ཤོག་ལྷེབ་ ༢༨༢ ནས་ ༣༠༠ བར།
རྣམ་འགྲེལ་བཅུ་གཅིག་གི་ངོས་འཛིན་ནོར་བུའི་གཎྜི་ཞེས་བྱ་བ་བཞུགས་སོ། །ཨོཾ་སྭ་སྟི། ལམ་འབྲས་བུ་དང་བཅས་པའི་རྩ་བ་རྡོ་རྗེའི་ཚིག་རྐང་གི་རྣམ་འགྲེལ་བཅུ་གཅིག་ཅེས་པ་ནི། རྗེ་བཙུན་གྱི་དཀར་ཆག་ལས། དེ་ལ་རྡོ་རྗེའི་ཚིག་རྐང་ལ་རྣམ་འགྲེལ་རྗེ་བླ་མས་མཛད་པ་བཅུ་གཅིག་ཙམ་སྣང་བ་ལས།
ཞེས་གསུངས་པ་ཉིད་གྲངས་འདྲེན་ཚུལ་མི་འདྲ་བ་མང་ཡང་། འདིར་འཁྲུལ་མེད་ཀྱི་ངོས་འཛིན་ནི། ༡ཨ་སེང་ཟླ་རྒྱལ་༢ལྡན་བུ་༣དང་། །ཡུམ་༤དོན་ཀློག་སྐྱ་སྒ་༦ཐེང་ཞུ༧། །སྲས་༨དོན་ཇོ་མོ་༩ཟངས་༡༠རི་ཕུག །གཉགས་༡༡མ་དང་ནི་བཅུ་གཅིག་གོ །ཞེས་པ་ལྟར་ཏེ། དེ་ལ་དང་པོ་ནི། ཁམས་པ་བྱང་ཆུབ་སེམས་དཔའ་སྐྱུ་རུ་ཨ་སྐྱབས་ཀྱི་སྲས་སྐྱུ་ར་ཨ་སེང་གི་ངོར་མཛད་པ་སྟེ། གཞུང་ཚད་རྐང་པར་བཅད་པའི་བློ་ཀ་ཉི་ཤུ་ཡོད། ༈ །གཉིས་པ་ནི། མངའ་རིས་པ་བྱང་སེམས་ཟླ་བ་རྒྱལ་མཚན་གྱི་ངོར་མཛད་པ་སྟེ། འདིའི་ནང་དུ་དབང་གསུམ་པ་དང་བཞི་པའི་འདའ་ཁ་མ་གཉིས་ཀྱི་ཁྱད་པར་འཆི་ཁར་ཁམས་ལྟེ་བར་འདུས་པ་དང་། གསང་གནས་སུ་འདུས་པ་ལ་བཤད། ལམ་དུས་ཀྱི་དབང་གི་ཐད་དུ་ཆོས་དབྱིངས་ཡེ་ཤེས་མི་བསྐྱོད་པ་ལ་སྦྱར་བ་སོགས་ཡོད། གཞུང་ཚད་ཕྲེང་བདུན་རེར་བྱས་པའི་ཤོག་བུ་༢༠ཙམ་མོ། ༈ །གསུམ་པ་ནི། ཇོ་གདན་ལྡན་བུའི་ངོར་མཛད་པ་སྟེ། འདི་རྒྱ་གར་སིནྡྷཱའི་ཡུལ་གྱི་དགེ་སློང་པཎྜིཏ་ལ་ན་ལ་རྩེར་གདམས་ངག་གནང་བའི་ཚེ་ཇོ་གདན་ལྡན་བུས་ཀྱང་ཉན་པས། དེའི་ཚེ་ལེགས་སྦྱར་གྱི་སྐད་དུ་གསུངས་པ། སླར་བོད་སྐད་དུ་བསྒྱུར་བ་ཡིན་པས་མགོ་བོར་སྐད་གཉིས་ཤན་སྦྱར་ནས་ཡོད། གདན་སོགས་ཀྱི་ཐད་དུ། གསང་བ་ཤེས་རབ་ཡེ་ཤེས་ཀྱི་དབང་ལ། ཕྱག་རྒྱའི་ཆོས་འབྱུང་དུ། །
ལྷ་དགུ་གཞལ་ཡས་ཁང་དང་བཅས་པ་བསྐྱེད། མཆོད། དེ་ལ་སློབ་མས་མེ་ཏོག་དོར། གར་ཕོག་གི་མིང་བཏགས། ཡེ་ཤེས་དབབ། དེ་ནས་སྙོམས་འཇུག་བྱས་ཏེ་དབང་བསྐུར་བར་བཤད་པ་སོགས་སྣང་། འདི་ལ་ཆེ་ཆུང་གཉིས་ཡོད་པའི་ཆུང་བ་ལ་གཞུང་གི་ཚད་བརྒྱ་ཉི་ཤུ་ཙམ་མོ། ༈ །བཞི་པ་ནི། ས་ཆེན་རང་གི་ཡུམ་གྱི་དོན་དུ་མཛད་པ་སྟེ། འདིར་སྣང་བ་བསྒྱུར་བའི་འདའ་ཁ་མ་ནི། སྤྱོད་ལམ་ཐམས་ཅད་དུ་ཡི་དམ་གྱི་ལྷ་ཡིན་དུ་བསམས་ཏེ། ཞལ་ཕྱག་ལ་སོགས་པ་དྲན་མི་དགོས་སོ་གསུངས། གཞུང་ཚད་ནི་བརྒྱ་ཕྲག་ཙམ་མོ། ༈ །ལྔ་པ་ནི། གཙང་པ་ཀློག་སྐྱའི་ངོར་མཛད་པ་སྟེ། ཡུམ་དོན་མ་དང་ཞུ་དག་ཕེར་བ་ཙམ་ཡོད་ཀྱང་མཆན་བུ་འགའ་ཞིག་བསྣན་པས་ཁྱད་པར་དུ་བྱས་པ་སྟེ། གཞུང་ཚད་ཀྱང་སྔ་མ་ལས་༡༢༠མང་ངོ་། ༈ །འདིའི་མཆན་དུ་ལུས་དཀྱིལ་གྱི་གཙོ་བོ་རྣམས་བཞུགས། འཁོར་རྣམས་བཞེངས་ལ་གཙོ་བོ་རྣམས་བཞེངས་ཀྱང་བཏུབ་གསུངས། འདི་དང་སྔ་མ་གཉིས་ཀར་ལྷ་ཐམས་ཅད་ལ་རིན་ཆེན་དང་རུས་པའི་རྒྱན་བཤད། ༈ །དྲུག་པ་ནི། ཁམས་པ་སྒ་ཐེང་གི་ངོར་མཛད་པ་སྟེ། འདིའི་དམ་ཚིག་གི་སྐབས་སུ་བདུད་རྩི་རིལ་བུའི་སྒྲུབ་ཐབས་བསྟན། ལམ་དབང་གི་གསུང་སྒྲོས་རྒྱས། གཞུང་བརྒྱ་ལྷག་ཙམ་མོ། ༈ །བདུན་པ་ནི། ཞུ་བྱས་དངོས་གྲུབ་ཅེས་འགྲོ་མགོན་ཞང་རིན་པོ་ཆེའི་བླ་མ་དེའི་ངོར་མཛད་
པ་སྟེ། འདིའི་མཇུག་ཏུ། འདི་བྲིས་དགེ་བས་སེམས་ཅན་ཀུན། །བསོད་ནམས་ཡེ་ཤེས་ཚོགས་རྫོགས་ཏེ། །དཔལ་ལྡན་ས་བཅུའི་རྩེ་མོ་ནི། །རྡོ་རྗེ་འཆང་དབང་འགྲུབ་པར་ཤོག །ཅེས་སློབ་དཔོན་རིན་པོ་ཆེའི་སྦྱར་བྱང་འབྱུང་བ་ནི། རྗེ་བཙུན་སྐུ་མཆེད་ཀྱིས་ནང་མཆོད་ཅིག་མཛད་པའི་ཚེ། ཞུ་བྱས་རྡོ་རྗེ་གདན་ནས་ཉི་མ་ཟེར་ཙམ་ལ་རྫུ་འཕྲུལ་གྱིས་ཕེབས་པའི་ཚེ། སྐུ་མཆེད་གཉིས་ཀྱིས་ངག་ནས་བླངས་ཏེ་བྲིས་པས་འབྲི་བ་པོའི་མཚན་བཏགས་པའོ། །གཞུང་ཚང་ཉུང་། །།བརྒྱད་པ་ནི། རང་གི་སྲས་ཀྱི་དོན་དུ་ཡི་གེ་དུམ་བུ་དུམ་བུར་མཛད་པ་ཉིད། གཉན་ཕུལ་བྱུང་བ་གཙུག་ཏོར་རྒྱལ་པོས་ཕྱོགས་གཅིག་ཏུ་བསྒྲིགས་པ་སྟེ། འདིར་རྩ་བ་མཐར་ཆགས་སུ་བསྟན་ན་ཆོས་བཅོ་བརྒྱད། དེ་ལས་དབྱེ་ན་འཁོར་འདས་ཐུན་མོང་བ་ལ་ལྔ་བཅུ་རྩ་ལྔ། འཁོར་ལོ་འཆམ་པ་ལ་བཅུ་གཉིས། བསྐོར་བ་ལ་ཉི་ཤུ་རྩ་ལྔ་སྟེ་བསྡོམས་པས་བརྒྱ་དང་བཅུ་རུ་བསྡུས། ཉམས་སུ་བླང་བའི་མཐའ་ནི་སྦྱང་བ་དུས་ཀྱི་གནས་ལུགས་ཉི་ཤུ་ལ་སོགས་པ་དང་། །ཞེས་ལུས་སྦྱོང་རྒྱས་པ་ལུས་སྦྱོང་ཉི་ཤུ་པ་ལ་གསུངས་པ་སོགས་སྣང་། ༈ །དགུ་པ་ནི། གཡའ་ལུང་ཇོ་མོ་ཞིག་གིས་ལམ་འབྲས་བསྒོམ་པས་ཁྱིའི་ཉམས་བྱུང་ནས་འའུ་འའུ་ཟེར་བས་དེ་སྐད་དུ་གྲགས་པ་དེའི་ངོར་མཛད་པས་འའུ་མར་གྲགས་པ་སྟེ། མ་ཆུང་མ་དང་གཅིག་པར་ཡང་བཞེད། འདིའི་
ཉམས་ཀྱི་སྣང་བའི་ཐད་དུ་ཉམས་དགུར་བསྟན། གསང་དབང་གི་སྔོན་འགྲོ་སྦྱོང་བ་གསུམ་གྱི་ཐད་དུ། དང་པོ་ལག་པ་བཀྲུ་སྟེ་ཞེས་སོགས་ལུས་སྦྱོང་ཉི་ཤུ་ཚང་བར་བསྟན་པ་སོགས་ཡོད། གཞུང་ཚད་བདུན་ཅུ་ཙམ་མོ། ༈ །བཅུ་པ་ནི། ངམ་ཤོད་ཀྱི་སྔགས་པ་བརྗེ་གཤིན་རྗེ་གྲགས་ཏེ་འགའ་ཞིག་གིས་འདའ་འཕྱར་ཡིན་པར་བཤད་པ་དེའི་ངོར་མཛད་པ་སྟེ། ཀུན་གཞི་རྒྱུ་རྒྱུད་དུ་རྩ་ཡིག་རགས་པ་རྡོ་རྗེ་དང་པདྨར་བཤད། བར་དོར་འོད་སྔོན་པོ་ལ་སེམས་ཟིན་ན་དམྱལ་བ། དཀར་པོ་ལ་ཟིན་ན་བྱོལ་སོང་ཞེས་བཤད། གྲིབ་མ་ཁྲུས་ཀྱིས་སེལ་བར། བྱང་ཆུབ་དང་ལམ་ལས་རྡོ་རྗེ་གྲི་གུག་དང་འདི་ལ་དགོངས་ནས་འབྱུང་བཞིའི་རླུང་ཉིས་བརྒྱ་ཉེར་ལྔ་པ་རེ་ལ་ལྷ་མོའི་མིང་གིས་བཏགས་པ། ཞེས་བཤད། ཧ་རིམ་ལ་སོགས་པར་ཞེས་པ་ཐུན་མོང་མ་ཡིན་པའི་གསང་བ་ལས། ཕྲ་ཞིང་ཡང་ལ་ཞེས་སོགས་དྲངས། འདིར་གཞན་ཡང་ཐུན་མོང་མིན་པའི་ལུང་འདྲེན་འགའ་རེ་འབྱུང་། གཞུང་ཚད་ནི་གོ་ལྔ་ཙམ་མོ། ༈ །བཅུ་གཅིག་པ་ནི། དགེ་བཤེས་གཉན་གཉགས་དབང་རྒྱལ་གྱི་ངོར་མཛད་པ་སྟེ། འདི་ལ། ལམ་སོགས་ཉི་ཤུའི་བུམ་པའི་དབང་གི་ལམ་དུ། ལམ་དབྱིབས་༡དང་། བུམ་དབང་གི་འཕོ་བ་༢དང་། གསང་དབང་གི་ལམ་དུ་ཐིག་ལེའི་རྣལ་འབྱོར་༣དང་། ཤེས་རབ་ཡེ་ཤེས་ཀྱི་ལམ་དུ་ཕྱག་རྒྱའི་མཚན་ཉིད་༤དང་། དབང་བཞི་པའི་
