དཔལ་ཡང་དག་པའི་གྲོལ་བའི་ལམ་ཡེ་ཤེས་ཐིག་ལེའི་མན་ངག
དཔལ་ཡང་དག་པའི་གྲོལ་བའི་ལམ་ཡེ་ཤེས་ཐིག་ལེའི་མན་ངག་བཞུགས་སོ།།
ན་མོ་གུ་རུ་ཤྲཱི་ཧེ་རུ་ཀཱ་ཡ། གྲུབ་པའི་སློབ་དཔོན་ཆེན་པོ་རྡོ་རྗེ་ཧཱུྃ་ཀཱ་རས་མཛད་པའི་དཔལ་ཡང་དག་ཡེ་ཤེས་ཐིག་ལེའི་མན་ངག་གྲོལ་ལམ་མཐར་ཐུག་པ་འདི་འཆད་པ་ལ་གསུམ། ཀླད་ཀྱི་དོན། གཞུང་གི་དོན། མཇུག་གི་དོན་ནོ། །དང་པོ་ལ་གཉིས། མཚན་བསྟན་པ་དང་། མཆོད་པར་བརྗོད་པའོ། །དང་པོ་ནི། རྒྱ་གར་སྐད་དུ། ཛཱ་ན་བིནྡྷཱ་ཨུ་པ་དེ་ཤ །བོད་སྐད་དུ། ཡེ་ཤེས་ཐིག་ལེའི་མན་ངག །གཉིས་པ་ནི། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གཉིས་པ་གཞུང་གི་དོན་ལ་གཉིས། བཤད་བྱ་རྩ་བའི་མདོ་དང་། འཆད་བྱེད་དོན་གྱི་མན་ངག་གོ། །དང་པོ་ནི། ཡང་དག་གྲུབ་པ་གཅིག་པུ་ནི། །སངས་རྒྱས་བདེ་ཆེན་ཀུན་འདུས་པ། །རྣལ་འབྱོར་ཟབ་མོ་སྐུ་
གསུམ་རྫོགས། །མཁའ་འགྲོ་སྒྱུ་མ་བདེ་མཆོག་བདེ། །གཉིས་པ་འཆད་བྱེད་དོན་གྱི་མན་ངག་བསྟན་པ་ལ་གསུམ། མདོར་བསྟན་པ། རྒྱས་པར་བཤད་པ། དོན་བསྡུ་བའོ། །དང་པོ་ནི། དོན་དམ་ཡེ་ཤེས་ཐིག་ལེ་ཆེ། །མངོན་སུམ་གཏན་ལ་འབེབས་པའི་ལུང་། །མན་ངག་ངེས་པའི་སྙིང་པོ་ནི། །ལྟ་སྒོམ་སྤྱོད་འབྲས་ཚུལ་དུ་དབྱེ། །གཉིས་པ་རྒྱས་པར་བཤད་པ་ལ་བཞི། དེ་ཁོ་ན་ཉིད་ལྟ་བ། ཉམས་སུ་མྱོང་བ་སྒོམ་པ། མཚམས་སྦྱར་བ་སྤྱོད་པ། མཐར་ཕྱིན་པ་འབྲས་བུའི་ཚུལ་ལོ། །དང་པོ་ནི། ཡང་དག་གནས་ལུགས་གདོད་མ་ནས། །རང་བཞིན་གྲུབ་པ་གཅིག་པུའི་གཤིས། །ཀུན་ཡིན་གང་ཡང་མ་ཡིན་པ། །རིག་པ་ཁྱབ་བརྡལ་ངོ་བོ་ཉིད། །སངས་རྒྱས་སེམས་ཅན་
ཡོངས་ཀྱི་སྲོག །རང་སྣང་རྣམ་དག་བདེ་ཆེན་པོ། །མ་ལུས་ཀུན་འདུས་དགོངས་གཞིར་གནས། གང་ཡང་མ་འགགས་ཅིར་ཡང་འཆར། །རང་བྱུང་ཡེ་ཤེས་ངོ་བོར་ཐིམ། །མཐའ་རྣམས་ཐམས་ཅད་མ་སྤངས་བྲལ། །ལྷུན་གྲུབ་ཡེ་ཤེས་རང་གནས་པ། །སངས་རྒྱས་ཀུན་གྱི་དེ་ཉིད་དོ། །གཉིས་པ་ནི། དེ་ལྟར་མཐོང་བའི་རྣལ་འབྱོར་པས། །སེམས་ནི་མ་བཅོས་རང་གར་བཞག །དབང་པོ་མ་བཀག་རང་གསལ་བཞག །གཟུགས་སྒྲ་དྲི་རོ་ལ་སོགས་པ། །གང་མཐོང་གང་སྣང་དེ་ཉིད་ཀྱི། །ངང་ལ་མཉམ་པར་ལྷན་ནེར་བཞག །གང་ཡང་མི་འགེགས་མི་འཛིན་ཅིང་། །མཉམ་ཉིད་རིག་པའི་གདེངས་ལ་བཞག །དེ་ལ་རྟོག་ཅིང་གོམས་པ་ཡིས། །མེ་ཡི་ཕུང་པོ་འབར་བ་ལ། །ཡམ་ཤིང་སྐམ་པོ་བསྣན་པ་བཞིན། །དངོས་པོ་གང་དང་གང་སྣང་ཡང་། །དེ་ཉིད་ཡེ་ཤེས་རྐྱེན་དུ་འགྱུར། །འཇུར་བུས་མི་བསྒོམ་གང་བདེར་བཞག ། དེ་ཡང་སེམས་ལ་དབང་ཐོབ་ནས། །ཕྱོགས་གཅིག་ཁོ་ནར་མི་བསྒོམ་སྟེ། །ཏིང་འཛིན་འབུམ་ཕྲག་དུ་མ་ལ། །རྣལ་འབྱོར་རིག་པའི་རྩལ་ཆེན་སྦྱངས། །ཟབ་མོ་སངས་རྒྱས་སྤྱོད་ཡུལ་ཆེ། །རིག་པ་མཐའ་དབུས་མེད་པ་ཡི། །བདེ་ཆེན་སྤྱི་བླུགས་ཉིད་དུ་འཆར། །ནམ་མཁའི་མཐོངས་སུ་མདུང་བསྐོར་བཞིན། །རིག་བ་རང་ལ་རང་དབང་བསྒྱུར། །དེ་ལྟར་གདེངས་ཆེན་བསྒོམ་པའི་མཆོག །གསུམ་པ་ནི། དེ་
ཉིད་རྟོགས་པའི་རྣལ་འབྱོར་པས། །སྤྱོད་པ་བླང་དོར་མེད་པར་སྤྱད། །སྤངས་ནི་ཅིར་ཡང་མ་སྤངས་ལ། །ཆེད་དུ་གང་ཡང་བསྒྲུབ་པ་མེད། །སྤྱོད་པ་མ་འགགས་བླང་དོར་བྲལ། །མ་སྐྱེས་པ་ནི་ཆོས་ཀྱི་སྐུ། །འགགས་མེད་ཤར་བ་ལོངས་སྤྱོད་རྫོགས། །གཉིས་སུ་འཛིན་བྲལ་སྤྲུལ་པའི་ཚུལ། །སྐུ་གསུམ་རྫོགས་པའི་བརྟུལ་ཞུགས་གྲུབ། །བཞི་པ་ནི། མ་བསྒྲུབ་བདག་ཉིད་འབྲས་བུར་རྫོགས། །མ་བླངས་དངོས་གྲུབ་རང་ལ་ཤར། །མ་བགྲོད་ས་ལམ་ལྷུན་གྱིས་བགྲོད། །མ་བཙལ་ཆོས་སྐུའི་ནམ་མཁའ་ལ། །གཟུགས་སྐུ་ཡེ་ཤེས་ཤུགས་ཀྱིས་འགྲོ། །སྒྱུ་མ་ལྟ་བུར་གཞན་དོན་སྣང་། །བདེ་མཆོག་བདེ་བའི་གནས་ཐོབ་པའོ། །གསུམ་པ་དོན་བསྡུ་བ་ནི། མདོར་ན་དེ་ཉིད་མཐོང་ཞིང་གོམས། །གདེངས་སུ་སྤྱོད་ནས་འབྲས་ཐོབ་པའི། །ཚུལ་རྣམས་རང་རིག་གཅིག་པུ་ཡི། །ངང་ལས་མ་གཡོས་སྡོམ་པའི་མཆོག །གསུམ་པ་མཇུག་གི་དོན་ལ་གཉིས། །བརྩམས་པ་མཐར་ཕྱིན་པའི་བྱ་བ་དང་། འགྱུར་བྱང་གིས་མཇུག་བསྡུ་བའོ། །དང་པོ་ནི། འདི་བགྱིས་དགེ་བས་འགྲོ་བ་ཀུན། །ཡང་དག་ཡེ་ཤེས་མངོན་གྱུར་ཤོག །གཉིས་པ་ནི་རྒྱ་གར་གྱི་སློབ་དཔོན་ཆེན་པོ་རྡོ་རྗེ་ཧཱུྃ་ཀཱ་རས་མཛད་པ་རྫོགས་སོ། །པཎྜིཏ་དེ་ཉིད་དང་། བོད་ཀྱི་ལོ་ཙཱ་བ་གནུབས་ནམ་མཁའི་སྙིང་པོས་གསེར་བྲག་བྱ་སྐྱིབས་ཅན་དུ་བསྒྱུར་ནས་མངའ་བདག་བཙད་པོ་ལ་
གཏད་པས་ཡང་དག་པའི་ཡེ་ཤེས་ཀྱི་དགོངས་པ་ལས་མི་གཡོ་བའི་ས་བརྙེས་པ་ཡིན་ནོ། །མངྒ་ལཾ།།