བདེ་གཤེགས་སྙིང་པོའི་དོན་གསལ་བར་བྱེད་པ།
བདེ་གཤེགས་སྙིང་པོའི་དོན་གསལ་བར་བྱེད་པ་བཞུགས་སོ། །ན་མོ་མུ་ནཱིནྡཱ་ཡ། བདེ་གཤེགས་སྙིང་པོའི་གནས་ལུགས་མདོ་ལས་གསུངས་ཚུལ་དང་། དགོངས་འགྲེལ་གྱིས་བཀྲལ་ཚུལ་དང་། སྙིང་པོར་གྱུར་པའི་དོན་གཏན་ལ་དབབ་པ་དང་། གཞན་དུ་གསུངས་པའི་དགོངས་པ་བཤད་ཅིང་ཐེ་ཚོམ་བསལ་བའོ། །དང་པོ་ནི། ཉན་ཐོས་ཀྱི་ཐེག་པར་ཡིད་རང་བཞིན་གྱིས་རྣམ་པར་དག་པ་ཉིད་དགོངས་བཞིར་བྱས་ནས། དེ་ལ་བདེ་གཤེགས་སྙིང་པོའི་སྒྲས་བསྟན་པར་མ་མཛད་ཀྱང་དེའི་དོན་དུ་གསུངས། ཐེག་པ་ཆེན་པོའི་མདོ་སྡེ་རྣམས་ལས། རྟོགས་པའི་དགོས་པ་ལ་ལྟོས་ནས་རྣམ་གྲངས་གཞན་གྱིས་བཤད་པ་དང་། རང་གི་མིང་ནས་སྨོས་པའི་ཚུལ་གྱིས་སྒྲ་ཇི་བཞིན་པ་བསྟན་པར་མཛད་པ་གཉིས་ལས། དང་
པོ་ནི། སེམས་ཙམ་སྟོན་པའི་མདོ་རྒྱུད་འགའ་ཞིག་ལས། མཚན་དཔེ་གསལ་རྫོགས་ཀྱི་ཚུལ་གྱིས་འགྲོ་རྒྱུད་ལ་ཡོད་པར་བཤད་པ་སོགས་འདུས་བྱས་དང་ཚུལ་མཐུན་པར་བསྟན་ཅིང་། མདོར་ན་དེ་བཞིན་གཤེགས་པའི་སྙིང་པོ་སྤྱི་ཙམ་གྱི་ལྡོག་པ་ལ་རང་བཞིན་གནས་རིགས་སོགས་ཆོས་ཉིད་བྱེ་བྲག་པའི་མིང་གིས་བཏགས་པ་དེ་དང་དེར་ཁས་བླང་དུ་མི་བཏུབ་པ་སྟེ། ཅིའི་ཕྱིར་ན་གཤེགས་སྙིང་དེ་གཞི་ལམ་འབྲས་གསུམ་དེ་ཆོས་ཀྱི་བྱེ་བྲག་ཐམས་ཅད་ཀྱི་རང་བཞིན་ཡིན་ཕྱིར། ཆོས་ཕྱོགས་རེའི་ཆོས་ཉིད་དུ་མ་དམིགས་པའི་ཕྱིར་རོ། །གཉིས་པ་ནི། མདོ་རྣམས་ལས་རྣམ་པར་ཐར་པའི་སྒོ་གསུམ་སོགས་དང་། རྒྱུད་སྡེ་ལས་རང་བཞིན་ལྷན་སྐྱེས་དང་། འཁོར་འདས་དབྱེར་མེད་དང་། རྣམ་པ་ཀུན་གྱི་མཆོག་དང་ལྡན་པའི་སྟོང་པ་དང་། སློབ་དཔོན་ཀླུ་སྒྲུབ་ཀྱིས་ཟུང་འཇུག་དང་། བི་རུ་པས་ཤིན་ཏུ་རྣམ་པར་དག་པའི་དེ་ཁོ་ན་ཉིད་སོགས་དང་། སློབ་དཔོན་སངས་རྒྱས་ཡེ་ཤེས་ཀྱིས་ཟབ་གསལ་གཉིས་སུ་མེད་པའི་ཡེ་ཤེས་དང་། འཁོར་ལོ་སྡོམ་པ་ལས་བསམ་གྱིས་མི་ཁྱབ་པའི་ཡེ་ཤེས་དང་། གཤེད་དམར་གྱི་མན་ངག་ཏུ་ཤིན་ཏུ་སྤྲོས་མེད་སོགས་གསུངས་པ་རྣམས་ཏེ། འདི་དག་གིས་མིང་གིས་བཏགས་པ་ལྟར་གནས་ལུགས་རང་ངོས་ནས་གྲུབ་པ་མེད་ཀྱང་ཐ་སྙད་དུ་དེ་ལྟར་ཁས་བླང་དུ་བཏུབ་པར་གསལ་ལོ། །གཉིས་པ་ནི། ཐེག་
དམན་པས་སེམས་ཅན་སངས་རྒྱས་ཀྱི་སྙིང་པོ་ཅན་དུ་མི་འདོད་པས་འདིའི་དོན་ཇི་ལྟར་བཀྲལ། ཐེག་ཆེན་དབུ་སེམས་གཉིས་ཀྱི། སེམས་ཙམ་པས། སེམས་རང་བཞིན་གྱིས་འོད་གསལ་བ། ངོ་བོ་རང་རིག་གིས་བསྡུས་པ། དངོས་པོར་གྲུབ་པ་ཉིད་ལ་དེ་བཞིན་གཤེགས་པའི་སྙིང་པོར་འཆད་ཅིང་། དེ་ལ་སངས་རྒྱས་སོགས་འབྲས་བུའི་མིང་གིས་བཏགས་པ་རྣམས་སྒྲ་ཇི་བཞིན་