འཆི་མེད་གྲུབ་པའི་བདེན་ཚིག་གི་རྣམ་འགྲེལ་ཉུང་ངུ་ཚིག་དོན་གྱི་ས་བོན།
འཆི་མེད་གྲུབ་པའི་བདེན་ཚིག་གི་རྣམ་འགྲེལ་ཉུང་ངུ་ཚིག་དོན་གྱི་ས་བོན་ཅེས་བྱ་བ་བཞུགས་སོ། །ཐམས་ཅད་མཁྱེན་པའི་ཡེ་ཤེས་སྐུ། །རྒྱལ་སྲས་འཇམ་དཔལ་གཞོན་ནུའི་དངོས། །གཞན་%ཕན་ཕ་མཐའ་ཡས་པ་ཡིས། །བྱང་ཆུབ་བར་དུ་སྐྱོང་གྱུར་ཅིག །དེ་ལ་འདི་སྐད་ཅེས་རྗེས་སུ་ཐོས་ཏེ། གང་གི་ཚེ་གཟོད་མ་ནས་ཤིན་ཏུ་རྣམ་པར་དག་པའི་ཡེ་ཤེས་རིགས་ཐམས་ཅད་ཀྱི་ཁྱབ་བྱེད་ཀུན་ཏུ་འཆང་བའི་གོ་འཕང་ལས་གཞར་ཡང་མ་གཡོས་བཞིན་དུ། མི་སློབ་པའི་ཟུང་འཇུག་དག་པ་སྒྱུ་མའི་སྣང་བརྙན་ཅིར་ཡང་འཆར་བ་ལས། རེ་ཞིག་བཅོམ་ལྡན་འདས་གཟུགས་ཀྱི་རྒྱལ་པོའི་མཚན་གཞན་དུ་བསྒྱུར་བ་ནི། འཇིག་རྟེན་གྱི་མིག་གཅིག་པུ་བེ་རོ་ཙ་ན་རཀྴི་ཏ་སོགས་མཁས་པ་དང་། གྲུབ་པའི་སྐྱེ་སྲིད་བགྲང་ལས་འདས་པ་བཟུང་བའི་མཐར། ཆེས་ཆེར་ཤིན་ཏུ་སྙིགས་མའི་དུས་འདིར་རྒྱལ་བའི་བསྟན་པ་སྤྱི་དང་། བྱེ་བྲག་རྡོ་རྗེ་ཐེག་པ་ནང་རྒྱུད་སྡེ་གསུམ་གྱི་བསྟན་པའི་མེ་རོ་གསར་དུ་སློང་བའི་ཤིང་རྟ་ཆེན་པོ་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་ཞེས་བྱ་བ་སྨྲ་བའི་ཁྱུ་མཆོག་
རླབས་པོ་ཆེའི་གནས་ཐོབ་པའི་ཉིན་མོར་བྱེད་པ་ཞིག་འཇིག་རྟེན་དུ་ཤར་བར་གྱུར་ཏོ། །དེའི་ཚེ་དེའི་དུས་ན་རིག་པ་དང་གྲོལ་བའི་ཡོན་ཏན་རྨད་དུ་བྱུང་བ་དཀྱིལ་འཁོར་རྒྱ་མཚོའི་རྡོ་རྗེའི་སློབ་དཔོན་པདྨ་དབང་རྒྱལ་རྡོ་རྗེ་ཞེས་བྱ་བ་སྔ་འགྱུར་གྱི་བསྟན་འཛིན་བྱེ་བའི་དབུས་ན་མངོན་པར་མཐོ་བ་གང་དེས་འདི་སྐད་ཅེས་རྗེས་སུ་དགོངས་ཏེ། ཀྱེ་མ་དེང་གི་དུས་འདི་ནི་ཧ་ཅང་སྙིགས་མར་སྤྱོད་པས་ཡིད་སྲུབས་ཀྱི་ཚོགས་སྟོབས་རྒྱས་པའི་མཐུས། འཇིག་རྟེན་གསུམ་ན་རྙེད་པར་དཀའ་བའི་བཤེས་གཉེན་དམ་པ་འདི་ལྟ་བུ་ཞིག་བཞུགས་སུ་ཟིན་ཀྱང་ཡུན་རིང་དུ་འཚོ་ཞིང་གཞེས་པར་དཀའ་བས་ན། བླ་མ་ལ་བདག་གིས་ནི་རྗེ་རང་ཉིད་ཀྱི་ཐུགས་རྒྱུད་བསྐུལ་ཏེ་བདེན་ཚིག་གི་བདུད་རྩིས་འཆི་མེད་གྲུབ་པའི་པདྨོ་གསར་དུ་བཞད་པར་བགྱིའོ་སྙམ་དུ་དགོངས་སོ། །དགོངས་ནས་ཀྱང་གསུང་གི་ཟིལ་མངར་མཎྜལ་གྱི་རྟེན་དང་བཅས་ཏེ་གསོལ་བ་བཏབ་པ་ན། འཇམ་མགོན་བླ་མ་ཉིད་ཀྱིས་ཀྱང་ཚིག་ཉུང་ཞིང་དོན་བསམ་གྱིས་མི་ཁྱབ་པའི་ཚིགས་སུ་བཅད་པ་འདི་ཉིད་སྩལ་བས་དགེ་མཚན་གྱི་སྣང་བ་ཅིར་ཡང་བྱས་པར་གྱུར་ཏོ་ཞེས་གྲགས་སོ། །དེ་ནས་ཅུང་ཞིག་ལོན་པ་ན། སླར་ཡང་རྗེ་ཉིད་ཀྱི་ཞབས་རྡུལ་སྤྱི་བོའི་རྒྱན་དུ་འཛིན་པའི་བློ་གསལ་རིག་པར་སྨྲ་བ་དག་གིས། ཁོ་བོ་ཅག་ལ་ཚིག་དང་དོན་གྱི་ཆ་
གསལ་བར་གྱིས་ཤིག་ཅེས་མཉན་པར་འོས་པའི་ངག་གིས་མཚམས་སྦྱར་ནའང་མི་མཁས་པ་དང་། མ་སྦྱངས་པ་དང་། རྣམ་པར་གཡེང་བའི་གཞན་དབང་གིས་སྨྲ་བར་འོས་པའི་སྐབས་མ་མཆིས་མོད། །དེ་ལྟར་ནའང་དམ་པའི་གསུང་རྣར་གཟོན་བགྱིད་པར་ཕོངས་ནས་ཚིག་འགྲེལ་མདོར་བསྡུས་སུ་འཆད་པ་ལ་གསུམ། ཀླད་དང་། གཞུང་དང་། མཇུག་གི་དོན་ནོ། །དང་པོ་ནི། ཨོཾ་སྭ་སྟི། ཞེས་པ་སྟེ༑ ཚིག་རྒྱན་གྱི་གཞུང་ལས། ཤིས་བརྗོད་ཕྱག་བྱ་རོས་བོ་ནི། །ངེས་པར་བསྟན་པའང་དེ་ཡི་སྒོ། །ཞེས་བསྟན་བཅོས་རྩོམ་པ་ལ་འཇུག་པའི་སྒོ་གསུམ་དུ་གསུངས་པའི་ནང་ཚན་ལེགས་སྦྱར་གྱི་སྐད་དུ་ཤིས་པར་བརྗོད་པའི་ཚིག་གིས་མདུན་བསུ་བ་སྟེ། དེ་ཡང་གང་གིས། བ།ང་ལ། ཇི་ལྟར་ཤེས་པར་བྱ་བའི་ཚུལ་ཏེ་གསུམ་ལས། དང་པོ་ནི། ཨོཾ་ཞེས་པ་སཾ་སྐྲྀ་ཏའི་གཞུང་མིང་དང་རྟགས་རྗེས་སུ་སྟོན་པའི་བསྟན་བཅོས་ལས་དོན་དུ་མ་ཅན་གྱི་སྡེ་ཚན་དུ་བཀླགས་ཤིང་། དེ་དང་མཐུན་པར་རྒྱུད་རྡོ་རྗེ་རྩེ་མོ་ལས། ཨོཾ་ནི་ཅི་ཞིག་ཡིན་པར་བཤད། །མཆོག་དང་ནོར་སྟེར་དཔལ་དང་གཡང་། །སྐལ་བཟང་རྣམ་པ་དང་ལྡན་པ།. །དམ་བཅའ་བ་དང་བཀྲ་ཤིས་དོན། །ནོར་པུ་འཛིན་པའི་སྙིང་པོ་ཡིན། །ཅེས་དོན་བདུན་ལ་འཇུག་ཅིང་རིག་སྔགས་ཀྱི་ནོར་བུ་འཛིན་པར་གསུངས་པ་ལས། འདིར་རེ་
ཞིག་བཀྲ་ཤིས་པའི་འཇུག་པའི་དབང་དུ་བྱས་ཏེ་བཤད་ན། འཇམ་དཔལ་སྒྱུ་འཕྲུལ་དྲྭ་བ་ལས། ཆོས་༡ཤེས་བཀྲ་ཤིས་བཀྲ་ཤིས་༢འབྱུང་། །བཀྲ་ཤིས་༣ཀུན་གྱི་བཀྲ་ཤིས་༤པ། །གྲགས་༥པའི་བཀྲ་ཤིས་སྙན་གྲགས་དགེ། །ཞེས་སྤྱིར་བཀྲ་ཤིས་པའི་ཚིག་གཅིག་ཉིད་བཤད་པའི་གཞིར་བཞག་སྟེ། ངོ་བོ་དང་། བྱེད་ལས། འབྲས་བུ་དང་། དེའི་ཁྱད་པར་དང་མཐར་ཕྱིན་པ་སྟེ་རྣམ་པ་ལྔའི་སྒོ་ནས་ཚོགས་སྦྱོར་མཐོང་སྒོམ་མི་སློབ་པའི་ལམ་ལྔར་བྱེ་བྲག་ཏུ་འཇུག་པའི་ཚུལ་རྒྱ་ཆེར་བཤད་དུ་ཡོད་ལ། དེ་ལྟ་བུའི་ལམ་ལྔ་མཐར་ཕྱིན་པ་ནི་རྫོགས་པའི་སངས་རྒྱས། ལམ་རང་གི་ངོ་བོ་ནི་འགོག་པ་དང་། དེས་མཚོན་པར་བྱེད་པ་ལམ་བདེན་གྱི་དམ་ཆོས། དེ་དག་སྒྲུབ་ཅིང་འཆད་པར་བྱེད་པ་དགེ་འདུན། དེ་གསུམ་ངོ་བོ་དབྱེར་མེད་པའི་བླ་མ་སྟེ། མདོར་ན་བླ་མ་དང་དཀོན་མཆོག་གསུམ་མཚོན་པར་བྱེད་པས་ན་གང་གིས་ཤིས་པར་བྱེད་པ་པོའོ། །གཞན་ཡང་འདི་ལ་ཐུན་མོང་རིག་བྱེད་ཀྱི་གཞུང་ལས་གྲགས་པའི་ངེས་ཚིག་གི་བཤད་པ་དང་། ཁྱད་པར་གསང་སྔགས་ནང་གི་ངེས་དོན་དང་སྦྱར་བའི་བཤད་པ་རྒྱ་ཆེར་མཆིས་ཀྱང་ཡི་གེས་འཇིགས་པས་མ་སྤྲོས་སོ། །གཉིས་པ་ནི། དངོས་སུ་གཞུང་བསྐུལ་ཞིང་རྩོམ་པ་པོ་དང་། བརྒྱུད་ནས་ཉམས་སུ་ལེན་པ་མཐའ་དག་གོ། །
