན་འཇམ་དཔལ་རྒྱ་མཚོ་ནི། ཙོང་ཁའི་ཡུལ་དུ་འཁྲུངས། དབུས་སུ་བྱོན་ནས་ཚད་མ་སོགས་ལ་ལེགས་པར་སྦྱངས་ཤིང་ཕྱིས་རྗེའི་ཕྱག་ཕྱི་མཛད་ནས་སྒྲུབ་པ་སྙིང་པོར་དྲིལ། རྗེས་འཇམ་དཔལ་དཔའ་གཅིག་གིས་རྗེས་གནང་མཛད་ནས་མཁས་གྲུབ་པས་ཞལ་གཟིགས་ཏེ་མི་དང་མི་ལབས་པ་བཞིན་དུ་གྱུར། དགུང་ལོ་དོན་གསུམ་པར་གཤེགས།། ༈ །།རྒྱལ་ཚབ་དར་མ་རིན་ཆེན་ནི་
རབ་བྱུང་དྲུག་པའི་ཤིང་འབྲུག་བུ་སྟོན་གཤེགས་ལོ་དེར་སྐུ་བལྟམས། གཙང་སྟོད་དུ། གནས་རྙིང་མཁན་པོ་རིན་ཆེན་རྒྱལ་མཚན་ལས་རབ་ཏུ་བྱུང་། གངས་ཅན་ཀུན་དགའ་དཔལ། བཀའ་བཞི་པ་རིན་ཆེན་རྡོ་རྗེ། རྗེ་བཙུན་རེ་མདའ་བ་སོགས་བསྟེན་ནས་ཤིན་ཏུ་བརྩོན་པས་ལུང་རིགས་སྨྲ་བའི་མཁས་པ་ཆེན་པོར་གྱུར། ས་སྐྱ། གསང་ཕུ་རྩེ་ཐང་སོགས་སུ་གྲྭ་སྐོར་གནང་བས་མཁས་པའི་ཡང་རྩེར་སོན། རྗེ་རིན་པོ་ཆེ་དང་གཉལ་རྭ་གྲོང་དུ་མཇལ་བས་ཁེངས་པའི་རི་བོ་བསྙིལ་ནས་ཞལ་སློབ་ཏུ་གྱུར། རྗེ་གཤེགས་པའི་མཇུག་དེ་ཀར་འདུལ་འཛིན་རིན་པོ་ཆེས་ཐོག་དྲངས་རྒྱལ་ཚབ་ཏུ་དབང་བསྐུར། ཕྱིས་དབེན་གནས་རྒྱལ་ཁང་རྩེར་ཐུགས་དམ་ལ་བཞུགས། ཚད་མ། ཕར་ཕྱིན། དབུ་མ་སོགས་པོད་ཆེན་ཤིན་ཏུ་མང་པོའི་འགྲེལ་པ་མཛད། རེ་དགུ་པར་ཆུ་བྱི་ཧོར་ཟླ་ལྔ་པའི་ཚེས་བརྒྱད་ལ་པོ་ཏ་ལར་གཤེགས་སོ།། ༈ །།འདུལ་འཛིན་གྲགས་རྒྱན་པ་ནི། དབུར་སྟོད་དུ་ཤིང་སྟག་ལོར་འཁྲུངས། དང་པོ་འབྲི་གུང་པའི་ཆོས་གསན། དེ་ནས་བྲག་ཚབ་ཏུ་འདུལ་བ་དང་། བུ་སྟོན་ནས་བརྒྱུད་པའི་སྔགས་ཕྱོགས་སྐོར་གསན། ཕྱིས་རྗེ་ཐམས་ཅད་མཁྱེན་པའི་ཐུགས་སྲས་ཀྱི་ཐུ་བོར་གྱུར། བཙུན་མོ་ཚལ་གྱི་དགོན་པ་བཏབ། ལེགས་བཤད་ཀྱང་པུསྟི་གསུམ་ཙམ་བཞུགས། རེ་གཅིག་པར་གཤེགས་སོ།། ༈ །།མཁས་གྲུབ་རྗེ་ནི། གཙང་སྟོད་མདོག་
གཞུང་དུ་ཡབ་བཀྲ་ཤིས་དཔལ་བཟང་དང་། ཡུམ་བུ་འགྲེ་མའི་སྲས་སུ་ཤིང་གླང་ལོར་འཁྲུངས། ལམ་འབྲས་པ་ཡེ་ཤེས་དཔལ་བ། ཀུན་དགའ་རྒྱལ་མཚན་པ། རེད་མདའ་བ་རྣམས་ལས་མདོ་རྒྱུད་མཐའ་དག་སྤངས་པའི་ཕ་རོལ་ཏུ་སོན། བཅུ་བདུན་པར་བོ་དོང་ཕྱོགས་ལས་རྣམ་རྒྱལ་ལུང་རིག་གིས་བཏུལ། རེད་མདའ་བར་བསྙེན་རྫོགས་གསན། སེ་ར་ཆོས་སྡིངས་སུ་རྗེ་དང་མཇལ་ཞིང་གསུང་གི་བདུད་རྩིས་ཐུགས་རྒྱུད་གཏམས། དེ་ནས་ཉང་སྟོད་ལྕང་རའི་གདན་ས་མཛད། ཆོས་རྒྱལ་རབ་བརྟན་ཀུན་བཟང་འཕགས་དང་མཆོད་ཡོན་འབྲེལ་ནས་དཔལ་འཁོར་བདེ་ཆེན་གྱི་ཆོས་སྡེ་བཏབ། རྗེརིན་པོ་ཆེའི་གདན་ས་གསུམ་པ་མཛད། འཆད་རྩོད་རྩོམ་གསུམ་ལ་འཇིགས་པ་མེད་པའི་སེང་གེའི་སྒྲ་ཆེན་པོ་བསྒྲགས། ང་བཞི་པར་ས་རྟ་ཟླ་བ་དང་པོའི་ཚེས་༢༡ལ་སྐུ་གཤེགས་སོ། །འོན་ཀྱང་རོང་སྐྱེས་ཤཱཀྱ་ཡི། །བསྟན་ལ་སྡང་བའི་ཡིད་ལྡན་ཞིང་། །གཤེན་རབ་གཞུང་ལུགས་རྒྱལ་མཚན་འཛིན། །བྱིས་པ་མཁས་པར་རློམས་པ་གང་། ཞེས་གསུངས།། ༈ །།བ་སོ་ཆོས་རྒྱན་ནི། མཁས་གྲུབ་རྗེའི་གཅུང་དུ་ཆུ་རྟ་ལོར་འཁྲུངས། རྗེ་ཡབ་སྲས་ཀྱི་ཞབས་པད་བསྟེན། དང་པོར་གསང་ཕུར་ར་བ་སྨད་པའི་འཆད་ཉན་མཛད་པ་ཐུགས་ཀྱིས་བོར་ནས། ལྷན་པ་སོར་གདམས་པ་ཐུགས་ཉམས་སུ་བསྟར་བས་བདེ་སྟོང་གི་ཏིང་འཛིན་ཟབ་མོ་ཐུགས་ལ་
འཁྲུངས། ཕྱིས་དགའ་ལྡན་གྱི་གདན་ས་ལྔ་པའང་མཛད། དོན་གཉིས་པར་ཐེགས།། ༈ །།ལྷ་བཙུན་རིན་ཆེན་བློ་གྲོས་རྒྱལ་མཚན་ནི་འབྲོང་རྩེ་པའི་ཞོལ་ངོར་འཁྲུངས། མཁས་གྲུབ་རིན་པོ་ཆེ་ལས་གདམས་པ་བུམ་པ་གང་བྱོར་གསན། བདག་བས་གཞན་གཅེས་ཐུགས་ལ་འཁྲུངས། འབྲོང་རྩེ་བེ་བུམ་དུ་གྲགས་པ་དེའང་འདིས་མཛད་དོ།། ༈ །།ཀུན་བཟང་ཀློང་རྒྱུད་ལས། ཀུན་གཞི་ནི་འཁོར་འདས་ཀུན་གྱི་སྤྱི་གཞི་དབང་པོ་ཡུལ་ལ་མ་སད་པ་གཉིད་དུ་སོང་བའི་གནས་སྐབས་ལྟ་བུ་ཡིན་ལ། བདེ་གཤེགས་སྙིང་པོར་མི་བཞེད། སེམས་ཉིད་དང་། ཡེ་ཤེས་དང་། སེམས་ཅན་དང་། སངས་རྒྱས་གང་ཡང་མ་ཡིན་པ་ཀུན་གྱི་འཆར་གཞི་ལྟ་བུའོ། །རིག་པའི་ཡེ་ཤེས་ནི་ཀུན་གཞིའི་ཁམས་ལས་རྒྱུན་ཆགས་ཀྱི་ཆ་ནས་རྫས་འགལ་བ་མ་ཡིན་ཡང་། ངོ་བོ་གནས་འགྱུར་པ་སྟེ། གཉིད་དུ་སོང་བ་དང་། དེ་ལས་སད་པ་ལྟ་བུའོ། །སེམས་ནི་འཛིན་པ་དང་བཅས་ཤིང་ཡུལ་གྱི་བག་ཆགས་པ་ལྟར་མི་མངོན་པ་དང་འགྲོགས་ལ། སེམས་ཉིད་ནི། ངོ་བོ་སྤྲོས་བྲལ་རང་བཞིན་ཟང་ཐལ་རྣམ་པ་ཐམས་ཅད་པའི་ཤེས་རབ་ཡུལ་དང་བྱིང་རྒོད་ཀྱིས་བརྫི་བར་མི་ནུས་པས་མྱ་ངན་ལས་འདས་པའི་རྟེན་འབྱུང་ཐམས་ཅད་རྫོགས་པའོ། །འཁོར་འདས་ཐམས་ཅད་ཀྱི་སྣོད་དམ་གཞིར་གྱུར་པས་ཀུན་གཞི། གོ་འབྱེད་པའི་ཆ་ནས་ཀུན་གཞིའི་རྣམ་ཤེས། དེ་ཁ་ཕྱིར་
བལྟས་ཏེ་ཡུལ་ལ་སད་པའི་ཆ་ནས་སྒོ་ལྔ། རང་ས་ནས་ཉོན་མོངས་ཉེ་བར་ལེན་པའི་ཆ་ནས་ཉོན་ཡིད། སྣ་ཚོགས་སུ་འབྱེད་པའི་ཆ་ནས་ཡིད་ཤེས་ཏེ། རྣམ་པར་ཤེས་པའི་ཚོགས་བརྒྱད་ཅེས་བྱའོ། །ལོངས་སྤྱོད་རྫོགས་སྐུའི་འཆར་གཞི་ནི་ཆོས་སྐུའི་རྩལ་སྣང་སྟེ། འབྲས་བུའི་ལོངས་སྐུ་ལས་བྱད་དང་མེ་ལོང་གི་ཚུལ་བཞིན་སྟོན་པ་རྡོ་རྗེ་འཆང་གི་ཐུགས་རྗེ་ལས་རང་བཞིན་དུ་སྤྲུལ་པ་མངོན་པར་དགའ་བ་སོགས་ལྔའོ། །ཁམས་བདེ་གཤེགས་སྙིང་པོའི་ཁྱབ་བྱེད་རང་གི་སྙིང་ག་ན་གཞི་སྣང་བ་ཆེན་པོའི་འོད་གསལ་ཡེ་ཤེས་ལྔའི་རང་བཞིན་ལྷུན་གྲུབ་ཆེན་པོའི་འཆར་གཞིར་བཞུགས་པ་ལས་བར་དོའི་ལམ་སྣང་དུ་རིག་པ་ཚད་ཕེབས་ཀྱི་མཚན་དཔེ་འགོད་ཅིང་གདུལ་བྱའི་དོན་ཀྱང་རྨི་ལམ་ལྟར་བྱེད། འདི་ནས་ཤར་གྱི་ཕྱོགས་རོལ་ན༔ ཞེས་སོགས་སྐུ་གསུམ་གྱི་ཞིང་ལ་སྦྱོར་ཚུལ་གྱི་གནད་འདིར་དྲན་ནོ། །ཀུན་བཟང་དགོངས་ཉམས་ལས། དེ་ཡང་འདུ་བྱེད་བློ་ཡི་འཚོལ་འཕྲོ་དང་༔ བཏགས་བཞག་ཆེད་འཛིན་མཐའ་དག་སྤང་བྱས་ནས༔ ཐད་ཀའི་ཤེས་པ་རྩིས་མེད་རང་ཡན་འདི༔ བཅས་བཅོས་འཕྲི་བསྣན་སྤངས་ལ་རང་སོར་ཞོག༔ དེ་ཚེ་མཚན མའི་རྣམ་རྟོག་ཅི་ཤར་ཡང་༔ གང་ཤར་མི་བལྟ་ཤར་མཁན་ངོས་བཟུང་ལ༔ སྤང་ལ་བེ་ཕུར་བཏབ་པ་ཇི་བཞིན་དུ༔ ཤེས་རིག་རང་ཚོ་བཟུང་པ་གནད་དུ་ཟབ༔ ཅེས་གསུངས།། ༈ །།གནད་གསུམ་ཤན་
འབྱེད་ལས༔ ཀུན་གཞི་འཁོར་འདས་ཀུན་གྱི་གཞི་ཡིན་ཏེ༔ རྙོགས་མ་ཅན་གྱི་ཆུ་དང་ཁྱད་པར་མེད༔ བག་ལ་ཉལ་གྱི་གཏི་མུག་མགོ་རྨོངས་ནས༔ ཡེ་ཤེས་རིག་པའི་དྭངས་ཆ་ལྐོག་ཏུ་གྱུར༔ ཆོས་སྐུ་རྙོགས་མ་དྭངས་པའི་ཆུ་དང་འདྲ༔ གློ་བུར་དྲི་མ་སྤངས་པའི་བདག་ཉིད་ཅན༔ རྣམ་གྲོལ་ཡོན་ཏན་ཀུན་གྱི་ངོ་བོ་སྟེ༔ ཕྱིན་ཆད་འཁྲུལ་མི་ཤེས་པའི་ཡེ་ཤེས་ཡིན༔ ཞེས་སོ། །སེམས་དང་རིག་པ་རླུང་དང་འཚནམ་མཁའ་འདྲ༔ སེམས་ནི་དམིགས་གཏད་གྱ་གྱུའི་རྣམ་པ་ཅན༔ ཝལ་ལེར་འཁྱིལ་བ་བླུད་བུ་དགང་བའམ༔ ཡར་ལུད་འཕྱོ་བ་འཐོར་རླུང་ལྟ་བུ་སྟེ༔ བྱུང་ཚོར་སྣ་ཚོགས་རྐྱེན་གྱི་རྟེན་གཞི་ཅན༔ རིག་པ་རྟེན་དང་བྲལ་ཞིང་ཀུན་ལ་ཁྱབ༔ སྟོང་ལ་གོ་འབྱེད་ནམ་མཁའི་དབྱིངས་ལྟ་བུ༔ གསལ་ལ་རྟོག་མེད་དྭངས་ཤེལ་གཙང་མ་འདྲ༔ དེ་ཕྱིར་སེམས་ལས་རྣམ་གྲོལ་རིག་པའི་ཀློང་༔ གནས་ལུགས་བཙན་ས་འཛིན་པ་སྙིང་ཏིག་གནད༔ ཅེས་དང་། ཞི་གནས་དབང་པོ་མེད་པའི་མི་དང་འདྲ༔ ལྷང་ངེ་ཐོམ་མེ་བུན་ནེ་ཡོ་རེ་བ༔ ཤེས་པ་མདུང་ཚུགས་དྲན་པ་དམིགས་གཏད་ཅན༔ ལྷག་མཐོང་སྒོ་ལྔ་ཚང་བའི་སྐྱེས་བུ་འདྲ རང་བཞིན་ཤེས་ཤིང་ངོ་བོའི་ཆོས་ཉིད་མཐོང་༔ ཧ་ཅང་དཔྱད་དྲགས་ཡུལ་སོགས་བློ་ཡིས་བགྲོད༔ ཅེས་སོ།། ༈ །།ཡེ་ཤེས་བླ་མ་ལས། དད་པ་དང་ལྡན་པ་སྙིང་ཏིག་གི་གདུལ་བྱ་ཡིན་ཡང་རྣམ་ཤེས་ལྐོག་ཏུ་
གྱུར་པའི་རིགས་ཅན་ལ། ངོ་སྤྲོད་སྦས་པ་ལས། སྣང་བ་སེམས་སུ་ངོ་སྤྲད་ཚུལ་སོགས་གསུངས་པ་ནི། སྣང་བ་སེམས་ཀྱིས་བཟོས་པར་ངོ་སྤྲད་པས་བདེན་འཛིན་རང་རྒྱུད་པ་བཟློག །དེ་ལྟར་བཟོ་བྱེད་ཀྱི་སེམས་སྟོང་པར་ངོ་སྤྲད་པས་ཕྱི་ཡུལ་དོན་དུ་ཞེན་པ་སྤང་། སྟོང་པ་རིག་པར་ངོ་སྤྲད་པས་ཆོས་ཉིད་ཆད་ལྟར་མི་གོལ་བའི་གནད་ཙམ་ལ་ཁ་དྲངས་ཏེ་ཁྲིད་པའོ། །ཞེས་གསུངས། དེ་ནི་སྙིང་ཏིག་རང་རྐང་གི་དགོངས་པ་མཐར་ཐུག་པ་མ་ཡིན་ཏེ། རང་ཤར་ལས། སྣང་བ་སེམས་ཀྱི་རྣལ་འབྱོར་ནི། །ཐམས་ཅད་ང་ཡི་སེམས་ལས་བྱུང་། །སེམས་ཉིད་རྟོགས་ན་ཅི་བྱར་ཡོད། །དེ་སྐད་ཀུན་ཏུ་རྗོད་བྱེད་པ། །ང་གྲོལ་བར་མ་བཤད་དོ། །ཞེས་དང་། དེའི་འཐད་པའང་། སེམས་མེད་པའི་གནས་སྐབས་ལྔ་ཡི་དུས་ནའང་། སྣང་བ་གང་དུའང་མ་སོང་ཞིང་། རྨི་ལམ་གྱི་སྣང་བ་སད་ནས་ཅིའང་མེད་པ་ལྟར། དྲན་བསམ་དང་སྣང་བ་དཀར་དམར་གློ་བུར་གྱི་རྐྱེན་ལས་བྱུང་བའི་ཕྱིར་རོ། །འཇོག་སོ་དངོས་ནི། ད་ལྟའི་རིག་པ་སྐད་ཅིག་མ་བཅས་བཅོས་སྤྲོ་བསྡུ་དང་བྲལ་བ་བསམ་གྱིས་མི་ཁྱབ་པའི་སྤྱོད་ཡུལ་ཅན་གང་ཡིན་པའོ། །དེའི་ངང་ལས་ཚོགས་དྲུག་གི་སྣང་བ་ལ་མཚོན་ན། རི་ཤར་བའི་སྐད་ཅིག་མ་དང་པོར་རིའོ་སྙམ་པ་ནི་སོ་སྐྱེའི་དབང་ལམ་མི་སྐྱེ་བའི་དབང་མེད་ཀྱང་། སྐད་ཅིག་མ་གཉིས་པར་རིའི་རང་བཞིན་ལ་དཔྱོད་པའི་སེམས་བྱུང་
གི་རྩལ་རྫོགས་པས་རིའི་རྣམ་རྟོག་རང་ཡལ་རྗེས་མེད་དུ་སོང་ནས། དེའི་ཚེ་རིའི་སྣང་ཆ་མ་འགགས་ཀྱང་དེར་འཛིན་མེད་པའི་ཆོས་ཉིད་ལ་གོམས་པར་གྱུར་པ་ལ་ཤར་གྲོལ་དུས་མཉམ་དུ་དག་ནས་སྣང་སེམས་འདྲེས་པ་རང་བཞིན་རྫོགས་པ་ཆེན་པོའི་ལམ་མ་ནོར་བ་སྟེ། རིག་འཛིན་དགའ་རབ་རྡོ་རྗེས། ཤར་བའི་དུས་ན། སོགས། ཆོས་ཉིད་བར་དོར་གྲོལ་བར་བྱེད་པའི་གནད། རིག་པ་སྟོང་ཉིད་ཟང་ཐལ་བསམ་བརྗོད་ལས་འདས་པ་དེ་ཀ་དག་གི་རང་ངོར་འདུག་པས་མཐར་ཐུག་གི་གྲོལ་བ་ཅེར་མཐོང་ཡིན་པ་རང་ཐོག་ཏུ་རང་ངོ་ཤེས་དགོས། ཡིན་ཐོག་ཏུ་ཐག་ཆོད་དགོས། གྲོལ་ཐོག་ཏུ་གདེངས་འཆའ་དགོས། རང་བཞིན་གྱི་སྣང་བ་ལ་ཕར་བལྟས་ན་མཐའ་ཡས་ཀྱང་། ཚུར་བལྟས་ན་གཅིག་ཀྱང་མེད་པས། མེད་དོ་སྙམ་པའི་འཛིན་པ་ཡང་རང་གོལ་བའི་སྐད་ཅིག་མ་རྗེན་པའི་རང་ངོ་རྟོག་དཔྱོད་མེད་པ་ནི་གདོད་མའི་གྲོལ་ས་ལ་སྤར་གྱིས་བཏབ་པའི་གནད། ཐུགས་རྗེ་ཡུལ་ལ་ཇི་ལྟར་འཇུག་ཀྱང་དེ་ཉིད་ཀྱི་རྗེས་མི་བཅད། ནང་དུ་མི་དགག །ཤར་ས་དེར་ཅོག་གེར་བཞག་པས། ཕྱི་ནང་བར་མེད་ཀྱི་ཤེས་པ་ཟང་ཐལ་ལེ་བས་བར་དོའི་སྣང་བ་རིག་གདངས་སུ་རང་དག་ནས་གྲོལ་བ་ཅེར་མཐོང་དུ་ངོ་ཤེས་པའི་གནད་སྙིང་གི་ཞུན་ཐིག་སྟེ། ཞེས་གསུངས། ཟབ།། ༈ །།གནས་ལུགས་རྡོ་རྗེའི་ཚིག་རྐང་ལས། བཟང་རྟོག་ངན་རྟོག་ལུང་མ་