མ་ཡིན་པར་དྲང་པའི་དོན་དུ་འདོད་དེ། ཕྱོགས་གླང་གིས། སོ་སོ་སྐྱེ་བོའི་ཤེས་པ་གང་། །རང་བཞིན་གྱིས་ནི་རྣམ་བྱང་ལ། །དེ་ལ་སངས་རྒྱས་སྨྲ་བརྗོད་དེ། །བྱང་སེམས་ས་ལ་སངས་རྒྱས་བཞིན། །ཅེས་གསུངས་པའི་ཕྱིར་རོ། །དབུ་མ་པའི་ལུགས་ནི། ངེས་དོན་སྟོན་པའི་མདོ་དང་བསྟན་བཅོས་ཀུན་ནས་བདེ་གཤེགས་སྙིང་པོ་ངོ་བོ་ཟུང་འཇུག་གི་ཚུལ་གྱིས་གསུངས་པ་ཁོ་ནར་འཆད་དོ། །འོ་ན་དབུ་མའི་ལུགས་ལ། སེམས་ཅན་དང་སངས་རྒྱས་ཀྱི་ཆོས་དབྱིངས་གཉིས་དབྱེར་མེད་པ་དང་། སེམས་ཀྱི་སྟོང་ཆ་དང་། གསལ་རིག་ཙམ་དང་། ཀུན་གཞིའི་རྣམ་ཤེས་ལ་བཤད་པ་དང་། ཆོས་སྐུ་ལ་བཤད་པ་སོགས་དུ་མ་ཡོད་དོ་སྙམ་ན། དང་པོ་ནི་ཟུང་འཇུག་ལས་མ་འདས། སྟོང་ཆ་རྐྱང་པ་དང་། གསལ་རིག་རྐྱང་པར་བཤད་པ་དབུ་མའི་གཞུང་ན་མེད། ཀུན་རྣམ་ལ་བཤད་པ་ནི་སྒྲ་ཇི་བཞིན་མ་ཡིན་པར་སྔར་བཤད་པས་ཁྱབ། ཆོས་སྐུ་ལ་སྙིང་པོར་གསུངས་ཀྱང་།
དེས་སྙིང་པོ་ཆོས་སྐུར་གསུངས་པ་མི་འགྲུབ་བོ། །རང་ལུགས་གསལ་བ་དང་། སྟོང་པ་དང་། ཆོས་སྐུ་དང་གསུམ་གྱི་སྒོ་ནས་བཤད་པ་བཞིར་སྨོས་པ་ནི། དེ་དང་དེའི་མིང་ནས་སྨོས་པའི་ཚུལ་གྱིས་གཙོ་བོར་གསུངས་པ་ལ་དགོངས་སོ། །གསུམ་པ་ལ། རྗེ་བཙུན་སྐུ་མཆེད་ཀྱི་དགོངས་པ་ལྟར་སྤྱིར་བསྟན་པ་དང་། སྡོམ་གསུམ་དང་སྦྱར་ཏེ་བྱེ་བྲག་ཏུ་བསྟན་པའོ། །དང་པོ་ལ། སྙིང་པོའི་ངོ་བོ་ངོས་བཟུང་། དེས་ཀུན་ལ་ཁྱབ་པར་བསྟན་པའོ། །དང་པོ་ནི། རྩ་རྒྱུད་ལས། ཡེ་ཤེས་ཆེན་པོ་ཞེས་སྨོས་པ། ཡེ་ཤེས་ནི་གསལ་བ། ཆེན་པོ་ནི་སྟོང་པ། དེ་གཉིས་གཞི་མཐུན་པའི་ཕྱིར་ཟུང་འཇུག །དེའི་མཚན་ཉིད་ཀྱང་སྒྲོ་སྐུར་གྱི་རྟོག་པ་གཉིས་ཀ་སྤང་བའི་དོན་དུ་རྣམ་པར་བཤད་ལ། སྤྱིར་སྙིང་པོ་ཞེས་པའི་སྒྲ་སཱ་ར་དང་། གནྡྷ་ཞེས་པ་འདྲ་བའམ། སྐྱེ་གནས་སོགས་ལ་འཇུག་པས། འགྱུར་བ་མེད་པ་དང་། འཁོར་འདས་ཀུན་གྱི་འབྱུང་གནས་སུ་གྱུར་པ་སོགས། མདོར་ན་སེམས་ཀྱི་རང་བཞིན་སྤྲོས་པ་དང་བྲལ་བ་ཐབས་དང་ཤེས་རབ་ཀྱི་བདག་ཉིད་འདི་ལ་དེ་བཞིན་གཤེགས་པའི་སྙིང་པོ་ཞེས་བརྗོད་དེ། དེ་བཞིན་གཤེགས་པ་རྣམས་སྐྱེ་བའི་གནས་ཡིན་པའི་ཕྱིར་རོ། །དེ་བཞིན་གཤེགས་པའི་སྐྱེ་བ་ལ་དེ་བཞིན་གཤེགས་པའི་སྙིང་པོར་བསྟན་པ་དང་། དེ་བཞིན་གཤེགས་པ་ལ་རང་བཞིན་དབྱེར་མེད་པ་གཤེགས་སྙིང་དང་། རྒྱུ་ལ་སྙིང་