འཕོ་བ་༥དང་། ལམ་གྱི་དབང་བཞི་རྒྱས་བསྡུས་བླང་བ་༦དང་། གདམས་ངག་དྲུག་གི་སྐྱོན་མེད་གསུམ་ལ་མ་སྐྱེས་པ་བསྐྱེད་པའི་ཐབས་༧དང་། ཐུན་མོང་གི་སྲུང་བ་བཅུ་བཞིའི་འཛག་སྲུང་༨དང་། །སྒྲིབ་པ་སྲུང་བའི་སྐབས་ཀྱི་སྐྱོན་མེད་མ་སྐྱེས་པ་བསྐྱེད་པའི་༩ཐབས་དང་། རླུང་རང་གནས་སུ་ཟིན་པའི་ཐད་ཀྱི་གཞུང་ཇི་ལྟར་འགྲོ་བ་སྟེ་ཞལ་ཤེས་བཅུ་དང་ལྡན་ཅིང་རྣམ་འགྲེལ་ཐམས་ཅད་ལས་ཁྱད་པར་འཕགས་སོ། ཀ༽ །ཀློག་སྐྱ་མར། ཀུན་གཞི་རྒྱུ་རྒྱུད་རྟེན་དང་བརྟེན་ཚུལ་དུ། ཏིལ་དང་། ཏིལ་མར་རམ། འོ་མ་དང་མར་རམ། ཆུ་དང་འཁྱག་པའམ། མེ་ཏོག་དང་དྲིའི་ཚུལ་ཞེས་བཤད། བུམ་དབང་གི་འདའ་ཀ་མའི་མཚམས་སྦྱོར་དུ་གྲུབ་མཐའ་སྙོགས་ན་ཚེ་བསྐལ་པའི་བར་དུ་ཐུབ་པས་འདའ་ཁ་མི་དགོས་ཞེས་བཤད། མཇུག་ཏུ། བླ་མ་དམ་པའི་གསུང་ངག་བདུད་རྩིའི་བཅུད། །འཐུང་ན་སྲིད་པའི་སྡུག་བསྔལ་འཁྱག་ཞི་བྱེད་པའི། །དཔེ་མཁྱུད་སྤངས་པར་དྷརྨ་ཀཱིརྟི་ཡིས། །ལར་བཟང་པོའི་མཐའ་ཅན་དང་། ལ་ལར་གྲགས་པ་བཟང་པོ་ཞེས་འབྱུང་ཡང་དོན་དུ་ཞུས་ཚུལ་ལས་སྦྱར་བྱང་མ་ཡིན་ཅིང་གློག་སྐྱ་བའི་མཚན་ཡིན་ནམ་སྙམ་ལགས། །ཐོབ་དང་བྲིས་པ་གུས་པར་སྤྱི་བོས་བླངས། །ཞེས་འབྱུང་།། ༈ །།སངས་རྒྱས་ཐམས་ཅད་ཀྱི་གསང་ཆེན་གཅིག་ཏུ་འདུས་པ་གོང་ན་མེད་པའི་རྒྱུད་ཕྱི་མ་དང་བཅས་པ་འདི་ལ་ཐོག་མར་འཕགས་པ་ཀླུས་བསྐྱེད་རིམ་ཡན་
ལན་གསུམ་དང་། རྫོགས་རིམ་རིམ་པ་ལྔས་འཆིང་བའི་སྲོལ་ཆེན་པོ་ཕྱེ་བར་མཛད། དེ་རྗེས་སློབ་དཔོན་ཡེ་ཤེས་ཞབས་ཀྱིས་བཅོམ་ལྡན་འདས་འཇམ་དཔལ་རྡོ་རྗེའི་དཀྱིལ་འཁོར་ལས་དབང་མནོས་ཤིང་། །ཞལ་གྱི་ལུང་ཐོབ་ནས་ཡོངས་སུ་རྫོགས་པའི་ལམ་སྲོལ་དར་བར་མཛད་པ་ལས། འདིར་རེ་ཞིག་དེའི་བསྐྱེད་རིམ་གྱི་རྣམ་གཞག་གི་ས་བཅད་རགས་པ་ཞིག་འཆད་ན། བླ་མ་ཆེན་པོ་ཇི་ལྟར་བྱོན་པའི་ལོ་རྒྱུས་དང་། དེས་བཀྲལ་བའི་ལམ་སྤྱིའི་རྣམ་གཞག་མདོར་བསྡུས་པ། དེ་ལས་བསྐྱེད་རིམ་བྱེ་བྲག་ཏུ་བཤད་པའོ། །དང་པོ་ནི། རྒྱ་གར་ཤར་ལྷོའི་ཡུལ་སིནྡྷ་ར་ཞེས་བྱ་བར་རྒྱལ་པོ་གྷ་ས་རོ་པྲ་བྷ་ཝ་ཞེས་བྱ་བའི་སྲས་སུ་འཁྲུངས་སོ། །དེ་ལས་ཟབ་ཅིང་རྒྱ་ཆེ་བའི་ཆོས་ཚུལ་བསམ་གྱིས་མི་ཁྱབ་པ་ཐོབ་པས་ཀྱང་མ་ཚིམས་པར་བརྩོན་པ་ས་བྷ་ག་ཝཱ་ན་མཉྫུ་ཤྲཱི་བཛྲ་གྱིས་རྗེས་སུ་བཟུང་སྟེ་རྒྱས་པར་གཞན་དུ་ཤེས་པར་བྱའོ། །གཉིས་པ་ནི། ལམ་གྱི་སྔོན་དུ་འགྲོ་བ། བསྒོམ་པར་བྱ་བའི་ལམ་དངོས། རྟོགས་པའི་རིམ་པ་བཞག་པའི་གང་ཟག །ལམ་སྒྲུབ་པའི་འབྲས་བུའོ། །དང་པོ་ལ་བཞི། དཀྱིལ་འཁོར། སློབ་དཔོན། དབང་། དམ་ཚིག་དང་སྡོམ་པའོ། །དང་པོ་ལ། རི་མོ། ལུས། བྱང་སེམས། བྷ་གའི་དཀྱིལ་འཁོར་རོ། །དང་པོ་ལ། མར་མེ་མཛད་དང་སྨན་ཞབས་ཀྱིས་རྡུལ་ཚོན་ཁོ་ན་དང་། ངག་དབང་གྲགས་པས་རྡུལ་ཚོན།
རས་རིས། ཡིད་ཀྱི་དཀྱིལ་འཁོར་གསུམ་གསུངས། རྡུལ་ཚོན་ལའང་། ལས་དང་པོ་པས་ཆོ་ག་ཇི་བཞིན་དུ་འབྲི་བ་དང་། ཡེ་ཤེས་ལ་ཅུང་ཟད་དབང་བས་ཁྱེའུ་དང་བུ་མོ་གཙང་མར་པྲ་ཕབ་སྟེ་བྲི་བ་དང་། ཡེ་ཤེས་ལ་དབང་བས་ཏིང་ངེ་འཛིན་འབའ་ཞིག་གིས་རྡུལ་ཚོན་གྱི་དཀྱིལ་འཁོར་རྫོགས་པར་སྤྲུལ་ཏེ་གསུམ་ཆར་ལ་ཡང་ཆོ་ག་ལྷག་མ་རྣམས་ནི་འདྲ་བ་ཉིད་དོ། །ཕྱི་མ་གསུམ་ནི། རྒྱུའི་སློབ་དཔོན་གྱི་། ལུས་ཀྱི་དཀྱིལ་འཁོར་དང་རྒྱུ་དང་རྐྱེན་གྱི་སློབ་དཔོན་གཉིས་ཀྱི་བྱང་ཆུབ་ཀྱི་སེམས་དང་། ལྷན་ཅིག་བྱེད་པའི་སློབ་དཔོན་གྱི་བྷ་གའི་དཀྱིལ་འཁོར་ལ་འཆད་དོ། །གཉིས་པ་སློབ་དཔོན་ལ། རྒྱུའི། རྐྱེན་གྱི། ལྷན་ཅིག་བྱེད་པའི་སློབ་དཔོན་ནོ། །དང་པོ་ནི། བུམ་དབང་བསྐུར་བ། གཉིས་པ་ནི། གསང་དབང་བསྐུར་བའི་བླ་མའི་ཕྱག་རྒྱ། གསུམ་པ་ནི། ཤེར་དབང་ནོད་པའི་སློབ་མའི་ཕྱག་རྒྱའོ། །གསུམ་པ་དབང་ལ། བུམ་གསང་ཤེས་རབ་ཡེ་ཤེས་ཏེ་གསུམ་མོ། །དེ་རེ་རེ་ལ་ཡང་། སློབ་དཔོན་དང་། ཡོན་དང་། སྡོམ་པ་དང་། དཀྱིལ་འཁོར་དང་། ཆོ་ག་དང་། ངོ་བོ་དང་། དག་བྱ་དང་། སྐལ་པ་གང་དང་མཉམ་པ་དང་། གདམས་ངག་དང་། རྟོག་པ་དང་། ངེས་ཚིག་སྟེ་བཅུ་གཅིག་གི་སྒོ་ནས་སྨན་ཞབས་ཀྱི་སྦྱོར་བ་བདུན་པ་ལས་གསུངས་ཏེ། དབང་བཞི་པ་བཞི་བརྒྱ་ལྔ་བཅུ་པ་སོགས་ལས་མིང་ཙམ་ཡང་
མི་འབྱུང་ཞིང་། དབང་གི་རབ་བྱེད་ལས་ཤེས་རབ་ཡེ་ཤེས་ཀྱི་ཡེ་ཤེས་བདུན་ཡན་ལག་བདུན་ལྡན་དུ་ངོ་སྤྲོད་པའི་སྒོ་ནས་བསྐུར་ཚུལ་གསུངས་སོ། །སྦྱོར་བདུན་ལས་ནི། རང་བཞིན་གནང་ཕྱིར་སློབ་དཔོན་ཟླ མེད། །ཅེས་སོགས་དགག་ཕྱོགས་འབའ་ཞིག་གིས་བསྟན་ཀྱང་། ཤེས་རབ་ཀྱི་ཡེ་ཤེས་ལས་ལོགས་སུ་དེ་དག་མེད་ཅེས་པའི་དོན་ཡིན་གྱི། དབང་བཞི་པ་མཚན་ཉིད་པ་དང་། དེ་ཙམ་གྱིས་བསྐུར་ཚུལ་དག་མི་བཞེད་པ་ནི་མིན་ཏེ། འདུས་པར། །བུམ་པའི་དབང་ནི་དང་པོ་སྟེ། །གཉིས་པ་ལ་ནི་གསང་བའི་དབང་། །གསུམ་པ་ཤེས་རབ་ཡེ་ཤེས་དབང་། །དེ་ལྟར་དེ་བཞིན་བཞི་པ་ཡང་། །ཞེས་གསུངས་པས་སོ། །འདི་ལ་གསུམ་སྟེ། དབང་བཞི་པ་མཚན་ཉིད་པ། མཚོན་བྱེད་དཔེའི་དབང་བཞི་པ། དེ་ཚིག་གི་སྒོ་ནས་ཇི་ལྟར་བསྐུར་བའི་ཚུལ་ལོ། །དང་པོ་ནི། སངས་རྒྱས་ཀྱི་སའི་སྐུ་གསུམ་ཡན་ལག་བདུན་དང་ལྡན་པའོ། །གཉིས་པ་ནི། དབང་བཞི་པའི་ཡེ་ཤེས་གཅིག་ཉིད་ལ་སྔར་གྱི་སློབ་དཔོན་ལ་སོགས་པའི་དོན་བཅུ་གཅིག་རང་བཞིན་ལྷུན་གྲུབ་ཀྱིས་ཚང་བའོ། །གསུམ་པ་ནི། དེ་ལྟར་དང་། ཡང་དང་། དེ་བཞིན་ཞེས་པའི་ཚིག་གསུམ་གྱིས་དབང་གསུམ་པའི་ཡེ་ཤེས་ལ་ཡན་ལག་བདུན་ལྡན་ཚང་བར་ངོ་སྤྲོད་པའོ། །གསུམ་པ་དམ་ཚིག་དང་སྡོམ་པ་ལ་གཉིས། ཐུན་མོང་དང་། ཐུན་མིན་ནོ། །དང་པོ་ནི། སྟ་གོན་
དང་འཇུག་པའི་སྐབས་སུ་སོ་བྱང་དང་། རིགས་ལྔའི་དབང་གི་སྐབས་སུ་ཐོབ་པའི་རིགས་ལྔའི་སྡོམ་པ་སྟེ། སློབ་དཔོན་དང་སློབ་མ་གཉིས་ཀའི་ཐུན་མོང་པའོ། །གཉིས་པ་ལ་གསུམ་སྟེ། སྤང་པའི་དམ་ཚིག་སྡོམ་པ་དང་། བཟའ་དང་བསྲུང་བའི་དམ་ཚིག་དང་། རྣལ་འབྱོར་སྙིང་པོའི་སྡོམ་བའོ། །དང་པོ་ནི། བུམ་དབང་གི་སྐབས་སུ་ཐོབ་བའི་རྩ་བ་༡༤དང་ཡན་རལག་གི་དམ་ཚིག་གོ། །གཉིས་པ་ནི། །གསང་དབང་གི་སྐབས་སུ་ཐོབ་པ་སྟེ། ཤ་ལྔ་བདུད་རྩི་ལྔ་བཟའ་བ་དང་། བསྲུང་བ་སྲོག་གཅོད་སོགས་བཞིའོ། །གསུམ་པ་ནི། ཤེར་དབང་གི་སྐབས་སུ་ཐོབ་སྟེ། ཕྱི་རོལ་གྱི་དཀྱིལ་འཁོར་བྲི་བ་ལ་སོགས་པ་བཀག་ནས་ཕྱག་རྒྱ་སྤྱན་མ་ལ་སོགས་པ་དང་། སྒྲུབ་པོ་རིགས་ལྔར་ཤེས་པར་བྱས་ནས་དག་མ་དག་གི་འདུ་ཤེས་འགོག་པའོ། །གཉིས་པ་བསྒོམ་བྱ་ལམ་གྱི་ངོ་བོ་ནི་བསྐྱེད་རྫོགས་གཉིས་ཏེ། འདི་ལ་དབྱེ་གཞི། དབྱེ་ངོ་། གྲངས་ངེས། བསྒོམ་པའི་གོ་རིམ་སྟེ་བཞི་ལས། དང་པོ་ནི། ཡིད་མཚན་རྟོག་ལས་སྐྱོབ་པའི་ཐབས་ཁྱད་པར་ཅན་དུ་གྱུར་པའི་སྔགས་ཀྱི་སྤྱོད་པའོ། །གཉིས་པ་ནི། འདུས་པའི་རྒྱུད་ཕྱི་མར། །སངས་རྒྱས་རྣམས་ཀྱིས་དེར་བསྟན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པའི་རིམ་པ་ཉིད་དང་ནི། །དེ་བཞིན་རྫོགས་པའི་རིམ་ཉིད་དོ། །ཞེས་པ་ལས། དང་པོ་ནི་འོག་ཏུ་འཆད་ལ། གཉིས་པ་
