མཁའ་སྤྱོད་སྐོར་ལ།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བྱིན་རླབས་བྱ་ཚུལ་མཐོང་བ་དོན་ལྡན།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བྱིན་རླབས་བྱ་ཚུལ་མཐོང་བ་དོན་ལྡན་ཞེས་བྱ་བ་བཞུགས་སོ།།
ན་མོ་གུ་རུ་བུདྡྷ་སི་ཧཱ་ཡ། བླ་མ་ཡི་དམ་དབྱེར་མེད་དང་། །རྗེ་བཙུན་རྡོ་རྗེ་རྣལ་འབྱོར་མའི། །བྱིན་རླབས་ཇི་ལྟར་བྱ་བའི་ཚུལ། །ཆོ་གའི་རིམ་པ་ཅུང་ཟད་འབྲི། ། དེ་ལ་འདིར་རྗེ་བཙུན་རྡོ་རྗེ་རྣལ་འབྱོར་མའི་བྱིན་རླབས་ཀྱི་ཆོ་ག་ལ་སྦྱོར་དངོས་རྗེས་གསུམ་ལས། །དང་པོ་ནི། བླ་ཆེན་འཕགས་པས་མཛད་པའི་བྱིན་རླབས་ཀྱི་ཡི་གེ་ལས་རྟོགས་པར་བྱའོ། །གཉིས་པ་དངོས་གཞི་ལ་གཉིས་ལས། དང་པོ་སློབ་དཔོན་གྱི་བྱ་བ་ནི། མཆོད་པའི་ཡོ་བྱད་རྣམས་ལ་རྡོ་རྗེའི་རྗེས་ནང་མཆོད་གཏོར་ཏེ། ཨོཾ་སུམྦྷ་སོགས་ཀྱིས་བསང་། སྭ་བྷཱ་བས་སྦྱང་། སྟོང་པའི་ངང་ལས་ཨ་བདུན་ལས་ཐོད་པའི་སྣོད་བདུན་གྱི་ནང་དུ་ཧཱུཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་
སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། སོ་སོའི་ཕྱག་རྒྱ་དང་བཅས། ཨོཾ་བཛྲ་ཨགྷཾ་ནས་ཤབྡ་ཨཱཧཱུཾ། རོལ་མོ་དང་གྷཎེར་ཎི་སོགས་གསུམ་གྱིས་བྱིན་གྱིས་བརླབ། ནམ་མཁའ་དང་མཉམ་པའི་སོགས་ནས་འོད་གསལ་སྟོང་པ་ཉིད་དུ་གྱུར་པར་བསམ། ལྡང་བའི་ཚེ་རྗེ་བཙུན་མ་ཕྱག་མཚན་མེད་པའི་སྐུར་ལྡང་ཞེས་པའི་བར་རྗེ་བཙུན་རཏྣ་ནི་ད་བྷོ་གས་མཛད་པའི་ཡིག་ཆ་ལྟར་བྱའོ། །མདུན་བསྐྱེད་བསང་སྦྱང་། སྟོང་པའི་ངང་ལས་ཡཾ་ལས་རླུང་། རཾ་ལས་མེ། བཻ་ལས་ཆུ། ལཾ་ལས་ས། ཀཾ་ལས་ཐོད་པ་དཀར་པོ་ཡངས་ཤིང་རྒྱ་ཆེ་བ་བདུད་རྩི་ལྔས་ཡོངས་སུ་གང་བའི་སྟེང་དུ་པཾ་ལས་པདྨ། རཾ་ལས་
ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ་དེ་ལས་འོད་ཟེར་འཕྲོས་པས་རྡོ་རྗེའི་ས་གཞི། ར་བ། དྲྭ་བ། གུར། བླ་བྲེ། བསྐལ་པའི་མེ་ལྟ་བུའི་ཡེ་ཤེས་ཀྱི་མེ་འབར་བའི་སྲུང་བའི་འཁོར་ལོའི་ནང་དུ་དུར་ཁྲོད་ཆེན་པོ་བརྒྱད་ཀྱིས་བསྐོར་བའི་དབུས་སུ། ཨེ་ཡིག་ཉིས་བརྩེགས་ལས་བྱུང་བའི་ཆོས་འབྱུང་ཉིས་བརྩེགས་ཁོག་པ་སྟོང་པ་ཡངས་ཤིང་རྒྱ་ཆེ་བའི་ནང་དུ་པཾ་ལས་པདྨ་རཾ་ལས་ཉི་མའི་དཀྱིལ་འཁོར་གྱི་སྟེང་དུ་པཾ་ཡིག་དམར་པོའི་ཐ་མར་སོགས་ནས་ཞེས་པས་བསྐོར་ཏེ་གནས་པ། དེ་ལས་འོད་ཟེར་འཕྲོས་སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་བྱུང་བའི་རྗེ་བཙུན་རྡོ་རྗེ་རྣལ་འབྱོར་མ་སོགས་ནས་ཙཎྜི་ཀཱའི་ངོ་བོ། ཕོ་ཐུགས་ཀའི་སོགས་ནས་ཤུདྡྷོཉ་ཧཾ། མཆོད་པ་བྱིན་རླབས་སྔ་མ་ལྟར་ལས་ཤརྡ་ཨཱཧཱུཾ། ཨོཾ་སརྦ་ཏ་ཐཱ་ག་ཏ་བཛྲ་ཡོ་གི་ནི་ཀུན་ལ་སྦྱར་བའི་ཨགྷཾ་ནས་ཤབྡ་ཨཱཿཧཱུྃ། རོལ་ཆེན་དང་གྷཎེར་ཎི་སོགས་བརྗོད། མཚན་སྔགས་སྔོན་དུ་འགྲོ་བའི་ཨོ་རུ་པ་སོགས་ནས་སྤརེ་ཀཱ་མ་གུ་ཎ་པཱུ་ཛི་ཏེ་ཨཱཧཱུྃ། ཞེས་སོགས་ཕྱག་རྒྱར་བཅས་པས་མཆོད། ནང་མཆོད་གཏོར་མ་ལྟར་བྱིན་གྱིས་བརླབ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ་མཁྱེན་པའི་ཡེ་ཤེས་བརྩེ་བའི་ཐུགས་རྗེ་མཛད་པའི་ཕྲིན་ལས་བསམ་གྱིས་མི་
ཁྱབ་པ་མངའ་བ། དྲིན་ཅན་རྩ་བའི་བླ་མ་རྡོ་རྗེ་འཆང་སངས་རྒྱས་སེང་གེའི་ཞལ་དུ་ཨོཾ་ཨཱཧཱུཾ། ནང་མཆོད་གཏོར། རྡོ་རྗེ་འཆང་དང་རྡོ་རྗེ་རྣལ་འབྱོར་མ། །གྲུབ་ཆེན་ནཱ་རོ་པ་དང་ཕམ་འཐིང་པ། ། ཤེས་རབ་བརྩེགས་དང་མལ་གྱོ་ས་སྐྱ་པ། །རྗེ་བཙུན་སྐུ་མཆེད་ཞལ་དུ་ཨོ་ཨཱཧཱུཾ། །ས་སྐྱ་པཎ་ཆེན་འཕགས་པ་རིན་པོ་ཆེ། །དཀོན་མཆོག་དཔལ་དང་ཆོས་རྗེ་བྲག་ཕུག་པ། བསོད་ནམས་རྒྱལ་མཚན་དཔལ་ལྡན་ཚུལ་ཁྲིམས་དང་། །ཡེ་ཤེས་རྒྱལ་མཚན་ཞལ་དུ་ཨོཾ་ཨཱཧཱུཾ། །ཀུན་དགའ་བཟང་པོ་དཀོན་མཆོག་རྒྱལ་མཚན་དང་། །བསོད་ནམས་སེང་གེ་སངས་རྒྱས་རིན་ཆེན་ཞབས། །ལྷ་མཆོག་སེང་གེ་དཀོན་མཆོག་ལྷུན་གྲུབ་དང་། །བུདྡྷ་སཾ་ཧའི་ཞལ་དུ་ཨོཾ་ཨཱཿཧཱུྃ། གཞན་ཡང་དབང་བསྐུར་སོགས་དང་། ཨོ་ཨོ་ཨོཾ་སོགས་ནས། རྗེ་བཙུན་རྡོ་རྗེ་རྣལ་འབྱོར་མའི་ཞལ་དུ་ཨོཾ་ཨཱཿཧཱུྃ། གཞན་ཡང་བྱ་བའི་རྒྱུད་སོགས་ནས། ལྡན་པར་གྱུར་ཅིག་ཨོཾ་ཨཱཧུཾ་ཞེས་པའི་བར་མ་རྒྱུད་སྤྱི་དང་མཐུན་པར་བྱའོ། །འབྲུ་གསུམ་གྱིས་བདུད་རྩི་རང་གི་ལྕེ་ལ་མྱོང་ངོ་། །ན་མོ་ཆོས་ཀྱི་དབྱིངས་སོགས་ནས་སཱ་ཧཱ་ས་ཡིད་མཆོད། རྡོ་རྗེ་དྲིལ་བུ་འཛིན་པས། དཔལ་ལྡན་རྡོ་རྗེ་སོགས་ཀྱིས་བསྟོད། གཏོར་མ་བསང་སྦྱང་སོགས་ནས་ཧ་ཧོ་ཧཱི ཨོ་གསུམ་མའི་རྗེས་སུ་ཨོཾ་ཨ་ཀཱ་རོ་སོགས་ནས་ཕྱག་འཚལ་ལོ། །བཅོམ་ལྡན་འདས་མས་བདག་དང་སེམས་ཅན་
ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཆོས་སྐྱོང་གི་གཏོར་མ་གཏོར་ཆོག་ལྟར་ཕུལ། མཁའ་འགྲོ་སྤྱི་གཏོར་བདེ་མཆོག་ལྟར་བྱའོ། །དེ་ནས་བུམ་པ་བསང་སྦྱང་། སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ཞབས་ཞུམ་པ། ལྟོ་བ་ལྡིར་བ། མགྲིན་པ་ཕྲ་བ། ཁ་གཡེལ་བ། མཆུ་འཕྱངས་བ། ལྷ་རྫས་ཀྱི་གོས་ཀྱིས་མགུལ་བ་བཅིངས་པ། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་བུམ་པའི་ཆུའི་དབུས་སུ་རྗེ་བཙུན་རྡོ་རྗེ་རྣལ་འབྱོར་མ་པདྨ་དང་ཉི་མའི་གདན་ལ་ཞབས་གཡས་སོགས་ནས་ཐིམ་ཞེས་པའི་བར་སྒྲུབ་ཐབས་ལྟར་བརྗོད། མཚན་སྔགས་རེ་རེ་སྦྱར་བའི་ཨབྷཾ་ནས་ཤརྡ་རོལ་ཆེན་དང་བཅས་པས་ཕྱི་མཆོད། ༀ་གསུམ་མའི་རྗེས་སུ་འབྲུ་གསུམ་བཏགས་ནས། རྗེ་བཙུན་རྡོ་རྗེ་རྣལ་འབྱོར་མའི་ཞལ་དུ་མཆོད་པ་དམ་པ་འབུལ་ལོ། །ཞེས་པས་ནང་མཆོད། དཔལ་ལྡན་སོགས་ཀྱིས་བསྟོད། གཟུངས་ཐག་ནས་བཟུང་སྟེ། རང་གི་སྙིང་ག་ནས་སྔགས་ཀྱི་ཕྲེང་བ་གཟུངས་ཐག་ལ་བརྟེན་ནས་སོང་བས་བུམ་ནང་གི་རྗེ་བཙུན་རྡོ་རྗེ་རྣལ་འབྱོར་མའི་ཐུགས་རྒྱུད་བསྐུལ་ནས་ཡེ་ཤེས་ཀྱི་བདུད་རྩིའི་ཆུ་རྒྱུན་ཟག་པས་བུམ་པ་གང་བར་གྱུར། ཨོཾ་གསུམ་མ་དང་། སུམྦྷ་དང་། །
ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་ཅི་རིགས་བཟླ། སླར་ཡང་མཆོད་བསྟོད་གོང་ལྟར་བྱ། འདོད་དོན་གསོལ་གདབ་དང་། ཧེ་རུ་ཀའི་ཡིག་བརྒྱ་ལན་གསུམ་བརྗོད། ཨོཾ་ཨཱཿཧཱུྃ་མཆོད་ཡོན་ཕུལ་བའི་རྐྱེན་གྱིས་བུམ་ནང་གི་ལྷ་འོད་དུ་ཞུ་བ་ལས་བྱུང་བའི་བུམ་པའི་ཆུ་བདུད་རྩིའི་རང་བཞིན་དུ་གྱུར་ཅེས་བརྗོད། དེ་ནས་སློབ་དཔོན་གྱི་མདུན་དུ་མཎྜལ་མེ་ཏོག་བུམ་པ་དང་བཅས་པ་སྟ་གོན་བྱས་ཏེ་བྱིན་རླབས་ཀྱི་འཇུག་པ་ནས་བརྩམས་ཏེ་སྤྱད་དུ་གསོལ་གྱི་བར་སློབ་མ་ལ་ཇི་ལྟར་བསྐུར་བ་བཞིན་བདག་འཇུག་གི་ཚུལ་དུ་བླང་ངོ་། །གཏོར་མ་སྐབས་འདིར་ཕུལ་ཀྱང་རུང་བས་གང་བདེ་བྱ་ཆོག་གོ། །གཉིས་པ་སློབ་མ་ལ་བྱ་བ་ལ། བདེ་མཆོག་ལོ་ནག་སོགས་གང་རུང་གི་དབང་ཐོབ་པའི་སློབ་མ་གཅིག་ནས་ཉི་ཤུ་རྩ་ལྔའི་བར་ཟུང་དུ་མ་གྱུར་པ་ནང་གཤིམ་པ་རྣམས་ཁྲུས་བྱས་ནས་གཡོན་སྐོར་ཏུ་གྲལ་ལ་འཁོད་པ་ལ། ལས་ཀྱི་རྡོ་རྗེས་མེ་ཏོག་བཀྱེ་བསྡུ་གྲུབ་རྗེས། སློབ་དཔོན་གྱིས། འོ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་ཐོབ་པར་བྱ། དེའི་ཆེད་དུ་བྱིན་རླབས་ཟབ་མོ་གསན་ལ་དོན་ཚུལ་བཞིན་དུ་ཉམས་སུ་བླང་བར་བགྱིའོ་སྙམ་པ་བྱང་ཆུབ་མཆོག་ཏུ་ཐུགས་བསྐྱེད་པ་གསལ་བཏབ་ནས་གསན་པར་ཞུ། དེ་ལ་གསན་རྒྱུའི་བྱིན་རླབས་ལ་བསམ་གྱིས་མི་
ཁྱབ་པ་ཞིག་ཡོད་པའི་ནང་ནས། འདིར་རྗེ་བཙུན་ས་སྐྱ་པ་ཡབ་སྲས་ལ་གདམས་པ་རྒྱ་མཚོ་ཙམ་བཞུགས་པའི་ནང་ཚན། གཙོ་བོར་མཆོག་སྒྲུབ་པ་ལ་དམར་མོ་སྐོར་གསུམ་དང་། ལས་རྒྱས་པ་ལ་དམར་པོ་སྐོར་གསུམ་དང་གཉིས་ལས། འདིར་དམར་མོ་སྐོར་གསུམ་གྱི་ཕྱོགས་ཡིན། དེ་ལའང་རྗེ་བཙུན་ནཱ་རོ་ཏ་པས་བདེ་མཆོག་ལེའུ་ཉི་ཤུ་རྩ་གཅིག་པ་ལ་བརྟེན་ནས་ནཱ་རོ་མཁའ་སྤྱོད་ཀྱི་སྒྲུབ་ཐབས་དང་ལམ་གྱི་ཆ་རྐྱེན་ལ་སོགས་པ་མཛད་དེ། དེ་རྣམས་ལ་ནཱ་རོ་མཁའ་སྤྱོད་ཅེས་གྲགས་སོ། །ཡང་རྒྱལ་ཆེན་ཨིནྡྲ་བྷཱུ་ཏིས་རྒྱུད་དེ་ཉིད་ལ་བརྟེན་ནས་ཕག་མོ་ཞལ་གཉིས་མའི་བྱིན་རླབས་དང་། སྔགས་བཏུ་ལ་སོགས་པའི་གདམས་པ་ཟློ དང་བཅས་མཛད་པ་རྣམས་ལ་ཨིནྡ་མཁའ་སྤྱོད་ཅེས་ཡོངས་སུ་གྲགས་པ་དང་། ཡང་གྲུབ་ཆེན་མེ་ཏྲི་པས་རྒྱུད་རལ་པ་གྱེན་བརྫེས་ལ་བརྟེན་ནས་རིག་པ་འཛིན་པ་རྩེན་མའི་བྱིན་རླབས་མན་ངག་དང་བཅས་མཛད་པ་ལ་མེ་ཏྲི་མཁའ་སྤྱོད་ཅེས་གྲགས་པ་རྣམས་སུ་ཡོད་པ་ལས་འདིར་གྲུབ་ཆེན་ནཱ་རོ་པའི་ཕྱོགས་ལ་བརྟེན་པ་ཡིན། དེ་ལའང་རྗེ་བཙུན་རྡོ་རྗེ་རྣལ་འབྱོར་མའི་བྱིན་རླབས་ཀྱི་ཆོ་ག་དང་། བསྐྱེད་པའི་རིམ་པ་ནཱ་རོ་མཁའ་སྤྱོད། རྫོགས་པའི་རིམ་པ་རྩ་དབུ་མ། ལམ་གྱི་ཆ་རྐྱེན་པྲ་སེ་ནཱ་དབབ་པ་དང་། ལངྐ་ལི་ཡ་ལ་བརྟེན་ནས་མཁའ་སྤྱོད་སྒྲུབ་པ་ལ་སོགས་པ་བསམ་གྱིས་མི་ཁྱབ་པ་ཞིག་ཡོད་པ་ལས། འདིར་རྗེ་བཙུན་རྡོ་
རྗེ་རྣལ་འབྱོར་མའི་སིནྡྷ་རའི་དཀྱིལ་འཁོར་དུ་བྱིན་རླབས་ཟབ་མོ་སྒྲུབ་པར་བྱེད་པ་ཡིན། དེ་ལ་གང་གིས་སྒྲུབ་པར་བྱེད་པའི་སློབ་དཔོན་ནི། འཁོར་ལོ་བདེ་མཆོག་ལོ་ནག་སོགས་གང་རུང་གི་དཀྱིལ་འཁོར་དུ་དབང་ཐོབ་པ། འདིའི་བྱིན་རླབས་ཐོབ་ཅིང་ཆག་མེད་རྒྱུན་དུ་བྱེད་པ་ཞིག་དགོས། གང་ལ་བྱ་བའི་སློབ་མ་ནི། དབང་ཐོབ་ཅིང་བྱིན་རླབས་དོན་དུ་གཉེར་བ་དམ་ཚིག་དང་སྡོམ་པ་སྲུང་སྡོམ་བྱེད་པའི་སློབ་མ་ཞིག་ལ་བརྟེན་པར་བྱ་བ་ཡིན་ལ། ནམ་བྱ་བའི་དུས་ནི་རྩ་རྒྱུད་ལས། ཚེས་བཅུ་ལ་ནི་དེ་རབ་མཆོད། །ཅེས་གསུངས་པས་གཙོ་བོར་འགལ་རྐྱེན་སྡིག་སྒྲིབ་སྦྱོང་བར་བྱེད་པ་ལ་མར་ངོའི་ཚེས་བཅུ་དང་། མཐུན་རྐྱེན་བསོད་ནམས་དང་ཡེ་ཤེས་ཀྱི་ཚོགས་གསོག་པར་བྱེད་པ་ལ་ཡར་ངོའི་ཚེས་བཅུ་གཉིས་ཡོད་པ་ལས། ད་ལན་ཡར་ངོའི་ཚེས་བཅུའི་སྐབས་སུ་བབས་པ་ཡིན། དེ་ལས་གཞན་པའི་ཚེས་གྲངས་ལ་མི་བྱ་སྟེ། དུས་ཚེས་མ་དག་པར་འགྱུར་བའི་ཕྱིར་རོ། །ཚུལ་ཇི་ལྟར་བྱ་བའི་ཆོ་ག་ལ་སྔོན་དུ་འགྲོ་བ་སློབ་དཔོན་གྱི་བྱ་བ་དང་དངོས་གཞི་སློབ་མ་ལ་བྱ་བ་གཉིས་ལས། དང་པོ་སྔོན་དུ་འགྲོ་བ་སློབ་དཔོན་གྱི་བྱ་བ་ལ། མཆོད་པ་བྱིན་རླབས་སྔོན་ཏུ་འགྲོ་བའི་སྒོ་ནས་བདག་བསྐྱེད་བཟླས་པ་དང་བཅས་པ། མདུན་བསྐྱེད་སྒྲུབ་ཅིང་མཆོད་བསྟོད་བྱ་བ། གཏོར་མ་འབུལ་བ། བུམ་པ་སྒྲུབ་པ། སློབ་མ་ལ་ཇི་ཙམ་བསྐུར་བའི་བྱིན་
རླབས་ཐམས་ཅད་སློབ་དཔོན་རང་ཉིད་ཀྱིས་བདག་འཇུག་གི་ཚུལ་དུ་བླང་དགོས་པ་རྣམས་སྔོན་དུ་ལེགས་པར་གྲུབ་ཟིན། གཉིས་པ་དངོས་གཞི་སློབ་མ་ལ་བྱ་བ་ལྷ་དང་སྐལ་པ་མཉམ་པའི་ཆེད་དུ་དཀྱིལ་འཁོར་དུ་འཇུག་པ། ཞུགས་ནས་བྱིན་རླབས་དབང་བཞིའི་ཚུལ་དུ་བསྐུར་བ་རྣམ་པ་གཉིས་ཡོད་པ་ལས། ཐོག་མར་བྱིན་རླབས་ཀྱི་འཇུག་པའི་ཆོས་རྣམས་ཞུ་བའི་ཡོན་དུ་སློབ་དཔོན་ལ་རྗེ་བཙུན་རྡོ་རྗེ་རྣལ་འབྱོར་མ་འབུལ་བར་ཞུ། དེ་ནས་མཎྜལ་ཕུལ་ནས་ཕྱག་སྙིམས་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། གང་གི་དྲིན་གྱི་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །དཔལ་ལྡན་རྡོ་རྗེ་མཁའ་འགྲོ་མ་ནས། །འགྲོ་བ་སྐྱོབ་ལ་ཕྱག་འཚལ་ལོ། །དཔལ་ལྡན་རྡོ་རྗེ་རྣལ་འབྱོར་མས། །བདག་ལ་བྱིན་གྱིས་བརླབ་ཏུ་གསོལ། །ཞེས་གསོལ་བ་བཏབ་ནས། སྔོན་ཆད་རྗེ་བཙུན་རྡོ་རྗེ་རྣལ་འབྱོར་མའི་སིནྡྷ་རའི་དཀྱིལ་འཁོར་དུ་མ་ཞུགས་པའམ། ཞུགས་ཀྱང་བསྐྱར་ནས་འཇུག་པའི་མཚོན་བྱེད་དུ་རས་ཡུག་དམར་པོ་རེས་གདོང་དམ་དུ་བཅིངས་པའི་མོས་པ་མཛོད། །ཨཱ་ཁཾ་
ཝཱི་ར་ཧཱུྃ། ཞེས་གདོང་བཅིངས་ནས། དེ་ནས་དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་སྟོང་དུ་མཇལ་དུ་མི་བཏུབ་པས་ཨུ་དུ ་ར་ལ་སོགས་པའི་མེ་ཏོག་གི་ཕྲེང་བ་རེ་བྱིན་པར་མོས་པ་མཛོད། ཨཱ་ཁཾ་ཝཱི་ར་ཧཱུཾ་ཞེས་པས་མེ་ཏོག་གི་ཕྲེང་བ་གཏད་ལ་དམིགས་པ་འདི་བཞིན་མཛོད། །སློབ་དཔོན་གྱི་ཐུགས་ཀ་ནས་ཁཎྜ་རོ་ཧིའི་ཚོགས་དཔག་ཏུ་མེད་པ་སྤྲོས་ཏེ། ཁྱེད་རང་རྣམས་ལ་བྱིན་གྱིས་བརླབ་པ་སྒྲུབ་པ་ལ་བར་དུ་གཅོད་པའི་བགེགས་དང་ལོག་འདྲེན་ཐམས་ཅད་རྒྱང་རིང་དུ་བསྐྱེད་པར་མོས་པ་མཛོད། སུམྦྷ་སོགས་བརྗོད་ཅིང་བུམ་ཆུ་གཏོར། སློབ་དཔོན་གྱིས་བདུད་རྩི་ཁྱེད་རང་རྣམས་ཀྱི་ལྗགས་ཐོག་དང་སྐུ་ལ་གཏོར་ཏེ་བསྲུང་བ་བྱས་པར་མོས་པ་མཛོད། ཨོཾ་ཨཱཏྟཱཧཱུྃ་ཞེས་བརྗོད་ཅིང་དེ་ལྟར་ལུས་ཐམས་ཅད་ཡེ་ཤེས་ཀྱི་བདུད་རྩིས་གང་ཞིང་ཟག་མེད་ཀྱི་བདེ་བས་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། དེ་ནས་སེམས་བསྐྱེད་པའི་སླད་དུ་ཁྱེད་རང་རྣམས་ཀྱི་ཐུགས་ཀར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཆ་ཤས་ཡོངས་སུ་རྫོགས་པ་ཉ་གང་བ་ལྟ་བུ་སྐྱ་ཆིལ་བ་རེ་གསལ་བཏབ་ལ། དེའི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བ་དང་བཅས་པ་གྱེན་དུ་ལངས་པ་རེ་བྱུང་བར་མོས་ཏེ། བདེན་གཉིས་དབྱེར་མེད་དུ་སེམས་བསྐྱེད་པར་བགྱིའོ་སྙམ་པས་འདིའི་རྗེས་ཟློས་
མཛོད། །ཨོཾ་སརྦ་ཡོ་ག་ཙིཏྟ་ཨུཏྲ་དཱ་ཡཱ་མི་ཞེས་བརྗོད་ནས། སློབ་དཔོན་གྱིས་ཁྱེད་རང་རྣམས་ཀྱི་སྙིང་གར་རྡོ་རྗེ་བཞག་པའི་སྒོ་ནས་བརྟན་པར་བྱས་པའི་མོས་པ་མཛོད། །སུ་ར་ཏི་ས་མ་ཡ་ཧཱུཾ་ཧོ་སིདྡྷི་བཛྲ་ཡ་ཐཱ་སུ་ཁཾ། ཞེས་པས་བདེན་གཉིས་དབྱེར་མེད་དུ་སེམས་བསྐྱེད་ནས། གཞན་ཡང་འོག་ནས་འབྱུང་བའི་གསང་སྔགས་ཀྱི་ཀུན་སྤྱོད་ཐམས་ཅད་སྣོད་དང་མི་ལྡན་པ་རྣམས་ཀྱི་མདུན་དུ་མ་སྨྲ་ཞིག་ཅེས་གསང་བར་གདམས་པ་ནི་མགོ་བོར་རྡོ་རྗེ་བཞག་སྟེ། དེང་ཁྱོད་རྡོ་རྗེ་རྣལ་འབྱོར་མའི་རིགས་སུ་ཞུགས་ཀྱི། དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་འདི། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། མ་དད་པ་རྣམས་ལ་ཡང་མ་ཡིན་ནོ། །ཞེས་པས་གསང་བར་གདམས་ནས། ནང་འཇུག་གི་སླད་དུ་སློབ་དཔོན་གྱི་ལག་གི་རྡོ་རྗེ་ལ་འཇུས་ཏེ་དཀྱིལ་འཁོར་གྱི་ཕྱོགས་ལ་མེ་ཏོག་དང་བཅས་ཐལ་མོ་སྦྱར་ནས་མགོ་དུད་པ་དང་བཅས་པས་འདིའི་རྗེས་ཟློས་མཛོད། ཛ༔ཧཱུྃ་བཾ་ཧོ༔ ཞེས་པས་སིནྡྷ་རའི་དཀྱིལ་འཁོར་གྱི་དྲུང་དུ་ཁྲིད་ནས་ཤར་དུ་འཁོད་པར་མོས་པ་མཛོད། རྒྱུད་དག་པར་བྱ་བའི་སླད་དུ་དམིགས་པ་འདི་བཞིན་མཛོད། དཀྱིལ་འཁོར་གྱི་དབུས་ན་བཞུགས་པའི་བླ་མ་དང་རྗེ་བཙུན་རྡོ་རྗེ་རྣལ་འབྱོར་མ་གཉིས་སུ་མེད་པ་ལ་གཞན་ཡང་སངས་རྒྱས་དང་བྱང་ཆུབ་
