གངས་རིའི་ཁྲོད་ཀྱི་སྤོང་བ་བསམ་གཏན་པ་རྣམས་ཀྱི་སྙན་དུ་བསྲིངས་པ་བསྒོམ་པ་འཆི་མེད་བདུད་རྩི།
གངས་རིའི་ཁྲོད་ཀྱི་སྤོང་བ་བསམ་གཏན་པ་རྣམས་ཀྱི་སྙན་དུ་བསྲིངས་པ་བསྒོམ་པ་འཆི་མེད་བདུད་རྩི་ཞེས་བྱ་བ། སྐུ་བཞིའི་དབང་ཕྱུག་དཔལ་རྡོ་རྗེ་འཆང་ལ་ཕྱག་འཚལ་ལོ། །སྐྱེས་བུ་གསུམ་གྱི་ལམ་གྱིས་རྒྱུད་སྦྱངས་ཀ་དག་ལྷུན་གྲུབ་དབྱེར་མེད་དང་། །བདེ་སྟོང་ཟུང་འཇུག་དབང་བཞིའི་ལམ་བསྒོམ་ཕྱག་རྒྱ་ཆེན་པོར་མཉམ་བཞག་པས། །གཟུང་འཛིན་འཁྲུལ་པ་རང་སར་ཞི་བ་མཆོག་ཏུ་མི་འགྱུར་ཡེ་ཤེས་ཀྱིས། །རྡོ་རྗེ་གསུམ་གྱི་གོ་འཕང་སྦྱིན་མཁས་ཁྱབ་བདག་བླ་མས་དགེ་ལེགས་མཛོད། །རྒྱལ་བའི་གསུང་རབ་ཀུན་གྱི་སྙིང་པོའི་ཕུལ། །རྟོགས་པའི་དམ་ཆོས་ཉམས་སུ་ལེན་འདོད་ན། །སུམ་ལྡན་བླ་མ་སངས་རྒྱས་དངོས་སུ་བསྒོམ། །གྲུབ་ཐོབ་གོང་མའི་སྙན་བརྒྱུད་གདམས་པ་ལ། །དྲན་འདུན་དྲག་པོས་རྩེ་གཅིག་ཉམས་སུ་ལོངས། །ལོག་པའི་གདམས་པ་ཉིན་མཚན་ཁོར་ཡུག་ཏུ། །ཉམས་སུ་བླངས་ཀྱང་ངལ་བ་དོན་མེད་པས། །དེ་ཕྱིར་གྲུབ་ཆེན་གདམས་པ་འདི་ཡིན་ཞེས། །ཕྱོགས་ཀྱི་སྒོམ་ཆེན་རྣམས་ལ་འདི་བསྲིངས་སོ། །རྒྱལ་བས་ལུང་བསྟན་གངས་ཅན་འགྲོ་བའི་མགོན། །གཅིག་ཏུ་བསྟན་པ་འབའ་ཞིག་ཉེར་དགོངས་པའི། །སྔོན་གྱི་ཆོས་རྒྱལ་ཡེ་ཤེས་འོད་ཀྱང་ངོ་། །ལྷ་གཅིག་བཙན་པོ་དེ། །གངས་རིའི་ཁྲོད་འདིར་སྟོན་པ་གཉིས་པ་ཡིན། །ཞུ་ཆེན་ལོ་ཙཱ་བ་གོར་བེ་རོ་དང་། །རྒྱལ་བའི་གདུང་འཚོབ་འབྲོམ་སྟོན་ཨུ་པ་སཱི། །མཁས་གྲུབ་ཆེན་པོ་ཁྱུང་པོ་རྣལ་འབྱོར་པ། །སྐད་གཉིས་སྨྲ་བ་བླ་ཆེན་འབྲོག་མི་དང་། །
རྣལ་འབྱོར་དབང་ཕྱུག་རྗེ་བཙུན་མར་པའི་ཞབས། །གྲུབ་པའི་སར་བཞུགས་དམ་པ་རྒྱ་གར་དང་། །གྱི་གྱོ་ལོ་ཙཱ་མཁས་གྲུབ་ཨོ་རྒྱན་པ། །བྱང་ཕྱོགས་སྒྲུབ་བརྒྱུད་འདེགས་པའི་ཀ་ཆེན་བརྒྱད། །དཔལ་ལྡན་རྡོ་རྗེ་འཆང་ནས་ལེགས་འོངས་པའི། །གངས་རིའི་ཁྲོད་འདིར་སྒྲུབ་བརྒྱུད་སྲོལ་ཆེན་བརྒྱད། །དེ་དག་གྲུབ་ཐོབ་གོང་མའི་གཤེགས་ཤུལ་ཡིན། །ཐར་འདོད་རྣམས་ཀྱང་ལམ་དེའི་རྗེས་སུ་ཞུགས། །སེམས་སྡེ་ཚོགས་དྲུག་ཡུལ་དུ་སྣང་བ་གང་ཤར་ཡང་། །གདོད་ནས་གྲུབ་པའི་གཉུག་མའི་ཡེ་ཤེས་ཏེ། །རང་ཞལ་བལྟ་ཞིང་ཀློང་སྡེ་བསྒོམ་མེད་མ་ཡེངས་པར། །མན་ངག་སྡེ་སྣང་བཞིའི་ཆོས་ཉིད་མངོན་སུམ། ཉམས་སྣང་གོང་འཕེལ། རིག་པ་ཚད་ཕེབས། ཆོས་ཉིད་ཟད། དོན་ལ་མཉམ་པར་འཇོག་པ་ཉིད། །རྫོགས་ཆེན་ཞེས་པའི་དོན་ནི། མ་ཧཱ་སནྟིའི་སྒྲ་ལས་དྲངས་ན་ཡང་དག་པའི་བསམ་གཏན་ཆེན་པོ་ཞེས་པར་འགྱུར་ཏེ། ཐེག་བརྒྱད་བློ་ཡི་གྲུབ་མཐའ་ལས་འདས་པའི་གནས་ལུགས་གཅིག་པུའི་ཀློང་དུ་འཁོར་འདས་ཀྱི་ཆོས་ཐམས་ཅད་རང་ཤར་བའི་ཡེ་ཤེས་བླ་ན་མེད་པའི་དོན་ནོ། །དབྱེ་ན། ཆོས་ཐམས་ཅད་སེམས་ཉིད་གཅིག་པུའི་རོལ་པར་རྒྱུ་རྐྱེན་རྩོལ་སྒྲུབ་ལས་འདས་པར་རྟོགས་པས་སྤང་བྱའི་མཐའ་ལས་གྲོལ་བ་ཕྱི་སེམས་སྡེ། དེ་ལའང་ནང་གསེས་སུ་འབྲས་བུ་སེམས་ཀྱི་བྱུང་སར་འདོད་པ་སོགས་བདུན་ནོ། །ཆོས་ཅན་ཐམས་ཅད་ཆོས་ཉིད་ཀུན་ཏུ་བཟང་མོའི་ཀློང་ལས་འགྲོ་འོང་མེད་པའི་ཕྱིར་སྐུ་གསུམ་རང་ཆས་ཀྱི་དབྱིངས་ལས་མི་འགྱུར་བར་རྟོགས་པས་གཉེན་པོའི་མཐའ་ལས་གྲོལ་བ་ནང་བྱ་བྲལ་ཀློང་གི་སྡེ། དེ་ལའང་
དཀར་ནག་ཁྲ་གསུམ་རབ་འབྱམས་ཀྱི་ཀློང་སྡེ་བཞིའོ། །གཞི་ལམ་འབྲས་གསུམ་གྱི་ཆོས་ཐམས་ཅད་ཀ་དག་དང་ལྷུན་གྲུབ་དབྱེར་མེད་པའི་དོན་རང་གི་མཚན་ཉིད་ཡིན་ལུགས་ལྟར་རྟོགས་པས་སྤང་གཉེན་གཉིས་ཀའི་མཐའ་ཡས་གྲོལ་བ་གསང་བ་ཟབ་པ་མན་ངག་གི་སྡེ། དེ་ལའང་། ཁ་གཏམ། ཁ་འཐོར། རྒྱུད་རང་གཞུང་དུ་བསྟན་པ་དང་གསུམ་མོ། །དེ་སྐད་དུའང་བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། །རིམ་རྩོལ་བྲལ་ལ་མན་ངག་གོ། །ཞེས་སོ། །ཆོས་ཀྱི་ཉམས་ལེན་གཙོ་བོ་ཡིན། །རྟེན་གཞིའི་གཙོ་བོ་རྒྱུད་མ་ཧཱ་ལུང་ཨ་ནུ་མན་ངག་ཨ་ཏི་ཡོ་ག་གསུམ། །ཤྲཱི་སེང་ཧ་དཔལ་གྱི་སེང་གེའི་ཁྱད་པར་གདམས་པ་མཆོག །དང་པོར་བཀའ་བབས་སྔགས་འཆང་བེ་རོ་ཡིས། །ཐུགས་ཉམས་བཞེས་ནས་གངས་རིའི་ཁྲོད་འདིར་སྤེལ། །བ་ཡིན་ཏེ། དེ་ཡང་སེམས་ཕྱོགས་རྣམས་མངའ་བདག་ཁྲི་སྲོང་ལྡེའུ་བཙན། རྒྱལ་མོ་གཡུ་སྒྲ་སྙིང་པོ། གསང་སྟོན་ཡེ་ཤེས་བླ་མ། སྤང་སངས་རྒྱས་མགོན་པོ། ལི་ཟ་ཤེས་རབ་སྒྲོན་མ་ལ་གསུངས་པ་སྟེ་རིམ་པ་ལྔར་གྲགས་ཤིང་། བེ་རོ་དང་གཡུ་སྒྲ་གཉིས་ཀ་ལས། གཉགས་ཛྙཱ་ན་ཀུ་མཱ་རས་གསན་པ་སོགས་ལས་དང་། ཀློང་སྡེ་ནི། བེ་རོས་སྤང་མི་ཕམ་མགོན་པོ་ལ་གསུངས་ནས་དར་བ་སོགས་མཐའ་ཡས། མན་ངག་གི་སྡེ་སྙིང་ཐིག་གི་སྐོར་ནི། ཤྲཱི་སེང་ཧ་ནས། མཁས་པ་ཡེ་ཤེས་མདོ། པཎ་ཆེན་བི་མ་ལ་མི་ཏྲ། དེས་མངའ་བདག་དང་ཉང་བན་སོགས་ལ་གསུངས་པ་དང་། སློབ་དཔོན་ཆེན་པོ་པདྨས་ཤྲཱི་སེང་ཧ་ལ་གསན་ནས། མཁའ་འགྲོ་མཚོ་རྒྱལ་ལ་གདམས་པ་སོགས་ཕྱིས་ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་གྱི་བཀའ་དྲིན་ལས་རྒྱ་ཆེར་དར་རོ། །