བསྟན༔ གང་གི་ཕྱོགས་སུའང་མི་ལྷུང་ཞིང་༔ ཤར་གྲོལ་དབྱེ་བའི་མཁན་པོ་མེདཿ ཤེས་རིག་རང་ཚུགས་མ་ཤོར་ན༔ འདི་ལས་ལྷག་པ་གཞན་མི་དགོས༔ ཞེས་གསུངས།། ༈ །།ཀུན་མཁྱེན་ཞལ་ལུང་ལས། ངོ་བོ་ལ་བཟང་ངན་འཕེལ་འགྲིབ་བྲལ་ཐོབ་མེད་ཀྱང་། རྩལ་གྱི་རྣམ་རྟོག་ཁོ་ནས་འཁོར་འདས་བར་ལག་འབྱེད་ཅིང་སྒོམ་ཆེན་བསླུ་བས་དེའི་རང་བཞིན་ཞིབ་ཏུ་བསྙད་པ་ལ་དེ་ཡང་རིམ་སྐྱེས་པའི་དབང་དུ་བྱས་ན། རྣམ་རྟོག་ལ་གྲོལ་ལུགས་གསུམ་དུ་པཎ་ཆེན་བི་མ་ལའི་རྗེས་འབྲངས་རྣམས་བཞེད་པའི། འདི་ལྟར་རྣམ་རྟོག་ངོ་ཤེས་པས་གྲོལ་བ་སྔར་འདྲིས་ཀྱི་མི་དང་འཕྲད་པ་ལྟ་བུར་གྲོལ་བ། རྣམ་རྟོག་ཁོ་རང་གྲོལ་ན་སྦྲུལ་གྱི་མདུད་པ་ཞིག་པ་ལྟར་གྲོལ་བ། རྣམ་རྟོག་ཕན་མེད་གནོད་མེད་ཆོས་སྐུར་གྲོལ་བ་ཞེས་མཚོན་དཔེ་རྣམ་གྲངས་གསུམ་གྱིས་བཤད་པའི་དང་པོ་ནི། ཤེས་པ་གསལ་སྟོང་རྩེ་གཅིག་ཏུ་གནས་དུས་དེའི་ངང་ལས་རྣམ་རྟོག་ཐོལ་གྱིས་འཆར་བ་རིག་པ་སྟེ་གཟུགས་མེད་ཀྱི་ལྷ་དང་རྗེས་མཐུན་པའི་མཉམ་བཞག་དང་པོ་སྐྱེ་དུས་ནས་ཡོད་ཅིང་། དེ་ལ་བལྟ་བྱའི་རྣམ་རྟོག་དང་། ལྟ་མཁན་གྱི་དྲན་པ་གཉིས་སུ་ཡོད་པས་གཉིས་འཛིན་ནི་འཁོར་བའི་རྩ་བ་སྡུག་བསྔལ་གྱི་འབྱུང་ཁུངས་ས་ལམ་གྱི་བཀག་སོ་ཡིན་ཕྱིར་གནས་ཀྱང་ངོ་ཤེས་འགྱུས་ཀྱང་ངོ་ཤེས་པ་འདི་རྟོགས་པ་ཀློང་དུ་གྱུར་པའི་ཚེ་ནོར་ས་རྔམས་པོ་ཆེ་ཡིན་ནོ། །ཞེས་དང་།
གཉིས་པ་ནི། དེ་ལ་ཞེན་པ་མེད་པར་བསྐྱང་ཤེས་ན་བལྟ་བྱ་དང་ལྟ་བྱེད་ཀྱི་འཛིན་སྟངས་ཞིག་ནས་མཉམ་བཞག་རྩེ་གཅིག་པས། བལྟ་མ་དགོས་པར་རྣམ་རྟོག་ཁོ་རང་གིས་ཁོ་རང་ངོ་ཤེས་ནས་རང་གྲོལ་དུ་སོང་བ་སྦྲུལ་གྱི་མདུད་པ་ལྟར་གྲོལ་བའི་ཐ་སྙད་བཏགས་ཤིང་། ཆོས་སྐད་ཀྱི་དབང་དུ་བྱས་ན་ཐབས་ཀྱིས་ཟིན་པའི་རྗེས་ཐོབ་མཚན་ཉིད་པ་ཡིན་ལ། འདི་ལ་ཐེག་པ་གཞན་དག་ནས་རྩིས་ཅན་དུ་བྱེད་ཀྱང་། །རྫོགས་ཆེན་པས་ངོ་ཤེས་མཁན་གྱི་འདུ་ཤེས་དྲུང་པོ་དེ་ཀ་གོལ་སྒྲིབ་ཏུ་བཤད་ནས། གཉིས་སྣང་གི་ཤེས་པ་ཕྲ་མོ་ཡོད་པར་འདོད་ལ། དེ་ཕྱིར་གནས་ཀྱང་ངོ་ཤེས་འགྱུས་ཀྱང་ངོ་ཤེས་པ་འདི་ལ་རྟོགས་པ་ཀློང་དུ་གྱུར་པའི་རྣལ་འབྱོར་པས་དཔྱད་ན་རྣམ་འབྱེད་ཤིན་ཏུ་ཕྲ་བ་ཡོད་པས་འདི་ཡང་ཐེག་རྩེ་ཤིན་ཏུ་རྣལ་འབྱོར་གྱི་དགོངས་པ་མ་ཡིན་ནོ། །ཞེས་དང་། གྲོལ་ལུགས་གསུམ་པ་རྣམ་རྟོག་ཕན་གནོད་མེད་པར་གྲོལ་བ་ཁང་སྟོང་གི་རྐུན་མ་ལྟ་བུ་དེ་ཉིད་རྣལ་འབྱོར་དབང་ཕྱུག་གི་ལམ་ཡིན་ཏེ། འདི་ལྟར་ཁང་པ་སྟོང་པའི་ནང་དུ་རྐུན་པོ་ཞུགས་ཀྱང་ཆོམ་རྐུན་ལ་ཐོབ་རྒྱུ་མེད། ཁང་སྟོང་ལ་ཤོར་རྒྱུ་མེད་པས་ཕན་གནོད་ཐོབ་ཤོར་གྱི་རང་བཞིན་ལས་ཡེ་ནས་འདས་པ་ལྟར། འདིར་རིག་པའི་ངོ་བོ་ཟང་ཐལ་རྟོག་དཔྱོད་ཀྱི་ཤེས་སྒྲིབ་དང་བྲལ་བའི་ཚུགས་མ་ཤོར་བ་དེ་ཉིད་སྒོམ་གྱི་སྙིང་རྡོའམ། གཉུག་མའི་དྲན་རིག་ཡིན་ལ། རྩལ་
གྱི་རྣམ་རྟོག་ཇི་ལྟར་གཡོ་ཡང་དཔྱོད་བྱེད་ཀྱི་འདུ་ཤེས་དག་པས་ཤར་ས་ཤར་མཁན་མེད་པའི་རིག་སྟོང་རྗེན་པ་བློ་འདས་རྒྱ་ཡན་གྱི་ངང་དུ་ཆོས་སྐུ་འཕོ་མེད་རྒྱལ་པོའི་བཙན་ས་ཟིན་པའི་ཕྱིར་རྣམ་རྟོག་གིས་ཕན་གནོད་མ་བྱས་པའི་སྒྲ་བཤད་བཞག །ཅེས་གསུངས། གོལ་ཤོལ་ཚར་གཅོད་ལས། ཐ་མལ་གྱི་ཤེས་པ་ད་ལྟའི་ཤེས་པ་སྐྱོན་ཡོན་གང་གིས་ཀྱང་མ་བསླད་པའི་རང་བབས་འདི་ཀ་རིག་པའི་རྒྱུན་སྐྱོང་བ་ལ་ཟེར་བ་མ་གོ་བར། འཇིག་རྟེན་ཐ་མལ་པའི་རྣམ་རྟོག་རང་རྒྱུད་པར་ངོས་འཛིན་པ་ནོར། ཞེས་དང་། ད་ལྟར་གྱི་ཤེས་པ་གྲ་མ་ཉམས་ཤིང་ཟུར་མ་ཆག་པ་འདི་ཀ་ལ་སྒོམ་མཁན་གྱི་གཉེན་པོ་དང་། ལྟ་བའི་ཞེན་པས་མ་བཅིངས་པ་ཟང་ཐལ་ཁ་ཡན་དུ་ལམ་དུ་འཁྱེར། ཞེས་དང་། སྒོམ་མེད་ནི། གནས་ལུགས་ལྷུམས་སུ་ཞུགས་ནས་སྒོམ་མི་སྒོམ་གྱི་ཞེན་པ་དག་སྟེ་སེམས་ལ་བཟོ་བཅོས་དང་དམིགས་གཏད་གང་ཡང་མེད་པ་ཁྱབ་གདལ་གྱི་དྲན་པའི་མཁར་ཚུགས་པ་ལ་གཟེར་གྱི་བློས་བཏང་བའི་བཏང་སྙོམས་ཐ་མལ་དུ་སྡོད་པའམ། ཅི་ཡིན་འདི་ཡིན་མེད་པའི་ལུང་མ་བསྟན་དུ་རྒྱ་འབྱམས་ན་ནོར། ཞེས་དང་། གང་ཤར་སྐྱོང་ཟེར་བ་དེ། གང་ཤར་གྱི་རྣམ་རྟོག་དེ་ལ་ནེར་གྱིས་བལྟས་ནས་དགག་པའང་མ་ཡིན། དེ་ལ་བརྟག་གཞིག་བྱེད་པའང་མ་ཡིན། དེའི་རྗེས་སུ་འབྲང་བའང་མ་ཡིན་པར་རྣམ་རྟོག་ཤར་མཁན་ཁོ་རང་རིག་ཐོག་ཏུ་གློད་ནས་
གནས་འགྱུ་ཟང་ཐལ་དུ་སྐྱོང་བ་ལ་ཟེར་བ་མ་གོ་བར། གང་ཤར་རང་དགར་རྗེས་སུ་འབྲངས་ཤིང་རྟོག་དཔྱོད་བྱེད་ན་ནོར། ཞེས་དང་། བཟང་ངན་གྱི་རྣམ་རྟོག་གང་ཤར་ཡང་རྣམ་རྟོག་གོ་སྙམ་པའི་ཅེར་འཛིན་གྱི་ལྷན་པ་འདེབས་པ་དང་། སྤང་བྱའི་སྟེང་དུ་གཉེན་པོའི་མེ་བཙའ་རྒྱགས་པ་སོགས་གང་ཡང་མི་བྱེད་པར་མི་རྒན་གྱིས་བྱིས་པའི་རྩེད་མོ་ལ་བལྟ་བ་ལྟར་སྣང་མེད་སྤྲོས་བྲལ་གྱི་ངང་དུ་ཉིན་མཚན་བར་མེད་དུ་ལ་བཟློ་བར་བྱས་པས། ལྷག་མཐོང་རྟོག་མེད་ཀྱི་རྩལ་རྫོགས་ཏེ། གནས་འགྱུ་དྲན་རིག་བཟང་རྟོག་ངན་རྟོག་ཇི་ལྟ་བུ་འཆར་ཡང་། རིག་སྟོང་བློ་འདས་རྫོགས་པ་ཆེན་པོའི་ངང་དུ་བཙན་ས་ཟིན། ཞེས་གསུངས། མདོར་ན་མ་བཅོས་པའི་ངང་དང་མ་བྲལ་བ་ལས་གཞན་ཅི་ཡང་དགོས་རེ་ཀན། གནས་ལུགས་ཅེར་མཐོང་གི་དོན། རྫོགས་པ་ཆེན་པོའི་དོན་གྱི་འཇོག་སོ་ནི། མ་བཅོས་པའི་རིག་པ་རྗེན་པ་འདི་ཀ་ཡིན། དེ་ཉིད་རྟག་ཏུ་མ་བརྗེད་ཙམ་པའི་དྲན་པས་སྐྱོང་བ་ལ་སྒོམ་ཟེར་བ་ཡིན། ཧ་ཅང་འཇུར་དྲན་མ་ཡིན་པའི་ངང་ནས་རང་ངོ་ཤེས་ཙམ་དུ་མ་བརྗེད་པར་བསྐྱངས་པས། གཟོད་དོན་དམ་སྤྲོས་བྲལ་གྱི་བདེན་པ་དཔེ་དང་ཐ་སྙད་ལས་འདས་པ་ཞིག་འཆར། ལས་དང་པོ་པའི་དུས་རྣམ་རྟོག་ནག་པོ་ཁ་འབྱམས་ཀྱིས་དྲན་པ་ཡེངས་སུ་བཅུག་ནས། ནམ་ཞིག་དྲན་པས་སླེབ་ནས་ཡེངས་འདུག་སོགས་འགྱོད་པ་ཤར་
ན། རྣམ་རྟོག་སྔ་མའི་རྗེས་གཅོད་དང་འགྱོད་པ་སོགས་མི་བྱ་བར། དྲན་པ་ཧྲིག་གེ་བ་དེ་ཀའི་སྟེང་དུ་རང་བབས་སུ་བཞག །དེ་ལ་རྒྱུན་རིང་བར་གོམས་པས་རྣམ་རྟོག་སྒོམ་ལ་ཤར་ནས་གནས་འགྱུ་མཉམ་གྲོལ་དུ་འགྲོ་བ་ཡིན། འདིའི་ཚེ་གྲོལ་ལུགས་གསུམ་འབྱུང་བའི་ཐ་མར་སླེབས་པས་སངས་རྒྱས་ཀྱི་བདེན་མཐོང་མོས་སྤྱོད་ལས་འཕགས་པ་ཡིན་ཀྱང་། ད་དུང་དག་པ་གསུམ་ལ་མ་སླེབ་པར་བྲལ་ཐོབ་དང་ལྡོག་པ་ལ་ཚེགས་མེད་པས་དབེན་པར་བསྒོམ་པ་ཁོ་ན་གལ་ཆེ། རིག་པ་རང་ངོས་ནས་ས་ལམ་གྱི་དོད་མེད་ཀྱང་། རྗེས་ཐོབ་རིག་པའི་རྩལ་རྫོགས་ཚུལ་ལ་ལྟོས་ནས་རྣལ་འབྱོར་བཞི་སོགས་སུ་མཆོག་གཟིགས་རྣམས་ཀྱིས་ཕྱེ་བའང་རིམ་གྱིས་བགྲོད་པ་ལ་དོན་དུ་གནས་པ་ཁོ་ནའོ།། ༈ །།ཤཱན་པུ་རི་ཕྱི་མཆོད་རྟེན་ལ་ནང་གཞལ་མེད་ཁང་རྒྱ་ཁྱོན་བསམ་ལས་འདས་པ། ཕྱི་རོལ་དུ་ཌཱ་ཀིའི་གྲོང་ཁྱེར་འབུམ་ཚོ་ཙམ་ཡོད་པ། གཞལ་ཡས་ཁང་དེའི་དབུས་ན་ཁྲི་འཕང་མཐོན་པོའི་སྟེང་། དཔའ་བོ་རིག་འཛིན་ཐོད་པའི་དུམ་བུ་ཞེས་པ་ན་ཚོད་བཅོ་ལྔ་པ་ཤངས་ཞུར་དཀར་པོ་ཡོད་པ། དར་དང་རིན་ཆེན་དང་དུར་ཁྲོད་ཀྱི་ཆས་ཀྱིས་བརྒྱན་པ། འཁོར་དུ་དཔའ་བོ་མཁའ་འགྲོ་དང་། རབ་བྱུང་དང་། བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ། ཐེག་པ་སྣ་ཚོགས་ཀྱི་ཆོས་འཁོར་བསྐོར་བ་ཞིག་གཟིགས། ཞེས་སོ། །རྣམ་ཐར་ངོ་
མཚར་གཏམ་བཅུ་ཆོས་རྗེ་ཀུན་བཟང་པས་མཛད་པར་སྣང་ངོ་།། ༈ །།རྗེ་བཙུན་ས་སྐྱ་པ་ཡབ་སྲས་ལ་དཔལ་རྡོ་རྗེ་ནག་པོ་ཆེན་པོ་གུར་གྱི་མགོན་པོའི་བརྒྱུད་པའི་བཀའ་མི་འདྲ་བ་བཞི་ཙམ་ཕྱག་ཏུ་བབས་པ་ཡིན་ཏེ། དེ་ཡང་ག་ཡ་དྷ་ར་ནས་བརྒྱུད་པའི་ལམ་འབྲས་པའི་མགོན་རྐྱང་དཔའ་བོ་གཅིག་པ་དང་། རྡོ་རྗེ་གདན་པ་དང་བ་རི་ལོ་ཙཱ་བ་ལས་བརྒྱུད་པའི་སྒྲུབ་ཐབས་བརྒྱ་རྩའི་ནང་ན་བཞུགས་པའི་གུར་གྱི་མགོན་པོ་དང་། པཎ་ཆེན་ཤཱཀྱ་ཤྲཱི་ནས་ས་པཎ་ལ་བརྒྱུད་པའི་སྤུ་གྲི་སྐོར་གསུམ་གྱི་གདམས་ངག་དང་། བྲམ་ཟེ་མཆོག་སྲེད་ནས་པཎ་ཆེན་བདེ་བའི་རྡོ་རྗེ་སོགས་ལ་རིམ་བཞིན་དུ་བརྒྱུད་པ་མལ་ལོ་ཙཱ་བ་ལས་གསན་པའི་སྐོར་དང་བཞི་ལས། དང་པོ་གསུམ་པོ་དེ་ལ་ནི་སྒྲུབ་ཐབས་རྗེས་གནང་མན་ངག་ཙམ་ལས་ཁྲིད་ལ་སོགས་པའི་རྣམ་གཞག་རྒྱ་ཆེར་མེད་ཅིང་། བཞི་པོ་དེའི་ནང་ནས་ཐུགས་རྩིས་དང་ཐུགས་དམ་གྱི་སྙིང་པོ་ནི་མལ་ལོ་ནས་བརྒྱུད་པ་འདི་ལ་མཛད་པ་ཡིན་ཅིང་། དེ་ལའང་བྱིན་རླབས་ཆུ་བོའི་རྒྱུན་དང་འདྲ་བའི་བཀའ་མ་ནུབ་པ། གདམས་ངག་གསེར་འགྱུར་གྱི་རྩི་དང་འདྲ་བའི་སརྒ་མ་ལོག་པ། མོས་གུས་གཞོན་ནུ་མའི་དགའ་བ་དང་འདྲ་བའི་བསམ་པ་ཚིམ་པ། བསྙེན་བཀུར་ལྷ་འདོད་ཡོན་ལ་ལོངས་སྤྱོད་པ་དང་འདྲ་བའི་དཔལ་འབྱོར་རྒྱུན་མི་ཆད་པ་སྟེ། སྙན་བརྒྱུད་བཞི་ལས། དང་པོ་ལ། དབང་བཀའ་མ་
ནུབ་པ་བཞི། བྱིན་རླབས་བཀའ་མ་ནུབ་པ་གཅིག །རྗེས་གནང་བཀའ་མ་ནུབ་པ་ཉི་ཤུ་ཙམ་ཡོད། གཉིས་པ་ལ། ཁྲོ་བཅུའི་རྗེས་གནང་སྔོན་དུ་སོང་ནས་ཕྱི་སྲུང་བའི་འཁོར་ལོ་ལ་བརྟེན་པ་ཕྱི་འཁྲིད་དང་།། དྲག་པོ་སྔགས་རྒོད་ནང་གི་བྲག་རྫོང་མ། སེམས་ཉིད་ཡེ་ཤེས་རྩལ་འདོན་གསང་བའི་བྲག་རྫོང་མ་སྟེ་གསུམ། ལྷ་བརྒྱད་ཟངས་གྲི་ཅན་དང་བཅས་པའི་རྗེས་གནང་སྔོན་དུ་སོང་ནས། གསང་བ་ཡང་གསང་སེམས་ཀྱི་གནད་ལ་བརྟེན་ནས་སྒྲུབ་པའི་ཁྲིད་ཕོག །དེའང་ཕྱི་ནང་གསང་གསུམ་གྱི་བྲག་རྫོང་མ་སྔོན་དུ་སོང་བ་དང་། ཕྱི་ཁྲིད་ཙམ་སྔོན་དུ་སོང་བ་དང་། བྲག་རྫོང་མའི་སྲུང་འཁོར་ཙམ་སྔོན་དུ་སོང་བ་དང་། མ་སོང་ཡང་བླ་མའི་རྣལ་འབྱོར་ཡན་ཆད་སྔོན་དུ་སོང་ནས་སྟོན་དུ་རུང་བར་བཞེད། འདི་རྣམས་ཀྱི་ཁུངས་ཀྱང་། མཁའ་འགྲོ་མ་རྡོ་རྗེ་གུར་གྱི་རྒྱུད་ལས། དེ་ནས་རྡོ་རྗེ་འཛིན་པ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ནག་པོ་ཆེན་པོ་འདི་ཉིད་རབ་ཏུ་ཕྱུང་ངོ་། །ཞེས་པས་དེ་སྤྱི་དོན་ལྟར་ན། རྡོ་རྗེ་འཛིན་པ་ནི་རྒྱུད་གསུངས་པའི་སྟོན་པ། དེའི་སྐུ་གསུང་ཐུགས་ལས་བསྟན་པ་སྤྱི་དང་། བྱེ་བྲག་རྒྱུད་འདི་གསུངས་པའི་ཕྱིར་ནག་པོ་ཆེན་པོ་ཞལ་ཕྱག་གི་རྣམ་པ་ཅན་འཇིགས་སུ་རུང་བ་སྤྲོས་ཏེ། ཕྱི་སྒྲུབ་ཐམས་ཅད་བསྟན་པ་ཡིན་ནོ། །སྦས་དོན་དུ་བཤད་ན། རྡོ་རྗེ་འཛིན་པ་ནི་ཁམས་དྲུག་ལྡན་གྱི་སྒྲུབ་པ་པོ་རང་ཉིད་དང་། རྩ་
རོ་རྐྱང་དབུ་གསུམ་རཀྟ་ཁུ་བ་ཁུ་ཁྲག་འདྲེས་པ་རླུང་ལྡང་འཇུག་གནས་གསུམ་དང་བཅས་པ་ནི་སྐུ་གསུང་ཐུགས་རྡོ་རྗེ། དེ་ལ་གནད་དུ་བསྣུན་པས་ཕྱི་ནང་གི་དྲེགས་པ་རྒྱུད་གསུམ་དབང་དུ་སྡུད་པར་བྱེད་པ་ནང་སྒྲུབ། མཐར་ཐུག་གི་དོན་དུ། རྡོ་རྗེ་འཛིན་པ་ནི་ཁམས་དྲུག་ལྡན་གྱི་སྒྲུབ་པ་པོ། །སེམས་གསལ་སྟོང་ཟུང་འཇུག་ནི་རྡོ་རྗེ་གསུམ། དེ་ལ་གནད་དུ་བསྣུན་ནས་སྒྲུབ་པ་ལ་གསང་སྒྲུབ་ཅེས་འཇོག་གོ ། དེའང་ཁའུ་པའི་ལུགས་གསང་ཁྲིད་ལ་ནང་ཁྲིད་ཀྱང་དོན་གྱིས་ཚང་བས་ལོགས་སུ་མི་མཛད།། ༈ །།བླ་མ་ལྔ་བཅུ་པ་ལས། རྟེན་ལ་ཕྱག་གསུམ་བྱས་ནས་ནི། །པུས་བཙུག་ཐལ་མོ་སྦྱར་བ་ཡིས། །ཉན་སོགས་འདོད་པས་གསོལ་གསུམ་གདབ། །གསང་བ་སྤྱི་རྒྱུད་ལས། །མཐོ་དམན་ཅན་དང་ཚེར་མ་ཅན། །གྱོ་དུམ་ཅན་དང་ངམ་གྲོག་ཅན། །རུས་པ་སྡོང་དུམ་ཁུང་བུ་ཅན། །གྲོག་མཁར་ཐལ་བ་ཚ་སྒོ་ཅན། །སོག་མ་བོང་བ་རྡུལ་དང་སྐུ། །སྲིན་བུ་གྲོག་སྤུར་ལ་སོགས་མང་། །དེ་ལྟ་བུ་ཡི་ས་གཞི་ནི། །མཁས་པས་ལས་རྣམས་ཀུན་ལ་སྤང་། ཞེས་དང་། །སྟོན་ཟླ་ར་བ་ནས་བརྩམས་ཏེ། །ཟླ་བ་གསུམ་གསུམ་ལྟོ་འཕྱེའི་མགོ །ཤར་དང་ལྷོ་དང་ནུབ་དང་བྱང་། །བལྟས་ཏེ་གཡོན་པའི་ཟུར་གྱིས་ཉལ། །པུས་མོ་ལྟེ་བ་རྐེད་མཚམས་སུ། །དངོས་གྲུབ་རྗེས་མཐུན་ལྟོ་ནས་བརྐོ། །ཞེས་སོ། །ཕུབ་མ་གསེག་མ་རྡོ་བ་དང་། །
ཤིང་བུ་ལ་སོགས་དོར་བར་བྱ། །ཞེས་སོ། །རྡོ་ལ་རླུང་། རུས་ལ་གཟེར། གྱོ་དུམ་ལ་སྐུགས་པ། ཕུབ་མ་དང་སོལ་བ་ཡོད་ན་རིམས་ནད། སྒྲ་དང་རྩ་ཤིང་སོགས་ཡོད་ན་ཉེར་འཚེ་ཕྲ་མོ་རྣམས་འབྱུང་བས་བསལ་ལོ། །རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངེས་བློ་ལ་རྡོ་རྗེ་སེམས་སོགས་ཀྱི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །ཅེས་དང་། གསང་བ་སྤྱི་རྒྱུད་ལས། །དེ་ཡི་ཚེ་ན་མཚན་མ་ནི། །དེ་རྩེ་ཐུར་ལ་བསྟན་པ་དང་། །རྩེ་མོ་གྱེན་དུ་བསྒྲེངས་གྱུར་ན། །དེ་ནི་དངོས་གྲུབ་མཆོག་ཅེས་བཤད། །དེ་བཞིན་ཐུར་དུ་བལྟས་ན་ནི། །དེ་ནི་དངོས་གྲུབ་འབྲིང་དུ་བཤད། །མཚམས་དང་བྱང་དུ་ཁ་བལྟས་ན། །འཇིག་རྟེན་པ་ཡི་དངོས་གྲུབ་ཐོབ། །སོ་ཤིང་དོར་བ་བརྒྱ་ཞིག་ལ། །གལ་ཏེ་ཐུར་དུ་ཁ་བལྟས་ན། །དེ་ནི་ངེས་པར་ས་འོག་གི །དངོས་གྲུབ་འགྲུབ་པར་ཐེ་ཚོམ་མེད། །ཅེས་སོ། །དཔལ་དུས་ཀྱི་འཁོར་ལོ་ལས། འགྲོ་བ་བགྲོད་པ་རྣམས་ཀྱི་བརྟུལ་ཞུགས་སྦྱིན་བྱ་དེ་དག་ནི། །འཚེ་དང་མི་བདེན་གཞན་གྱི་བུད་མེད་སྤང་བྱ་གཞན་གྱི་ནོར་དང་ཆང་གི་བཏུང་བ་དེ་བཞིན་ཉིད། །འཁོར་བར་རྡོ་རྗེའི་ཞགས་པ་དག་སྟེ་རང་གི་དགེ་བ་འཇོམས་བྱེད་སྡིག་པ་ལྔ་པོ་འདི་རྣམས་སོ། །གང་ཞིག་གང་གི་དུས་སུ་བྱུང་བ་ལྷ་དང་མི་ཡི་བླ་མ་དེ་ཡི་མཚན་གྱིས་རབ་སྦྱིན་བྱ། །སྣ་
ཚོགས་གཙོ་བོའི་བཀའ་འདིས་སྲིད་པའི་འཇིགས་པ་འཇོམས་པ་དག་སྟེ་ཁྱོད་ཀྱིས་ཀྱང་ནི་བསྐྱང་བར་བྱ། །ཚེ་ལོ་ཁ་ན་མ་ཐོ་བཅས་པའི་ཟས་དང་ཚིག་ངན་ཀློག་དང་འབྱུང་པོ་ལྷ་མིན་དབང་པོའི་ཆོས། །བ་ལང་བྱིས་པ་བུད་མེད་སྐྱེས་པ་རྣམས་དང་ལྷ་མིའི་བླ་མ་གསོད་པ་ལྔ་ནི་མི་བྱའོ། །གྲོགས་པོ་རྗེ་བོ་རྣམས་དང་ལྷ་དང་མི་ཡི་བླ་མ་དགེ་འདུན་ཡིད་བརྟན་རྣམས་ལ་འཁུ་བ་ཡང་། །དབང་པོ་རྣམས་ནི་ཀུན་ནས་ཆགས་པ་དག་སྟེ་དེ་ལྟར་སྲིད་པའི་བདག་པོའི་བརྟུལ་ཞུགས་ཉི་ཤུ་ལྔ། །ཞེས་དང་། སྲིད་པའི་འཇིགས་པ་འཇོམས་མཛད་པའི། །བརྟུལ་ཞུགས་ཉི་ཤུ་རྩ་ལྔ་པོ། །སྣ་ཚོགས་གཙོ་བོའི་གསུང་ཇི་བཞིན། །བདག་གིས་བརྟན་པོར་བཟུང་བར་བགྱི། །ཞེས་སོ། །ཡང་། ངེས་པར་རྡོ་རྗེའི་རིགས་དག་ལ་ནི་སྲོག་གཅོད་བྱ་སྟེ་རལ་གྲི་ལ་ཡང་བདེན་པ་མིན་པའི་ཚིག །རིན་ཆེན་ལ་ནི་གཞན་ནོར་འཕྲོག་བྱ་མཆོག་གི་པདྨའི་རིགས་ལ་ཡང་ནི་གཞན་གྱི་བུད་མེད་འཕྲོག །ཆང་དང་སྒྲོན་མ་སངས་རྒྱས་རྣམས་དང་བཟང་པོའི་ཡུལ་རྣམས་མཐའ་དག་འཁོར་ལོ་ལ་ནི་བསྟེན་པར་བྱ། །གཡུང་མོ་ལ་སོགས་མཐའ་དག་བུད་མེད་རྣམས་ནི་གྲི་གུག་ལ་ཡང་མཁའ་ཡི་པདྨར་སྨད་མི་བྱ། །སེམས་ཅན་དོན་གྱི་སླད་དུ་ནོར་དང་བཅས་པའི་ལུས་འདི་སྦྱིན་པར་བྱ་སྟེ་ཁྱོད་ཀྱིས་བསྲུང་མི་བྱ། །རིགས་ཀྱི་བུ་ཀྱེ་སངས་རྒྱས་ཉིད་དུ་འགྱུར་བ་གཞན་དུ་མཐའ་ཡས་བསྐལ་
པས་མིན་པར་རྒྱལ་བས་གསུངས། ཞེས་དང་། གལ་ཏེ་གཡོ་སྒྱུའི་དབང་གིས་རྩ་བའི་ལྟུང་བ་བྱུང་ན་དམྱལ་བར་འགྲོ་སྟེ་འདི་དག་སྡུག་བསྔལ་ལོ། །ཞེས་དང་། དཔལ་ལྡན་བླ་མའི་ཐུགས་དཀྲུགས་པ་ལས་བུ་རྣམས་རྩ་བའི་ལྟུང་བ་རི་བོང་འཛིན་པར་འགྱུར། །དེ་ཡི་བཀའ་ལ་འགོངས་པས་གཞན་དུ་འགྱུར་ཏེ་ངེས་པར་དེ་བཞིན་སྤུན་ལ་ཁྲོས་པས་གསུམ་པའོ། །བྱམས་པ་བཏང་བས་བཞི་པར་འགྱུར་ཏེ་བྱང་ཆུབ་སེམས་ནི་རབ་ཏུ་ཉམས་པ་ལས་ཀྱང་མདའ་རུ་འགྱུར། །དྲུག་པ་གྲུབ་པའི་མཐའ་ལ་སྨོད་པ་རི་བོང་དག་ཀྱང་མ་སྨིན་མི་ལ་གསང་བ་བྱིན་ལས་སོ། །ཕུང་པོ་ཉོན་མོངས་པ་ལས་ཀླུ་རུ་འགྱུར་ཏེ་སླར་ཡང་དགུ་པ་དག་པའི་ཆོས་ལ་མ་དད་གང་། །སྒྱུ་ཡི་བྱམས་པ་དང་ནི་མིང་སོགས་བྲལ་ན་བདེ་བ་སྟེར་ལ་རྟོག་པ་ཕྱོགས་དང་དྲག་པོའོ། །དག་པའི་སེམས་ཅན་དག་ལ་སྐྱོན་བརྗོད་པ་ལས་ཉི་མ་དམ་ཚིག་གཏོང་བ་ལས་ཀྱང་གཞན། །བུད་མེད་ཐམས་ཅད་ལ་སྨོད་ངེས་པར་མ་ནུར་འགྱུར་ཏེ་རྡོ་རྗེ་ཐེག་པར་གནས་པ་རྣམས་ལའོ། །ཞེས་པས་སོ། །དངོས་པོ་མེད་ལ་བསྒོམ་པ་མེད། །སྒོམ་པ་བསྒོམ་པ་ཉིད་མ་ཡིན། །དེ་ལྟར་དངོས་པོ་དངོས་མེད་པས། བསྒོམ་པ་དམིགས་སུ་མེད་པའོ། །ཞེས་དང་། །དེ་བཞིན་སེམས་ཀྱི་འོད་གསལ་རྟོག་པ་ཡི། །སྒོམ་པའི་ཐབས་རྣམས་བདག་གིས་མི་མཐོང་སྟེ། །འདི་ཉིད་དུ་ནི་རྐྱང་མ་དག་དང་ནི། །རོ་མ་
གཅིག་ཏུ་སྦྱོར་བས་མཐོང་བར་འགྱུར། ཞེས་དང་། །ཡན་ལག་ཕྱག་རྒྱ་ཆེ་བསྒོམས་པས། །རྣམ་འབྱོར་ཆེན་པོ་ཀུན་མཁྱེན་ཉིད། །འགྱུར་མེད་བདེ་བའི་རང་བཞིན་བསྒྲུབ། །སྐྱེ་བ་འདི་ལ་སངས་རྒྱས་ཉིད། །ཅེས་སོ། །ཇི་སྐད་དུ། མཚལ་ཆེན་བདུད་རྩི་ལྔ་དང་བཅས། །དུར་ཁྲོད་རས་ལ་བྱུགས་ནས་ནི། །བསྡུས་པའི་ཕྱེ་མ་ཆ་གཅིག་དང་། །བྱི་ལ་ནག་པོའི་བཤང་བ་ནི། །དེ་མཉམ་ཆ་ནི་གཅིག་ཏུ་བྱ། །དེ་ནས་གུ་གུལ་ནག་པོ་སྦྱར། །དུར་ཁྲོད་སོལ་བ་བླངས་ནས་ནི། །མཆོད་ཡོན་སྣོད་དུ་བདུག་པ་སྦྱར། །ཞེས་སོ། །སློབ་དཔོན་སྨད་པར་མི་བྱ་ཞིང་། །བདེ་གཤེགས་བཀའ་ལས་འདའ་མི་བྱ། །རྡོ་རྗེ་སྤུན་ལ་སྨོད་མི་བྱ། །སེམས་ཅན་རྣམས་ལ་བྱམས་པ་དང་། །བྱང་ཆུབ་སེམས་ནི་དོར་མི་བྱ། །རང་གཞན་ཆོས་ལ་སྨོད་མི་བྱ། །སྐལ་མེད་དེ་ཉིད་བསྟེན་མི་བྱ། །བདག་ཉིད་ཕུང་པོ་སྨོད་མི་བྱ། །ཆོས་ཉིད་ལ་ནི་སུན་མི་དབྱུང་། །གདུག་ལ་བྱམས་པ་རྟག་ཏུ་སྤང་། །ཆོས་ལ་ཚད་བཟུང་མི་བྱའོ། །དད་ལྡན་སེམས་ཅན་བསླུ་མི་བྱ། །རྟག་ཏུ་དམ་ཚིག་བསྟེན་པར་བྱ། །བུད་མེད་ཉིད་ལའང་སྨོད་མི་བྱ། །ཞེས་དང་། དམ་ཚིག་དག་དང་མི་ལྡན་པའི། །རིག་མ་ལ་བརྟེན་དགའ་བ་ན། །ཉེས་པ་འོང་བས་སྤང་བར་བྱ། །ཚོགས་ཀྱི་འཁོར་ལོ་རྩོད་པ་ནི། །ཉེས་པ་ཡོད་པས་མི་བྱའོ། །ཚུལ་དང་མི་ལྡན་རིག་མ་ལ། །སྤྱད་པར་མི་བྱ་ཉེས་
པ་འབྱུང་། །གསང་ཆོས་ཆོ་ག་ཤེས་པ་འདི། །བུ་ལ་ལེགས་པར་བསྟན་པར་བྱ། །དད་པས་སེམས་ཅན་ཆོས་འདྲི་བར། །ཆོས་ལོག་མི་བཤད་དོན་ལ་བཀྲི། །ཉན་ཐོས་སྤྱོད་པའི་ནང་དག་ཏུ། །ཞག་བདུན་ལ་སོགས་བསྡད་མི་བྱ། །སྔགས་ཀྱི་བསྐྱེད་རྫོགས་མི་ཤེས་པར། །སྔགས་ཀྱི་ཁ་ཕོ་མི་བཏང་ངོ་། །སྣོད་དང་མི་ལྡན་སེམས་ཅན་ལ། །གསང་ཆོས་བཤད་པར་མི་བྱའོ། །ཞེས་སོ།། ༈ །།བྱང་ཆུབ་སྙིང་པོ་རྒྱན་གྱི་ཆོ་ག་ཞིབ་མོ་ལས། ཆོས་སྐུའི་རིང་བསྲེལ་དང་། །ཆོས་ཀྱི་རིང་བསྲེལ་དང་། སྐུ་གདུང་གི་རིང་བསྲེལ་དང་། སྐུ་བལ་གྱི་རིང་བསྲེལ་དང་། ཡུངས་འབྲུ་ལྟ་བུའི་རིང་བསྲེལ་ཏེ་ལྔར་བཤད་པའི། དང་པོ་ནི། སཱཙྪདང་མཆོད་རྟེན་སོགས་ཆོས་སྐུའི་རྟེན་རྣམས་དང་། གཉིས་པ་ནི་གླེགས་བམ་དང་གཟུངས་སྔགས་སོ། །གསུམ་པ་སྐུ་གདུང་དངོས་ཏེ་གང་ཟག་ཁྱད་པར་ཅན་གྱི་སྐུ་གདུང་སོགས། བཞི་པ་སྐུའི་ཉེར་སྤྱད་ན་བཟའ་སོགས། ལྔ་པ་རིང་བསྲེལ་དངོས་ཏེ་འཕེལ་གདུང་དུ་གྲགས་པ་རྣམས་ཡིན་ནོ།། ༈ །།སློབ་དཔོན་ངག་གི་དབང་ཕྱུག་གྲགས་པས་མཛད་པའི་འཆི་བ་བསླུ་བའི་མན་ངག་ཀུན་ལས་བཏུས་པ་ལས། གང་གིས་དཔལ་ལྡན་སྟུག་པོ་བཀོད་པར་དོན་དམ་རྟོགས་པ་ཉིད། །སླར་ཡང་དགའ་ལྡན་སྐྱེ་བོའི་དོན་དུ་དམ་པ་ཏོག་དཀར་གྱུར། །དེ་ནས་འདིར་ནི་འགྲོ་བའི་དོན་དུ་ཤཱཀྱའི་ཏོག་གྱུར་པ། །འཆི་བ་
ལས་རྒྱལ་སྒྱུ་མ་མཐའ་ཡས་སྟོན་དེ་རྒྱལ་གྱུར་ཅིག །ཅེས་དང་། །བློ་གྲོས་དམན་པས་རྟོགས་དཀའ་ཞིང་། །གཡོ་བའི་སེམས་ཀྱིས་སྒྲུབ་དཀའ་བའི། །འཆི་ལྟས་འཆི་བ་བསླུ་བར་བཅས། །བསྟན་བཅོས་ལས་བཏུས་བཤད་པར་བྱ། །རྣམ་ཀུན་འཆི་བ་བསླུ་བ་ནི། །གྲོལ་བ་ཉིད་ལ་རིགས་པ་ཡིན། །མ་གྲོལ་བ་རྣམས་ཐམས་ཅད་ལ། །ཇི་ཙམ་དུས་ལ་བསྲིང་བའོ། །ཚེ་དང་དབང་པོ་སེམས་རྣམས་ནི། །འགགས་པ་འཆི་བའི་མཚན་ཉིད་དེ། །ཐབས་ཀྱིས་རིང་དུ་འཚོ་བ་ནི། །འཆི་བ་བསླུ་བ་ཞེས་བརྗོད་དོ། །ཆོས་སྤྱོད་དབང་པོ་ཐུལ་བ་ནི། །འཁོར་བ་རུ་ནི་ཇི་སྲིད་འཚོ། །དེ་སྲིད་བསོད་ནམས་ལ་སོགས་ལྷོཚོགས། །བྱང་ཆུབ་སྒྲུབ་བྱེད་རབ་ཏུ་སྐྱེ། །འཚོ་བ་ལས་གཞན་སྙིང་པོ་ནི། །འཁོར་བར་ཅུང་ཟད་མ་མཐོང་ངོ་། །དེ་ཕྱིར་མྱུར་དུ་ཐབས་མང་པོས། །འཆི་བ་བསླུ་བ་བརྩམ་པར་བྱ། །གང་ཕྱིར་རིག་པས་ཐབས་སྦྱར་བས། །དཀའ་བ་ཅུང་ཟད་ཡོད་མ་ཡིན། །ནོར་བུ་སྨན་དང་སྔགས་རྣམས་ཀྱི། །མཐུ་ནི་ཐམས་ཅད་ཡང་དག་འདོད། །འཆི་བའི་མཚན་ཉིད་རིང་མོ་ནས། །ཤེས་བྱ་འོས་པས་བཅོས་པར་བྱ། །སྤྱི་བོར་ཐོག་ནི་བབས་པའི་ཚེ། །རབ་ཏུ་མཁས་ཀྱང་ཅི་བྱར་ཡོད། ཅེས་སོ། །ཡང་། ཕྱི་དང་ནང་གི་བདག་ཉིད་ཅན། །འཆི་ལྟས་ཚོགས་ནི་ཤེས་བྱས་ནས། །ཕྱི་དང་ནང་གི་བདག་ཉིད་ཀྱིས། །བསླུ་བ་བསྡུས་པའང་
ཤེས་པར་བྱ། །ལུས་དང་ངག་དང་ལས་ཀྱིས་ནི། །བསམ་གཏན་ལས་ཀྱིས་ནང་གི་ཡིན། །ནོར་བུ་སྔགས་སྨན་ཕྱི་ཡིན་ཏེ། །རྣལ་འབྱོར་ནུས་པ་ནང་ཡིན་ནོ། །འབད་པས་འཆི་བ་བསླུ་བ་ནི། །དད་པ་ཉིད་ཀྱིས་བྱ་བར་ནུས། །དེ་བས་དད་པ་བརྟན་པར་བྱ། །གཞན་དུ་ངལ་བ་དོན་མེད་འགྱུར། །ཞེས་སོ། །འཆི་བ་བསླུ་བར་འདོད་པ་ཡིས། །དང་པོར་བསོད་ནམས་བརྩོན་པས་བསྐྱེད། །ཆོས་ཀྱིས་འཆི་ལས་སྐྱོབ་བྱེད་ཅིང་། །ཆོས་ཀྱིས་འཆི་བ་སླུ་བར་བྱེད། །ཆོས་ནི་དོར་ཞིང་བག་མེད་དུ། །སྐད་ཅིག་ཙམ་ཡང་གནས་མི་བྱ། །ཞེས་དང་། ཆོས་གཞན་རྒྱ་ཆེན་རྣམས་ཀྱིས་ཅི། །འཚེ་བ་མེད་པ་ཆོས་ཀྱི་མཆོག ། ཅེས་དང་། །བྱ་ཉ་རི་དྭགས་རྐུན་མ་དང་། །སྦྲུལ་སོགས་བསད་བྱའི་ཕྱོགས་གྱུར་པ། །སྲོག་བསྐྱབས་པ་ཡིས་འཕྲལ་དུ་ནི། །ཚེ་ཐུང་བ་ཡང་ཚེ་རིང་འགྱུར། །རྐུན་མ་ཉ་དང་རི་དྭགས་སྤྲུལ། །བྱ་སོགས་སྲོག་ལ་ཆགས་པ་རྣམས། །འདི་དག་བསད་ན་འཕྲལ་དུ་ནི། །ཚེ་རིང་བ་ཡང་ཚེ་ཐུང་འགྱུར། །མི་དགེ་བཅུ་ནི་སྤངས་པ་དང་། །དེ་བཞིན་གསུམ་པ་སྐྱབས་འགྲོ་དང་། །བསླབ་པ་ལྔ་དང་བརྒྱད་བསྲུངས་ན། །འཆི་བ་ཐག་རིང་བསྲིང་བར་འགྱུར། །བཙོན་རར་ནད་དང་གདུང་བ་དང་། །འཚེ་སོགས་འཇིགས་པ་ཇི་ཙམ་ཡང་། །བསྐྱབས་བྱས་ན་ནི་ངེས་པར་དུ། །ཚེ་རིང་འཆི་བ་སླུ་བྱེད་ཡིན། །ཞེས་དང་། དབེན་པའི་གནས་