སེམས་དཔའ་དཔའ་བོ་དང་རྣལ་འབྱོར་མའི་ཚོགས་བསམ་གྱིས་མི་ཁྱབ་པས་བསྐོར་བ་སྤྲིན་ཕུང་འཐིབས་པ་ལྟར་བཞུགས་པར་མོས་པ་བྱས། དེ་དག་གི་སྤྱན་སྔར་རང་གཞན་གྱི་ཕ་མས་ཐོག་དྲངས་མཁའ་མཉམ་གྱིས་བསྡུས་པའི་སེམས་ཅན་ཐམས་ཅད་ཀྱིས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་བཤགས་པ་ལ་སོགས་པའི་ཡན་ལག་བདུན་པ་བགྱིད་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་སོགས་ལན་གསུམ་བརྗོད། ཅེས་རྒྱུད་དག་པར་བྱས་ནས་མདོར་ན་རིགས་ལྔ་སྤྱི་དང་ཁྱད་པར་གྱི་དམ་ཚིག་དང་སྡོམ་པ་ཐམས་ཅད་ཚུལ་བཞིན་དུ་འཛིན་སྙམ་པས་འདིའི་རྗེས་ཟློས་མཛོད། སྲས་བཅས་སངས་རྒྱས་སོགས་གསུམ། ཞེས་པས་སྡོམ་པ་ཐམས་ཅད་ཚུལ་བཞིན་ཏུ་བཟུང་ནས། སླར་ཡང་དེ་དག་གི་སྤྱན་སྔར་དམ་ཚིག་ཉི་ཤུ་རྩ་གཉིས་བཟུང་སྙམ་པས་འདིའི་རྗེས་ཟློས་མཛོད། སངས་རྒྱས་ཆོས་དང་དགེ་འདུན་ལ། །རྟག་པར་བདག་ནི་སྐྱབས་སུ་མཆི། རྣལ་འབྱོར་གསང་སྔགས་མཁའ་འགྲོ་མ། །འཁོར་ལོ་གསུམ་གྱི་བདག་ཉིད་ཅན། །ཀུན་ལ་རྟག་ཏུ་སྐྱབས་སུ་མཆི། །དཔའ་བོ་དཔའ་མོ་དབང་ལྷ་མོ། །བྱང་ཆུབ་སེམས་དཔའ་བདག་ཉིད་ཆེ། །ཁྱད་པར་དུ་ཡང་སློབ་དཔོན་ལ། །རྟག་པར་བདག་ནི་སྐྱབས་སུ་མཆི། །དཔལ་ལྡན་ཁྲག་འཐུང་སོགས་དཔའ་བོ། །རྣལ་འབྱོར་མ་དང་སྣང་མཛད་སོགས། །
བྱང་ཆུབ་སེམས་དཔའ་དཔག་མེད་པ། །ཐམས་ཅད་བདག་ལ་དགོངས་སུ་གསོལ། །བདག་གིས་དུས་འདི་ནས་བཟུང་སྟེ། །ཇི་སྲིད་གཉིས་མེད་ལ་གནས་པར། །དེ་ཡི་ཚངས་སྤྱོད་གཉིས་མེད་པ། །ཉི་ཤུ་རྩ་གཉིས་ལེགས་པར་གཟུང་། །ཞེས་དམ་ཚིག་བཟུང་བ་དང་བཅས་པ་ནི་སྔོན་འགྲོ་ཡིན། དངོས་གཞི་ལ་ཁྱེད་རང་རྣམས་དམིགས་པ་འདི་བཞིན་མཛོད། སིནྡྷ་རའི་དཀྱིལ་འཁོར་གྱི་དབུས་སུ་བླ་མ་དང་གཉིས་སུ་མེད་པའི་རྗེ་བཙུན་རྡོ་རྗེ་རྣལ་འབྱོར་མ་བཞུགས་པ་དེ་ཉིད་སངས་རྒྱས་ཐམས་ཅད་འདུས་པའི་ངོ་བོ་ཡིན་སྙམ་པའི་མོས་གུས་བྱས་པའི་རྐྱེན་གྱིས་བཅོམ་ལྡན་འོདས་མའི་ཐུགས་ཀ་ནས་འོད་ཟེར་བསམ་གྱིས་མི་ཁྱབ་པ་འཕྲོས་པས་ཁྱེད་རང་རྣམས་ཀྱི་ལུས་ཀྱི་ཕྱི་ནང་ཐམས་ཅད་ཁྱབ་པར་གང་བས་ཚེ་ཐོག་མ་མེད་པ་ནས་བསགས་པའི་ནད་གདོན་སྡིག་པ་དང་སྒྲིབ་པ་ཐམས་ཅད་བསྲེགས་ཤིང་སྦྱངས། འོད་ཟེར་རྣམས་ཚུར་འདུས་ཏེ་ཁྱེད་རང་རྣམས་ཀྱི་ལྟེ་བའི་ནང་དུ་ཨེ་ལས་ཆོས་ཀྱི་འབྱུང་གནས་གྲུ་གསུམ་ཉིས་བརྩེགས་ཀྱི་ནང་དུ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བཻ་ཡིག་སོགས་ནས། སྭཱ་ཧཱ་ཞེས་པ་དམར་ཁྱིལ་གྱིས་འཁོར་བའི་མོས་པ་མཛོད། དེ་ལས་འོད་ཟེར་འཕྲོས་སྣོད་ཐམས་ཅད་ལ་ཕོག་པས་ཡོངས་སུ་དག་པའི་གཞལ་ཡས་ཁང་དང་། བཅུད་ཀྱི་སེམས་ཅན་ལ་ཕོག་པས་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར། འོད་ཟེར་
དེ་རྣམས་ཚུར་འདུས་ཏེ་ཁྱེད་རང་རྣམས་ཀྱི་ལྟེ་བའི་པཾ་ཡིག་སྔགས་ཕྲེང་དང་བཅས་པ་ལ་ཐིམ་པར་མོས་པ་མཛོད། དེ་ཡོངས་སུ་གྱུར་པ་ལས་ཁྱེད་རང་རྣམས་རྗེ་བཙུན་རྡོ་རྗེ་རྣལ་འབྱོར་མ་སོགས་ནས། ཙཎྜི་ཀཱའི་ངོ་བོ་སྟེ་གོ་ཆ་རྣམས་ཀྱང་ངོ་བོ་ལྷ་ཡིན་པ་ལ་རྣམ་པ་ཡིག་འབྲུའི་གཟུགས་སུ་གསལ་ལམ་གྱིས་བཏབ་ནས། བླ་མ་དང་གཉིས་སུ་མེད་པའི་རྗེ་བཙུན་རྡོ་རྗེ་རྣལ་འབྱོར་མ་ལ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། སློབ་དཔོན་ཁྱེད་ཀྱིས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་དངོས་གྲུབ་དང་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་རྣམས་སྩལ་ཞིང་བརྟན་པར་མཛད་དུ་གསོལ་ཞེས་གསོལ་བ་བཏབ་པས། མདུན་བསྐྱེད་ཀྱི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་རྗེ་བཙུན་རྡོ་རྗེ་རྣལ་འབྱོར་མའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བྱིན་རླབས་དང་། ཡེ་ཤེས་ཐམས་ཅད་གཅིག་ཏུ་བསྡུས་པའི་ངོ་བོ་རྗེ་བཙུན་རྡོ་རྗེ་རྣལ་འབྱོར་མའི་སྐུ་མཐེ་བོང་གི་ཚད་ཙམ་མར་མེ་གཅིག་ལས་གཉིས་ཆད་ཀྱི་ཚུལ་གྱིས་བྱུང་སྟེ། ཁྱེད་རང་རྣམས་ཀྱི་ཞལ་དུ་ཞུགས། མགྲིན་པ་དང་སྙིང་ག་ནས་དམར་ཧྲིལ་གྱིས་སོང་བས་ལྟེ་བའི་ནང་གི་ཆོས་འབྱུང་ཉིས་བརྩེགས་ཀྱི་དབུས་ཀྱི་བོ་ཡིག་ལ་ཐིམ་པས། དེ་ཡོངས་སུ་གྱུར་པ་ལས་རྗེ་བཙུན་རྡོ་རྗེ་རྣལ་འབྱོར་
མའི་སྐུ་ཅན་གསལ་ལམ་པར་གྱུར་པའི་མོས་པ་མཛོད། སློབ་དཔོན་གྱིས་ཨོ་གསུམ་མ་བརྗོད་ཅིང་ཏིང་ལོ་སྦྱིན། ཁྱེད་རང་རྣམས་དམིགས་པ་འདི་བཞིན་དུ་མཛོད། ཁྱེད་རང་རྣམས་ཀྱི་ལྟེ་བའི་ཆོས་འབྱུང་གི་ནང་གི་རྗེ་བཙུན་རྡོ་རྗེ་རྣལ་འབྱོར་མའི་སྐུ་བདེ་བ་ཆེན་པོས་ཡོངས་སུ་གང་བས་ལུས་ཀྱི་གནས་ཉི་ཤུ་རྩ་བཞིར་བདེ་བ་ཆེན་པོའི་གར་སྟབས་བསམ་གྱིས་མི་ཁྱབ་པ་བསྒྱུར་བས་ཁྱེད་རང་རྣམས་ཀྱི་ཐུགས་རྒྱུད་ལ་བདེ་སྟོང་གི་ཡེ་ཤེས་སྐྱེས་པའི་མོས་པ་མཛོད། ཡང་དམིགས་པ་འདི་བཞིན་དུ་མཛོད། ལྟེ་བའི་ནང་གི་ཆོས་འབྱུང་གི་མདུན་རྒྱབ་གཉིས་སྤངས་པའི་གྲྭ་བཞིར་དགའ་བ་འཁྱིལ་བ་གཡོན་སྐོར་དུ་འཁོར་བ་ལ་སེམས་གཏད་པས་བདེ་བ་ཆེན་པོའི་ཡེ་ཤེས་སྐྱེས་པར་མོས་པ་མཛོད། །སླར་ཡང་དམིགས་པ་འདི་བཞིན་མཛོད། ཁྱེད་རང་རྣམས་རྗེ་བཙུན་རྡོ་རྗེ་རྣལ་འབྱོར་མར་གསལ་བའི་ཕྱིའི་སྨིན་མཚམས་ཀྱི་ཐད་ཀར་དགའ་བ་འཁྱིལ་པ་གཡོན་སྐོར་དུ་དམར་ཁྱིལ་གྱིས་འཁོར་བ་ལ་སེམས་གཏད་པས་མི་རྟོག་པའི་ཡེ་ཤེས་སྐྱེས་པར་མོས་པ་མཛོད། ཡང་དམིགས་པ་འདི་བཞིན་མཛོད། སྙིང་གའི་ཐོ་ཡིག་གི་མཐའ་སྐོར་གྱི་སྔགས་ཀྱི་ཕྲེང་བ་གཡོན་སྐོར་ཏུ་འཁོར་བ་དང་། ཆོས་འབྱུང་གི་དགའ་བ་འཁྱིལ་པ་གཡོན་སྐོར་དུ་འཁོར་བ་དང་། ཕྱིའི་སྨིན་མཚམས་ཀྱི་ཐད་ཀའི་དགའ་བ་འཁྱིལ་པ་གཡོན་སྐོར་དུ་འཁོར་བ་རྣམས་ལ་དུས་
གཅིག་ཏུ་ཤེས་པ་གཏད་པས་ཁྱེད་རང་རྣམས་ཀྱི་རྒྱུད་ལ་བདེ་བ་དང་སྟོང་པ་གཉིས་སུ་མེད་པའི་ཡེ་ཤེས་སྐྱེས་པར་མོས་པ་མཛོད། དེའི་ཚེ་སློབ་དཔོན་གྱི་ཐུགས་ཀའི་ས་བོན་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུ་བསམ་གྱིས་མི་ཁྱབ་པ་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མ་ཡུལ་ཉི་ཤུ་རྩ་བཞི་ན་བཞུགས་པ་ཐམས་ཅད་ཀྱི་ཐུགས་རྒྱུད་བསྐུལ། དེ་རྣམས་ཀྱི་ཐུགས་ཀ་ནས་རྗེ་བཙུན་རྡོ་རྗེ་རྣལ་འབྱོར་མའི་སྐུ་ཆེ་བ་རི་རབ་ཙམ། ཆུང་བ་རྡུལ་ཕྲན་ཙམ་བསམ་གྱིས་མི་ཁྱབ་པ་སྤྱན་དྲངས་ཏེ། ཁྱེད་རང་རྣམས་ཀྱི་སྤྱི་བོའི་གཙུག་བ་སྤུའི་བུ་ག་དབང་པོའི་སྒོ་ཐམས་ཅད་ནས་མར་མཚོ་ཆེན་པོ་ལ་ཁ་བ་བབས་པ་ལྟར་གཉིས་སུ་མེད་པར་ཐིམ་པར་མོས་པ་མཛོད། སླར་ཡང་སློབ་དཔོན་མདུན་བསྐྱེད་དང་བཅས་པའི་ཐུགས་ཀ་ནས་ཀྱང་རྗེ་བཙུན་རྡོ་རྗེ་རྣལ་འབྱོར་མའི་སྐུ་བསམ་གྱིས་མི་ཁྱབ་པ་སྤྱན་དྲངས་ཏེ་ཁྱེད་རང་རྣམས་སོགས་ནས། ཐིམ་པས་ལུས་ངག་ཡིད་གསུམ་དང་དབྱེར་མེད་རོ་གཅིག་ཏུ་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། སློབ་དཔོན་གྱིས་ཌ་དྲིལ་རོལ་མོ་སོགས་དང་། ངག་ཏུ་ཨོ་གསུམ་པ་བརྗོད། ཅེས་པས་བྱིན་གྱིས་བརླབས་ནས། དེ་ལྟར་བྱིན་རླབས་ཀྱི་རྒྱུན་བརྟན་པར་བྱ་བའི་ཕྱིར་དུ་རྡོ་རྗེ་རྒྱ་གྲམ་དུ་བཞག་སྟེ་བརྟན་པར་བྱས་པའི་མོས་པ་མཛོད། ཨོ་ཏིཥྛ
བཛྲ་ཞེས་པས་བརྟན་པར་བྱས་ནས་དཀྱིལ་འཁོར་གྱི་ལྷ་ལ་མེ་ཏོག་དོར་བ་ནི་འདི་ན་རྗེ་བཙུན་རྡོ་རྗེ་རྣལ་འབྱོར་མའི་སིནྡྷ་རའི་དཀྱིལ་འཁོར་བཞུགས་པ་ཡིན་ཏེ། རིམ་པ་ལྟར་བྱོན་ནས་གཡོན་པའི་ཕྱག་གིས་མེ་ཏོག་དེ་རྗེ་བཙུན་མའི་དབུ་ལ་ཕུལ་བར་མོས་ཏེ། ཨོ་པྲ་ཏིཙྪ་བཛྲ་ཧོ༔ ཞེས་གསུང་ཞིང་མེ་ཏོག་དོར་བ་ཞུ། དེ་ཉིད་སློབ་དཔོན་གྱིས་བླངས་ཏེ་ཁྱེད་རང་རྣམས་ཀྱི་སྤྱི་བོར་བཞག་སྟེ་སྔགས་ཀྱི་ཕྲེང་བར་བྱིན་གྱིས་བརླབས་པའི་མོས་པ་མཛོད། ཨོཾ་པྲ་ཏི་སྲྀཏྣ་ཨི་མཾ་སཏཱ་མ་ཧཱ་བཱ་ལ་ཨོ། ཞེས་པས་བྱིན་གྱིས་བརླབས་ནས། སློབ་དཔོན་གྱིས་ཨོ་བཛྲ་ནེ་ཏྲ་ཨ་པ་ཧཱ་ར་པ་ཊ་ལཾ་ཧཱི ཞེས་པས་ཁྱེད་རང་རྣམས་ཀྱི་མ་རིག་པའི་ལིང་ཐོག་དང་མིག་རས་ལྷན་ཅིག་ཏུ་ཕྱེས་ནས་དཀྱིལ་འཁོར་གྱི་ལྷ་ངོ་བསྟན་པ་ནི། འདི་ན་རྗེ་བཙུན་རྡོ་རྗེ་རྣལ་འབྱོར་མའི་སིནྡྷ་རའི་དཀྱིལ་འཁོར་བཞུགས་པ་ཡིན་ཏེ་འོག་གི་རྡུལ་ཚོན་གྱི་དཀྱིལ་འཁོར་འདི་ནི་ཀུན་རྫོབ་བརྡར་བཏགས་པའི་དཀྱིལ་འཁོར་བརྡའམ་མཚན་མ་ཙམ་ཡིན་ལ། དེའི་སྟེང་དུ་འབྱུང་བཞི་རི་རབ་ཀྱི་སྟེང་དུ་ཐོད་པ་དཀར་པོ་ཤིན་ཏུ་ཡངས་ཤིང་རྒྱ་ཆེ་བ་བདུད་རྩི་ལྔས་གང་བའི་སྟེང་དུ་པདྨའི་ལྟེ་བར་ཉི་མའི་དཀྱིལ་འཁོར་གྱི་སྟེང་དུ་རྡོ་རྗེའི་ས་གཞི། ར་བ། དྲྭ་བ། གུར། བླ་བྲེ། ཡེ་ཤེས་ཀྱི་མེ་རབ་ཏུ་འབར་བ་དང་བཅས་པའི་སྲུང་བའི་འཁོར་ལོ་ཡངས་ཤིང་རྒྱ་ཆེ་བའི་ནང་དུ་དུར་ཁྲོད་ཆེན་པོ་བརྒྱད་ཀྱིས་
བསྐོར་བའི་དབུས་སུ་རྣམ་ཐར་སྒོ་གསུམ་གྱི་རང་བཞིན་ཆོས་ཀྱི་འབྱུང་གནས་གྲུ་གསུམ་ཉིས་བརྩེགས་ཡངས་ཤིང་རྒྱ་ཆེ་བའི་ནང་དུ་རྗེ་བཙུན་རྡོ་རྗེ་རྣལ་འབྱོར་མ་པདྨ་དང་ཉི་མའི་དཀྱིལ་འཁོར་གྱི་སྟེང་དུ་ཞབས་གཡས་བརྐྱངས་པས་སོགས་ནས་བཞུགས་པ་སྟེ། མདོར་ན་རྗེ་བཙུན་རྡོ་རྗེ་རྣལ་འབྱོར་མའི་སིནྡྷ་རའི་དཀྱིལ་འཁོར་རྟེན་དང་བརྟེན་པར་བཅས་པའི་དཀྱིལ་འཁོར་གདོས་བཅས་ཀྱི་རྣམ་པ་མ་ཡིན་པར་མེ་ལོང་ནང་གི་གཟུགས་བརྙན་ལྟར་མངོན་སུམ་ལྟ་བུར་གཟིགས་པ་ཡིན་སྙམ་དུ་མོས་པ་མཛོད། །དེས་འཇུག་པའི་ཆོ་ག་གྲུབ་ནས། དབང་བཞི་བྱིན་རླབས་ཀྱི་ཚུལ་དུ་བསྐུར་བ་ཞུ་བའི་ཡོན་དུ་མཎྜལ་འབུལ་བར་ཞུ། མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་མཛོད། རྣལ་འབྱོར་མ་དཔལ་དབང་བསྐུར་བ། །འགྲོ་བ་སྐྱོབ་པའི་གཟི་བརྗིད་ཅན། །ཇི་ལྟར་མཁའ་སྤྱོད་མ་དཔལ་གཙོ། །དེ་བཞིན་བདག་ལའང་དེང་སྩོལ་ཅིག །ལན་གསུམ། དམིགས་པ་འདི་བཞིན་མཛོད། སིནྡྷ་རའི་དཀྱིལ་འཁོར་གྱི་ཤར་ཕྱོགས་སུ་ཁྲུ་གསུམ་གྱི་སར། རིན་པོ་ཆེའི་ཁྲིའི་སྟེང་དུ་པདྨ་དང་ཉི་མའི་དཀྱིལ་འཁོར་གྱི་སྟེང་ཁྱེད་རང་རྣམས་བཅོམ་ལྡན་འདས་མ་རྗེ་བཙུན་རྡོ་རྗེ་རྣལ་འབྱོར་མའི་སྐུ་ཅན་རེ་རེར་གསོལ་བར་གྱུར་པའི་སྟེང་དུ་བླ་བྲེ། གཡས་སུ་གདུགས། གཡོན་དུ་རྒྱལ་མཚན། མཐའ་སྐོར་ཀུན་ཏུ་མཆོད་པའི་ཚོགས་བསམ་གྱིས་
མི་ཁྱབ་པས་བསྐོར་ཏེ་བཞུགས་པར་མོས་པ་མཛོད། ཕེ་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་དབང་བསྐུར་གྱི་ལྷ་འཁོར་ལོ་བདེ་མཆོག་དྲུག་ཅུ་རྩ་གཉིས་མདུན་གྱི་ནམ་མཁར་བྱོན། །ཅེས་སྤྱན་དྲངས་ཏེ། དབང་གི་ལྷས་མདུན་གྱི་ནམ་མཁའི་ལྟོས་ཐམས་ཅད་ཁྱབ་ནས་བཞུགས་པར་མོས་པར་བྱས་ཏེ། ཁྱེད་རྣམས་ཀྱི་ཕྱོགས་སུ་བུམ་པ་ཅུང་ཟད་ཡོ་བ་དང་བཅས་པས་མེ་ཏོག་གི་ཆར་དབབ་ཅིང་བཀྲ་ཤིས་ཀྱིས་མངའ་གསོལ་བར་མོས་པ་མཛོད། བཀྲ་ཤིས་གང་ཞིག་ཅེས་སོགས་བློཀ་གསུམ་བྱ། ནམ་མཁར་བཞགས་པའི་དབང་གི་ལྷའི་གཙོ་མོ་རྗེ་བཙུན་རྡོ་རྗེ་རྣལ་འབྱོར་མ་དང་རིགས་ལྔས་བུམ་པ་དཀར་པོ་ཡེ་ཤེས་ཀྱི་བདུད་རྩིས་གང་བས་ཁྱེད་རང་རྣམས་ཀྱི་སྤྱི་བོ་ནས་དབང་བསྐུར། དཔའ་བོ་རྣམས་ཀྱིས་བཀྲ་ཤིས་བརྗོད། དཔའ་མོ་རྣམས་ཀྱིས་གླུ་ལེན། སྒོ་མཚམས་མ་རྣམས་ཀྱིས་བགེགས་བསྐྲད་པ་དང་བཅས་པའི་སྒོ་ནས་དབང་བསྐུར་བའི་མོས་པར་མཛོད། སློབ་དཔོན་གྱིས་བུམ་པ་སྤྱི་བོར་བཞག་ཅིང་། ངག་ཏུ་ཇི་ལྟར་བལྟམས་པ་ནས་ཤྲི་ཡེ་ཧཱུཾ་ཙཀྲ་བཱི་རཙཱ་ཨ་བྷི་ཥིཉྩ་མཱི། བཛཱི་བྷ་བ་ཨ་བྷི་ཥིཉྩ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར་བས་སྤྱི་གཙུག་ནས་རྐང་མཐིལ་ཡན་ཆད་གང་། དྲི་མ་ཐམས་ཅད་དག །དབང་ཐམས་ཅད་ཐོབ། ཆུ་ལྷག་མ་ཡར་ལུད་པ་ལས་སྤྱི་བོར་རྣམ་པར་སྣང་མཛད་ཀྱིས་དབུར་
བརྒྱན་པར་མོས་པ་མཛོད། སློབ་དཔོན་ནམ་མཁར་བཞུགས་པའི་དབང་གི་ལྷ་རྗེ་བཙུན་མ་འཁོར་དང་བཅས་པ་རྣམས་ཀྱིས་མགྲིན་གཅིག་ཏུ། ཁམས་གསུམ་ཆོས་ཀྱི་རྒྱལ་པོའི་རྒྱལ་ཚབ་ཏུ་རབ་ཏུ་གནས་པར་བྱས་པའི་མོས་པ་མཛོད། ཨོཾ་སུ་པྲ་ཏིཥྛ་སོགས་དང་མེ་ཏོག་སྤྱི་བོར་བཞག་གོ། །དེས་རྡོ་རྗེ་སློབ་དཔོན་དུ་དབང་བསྐུར་བ་ཡིན། སྔགས་ཀྱི་བཟླས་ལུང་གི་སླད་དུ་དམིགས་པ་འདི་བཞིན་མཛོད། སློབ་དཔོན་ལ་རྗེ་བཙུན་མ་དངོས་ཡིན་སྙམ་པའི་གུས་འདུད་དྲག་པོ་བྱས་པས་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་སྔགས་ཀྱི་ཕྲེང་བ་བྱེ་རུ་བསྟར་ལ་བརྒྱུས་པ་ལྟར་བསམ་གྱིས་མི་ཁྱབ་པ་བྱུང་། སློབ་དཔོན་གྱི་ཞལ་ནས་ཐོན། དེ་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མ་ཐམས་ཅད་ཀྱི་ཐུགས་ཀ་ནས་གཉིས་སུ་མེད་པའི་ཡེ་ཤེས་དང་། བྱིན་རླབས་ཐམས་ཅད་སྔགས་ཀྱི་ཕྲེང་བའི་རྣམ་པར་སྤྱན་དྲངས་ཏེ། ཞལ་ནས་འཐོན་པའི་སྔགས་ཕྲེང་དབྱེར་མེད་དུ་གྱུར་པ་དེ་ཉིད་ཁྱེད་རྣམས་རྗེ་བཙུན་མའི་སྐུ་ཅན་དུ་གསལ་བའི་ཞལ་དུ་ཞུགས་ཐུགས་ཀའི་བི་ཡིག་གི་མཐའ་ནས་ཕར་གཡས་སྐོར་དུ་དམར་ཁྱིལ་གྱིས་འཁོད་པར་མོས་པ་བྱས་ནས་སྔགས་འདིའི་རྗེས་ཟློས་མཛོད། ཨོ་ཨོ་ཨོ་སོགས་ལན་གསུམ་བརྗོད། དེ་ལྟར་བཟླས་པས་དང་པོས་རྒྱུད་བྱིན་གྱིས་བརླབས།
གཉིས་པས་དབྱེར་མེད་དུ་བྱས། གསུམ་པས་བརྟན་པར་མོས་ཏེ་སློབ་དཔོན་ལ་དྲིན་ལན་གྱི་ཚུལ་དུ་མེ་ཏོག་གཏོར་ཏེ་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་བདག་ལ་སོགས་ལན་གསུམ། ཁྱེད་རྣམས་ཀྱིས་མེ་ཏོག་གི་ཕྲེང་བ་ཕུལ་བ་དེ་ཉིད་སློབ་དཔོན་གྱིས་སྔགས་ཀྱི་ཕྲེང་བའི་རང་བཞིན་དུ་བྱས་ཏེ་ཁྱེད་རང་རྣམས་ཀྱི་སྤྱི་བོར་བཞག་སྟེ་བྱིན་གྱིས་བརླབས་པར་མོས་པ་མཛོད། །བཅོམ་ལྡན་འདི་ལ་སོགས་བརྗོད། རྡོ་རྗེ་སློབ་མ་འདི་རྣམས་ཀྱི་རྒྱུད་ལ་བཅོམ་ལྡན་འདས་མའི་གསང་སྔགས་ཀྱི་བྱིན་རླབས་དང་ནུས་མཐུ་ཐམས་ཅད་འཇུག་པར་གྱུར་ཅིག །ཅེས་སྔགས་ཀྱི་རྗེས་སུ་གནང་བ་ཡིན། དམ་བཅའ་བའི་ལུང་གི་སླད་དུ་ཉིན་རེ་བཞིན་ལ་སྔགས་ཇི་ཙམ་བཟླ་བའི་དམ་བཅའ་ཁས་ལེན་དུ་བཅུག་ལ། དུས་དེ་ནས་བཟུང་སྟེ་ཇི་སྲིད་བྱང་ཆུབ་མ་ཐོབ་ཀྱི་བར་དུ་རྗེ་བཙུན་རྡོ་རྗེ་རྣལ་འབྱོར་མ་ཡི་དམ་གྱི་ལྷར་བཟུང་ཞིང་དེའི་གསང་སྔགས་ཨོ་གསུམ་མ་ཉིན་རེ་བཞིན་ཉི་ཤུ་རྩ་གཅིག་ལ་སོགས་པ་མ་ཆགས་པར་དམ་བཅའ་སྙམ་པས་འདིའི་རྗེས་ཟློས་མཛོད། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་དུས་དེ་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་རྗེ་བཙུན་རྡོ་རྗེ་རྣལ་འབྱོར་མ་ཡི་དམ་གྱི་ལྷར་
