རྒྱན་གྱི་འཆད་ཐབས་ཉུང་གསལ་གཞན་ཕན་ཉེར་མཁོ།
རྒྱན་གྱི་འཆད་ཐབས་ཉུང་གསལ་གཞན་ཕན་ཉེར་མཁོ་བཞུགས། །ཨོཾ་སྭ་སྟི་སིདྡྷི། འདིར་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པ་རྒྱན་གྱི་དོན་བསྡུས་ཏེ་འཆད་པ་ལ་བཞི། མཚན་གྱི་དོན། འགྱུར་གྱི་ཕྱག །གཞུང་གི་དོན། མཇུག་གི་དོན་ནོ། །དང་པོ་ནི། ཆོས་ཁུངས་བཙུན་པར་བསྟན་པའི་ཕྱིར་རྒྱ་གར་ན་སྐད་རིགས་བཞི་ཡོད་པའི་ལེགས་སྦྱར་ལྷའི་སྐད་དུ། བསྟན་བཅོས་འདིའི་མཚན་ལ། ཨ་བྷི་ས་མ་ཡ་ཨ་ལངྐཱ་ར་ནཱ་མ་པྲཛྙཱ་པཱ་ར་མི་ཏ་ཨུ་པ་དེ་ཤ་ཤཱས། ཞེས་བརྗོད་ཅིང་བོད་ཀྱི་སྐད་དུ་བསྒྱུར་ན་འབྲས་བུ་ཤེར་ཕྱིན་དང་ལམ་ཤེར་ཕྱིན་བརྗོད་བྱར་བྱེད་པའི་གཞུང་སྟོང་ཕྲག་བརྒྱ་པ་སོགས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་རྟོགས་བྱེད་ཀྱི་ཐབས་མན་ངག་དང་བསྟན་བཅོས་ཀྱི་གཞི་མཐུན་ཡིན་པས་གི་བསྟན་བཅོས་ཏེ་འཆོས་སྐྱོབ་ཀྱི་ཡོན་ཏན་གཉིས་དང་ལྡན་པ་ཡིན་ཅིང་། མཁྱེན་གསུམ་གྱི་རྣམ་པ་ཀུན་མངོན་དུ་ཕྱོགས་པར་མ་ནོར་བར་རྟོགས་པའི་ལམ་མཐའ་དག་གསལ་བྱེད་ཀྱི་རྒྱན་ཅེས་བྱ་བ་ནི་མཚན་སྒྲོག་པའོ། །གཉིས་པ་འགྱུར་ཕྱག་ནི། མ་རིག་པའི་གཉིད་ལས་སངས་ཤིང་ཤེས་བྱ་ལ་བློ་པདྨའི་འདབ་མ་ལྟར་རྒྱས་པའི་སངས་རྒྱས་དང་། ཀུན་རྫོབ་ཏུ་སེམས་ཅན་གྱི་དོན་དུ་བླ་མེད་བྱང་ཆུབ་དོན་དུ་གཉེར་བ་ལ་སེམས་མི་མཐུན་ཕྱོགས་ཀྱིས་མི་བརྫི་བའི་དཔའ་བོ་ཐམས་ཅད་དང་ཡང་ན་བྱང་ཆུབ་ནི་དེ་ཁོ་ན་ཉིད་ཡིན་ལ་དེ་དང་མཐུན་པར་སེམས་ཉིད་ཆོས་ཉིད་ལ་ཞུགས་པའི་དཔའ་བོ་ཐམས་ཅད་ལ་ཕྱག་འཚལ་ལོ། །གསུམ་པ་གཞུང་དོན་ལ་མཆོད་པར་བརྗོད་པ། བསྟན་