ནི། སྙིང་གར་མི་ཤིགས་པའི་ཐིག་ལེ་བསྒོམས་པ་དགའ་བའི་རང་བཞིན། གསང་གནས་སུ་གསང་བའི་ཐིག་ལེ་བསྒོམས་པ་དགའ་བ་བར་མའི་རང་བཞིན། ལུས་ཀྱི་གནས་བཞིར་སྤྲུལ་པའི་ཐིག་ལེ་བསྒོམས་པ་དགའ་བྲལ་གྱི་རང་བཞིན། དགའ་བ་གསུམ་ཆར་རོ་གཅིག་པ་མི་ཤིགས་པའི་ཐིག་ལེ། དེ་ཉིད་བསྒོམས་པ་ལྷན་སྐྱེས་ཀྱི་རང་བཞིན་ཏེ་གཙོ་བོར་ཐིག་ལེའི་རྣལ་འབྱོར་བཞི་གསུངས་ལ། དེ་ཡང་། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཞེས་པའི་ཚུལ་གྱིས་ལས་རྒྱ་ལ་བརྟེན་ནས་སྒྱུ་མའི་དཔེ་བཅུ་གཉིས་ཀྱིས་མཚོན་པའི་སྒྱུ་མ་ལྟ་བུའི་ཏིང་ངེ་འཛིན་དཔེའི་ཚུལ་གྱིས་མངོན་སུམ་དུ་རྟོགས་ནས་རིག་པ་བཏུལ་ཞུགས་ཀྱི་སྤྱོད་པ་ཟླ་བ་དྲུག་གམ་བཅོ་བརྒྱད་ཀྱི་བར་དུ་སྤྱོད་པས་ཚེ་འདིར་རྡོ་རྗེ་འཆང་སྒྲུབ་པའོ། །དེ་ལྟར་བསྐྱེད་རྫོགས་གཉིས་པོ་དེ་ཡང་། འབྲས་བུ་སངས་རྒྱས་ཀྱི་ཡེ་ཤེས་ཟབ་གསལ་གཉིས་མེད་ཀྱི་ཡེ་ཤེས་ཡིན་པ་ལྟར། ཟབ་གསལ་གཉིས་མེད་ཚུལ་གྱིས་བསྒོམ་དགོས་ལ། བསྐྱེད་རིམ་ཟབ་གསལ་གཉིས་མེད་ནི་ཡེ་ཤེས་ཀྱི་ཚོགས་བསགས་པའི་ཟབ་མོ་སྟོང་པ་ཉིད་བསྒོམས་ནས། དེ་ལས་ལངས་ཏེ་སེམས་གསལ་བ་དང་། དཀྱིལ་འཁོར་གྱི་འཁོར་ལོའི་རྣམ་པར་བརྟག་པ་ན། ཟབ་མོ་སྟོང་པ་ཉིད་དང་གསལ་བའི་དཀྱིལ་འཁོར་གྱི་འཁོར་ལོ་དབྱེར་མེད་པའོ། །རྫོགས་རིམ་ཟབ་གསལ་
གཉིས་མེད་ནི་ཕྱག་རྒྱ་ལ་བརྟེན་ནས་དཔེའི་ཚུལ་གྱིས་རྟོགས་པའོ། །གསུམ་པ་ནི། སྤང་བྱ༢། བསྒྲུབ་བྱ༢། བསྐྱེད་བྱ༢། རང་གི་ངོ་བོ་རྟེན་དང་བརྟེན་པ་ཡིན་པས་རིམ་གཉིས་སུ་གྲངས་ངེས་པ་སྟེ། དང་པོ་ནི། ཐ་མལ་རྣམ་རྟོག་དང་། ལྷར་ཞེན་པའི་རྣམ་པར་རྟོག་པ་གཉིས་སྤོང་བར་བྱེད་པ་སྟེ། ཀུན་བཟང་ལས། ཐ་མལ་རྣམ་རྟོག་སོགས་དང་། ཞལ་ལུང་གི་འགྲེལ་པར། དེ་ལྟར་བསྐྱེད་པའི་རིམ་པའི་གཞི་རྣམ་པར་བཀོད་ནས། ད་ནི་རྫོགས་པའི་རིམ་པས་དེ་སྦྱོང་བའི་ཐབས་གསུངས་པ། ཞེས་སོ། །གཉིས་པ་ནི། བསྒྲུབ་བྱ་ཐུན་མོང་གི་དངོས་གྲུབ་ཀྱི་ཕྱིར་ཏེ། འདུས་པར། ཐ་མལ་པ་ནི་རྡོ་རྗེ་བཞི། །ཡེ་ཤེས་རྡོ་རྗེ་མཆོག་རྣམས་སོ། །ཞེས་སོ། །གསུམ་པ་བསྐྱེད་པར་བྱ་བ་སྔགས་དང་། ཡེ་ཤེས་ཀྱི་སྐུ་གཉིས་སུ་ངེས་པས་ཏེ། ཞལ་ལུང་གི་འགྲེལ་པར། དང་པོའི་རིམ་པ་ནི་བསྐྱེད་པའི་རིམ་པ་ཡན་ལག་དང་བཅས་པ་རྟོགས་པས་རང་གི་རྒྱུད་ཀྱི་ལས་ཀྱི་དྲི་མ་རྣམ་པར་དག་པར་བྱ་སྟེ། ཡེ་ཤེས་སྒྱུ་མ་ཞེས་པ་ནི་ཡེ་ཤེས་ཅུང་ཟད་དག་པའི་སྐུ་སྟེ། ཞེས་སོ། །བཞི་པ་རྫོགས་པའི་རིམ་པས་ཟབ་གསལ་གཉིས་མེད་དཔེའི་ཚུལ་གྱིས་བསྒྲུབ་པར་བསྐྱེད་རིམ་ངེས་པར་རྟེན་དུ་དགོས་ཏེ། ཞལ་ལུང་ལས་གསུངས་པའི་ཕྱིར་རོ། །བཞི་པ་གོ་རིམ་ནི། ལུགས་འདིར་བསྐྱེད་རིམ་རྟེན་ཙམ་དུ་བྱས་ནས་རྫོགས་རིམ་གཙོ་བོར་བསྒོམ་པ་དང་།