གསུམ་པ་ནི། སྭ་སྟི། ཞེས་པ་སྟེ་མིང་གི་གཙུག་ལག་ལས། སྭ་སྟི་ཤིས་པ་དགེ་ལེགས་དང་། །བསོད་ནམས་དང་ནི་ཤིན་ཏུ་དགའ། །ཞེས་དོན་དུ་མ་ལ་འཇུག་པར་བཤད་པས། སྐབས་འདིར་བདེ་ལེགས་སུ་གྱུར་ཅིག །ཅེས་གནས་སྐབས་སུ་མངོན་པར་མཐོ་བའི་བདེ་བ་དང་། མཐར་ཐུག་ངེས་པར་ལེགས་པའི་གོ་འཕང་ལ་དབང་འབྱོར་བའི་བཀྲ་ཤིས་དང་དགེ་མཚན་གྱི་སྣང་བས་ཡོངས་སུ་ཁྱབ་པར་གྱུར་ཅིག །ཅེས་སྨོན་པའི་ཚིག་གིས་མཐར་བརྒྱན་པའོ། །གཉིས་པ་གཞུང་གི་དོན་ལ་གསུམ་ལས། དང་པོར་གཙོ་བོར་བསྐྱེད་པ་མ་ཧཱ་ཡོ་གའི་གཞུང་དང་སྦྱར་བ་ནི། སྣང་བཏགས་ཆོས་ཀུན་བདེན་པས་སྟོང་པ་དང་། །ཞེས་སོགས་ཚིགས་བཅད་གཅིག་སྟེ། དེ་ཡང་སྙིང་པོའི་རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། །ཐབས་དང་རྒྱུ་ལས་འབྲས་བུའོ། །ཞེས་གསུངས་པ་ལྟར་གཞི་ལམ་འབྲས་བུའི་རྒྱུད་ཀྱི་ངེས་གསང་དང་སྦྱར་ན། དང་པོ་ནི། འདི་ལྟར་ཆོས་ཐམས་ཅད་གནས་ལུགས་དོན་དམ་པའི་ངོས་ནས་སྤྲོས་པའི་མཐའ་བ་གང་དུའང་མ་གྲུབ་ཀྱང་། སྣང་ཚུལ་ཀུན་རྫོབ་ཀྱི་ངོས་ནས་རྒྱུ་རྐྱེན་སྣ་ཚོགས་པའི་རྟེན་འབྲེལ་ལས་རྨི་ལམ་དང་སྒྱུ་མ་ལྟར་ཤར་ཅིང་། ཤར་དུས་ཉིད་ནས་དེ་དང་དེར་འདོགས་བྱེད་ཀྱི་བློས་ཕར་སོ་སོར་བཏགས་པ་ཙམ་མ་གཏོགས། གང་ཟག་དང་ཆོས་ཀྱིས་
རབ་ཏུ་ཕྱེ་བའི་དོན་རང་གི་ངོས་ནས་གཅིག་དང་དུ་མའམ། རྒྱུ་དང་འབྲས་བུ་ལ་སོགས་པ་གང་དུ་གྲུབ་པའི་རིག་པས་དཔྱད་ན་བདེན་པའི་དངོས་པོར་གྲུབ་པ་རྡུལ་ཙམ་ཡང་མ་མཆིས་པའི་ཕྱིར་སྟོང་པ་དང་། རྟེན་འབྱུང་དབྱེར་མེད་པའི་དོན་ལ་ངེས་ཤེས་གཏིང་ཚུགས་པ་ཉིད་གཞིར་བཞག་སྟེ། དེ་ལྟ་བུའི་འོད་གསལ་སྟོང་པ་ཉིད་ཀྱི་གནས་ལུགས་གང་ཞིག་སངས་རྒྱས་ཐམས་ཅད་ཀྱི་ཆོས་ཀྱི་སྐུ་ཡིན་པའི་རྒྱུ་མཚན་གྱིས། སྟོང་གཞི་ཆོས་ཅན། གཟུགས་ཀྱི་སྐུར་བསྒྲུབ་སྟེ་ཀུན་རྫོབ་ཏུ་ཡང་ཆོས་ཐམས་ཅད་འཁོར་འདས་དབྱེར་མེད་ལྷག་པའི་ཆོས་སྐུ་ཆེན་པོར་གཏན་ལ་དབབ་པ་ནི་སྔགས་ཀྱི་ཁྱད་ཆོས་ཏེ། སྒྱུ་འཕྲུལ་ལས། ཐབས་ཀྱི་ཐེག་པ་ཆེན་པོ་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་སོ། །དེས་ན་སྣང་བས་བཏགས་པའི་ཆོས་ཀུན་བདག་གཉིས་ཀྱི་བདེན་པས་སྟོང་པའི་སྟོང་ཉིད་ཆོས་སྐུ་དང་། དེའི་སྟོང་གཞི་ཆོས་ཅན་གཟུགས་ཀྱི་སྐུ་མཉམ་པར་སྦྱོར་བ་སྟེ་དབྱེར་མེད་པའི་ཡེ་ཤེས་ནི་གཞིའི་གནས་ལུགས་འོད་གསལ་མཆོག་གི་རྡོ་རྗེ་སེམས་དཔའ་ཞེས་བྱ་སྟེ། སྤྱིར་འོད་གསལ་ལ་གཞི་ལམ་འབྲས་གསུམ་དང་། ལམ་ལའང་སྤྱི་སྦས་དཔེ་དོན་མཐར་ཐུག་སོགས་སུ་དབྱེ་བ་ལས། འདིར་སྐབས་དོན་སྔ་མ་
ཉིད་བཟུང་ཞིང་། དེ་ཉིད་ལས་གཞན་པའི་བསྒྲུབ་བྱ་ཁྱད་པར་ཅན་གུད་ན་མ་དམིགས་ཤིང་སྤྲོས་པའི་འགྱུར་བ་སྤངས་པའི་ཕྱིར་མཆོག་ཏུ་མི་འགྱུར་བའི་ཡེ་ཤེས་དང་། རྡོ་རྗེ་ཤེས་རབ་སྟོང་པ་ཉིད་དང་༑ སེམས་དཔའ་སྙིང་རྗེ་ཆེན་པོ་ལ་འཇུག་པས། སྐབས་འདིར་ཀཱ་རུ་ཎའི་སྒྲ་དོན་གཞན་བདེ་པ་འགོག་པ་སྟེ། ཟག་བཅས་ཀྱི་བདེ་བ་སྤངས་པའི་ཟག་མེད་བདེ་བའི་ཡེ་ཤེས་རང་ཆས་སུ་བཞུགས་པ་ལ་བདེ་སྟོང་ཟུང་འཇུག་གི་སྒྲས་ཀྱང་སྨོས་པ་ཉིད་གང་རྟོགས་པར་བྱ་བའི་གཞི་ཉིད་དུ་རྣམ་པར་འཇོག་གོ། །དེ་ལས་གཞན་ཡང་རང་རྒྱུད་དུ་གྲུབ་པའི་ལྷ་དང་། གཞན་རྒྱུད་དུ་གྲུབ་པའི་ལྷ་ལ་མཆོག་དམན་བལྟ་མིན་གྱི་སྒོ་ནས་ཕྱི་རྒྱུད་སྡེ་གསུམ་གྱི་ལྟ་བ་འཇོག་ཚུལ་དང་། དེ་ཡི་དབང་གིས་མཚན་བཅས་ལྷ་བསྒོམ་པ་དང་། མཚན་མེད་ལྷར་སྣང་སྒྱུ་མ་ལ་བརྟེན་ནས་བལྟས་པ་ལ་སོགས་པའི་བདེ་བས་ཡེ་ཤེས་འདྲེན་ཚུལ་སོགས་ཁྱད་པར་ཅན་འཆད་དུ་ཡོད་ཀྱང་རེ་ཞིག་དེ་ཙམ་མོ། །གཉིས་པ་ལམ་ནི། རྟེན་གྱི་གང་ཟག་ངེས་འབྱུང་དང་སྙིང་རྗེ་ཆེན་པོས་རྒྱུད་འབྱོངས་པའི་རྡོ་རྗེའི་སློབ་མ་དད་བརྩོན་བརྟུལ་ཞུགས་དང་ལྡན་པས། རང་བཞིན་བརྒྱད་ལྡན་གྱི་རྡོ་རྗེ་སློབ་དཔོན་ལས། རྒྱུ་གཉིས་དང་རྐྱེན་བཞིའི་སྦྱོར་བས་ཕན་ནུས་ཟབ་མོའི་དབང་གིས་རྒྱུད་སྨིན་པར་བྱས་ཏེ་དམ་ཚིག་དང་སྡོམ་པའི་ཀུན་
སྤྱོད་ལ་གནས་པ་གཞིར་བཞག་ནས་ལམ་ལ་འཇུག་པར་བྱའོ། །དེ་ལ་ལམ་ཐམས་ཅད་ཐབས་ཤེས་སམ་ཐབས་གྲོལ་གཉིས་སུ་འདུ་བའི་ཚུལ་དང་། དེ་གཉིས་ཀྱང་སྤྱོད་ཚུལ་ཤས་ཆེ་ཆུང་ལས་ཡ་བྲལ་མ་ཡིན་པ་དང་། སྒྱུ་འཕྲུལ་རང་ལུགས་དབང་གསུམ་པའི་ཉམས་ལེན་ཁོ་ན་ཐབས་ལམ་དུ་བཞག་པའང་ཐབས་ཁྱད་པར་ཅན་གྱི་ཕྱིར་སྤྱི་མིང་བྱེ་བྲག་ལ་བཏགས་པའི་ཚུལ་རྣམས་ཀྱང་ཁོང་དུ་ཆུད་པར་གཅེས་ལ། འདིར་ནི་སྐབས་དོན་གྲོལ་ལམ་ཉིད་ཅུང་ཟད་བཤད་ན། མ་ཧཱ་ཡོ་ག་ཏན་སྡེ་བཅོ་བརྒྱད་ཀྱི་རྩ་བའི་རྒྱུད་གསང་བ་སྙིང་པོ་ལས། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། ཞེས་གསུངས་པའི་དོན། སྔར་སྨོས་པ་ལྟར་རྒྱུ་ཤེས་པའི་མཚན་ཉིད་ལྟ་བ་ལུང་རིག་མན་ངག་གི་སྒོ་ནས་གཏན་ལ་ཕབ་སྟེ། རྐྱེན་འཇུག་པའི་མཚན་ཉིད་སྣང་ལུགས་ཀུན་རྫོབ་ཀྱི་བདེན་པ་གཙོ་བོར་ལམ་དུ་བྱེད་པ་བསྐྱེད་རིམ་དང་། གནས་ལུགས་དོན་དམ་གྱི་བདེན་པ་གཙོ་བོར་ལམ་དུ་བྱེད་པ་རྫོགས་རིམ་སྟེ། དེ་སོ་སོར་སྟོང་པ་ཆེན་པོ་དང་། སྙིང་རྗེ་སྒྱུ་མ་དང་། ཕྱག་རྒྱ་གཅིག་པ་དང་། ཕྱག་རྒྱ་སྤྲོས་བཅས་དང་། ཚོམ་བུ་ཚོགས་སྒྲུབ་རྣམས་ཚུལ་བཞིན་དུ་ཉམས་སུ་བླངས་པ་སྟེ། དེ་ཡང་