པོར་བསྟན་པ་སྟེ། གསུམ་པོ་འདི་རྒྱུད་བླ་མ་ལས། རྫོགས་སངས་སྐུ་ནི། ཞེས་སོགས་གསུངས་པའི་དོན་ཀྱང་ངོ་། །གཉིས་པ་ལ། སྤྱིར་ཁྱབ་ཚུལ་དང་། རྒྱུ་ལམ་འབྲས་གསུམ་གྱི་བདེ་གཤེགས་སྙིང་པོ་སོ་སོས་ཐམས་ཅད་ལ་ཁྱབ་པའི་དགོངས་པ་བཤད་པའོ། །དང་པོ་ལ། དེ་ལས་བྱུང་བའི་ཚུལ་གྱིས་དང་། དེའི་བདག་ཉིད་ཡིན་པའི་ཚུལ་གྱིས་སོ། །དང་པོ་ནི། རང་གི་ངོ་བོས་གྲུབ་ལུགས་ཀྱི་དབང་དུ་བྱས་ན་གང་དུའང་མ་གྲུབ་ལ། སྣང་ལུགས་ཀྱི་དབང་དུ་བྱས་ན་ཆོས་ཅན་སྣ་ཚོགས་ཐམས་ཅད་དུ་སྣང་བ་སྟེ། གཞི་ལམ་འབྲས་གསུམ་གྱི་སྣང་བ་གང་འཆར་ཀྱང་། རང་གི་ངོ་བོ་སྤྲོས་པ་དང་བྲལ་བཞིན་དུ་དེ་དག་ཏུ་འཆར་བའོ། །གཉིས་པ་ནི། སྣང་བ་སྣ་ཚོགས་སུ་སྣང་ཡང་རང་གི་ངོ་བོ་ལྷན་ཅིག་སྐྱེས་པའི་ཡེ་ཤེས་ལས་ལོགས་སུ་མ་གྲུབ་པས་གུད་ན་མེད་ཅེས་སྨོས་པའོ། །གསུམ་པ་ནི། རང་བཞིན་སྤྲོས་པ་དང་བྲལ་ཞིང་ཟུང་དུ་འཇུག་པ་འདི་ལས་མ་བྱུང་ཞིང་། འདིའི་ཁོངས་སུ་མ་འདུས་པའི་གཞི་ལམ་འབྲས་གསུམ་གང་ཡང་མེད་པས་འབྲས་བུ་སྟོན་པའི་སྐབས་སུ་བཅོམ་ལྡན་འདས་ཐམས་ཅད་ལ་བཞུགས་པར་བཤད་པ་སོགས་ཀྱང་རང་བཞིན་ལ་འདོད་དགོས་ཀྱི། ཆོས་ཅན་སོ་སོ་དང་འབྲེལ་བའི་ཆོས་ཉིད་འདིས་ཀུན་ལ་ཁྱབ་པ་མི་སྲིད་དེ། གནད་འདི་གོ་ན་འབྲས་བུ་དང་ལམ་གྱིས་ཀྱང་རྒྱུ་མཚོན་ནུས་པ་དང་། སེམས་ཅན་གྱི་སེམས་
ཀྱིས་འབྲས་བུ་དང་ལམ་ལ་ཁྱབ་པ་དང་། ལམ་གྱི་ཆོས་ཉིད་ཀྱིས་ཀྱང་འབྲས་བུ་དང་རྒྱུ་ལ་ཁྱབ་པའི་ཐ་སྙད་ཤིན་ཏུ་ཡང་རིགས་སོ། །གཉིས་པ་ལ་མདོར་བསྟན་པ་དང་། དེ་ཉིད་རྗེ་བཙུན་གོང་མ་གསུམ་གྱི་གསུང་དང་། བདག་ཉིད་ཆེན་པོ་ཁུ་དབོན་གྱི་གསུང་སྒྲོས་དང་སྦྱར་ཏེ་རྒྱས་པར་བཤད་པའོ། །དང་པོ་ནི། རིག་པས་ཀྱང་ནི་འདི་གྲུབ་བོ་ཞེས་པ་ཡན་ཆད་ཀྱིས་གཞན་གྱི་འདོད་ཚུལ་བཀག །ཆོས་༧ འཕགས་པའི་ལེའུར་ལྟོས། ཞེས་པ་ཡན་ཆད་ཀྱིས་སྤྲོས་བྲལ་བདེ་གཤེགས་སྙིང་པོར་འཆད་པའི་རང་གི་ལུང་ཁུངས་དང་བཅས་པ་སྨོས། ཤེས་པར་གྱིས་ཡན་ཆད་ཀྱིས་གནས་ལུགས་སྤྲོས་བྲལ་སྙིང་པོར་བཤད་པ་དེ་ལ་དོགས་པ་སྤོང་བའོ། །དེས་ན་རྗེ་བཙུན་སྐུ་མཆེད་ཀྱིས། རྩ་རྒྱུད་ལས། ཡང་ན་དེ་ཉིད་ཐམས་ཅད་བདག །ཅེས་སོགས་ཀྱི་ཐད། གྲུབ་ལུགས་ཀྱི་དབང་དུ་བྱས་ན་རང་གི་ངོ་བོས་གང་དུའང་མ་གྲུབ་པ་དེས་གྲོལ་བ་ཡིན་ལ། སྣང་ལུགས་ཀྱི་དབང་དུ་བྱས་ན་ཐམས་ཅད་དུ་སྣང་བ་དངོས་པོ་ཀུན་གྱི་གནས་ལུགས་སུ་གྲུབ་པ་འདི་ལ་འགལ་བ་མེད་དོ། །ཞེས་པའང་གཞུང་དོན་ཕྱི་མ་གཉིས་ལ་སྦྱར་ན་འགྲིག་སྟེ། བདེ་གཤེགས་སྙིང་པོ་རང་གི་ངོ་བོ་གང་དུའང་མ་གྲུབ་ཀྱང་མདོ་སྡེ་འགའ་ཞིག་ལས་ཡོད་པར་གསུངས་པ་ནི་སྣང་ལུགས་ཀྱི་དབང་དུ་བྱས་ན་སྙིང་པོ་སྣ་ཚོགས་སུ་སྣང་བ་ལ་དགོངས་ཤིང་། དགོས་པ་སྐྱོན་ལྔ་སྤོང་