སུ་རས་བྲིས་སོགས། །མདུན་དུ་མཆོད་པ་བྱས་ནས་ནི། །སྔགས་རྣམས་བཟླས་པ་ཙམ་གྱིས་ཀྱང་། །འཆི་བ་བསླུ་བ་འབྱུང་བར་འགྱུར། །ཞེས་དང་། དེ་ལྟར་འཆི་བའི་དགྲ་བོ་བསླུ་བ་འདི་ནི་བཤད་པ་སྟེ། །རང་ངམ་གཞན་གྱི་གཞུང་ལས་གྲུབ་པའི་བསམ་གཏན་ལས་ནི་རབ་བསྒྲུབས་ཤིང་། །བརྩེ་མེད་འཆི་བའི་འཇིགས་པ་ལས་ནི་འབད་པས་ཡང་དག་བསྒྲལ་བར་བྱ། །གང་ཕྱིར་འདིར་ནི་སྲོག་ལས་ཀྵ གཞན་པའི་ཡིད་འོང་ཡོད་མ་ཡིན། །ཞེས་དང་། དེ་བཞིན་ཉིད་ནི་སྟོང་ཉིད་བཤད། །རྣམ་པ་ཀུན་མཆོག་བདག་ཉིད་ཅན། །དེ་ནི་རྟག་ཏུ་གོམས་བྱས་ནས། །འཆི་བ་བསླུ་བར་འགྱུར་བ་ཡིན། །ཞེས་དང་། རྣམ་པ་ཀུན་གྱི་མཆོག་ལྡན་པའི། །སྟོང་ཉིད་ཀུན་གྱི་མཆོག་ལྡན་པའི། །སྟོང་ཉིད་འཛིན་པ་རྣམས་པར་སྤངས། །སྟོང་པ་ཉིད་ནི་རྟག་བསྒོམས་ན། །འཆི་བ་ཡིས་ནི་མཐོང་མི་འགྱུར། །ཀུན་རྟོག་ཙམ་ལས་བྱུང་བ་ཡི། །འཆི་བ་དེ་ཡང་མཐོང་མི་འགྱུར། །གཞན་ཡང་བདུད་ནི་མང་པོ་དང་། །འཁོར་བ་ཡང་ནི་མཐོང་མི་འགྱུར། །ཞེས་དང་། འཆི་བ་ཞེས་བྱ་རྣམ་རྟོག་འདི། །དངོས་པོ་ཀུན་ལ་ཡོད་མིན་ཏེ། །སོ་སོ་སྐྱེ་བོ་རྣམ་རྨུགས་པས། །རང་གི་རྟོག་པས་བཅོམ་པ་ཡིན། །རྣམ་རྟོག་སྡུག་བསྔལ་ཐམས་ཅད་དེ། །རྣམ་པར་རྟོག་པ་འཆི་བར་བཤད། །དེ་ཕྱིར་རྣམ་པར་རྟོག་གཞོམ་ཕྱིར། རྟག་ཏུ་རྣམ་པར་མི་རྟོག་བྱ། །
ཞེས་དང་། བསྟན་བཅོས་རྣམས་ནི་རྙེད་སླ་ཡི།. །དེ་སྦྱོར་ཤིན་ཏུ་རྙེད་པར་དཀའ། །སྦྱོར་བ་ཤེས་པའི་འཇིག་རྟེན་ན། །སྦྱོར་བ་རྙེད་དཀའ་ཉིད་མ་ཡིན། །ཞེས་དང་། རབ་ཏུ་སྦྱོར་བ་མཁས་ཤིང་དང་། །བཟོད་དང་བརྩོན་འགྲུས་ལ་རབ་གནས། །སྒྲུབ་ལ་བརྩོན་པའི་ཤེས་རབ་ཅན། །འཆི་བ་བསླུ་བའི་སྣོད་ཡིན་ནོ། །ཞེས་དང་། སྣུམ་དང་སྙིང་པོ་ཟད་སོགས་ལས། །མར་མེ་ལ་སོགས་འཇིག་ཕྱོགས་པའང་། །སླར་ཡང་སྣུམ་སོགས་རབ་ཐོབ་པས། །བསྐལ་པའི་བར་དུ་གནས་པ་ཡིན། །ཇི་ལྟར་དེ་བཞིན་ལུས་འདི་ཡང་། །རྒས་སོགས་ཀྱིས་ནི་འཆི་བཞིན་པར། །གྲུབ་པའི་མན་ངག་ལེགས་རྙེད་ན། །བསྐལ་པའི་མཐར་ཡང་ཅིས་མི་གནས། །ཞེས་དང་། སྟོབས་ཀྱིས་འབད་པས་དཀའ་བ་ཅུང་ཟད་མེད། །དེ་བས་རྩོལ་བའི་ཁུར་ནི་འདོར་མི་བྱ། །རྟག་ཏུ་འབབ་ན་ཆུ་རྒྱུན་འཇམ་པོས་ཀྱང་། །དུས་སུ་རྡོ་ལེབ་དག་ཀྱང་རྣམ་པར་འབིགས། །གཙུབས་ན་ཤིང་ལས་མེ་ནི་འབྱུང་འགྱུར་ཞིང་། །བརྐོས་པས་ས་ལས་ཆུ་ནི་འབྱུང་བར་འགྱུར། །མི་ནི་རྩོལ་བ་བཅས་ལ་མི་འགྲུབ་མེད། །ཅེས་གསུངས་སོ། །གདན་བཞིའི་དཀྱིལ་ཆོག་སྙིང་པོ་མདོར་བསགས་ལས། །བརྒྱུད་པའི་གསང་བ་མཐོང་བ་ལས། །རྣལ་འབྱོར་བསྟན་བཅོས་དམ་པ་སྟེ། །ཕྱི་རོལ་བསྟན་བཅོས་སུན་འབྱིན་ཡིན། །སྡེབ་སྦྱོར་དང་ནི་ཚད་མ་མེད། །སྒྲ་ཡི་མཚན་
ཉིད་རྣམ་པར་སྤངས། །ཡེ་ཤེས་ཅན་གྱི་རྣལ་འབྱོར་ཚིག །ཐམས་ཅད་རྣལ་འབྱོར་བསྟན་བཅོས་ཡིན། །ཞེས་དང་། དོན་ལ་རྟེན་པའི་བསྟན་བཅོས་འདི། །གཅིག་ནས་གཅིག་ཏུ་བསླབ་པ་སྟེ། །ཤིན་ཏུ་གབ་ཅིང་གསང་བའི་དོན། །བརྡ་ཡི་སྐད་ཀྱིས་བཤད་པ་ཡིན། །ཞེས་དང་། དང་པོར་རེ་ཞིག་སློབ་དཔོན་གྱིས། །སྔོན་དུ་བསྙེན་པ་ལ་སོགས་བྱ། །ཞེས་དང་། ཤིན་ཏུ་བརྟན་པའི་སློབ་མ་ལ། །སློབ་དཔོན་གྱིས་ནི་དཀྱིལ་འཁོར་འདྲི། །དཀོན་མཆོག་གསུམ་ལ་སྐྱབས་སོང་ཞིང་། །ལུས་སོགས་རང་བཞིན་དག་པར་ལྡན། །འཇམ་ཞིང་སྙན་པར་སྨྲ་བ་དང་། །སྙིང་རྗེ་ལ་སོགས་ཕན་སེམས་ལྡན། །ཞྭ ཉན་དང་ཐོས་སོགས་ལྷག་པར་དང་། །སྦྱིན་སོགས་དགེ་བའི་ལས་ལ་དགའ། །ཐེག་པ་ཆེ་ལ་མངོན་པར་སེམས། །གསང་བའི་ཆོས་ལ་དད་པ་ལྡན། །རྟག་པར་རྒྱུན་དུ་བླ་མར་གུས། །དེ་འདྲའི་སློབ་མ་ཡོངས་སུ་བཟུང་། ཞེས་དང་། །དེ་ནས་དངོས་གྲུབ་ཀུན་སྒྲུབ་པའི། །དཀྱིལ་འཁོར་ཆོ་ག་བཤད་པར་བྱ། །སྙིང་རྗེ་ཕན་པའི་སེམས་ཀྱིས་ནི། །དང་པོར་ས་གཞི་ཡོངས་སུ་བཟུང་། །ཡིད་ཀྱིས་དག་པའི་ས་ཕྱོགས་ཏེ། །མ་དད་པ་ནི་སྤང་བར་བྱ། །དག་པའི་ས་སོགས་བཟུང་ནས་སུ། །བློ་ལྡན་དེར་ནི་དཀྱིལ་འཁོར་བརྩམ། །ཞེས་དང་། དེ་ནས་བྱང་ངམ་ཤར་དུ་ནི། །སློབ་མ་སྟ་གོན་གནས་པར་བྱ། །ཞེས་དང་། དེ་ནས་
དབང་ནི་བསྐུར་བའི་ཕྱིར། །ལྷོ་དང་ནུབ་དང་བྱང་དང་ནི། །ཤར་གྱི་སྒོ་ཡི་བུམ་པ་ཡི། །སློབ་དཔོན་གྱིས་ནི་བསྙེན་པར་བྱ། །ཞེས་དང་། དེ་ནས་སློབ་མ་བློ་ལྡན་པས། །བླ་མར་ཡོན་ནི་དབུལ་བར་བྱ། །བུ་དང་ཆུང་མ་སྡུག་པ་དང་། །གཉེན་དང་བྲན་ཕོ་བྲན་མོ་བཅས། །ཡུལ་དང་ཁྱིམ་དང་ཞིང་དང་ནི། །མུ་ཏིག་གོས་དང་གསེར་དང་ནི། །དངུལ་དང་ཟངས་སོགས་ནོར་རྣམས་དང་། །འབྲུ་ནི་རྣམ་པ་སྣ་ཚོགས་དབུལ། །མལ་སྟན་གདུགས་དང་མཆིལ་ལྷམ་སོགས། །མཉེས་པའི་ལོངས་སྤྱོད་ཀུན་ཕུལ་ནས། །མཐར་ནི་བདག་གི་ལུས་ཉིད་ཀྱང་། །བླ་མའི་ཡོན་དུ་བསྟན་པར་བྱ། །སློབ་མ་གུས་པ་མེད་པ་ཡིས། །སྡུག་བསྔལ་གྱིས་གཟིར་ཐེ་ཚོམ་མེད། །དེ་ཕྱིར་སློབ་མས་དངོས་ཀུན་གྱི། །ཡོན་ནི་གཟབ་སྟེ་དབུལ་བར་བྱ། །ཞེས་དང་། སློབ་མར་བཅས་པས་སྔགས་དང་ནི། །བཀྲ་ཤིས་གླུ་བླངས་གར་ཡང་བྱ། །ཞེས་དང་། མཚམས་མེད་པ་དང་སྡིག་ཅན་ཡང་། །ཚོན་རྩི་མཐོང་བས་གྲོལ་བར་འགྱུར། །སྔགས་ཀྱི་དེ་ཉིད་ཕབ་པ་ཡིས། །གཙང་མའི་རིགས་སུ་སྐྱེ་བར་འགྱུར། །ཞེས་དང་། ཧཱུྃ་ཞེས་བྱ་བའི་གླུ་ཡིས་ནི། །རྡོ་རྗེ་རྣལ་འབྱོར་མ་ཆགས་བྱ། །བཀྲ་ཤིས་རོལ་མོ་སྙན་པ་ཡིས། །ཤིན་ཏུ་མཉམ་བཞག་གླུ་བླང་བྱ། །ཞེས་དཔལ་སྤྱོད་པའི་བརྟུལ་ཞུགས་ཞབས་ཀྱིས་མཛད་པའི་ཆོ་ག་ལེའུ་ཉི་ཤུ་རྩ་བརྒྱད་པ་ལས་ཁོལ་བཏུས་སོ།། ༈ །།ནག་པོ་
ཆེན་པོའི་རྒྱུད་དངོས་གྲུབ་ཀུན་ལས་བཏུས་པར། ལག་ན་རྡོ་རྗེས་གསོལ་པ། ཀྱེ་བཅོམ་ལྡན་འདས་དགའ་བ་རྣམས་ནི་དུ་ཞིག །བཅོམ་ལྡན་འདས་ཀྱིས་གསུངས་པ། །དགའ་བ་བཞི་སྟེ་དགའ་བ་དང་། མཆོག་དགའ་དང་། ལྷན་ཅིག་སྐྱེས་པའི་དགའ་བ་དང་། །དགའ་བྲལ་གྱི་དགའ་བའོ། །མཆོག་དགའ་དང་དགའ་བྲལ་གྱི་དབུས་སུ་ངེས་པར་མཚོན་པར་གྱིས་ཤིག །ཅེས་དང་། ལག་ན་རྡོ་རྗེས་གསོལ་པ། ཀྱེ་བཅོམ་ལྡན་འདས། ལུས་ལ་རྩ་དུ་ཞིག་མཆིས། དེ་རྣམས་ཀྱི་རང་བཞིན་འབྱུང་བ་ཇི་ལྟ་བུ་རང་གི་མངོན་པར་འདོད་པའི་གནས་དེ་གསུང་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། །ལུས་ལ་རྩ་སུམ་ཅུ་རྩ་གཉིས་ཏེ་དེ་རྣམས་ཀྱི་ནང་དུ་རྩའི་གཙོ་མོ་གསུམ་ནི། རྐྱང་མ་དང་། རོ་མ་དང་། ཀུན་འདར་མ་སྟེ། རྐྱང་མ་ནི་ཤེས་རབ་དང་རོ་མ་ནི་ཐབས་ཀྱི་རང་བཞིན་དུ་གནས་སོ། །དབུས་ཀྱི་ཡུལ་ལ་ཨ་བ་དྷུ་ཏཱི་སྟེ་ནམ་མཁའི་རང་བཞིན་གཟུང་བ་དང་འཛིན་པ་སྤངས་པའོ། །ཞེས་དང་། ཀྱེ་བཅོམ་ལྡན་འདས་ཕྱག་རྒྱ་ཆེན་མོ་ཞེས་པ་ཅིའི་ཕྱིར་གསུངས། བཅོམ་ལྡན་འདས་ཀྱིས་བཀའ་སྩལ་པ། ཕྱག་སྨྱུ རྒྱའང་འདི་ལ་ཆེན་མོའང་འདི་ཡིན་པས་ཕྱག་རྒྱ་ཆེན་མོ་སྟེ། རང་བཞིན་མེད་པའི་ཚུལ་ཅན་ལུས་ངག་ཡིད་སྤངས་པ། སྟོན་ཀའི་ནམ་མཁའི་དཀྱིལ་ལྟ་བུ་ཕུན་སུམ་ཚོགས་པ་ཐམས་ཅད་ཀྱི་གནས་སུ་གྱུར་པ། །
སྲིད་པ་དང་མྱ་ངན་ལས་འདས་པ་ཐམས་ཅད་གཅིག་པའི་བདག་ཉིད། བདེ་བ་ཆེན་པོའི་གཟུགས་ཅན་ནི་ཕྱག་རྒྱ་ཆེན་པོའི་མིང་གིས་བཤད་པའོ། །ཞེས་སོ། །སྔགས་བཟླས་མེད་ཅིང་དཀའ་ཐུབ་མེད། །སྦྱིན་སྲེག་མེད་ཅིང་དཀྱིལ་འཁོར་དང་། །དཀྱིལ་འཁོར་པ་མེད་དེ་ཉིད་ནི། །སྔགས་བཟླས་དཀའ་ཐུབ་སྦྱིན་སྲེག་སྟེ། །དེ་ཉིད་དཀྱིལ་འཁོར་འཁོར་ལོ་པའང་། །ཞེས་སོ།། ༈ །།གཤིན་རྗེ་གཤེད་དམར་པོའི་རྒྱུད་ཀྱི་རྒྱལ་པོ་ལས། །བསམ་བྱ་མེད་ཅིང་བསམ་བྱེད་གང་། །དེ་ཡང་གང་དུ་ཡོད་མ་ཡིན། །དེ་འདིར་བསམ་མི་ཁྱབ་པར་བརྗོད། །སྲིད་པའི་ཤིང་གི་སྭཱ་རེ་སྟེ། །ཞེས་དང་། །སྙིང་གར་སྲོག་དང་ཐུར་སེལ་བཤད། །ལྟེ་བའི་ཕྱོགས་སུ་མཉམ་གནས་སོ། །མགྲིན་པའི་ཕྱོགས་ན་གྱེན་རྒྱུ་སྟེ། །ལུས་ཀུན་སོན་པ་ཁྱབ་བྱེད་དོ། །ཞེས་དང་། །རྐྱང་མ་དང་ནི་རོ་མ་དག །གཡོན་དང་གཡས་སུ་གནས་པའོ། །ཀུན་འདར་མ་ནི་དབུས་ཕྱོགས་སུ། །ལྷན་ཅིག་སྐྱེས་པ་རྗེས་སུ་བྱེད། །ཅེས་དང་། ལྷ་ཡི་གཟུགས་ཀྱི་བདག་ཉིད་ཅན། །སླར་ཡང་སྐུ་གསུང་ཐུགས་དབྱེ་བས། །ཡིག་གསུམ་ཉིད་ཀྱིས་མཉམ་བཞག་པའི། །ཡིད་ཀྱི་ཁོང་དུ་ཆུད་པར་བྱ། །ཨོཾ་ཡིག་གིས་ནི་འཇུག་པ་དང་། །ཨཱཡིག་གིས་ནི་དེ་བཞིན་གནས། །ཧཱུྃ་ཡིག་གིས་ནི་དབྱུང་བ་ཡང་། །རྣལ་འབྱོར་མན་ངག་ལས་བྱའོ། །ཨོཾ་ཨཱཿཧཱུྃ་ཞེས་བྱ་བ་འདིས། །གཡོ་ཞིང་གཡོ་བ་བརྟན་པར་
འགྱུར། །ཞེས་པས་སོ།། ༈ །།ཝི། རྒྱུད་མ་ལུས་པའི་དོན་སྐུལ་བར་བྱེད་པ། དཔལ་གསང་བ་གྲུབ་པ་ཞེས་བྱ་བ་སློབ་དཔོན་པདྨ་བཛྲ་གྱིས་མཛད་པ་ལས། ལེའུ་དང་པོར། དངོས་པོ་མེད་ཅིང་ཁྱབ་པ་མཆོག་ཏུ་ཞི་བའི་གོ་འཕང་འཇིག་རྟེན་སྤྱོད་པ་དག་ལས་རྣམ་གྲོལ་བ། །གང་ཞིག་རྟག་འབྱུང་ཞི་ལ་རྒྱལ་བ་དམ་པ་ཁྱུ་མཆོག་རྣམས་ཀྱིས་ཕྱག་བྱས་བསམ་གཏན་དང་བྲལ་བ། །ཅི་ཡང་རུང་བའི་གནས་གྱུར་དཔལ་ལྡན་རྒྱལ་བའི་སྐུ་ཡི་དམ་པ་རྣམ་དག་ནང་གི་བདག་ཉིད་ཀྱིས་འཇུག་པ། །སངས་རྒྱས་ཀྱིས་ཀྱང་རྟོགས་པར་བྱ་བ་མིན་ཞིང་དྲི་མ་རྣམས་དང་བྲལ་བ་དེ་ཉིད་དེ་ལ་ཕྱག་འཚལ་ནས། །ཞེས་དང་། རྫོགས་པའི་རིམ་པའི་རྣལ་འབྱོར་ཉིད། །དེ་ཉིད་ལྡན་པས་བསྒོམ་པར་བྱ། །གཞན་དུ་དེ་ཉིད་དམན་པས་ནི། །དངོས་གྲུབ་ཐོབ་པར་མི་འགྱུར་རོ། །ཞེས་དང་། །འབབས་སྟེགས་ལྷ་རྟེན་སྦྱིན་པའང་མིན། །ཁྲུས་དང་གཙང་སྦྲ་དེ་བཞིན་ཏེ། འདི་ཀུན་བདེན་པ་མ་ཡིན་གྱི། །འདི་ཉིད་གཅིག་པུ་བདེན་པ་ཡིན། །ཞེས་དང་། མཚམས་མེད་ལྔ་པོ་བྱས་པ་དང་། །སྲིད་པར་ངལ་བར་བྱས་པས་ཀྱང་། །དེ་ཉིད་ལྡན་ན་འགྲུབ་འགྱུར་ཏེ། །དྲི་མེད་གོ་འཕང་འཐོབ་པར་འགྱུར། །ཞེས་དང་། །བྱ་བ་སྤྱོད་པའི་དབྱེ་བ་དང་། །མདོ་སྡེའི་སྡེ་སྣོད་ལ་སོགས་སུ། །མཆོག་ཏུ་དག་པ་གཅིག་པུ་ཉིད། །རྣམ་པ་དུ་མར་རྣམ་པར་གནས། །ཕུང་པོ་
རིན་ཆེན་སྣོད་ཉིད་དུ། །སེམས་ཅན་བསམ་པའི་བྱེ་བྲག་གིས། །དེ་ཉིད་འབད་པས་སྦ་མཛད་ནས། །སངས་རྒྱས་མགོན་པོ་རྣམ་པར་བཞག །བྱང་ཆུབ་སེམས་མཆོག་རྣམ་པར་དག །བླ་མའི་ཞབས་ཀྱི་བཀའ་དྲིན་གྱིས། །རང་གི་ལུས་ལ་རབ་གནས་པ། །དེ་ནི་འབད་པས་རིག་པར་བྱ། །དེ་ནས་སྤྱོད་པ་བྱ་བའམ། །ཁྱིམ་དུ་གནས་ཏེ་བསྒོམ་པར་བྱ། ཞེས་དང་། །བླ་མ་དང་ནི་རྡོ་རྗེ་འཛིན། །གང་གིས་གཉིས་སུ་མེད་དེར་མཐོང་། །དངོས་གྲུབ་བསྡུས་པའི་མཚན་ཉིད་ཅན། །དེ་ཉིད་འདིར་ནི་ཐོབ་པར་འགྱུར། །ཞེས་དང་། །དབང་བསྐུར་རྗེས་གནང་མེད་པར་ཡང་། །སློབ་མ་དག་ནི་སྡུད་པར་བྱེད། །གླེགས་བམ་མཐོང་བས་དགའ་གྱུར་ནས། །གསང་སྔགས་རང་ཉིད་ལེན་པར་བྱེད། ཅེས་དང་། །དཔལ་ལྡན་འདུས་པ་ཞེས་བྱ་འདིར། །རྟོག་པ་ཐམས་ཅད་རྣམ་པར་སྤངས། །རྫོགས་པའི་རིམ་པའི་རྣལ་འབྱོར་གྱིས། །ཚེ་འདི་ཉིད་ལ་འགྲུབ་པར་འགྱུར། །དཔལ་ལྡན་འདུས་ལས་ཆོས་གཞན་མེད། །འཇིག་རྟེན་གསུམ་གྱི་རིན་ཆེན་འགྱུར། །སྙིང་པོ་ལས་ཀྱང་སྙིང་པོའི་མཆོག །རྒྱུད་ཀུན་གྱི་ནི་བླ་མའི་བླ། །བསྟན་དང་བཤད་པའི་རྣམ་པར་གནས། །རྫོགས་པའི་རྣལ་འབྱོར་རིམ་པ་ཉིད། །འདུས་པ་གང་གིས་མི་ཤེས་པར། །དེ་ཡིས་དངོས་གྲུབ་ཇི་ལྟར་འགྲུབ། །ཐེ་ཚོམ་ཐམས་ཅད་གཅོད་བྱེད་ཅིང་། །མི་ཤེས་རབ་རིབ་སེལ་བྱེད་པ། །