ཚོགས་ལམ་དུ་རིམ་པ་སྔ་མ་གཉིས་དང་བསྐྱེད་རིམ་ཕྱག་རྒྱ་གཅིག་པ་དང་འབྲེལ་བའི་དབེན་གསུམ་ལ་མཉམ་པར་བཞག་པས་ལྷར་སྣང་སྒྱུ་མ་ལ་སེམས་རྩེ་གཅིག་པའི་སྣང་ཕྱོགས་དང་། རྣམ་པ་དེས་དབེན་པའི་སྟོང་ཉམས་སུ་འབྱམས་པ་སྟོང་ཕྱོགས་ཏེ་ཉམས་སྐྱོན་ཅན་གཉིས་དང་། འོད་གསལ་དུ་སོགས་ཀྱི་ཉམས་ཤར་བ་ཟུང་འཇུག་གི་ངོ་བོ་ཉིད་ནི་ཉམས་སྐྱོན་མེད་དེ། དེ་ཉིད་ནས་སྦྱོར་ལམ་དྲོད་ཀྱི་སྣེ་ཟིན་ཅིང་། བསྐྱེད་རིམ་ཕྱག་རྒྱ་སྤྲོས་བཅས་དང་འབྲེལ་བར་སྒྱུ་ལུས་དག་རིམ་པར་བསྒོམ་ཞིང་དཔེའི་ཡེ་ཤེས་ཡང་ཡང་བསྐྱང་སྟེ། ཚོམ་བུ་ཚོགས་སྒྲུབ་ཀྱི་སྤྱོད་པའི་ཉེ་རྒྱུས་བོགས་དབྱུང་བས། སྔར་རྒྱུ་དུས་སུ་བླ་མས་ངོ་སྤྲད་པ་དང་། ཐོས་བསམ་ཙམ་ལས་སྐྱེས་པའི་འཁོར་འདས་དབྱེར་མེད་དམ་བདེན་པ་དབྱེར་མེད་པའི་དོན་གྱི་ཡེ་ཤེས་མངོན་སུམ་དུ་རྟོགས་པ་ལ་གྲུབ་མཐའ་འཁོར་འདས་དབྱེར་མེད་ཅེས་འཇོག་ཅིང་། མི་འགྱུར་བའི་འབྲས་བུ་རླུང་སེམས་ཙམ་ལས་གྲུབ་པའི་སྒྱུ་མའི་སྐུ་རྣམ་པར་སྨིན་པ་དང་། དེ་ཉིད་འོད་གསལ་དུ་བཅུག་པས་མཐོང་ལམ་མངོན་དུ་བྱས་ནས་ལམ་མཆོག་ཡོངས་སུ་རྫོགས་པའི་ཚེ་དབང་རིག་འཛིན་དག་ཐོབ་ལ། དེ་ནས་སྒོམ་ལམ་དངོས་དང་། མི་སློབ་པའི་ལམ་གྱི་ཉེར་བསྡོགས་སློབ་པའི་ཟུང་འཇུག་གིས་བསྡུས་པའི་ཕྱག་ཆེན་དང་ལྷན་གྲུབ་རིག་འཛིན་
དག་རིམ་བཞིན་དུ་ཐོབ་པར་འགྱུར་རོ། །གསུམ་པ་འབྲས་བུ་ནི། སློབ་པའི་ཟུང་འཇུག་ཉིད་འབྲས་བུའི་འོད་གསལ་དུ་སྦྱངས་ཤིང་། མི་སློབ་པའི་ཟུང་འཇུག་གི་སྐུ་ཁ་སྦྱོར་ཡན་ལག་བདུན་དང་ལྡན་པ། རིགས་ཐམས་ཅད་ཀྱི་ཁྱབ་བྱེད་ཀུན་བཟང་རྡོ་རྗེ་འཆང་ཆེན་པོའི་གོ་འཕང་མངོན་དུ་བྱས་པའང་བླ་མའི་ཐུགས་རྣམ་པར་མི་རྟོག་པའི་ངོ་བོ་གསལ་སྟོང་ཟུང་འཇུག་གི་ལྡོག་པ་ལས་ཤར་བའི་ཚུལ་སོ་སོ་དང་རིག་པའི་ཡེ་ཤེས་ཀྱིས་ཁོང་དུ་ཆུད་པའི་བདེན་པས། རྒྱལ་བའི་སྲས་བྱང་ཆུབ་སེམས་དཔའ་རིག་པ་འཛིན་པ་བྱེ་བའི་ཁྱུ་མཆོག་ཁྱོད་ཉིད་ཞབས་ཀྱི་པདྨོ་བསྐལ་པ་རྒྱ་མཚོར་བརྟན་ཅིང་ཆོས་ཀྱི་འཁོར་ལོ་དུས་རྟག་ཏུ་བསྐོར་བར་གྱུར་ཅིག །ཅེས་ཤིས་པར་བརྗོད་པའི་རྒྱན་དུ་བྱས་པ་སྟེ། ཚིག་རྒྱན་གྱི་གཞུང་ལས། མངོན་པར་འདོད་པའི་དངོས་པོ་ལ། །སྨོན་པ་ཤིས་བརྗོད། ཅེས་གསུངས་པའི་ཕྱིར་རོ། །གཉིས་པ་གཙོ་བོར་རྫོགས་པ་ཨ་ནུ་ཡོ་གའི་གཞུང་དང་སྦྱར་བ་ནི། མ་དག་རླུང་སེམས་དྷ་ཏིའི་གཞན་དབང་དུ། །ཞེས་སོགས་ཚིགས་སུ་བཅད་པ་གཅིག་སྟེ། དེ་ཡང་ཨ་ནུའི་མདོ་ལུང་། ཐམས་ཅད་ཀྱི་རྩ་རྒྱུད་ཀུན་འདུས་རིག་པ་ལས། བྱ་བ་རྒྱུ་ཡི་རྣལ་འབྱོར་དང་། བྱེད་པ་རྐྱེན་གྱི་རྣལ་འབྱོར་དང་། བྱ་བྲལ་འབྲས་བུའི་རྣལ་འབྱོར་རོ། །ཞེས་རྒྱུ་རྐྱེན་འབྲས་བུའི་རྣལ་འབྱོར་གསུམ་དུ་
གསུངས་པའི། དང་པོ་ནི། ཆོས་ཐམས་ཅད་ཀྱི་གནས་ལུགས་དབྱིངས་སྟོང་པ་ཉིད་དང་རིག་པའི་ཡེ་ཤེས་དབྱེར་མེད་པའོ། །གཉིས་པ་ནི། ལམ་གྱི་རྩོལ་བ་དང་བཅས་པའི་བྱེད་པས་གོང་མའི་ལམ་སྟེགས་སམ་རྐྱེན་དུ་གྱུར་པ་མཚན་ཉིད་སྡེ་གསུམ་མོ། །གསུམ་པ་ནི། བདེན་གཉིས་དབྱེར་མེད་དུ་རྟོགས་པས་འབྲས་བུ་གཞན་ནས་མི་འཚོལ་བ་སྔགས་ཕྱི་ནང་གི་ཐེག་པ་སྟེ། དེ་ལས་ཁྱད་པར་མདོ་རང་ལུགས་ཀྱི་ལམ་ལ། ཐབས་ངེས་པ་དང་། ཤེས་རབ་རྣམ་པར་གྲོལ་བའི་ལམ་རྗེས་འབྲངས་དང་བཅས་པ་ལས་འདིར་ཕྱོགས་གཅིག་ཏུ་མདོར་བསྡུས་ཏེ་འཆད་ན། ཐུན་མོང་གི་ལམ་གྱིས་རྒྱུད་སྦྱངས་ཤིང་། སྨིན་བྱེད་ཀྱི་དབང་ཕྱི་ནང་སྒྲུབ་གསང་བཞིས་བསྡུས་པ་ལས་ཀྱང་། གཉིས་པ་དང་གསུམ་པ་དག་རྩལ་དུ་བཏོན་པས་རྒྱུད་སྨིན་ཅིང་སྤྱི་དང་བྱེ་བྲག་གི་དམ་ཚིག་རྣམ་པར་དག་པས། ཆོས་ཐམས་ཅད་ཀྱི་གཤིས་ལུགས་དཀྱིལ་འཁོར་རྣམ་གསུམ་མ་འདྲེས་ཡོངས་རྫོགས་སུ་གནས་པ་ཉིད་གྲོལ་ལམ་རྟོག་དཔྱོད་ཀྱི་རྗེས་སུ་འཇུག་པ་ལྟ་བས་གཏན་ལ་ཕབ་སྟེ། དོན་གྱི་རྗེས་སུ་འཇུག་པ་རྣམ་པར་མི་རྟོག་པའི་ཡེ་ཤེས་དང་། ཡི་གེའི་རྗེས་སུ་འཇུག་པ་བསྐྱེད་རིམ་ཇི་རིགས་པ་དང་འབྲེལ་བའི་སྒོ་ནས་གཙོ་བོར་ཐབས་ལམ་གྱི་རྫོགས་རིམ་ལ་འཇུག་པ་སྟེ། དེ་ཡང་དགའ་བ་བཞིས་དྲངས་པའི་ལྷན་
སྐྱེས་དཔེ་ཡི་འོད་གསལ་ཉིད་བསྒྲུབ་བྱར་བྱས་ཏེ། སྒྲུབ་བྱེད་ཀྱི་ཐབས་སྟེང་འོག་གི་སྒོ་གཉིས་ལས། འདིར་སྔ་མ་ལྟར་བཤད་ན། འཁོར་བར་འཆིང་བྱེད་ཀྱི་གཙོ་བོ་མ་དག་པའི་ལས་ཀྱི་རླུང་ཉི་ཁྲི་ཆིག་སྟོང་དྲུག་བརྒྱ་དང་། གཟུང་འཛིན་གྱི་སེམས་རྟོག་ཚོགས་བརྒྱད་ཁྲི་བཞི་སྟོང་ས་བོན་དང་བཅས་པ། ཁྱབ་བྱེད་རླུང་གི་རྣལ་འབྱོར་བདུན་དང་། རྣམ་པར་མི་རྟོག་པའི་ཡེ་ཤེས་ཟུང་འབྲེལ་ལས་མཉམ་པར་འཇོག་པ་སོགས་བྱེད་པ་སྡོམ་པའི་ཐབས་ཀྱིས་དྷ་ཏི་སྟེ་གཟུང་འཛིན་གཉིས་སྤངས་པའི་འོད་གསལ་གྱི་རྩ་དབུ་མའི་དབྱིངས་སུ་ཐིམ་ནས་རྣམ་པར་རྟོག་པ་ཡེ་ཤེས་ཀྱི་གཞན་དབང་དུ་གྱུར་པ་དང་། ནང་གི་ཉི་མ་ལྟེ་འོག་གི་གཏུམ་མོར་ཕན་པ་སྟེ་གནས་སྐོབས་སུ་ཚིམ་པ་དང་། མཐར་ཐུག་དེ་ལས་སྐྱེས་པའི་བདེ་སྟོང་དགའ་བ་བཞིའི་ཡེ་ཤེས་ཀྱི་དཔྱིད་ཆེན་པོ་སྦྱིན་པར་མཛད་པ་ནང་གི་ཟླ་བ་ཧཾ་ཡིག་བྱང་ཆུབ་ཀྱི་སེམས་བདུད་རྩིར་ཞུ་བའི་བཏུང་བ། ཁྱབ་བྱ་གཏུམ་མོའི་འབར་འཛག་གིས་འཁོར་ལོ་བཞིར་རིམ་པར་དྲངས་པའི་མཐར་རྡོ་རྗེ་ནོར་བུའི་རྩེ་མོའི་རྒྱུན་མཐའ་རུ་སོང་ནས། སླར་རླུང་འཕོ་བ་དང་བྲལ་བའི་སྟོབས་ཀྱིས་ཕྱིར་འཛག་མེད་དུ་འཆིང་བ་དང་། བཟློག་ཁྱབ་བསྲེ་བའི་སྦྱོར་བས་བགྲང་ཡས་པའི་རྩའི་འཁོར་ལོ་ཐམས་ཅད་ཁྱབ་པས་དཔེ་ཡི་ཡེ་ཤེས་ཡང་ཡང་དྲངས་པ་དང་།