བའི་ཕྱིར་ཡིན་ལ། དངོས་ལ་གནོད་བྱེད་ངོ་བོས་གྲུབ་པ་དེ་འདྲའི་སངས་རྒྱས་ཀྱི་ཁམས་ཡོད་ན་སོགས་སྦྱར་རོ། །ཡང་འཕགས་པའི་བཞེད་པ་ལྟར་ན། རྒྱུད་བླའི་ས་བཅད་དང་མཐུན་པར། དོན་ཕྱི་མ་གཉིས་ཀྱིས། ངེས་དོན་གྱི་དབང་དུ་བྱས་ན་བདེ་གཤེགས་སྙིང་པོ་རང་བཞིན་སྤྲོས་བྲལ་ཡིན་ལ། འོ་ན་མདོ་དང་རྒྱུད་བླ་སོགས་ལས་བཤད་ཚུལ་དང་འགལ་ལོ་སྙམ་ན། ངེས་དོན་གྱི་དབང་དུ་བྱས་ན་དེ་ནི་དྲང་དོན་དགོངས་པ་ཅན་དུ་ཤེས་པར་བྱ་ཞེས་སྦྲེལ་ལོ། །དེས་ན་བདེ་གཤེགས་སྙིང་པོ་ཆོས་ཅན། ངོ་བོ་སྤྲོས་བྲལ་ཡིན་པར་ཐལ། དེ་ལས་འཁོར་འདས་ཐམས་ཅད་འབྱུང་དུ་རུང་བའི་ཕྱིར། དེ་ལྟ་བུ་དེ་དྲང་དོན་ནམ་ཀུན་རྫོབ་ཏུ་ཡོད་པར་ཁས་འདི་དང་མཐུན་པར་ཀུན་མཁྱེན་གྱི་སྡོམ་གསུམ་ཁ་བསྐང་དུ་བྲིས་ཡོད། འཁྲུལ་སྤོངས་སུ་མི་སྣང་། ལེན་པ་ལ་འགལ་བ་མེད་དོ། །གཉིས་པ་ནི། ས་ཆེན་གྱི་སཾ་བྷུ་ཊའི་རྣམ་བཤད་ཐོར་གང་ཚེ་སེམས་ཀྱི་ངོ་བོ་ནི། བུ་ལས། བདེ་གཤེགས་སྙིང་པོ་དེ་རང་གི་ངོ་བོས་མ་གྲུབ་བཞིན་དུ་སྣང་། ཐམས་ཅད་དེ་ལས་བྱུང་བའི་ཚུལ་གྱིས་ཁྱབ་པར་གསུངས་པ་དང་། རྗེ་བཙུན་མཆེད་གྱིས་མཛད་པའི་གནད་ཀྱི་གསལ། །སྔོ་སོགས་ཁ་དོག་མི་དམིགས་ཤིང་། །བྱེད་དང་། དག་ལྡན་སོགས་ཀྱང་ཚུལ་དེ་བཞིན་དུ་བཤད་ལ། དེ་དང་མཐུན་པར་ཆོས་རྗེས་ཀྱང་སྡོམ་གསུམ་དང་། ཞུ་ཕྲིན་སོགས་ལས་རྒྱ་ཆེར་བཤད་པ་དང་། འཕགས་པས་ཀྱང་ལྗོན་
ཤིང་ལས། སེམས་ཀྱི་རང་བཞིན་སྤྲོས་པ་དང་བྲལ་བ་དེ་ལ་དེ་བཞིན་གཤེགས་པའི་སྙིང་པོ་ཞེས་གསུངས་ཏེ། རྒྱན་ལས། དེ་བཞིན་ཉིད་ནི་སོགས་དྲངས་ཏེ། ཞེས་གསུངས་པས་སོ། །ཞེས་བཤད་པ་ཡང་སྔར་དང་མཐུན་མོད། འོན་ཀྱང་རྒྱུད་བླ་རང་རྐང་འཆད་པའི་ཚེ། སེམས་ཙམ་ལྟར་ན། དཔེ་དགུས་བསྟན་པ་ལྟར་ཡོན་ཏན་དབྱེར་མེད་ཀྱི་ཚུལ་གྱིས་འགྲོ་རྒྱུད་ལ་མེད་ཀྱང་། དེ་ལྟ་བུ་ཡོད་པར་བཤད་པ་ནི་ས་བོན་ནམ་ཆ་འཛིན་ལ་དགོངས་ཞེས་བཤད་དོ། །དབུ་མ་པ་ལྟར། རྗེ་བཙུན་སྐུ་མཆེད་ཀྱིས། དཔེ་དགུས་བསྟན་པ་ལྟར་མེད་དེ། དེ་དག་གི་སྐབས་སུ་རྟེན་དང་བརྟེན་པ་དོན་གཞན་ཚུལ་གྱིས་བཤད་ལ། དེ་བཞིན་གཤེགས་པའི་སྙིང་པོ་ནི། འཁོར་བ་སྤངས་ནས་གཞན་དུ་ན། །མྱ་ངན་འདས་ཞེས་པ་ལྟར་ཀུན་རྫོབ་ཀྱི་ཆོས་གང་ཡང་གཞན་དུ་མ་གྲུབ་པའི་ཕྱིར་རོ། །འཕགས་པ་ལྟར་ན། དཔེ་དགུས་བསྟན་པའི་སྙིང་པོ་དཔེས་བསྟན་པའི་ཆ་ནས་འགྲོ་ལྔའི་རྒྱུད་ལ་ཡོད་ཀྱང་དེ་ཉིད་དྲང་དོན་གྱི་དབང་དུ་བྱས་པ་ཡིན། ངེས་དོན་གྱི་དབང་དུ་མེད་དེ། ཆོས་ཐམས་ཅད་རང་བཞིན་གྱིས་སྟོང་པ་ཡིན་པའི་ཕྱིར། ཞེས་བཞེད། བཞི་པ་ནི། མྱང་འདས་འདས་མ་འོངས་པའི་སངས་རྒྱས་ཀྱི་རང་བཞིན་ཡིན་པར་བཤད་པ་ནི། རང་བཞིན་ཅེས་པའི་སྐད་དོད་ཏཎཱ་ཡ་སྟེ་རང་བཞིན་ཉེ་རྒྱུ་དང་། བྱུང་ཟིན་ཏེ་འབྲས་བུ་གཉིས་ཀ་ལ་འཇུག་པས།