སངས་རྒྱས་རིན་ཆེན་ཟ་མ་ཏོག །དཔལ་ལྡན་འདུས་པ་ཡོངས་སྤངས་ནས། །རྣམ་རྟོག་དུ་མས་བརྟགས་པ་ཡི། །རྨོངས་པ་དངོས་གྲུབ་འདོད་གྱུར་པ། །མཁའ་ལ་ཁུ་ཚུར་བརྡེག་པ་དང་། །སྨིག་རྒྱུའི་ཆུ་ལ་འཐུང་བ་བཞིན། །ཞེས་དང་། ཚེས་གྲངས་མེད་ཅིང་རྒྱུ་སྐར་མེད། །འདི་ལ་སྨྱུང་བར་བཤད་པ་མེད། །གཉིས་མེད་ཡེ་ཤེས་དང་ལྡན་ན། །བདེ་བར་གཤེགས་པའི་དངོས་གྲུབ་འགྱུར། །ཞེས་དང་། ལེའུ་གཉིས་པ་ལས། །སློབ་དཔོན་ཕལ་ཆེར་འདི་སྐད་བརྗོད། །དཔལ་ལྡན་འདུས་པ་མདངས་ཆེན་གྱི། །རྒྱུད་ཀྱི་སྡུད་པར་བྱེད་པ་པོ། །དཔའ་བོ་འཇིག་རྟེན་དབང་ཕྱུག་ཟེར། །བླ་མའི་ཞབས་ཀྱི་བཀའ་དྲིན་གྱིས། །དཔལ་ལྡན་འདས་པའི་སྡུད་པ་པོ། །གཞན་དག་ཡོད་པ་མ་ཡིན་ཞེས། །བདག་ཉིད་འབའ་ཞིག་སྨྲ་བར་བྱེད། །རྒྱུད་མཛད་པ་ནི་ཐུགས་རྗེ་ཆེ། །གསུང་བ་པོ་དེ་བརྗོད་པའང་དེ། །དེ་ལས་གཞན་དག་ཡོད་མིན་པས། །བདེ་ཆེན་ལས་གཞན་གསུངས་པ་མེད། །ཅེས་དང་། སངས་རྒྱས་ཀུན་གྱི་གནས་ཞེས་པ། །ཆོས་འབྱུང་མི་འགྱུར་ཞི་བ་ཉིད། །ཤེས་རབ་རང་གི་དངོས་དེ་སྲིད། །ཀུན་ཏུ་བཟང་པོའི་ཡེ་ཤེས་ཀྱིས། །སྤྲོས་པ་མེད་ཅིང་དག་པ་ལས། །འདི་དག་ཐམས་ཅད་རྣམ་པར་འཕྲུལ། །མཆོག་ཏུ་ཤེས་ཤིང་རྣམ་དག་གང་། །སངས་རྒྱས་ཀུན་གྱིས་ཕྱག་བྱས་པའི། །བརྗོད་མིན་ཀུན་ལ་ཁྱབ་པར་
གནས། །ཐམས་ཅད་དེ་ཡི་རྣམ་འཕྲུལ་ཡིན། །ཞེས་དང་། གང་ཞིག་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ཚུལ་དག་གིས། །གནས་ཤིང་དངོས་གྲུབ་བཟང་སྟེར་བ། །ཤེས་རབ་ཅེས་བྱའི་མིང་། གིས་གནས། །དེ་ལ་གནས་པ་གང་ཡིན་པ། །བྷ་ག་ཞེས་བྱའི་ཡི་གེ་གཉིས། །དག་པའི་དེ་ཉིད་ཅེས་བྱ་སྟེ། །དོན་དམ་པ་དེ་བདག་གིས་བསྟན། །ཞེས་སོགས་དེའི་དོན་རྒྱས་པར་སྨོས་ནས། གཞན་ཡང་། རྡོ་རྗེ་བཙུན་མོ་ལས་བྱུང་བ། །ཨེ་ཝཾ་རྣམ་དག་ཡི་གེ་ཉིད། །ཨེ་ཝཾ་ནམ་མཁའི་ཁམས་སུ་བརྗོད། །མཱ་ཡཱ་ཕྱག་རྒྱུར་རྗེས་སུ་ཐོབ། །གང་ཞིག་དེ་ནི་སྟོན་བྱེད་པ། །ཐོབ་པ་ཞེས་བྱར་འདིར་བརྗོད་དོ། །རྟོག་མེད་ཀུན་མཁྱེན་ཡེ་ཤེས་ཉིད། །དུས་གཅིག་པ་ཡང་དེ་བཞིན་ནོ། །ཞེས་དང་། རྡོ་རྗེ་བཙུན་མོ་ཞེས་བརྗོད་པ། །ཤེས་རབ་རྒྱལ་བ་ཀུན་དངོས་ཏེ། །ཞེས་དང་། རྣམ་དག་བཙུན་མོའི་བྷ་ག་དེར། །བདེ་བ་ཆེན་པོ་རྟག་ཏུ་བཞུགས། །ཞེས་དང་། རྡོ་རྗེ་ཐུགས་སམ་གཞན་ཡང་རུང་། །དཔལ་ལྡན་བདེ་ཆེན་རྒྱལ་པོ་ནི། །འདུས་པ་ཞེས་བྱ་བྱེད་པོ་གང་། །དེ་ནི་ཨེ་ཝཾ་འདི་རབ་གནས། །ཞེས་དང་། འདིར་ནི་ཡི་གེ་གཉིས་པོ་ནི། །རྒྱུད་ཀྱི་དང་པོར་མེད་མི་འདོད། །ཅེས་སོ། །ལེའུ་གསུམ་པ་མངོན་པར་བྱང་ཆུབ་བསྟན་པ་ལས། དབང་པོ་ཀུན་ལས་རྣམ་གྲོལ་ཞིང་། །གཉིས་མེད་མཆོག་ཏུ་ཞི་བ་ཉིད། །ཁྱབ་ཅིང་རང་
བཞིན་མེད་པ་ཡི། །རྟོག་པ་དེ་ནི་གོ་འཕང་མཆོག །ཅེས་དང་། ངོ་མཚར་མཆོག་གྱུར་རྡོ་རྗེ་ཅན། །དེ་ཡི་ཚེ་ན་བསྒྲུབ་པར་བྱ། །རང་ལུས་ཐབས་དང་ལྡན་པའམ། །ཡང་ན་ལས་ཀྱི་ཕྱག་རྒྱས་སོ། །ཞེས་དང་། ལས་ཀྱི་ཕྱག་རྒྱ་ཁྲོ་རྒྱུ་ཅན། །ཡེ་ཤེས་ཕྱག་རྒྱ་ཡང་དེ་བཞིན། །རྣམ་རྟོག་མང་བ་སྤངས་བྱས་ལ། །ཕྱག་རྒྱ་ཆེན་པོ་རྣམ་བསྒོམ་བྱ། །ཞེས་དང་། རྣམ་པར་གཡེང་བ་ཀུན་འབྱུང་བའི། །བུད་མེད་ཕྱག་རྒྱ་རྣམ་སྤངས་ལ། །རང་ལུས་ཐབས་དང་ལྡན་པ་ཡི། །ཕྱག་རྒྱ་ཆེན་པོ་བསྟེན་པར་བྱ། །རང་གི་རིག་པའི་ལྷ་རྫས་དེ། །ཕྱག་རྒྱ་ཆེན་པོ་མཆོག་ཏུ་དག །ཐ་མལ་ལུས་ལ་བསྟེན་ནས་གནས། །ཤེས་རབ་ཆུང་བས་མཐོང་མི་འགྱུར། །ཞེས་དང་། མི་འགྱུར་བ་ཡི་རང་ལུས་དེ། །མཆོག་གཅིག་གིས་ནི་ཤེས་པར་འགྱུར། །བླ་མའི་བཀའ་དྲིན་གནང་བ་ལས། །ཇི་ལྟ་བ་བཞིན་རྣམ་པར་གནས། །ཞེས་དང་། ཐབས་དང་བྲལ་ན་ནམ་དུ་ཡང་། །ལྷ་རྫས་ཡོན་ཏན་ཀུན་འབྱུང་བ། གཉུག་མའི་ལུས་ལ་གནས་ན་ཡང་། །ཤེས་རབ་དེ་བཞིན་མཐོང་མི་འགྱུར། །ཞེས་དང་། ཇི་ལྟར་བུར་ཤིང་ཁུ་བ་དང་། །ཏིལ་ལ་ཏིལ་མར་ཇི་བཞིན་པ། །དེ་བཞིན་ལུས་ལ་ཐམས་ཅད་དུ། །ཤེས་རབ་ཕ་རོལ་ཕྱིན་པ་གནས། །ཞེས་དང་། བློ་ལྡན་དངོས་པོ་མི་བསྒོམས་ཤིང་། །དངོས་མེད་ཕ་རོལ་རིང་དུ་སྤངས། །གཅིག་གིས་རྟག་པར་འཛིན་གྱུར་ཅིག །
གཞན་དག་གིས་ནི་སྟོང་ཉིད་དུའོ། །རྟག་དང་ཆད་པའི་སྦྱོར་བ་ལས། །མཆོག་ཏུ་འཛིན་པ་ཟག་པ་གང་། །ཡེ་ཤེས་ཅི་ཞིག་འབྱུང་འགྱུར་བ། །ཐོག་མ་དབུས་མཐའ་དྲི་མ་མེད། །གཙོ་བོ་རྟག་པ་མཆོག་ཏུ་ཞི། །རྒྱུ་དང་དཔེ་ནི་རྣམ་སྤངས་པ། །དངོས་དང་དངོས་མེད་རྣམ་པར་སྤངས། །རྟག་ཏུ་འབྱུང་ཞིང་འགྱུར་བ་མེད། །མི་གནས་མྱ་ངན་འདས་པ་ཉིད། །སྡིག་པ་ཐམས་ཅད་རྣམ་པར་སྤངས། །དེར་གནས་སྒོམ་དང་ལྡན་གྱུར་པས། །སངས་རྒྱས་ཀྱི་ཡང་སྤྱོད་ཡུལ་མིན། །དེར་ནི་བགྲོད་དང་བགྲོད་བྱ་མེད། །བགྲོད་པར་འགྱུར་བ་འགའ་ཡང་མེད། །སྒོམ་དང་བསྒོམ་བྱ་སྒོམ་པ་པོ། །དོན་དམ་པར་ན་ཡོད་མ་ཡིན། །དཔེ་ལས་ཟློའདས་ཤིང་བརྗོད་དུ་མེད། །གཟུང་དང་འཛིན་པ་རྣམ་པར་སྤངས། མཚན་མ་མེད་ཅིང་རྡུལ་བྲལ་བ། །མྱ་ངན་འདས་ཞེས་དེ་ལ་བཤད། །ཅེས་དང་། ལྷ་དང་ལྷ་མིན་མིར་བཅས་པ། །ཐམས་ཅད་མ་ལུས་འདི་ལས་འབྱུང་། །ཁམས་གསུམ་མ་ལུས་པ་འདི་དག །ཐམས་ཅད་བདེ་བ་ཉིད་དུ་གནས། །ཞེས་དང་། གང་གིས་གཟུགས་ནི་ཤེས་མིན་ཞིང་། །གང་ཞིག་ཚིག་དང་བློ་སྤངས་ལ། །སྒྲ་དང་དྲི་དང་རོ་ལས་འདས། །བློ་ཡི་ཡུལ་ལས་གང་འདས་པ། །དེ་ནི་འཇིག་རྟེན་ལས་འདས་པ། །ཞེས་དང་། ལས་ཀྱི་ཕྱག་རྒྱ་ལྡན་པའམ། །ཡང་ན་ཕྱག་རྒྱ་ཆེན་པོ་ཡི། །སངས་རྒྱས་རྣམས་ཀྱི་ཐུགས་གྱུར་པ། །འདི་ནི་མཆོག་
ན་ཡང་ཉིད་མཆོག་ཡིན་ན། །ཞེས་དང་། རང་གི་རིག་པའི་དེ་ཉིད་དེ། །གཞན་གྱིས་བརྗོད་པར་ནུས་མི་འགྱུར། །གུས་དང་བསྒོམས་པས་རྟོགས་འགྱུར་གྱི། །དེ་ནི་གཞན་དུ་རྟོགས་མི་ནུས། །དེ་ཉིད་ཤེས་ནས་ཉིན་མཚན་དུ། །གུས་པས་བསྒོམ་པར་བྱ་བ་ཡིན། །མྱ་ངན་འདས་པའི་གོ་འཕང་མཆོག །བདེ་ཞིང་བདེ་བ་བླ་མེད་དེར། །དེར་ནི་གུས་པའི་སྟོབས་ཉིད་དང་། །སྒོམ་པའི་སྟོབས་ཀྱིས་གང་སྤྲུལ་པ། །དེར་ནི་འབྱུང་བར་འགྱུར་བའི་གཟུགས། །ཀུན་དགའ་ལས་བྱུང་ཅི་ཡང་མཆོག །སྤྲོ་ཞིང་སྡུད་པར་བྱེད་པ་ཅན། །གསལ་པོར་ཡུད་ཀྱིས་བྱུང་གྱུར་པ། །ས་འོག་ས་སྟེང་ས་བླ་ཡི། །རྒྱུ་དང་མི་རྒྱུ་སྣང་བར་བྱེད། །དེ་ཉིད་སྒོམ་པའི་སྟོབས་ཀྱིས་ནི། །ཐབས་དང་ཤེས་རབ་དངོས་ཞི་བ། །ཉོན་མོངས་ཀུན་ལས་རྣམ་གྲོལ་ཞིང་། །མཚན་རྣམས་ཀུན་གྱིས་རྣམ་བརྒྱན་པ། །སྟོང་ཉིད་ཡེ་ཤེས་ལས་བྱུང་ཞེས། །གཉིས་མེད་མཆོག་ཏུ་ཞི་བ་ཉིད། །རྣམ་པ་ཀུན་ཏུ་མཆོག་ལྡན་ཞིང་། །གཟུང་དང་འཛིན་པ་རྣམ་པར་སྤངས། །རྣམ་དག་ཡེ་ཤེས་སྒྱུ་མའི་དངོས། །གསལ་ཞིང་རང་བཞིན་དྲི་མ་མེད། །ས་དང་དྲི་དང་རོ་ལས་འདས། །དེ་བཞིན་རེག་པ་རྣམ་པར་སྤངས། །ཏིང་འཛིན་ཡེ་ཤེས་མིག་གཉིས་ཀྱིས། །མཆོག་གཅིག་པུ་དེ་མཐོང་བར་འགྱུར། །བཟང་པོ་གྲིབ་མའི་སྒྱུ་འདྲ་བ། །འདུ་བྱེད་བཟང་པོ་བདེ་ལྡན་པ། །མེ་ཡིས་ཐག་པ་སྲེག་
པ་བཞིན། །ཉོན་མོངས་འཆིང་བ་ལས་གྲོལ་བ། །རྣམ་པ་སྣ་ཚོགས་ལུས་རྣམས་དང་། །ཡེ་ཤེས་རླབས་ཀྱི་ཕྲེང་བ་སྤྲོད། །དབང་པོའི་གཞུ་དང་འདྲ་བའི་སྐུ། །དེ་ཉིད་བསྒོམས་པས་ཐོབ་པར་འགྱུར། །རྣལ་འབྱོར་སྒོམ་པའི་ནུས་པ་དང་། །དམ་ཚིག་རྣམས་ནི་བསྐྱངས་བྱས་ལ། །རྒྱལ་བ་ཡིས་ཀྱང་བརྗོད་མེད་པའི། །དེ་འདྲའི་གཟུགས་ནི་ཐོབ་པར་འགྱུར། །ཞེས་སོ། །ལེའུ་བཞི་པ་ལས། གོང་མ་གོང་མའི་ལམ་@ཉིད་ཀྱིས། །བསྒོམ་པར་བྱ་བ་བཞི་པོ་ཉིད། །དང་པོར་ཡི་གེ་དགོད་པར་བྱ། །བསྐྱེད་པའི་རིམ་པ་ལ་གནས་པ། །སྒྲུབ་པོའི་དབང་པོས་བསྒོམ་པར་བྱ། །གཉིས་པ་ནང་གི་རང་བཞིན་ཉིད། །གསུམ་པ་བཟང་པོ་མཆོག་གྱུར་པ། །ཡེ་ཤེས་ཕྱག་རྒྱ་རྣམ་པར་བསྒོམ། །བཞི་པ་གོང་མར་གང་གསུངས་པ། །ཕྱག་རྒྱ་ཆེན་པོ་རྣམ་པར་བསྒོམ། །ཞེས་དང་། ཡི་གེ་དགོད་པའི་སྦྱོར་བ་ཡིས། །བསྒོམ་པར་བྱ་བ་གང་བསྟན་པ། །སེམས་ཅན་དང་པོའི་ལས་ཅན་རྣམས། །གཞུག་པར་བྱ་བའི་ཕྱིར་དུ་གསུངས། །ཞེས་དང་། བསྐྱེད་པའི་རིམ་པའི་ལམ་ཉིད་དུ། །གཅིག་ཉིད་རྣམ་པ་ལྔ་རུ་འགྱུར། །མངོན་པར་བྱང་ཆུབ་རྣམ་ལྔ་ཡིས། །ཡེ་ཤེས་མཆོག་ཏུ་དགེ་བ་ཉིད། །ཅེས་དང་། སྤྲོས་པ་ཀུན་ལས་རྣམ་གྲོལ་ཞིང་། གཟུགས་གང་མཆོག་ནི་ཞི་བ་ཉིད། །ཆོས་ཀྱི་དབྱིངས་ཀྱི་ངོ་བོ་ཤེས། །ཡེ་ཤེས་འདི་ལ་འདི་རབ་གྲགས། །
ཞེས་དང་། རྣལ་འབྱོར་ཕྱག་རྒྱ་གཟུགས་ལྡན་པའི། །དངོས་པོ་མེད་པའི་རང་བཞིན་གྱིས། །གཟུགས་བརྙན་ཡིད་ཀྱི་རང་བཞིན་ཉིད། །ཡོན་ཏན་མཐའ་མེད་འབྱུང་འགྱུར་བ། །སངས་རྒྱས་ཀྱིས་ཀྱང་མི་མཁྱེན་པའི། །དཔལ་ལྡན་མེ་ལོང་མིང་ཅན་དུ། །ཡེ་ཤེས་དེ་ལ་བརྗོད་པར་བྱ། །དངོས་པོ་མེད་པའི་རང་བཞིན་དུ། །དེར་ནི་འགོག་པའི་ཡེ་ཤེས་གང་། །དེ་ཡི་རང་བཞིན་རྣལ་འབྱོར་ལྡན། །མཉམ་ཉིད་ཡེ་ཤེས་ཞེས་བརྗོད་དོ། །རྒྱས་པ་ཅན་ཞེས་བྱ་བ་གང་། །ལྷ་རྫས་བུད་མེད་དཀྱིལ་འཁོར་རོ། །འབད་པས་སོ་སོར་རྟོག་གྱུར་པ། །དེ་བཞིན་གཤེགས་པ་ཀུན་གྱི་གནས། །ཞེས་དང་། །སངས་རྒྱས་གཟུགས་ནི་འོད་ཆེན་པོ། །བཟང་པོ་དེ་ནི་མཐོང་གྱུར་ནས། །ནམ་མཁའི་དབྱིངས་ཀྱི་གནས་བཟང་པོར། །རྣལ་འབྱོར་འདི་ལ་བརྟག་པར་བྱ། །ཞེས་དང་། དག་ཅིང་དྭངས་པ་དྲི་མེད་དེ། །དེ་བཞིན་གཤེགས་པ་ཀུན་གྱིས་མཆོད། །ཡེ་ཤེས་དེ་ནི་མདོར་བསྡུ་ན། །སོ་སོར་རྟོག་པ་ཞེས་བྱར་བརྗོད། །ཅེས་དང་། རྡོ་རྗེ་པདྨ་མཉམ་སྦྱོར་བས། །མཆོག་ཏུ་དགའ་བའི་གཟུགས་ཅན་གྱིས། །རྣམ་པ་སྣ་ཚོགས་གཟུགས་ལྡན་པའི། །ཡེ་ཤེས་རླབས་ཀྱི་ཕྲེང་བ་སྤྲོས། །བྱ་བ་ནན་ཏན་ཡེ་ཤེས་ཞེས། །མཆོག་ཏུ་གྱུར་པ་དེ་ལ་བརྗོད། །ཅེས་སོགས་ཤིན་ཏུ་རྒྱས་པར་བསྟན་ཅིང་། །ལྷག་མ་གསུམ་པོ་ཡང་། །བསྐྱེད་པའི་རིམ་ལ་ཉུང་ལྡན་པས། །