དངོས་རིག་གི་ཕྱག་རྒྱའི་ཉེ་རྒྱུས་མཚམས་སྦྱོར་བ་དང་བཅས་པས་ཚོགས་ལམ་འདུན་པ་སེམས་པ་དང་། སྦྱོར་ལམ་རིག་ཆེན་འབྱེད་པ་དག་ཐོབ། དོན་གྱི་ཡེ་ཤེས་ཕྱོགས་གཅིག་པ་མཐོང་ལམ་དབུགས་ཆེན་འབྱིན་པ་མངོན་སུམ་དུ་བྱས། དེ་ལས་ལངས་པ་ན་སྒོམ་ལམ་ལུང་ཆེན་ཐོབ་པ་དང་། མཐར་ལམ་རྩལ་ཆེན་རྫོགས་པ་དག་བགྲོད་ནས། རྟེན་དེ་ལ་འདོད་ཆགས་ཆེན་པོའི་དབང་གིས་ཁུ་རྡུལ་རླུང་གསུམ་ཕྲ་མོ་སྟེང་འོག་ཏུ་འགགས་པའི་དེ་མ་ཐག་པར་འགྱུར་བདེ་མྱོང་བའི་རིག་ཤེས་ཀྱང་རྒྱུན་ཆད་དེ་སེམས་རྟོག་མེད་ཆོས་ཀྱི་སྐུ་དང་། ལུས་ཟག་མེད་འཇའ་ཚོན་གྱི་སྐུ་དབྱེར་མེད་པའི་མི་སློབ་པའི་ཟུང་འཇུག་གི་གོ་འཕང་མངོན་སུམ་དུ་བརྙེས་པ་གང་ཁྱོད། དོན་དམ་པར་སྐྱེ་འགག་ལ་སོགས་པའི་མཚན་མ་མ་དམིགས་ཀྱང་། ཀུན་རྫོབ་ཚུ་རོལ་མཐོང་བའི་བྱིས་པ་སོ་སོ་སྐྱེ་བོའི་བློ་ཅན་རྣམས་ཀྱི་ངོར་ཡང་འཕོ་འགྱུར་གྱི་མཚན་མ་མི་གཞེས་པར་མཐའ་ཡས་པའི་བསྐལ་པ་རྒྱ་མཚོར་དུས་རྟག་ཏུ་ཞབས་པད་བརྟན་པར་ཤོག་ཅིག་ཅེས་མངོན་པར་འདོད་པའི་དོན་ལ་སྨོན་པའི་ཚིག་གིས་མཐའ་བརྒྱན་པའོ། གསུམ་པ་གཙོ་བོར་རྫོགས་པ་ཆེན་པོ་ཨ་ཏི་ཡོ་གའི་གཞུང་དང་སྦྱར་བ་ནི། དོན་དམ་ཀ་ནས་དག་པའི་སྤྲོས་བྲལ་དང་། །ཞེས་སོགས་ཚིགས་བཅད་གཅིག་སྟེ། དེའང་འོད་གསལ་རྫོགས་པ་ཆེན་པོ་མན་
ངག་སྡེ་རྒྱུད་བཅུ་བདུན་གྱི་རྩ་བ་སྒྲ་ཐལ་འགྱུར་ལས། ཡེ་ཤེས་རང་རིག་གནས་པ་ལ། །གསུམ་གྱི་ཚུལ་གྱིས་དབྱེར་མེད་དོ། །ཞེས་གཞི་ཀ་དག་དང་ལྷུན་གྲུབ་ཟུང་འཇུག་གི་ཚུལ་གཏན་ལ་ཕབ་ནས། ལམ་ཁྲེགས་ཆོད་དང་ཐོད་རྒལ་དབྱེར་མེད་པར་ཉམས་སུ་བླངས་པས། འབྲས་བུ་སྐུ་དང་ཡེ་ཤེས་རང་ཤར་བའི་ཕྱིར་གཞི་ལམ་འབྲས་གསུམ་དུ་རྣམ་པར་བཞག་པ་ལས། དང་པོ་ནི། །གཞི་ངེས་པ་དང་མ་ངེས་པར་འདོད་པ་སོགས་ཕྱོགས་རེར་འཆེལ་བ་གཞན་དག་ལུང་རིག་གིས་བསལ་ནས། ཀ་དག་གི་ཡེ་གཞི་ཉིད་སྐྱོན་མེད་དུ་ཁས་བླངས་པ་སྟེ། དེ་ཡང་དོན་དམ་པར་ཆོས་ཐམས་ཅད་ཀྱི་ངོ་བོ་ཀ་ནས་ཏེ་ཟོད་མ་ནས་རྣམ་པར་དག་པས་ཡོད་མེད་རྟག་ཆད་སྐྱེ་འགག་གཅིག་དང་དུ་མ་སོགས་གཉིས་སྣང་དང་བཅས་པའི་བློ་ཡི་ཡུལ་གང་དུའང་མ་གྲུབ་པའི་སྤྲོས་བྲལ་སྟོང་པ་ཉིད་དང་། དེའི་རང་བཞིན་གསལ་ཆ་རྟེན་ཅིང་འབྲེལ་བར་འབྱུང་བའི་ཚུལ་འགག་མེད་ལྷུན་གྱིས་གྲུབ་པར་འཆར་བའང་། ཐུགས་རྗེ་རང་རིག་པའི་ཆོས་ཅན་དུ་མཐོང་ནས་གཟུང་འཛིན་གྱི་ཆོས་ཟད་པའམ། དེ་ལས་གཞན་དུ་སྒྲོ་བཏགས་པའི་དབང་གི་གྲོལ་འཁྲུལ་གྱི་འཇུག་ལྡོག་བྱེད་པ་སྟེ། རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལས། གཞི་དེ་ཡང་ངོ་བོ་སྟོང་པ། རང་བཞིན་གསལ་བ། ཐུགས་རྗེ་
སེམས་ཅན་ལ་སྣང་ནུས་པའོ། །ཞེས་གསུངས་པའི་ཕྱིར་རོ། །གཉིས་པ་ནི། ཐུན་མོང་གི་གྲུབ་མཐས་བློ་བསྒྱུར་བ་སྔོན་དུ་སོང་བས། དབང་བཞི་པ་ཉིད་ལས་རིམ་པར་ཕྱེ་བའི་སྤྲོས་བཅས་ལ་སོགས་པའི་དབང་བཞི་དང་དེའི་གཞི་རྟེན་དམ་ཚིག་གི་ཀུན་སྤྱོད་ཁྱད་པར་ཅན་གྱིས་གོ་ཕྱེ་ནས་ཁྲེགས་ཆོད་དང་ཐོད་རྒལ་གྱི་ལམ་ཟབ་མོར་འཇུག་པར་བྱ་སྟེ། དང་པོ་ནི། ཐལ་འགྱུར་ལས། ཤེས་རབ་ཕ་རོལ་ཕྱིན་པའི་མཐའ། །སྣང་བ་ཐད་དཀར་གཅོད་ལ་འདུས། །ཞེས་གསུངས་པ་ལྟར། གྲོལ་ལུགས་བཞིའི་སྒོ་ནས་ཆོས་ཐམས་ཅད་ཀྱི་གནས་ལུགས་སྟོང་པའི་འོད་གསལ་གྱི་ངང་དུ་ཡུལ་ཡུལ་ཅན་གྱི་སྤྲོས་པ་ཐད་ཀར་གཅོད་པ་སྟེ། གནས་ལུགས་དེ་ཉིད་གཟོད་མ་ནས་སྤྲོས་པའི་ཆོས་ཀྱིས་གོས་མ་མྱོང་བའི་ཕྱིར། ཡེ་གྲོལ། དེ་ལྟར་ཡིན་པ་ལ་གཟོད་གཉེན་པོས་བསྐྱར་ནས་དགྲོལ་དུ་མེད་པའི་ཕྱིར་རང་གྲོལ། གཟུང་འཛིན་གྱི་མཚན་མ་ཐད་ཀར་གཅོད་པ་ཅེར་གྲོལ། དུས་གསུམ་དུ་ཤེས་བྱ་བློའི་ཡུལ་དང་། ལྷན་ཅིག་མི་གནས་པའི་ཕྱིར་མཐའ་གྲོལ་ལོ། །གཉིས་པ་ནི། སྒྲོན་མ་བཞི་ལ། གནད་དྲུག་གིས་ཉམས་སུ་བླངས་པས། རང་འབྲས་སྣང་བ་བཞི་མཐར་ཕྱིན་པ་སྟེ། དེ་ཡང་སེམས་ཀྱི་ཆོས་ཉིད་རང་བཞིན་རྣམ་པར་དག་ཅིང་ཅིར་ཡང་འཆར་དུ་རུང་བ་ཤེས་རབ་རང་བྱུང་། སྙིང་ནས་
མིག་ཏུ་འབྲེལ་བའི་རྩ་རྒྱང་ཞགས་ཆུ། སྤྲིན་བྲལ་ནམ་མཁར་མཐིང་ཞུན་ལྟ་བུའི་འོད་ཟླུམ་དག་པ་དབྱིངས་རྡོ་རྗེ་ལུ་གུ་རྒྱུད་གསེར་སྐུད་ལྡིང་བ་ལྟ་བུ་ཐིག་ལེ་སྟོང་པའི་སྒྲོན་མ་ཞེས་ངེས་པར་བྱས་ནས། བཅའ་བ་ལུས། འཁྲིད་པ་དབྱིངས། འགྲོ་འོང་རླུང་། འཆར་བྱེད་སྒོ། འཆར་བྱ་ཡུལ། རྩ་བ་སེམས་ཀྱི་གནད་རྣམས་རྡོ་རྗེ་སློབ་དཔོན་གྱི་གསུང་གི་བདུད་རྩིས་ཇི་ལྟར་སྐབས་དབྱེ་བ་བཞིན་བརྩོན་པས། དྭངས་པའི་ཆུ་ལ་ཉི་མ་འཆར་བའི་འོད་སྟེང་གི་ནམ་མཁའ་ལ་ཕོག་པ་བཞིན་རིག་གདངས་རྡོ་རྗེ་ལུ་གུ་རྒྱུད་མཐོང་བ་ཆོས་ཉིད་མངོན་སུམ་དུ་སྣང་བའི་འོད་གསལ་གང་ཞིག །རང་རིག་པའི་རྩལ་ལས་གཞན་དུ་མ་དམིགས་པའི་ཕྱིར་གཉིས་སུ་འཛིན་པའི་མཐའ་སྤངས་ཏེ་སྣང་སྟོང་གི་འོད་གསལ་ཟུང་འབྲེལ་དུ་བསྐྱངས་པས། སྣང་བའི་འོད་གསལ་ཉིད་ཆེས་ཆེར་མཆེད་པ་ཉམས་གོང་འཕེལ་དང་། རིག་གདངས་ཀྱི་འཕེལ་ཆ་དེ་ལས་བོགས་དབྱུང་དུ་མེད་པར་ཐོབ་པ་རིག་པ་ཚད་ཕེབས་དང་། ལྟོས་གཞིའི་ཆོས་ཅན་གྱི་འཇུག་པ་ཟད་པས་དེ་ལ་ལྟོས་པའི་ཆོས་ཉིད་ཀྱང་ངོ་བོ་ཉིད་ཀྱིས་རང་བཞིན་མ་གྲུབ་པས་ཆོས་ཉིད་ཟད་པ་སྟེ་ལམ་སྣང་བ་བཞི་རིམ་གྱིས་བགྲོད་པའི་མཐར། གསུམ་པ་ནི། རང་བཞིན་རྫོགས་པ་ཆེན་པོ་ཞེས་གཞི་ལམ་འབྲས་གསུམ་གྱི་ལྡོག་ཆ་ཐ་དད་པ་ལས། འདིར་ཕྱི་