བཟུང་ཞིང་དེའི་གསང་སྔགས་ཨོ་གསུམ་མ་ཉི་མ་རེ་རེ་བཞིན་ཉི་ཤུ་རྩ་གཅིག་ལ་སོགས་པ་མ་ཆགས་པར་འདོན་པར་དམ་འཆའ་ལགས་སོ། །དེ་རྣམས་བརྟན་པའི་ཕྱིར་སློབ་དཔོན་གྱིས་གཡོན་པའི་སྲིན་ལག་གིས་སིནྡྷ་རའི་རྡུལ་ཚོན་བླངས་ཏེ་ཁྱེད་རང་རྣམས་ཀྱི་གནས་གསུམ་དུ་རེག་པས་རྗེ་བཙུན་རྡོ་རྗེ་རྣལ་འབྱོར་མའི་སྐུ་གསུང་ཐུགས་གྱི་དངོས་གྲུབ་མ་ལུས་པ་ཐོབ་པར་བྱས་པ་ཡིན་སྙམ་དུ་མོས་པ་མཛོད། སློབ་དཔོན་གྱིས་ངག་ཏུ་ༀ་གསུམ་མ་བརྗོད། དེ་ལྟར་ན་བུམ་པའི་དབང་བསྐུར་བ་བྱིན་རླབས་ཀྱི་ཚུལ་དུ་ཐོབ། ལུས་ཀྱི་དྲི་མ་དག །ལམ་བསྐྱེད་པའི་རིམ་པ་སྒོམ་པ་ལ་དབང་། འབྲས་བུ་སྤྲུལ་པའི་སྐུའི་ས་བོན་དང་བག་ཆགས་རྒྱུད་ལ་བཞག་པ་ཡིན་སྙམ་དུ་མོས་པ་མཛོད། གསང་དབང་བྱིན་རླབས་ཀྱི་ཚུལ་དུ་བསྐུར་བ་ལ་དམིགས་པ་འདི་བཞིན་མཛོད། སིནྡྷ་རའི་དཀྱིལ་འཁོར་གྱི་དབུས་ན་བཞུགས་པའི་བཅོམ་ལྡན་འདས་མ་རྗེ་བཙུན་རྡོ་རྗེ་རྣལ་འབྱོར་མའི་བྷ་ག་ནས་བྱང་ཆུབ་ཀྱི་སེམས་དཀར་དམར་བསམ་གྱིས་མི་ཁྱབ་པ་བྱུང་སྟེ། མཎྜལ་གྱི་འོག་གི་ཐོད་པའི་བདུད་རྩི་དང་འདྲེས་པ་དེ་ཉིད་སློབ་དཔོན་གྱིས་བླངས་ཏེ་ཁྱེད་རང་རྣམས་ཀྱི་ལྕེ་ཐོག་ཏུ་བཞག་པར་མོས་པ་མཛོད། ༀ་གསུམ་མ་དང་། ཨོཾ་ཨཱཧཱུྃ། ཞེས་བརྗོད་ཅིང་། ཞེས་བྱིན་པའི་བདུད་རྩི་དེ་སངས་རྒྱས་ཐམས་ཅད་འདུས་པའི་ངོ་བོར་མོས་ནས་མྱང་བས་བདུད་རྩི་
དེས་ལུས་ཐམས་ཅད་ལ་ཁྱབ་པས་རང་བཞིན་བརྒྱད་ཅུའི་རྣམ་རྟོག་རགས་རིམ་འགགས་ནས་གསལ་སྟོང་བདེ་བས་བརྒྱན་པའི་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེས་པར་མོས་ནས་དེའི་ངང་ལ་ཅུང་ཟད་ཅིག་མཉམ་པར་འཇོག་པར་ཞུ། དེ་ལྟར་ན་གསང་བའི་དབང་བསྐུར་བ་བྱིན་རླབས་ཀྱི་ཚུལ་དུ་ཐོབ། ངག་གི་དྲི་མ་དག །ལམ་ཙཎྜ་ལཱིའི་རྣལ་འབྱོར་སྒོམ་པ་ལ་དབང་། འབྲས་བུ་ལོངས་སྤྱོད་རྫོགས་པའི་སྐུའི་ས་བོན་དང་བག་ཆགས་རྒྱུད་ལ་བཞག་པ་ཡིན་སྙམ་དུ་མོས་པར་མཛོད། ཤེས་རབ་ཡེ་ཤེས་ཀྱི་དབང་བྱིན་རླབས་ཀྱི་ཚུལ་དུ་བསྐུར་བ་ལ་དམིགས་པ་འདི་བཞིན་མཛོད། སློབ་དཔོན་གྱི་གཡོན་པའི་སྲིན་ལག་གིས་སིནྡྷ་རའི་རྡུལ་ཚོན་བླངས་ཏེ། ཁྱེད་རྣམས་ཀྱི་དཔྲལ་བ་མགྲིན་པ་སྙིང་ག་གསང་གནས་རྣམས་སུ་ཡས་རིམ་གྱིས་རེག་པས་ནམ་མཁར་བཞུགས་པའི་དབང་བསྐུར་གྱི་ལྷ་འཁོར་ལོ་བདེ་མཆོག་གི་ལྷ་ཚོགས་རྣམས་ཐབས་ཤེས་རབ་སྙོམས་པར་ཞུགས་པ་ལས་བྱུང་བའི་བྱང་ཆུབ་ཀྱི་སེམས་དཀར་ལ་དམར་བའི་མདངས་ཆགས་པ་དེ་ཁྱེད་རང་རྣམས་རྗེ་བཙུན་མར་གསལ་བའི་བྷ་གའི་ནང་ནས་ཞུགས་ཏེ་ལུས་ཐམས་ཅད་ལ་ཁྱབ་པས་རིམ་པ་བཞིན་ལྟེ་བར་བྱོན་པས་དགའ་བ། ལྟེ་བ་ནས་སྙིང་གར་བྱོན་པས་མཆོག་དགའ། སྙིང་ག་ནས་མགྲིན་པར་བྱོན་པས་དགའ་བྲལ་གྱི་དགའ་བ། མགྲིན་པ་ནས་སྤྱི་བོར་བྱོན་པས་ལྷན་ཅིག་སྐྱེས་
པའི་དགའ་བའི་ཡེ་ཤེས་མངོན་དུ་བྱས་པ་ཡིན་སྙམ་དུ་མོས་པར་བྱས་ཏེ། ལུས་ཐམས་ཅད་ལ་བྱང་ཆུབ་ཀྱི་སེམས་ཀྱིས་ཁྱབ་པས་ཉམས་མྱོང་ལྷན་ཅིག་སྐྱེས་པའི་ཡེ་ཤེས་རྒྱུད་ལ་སྐྱེས་པའི་མོས་པ་མཛད་ནས་འཁྱུད་རྒྱ་དང་བཅས་པས་འདིའི་རྗེས་ཟློས་མཛོད། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོཉ་ཧཾ། དེའི་དོན་ནི། དེ་བཞིན་གཤེགས་པ་ཐམས་ཅད་དང་རྗེས་སུ་ཆགས་པའི་བདག་ཉིད་ང་ཡིན་ནོ་ཞེས་པའི་དོན་ཡིན་ནོ། །དེ་ལྟར་ན་ཤེས་རབ་ཡེ་ཤེས་ཀྱི་དབང་བསྐུར་བ་བྱིན་རླབས་ཀྱི་ཚུལ་དུ་ཐོབ། ཡིད་ཀྱི་དྲི་མ་དག །ལམ་ཕྱག་རྒྱའི་རྣལ་འབྱོར་སྒོམ་པ་ལ་དབང་། འབྲས་བུ་ཆོས་སྐུའི་ས་བོན་དང་བག་ཆགས་རྒྱུད་ལ་བཞག་པ་ཡིན་སྙམ་དུ་མོས་པ་མཛོད། དབང་བཞི་པ་བྱིན་རླབས་ཀྱི་ཚུལ་དུ་བསྐུར་བ་ནི། སློབ་དཔོན་རྡོ་རྗེ་རྣལ་འབྱོར་མར་གསལ་བའི་ཞལ་ནས། དངོས་པོ་མེད་པའི་ཆོས་ཉིད་ཆོས། ། ནམ་མཁའ་ལྟ་བུར་དྲི་མ་མེད། །སྟོང་ཉིད་ཡེ་ཤེས་རྡོ་རྗེ་ཡི། །སྟོང་པ་ཉིད་དུ་རྣམ་པར་བསྒོམ། ཞེས་གསུངས་པའི་དོན་ཉམས་སུ་ལེན་པར་བྱེད་པ་ལ། ལུས་བསམ་གཏན་གྱི་སྤྱོད་ལམ་དང་ལྡན་པར་བྱས། ངག་རླུང་རྒྱུ་བ་སོར་བཞག །སེམས་ཀྱིས་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་སེམས་ཀྱི་ཆོ་འཕྲུལ་ཙམ་དུ་ཐག་བཅད། རང་ལྷའི་སྐུ་སྣང་ལ་རང་བཞིན་མེད་པ་སྒྱུ་མ་ལྟ་བུའི་ཕྱག་རྒྱ་ལ་
མཉམ་པར་སྦྱར་བ་དང་། དེའི་སེམས་རྒྱུད་ཕྱག་རྒྱ་དང་མཉམ་པར་སྦྱར་བ་ལས་བྱུང་བའི་འཛག་མེད་ཀྱི་བདེ་བས་རྒྱུད་གང་བ་དེ་ཡིད་ཡུལ་བྱས་ཏེ། དེའི་ངོ་བོ་ལ་བལྟས་པའི་ཚེ་སྐྱེ་འགག་གནས་པ་ལ་སོགས་པ་ཐམས་ཅད་ཀྱིས་སྟོང་པ་ནམ་མཁའ་ལྟ་བུ་སྟེ། ནམ་མཁའ་ལ་སྐྱེ་འགག་མེད་པ་བཞིན་སེམས་ལ་སྐྱེ་འགག་མེད། ནམ་མཁའ་ལ་འགྲོ་འོང་མེད་པ་བཞིན་སེམས་ལ་འགྲོ་འོང་མེད། ནམ་མཁའ་ལ་རྟག་ཆད་མེད་པ་བཞིན་སེམས་ལ་རྟག་ཆད་མེད། ནམ་མཁའ་ལ་མཐའ་དབུས་མེད་པ་བཞིན་སེམས་ལ་མཐའ་དབུས་མེད། ནམ་མཁའ་ལ་འདུས་བྱས་ཀྱི་གནོད་པས་མི་བརྫི་བ་བཞིན་སེམས་ལ་གློ་བུར་གྱི་རྐྱེན་གྱིས་མི་བརྫི། ནམ་མཁའ་ཕྱི་ནང་གིས་བསྡུས་པའི་ཆོས་ཐམས་ཅད་ལ་ཁྱབ་པ་ལྟར། སེམས་ཀྱིས་འཁོར་འདས་ཀྱིས་བསྡུས་པའི་ཆོས་ཐམས་ཅད་ལ་ཁྱབ་པ་སྟེ། མདོར་ན་སྤྲོས་བྲལ་ནམ་མཁའ་ལྟ་བུའི་ངང་ལ་བློ་ལྷོད་ཀྱིས་ཀློད་ནས་སེམས་ལ་སེམས་ཀྱིས་ལྟ་བའི་ཚུལ་གྱིས་གསལ་སྟོང་འཛིན་མེད་ཀྱི་ངང་དུ་ཅུང་ཟད་རེ་མཉམ་པར་འཇོག་པར་ཞུ། དེ་ལྟར་དབང་བཞི་པ་བྱིན་རླབས་ཀྱི་ཚུལ་གྱིས་ཐོབ། ལུས་ངག་ཡིད་གསུམ་གྱི་དྲི་མ་དག །ལམ་ཕྱག་རྒྱ་ཆེན་པོ་སྒོམ་པ་ལ་དབང་། འབྲས་བུ་ངོ་བོ་ཉིད་སྐུའི་ས་བོན་དང་བག་ཆགས་རྒྱུད་ལ་བཞག་པ་ཡིན་སྙམ་དུ་མོས་པ་མཛོད། དེས་དངོས་གཞི་གྲུབ་ནས། དེ་དག་གི་གནས་སྐབས་སུ་སོགས་
རྗེས་ཀྱི་ཆོས་གསུམ་གཞན་དང་འདྲའོ། །དེས་རྗེ་བཙུན་རྡོ་རྗེ་རྣལ་འབྱོར་མའི་བྱིན་རླབས་ཟབ་མོ་གསན་པ་ཡིན་པས་དོ་ནུབ་ནས་བཟུང་སྟེ་ཆག་མེད་ལ་སོགས་པར་བརྩོན་པ་དང་རང་གཞན་གྱི་དོན་རྒྱ་ཆེན་པོར་མཛད་པར་ཞུ། སློབ་དཔོན་གྱིས་བསོད་ནམས་འདི་ཡིས་སོགས་དང་སློབ་མ་རྣམས་རང་གནས་སུ་གཏང་ངོ་། །གསུམ་པ་རྗེས་ཆོག་ནི། མཆོད་པ་རྣམས་བསང་སྦྱང་ནས་ཕྱི་ནང་གི་མཆོད་བསྟོད། འདོད་དོན་གསོལ་བཏབ། ཧེ་རུ་ཀའི་ཡིག་བརྒྱ་ལན་གསུམ་བརྗོད་པའི་བར་བུམ་བསྐྱེད་ལྟར་རོ། །མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། ཨོ་ཁྱེད་ཀྱིས་སོགས་ནས་བཛྲ་མུ༔ སིནྡྷ་རའི་དཀྱིལ་འཁོར་གྱི་ཡེ་ཤེས་པ་དང་བུམ་ནང་གི་ཡེ་ཤེས་པ་རྣམས་རང་བཞིན་གྱི་གནས་སུ་གཤེགས་དམ་ཚིག་པ་རང་ལ་གཉིས་སུ་མེད་པར་ཐིམ། ཛཧཱུྃ་བཾ་ཧོ༔ རང་གི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ་ཨོ་བོ་སོགས་ཀྱིས་བསྲུང་ངོ་། །དགེ་བ་འདི་ཡིས་མྱུར་དུ་བདག །སོགས་བསྔོ་སྨོན་བཀྲ་ཤིས་གང་ཞིག་སོགས་ཀྱི་བཀྲ་ཤིས་བྱའོ། །སྤྱོད་ལམ་གྱི་རྣལ་འབྱོར་དང་ཆོས་ལྡན་གྱི་བྱ་བ་སོགས་ལ་འཇུག་གོ། །ཞེས་པ་འདི་ནི་ཆོས་ཀྱི་རྒྱལ་པོ་འཕགས་པས་མཛད་པའི་བྱིན་རླབས་ཀྱི་ཡིག་ཆར་མི་གསལ་བ་རྣམས་ཀྱི་གསལ་བྱེད་དུ་བདག་གི་བླ་མས་ཕྱག་ལེན་ཇི་ལྟར་མཛད་པའི་ཚུལ་རྣམས་ལས་དང་པོ་རྣམས་ལ་
ཕན་པའི་ཕྱིར་དུ་མཁྱེན་རབ་ཀྱི་དབང་ཕྱུག་རྡོ་རྗེ་འཆང་དཀོན་མཆོག་ལྷུན་གྲུབ་ལ་སོགས་པའི་མཁས་གྲུབ་རྣམས་ཀྱི་ཞབས་རྡུལ་སྤྱི་བོས་ལེན་པ་བྲང་ཏི་པ་དགེ་སློང་ནམ་མཁའ་དཔལ་བཟང་གིས་ཨེ་ཝཾ་ཐར་པ་སྦར་བའོ། །སླར་ཡང་ཕྱི་མོ་ལ་མཆན་དཀྱུས་སུ་ཤོར་བ་སོགས་ཡིག་ནོར་རྒྱུན་འབྱམས་རིགས་ཅུང་ཟད་དག་པར་བགྱིས་ཤིང་། བྱིན་རླབས་ཀྱི་སྐབས་འཕགས་པ་རིན་པོའི་ཡིག་ཆར་ཞལ་འཕང་མཛད་པ་འགའ་ཞིག་ཕྱོགས་འདིར་ཞལ་འདྲིས་མེད་པའི་ལས་དང་པོ་པ་ལ་ཕན་པར་བསམས་ནས་དཀྱུས་སུ་བྲིས་པ་དགེ། །འདིས་ཀྱང་བསྟན་པ་དང་སེམས་ཅན་ལ་ཕན་པར་གྱུར་ཅིག ༈ །རྗེ་བཙུན་རྡོ་རྗེ་རྣལ་འབྱོར་མའི་བྱིན་རླབས་ཀྱི་ཟུར་འདེབས་ཉུང་གསལ་བཞུགས་སོ། །ན་མོ་གུ་རུ་བཛྲ་ཡོ་གི་ནཱི་པཱ་དཱ་ཡ། རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བྱིན་རླབས་བྱ་ཚུལ་མཐོང་བ་དོན་ལྡན་གྱི་ཟུར་འདེབས་ཅུང་ཟད་བརྗོད་པ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། ཚེས་བཅུ་རྣམ་པ་གཉིས་གང་ཡང་རུང་བའི་དུས་ཁྱད་པར་ཅན་གྱི་ཚེ། གནས་དབེན་པར་སྟེགས་བུའི་དབུས་སུ་མཎྜ་ལར་རྡུལ་ཚོན་གྱི་ཆོས་འབྱུང་ཉིས་བརྩེགས་ཀྱི་ནང་ཐམས་ཅད་ཚོན་དམར་པོ། ཕྱི་རོལ་གྱི་བར་ཐམས་ཅད་ལྗང་གུ། བཅད་དཀར་པོ། དབུས་སུ་ཟླ་གདན་ལ་ཚོན་ཕུང་དམར་པོ་བཀོད་པ་ནི་སྐུ་ཚོམ་བུའི་དཀྱིལ་འཁོར། དེའི་སྟེང་དུ་མཉྫིའི་ཁར་ཐོད་པ་བདུད་རྩིས་གང་བ་དར་རམ་རས་དམར་པོས་བཀབ་
པ་ནི་གསུང་བདུད་རྩིའི་དཀྱིལ་འཁོར། དེའི་སྟེང་དུ་མེ་ལོང་ལ་སིན་ར་བཀྲམ་པར། གསེར་གྱི་ཐུར་མའམ་རྡོ་རྗེའི་རྗེས་ཆོས་འབྱུང་ཉིས་བརྩེགས་ཀྱི་མདུན་རྒྱབ་སྤངས་པའི་གྲྭ་བཞིར་དགའ་བ་འཁྱིལ་པ་བཞི། དབུས་སུ་པཾ། དེའི་མཐར་མདུན་ནས་བརྩམས་ཏེ་གཡོན་སྐོར་གྱིས་ཨོ་གསུམ་མའི་སྔགས་ཀྱིས་བསྐོར་བ་བྲིས་ཏེ་བཤམས་པ་ནི་ཐུགས་སིནྡྷ་རའི་དཀྱིལ་འཁོར་རོ། །དེའི་མདུན་སོགས་གང་བདེར་ཏིང་ལོ་ཆུང་དུ་འབྲི་མོག་གིས་ཁ་བསྒྱུར་བ་དང་། སྟེང་དུ་དར་དམར་རམ་ལྭ་དམར་ལྟ་བུའི་གུར་ཁང་མཛེས་པར་ཕུབ་པའི་མཐར་ཤར་ལྷོར་མཚམས་འཛིན་གྱི་མེ་ཏོག་དང་། ཤར་དུ་མཆོད་ཡོན་སོགས་ཆུ་གཉིས་སྔོན་འགྲོའི་ཉེར་སྤྱོད་གཡོན་སྐོར། ཤར་ལྷོ་ནས་བྱང་ཤར་གྱི་བར་དུ་གཏོར་མ་གཉིས་སམ་གསུམ། རང་གི་མདུན་དུ་ནང་མཆོད། རྡོ་རྗེ་དྲིལ་བུ། ཌ་མ་རུ། བུམ་པ་བཅུད་ལྡན། མཎྜལ། ཉེ་ལོགས་ཅི་བདེ་བར་སྔོན་འགྲོ་གཏོར་མ། སློབ་མ་ལ་དགོས་པའི་མིག་དར། མེ་ཏོག །ཏིང་ལོ་སོགས་ཉེ་བར་མཁོ་བའི་ཡོ་བྱད་ཐམས་ཅད་ལེགས་པར་འདུ་བྱའོ། །གཉིས་པ་དངོས་གཞི་ལ་གཉིས། དང་པོ་སློབ་དཔོན་གྱི་བྱ་བ་ནི། སྔོན་འགྲོ་གཏོར་མ་ལ་ཆབ་ཀྱིས་བྲན། རྡོ་རྗེའི་རྗེས་ནང་མཆོད་འཐོར། སུམྦྷས་བསང་། སྭ་བྷ་ཝས་སྦྱང་། ལག་པ་གཡས་གཡོན་གཉིས་ཀ་བསྟན་ལ། ཨོཾ་ཨཱཿཧཱུྃ་ཧ་ཧོ་ཧཱི༔ ལན་གསུམ་གྱིས་བྱིན་གྱིས་
བརླབས་ལ། འབར་བའི་ཕྱག་རྒྱས་བསྐོར་ཞིང་ཕོ་བཛྲ་ཨཱ་རལླི་ཧོ༔སོགས་ཀྱིས་སྤྱན་དྲངས་ལ་མཁའ་འགྲོ་སྤྱི་གཏོར་ལྟར་སྔགས་ལན་གསུམ་གྱིས་གཏོར་མ་ཕུལ། ཨགྷཾ་ནས་ཤབྡའི་བར་གྱིས་མཆོད་ནས། ཨོ་ཨཱཿཧཱུྃ་ཞེས་བརྗོད་ཅིང་ནང་མཆོད་སྲིན་ལག་གིས་གཏོར་ལ་རྡོ་རྗེ་དྲིལ་བུ་འཛིན་པས། ལྷ་ཡི་ཚོགས་རྣམས་མ་ལུས་དང་སོགས་ནས། ཡིད་ལ་འདོད་པ་ཀུན་འགྲུབ་ཤོག་གི་བར་བརྗོད་པའི་མཐར། དཔལ་ལྡན་བླ་མ་དམ་པ་རྣམས་ཀྱི་ཐུགས་དགོངས་རྫོགས་པ་དང་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་རྗེ་བཙུན་རྡོ་རྗེ་རྣལ་འབྱོར་མའི་གོ་འཕང་ཐོབ་པར་བྱ་བའི་ཕྱིར་དུ། སའི་ཕྱོགས་འདིར་རྗེ་བཙུན་རྡོ་རྗེ་རྣལ་འབྱོར་མའི་སིནྡྷ་རའི་དཀྱིལ་འཁོར་ཆེན་པོ་སྒྲུབ་ཅིང་མཆོད་པ་དང་བདག་ཉིད་འཇུག་ཅིང་དབང་བླང་བ་དང་། སློབ་མ་གཞུག་ཅིང་དབང་བསྐུར་བར་འཚལ་ན། སྲུང་མའི་དབང་པོ་ཁྱེད་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་གྱི་བར་དུ་བར་ཆད་ཐམས་ཅད་ཞི་བ་དང་། དེ་ནས་ཀྱང་བྱང་ཆུབ་མ་ཐོབ་ཀྱི་བར་དུ་སྲུང་ཞིང་དངོས་གྲུབ་སྒྲུབ་པའི་སྡོང་གྲོགས་མཛོད། ཅེས་དང་། གང་དག་ནག་པོའི་ཕྱོགས་ལ་མངོན་པར་དགའ་བའི་འབྱུང་པོ་གདུག་པ་ཅན་གསང་སྤྱོད་ལྟ་བར་མི་དབང་བ་དེ་དག་སའི་ཕྱོགས་འདིར་མ་
གནས་པར་གཞན་དུ་སོང་ཞིག །སུམྦྷ་སོགས་བརྗོད་ཅིང་རྡོ་རྗེ་གསོར། དྲིལ་བུ་དྲག་ཏུ་དཀྲོལ་ལ་གཏོར་མ་ཕྱི་རོལ་དུ་དོར། གནས་དང་མཆོད་པའི་ཡོ་བྱད་ལ་དམིགས་ཏེ་བསང་སྦྱང་། སྟོང་པའི་ངང་ལས་གནས་ཁང་ཧཱུཾ་ལས་རིན་པོ་ཆེ་སྣ་ཚོགས་ལས་གྲུབ་པའི་ཐར་པ་ཆེན་པོའི་གཞལ་ཡས་ཁང་གྲུ་བཞི་པ། སྒོ་བཞི་པ། རྟ་བབས་བཞིས་མཛེས་ཤིང་རྒྱན་ཐམས་ཅད་ཀྱིས་བརྒྱན་པ། མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ། ཨ་བདུན་ལས་ཐོད་པའི་སྣོད་བདུན་སོགས་ནས། རོལ་མོ་རྣམས་དྭངས་ཤིང་ཐོགས་པ་མེད་པ་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ་དུས་འཁོར་བ་ཇི་སྲིད་མ་སྟོངས་ཀྱི་བར་དུ་རྒྱུན་མི་ཆད་པར་གྱུར། སོ་སོའི་སྔགས་རྒྱ་སོགས་དཀྱུས་བཞིན་ལས། གྷནྡྷེ་ར་ཎི་ལན་གསུམ་རོལ་མོ་དང་བཅས་པས་བྱིན་དབབ། སྐྱབས་ཡུལ་གསལ་བཏབ་ལ། བདག་དང་འགྲོ་བ་སོགས་སྐྱབས་སེམས་ཀྱི་རྗེས། སྤྲོ་ན་རྡོར་སེམས་ཧེ་རུ་ཀའི་སྒོམ་བཟླས་མ་རྒྱུད་སྤྱི་ལྟར་བྱ། རང་གི་མདུན་གྱི་ནམ་མཁར་སོགས་བླ་མའི་རྣལ་འབྱོར་ནས་བརྩམས་ཏེ་བདག་བསྐྱེད་རྗེ་བཙུན་དཀོན་མཆོག་ལྷུན་གྲུབ་ཀྱིས་མཛད་པའི་སྒྲུབ་ཐབས་ལྟར་ཉམས་སུ་བླངས་པའི་མཐར། ནཱ་ད་ཡང་མི་དམིགས་པ་འོད་གསལ་སྟོང་པ་ཉིད་དུ་གྱུར་ཅེས་
པའི་རྗེས། སླར་ཡང་རང་སྐད་ཅིག་གིས་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་ཅེས་བརྗོད་ཅིང་བསམས་ལ། རང་གི་མདུན་གྱི་ནང་མཆོད་དང་། གསུང་བདུད་རྩིའི་དཀྱིལ་འཁོར་གཉིས་ཆར་ལ་དམིགས་ཏེ་བསང་སྦྱང་རྒྱས་པར་སྤྲོ་ན་བདེ་མཆོག་གི་ནང་མཆོད་བྱིན་རླབས་ལྟར་བྱ་བའམ། དེ་ཙམ་མ་གྲུབ་ན་སྒྲུབ་ཐབས་ཀྱི་མཇུག་གི་གཏོར་མ་ལྟར་བྱིན་བརླབ། དེ་ནས་རྡོ་རྗེའི་རྗེས་ནང་མཆོད་བླང་། དཀྱིལ་འཁོར་གསུམ་ཆར་ལ་གཏོར་ཏེ་བསང་སྦྱང་། སྟོང་པའི་ངང་ལས་ཡཾ་ལས་རླུང་སོགས་ནས། ཡོ་ག་ཤུདྡྷོཉ་ཧཾ་ཞེས་པའི་བར་བྱིན་རླབས་ཀྱི་དཀྱུས་ལྟར། མཆོད་པ་བསང་སྦྱང་། སྟོང་པའི་ངང་ལས་ཨ་བདུན་སོགས་བྱིན་རླབས་ཀྱི་དབུ་ནས་འབྱུང་བ་ལྟར་བྱིན་བརླབ། གྷནྡྷེ་ར་ཎི་ཏ་མི་དགོས། དེ་ནས་མདུན་བསྐྱེད་རྡོ་རྗེ་རྣལ་འབྱོར་མ་དེ་ཉིད་རང་གི་རྩ་བའི་བླ་མ་དང་ཐ་མི་དད་པའི་སྟེང་གི་ཆར་བརྒྱུད་པའི་བླ་མ་རྣམས་དང་། མཐའ་སྐོར་དུ་སྐྱབས་ཡུལ་ཐམས་ཅད་ཀྱིས་བསྐོར་བ་མངོན་སུམ་བཞིན་ཏུ་བཞུགས་པར་བསམས་ལ། དེ་རྣམས་ལ་མཆོད་པའི་བསམ་པས་རྒྱས་པར་སྤྲོ་ན་ཕྱི་མཆོད་ཆུ་གཉིས་སྔོན་འགྲོའི་ཉེར་སྤྱོད། གོས་ཟུང་། རིག་མ་བཅུ་དྲུག །རྒྱལ་སྲིད་བདུན། འདོད་ཡོན་ལྔ་རྣམས་ཚིགས་བཅད་དང་སྔགས་སྤེལ་བས་སྤྱི་ལྟར་འབུལ། བསྡུ་ན་ཉེར་སྤྱོད་དང་། འདོད་ཡོན་ལྔའི་མཆོད་པ་དཀྱུས་སུ་གསལ་བ་ལྟར་གྱིས་འཐུས། ནང་
བདུད་རྩིའི་མཆོད་པ་ནི་བྱིན་གྱིས་བརླབས་པའི་ནང་མཆོད་གཡོན་པའི་སྲིན་ལག་གིས་ཐོག་མར་སྤྱི་གཙུག་ནས་འཐོར་ཞིང་། ཕྱོགས་བཅུ་དུས་གསུམ་སོགས་ནས། རྡོ་རྗེ་འཆང་རྣལ་འབྱོར་འཇམ་དཔལ་བཟང་པོའི་ཞལ་དུ་ཨོཾ་ཨཱཧཱུཾ། རྡོ་རྗེ་འཆང་ཆེན་སོགས་ནས། སཾ་ཧའི་ཞལ་དུ་ཨོཾ་ཨཱཧཱུཾ། ནམ་མཁའ་དཔལ་བཟང་བསོད་ནམས་ལྷུན་གྲུབ་དང་། །ཀུན་དགའ་བཀྲ་ཤིས་ཤེས་རབ་འབྱུང་གནས་ཞབས། ། དཔལ་མཆོག་རྒྱལ་མཚན་དམ་ཆོས་བསམ་འགྲུབ་དང་། །སངས་རྒྱས་ཕུན་ཚོགས་ཞལ་དུ་ཨོཾ་ཨཱཧཱུཾ། །བཀྲ་ཤིས་ལྷུན་གྲུབ་བསྟན་འཛིན་ལྷུན་གྲུབ་དང་། །དཔལ་ལྡན་ཆོས་སྐྱོང་རིན་ཆེན་མཆོག་གྲུབ་ཞབས། ། ནམ་མཁའ་འཆི་མེད་ཀུན་དགའ་བསྟན་འཛིན་དང་། །འཇམ་དཔལ་བཟང་པོའི་ཞལ་དུ་ཨོཾ་ཨཱཿཧཱུྃ། གཞན་ཡང་དབང་བསྐུར། རྒྱུད་བཤད། མན་ངག་མནོས། ཆོས་ཀྱི་འབྲེལ་བ་ཐོབ་པའི་བླ་མ་དམ་པ་རྣམས་ཀྱི་ཞལ་དུ་ཨོཾ་ཨཱཧཱུྃ། སྙིང་གའི་ཐད་ནས་གཏོར་ཏེ་རྗེ་བཙུན་རྡོ་རྗེ་རྣལ་འབྱོར་མའི་ཞལ་དུ༴ གཞན་ཡང་བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་གྱི་རྒྱུད། རྣལ་འབྱོར་ཆེན་པོ་བླ་ན་མེད་པའི་རྒྱུད་དེ། རྒྱུད་སྡེ་ཆེན་པོ་བཞི་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ༴ དེ་ནས་རང་གི་ལྕེ་རྩེ་སྨིན་མཚམས་སྤྱི་གཙུག་རྣམས་སུ་ཐིག་ལེ་བྱས་ལ། ཨོཾ་ཨཱཿཧཱུྃ་ཞེས་པས་ལུས་ཀྱི་ལྷ་རྣམས་མཆོད་པར་