བཅོས་བརྩམས་པའི་དགོས་པ། བརྩམ་པའི་བསྟན་བཅོས་ཀྱི་ལུས་སོ། ༈ །དང་པོ་ནི། སྲིད་པ་ཐ་མའི་ཚེ་ཡང་དག་པའི་གདམས་ངག་གཞན་ལས་ཉན་ཅིང་ཚུལ་དེ་གཞན་ལའང་ངག་གིས་ཐོས་པར་བྱ་དགོས་པས་ཉན་ཐོས་སྲིད་པ་ཐ་མའི་ཚེ་གཞན་ལ་མ་ལྟོས་པར་རང་གི་བྱང་ཆུབ་མངོན་དུ་བྱ་ནུས་པའི་རང་བྱུང་རང་རྒྱལ་སོགས་ཞི་བ་ཐར་པ་འཚོལ་བ་རྣམས་ཕུང་སོགས་ཀྱི་གཞི་ཀུན་གང་ཟག་གི་བདག་མེད་དུ་ཤེས་པ་ཉིད་ཀྱིས་ཉོན་མོངས་པ་དང་སྡུག་བསྔལ་ཀུན་ཉེ་བར་ཞི་བའི་ལྷག་བཅས་ལྷག་མེད་ཀྱི་མྱ་ངན་ལས་འདས་པར་ཁྲིད་པར་མཛད་པ་གང་ཡིན་པ་དང་། །བྱང་ཆུབ་སེམས་དཔའ་འགྲོ་བ་ལ་ཕན་པར་བྱེད་པ་རྣམས་ཐེག་པ་གསུམ་གྱི་ལམ་བདེན་མེད་དུ་ཤེས་པའི་ལམ་ཤེས་པ་ཉིད་ཀྱིས་འཇིག་རྟེན་ཏེ་འགྲོ་བ་མཐའ་དག་གི་དོན་སྒྲུབ་པར་མཛད་པ་གང་ཡིན་པ་དང་། རྣམ་པ་ཐམས་ཅད་སྐྱེ་བ་མེད་པ་ཐུགས་སུ་ཆུད་པའི་རྣམ་མཁྱེན་གང་དང་ཡང་དག་པར་ལྡན་པས་ཐུབ་པ་སངས་རྒྱས་བཅོམ་ལྡན་འདས་རྣམས་ཀྱིས་བརྗོད་བྱའི་རྣམ་པ་ཀུན་དང་ལྡན་པའི་རྗོད་བྱེད་ཆོས་ཀྱི་འཁོར་ལོ་རིམ་པ་གསུམ་སོགས་སྣ་ཚོགས་པ་འདི་གསུངས་པ། །དེས་ན་ཉན་ཐོས་འཕགས་པ་དང་། རང་རྒྱལ་འཕགས་པ་དང་། བྱང་ཆུབ་སེམས་དཔའི་འཕགས་པའི་ཚོགས་དང་བཅས་པ་དང་། སངས་རྒྱས་འཕགས་པ་རྣམས་ཀྱི་ཡང་ནི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་ཕྱག་འཚལ་ལོ། །འདིར་ཡུམ་མཁྱེན་པ་གསུམ་གྱིས་གང་ཟག་གི་བདག་མེད་གཟུང་འཛིན་གཉིས་སྟོང་ལམ་གསུམ་བདེན་མེད་རྣམ་པ་ཐམས་ཅད་བདེན་མེད་སོགས་རྟོགས་པའི་ངོ་བོའི་ཡོན་ཏན། ཉེར་ཞིང་འཁྲིད་པ་གཞན་
དོན་སྒྲུབ་པ་ཆོས་འཁོར་བསྐོར་བ་སོགས་ནུས་པའི་ཡོན་ཏན་དང་ལྡན་པའི་སྒོ་ནས་བསྟོད་པའོ། །འདིར་གདུལ་བྱ་དབང་རྣོན་གྱིས་དབུ་མའི་ལྟ་བ་རྟོགས་པའི་སྒོ་ནས་ཡོན་ཏན་གཉིས་པོ་དེ་མི་འགལ་བར་ཚད་མའི་སྟོབས་ཀྱིས་ངེས་པ་རྙེད་ལ། དབང་བརྟུལ་གྱིས་ཚིག་ཙམ་གྱི་སྒོ་ནས་དད་པ་སྐྱེ་ལ་དེ་ལས་རྒྱན་ལ་ཐོས་སོགས་ཀྱིས་ཞུགས་ནས་རྣམ་མཁྱེན་ཐོབ་པར་འགྱུར་རོ། །གཉིས་པ་ལ་དགོས་སོགས་བཞི་ལས་བརྗོད་བྱ་ནི་རྣམ་པ་ཐམས་ཅད་མཁྱེན་པ་ཉིད་ཀྱི་ལམ་ལ་སོགས་པ་མངོན་རྟོགས་བརྒྱད་སྟོན་པས་ཚུ ཤེར་ཕྱིན་གྱི་མདོ་འདི་ལས་བཤད་པ་གང་ཡིན་པའོ། །ཉིང་དགོས་ནི་མུ་སྟེགས་དང་ཉན་རང་སོགས་གཞན་གྱིས་ཐོས་སོགས་ཀྱིས་མྱོང་བ་མ་ཡིན་པའི་རྣམ་མཁྱེན་ཏེའོ། །སུས་མྱོང་ན་སེམས་བསྐྱེད་དང་གདམས་ངག་སོགས་རྣམ་མཁྱེན་མཚོན་བྱེད་ཀྱི་ཆོས་བཅུ་སྦྱིན་སོགས་ཀྱི་སྤྱོད་པ་བཅུ་ཡི་བདག་ཉིད་ཅན་ཀྱི་ཐེག་ཆེན་གྱི་ལམ་འབྲས་ཡུམ་གྱི་མདོ་ཡི་དོན་མ་ལུས་པ་ཉམས་སུ་མྱོང་བ་ཤིན་ཏུ་གསལ་བའི་ཤེས་རབ་ཀྱིས་ངེས་པར་བྱས་པ་མི་བརྗེད་པའི་དྲན་པ་ལ་བཞག་ནས་མོས་སྤྱོད་པ་རྣམས་སུ་ཡང་ཡང་སྒོམ་པའི་བྱང་ཆུབ་སེམས་དཔའ་བློ་དང་ལྡན་པས་ས་དང་པོ་རབ་ཏུ་དགའ་བ་ལ་སོགས་པ་རྟོགས་པའི་རིམ་གྱིས་སངས་རྒྱས་ཀྱི་སར་མངོན་སུམ་དུ་ཉིང་དགོས་རྣམ་མཁྱེན་དེ་མཐོང་བར་འགྱུར་བའི་ཕྱིར་དུ་ཤེར་ཕྱིན་གྱི་མདོའི་དོན་དཀའ་ཚེགས་མེད་པར། །བདེ་བླག་ཏུ་ནི་མྱུར་དུ་འགྱུར་བ་ཞེས་བྱ་བ་ནི་བསྟན་བཅོས་མངོན་རྟོགས་རྒྱན་རྩོམ་པའི་དགོས་པ་ཡིན་ནོ། །འབྲེལ་པ་ནི་བསྟན་བཅོས་བརྗོད་བྱ་དང་འབྲེལ། དགོས་པ་བསྟན་བཅོས་དང་འབྲེལ། གནས་སྐབས་ཉིང་དགོས་མོས་སྤྱོད་དང་ས་བཅུ་སོགས་དགོས་པ་དང་
འབྲེལ། མཐར་ཐུག་གི་ཉིང་དགོས་རྣམ་མཁྱེན་དེ་གནས་སྐབས་ཀྱི་ཉིང་དགོས་དང་འབྲེལ་བ་དེ་རྣམས་འབྲེལ་པ་ཡིན་ནོ། །གསུམ་པ་བརྩམས་པའི་བསྟན་བཅོས་ཀྱི་ལུས་དངོས་ལ་གཉིས། མཁྱེན་གསུམ་མདོར་བསྟན་པ་དང་། ཡན་ལག་རྒྱས་པར་བཤད་པའོ། །དང་པོ་ལ་གཉིས། ལུས་མདོར་བསྟན་པ་དང་། ལུས་རྒྱས་པར་བཤད་པའོ། །དང་པོ་ནི། ཤེས་རབ་སོགས། གཉིས་པ་ལུས་རྒྱས་པར་བཤད་པ་ནི། སེམས་བསྐྱེད་པ་ནི་སོགས། གཉིས་པ་ཡན་ལག་རྒྱས་པར་བཤད་པ་ལ། རྣམ་མཁྱེན