མའི་དབང་དུ་བྱས་ན། གཞི་དེ་ལས་འཕགས་པའི་གཞི་སྣང་ཁྱད་ཆོས་དྲུག་ལྡན་རང་བཞིན་ཀ་དག་གི་ཡེ་ཤེས་གཅིག་པུའི་ཀློང་དུ་མི་སློབ་པའི་ཟུང་འཇུག་ལོངས་སྐུ་རྣམ་པ་གཉིས་དང་། སྤྲུལ་པའི་སྐུ་གསུམ་སོགས་སྐུ་དང་ཡེ་ཤེས་རྒྱ་མཚོ་ལྟ་བུ་ས་བོན་གྱི་ཚུལ་དུ་རྫོགས་པ་མངོན་སུམ་དུ་བྱས་པ་ན། དེ་ལས་གོང་དུ་འཐོབ་བྱ་གཞན་མ་དམིགས་པའི་ཕྱིར་ཆེན་པོའི་སྒྲས་སྨོས་པའམ། ཡང་མ་ཧཱ་སནྣི་ཞེས་པའི་སྒྲ་ལས་དྲངས་ན་མཉམ་པའི་བློ་ཆེན་པོ་སྟེ། སྐུ་གསུམ་མཉམ་པ་ཉིད་ནང་དབྱིངས་གཞོན་ནུ་བུམ་སྐུར་གྲགས་པ་ངོ་བོ་ཉིད་ཀྱི་སྐུ་དང་། དེའི་ལྡོག་ཆ་ཟག་པ་མེད་པའི་བློའམ་ཡེ་ཤེས་ཀྱི་རྣམ་རོལ་སྐུ་གསུམ་དང་། རྟག་ཅིང་ཁྱབ་དང་ལྷུན་གྱིས་གྲུབ་པའི་ཕྲིན་ལས་ཆེན་པོ་ལ་དབང་འབྱོར་པའི་ཕྱིར་རྒྱུན་གྱིས་རྟག་པ་འཕོ་བ་ཆེན་པོའི་གོ་འཕང་ལས་གཞར་ཡང་མི་གཡོ་བའི་ཚུལ་གདུལ་བྱ་ཐུན་མོང་བའི་སྣང་ངོར་ཀྱང་མངོན་དུ་མཛད་ནས་འཆི་མེད་རྡོ་རྗེའི་གཟུགས་སྐུ་ནམ་མཁའ་ཇི་སྲིད་བར་དུ་བཞུགས་པར་གྱུར་ཅིག་ཅེས་བདེན་པའི་ཚིག་གིས་མཚམས་སྦྱར་བའོ། །མདོར་ན་ཚིགས་སུ་བཅད་པ་འདི་གསུམ་དུ་སྔ་འགྱུར་རྡོ་རྗེ་ཐེག་པ་ནང་རྒྱུད་སྡེ་གསུམ་གྱི་བརྗོད་བྱ་མཐའ་དག་དངོས་ཤུགས་ཇི་རིགས་པའི་སྒོ་ནས་འདུས་པས་ན། དེ་དང་དེའི་གཞུང་སོ་སོ་དང་སྦྱར་བའི་བཤད་པ་དང་། བྱེ་བྲག་ཏུ་
བསྐྱེད་རྫོགས་སྡེ་གསུམ་དང་། དབང་བཞིའི་ལམ་འབྲས་བུ་དང་བཅས་པ་དག་ཕན་ཚུན་ལྟོ་སྦྱར་ཏེ། ཐུན་མོང་བ་དང་མི་འགལ་ཞིང་། ཐུན་མོང་མ་ཡིན་པ་དག་མ་འདྲེས་པའི་ཚུལ་གྱིས་རྒྱ་ཆེར་སྤྲོས་པས་ཆོག་གོ། །ཞར་ལ་གསོལ་འདེབས་འདི་ཉིད་ཉམས་སུ་བསྟར་བའི་སྐབས་ཀྱི་དམིགས་རྣམ་ཅུང་ཟད་བཤད་ན། ངེས་འབྱུང་དང་། ལྷག་པའི་བསམ་པས་གཞི་བཟུང་ཞིང་། བླ་མའི་རྣམ་ཐར་ལ་མི་ཕྱེད་དད་པའི་གདུང་ཤུགས་དྲག་པོས་རྒྱུད་བསྐུལ་ཏེ། མདུན་གྱི་ནམ་མཁར་ཡིད་འཕྲོག་མཆོད་པའི་སྤྲིན་ཕུང་སྣ་ཚོགས་པའི་དབུས་སུ། རྗེ་བཙུན་བླ་མ་དམ་པ་ཉིད་ད་ལྟའི་སྐུ་ཡི་རྣམ་པ་ཇི་ལྟ་བ་ལ། གཞོན་ཚུལ་མཚན་དཔེའི་གཟི་བྱིན་མཆོག་ཏུ་འབར་ཞིང་། ན་བཟའ་གཟབ་འཕྱོར་གྱི་རྣམ་པ་ཅན་དུ་བསྒོམ་པ་ནི་རྟེན་འབྲེལ་གྱི་གནད་ཡིན་པས། དེ་ལྟར་ལེགས་པར་གསལ་ཐེབས་པ་དང་། །སྤྲོ་ན་ཡན་ལག་བདུན་པ་སྔོན་དུ་འགྲོ་བས། ཚིག་དོན་ཡིད་ལ་དྲན་བཞིན་པའམ། དེ་ཙམ་མི་ནུས་ཀྱང་ཞབས་པད་བརྟན་པར་སྙིང་ཐག་པ་ནས་གསོལ་བ་ལན་ཇི་ལྟར་རིགས་པ་གདབ་པས། རྗེ་བཙུན་བླ་མས་ཀྱང་དགྱེས་བཞིན་དུ་ཞལ་གྱིས་བཞེས་ཏེ། སྐུ་ཡི་ཆ་ཐམས་ཅད་ནས་འོད་ཟེར་བསམ་གྱིས་མི་ཁྱབ་པ་འཕྲོས་པས། འཁོར་འདས་ལམ་གསུམ་གྱི་ཚེ་བསོད་དཔལ་འབྱོར་ཡེ་ཤེས་ཐམས་ཅད་འོད་
ཟེར་བདུད་རྩིའི་རྣམ་པར་སྤྱན་དྲངས་ནས་ཐིམ་པའི་སྐད་ཅིག་དེ་ཉིད་ལ་མགོན་པོ་ཚེ་དཔག་ཏུ་མེད་པའི་སྐུར་གྱུར་ཏེ་ཇི་སྲིད་འཁོར་བ་མ་སྟོང་བར་དུ་ཆོས་འཁོར་བསྐོར་བཞིན་དུ་བཞུགས་པར་བསམས་ལ་བསྔོ་སྨོན་གྱིས་རྒྱས་གདབ། རང་དོན་དུ་ཚེ་སྒྲུབ་བྱེད་ནའང་།. ཕྱག་གི་བུམ་པ་ལས་འཆི་མེད་བདུད་རྩིའི་རྒྱུན་དཔག་ཏུ་མེད་པ་བབས། རང་གི་སྤྱི་བོ་ནས་ཞུགས། ལུས་ཀྱི་ནང་གང་། ནད་གདོན་སྡིག་སྒྲིབ་ཐམས་ཅད་དག་ཅིང་འཆི་མེད་ཚེའི་དངོས་གྲུབ་ཐོབ་པར་བསམས་ལ་ཚེ་གཟུངས་བཟླ་བའང་བྱ་ཞེས་མན་ངག་རིག་པ་རྣམས་ཀྱིས་གསུངས་སོ། །གསུམ་པ་མཇུག་གི་དོན་ནི། ཞེས་པའང་མཆོག་གི་རྡོ་རྗེའི་སློབ་དཔོན་སོགས་སྦྱར་བྱང་གི་མཇུག་བསྡུ་བ་སྟེ་གོ་སླ་བས་མ་སྤྲོས་སོ། །འཆི་མེད་གྲུབ་པའི་རྡོ་རྗེའི་ཚིག །ཅུང་ཟད་བཤད་པའི་ལེགས་བྱས་ཀྱིས། །ཁྱབ་བདག་འཇམ་དབྱངས་བླ་མ་ཆེའི། །ཞབས་པད་བསྐལ་བརྒྱར་བརྟན་གྱུར་ཅིག །ཅེས་པའང་རིས་མེད་པའི་ཡོངས་འཛིན་དམ་པ་རྣམས་ཀྱི་གསུང་གི་བདུད་རྩི་མང་དུ་ཐོབ་ཀྱང་སྙོམས་ལས་ཁོ་ནའི་གཞན་དབང་དུ་གྱུར་པའི་ཀུན་རྨོངས་ཀུན་ཏུ་རྒྱུ་འཇམ་དབྱངས་མཁྱེན་བརྩེའི་དབང་པོས། རྗེ་བླ་མ་ཉིད་ཀྱི་གསུང་འགའ་ཞིག་མཐོང་བ་དང་། ཅུང་ཟད་ཐོས་པ་ཉིད་གཞིར་བྱས་ཏེ་ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་
བའི་ཚལ་ཆེན་པོར་ཟིན་བྲིས་སུ་ཤིན་ཏུ་སྙིང་པོར་དྲིལ་བའི་ཚུལ་གྱིས་ཤར་མར་སྤེལ་བ་སྟེ། ནོངས་པའི་ཚོགས་རྣམས་ཡེ་ཤེས་གཟིགས་པ་དམ་པས་བསལ་དུ་གསོལ། །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །།སྦྱངས་པའི་ཡོན་ཏན་བཅུ་གཉིས་ཀྱི་རྣམ་པར་བཤད་པའི་ལེའུ་ཚན་ནོ། །ན་མཤཱཀྱ་མུ་ན་ཡེ། སྤྱིར་སྦྱངས་པའི་ཡོན་ཏན་ལ་བཅུ་གཉིས་ཡོད་དེ། ཟས་ཀྱི་དབང་དུ་བྱས་པ་གསུམ། གོས་ཀྱི་དབང་དུ་བྱས་པ་གསུམ། གནས་མལ་གྱི་དབང་དུ་བྱས་པ་དྲུག་ཡོད་པས་སོ། །ཟས་ཀྱི་དབང་དུ་བྱས་པ་གསུམ་ནི། བསོད་སྙོམས་པ་དང་། སྟན་གཅིག་པ་དང་། ཟས་ཕྱིས་མི་ལེན་པའོ། །དང་པོ་ལ་རྙེད་པས་ཆོག་པའི་བསོད་སྙོམས་པ་དང་། མཐར་གྱིས་སློང་བའི་བསོད་སྙོམས་པ་གཉིས་སུ་ཕྱེ་ན་སྦྱངས་པའི་ཡོན་ཏན་བཅུ་གསུམ་དུ་འགྱུར། གོས་ཀྱི་དབང་དུ་བྱས་པ་གསུམ་ནི། ཆོས་གོས་གསུམ་པ་དང་། ཕྱིར་བ་པ་དང་། ཕྱགས་དར་ཁྲོད་པའོ། །གནས་མལ་གྱི་དབང་དུ་བྱས་པ་དྲུག་ནི། དགོན་པ་དང་། ཤིང་དྲུང་པ་དང་། བླ་གབ་མེད་པ། དུར་ཁྲོད་པ་དང་། ཙོག་པུ་དང་། གཞི་ཇི་བཞིན་པའོ། །ཁ་ཅིག་ཕྱི་མ་གཉིས་སྤྱོད་ལམ་གྱི་དབང་དུ་བྱས་པར་མཛད་ནས། གནས་མལ་གྱི་དབང་དུ་བྱས་པ་བཞི་ཡིན་ཞེས་ཟེར། དེ་དག་སོ་སོའི་ངོ་བོ་གང་ཞེ་ན། རྙེད་པས་ཆོག་པའི་