འདི་སོགས་སངས་རྒྱས་ཀྱི་རང་བཞིན་ཡོད་པར་གསུངས་པ་ནི་འབྲས་བུ་འཇུག་པའི་དབང་དུ་བྱས་སོ། །དེ་ནས་རྗེ་བཙུན་གྱིས། རང་བཞིན་རྒྱུ་ལ། སོགས་ཀྱིས་དོན་ལེགས་པར་བསམ་ན་གནད་ཐམས་ཅད་རང་གྲོལ་དུ་འགྱུར་རོ། །ཞེས་པའང་བརྗེད་བྱང་དུ་བཏབ་པའོ། །མྱང་འདས་ལས། ཤེས་རབ་ཅན་རྣམས་ཀྱིས་ནི་ངའི་ལུས་ལ་ཆོས་ཀྱི་སྐུའི་ས་བོན་ཡོད་སྙམ་དུ་ཤེས་པ་ཐམས་ཅད་འཛིན་པར་མི་བྱེད་དོ། །བདག་མེད་པར་བསྟན་ན་ནི་བྱིས་པ་རྣམས་བདག་མེད་དོ་སྙམ་དུ་འཛིན་ནོ། །ཤེས་རབ་ཅན་གྱིས་ནི་ཐ་སྙད་དུ་ཡོད་དོ་སྙམ་དུ་ཤེས་ཏེ་ཐེ་ཚོམ་མེད་དོ། །དེ་བཞིན་གཤེགས་པའི་སྙིང་པོ་ནི་སྟོང་པ་ཉིད་ཡིན་ནོ་ཞེས་བསྟན་ན་ནི། བྱིས་པ་རྣམས་ཆད་པ་འཇིགས་སུ་རུང་བ་ཡོན་པོ་སྒོམ་པར་བྱེད་དོ། །ཤེས་རབ་ཅན་རྣམས་ཀྱིས་ནི་རྟག་པ་དང་བརྟན་པ་དང་ཐེར་ཟུག་པ་དེ་སྒྱུ་མ་ཙམ་དུ་ཡོད་པར་ཤེས་སོ། །ཞེས་གསུངས།། ༈ །།རྣམ་འགྲེལ་ལེའུ་གཉིས་པར། རྒྱུ་སྤངས་ཡོན་ཏན་སོགས་ཀྱི་དོན་བདེ་གཤེགས་ཞེས་པ་འཆད་པ་སྟེ། དེ་ཡང་བདག་བདེ་ལ་གོམས་པས་བདག་དང་བདག་གིར་ཆགས་པའི་རྒྱུ་སྔ་མ་ངང་གིས་འགོག་ཅིང་། ཕྱི་མ་མི་སྐྱེ་བའི་མཚན་ཉིད་ཅན་གྱི་ཁྱད་པར་ནི་སྤངས་བའོ། །ཡོན་ཏན་གསུམ་ནི་ཁྱབ་པ་གསུམ་མོ། །དེ་ནི་བདེ་བར་གཤེགས་པ་ཉིད་ཡིན་ནོ། །དེ་ཡང་སུ་ག་ཏའི་སྒྲ་ལས་དྲངས་ན་ལེགས་པར་གཤེགས་པ་སོགས་དོན་དུ་མ་
འཇུག་ཀྱང་། འདིར་བསྔགས་པ་ཉིད་དང་། སླར་མི་ལྡོག་པ་ཉིད་དང་། མ་ལུས་པ་ཉིད་དེ་དོན་གསུམ་གྱི་དབང་དུ་བྱས་ཏེ་འཆད་ན། དང་པོ་ནི། བདག་མེད་མཐོང་བའི་ཕྱིར་བསྔགས་པ་མ་ཡིན་པ་སྡུག་བསྔལ་གྱི་རྟེན་དུ་འགྱུར་བ་མ་ཡིན་ཏེ། དེ་ནི་བསྔགས་པར་འོས་པའི་སར་གཤེགས་པ་ཡིན་ལ། གང་གི་རྒྱུ་ཡང་སྡུག་བསྔལ་གྱི་རྩ་བ་བདག་ཏུ་ལྟ་བ་མེད་པར་མཐོང་བའམ། སྦྱོར་བ་ལས་ཡིན་ནོ། །གཉིས་པ་ནི། སྐྱེ་དང་སྐྱོན་ནི་ཀུན་འབྱུང་དག །སླར་ཡང་ལྡོག་ཅེས་བཤད་པ་ཡིན། །བདག་ལྟའི་ས་བོན་སྤངས་པའི་ཕྱིར། །སླར་མི་གཤེགས་པ་ཉིད་ཡིན་ནོ། །དེ་བདེན་ཐ་དད་བདག་ཉིད་བདེན་པ་ཉིད་དུ་བལྟ་བས་སྒྲོ་བརྟགས་པ་བདེན་པ་མ་ཡིན་པའི་རྣམ་པར་བཟློག་པར་འཛིན་པ་ཅན་ཡིན་པའི་ཕྱིར་རོ། །ཀྱིས། །ཞེས་དང་། གསུམ་པ་ནི། ལུས་ངག་སེམས་ཀྱི་གནས་ངན་ལེན། །ཉོན་མོངས་མེད་དང་ནད་མེད་དང་། །ལམ་བཤད་མི་གསལ་ཉིད་ལུས་ཡིན། །གོམས་ཕྱིར་མ་ལུས་སྤངས་བ་ཉིད། །ཅེས་བཤད་དོ། །འདི་ཡུལ་སུན་ཕྱུང་སོགས་ཀྱི་དོན། བདག་ཏུ་ཆགས་པ་འདིའི་ཡུལ་བདག་གང་ཡིན་པ་དེ་ཡུལ་མེད་པ་ཉིད་དུ་སུན་ཕྱུང་མེད་པར་ནི་དེ་སྤངས་པར་ནི་ནུས་པ་ཡིན། དེའི་ཡུལ་ཆགས་ཅན་གྱི་སྐྱེ་བ་སྤངས་པར་ནུས་པ་མ་ཡིན་ཏེ། དེ་ཡོད་པ་ཙམ་དུ་བལྟ་བའི་ངང་ཚུལ་ཅན་ཡིན་པའི་ཕྱིར་རོ། །ཞེས་བཤད། ༈ །ཡུལ་ཅན་ཡིན་ཡང་ཕྲ་