རྒྱུས་ཉུང་རྨ་དང་འཁོན་ཟུར་གནུབས་མྱོས་དང་། །སྲིད་རོང་དཔྱལ་དང་སྐྱོ་སྟོན་གཡུང་ལ་སོགས། །སྔ་འགྱུར་རྙིང་མའི་བཀའ་བརྒྱུད་བགྲང་ཡས་བྱོན། །དཔལ་ལྡན་ཟུར་པོ་ཆེ་ཤཱཀྱ་འབྱུང་གནས་ཀྱིས། མྱང་ཡེ་འབྱུང་། ལྕེ་ཤཱཀ་མཆོག །རོག་ཤཱཀ་འབྱུང་སོགས་བླ་མ་མང་དུ་བསྟེན། མདོ་སྒྱུ་སེམས་གསུམ་ལ་མཁས་པའི་ཕུལ་དུ་ཕྱིན། རྩ་རྒྱུད་དང་བཤད་རྒྱུད་འགྲེལ་པ་དང་སྒྲུབ་ཐབས་ལུང་མན་ངག་སོ་སོར་ཕྱེ་སྟེ་བཤད་པ་ལ། སློབ་མ་རྩེ་མོ་བཞི། རྩེ་ལྐོག་བརྒྱད། སྒོམ་ཆེན་བརྒྱ་རྩ་བརྒྱད་སོགས་བྱུང་བའི་གཙོ་བོ་ནི་ཟུར་ཆུང་ཤེས་རབ་གྲགས་པ་དང་། དེའི་རིགས་ཀྱི་སྲས་སྒྲོ་ཕུག་པ་ཤཱཀྱ་སེང་གེ་སྟེ་ཟུར་མེས་དབོན་གསུམ་དུ་གྲགས། འདི་རྣམས་ཀྱི་རིང་ལ་གསང་སྔགས་སྔ་འགྱུར་གྱི་ཕྲིན་ལས་ནམ་མཁའ་དང་མཉམ་པར་སོང་བས་བོད་ཁམས་ཨོཎཱི་ཡཱ་ནའི་ཡུལ་དང་མཚུངས་པར་གླེངས་སོ། །པ་རྫོགས་ཆེན་བསྟན་པའི་རྒྱན། །དལ་འབྱོར་རྙེད་དཀའ་མི་རྟག་འཆི་བ་དང་། །ལས་འབྲས་བསླུ་མེད་འཁོར་བའི་ཉེས་དམིགས་དང་། །བྱང་ཆུབ་སེམས་གཉིས་ནན་གྱིས་སྒོམ་བྱེད་པ། །བཀའ་གདམས་ཞེས་རྒྱལ་བའི་བཀའ་ཐམས་ཅད་གང་ཟག་གཅིག་འཚང་རྒྱ་བའི་གདམས་ངག་ཏུ་ཤར་བའི་ཆོས་ཀྱི་ཉམས་ལེན་གཙོ་བོ་ནི་ཡིན། །གཞུང་གདམས་མན་ངག་གསུམ་དུ་གྲགས་པའི། གཞུང་གདམས་གཉིས་ལ་ལྟ་སྤྱོད་གཙོ་བོར་སྟོན་པའི་གཞུང་སོ་སོར་ཡོད་ལ། གཉིས་ཀ་ཟུང་འབྲེལ་དུ་སྟོན་པ་ནི་བྱང་ཆུབ་ལམ་གྱི་སྒྲོན་མ་དང་། མན་ངག་ནི་ཇོ་བོ་ཡབ་སྲས་ཀྱི་གསང་ཆོས་གླེགས་བམ་རིན་པོ་ཆེའོ། །དེ་ལས་ལམ་སྒྲོན་གྱི་བརྗོད་བྱ་ནི། གཞུང་ལས། ཆུང་དང་འབྲིང་དང་མཆོག་གྱུར་པའི། །སྐྱེས་བུ་གསུམ་དུ་ཤེས་པར་བྱ། །
ཞེས་པ་ལྟར་སྐྱེས་བུ་གསུམ་གྱི་ལམ་རིམ་སྟེ། དེ་ཡང་སྐྱེས་བུའི་སྐད་དོད་པུ་རུ་ཥ་ཞེས་པ་ནུས་ལྡན་ལ་འཇུག་པས། ཚེ་ཕྱི་མ་ཕན་ཆད་ཀྱི་དོན་སྒྲུབ་ནུས་པ་ཞིག་ལ་སྐབས་འདིར་བསྟན་གྱི་སྐྱེས་བུ་ཞེས་བྱ། དེ་ལའང་ཚེ་འདིའི་ཞེན་པ་ལོག་ནས་ཕྱི་མ་རང་ཉིད་ཁོ་ན་འཁོར་བདེའི་ཆེད་དུ་ལས་འབྲས་ཀྱི་བླང་དོར་སྒྲུབ་ནུས་པ་ནི་སྐྱེས་བུ་ཆུང་ངུ་སྟེ། འདི་ཡི་ལམ་གྱི་དངོས་གཞིར་མི་རྟག་པ། ངན་སོང་གི་ཉེས་དམིགས། སྐྱབས་འགྲོ། ལས་འབྲས་བཅས་དམིགས་སྐོར་བཞིའོ། །འཁོར་བ་མཐའ་དག་ལས་ཞེན་པ་ལོག་ནས་དེ་ལས་ཐར་པའི་ཆེད་དུ་ལམ་བསླབ་པ་གསུམ་ལ་ཚུལ་བཞིན་དུ་བསྒྲུབ་ནུས་པ་ནི་སྐྱེས་བུ་འབྲིང་སྟེ། འདི་ལ་ཐེག་པའི་སྒོ་ནས་ཉན་རང་གཉིས། བསྒོམ་བྱའི་སྒོ་ནས་བདེན་བཞི་དང་རྟེན་འབྲེལ་གཉིས། གང་ཟག་གི་བདག་མེད་རགས་ཕྲ་གཉིས་སོགས་སོ། །སྲིད་ཞིའི་མཐར་གཉིས་ཀར་སྐྱོན་དུ་མཐོང་ནས་འགྲོ་ཀུན་སངས་རྒྱས་ཀྱི་ས་ལ་འགོད་པའི་ཁུར་འཁྱེར་ནུས་པ་ནི་སྐྱེས་བུ་ཆེན་པོ་སྟེ། འདི་ལའང་ལྟ་བའི་སྒོ་ནས་དབུ་སེམས་དང་། ཐེག་པའི་སྒོ་ནས་མདོ་སྔགས་གཉིས་སུ་དབྱེ་ལ། ལམ་གྱི་ཁྱད་པར་སེམས་བསྐྱེད་པ་སྔོན་དུ་འགྲོ་བས་རྒྱལ་སྲས་ཀྱི་སྤྱོད་པ་སྤྱི་དང་བྱེ་བྲག་ལ་བསླབ་ཚུལ་འབྲས་བུ་དང་བཅས་པའོ། །བཤེས་གཉེན་བསྟེན་ཚུལ་དང་། དལ་འབྱོར་གྱི་ཆོས་སྐོར་ནི་གསུམ་ཀའི་ལམ་གྱི་གཞི་རྟེན་དུ་བཞེད་དོ། །གསང་ཆོས་གླེགས་བམ་རིན་པོ་ཆེའི་བརྗོད་བྱ་ནི། གཞུང་ལས། སྐྱབས་གནས་བླ་མ་དྲན་པར་མཛོད། ལུས་ནི་ལྷ་ཡི་རང་བཞིན་ཏེ། །ངག་ནི་བཟླས་བརྗོད་རྒྱུན་པར་མཛོད། །འགྲོ་བ་མ་ལུས་ཕ་མར་སོམས། །སེམས་ཀྱི་གནས་ལུགས་སྟོང་པར་དཔྱོད། །ལྔ་པོ་འདི་ཡི་སྐྱེ་བར་ནས། །དགེ་རྩ་ཐམས་ཅད་དག་པར་མཛོད། ཅེས་རྗེས་དྲན་ལྔའོ། །རྟེན་
གཞིའི་གཙོ་བོ་མངོན་རྟོགས་རྒྱན་སོགས་རྒྱ་ཆེན་སྤྱོད་པའི་གཞུང་། །ལྷ་གཅིག་ཇོ་བོའི་ཁྱད་པར་གདམས་པ་མཆོག །དང་པོར་བཀའ་བབས་རྒྱལ་སྲས་འབྲོམ་སྟོན་རྒྱལ་བའི་འབྱུང་གནས་ཀྱིས། །ཐུགས་ཉམས་བཞེས་ནས་གངས་རིའི་་འདིར་སྤེལ། བ་ཡིན་ཏེ། དེ་ཡང་ཇོ་བོ་རྗེ་དཔལ་ལྡན་ཨ་ཏི་ཤའི་དུས་སུ་བསྟན་པའི་དབུ་བརྙེས། སྟོན་པ་རིན་པོ་ཆེའི་སྲོལ་འབྱེད། སྐུ་མཆེད་གསུམ་གྱིས་དར་ཞིང་རྒྱས། གླང་ཤར་བྱ་ཡུལ་བ་སོགས་ཀྱི་དུས་ཤིན་ཏུ་དར་བ་ལས། པུ་ཏོ་བ་ནས་བརྒྱུད་པ་ལ་གཞུང་པ། སྤྱན་སྔ་བ་ནས་བརྒྱུད་པ་ལ་གདམས་ངག་པ། ཕུ་ཆུང་བ་ནས་བརྒྱུད་པ་ལ་མན་ངག་པ། གུང་ཐང་ནག་ཚོ་ལོ་ཙཱ་བས་ཚུལ་ཁྲིམས་རྒྱལ་བའི་སློབ་མ་རོང་པ་ཕྱག་སོར་བ་ནས་བརྒྱུད་པ་ལ་ནག་ཚོའི་བཀའ་བརྒྱུད་དུ་གྲགས་པའི་ཚུལ་ལ། བཀའ་གདམས་གཞུང་དྲུག་སྐྱེས་༡ཚོམས་དད་པའི། བསླབ་༣སྤྱོད་སྤྱོད་པའི། ས་༥རྒྱན་པཏིང་ངེ་འཛིན་གྱི་གཞུང་། ཉན་བཤད་གཞུང་པ་དང་། །ཉམས་ལེན་བདེན་བཞིའི་སྡུག་བསྔལ་ཀུན་འབྱུང་འགོག་པ་ལམ་ཁྲིད་བསྡུས་གདམས་ངག་པ། །གུང་ཐང་ནག་ཚོའི་བཀའ་བརྒྱུད་གདམས་པ་འོག །བཤད་སྒྲུབ་ཆུ་བོ་གཉིས་ལྡན་གཞུང་པ་མཆོག །སྡོང་པོ་ལྟ་བུ་ཐབས་ལམ་བདེ་དྲོད་རབ་འབར། སྒྱུ་ལུས་ཆགས་སྡང་རང་གྲོལ། རྨི་ལམ་ཉིད་འཁྲུལ་རང་དག །འོད་གསལ་གཏི་མུག་རང་སངས། འཕོ་བ་མ་བསྒོམ་སངས་རྒྱས། བར་དོ་རྒྱལ་བ་ལོངས་སྐུ་སྟེ་ཆོས་དྲུག་ཡལ་ག་ཕྱག་རྒྱ་ཆེན་པོ་གའུ་མ། །ལོ་མ་སྣང་བ་ལ་བརྟེན་ནས་བླ་མ། ཡི་དམ། སྒྱུ་མ་ལམ་དུ་ཁྱེར་བ་སྟེ་འཕྱུགས་མེད། ལམ་ཁྱེར་རྣམ་གསུམ་མེ་ཏོག་མཁའ་སྤྱོད་དཀར་དམར་