བསོད་སྙོམས་པ་ནི། འདྲིས་པའི་ཁྱིམ་ནས་ཇི་ཙམ་རྙེད་པ་ཟ་བར་བྱེད་པ་ཡིན་ལ། མཐར་གྱིས་སློང་བའི་བསོད་སྙོམས་པ་ནི། ཁྱིམ་རྣམས་སུ་རིམ་གྱིས་བརྒྱུད་དེ་བསོད་སྙོམས་ཇི་ཙམ་རྙེད་པ་ཟ་བར་བྱེད་ཀྱི། བདག་གིས་འདི་ནས་བཟའ་བ་དང་བཅའ་བ་བཟང་པོ་ཐོབ་བོ་སྙམ་ནས་མགོ་འཕང་བསྟོད་དེ་མི་འགྲོའོ། །སྟན་གཅིག་པ་ནི། སྟན་གཅིག་པོ་དེ་ལ་འདུག་ནས་ཇི་ཙམ་ཟ་བ་དེ་ཙམ་དུ་ཟ་བར་བྱེད་ཀྱི། དེ་ལས་ལངས་ནས་མི་ཟ་བའོ། །ཟས་ཕྱིས་མི་ལེན་པ་ནི། ཟས་ཀྱི་ཕྱིར་འདུག་ནས་ཇི་ཙམ་གྱིས་བདག་འཚོ་བའི་ཟས་ཐམས་ཅད་མ་བླངས་ཀྱི་བར་དུ་མི་ཟ་ཞིང་། འདིས་འཚོའོ་སྙམ་པ་དང་ཐམས་ཅད་གཅིག་ཅར་དུ་བླངས་ནས་ཟ་བའོ། །ཆོས་གོས་གསུམ་པ་ནི། སྣམ་སྦྱར། བླ་གོས། མཐང་གོས་གསུམ་གྱིས་འཚོ་བར་བྱེད་ཅིང་། དེ་ལས་ལྷག་པའི་གོས་མི་འཆང་བ་དང་། ཕྱིང་བ་པ་ནི༑ ཆོས་གོས་གསུམ་མམ། གོས་ལྷག་པ་གཅིག་འཆང་བ་ཐམས་ཅད་བལ་ལས་བྱས་པ་ཤ་སྟག་འཆང་གི། དེ་ལས་གཞན་མི་འཆང་བ་དང་། ཕྱགས་དར་ཁྲོད་པ་ནི། ལམ་པོ་ཆེ་ལ་སོགས་པར་བོར་བའི་བཤང་གཅིན་སོགས་ཀྱིས་རེག་པ་མི་གཙང་བ་རྣམས་བོར་ཏེ། རུང་བ་རྣམས་བླངས་ཏེ་བཀྲུས་དྲུབས་ཁ་དོག་བཟང་པོར་བསྒྱུར་ནས་འཆང་བར་བྱེད་པ་དང་། དགོན་པ་བ་ནི་གྲོང་དང་གྲོང་
བརྡལ་ལ་སོགས་པས་དབེན་པའི་དགོན་པ་དང་། ནགས་འདབས་ལ་སོགས་པར་གནས་པ་དང་། ཤིང་དྲུང་པ་ནི་ཤིང་ལྗོན་པའི་དྲུང་དུ་གནས་འཆའ་ཞིང་རྟེན་པར་བྱེད་པ་དང་། བླ་གབ་མེད་པ་ནི། སྟེང་གི་ཐོག་མ་བཀབ་ཅིང་མ་གཡོགས་པའི་ཕྱོགས་སུ་གནས་འཆའ་བར་བྱེད་པ་དང་། དུར་ཁྲོད་པ་ནི། གང་དུ་སྐྱེའོ་ཤིའོ་ཅོག་འདོང་བའི་དུར་ཁྲོད་དུ་གནས་འཆའ་བར་བྱེད་པ་དང་། །ཙོག་པུ་པ་ནི། ཁྲིའམ། ཁྲིའུ་འམ། རྩྭའི་སྟེང་དུ་ཙོག་པུར་འདུག་སྟེ། ཁྲི་ལ་སོགས་པར་རྒྱབ་བམ། གློས་མི་བསྟེན་པ་དང་། གཞི་ཇི་བཞིན་པ་ནི། རྩྭ་དང་ལོ་མ་ལ་སོགས་པ་བཏིང་བ་ལ་མལ་འཆའ་ཞིང་། ལན་གཅིག་ཇི་ལྟར་བཏིང་བ་མལ་འཆའ་བར་བྱེད་ཀྱི། ཡང་ཡང་དུ་བརྗེ་ཞིང་མི་འཆོས་པའོ། །དེ་དག་ནི་ཉན་ཐོས་ཀྱི་ས་ལས་ཇི་ལྟར་འབྱུང་བ་བཞིན་ཡིན་ནོ། །ཡང་ཕྱིང་བ་པ་མ་གཏོགས་པ་རྣམས་ལ་ཆུང་ངུ་། འབྲིང་། ཆེན་པོ་གསུམ་གསུམ་ཡོད་དེ། བསོད་སྙོམས་པ་ལ་གསུམ་ལས། ཆུང་ངུ་ནི། གྲོང་དུ་ཕྱིན་པ་ན་ཀུན་དགའ་ར་བར་རྙེད་པ་ལེན་པར་བྱེད་པ་དང་། འབྲིང་ནི་དེར་མི་ལེན་པར་ལམ་བར་དུ་རྙེད་པ་ལེན་པར་བྱེད་པ་དང་། ཆེན་པོ་ནི། དེར་ཡང་མི་ལེན་པར་གྲོང་ཁྱེར་གྱི་ཉེ་སྐོར་དུ་ཕྱིན་ནས་རྙེད་པ་ལེན་པར་བྱེད་པའོ། །སྟན་གཅིག་པ་ལ་ཡང་གསུམ་ལས།
ཆུང་ངུ་ནི། ཉན་པ་ལས་བཤད་པ་བཞིན་དང་། འབྲིང་ནི་སྟན་གཅིག་པོ་དེ་མ་སྤངས་ཀྱི་བར་དུ་ཟས་ཟོས་ནས་ཟས་བསོད་པ་བྱུང་ན་ལེན་པ་དང་། ཆེན་པོ་ནི། ཟོས་ནས་ཟས་བསོད་པ་ཡང་ལེན་པར་མི་བྱེད་པའོ། །ཟས་ཕྱིས་མི་ལེན་པ་ལ་ཡང་གསུམ་ལས། ཆུང་ངུ་ནི་ཁ་ལ་སོགས་པ་མ་བཀྲུས་ཀྱི་བར་དུ་ལེན་པར་བྱེད་པ་དང་། འབྲིང་ནི། ཟས་ཟ་བཞིན་དུ་གཞན་གྱིས་བསྟབས་པ་ལེན་ལ། ཁ་ལ་སོགས་པ་བཀྲུས་ནས་མི་ལེན་པ་དང་། ཆེན་པོ་ནི། སྔར་ཟས་ཐམས་ཅད་གཅིག་ཅར་དུ་བླངས་ནས་ཟས་ཟ་བཞིན་དུ་མི་ལེན་པའོ། །ཆོས་གོས་གསུམ་པ་ལ་ཡང་གསུམ་ལས། ཆུང་ངུ་ནི། ཆོས་གོས་གསུམ་དང་རས་ཆེན་གཡན་པ་དགབ་པ་སྟན་དང་གདིང་བ་བཅས་འཆང་བར་བྱེད་པ་དང་། འབྲིང་ནི། རས་ཆེན་སོགས་བཞི་རང་གིས་བྱིན་གྱིས་བརླབས་པ་མི་འཆང་ལ། གཞན་གྱིས་བྱིན་གྱིས་བརླབས་པ་ལ་ལོངས་སྤྱོད་པར་བྱེད་པ་དང་། ཆེན་པོ་ནི། ཆོས་གོས་གསུམ་ཙམ་འཆང་གི། དེ་ལས་ལྷག་པར་མི་འཆང་བའོ། །ཕྱགས་དར་ཁྲོད་པ་ལ་ཡང་གསུམ་ལས། ཆུང་ངུ་ནི། བྱི་བས་ཟོས་པ༑ ཚིག་པ། དུམ་བུར་བཅད་པ། གཞན་གྱིས་རང་གི་ཆེད་དུ་བྱས་པ་ལེན་པ་དང་། འབྲིང་ནི། རང་གི་ཆེད་དུ་བྱས་པ་མི་ལེན་པར། མ་ངེས་པར་བོར་བ་ལེན་པ་དང་། ཆེན་པོ་ནི། དེ་དག་མི་
ལེན་པར། དུར་ཁྲོད་དང་། ཕྱགས་དར་ཁྲོད་དང་། ལམ་པོ་ཆེར་ལྷུང་བ་ལེན་པའོ། །དགོན་པ་པ་ལ་ཡང་གསུམ་ལས། ཆུང་ངུ་ནི། གྲོང་ལས་གཞུ་འདོམ་ལྔ་བརྒྱས་བཅད་པའི་སར་གནས་པ་དང་། འབྲིང་ནི། གྲོང་ལས་གཞུ་འདོམ་སྟོང་ཕྲག་གཉིས་ཀྱིས་བཅད་པའི་སར་གནས་པ་དང་། ཆེན་པོ་ནི། གྲོང་ལས་གཞུ་འདོམ་སྟོང་ཕྲག་བརྒྱད་ཀྱིས་བཅད་པའི་སར་གནས་པའོ། །ཤིང་དྲུང་པ་ལ་ཡང་གསུམ་ལས། ཆུང་ངུ་ནི། ཤིང་དྲུང་ངོ་བཞི་པོ་ཐམས་ཅད་སྐྱོར་བར་གནས་པ་དང་། འབྲིང་ནི། དེར་ངོས་ཅུང་ཟད་སྐྱོར་བར་གནས་པ་དང་། ཆེན་པོ་ནི། དེར་ངོས་ཐམས་ཅད་ནས་མ་སྐྱོར་བར་གནས་པའོ། །བླ་གབ་མེད་པ་ལ་ཡང་གསུམ་ལས། ཆུང་ངུ་ནི། སྟེང་གི་ངོས་གསུམ་གཡོགས་ལ། གཅིག་མ་གཡོགས་པར་གནས་པ་དང་། འབྲིང་ནི། སྟེང་ངོས་གཅིག་གཡོགས་ལ་གསུམ་མ་གཡོགས་པར་གནས་པ་དང་། ཆེན་པོ་ནི། སྟེང་གི་ངོས་ཐམས་ཅད་མ་གཡོགས་པར་གནས་པའོ། །དུར་ཁྲོད་པ་ལ་ཡང་གསུམ་ལས། ཆུང་ངུ་ནི། སྔོན་དུར་ཁྲོད་ཡིན་ལ། ད་ལྟ་དུར་ཁྲོད་མ་ཡིན་པར་གནས་པ་དང་། འབྲིང་ནི། རོ་ཅུང་ཟད་སྐྱེལ་བའི་སར་གནས་པ་དང་། ཆེན་པོ་ནི། སྐྱེ་བོ་ཤིའོ་ཅོག་སྐྱེལ་བའི་སར་གནས་པའོ། །ཙོག་པུ་པ་ལ་ཡང་གསུམ་ལས། ཆུང་ངུ་ནི།