བསྐྱེད་པའི་རིམ་པ་ཉིད་ཀྱིས་ཡང་དག་པའི་ཡེ་ཤེས་ལ་དབང་བའི་བར་བགྲོད་པར་བྱེད་པའི་ལུགས་གཉིས་སོ། །གསུམ་པ་རྟོག་པའི་རིམ་པས་བཞག་པའི་གང་ཟག་བཞི་སྟེ། ལས་དང་པོ་པ་ནི་དབང་བསྐུར་དང་བསྐྱེད་རིམ་གྱི་གདམས་ངག་ཚུལ་བཞིན་དུ་ཐོབ་ནས་རགས་པ་དང་ཕྲ་བའི་ལྷའི་རྣལ་འབྱོར་ཐམས་ཅད་རིམ་པ་བཞིན་དུ་བསྒོམ་དགོས་པའོ། །ཡེ་ཤེས་ལ་ཅུང་ཟད་དབང་བ་ནི། རགས་པ་ལྷའི་རྣལ་འབྱོར་ཡུད་ཙམ་གྱིས་བསྒོམ་ནུས་ཤིང་། ཕྲ་བ་སའི་སྙིང་པོ་ལ་སོགས་པ་རིམ་བཞིན་དུ་བསྒོམ་ནུས་པ་སྟེ། འདི་ལ་ལྷའི་བསྐྱེད་ཆོག་ཕྲི་ནས་ཕྲ་བའི་ལྷ་སྔ་མ་བཞིན་དུ་བསྒོམ་དགོས་པའོ། །ཡེ་ཤེས་ལ་དབང་བ་ནི། ཟླརགས་ཕྲའི་ལྷའི་རྣལ་འབྱོར་གཉིས་ཀ་ཡུད་ཙམ་གྱིས་བསྒོམ་པར་ནུས་པ་སྟེ། འདི་ལ་ཕྲ་བའི་ལྷའི་བསྐྱེད་ཆོག་རྣམས་ཀྱང་ཕྲི་ནས་ཕྲ་རགས་ཀྱི་ལྷའི་རྣལ་འབྱོར་ཐམས་ཅད་སེ་གོལ་གཏོགས་པ་ཙམ་ལ་གཅིག་ཅར་དུ་བསྒོམ་པའོ། །ཡང་དག་པའི་ཡེ་ཤེས་ལ་དབང་བ་ནི། རྡུལ་ཕྲན་གཅིག་གི་ནང་དུ་དཀྱིལ་འཁོར་གྱི་འཁོར་ལོ་དོགས་པ་མེད་པར་བསྒོམ་ནུས་པའོ། །བཞི་པ་ལམ་གྱིས་སྒྲུབ་པའི་འབྲས་བུ་ལ། ཐུན་མོང་དང་། མཆོག་གོ །དང་པོ་ནི། རིག་འཛིན། མངོན་ཤེས། མི་སྣང་བ་རྒྱ་མཚོ་བཅག་པ། མངགས་གཞུག །སྔགས་ཀྱི་ཁྱད་པར། མིག་སྨན། ལས་བཞིའི་རབ་ཏུ་དབྱེ་བ་སྟེ་བརྒྱད་དོ། །གཉིས་པ་ནི།
ཡང་དག་པའི་ཡེ་ཤེས་ལ་དབང་ཐོབ་པ། ས་དང་པོ་ཐོབ་པའི་ལམ་ནས་བརྩམས་ཏེ། གསང་གསུམ་གཅིག་ཏུ་འདུས་པའི་རྡོ་རྗེ་འཛིན་པའི་སའི་བར་ཏེ། འབྲས་བུ་མཐར་ཐུག་པ་ནི། ཞལ་ལུང་ལས། རྣམ་པར་རྟོག་པ་ཀུན་བྲལ་བས། །བསམ་བརྗོད་ཡུལ་ལས་ཤིན་ཏུ་འདས། །མཁའ་བཞིན་དྲི་མེད་ཀུན་འབྱུང་བ། །བརྟགས་བྲལ་ཟབ་མོ་ཉིད་ཅེས་བྱ། །ཕྱག་རྒྱ་ཆེན་པོའི་གཟུགས་འཆང་བ། །སྒྱུ་མ་འཇའ་ཚོན་ལྟ་བུ་རུ། །རང་དང་གཞན་གྱི་རྒྱུད་སྦྱོང་བ། །ཡང་དག་གསལ་བ་ཉིད་ཅེས་བྱ། །ཞེས་སོ། །གསུམ་པ་བསྐྱེད་རིམ་བྱེ་བྲག་ཏུ་བཤད་པ་ལ་གསུམ། གང་གིས་སྒོམ་པའི་གང་ཟག །གང་དུ་བསྒོམ་པའི་གནས། །གང་བསྒོམ་པའི་རྣལ་འབྱོར་རོ། །དང་པོ་ནི། བྱང་ཆུབ་ཏུ་སེམས་བསྐྱེད་ཅིང་། སྦྱིན་སོགས་ཡོན་ཏན་གྱིས་བརྒྱན་པ། ཟབ་མོ་སྔགས་ཀྱི་ཚུལ་ལ་ལྷག་པར་མོས་པ། འདིའི་དབང་བསྐུར་ཞིང་རྗེས་སུ་གནང་བ་ཐོབ་པ་སྟེ་ཁྱད་པར་བཞི་ལྡན་དུ་གསུངས་སོ། །གཉིས་པ་ནི། ཀུན་བཟང་བསྡུས་པར། ལ་ལར་དྲི་མེད་ཆུ་ནི་ཕུན་ཚོགས་ཤིང་། །ཤིང་མཆོག་མཛེས་པ་རྣམ་པར་བརྒྱན་པ་ཡི། །རི་བོའི་ཕྱོགས་གཅིག་ཏུ་ནི་བཅོམ་ལྡན་འདས། །འཇམ་པའི་དབྱངས་ཞེས་བྱ་བ་རབ་བསྒྲུབ་བྱ། །ཞེས་སོ། །གསུམ་པ་ལ་གསུམ་སྟེ། དང་པོ་སྦྱོར་བ། དཀྱིལ་འཁོར་རྒྱལ་མཆོག །ལས་རྒྱལ་མཆོག་གོ། །དང་པོ་ལ་གསུམ།
སྔོན་དུ་འགྲོ་བ་དང་། དངོས་གཞི་དང་། རྗེས་སུ་ཆགས་པའི་རྣལ་འབྱོར་རོ། །དང་པོ་ལ་གསུམ་སྟེ། ལས་ཐམས་ཅད་སངས་རྒྱས་ཀྱི་རྒྱུར་འགྱུར་བའི་ཕྱིར་ཚངས་གནས་བཞི་བསྒོམ་པ། ལས་ཀྱི་སྒྲིབ་པ་། ཊྛ བཟློག་པའི་ཕྱིར་བསོད་ནམས་ཀྱི་ཚོགས་བསགས་པ། དངོས་འཛིན་བཟློག་པའི་ཕྱིར་ཡེ་ཤེས་ཀྱི་ཚོགས་བསགས་པའོ། །དང་པོ་ནི། ཞལ་ལུང་ལས། དེ་ནས་སེམས་ཅན་ཐམས་ཅད་ཀུན། །ཚངས་སྤྱོད་ཆེན་པོ་བཞི་དམིགས་ཏེ། །ཞེས་སོ། །གཉིས་པ་ལ་བཞི་སྟེ། ཚོགས་ཀྱི་ཞིང་དམིགས་པ། ཕྱག་འཚལ་ཞིང་མཆོད་པ། རྒྱུན་བཤགས་བྱ་བ། དེ་དག་གི་དགོས་པ་བཤད་པའོ། །ཕྱི་མ་ནི། ཞལ་ལུང་གི་འགྲེལ་པར། མཚམས་མེད་ལ་སོགས་པའི་ལས་ཀྱི་སྒྲིབ་པ་བསགས་པ་བཟློག་པའི་ཆེད་དུ་ཡིན་པར་གསུངས་པས། སེར་སྣའི་ལས་ཀྱི་སྒྲིབ་པའི་གཉེན་པོར་མཆོད་པ་ལ་སོགས་པ་སྦྱར་རོ། །གསུམ་པ་ལ་གཉིས་ཏེ། གཞན་གྱི་ལོག་རྟོག་དགག་པ་དང་། རང་ལུགས་འཐད་ཕྱོགས་བཤད་པའོ། །དང་པོ་ལ་གཉིས་ཏེ། སྣང་བ་མི་གསལ་བའི་ཕྱོགས་དགག་པ་དང་། བདེན་པ་མི་གསལ་བའི་ཕྱོགས་དགག་པའོ། །དང་པོ་ནི། བོད་སྔ་མ་ཁ་ཅིག་ན་རེ། ཡེ་ཤེས་ཚོགས་བསགས་ཀྱི་སྟོང་ཉིད་བསྒོམ་པའི་དོན། སྣང་བའི་སྟེང་དུ་བདེན་པ་བསལ་བ་ལས་བདེན་མེད་སྒྱུ་མ་ལྟ་བུ་དེ་ཡང་བསལ་བའི་སྟོང་ཉིད་བཙན་ཐབས་སུ་སྒོམ་མི་རུང་སྟེ།།
སྟོང་ཉིད་སྣང་བའི་འཇིག་རྒྱུར་ཐལ་བའི་ཕྱིར། །ཞེས་འདོད། དེ་ནི་ལུང་རིགས་མྱོང་བ་ཁས་བླངས་ཐམས་ཅད་དང་འགལ་བའི་ཕྱིར་མི་འཐད་དོ། །གཉིས་པ་ནི། འཕགས་ཡུལ་དུ་ཤཱནྟི་པ་སེམས་ཙམ་པ། སོགས། ཀུན་བརྟག་གིས་སྟོང་པའི་ཡོངས་གྲུབ་ཡོད་པ་དང་བདེན་པ་དེ་ལ་ང་རྒྱལ་འཇོག་ཞེས་འཆད་ལ། འདི་མི་འཐད་པར་དབུ་མ་པ། ངག་དབང་གྲགས་པ་སོགས་ཀྱིས་སྐྱོན་མང་དུ་བརྗོད་དོ། །ཡང་གངས་རིའི་ཁྲོད་འདིར་གཞན་སྟོང་གི་མིང་བཏགས་ནས་དབུ་སེམས་གང་ཡང་མ་ཡིན་པའི་ཐེག་ཆེན་དུ་ཞལ་གྱིས་བཞེས་པ་དག །ཡེ་ཤེས་ཀྱི་ཚོགས་བསགས་པའི་དོན་གཟུང་འཛིན་གཉིས་སྟོང་གི་ཤེས་པ་རང་རིག་རྒྱུ རང་གསལ་བདེན་པར་གྲུབ་པ་ནི་སྟོང་ཉིད་ཡེ་ཤེས་རྡོ་རྗེའི་རང་བཞིན་ཡིན་ལ། དེ་ལ་ང་རྒྱལ་འཇོག །འོག་ཏུ་ལྷར་བསྐྱེད་པ་ཡང་དེ་ཉིད་བསྐྱེད་པ་ཡིན་ནོ། །ཞེས་སོགས་འདོད། དེ་དགག་པ་ལ་ཡུལ་བདེན་གྲུབ་ཡུལ་ཅན་ངར་འཛིན་འཇོག་པ་ཡེ་ཤེས་ཀྱི་ཚོགས་བསགས་ཡིན་ན་སེམས་ཅན་ཐམས་ཅད་འབད་མེད་དུ་གྲོལ་བར་ཐལ་བ། གྲུབ་མཐའ་བཞིའི་རྣམ་གཞག་མི་རུང་བ་སྟེ་ཁྱོད་ཀྱི་འདོད་པ་དེ་སེམས་ཙམ་དང་མཚུངས་པའི་ཕྱིར་དང་། སྡོམ་རྣམ་གཉིས་དང་ཤཱནྟི་པ་སོགས་དབུ་མ་ཆེན་པོའི་གཞུང་དང་དེ་སྨྲ་བའི་གང་ཟག་ཡིན་ན་འཕགས་ཡུལ་དུ་སེམས་ཙམ་འཛིན་པའི་པཎྜི་ཏ་མེད་པར་འགྱུར་བ་དང་། ཀླུ་སྒྲུབ་ཀྱིས་
རིག་ཚོགས་ཀྱིས་རང་སྟོང་དང་། བསྟོད་ཚོགས་ཀྱིས་གཞན་སྟོང་འགྲེལ་ན་མཐར་ཐུག་གི་ལྟ་བ་ངོས་བཟུང་དུ་མི་རུང་བར་འགྱུར་ཏེ། དེ་གཉིས་གང་དབུ་མ་མཐར་ཐུག་ཡིན། དང་པོ་ཡིན་ན་གཞན་གྱི་འདོད་པ་གྲུབ། རང་ལ་ཁས་བླངས་དང་འགལ། གཉིས་པ་ལྟར་ན་འོག་མས་གོང་མ་སུན་ཕྱུང་བར་ཐལ། གཉིས་ཀ་ཡིན་ན། གཉིས་མེད་ཀྱི་རྣམ་ཤེས་ཆོས་ཅན། ཁྱོད་རང་གི་ངོ་བོས་མི་སྟོང་པར་ཐལ། །ཁྱོད་རང་གི་ངོ་བོས་སྟོང་པ་དེ་དབུ་མ་མཐར་ཐུག་ཡིན་པའི་ཕྱིར། འདོད་ན་དེ་ཆོས་ཅན། ཁྱོད་རང་གི་ངོ་བོས་མི་སྟོང་པར་ཐལ། ཁྱོད་རང་གི་ངོ་བོས་མི་སྟོང་པ་དེ་དབུ་མའི་ལྟ་བ་མཐར་ཐུག་ཡིན་པའི་ཕྱིར། ཞེས་སོ། །ཡང་དངོས་པོ་རང་བཞིན་གྱིས་གྲུབ་པར་ཁས་བླངས་ན་དབུ་མའི་ལྟ་བའི་དོན་དང་ཐ་སྙད་གཉིས་ཀ་མི་གནས་པའི་ཕྱིར་དང་། ༤ ཁྱོད་འདོད་པའི་བདེ་གཤེགས་སྙིང་པོ་དང་། ཆོས་དབྱིངས་ལ་འཁོར་འདས་ལ བྱ་བྱེད་མི་རུང་བར་ཐལ་ཏེ། བདེན་པར་གྲུབ་པའི་ཕྱིར་དང་། ཡུལ་ཆོས་དབྱིངས་བདེན་པར་གྲུབ་ཀྱང་ཡུལ་ཅན་བདེན་ཞེན་ཞེན་ཡུལ་བདེན་པ་རིག་པས་དཔྱད་པའི་ཚེ་རྙེད་པས་ཡུལ་ཅན་བདེན་པ་རང་ལྡོག་ཏུ་འགྲོ་བ་ལ་བྱེད་དམ། ཞེན་ཡུལ་བདེན་པ་མ་བཀག་པར་ཡུལ་ཅན་བདེན་ཞེན་རང་དགར་བཀག་པ་ལ་བྱེད། དང་པོ་ལྟར་ན་དངོས་སུ་འགལ་ཏེ་ཞེན་ཡུལ་བདེན་པས་རིག་པས་དཔྱད་པའི་ཚེ་རྙེད་པར་ཁས་