།གཉིས། །འབྲས་བུ་ལུས་སེམས་འཆི་མེད་སྒོམ་རིམ་དེ། །གསེར་ཆོས་ལྔའམ། ཁྲིད་ཆེན་ལྔར་གྲགས་པའི་ནི་གུའི་ཆོས་སྐོར་རྣམས་ནི། །བཀའ་བརྒྱུད་ཤངས་པའི་ཉམས་ལེན་གཙོ་བོ་ཡིན་ལ། །གཞན་ཡང་སུ་ཁའི་ཆོས་སྐོར་རྡོ་རྗེ་གདན་པའི་ཆོས་སྐོར། མེ་ཏྲི་པའི་ཆོས་སྐོར། རཱ་ཧུ་ལའི་ཆོས་སྐོར། དེར་མ་འདུས་པའི་མན་ངག་འཐོར་བུ་དང་བཅས་ཤངས་ཆོས་ཀྱི་སྐོར་བསམ་གྱིས་མི་ཁྱབ་པ་ཞིག་ཡོད་དོ། །དེ་ཡང་བདེ་བས་ཐབས་བྱས་པའི་སྟོང་ཉིད་ཕྱག་རྒྱ་ཆེན་པོའི་ཡེ་ཤེས་མངོན་དུ་གྱུར་པ་ནི་བསྒྲུབ་བྱའི་སྙིང་པོ་སྟེ། རྩ་བ་རྡོ་རྗེའི་ཚིག་རྐང་ལས། ལམ་གྱི་མཆོག་གྱུར་འདི་ཉིད་ཉམས་ལེན་རྣམས། །གཞན་གྱི་དུས་མིན་འདིའམ་བར་མ་དོར། །བདེ་སྟོང་དབྱེར་མེད་སྐུ་གསུམ་རང་ཤར་ནས། །རྣམ་པར་དག་པའི་མཁའ་སྤྱོད་ཉིད་དུ་འགྲོ། །ཞེས་སོ། །རྟེན་གཞིའི་གཙོ་བོ་འཁོར་ལོ་སྡོམ་པའི་རྒྱུད། །དང་གཞན་ཡང་། དགྱེས་རྡོར། གསང་འདུས། མ་ཧཱ་མ་ཡ། རྡོ་རྗེ་འཇིགས་བྱེད་རྣམས་ཀྱང་ངོ་། །ནཱ་རོ་པའི་ལྕམ་ཡེ་ཤེས་མཁའ་འགྲོ་ནི་གུ་མའི་ཁྱད་པར་གདམས་པ་མཆོག །དང་པོར་བཀའ་བབས་སྐུ་གསང་བ་འདུས་པ། གསུང་མ་ཧཱ་མཱ་ཡ། ཐུགས་དགྱེས་མཛད་རྡོ་རྗེ། ཡོན་ཏན་འཁོར་ལོ་སྡོམ་པ། ཕྲིན་ལས་རྡོ་རྗེ་འཇིགས་མཛད་དེ་ཡེ་ཤེས་དཀྱིལ་འཁོར་ལྔའི་ངོ་བོ་དང་གཉིས་སུ་མེད་པར་བཞུགས་པའི་མཁས་གྲུབ་ཁྱུང་པོ་རྣལ་འབྱོར་བརྩོན་འགྲུས་མགོན་ཡིས། །ཐུགས་ཉམས་བཞེས་ནས་གངས་རིའི་ཁྲོད་འདིར་སྤེལ། །རྡོ་རྗེ་འཆང་། ནི་གུ་མ། ཁྱུང་པོ། སྨོ་གཅོག་པ། སྐྱེར་སྒང་པ། སངས་རྒྱས་གཉན་སྟོན། སངས་རྒྱས་སྟོན་པ་སྟེ། བརྒྱུད་རིམ་བདུན་དུ་ཆིག་བརྒྱུད་བཀའ་རྒྱས་བཏབ། །
སངས་རྒྱས་སྟོན་པས་སྐལ་ལྡན་ཡོངས་ལ་སྤེལ། །དབུས་ཤངས་འཇག་པ་ཚུལ་ཁྲིམས་མགོན་དང་ཉང་བསམ་སྡིང་པ་མཁས་བཙུན་གཞོན་ནུ་གྲུབ་སོགས་བཀའ་བརྒྱུད་རྣམ་མང་གྱེས། །ཉམས་ལེན་རྒྱུན་གྱི་འཛུག་ལེགས་ཁྱད་པར་འཕགས། །གསུང་ངག་རིན་པོ་ཆེ་ལ་ཚད་མ་བཞི་དང་སྙན་བརྒྱུད་བཞིའི་སྒོ་ནས་སློབ་མ་དཀྲི་བའི་ཚུལ་རྣམ་པ་བཞི་ལས། གཞུང་ཤིང་རྒྱས་པ་གཞུང་ཇི་ལྟར་བ་བཞིན་དཀྲི་པའི་དབང་དུ་བྱས་ན། རྗེ་ས་སྐྱ་པ་ཆེན་པོས། སྣང་བ་གསུམ་གྱིས་ལམ་གྱི་གཞི་བཅས་ཏེ། །ཉམས་བླངས་མ་ལུས་རྒྱུད་གསུམ་དག་གིས་ཤེས། །ཞེས་གསུངས་པ་ལྟར། ལམ་གྱི་གཞི་བཅའ་ཕར་ཕྱིན་དང་ཐུན་མོང་བ་སྣང་བ་གསུམ་གྱིས་རྒྱུད་སྦྱངས་པ་སྔོན་དུ་འགྲོ་བས། སྔགས་ལམ་ཐུན་མོང་མ་ཡིན་པའི་ཐོག་མར་རྒྱུ་དུས་ཀྱི་དབང་བསྐུར་ནས། །གཞི་དམ་ཚིག་ལ་གནས་པར་བྱ་བ་དང་། ལམ་དངོས་ལ་རྒྱུད་གསུམ་ལས། ཀུན་གཞི་རྒྱུ་རྒྱུད་ལ་འཁོར་འདས་དབྱེར་མེད་ཀྱི་ལྟ་བ་གསལ་སྟོང་ཟུང་འཇུག་ཏུ་ངོ་སྤྲད་ཅིང་བསྒོམ་པ། ལུས་ཐབས་རྒྱུད་ལ་དབང་བཞི་དང་རྗེས་སུ་འབྲེལ་བའི་ལམ་བཞི་ལས། བུམ་དབང་གི་ལམ་ཕྱི་ནང་བསྐྱེད་རིམ་དང་། །ལམ་དུས་ཀྱི་དབང་བསྐུར་ནས་དེའི་དོན་ཟབ་མོ་ཉིན་ཞག་རེ་ལ་ཐུན་བཞིར་བསྒོམ་པ་དང་། །གསང་དབང་གི་ལམ་རླུང་དང་གཏུམ་མོ། ཤེར་དབང་གི་ལམ་ཕོ་ཉའི་ལམ། དབང་བཞི་པའི་ལམ་རྡོ་རྗེའི་རྦ་རླབས་ཏེ་རྫོགས་རིམ་གྱི་ལམ་གསུམ་བསྒོམས་པས་དཔེ་དང་དོན་གྱི་ཡེ་ཤེས་འདྲེན་པར་བྱེད་པ་དང་། །འབྲས་བུ་སྐུ་ལྔ་མངོན་དུ་འགྱུར་བའི་ཚུལ་སོགས་མདོར་ན་ལམ་གྱི་དུས་ནས་འབྲས་བུ་ཐོབ་རུང་དུ་གནས་པས་གཞི་ལམ་འབྲས་གསུམ་དབྱེར་མེད་པའི་དོན་སྟོན་པ། ལམ་འབྲས་ཆོས་ཀྱི་ཉམས་ལེན་གཙོ་
བོ་ཡིན། །རྟེན་གཞིའི་གཙོ་བོ་དགྱེས་པ་རྡོ་རྗེའི་རྩ་བཤད་ཀྱི་རྒྱུད་གསུམ་ལ་བརྟེན་ནས་ས་དྲུག་གི་བདག་ཉིད་གྲུབ་ཆེན་བིརླ་པས་ཤར་ཕྱོགས་ནག་པོ་པའི་དོན་དུ་ལམ་འབྲས་རྡོ་རྗེའི་ཚིག་རྐང་མཛད། འདི་ལ་འབྲོག་མི། གྱི་གྱོ། འབྲོམ་གསུམ་གྱིས་། རྒྱ་དཔེ་དང་བསྟུན་ནས་བསྒྱུར། ཆ་གན་དང་ཇོ་ནང་ཀུན་སྤངས་པས་རྒྱ་དཔེ་ལ་མ་གཏུགས་པར་གོ་རིམ་དཀྲུགས་པའི་འགྱུར་བཅོས་མཛད་པ་དང་། གཟུངས་ཀྱི་དཔལ་བའི་ཡིག་ཆར་པཎྜིཏ་རཱ་ཧུ་ལའི་འགྱུར་ཡང་ཡོད་པར་གསུངས་པས། དེ་ལྟར་ན་འགྱུར་མགོ་དྲུག་གོ། །སྤྲིན་འཛིན་ག་ཡདྷ་རའི་ཁྱད་པར་གདམས་པ་མཆོག །དང་པོ་བཀའ་བབས་བླ་ཆེན་འབྲོག་མི་ཡིས། །ཐུགས་ཉམས་བཞེས་ནས་གངས་རིའི་ཁྲོད་འདིར་སྤེལ། །གྱི་གྱོ་འབྲོམ་དང་ཞང་སྟོན་ཞྭ་མ་ལུགས། །ཀོ་བྲག་མར་ལམ་ཆ་གན་ཇོ་ནང་ལུགས། །དབང་རྒྱལ་ས་ལུགས་ལྕེ་སྒོམ་མཐའ་རྩ་༢ལུགས། །སྟེ་གཙོ་ཆེ་བའི་ལུགས་སྲོལ་བཅུ་གཉིས་དང་། དེ་ལས་འཕྲོས་པའི་རྣམ་གྲངས་མི་གཅིག་པ་བཅོ་བརྒྱད་དུ་གྲགས་ཏེ། དེ་ཡང་འབྲོག་མི་དང་གྱི་༡གྱོ་ལས་བརྒྱུད་པ་གཉིས་ཀྱི། སྔ་མ་ལ་འབྲོག་མིའི་སྲས་ཨིནྡྲ་དང་རྡོ་རྗེ་ལས་བརྒྱུད་པའི་ལམ་འབྲས། ཐུགས་ཀྱི་སྲས་འབྲོམ་སྟོན་དེ་བེ་༣ལས་བརྒྱུད་པའི་ལམ་འབྲས། སེ་མ་ཁར་ཆུང་བ་ནས་འཕེལ་བ་ལ་རབ་འབྲིང་ཐ་གསུམ་ལས། འབྲིང་དུ་ཐོབ་པ་ཞྭ་མ་ནས་འཕེལ་བ་ལ། ཕོ་རྒྱུད་མོ་རྒྱུད་བསྲེས་རྒྱུད་དང་གསུམ། ཕོ་རྒྱུད་ལའང་། རྗེ་ཁམ་བུ་བ་ནས་འཕེལ་བའི་སློབ་བརྒྱུད་༤དང་། སྲས་ཞྭ་མ་ཙནྡྲ་ནས་འཕེལ་བའི་སྲས་བརྒྱུད་(དེ་གཉིས། མོ་རྒྱུད་ལ་ཡང་། ཞྭ་མའི་སློབ་མ་ཉང་༦བསྒོམ། སྟོན་གཡུང་༧པ། དཔོན་མོ་ཤེས་རརབ། ཚུལ་ཁྲིམས་ལས་འཕེལ་པའི་
ལུགས་ཏེ་གསུམ། བསྲེས་རྒྱུད་ལས། ཞྭ་མ་ཕོ་མོ་བསྲེས་པ་དུམ་བུ་ཀོ་བྲག་༩པའི་ལུགས། ཞྭ་མ་ཕོ་མོ་གཉིས་ས་ལུགས་དང་གསུམ་བསྲེས་པས་ཆ་གན་༡༠གྱི་ལུགས། འབྲོག་མི་ལུགས་དང་གྱི་གྱོ་ལུགས་བསྲེས་པ་ཇོ་ནང་ཀུན་སྤངས་༡༡པའི་ལུགས། ལམ་འབྲས་སྦྱོར་དྲུག་རྫོགས་ཆེན་གསུམ་བསྲེས་པ་ལ་སྟོད་དབང་རྒྱལ་༡༢གྱི་ལུགས། རབ་ཏུ་ཐོབ་པ་ཞང་གི་བརྒྱུད་པར། ས་ལུགས་ལ་སྔ་བུ་ཕག་གྲུ་༡༣ལུགས། ལྕེ་སྒོམ་ལུགས་༡༤གཉིས། ཕྱི་བུ་ལ་ཉེ་བརྒྱུད་༡༥དང་། རིང་རྒྱུད་༡༦གཉིས། འབྲོག་མིའི་ཇོ་སྲས་གཉིས་དང་ཞང་སྟོན་མཆེད་གཉིས་སྡེ་བཞིའི་གསུང་གཅེས་པ་བསྡུས་པ་མང་ལམ་ཞིག་པོའི་༡༧ལུགས། སེ་སྟོན་ལས་ཐ་མར་ཐོབ་པ་བྱང་ཆུབ་ཡེ་ཤེས་ཀྱིས་ཞིང་༡༨ཕུག་པར་གདམས་པའི་ལུགས་ཏེ་བཅོ་བརྒྱད་པོ་ཐམས་ཅད་འབྲོག་མི་དང་། གྱི་གྱོའི་བརྒྱུད་འཛིན་ཁོ་ན་ལས་བྱུང་བ་ཡིན་ལ། དེ་རྣམས་ཀྱི་ནང་ནས་ཕྱིས་སུ་ས་ལུགས་དང་། ཞྭ་ལུགས་གཉིས་དར་རྒྱས་ཆེ་བ་ལས་ཀྱང་ཆོས་ལུགས་རྒྱ་མཚོའི་མཐར་སོན་ས་སྐྱ་པ། །གང་དེ་སྒྲུབ་བརྒྱུད་བསྟན་པའི་གཙུག་གི་རྒྱན། །ཕྱག་རྒྱ་ཆེན་པོ་ཞེས་པའི་ངོ་བོ་ནི། འཁོར་འདས་ཐམས་ཅད་ལ་ཁྱབ་པ་ཟབ་གསལ་གཉིས་སུ་མེད་པའི་ཡེ་ཤེས་ཁྱད་པར་བདུན་ལྡན་ནོ། །ངེས་ཚིག་ནི། མ་ཧཱ་མུ་དྲའི་སྒྲ་ལས་དྲངས་ན། འཁོར་འདས་ལམ་གསུམ་གྱི་ཆོས་ཐམས་ཅད་འདི་ལས་མི་འདའ་བས་ཕྱག་རྒྱ་དང་། དེ་ལས་གོང་དུ་ཆོས་གཞན་མེད་པས་ན་ཆེན་པོ་ཞེས་བྱ་སྟེ་གཞི་མཐུན་པའི་བསྡུ་བའོ། །དབྱེ་ན། གཞི་ལམ་འབྲས་གསུམ་ལས། དང་པོ་ནི། གནས་ལུགས་ཀྱི་དོན་དེ་ཉིད་རྟོགས་མ་རྟོགས་ལས་གྲོལ་འཁྲུལ་གཉིས་སུ་བྱུང་བས་ན། འཁོར་འདས་ཀྱི་ཆོས་ཀུན་དེ་ལས་མི་འདའ་བས་ཕྱག་རྒྱ། དེ་ཉིད་ལས་གཞན་པའི་ཆོས་ཀྱི་སྐུ་ཞེས་བཙལ་དུ་མེད་པས་
ཆེན་པོ། གཉིས་པ་ནི། བླ་མའི་མན་ངག་གིས་ངོ་སྤྲད་ནས་ཉམས་སུ་བླངས་པའི་ཚེ་ནའང་། ཤེས་དང་ཤེས་བྱ་ཐམས་ཅད་དེའི་གདངས་ལས་མི་འདའ་བས་ཕྱག་རྒྱ། དེ་ལས་གཞན་པའི་སངས་རྒྱས་ཀྱི་ཡེ་ཤེས་བཙལ་དུ་མེད་པས་ཆེན་པོ། གསུམ་པ་ནི། ལམ་གྱིས་གློ་བུར་བའི་དྲི་མ་སྦྱངས་པས་གཞིའི་བཞུགས་ཚུལ་མངོན་དུ་གྱུར་པའི་སྐབས། སྐུ་དང་ཡེ་ཤེས་ཀྱི་རྣམ་རོལ་ཐམས་ཅད་དེ་ལས་མི་འདའ་བས་ཕྱག་རྒྱ། མཐར་ཐུག་པའི་གོ་འཕང་ཡིན་པས་ཆེན་པོའོ། །མདོར་ན་སྣང་སེམས་དབྱེར་མེད་ལྷན་ཅིག་སྐྱེས་པ་ཡིད་ལ་མི་བྱེད་པ་ཕྱག་རྒྱ་ཆེན་པོའི་འབྲས་བུ་ལ་སྦྱོར་བའི་མདོ་སྔགས་ཀྱི་གསེང་ལམ་ཁྱད་པར་ཅན་ཏེ། རྗེ་བཙུན་སྒམ་པོ་བས། སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །སྣང་བ་ལྷན་ཅིག་སྐྱེས་པ་ཆོས་སྐུའི་འོད། །དེ་ཕྱིར་སྣང་སེམས་དབྱེར་མེད་ལྷན་ཅིག་སྐྱེས། །ཞེས་དང་། སེམས་དང་རྣམ་རྟོག་ཆོས་སྐུ་གསུམ། །དང་པོ་ལྷན་ཅིག་སྐྱེས་པ་སྟེ། །གདམས་པས་གཅིག་ཏུ་སྦྱོར་བའི་ཕྱིར། །ལྷན་ཅིག་སྐྱེས་སྦྱོར་མི་ཟེར་རམ། །ཞེས་སོ། །དེ་ལྟ་བུའི་དོན་ཉམས་སུ་བླངས་པའི་དུས་སུ་དྭངས་མའི་ཤེས་པ་སྟེ་ཐ་མལ་གྱི་ཤེས་པ་མ་བཅོས་པ་ཉིད། །ཏེ་ལོ་པས། ཀྱེ་ཧོ་འདི་ནི་རང་རིག་ཡེ་ཤེས་ཏེ། །ངག་ཚིག་ལས་འདས་ཡིད་ཀྱི་སྤྱོད་ཡུལ་མིན། །ཏེ་ལོ་ང་ཡིས་ཅི་ཡང་བསྟེན་དུ་མེད། །རང་གིས་རང་ལ་མཚོན་ཏེ་ཤེས་པར་བྱོས། །ཞེས་གསུངས་པ་ལྟར་གཞི་ལྟ་བའི་གནས་ལུགས། རང་ངོ་ཤེས་ནས་མི་༡མནོ་མི་བསམ་༢མི་དཔྱད་༣ཅིང་། །མི་༤བསྒོམ་མི་སེམས་༥རང་བབས་བཞག །ཅེས་པའི་ཚུལ་གྱིས་མ་ཡེངས་དྲན་འདུན་དང་། །བཅས་ལམ་བསྒོམས་པས་ཉམས་སུ་བླང་བ་ནི་ལམ་གྱི་དངོས་གཞི་དང་། དེའི་ཡན་ལག་རྡོ་རྗེའི་ལུས་ལ་གནད་དུ་བསྣུན་པའི་ཐབས་ལམ་ཟབ་མོ་བསྒོམས་
པས་ལྟ་སྤྱོད་ཟུང་དུ་སྦྲེལ་བ་སྟེ། །དེ་ཡང་རྒྱུད་དང་འབྲེལ་བའི་ཐབས་ལམ་ལ་བཀའ་ཡང་དག་པའི་ཚད་མར། གཏུམ་མོ་ལས་ཀྱི་ཕྱག་རྒྱ་དང་། །སྒྱུ་མ་རྨི་ལམ་འོད་གསལ་དང་། །བར་དོ་འཕོ་བ་གྲོང་འཇུག་གོ །ཞེས་གཏུམ་མོ་ལམ་གྱི་རྩ་བ། ལས་རྒྱ་ལམ་གྱི་བོགས་ཀྵ འདོན། སྒྱུ་ལུས་ལམ་གྱི་སྲོག་ཤིང་། རྨི་ལམ་ལམ་གྱི་དྲོད་ཚད། འོད་གསལ་ལམ་གྱི་སྙིང་པོ། བར་དོ་ལམ་གྱི་བློ་ཆེད། འཕོ་བ་ལམ་གྱི་སུན་མ། གྲོང་འཇུག་ལམ་གྱི་ཆད་མཐུད་དེ་ཆོས་བརྒྱད་དང་། བྱིན་རླབས་དང་འབྲེལ་པ་སྙན་བརྒྱུད་ལ། ལས་རྒྱ་དང་། གྲོང་འཇུག་མ་གཏོགས་ཆོས་དྲུག་དང་། གཞན་ཡང་འཕོ་བ་བར་དོའི་ཁོངས་སུ་བསྡུས་པའི་ཆོས་ལྔ་དང་། འཁོར་ལོ་བཞི་སོགས་ཀྱི་དབང་དུ་བྱས་པའི་གཏུམ་མོ། སྒྱུ་ལུས། འོད་གསལ། རྨི་ལམ་སྟེ་བཞི་དང་། རྩ་བ་དང་ཡན་ལག་གི་ཆོས་གཉིས་སུ་བསྡུ་བ་སོགས་བཀའ་བརྒྱུད་དྭགས་པོའི་ཉམས་ལེན་གཙོ་བོ་ཡིན། །རྟེན་གཞིའི་གཙོ་བོ་བྱིན་རླབས་ཅན་མ་རྒྱུད་བདེ་མཆོག་སྟེ། །བཀའ་བབས་ཆུ་བོ་བཞི་འདུས་གྲུབ་ཆེན་ཏེ་ལོ་ཤེས་རབ་བཟང་པོའི་སློབ་མ། བྱང་སྒོ་སྲུང་བའི་པཎྜི་ཏ་ནཱ་རོ་ཏཱ་པའི་སྟེ་མི་མཆོག་ཞབས་སམ། རྩོད་མེད་ཞབས་ཞེས་གྲགས་པ་ཁྱད་པར་གདམས་པ་མཆོག །དང་པོར་བཀའ་བབས་དགྱེས་མཛད་རྡོ་རྗེ་མི་ཡི་དངོས་སྣང་རྗེ་བཙུན་མར་པ་ལོ་ཙཱ་བ་ཆོས་ཀྱི་བློ་གྲོས་ཡིས། །ཐུགས་ཉམས་བཞེས་ནས་གངས་རིའི་ཁྲོད་འདིར་སྤེལ་བ་ལས། །སློབ་མའི་གཙོ་བོ་མཚུར་རྔོག་མེས་གསུམ་གྱི་བཤད་པ་དང་། མི་ལས་སྒྲུབ་པའི་སྲོལ་བཟུང་། དེའི་སློབ་མ་ཉི་ཟླ་ལྟ་བུ་དྭགས་པོ་རིན་པོ་ཆེ་དང་། རས་ཆུང་པ་གཉིས། སྔ་མའི་སློབ་མ་ཕག་གྲུའི་ཐུགས་སྲས་རྒྱལ་ཚ་རིན་པོ་ཆེ་དང་། ཀུན་ལྡན་རས་ཆུང་མཆེད་
གཉིས་ལས་འཕེལ་བའི་ཁྲོ་ཕུ་པ་དང་གླིང་རས་སློབ་མ་གཙང་པ་རྒྱ་རས་ཡེ་ཤེས་རྡོ་རྗེ་ལས་དཔལ་ལྡན་འབྲུག་པ་དང་། །དྭགས་པོའི་སློབ་མས་སྒོམ་ཚུལ་གྱི་ཐུགས་སྲས་ཞང་འགྲོ་བའི་མགོན་པོ་ལས་ཚལ་པ་བཀའ་བརྒྱུད་དྭགས་པོའི་སློབ་མ་སྤྱན་རས་གཟིགས་ཀྱི་སྤྲུལ་སྐུ་ཀརྨ་པ། །དུས་གསུམ་མཁྱེན་པ་ལས་ཀཾ་ཚང་བཀའ་བརྒྱུད། ཕག་གྲུའི་སློབ་མ་འབྲི་གུང་པ་རིན་ཆེན་དཔལ་ལས་འབྲི་གུང་བཀའ་བརྒྱུད། སྟག་ལུང་ཐང་པ་བཀྲ་ཤིས་དཔལ་ལས་སྟག་ལུང་བཀའ་བརྒྱུད་དེ་འབྲི་སྟག་རྣམ་གཉིས་སྐལ་ལྡན་ཟུར་བ་ཡེ་ཤེས་སེང་གེའི་སློབ་མ་རྒྱལ་བ་གཡའ་བཟང་བ་ལས་གཡའ་བཟང་བཀའ་བརྒྱུད། བཀའ་བརྒྱུད་དེ་རྣམས་ཕལ་ཆེར་གྱི་འབྱུང་གནས། འགྲོ་མགོན་ཕག་མོ་གྲུ་པ་རྡོ་རྗེ་རྒྱལ་པོའི་གདན་ས་པ་སྤྱན་སྔ་རིན་པོ་ཆེ་ལས་ཕག་གྲུ་བཀའ་བརྒྱུད་དེ། །མདོར་ན་ཕྱག་རྒྱ་ཆེན་པོ་ལ་བཤད་པ་དང་། ཉམས་ལེན་གྱི་སྲོལ་གཉིས་ལས། དང་པོ་ནི། ཇོ་བོ། མར་པ། དངུལ་ཆུ་བེརོ། ཀོང་ནི་རུ་པ། རྒྱ་གར་ཕྱག་ན། བལ་པོ་ཨ་སུ། རས་ཆུང་བ། མངའ་རིས་ནག་པོ་སྟེ་བརྒྱད་ཙམ་བྱུང་བ་ལས། སྔོན་དར་རྒྱས་ཆེ་ནའང་། །དེང་སང་ཆེར་མི་སྣང་ལ། ཕྱི་མ་ཉམས་ལེན་སྒྲུབ་བརྒྱུད་ཀྱི་སྲོལ་རྨད་དུ་བྱུང་བ་ནི་ས་གསུམ་མཉམ་མེད་དྭགས་པོའི་བཀའ་བརྒྱུད་དེ། དེའི་བཤད་སྒྲུབ་ཉམས་ལེན་གྱིས། །གངས་ཅན་རི་སུལ་ཕལ་ཆེར་མཛེས་པར་བྱས་པ་ལས་ཀྱང་། །དཔལ་ལྡན་འབྲུག་པ་བཀའ་བརྒྱུད་ནི། རྗེ་རྒོད་ཚང་པ་ལས་སྟོད་འབྲུག་གནམ་གྱི་སྐར་མ་ལྟ་བུ་དང་། རྒྱལ་བ་ལོ་རས་པ་ལས་སྨད་འབྲུག་སའི་དྲེགས་པ་ལྟ་བུ་བྱུང་བས་མཚོན། མི་ཕྱེད་འབྲུག་པ། འབྲུག་ཕྱེད་སྤྲང་པོ། སྤྲང་ཕྱེད་གྲུབ་ཐོབ་ཅེས་ཀུན་ལ་རླུང་ལྟར་དུ་གྲགས་པས་བརྒྱུད་འཛིན་ཆུ་བོའི་