ངོས་གཉིས་སྙེས་ནས་གནས་པ་དང་། འབྲིང་ནི། ངོས་གཅིག་སྙེས་ནས་གནས་པ་དང་། ཆེན་པོ་ནི་ངོས་ཐམས་ཅད་ལ་མ་སྙེས་པར་གནས་པའོ། །གཞི་ཇི་བཞིན་པ་ལ་གསུམ་ལས། ཆུང་ངུ་ནི་ལན་། གསུམ་མལ་འཆའི་གཞན་མི་བྱེད་པ་དང་། འབྲིང་ནི། ལན་གཉིས་སུ་མལ་འཆའི་གཞན་མི་བྱེད་པ་དང་། ཆེན་པོ་ནི། ལན་གཅིག་སྟན་བཏིང་བ་ལ་མལ་འཆའི། ཡང་དང་ཡང་དུ་མི་བརྗེ་མི་འཆོས་པའོ༑ །དེ་དག་ལ་ཅིའི་ཕྱིར་སྦྱངས་པའི་ཡོན་ཏན་ཞེས་བྱ་ཞེ་ན། དཔེར་ན། བལ་མ་རྨེལ་བ་དེའི་ཚེ་སྐུད་པ་མི་རུང་ལ། རྨེལ་ནས་རུང་བ་དེ་བཞིན་དུ། བསོད་སྙོམས་དང་། ཆོས་གོས་དང་། །གནས་མལ་ལ་ཆགས་པའི་ཚེ་སེམས་ལས་སུ་མི་རུང་ལ། ཡོན་ཏན་འདི་དག་གིས་ཚངས་སྤྱོད་ལ་གནས་པར་བྱ་བའི་ཕྱིར། སེམས་ལས་རུང་དུ་སྦྱོང་བར་བྱེད་པས་དེ་སྐད་ཅེས་བྱའོ། །སྦྱངས་པའི་ཡོན་ཏན་བཅུ་གཉིས་པོ་འདི་དག་བསྟེན་པ་ལ་དགོས་པ་ཅི་ཡོད་ཅེ་ན། ཟས་ཀྱི་དབང་དུ་བྱས་པ་གསུམ་བསྟེན་པ་ལ་དགོས་པ་ཡོད་དེ། ཟས་བཟང་པོ་ལ་ཆགས་པ་སྤང་པའི་ཕྱིར་དུ་བསོད་སྙོམས་པ་དང་། །ཟས་མང་པོ་ལ་ཆགས་པ་སྤང་བའི་ཕྱིར་དུ་སྟན་གཅིག་པ་དང་། ཟས་ཕྱིས་མི་ལེན་པ་གཉིས་བརྟེན་པར་བྱ་བ་ཡིན་པའི་ཕྱིར། གོས་ཀྱི་དབང་དུ་བྱས་པ་གསུམ་བསྟེན་པ་ལ་དགོས་པ་ཡོད་དེ། གོས་མང་
པོ་ལ་ཆགས་པ་སྤང་བའི་ཕྱིར་དུ་ཆོས་གོས་གསུམ་པ་དང་། གོས་འཇམ་ཞིང་རེག་ན་བདེ་བ་ལ་ཆགས་པ་སྤང་བའི་ཕྱིར་དུ་ཕྱིང་བ་པ་དང་། གོས་བཟང་པོ་ལ་ཞེན་པ་དགག་པའི་ཕྱིར་དུ་ཕྱགས་དར་ཁྲོད་པ་བསྟེན་པར་བྱ་བ་ཡིན་པའི་ཕྱིར། གནས་མལ་གྱི་དབང་དུ་བྱས་པ་དྲུག་བསྟེན་པ་ལ་དགོས་པ་ཡོད་དེ། འདུ་འཛི་ལ་ཆགས་པ་སྤང་བའི་ཕྱིར་དགོན་པ་དང་། གནས་ལ་ཆགས་པ་སྤང་བའི་ཕྱིར་ཤིང་དྲུང་པ་དང་། བླ་གབ་མེད་པ་དང་། དུར་ཁྲོད་པ་སྟེ་གསུམ་དང་། དུར་ཁྲོད་པ་ནི་འཁྲིག་པ་ལ་ཆགས་པ་སྤང་པའི་ཕྱིར་ཡང་ཡིན་ལ། གློས་འབེབས་པ་དང་ཉལ་བའི་བདེ་བ་ལ་ཆགས་པ་སྤང་བའི་ཕྱིར་ཙོག་པུ་པ་དང་། སྟན་འདིང་བ་དང་གབ་པ་ལ་ཆགས་པའི་གཉེན་པོར་གཞི་ཇི་བཞིན་པ་བསྟེན་པར་བྱ་བ་ཡིན་པའི་ཕྱིར་རོ། །སྦྱངས་པའི་ཡོན་ཏན་བཅུ་གཉིས་པོ་བརྟེན་པ་འདི་དག་ལ་ཕན་ཡོན་ཅི་ཡོད་ཅེ་ན། འདི་ལ་སྤྱིར་བསྟན་པ་དང་། སོ་སོར་ཕྱེ་ནས་བསྟན་པ་གཉིས་ལས། དང་པོ་ནི། འདི་དག་བསྟེན་པ་ལ་ཕན་ཡོན་ཡོད་དེ། གྲགས་པ་དང་རྙེད་བཀུར་ཚུལ་འཆོས་དང་ཁ་།གསགས་ཆགས་སྡང་སོགས་རིམ་གྱིས་སྤང་བར་འགྱུར་བ་དང་། བསོད་སྙོམས་དང་ཆོས་གོས་གནས་མལ་ངན་ངོན་ཙམ་གྱིས་ཆོག་ཤེས་པ་འཕགས་པའི་རིགས་ལ་གནས་པར་འགྱུར་བ་དང་། ཡོ་བྱད་
བསྙུངས་པར་འགྱུར་བ་དང་། སངས་རྒྱས་དང་ཉན་ཐོས་ཀྱིས་བསྔགས་པར་འགྱུར་བའི་ཕན་ཡོན་ཡོད་པའི་ཕྱིར་རོ། །གཉིས་པ་ནི། བསོད་སྙོམས་པ་ལ་ནི་ང་རྒྱལ་མེད་ཅིང་། བརྙས་པ་བཟོད་པ་དང་༑ ཟས་ཀྱིས་ཕོངས་པ་མེད་པ་དང་། ཟས་བཟང་པོ་དོན་དུ་གཉེར་བའི་སྡུག་བསྔལ་མི་འབྱུང་བའི་ཕན་ཡོན་ཡོད་དོ། །སྟན་གཅིག་པ་ལ་ཡང་ཟས་གཉིས་པ་ཚོལ་བ་དང་། བྱིན་ལེན་ཡང་དང་ཡང་དུ་བྱེད་པའི་གནོད་པ་མི་འབྱུང་བ་དང་། ཟོས་པ་འཇུ་ཞིང་གནོད་པ་ཆུང་བ་དང་། ལྡང་བ་ཡང་ཞིང་བདེ་བར་གནས་པའི་ཕན་ཡོན་ཡོད་དོ། །ཟས་ཕྱིས་མི་ལེན་པ་ལ་ཡང་། ཆོག་ཤེས་པ་དང་། ཟས་ལ་བརྐམ་ཆགས་མེད་པ་དང་། ཟས་ཡང་དང་ཡང་དུ་ཚོལ་བའི་གནོད་པ་མེད་པ་དང་། བསམ་གཏན་དང་ཀློག་པ་ལ་མི་གནོད་པའི་ཕན་ཡོན་ཡོད་དོ། །ཆོས་གོས་གསུམ་པ་ལ་ཡང་། ཆོས་གོས་ལྷག་པོ་ཚོལ་བའི་སྡུག་བསྔལ་མེད་པ་དང་། གོས་ཞག་བཅུ་འཆང་ཡང་ལྟུང་བ་མི་འབྱུང་བ་དང་། གོས་ལྷག་པ་བྱིན་གྱིས་རློབས་པའི་ལས་མི་འབྱུང་བ་དང་། ཡོ་བྱད་བསྙུངས་ཤིང་རྣལ་འབྱོར་དང་རྗེས་སུ་།མཐུན་པའི་ཕན་ཡོན་ཡོད་དོ། །ཕྱིང་བ་པ་ལ་ཡང་། གོས་བཟང་པོ་ལ་སྲེད་པ་མེད་པས། དེ་ཚོལ་བའི་སྡུག་བསྔལ་མེད་པ་དང་། དེ་ལ་བརྟེན་ནས་ཆར་དང་ཚ་གྲང་ལ་སོགས་པའི་གནོད་པ་བཟོད་
པའི་ཕན་ཡོན་ཡོད་དོ། །ཕྱགས་དར་ཁྲོད་པ་ལ་ཡང་། གོས་ཀྱི་ཕྱིར་ཁྱིམ་པ་རྣམས་དང་མི་འདྲེ་བ་དང་། ཆོམ་རྐུན་པས་གླགས་མི་བལྟ་ཞིང་། གོས་བསྲུང་བའི་ཕྱིར་སྡུག་བསྔལ་མེད་པ་དང་། ཕྱོགས་གང་དུ་ཕྱིན་ཀྱང་གོས་ཀྱིས་མི་བྲེལ་བ་དང་། ལོག་འཚོའི་སྐྱོན་གྱིས་མི་གོས་པའི་ཕན་ཡོན་ཡོད་དོ། །དགོན་པ་བ་ལ་ཡང་། གྲོང་གི་འདུ་འཛི་ལ་གནས་པས། ཏིང་ངེ་འཛིན་ཐོབ་པ་དང་༑ བསྲུང་བར་མི་ནུས་ལ། འདུ་འཛི་སྤངས་ནས་དགོན་པར་མཉམ་པར་བཞག་པས། ཏིང་ངེ་འཛིན་ཐོབ་པ་དང་། བསྲུང་བར་ནུས་པ་དང་། དགེ་བ་ལ་མངོན་དུ་ཕྱོགས་པ་དང་། འགྱོད་པ་མེད་པར་འཆི་བའི་དུས་བྱེད་པའི་ཕན་ཡོན་ཡོད་དོ། །ཤིང་དྲུང་པ་ལ་ཡང་། གནས་མལ་ཚོལ་བའི་སྡུག་བསྔལ་མེད་པ་དང་། གཞན་དང་རྩོད་གཞི་མེད་པ་དང་། ཤིང་གི་ཡལ་ག་དང་ལོ་མའི་དུས་ཀྱི་འགྱུར་ལྡོག་ལ་བརྟེན་ནས་འདུས་བྱས་མི་རྟག་པར་རྟོགས་པ་དང་། གནས་མལ་ལ་ཆགས་པ་མེད་ཅིང་ཐོགས་མེད་དུ་རྒྱུ་བའི་ཕན་ཡོན་ཡོད་དོ། །བླ་གབ་མེད་པ་ལ་ཡང་། གནས་མལ་ཚོལ་བ་དང་སྦ་བ་དང་བྱི་དོར་བྱེད་པའི་སྡུག་བསྔལ་མེད་པ་དང་། རྒྱུ་སྐར་གྱི་འགྲོ་འདུག་ལ་བརྟེན་ནས་འདུས་བྱས་མི་རྟག་པར་རྟོགས་པ་ལ་སོགས་པའི་ཕན་ཡོན་ཡོད་དོ། །དུར་ཁྲོད་པ་ཡང་། དུར་ཁྲོད་དུ་མི་རྟག་པ་