བའི་ཕྱིར། །འགའ་ཞིག་ལ་ཡང་ཐོགས་མེད་དེ། །ཆུ་བཞིན་གསེར་ལ་དངུལ་ཆུ་བཞིན། །མ་མཐོང་ཕྱིར་ན་མེད་པ་མིན། །ཅེས་སོ། །རྟོག་པའི་དྲྭ་བ་རྣམ་བསལ་ཞིང་། །ཟབ་ཅིང་རྒྱ་ཆེའི་སྐུ་མངའ་བ། །ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ་ལ་ཕྱག་འཚལ་ལོ།། ༈ །།སྐྱེ་བོ་ཕལ་ཆེར་ཕལ་ལ་ཆགས་ཤིང་ཤེས་རབ་རྩལ་མེད་པས་ན་ལེགས་བཤད་རྣམས། །དོན་དུ་མི་གཉེར་ཁོ་ནར་མ་ཟད་ཕྲག་དོག་དྲི་མ་དག་གིས་སྡང་བར་ཡང་། །ཡོངས་གྱུར་དེས་ན་བདག་ལ་འདི་ནི་གཞན་ལ་ཕན་པ་ཡིན་ཅེས་བསམ་པའང་མེད། །སེམས་ནི་ཡུན་རིང་ལེགས་བཤད་གོམས་པ་ལྷུར་ལེན་བསྐྱེད་ཕྱིར་འདི་ལ་དགའ་བ་སྐྱེས། །ཞེས་སོ། །ལེའུ་གཉིས་པར། ཚད་མ་བསླུ་མེད་ཅན་ཞེས་པ། །དོན་བྱེད་ནུས་པར་གནས་པ་ནི། །མི་བསླུ་སྒྲ་ལས་བྱུང་བ་ཡང་། །མངོན་པར་འདོད་པ་སྟོན་ཕྱིར་རོ། །ཞེས་བཤད། འགྲེལ་བར། སླུ་བར་ བྱེད་པ་ན་བསླུ་བའོ། །ཤེས་པ་ནང་ན་ཡོད་པ་དེ་ནི་བསླུ་བ་ཅན་ནོ། །བསླུ་བ་ཡོད་པ་མ་ཡིན་པ་ཅན་ནི་བསླུ་བ་མེད་པ་ཅན་ཏེ། གང་ལ་བསླུ་བ་མེད་པ་ཞེས་བྱ་བའི་དོན་ཏོ། །མི་བསླུ་བ་དེ་ཡང་དོན་ཡོངས་སུ་བཅད་ནས་འཇུག་པ་ན་དོན་གྱི་རང་གི་ནུས་པ་གྲུབ་པས། ཇི་ལྟར་འདོད་པའི་དོན་དེ་ལྟ་བུའི་ངོ་བོ་མི་བསླུ་བ་ནི་ཡུལ་གྱི་ཆོས་དང་། དེའི་དེ་ལྟར་བུར་གྱུར་པ་རྟོགས་པ་ན་ཤེས་པ་མི་བསླུ་བ་ནི་ཡུལ་ཅན་གྱི་ཆོས་
ཡིན་ནོ། །གང་ལ་ཡོད་པ་དེ་ནི་བསླུ་བ་མེད་པ་ཅན་གྱི་ཤེས་པའོ། །ཞེས་བཤད་དོ།། ༈ །།འདུལ་བ་ཚིག་ལེའུར་བྱས་པ་ལས། དེ་ནས་རབ་གུས་བསྐྱེད་པ་ཡིས། །བླ་མ་ལ་ནི་ཕྱག་བྱ་སྟེ། །ཞེས་དང་། བསམ་གཏན་ཀློག་པའི་ལས་དག་གིས། །ལུས་ལ་སྙིང་པོ་བླང་བར་བྱ། །ངུར་སྨྲིག་གྱོན་ཙམ་གྱིས་ཆོག་པའི། །བསོད་ནམས་ནམ་ཡང་མི་བྱའོ། །ཞེས་དང་། སྡོམ་པ་ལྔ་པོ་གཅོད་པ་དང་། །དགེ་འདུན་ལྷག་མས་དེ་ལྡང་དང་། །དེ་བཞིན་གང་ཟག་ལྷག་མ་ཅན། །ལྟུང་བ་རྣམ་པ་གསུམ་དུ་གྲགས། །དང་པོར་ཕས་ཕམ་གསུངས་པ་ནི། །བཞི་ཡིན་ཤིན་ཏུ་ལྕི་བའི་ཕྱིར། །འདི་དག་མང་དུ་བྱུང་ནས་ནི། །དགེ་སློང་རྣམ་པར་ཉམས་པ་ཡིན། །ཅེས་དང་། སྒྲ་དབྱངས་ཆུང་ངུའི་སྟོན་པ་ཡི། །ཡོན་ཏན་བརྗོད་བྱ་དམ་ཆོས་ཀྱིས། །དབྱངས་ནི་མངོན་པར་མི་ཤེས་ན། །དབེན་པར་སློབ་པ་བཀག་པ་མེད། །སྟོན་པའི་དམ་ཆོས་མཛེས་ཕྱིར་ཏེ། །ཉོན་མོངས་བཅས་པའི་སེམས་ཀྱིས་མིན། །ཅེས་དང་། བསླབ་པ་རྗེས་བསྲུང་བརྩེ་ལྡན་གྱིས། །ཤིག་རྣམས་དལ་གྱིས་བཟུང་ནས་ནི། །བསྡུས་ནས་རྩིག་པ་ལ་སོགས་པའི། །བུ་གར་སྙིང་རྗེ་ཅན་གྱིས་གཞུག །ཅེས་དང་། ཁྲིམས་ལྡན་ནད་གཡོག་བྱེད་པ་དང་། །ཆོས་དང་ཟང་ཟིང་སེར་སྣ་མེད། །དུས་སུ་འདོམས་པའི་བླ་མ་ནི། །བླ་མའི་ཡོན་ཏན་ཡང་དག་ལྡན། །གནས་པའི་ཚུལ་ལྡན་
ཤེས་རབ་ཅན། །དུལ་ཞིང་བཟོད་དང་ལྡན་པ་དང་། །བླ་མ་ལ་ནི་རྟག་ཏུ་གུས། །ཞེས་དང་། དགེ་སློང་མདོ་སོགས་མཁས་པ་ལས། །ལམ་བྱེད་འོངས་བ་ཐོས་པ་ན། །ཇི་སྲིད་དཔག་ཚད་ཕྱེད་དང་གསུམ། །བ་དན་བསྒྲེངས་སོགས་སྔོན་འགྲོ་བས། །གཎྜི་བརྡུངས་ཏེ་དགེ་འདུན་གྱིས། །རང་གི་ནུས་པས་བསུ་བར་བྱ། །འོངས་ནས་དགའ་བས་རྙེད་པ་ཡང་། །དེར་དབུལ་ཚོགས་ཀྱིས་ཀྱང་ནི་ཐོང་། །གནས་ཁང་འདུག་སྟན་མལ་སྟན་རྣམས། །དེ་དག་གུས་པས་རྟག་ཏུ་དབུལ། །ཞེས་དང་། སྐུ་གཟུགས་མཆོད་རྟེན་བདེ་གཤེགས་ཀྱི། །བཀའ་ཡང་མངོན་པར་བྲི་བ་སྟེ། །རྙིང་ངམ་བརླག་ན་དགེ་སློང་གིས། །སླར་ནི་གསོ་བར་འོས་པ་ཡིན། །ཅེས་དང་། མཆོད་རྟེན་སྐུ་གཟུགས་གྲིབ་མ་དང་། །མཎྜལ་ཡང་ནི་འགོམ་མི་བྱ། །དགོས་པ་ཆེད་དུ་བདེ་གཤེགས་ཀྱི། །ཚིགས་བཅད་སྔོན་དུ་བྱས་ཏེ་འགོམ། །ཞེས་དང་། དེ་རྗེས་མི་རྟག་རྣམ་པའི་ཚུལ། །སྟོན་བྱེད་ཆོས་ཉན་སྦྱིན་བྱ་སྟེ། །འདི་དག་སྐྱོ་བ་བསྐྱེད་པ་དང་། །མྱ་ངན་དག་ཀྱང་བསལ་ཕྱིར་རོ། །གང་ཕྱིར་འདུས་བྱས་ཐམས་ཅད་ནི། །རྐྱེན་གྱིས་གཞན་དུ་འགྱུར་བ་སྟེ། །རྩྭ་རྩེ་རླུང་གིས་བསྐྱོད་པ་ཡི། །ཟིལ་པ་བཞིན་དུ་མི་རྟག་གོ །ཞེས་དང་། ཁང་བཟང་དག་གི་ངོས་དག་ཏུ། །ཐུབ་པའི་སྔོན་གྱི་སྐྱེས་རབས་བྲི། །དཔེར་ན་ཐམས་ཅད་སྒྲོལ་དང་ནི། །ཟླ་འོད་བཟོད་པར་སྨྲ་
ལ་སོགས། །གཙུག་ལག་ཁང་སོགས་འདུལ་བ་ལ། །འཇིག་རྟེན་མངོན་པར་དད་འཕེལ་ཕྱིར། །རི་མོའི་ཆོ་ག་བརྗོད་པ་འདི། །ཐུགས་རྗེ་ཅན་གྱིས་ལེགས་པར་གནང་། །ཅེས་དང་། བདེ་གཤེགས་སྲས་ཀྱི་ལྷུན་པོའི་ཚད། །སྐུ་གཟུགས་མཆོད་རྟེན་བྱ་བར་འོས། །ཟུར་བཞི་ལོགས་མཉམ་མཛེས་བྱས་ནས། །བང་རིམ་ལ་སོགས་གཞན་རིམ་བཞིན། །དེ་ཡང་གཉིས་གསུམ་བཞི་དང་ལྔ། །འབྲས་བུའི་རིམ་པ་༧ གདུགས་ཀྱི་ཚད། །མཆོད་རྟེན་བྱེད་པོ་ཡོན་ཏན་ཅན། །སོ་སོའི་སྐྱེ་བོ་རྣམས་ལ་འོས། །འདི་ཡི་མཐར་ནི་སྟོན་པ་ཡི། །གདུགས་ཀྱི་ཚད་ལ་ངེས་པ་མེད། །བརྒྱ་ལྷག་རི་བ་བྱེ་བ་རྙེད། །མཆོད་རྟེན་ཡང་ནི་བྱ་བར་འོས། །དམན་པ་བསེ་རུའི་སྤྱོད་པ་ལ། །གདུགས་ནི་རིམ་པ་བཅུ་གསུམ་སྟེ། །དེ་ལ་ཆར་ཁེབས་མེད་པ་དག །བྱའོ་ཞེས་ནི་ཐོས་པ་ཡིན། །ལོགས་དག་ཏུ་ནི་སློབ་མ་ཟུང་། །སྟོན་པའི་མཆོད་རྟེན་དབུས་སུ་སྟེ། །ལྷག་མ་རྣམས་ནི་གྲལ་རིམ་བཞིན། །ཅེས་སོ། འདུལ་བའི་བསྟོད་པའི་ས་བཅད་ལ། ཀླད་དང་། གཞུང་དང་། མཇུག་གི་དོན་ནོ། །དང་པོ་ལ་མཆོད་པར་བརྗོད་པ། བརྩམ་པར་དམ་བཅའ་བ། ཁེངས་པ་བསྐྱུང་བ། གཉིས་པ་ལ། ཡོན་ཏན་ཀུན་གྱི་རྟེན་དུ་གྱུར་པས་བསྟོད་པ། བསྲུང་བ་ཉིད་ཀྱིས་བསྟོད་པ། ཇི་ལྟར་ཆུ་ལོན། བྱང་ཆུབ་གསུམ་གྱི་ཚོགས་ཉིད་སངས་རྒྱས་ཀྱི་ཕྱིར་བསྟོད་པ།
བསྟན་པའི་རྒྱུ་ཉིད་ཇི་སྲིད་གྱིས་བསྟོད་པ། དཀོན་པར་བྱེད་པའི་སྒོ་ནས་བསྟོད་སངས་རྒྱས་མི་བཞུགས་པ། དཔེའི་སྒོ་ནས་བསྟོད་པ། འཇོག་བྲལ། སྟོན་པ་དང་འདྲ་བ་ཉིད་ཀྱིས་བསྟོད་པ། རྒྱལ་བ། དེ་བཞིན་གཤེགས་པ་བས་ཀྱང་བླ་མ་ཡིན་པའི་ཕྱིར་འདི་ལ་ཕྱག་བྱ་བ་ཉིད་དུ་བསྟན་པ། གང་ལ། མཆོད་པའི་རྒྱུ་ཉིད་ཀྱིས་གུས་པ་བསྐྱེད་པའི་ཆེད་གང་ཞིག་དུ་བསྟོད་པ། ཁྱད་པར་གསོད་དང་བཅས་པའི་ཁ་ན་མ་ཐོ་བ་དང་བཅས་པ་ལས་འདས་པའི་ཉེས་བ་བརྗོད་པ། འདི་ན། ད་ནི་སོ་སོར་ཐར་པའི་རྣམ་པར་བཤད་པ་ཉིད་ཀྱིས་འདུལ་བ་སོ་སོར་ཐར་པ། བསྟོད་པ་སྟེ་བཅུའོ། །འདིའི་སྐབས་ཀྱི་བཅས་པའི་ཁ་ན་མ་ཐོ་བ་སྨྱུག་མའི་ཚལ་ལྟ་བུ་དེ་ལས་འདས་ཤིང་རང་བཞིན་གྱི་ཁ་ན་མ་ཐོ་བ་ཨ་མའི་ཚལ་ལྟ་བུ་དེ་ཉམས་པ་ན་རྒྱལ་པོ་ཁྲོས་པ་ལ་སོགས་པ་ལྟ་བུའི་རྒྱལ་བའི་བཀའ་ཁྱད་དུ་བསད་ཅིང་། བསླབ་པ་དྲལ་བ་དེས། དེ་ལས་རྒྱལ་པོའི་ཆད་པའི་སྡུག་བསྔལ་གྱི་གཞན་དབང་ལྟ་བུ་གནོད་པའི་སྡུག་བསྔལ་དུ་མ་ཉམས་སུ་མྱོང་བས་ན། བཅས་པ་ཕྲ་མོ་ཡང་བག་ཡངས་སུ་མི་བྱའོ། ༈ །གང་གིས་ཉིད་ཀྱི་དབུ་ཡང་རིན་ཆེན་འོད་འཕྲོ་ལྟ་བུ་དང་། །རབ་རྒྱས་པདྨ་གསེར་མདོག་དང་འདྲའི་བཙུན་མོ་རྣམས་ཀྱང་བྱིན། །མ་ལུས་དོན་གཉེར་རབ་དགར་མཛད་ནས་བྱང་ཆུབ་མཆོག་བརྙེས་པ། །ཆོས་འདུལ་ཞི་བའི་དོན་དུ་སྟོན་མཛད་དེ་ལ་ཕྱག་འཚལ་ལོ། །གང་ཐོབ་ངན་
འགྲོའི་འཇིགས་པ་རྣམས་ལས་ངེས་པར་སྒྲོལ་འགྱུར་ཞིང་། །སྲིད་པའི་འཆིང་བ་མཐའ་དག་བཅད་ནས་མྱ་ངན་འདས་གྱུར་པ། །འཁོར་བའི་རྒྱ་མཚོ་གཏིང་མཐའ་མེད་པ་ཀུན་ནས་སྒྲོལ་བ་ཡིས། །གཟིངས་གྱུར་གཅིག་པུ་བདེ་གཤེགས་རྣམས་ཀྱི་བསྟན་བཅོས་དེ་ལ་འདུད། །གང་ཡང་ཡོན་ཏན་ཀུན་ལྡན་ཡོན་གནས་དམ་པར་གང་གྱུར་པ། ཅུང་ཟད་ཕུལ་ཡང་འབྲས་བུ་རྒྱ་ཆེན་ཤིན་ཏུ་འཕེལ་འགྱུར་བ། །བདག་ཉིད་ཀུན་གྱིས་ཕྱག་འོས་བདེ་བཤེགས་སྲས་ལ་རབ་ཏུ་བསྔགས། །གང་ཟག་བརྒྱད་མཆོག་ལེགས་སྤྱོད་ཀྱིས་བརྒྱན་འཕགས་ཚོགས་རྣམས་ལའང་འདུད། །ཅེས་གསུངས།།