རྡོ་རྗེ་པདྨ་མཉམ་སྦྱོར་བ། །འདི་ནི་སྒོམ་པ་གཉིས་ཕ་སྟེ། །རང་གི་ངོ་བོ་ཡིན་ཞེས་གྲགས། །གསུམ་པ་དེ་ནི་བསྟན་པ་སྟེ། །ནང་གི་གོ་འཕང་བསྒོམས་པ་ཡིན། །རྣམ་པ་ཀུན་གྱི་མཆོག་ལྡན་པའི། །ཡེ་ཤེས་ཕྱག་རྒྱ་རབ་བརྟག་པའོ། །བཞི་པ་གོང་ན་མེད་པའི་རྒྱུ། །མངོན་པར་བྱང་ཆུབ་བྱེད་པ་པོ། །ཕྱག་རྒྱ་ཆེན་པོ་རྣམ་བསྒོམས་པ། །དེ་ཡི་གོང་ན་གཞན་མེད་པའོ། །ཞེས་པ་ལ་སོགས་པས་བསྟན་ཅིང་། །གཞན་ཡང་གཅིག་ཏུ་གསང་བའི་ས་ཕྱོགས་ཡོན་ཏན་བརྒྱ་ཡི་གཞིར་གྱུར་རིའམ་ཁྱིམ་སྟོང་ངམ། །སྐྱེད་ཚལ་ཉིད་དམ་བྲག་ཕུག་དུར་ཁྲོད་དག་གམ་ས་ཕུག་ཉམས་དགའ་བའམ། །དེ་ལྟར་དྲི་མེད་བྱས་པའི་ས་ཕྱོགས་དག་ཏུ་བཟང་པོ་མཚོན་ཅིང་བཟུང་། །ཡུལ་གྱི་བདེ་བསྐྱེད་དེ་ཉིད་རིན་ཆེན་རྡོ་རྗེ་ཅན་གྱི་འདུ་འཛི་སྤངས་ལ་བསྒོམ། །ཞེས་དང་། འཁོར་བར་རབ་ཏུ་འཆིང་གྱུར་པར། །ཁམས་གསུམ་པ་ཡིས་བསྟན་པའི་ལམ། །དེ་ཀུན་དངོས་པོ་མེད་གྱུར་པའི། །ཡེ་ཤེས་མཆོག་གི་རྣམ་འཕྲུལ་ཡིན། །ཞེས་དང་། དངོས་དང་དངོས་མེད་ལས་གྲོལ་ཞིང་། །སྤྲོས་པ་མེད་པའི་ངོ་བོ་ཉིད། །སངས་རྒྱས་ཀྱིས་ཀྱང་རྟོགས་མིན་ན། །སྐྱེ་བོ་གཞན་གྱིས་སྨོས་ཅི་དགོས། །ཞེས་དང་། སྒོམ་དང་བསྒོམས་པ་བསྒོམ་བྱ་དག །དོན་དམ་པར་ན་ཡོད་མ་ཡིན། །དེ་ཉིད་མཆོག་གྱུར་གཅིག་པུ་དེ། །བྱང་ཆུབ་སེམས་དཔའ་ཞེས་སུ་བརྗོད། །
ཅེས་དང་། ལྟ་བའི་བུད་ཤིང་ཕུང་པོ་རྣམས། །སྟོང་ཉིད་མེ་ཡིས་བསྲེགས་བྱས་ནས། །འདིར་ནི་མཉམ་ཉིད་ལ་གནས་ན། དེ་བཞིན་ཉིད་ཀྱི་མེ་ཡང་འགགས། །ཞེས་དང་། ལེའུ་ལྔ་པ་ཕྱག་རྒྱ་ཆེན་པོ་མངོན་པར་བསྟན་པ་ལས། ལུགས་བཅས་རིམ་པ་དེ་ཉིད་ངེས་པའི་བློ་ལྡན་སྒོམ་འགྱུར་རྡོ་རྗེ་ཅན། །འདོད་པའི་ཡིད་ཅན་བཟང་པོར་རབ་དགའི་ཡིད་ཅན་དངོས་གྲུབ་དོན་ཀུན་བསྒྲུབ། །མི་ཡི་ཚེ་འདི་ཉིད་ལ་འགྲུབ་འགྱུར་དཔལ་ལྡན་གསང་གྲུབ་ལ་གནས་ནས། །ཐབས་བཟང་དག་དང་ལྡན་པས་བརྗོད་མེད་མཆོག་གྱུར་གོ་འཕང་དམ་པར་འགྲོ། །ཞེས་སོགས་གསུངས་ཤིང་དབང་བསྐུར་བའི་ཆོ་ག་མདོ་ཙམ་བསྟན་ནོ། །ལེའུ་དྲུག་པ་གསང་བའི་སྤྱོད་པ་བསྟན་པ་ལས། མཚན་མ་མེད་ཅིང་སྣང་བ་མེད། །རང་གི་ལུས་ཀྱི་ཐབས་ལྡན་པའི། །རྡོ་རྗེ་སེམས་དཔའ་བདེ་བའི་མཆོག །འབད་པས་རབ་ཏུ་བསྒོམ་པར་བྱ། །ཞེས་དང་། ཏིལ་འབྲུ་ཙམ་གྱི་དངོས་པོ་ཡང་། །ཡོངས་སུ་གཟུང་བར་མི་བྱའོ། །ཡོངས་སུ་འཛིན་ལས་སྡུག་བསྔལ་འབྱུང་། །སྡུག་བསྔལ་གྱིས་ནི་སེམས་འཁོར་འགྱུར། །འཁོར་བས་སེམས་ནི་ཞུམ་འགྱུར་ཏེ། །ཞུམ་པས་དངོས་གྲུབ་ཉམས་པར་འགྱུར། །དངོས་གྲུབ་ཉམས་པས་འཁོར་བ་སྟེ། །འཁོར་བས་དམྱལ་བ་སྒྲུབ་པར་བྱེད། །དམྱལ་བར་ཉོན་མོངས་སྡུག་བསྔལ་གྱིས། །གྲངས་མེད་བསྐལ་པར་གནོད་པར་
འགྱུར། །ཞེས་དང་། ཐེག་པ་གསུམ་ལ་ཞུགས་རྣམས་ལ། །ཕྱག་ལ་སོགས་པ་མི་བྱའོ། །སངས་རྒྱས་དམ་པར་མ་འཛིན་ན། །རྣལ་འབྱོར་པ་གཞན་སྨོས་ཅི་དགོས། །ཞེས་དང་། ཕྱོགས་བཅུ་དག་ཏུ་རྣམ་པར་རྒྱུག་བྱེད་པའི། །རང་སེམས་གལ་ཏེ་འཛིན་པར་འདོད་གྱུར་ན། །སངས་རྒྱས་ཐོབ་པའི་རྒྱུར་གྱུར་རང་གི་སེམས། །དེ་ཚེ་ཡང་དག་སྦྱོར་བ་མཆོག་ཏུ་བྱ། །ཞེས་སོ། །ལེའུ་བདུན་པ་རིག་པའི་བརྟུལ་ཞུགས་ལས། འདོད་པའི་རྫུ་འཕྲུལ་ཆེ་ལྡན་ཞིང་། །ཆུ་དང་རྡུལ་དག་རྣམ་པར་སྤངས། །སྣ་ཚོགས་གཟུགས་དག་རབ་སྟོན་པའི། །ལྷ་རྫས་བཙུན་མོ་བསྟེན་པར་བྱ། །ཞེས་དང་། ལྷ་རྫས་བཙུན་མོ་འགུགས་པ་ཡི། །ནུས་པ་གལ་ཏེ་མེད་གྱུར་ན། །འདོད་ཆགས་གནོད་པ་ཉིད་གྱུར་ལ། །དེས་ན་མི་ཡི་བུ་མོ་བསྟེན། །ཞེས་སོ། །ལེའུ་བརྒྱད་པ་ཚོགས་ཀྱི་བརྟུལ་ཞུགས་ལས། །མགོ་བོའི་སྐྲ་ནི་བྲེགས་ནས་ཀྱང་། །རལ་པ་སྦོམ་པོ་གཅིག་བཞག་ལ། །གཙུག་ཕུད་གཅིག་ནི་བཟུང་བར་བྱ། །ཞེས་དང་། ཇི་སྲིད་རྣལ་འབྱོར་བྱང་ཆུབ་སེམས། །གཏོང་བར་བྱེད་པ་མ་ཡིན་པ། །དེ་སྲིད་ཀུན་དགའ་ལས་བྱུང་བདེ། །ཅི་ཡང་རྒྱུན་མི་འཆད་པ་ཐོབ། །བདེ་བ་དེ་ཡི་ངོ་བོ་དང་། །ཡང་དག་ལྡན་པའི་བྱང་ཆུབ་མཆོག །བདག་ཉིད་རྟག་ཏུ་བསྒོམས་ན་ནི། །འགྲུབ་འགྱུར་འདི་ལ་ཐེ་ཚོམ་མེད། །དངོས་གྲུབ་ཀུན་གྱི་གཏེར་གྱུར་པ། །བྱང་ཆུབ་
སེམས་ནི་དེར་ལྷུང་བས། །ཕུང་པོ་རྣམ་ཤེས་བརྒྱལ་གྱུར་ནས། །མ་སྨད་དངོས་གྲུབ་ག་ལ་ཡོད། ཅེས་སོ། །ལེའུ་དགུ་པ་དོན་དམ་པའི་སློབ་དཔོན་གྱི་མཆོད་པ་ངེས་པར་བསྟན་པ་ལས། །དམ་ཚིག་དག་ནི་ཐམས་ཅད་ལས། །བླ་མ་མཆོད་པ་མཆོག་ཡིན་ཏེ། །སངས་རྒྱས་རིན་ཆེན་ཟ་མ་ཏོག །དཔལ་ལྡན་འདུས་པའམ་གཞན་དུ་བསྟེན། །ཞེས་དང་། ཁམས་གསུམ་རིན་པོ་ཆེར་གྱུར་པ། །སློབ་དཔོན་ལས་ནི་མཆོག་གཞན་མེད། །གང་ལས་བཀའ་དྲིན་ཐོབ་པ་ནི། །མཁས་པས་དངོས་གྲུབ་དུ་མ་ཐོབ། །ཅེས་དང་། གང་གིས་སངས་རྒྱས་རྣམས་ཀྱི་ཆོས། །ནམ་མཁའ་ལྟ་བུ་མི་ཤེས་པས། །ཐེག་པ་མཆོག་འདི་ཐོས་གྱུར་ནས། །སེམས་ཅན་དེ་ནི་སྐྲག་གྱུར་ན། །རྡོ་རྗེ་ཐེག་པ་སྨོད་པ་དེ། །ངན་འགྲོ་དག་ཏུ་འགྲོ་བར་འགྱུར། །ཞེས་དང་ཡང་། མུན་པ་ལས་ནི་མར་མེ་བཞིན། །བདེ་ཆེན་མགོན་པོ་གཅིག་པུ་ཉིད། །གང་ཞིག་རྟག་ཏུ་དྲན་བྱེད་ཅིང་། །ཞབས་ཀྱི་པདྨོ་གཉིས་གུས་པས། །སྡིག་པ་ཐམས་ཅད་ཟད་གྱུར་ནས། །སེམས་ཅན་དེ་ཉིད་དེ་ཡི་མཐུས། །པད་བསྣམས་འཇིག་རྟེན་མགོན་པོ་ལྟར། །དངོས་གྲུབ་ཀུན་གྱི་གཏེར་གྱུར་པ། །དུས་མི་རིང་བར་འགྱུར་བ་ཉིད། །ཅེས་གསུངས་སོ། །བདེ་བ་ཆེན་པོ་པདྨ་བཛྲ་གྱི་ཞལ་ལུང་བདུད་རྩིའི་ཕུང་པོ་འདི་ཉིད། །རྒྱ་གར་གྱི་པཎྜི་ཏ་ཀྲྀཥྛ་པ་དང་། ལོ་ཙཱ་བ་ཚུལ་ཁྲིམས་རྒྱལ་
བས་བསྒྱུར་བ་སྟེ། གཞུང་གི་དུམ་བུ་ཅུང་ཟད་བཏུས་པའོ། །ཇི་ལྟར་ཟླ་བའི་འཛུམ་རླབས་ཀྱིས། །ཀུནྡའི་ནགས་ཚལ་བྱེ་བ་བཞིན། །གསང་བ་གྲུབ་པའི་ལུང་འདི་ཡིས། །གྲུབ་པའི་བློ་མཆོག་གྲོལ་བར་ཤོག །ཤུ་བྷཾ། །སློབ་དཔོན་ཡན་ལག་མེད་པའི་རྡོ་རྗེས་མཛད་པའི་ཐབས་དང་ཤེས་རབ་རྣམ་པར་གཏན་ལ་དབབ་པ་གྲུབ་པ་ལས། །ཤེས་རབ་ཐབས་རྣམ་པར་སྤྲོས་པ་ཕྱེ་བའི་ལེའུ་དང་པོར། །བྱིས་པས་འཁྲུལ་པ་བདེན་མིན་པའི། །ཀུན་ཏུ་རྟོག་པ་ལས་བྱུང་དངོས། །ཀུན་ཏུ་རྟོག་པའི་བདག་ཉིད་ཅན། །དེ་ནི་སྲིད་པར་མཁས་པས་བཤད། །ཅེས་དང་། མར་མེ་འབར་བ་བསད་རུང་གི །ཤི་ནས་ཅི་ཡང་བྱར་མེད་པར། །དངོས་པོར་འཛིན་པ་ཉིད་རུང་གི །དངོས་མེད་འཛིན་པ་དེ་ལྟ་མིན། །ཞེས་དང་། རྟག་ཏུ་རྗེས་མཐུན་སྦྱོར་བ་ཡིས། །སྐྱེ་བོ་མངོན་པར་འདོད་པ་ཡིས། །འབྲས་བུ་གང་ཡིན་ཉེར་སྦྱིན་པ། །དེ་ནི་ཐབས་ཞེས་བྱ་བར་བསྒྲགས། །ཞེས་དང་། དཔག་མེད་བདེ་བའི་རང་བཞིན་ཕྱིར། །དཔལ་ལྡན་བདེ་ཆེན་ཞེས་བྱ་བ། །ཀུན་ཏུ་བཟང་པོ་མཆོག་ཉིད་དང་། །མངོན་པར་བྱང་ཆུབ་བྱེད་པ་པོ། །ཞེས་སོ། ལེའུ་གཉིས་པར། དེ་འདི་ཡིན་ཞེས་རྒྱལ་བས་ཀྱང་། །དེ་ནི་བརྗོད་པར་ནུས་མ་ཡིན། །སོ་སོ་རང་རིག་རང་བཞིན་ཕྱིར། །ངག་གི་ལམ་གྱིས་གཟུང་བྱ་མིན། །དེ་ལྟ་ན་ནི་དུས་གསུམ་གྱི། །སངས་རྒྱས་འགྲོ་རྣམས་
དགའ་མཛད་པ། །མདོ་སྡེ་དུ་མ་གསང་སྔགས་ཀྱི། །སྤྱོད་པ་ལ་སོགས་རིམ་གྱིས་བཤད། །ཅེས་དང་། དེ་བས་དམ་པ་དོན་གཉེར་བའི། །སྐྱེས་བུའི་དངོས་པོ་ཐམས་ཅད་ཀྱིས། །དཔག་མེད་འབྲས་བུ་སྟེར་བ་ཡི། །སློབ་དཔོན་ཀུན་ཏུ་བསྟེན་པར་བྱ། །ཞེས་དང་། བརྟན་པས་གཡོ་དང་ཟོལ་དང་ང་རྒྱལ་སྒྲིབ་པ་ཐམས་ཅད་ཡོངས་སུ་སྤངས་ནས་ནི། །མན་ངག་ལྡན་པའི་བླ་མ་མཚུངས་པ་མེད་པ་དད་པས་འདིར་ནི་བསྟེན་པར་བྱ། །དེས་དེ་ངེས་པར་རྒྱལ་བའི་ཡོན་ཏན་གཏེར་གྱུར་དེ་ཉིད་རིན་ཆེན་རྙེད་གྱུར་ནས། །བདེ་གཤེགས་ཀུན་གྱིས་བརྙེས་པའི་བྱང་ཆུབ་མཆོག་ནི་འཐོབ་པར་འགྱུར། །ཞེས་སོ། །ལེའུ་གསུམ་པ་བྱང་ཆུབ་སེམས་ཀྱི་དབང་བསྐུར་བ་ངེས་པར་ཕྱེ་བ་ལས། །ཆོ་ག་འདི་དག་ཉིད་ཀྱིས་དབང་བསྐུར་བྱིན་ནས་ནི། །སློབ་མ་ལྷག་པར་མོས་པའི་ཡིད་ཀྱིས་བརྟགས་བྱས་ལ། །ཟབ་ཅིང་རྒྱ་ཆེ་བ་ལ་ལྷག་པར་མོས་ནས་ནི། །ཚིག་གི་སྒོ་ནས་རིན་ཆེན་དབང་བསྐུར་སྦྱིན་པར་བྱ། །དབང་བསྐུར་མཆོག་ནི་མ་ལུས་ཐོབ་པར་འགྱུར་བ་སྟེ། །རྡོ་རྗེ་མཆོག་འཛིན་རྙེད་དཀའ་མཚུངས་པ་མེད་པའི་གནས། །ལོངས་སྤྱོད་རྫོགས་པ་དང་ནི་དཔལ་གྱི་ཞིང་གྱུར་པ། །བྱང་ཆུབ་སེམས་ཅན་དབང་བསྐུར་དེ་དག་བླང་བར་བྱ། །ཞེས་སོ། །ལེའུ་བཞི་པ་དེ་ཁོ་ན་ཉིད་སྒོམ་པའི་རིམ་པར་ཕྱེ་བ་ལས། གོང་ན་སྒོམ་པ་པོ་མེད་ཅིང་། །རྣམ་པར་
བསྒོམས་པ་ཅི་ཡང་མེད༑ །བསྒོམ་བྱ་ཉིད་ཀྱང་ཡོད་མིན་པ། དེ་ནི་སྟོང་ཉིད་བསྒོམ་པར་བཤད། ཅེས་དང་། ཀུན་རྟོག་མུན་པ་སྡུག་བསྔལ་སྟུག་པོས་ཟིལ་གནོན་ཞིང་། །འདོད་ཆགས་ལ་སོགས་བཟློག་དཀའི་དྲི་མས་གཡོགས་གྱུར་པའི། །རབ་ཏུ་འཐོར་རླུང་གིས་བསྐྱོད་གློག་ལྟར་གཡོ་བ་ཡི། །སེམས་ནི་འཁོར་བ་ཡིན་པར་རྡོ་རྗེ་ཅན་གྱིས་གསུངས། །རྟོག་པ་ལས་ནི་རྣམ་པར་གྲོལ་ཞིང་འོད་གསལ་བ། །འདོད་ཆགས་ལ་སོགས་དྲི་མའི་སྒྲིབ་གཡོགས་རབ་ཏུ་སྤངས། །གཟུང་བ་དང་ནི་འཛིན་པ་མེད་ན་དེ་ཉིད་ནི། །མྱ་ངན་འདས་པའི་དོན་དུ་སེམས་ཅན་མཆོག་གིས་གསུངས། །ཞེས་སོ། །ལེའུ་ལྔ་པ་དེ་ཁོ་ན་ཉིད་སྤྱོད་པའི་ངེས་པར་ཕྱེ་བ་ལས། །སྒྲུབ་པ་པོ་ལ་ཕན་གདག་ཕྱིར། །ཁམས་གསུམ་པ་ནི་མ་ལུས་པ། །འདི་དག་ཐམས་ཅད་ལོངས་སྤྱོད་ཕྱིར། །རྡོ་རྗེ་སེམས་དཔས་སྤྲུལ་པ་ཡིན། །ཞེས་དང་། །ཡེ་ཤེས་མཐའ་ཡས་རྙེད་པ་ཡི། །དེ་བཞིན་གཤེགས་ལའང་ཕྱག་མིན་ན། །རྟག་ཏུ་བསྒོམས་ལ་འགྲུབ་པ་ཡི། །ལུགས་མ་ལ་སོགས་སྨོས་ཅི་དགོས། །ཞེས་དང་། གཉིས་མེད་མཚུངས་པ་མེད་པ་གང་ཡིན་ཉིན་རེ་བཞིན། །དེ་ཉིད་མཆོག་ནི་རྒྱུན་དུ་རྗེས་སུ་བསྟེན་པར་བྱ། །འདི་ཡིས་དྲི་མ་མེད་ཅིང་རྡོ་རྗེ་ལྟ་བུ་དང་། །གྲིབ་མ་ལྟ་བུའི་སྐུ་ནི་མཚུངས་མེད་ཐོབ་པར་འགྱུར། །བློ་དང་ལྡན་པས་ཤེས་རབ་ཀྱིས་ནི་ཆོས་རྣམས་ཀུན། །རང་བཞིན་
གྱིས་ནི་དྲི་མ་མེད་པར་རྣམ་འབྱེད་དེ། །འཇིག་རྟེན་གསུམ་གྱི་སྡུག་བསྔལ་ཟད་པར་བྱ་བའི་ཕྱིར། །ཉིན་རེར་བརྩོན་འགྲུས་གོ་ཆ་ཆེན་པོ་བགོས་ནས་སུ། །དངོས་པོ་ཀུན་གྱི་རང་བཞིན་དཔལ་ལྡན་རྡོ་རྗེ་སེམས། །ཡོན་ཏན་མ་ལུས་པ་ཡི་གཏེར་གྱུར་བསྒོམ་པར་བྱ། །སེམས་ནི་བྱང་ཆུབ་ངོ་བོར་བཞག་ནས་ཡུལ་གྱི་ནི། །བདེ་ལ་དགའ་བས་ཚེ་འདི་ཉིད་ལ་འགྲུབ་པར་འགྱུར། །རང་བཞིན་གྱིས་ནི་མ་ལུས་འདི་དག་རྣམ་དག་སྟེ། །ཐ་མལ་ཡུལ་རྣམས་བདག་མེད་སྒྱུ་མ་ལྟ་བུ་དང་། །མིག་འཕྲུལ་དང་ནི་མིག་ཡོར་དག་དང་མཚུངས་པ་སྟེ། །གནས་མེད་རྟོག་པའི་ཐ་སྙད་དག་ལས་རྣམ་པར་གྲོལ། །གང་ཚེ་སྐྱེས་བུ་དམ་པ་རྒྱ་ཆེན་བསམ་པ་དང་། །འཛིན་པ་མེད་པའི་སེམས་ནི་ཀུན་ཏུ་རྟོག་གྱུར་པ། །དེ་ཚེ་ལྷན་ཅིག་སྐྱེས་པའི་རྟོག་པས་ཟིལ་གནོན་ཏེ། །ཡུལ་འདི་རྣམས་ཀྱི་ནུས་པས་འཆིང་བར་ནུས་མ་ཡིན། །གང་རྣམས་རྙེད་དང་མ་རྙེད་གྲགས་དང་མ་གྲགས་དང་། །བདེ་བ་དང་ནི་སྡུག་བསྔལ་རབ་ཏུ་རྒྱས་པ་དང་། །བསྟོད་པ་དང་ནི་སྨད་པའི་དྲི་མ་མ་ལུས་པ། །ཟད་པས་རང་གི་སེམས་ནི་མཉམ་པ་ཉིད་དུ་བྱ། །ཆགས་པ་མེད་དང་འགྲོ་ལ་སྙིང་ནི་བརྩེ་བ་ཡིས། །རྣམ་པར་རྟོག་པ་ཐམས་ཅད་ལས་གྲོལ་སྤྱོད་པ་དང་། །ལྡན་པ་དེ་ཡི་ཕྱག་ན་བདེ་གཤེགས་གོ་འཕང་ནི། །གནས་པ་ཡིན་ཞེས་རྡོ་རྗེ་སེམས་དཔའ་རབ་ཏུ་གསུངས། །ཞེས་གསུངས་སོ། །