དང་། མི་གཙང་བ་བསྒོམ་པ་ལ་བརྟེན་ནས་འདོད་ཆགས་སོགས་བག་མེད་པ་མི་འབྱུང་བ་དང་། ལུས་སྲོག་ལ་བལྟ་བ་བསྲབ་པར་འགྱུར་བ་དང་། དེ་ལ་བརྟེན་པའི་རྒྱགས་པ་སྤང་པའི་ཕན་ཡོན་ཡོད་དོ། །ཙོག་པུ་པར་ཡང་། །སེམས་གཉིད་དང་མལ་བདེ་བའི་དབང་དུ་མི་འགྲོ་བ་དང་། ལུས་ལ་ཆགས་པ་བསྲབ་པར་འགྱུར་བ་དང་། ལྡང་བ་ཡང་ཞིང་རྨི་ལམ་ཉུང་བ་དང་། གནས་མལ་འཚོལ་བ་དང་འཆོས་པའི་བྱ་བ་ཉུང་བའི་ཕན་ཡོན་ཡོད་དོ། །གཞི་ཇི་བཞིན་པ་ལ་ཡང་། ལན་གཅིག་ཇི་ལྟར་སྟན་བཅས་པས་ཆོག་ཤེས་ནས་གནས་མལ་འཚོལ་བའི་སྡུག་བསྔལ་མེད་པ་དང་། གནས་མལ་ལ་ཆགས་པ་མེད་པ་དང་། དོན་ཉུང་བ་དང་བྱ་བ་ཉུང་བ་ལ་སོགས་པའི་ཕན་ཡོན་རྣམས་ཡོད་དོ། །འོ་ན་སྦྱངས་པའི་ཡོན་ཏན་འདི་དག་གང་ལས་འཐོབ་ཅེ་ན། མཛོད་ལས། ལྷག་མའི་རྣམ་རིག་མིན་ཞིང་དང་། །ལེན་དང་གུས་པར་བྱེད་ལས་འཐོབ། །ཅེས་པ་ལྟར། དགེ་སློང་ལྟ་བུ་ལས་ལེན་པར་བྱེད་པ་ལས་འཐོབ་བོ། །ཚུལ་ཇི་ལྟར་ན། ཡུལ་དེ་ཕྱག་འོས་ཡིན་ན་ཕྱག་འཚལ། མདུན་དུ་ཙོག་པུར་འདུག་སྟེ། ཐལ་མོ་སྦྱར་ནས་བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་བཟུང་སྟེ། ཇི་སྲིད་འཚོའི་བར་དུ་ཆོས་གོས་བཞི་སྤངས་ཏེ། ཆོས་གོས་གསུམ་པ་ཡང་
དག་པར་ལེན་ཏེ། བདག་ཆོས་གོས་གསུམ་པའི་ཡི་དམ་དང་ལྡན་པར་བཙུན་པས་བཟུང་དུ་གསོལ། །ཞེས་ལན་གསུམ་དང་། མཇུག་ཏུ་ཐབས་ལེགས་བྱའོ། །དེ་བཞིན་དུ་གཞན་རྣམས་ལ་ཡང་ཇི་ལྟར་རིགས་པ་ཤེས་པར་བྱའོ། །འོ་ན་སྦྱངས་པའི་ཡོན་ཏན་འདི་དག་གི་ཡི་དམ་གང་གིས་འཇིག་པའམ་གཏོང་བ་ཡིན་ཞེ་ན། མཛོད་ལས། བར་མ་ཤུགས་བླངས་བྱ་བ་དང་། །དེ་ཚེ་རྩ་བ་ཆད་པ་ལས། །ཞེས་བཤད་པ་ལྟར། འདི་ཙམ་དུ་ཞེས་བླངས་པ་ནི་བླངས་པ་ཆད་པ་དང་། བླངས་ཀྱང་བྱ་བ་ཇི་བཞིན་མི་བྱེད་ན་བྱ་བ་ཆད་པ་དང་། ཚེ་ཆད་པ་དང་། དགེ་རྩ་ཆད་པས་གཏོང་བ་དང་། །མི་བརྡ་འཕྲོད་པའི་དྲུང་དུ་བསམ་པ་ཐག་པས་ཕུལ་བས་ཀྱང་གཏོང་ལ། འབུལ་ཚུལ་ནི། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བྱ་བས་ཆོས་གོས་གསུམ་པའི་ཡི་དམ་ཡང་དག་པར་བླངས་པ་ལས། ཆེ་གེ་མོའི་རྐྱེན་གྱིས་དེ་ཉིད་སླར་འབུལ་ལོ། །ཚེ་དང་ལྡན་པ་བདག་ཆོས་གོས་གསུམ་པའི་ཡི་དམ་མ་མཆིས་པར་བཟུང་དུ་གསོལ། །ཞེས་པ་ལྟ་བུའོ། །འོ་ན་འདི་དག་ལ་གནང་བ་ཡོད་དམ་མེད་ཅེ་ན། ཡོད་དེ། འདི་དག་ནི་གོས་དང་ཟས་དང་གནས་མལ་ལ་ལྷག་པར་ཆགས་པའི་གཉེན་པོར་གསུངས་པ་ཡིན་པས། སྦྱོར་བའི་དུས་སུ་འབད་རྩོལ་གྱིས་བསྒྲུབས་མི་དགོས་ཤིང་།
དངོས་གཞིའི་དུས་སུ་ཆགས་ཞེན་མེད་ན། གོས་སྲང་འབུམ་རི་བ་དང་། ཁང་པ་བརྩེགས་པ་ལྔ་བརྒྱ་པ་དང་། ཟས་རོ་བརྒྱ་པ་ལ་ལོངས་སྤྱད་པར་ཆོག་པར་གསུངས་པའི་ཕྱིར། དེ་ལྟར་ཡང་མདོ་རྩ་བ་ལས༑ མྱ་ངན་ལས་འདས་པའི་བསམ་པས་རབ་ཏུ་བྱུང་བ་ཚུལ་ཁྲིམས་དང་ལྡན་པ་ལ་ནི་གོས་སྟོང་ཕྲག་བརྒྱ་པ་དང་། ཟས་རོ་བརྒྱ་པ་དང་། ཁང་པ་བརྩེགས་པ་ལྔ་བརྒྱ་པ་ཡང་འོས་སོ། །ཞེས་གསུངས་སོ། །དེ་ལྟ་བུའི་གནང་བཀག་འབྱུང་བའི་རྒྱུ་མཚན་ཡོད་དེ། རབ་ཏུ་བྱུང་བ་རྣམས་ཀྱིས་འདོད་པ་བསོད་ཉམས་ཀྱི་མཐའ་དང་། ངལ་ཞིང་དུབ་པའི་མཐའ་སྤངས་ནས་དབུ་མའི་ལམ་ལ་གནས་པར་བྱ་དགོས་པའི་ཕྱིར་རོ། །ཞེས་པའང་ཉེར་མཁོའི་ལེའུ་ཚན་ནོ།། ༈ །།ན་མོ་ཨཱརྱ་ཏཱ་ར་ཡེ། ལྷ་མོ་ལ་གུས་སོགས་ཚིག་རྐང་བཞིའི་དོན། ལྷ་རྗེ་དཔོན་དང་བདག་བྲན་གྱི་ཚུལ་དུ་བྱས་ནས་གུས་པ་ཆེན་པོས་བསྙེན་པར་བྱ་བ་ནི་བྱ་བའི་རྒྱུད་ཀྱི་ཉམས་ལེན། བདག་ཀྱང་ཐ་མལ་པ་མ་ཡིན་པར་ཡང་དག་པའི་ལྷར་བལྟ་ཞིང་མདུན་བསྐྱེད་དང་སྤུན་གྲོགས་ཀྱི་ཚུལ་གྱིས་དངོས་གྲུབ་ལེན་པ་སྤྱོད་རྒྱུད་ཀྱི་ལམ་རིམ། བློ་ལྡན་ནི་ཆོས་ཐམས་ཅད་ཀྱི་གནས་ལུགས་སྟོང་པར་རྟོགས་པ་སྟེ། དེའི་ངང་ལས་རབ་ཏུ་དད་པ་ཞེས་ལྷ་དང་བདག་དབྱེར་མེད་པར་རྟོགས་པའི་ཚུལ་གྱིས་བཟླས་བརྗོད་དང་འོད་ཟེར་སྤྲོ་
བསྡུ་སོགས་ཀྱིས་སངས་རྒྱས་ཀྱི་མཛད་པ་ད་ལྟ་ནས་བསྒྲུབས་པ་ཡོ་གའི་རྣལ་འབྱོར། སྲོད་ནི་ཉི་མ་ནུབ་པས་མཚོན་པ་ཐ་མལ་གྱི་རྣམ་རྟོག་དབྱིངས་སུ་ནུབ་སྟེ། སྣོད་བཅུད་དག་པ་རབ་འབྱམས་ཆེན་པོར་བསྒྱུར་བའི་བསྐྱེད་རིམ་དང་། ཐོ་རངས་ནི་ཉི་མ་འཆར་བའི་སྔོན་དུ་འགྲོ་བས་མཚོན་ཏེ། ཡེ་ཤེས་སྐྱེ་བའི་ཉེར་བསྡོགས་རྫོགས་རིམ་སྟེ་ཐ་མལ་གྱི་རྣམ་རྟོག་དང་། གྱ་ནོམ་ལྷར་ཞེན་པའི་རྟོགས་པ་དེ་དང་དེ་ཀ་རིམ་གཉིས་སུ་ལངས་པར་བྱ་བ་ནི་རྣལ་འབྱོར་བླ་མེད་ཀྱི་སྙིང་པོ། དེ་ལྟ་བུའི་རྒྱུད་སྡེ་ཆེན་པོ་བཞི་དང་འབྲེལ་བའི་ལམ་ཉམས་སུ་ལེན་པ་ལ་དྲན་པ་ཉེ་བར་བཞག་པས་གནས་སྐབས་དང་མཐར་ཐུག་གི་འཇིགས་པ་ཐམས་ཅད་འཕྲོག་སྟེ་ཐར་པ་ཐམས་ཅད་མཁྱེན་པའི་གོ་འཕང་ལ་འཇོག་པ་སྟེ། འདི་ལྟ་བུས་ནི་ལམ་འབྲས་དངོས་གཞི་ཞར་ལ་བསྟན་པས་རྒྱུད་ཐམས་ཅད་ཀྱི་བརྗོད་བྱ་ཚང་ལ་མ་ནོར་བ་རྫོགས་པ་ཡིན་ནོ། །འདི་ཡང་མྱུར་མ་དཔའ་མོ་དང་། །དབྱེར་མེད་ཛྙཱ་ན་སཱ་ག་རས། །བྱིན་རླབས་ཉིན་མོའི་བློ་གྲོས་ཀྱིས། །ཨུཏྤལ་ཅུང་ཟད་འཛུམ་ལས་བྱུང་། །སིདྡྷི་རསྟུ་༑ །གཞན་ཡང་བསྟོད་རྒྱུད་ཀྱི་དོན་ཟབ་ཅིང་རྒྱ་ཆེ་བར་རྟོགས་སོ།།