དགེས་པ་རྡོ་རྗེའི་རྒྱུད་གསུམ་གྱི་དངོས་གཞིའི་བཤད་པ་ཁོག་ཕུབ་གནད་ཀྱི་ལྡེའུ་མིག།
མཁན་ཆེན་ངག་དབང་ཆོས་གྲགས་ཀྱིས་མཛད་པའི་དགེས་པ་རྡོ་རྗེའི་རྒྱུད་གསུམ་གྱི་དངོས་གཞིའི་བཤད་པ་ཁོག་ཕུབ་གནད་ཀྱི་ལྡེའུ་མིག་༧༡ལས། དེ་ལ་འདིར་གང་བཤད་པར་བྱ་བའི་ཆོས་ནི་རྗེ་བཙུན་ས་སྐྱ་པ་ཡབ་སྲས་བརྒྱུད་འཛིན་དང་བཅས་པ་ལ་བཀའ་བབས་པའི་དཔལ་དགེས་པ་རྡོ་རྗེའི་རྩ་བཤད་ཀྱི་རྒྱུད་གསུམ་ཡིན་ལ། འདིར་འཆད་པར་བྱེད་པ་ལ་སྔོན་འགྲོ་ཚུལ་བཞིའི་རྣམ་གཞག་སྤྱི་རྣམ་དང་ལྗོན་ཤིང་གི་དགོངས་པ་བཞིན་ངེས་པར་བྱས་ཚར་ནས། ད་ནི་རྒྱུད་ཉིད་འཆད་པ་སྐབས་སུ་བབས་ལ། དེ་ཡང་རྒྱས་
པར་ན་སྐྱེས་སྟོབས་དང་སྦྱངས་པའི་རྣམ་དཔྱོད་དང་ལྡན་པ་དག་གིས་རྗེ་བཙུན་ས་ཆེན་ཡབ་སྲས་ཀྱིས་མཛད་པའི་དཀའ་འགྲེལ། ཉི་འོད། དག་ལྡན། གུར་རྒྱན། གནད་ཀྱི་གསལ་བྱེད་རྣམས་ཀྱི་སྟེང་ནས་ཚིག་དོན་མ་ལུས་པ་འཆད་པ་ཡིན་ཏེ། ངོར་ཆེན་དཀོན་མཆོག་ལྷུན་གྲུབ་ཡན་ཆད་དུ་དེ་ལྟར་བྱུང་བ་ངེས་སོ། །འདིར་ནི་དུས་སྐབས་དང་མཐུན་པའི་གདུལ་བྱའི་དོན་གཉེར་སོགས་དང་བསྟུན་གོང་མའི་གསུང་རབ་དེ་དག་རྒྱབ་བརྟེན་གྱི་ལུང་རྒྱུན་དུ་ངེས་པར་མ་ཆད་པར་བྱས་ལ། ཟིན་ཐུན་གྱི་རིམ་པ་རྣམས་གཞུང་སྔ་ཕྱིའི་འབྲེལ་དང་བརྗོད་བྱ་རགས་པ་སྟོན་ཚུལ་གྱིས་ཁོག་ཕུབ་པའི་སྒོ་ནས་བཤད་ལ། འཆད་པ་པོས་འཆད་སླ་ཞིང་། ཉན་པ་པོས་བཟུང་བདེ་བ་དང་། རྒྱུད་ཀྱི་བཤད་བཀའ་མི་ནུབ་པར་འགྱུར་པའི་དགོས་པ་ཁྱད་པར་ཅན་མཐོང་བས། དགོས་པ་དེ་ལྡན་གྱི་ལུགས་བཞིན་དུ་འཆད་པར་སྤྲོ་བས་འདི་ལ་དོན་གསུམ་སྟེ། རྩ་རྒྱུད་བཤད་པ། ཐུན་མོང་མ་ཡིན་པའི་བཤད་རྒྱུད་གུར་བཤད་པ། ཐུན་མོང་བའི་བཤད་རྒྱུད་དཔལ་ཁ་སྦྱོར་བཤད་པའོ། །ཞེས་སོགས་གསུངས་ནས་བརྟག་༢༩གཉིས་ནི་འཕགས་པའི་དག་ལྡན་བསྡུས་དོན་ས་བཅད་གཞིར་བྱས་ནས་བཤད། གུར་ནི་རྗེ་བཙུན་རིན་པོ་ཆེའི་གུར་རྒྱན་དང་དེའི་བསྡུས་དོན་གཞིར་བཞག་ནས་བཤད། སམྦྷཊ་༦༩ནི་སློབ་དཔོན་རིན་པོ་ཆེའི་འགྲེལ་པ་གནད་ཀྱིས་གསལ་
བྱེད་དང་། བསྡུས་དོན་ས་བཅད་སོགས་དང་མཐུན་པར་འཆད་པས་མཆོད་བརྗོད་ཀྱང་དེ་ལྟར་སོ་སོར་ཡོད། དེ་ལ་གནད་ཀྱི་གསལ་བྱེད་ནི་མན་ངག་ལུགས་གཞིར་བཞག་ནས། འགྲེལ་པ་ལུགས་ཀྱང་ཟུར་གྱིས་ཚང་བ་ཡིན། གུར་རྒྱན་ནི་རྒྱུད་རྐྱང་དང་འགྲེལ་པའི་ལུགས་གཉིས་ལས། རྒྱུད་རྐྱང་མན་ངག་གིས་བཤད་པ་ཡིན་ནོ། །ཞེས་བཞེད་དོ།། །།