གཏེར་ལྟ་བུ་སྟེ། །དེ་རྣམས་ཀྱི་ཉམས་བཞེས་ནི། ལྟ་བ་གཙོ་བོར་བཏོན་པ་གདམས་ངག་ཕྱག་རྒྱ་ཆེན་པོ། སྒོམ་པ་གཙོ་བོར་བཏོན་པ་གདམས་ངག་ནཱ་རོ་ཆོས་དྲུག །སྤྱོད་པ་གཙོ་བོར་བཏོན་པ་གདམས་ངག་འབྱུང་བ་རོ་སྙོམས། འབྲས་བུ་གཙོ་བོར་བཏོན་པ་གདམས་ངག་རྟེན་འབྲེལ། ཀུན་ལ་གཅེས་པའི་གདམས་ངག་ལམ་ཟབ་བླ་སྒྲུབ་ལྔ་ནི་གཞུང་ཆོས་ལྟ་བུ་དང་། གཞན་གདམས་ངག་བསམ་གྱིས་མི་ཁྱབ་པ་ནི་ཟུར་འདེབས་ལྟ་བུར་མཛད་དོ། །སྤྱིར་བཀའ་བརྒྱུད་ཅེས་པའི་སྒྲ་དོན་ནི། རྗེ་དྭགས་པོ་རིན་པོ་ཆེ་བསོད་ནམས་རིན་ཆེན་གྱིས་དང་པོར་བཀའ་གདམས་པའི་ཆོས་ཀྱི་བདུད་རྩི་གསོལ་ནས། ཕྱིས་ཕྱག་རྒྱ་ཆེན་པོའི་བརྒྱུད་པ་རིན་པོ་ཆེ་ལ་ཞུགས་ནས་རྟོགས་པ་བརྙེས་པས་བཀའ་ཕྱག་ཆུ་བོ་གཉིས་འདྲེས་ཀྱི་གཞུང་བཟུང་བའི་ཕྱིར་དེ་སྐད་ཅེས་བརྗོད་དོ། །གཟུང་བའི་ཆོས་ཀུན་རང་རང་ངོ་བོས་སྟོང་། །འཛིན་པའི་སེམས་ཀྱང་སྤྲོས་བྲལ་སྟོང་པ་ཉིད། །སྤྲོས་མེད་ངང་ནས་གསལ་སྟོང་མི་གཡོ་བ། །ཞི་བྱེད་ཆོས་ཀྱི་ཉམས་ལེན་གཙོ་བོ་ཡིན་ཏེ། །དེ་ཡང་སྤྱིར་ལམ་འདི་ལ་དབང་པོའི་རིམ་པས་འཁྲིད་ཚུལ་བསམ་གྱིས་མི་ཁྱབ་ཀྱང་རེ་ཞིག་འི བདུན་རྫོགས་བདུན་གྱི་མན་ངག་ལྟར་ན། ཟབ་མོ་བརྡ་ཡི་དབང་བཞིས་སྨིན་པར་བྱ་བ་སྔོན་དུ་སོང་ནས། དབང་བོ་རབ་གཟུང་འཛིན་ལས་འདས་པའི་གཉུག་མའི་སེམས་མ་བཅོས་པའི་གནས་ལུགས་མངོན་སུམ་དུ་མཐོང་བས་གཅིག་ཅར་དུ་འཚང་རྒྱ་བར་བྱེད་པ་དཀར་༡ཁྲིད་རིག་པ་གཅེར་མཐོང་གི་གནད། འབྲིང་སྒོ་གསུམ་ཆ་མཉམ་གྱི་ཐིག་ལེ་སྦྱང་བ་བླ་མ་སྐུ་༤བཞིའི་ལམ་རྫོགས་པས་ཐོད་རྒལ་དུ་སྐུ་བཞིར་གྲུབ་པ་སྨར་༢ཁྲིད་མོས་གུས་ཆིག་ཆོད་ཀྱི་གནད། ཐ་མ་རིམ་འཇུག་གི་ལམ་ལྔ་ཐོབ་ལས་ནག་ཁྲིད་གདམས་ངག་ཕྲ་ཆོད་པའི་གནད་དང་གསུམ་
ལས། ཕྱི་མ་ལའང་། ཕྱི་མཚན་ཉིད་ཀྱི་གདམས་པ་སྐབས་བརྒྱད་རྩ་བ་གཅིག་ཏུ་བསྡུས་ནས་ལམ་ལྔ་གདན་གཅིག་ཏུ་ཉམས་སུ་བླངས་པ་ལ་བརྟེན་ནས་ཚོགས་ལམ་བློ་སྦྱོང་གིས་ལམ་༣བགྲོད། ཕ་རྒྱུད་གཡོ་བའི་རླུང་སྤར་འཛིན་གྱི་ལམ་རིམ་ལྔ་གདན་གཅིག་ཏུ་རྫོགས་པ་ལ་བརྟེན་ནས་སྦྱོར་ལམ་དཀའ་ཐུབ་ཀྱི་སྲང་དུ་བཅུག །མ་རྒྱུད་བདེ་བ་ཉམས་ཀྱི་གདམས་ངག་ཕྱག་རྒྱ་བཞི་གདན་རྫོགས་སུ་བསྒོམ་པ་ལ་བརྟེན་ནས་མཐོང་ལམ་གྱིས་རྗེས་བཅད། སྙིང་པོ་དོན་གྱི་གདམས་པ་རྣལ་འབྱོར་བཞི་༦ལམ་ཏིང་ངེ་འཛིན་བཞི་གདན་རྫོགས་སུ་བསྒོམ་པ་ལ་བརྟེན་ནས་སྒོམ་ལམ་རོ་སྙོམས་ཀྱི་བོགས་དབྱུང་། རིག་པ་རང་གྲོལ་གྱི་གདམས་པ་སྦྱོར་བ་ཡན་༧ལག་དྲུག་གདན་རྫོགས་སུ་བསྒོམ་པ་ལ་བརྟེན་ནས་མཐར་ཕྱིན་བྱ་བྲལ་གྱི་ལམ་ཐོབ་པར་བྱ་བའོ། །ཞི་བྱེད་ཅེས་པའི་སྒྲ་དོན་ནི། བོད་དུ་བྱོན་པའི་འཁྲིད་ཚུལ་ཕལ་མོ་ཆེས་སློབ་མ་མི་དགེ་བ་ལས་བཟློག་ཏུ་བཅུག་ནས་གཟོད་དེའི་སེམས་རྒྱུད་ཀྱི་ཉོན་མོངས་སྦྱོང་བར་བྱེད་པ་གཙོ་ཆེ་ལ། འདིར་ནི་སྔོན་ལས་ཀྱི་དབང་གིས་ལུས་དམན་པ་དང་། ནད་བུ་ཅན་དུ་གྱུར་པ་སོགས་སྡུག་བསྔལ་རྣམས་འཕྲལ་འཕྲལ་དུ་ཞི་བར་བྱས་ནས་རྣལ་འབྱོར་ལ་སྦྱོར་བཟོད་པར་བྱེད་པས་ན་དམ་ཆོས་སྡུག་བསྔལ་ཞི་བྱེད་ཅེས་བྱ་སྟེ། ཡུམ་ལས། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་སྔགས། ཞེས་དང་། འཇམ་དཔལ་སྒྱུ་དྲྭ་ལས། སྡུག་བསྔལ་གསུམ་གྱིས་སྡུག་བསྔལ་ཞི། །སྲིད་གསུམ་མཐའ་ཡས་གྲོལ་གསུམ་ཐོབ། །སྒྲིབ་པ་ཀུན་ལས་རྣམ་པར་གྲོལ། །མཁའ་ལྟར་མཉམ་པ་ཉིད་ལ་གནས། །ཞེས་སོགས་གསུངས་པ་ལ་བརྟེན་ནས་བཏགས་པར་མཛད་ཅིང་། ངོ་བོ་ཕ་རོལ་ཏུ་ཕྱིན་པ་སྔགས་དང་རྗེས་སུ་མཐུན་པ་ཞེས་མདོ་རྒྱུད་ཐམས་ཅད་ཀྱི་ཟབ་གནད་གཅིག་ཏུ་དྲིལ་བའི་གདམས་པ་ཁྱད་པར་ཅན་ནོ། །
རྟེན་གཞིའི་གཙོ་བོ་སྤྱི་མདོ་ཤེར་ཕྱིན་རྒྱས་འབྲིང་བསྡུས་གསུམ་སོགས་དང་། སྒོས་མདོ་ཆུ་ཀླུང་རོལ་བའི་མདོ། །རྒྱ་གར་བེ་ཏཱའི་ཡུལ་གྱི་ཙ་ར་སེང་ངར་འཁྲུངས་པའི་མཁས་པ་ཆེན་པོ་ཀ་མ་ལ་ཤཱི་ལའམ་འགྲོ་བའི་མགོན་པོ་དམ་པ་སངས་རྒྱས་ཞེས་བྱ་བ་གྲུབ་ཐོབ་ཕོ་མོ་ལྔ་བཅུ་རྩ་བཞི་ལས་གདམས་པ་ཟབ་མོ་མཐའ་དག་གསན་ནས་རྩེ་གཅིག་ཏུ་བསྒྲུབ་པ་ལ་གཞོལ་བས། ཐུགས་དམ་བདེར་གཤེགས་བཅུ་གཉིས་དང་། ངོ་མཚར་མཁའ་སྤྱོད་ཀྱི་བླ་མ་སུམ་ཅུ་རྩ་དྲུག་སོགས་ཀྱི་ཞལ་གཟིགས། ཐུན་མོང་གི་དངོས་གྲུབ་གྲུབ་པ་ཆེན་པོ་བརྒྱད་དང་། མཆོག་གི་དངོས་གྲུབ་མཐོང་ལམ་ཆེན་པོའི་ཡེ་ཤེས་བརྙེས་པ་དེ་ཉིད་ཀྱི་ཁྱད་པར་གདམས་པ་མཆོག །བོད་ཡུལ་འདིར་བརྡ་དང་གསུང་གིས་གཞན་ལ་གདུལ་བྱ་སོ་སོའི་དབང་པོ་དང་འཚམས་པར་སྔ་ཕྱི་བར་གསུམ་དུ་བསྟན་པ་ལས། །གངས་རིའི་ཁྲོད་འདིར་བརྒྱུད་པ་རིམ་པ་གསུམ། །བརྒྱུད་པ་དང་པོ་དམ་པས་ཁ་ཆེ་ཛྙ་ན་གུ་ཧྱ་ལ་ཞི་བྱེད་སྒྲོན་མའི་སྐོར་གསུམ་སོགས་གནང་ཞིང་། དེ་དང་དམ་པ་གཉིས་ཀས་རྗེ་བཙུན་ཨོང་པོ་ལོ་ཙཱ་བ་ལ་གནང་བ་དང་། ཛྙཱ་ན་གུ་རྒྱས་པུ་ཧྲང་ལོ་ཆུང་ལ་བཤད་པ་སོགས་དང་། །བརྒྱད་པ་བར་པ་རྨ་ཆོས་ཀྱི་ཤེས་རབ་ལ་ཕྱག་ཆེན་སྐོར་སོ་ཆུང་དགེ་འདུན་འབར་ལ་རིག་པ་ཅེར་མཐོང་གི་མན་ངག །ཀམ་ཚུལ་ཁྲིམས་རྒྱལ་མཚན་ལ་རྟོག་པ་ལམ་ཁྱེར་གདམས་ངག་གནང་བ་སོགས་རྨ་སོ་ཀམ་གསུམ་ཕྲན་དང་བཅས་པ་དང་། །བརྒྱུད་པ་བླ་མ་དམ་པ་ཕྱར་ཆེན་ལ་ཤེར་ཕྱིན་བསྒོམ་ཡོད་བསྒོམ་མེད་གཉིས་སུ་ངོ་སྤྲད་ནས་ཆོ་ལུ་དང་། མདོ་སྦྱོར་དང་། དོན་སྡེ་པ་གསུམ་གྱིས་སྤྲོས་པ་བཅད། དམ་པ་ཕྱར་ཆུང་ལ་སྔགས་དང་ཕར་ཕྱིན་གཉིས་མེད་ཀྱི་གདམས་པས་ངོ་སྤྲད་དེ། བསྙེན་སྒྲུབ་བཞིའི་སྲང་དུ་བཅུག །
