དམ་པའི་ཆོས་འདུལ་བ་ལས་བརྩམས་པའི་ཚིགས་སུ་བཅད་པ།
༈ དམ་པའི་ཆོས་འདུལ་བ་ལས་བརྩམས་པའི་ཚིགས་སུ་བཅད་པ་ནི། དམ་ཆོས་འདུལ་བ་གང་ཆེན་མཚོ། །དགག་སྒྲུབ་གནང་བའི་རླབས་ཕྲེང་ཅན། །གཏིང་མཐའ་མེད་པ་བདུད་རྩིའི་མཆོག །བྱང་ཆུབ་བར་དུ་ཐོབ་གྱུར་ཅིག །ས་གསུམ་འཇིག་རྟེན་སྣང་བའི་ཕུལ། །ཐུབ་མཆོག་ཞལ་གྱི་བུམ་བཟང་ལས། །དྲང་སྲོང་ལྷུང་བའི་ནགས་ཚལ་དུ། །བདེན་བཞིའི་ཟིལ་དངར་ཐོག་མར་དབྱེ། །སླར་ཡང་ཡུལ་དང་དུས་དང་ནི། །གང་ཟག་སོ་སོའི་ངོར་བྱས་ཏེ། །གཅིག་ཏུ་བཀག་དང་གཅིག་ཏུ་གནང་། །རྗེས་སུ་བཅས་དང་བསྒྲུབས་པ་ཡི། །ཚུལ་གནས་ཁྲིམས་ཀྱི་དྲིལ་ཆེན་བསྒྲགས༑ །དེ་ཚེ་ཡིད་སྲུབ་དཔུང་བཅས་ཀུན། །མྱ་ངན་ཁོང་བུར་ཚུད་པ་དང་། །ལྷར་བཅས་དགའ་བའི་འཛུམ་དཀར་གྲོལ། །ཨེ་མ་གང་ལས་ཚུལ་གང་གིས། །ཇི་ལྟར་ངེས་པར་གང་དུ་འབྱུང་། །དེ་ལྟའི་ཚུལ་ལ་ལེགས་དཔྱད་ན། །ལམ་འདིའི་བརྗོད་བྱ་གསལ་བར་མཐོང་། །མཐའ་དང་ཟད་དུ་མེད་པ་ཡི། །སྡུག་བསྔལ་འབྱུང་གནས་འཁོར་བ་ལས། །གདོན་བྱེད་ཚུལ་ཁྲིམས་རྣམ་དག་པས། །ཏིང་ངེ་འཛིན་དང་ཤེས་རབ་སྐྱེ། །དེ་ཡང་ཡོན་ཏན་མཐའ་དག་གི །རྟེན་དང་གནས་དང་འབྱུང་ཁུངས་ཀྱི། །སོ་སོར་ཐར་པའི་སྡོམ་པ་ཡང་། །ཡང་དག་བླང་དང་སྲུང་བ་དང་། །ཕྱིར་ཞིང་བཅོས་པའི་
གཞི་བཅུ་བདུན། །འཆད་དང་སྒྲུབ་ལ་ཐོགས་མེད་པས། །འགྱོད་པ་མེད་པའི་ཚུལ་ཁྲིམས་ཀྱིས། །སེམས་ནི་རྣམ་པར་གཡེང་ལས་བཟློག །དེ་ཚེ་ཆོས་རབ་རྣམ་འབྱེད་པའི། །སོ་སོར་རྟོག་པའི་ཡེ་ཤེས་མེས། །སྲིད་པའི་རྩ་བ་བསྲེགས་བྱས་ཏེ། །ཉོན་མོངས་དགྲ་རྣམས་བཅོམ་པ་ལས། །བྱང་ཆུབ་གསུམ་གྱི་འབྲས་བུར་འགྲུབ། །དེ་བས་ཡང་སྲིད་ཐམས་ཅད་དུ། །རྙེད་དཀའ་དལ་རྟེན་དོན་ཡོད་པའི༑ །ཚུལ་གནས་ཁྲིམས་ཀྱིས་དགེ་བྱས་པས། །རྣམ་པར་གྲོལ་བ་ཉིད་གྱུར་ཅིག། །།