བསམ། སྐབས་འདིར་གཏོར་མ་ལ་བར་ཕུད་བྲན་ལ་ལྟེ་བའི་ཐད་ནས་གཏོར་ཏེ། དེ་ནས་ཨོཾ་ཤྲཱི་མ་ཧཱ་ཀཱ་ལཱ་ཡ་ཨོཾ་ཨཱཿཧཱུྃ། གཞན་ཡང་ཆོས་འཁོར་བསྲུང་ཞིང་བསྟན་པ་སྐྱོང་བར་ཞལ་གྱིས་བཞེས་པའི་དཔལ་མགོན་དམ་ཚིག་ཅན་རྣམས་ཀྱི་ཞལ་དུ༔ གནས་དང་ཉེ་བའི་གནས། ཞིང་དང་ཉེ་བའི་ཞིང་། ཚནྡོ་དང་ཉེ་བའི་ཚནྡོ། འདུ་བ་དང་ཉེ་བའི་འདུ་བ། འཐུང་གཅོད་དང་ཉེ་བའི་འཐུང་གཅོད། དུར་ཁྲོད་དང་ཉེ་བའི་དུར་ཁྲོད། ཡུལ་སུམ་ཅུ་སོ་གཉིས། གནས་ཉི་ཤུ་རྩ་བཞི། དུར་ཁྲོད་ཆེན་པོ་བརྒྱད་ན་བཞུགས་པའི་དཔའ་བོ་དང་རྣལ་འབྱོར་མ་བསམ་གྱིས་མི་ཁྱབ་པ་སྤྲུལ་པའི་སྐས་འགྲོ་བ་སེམས་ཅན་གྱི་དོན་མཛད་པ་རྣམས་ཀྱི་ཞལ་དུ༔ ཞིང་སྐྱོང་བཞི་བཅུ་རྩ་བརྒྱད། ཕོ་ཉ་གནས་ལས་སྐྱེས་པ། རིགས་ལས་སྐྱེས་པ། སྔགས་ལས་སྐྱེས་པ། ལས་ལས་སྐྱེས་པའི་མཁའ་འགྲོའི་ཚོགས་དང་། གནས་གསུམ་གྱི་རྡོ་རྗེ་མཁའ་འགྲོ་མ་རྣམས་ཀྱི་ཞལ་དུ༔ གཞན་ཡང་གནོད་སྦྱིན། སྲིན་པོ། འབྱུང་པོ། ཡི་དྭགས། ཤ་ཟ། སྨྱོ་བྱེད། རྗེད་བྱེད། མ་མོ། ཞིང་སྐྱོང་། ཕོ་ཉ། འཕྲོག་མ། གྲུབ་པ་རྣམས་ཀྱི་ཞལ་དུ༔ བོད་ཁམས་སྐྱོང་བར་ཞལ་གྱིས་བཞེས་པའི་བརྟན་མ་བཅུ་གཉིས་འཁོར་དང་བཅས་པ་རྣམས་དང་། གནས་བདག །གཞི་བདག །ཡུལ་བདག །གྲོང་བདག །གཉུག་མར་གནས་པ་རྣམས་དང་། འགྲོ་བ་རིགས་དྲུག །
ལམ་རྒྱུད་ལྔ། སྐྱེ་གནས་བཞིས་བསྡུས་པའི་སེམས་ཅན་ཐམས་ཅད་ཚིམ་ཞིང་ཟག་པ་མེད་པའི་བདེ་བས་རྒྱུད་གང་ནས་མྱུར་དུ་བླ་ན་མེད་པའི་སངས་རྒྱས་ཀྱི་གོ་འཕང་ཐོབ་པའི་སྐལ་བ་དང་ལྡན་པར་གྱུར་ཅིག །ཨོཾ་ཨཱཿཧཱུྃ། ཞེས་དང་། རང་གིས་ཀྱང་མྱངས་ལ། ཨོཾ་ཨོཾ་ཨོཾ་སརྦ་སོགས་ལན་གསུམ་བརྗོད་དོ། །དཔྲལ་བར་ནམ་མཁའ་མཛོད་ཀྱི་ཕྱག་རྒྱ་བཅས་ནས། ན་མོ་ཆོས་ཀྱི་དབྱིངས་ཀྱི་བྱིན་རླབས་དང་། གྷ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་རྣམ་པར་དག་པའི་བྱིན་རླབས་དང་། གསང་སྔགས་དང་ཕྱག་རྒྱའི་མཐུ་དང་། བདག་གི་མོས་པ་དང་། ཏིང་ངེ་འཛིན་དང་། སྨོན་ལམ་གྱི་དབང་གིས་འཇིག་རྟེན་གྱི་ཁམས་ན་བདག་པོས་ཡོངས་སུ་མ་བཟུང་བའི་མཆོད་པའི་བྱེ་བྲག་ཇི་སྙེད་ཡོད་པ་དང་། གཞན་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ་ཞིག་བླ་མ་དང་། རྗེ་བཙུན་རྡོ་རྗེ་རྣལ་འབྱོར་མ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཅེས་བརྗོད་ཅིང་སེ་གོལ་བརྡབ། ཡང་ཕྱག་རྒྱ་དང་བཅས་ཏེ། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨཱ་ཝརྟ་ཡ་ཨཱ་ཝརྟ་ཡ་ཧོ༔ ན་མས་མནྟ་བུདྡྷ་ནཱཾ། ཨ་བྷི་སྨ་ར་ཡེ། སྱཱ་ར་ཎ་སི་མཾ་ག་ག་ན་ཁཾ། དྷརྨ་དྷཱ་ཏུ་ཨཱ་ཀ་ཤཱ་
ཡ་ས་མནྟ་ནཱཾ། སརྦ་ཏ་ཐཱ་ག་ཏ་ཨ་པ་རི་ཤོདྷ་ཡ། མཎྜ་ལེ་མ་མ་པྲ་ཎི་དྷི། པུཎྱ་ཛྙཱ་ན་བ་ལེ་ན། སརྦ་ཏ་ཐཱ་ག་ཏ་བ་ལེན། བནྡྷ་པྲ་སྦྲ་ན་བ་ལེ་ན་ཙཱ་ཡ་སྭཱ་ཧཱ། ཞེས་བརྗོད་ཅིང་སེ་གོལ་ལན་གཉིས་བརྡབ་པ་ནི་ཡིད་བྱུང་གི་མཆོད་པའོ། །བསྟོད་པ་ནི། ཨོཾ་ན་མོ་བྷ་ག་ཝ་ཏེ་བཛྲ་ཝཱ་རཱ་ཧཱི་བཾ་ཧུཾ་ཧཱུྃ་ཕཊ། ༀ་ན་མ་ཨཱརྱ་ཨ་པ་རཱ་ཛི་ཏེ་ཏྲི་ལོ་ཀྱ་མཱ་ཏེ་མ་ཧཱ་བིདྱེ་ཤྭ་རི་ཧཱུྃ་ཧཱུྃ་ཕཊ། ཨོཾ་ན་མོ་སརྦ་བྷུ་ཏ་བྷ་ཡ་བ་ཧེ་མ་ཧཱ་བཛྲ་ཧཱུྃ་ཧཱུྃ་ཕཊ། ཨོཾ་ན་མོ་བཛྲ་ཨཱ་ས་ནེ་ཨ་ཛི་ཏེ་ཨ་པ་རཱ་ཛི་ཏེ་ཝ་ཧཱུྃ་ཀ་རི་ན་ཏྲ་བྷ་མ་ཎཱི་ཡེ་ཧུཾ་ཧཱུྃ་ཕཊ། ཨོཾ་ན་མོ་བི་ཥ་ནི་ཤོ་ཥ་ནི་རོ་ཥ་ནི་ཀྲོ་དྷེ་ཀ་རཱ་ལི་ནི་ཧུཾ་ཧཱུྃ་ཕཊ། ཨོཾ་ན་མོ་སྨྲ་ས་ནི་མཱ་ར་ཎི་སུ་པྲ་བྷེ་ད་ནི་ཨ་པ་རཱ་ཛ་ཡེ་ཧུཾ་ཧཱུྃ་ཕཊ། ཨོཾ་ན་མོ་བི་ཛ་ཡེ་ཛམྦྷ་ནི་སྟམྦྷ་ནི་མོ་ཧ་ནི་ཧུཾ་ཧཱུྃ་ཕཊ། ཨོཾ་ན་མོ་བཛྲ་ཝཱ་རཱ་ཧཱི་བི་མ་ཧཱ་ཡོ་གི་ནི་ཀཱ་མེ་ཤྭ་རི་ཁ་གེ་ཧཱུྃ་ཧཱུྃ་ཕཊ། ཅེས་ཡུམ་གྱི་རྐང་བརྒྱད་དང་། དཔལ་ལྡན་རྡོ་རྗེ་མཁའ་འགྲོ་མ་སོགས་གློ་ཀ་གཉིས་ཀྱིས་བསྟོད། རྒྱས་པར་སྤྲོ་ན། ཡེ་ཤེས་ཆེན་པོའི་མཛོད་འཛིན་སོགས་ངོར་ཆེན་རྡོ་རྗེ་འཆང་ཆེན་པོས་མཛད་པའང་བྱ། བསྡུ་ན། དཔལ་ལྡན་རྡོ་རྗེ་མཁའ་འགྲོ་སོགས་དང་། བཅོམ་ལྡན་འདས་མས་སོགས་ཀྱིས་གསོལ་བ་གདབ། གཏོར་མ་དཀྱུས་སུ་འདིར་འབུལ་བར་གསུངས་ཀྱང་བདག་འཇུག་གི་རྗེས་སུ་འབུལ་བ་སྟབས་བདེ་བས་ཕྱག་ལེན་ལ་དེ་ལྟར་མཛད། བུམ་པ་དཀྱུས་ལྟར་བསྒྲུབ། །བདག་འཇུག་ནི། རང་
གི་མདུན་དུ་མཎྜལ་དང་མེ་ཏོག་སོགས་བཤམ། ཇི་ལྟར་བལྟམས་པ་སོགས་ནས། ཤྲི་ཡེ་ཧཱུྃ་ཞེས་བརྗོད་ཅིང་བུམ་ཆུས་ཁྲུས་བྱ། ཨོཾ་བཛྲ་བྷ་མི་སོགས་མཎྜལ་ཚོམ་བུ་བདུན་མའི་མཐར། མ་ཚང་བ་མེད་པ་འདི་ཉིད་བླ་མ་དང་རྗེ་བཙུན་རྡོ་རྗེ་རྣལ་འབྱོར་མ་ཐ་མི་དད་པ་ལ་འཇུག་པའི་ཆོས་རྣམས་ཞུ་བའི་ཡོན་དུ་སོགས་མེ་ཏོག་དང་བཅས་པས་ཐལ་མོ་སྦྱར་ཏེ། གང་གི་དྲིན་གྱིས་སོགས་ནས། བརླབ་ཏུ་གསོལ། ལན་གསུམ། ཨཱ་ཁཾ་བཱི་ར་ཧཱུཾ་ལན་གཉིས་ཀྱིས་གདོང་བཅིངས་ཤིང་། མེ་ཏོག་གི་ཕྲེང་བ་བླང་བར་མོས། མདུན་བསྐྱེད་ཀྱི་རྣལ་འབྱོར་མའི་ཐུགས་ཀ་ནས་ཁྲོ་མོ་ཁཎྜ་རོ་ཧཱིའི་ཚོགས་དཔག་ཏུ་མེད་པ་སྤྲོས་ཏེ་རང་ཉིད་ལ་བར་དུ་གཅོད་པའི་བགེགས་དང་ལོག་པར་འདྲེན་པ་ཐམས་ཅད་རྒྱང་རིང་དུ་བསྐྲད་པར་གྱུར། སུམྦྷ་སོགས་བརྗོད་ཅིང་བུམ་ཆུ་གཏོར། ཨོཾ་ཨཱཿཧཱུྃ་གིས་བདུད་རྩི་མྱོང་བས་ནང་ཁམས་ཀྱི་བར་ཆད་ཐམས་ཅད་སྦྱངས་ཤིང་བདེ་བ་ཆེན་པོས་བྱིན་གྱིས་བརླབས་པར་བསམ། རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བ་དང་བཅས་པར་གྱུར། ཨོཾ་སརྦ་སོགས། སྙིང་གར་རྡོ་རྗེ་བཞག་ལ། སུ་ར་ཏི་སོགས་ཀྱིས་བདེན་གཉིས་དབྱེར་མེད་དུ་སེམས་བསྐྱེད་ཅིང་བརྟན་པར་མོས། སྤྱི་བོར་རྡོ་རྗེ་བཞག་ལ། དེང་ཁྱོད་སོགས། མེ་ཏོག་དང་བཅས་པས་ཐལ་མོ་སྦྱར་ཏེ་དཀྱིལ་འཁོར་གྱི་
ཕྱོགས་ལ་མགོ་དུད་ཙམ་དང་བཅས། ཛ༔ཧཱུྃ་བཾ་ཧོཞེས་བརྗོད་པས་རང་ཉིད་སིནྡྷ་རའི་དཀྱིལ་འཁོར་གྱི་ཤར་ཕྱོགས་སུ་འཁོད་པར་མོས་ཏེ། མདུན་བསྐྱེད་ཚོགས་ཞིང་རྒྱ་མཚོས་བསྐོར་བའི་སྤྱན་སྔར་རྒྱུན་བཤགས། སྡོམ་བཟུང་། ཁྱད་པར་གྱི་དམ་ཚིག་བཟུང་བ་རྣམས་སོ་སོར་ལན་གསུམ་རེ་བྱ། དཀྱིལ་འཁོར་གྱི་གཙོ་མོ་བཅོམ་ལྡན་འདས་མའི་ཐུགས་ཀ་ནས་འོད་ཟེར་བསམ་གྱིས་མི་ཁྱབ་པ་འཕྲོས། རང་གི་ལུས་ཀྱི་ཕྱི་ནང་ཐམས་ཅད་ལ་ཕོག་པས་ཚེ་ཐོག་མ་མེད་པ་ནས་བསགས་པའི་ནད་གདོན་སྡིག་སྒྲིབ་ཐམས་ཅད་བསྲེགས་སྦྱངས། འོད་ཟེར་རྣམས་ཚུར་འདུས་ཏེ་རང་གི་ལྟེ་བའི་ནང་དུ་ཨེ་ལས་ཆོས་ཀྱི་འབྱུང་གནས་གྲུ་གསུམ་ཉིས་བརྩེགས་ཀྱི་ནང་དུ། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བཻ་ཡིག་སོགས་ནས་ཞེས་པས་དམར་ཁྱིལ་གྱིས་བསྐོར་བར་གྱུར། དེ་ལས་འོད་ཟེར་འཕྲོས་པས་སྣོད་ཀྱི་འཇིག་རྟེན་ཐམས་ཅད་གཞལ་ཡས་ཁང་དང་། བཅུད་ཀྱི་སེམས་ཅན་ཐམས་ཅད་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་འོད་ཟེར་རྣམས་ཚུར་འདུས་ཏེ་ལྟེ་བའི་པཾ་ཡིག་སྔགས་ཕྲེང་དང་བཅས་པ་ལ་ཐིམ། དེ་ཡོངས་སུ་གྱུར་པ་ལས་རང་ཉིད་རྗེ་བཙུན་རྡོ་རྗེ་རྣལ་འབྱོར་མ་པདྨ་དང་ཉི་མའི་གདན་ཞེས་སོགས་ནས་ཙཎྜི་ཀཱའི་ངོ་བོ་ཞེས་བརྗོད་ནས་སློབ་དཔོན་ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་
དང་། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་རྣམས་སྩལ་ཞིང་བརྟན་པར་མཛད་དུ་གསོལ། །ཞེས་ལན་གསུམ། མདུན་བསྐྱེད་ཀྱི་ཐུགས་ཀ་ནས་རྗེ་བཙུན་མའི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་གཅིག་ཏུ་བསྡུས་པའི་ངོ་བོ་རྗེ་བཙུན་མའི་སྐུ་མཐེ་བོང་གི་ཚད་ཙམ་པ་མར་མེ་གཅིག་ལས་གཉིས་ཆད་ཀྱི་ཚུལ་གྱིས་བྱུང་སྟེ་རང་གི་ཞར་དུ་ཞུགས། མགྲིན་པ་དང་སྙིང་ག་ནས་དམར་ཧྲིལ་གྱིས་སོང་བ་ལྟེ་བའི་ཆོས་འབྱུང་ཉིས་བརྩེགས་ཀྱི་དབུས་ཀྱི་པཾ་ཡིག་ལ་ཐིམ་པ་དེ་ཡོངས་སུ་གྱུར་པ་ལས་རྗེ་བཙུན་རྡོ་རྗེ་རྣལ་འབྱོར་མའི་སྐུ་རུ་གྱུར། དེས་ལུས་ཀྱི་གནས་ཉི་ཤུ་རྩ་བཞིར་བདེ་བའི་གར་སྟབས་བསམ་གྱིས་མི་ཁྱབ་པ་བསྒྱུར་བ་དང་། ནང་གི་ཆོས་འབྱུང་གི་གྲྭ་བཞི་དང་། ཕྱིའི་སྨིན་མཚམས་ཀྱི་ཐད་རྣམས་སུ་དགའ་བ་འཁྱིལ་བ་གཡོན་ཕྱོགས་སུ་འཁོར་བ་ལ་སེམས་གཏད་པས། དེའི་ཚེ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་བསམ་གྱིས་མི་ཁྱབ་པ་སྤྱན་དྲངས་ཏེ་རང་གི་ལུས་ལ་ཐིམ་པས་རྒྱུད་བྱིན་གྱིས་བརླབས་པར་གྱུར། ཨོཾ་གསུམ་མ་བརྗོད་ཅིང་། གུ་གུལ་གྱིས་བདུག །རོལ་མོའི་སྒྲ་སྦྱར། སྤྱི་བོར་རྡོ་རྗེ་རྒྱ་གྲམ་གྱི་ཚུལ་དུ་བཞག་ཅིང་། ཏིཥྛ་བཛྲས་བརྟན་པར་བྱ། མེ་ཏོག་གི་ཕྲེང་བ་རྗེ་བཙུན་མར་ཕུལ་བའི་མོས་པས། ཨོ་པྲ་ཏིཙྪ་བཛྲ་ཧོ༔ ཞེས་བརྗོད་ཅིང་དོར་བའི་ཚུལ་བྱ། སླར་ཡང་སྤྱི་བོར་
བཞག་པར་མོས་ཏེ། ཨོ་པྲ་ཏཱི་གྲིཉྩ་སོགས་བརྗོད། ཨོཾ་བཛྲ་ནི་ཏྲ་སོགས་བརྗོད་ལ་མིག་དར་དབྱེ་བའི་ཚུལ་བྱ། སིནྡྷ་རའི་དཀྱིལ་འཁོར་རྟེན་དང་བརྟེན་པར་བཅས་པ་མངོན་སུམ་བཞིན་དུ་མཐོང་བར་གྱུར་ཅེས་བརྗོད་ཅིང་བསམས་པ་རྣམས་ནི་འཇུག་པའི་ཆོས་འཁོར་དང་བཅས་པའོ། །དངོས་གཞིའི་དབང་གི་སླད་དུ། མཎྜལཾ་གླིང་བཞི་རི་རབ་ཉི་ཟླ་ཟུང་གཅིག་ལྷ་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་འདི་ཉིད་བླ་མ་དང་རྡོ་རྗེ་རྣལ་འབྱོར་མ་ཐ་མི་དད་པ་ལ་དངོས་གཞིའི་ཆོས་རྣམས་སོགས། ཐལ་མོ་སྦྱར་ཏེ། རྣལ་འབྱོར་མ་དཔལ་སོགས་ལན་གསུམ་གྱིས་གསོལ་བ་གདབ། སིནྡྷ་རའི་དཀྱིལ་འཁོར་གྱི་ཤར་ཕྱོགས་སུ་དབང་སྟེགས་རིན་པོ་ཆེའི་ཁྲི་པདྨ་དང་ཉི་མའི་གདན་གྱི་སྟེང་དུ། རང་ཉིད་རྗེ་བཙུན་རྡོ་རྗེ་རྣལ་འབྱོར་མའི་སྐུ་ཅན་དུ་གསལ་བའི་སྟེང་དུ་བླ་བྲེ། གཡས་སུ་གདུགས། གཡོན་དུ་རྒྱལ་མཚན། མཐའ་སྐོར་དུ་མཆོད་པའི་ཚོགས་བསམ་གྱིས་མི་ཁྱབ་པས་བསྐོར་བ། ཕོ་ཐུགས་ཀའི་ས་བོན་ལས་འོད་ཟེར་འཕྲོས་པས་དབང་གི་ལྷ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་མདུན་གྱི་ནམ་མཁར་བྱོན། རྡོར་དྲིལ་འཛིན་པས་མེ་ཏོག་གཏོར་ཞིང་། བཀྲ་ཤིས་གང་ཞིག་སོགས་ནས། འདྲེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཅེས་བརྗོད་ནས། བུམ་པ་སྤྱི་བོར་བཞག་ཅིང་། ཇི་ལྟར་བལྟམས་པ་སོགས་
ནས་ཨ་བྷི་ཥིཉྩ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར་བས་སྤྱི་གཙུག་ནས་རྐང་མཐིལ་ཡན་ཆད་གང་། དྲི་མ་ཐམས་ཅད་དག །དབང་ཐམས་ཅད་ཐོབ། ཆུའི་ལྷག་མ་ཡར་ལུད་པ་ལས་རྣམ་པར་སྣང་མཛད་ཀྱིས་དབུར་བརྒྱན། དབང་གི་ལྷས། ཨོཾ་སུ་པྲ་ཏིཥྛ་བཛྲ་ཡ་སྭཱ་ཧཱས་སྤྱི་བོར་མེ་ཏོག་བཞག་པར་བསམ། རྗེ་བཙུན་མའི་ཐུགས་ཀའི་སྔགས་ཕྲེང་ལས་སྔགས་ཀྱི་ཕྲེང་བ་བསམ་གྱིས་མི་ཁྱབ་པ་བྱུང་སྟེ་ཞལ་ནས་འཐོན། རང་གི་ཞལ་དུ་ཞུགས་ས་བོན་གྱི་མཐར་གཡོན་སྐོར་དུ་འཁོད་པར་གྱུར། ཨོཾ་གསུམ་མ་ལན་གསུམ་བཟླ། བཅོམ་ལྡན་བདག་ལ་སོགས་ལན་གསུམ་བརྗོད་ཅིང་མེ་ཏོག་གཏོར། བཅོམ་ལྡན་འདི་ལ་སོགས་ལན་གསུམ་བརྗོད་ཅིང་མེ་ཏོག་རང་གི་སྤྱི་བོར་བཞག །སིནྡྷ་རའི་རྡུལ་ཚོན་གནས་གསུམ་དུ་རེག་པས་བྱིན་རླབས་ཀྱི་རྒྱུན་བརྟན་པར་མོས་ཏེ་ༀ་གསུམ་མ་ལན་གསུམ་བརྗོད། དེ་ལྟར་ན་བུམ་པའི་དབང་སོགས་ནས། རྒྱུད་ལ་བཞག་པ་ཡིན་ནོ། །གསང་དབང་གི་སླད་དུ། མདུན་གྱི་རྗེ་བཙུན་མའི་མཁའ་གསང་ནས་བྱང་སེམས་དཀར་དམར་བསམ་གྱིས་མི་ཁྱབ་པ་བྱུང་བ་ཐོད་པའི་བདུད་རྩི་དང་འདྲེས་པ་དེ་ཉིད་རང་གི་ལྕེ་ཐོག་ཏུ་བཞག་པར་བསམས་ལ། ཨོཾ་གསུམ་མ་དང་། ཨོཾ་ཨཱཿཧཱུྃ་ཞེས་བརྗོད་ཅིང་བདུད་རྩི་མྱངས་པས་རང་བཞིན་བརྒྱད་ཅུའི་རྣམ་རྟོག་རགས་རིམ་དབྱིངས་སུ་འགགས་པའི་
གསལ་སྟོང་བདེ་བས་བརྒྱན་པའི་ཏིང་ངེ་འཛིན་རྒྱུད་ལ་སྐྱེས་པར་མོས། དེ་ལྟར་ན་གསང་བའི་དབང་སོགས་ནས། བཞག་པ་ཡིན་ནོ། །ཤེས་རབ་ཡེ་ཤེས་ཀྱི་དབང་གི་སླད་དུ། སིནྡྷ་རའི་དཀྱིལ་འཁོར་ནས་བླངས་པའི་རྡུལ་ཚོན་གྱིས་རང་གི་གནས་བཞིར་རེག་པས་ནམ་མཁར་བཞུགས་པའི་འཁོར་ལོ་བདེ་མཆོག་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་བྱང་སེམས་དཀར་དམར་དཔག་ཏུ་མེད་པ་བྱུང་། རང་རྗེ་བཙུན་མར་གསལ་བའི་མཁའ་གསང་ནས་ཞུགས་ཏེ། གནས་བཞིར་དྲངས་པས་དགའ་བཞིའི་ཡེ་ཤེས་རྒྱུད་ལ་སྐྱེས་པར་མོས་ཏེ་འཁྱུད་རྒྱ་དང་བཅས་པས། ཨོཾ་སརྦ་སོགས་བརྗོད། དེ་ལྟར་ན་ཤེས་རབ་ཡེ་ཤེས་ཀྱི་སོགས་ནས། བཞག་པ་ཡིན་ནོ། །དབང་བཞི་པའི་སླད་དུ། མདུན་གྱི་རྗེ་བཙུན་མས་གསུངས་པར་བསམས་ལ། དངོས་པོ་མེད་པའི་ནས། བསྒོམ་ཞེས་བརྗོད་ཅིང་དེའི་དོན་བདེ་སྟོང་ནམ་མཁའ་ལྟ་བུའི་ངང་དུ་ཅུང་ཟད་རེ་མཉམ་པར་གཞག །དེ་ལྟར་ན་དབང་བཞི་པ་སོགས་ནས། བཞག་པ་ཡིན་ནོ། །གཙོ་བོས་ཇི་ལྟར་སོགས། ཨོཾ་བཛྲ་བྷཱུ་མི་ནས། དབང་ཡོངས་སུ་རྫོགས་པར་ཐོབ་པའི་བཀའ་དྲིན་གཏང་རག་ཏུ་དབུལ་བར་སོགས་དང་། དེང་ནས་བརྩམས་ཏེ་སོགས་བརྗོད། གཏོར་མ་བསང་སྦྱང་བྱིན་བརླབས་ལ། སྒྲུབ་ཐབས་ལྟར་འབུལ་ཞིང་འདོད་དོན་གསོལ། གཏོར་མ་གཉིས་པ་ཆོས་སྐྱོང་གི་གཏོར་
བསྔོ་རྒྱས་བསྡུས་གང་རིགས་དང་། གསུམ་པ་མཁའ་འགྲོ་སྤྱི་གཏོར་གྱི་ཚོགས་འབུལ། བསྡུ་ན་ཆོས་སྲུང་ལ་ལོགས་སུ་མ་ཕུལ་ཀྱང་རུང་། དེ་ནས་སློབ་མ་ལ་བྱ་བའི་རིམ་པ་ནི་བྱིན་རླབས་ཀྱི་དཀྱུས་སུ་གསལ་བ་ལྟར་མ་འཁྲུལ་བར་བགྱིས་བས་གྲུབ། གསུམ་པ་རྗེས་ནི། བྱིན་རླབས་ཀྱི་ཆོ་གའི་དཀྱུས་ལྟར་ལ། བཀྲ་ཤིས་ནི་ཚིགས་བཅད་ཀྱི་མཚམས་སུ་དྲིལ་བུ་གསིལ་ཞིང་མེ་ཏོག་འཐོར་བ་དང་བཅས། བཀྲ་ཤིས་གང་ཞིག་ཆོས་ཀྱི་དབྱིངས་ལས་ལེགས་བྱུང་བ། །ཧེ་རུ་ཀ་དཔལ་འཇིགས་བྱེད་རྒྱལ་པོ་འབར་བའི་སྐུ། །ཤེས་རབ་ཕག་མོའི་པདྨར་རྡོ་རྗེ་རོལ་མཛད་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཧེ་རུ་ཀ་དཔལ་འབར་བའི་སྐུ་མངའ་བ། །ཧ་ཧའི་གད་རྒྱངས་ས་གསུམ་གཡོ་བར་བྱེད། །ཧཱུྃ་ཧཱུྃ་ཕཊ་ཕཊ་བདུད་ཀྱི་ཀླད་འགེམས་པའི། །བདེ་མཆོག་འཁོར་ལོའི་བཀྲ་ཤིས་དེང་འདིར་སྩོལ། ། ཨེ་ཝཾ་མཉམ་པར་སྦྱོར་བ་སྔགས་ཀྱི་སྐུ། །ཨཱ་ལི་ཀཱ་ལི་གཉིས་མེད་རོལ་པའི་གསུང་། །ཨོྃ་གྱི་ངོ་བོར་སོན་པའི་ཐུགས་མངའ་བ། །རྡོ་རྗེ་ཕག་མོའི་བཀྲ་ཤིས་དེང་འདིར་སྩོལ། །ཞེས་དང་། གཞན་ཡང་ཤིས་བརྗོད་ཇི་ལྟར་རིགས་པས་བདེ་ལེགས་སུ་བྱ་ཞིང་། ལས་ཀྱི་རྗེས་མི་མངོན་པར་བསྡུའོ། སྐབས་གཞན་ཏུ་སྒྲུབ་མཆོད་རྒྱས་པར་བྱ་བར་འདོད་ནའང་ཆོ་གའི་འགྲོས་སྤྱིར་གོང་ལྟར་ལ། མཆོད་ཕྲེང་དང་། བསྟོད་