བཛྲ་ཀྲོ་དྷ་བྱིན་རླབས་ཀྱི་ལམ་པ་ཡིན་གསུངས་ནས་རྟག་ཏུ་གསོལ་བ་འདེབས་སུ་བཅུག །བྱང་ཆུབ་སེམས་དཔའ་ཀུན་དགའ་ནི་གང་ཟག་རིམ་གྱིས་པ་ཡིན་གསུངས་ནས། བློ་སྦྱོང་གནང་ནས་དཀའ་ཐུབ་ཀྱི་སྲང་རྐྱང་ཁུག་ལམ་ལྔས་བསྡུས་པ་ལ་བཅུག་པ་སྟེ། སྒོ་བའི་རྣལ་འབྱོར་པ་བཞི་ཡིས་མཚོན་བུ་ཆེན་བདུན་གྱི་ལུགས་དང་། མ་ཇོ་ཉི་ཤུ་རྩ་བཞི་སོགས་གྲུབ་པའི་སྐྱེས་བུ་བགྲང་ལས་འདས་པ་བྱོན་པས་སོ་སོའི་ལུགས། །སྲོལ་ཕྲ་མོ་བསམ་གྱིས་མི་ཁྱབ་ཀྱང་། སྐྱེ་བ་ལྔར་དམ་པས་རྗེས་སུ་བཟུང་ཞིང་། ང་དང་དགོངས་པ་མཉམ་པ་ཀུན་དགའ་ཡིན་ཅེས་བསྔགས་པ་ཆིག་བརྒྱུད་ཀྱི་མངའ་བདག་དམ་པ་ཀུན་དགའ་ཞེས་ཐུགས་སྲས་མཆོག་ཏུ་གྱུར་པས་གང་གིས་པ་ཚབ་བསྒོམ་པ་དང་། དེས་རྒྱལ་བ་ཏེ་ནེ། དེས་རོག་ཤེས་རབ་སེང་གེ་སྐུ་མཆེད་ལ་གནང་བ་སོགས་ཤིན་ཏུ་དར་རྒྱས་ཆེ་བར་བྱུང་བ་ནི་ལུགས་སྲོལ་ཁྱད་པར་དུ་འཕགས་པ་ཞིག་ཡིན་ལ། །སྤྱིར་བརྒྱུད་པ་བར་པ་བཀའ་ཐ་མ་དང་། བརྒྱུད་པ་ཐ་མ་སྔགས་དང་གཙོ་བོར་མཐུན་ནོ། །སོར་སྡུད་བསམ་གཏན་སྟོང་གཟུགས་འཆར་བ་དང་། །སྲོག་རྩོལ་འཛིན་པས་སྲོག་གནས་འགོག་པར་བྱེད། །རྗེས་དྲན་ཏིང་འཛིན་བདེ་ཆེན་བསྐྱེད་པ་དེ། །སྦྱོར་དྲུག་ཆོས་ཀྱི་ཉམས་ལེན་གཙོ་བོ་ཡིན་ཏེ། །དེ་ཡང་དུས་འཁོར་རྩ་རྒྱུད་ལས། སོ་སོར་སྡུད་དང་བསམ་གཏན་དང་། །སྲོག་རྩོལ་དེ་བཞིན་འཛིན་པ་དང་། །རྗེས་སུ་དྲན་དང་ཏིང་ངེ་འཛིན། །སྦྱོར་བ་ཡན་ལག་དྲུག་ཏུ་འདོད། །ཅེས་གསུངས་པ་ལྟར། བསྒྲུབ་བྱ་ནི་དེ་བཞིན་གཤེགས་པའི་གསང་བ་གསུམ་དང་། སྒྲུབ་བྱེད་སྦྱོར་བ་ཡན་ལག་དྲུག་ཡིན་ལ། ཇི་ལྟར་བསྒྲུབ་ཚུལ་ནི། སོར་བསམ་གཉིས་ཀྱིས་དབུ་མ་སྦྱངས་ཤིང་རྡོ་རྗེའི་སྐུ་རྣམ་པ་ཐམས་ཅད་པ་སྒྲུབ། སྲོག་
རྩོལ་གྱིས་དེར་རོ་རྐྱང་གི་རླུང་འཛུད་ཅིང་། འཛིན་པས་དེ་བརྟན་པར་བྱས་པས་རྡོ་རྗེའི་གསུང་རྣམ་པ་ཐམས་ཅད་པ་སྒྲུབ། རྗེས་དྲན་གྱིས་ཕྱག་རྒྱ་ལ་བརྟེན་ནས་བྱང་སེམས་བཞུ་བ་དེ་ཟག་བྲལ་གྱི་ངང་དུ་བཟུང་བའི་འགྱུར་མེད་ཀྱི་བདེ་བ་དང་། ཏིང་འཛིན་གྱིས་དེ་ཉིད་ཁ་སྦྱོར་ཏེ་གཟུགས་ཀྱི་སྐུ་དང་དབྱེར་མེད་དུ་བྱས་པས་བདེ་སྟོང་ཟུང་འཇུག་རྡོ་རྗེའི་ཐུགས་རྣམ་པ་ཐམས་ཅད་བསྒྲུབ་པའོ། །གཞན་ཡང་སོར་བསམ་གཉིས་སྐུ་རྡོ་རྗེའི་རྣལ་འབྱོར་བསྙེན་པའི་ཡན་ལག །སྲོག་འཛིན་གཉིས་གསུང་རྡོ་རྗེའི་རྣལ་འབྱོར་ཉེར་སྒྲུབ་ཀྱི་ཡན་ལག །རྗེས་དྲན་ཐུགས་རྡོ་རྗེའི་རྣལ་འབྱོར་སྒྲུབ་པའི་ཡན་ལག །ཏིང་ངེ་འཛིན་ཡེ་ཤེས་རྡོ་རྗེའི་རྣལ་འབྱོར་སྒྲུབ་ཆེན་གྱི་ཡན་ལག་གམ། སོར་བསམ་གཉིས་གཟུགས་སྒྲུབ་ཀྱི་ཡན་ལག །སྲོག་འཛིན་གཉིས་སྲོག་སྒྲུབ་ཀྱི་ཡན་ལག །རྗེས་དྲན་བདེ་བ་སྒྲུབ་པའི་ཡན་ལག །ཏིང་ངེ་འཛིན་བདེ་བ་སྒྲུབ་པའི་ཡན་ལག་ཅེས་ཀྱང་བྱའོ། །དེ་ཡང་དུས་ཞབས་སྙན་བརྒྱུད་ལས། ཀུན་ལ་དྲུག་དྲུག་ཅེས་བྱ་སྟེ། །ཞེས་གསུངས་པ་ལྟར། ཡན་ལག་དྲུག་པོ་རེ་རེ་ལའང་། ངོ་༡བོ་ངེས་༢ཚིག་དབྱེ་བ་༣དང་། །རིགས་༤བདག་བསྐྱེད་(ཐབས་འབྲས་༦བུའོ། །ཞེས་དོན་ཚན་དྲུག་དྲུག་གི་སྒོ་ནས་གཏན་ལ་འབེབས་ཚུལ་སོགས་རྒྱས་པར་བསྙེན་སྒྲུབ་ཡན་ལག་བཞི་ཡི་རྣམ་གཞག་ཏུ་བཤད་པ་ལྟར་དང་བླ་མ་གོང་མ་རྣམས་ཀྱིས། སྔོན་འགྲོ་ལྟོས་མེད་དྲུག་ལྡན། དངོས་གཞི་རྣལ་འབྱོར་དྲུག་ལྡན། རྗེས་སྲུང་སྡོམ་དྲུག་ལྡན་ཅེས་པའི་ཆིངས་ཀྱང་མཛད་དོ། །རྟེན་གཞིའི་གཙོ་བོ་དཔལ་དུས་ཀྱི་འཁོར་ལོ་རྩ་བའི་རྒྱུད་སྟོང་ཕྲག་བཅུ་གཉིས་པ་དང་། དེ་ལས་འཇམ་དཔལ་གྱི་སྤྲུལ་པ་རིགས་ལྡན་གྲགས་པ་མཉེ་བར་བསྡུས་པའི་རྒྱུད། །ལེའུ་ལྔ་པའི་བདག་ཉིད་འགྲེལ་ཆེན་དང་བཅས་པ་སྟེ། ཐོག་མར་སྤྲུལ་པའི་རིགས་
ལྡན་རྣམས་ཀྱི་ཤམྦྷ་ལར་དར་རྒྱས་སུ་མཛད། དེ་ནས་འཕགས་ཡུལ་དུ་ཙི་ལུ་པཎྜི་ཏས་སྤེལ་ཞིང་། དེའི་སློབ་མ་པིཎྜི་ཨཱ་ཙརྱ་སྟེ་སློབ་དཔོན་བསོད་སྙོམས་པར་གྲགས་པ་དང་། དེའི་སློབ་མ་དུས་ཞབས་པཎ་ཆེན་ཏེ། དུས་འཁོར་ཞབས་པ་ཆེན་པོའམ། ཙི་ལུ་པ་ཆུང་བར་ཡང་གྲགས་པ་དེས། སྤྲུལ་པའི་རིགས་ལྡན་ལས་ཀྱང་དངོས་སུ་དབང་བཤད་མན་ངག་མཐའ་དག་གསན་ནས་ཁྱད་པར་གྱི་གདམས་པ་མཆོག །འདི་རྩལ་དུ་བཏོན་ནས་འཆད་པར་མཛད་པ་ལས། སློབ་མའི་མཆོག་ཨ་ཝདྡྷ་ཏི་པ། ངག་གི་དབང་ཕྱུག ། ཤྲཱི་བྷ་དྲ་བོ་དྷི། ན་ལེནྡྲ་པ་སྟེ་འདི་གསུམ་ཀ་ལ་དུས་ཞབས་པ་ཆུང་བར་སོ་སོར་གྲགས་པ་སོགས་མཁས་ཤིང་དངོས་གྲུབ་བརྙེས་པ་བསམ་གྱིས་མི་ཁྱབ་པ་ཞིག་བྱོན། བོད་ཡུལ་འདིར་དང་པོར་བཀའ་བབས་ཀྱི་གྱོ་ལོ་ཙཱ་ཟླ་བའི་འོད་ཟེར་ཡིས། །དུས་ཞབས་པ་ཆུང་བ་ཤྲཱི་བྷ་དྲ་བོ་དྷི་སྤྱན་དྲངས་ནས་རྒྱུད་འགྲེལ་རྫོགས་པར་བསྒྱུར་ཅིང་། རང་གིས་ཐུགས་ཉམས་བཞེས་ནས་གངས་རིའི་ཁྲོད་འདིར་སྤེལ་བ་ལས་སློབ་མ་ཁྲོམ་ལོ་ཙཱ་བ་པདྨ་འོད་ཟེར་སོགས་བུ་ཆེན་བཞིར་གྲགས་པ་བྱུང་། ཁྲོམ་ལོས་བླ་མའི་གསུང་ཟིན་བྲིས་སུ་མཛད་པ་ལས་བརྒྱུད་པའི་གྱི་གྱོ་ལུགས་དང་། ནཱ་ལནྡྲ་པའི་སློབ་མ་མཉྫ་ཀཱི་རྟི། དེའི་སློབ་མ་བལ་པོ་ས་མནྟ་བྷཾ། དེ་ལས་རྭ་ལོ་ཙཱ་བ་ཆོས་རབ་ཀྱིས་གསན་པའི་རྭ་ལུགས་དང་། དེ་བཞིན་དུ། ནཱ་ལེནྡྲ་པ། ཁ་ཆེ་ཟླ་གཞོན་འབྲོ་ཤེས་རབ་གྲགས། སྒོམ་པ་དཀོན་མཆོག་སྲུང་སོགས་ལས་བརྒྱུད་པའི་འབྲོ་ལུགས། ནཱ་ལེནྡྲ་པའི་སློབ་མ་རྩ་མི་བསོད་སྙོམས་པ་སངས་རྒྱས་གྲགས་ནས་བརྒྱུད་པའི་རྩ་མི་ལུགས། དེའི་སློབ་མ་སེ་ལོ་ཙཱ་བ་གཞོན་ནུ་ཚུལ་ཁྲིམས་དང་། དེ་ལས་གཉོས་དར་མ་འོད་ཀྱིས་གསན་པ་སོགས་གཉོས་ལུགས། ནཱ་ལནྡྲ་པ། ཨ་