བླངས་པའི་ཕྱིར། ཕྱི་མ་ལྟར་ན་རྒྱ་ནག་ཧྭ་ཤང་གི་ལྟ་བར་འགྱུར་ཏེ། ཡུལ་ལ་དཔྱད་པ་མ་བྱས་པར་ཡུལ་ཅན་རྟོག་པས་རང་དགར་བཀག་པའི་ཕྱིར། ༧ ཡེ་ཤེས་ཚོགས་བསགས་ནས་དེ་ལས་ལངས་པའི་ཚེ་སྟོང་ཉིད་ལས་ལངས་ཞེས་པ་དང་ཁྱོད་འགལ་ཏེ། བདེན་གྲུབ་ཀྱི་ངང་ལས་ལངས་ཞེས་བརྗོད་དགོས་པའི་ཕྱིར། སྔ་མ་བསོད་ནམས་དང་། འདི་ཡེ་ཤེས་ཀྱི་ཚོགས་བྱས་ཏེ་ཚོགས་གཉིས་ཟུང་འཇུག་ལས་གཟུགས་སྐུར་ལངས་པ་མི་རུང་། ཡུལ་བདེན་གྲུབ་ལ་ཡུལ་ཅན་ངར་འཛིན་སྒོམ་པ་ནི་སྡུག་བསྔལ་གྱི་རྒྱུ་ཡིན་པའི་ཕྱིར། དེ་ལ་སོགས་ཏེ་གནོད་བྱེད་མཐའ་ཀླས་སོ། །གཉིས་པ་རང་ལུགས་འཐད་པའི་ཕྱོགས་བཞག་པ་ལ། བསྒོམ་བྱའི་བྱང་ཆུབ་ཀྱི་སེམས་ངོས་བཟུང་བ། དེ་ཇི་ལྟར་བསྒོམ་པའི་ཚུལ། ང་རྒྱལ་འཇོག་པའི་དོན། དེ་ལྟར་བསྒོམ་པའི་དགོས་པའོ། །དང་པོ་ནི། ཨོཾ་ནི་སྟོང་ཉིད་ཁས་བླངས་པ། ཤུན་ཏཱ་ནི་སྟོང་པ་ཉིད་དེ། སངས་རྒྱས་ཡེ་ཤེས་ཞབས་ཀྱིས་ངོ་བོ་དང་། རྒྱུ་དང་། འབྲས་བུ་སྟོང་པའི་རྣམ་ཐར་སྒོ་གསུམ་དུ་བཤད་ལ། ཀླུ་སྒྲུབ་ཀྱིས། ཕྱི་རོལ་པས་བཏགས་པའི་བདག་ཉན་ཐོས་སྡེ་གཉིས་ཀྱིས་བཏགས་པའི་ཕུང་པོ་ལ་སོགས་པའི་གཟུང་འཛིན་དང་། རྣམ་རིག་པས་བཏགས་པའི་གཉིས་མེད་ཀྱི་ཡེ་ཤེས་ཀྱིས་སྟོང་པ་ཉིད་དུ་བཤད་དོ། །འོ་ན་རི་བོང་གི་རྭ་ལྟར་ཅིའང་མེད་པའི་སྟོང་ཉིད་ཡིན་ནམ་
སྙམ་མོ། །དེ་དགག་པའི་ཛཱན་ཡེ་ཤེས་ཏེ། གསལ་བ་ཙམ་མི་དགག་པའོ། །དེ་ན་སྟོང་པའི་ཚེ་ན་ཡང་ཚོལ་མཁན་གྱི་གསལ་བ་མི་འགག་པས། གསལ་བ་མི་འགག་པ་དང་། གསལ་བ་མ་རྙེད་པ་གཅིག་ཏུ་འཁྲུལ་པར་མི་བྱའོ། །དེ་ཉིད་བཛྲ་ནི་རྡོ་རྗེ་སྟེ། ཕར་མཚན་རྟོགས་འཇོམས་ཤིང་། ཚུར་གང་གིས་ཀྱང་མི་ཤིགས་པའོ། །སྭ་བྷཱ་ཝ་རང་བཞིན་ཏེ། གསལ་བ་དང་སྟོང་པ་ཟུང་དུ་འཇུག་པའི་རང་བཞིན་ཅེས་པའི་དོན་ཏོ། །ཨཱཏྨ་ཀོཉཧཾ། བདག་ཉིད་ངའོ་ཞེས་པ་སྟེ་འོག་ཏུ་བཤད་པར་བྱའོ། །གཉིས་པ་ནི། རྗེས་ཆེན་གྱིས། གང་ཟག་དམན་པ་དབུ་མའི་ལྟ་བ་ལ་བློ་མ་སྦྱངས་པ་རྣམས་ཀྱིས། ཐོག་མར་སྣང་བ་ཐམས་ཅད་སེམས་སུ་བསྡུས་ནས་སེམས་ཉིད་གཅིག་དང་དུ་བྲལ་བ་ལ་སོགས་པའི་རིགས་པས་རིམ་གྱིས་དཔྱད་ནས་མ་རྙེད་པ་རིམ་གྱིས་སྟོང་ཉིད་བསྒོམ་པ་སྟེ། ཞལ་ལུང་ལས། སེམས་ཙམ་ལ་ནི་རྟ་བྱས་ཏེ། །ཕྱི་རོལ་རང་བཞིན་སྟོང་པར་བྱ། །སེམས་ཙམ་དེ་ཡང་སྟོང་བྱས་ནས། །ཞེས་སོ། །བློ་བྱང་པ་མཆོག་གིས་བཙན་ཐབས་སུ་སྟོང་ཉིད་བསྒོམ་པ་ནི། སྔགས་བརྗོད་པ་ཙམ་གྱིས་སྣང་བ་ཐམས་ཅད་སེམས་སུ་བསྡུས་ནས་སེམས་དེ་ཡང་མི་དམིགས་པར་བསམས་ཏེ་བློ་སྦྱངས་པས་དེ་ཙམ་གྱིས་རང་བཞིན་སྟོང་པ་ཉིད་ལ་ངེས་ཤེས་འདྲེན་ནུས་པའི་ཕྱིར་རོ། །གསུམ་པ་ལ་གསུམ། སྤང་བྱའི་ང་རྒྱལ། གཉེན་པོའི་ང་རྒྱལ།