པ་སོགས་ཁ་འཕངས་སུ་བྱས་པ་རྣམས་སྦྱར་བ་ཙམ་གྱིས་ལེགས་པར་གྲུབ་པ་ཡིན་ནོ། །ཚོགས་ཀྱི་མཆོད་པ་མདོར་བསྡུ་ས་བྱེད་ན། ཚོགས་བསགས་པར་འདོད་ན་ཡར་ངོའི་ཚེས་བཅུ་དང་། སྒྲིབ་པ་སྦྱོང་བ་ལ་མར་ངོའི་ཚེས་བཅུར། སྦྱོར་བའི་སྐབས་གཞན་འདྲ་བ་ལ། དཀྱིལ་འཁོར་གྱི་ཉེ་ལོགས་གང་བདེ་རམ་ད་ན་དང་ཆང་བཱ་ཤ་ལ་གཙོ་བོར་གྱུར་པའི་བཟའ་བཅའ་བཏུང་བའི་ཡོ་བྱད་ཅི་འབྱོར་པ་གཙང་ཞིང་བཀོད་པས་མཛེས་པར་བཤམས། དངོས་གཞི་བདག་འཇུག་གཏོར་བསྔོ་ཡན་ལེགས་པར་གྲུབ་ནས། ཚོགས་ཀྱི་ཡོ་བྱད་རྣམས་ལ་ནང་མཆོད་ཆུ་ཆང་གིས་སྦྱང་། སློབ་དཔོན་གྱིས་རྡོ་རྗེའི་རྗེས་ནང་མཆོད་གཏོར། བསང་སྦྱང་བྱིན་རླབས་གཏོར་མ་ལྟར་བྱ་ཞིང་། ཨོཾ་ཨཱཎཱཧཱུྃ་དང་ཧ་ཧོ༔ཧཱིལན་མང་དུ་བརྗོད་པས་བདུད་རྩིར་བསྒྱུར་བའི་དམིགས་པ་ནན་ཏན་ཏུ་བྱ། དེ་ནས་ཕུད་སྣོད་གཙང་མར་བླུགས་ལ་དཀྱིལ་འཁོར་གྱི་མདུན་ཏུ་བཞག །གཏོར་མ་རྣམས་ལའང་ཕུལ། སླར་ཡང་བདུད་རྩིས་བྲན། གང་གི་དྲིན་གྱིས་སོགས་བླ་མ་ལ་ཕྱག་འཚལ་བ་སྔོན་ཏུ་འགྲོ་བས། ༀ་གསུམ་མའི་སྔགས་ཀྱི་མཐར་ཨ་ཀཱ་རོ་བཏགས་པ་ལན་གསུམ་མམ་ལྔས་ཡི་དམ་དང་། ཆོས་སྐྱོང་ལ་སོ་སོའི་གཏོར་སྔགས་སམ། བསྡུ་ན། ཨོཾ་ཤྲཱི་བཛྲ་དྷརྨ་པཱ་ལ་ས་པ་རི་ཝཱ་ར་ཨ་ཀཱ་རོ་སོགས་ལན་གསུམ་དང་། མཁའ་འགྲོ་སྤྱི་གཏོར་གྱི་སྔགས་ཀྱིས་ཕུལ། ཚོགས་པ་ཡོད་
ན་ཞུ་འབུལ་སྤྱི་ལྟར་དང་བཅས་བཟའ་བཏུང་གི་ཚོགས་རྣམས་རྣལ་འབྱོར་པ་རྣམས་ཀྱི་མདུན་དུ་བསྟར། སྤྲོ་ན་མ་ད་ན་བདུད་རྩིར་བསམ་པའི་ཕུད། རྡོ་རྗེ་འཆང་ཆེན་སོགས་ཀྱིས་ནང་མཆོད་ཀྱི་སྐབས་ལྟར་འབུལ། གང་ལྟར་ཡང་སྙིང་གའི་པཾ་ཡིག་སངས་རྒྱས་ཐམས་ཅད་འདུས་པའི་ངོ་བོར་མཆོད་པར་བསམས་ལ། ཨ་ཧོ་སུ་ཁ་ཞེས་བརྗོད་ཅིང་ལག་གཡོན་པས་བླངས་ཏེ་ཞེན་པ་མེད་པར་ལོངས་སྤྱོད། ལྷག་མ་རྣམས་བསྡུས་ལ་ལག་པ་འབར་བའི་ཕྱག་རྒྱ་བྱས་པའི་བར་ནས། ཕོ། ཞེས་བརྗོད་པ་དང་བསྟུན། མ་ད་ནའི་ཁ་ཕྲུ་གདབ། སླར་ཡང་ནང་མཆོད་ཆུ་ཆང་གིས་བྲན། ཨོཾ་ཨཱ༔ཧཱུྃ་གིས་བདུད་རྩིའི་རྒྱ་མཚོར་བྱིན་གྱིས་བརླབ། ཨོཾ་ཁ་ཁ་ཁཱ་ཧི་ཁཱ་ཧི་ཨུཙྪིཥྚ་བ་ལིན་བྷཀྵ་སི་སྭཱ་ཧཱ། ཞེས་ལན་གསུམ་མམ་བདུན་གྱིས་བྱིན་པས་འབྱུང་པོ་ཐམས་ཅད་ཚིམས་པར་བསམས་ལ། མཚན་མོ་ཡིན་ན་དཔལ་འབར་དང་བཅས་ལམ་གྱི་གཞི་མདོར་དོར། ཤེས་ན་བརྟག་གཉིས་ལས་འབྱུང་བའི་ཀོལླ་ཨི་རེཊྛ་སོགས་ཀྱི་རྡོ་རྗེའི་གླུའམ། བདེ་མཆོག་ལས་གསུངས་པའི་དཔྱིད་ཀྱི་རྒྱལ་མོའི་གླུ་བླང་། གང་ལྟར་ཡང་རོལ་མོའི་སྒྲ་དང་བཅས། བཀྲ་ཤིས་གང་ཞིག་སོགས་ཀྱི་མཐར། འཆི་ཚེ་མགོན་དང་སོགས་སྨོན་ལམ་གང་ཤེས་གདབ། དེ་ནས་རྗེས་ཆོག་དཀྱུས་ལྟར་བྱའོ། །སྦྱིན་སྲེག་གི་ཆོ་ག་ནི་པཎ་ཆེན་ནམ་མཁའ་དཔལ་བཟང་གི་གསུང་རབ་ལྟར་
ལ། སྡིག་སྒྲིབ་སྦྱོང་བའི་སླད་དུ་མར་མེའི་སྦྱིན་སྲེག་བྱེད་པར་འདོད་ན། ཀོང་བུ་ཡངས་པར་རས་དམར་གྱི་ལྡོང་བུ་སྦོམ་པོ་བཙུགས། མར་དཀར་གྱི་ཁུ་བས་དགང་། དེའི་མདུན་ཏུ་འབྱོར་ན་ཟླུམ་གཏོར་གཅིག་དང་། མཆོད་པ་ལྔ་བཤམ། བདག་བསྐྱེད་བཟླས་པ་དང་བཅས་པ་བྱ་བའམ། ཐུན་མཚམས་ཀྱི་ལྷ་རྡོ་རྗེ་རྣལ་འབྱོར་མར་དྲན་པ་ཙམ་གྱིས་ཀྱང་རུང་སྟེ། གང་ལྟར་ཡང་མར་མེ་སྦར་ལ། སུམྦྷས་བསང་། སྭ་བྷཱ་བས་སྦྱང་། སྟོང་པའི་ངང་ལས་བཾ་ཡིག་དམར་པོ་ཡོངས་སུ་གྱུར་པ་ལས་སྐད་ཅིག་གིས་རྗེ་བཙུན་རྡོ་རྗེ་རྣལ་འབྱོར་མ་སོགས་ནས། ཙཎྜི་ཀཱའི་ངོ་བོ། ཕོ། ཐུགས་ཀའི་ནས། ཛཧཱུྃ་བཾ་ཧོ༔ མདུན་བསྐྱེད་ལ་གཉིས་སུ་མེད་པར་ཐིམ་ཞེས་པའི་བར་གྱིས་གསལ་གདབ། དེ་ནས་མདུན་དུ་བསྲེག་རྫས་ཏིལ་ནག་པོ་བཞག་ལ། བདག་གིས་ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་སྣ་སྒོ་ནས་སྡིག་པ་རྭ་ཅན་གྱི་རྣམ་པས་ཐོན་ཏེ་མདུན་གྱི་ཏིལ་ལ་ཐིམ། ཨོཾ་ཨཱཿཧཱུྃ་གིས་བདུད་རྩིར་བསྒྱུར་བ་དེ་ཉིད་རྗེ་བཙུན་མའི་ཞལ་དུ་ཕུལ་བས་སྡིག་སྒྲིབ་ཐམས་ཅད་སྦྱངས་པར་བསམས་ལ་མཐེབ་སྲིན་གྱིས་བླངས་ཏེ། ཨོཾ་བཛྲ་ཌ་ཀི་ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ཤཱནྟཾ་ཀུ་རུ་སྭཱ་ཧཱ། ཞེས་སམ། ༀ་གསུམ་མའི་མཐར། སརྦ་པཱ་པཾ་སོགས་བཏགས་པ་གང་ཡང་རུང་བས་མར་མེ་མ་ཟད་བར་དུ་ཕུལ། མར་མེ་ཟད་པར་བརྩམས་པ་ན་མཆོད་
གཏོར་ཡོད་ན་ཨོཾ་ཨཱཿཧཱུྃ་གིས་བྱིན་གྱིས་བརླབ། ཨོཾ་བཛྲ་པུཥྛ་ཨཱཿཧཱུྃ་སོགས་ཀྱིས་ཕྱི་མཆོད་དང་། ཨོ་ཨཱཿཧཱུྃ་གིས་ནང་མཆོད་ཕུལ། དཔལ་ལྡན་རྡོ་རྗེ་མཁའ་འགྲོ་སོགས་ཀྱིས་བསྟོད། གཏོར་མ་བསང་སྦྱང་བྱིན་རླབས་སྒྲུབ་ཐབས་ལྟར་ཕུལ། གང་ལྟར་ཡང་། བཅོམ་ལྡན་འདས་མས་བདག་གི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་མཛད་དུ་གསོལ། །ཞེས་གསོལ་བ་གདབ། ཡི་གེ་བརྒྱ་པ་ལན་གསུམ་གྱི་མཐར། མ་འབྱོར་བ་དང་སོགས་ཀྱིས་བཟོད་པར་གསོལ། བཛྲ་མུས་ཡེ་ཤེས་པ་གཤེགས། དམ་ཚིག་པ་རང་ལ་ཐིམ། བསྔོ་སྨོན་ཤིས་བརྗོད་དཀྱུས་ལྟར་བྱས་ལ། མར་མེའི་རོ་མ་ཆུ་བོ་ཆེན་པོའམ་གཙང་སར་དོར་རོ། །འདི་ནི་སྡིག་སྒྲིབ་ཐམས་ཅད་འདག་པ་དང་། རྗེ་བཙུན་མའི་བྱིན་རླབས་འཇུག་པའི་ཐབས་ཁྱད་པར་ཅན་ཡིན་པར་གསུངས་སོ། །གཞན་ཡང་ལམ་གྱི་ཆ་རྐྱེན་པྲ་སེ་ནཱ་དབབ་པ་སོགས་ལས་ཚོགས་ཕྲ་མོ་རྣམས་ནི་དེང་སང་ལག་ལེན་ཏུ་འདེབས་མཁན་ཉུང་བས་འདིར་མ་བྲིས་ཏེ། རྟོགས་པར་འདོད་ན་ཡིག་རྙིང་སོགས་ལས་ཤེས་པར་བྱའོ། །ཞེས་མཁྱེན་རབ་ཀྱི་དབང་ཕྱུག་ཐར་རྩེ་པཎྜི་ཏ་ཆེན་པོ་ནམ་མཁའ་དཔལ་བཟང་གི་གསུང་བྱིན་རླབས་ཀྱི་ཆོ་གའི་ཞབས་ཏོག་ཏུ་དམིགས་ཏེ། འཕགས་པ་རིན་པོ་ཆེའི་གསུང་རབ་དང་། མཁན་ཆེན་བཀྲ་ཤིས་ལྷུན་གྲུབ་ཀྱི་ཟུར་འདེབས་སོགས་ཀྱི་དགོངས་པ་ཇི་ལྟ་
བར་མདོར་བསྡུས་སྙིང་པོར་དྲིལ་བའི་ཚུལ་གྱིས་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་བདག་དང་མཐའ་ཡས་པའི་སེམས་ཅན་ཐམས་ཅད་རྗེ་བཙུན་རྡོ་རྗེ་རྣལ་འབྱོར་མའི་གོ་འཕང་མཆོག་ལ་མྱུར་དུ་རེག་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །།བུམ་སྒྲུབ་ཤིན་ཏུ་བསྡུས་པར་འདོད་ན། བསང་སྦྱང་། སྟོང་པའི་ངང་ལས་པད་ཟླའི་གདན་སྟེང་དུ། །ཧཱུཾ་ལས་རིན་ཆེན་བུམ་པ་མཚན་ཉིད་རྫོགས། །ནང་བཅུད་བདུད་རྩིས་ཡོངས་སུ་གང་བའི་དབུས། །ཨེ་ཡིག་དམར་པོ་ཉིས་བརྩེགས་ཡོངས་གྱུར་ལས། །ཆོས་འབྱུང་དབུས་སུ་ཟླ་དཀྱིལ་བཻ་ཡིག་མཐར། །སྔགས་ཕྲེང་གཡོན་འཁོར་ཟེར་གྱིས་དོན་གཉིས་བསྒྲུབས། །ཚུར་འདུས་ཡོངས་གྱུར་སྐད་ཅིག་དྲན་རྫོགས་སུ། །སྣ་ཚོགས་པདྨ་ཉི་མའི་གདན་གྱི་སྟེང་། །རྣམ་སྣང་རིགས་ཀྱི་བདག་པོ་དང་བཅས་པ། །རྣལ་འབྱོར་མ་དཔལ་སོགས། །རང་གི་ཐུགས་ནས་སྔགས་ཀྱི་ཕྲེང་བ་ནི། །གཟུངས་ཐག་ལས་འཁྲིལ་བུམ་ལྷའི་སྐུ་ལ་ཕོག །བ་སྤུའི་བུ་ག་ཀུན་ནས་ཡེ་ཤེས་ཀྱི། །བདུད་རྩིའི་རྒྱུན་བབས་བུམ་པ་གང་བར་གྱུར། །ཨོཾ་ཨོཾ་ཨོཾ་སརྦ་བུདྡྷ་ཌཱ་ཀི་ནི་ཡེ། བཛྲ་ཝརྞཱ་ནཱི་ཡེ། བཛྲ་བཻ་རོ་ཙ་ནཱི་ཡེ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་བསྐྱེད་རྫོགས་མདོར་བསྡུས་པ་མཁའ་སྤྱོད་བགྲོད་པའི་གསང་ལམ།
༈ རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་བསྐྱེད་རྫོགས་མདོར་བསྡུས་པ་མཁའ་སྤྱོད་བགྲོད་པའི་གསང་
ལམ་ཞེས་བྱ་བ་བཞུགས་སོ། །བླ་མ་རྡོ་རྗེ་རྣལ་འབྱོར་མར། །བཏུད་ནས་དེ་ཡི་རིམ་གཉིས་ཚུལ། །མདོར་བསྡུས་མཁའ་སྤྱོད་རྡོ་རྗེའི་གྲོང་། །བགྲོད་པའི་གསང་ལམ་འདིར་གསལ་བྱ། །དེ་ལ་འཁོར་ལོ་བདེ་མཆོག་གི་དཀྱིལ་འཁོར་དུ་དབང་བསྐུར་བ་དང་། འདི་ཉིད་ཀྱི་བྱིན་རླབས་ཉམས་ཁྲིད་དང་བཅས་པ་ལེགས་པར་ཐོབ་ཅིང་། དམ་ཚིག་དང་སྡོམ་པར་ལྡན་པའི་གང་ཟག་གིས་ཉམས་སུ་བླང་བྱའི་ལམ་ནི། བསྐྱེད་པའི་རིམ་པ་ཕག་མོ་མཁའ་སྤྱོད། རྫོགས་པའི་རིམ་པ་རྩ་དབུ་མ། ལམ་གྱི་ཡན་ལག་པྲ་ས་ནཱ་དབབས་པ། སྨན་ཆེན་མོ་བཅུད་ལེན། གནོད་སྦྱིན་མོ་དབང་དུ་བྱ་བ་རྣམས་སུ་བཤད་པ་ལས། དང་པོ་ནི། རྗེ་ས་སྐྱ་པ་ཆེན་པོའི་ཞལ་ནས། ཉལ་དང་ལྡང་དང་བདུད་རྩི་མྱང་། །ཚད་མེད་བླ་མ་བདག་ལྷར་བསྐྱེད། །འགྲོ་བ་དག་པའི་རྣལ་འབྱོར་དང་། །དཔའ་བོ་དཔའ་མོས་བྱིན་གྱིས་རླབས། །ངག་བཟླས་ཡིད་བཟླས་གཉིས་གཅིག་ཡིན། །བསམ་མི་ཁྱབ་པའི་རྣལ་འབྱོར་དང་། །སྤྱོད་ལམ་གྱི་ནི་རྣལ་འབྱོར་ཏེ། །དེ་ལྟར་རྣལ་འབྱོར་བཅུ་གཅིག་གོ །ཅེས་གསུངས་པ་འདིར་འདུ་བ་ལས། དང་པོ་ཉལ་བའི་རྣལ་འབྱོར་ནི། ནུབ་མོ་བསམ་གྱིས་མི་ཁྱབ་པའི་རྣལ་འབྱོར་གྱིས་འོད་གསལ་སྟོང་པ་ཉིད་ཀྱི་ངང་དུ་ཉལ་པའམ། སྟོང་ཉིད་དེའི་ངང་ལས་ཐུན་མཚམས་ཀྱི་ལྷར་ལྡང་སྟེ། གནས་ཁང་ཆོས་འབྱུང་དམར་པོ་འོད་
ཀྱི་རང་བཞིན་ཅན་གྱི་ནང་དུ། རང་ཉིད་སེང་གེའི་ཁྲི་ལ་འཁོད་པའི་སྔས་མགོར་སེང་ཁྲི་པད་ཟླའི་སྟེང་དུ། རྩ་བའི་བླ་མ་རྡོ་རྗེ་ཆོས་ཀྱི་རྣམ་པར་བཞུགས་པ་ལ་མོས་གུས་དུང་ངེ་བ་དང་། ལྷ་ཡི་གསལ་སྣང་མ་བྲལ་བའི་ངང་ནས་གཉིད་ལོག །གཉིས་པ་ལྡང་བའི་རྣལ་འབྱོར་ནི། ཐོ་རངས་ནམ་གྱི་བརྒྱད་ཆ་ཙམ་ལོན་པ་ན། ནམ་མཁའ་ནས་མཁའ་སྤྱོད་ཀྱི་དཔའ་བོ་དང་རྣལ་འབྱོར་མས་ཌཱ་མ་རུའི་སྒྲ་ༀ་གསུམ་མའི་གདངས་སུ་བསྒྲགས་པས་བསྐུལ་ཏེ། འོད་གསལ་སྟོང་ཉིད་དེའི་ངང་ལས་ཆུ་ལས་ཉ་འཕར་བ་ལྟར་ཐུན་མཚམས་ཀྱི་ལྷར་ལྡང་བའམ། ཉལ་ལུགས་ཕྱི་མ་ལྟར་ན། རང་དང་བླ་མ་གནས་ཁང་སོགས་ཅིར་སྣང་ཐམས་ཅད་ལྷ་དང་གཞལ་ཡས་ཁང་དུ་གསལ་བཞིན་པའི་ངང་ནས་ལྡང་ལ། སྔས་མགོའི་བླ་མ་ལ་མོས་གུས་བྱས་པས་འོད་དུ་ཞུ་སྟེ་རང་ལ་ཐིམ་པས་རྒྱུད་བྱིན་གྱིས་བརླབ་པར་བསམ་མོ། །གསུམ་པ་བདུད་རྩི་མྱོང་བའི་རྣལ་འབྱོར་ནི། བདུད་རྩི་རིལ་བུ་དངོས་སུ་འབྱོར་ན་དང་། མ་འབྱོར་ན་བྱིན་གྱིས་བརླབ་པའི་ནང་མཆོད་སྲིན་ལག་གིས་བླངས་ཏེ། ཨོཾ་ཨཱཿཧཱུྃ་གིས་མྱོང་བས་སྙིང་གའི་པཾ་ཡིག་སངས་རྒྱས་ཐམས་ཅད་འདུས་པའི་ངོ་བོར་མཆོད་པར་བསམ། བཞི་པ་ཚད་མེད་པའི་རྣལ་འབྱོར་ནི། ཐོག་མར་ཐ་མལ་གྱི་སྣང་བ་ཐམས་ཅད་དབྱིངས་སུ་ཐིམ་པ་ལས་གནས་ཡུལ་དག་པའི་ཞིང་ཁམས་ཆེན་པོར་གསལ་བའི་ངང་།
རང་གི་སྨིན་མཚམས་ཀྱི་ཐད་ཁྲུ་གང་ཙམ་གྱིས་མཐོ་བའི་ནམ་མཁར་སེང་ཁྲི་པདྨ་ཉི་ཟླའི་གདན་ལ་རྩ་བའི་བླ་མ་སངས་རྒྱས་རྡོ་རྗེ་ཆོས། སྐུ་མདོག་དམར་པོ་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་འཛིན་པ། དར་དང་རིན་པོ་ཆེས་བརྒྱན་ཅིང་། ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས། ཡོན་ཏན་ནོར་ལྷ། ཕྲིན་ལས་མཁའ་འགྲོ་ཆོས་སྐྱོང་ཐམས་ཅད་འདུས་པའི་ངོ་བོར་གསལ་བཏབ། དེའི་མདུན་དུ་རང་ཉིད། རང་གི་གཡས་གཡོན་དུ་ཕ་མ། མདུན་དུ་གནོད་བྱེད། མཐར་སྐོར་ཀུན་ཏུ་རིགས་དྲུག་གི་སེམས་ཅན་ཐམས་ཅད་འཁོད་དེ། འདུན་པ་ཕྱོགས་གཅིག་པས་སྐྱབས་སུ་འགྲོ་བར་མོས་ལ། ངེས་འབྱུང་དང་སྙིང་རྗེ་ཆེན་པོའི་ཤུགས་དྲག་ཏུ་བསྐྱེད་བཞིན་པའི་ངང་། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ༴ །དམ་པའི་ཆོས་རྣམས །འཕགས་པའི་དགེ་འདུན་རྣམས༴ །ཞེས་ཅི་ནུས་དང་། མཐར། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། །
ཅེས་གསོལ་བ་བཏབ་པས། གདན་སེང་ཁྲི་ནས་ཡར་འོད་དུ་ཞུ། དབུའི་གཙུག་ཏོར་ནས་མར་འོད་དུ་ཞུ་སྟེ། ཐུགས་ཀའི་ཐད་དུ་འོད་དམར་པོའི་རྣམ་པར་གྱུར་པ་རང་གི་སྨིན་མཚམས་ནས་ཐིམ་པས། རང་གི་ལུས་ངག་ཡིད་གསུམ་དང་། བླ་མའི་སྐུ་གསུང་ཐུགས་དབྱེར་མེད་དུ་གྱུར་པར་བསམ་ལ་རིག་པ་འཛིན་མེད་ཀྱི་ངང་དུ་མཉམ་པར་བཞག །དེ་ནས་ཚད་མེད་དངོས་ནི། བདག་གིས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱས་ལ། སེམས་ཅན་ཐམས་ཅད་སྲིད་པའི་སྡུག་བསྔལ་གྱི་རྒྱ་མཚོ་ལས་བསྒྲལ་བར་བྱ། དེའི་ཆེད་དུ་རྡོ་རྗེ་རྣལ་འབྱོར་མའི་བསྒོམ་བཟླས་ཉམས་སུ་བླང་བར་བགྱིའོ། །ཞེས་པའི་དོན་དྲན་བཞིན་པས་ལན་གསུམ་བརྗོད། སྤྲོ་ཞིང་ནུས་ན་རྡོ་རྗེ་སེམས་དཔའི་བསྒོམ་བཟླས་ཀྱང་སྟོབས་བཞི་ཚང་བའི་དམིགས་གནད་དང་མ་བྲལ་བའི་སྒོ་ནས་མ་རྒྱུད་སྤྱི་ལྟར་བྱ། ལྔ་པ་བླ་མའི་རྣལ་འབྱོར་ལ། ཐུན་མོང་བ་ནི། རང་གི་མདུན་གྱི་ནམ་མཁར་སེང་ཁྲི་པད་ཟླའི་གདན་ལ། རྩ་བའི་བླ་མ་དཔའ་བོ་རྡོ་རྗེ་ཆོས་སྐུ་མདོག་དམར་པོ། །ཕྱག་གཡས་ཌ་མ་རུ་དང་། གཡོན་ཐོད་པ་བདུད་རྩིས་བཀང་བ་དང་། གྲུ་མོ་གཡོན་ན་ཁ་ཊཾ་ག་བསྣམས་པ། རུས་པའི་རྒྱན་དྲུག་གིས་བརྒྱན་ཅིང་། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ལང་ཚོ་དར་ལ་བབ་པའི་རྣམ་པ་ཅན། སྐྱབས་གནས་ཐམས་ཅད་འདུས་པའི་ངོ་བོར་གྱུར་
པར་བསམ་ལ་མོས་གུས་དྲག་པོས། གང་གི་དྲིན་གྱིས་སོགས་དང་། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་ཧེ་རུ་ཀར། །གསོལ་བ་འདེབས་སོ་བྱིན་གྱིས་རློབས། །ཞེས་གསོལ་བ་བཏབ་པས་འོད་དམར་པོ་བདེ་བ་ཆེན་པོའི་རྣམ་པས་རང་གི་སྤྱི་བོ་ནས་ཞུགས། སྙིང་གའི་པཾ་ཡིག་ལ་ཐིམ་པས། དེ་ཉིད་ཇེ་ཆེར་སོང་སྟེ་མཐར་ནམ་མཁའ་ལ་འཇའ་ཡལ་བ་ལྟར་གྱུར་པར་བསམ་ལ། གསལ་སྟོང་འཛིན་མེད་ཀྱི་ངང་དུ་ཅི་གནས་སུ་མཉམ་པར་བཞག །ཡང་ན་མན་ངག་ཐོབ་པས་ཐུན་མོང་མ་ཡིན་པའི་བླ་མའི་རྣལ་འབྱོར་ཉམས་སུ་བླངས་ཏེ། དེའི་ཚུལ་ནི་གཞན་དུ་ཤེས་པར་བྱའོ། །དྲུག་པ་བདག་གི་གཞི་སྦྱངས་བསྒྱུར་གྱིས་ལྷར་བསྐྱེད་པའི་རྣལ་འབྱོར་ནི། དེའི་ངང་ལས། རང་གི་སྙིང་གར་ཨེ་ཨེ་ལས་ཆོས་འབྱུང་ཉིས་བརྩེགས་ཀྱི་ནང་དུ་ཨ་ལས་ཟླ་བའི་དཀྱིལ་འཁོར་གྱི་དབུས་སུ་པཾ་ཡིག་དམར་པོའི་མཐར། ཨོཾ་ཨོཾ་ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝཎྞ་ནཱི་ཡེ། བཛྲ་བཻ་རོ་ཙ་ནཱི་ཡེ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ཞེས་པའི་སྔགས་ཕྲེང་གཡོན་སྐོར་དུ་གནས་པ་ལས་འོད་ཟེར་འཕྲོས། ལུས་ཀྱི་ཕྱི་ནང་ཐམས་ཅད་གང་བས་སྒོ་གསུམ་གྱི་སྡིག་སྒྲིབ་དག་སྟེ་ལུས་འོད་ཀྱི་གོང་བུར་གྱུར། དེ་ཡོངས་སུ་གྱུར་པ་ལས་ཆོས་འབྱུང་གྲུ་གསུམ་ཉིས་བརྩེགས་ཀྱི་གཞལ་ཡས་ཁང་གི་དབུས་སུ་སྣ་ཚོགས་པད་ཉིའི་