བྷ་ཡཱ་ཀཱ་ར། ནིངྐ་ལི་ཀ །བལ་པོའི་པཎྜི་ཏ་རེ་བེནྡྲ། ཆག་ལོ་ཆོས་རྗེ་དཔལ་སོགས་ལས་བརྒྱུད་པ་ཆག་ལོ་ལུགས། ཨ་བྷཱ་ཡ། བིཥྛ་ཏཱ་དཔེ། ཁ་ཆེ་པཎ་ཆེན་ཤཱ་ཀྱ་ཤྲཱི། དཔྱལ་ཆོས་ཀྱི་བཟང་པོ་སོགས་ལས་བརྒྱུད་པའི་པཎ་ཆེན་ལུགས་སམ་དཔྱལ་ལོ་ལུགས། རྭ་ཆོས་རབ་ནས། ཡེ་ཤེས་སེང་གེ །འབུམ་སེང་རོང་། །པ་ཧྥ་ལོ་རྣམ་རྒྱལ་རྡོ་རྗེ་སོགས་ལས་བརྒྱུད་པའི་རོང་ལུགས། རྩྭ་མི་ནས་ཁམས་པ་གྲྭ་ལོ་གཞོན་ནུ་དཔལ་ལ་བརྒྱུད་པ་དང་། དེ་ཉིད་ཀྱི་ཞང་ཚལ་པ་ལ་གནང་པའི་ཚལ་ལུགས། གྲུབ་ཆེན་ཤཱ་བ་རི་དབང་ཕྱུག་གིས་པཎ་ཆེན་བིབྷཱུ་ཏི་ཙནྡྲ་ལ་དངོས་སུ་བསྩལ་ཞིང་། དེས་ཀོ་བྲག་པ་བསོད་ནམས་རྒྱལ་མཚན་ལ་གནང་བ་ཀོ་བྲག་ལུགས། མནྡྲཀཱི་རྟི་དང་། ཨ་བྷཱ་ཡས་གཉན་ལོ་དང་། གྲྭ་ལོ་གཉིས་ལ་གསུངས་ཤིང་། དེ་གཉིས་ཀ་ལས་བླ་མ་འགོས་ཀྱིས་གསན་པ་སོགས་འགོས་ལུགས། ཆག་ཆོས་རྗེ་དཔལ། གོ་ལུང་པ་མདོ་སྡེ་དཔལ། མཁས་གྲུབ་ཨོ་རྒྱན་པ། སྙེ་མདོ་ཀུན་དགའ་དོན་གྲུབ། རྗེ་རང་བྱུང་པ་སོགས་ལས་བརྒྱུད་པ་ཀར་ལུགས། གྲུབ་ཐོབ་སེ་མོ་ཆེ་བ་ནས། བོ་དོང་པ་རིན་ཆེན་རྩེ་མོ། སྟག་སྡེབ་སེང་གེ་རྒྱལ་མཚན། དེ་དང་གོ་ལུང་པའི་སློབ་མ་ཤོང་སྟོན་ལོ་ཙཱ་བ་རྡོ་རྗེ་རྒྱལ་མཚན་དང་། དཔང་བློ་གྲོས་བརྟན་པ་སོགས་ལས་བརྒྱུད་པ་དང་། །ཁམས་པ་གྲྭ་ལོ་ནས་ས་ཆེན་ལ་གནང་བའི་ས་ལུགས་རྣམས་དང་། ཁྱད་པར་དུས་ཀྱི་འཁོར་ལོ་གངས་ཅན་ཁྲོད་འདིར་ཤིན་ཏུ་དར་བར་མཛད་པ་ནི་ཇོ་ཞལ་གཉིས་ཏེ། དེ་ཡང་སྒོམ་པ་དཀོན་མཆོག་སྲུང་ནས། སྒྲོ་སྟོན་གནམ་ལ་བརྩེགས། གྲུབ་ཐོབ་ཡུ་མོ་བ། སྲས་དྷ་རྨེ་ཤྭ་ར། ནམ་མཁའ་འོད། གྲུབ་ཐོབ་སེ་མོ་ཆེ་བ། འཇམ་གསར་བ། ཀུན་མཁྱེན་ཆོས་འོད། ཀུན་སྤངས་ཐུགས་རྗེ་བརྩོན་འགྲུས། བྱང་སེམས་རྒྱལ་ཡེ། ཡོན་ཏན་རྒྱ་མཚོ། ཀུན་མཁྱེན་
དོལ་བུ་པ་ཤེས་རབ་རྒྱལ་མཚན་སོགས་ལས་བརྒྱུད་པ་ཇོ་ནང་ལུགས་དང་། ཆོས་འོད་ནས། འཕགས་འོད། བུ་སྟོན་རིན་ཆེན་གྲུབ་ལ་བརྒྱུད་པ་སོགས་བུ་ལུགས་ཏེ། ལུགས་འདི་གཉིས་ཀས་དང་པོར་རྭ་པའི་བརྒྱུད་པ་ལས་གསན་ཅིང་། ཕྱིས་འབྲོ་ལུགས་ལ་ཡང་དག་པར་ཞུགས་པས་གཙོ་བོར་རྭ་འབྲོའི་བརྒྱུད་པ་འཛིན་མོད། གཞན་དུ་སྦྱོར་དྲུག་མི་འདྲ་བ་ཕལ་ཆེར་གྱི་བཀའ་བབས་པ་དང་། དེར་མ་ཟད་ལུགས་སྲོལ་ཕྲན་ཚེགས་ནི་ལྐོག་ཕྲེང་བའི་ལུགས་དང་། ཀུན་སྤངས་པའི་སློབ་མ་ལ་སྟོད་དབང་རྒྱལ་ལུགས། །སོགས་མང་དུ་བྱོན་པ་སྟེ། མདོར་ན་རྒྱ་གར་འཕགས་པའི་ཡུལ་དུ་དུས་ཞབས་པ་ཆེ་ཆུང་། ཤ་བ་རི། དཔེ་མེད་མཚོ། ཉི་མ་དཔལ་ཡེ་ཤེས། ནཱ་རོ་པ། ཁ་ཆེ་པཎ་ཆེན་གྱི་ལུགས་སོགས་དང་། བོད་འདིར་དར་བ་ལ། གྱི་ཇོ། འབྲོ། རྭ། དིང་རིང་ཆོས་གྲགས་ཏེ་སྔོན་བྱོན་བཞི། མན་ལྷོ ལུང་གུ་རུ། ཐར་ལོ། ཨོ་རྒྱན་པ། བི་བྷུ་ཏི་ཙནྡྲ་སྟེ་བར་བྱོན་བཞི། ཤ་བ་རི་ཐོག་མཐར་བར་གསུམ། ཕྱིས་བྱོན་རྒྱ་གར་ཤར་ཕྱོགས་པཏྟཱ་ག་རིའི་པཎྜི་ཏ་ཆེན་པོ་ནགས་ཀྱི་རིན་ཆེན་ལས་བྱུང་བས་མཚོན་དེ་སོགས་ཟབ་ལམ་རྨད་དུ་བྱུང་བ་འདི་གངས་ཅན་གྱི་འཛིན་མར་ཁྱབ་པར་ཤར། །བ་ལས་ཀྱང་། རྡོ་རྗེའི་རྣལ་འབྱོར་ཟབ་མོའི་ཉམས་ལེན་ཆུ་བོའི་རྒྱུན་ལྟར་བར་མ་ཆད་པ་དང་ལྡན་པ་ནི་ཀུན་མཁྱེན་ཇོ་ནང་པ་ཡིན་ཏེ། ཀུན་སྤངས་རིན་པོ་ཆེར་བྱང་སེམས་རྒྱལ་ཡེ་སོགས་ཀུན་སྤངས་བུ་བཞིར་གྲགས་པ་དང་། ཀུན་མཁྱེན་དོལ་བུ་པར་ཀུན་མཁྱེན་ཆོས་གྲགས། ཕྱོགས་ལས་རྣམ་རྒྱལ། ཉ་དབོན་ཀུན་དགའ་དཔལ། མ་ཏི་རྣམ་གཉིས་སོགས་བསྟན་འཛིན་ཆེན་པོ་བསམ་གྱིས་མི་ཁྱབ་པ་ཞིག་བྱོན་ནས། སློབ་བརྒྱུད་མཁས་ཤིང་སྦྱོར་བ་ཡན་ལག་དྲུག་གི་རྣལ་འབྱོར་ལྷུར་ལེན་པ་མང་པོས་སྟོད་
མངའ་རིས་ནས་བཟུང་དབུས་གཙང་ཁམས་གསུམ་གྱི་རི་སུལ་ཕལ་ཆེར་གང་བས་ངེས་དོན་གྱི་བསྟན་པ་ཉིན་མོ་ལྟར་མཛད་དོ། །ལུས་རྩ་དག་པར་བྱེད་པ་སྐུ་ཡི་རྡོ་རྗེ་བསྙེན་པའི་ཡན་ལག་ལ་ལུས་གནད་བྱེད་པ་བཅིངས་པའི་རྣལ་འབྱོར་རྒྱུ་སོར་སྡུད་དེའི་བྱེད་ལས། འབྲས་བུ་བསམ་གཏན་སྡེ་གསུམ་གྱི་སྒོ་ནས་གཏན་ལ་དབབ་པ་དང་། །ངག་རླུང་དག་པར་བྱེད་པ་གསུང་གི་རྡོ་རྗེ་སྒྲུབ་པའི་ཡན་ལག་རྡོར་བཟླས་ཞེས་འཇུག་ལྡང་གནས་གསུམ་འབྲུ་གསུམ་གྱི་སྔགས་སུ་སྦྱར་བའི་རྣལ་འབྱོར་སྔོན་དུ་འགྲོ་བས་རྒྱུ་སྲོག་རྩོལ་དང་། དེའི་འབྲས་བུ་འཛིན་པ་དེ་གཉིས་ཀྱི་བྱེད་ལས། བྱེད་ལས་ཀྱིས་བསྒྲུབས་པའི་འབྲས་བུ་དང་བཞིའི་སྒོ་ནས་གཏན་ལ་དབབ་པ་དང་། ཡིད་ཐིག་ལེ་དག་པར་བྱེད་པ་ཐུགས་ཀྱི་རྡོ་རྗེ་སྒྲུབ་པ་ཆེན་པོའི་ཡན་ལག་ལ། འཇིག་རྟེན་པའི་ལས་རྫོགས་པར་བསྟན་པ་རྗེས་དྲན་དབང་པོ་རབ་གཏུམ་མོ། འབྲིང་རང་ལུས། ཐ་མ་གཞན་ལུས་ལ་བརྟེན་པ་གསུམ། འཇིག་རྟེན་ལས་འདས་པའི་ལམ་རྫོགས་པར་བསྟན་པ་ཏིང་ངེ་འཛིན་དམིགས་བཅས་དང་དམིགས་མེད་ཀྱི་བདེ་བ་ཆེན་པོ་གཉིས་སུ་མེད་པ་རང་རིག་པའི་བདེ་བ་ལ་སེམས་རྩེ་གཅིག་ཏུ་གནས་པས་དྭངས་མ་ཐིག་ལེ་ཕྱི་རོལ་དུ་འཕོ་རྒྱུ་ཐམས་ཅད་རྡོ་རྗེ་ནོར་བུ་ནས་ཕྱིར་འཛག་པ་མེད་པར་འཆིང་། །བ་རྣམས་ནི། གྲུབ་པའི་སློབ་དཔོན་ཨོ་ཌི་ཡཱ་ན་པ་ལས་བྱུང་བའི་རྡོ་རྗེ་གསུམ་གྱི་བསྙེན་སྒྲུབ་ཅེས་གྲགས་པའི་ཟབ་ཆོས་ཀྱི་ཉམས་སུ་ལེན་བྱའི་གཙོ་བོ་ཡིན་པའི་ཚུལ། དཔལ་གསང་བ་འདུས་པ་ལས། ཁྱོད་ཀྱི་ལུས་སེམས་ལྟ་བུ་དང་། སེམས་ལུས་ལྟ་བུ་དང་པ། སེམས་ཚིག་ཏུ་བརྗོད་པ་ལྟ་བུར་བསྐྱེད་ཅིག །ཅེས་གཞི་དུས་སུ་རྡོ་རྗེ་གསུམ་མི་ཕྱེད་པའི་འབྲེལ་བཀོད་ནས། ལམ་དུས་སུ་རྡོ་རྗེ་གསུམ་དབྱེར་མེད་པའི་རྣལ་