་ནས། ཆོས་སྐུའི་ཡན་ལག་རྒྱས་པར་བཤད་ཀྱི་བརྒྱད། དེ་རེ་རེ་ལའང་གཉིས། མཚོན་བྱེད་ཀྱི་རྒྱས་པར་བཤད་པ་དང་། སྐབས་བསྡུ་བའོ། །དེ་རྣམས་ནི་རིམ་པར། སེམས་བསྐྱེད་པ་ནི་སོགས་ནས། བརྒྱད་པའོ། །ཞེས་པའི་བར་གྱིས་བསྟན་ཏེ་བསྡུས་དོན་དུ་ཞིབ་པར་གསལ་ལོ། །གཉིས་པ་སྐབས་དྲུག་ཏུ་ཕྱེ་བ་ནི་ཉམས་སུ་བླང་བར་བྱ་བའི་མཁྱེན་པ་གསུམ་ནི། མཚན་ཉིད་ཀྱི་སྐབས་དང་རྣམ་རྫོགས་སྦྱོར་བ་ནི་མཁྱེན་གསུམ། དེ་ཡི་ཉམས་སུ་ལེན་བྱེད་ཀྱི་སྦྱོར་བའི་སྐབས་དང་། རྩེ་སྦྱོར་ནི་སྦྱོར་བ་དེ་རབ་ཏུ་གྱུར་པའི་སྐབས་དང་མཐར་གྱིས་པ་ནི་སྦྱོར་བ་དེ་ཡི་གོ་རིམ་གྱི་སྐབས་དང་། སྐད་ཅིག་སྦྱོར་བ་ནི་སྦྱོར་བ་དེ་མཐར་ཐུག་པའི་སྐབས་དང་། ཆོས་སྐུ་ནི་སྦྱོར་བ་དེ་ཡི་རྣམ་སྨིན་གྱི་སྐབས་དང་ནི་སྟེ་མཚན་ཉིད་སྐབས་སྦྱོར་བའི་སྐབས་རབ་ཀྱི་སྐབས་ཞེས་སོགས་དོན་བསྡུས་པའི་ཚུལ་གཞན་ཏེ་སྐབས་རྣམ་པ་དྲུག་ཏུ་བཤད་དོ། །གསུམ་པ་སྐབས་གསུམ་དུ་ཕྱེ་བ་ནི་འཇུག་པའི་ཡུལ་མཁྱེན་པ་ནི་རྣམ་པ་གསུམ་པོ་རྒྱུའི་སྐབས་དང་ཉམས་ལེན་གྱི་སྦྱོར་བ་རྣམ་པ་བཞི་ཡི་བདག་ཉིད་ནི་སྦྱོར་བའི་སྐབས་དང་། ཆོས་སྐུ་ཕྲིན་ལས་དང་བཅས་པ་ནི་འབྲས་བུའི་སྐབས་དང་ནི། །ཞེས་དེ་
ལྟར་དོན་བསྡུས་ཚུལ་གཞན་ཏེ་སྐབས་རྣམ་པ་གསུམ་དུ་བཤད་དོ། །བཤད་ཚུལ་གསུམ་པོ་དེ་ལ་སྐབས་ཀྱི་གྲངས་བློ་ལ་འཆར་ཚུལ་མང་ཉུང་ཡོད་ཀྱང་། དོན་ནི་སྔར་རྒྱས་པར་བཤད་པ་གཞན་དུ་ཤེས་པར་བྱ་དགོས་སོ། །བཞི་པ་མཇུག་གི་དོན་གཉིས་མཛད་པ་པོ་གང་ཡིན་པ་དང་། ལོ་པཎ་གང་གིས་བསྒྱུར་བའོ། །དང་པོ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་ཅེས་བྱ་བ། འགྲོ་བ་མགོན་མེད་པ་རྣམས་སྐྱོབ་བའི་རྗེ་བོ་སྒོ་གསུམ་མི་མཐུན་ཕྱོགས་ལས་བསྡམས་པའི་བཙུན་པ་སློབ་པ་དང་མི་སློབ་པའི་གནས་སྐབས་ཐམས་ཅད་དུ་བྱམས་པའི་མཚན་མི་འདོར་བས་བྱམས་པ་ལེགས་པའི་ལམ་དོན་དུ་གཉེར་བ་རྣམས་ཀྱི་མགོན་པོས་ཐུགས་རྗེ་གཞན་དབང་དུ་གྱུར་པའི་སྒོ་ནས་གདུལ་བྱ་རྣམས་ཀྱི་ཤེར་ཕྱིན་གྱི་མདོའི་དོན་རྟོགས་ཕྱིར་མཛད་པ་མ་ཚང་བ་མེད་པར་རྫོགས་སོ། །གཉིས་པ་གང་གིས་བསྒྱུར་བའི་འགྱུར་བྱང་ནི་རྒྱ་གར་གྱི་མཁན་པོ་བིདྱ་ཀཱ་ར་པྲ་བྷ་སྟེ་རིག་བྱེད་འོད་ཟེར་རམ་རིག་པའི་འབྱུང་གནས་དང་། ཞུ་ཆེན་གྱི་ལོ་ཙཱ་བ་བནྡེ་དཔལ་བརྩེགས་ཀྱིས་སཾ་སྐྲྀ་ཏ་ལམ་བོད་སྐད་དུ་བསྒྱུར་ཅིང་ཞུས་ཏེ་འཆད་ཉན་གྱིས་གཏན་ལ་ཕབ་པ་ལས། སླད་ཀྱི་པཎྜིཏ་གོ་མཱི་འཆི་མེད་དང་། ལོ་ཙཱ་བ་དགེ་སློང་བློ་ལྡན་ཤེས་རབ་ཀྱིས་བསྒྱུར་ཅིང་ཞུས་ཏེ་ལེགས་པར་གཏན་ལ་ཕབ་པའོ། །འདིས་ཀྱང་བསྟན་འགྲོ་ལ་མྱུར་དུ་ཕན་ཐོགས་པར་གྱུར་ཅིག །མངྒ་ལཾ།། །།སྨྲས་པ། མཚན་ཉིད་ལྡན་པའི་བཤེས་གཉེན་ལ་བརྟེན་ནས། །མདོ་དང་རྒྱན་ལ་ཐོས་སོགས་ཀྱིས་ཞུགས་ཏེ། །ངེས་འབྱུང་བྱང་སེམས་ཡང་དག་ལྟར་སྦྱོར་བ། །ཐོག་མར་མཁྱེན་གསུམ་ཉམས་ལེན་བསྡུས་
དོན་ཡིན། །ཡུལ་ལྔ་ལམ་མཁས་བསམ་པའི་གོ་གྱོན་ནས། །འཇུག་པའི་སེམས་བསྐྱེད་སྦྱོར་བའི་ཕྱིན་དྲུག་བརྩོན། །གྲངས་མེད་གསུམ་གྱི་ཚོགས་ཀྱི་མགོ་བཅོམ་པ། །བཞི་པའི་ཐར་ཆ་མཚན་ཉིད་ཚང་བའོ། །དེ་ནས་བསྒོམ་བྱའི་རྣམ་ཀུན་བརྒྱ་དོན་གསུམ། །རྣམ་ཐར་བསྡུས་འདི་ཚང་ལ་མ་ནོར་བའི། །ལམ་དུ་མཚན་ཉིད་བཞི་ཡི་གཏན་ཕབ་ནས། །རྣམ་ཀུན་རང་བཞིན་མེད་པར་མཉམ་བཞག་བསྒོམ། །ཞི་ལྷག་ཟུང་འབྲེལ་སྒོམ་པ་རབ་རྩེར་སོན། །བརྒྱ་དང་དོན་གསུམ་དམིགས་བཅས་ཀུན་རྫོབ་ཏུ། །གོ་རིམ་མ་འཆོལ་མཐར་གྱིས་འབད་པ་བསྒོམ། །གོམས་པའི་རྩོལ་མེད་སྐད་ཅིག་གཅིག་ལ་རྫོགས། །སྦྱོར་བཞིའི་དོན་བསྡུས་སྐུ་བཞི་ཕྲིན་ལས་བཅས། །མངོན་དུ་བྱེད་པ་འབྲས་བུའི་བསྡུས་དོན་ཡིན།།