གདན་ལ། རང་ཉིད་རྣམ་སྣང་རིགས་བདག་དང་བཅས་པའི་རྡོ་རྗེ་རྣལ་འབྱོར་མ་ཞབས་གཡས་བརྐྱངས་པས་དུས་མཚན་མ་དམར་མོའི་ནུ་མ་བརྫིས་ཤིང་། གཡོན་བསྐུམ་པས་འཇིགས་བྱེད་ནག་པོའི་མགོ་བོ་རྒྱབ་ཏུ་བལྟས་པའི་གདོང་མནན་པ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་དག་པ་མཁའ་སྤྱོད་དུ་གཟིགས་པ། གཡས་རྡོ་རྗེས་མཚན་པའི་གྲི་གུག་ཐུར་དུ་བརྐྱང་ཞིང་། གཡོན་ཐོད་པ་ཁྲག་གིས་གང་བ་སྟེང་ཕྱོགས་སུ་བཟུང་ནས་ཞལ་གྱེན་དུ་ཕྱོགས་པས་གསོལ་བ། ཕྲག་པ་གཡོན་པར་རྡོ་རྗེས་མཚན་པའི་ཁ་ཊཾ་ག་ལ་ཌ་མ་རུ་དང་། དྲིལ་བུ་དང་། འཕེན་རྩེ་གསུམ་པ་འཕྱང་བཞིན་པ་བསྣམས་པ། བདེ་སྟོང་གི་ཉམས་མཆོག་ཏུ་རྒྱས་ཤིང་། དབུ་སྐྲ་ནག་པོ་སིལ་བུར་གྲོལ་བ། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་དོ་ཤལ་ཅན། ཕྱག་རྒྱ་སྤྱི་བོར་རུས་པའི་འཁོར་ལོ། སྙན་རྒྱན། མགུལ་རྒྱན། གདུ་བུ། སྐེ་རགས་རྣམས་སོ། །ལྔས་བརྒྱན་ཅིང་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གསལ་བཏབ། བདུན་པ་གཞན་གྱི་གཞི་སྦྱང་བསྒྱུར་འགྲོ་བ་དག་པའི་རྣལ་འབྱོར་ནི། སྙིང་གའི་པཾ་ཡིག་སྔགས་ཕྲེང་དང་བཅས་པ་ལས་འོད་ཟེར་ཁ་དོག་སྣ་ཚོགས་བ་སྤུའི་བུ་ག་ནས་ཕྱིར་འཕྲོས། རིགས་དྲུག་གི་བརྟན་གཡོ་ཐམས་ཅད་ལ་ཕོག་པས། མ་དག་པའི་སྣང་བ་སྡིག་སྒྲིབ་བག་ཆགས་དང་བཅས་པ་སྦྱངས་ཏེ། སྣོད་གཞལ་
ཡས་ཁང་དང་། བཅུད་ཐམས་ཅད་རྡོ་རྗེ་རྣལ་འབྱོར་མའི་སྐུར་གྱུར་པར་བསམ། བརྒྱད་པ་དཔའ་བོ་དཔའ་མོས་བྱིན་གྱིས་བརླབས་ཏེ་དམ་ཡེ་དབྱེར་མེད་དུ་བྱ་བ་ནི། འབར་བའི་ཕྱག་རྒྱ་དཔྲལ་བར་གཡོན་དུ་ལན་གསུམ་བསྐོར་ཞིང་། ཕོ། རང་གི་སྙིང་གའི་པཾ་ཡིག་ལས་འོད་ཟེར་འཕྲོས་པས། འོག་མིན་ནས་རྡོ་རྗེ་རྣལ་འབྱོར་མ་ལ་ཕྱོགས་བཅུའི་སངས་རྒྱས་བྱང་སེམས་དཔའ་བོ་དང་རྣལ་འབྱོར་མའི་ཚོགས་ཀྱིས་བསྐོར་བ་དང་། འགྲོ་བ་རྣལ་འབྱོར་མར་གྱུར་པ་ཐམས་ཅད་ཀྱང་། ཛཧཱུྃ་བཾ་ཧོས་རང་ཉིད་ལ་གཉིས་སུ་མེད་པར་ཐིམ་པར་བསམ། སྐབས་འདིར་མན་ངག་ཐོབ་པ་ཡིན་ན་ལུས་དཀྱིལ་གསལ་བཏབ་པ་ནི། དེའི་རྐྱེན་གྱིས་སྙིང་གའི་པཾ་ཡིག་འོད་དུ་ཞུ་བ་ལས་དབུས་སུ་པཾ་ཡིག་གི་ངོ་བོ་རྡོ་རྗེ་རྣལ་འབྱོར་མ་དམར་མོ། ཤར་ནས་བརྩམས་ཏེ་གཡོན་སྐོར་གྱིས་བཻ་ཡིག་གི་ཆ་ཤས་ཡ་ར་ལ་ཝ་བཞིའི་ངོ་བོ་སྙིང་པོའི་རྣལ་འབྱོར་མ་དཀར་ལྗང་དམར་སེར་བཞི་དང་། མཐའ་སྐོར་སྔགས་ཀྱི་ཡིག་འབྲུ་སོ་གཉིས་ཀྱང་རེ་རེ་ནས། ཡུལ་ཉེར་བཞིའི་རྣལ་འབྱོར་མ་དང་། སྒོ་མཚམས་མ་བརྒྱད་ཀྱི་ངོ་བོ་རྣལ་འབྱོར་མ་དམར་མོ་རེ་རེ་སྟེ་ཐམས་ཅད་ཀྱང་རྒྱན་ཆ་ལུགས་ཕྱིའི་རྣལ་འབྱོར་མ་ཇི་ལྟ་བ་བཞིན་གསལ་བར་གྱུར་པར་བསམ་མོ། །གང་ལྟར་ཡང་། མཐར་པད་སྐོར་འཁྱུད་རྒྱ་དང་བཅས། ཨོ་ཡོ་ག་ཤུདྡྷསརྦ་དྷརྨཱཡོ་ག་ཤུདྡྷོཉ་ཧཾ། ཐབས་
ཤེས་གཉིས་སུ་མེད་པའི་བདེ་ཆེན་གྱི་ཡེ་ཤེས་སུ་བདག་ཉིད་རྣམ་པར་དག་ལ། དེ་བཞིན་དུ་ཆོས་ཐམས་ཅད་ཀྱང་རྣམ་པར་དག་གོ་སྙམ་དུ་ང་རྒྱལ་བཟུང་ཞིང་རིག་པ་འཛིན་མེད་དུ་བཞག །དེ་ནས་གོ་ཆ་བཅིངས་པ་ནི། རང་གི་ལུས་ཀྱི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ་ལྟེ་བར་ཨོ་བོ་དམར་མོ་རྡོ་རྗེ་ཕག་མོ། སྙིང་གར་ཧཾ་ཡཾ་སྔོན་མོ་གཤིན་རྗེ་མ། ཁར་ཧྲི་མཾ་དཀར་མོ་རྨོང་བྱེད་མ། དཔྲལ་བར་ཧཱུྃ་ཧཱུྃ་སེར་མོ་སྐྱོད་བྱེད་མ། སྤྱི་གཙུག་ཏུ་ཧཱུྃ་ཧཱུྃ་ལྗང་གུ་སྐྲག་བྱེད་མ། ཡན་ལག་ཐམས་ཅད་ལ་ཕཊ་ཕཊ་དུད་ཁ་ཙཎྜི་ཀའི་ངོ་བོར་གྱུར། ཅེས་བརྗོད་ཅིང་། དེ་ཡང་གནས་སོ་སོར་ཟླ་དཀྱིལ་ལ་རྒྱབ་ཡོལ་གྱི་ཚུལ་དུ་བྱས་པའི་ངོ་བོ་ལྷ་ལ་རྣམ་པ་ཡི་གེའི་གཟུགས་སུ་འདི་ལ་བཞེད་ཚུལ་འདྲ་མིན་གཞན་ཡང་སྣང་ངོ་། །མཆན། སྦྲེང་ཚར་དུ་གསལ་བཏབ། དགུ་པ་བཟླས་པའི་རྣལ་འབྱོར་ལ་གཉིས་ཏེ། དང་པོ་མཁའ་སྤྱོད་སྒྲུབ་པའི་ལམ་གྱི་གཙོ་བོ་ངག་བཟླས་ནི། ལུས་དཀྱིལ་གསལ་གདབ་ན། ལུས་དཀྱིལ་གྱི་གཙོ་མོའི་ཐུགས་ཀར་ཆོས་འབྱུང་གྲུ་གསུམ་དམར་པོ་ཉིས་བརྩེགས་ཀྱི་ནང་དུ་ཟླ་དཀྱིལ་བཻ་ཡིག་སྔགས་ཕྲེང་དང་བཅས་པ་གསལ་བ་དང་། མ་བཏབ་ན་སྔར་གསལ་བཞིན་པའི་སྔགས་ཕྲེང་ལ་ཡིད་གཏད་པས། དེ་ལས་འོད་ཟེར་དམར་པོ་དཔག་ཏུ་མེད་པ་འཕྲོས། འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་
དཔའ་ཕོ་ཉ་གསུམ་གྱི་བྱིན་རླབས་དང་ནུས་མཐུ་མཁའ་སྤྱོད་ཀྱི་དངོས་གྲུབ་ཐམས་ཅད་འོད་དམར་པོའི་རྣམ་པས་སྔགས་ཕྲེང་ལ་ཐིམ་པས་རྒྱུད་བྱིན་གྱིས་བརླབས་པར་བསམ་ལ། ཡིད་གཞན་དུ་མ་ཡེངས་པར་བྱིན་གྱིས་བརླབ་པའི་ཕྲེང་བ་བཟུང་སྟེ་ཨོ་གསུམ་མ་དམ་བཅས་པའི་གྲངས་ལས་མི་ཉུང་བར་བཟླས། གཉིས་པ་སྤྲོས་བཅས་ཀྱི་རྫོགས་རིམ་ཡིད་བཟླས་ནི། ལུས་གནད་དང་བཅས་རླུང་རོ་བསལ། འོག་རླུང་ཅུང་ཟད་འཐེན། སྟེང་རླུང་ཆིལ་གྱིས་མནན་པ་དང་མཉམ་དུ་མཆིལ་མ་སྒྲ་མེད་ཞིག་མིད་པས་སྙིང་གའི་ཆོས་འབྱུང་ཟླ་བ་ལུས་དཀྱིལ་བཅས། བདེ་བ་བསྐྱེད་པར་འདོད་ན་གསང་གནས་དང་། མི་རྟོག་པ་བསྐྱེད་པར་འདོད་ན་ལྟེ་བར་ཕབས་ལ་རླུང་ཁ་སྦྱོར་དུ་འཛིན་པ་དང་ལྷན་ཅིག་ཡིད་ཀྱིས་ལུས་དཀྱིལ་གྱི་ལྷ་རྣམས་ཡིག་འབྲུའི་གཟུགས་སུ་བསྒྱུར། ཡ་ར་ལ་ཝ་བཞི་པཾ་ཡིག་ལ་ཐིམ་པར་བསམ་ལ། སྔགས་ཕྲེང་ཡིད་ཀྱིས་ཀློག་པའི་ཚུལ་དང་བཅས་རླུང་བུམ་ཅན་ཅི་ཐུབ་འཛིན། མཐར་བཟླས་པ་བསྡུ་བ་ན། ཕྲེང་བ་ཐལ་མོའི་བར་དུ་བཅུག་ལ། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བྱིན་གྱིས་བརླབ་ཏུ་གསོལ། །མྱུར་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་རྗེ་བཙུན་རྡོ་རྗེ་རྣལ་འབྱོར་མའི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། །ཞེས་བརྗོད་ཅིང་ཕྲེང་བ་མགོ་ཐོག་ཏུ་
བཞག །ཞར་བྱུང་གི་རྫོགས་རིམ་གཉིས་བསྒོམ་པར་འདོད་ན། དང་པོ་ནི། ཆོས་འབྱུང་གི་མདུན་རྒྱབ་སྤངས་པའི་གྲྭ་བཞིར་དགའ་འཁྱིལ་དམར་པོ་གཡོན་དུ་ཤུགས་དྲག་ཏུ་འཁོར་བ་ལ་སེམས་གཏད་པས་བདེ་བའི་ཡེ་ཤེས་སྐྱེས་པར་བསམ་ལ་རླུང་ཁ་སྦྱར་དུ་འཛིན། གཉིས་པ་ནི། ཆོས་འབྱུང་སྔགས་ཕྲེང་སོགས་རེ་ཞིག་མི་དམིགས་པའི་ངང་། ལུས་ཀྱི་དབུས་དྲང་པོར་རྩ་དབུ་མ་ཕྱི་དཀར་ལ་ནང་དམར་བ། ཡར་སྣ་སྤྱི་བོ་ནས་སྨིན་མཚམས་སུ་གུག་པ། མར་སྣ་གསང་གནས་ཀྱི་པདྨར་ཟུག་པའི་ནང་དུ་དགའ་འཁྱིལ་དམར་པོ་དང་། སྨིན་མཚམས་སུ་དགའ་འཁྱིལ་དཀར་པོ་ཆུང་དུ་གཡོན་སྐོར་ཤུགས་དྲག་ཏུ་འཁོར་བ་ལ་སེམས་གཏད་པས། མས་ཡར་ནས་རིམ་གྱིས་བྱུང་སྟེ་བདེ་བ་དང་། སྟོང་པའི་ཡེ་ཤེས་སྐྱེས། མཐར་སྙིང་གར་འདྲེས་ཏེ་དབུ་མའི་སྟོང་པའི་ངང་དུ་མི་དམིགས་པར་བསམས་ལ་འཛིན་མེད་དུ་བཞག་གོ། །དེ་ནས་བསྐྱེད་རིམ་ལ་རིམ་གྱིས་བསླབ་པའི་ཚེ། ང་རྒྱལ་ལ་སེམས་འཛིན་པ། རྣམ་པ་སྤྱི་ལ་སེམས་འཛིན་པ། བྱེ་བྲག་རྒྱན་མེད་དང་། རྒྱན་ཅན་ལ་སེམས་འཛིན་པ། ལུས་དཀྱིལ་ལ་སེམས་འཛིན་པ་རྣམས་རེག་མཐོང་གི་མཚན་མ་བརྟན་པོ་མ་སྐྱེས་ཀྱི་བར་དུ་བསྒོམ་ཞིང་། དེ་ཐམས་ཅད་འཛིན་མེད་ཀྱི་ལྟ་བ་དང་ཟུང་འབྲེལ་དུ་ཉམས་སུ་བླང་ངོ་། །བཅུ་པ་བསམ་མི་ཁྱབ་པའི་རྣལ་འབྱོར་ལ། ཐུན་མོང་བ་ནི། རང་
གི་སྙིང་གའི་པཾ་ཡིག་སྔགས་ཕྲེང་དང་བཅས་པ་ལས་འོད་ཟེར་འཕྲོས་པས། ཁམས་གསུམ་སྣོད་བཅུད་ཐམས་ཅད་འོད་དུ་ཞུ་སྟེ། གཟུགས་མེད་ཁམས་འོད་སྔོན་པོའི་རྣམ་པས་ལུས་ཀྱི་སྟོད་ཀྱི་ཆ་ལ་ཐིམ། གཟུགས་ཁམས་འོད་དམར་པོའི་རྣམ་པས་ལུས་ཀྱི་བར་གྱི་ཆ་ལ་ཐིམ། འདོད་ཁམས་འོད་དཀར་པོའི་རྣམ་པས་ལུས་ཀྱི་སྨད་ཀྱི་ཆ་ལ་ཐིམ། རང་རྡོ་རྗེ་རྣལ་འབྱོར་མར་གསལ་བ་སྙིང་གའི་ཆོས་འབྱུང་ལ་ཐིམ། དེ་ཟླ་བ་ལ་ཐིམ། དེ་སྔགས་ཕྲེང་ལ་ཐིམ། དེ་བོ་ཡིག་ལ་ཐིམ། བཻ་ཡིག་གི་ཁོག་པ་མགོ་བོ་ལ་ཐིམ། མགོ་བོ་ཟླ་ཚེས་ལ་ཐིམ། ཟླ་ཚེས་ཐིག་ལེ་ལ་ཐིམ། ཐིག་ལེ་ནཱ་ད་ལ་ཐིམ། ནཱ་ད་ཡང་མི་དམིགས་པ་འོད་གསལ་སྟོང་པ་ཉིད་ཀྱི་ངང་དུ་གྱུར་པར་བསམ་ལ་མཉམ་པར་བཞག་པའམ། མན་ངག་ཐོབ་པ་ཡིན་ན་བསམ་མི་ཁྱབ་ཐུན་མོང་མ་ཡིན་པ་བསྒོམ་སྟེ། དེའི་ཚུལ་ནི་གཞན་དུ་ཤེས་པར་བྱའོ། །བཅུ་གཅིག་གོ པ་སྤྱོད་ལམ་གྱི་རྣལ་འབྱོར་ལ་དངོས་དང་། ཡན་ལག་གཉིས་ལས་དང་པོ་ནི། རྟོག་པ་ནམ་འཕྲོ་བ་ན། སླར་ཡང་རང་སྐད་ཅིག་གིས་རྡོ་རྗེ་རྣལ་འབྱོར་མ་རྒྱན་དང་ཕྱག་མཚན་སྤངས་པའི་སྐུར་གྱུར་པའི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ་སོགས། གོ་ཆ་བཀོད་པས་བདག་དང་རྣལ་འབྱོར་སྲུང་། གནས་སྲུང་བའི་སླད། ལག་པ་གཡོན་པའི་སྡིགས་མཛུབ་ཀྱིས་སེ་གོལ་ཕྱོགས་གཡོན་སྐོར་དང་།
མཚམས་གཡས་སྐོར་དུ་བརྡབ་ཅིང་སྔགས་བརྗོད་པ་ནི། ཨོཾ་སུམྦྷ་ནི་སོགས་བརྗོད་ཅིང་། ཤར་དང་སྟེང་དུ་ཁྲ་གདོང་མ་སྔོན་མོ། དེ་བཞིན་དུ། ཨོ་གྲོཏྟཱ་སོགས་བརྗོད་ཅིང་། བྱང་དུ་འུག་གདོང་མ་ལྗང་གུ། ཨོ་གྲོཏྟཱ་པ་ཡ་སོགས་བརྗོད་ཅིང་ནུབ་དང་འོག་ཏུ་ཁྱི་གདོང་མ་དམར་མོ། ཨོ་ཨཱ་ན་ཡ་སོགས་བརྗོད་ཅིང་། ལྷོར་ཕག་གདོང་མ་སེར་མོ་རྣམས་གྲུབ་པར་བསམ། ཡང་། ཨོཾ་སུམྦྷ་སོགས་ཚར་གཅིག་གིས། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་པ་མ་གཡས་ལྗང་གཡོན་སྔོ་བ་རྣམས་གྲུབ་པར་བསམ། དེ་ཐམས་ཅད་ཀྱང་ཞལ་གཅིག་ཕྱག་བཞི་མ་དང་པོ་གཉིས་ཌ་མ་རུ་དང་ཁ་ཊཾ་ག་འོག་མ་གཉིས་གྲི་ཐོད་ཐོགས་པ། སྤྱན་གསུམ་མ། མི་མགོ་སྐམ་པོ་ལྔའི་དབུ་རྒྱན་དང་། ལྔ་བཅུའི་དོ་ཤལ་ཅན། རུས་པའི་རྒྱན་ལྔས་བརྒྱན་པ། ཞབས་གཡས་བརྐྱང་གི་སྟབས་ཀྱིས་བཞུགས་པར་གསལ་བཏབ། སླར་ཡང་ཐུན་མོང་དུ་ཨོཾ་སུམྦྷ་ནི། ཚར་གཅིག་བརྗོད་པས། དེ་རྣམས་ལ་དེ་འདྲ་བའི་སྐུ་གྲངས་མེད་པ་དང་། རྡོ་རྗེའི་གུར། མདའི་དྲྭ་བ། ཡེ་ཤེས་ཀྱི་མེ་དཔུང་གི་ཕྲེང་བ་དཔག་ཏུ་མེད་པ་སྤྲོས་ཏེ་བགེགས་ཐམས་ཅད་ཚར་བཅད། དཔག་ཚད་བརྒྱ་ཡི་ཚད་ཙམ་ཚུན་ཆད་དུ་
སྲུང་བའི་གུར་ཁང་གསལ་ཞིང་བརྟན་པར་བསམ་ནས། དགེ་བ་འདི་ཡིས་སོགས་བསྔོ་སྨོན་བྱ། སྤྱོད་ལམ་ལ་འཇུག་པའི་ཚེ་སྣང་བ་ཐམས་ཅད་རྣལ་འབྱོར་མའི་སྐུ། སྒྲར་གྲགས་པ་ཐམས་ཅད་ཨོ་གསུམ་མའི་གདངས། ཡིད་ཀྱི་དྲན་རྟོག་གང་ཤར་ཐམས་ཅད་གསལ་སྟོང་འཛིན་མེད་དུ་འཇོག་པ་སྟེ་སྐུ་གསུང་ཐུགས་ཀྱི་དགའ་བ་གསུམ་དང་མ་བྲལ་བར་ལམ་དུ་ཁྱེར་ནས་ཐ་མལ་གྱི་སྣང་ཞེན་སྤང་། གཉིས་པ་ཡན་ལག་ལ། ཁ་ཟས། ཕྱི་རོལ་མཆོད་པ། སྦྱིན་སྲེག །ཚེས་བཅུའི་མཆོད་པ། གཏོར་མའི་རྣལ་འབྱོར་དང་ལྔ་ལས། དང་པོ་ནི། རྒྱས་པར་བྱེད་ན། བཟའ་བཏུང་རྣམས་མདུན་དུ་བདར་ལ། སུས་བསངས། སྭཱ་བྷཱ་ཝས་སྦྱངས། སྟོང་པའི་ངང་ལས་རླུང་མེ་དང་། །ཐོད་པའི་སྒྱེད་པུ་གསུམ་གྱི་ཁར། །ཨ་ཡིག་ལས་བྱུང་ཀ་པཱ་ལར། །བཟའ་བཅའ་བཏུང་པའི་དངོས་པོ་ཀུན། །ཤ་ལྔ་བདུད་རྩི་རྣམ་པ་ལྔ། །བསྐོལ་ཞིང་འོད་དུ་ཞུ་བ་ལས། །དམ་ཚིག་ཡེ་ཤེས་དབྱེར་མེད་པའི། །བདུད་རྩིའི་རྒྱ་མཚོ་ཆེན་པོར་གྱུར། །ཨོཾ་ཨཱ༔ཧཱུྃ་ཧ་ཧོ༔ཧཱི༔ རང་ཉིད་རྡོ་རྗེ་རྣལ་འབྱོར་མའི། །སྙིང་གར་བླ་མ་ཡི་དམ་དང་། །ལྟེ་བར་ཆོས་སྲུང་ནོར་ལྷའི་ཚོགས། །གཏུམ་མོའི་མེ་ལྕེའི་ཀློང་ན་བཞུགས། །ལག་གཉིས་རྡོ་རྗེའི་དགང་བླུགས་ཀྱིས། །ཁ་ཟས་ཡེ་ཤེས་བདུད་རྩིའི་རྒྱུན། །ཕུལ་བས་ཟག་མེད་བདེ་བ་ཆེས། །དགྱེས་ཤིང་
བྱིན་གྱིས་བརླབ་པར་གྱུར། །ཅེས་བརྗོད་ཅིང་བསམས་ལ། ཞེན་པ་མེད་པར་ལོངས་སྤྱད། དེ་ཙམ་མི་ནུས་ན། ཨོཾ་ཨཱཿཧཱུྃ་ཧ་ཧོ༔ཧིས་བྱིན་གྱིས་བརླབས་ལ་སྙིང་གའི་པཾ་ཡིག་སངས་རྒྱས་ཐམས་ཅད་འདུས་པའི་ངོ་བོར་མཆོད་པར་མོས་པའམ། བསྡུ་ན། ལྷ་ལ་ལྷ་ཐིམ་པའི་ཚུལ་གྱིས་རོལ། གཉིས་པ་ནི། ཚར་ཆེན་རིན་པོ་ཆེའི་སྒྲུབ་དཀྱིལ་དང་། གནས་གསར་རྗེས་ནག་འགྲོས་སུ་མཛད་པ་སོགས་ལས་རྟོགས་པར་བྱ། གསུམ་པ་ལ། སྦྱིན་སྲེག་དངོས་དང་། མར་མེའི་སྦྱིན་སྲེག་གཉིས་ལས། དང་པོ་ལའང་རྒྱས་པ་དང་། མདོར་བསྡུས་ཏེ་བྱ་བའི་ཚུལ་གཉིས་ཀྱི། དང་པོ་ནི། རྡོ་རྗེ་འཆང་དབང་ཕྱུག་རབ་བརྟན་གྱི་གསུང་གནས་གསར་རིན་པོ་ཆེའི་ནག་འགྲོས་སུ་མཛད་པ་དང་། པཎ་ཆེན་ནམ་མཁའ་དཔལ་བཟང་སོགས་ཀྱིས་མཛད་པའི་ཡིག་ཆ་ཁུངས་ཐུབ་ལས་ཤེས་པར་བྱ་ལ། གཉིས་པ་མདོར་བསྡུས་པ་ནི། སྔགས་ཀྱི་ནུས་པ་དབྱུང་བ་དང་སྡིག་སྒྲིབ་ཞི་བ་སོགས་ཀྱི་སླད་དུ། རྒྱུན་གྱི་དུས་སམ་ཇི་ལྟར་རིགས་པའི་དུས་སུ། རྗེ་ས་སྐྱ་པ་ཆེན་པོས། སྤྲོས་པ་ལ་མི་དགའ་ན། རྗེ་བཙུན་མ་ཉིད་མཆོད་པ་ནས་བཟུང་སྟེ་ལྷ་མཉེས་པ་ཉིད་ཀྱིས་ཆོ་ག་མ་ཚང་བ་མེད་པ་ཡིན་ནོ། །ཞེས་གསུངས་པའི་དོན་ཀུན་མཁྱེན་རིན་པོ་ཆེ་བསོད་ནམས་སེང་གེས་ཇི་ལྟར་བཀྲལ་བ་བཞིན་བརྗོད་ན། ཐབས་སྟེགས་ཀྱི་ངོས་རེ་ཁཱ་ཟླུམ་པོ་གཉིས་སྐོར་གྱི་ནང་དུ་ཆོས་
འབྱུང་གྲུ་གསུམ་ཉིས་བརྩེགས་ཀྱི་ཐིག་གདབ། ཆོས་འབྱུང་གི་རི་མོ་རྡུལ་ཚོན་དཀར་པོས་བཅད། ནང་ཐམས་ཅད་རྡུལ་ཚོན་དམར་པོས་བཀང་། མདུན་རྒྱབ་སྤངས་པའི་གྲྭ་བཞིར་དགའ་འཁྱིལ་གཡོན་སྐོར་དང་། དབུས་སུ་ཉི་གདན་ལ་ཚོམ་བུ་དམར་པོ་བཀོད། རང་གི་གཡོན་ཐབ་ཀྱི་གཡས་སུ་མཆོད་པ་ལྔ་དང་གཏོར་མ། རང་གི་གཡས་ཐབ་ཀྱི་གཡོན་དུ་མར་ཁུ་དང་། བསྲེག་རྫས་ཏིལ་ནག་པོ་འབའ་ཞིག་བཤམས། བདག་བསྐྱེད་སྔོན་དུ་འགྲོ་བས། ཐབ་དང་ཡོ་བྱད་རྣམས། སུམྦྷས་བསང་། སྭ་བྷ་ཝས་སྦྱང་། སྟོང་པའི་ངང་ལས་ཧཱུྃ་ལས་བྱུང་བའི་རིན་པོ་ཆེ་ལས་གྲུབ་པའི་ཐབ་ཁུང་ཡངས་ཤིང་རྒྱ་ཆེ་བའི་ནང་དུ་བུད་ཤིང་བརྩེགས་པ་དང་བཅས་པ་དངས་ཤིང་ཐོགས་པ་མེད་པར་གྱུར། ཧཱུྃ། ཞེས་ཡང་ཡང་བརྗོད། མཆོད་རྫས་དང་བསྲེགས་རྫས་རྣམས་ཀྱང་། ཨོ་ཨཱཿཧཱུྃ་ལས་བྱུང་བའི་མཆོད་རྫས་དང་བསྲེག་རྫས་རྣམས་དྭངས་ཤིང་ཐོགས་པ་མེད་པ་སོ་སོའི་ལས་སྒྲུབ་པའི་ནུས་པ་དང་ལྡན་པར་གྱུར། ཨོཾ་ཨཱ༔ཧཱུྃ་ཞེས་པས་བྱིན་གྱིས་བརླབ། དེ་ནས། ཨོཾ་གསུམ་མའི་རྗེས་སུ། ཨོཾ་བཛྲ་ཛྭ་ལ་རཾ། ཞེས་པས་མེ་སྦར། བསང་སྦྱང་། སྟོང་པའི་ངང་ལས་མེ་འབར་བའི་དབུས་སུ་ཆོས་འབྱུང་གི་ནང་དུ་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་པཾ་ཡིག་དམར་པོའི་མཐར་གཡོན་སྐོར་གྱིས། ཨོ་ཨོ་ཨོ་ནས། སྭཱ་ཧཱ་ཞེས་
པའི་སྔགས་ཕྲེང་ཁ་དོག་དམར་པོས་བསྐོར་བ་དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡིག་འབྲུ་རྣམས་ལ་ཐིམ། དེ་ཡོངས་སུ་གྱུར་པ་ལས་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་པ་ནི། སྣ་ཚོགས་པདྨ་དང་ཉི་མའི་གདན་ལ་ཞབས་གཡས་བརྐྱང་པས་སོགས་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་སྟེང་འོག་ཕྱོགས་མཚམས་མཐའ་སྐོར་ཀུན་ཏུ་བླ་མ་ཡི་དམ་སངས་རྒྱས་བྱང་སེམས། དཔའ་བོ་དང་རྣལ་འབྱོར་མ་ཐམས་ཅད་ཀྱིས་བསྐོར་བར་གསལ་བཏབ། ཡེ་ཤེས་པ་གཞུག །གོ་ཆ་བཀོད། དབང་བསྐུར། རྒྱས་གདབ། ཨོཾ་སརྦ་ཏ་ཐཱ་ག་ཏ་བཛྲ་ཡོ་གི་ནི་ས་པ་རི་ཝཱ་ར་པུཉྫ་ནས། ཤབྡའི་བར་གྱིས་ཕྱི་མཆོད། ཨོཾ་གསུམ་མའི་མཐར་ཨོཾ་ཨཱ༔ཧཱུྃ་བཏགས་པས་ནང་མཆོད་ཕུལ། དཔལ་ལྡན་རྡོ་རྗེ་མཁའ་འགྲོ་མ་སོགས་ཀྱིས་བསྟོད། རང་གཞན་གྱི་སྡིག་སྒྲིབ་ཐམས་ཅད་ཏིལ་ལ་བསྟིམ་ཞིང་དེ་ཉིད་ཡེ་ཤེས་ཀྱི་བདུད་རྩིར་བསྒྱུར་ཏེ། ཐོག་མར་ༀ་གསུམ་མའི་རྗེས་སུ། ཨོཾ་སརྦ་པཱ་པཾ་ད་ཧ་ན་བཛྲ་ཡེ་བདག་གི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་གསང་སྔགས་ཀྱི་ལྷག་ཆད་ལ་སོགས་པའི་ཉེས་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ལན་གསུམ་སོགས་ཀྱི་རྗེས། ཨོཾ་གསུམ་མ་འབའ་ཞིག་གིས་ཕུལ་ལ་གྲངས་བཟུང་། དེའི་ཚེ་ནམ་མཁའི་ཁམས་ཐམས་ཅད་ཁྱབ་པའི་
སངས་རྒྱས་བྱང་སེམས་སྐུ་མདོག་དཀར་པོ་ཕྱག་ན་བུམ་པ་ཡེ་ཤེས་ཀྱི་བདུད་རྩིས་གང་བ་ཐོགས་པ་རྣམས་ཀྱིས་བདག་ལ་དབང་བསྐུར་བས་སྡིག་སྒྲིབ་ཐམས་ཅད་དག །ལུས་ཡེ་ཤེས་ཀྱི་བདུད་རྩིས་ཁེངས་ཏེ་རྡོ་རྗེ་རྣལ་འབྱོར་མའི་གོ་འཕང་ཐོབ། མདུན་བསྐྱེད་ལས་ཀྱང་འོད་ཟེར་དཀར་པོ་འཕྲོས་པས་བདག་གཞན་ཐམས་ཅད་ཀྱི་སྡིག་སྒྲིབ་སྦྱངས་བར་བསམ། སྐབས་སྐབས་སུ་མར་གྱིས་མེ་གསོ། མཐར་གོང་བཞིན་མཆོད་ཅིང་བསྟོད་ལ་གསོལ་བ་གདབ། གཏོར་མ་དང་པོ་རྗེ་བཙུན་མ་དང་། གཉིས་པ་མཁའ་འགྲོ་སྤྱི་གཏོར་ལྟར་ཕུལ། རྗེ་བཙུན་མའི་ཞབས་དྲུང་ནས་བླངས་པར་མོས་པས་འདི་ཡེ་ཤེས་པ་གཤེགས་པའི་རྗེས་སུ་བྱས་ཀྱང་རུང་། ཐབས་ཀྱི་ཐལ་བ་ཅུང་ཟད་བླངས་ཏེ་གནས་གསུམ་དུ་བྱུགས། ཡི་གེ་བརྒྱ་བས་ལྷག་ཆད་ཁ་བསྐང་། མ་འབྱོར་པ་སོགས་ཀྱིས་ནོངས་པ་བཟོད་པར་གསོལ། ཨོ་ཁྱེད་ཀྱི་སོགས་ཀྱིས་མཐར། བཛྲ་མུས་ཐབ་ཀྱི་ཡེ་ཤེས་པ་གཤེགས། ཛཧཱུྃ་བཾ་ཧོས་དམ་ཚིག་པ་རང་ལ་ཐིམ། རང་གི་གནས་རྣམས་སུ་སོགས་གོ་ཆ་བཀོད། བསྲུང་བ་བྱ། བསྔོ་སྨོན་བཀྲ་ཤིས་བརྗོད། ལས་ཀྱི་རྗེས་མི་མངོན་པར་བྱའོ། །གཉིས་པ་མར་མེའི་སྦྱིན་སྲེག་ནི། རང་གི་མདུན་དུ་སྟེགས་ཀྱི་ཁར་མར་མེའི་ཀོང་བུ་ཡངས་པར། རས་དམར་གྱིས་དཀྲིས་པའི་སྡོང་བུ་སྦོམ་པོ་བཙུགས། མར་དཀར་གྱི་ཁུ་བས་བཀང་ལ་བཞག །མ་འབྱོར་ན་
གཏོར་མ་དང་། མཆོད་པ་ལྔ་བཤམས། བསྲེག་རྫས་ཏིལ་ནག་པོ་དང་། གཞན་ཡང་རྡོར་དྲིལ་ནང་མཆོད་སོགས་འདུ་བྱས་ལ། བདག་བསྐྱེད་རྒྱས་པར་བྱ་བའམ། ཐུན་མཚམས་ཀྱི་རྗེ་བཙུན་མར་དྲན་པར་བྱས་ཏེ། མཆོད་རྫས་ནང་མཆོད་དང་། སུམྦྷས་བསང་། སྭ་བྷ་ཝས་སྦྱང་། སྟོང་པའི་ངང་ལས་ཨ་ལས་ཐོད་པའི་སྣོད་དུ་འབྲུ་གསུམ་ཞུ་བ་ལས་བྱུང་བའི་མཆོད་རྫས་དངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་བསམས་ལ། ཨོཾ་བཛྲ་པུཊྚེ་ནས། ཤབྡ་ཨཱཿཧཱུྃ་གི་བར་དང་། གྷནྡེར་ཎི་ཏས་བརླབས། དེ་ནས་ཨོ་གསུམ་མའི་རྗེས་སུ། ཨོཾ་བཛྲ་ཛྭ་ལ་རཾ། ཞེས་པས་མར་མེ་སྦར། བསང་སྦྱང་། སྟོང་པའི་ངང་ལས་ཨེ་ཨེ་ལས་ཆོས་འབྱུང་གྲུ་གསུམ་ཉིས་བརྩེགས་ཀྱི་ནང་དུ། པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་དབུས་སུ་བཾ་ཡིག་དམར་པོའི་མཐར། ཨོཾ་ཨོ་ཨོ་ནས། སྭཱ་ཧཱ། ཞེས་པའི་སྔགས་ཕྲེང་གཡོན་སྐོར་དུ་འཁོར་བ་ལས་འོད་ཟེར་འཕྲོས་འདུས་དོན་གཉིས་བྱས། དེ་ཡོངས་སུ་གྱུར་པ་ལས་རྣམ་སྣང་རིགས་བདག་དང་བཅས་པའི་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་པ་ནི། ཞབས་གཡས་བརྐྱངས་པས་སོགས་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པ། ཕོ། ཐུགས་ཀའི་བི་ཡིག་ལས་འོད་ཟེར་འཕྲོས་པས་འོག་མིན་ནས་རྗེ་བཙུན་རྡོ་རྗེ་རྣལ་འབྱོར་མ་ལ་སངས་རྒྱས་བྱང་སེམས་དཔའ་བོ་མཁའ་
འགྲོའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛ༔ ཛཧཱུྃ་བཾ་ཧོ༔ གཉིས་སུ་མེད་པར་ཐིམ། ཨོ་ཡོ་ག་ཤུདྡྷསོགས། དེའི་གནས་རྣམས་སུ་སོགས། གོ་ཆ་བཀོད། ཕྱི་མཆོད། ནང་མཆོད། བསྟོད་པ་རྣམས་བྱ། དེ་ནས་མདུན་དུ་ཏིལ་བཞག་ལ། བདག་དང་སེམས་ཅན་ཐམས་ཅད་ཀྱི་ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་ཐམས་ཅད་སྙིང་ག་ནས་ཀཾ་ནག་པོའི་རྣམ་པས་འཐོན་སྣ་སྒོར་སྡིག་པ་རྭ་ཅན་གྱི་རྣམ་པར་གྱུར་པ་ཏིལ་ལ་ཐིམ་པ་དེ་ཉིད་རྗེ་བཙུན་མའི་ཞལ་དུ་ཕུལ་བས་ལྟེ་བའི་གཏུམ་མོའི་ཡེ་ཤེས་ཀྱི་མེས་བསྲེག་ཅིང་སྦྱངས་པར་བསམ་ལ། གཡོན་པའི་མཐེབ་སྲིན་གྱིས་ཏིལ་བླངས་ཏེ་འབུལ་ཞིང་། ཨོཾ་བཛྲ་ཌཱ་ཀི་ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ད་ཧ་ན་སྭཱ་ཧཱ། ཞེས་པའམ། ཨོཾ་གསུམ་མའི་རྗེས་སུ། ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ཤཱིནཾ་ཀུ་རུ་སྭཱ་ཧཱ། གང་རུང་གིས་འབུལ། རྫས་རྫོགས་པ་ན། མཆོད་བསྟོད་གོང་ལྟར་དང་། གཏོར་མ་ཡོད་ན་གཏོར་ཆོག་ལྟར་ཕུལ་བའི་རྗེས། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། །ཅེས་གསོལ་བ་གདབ། ཡིག་བརྒྱའི་མཐར། མ་འབྱོར་པ་དང་། སོགས་ཀྱིས་ནོངས་པ་བཤགས། ཨོ་ཁྱེད་ཀྱི་སོགས་ཀྱི་མཐར། བཛྲ་མུས་ཡེ་ཤེས་པ་གཤེགས།
ཛཧཱུྃ་བཾ་ཧོས་དམ་ཚིག་པ་རང་ལ་ཐིམ། བདག་བསྐྱེད་རྒྱས་པ་དང་འབྲེལ་ན། གོ་ཆ་བཀོད་ཅིང་བསྲུང་བ་བྱ། གང་ལྟར་ཡང་བསྔོ་སྨོན་ཤིས་བརྗོད་རྒྱས་པར་བྱའོ། །དེ་ལྟར་འབད་པས་སྡིག་པ་ཐམས་ཅད་བྱང་ཞིང་། རྗེ་བཙུན་མའི་བྱིན་རླབས་མྱུར་དུ་འཇུག་པར་འགྱུར་རོ། །བཞི་པ་ཚེས་བཅུའི་མཆོད་པ་ལའང་རྒྱས་བསྡུས་གཉིས་ལས། དང་པོ་ནི། སྐུ་གསུང་ཐུགས་ཀྱི་དཀྱིལ་འཁོར་གསུམ་བཤམས་ཤིང་སྒྲུབ་ཅིང་མཆོད་པ་དང་། དབང་བླང་བ་དང་། ཚོགས་ཀྱི་མཆོད་པ་སོགས་གནས་གསར་བའི་ཡིག་ཆ་ལྟར་རོ། །གཉིས་པ་ནི། རྗེ་ས་སྐྱ་པ་ཆེན་པོའི་ཚེས་བཅུའི་མཆོད་པའི་ཡི་གེ་ལས་ཇི་ལྟར་འབྱུང་བ་ཀུན་མཁྱེན་རིན་པོ་ཆེས་གསལ་བར་མཛད་པ་བཞིན་བརྗོད་ན་སྦྱོར་བ་དང་། དངོས་གཞི། རྗེས་གསུམ་ལས། དང་པོ་ནི། གནས་དབེན་ཞིང་ཡིད་དང་མཐུན་པར་ཚོགས་གསག་པར་འདོད་ན་ཡར་ངོ་དང་། སྒྲིབ་པ་དག་པར་འདོད་ན་མར་ངོའི་ཚེས་བཅུར། གནས་ཁང་ཕྱག་དར་བྱ་ཞིང་དྲི་བཟང་པོའི་ཆུས་ཆག་ཆག་གདབ། བྲིས་སྐུ་སོགས་རྟེན་ཇི་ལྟར་རིགས་པའི་མདུན། རས་དམར་པོས་བཀབ་པའི་སྟེགས་ཀྱི་ཁར་མཉྫིའི་སྟེང་དུ། མཎྜ་ལར་ཙནྡན་དམར་མོའི་ཆུས་སྲིན་ལག་གཡོན་པས་ཆོས་འབྱུང་གྲུ་གསུམ་གཡོན་སྐོར་དུ་བྲིས་པའི་ནང་ཐམས་ཅད་ཙནྡན་དམར་པོའི་ཆུས་བྱུགས། ཙནྡན་དམར་པོའི་ཆུ་མ་འབྱོར་ན་ཆང་བདུད་རྩིར་བྱིན་
གྱིས་བརླབས་པས་དེ་ལྟར་བྱས་ལ། དབུས་སུ་མེ་ཏོག་གི་ཚོམ་བུ་གཅིག་བཀོད་ལ་བཞག །དེའི་གཡས་སུ། མེ་ཏོག་རྩ་བའི་ཡིག་རྙིང་སོགས་སུ་མཆོད་པ་ལྔ་ཁོ་ན་ལས་མ་བཤད་ཀྱང་། སྤྲོ་ན་ཆུ་གཉིས་སྔོན་འགྲོའི་ཉེར་སྤྱོད་ཀྱང་རུང་། བདུག་སྤོས། མར་མེ། གཡོན་དུ་དྲི་ཆབ། གཏོར་མ། ལྷ་བཤོས། མདུན་དུ་མ་ད་ནཱའི་ཕུད་དང་། བཱ་ལ་སོགས་ཚོགས་ཀྱི་ཡོ་བྱད། གཞན་ཡང་ནང་མཆོད། རྡོར་དྲིལ། ཌཱ་མ་རུ་སོགས་དགོས་པའི་ཡོ་བྱད་རྣམས་འདུ་བྱའོ། །གཉིས་པ་དངོས་གཞི་ལ། ཐོག་མར་བདག་བསྐྱེད་བརྒྱུད་འདེབས་དང་སྐྱབས་འགྲོ་ནས། ཐུན་མཚམས་ཀྱི་ལྷར་ལྡང་བའི་བར་བྱ། དེ་ནས་མདུན་བསྐྱེད་གསལ་གདབ་པ་ནི། ཚོམ་བུ་སུམྦྷས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་མཎྜལ་གྱི་དབུས་སུ་ཆོས་འབྱུང་ལ་གནས་པའི་པཾ་ལས་པདྨ་དང་། རཾ་ལས་ཉི་མའི་དཀྱིལ་འཁོར་གྱི་སྟེང་དུ། རང་གི་ལྟེ་བའི་པཾ་ཡིག་ལས་བཾ་ཡིག་གཉིས་པ་ཞིག་མར་མེ་གཅིག་ལས་གཉིས་མཆེད་ཀྱི་ཚུལ་དུ་ཆད་དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་པ་ནི། ཞབས་གཡས་བརྐྱང་པས་སོགས་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པ། ཞེས་པའི་བར་བདག་བསྐྱེད་བཞིན་བརྗོད། འབར་བའི་ཕྱག་རྒྱ་དང་། ཕཻཾ། རང་གི་ཐུགས་ཀའི་
བྃ་ཡིག་ལས་འོད་ཟེར་འཕྲོས་པས། འོག་མིན་ནས་རྗེ་བཙུན་རྡོ་རྗེ་རྣལ་འབྱོར་མ་ལ་སངས་རྒྱས་བྱང་སེམས་དཔའ་དཔའ་བོ་དང་རྣལ་འབྱོར་མའི་ཚོགས་བསམ་གྱིས་མི་ཁྱབ་པས་བསྐོར་བ་ཨོ་བཛྲ་ས་མཱ་ཛས་སྤྱན་དྲངས། ཛ༔ཧཱུྃ་བཾ་ཧོས་མདུན་བསྐྱེད་ལ་གཉིས་སུ་མེད་པར་ཐིམ་པར་བསམ། ཨོཾ་ཡོ་ག་ཤུདྡྷསོགས་ཀྱིས་བརྟན་པར་བྱ། དེའི་གནས་རྣམས་སུ་ནས། ཙཎྜི་ཀའི་ངོ་བོར་གྱུར། བར་གྱི་གོ་ཆ་བཀོད། སླར་ཡང་རང་གི་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་ལྷ་ཚོགས་མདུན་གྱི་ནམ་མཁར་ཨོཾ་བཛྲ་ས་མཱ་ཛ༔ དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བ་རྩལ་དུ་གསོལ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཨོཾ་སརྦ་ཏ་ཐཱ་ག་ཏ་ནས་ཤྲཱི་ཧཱུྃ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་རྣམ་པར་སྣང་མཛད་ཀྱིས་དབུར་བརྒྱན། སླར་ཡང་ཐུགས་ཀ་ནས་འོད་ཟེར་འཕྲོས་པས། རྩ་བའི་བླ་མ་རྗེ་བཙུན་རྡོ་རྗེ་ཆོས་ཀྱི་རྣམ་པ་ཅན་ལ་བརྒྱུད་པའི་བླ་མ་དཔའ་བོ་དང་རྣལ་འབྱོར་མའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛས་ཚོགས་ཞིང་སྤྱན་དྲང་། ནང་མཆོད། སུམྦྷས་བསང་། སྭ་བྷ་ཝས་སྦྱང་། སྟོང་པའི་ངང་ལས་ཡཾ་ལས་རླུང་། རཾ་ལས་མེ།
ཀཾ་ལས་མི་མགོའི་སྒྱེད་པུ་གསུམ་གྱི་སྟེང་དུ། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་དཔྲལ་བ་རང་ལ་བསྟན་པ། དེའི་ནང་དུ་གོ་ཀུ་ད་ཧ་ན་ལས་ཤ་ལྔ། བི་ར་ཤུ་མ་མུ་ལས་བདུད་རྩི་ལྔ་རྣམས་གསལ་བའི། འོག་གི་རླུང་གཡོས། མེ་སྦར། རྫས་ཐམས་ཅད་ཁོལ་བས་འོད་དུ་ཞུ་ནས་དམ་ཚིག་པ་དང་ཡེ་ཤེས་དབྱེར་མེད་པའི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ་ལ། གཡོན་པའི་མཐེབ་སྲིན་སྦྱར་བས་ཆོས་འབྱུང་གཡོན་སྐོར་དུ་བྲིས་ཏེ། ཨོཾ་ཨཱཿཧཱུྃ་ཧོ༔ ཞེས་བརྗོད་པས་བྱིན་གྱིས་བརླབས་པས་རྫས་ཐམས་ཅད་ལ་གཏོར་ཏེ། སུམྦྷས་བསང་། སྭ་བྷ་ཝས་སྦྱང་། སྟོང་པའི་ངང་ལས་ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། གཞན་ཡང་རོལ་མོ་ལ་སོགས་པ་མཆོད་རྫས་རྣམས་དངས་ཤིང་ཐོགས་པ་མེད་པར་གྱུར། ཨོཾ་བཛྲ་པུཧྥེ་ཨཱཿཧཱུྃ་ནས། ཤཔྟ་ཨཱཿཧཱུྃ་གི་བར་གྱིས་བརླབས་ལ། སོ་སོའི་ཕྱག་རྒྱ་དང་བཅས་ཏེ། ཨོཾ་སརྦ་ཏ་ཐཱ་ག་ཏ་བཛྲ་ཡོ་གི་ནི་ས་པ་རི་ཝཱ་ར་པུབྦེ་པྲ་ཏིཙྪ་སྭཱ་ཧཱ་ནས། ཤཔྟའི་བར་དང་། གྷནྡྷེ་ར་ཎི་ཏས་རོལ་མོ་བྱ། ༀ་གསུམ་མའི་རྗེས་སུ་འབྲུ་གསུམ་བཏགས་ལ་ནང་མཆོད་འབུལ། དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་སྒྱུར། །ཡེ་
ཤེས་ལྔ་དང་སྐུ་གསུམ་བརྙེས། །འགྲོ་བ་སྐྱོབ་ལ་ཕྱག་འཚལ་ལོ། །ཇི་སྙེད་རྡོ་རྗེ་མཁའ་འགྲོ་མ། །ཀུན་ཏུ་རྟོག་པའི་འཆིང་གཅོད་ཅིང་། །འཇིག་རྟེན་བྱ་བར་རབ་འཇུག་མ། །དེ་སྙེད་རྣམས་ལ་ཕྱག་འཚལ་ལོ། ། ཞེས་པས་བསྟོད། དེ་ནས་གཏོར་མ་ནང་མཆོད་ཆུ་ཆང་གིས་སྦྱངས་ལ། སུམྦྷས་བསང་། སྭ་བྷཱ་ཝས་སྦྱང་། ལག་པ་གཡས་གཡོན་གཉིས་ཀ་བསྟན་ལ། བྱ་ཁྱུང་གིས་ཕྱག་རྒྱ་བཅས། ཨོཾ་ཨཱཿཧཱུྃ་ཧ་ཧོ༔ཧཱིས་བརླབས། ཕོ། རང་གི་སྙིང་ག་ནས་འོད་ཟེར་འཕྲོས་པས་རང་བཞིན་གྱི་གནས་ནས་རྗེ་བཙུན་རྡོ་རྗེ་རྣལ་འབྱོར་མ་ལ་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མ་ཆོས་སྐྱོང་དང་འཇིག་རྟེན་སྐྱོང་བའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛ༔ པད་སྐོར་གྱི་རྗེས་རྡོ་རྗེ་ཐལ་མོ་ཁ་གྱེན་དུ་ཕྱེ་བའི་མཐར་སེ་གོལ་གཏོག་པ་དང་བཅས་ཏེ། ༀ་གསུམ་མའི་རྗེས་སུ། ཨོཾ་ཨ་ཀཱ་རོ་སོགས་བཏགས་པ་ལན་ལྔའམ་བདུན་གྱིས་ཕུལ། ༀ་བཛྲ་ཡོ་གི་ནི་ས་པ་རི་ཝཱ་ར་པུཊྚེ་ནས། ཤཔྟའི་བར་གྱིས་ཕྱི་མཆོད། ཨོཾ་བཛྲ་ཨཱ་རལླི་ཧོ༔ ཨོཾ་ཨཱཧཱུཾ། རྗེ་བཙུན་རྡོ་རྗེ་རྣལ་འབྱོར་མའི་ཞལ་དུ་མཆོད་པ་དམ་པ་འབུལ་ལོ། །ཞེས་པས་ནང་མཆོད་འབུལ། དཔལ་ལྡན་རྡོ་རྗེ་མཁའ་འགྲོ་མ། སོགས་ཀྱིས་བསྟོད། འཆི་ཚེ་མགོན་དང་དཔའ་བོ་མ་ཚོགས་ཀྱིས། །མེ་ཏོག་གདུགས་དང་རྒྱལ་མཚན་ཐོགས་ནས་སུ། །
རོལ་མོ་གླུ་དབྱངས་སིལ་སྙན་སོགས་མཆོད་ཅིང་། །མཁའ་ལ་སྤྱོད་པའི་གནས་སུ་ཁྲིད་པར་ཤོག །ཅེས་གསོལ་བ་གདབ། དེ་ནས་གཏོར་མ་གཞན་རྣམས་གུར་ཞལ་སོགས་ཆོས་སྲུང་རྣམས་དང་། དུར་ཁྲོད་བདག་པོ་ཡབ་ཡུམ་དང་། མཁའ་འགྲོ་སྤྱི་གཏོར་གྱི་བར་ཇི་ལྟར་རིགས་པས་བཏང་། དེ་ནས་མདུན་གྱི་ཚོགས་རྫས་རྣམས་ལ་ནང་མཆོད་འཐོར་ཞིང་བསང་སྦྱང་བྱིན་རླབས་བདུད་རྩི་ལྟར་བྱས་རྗེས། ཚོགས་ཕུད་སྣོད་གཅིག་ཏུ་བླུགས་པ་དང་། མ་དཱ་ན་སྣོད་གཅིག་ཏུ་བླུགས་པ་མཎྜལ་གྱི་མདུན་དུ་བཞག །གཏོར་མ་རྣམས་ལའང་ཕུལ། སླར་ཐམས་ཅད་ནང་མཆོད་ཆུ་ཆང་གིས་བྲན་ལ། ཐོག་མར། གང་གི་དྲིན་གྱིས་སོགས་ཀྱིས་བླ་མ་ལ་ཕྱག་བྱ་བ་སྔོན་དུ་འགྲོ་བས། དམན་པའི་ཡུལ་ལས་རབ་འདས་ཤིང་། །རྒྱལ་བ་ཀུན་གྱི་དམ་ཚིག་མཆོག །དངོས་གྲུབ་ཀུན་གྱི་གཞིར་གྱུར་པ། །བདུད་རྩི་མཆོག་གིས་མཆོད་འི པར་བགྱི། །སྒྲིབ་པའི་དྲི་མ་ཀུན་བསལ་ནས། །རྟོག་པ་ཀུན་ལས་རྣམ་གྲོལ་བ། །བླ་ན་མེད་པའི་བྱང་ཆུབ་སེམས། །བདེ་བ་ཆེན་པོས་མཉེས་གྱུར་ཅིག །ཅེས་པས་སྨན་ཕུད་འབུལ། དེ་ནས་ཚོགས་ཕུད་དང་པོ་ནི། ཞལ་ཟས་རོ་བརྒྱ་ལྡན་ཞིང་སོགས་ཀྱི་མཐར། ཨོཾ་གུ་རུ་བུདྡྷ་བོ་དྷི་ས་ཏཱ་ས་པཱ་རི་ཝཱ་ར་ཨོཾ་ཨ་ཀཱ་རོ་སོགས་ཀྱིས་བླ་མ་དང་དཀོན་མཆོག་ཡི་དམ་སྤྱི་ལ་ཕུལ། དེ་རྗེས། ཨོ་གསུམ་མའི་མཐར། ཨ་ཀཱ་
རོ་བཏགས་པས་རྗེ་བཙུན་མ་ལ་འབུལ་ཞིང་། གཞན་ཡང་གུར་ཞལ་སོགས་ཀྱི་གཏོར་མ་ཡོད་ན་སོ་སོའི་གཏོར་སྔགས་ཀྱིས་རྒྱས་པར་འབུལ་བའམ། དེ་ཙམ་མ་ནུས་ན། ཨོཾ་ཤྲཱི་མ་ཧཱ་ཀཱ་ལ་མ་ཧཱ་ཀཱ་ལི་དེ་བཱི་ས་པ་རི་ཝཱ་ར་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། ཅེས་དང་། ༀ་ཤྲཱི་དྷརྨ་པཱ་ལ་ཙ་ཏུ་རྨ་ཁ་ས་པ་རི་སོགས་དང་། ཨོཾ་ཤྲཱི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་སྭཱ་ཧཱ། ཤྲཱི་ཧྥ་ཤ་ནཱ་ཨདྷི་པ་ཏི་ས་པ་རི་ཝཱ་ར་སོགས་ཀྱིས་འབུལ་ཞིང་། མཐར་འཇིག་རྟེན་པ་ལ་མཁའ་འགྲོ་སྤྱི་གཏོར་གྱི་སྔགས་ཀྱིས་ཕུལ། ཐུན་མོང་དུ་ཕྱི་ནང་གི་མཆོད་པ་སྔར་བཞིན་མཆོད། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས། དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ཀྱི་ཞལ་དུ་མཆོད་པ་དམ་པ་འབུལ་ལོ། །སངས་རྒྱས་ཀྱི་བསྟན་པ་དར་ཞིང་འཇིག་རྟེན་དུ་དགེ་ལེགས་རྒྱ་ཆེན་པོ་འབྱུང་བ་དང་། བདག་ཅག་དཔོན་སློབ་འཁོར་དང་བཅས་པ་རྣམས་ཀྱི་ཆོས་སྒྲུབ་པའི་འགལ་རྐྱེན་བར་ཆད་ཐམས་ཅད་ཞི་ཞིང་མཐུན་རྐྱེན་ཐམས་ཅད་ཡིད་བཞིན་དུ་འགྲུབ་པར་མཛད་དུ་གསོལ། ཅེས་གསོལ་བ་གདབ། ཚོགས་ཀྱི་ཡོ་བྱད་ལ་གཙང་སྨེའི་རྣམ་རྟོག་སྤངས་ཏེ། སྙིང་གའི་པཾ་ཡིག་སངས་རྒྱས་ཐམས་ཅད་འདུས་པའི་ངོ་བོར་མཆོད་པར་བསམ་ལ། ཨ་ཧོ་མ་ཧཱ་སུ་ཁ་ཧོ། ཞེས་བརྗོད་ཅིང་ཚིམ་པར་