འབྱོར་བསྒོམས་པས། འབྲས་དུས་སུ་གསང་བ་གསུམ་གྱི་བདག་ཉིད་མངོན་དུ་བྱེད་པའི་གདམས་ངག་ཁྱད་པར་ཏེ། རྡོ་རྗེའི་ཚིག་རྐང་ལས། རྩ་སྦྱངས་པས་ནི་ལུས་ཀྱི་དྲི་མ་དག །རླུང་སྦྱངས་བས་ནི་ངག་གི་དྲི་མ་དག །འཛག་མེད་ཐོབ་པས་ཡིད་ཀྱི་བག་ཆགས་བཅོམ། །འཁོར་ལོའི་མདུད་པ་དགའ་བཞིའི་འགྲོས་ཀྱིས་བཤིག །མ་རིག་གཉིད་ནི་བརྒྱལ་བ་ལོག་པས་དྭངས། །ཆགས་བྲལ་ཉམས་པ་ཞེ་སྡང་ཟད་པའི་སེམས། །ཆགས་པ་དག་པས་བདེ་བ་ཆེན་པོར་གྲོལ། །ཅེས་གསུངས་པ་ལྟར་རོ། །དེ་ལྟ་བུའི་ལམ་འདིའི་རྟེན་གཞིའི་གཙོ་བོ་ནི་མ་རྒྱུད་བདེ་མཆོག་འཁོར་ལོ་དང་། གཉིས་སུ་མེད་པ་དཔལ་དུས་ཀྱི་འཁོར་ལོའི་རྒྱུད་གཉིས་ལ་བརྟེན་ནས། །སངས་རྒྱས་ཐམས་ཅད་ཀྱི་ཤེས་རབ་སྟོང་པ་ཉིད་རྣམ་ཀུན་མཆོག་ལྡན་ཡེ་ཤེས་སྒྱུ་མའི་གཟུགས་སུ་ཤར་བའི་རྗེ་བཙུན་རྡོ་རྗེ་རྣལ་འབྱོར་མས་ལེགས་པར་བཀྲལ་བའི་ཁྱད་པར་ཅན་གྱི་གདམས་པ་མཆོག་ཏུ་གྱུར་པ། །གང་ཞིག་དང་པོར་བཀའ་བབས་མཁས་གྲུབ་ཨོ་རྒྱན་དང་། །ཐུགས་ཉམས་བཞེས་ནས་གངས་རིའི་ཁྲོད་འདིར་སྤེལ་བ་ཡིན་ཏེ། །དེ་ཡང་གྲུབ་ཆེན་རིན་ཆེན་དཔལ་ཞེས་རྒྱལ་བ་རྒོད་ཚང་པའི་སློབ་མ་བརྟུལ་ཞུགས་རང་དང་མཉམ་པར་བསྔགས་པ་དེ་ཉིད་མཐོང་ལམ་གྱི་བདེན་པ་མངོན་སུམ་དུ་གཟིགས་པ་སྤྱོད་པས་མཐར་ཕྱིན་པར་བྱ་བའི་ཕྱིར་ཛ་ལནྡྷར་སོགས་གནས་ཆེན་མང་པོར་བྱོན། ལྷག་པར་ཨོ་ཌི་ཡཱ་ན་ཞེས་གྲགས་པ་རྡོ་རྗེ་ཐེག་པའི་གན་མཛོད་ཆེན་པོར་བཞུགས་པ། སྤྲུལ་པའི་ཞིང་ཡེ་ཤེས་ཀྱི་མཁའ་འགྲོ་མ་རྣམས་ཀྱི་དགའ་བའི་ཚལ་ཆེན་པོ་དེར་དཔལ་ཡེ་ཤེས་པའི་ཞབས་འབྲིང་དང་བཅས་བྱོན་པས། ཡུལ་དེའི་དབུས་དྷ་མ་ཐ་ལར་རིགས་བཞིའི་མཁས་འགྲོས་བྱིན་གྱིས་བརླབས།
ཁྱད་པར་ཀ་བོ་ཀའི་གནས་སུ་མཁའ་སྤྱོད་རྡོ་རྗེ་བཙུན་མོའི་ཞལ་ནས་གདམས་ངག་འདི་སྩལ་ཏེ་སྐལ་ལྡན་རྣམས་ལ་རྡོ་རྗེ་སེམས་དཔའི་གསེང་ལམ་སྟོན་པའི་ས་མཁན་ཆེན་པོར་གྱུར། གཞན་དག་ལས་ལམ་བསྡུས་པ་སོགས་རྩ་བ་དང་ཡན་ལག་གི་གདམས་པ་རྫོགས་པར་གསན་པས་མཆོག་དང་ཐུན་མོང་གི་དངོས་གྲུབ་བརྙེས། བོད་དུ་བྱོན་ནས་ཤར་གངས་སུ་ཡི་དམ་རྡོ་རྗེ་བཙུན་མོས་སྣོད་ལྡན་གྱི་སློབ་མར་ལུང་བསྟན་ཐོབ་པ། གཡའ་བཟང་པའི་སློབ་མ་སྣུབས་འདུལ་བ་འཛིན་པའི་དབོན་མཁར་ཆུ་རིན་པོ་ཆེ། །ཞེས་གྲགས་པ་དེས་གསོལ་བ་བཏབ་ནས་མཁའ་འགྲོ་མའི་བཀའ་རྒྱ་གྲོལ་ཏེ། གཞུང་ཐོག་མར་ཡི་གེར་བཀོད། དེ་ནས་བཟུང་སྐལ་ལྡན་ཡོངས་ལ་རྒྱ་ཆེར་སྤེལ་བ་ལས། ཁྲིད་གཉེར་བ་རྟོགས་ལྡན་ཟླ་བ་སེང་གེ་དང་དཔལ་ལྡན་སྦ་ཏྲ་པྲ། །མཁས་བཙུན་བསོད་ནམས་འོད་ཟེར། །རྣམ་དཔྱོད་མཚུངས་མེད་རྗེ་བཙུན་ཟུར་ཕུག་པ། །རིན་ཆེན་དཔལ། གཞན་ཡང་རྒྱལ་བ་རང་བྱུང་བ། སྙེ་མདོ་ཐམས་ཅད་མཁྱེན་པ་སྐུ་མཆེད། ཆག་ལོ་དབོན་པོ་སོགས་མཁས་གྲུབ་མང་དུ་བྱོན་ཅིང་། ཕྱིས་སུ་ངེས་པར་ཐམས་ཅད་མཁྱེན་པ་བུ་སྟོན་རིན་པོ་ཆེ་དང་། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་སོགས་ཚད་མའི་སྐྱེས་བུ་མང་པོས་ཀྱང་འཆད་ཉན་བསྒོམ་སྒྲུབ་ཀྱིས་གཏན་ལ་ཕབ་པར་མཛད་པའི་ལམ་དྲི་མ་མེད་པ་ཡིན་ལ། སློབ་ཚོགས་རྣམས་ཀྱི་ནང་ནས་བརྒྱུད་འཛིན་ལུང་བསྟན་ཐོབ་ཕྱིར་དང་པོ་མཁར་ཆུ་རིན་པོ་ཆེ་ལས་བརྒྱུད་པ་ཉིད་མཆོག་ཏུ་གྱུར་པའོ། །དེ་ལྟར་སྒྲུབ་བརྒྱུད་ཀྱི་ལམ་སྲོལ་རྣམས་བཀའ་བབས་བརྒྱད་དུ་བསྡུས་པ་དེ་ཡང་གཙོ་ཆེ་བ་དང་། ལམ་སྲོལ་ཡོངས་སུ་རྫོགས་པའི་དབང་དུ་བྱས་པ་ཡིན་གྱི། གཞན་ལམ་སྲོལ་ཕྲན་ཚེགས་ནི་མཐའ་མ་བྱུང་། ལམ་འབྲས། ནི་གུ། བསྙེན་སྒྲུབ་རྣམས་
ལ་རྡོ་རྗེའི་ཚིག་རྐང་རྩོད་མེད་སྣང་། ནཱ་རོའི་རྡོ་རྗེའི་ཚིག་རྐང་ནི་མར་པ་དོ་པས་མཛད་པར་མཁས་གྲུབ་ཆེན་པོ་རྣམས་བཞེད་པས་དཔྱད་བྱའི་གནས་སོ། །གཏེར་བྱོན་དུ་གྲགས་ཀྱང་རྒྱུད་སྡེ་དང་མ་འབྲེལ་བ་དང་ཡི་དམ་ལུང་བསྟན་དུ། ཁས་ལེན་ཡང་རྫུན་གྱི་ཕྲེང་བ་བསྡེབས་ཐོས་བསམ་དང་སྒོམ་པ་འཆི་མེད་ཀྱི་བདུད་རྩིས་བཟུང་བའི་གཏམ་གྱི་ཨུཏྤལ་དཔྱོད་ལྡན་ཡོངས་ཀྱི་རྣ་བའི་རྒྱན་དུ་འོས་བ་འདི་ཉིད་ཀྱི་ཐོག་མར་བསྟན་བཅོས་སོ་སོའི་ལུས་རྣམ་པར་བཞག་པ་དང་མཐུན་པའི་མཆོད་བརྗོད་དང་ནས་སྨྲ་བའི་བཅོས་མའི་སྙན་བརྒྱུད་དུ་གྲགས་པ་རྣམས་ཀྱིས་མཚོན། །མདོར་ན་མཁས་གྲུབ་གོང་མའི་སྲོལ་དང་མི་མཐུན་པ། །དེ་དག་རྡོ་རྗེ་འཆང་གི་བཀའ་བརྒྱུད་མིན། །གླེང་གཞིའི་རིམ་པར་ཕྱེ་བ་སྟེ་དང་པོའོ། །གླེང་གཞིའི་སྐབས་ཀྱི་མཆན་ཆུང་རགས་པ་སོགས། མང་དུ་ཐོས་པའི་དཔྱིད་གཙུག་ལག་སྨྲ་བའི་ཉི་མའི་བློ་གྲོས་ཀྱི་སྣང་བས་ཅུང་ཟད་གསལ་བར་བྱས་པ་སྟེ། རྒྱས་པར་ལོགས་སུ་འཆད་པར་སྤྲོ་བ་ཉིད་དོ། །སརྦ་དཱ་ཀ་ལྱཱ་ཎཾ་བྷ་བ་ཏུ།། །།