གཞུང་འདི་པཎྜི་ཏ་ཤཱནྟི་བྷ་དྲ་དང་། འགོས་ལྷས་བཙས་ཀྱིས་བསྒྱུར་བ་སྟེ། ཉེ་བར་མཁོ་བའི་དུམ་བུ་འགའ་ཞིག་གུད་དུ་ཕྱུང་བ་ཤུ་བྷཾ། །སློབ་དཔོན་ཨིནྡྲ་བྷཱུ་ཏིས་མཛད་པའི་ཡེ་ཤེས་གྲུབ་པ་ཞེས་བྱ་བའི་སྒྲུབ་ཐབས་ལས། ལེའུ་དང་པོ་ཕྱག་རྒྱ་ཆེན་པོ་བསྟན་པ་ཞེས་བྱ་བར། །སེམས་ཅན་ཀུན་གྱི་ཡིད་ཁྱབ་པར། །རྡོ་རྗེ་སེམས་དཔའ་རང་ཉིད་བཞུགས། །དེ་ལྟར་བསམས་ནས་རྣལ་འབྱོར་གྱི། །དབང་པོ་གང་ལའང་བརྙས་མི་བྱ། །ཞེས་དང་། བཟའ་དང་བཟའ་མིན་ལས་འདས་དང་། །བཏུང་དང་བཏུང་མིན་རྣམ་པར་སྤངས། །བགྲོད་དང་བགྲོད་མིན་རྣམ་གྲོལ་བདག །རྣལ་འབྱོར་པ་ནི་མཉམ་འཇོག་འགྱུར། །ཞེས་དང་། །གང་ལ་བླ་མའི་དྲིན་ཡོད་པ། །དེ་ཡིས་དེ་ཉིད་མཆོག་རྙེད་འགྱུར། །གཞན་དུ་བྱིས་པས་ཡུན་རིང་དུ། །རྣམ་པར་རྨོངས་པས་ཉོན་མོངས་འགྱུར། །ཞེས་དང་། དེ་མཉམ་འགྲོ་བ་འཇིག་རྟེན་ན། །ཁམས་གསུམ་ན་ནི་གཞན་མེད་དེ། །རྡོ་རྗེ་སེམས་ཉིད་འཇིག་རྟེན་ན། །ཕུན་སུམ་ཚོགས་ཀུན་ཕྱིར་ཞུགས་ཡིན། །ཞེས་དང་། རྟོག་པ་ཐམས་ཅད་རྣམ་སྤངས་པའི། །ཡེ་ཤེས་མཆོག་བཟང་ཐོབ་པ་ཡིས། །རྡོ་རྗེ་ཡེ་ཤེས་དབང་བསྐུར་བས། །དངོས་གྲུབ་མཆོག་ནི་བསྒྲུབ་པར་བྱ། །ཡང་དག་ཡེ་ཤེས་ཀུན་ལྡན་ན། །བྲིས་པའི་དཀྱིལ་འཁོར་ལོགས་གཞན་དུ། །དབང་བསྐུར་བ་ནི་ལེན་ཅེ་ན། །འདི་ནི་དམ་ཚིག་ཉམས་པར་
འགྱུར། །དམ་ཚིག་ཉམས་པའི་སྡུག་བསྔལ་ནི། །ལུས་དང་དེ་བཞིན་ཡིད་དང་ནི། །དེ་ཡི་དོན་རྣམས་ཉམས་འགྱུར་ཞིང་། །མྱུར་བ་ཉིད་དུ་ཤི་བར་འགྱུར། །ཤི་ནས་དམྱལ་པའི་སྡུག་བསྔལ་ནི། །བསྐལ་པ་བྱེ་བ་བརྒྱ་ཕྲག་ཏུའང་། །མྱོང་ནས་གནས་ལས་འཕོས་གྱུར་ནའང་། །གདོལ་པའམ་དམན་པའི་རིགས་སུ་སྐྱེ། །ལྐུགས་པའམ་ཡང་ན་འོན་པའམ། །སྐྱེ་ཞིང་སྐྱེ་བར་དམུས་ལོང་དུ། །སྐྱེ་བར་འགྱུར་བ་ཐེ་ཚོམ་མེད། །དེ་བཞིན་གཤེགས་ཀུན་ཡེ་ཤེས་ནི། །རྡོ་རྗེ་ཡེ་ཤེས་ཞེས་བྱར་བཤད། །བློ་ལྡན་དེ་ཡིས་དབང་བསྐུར་ན། །དབང་བསྐུར་བར་ནི་ཤེས་པར་བྱ། །རྣལ་འབྱོར་སངས་རྒྱས་ཀུན་བདག་ཉིད། །འགྲོ་བའི་བདག་པོ་ལ་སོགས་པའི། །ཚོགས་ཀྱིས་ཐལ་མོ་སྦྱར་ནས་ནི། །བྱས་ནས་མངོན་པར་ཕྱག་བྱེད་འགྱུར། །བྱང་ཆུབ་སེམས་དཔའ་སྟོབས་ཆེན་དང་། །བདག་ཉིད་ཆེན་པོ་སངས་རྒྱས་ཀྱང་། །དཔལ་ཆེན་བསྲུང་བར་མཛད་གྱུར་ཏེ། །རྡོ་རྗེ་སྐུ་ཡིས་རྟག་ཏུ་བཞུགས། །བདེན་པའི་ཆོས་འཛིན་མི་འཁྲུགས་ཤིང་། །སངས་རྒྱས་གདུང་ནི་རབ་འཇུག་པ། །བྱིན་གྱིས་བརླབས་དང་ལྡན་པ་རྣམས། །གུས་དང་བཅས་པས་བསྔགས་པར་མཛད། །འཇིག་རྟེན་སྐྱོང་བ་དེ་བཞིན་གཞན། །སྟོབས་ཆེན་ཕ་རོལ་གནོན་པ་རྣམས། །གནས་རྣམས་ཀུན་ཏུ་རྟོགས་པ་ནའང་། །གསུང་བཞིན་དུ་ནི་རབ་ཏུ་གནས། །གང་ཡང་སེམས་ཅན་ཐམས་ཅད་ལ། །
བདུད་དང་བགེགས་སུ་གནས་པ་རྣམས། །དེ་ཡང་དེ་ལ་མི་བྱེད་དེ། །བགེགས་རྣམས་སྐྲག་ནས་འབྱེར་བར་འགྱུར། །ལྷ་ལ་སོགས་པ་གྲུབ་པ་རྣམས། །མཁའ་ལ་རྒྱུ་དང་མི་རྒྱུ་ཀུན། །ངན་འགྲོར་འགྲོ་བས་འཇིགས་པས་ན། །དེ་ཡང་དེ་ལ་མགོན་མི་བྱེད། །གལ་ཏེ་རྨོངས་པའི་དབང་གིས་ནི། །རྣམ་པར་རྨོངས་རྣམས་མགོན་བྱེད་ན། །བརྩོན་དང་ཡེ་ཤེས་རྣམ་ཤེས་དང་། །དངོས་གྲུབ་དག་ཀྱང་ཉམས་པར་འགྱུར། །ཀུན་མཁྱེན་མཆོག་སྦྱིན་གསུངས་པའོ། །དབྱིབས་ཀུན་དང་ནི་རྣམ་བྲལ་ཞིང་། །འགྲོ་དང་འོང་ལས་རྣམ་གྲོལ་བདག །རླུང་ཀུན་ཀྱིས་ཀྱང་བསྐྱོད་མི་ནུས། །མེ་ཡི་ཕུང་པོས་མི་ཚིག་ཅིང་། །ཆུ་རྣམས་ཀྱིས་ཀྱང་གཡེངས་མི་འགྱུར། །རབ་ཏུ་འབད་པས་མཚོན་ཆ་ནི། །རྣོན་པོས་ཀྱང་ནི་ཆོད་མི་འགྱུར། །ཇི་ལྟར་མི་གནས་ནམ་མཁའ་ནི། །ཁྱབ་ཅིང་མཚན་ཉིད་རྣམས་དང་བྲལ། །འདི་ན་དོན་དམ་དེ་ཉིད་དེ། །རྡོ་རྗེ་ཡེ་ཤེས་བླ་ན་མེད། །ཀུན་ཏུ་བཟང་པོ་ཞེས་བཤད་ཅིང་། །ཕྱག་རྒྱ་ཆེན་པོ་ཞེས་ཀྱང་བྱ། །འདི་ནི་ཆོས་སྐུར་ཤེས་བྱ་སྟེ། །མེ་ལོང་ཡེ་ཤེས་ཞེས་ཀྱང་བྱ། །ཇི་ལྟར་གཟུགས་བརྙན་མེ་ལོང་ལ། །རང་ཉིད་ངེས་པར་སྣང་བ་ལྟར། །དེ་བཞིན་ཆོས་སྐུར་ཡེ་ཤེས་ནི། །སྣང་བས་མེ་ལོང་ཞེས་བྱའོ། །དེ་བཞིན་གཤེགས་ཀུན་ཡེ་ཤེས་དང་། །རང་གི་དང་ནི་འགྲོ་བའི་ཡང་། །དངོས་ཉིད་གཅིག་པུར་ཐུགས་སུ་ཆུད། །
མཉམ་ཉིད་ཡེ་ཤེས་ཞེས་བྱའོ། །གདོད་ནས་དག་ཅིང་སྐྱེ་བ་མེད། །རང་བཞིན་གྱིས་ནི་འོད་གསལ་བ། །ཕན་ཚུན་ཁྱབ་པའི་ཡེ་ཤེས་པས། །སོ་སོར་རྟོག་པ་ཅན་ཞེས་བཤད། །ཀུན་ཏུ་ཀུན་ནས་སངས་རྒྱས་ཀྱི། །མཛད་པ་ཐམས་ཅད་ལ་འཇུག་པ། །སངས་རྒྱས་ཐམས་ཅད་མཛད་གཅིག་པས། །བྱ་བ་གྲུབ་པ་ཞེས་བཤད་དོ། །གང་ཚེ་ཉོན་མོངས་ཤེས་བྱའི་སྒྲིབ། །ཐམས་ཅད་ལས་གྲོལ་དེ་ཡི་ཚེ། །རྣལ་འབྱོར་པ་མཆོག་རྡོ་རྗེ་ཅན། །ཤིན་ཏུ་རྣམ་དག་ཅེས་བཤད་དོ། །ཇི་ལྟར་གདུལ་བྱའི་ཆོས་རྣམས་དང་། །འདོད་ཡོན་ཀུན་ལ་སངས་རྒྱས་རྣམས། །ཐམས་ཅད་ལོངས་སྤྱོད་གཅིག་པས་ན། །ལོངས་སྤྱོད་རྫོགས་པའི་སྐུར་འདོད་དོ། །མཚན་རྣམས་ཀུན་དང་ཡང་དག་ལྡན། །སྣ་ཚོགས་སྐུ་སྟེ་མཚན་ཉིད་མེད། །སངས་རྒྱས་རྣམས་ཀྱི་སྤྲུལ་པ་བས། །སྤྲུལ་པའི་སྐུར་ནི་བཤད་པ་ཡིན། །ཕྱག་རྒྱ་ཆེན་པོ་རབ་བསྒྲུབ་ཕྱིར། །ཤེས་ནས་རྣལ་འབྱོར་པས་དེ་བསྒོམས། །ཀུན་རྟོག་ཐམས་ཅད་རྣམ་སྤངས་ན། །ཚེ་འདི་ཉིད་ལ་འགྲུབ་པར་འགྱུར། །ཞེས་སོགས་རྒྱས་པར་གསུངས་སོ། །ལེའུ་གཉིས་པ་གཟུགས་སུ་བསྒོམ་པ་དགག་པ་ལས། །གལ་ཏེ་མགོན་མེད་སྐྱེ་བོ་འགའ། །རྒྱལ་པོར་འགྱུར་རོ་ཞེས་བསྒོམས་པས། །བསྐལ་པ་བྱེ་བ་བརྒྱ་ཡིས་ཀྱང་། །འདི་ནི་རྒྱལ་པོ་ཐོབ་མི་འགྱུར། །གང་ཞིག་ལོག་པར་རྟོག་པས་ནི། །དེ་ལ་རྒྱལ་པོ་ཡོད་མིན་
ལྟར། །དེ་བཞིན་ལོག་པའི་སྒོམ་པ་ཡིས། །སངས་རྒྱས་ཉིད་དུ་འགྱུར་མ་ཡིན། །ཞེས་དང་། གལ་ཏེ་བྱས་པའི་ལྷ་ཡི་གཟུགས། །རྡོ་རྗེ་སེམས་དཔར་གྱུར་ན་ཀོ །གང་ཕྱིར་འདུས་བྱས་ལས་བྱུང་བས། །བུམ་པ་ལ་སོགས་བཞིན་དུ་འཇིག །ཅེས་སོ། །ལེའུ་གསུམ་པ་རྣམ་པ་དང་བཅས་པའི་ཡེ་ཤེས་དགག་པ་ལས། །དེ་ལྟར་གཟུགས་སུ་བསྒོམས་པ་ཡིས། །རྡོ་རྗེ་སེམས་དཔའ་མི་འགྲུབ་སྟེ། །རྣམ་བཅས་རྟོག་པས་ཀྱང་དེ་བཞིན། །རྡོ་རྗེ་སེམས་དཔའ་མི་འགྲུབ་བོ། །ཞེས་དང་། གཟུགས་མེད་གཟུགས་སུ་མི་འགྱུར་ཏེ། །གཟུགས་མེད་གཟུགས་ཅན་ཡོད་མ་ཡིན། །ཡེ་ཤེས་གཟུགས་ནི་མེད་པར་གྲགས། །རྣམ་པ་གཟུགས་ཅན་ཡིན་པར་བཤད། །ཅེས་དང་། ཡེ་ཤེས་འབྱུང་བའི་དུས་སུ་ཡང་། །རྣམ་པ་ཀུན་ཏུ་མི་འབྱུང་ལ། །རྣམ་པའང་ཀུན་ཏུ་འབྱུང་བ་ན། །ཡེ་ཤེས་ཉིད་ནི་མི་རིགས་སོ། །ཞེས་དང་། ཡེ་ཤེས་རྣམ་བཅས་ཡིན་ཞེས་པ། །རྣམ་པ་དང་བྲལ་མ་ཡིན་ཏེ། །རྣམ་པ་དང་བཅས་ཡེ་ཤེས་ནི། །རྣམ་བཅས་ཉིད་དུ་ཇི་ལྟར་འགྱུར། །ཞེས་སོགས་རྒྱས་པར་བསྟན་ནོ། །ལེའུ་བཞི་པ་རྣམ་པ་མེད་པ་དགག་པ་ལས། གལ་ཏེ་རྣམ་པ་མེད་ན་ཡང་། །ཡེ་ཤེས་འགྱུར་བ་རྣམ་རྟོག་ན། །རྣམ་པ་དང་ནི་རྣམ་བྲལ་བ། །འདིས་ཅི་རིག་ན་ཀུན་རིག་ཡིན། །ཀུན་མཁྱེན་དེ་ལ་ཡོད་མིན་ཞིང་། །ཡེ་ཤེས་ཞེས་བྱ་རྟོག་པ་ཉིད། །རྣམ་པ་
ཐམས་ཅད་མི་གཟིགས་པས། །བེམ་པོ་ཉིད་དུ་ཐལ་བར་འགྱུར། །བེམ་མེད་རྟོག་པའི་ངོ་བོ་ནི། །རྣམ་པ་མེད་པ་ཡིན་པར་བཤད། །ཅེས་དང་། གལ་ཏེ་གཟུགས་སོགས་དངོས་པོ་རྣམས། །རྣམ་པ་ཀུན་ཏུ་ཡོད་མིན་ན། །སངས་རྒྱས་ཐུགས་རྗེའི་བདག་ཉིད་ཀྱི། །ལྷ་ཡི་སྤྱན་ནི་ཇི་ལྟར་འགྲུབ། །ལྷ་ཡི་སྙན་སོགས་ཐམས་ཅད་ཀྱང་། །དེ་བཞིན་དུ་ནི་ཡོད་མིན་པས། །མངོན་པར་ཤེས་པ་མེད་པའི་ཕྱིར། །དེ་བས་ཀུན་མཁྱེན་མེད་པར་འགྱུར། །ཞེས་དང་། སེམས་ཅན་ཀུན་དོན་ལེགས་བསྒྲུབ་ཕྱིར། །གང་ཚེ་ངེས་པ་ཉིད་འགྱུར་བས། །ཡེ་ཤེས་ཡིད་བཞིན་ནོར་བུ་བཤད། །བེམ་པོའི་བདག་ཉིད་མ་ཡིན་ནོ། །ཞེས་སོགས་གསུངས་སོ། །ལེའུ་ལྔ་པ་རྨོངས་པ་བསྒོམས་པ་དགག་པར། །ཤིན་ཏུ་རྨོངས་སྐབས་ཡེ་ཤེས་ནི། །རྣལ་འབྱོར་པ་ནི་ལ་ལ་འདོད། །རྨོངས་པ་བསྒོམས་པས་རྨོངས་པས་ནི། །ཚུལ་ངན་ཉིད་རྣམས་ཐོབ་པར་འགྱུར། །ཐམས་ཅད་རྒྱུ་དང་མཚུངས་པ་ཡི། །འབྲས་བུ་འཇིག་རྟེན་ལས་སྤྱོད་དོ། །ཀོ་ཊ་པ་ལས་འབྲས་སྐྱེ་བ། །གང་ལའང་ཡོད་པ་མ་ཡིན་ནོ། །ཞེས་སོགས་གསུངས་སོ། །ལེའུ་དྲུག་པ་དབུགས་རྔུབས་པ་དང་དབྱུང་བའི་དེ་ཁོ་ན་ཉིད་དགག་པར། དབུགས་འབྱུང་མ་ཡིན་རྡུབས་མིན་ནི། །དེ་ཉིད་གྲུབ་པར་རིགས་པ་མིན། །དེ་གཉིས་དབུས་ནའང་ཡོད་མ་ཡིན། །རླུང་གི་དེ་ཉིད་ཇི་ལྟར་འགྱུར། །
ཞེས་དང་། ལུས་ཀྱིས་འབུད་པ་གང་ཡིན་པ། །སྦྱད་པ་འབུད་པར་བྱེད་པ་དག །དེ་དག་ཁྱད་པར་མ་མཐོང་སྟེ། །དེ་ཉིད་མཐོང་བའི་རྣལ་འབྱོར་པས། །འབུད་པ་ཡི་ནི་བྱ་བ་མིན། །ཞེས་དང་། ཡང་། མངོན་པར་རྨོངས་ཤིང་ལམ་ཉམས་རྣམས། །ལོག་པའི་དོན་ནི་རབ་སྒོམ་པ། །དེ་དག་བདེ་འགྲོར་མི་སྐྱེ་སྟེ། །དམྱལ་བ་གཅིག་པུར་འགྲོ་བ་ཉིད། །ཅེས་གསུངས། ལེའུ་བདུན་པ་བདེ་བ་ཆེན་པོ་སྨྲ་བ་དགག་པའི་ཚུ ལེའུ་ལས། དབང་པོ་གནས་བྱུང་བདེ་བ་ནི། །དེ་ཉིད་ཡིན་ཞེས་སྐྱེ་ངན་སྨྲ། །དེ་ནི་བདེ་བ་ཆེ་ཡིན་ཞེས། །རྒྱལ་བ་མཆོག་གིས་མ་གསུངས་སོ། །རྟེན་ཅིང་འབྲེལ་འབྱུང་ལས་སྐྱེས་པ། །གང་དུ་དེ་ཉིད་ཤེས་ཟླམི་འགྲུབ། །གང་ཕྱིར་འདི་དེ་ཐམས་ཅད་དུ། །ངོ་བོ་ཉིད་ཀྱིས་ཡོད་མ་ཡིན། །བདེ་གཤེགས་ཀུན་གྱི་ཡེ་ཤེས་ནི། །རང་གི་ངོ་བོ་ཉིད་མཁྱེན་པའི། །བདེ་བ་ཀུན་གྱི་གཙོར་གྱུར་པས། །བདེ་བ་ཆེན་པོ་ཞེས་༧ བཤད་དོ། །བདེ་ཆེན་མི་རྟག་མ་ཡིན་ཏེ། །བདེ་བ་ཆེན་པོ་རྟག་ཏུ་རྟག །མཆན་ཁུང་གཡའ་འཕྲུགས་ལས་བྱུང་བ། །ཅི་ཡི་ཕྱིར་ན་བདེ་ཆེན་མིན། །ཆགས་དང་མཉམ་པའི་བདེ་མེད་དེ། །དེ་ནི་རྒྱལ་བ་རྣམས་ལ་ཕུལ། །འདོད་པའི་དོན་ཀུན་ལོངས་སྤྱོད་ཅིང་། །སྨོད་པ་དག་ཏུ་མི་བྱ་ཞེས། །རྣལ་འབྱོར་རྒྱུད་ནི་ཐམས་ཅད་ལས། །རྡོ་རྗེ་སེམས་དཔས་གསུངས་པ་ནི། །རྣལ་འབྱོར་པ་ཡི་སེམས་བདེ་ཕྱིར། །དོན་དམ་
པ་ཡི་དེ་ཉིད་མིན། ཅེས་གསུངས་སོ། །ལེའུ་བརྒྱད་པ་བསོད་ནམས་དང་ཡེ་ཤེས་ཀྱི་ཚོགས་རབ་ཏུ་འཕེལ་བར། །དེ་བས་ཐབས་ཤེས་རྣལ་འབྱོར་པ། །སེམས་ཅན་ཀུན་གྱི་གཉེན་གཅིག་པས། །ནམ་ཡང་བསླུ་བ་མེད་པའི་སེམས། །དེ་ནས་བརྟན་པ་བསྐྱེད་པར་བྱ། །འདི་བྱས་པས་ནི་རྫོགས་སངས་རྒྱས། །དགྱེས་པའི་བདག་ཉིད་ཅན་ཀུན་མཉེས། །ཞེས་དང་། ལམ་འདིར་གནས་པའི་རྣལ་འབྱོར་པས། །ཡར་ངོའི་ཟླ་བ་ཇི་བཞིན་དུ། །རིམ་གྱིས་ཡང་དག་འཕེལ་འགྱུར་གྱི། །ནམ་ཡང་ཟད་པར་མི་འགྱུར་རོ། །ཞེས་སོ། །ལེའུ་དགུ་པ་བསོད་ནམས་དང་སྡིག་པ་སྐྱེ་བ་དང་འཇིག་པ་ཡོངས་སུ་ཤེས་པར། །ཇི་ལྟར་བཤགས་པའི་སྡིག་པ་ནི། །ཤིན་ཏུ་མི་བཟད་ཟད་འགྱུར་ཞིང་། །དེ་ཡི་རྗེས་སུ་ཡི་རངས་པས། །ཇི་ལྟར་བསོད་ནམས་ཡང་དག་རྫོགས། །ཞེས་དང་། སེམས་མེད་པར་ནི་ལུས་ངག་གིས། །ཅི་ཡང་བྱེད་པར་ནུས་མ་ཡིན། །དེ་མེད་པར་ནི་ཚིག་གིས་ཀྱང་། །ནམ་ཡང་ནུས་འགྱུར་མ་ཡིན་ནོ། །དེ་བས་ལུས་ངག་ལས་རྣམས་ནི། །ཡིད་ཉིད་ལས་ནི་གྱུར་པ་ཡིན། །ཞེས་དང་། དེ་བས་དགེ་དང་མི་དགེ་ཀུན། །སེམས་ཉིད་ཀྱིས་ནི་བྱེད་པ་དང་། །སེམས་ཉིད་ཀྱིས་ནི་འཇིག་འགྱུར་ཞེས། །འགྲོ་བའི་བླ་མས་གསུངས་པ་ཡིན། །ཞེས་སོ། །ལེའུ་བཅུ་པ་གཙང་པ་དང་མི་གཙང་བའི་རྟོག་ལས་གྲོལ་བར། །
ཆར་གྱི་ཚོགས་ནི་འབབ་པ་ཡིས། །སྨོད་པ་ཐམས་ཅད་བཀྲུ་བ་དང་། །འབྲུ་རྣམས་ཐམས་ཅད་བསྐྱེད་ནས་ནི། །དེ་ནས་རྒྱ་མཚོར་འབབ་པར་འགྱུར། །མི་གཙང་རྣམས་དང་ལྡན་པ་ཡི། །ཆུ་ནི་ཆུ་ཡིས་བླངས་ནས་ཀྱང་། །ཆུ་ནི་གང་དང་གང་ཡིན་པ། །ཐམས་ཅད་དེ་བཞིན་ཆར་དུ་འབབ། །རྫིང་བུ་ལ་སོགས་ཀུན་རྒྱས་ཤིང་། །ཐམས་ཅད་ཀྱིས་ནི་ཐམས་ཅད་འཁྲུད། །ཅེས་དང་། གཙང་བ་ཉིད་ནི་ཡོད་གྱུར་ན། །མི་གཙང་ཉིད་ནི་འབྱུང་བར་འགྱུར། །དག་པ་མེད་པའི་མི་གཙང་ཉིད། །རྣམ་པ་ཀུན་ཏུ་མི་རྙེད་དོ། །ཞེས་སོ། །ལེའུ་བཅུ་གཅིག་པ་བགྲོད་པ་དང་བགྲོད་པ་མ་ཡིན་པ་བྲལ་བར། དེ་ལྟར་གནས་ཤིང་འཁོར་བར་ནི། །ཡུན་རིང་དུས་སུ་འཇུག་པ་དང་། །ཕ་དང་མར་ནི་མ་གྱུར་པའི། །སེམས་ཅན་གང་ཡང་ཡོད་མ་ཡིན། །ཞེས་སོགས་གསུངས། ལེའུ་བཅུ་གཉིས་པ་གནས་པ་བཞག་པ་ཞེས་བྱ་བར། །ཡང་དག་ཡེ་ཤེས་རིག་པ་ལས། །ཁྱབ་བདག་རྡོ་རྗེའི་སྐུ་ཉིད་དང་། །འགྱུར་བ་མེད་པ་ཉིད་དང་ནི། །ཀུན་མཁྱེན་ཉིད་ནི་དེ་ཡིས་འགྲུབ། །ཅེས་དང་། ལུས་ཅན་དག་ནི་ཐམས་ཅད་ལ། །ཡེ་ཤེས་ཆེ་གནས་ཉིད་ཡིན་ནའང་། །མི་ཤེས་རབ་རིབ་ཀྱིས་ཁེབས་པའི། །བྱིས་པ་རྨོངས་པས་མི་ཤེས་སོ། །ཞེས་སོ། །ལེའུ་བཅུ་གསུམ་པ་སློབ་དཔོན་གྱི་མཚན་ཉིད་ལས། །ཇི་ལྟར་དམུས་ལོང་བྱ་བ་ཡིས། །འབྲོག་དགོན་དག་ཏུ་ཞུགས་གྱུར་
པ། །གཉིས་ཀའང་དེ་འདྲ་ལ་ལ་ཞིག །ཇི་ལྟར་གྲོང་དུ་འཇུག་པར་འགྱུར། །དེ་བཞིན་དམུས་ལོང་གྱུར་པ་དེས། །ཡང་དག་ཡེ་ཤེས་མ་མཐོང་བས། །གནས་དེ་ཐོབ་པར་མི་ནུས་ན། །ཇི་ལྟར་དེས་ནི་གཞན་གྲོལ་བྱེད། །དེ་བས་བླ་མ་བསྟེན་པ་ཡི། །ཡང་དག་དང་ལྡན་སློབ་མ་ཡིས། །ཡོངས་སུ་བརྟག་པར་བྱའོ་ཞེས། །རྒྱལ་བ་མཆོག་གིས་རབ་ཏུ་གསུངས། །དཀོན་མཆོག་གསུམ་ལ་ངང་གིས་དད། །སེམས་ཅན་ཀུན་ལ་སྙིང་རྗེར་ལྡན། །བརྟན་ཞིང་གཏོང་སོགས་ཡོན་ཏན་ལྡན། །བསོད་ནམས་ཐམས་ཅད་ཆེར་བསྐྱེད་ལ། །བྱང་ཆུབ་སེམས་ནི་ཡང་དག་བསྐྱེད། །བློ་བཟང་རབ་དང་ཡོན་ཏན་ལྡན། །ཁྲོ་བ་མེད་ཅིང་སྤྲོ་བ་ཆེ། །ཟབ་མོའི་ཆོས་ལ་ལྷག་པར་མོས། །དེ་ནི་ཆོས་ཀྱི་སྦྱིན་པ་དག །ཟང་ཟིང་མེད་ལ་རྟག་པར་དགའ། །དེ་ནི་རྟག་ཏུ་འདོད་པ་ཆུང་། །ཚོགས་གཉིས་ཡང་དག་བསགས་པའོ། །དེ་ནི་བླ་མར་སངས་རྒྱས་དང་། །རྡོ་རྗེ་འཛིན་པ་ཀུན་གྱིས་གསུངས། །ཞེས་སོ། །ལེའུ་བཅུ་བཞི་པ་སློབ་མའི་མཚན་ཉིད་ལས། །ཇི་ལྟར་འགའ་ཞིག་གྲུར་ཞུགས་པས། །སྐྱ་བ་འཛིན་པར་ལེགས་བསླབས་ན། །མཚོ་ཆེན་ཕ་རོལ་འགྲོ་འགྱུར་ཞིང་། །གཞན་དུ་ཕ་རོལ་འགྲོ་མི་འགྱུར། །དེ་བཞིན་བླ་མ་དཀོན་མཆོག་གསུམ། །བྱང་ཆུབ་སེམས་ལའང་དད་ལྡན་ཞིང་། །འཇིག་རྟེན་ལ་ནི་སྙིང་རྗེར་ལྡན། །འདི་ནི་གྲུ་ཞེས་བྱ་བར་
བཤད། །བླ་མ་མཁས་པ་སྐྱ་བ་འཛིན། །གྲུ་ནི་ཐམས་ཅད་རབ་སྟོན་པ། །འཁོར་བའི་ཕ་རོལ་འགྲོ་རྣམས་ལ། །རྡོ་རྗེ་སེམས་དཔའ་གསུངས་པ་ཡིན། །སྐྱ་བ་འཛིན་པ་མེད་པར་ནི། །གྲུས་ཀྱང་ཕ་རོལ་བགྲོད་མི་ནུས། །ཡོན་ཏན་ཐམས་ཅད་རབ་རྟོགས་ཀྱང་། །བླ་མ་མེད་ན་སྲིད་མཐར་མིན། ཞེས་དང་། །ཤེས་རབ་དད་པར་ཡང་དག་ལྡན། །ཁྲོ་བ་མེད་ཅིང་བསླུ་བ་མེད། །གཏོང་སོགས་ཡོན་ཏན་རྣམས་ཀྱིས་བརྒྱན། །སྤྲོ་ཆེན་རང་གི་བརྩོན་འགྲུས་ལྡན། །རྟག་ཏུ་བླ་མའི་བཀའ་བཞིན་བྱེད། །མ་བསྒོས་པར་ཡང་རང་གི་བློས། །ཡོ་བྱད་ལ་སོགས་དངོས་པོ་རྣམས། །ཅི་སྙེད་པ་དང་ཅི་ནུས་དང་། །དེ་བཞིན་བཟའ་དང་བཅའ་སོགས་དབུལ། །ཇི་ལྟར་བརྙས་པར་གྱུར་ཀྱང་ནི། །ཡིད་ནི་ཞུམ་པ་མེད་པར་བཟོད། །ལུང་དང་རིགས་པ་རྟོགས་པ་པོ། །སློབ་མ་ཡོན་ཏན་ཀུན་ལྡན་ཡིན། །མི་རྟོག་པ་ཡི་རང་བཞིན་ཅན། །གང་ལའང་འདྲི་བ་མེད་པ་ནི། །སློབ་མར་བྱ་བ་མི་ནུས་ཞེས། །སངས་རྒྱས་ཉིད་ཀྱིས་རབ་ཏུ་གསུངས། །ཞེས་དང་། སྔར་གྱི་ལེའུ་བཅུ་གསུམ་པར། གང་གཞན་བླ་མར་བཤད་པ་དག །ལོག་ཤེས་མངོན་པའི་ང་རྒྱལ་ཅན། །ཆགས་སོགས་དོན་གཉེར་ཆོས་རྣམས་ནི། །མཆོག་དག་སྟོན་པར་བྱེད་འགྱུར་བ། །འགྲོ་བའི་སྡིག་པའི་གྲོགས་པོ་རུ། །འཇིག་རྟེན་ན་དེ་རབ་ཏུ་གནས། །ཞེས་གསུངས། ལེའུ་བཅོ་ལྔ་པ་དེ་ཁོ་
ན་ཉིད་ཡི་གེའི་ཚོགས་ངེས་པར་བསྟན་པ་ལས། ཐོག་མ་དང་ཐ་མ་མེད་ཅེས་པ་ནི་སྐྱེ་བ་དང་འཇིག་པ་མེད་པ་སྟེ། འདིས་ནི་ཁྱབ་པ་ཉིད་དང་། གཟུགས་ཅན་མ་ཡིན་པ་ཉིད་དང་། མི་འགྱུར་བ་ཉིད་དང་། དུས་ཐམས་ཅད་པ་ཉིད་དུ་ཡང་སྟོན་ཏེ། ཞེས་དང་། ཞི་བ་ཞེས་བྱ་བ་ནི་ཉོན་མོངས་པ་ཐམས་ཅད་གློ་བུར་བ་ཡིན་པའི་ཕྱིར་རབ་ཏུ་ཞི་བའོ། །ཞེས་དང་། འདུས་པ་ལས་ལུང་དྲངས་པ། ཆོས་རྣམས་རང་བཞིན་འོད་གསལ་བ། །གཟོད་ནས་དག་པ་མཁའ་དང་མཚུངས། །བྱང་ཆུབ་མེད་ཅིང་རྟོག་པའང་མེད། །བྱང་ཆུབ་ཚུལ་འདི་སྟོན་པའོ། །ཞེས་དང་། ལེའུ་བཅུ་པ་ལས། ལུས་ངག་སེམས་རྣམས་བསྒོམ་པ་ནི། །རྣམ་པར་མི་རྟོག་མི་དམིགས་པ། །གང་ལའང་མི་གནས་མཉམ་པ་ཉིད། །སྐུ་གསུང་ཐུགས་ཀྱི་རྡོ་རྗེ་བསྒོམ། །ལེའུ་བཅུ་གཉིས་པ་ལས། ནམ་མཁའི་ཁམས་དང་མཉམ་གྱུར་ཅིང་། །རྣམ་པར་མི་རྟོག་ངོ་བོ་ཉིད། །རང་བཞིན་དག་པའི་ཆོས་རྣམས་ལ། །རོལ་མོ་འདི་དག་རབ་ཏུ་བསྒོམ། །ལེའུ་བཅུ་དྲུག་པ་ལས། རྡོ་རྗེའི་ཐིག་ནི་གདབ་པ་དང་། །མཚོན་རྩི་དག་ཀྱང་དགྱེ་བ་ནི། །སྔགས་ཀྱི་སེམས་དཔས་མི་བྱ་སྟེ། །བྱས་ན་བྱང་ཆུབ་རྙེད་དཀའོ། །ཞེས་སོགས་དང་། གཉིས་མེད་རྣམ་རྒྱལ་ལས་དྲངས་པ། ལེའུ་བཅུ་གསུམ་པ་ལས། སངས་རྒྱས་ཀུན་གྱི་དཀྱིལ་འཁོར་ནི། །དེ་ཉིད་ཤེས་པའི་དཀྱིལ་འཁོར་ཏེ། །
འདི་ནི་དེ་ཉིད་གྲུབ་པ་ཡིན། །བཞིན་ནོར་བུ་ལྟ་བུར་བཤད། །ཅེས་དང་། ཟླ་གསང་ཐིག་ལེ་ནོར་བུའི་རྒྱུད་ལས། །ཡན་ལག་ཀུན་བསྒོམ་ལས་འད། ག་དང་བརྟག་བྱ་རྣམ་པར་སྤངས། །གུག་སྐྱེད་ཐིག་ལེ་ཡང་དག་འདས། །འདི་ནི་དཀྱིལ་འཁོར་དམ་པ་ཡིན། །ཞེས་སོགས་དང་། སྒྱུ་འཕྲུལ་དྲྭ་བའི་ལེའུ་བདུན་པ་བྱང་ཆུབ་སེམས་ཀྱི་ལེའུ་ལས་དྲངས་པར། ཆོས་རྣམས་རང་བཞིན་འོད་གསལ་བས། །གཟོད་ནས་དག་ཅིང་རྙོག་པ་མེད། །སེམས་ཅན་མེད་ཅིང་སྲོག་ཀྱང་མེད། །སངས་རྒྱས་ཉིད་དང་བྱང་ཆུབ་སེམས། །ཞེས་དང་། དཔལ་རྡོ་རྗེ་དཀྱིལ་འཁོར་གྱི་རྒྱན་ལས་དྲངས་པ། དཔེར་ན་མེ་ཏོག་ལ་དྲི་དང་། །དཔེར་ན་ཞོ་ལ་མར་སར་བཞིན། །ཀུན་ཏུ་སེམས་ཅན་ཐམས་ཅད་དང་། །རྒྱུ་བ་དང་ནི་མི་རྒྱུ་བ། །གཟུགས་དང་གཟུགས་མེད་རྟོག་པ་ལ། །ཕྱག་རྒྱ་ཆེན་པོ་རབ་ཏུ་གནས། །ཞེས་དང་། ཡང་། ཡེ་ཤེས་འདི་ནི་མི་འཇིག་པ་དང་། མི་ཟད་པ་དང་། མི་གཡོ་བ་དང་། གཟོད་མ་ནས་དག་པ་དང་། །དྲི་མ་མེད་པ་དང་། འོད་གསལ་བ་དང་། བརྗོད་དུ་མེད་པའོ། །ཞེས་སོ། །ལེའུ་བཅུ་དྲུག་པ་ཐབས་ངེས་པར་བསྟན་པ་ལས། དེ་ལྟར་ཤེས་མཆོག་ཐབས་དང་ནི། །བཅས་པར་ཡང་དག་བསྒོམ་པར་ནི། །ཤིན་ཏུ་དྲག་པོའི་བདག་ཉིད་ཅན། །སྐྱེ་བ་གཅིག་གིས་འགྲུབ་པར་འགྱུར། །ཞེས་སོ། །ལེའུ་བཅུ་
བདུན་པ་དབང་བསྐུར་བའི་ཆོ་གའི་ལེའུར། ཐུགས་རྗེའི་བདག་ཉིད་བཀའ་དྲིན་གྱིས། །ཡང་དག་ཡེ་ཤེས་མཆོག་ཐོབ་སྟེ། །རང་རིག་པ་ཡི་ངོ་བོ་ལ། །བདག་ནི་ཤིན་ཏུ་ངོ་མཚར་སྐྱེས། །ཞེས་སོ། །ལེའུ་བཅོ་བརྒྱད་པ་དབང་པོ་མཆོག་ལེགས་པར་སྤྱོད་པའི་རིམ་པར། །སངས་རྒྱས་ཞིང་ནི་མ་ལུས་པར། །སངས་རྒྱས་སྤྲུལ་པ་སྒྲུབ་པར་བྱེད། །སངས་རྒྱས་སྤྲུལ་པ་སྒྱུ་མ་ཡིས། །སངས་རྒྱས་རྣམས་ཀྱི་མཛད་པ་སྟོན། ཞེས་སོ། །ལེའུ་བཅུ་དགུ་པ་དབང་པོ་འབྲིང་བསྟན་པར། །རྣམ་པ་ཀུན་མཆོག་ལྡན་པ་ཡི། །རང་གི་ལྷ་ཡི་སྐད་ཅིག་གིས། །བསྐྱེད་ལ་སྔོན་བཞིན་རྣལ་འབྱོར་པས། །ལམ་ལ་གནས་ཏེ་བཟླས་བརྗོད་རྩོམ། །ཞེས་སོ། །ལེའུ་ཉི་ཤུ་པ་དབང་པོ་ཐ་མ་བསྟན་པར། །ཕྱག་རྒྱའི་དཀྱིལ་འཁོར་སྐུ་མདོག་སོགས། །ཕྱག་དང་གདན་ནི་རྣམ་སྒོམ་དང་། །ཏིང་འཛིན་གསུམ་དང་ཕྱག་རྒྱ་བཞི། །ཞལ་གསུམ་དང་ནི་ཕྱག་དྲུག་རྣམས། །སྒོམ་འགྱུར་དེ་ནི་ཕྱི་ཤུན་བཅས། །སྣ་ཚོགས་སྤྲོས་པའི་མན་ངག་རྣམས། །དེ་ཀུན་དམན་པའི་ཡིན་པར་བཤད། །ཅེས་གསུངས་སོ། །གཞུང་འདི་སྔོན་རྒྱ་གར་གྱི་མཁན་པོ་དད་བྱེད་གོ་ཆ་དང་། ལོ་ཆེན་རིན་བཟང་གིས་འགྱུར་ལ། །ཕྱིས་ནག་ཚོས་ཀྱང་བཅོས་པ་སྟེ། །དེ་ཉིད་ལས་ལུང་གི་དུམ་བུ་འགའ་ཞིག་ཕྱུང་བའོ། །གང་ཚེ་ཉི་གཞོན་ཐིགས་པ་དང་། །དཔྱིད་ཀྱི་དཔལ་མོ་མ་ཡིན་ཡང་། །བློ་ལྡན་
དགའ་བའི་ཨུཏྤ་ལ། །འབྱེད་པའི་ངེས་དོན་གྲུབ་པའི་གཏམ། ཞེས་ཀྱང་སྨྲས་སོ། །ཤུ་བྷཾ། །གཉིས་སུ་མེད་པར་གྲུབ་པ་ཞེས་བྱ་བའི་སྒྲུབ་ཐབས་ལས། །དམ་བཅའ་དཀའ་ཐུབ་སྨྱུང་བ་དང་། །སྙིང་པོ་བསྒོམ་པར་སྨྲ་བ་ལས། །འདི་ཉིད་མེད་པར་གྱུར་ན་ནི། །བསྐལ་པ་འབུམ་ཕྲག་བརྒྱར་མི་འགྱུར། ཞེས་དང་། །ཐམས་ཅད་རིག་ནས་བྱུང་བ་ཡི། །བུད་མེད་དག་ལ་བརྟག་མི་བྱ། །དེ་ཉིད་བཅོམ་ལྡན་ཕ་རོལ་ཕྱིན། །ཀུན་རྫོབ་ཙམ་གྱི་གཟུགས་ཅན་ནོ། །ཚེས་གྲངས་སྐར་མ་མི་དགོས་ཏེ། །སྨྱུང་བར་ཡང་ནི་གནས་མི་བྱ། །གཉིས་མེད་ཡེ་ཤེས་ལྡན་པ་ཡིས། །བདེ་བར་གཤེགས་པའི་དངོས་གྲུབ་འགྱུར། །ཞེས་དང་། ཐམས་ཅད་སེམས་ཀྱི་ཆོས་ཉིད་ནི། །དངོས་པོ་མ་གྲུབ་བརྟག་དཀའ་བ། །དེ་ཉིད་སློབ་དཔོན་ཞལ་ལས་ནི། །ཐོབ་པར་འགྱུར་བ་ཐེ་ཚོམ་མེད། །ཅེས་གསུངས་སོ། །འདི་ནི་ཨུ་རྒྱན་ན་ཆེ་བའི་རྣལ་འབྱོར་མ་གདན་གྱིས་སྒྲུབ་པའི་ལྷའི་གནས་ནས་ཕྱུང་བ་བཅོམ་ལྡན་འདས་མ་ལཀྵིའི་ཞལ་སྔ་ནས་བྱུང་བ་ལས་བཏུས་པའོ།། ༈ །།དངོས་པོ་གསལ་བའི་རྗེས་འགྲོ་དེ་ཁོ་ན་ཉིད་གྲུབ་པ་ཞེས་རྣལ་འབྱོར་མ་ཙི་ཏོས་མཛད་པ་ལས། འགྲོ་བ་རྣམས་ཀྱི་བདེ་ཆེན་རྒྱལ་པོ་གཅིག་པུ་ཉིད། །རྒྱུ་རྣམས་དང་བྲལ་རྟག་ཏུ་འབྱུང་བར་འགྱུར་བ་སྟེ། །གང་ཞིག་གིས་ནི་ཉེ་བར་བརྗོད་པའི་དུས་དག་ཏུ། །ཐམས་ཅད་མཁྱེན་པའང་ཚིག་གིས་