རོལ། ལྷག་མ་བསྡུས་ཏེ་ཆང་གི་ཁ་ཕྲུ་འབར་བའི་ཕྱག་རྒྱའི་བར་ནས་འཐོར་ཞིང་། ཕོ། ཨུཥྩི་ཊ་བ་ལིནྟ་བྷཀྵ་སྭ་སྭཱ་ཧཱ། འབྱུང་པོ་ལྷག་མ་ལ་དབང་བ་རྣམས་ལ་སྦྱིན་ནོ། །ངོམས་ཤིང་ཚིམ་པའི་སྐལ་བ་དང་ལྡན་པར་གྱུར་ཅིག་ཅེས་ཕྱི་རོལ་དུ་དོར། ཀོལླ་ཨི་རཊྛ་སོགས་རྡོ་རྗེའི་གླུ་དང་། བཀྲ་ཤིས་གང་ཞིག་ཆོས་ཀྱི་དབྱིངས་ལས་ལེགས་བྱུང་བ། །ཧེ་རུ་ཀ་དཔལ་འཇིགས་བྱེད་རྒྱལ་པོ་འབར་བའི་སྐུ། །ཤེས་རབ་ཕག་མོའི་པདྨར་རྡོ་རྗེས་རོལ་མཛད་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པར། །གང་གིས་ལམ་གྱིས་གྲོལ་འགྱུར་བ། །དེ་ཡིས་སངས་རྒྱས་མྱུར་ཐོབ་ཤོག །ཅེས་སོགས་བཀྲ་ཤིས་དང་སྨོན་ལམ་བྱའོ། །གསུམ་པ་རྗེས་ནི། མཆོད་པ་རྣམས་ཁ་གསོས་ཤིང་། བསང་སྦྱང་བྱིན་རླབས་བྱ། ཨོཾ་སརྦ་ཏ་ཐཱ་ག་ཏ་བཛྲ་ཡོ་གི་ནི་ས་པ་རི་ཝཱ་ར་པུཉྫ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་ཕུལ། དཔལ་ལྡན་རྡོ་རྗེ་སོགས་ཀྱིས་བསྟོད། རྗེ་བཙུན་རྡོ་རྗེ་རྣལ་འབྱོར་མས་བདག་དང་སེམས་ཅན་ཐམས་ཅད་༣ དག་པ་མཁའ་སྤྱོད་ཀྱི་གནས་སུ་འཁྲིད་པར་མཛད་དུ་གསོལ། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མ་ལུས་པ་སྩལ་དུ་གསོལ། །ཞེས་གསོལ་བ་གདབ། ཧེ་རུ་ཀའི་ཡིག་བརྒྱ་ལན་གསུམ་
གྱིས་ལྷག་ཆད་ཁ་བསྐང་། མ་འབྱོར་པ་དང་སོགས་ཀྱིས་ནོངས་པར་གསོལ། རྟེན་ཡོད་ན། འདིར་ནི་གཟུགས་དང་སོགས་བརྟན་བཞུགས་དང་། མེད་ན། ཨོ་ཁྱེད་ཀྱི་སོགས་ཀྱིས། ཚོམ་བུའི་ཡེ་ཤེས་པ་དང་། གཏོར་མགྲོན་གྱི་ཡེ་ཤེས་པ་རྣམས་གཤེགས། ཛཧཱུྃ་བཾ་ཧོས་དམ་ཚིག་པ་རྣམས་རང་ལ་གཉིས་སུ་མེད་པ་ཐིམ་པར་བསམ་ལ། རང་གི་གནས་རྣམས་སུ་སོགས་གོ་ཆ་བཀོད། བསྲུང་བ་བྱ། དགེ་བ་འདི་ཡིས་སོགས་བསྔོ་བ་དང་། མཁའ་སྤྱོད་ཞལ་བཟང་བལྟ་བའི་སྨོན་ལམ་གདབ། ཕུན་ཚོགས་དགེ་ལེགས་སོགས་ཀྱིས་ཤིས་པ་བརྗོད་ཅིང་མེ་ཏོག་གི་ཆར་སིལ་མ་དགྲམ། ལས་ཀྱི་རྗེས་མི་མངོན་པར་བྱའོ། །དེ་ལྟར་བཟླས་བསྒོམ་རྣམ་པ་གཉིས་དང་། ཚེས་བཅུའི་མཆོད་པ་མ་ཆགས་པར་ཉམས་སུ་བླངས་པ་ནི་ལས་དང་པོ་པས་མཁའ་སྤྱོད་སྒྲུབ་པའི་ལམ་གྱི་གཙོ་བོ་ཡིན་པས་ཤིན་ཏུ་གལ་ཆེའོ། །ལྔ་པ་གཏོར་མའི་རྣལ་འབྱོར་ནི། དཀུ་བག་སྟེ་ཤ་ཆང་གི་དམ་རྫས་ངེས་པར་ཚང་ཞིང་བསྒྲུབ་པའི་བདུད་རྩི་རིལ་བུ་དང་སྦྱར་བའི་གཏོར་མ་པདྨའི་སྙིང་པོ་ལྟར་ཟླུམ་པ། འཕྲལ་གཏོར་ལ་པད་འདབ་དང་། འཛིན་གཏོར་སོགས་ལ་མཐེབ་ཀྱུས་བསྐོར་བ་གཙང་སྦྲ་དང་ལྡན་པ་བཤམས། ཚེས་བཅུའི་མཆོད་པའི་སྐབས་སུ་བཤད་པ་ཇི་ལྟ་བ་བཞིན་ཕུལ་བ་ལས། མཆོད་པའི་སྐབས་སུ་ཆུ་གཉིས་སྔོན་འགྲོའི་ཉེར་སྤྱོད་ཀྱིས་མཆོད་པ་ཙམ་གྱི་
ཁྱད་པར་རོ། །འདིས་ནི་བར་ཆད་ཐམས་ཅད་ཞི་བ་དང་བསམ་པའི་དོན་འགྲུབ་པ་སོགས་དགོས་པ་ཁྱད་པར་ཅན་མང་ངོ་། །དེ་ལྟར་དབང་པོ་རབ་རྣལ་འབྱོར་བཅུ་གཅིག་པོ་འདི་མ་ཆགས་པར་ཉམས་སུ་བླངས་ཞིང་། ཚེས་བཅུའི་མཆོད་པ་ལ་བརྩོན་པ་ཙམ་གྱིས་ཚེ་འདིར་ལུས་མ་སྤངས་པར་མཁའ་སྤྱོད་ཀྱི་དངོས་གྲུབ་ཐོབ་པར་འགྱུར་ལ། འདི་ཉིད་བསྐྱེད་རིམ་ཕག་མོ་མཁའ་སྤྱོད་ཅེས་གཙོ་བོར་གསུངས་པ་མ་གཏོགས། དོན་གྱིས་བསྐྱེད་རྫོགས་ཟུང་འཇུག་ཡིན་ཏེ་མངོན་རྟོགས་ཀྱི་དཀྱུས་གཅིག་ལ་དབང་བཞིའི་ལམ་མཐའ་དག་ཚང་བའི་ཕྱིར་རོ། །དབང་པོ་འབྲིང་གིས་གཞིའི་བསྙེན་པ་མཐར་ཕྱིན་པ་ན། ལངྐ་ལིའི་ཤིང་ལ་བརྟེན་ནས་སིནྡྷ་རའི་བསྒྲུབ་པ་ཚུལ་བཞིན་དུ་བྱས་པས་རྡོ་རྗེ་རྣལ་འབྱོར་མ་མི་མོའི་རྣམ་པ་ཅན་གྱིས་རྗེས་སུ་བཟུང་ཞིང་མཁའ་སྤྱོད་ཀྱི་གྲོང་དུ་འཁྲིད་པ་སྟེ། དེའི་ཚུལ་ནི། དེང་དུས་ལག་ལེན་ལ་འདེབས་པ་ཉུང་བས་འདིར་མ་བྲིས་ལ། རྟོགས་པར་འདོད་ན་ཁྲིད་ཡིག་ཆེན་མོ་དང་། འཇམ་མགོན་ཀུན་དགའ་བསོད་ནམས་ཀྱི་ཡིག་ཆ་སོགས་ལས་ཤེས་པར་བྱའོ། །དབང་པོ་ཐ་མས་དེ་ལྟ་བུ་ལག་ཏུ་མ་བླངས་པའམ། བླངས་ཀྱང་མ་གྲུབ་ན་བཟླས་བསྒོམ་ལ་བརྩོན་པས། འཆི་ཁའམ་བར་དོར་བཟླས་བསྒོམ་བྱེད་པའི་སྣང་བ་ཤར་མ་ཐག་རྣལ་འབྱོར་མས་མདུན་བསུས་ཏེ་མཁའ་སྤྱོད་དུ་འཁྲིད་པར་ངེས་ནའང་། ཆེས་མྱུར་བར་
བྱེད་པའི་ཐབས་ལམ་གྱི་ཆད་མཐུད་འཕོ་བའི་རྣལ་འབྱོར་ཉམས་སུ་བླང་བའི་ཚུལ་ལ། སྦྱང་བ་དང་། ལས་ལ་སྦྱོར་བའོ། །དང་པོ་ལའང་རྗེ་བཙུན་ཡབ་ཡུམ་ཞལ་སྦྱོར་དང་། ཡུམ་རྐྱང་གི་འཕོ་བ་གཉིས་ལས། འདིར་ཕྱི་མ་ཅུང་ཟད་བཤད་ན། གསལ་གདབ་པ་དང་སྦྱང་བ་དངོས་གཉིས་ལས། དང་པོ་ནི། བདག་བསྐྱེད་དང་འབྲེལ་ན་ཐུན་མཚམས་ཀྱི་ལྷར་གསལ་བཞིན་པའི་ངང་དང་། མ་འབྲེལ་ན་སྐྱབས་སེམས་སྔོན་དུ་འགྲོ་བས་རང་སྐད་ཅིག་གིས་རྣལ་འབྱོར་མར་གསལ་གདབ་གང་ལྟར་ཡང་། རང་རྡོ་རྗེ་རྣལ་འབྱོར་མར་གསལ་བའི་ལུས་ཀྱི་དབུས་དྲང་པོར་རྩ་དབུ་མ་ཕྱི་དཀར་ལ་ནང་དམར་བ། རྩ་བ་ཕྲ་བ་མདའ་སྨྱུག་ཙམ་ལ། རྩེ་མོ་སྦོམ་པ་སྦ་ལྕག་ཙམ་པ། ཡར་སྣ་སྤྱི་གཙུག་ཚངས་བུག་ཏུ་ཟུག་ཅིང་རྒྱ་མཐོང་ལྟར་ཁ་བྱེ་བ། མར་སྣ་ལྟེ་བར་ཟླ་གདན་ལ་ཟུག་པ། ཆོས་འབྱུང་དམར་པོ་གྲུ་གསུམ་པའི་ནང་དུ་ཟུག་པར་བསྒོམ་ཀྱང་རུང་། དེའི་སྟེང་དུ་རང་གི་རླུང་སེམས་དབྱེར་མེད་པའི་ངོ་བོ་བཻ་ཡིག་གམ། ཐིག་ལེ་དམར་པོ་ཆེ་ཆུང་རིལ་མ་ཙམ་པ་འཕུར་ལ་ཁད་པ་ཞིག་གསལ་གདབ། རང་གི་སྤྱི་བོར་སེང་ཁྲི་པད་ཟླ་འཇིགས་བྱེད་དུས་མཚན་གྱི་གདན་ལ་རྩ་བའི་བླ་མ་རྡོ་རྗེ་རྣལ་འབྱོར་མའི་རྣམ་པར་བཞུགས་པ་ལ། བརྒྱུད་པའི་བླ་མ་གནས་གསུམ་གྱི་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་བ། དེ་དག་ཀྱང་འཇའ་གུར་གྱི་དབུས་ན་
བཞུགས་ཤིང་། མེ་ཏོག་གི་ཆར་ཆེན་པོ་རྒྱུན་མི་ཆད་པར་འབེབས་པ། འཇའ་མདུང་ཚུགས་སུ་ཟུག་ཅིང་སྤོས་ཀྱི་དྲི་ཞིམ་པོ་འཐུལ་པ་སོགས་མཁའ་སྤྱོད་དངོས་དང་མཚུངས་པར་གྱུར། ཅེས་བརྗོད་། ཅིང་བསམ། སླར་ཡང་རང་གི་ཐུགས་ཀ་ནས་འོད་ཟེར་འཕྲོས་པས་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་སོགས་སྐྱབས་ཡུལ་ཐམས་ཅད་ཨོཾ་བཛྲ་ས་མཱ་ཛ༔ ཛཧཱུྃ་བཾ་ཧོ༔ གཉིས་སུ་མེད་པར་ཐིམ་པས་སྐྱབས་གནས་ཐམས་ཅད་འདུས་པའི་ངོ་བོར་བསམ་མོ། །གཉིས་པ་སྦྱང་བ་དངོས་ནི། རང་གི་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་རྒྱུར་བྱས་པ་ལས་བྱུང་བའི་མཆོད་སྤྲིན་བསམ་གྱིས་མི་ཁྱབ་པས་མཆོད་པར་མོས་ཏེ། ཨོཾ་གུ་རུ་བཛྲ་ཡོ་གི་ནི་ས་པ་རི་ཝཱ་ར་ཨགྷཾ་ནས། ཤབྡའི་བར་གྱིས་མཆོད། དཔལ་ལྡན་རྡོ་རྗེ་མཁའ་འགྲོ་སོགས་ཀྱིས་བསྟོད། སྤྲོ་ན་བརྒྱུད་པའི་གསོལ་འདེབས་དང་། གང་ལྟར་ཡང་། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་མཁའ་སྤྱོད་རྡོ་རྗེ་རྣལ་འབྱོར་མ་ལ་གསོལ་བ་འདེབས་སོ། །བདག་འཛིན་བློ་ཡིས་ཐོངས་པར་བྱིན་གྱིས་རློབས་ཤིག །དགོས་མེད་རྒྱུད་ལ་སྐྱེ་བར་རྩྭ་བྱིན༴ །ལམ་མཆོག་འཕོ་བ་འབྱོངས་པར= །འཕྱུགས་མེད་མཁའ་སྤྱོད་འགྲུབ་པར= །ཞེས་ཚར་གྲངས་ཅི་ནུས་བརྗོད་ཅིང་གསོལ་བ་ཕུར་ཚུགས་སུ་བཏབ་ལ། འོག་རླུང་དྲག་ཏུ་འཐེན་པ་དང་མཉམ་དུ་གཤང་
སྒོའི་རླུང་གཡོས་ཟླ་དཀྱིལ་ལ་ཕོག །རང་སེམས་པཾ་ཡིག་གམ་ཐིག་ལེ་གསལ་བ་དེ་ཉིད་དབུ་མའི་ནང་ནས་སྐར་མདའ་འཕང་བ་ལྟར་སོང་། བླ་མ་རྗེ་བཙུན་མའི་གསང་བ་ནས་ཞུགས་ཏེ་ཐུགས་ཀའི་ཛཾ་ཡིག་ལ་སིབ་ཀྱིས་ཐིམ་པར་བསམ་ལ་སེམས་བཟུང་། ཡང་སྟེང་རླུང་རྔུབས་པས་བླ་མའི་ཐུགས་ཀ་ནས་བྱུང་སྟེ་སྔར་ལྟར་གདན་ལ་འཁོད་པར་བསམ་ལ་རླུང་བུམ་པ་ཅན་ཁ་སྦྱར་དུ་འཛིན། སླར་ཡང་མཆོད་བསྟོད་བྱ་བའམ། གསོལ་འདེབས་ཀྱི་མཐར་སྔར་བཞིན་དམིགས་པའི་རྟེན་གོམས་པ་ལ་བསླབས་པ་ནི་རླུང་གི་འཕོ་བ་དང་། སྐབས་སུ། ཨཱི་ཧི་ཀྲ །ཅེས་བརྗོད་པས་ཐིག་ལེ་སྤར་བ་དང་། ཀ་ཧི། ཞེས་པས་འབེབས་པ་སྟེ་སྒྲས་འཕོ་བའང་ཉམས་སུ་བླངས། འདི་གཉིས་ཀྱི་སྔ་མ་འབྱོངས་དཀའ་ཡང་འབྱོངས་ཕྱིན་བརྟན་པ་ཡིན་ལ། ཕྱི་མ་འབྱོངས་སླ་ཡང་བརྟན་དཀའ་བ་ཡིན་ཅེས་གསུངས། དེ་ལྟར་དུས་རྒྱུན་དུ་ལན་བདུན་སོགས་དང་། འདི་ཁོ་ན་སྦྱང་བའི་ཚེ་ཞག་བདུན་སོགས་ཐུན་བཞིར་བཅད་ལ་འབད་རྩོལ་དྲག་པོས་རྟགས་མ་བྱུང་བར་ཉམས་སུ་བླང་བར་བྱ་ཞིང་། རྟགས་ནི་སྤྱི་བོ་ཟ་བ་དང་། སྐྲངས་པ་དང་། ཆུ་སེར་འཛག་པ་དང་། སྒྲུབ་ཁང་ལ་འཇའ་ཟུག་པ་སོགས་འབྱུང་ངོ་། །ཐུན་ལས་ལྡང་བ། རླུང་སེམས་མར་ཕབས་པའི་རྗེས། མཐའ་སྐོར་གྱི་སྐྱབས་ཡུལ་རྣམས་བླ་མ་རྡོ་རྗེ་རྣལ་འབྱོར་མར་ཐིམ། དེ་ཉིད་རང་གི་ཚངས་
བུག་ནས་བརྒྱུད་སྙིང་གར་དབུ་མའི་ནང་དུ་ཞུགས། སྤྱི་གཙུག་སྣ་ཚོགས་རྡོ་རྗེ་སྲ་ཞིང་འཐས་པས་བཀག་པར་བསམ། རྟགས་བྱུང་བ་སོགས་ཀྱི་ཚེ་ཚེ་སྒྲུབ་བྱེད་པར་འདོད་ན། སྙིང་གའི་རྣལ་འབྱོར་མ་འཆི་མེད་ཚེའི་བདུད་རྩིའི་ཆུ་རྒྱུན་དུ་གྱུར་ནས་ལུས་ཀྱི་ནང་ཐམས་ཅད་གང་བས་འཆི་མེད་ཚེའི་དངོས་གྲུབ་ཐོབ། བ་སྤུའི་བུ་ག་ཚུན་ཆད་ཀྱང་བདུད་རྩིའི་ཟིལ་པ་ཕྲམ་མེར་ཡོད་པར་བསམ་ལ་རླུང་བུམ་ཅན་ཅི་ནུས་སུ་འཛིན། མཐར་བདག་བསྐྱེད་དང་འབྲེལ་ན་གོ་ཆ་བཀོད་པ་སོགས་དཀྱུས་ལྟར་དང་། མ་འབྲེལ་ན་བསྔོ་སྨོན་བཀྲ་ཤིས་སོགས་བྱའོ། །གཉིས་པ་ལས་ལ་སྦྱར་བ་ནི། ངེས་པའི་འཆི་ལྟས་བྱུང་ཞིང་དུས་ལ་བབས་པའི་ཚེ། སྔར་བཞིན་གསལ་གདབ། ཁྱད་པར་རང་གི་ལུས་ལོངས་སྤྱོད་དགྲ་གཉེན་བར་མའི་འགྲོ་བ་དང་བཅས་པ་བླ་མ་རྣལ་འབྱོར་མར་ཕུལ་ནས། ཆགས་སྡང་རྨོངས་གསུམ་གྱི་ཞེན་པ་བཙན་ཐབས་སུ་སྤངས། དམ་ཚིག་ཉམས་ཆགས་བཤགས་སྡོམ་གྱི་འདུན་པ་དྲག་པོ་བྱ། དམིགས་གནད་སྔར་བཞིན་ལ་རང་སེམས་བླ་མའི་ཐུགས་ཀར་ཐིམ། བླ་མ་རྗེ་བཙུན་མར་གསལ་བ་ཡང་མཁའ་སྤྱོད་དག་པའི་ཞིང་དུ་གཤེགས་པར་བསམ་ལ། དབྱིངས་སྟོང་ཉིད་དུ་རྗེན་ནེ། གདངས་གསལ་རིག་ཏུ་ལམ་མེ། དེ་གཉིས་དབྱེར་མེད་པ་བརྗོད་བྲལ་བློ་འདས་ཀྱི་ངང་དུ་མཉམ་པར་བཞག་པས། དེའི་ངང་དུ་དབུགས་ཆད་
ན་འཕོ་བ་ཐེབས་པ་ཡིན་ནོ། །གལ་ཏེ་གཟའ་གདོང་ཐུག་ལྟ་བུ་རྐྱེན་གློ་བུར་བས་དམིགས་པའི་གསལ་འདེབས་རྒྱས་པ་ལང་མ་བྱུང་ན། རང་སེམས་དང་བླ་མའི་ཐུགས་དབྱེར་མེད་དུ་བསྲེས་པའི་ངང་ལ་མཉམ་པར་བཞག །དེ་ལྟར་དྲན་པས་མ་ཟིན་པའམ། འཕོ་བ་མ་འབྱོངས་ནས་བར་དོའི་སྣང་བ་ཤར་ན། དེ་སྦྱང་བའི་ཚུལ་ནི། ད་ལྟ་ནས་གང་ཤར་གྱི་སྣང་བ་སྤྱི་དང་། ཁྱད་པར་འཇིགས་སྐྲག་སོགས་གློ་བུར་དུ་འཆར་བའི་ཚེ་བར་དོའི་སྣང་བ་ཤེས་པར་བྱས་ལ། རང་གཞན་གྱི་སྣང་བ་ཐམས་ཅད་སྦྱང་བསྒྱུར་གྱིས་ལྷ་དང་གཞལ་ཡས་ཁང་དུ་བསྒྱུར། རིག་པ་བརྗོད་མེད་དུ་ཆམ་མེར་འཇོག་པ་ལ་བསླབ་པས་བར་དོར་ཡང་དྲན་པས་ཟིན་ནས་ལམ་གྱི་འཕྲོ་མཐུད་དེ་གྲོལ་བར་འགྱུར་རོ། །དབང་པོ་ཤིན་ཏུ་ཐ་མས་འདའ་ཀ་མའམ། བར་དོའི་གདམས་ངག་མ་ཐེབ་ན། སྐྱེ་བ་ཕྱི་མར་ལམ་གྱི་འཕྲོ་མཐུད་ནས་མཁའ་སྤྱོད་ཀྱི་གོ་འཕང་དོན་དུ་གཉེར་བ་སྟེ། དེ་ཉིད་འགྲུབ་པའི་སླད་དུ་མཁའ་སྤྱོད་ཞལ་བཟང་བལྟ་བའི་སྨོན་ལམ་སོགས་གདབ་ཅིང་། བླ་མ་ལ་མོས་གུས་དང་མ་བྲལ་ན་ངེས་པར་འགྲུབ་པ་ཡིན་ནོ། །དེ་རྣམས་ཀྱིས་གཙོ་བོར་བསྐྱེད་རིམ་གྱི་རྣལ་འབྱོར་ཡན་ལག་དང་བཅས་པ་བསྟན་ནས། །གཉིས་པ་རྫོགས་པའི་རིམ་པ་ལ། སྤྱིར་ཆོས་ཉིད་དངོས་སུ་སྟོན་པ་དང་། བརྒྱུད་ནས་སྟོན་པ་གཉིས་ལས། འདིར་ཕྱི་མ་དཔེ་གསུམ་གྱིས་དོན་
གཅིག་གཏན་ལ་འབེབས་པར་བྱེད་པ་ལ། གཞི་ཆོས་ཅན་འཁོར་བའི་དུས་སུ་འཁྲུལ་སྣང་གི་གཙོ་བོ་རྩ་རླུང་ཐིག་ལེ་ཐམས་ཅད་ཀྱི་ཁྱབ་བྱེད་ནང་གི་ཕོ་ཉ་མཆོག་རྩ་དབུ་མ་ཁོ་ན་ལ་གནད་དུ་བསྣུན་པས། །གཉིས་མེད་ཀྱི་ཡེ་ཤེས་མྱུར་དུ་འཆར་བའི་གནད་ཤེས་པར་བྱས་ནས། དེ་ལ་གནད་དུ་བསྣན་པའི་ལམ་ཇི་ལྟར་བསྒོམས་པའི་གནད་རྗེ་བཙུན་ཡབ་དང་ཐུན་མོང་དང་། ཡུམ་རྐྱང་ཐུན་མོང་མ་ཡིན་པའི་རྩ་དབུ་མའི་རྣལ་འབྱོར་གཉིས་ལས། ཕྱི་མ་ལའང་ཆགས་ཅན་ཕོ་ཉའི་ལམ་ལ་དགའ་བ་དང་། ཆགས་བྲལ་རྣལ་འབྱོར་གྱི་ལམ་ལ་དགའ་བ་གཉིས་ཀྱི་ཕྱི་མ་ལྟར་བསྒོམ་པའི་ཚུལ་ལ། ཐོག་མ་སྦྱང་བའི་ཚུལ་སོགས་ཤཱི རྒྱས་པར་འཁྲིད་ཡིག་ཆེན་མོ་ལས་ཤེས་པར་བྱས་ནས། འདིར་རྒྱུན་དུ་ཉམས་སུ་བླངས་པའི་ཚུལ་ཅུང་ཟད་ཙམ་བཤད་ན། རྩ་དབུ་མ་ཁ་དབྱེ་བའི་རྣལ་འབྱོར་དང་། དབྱེ་ནས་བསྒོམ་པའི་མན་ངག་གཉིས་ལས། དང་པོ་ནི། རྒྱན་གྱི་ཉམས་ལེན་ལ་ཞར་བྱུང་གི་རྫོགས་རིམ་གྱི་མཇུག་ཏུ་ལུས་གནད་རྣམ་སྣང་ཆོས་བདུན་དང་ལྡན་པས། རང་རྣལ་འབྱོར་མའི་ལུས་དབུས་དྲང་པོར་རྩ་དབུ་མ་མར་སྣེ་ལྟེ་འོག་སོར་བཞིར་སླེབས་པ། ཡར་སྣེ་སྤྱི་བོར་ཟུག་པའི་ནང་དུ་བྱང་སེམས་ཧཾ་ཡིག་དཀར་པོ་མགོ་ཐུར་བསྟན་གྱིས་མཚན་པ། གཡས་སུ་རོ་མ་དམར་མོ། གཡོན་དུ་རྐྱང་མ་དཀར་མོ། གཉིས་ཀའང་གྲོ་སོག་འབྲིང་པོ་ཙམ་ཡར་སྣེ་སྤྱི་
གཙུག་ནས་གུག་སྟེ་སྣ་བུག་གཉིས་སུ་ཧ་རེ་ཟུག་པ། མར་སྣེ་ལྟེ་བའི་ཐད་དུ་དབུ་མ་དང་སྦུབས་གཅིག་ཏུ་གྱུར་པའི་ནང་དུ། ཙཎྜ་ལཱི་རཾ་དམར་པོ་མེའི་རང་བཞིན་ཅན་རིལ་མ་ཙམ་གྱིས་མཚན་པ། མེ་འབར་ལ་ཁད་པ་དེའི་འོག་ཏུ་རླུང་དཀྱིལ་ལྗང་ནག་སྲན་མ་བཀས་པ་ཙམ་གསལ་བཏབ། རླུང་རོ་དགུ་ཕྲུགས་སུ་ཕྱག་ལེན་ལྟར་བུས་ལ། འོག་རླུང་ཕྱེད་འཐེན་ཙམ་དང་། སྟེང་རླུང་རྫོགས་པར་རྔུབས། སླར་འོག་སྒོ་འབྱེད་འཛུམ་གསུམ་ཙམ་གྱིས་འོག་རླུང་རྫོགས་པར་དྲངས་པས་རླུང་དཀྱིལ་ལ་ཕོག །རླུང་གཡོས་རཾ་ཡིག་ལས་མེ་ལྕེ་དམར་ཉུག་ཉུག་འབར་བར་བསམ་ལ་བུམ་ཅན་འཛིན། མཐར་འཛིན་མེད་པའི་ལྟ་བས་རྒྱས་འདེབས། དེ་ནས་ལུས་ཁོལ་བུར་དྲོད་སྐྱེ་བ་སོགས་ཅུང་ཟད་གོམས་པ་ན། རིམ་གྱིས་རྩ་གསུམ་གྱི་ནང་ཐམས་ཅད་མེས་གང་། དེ་ནས་རྩ་ཕྲན་ཐམས་ཅད་ཀྱང་མེས་ཁེངས་ཏེ་སྡིག་སྒྲིབ་བག་ཆགས་དང་བཅས་པའི་ངོ་བོ་ཁམས་སྙིགས་མ་ཐམས་ཅད་ཆམ་ཆམ་བསྲེགས། དྭངས་མ་བདུད་རྩིར་ཞུ་བ་དང་། སྤྱི་བོའི་ཧཾ་ལ་རེག་པས་བདུད་རྩིའི་རྒྱུན་དངུལ་ཆུ་ལྟ་བུའི་དྭངས་མས་རྩ་ཐམས་ཅད་ཁེངས་ཏེ་བདེ་དྲོད་བསམ་གྱིས་མི་ཁྱབ་པ་སྐྱེས་པར་བསམ་ལ་རླུང་བུམ་ཅན་འཛིན། གཉིས་པ་བསྒོམ་པའི་མན་ངག་ལ། རླུང་ལུས་ལ་གནས་པས་བདེ་བ་དང་། སེམས་ལ་ཞུགས་པས་སྟོང་པར་བསྒྲུབ་པའི་རྣལ་འབྱོར་གཉིས་
ལས། དང་པོ་ནི། རོ་རྐྱང་གཉིས་མི་དམིགས་པར་བཞག །དབུ་མ་སྦ་ལྕག་འབྲིང་པོ་ཙམ་ཡར་སྣ་སྤྱི་གཙུག་ནས་སྨིན་མཚམས་སུ་གུག་པའི་ནང་དུ། ཆོས་འབྱུང་དམར་སེར་འོད་ཀྱི་རང་བཞིན་ཅན་གྱི་རྩ་བ་ཕྲ་བ་དབུ་མའི་ནང་དུ་ཟུག་པ་ལ་བུག་པ་ཐལ་ལེ་ཡོད་པ། མར་སྣེ་གསང་གནས་ཀྱི་པདྨའི་ནང་དུ་ཧ་རེ་ཡོད་པའི་ནང་ཆོས་འབྱུང་སྔ་མ་ལྟ་བུ་ཞིག་གསལ་གདབ། སྨིན་མཚམས་ཀྱི་ཆོས་འབྱུང་ནང་ཐིག་ལེ་དཀར་ལ་སྔོ་མདངས་ཆགས་པ། འོད་ཁ་དོག་ལྔ་འཕྲོ་བ་སྲན་མ་ཙམ་ཞིག་གསལ་ལ། འོག་རླུང་ཅུང་ཟད་འཐེན། སྟེང་རླུང་ཅུང་ཞིག་རྔུབས་པའི་རྐྱེན་གྱིས་དེ་ལས་འོད་ཁ་དོག་ལྔ་ལྡན་འཕྲོ་བར་བསམ་ལ་སེམས་བཟུང་བས་སྨིན་མཚམས་སུ་ན་ལྷང་ལྷང་བའམ་བདེ་བ་སྐྱེ་བ་སོགས་ཀྱི་རྟགས་བྱུང་ན། ཐིག་ལེ་དེ་བུག་པ་ནས་ཡར་སོང་། སྤྱི་གཙུག་གི་དབུ་མའི་ནང་དུ་རི་རྩེར་སྐར་མ་ཤར་བ་བཞིན་འོད་ཕྲམ་ཕྲམ་དུ་གནས་པར་བསམ་ལ་སེམས་བཟུང་། མཐར་དེ་ལས་བདེ་ཆེན་གྱི་ཐིག་ལེ་ཤེལ་དཀར་བཞུ་བ་ལྟ་བུ་པདྨའི་སྣལ་མ་ཙམ་པ་ཞིག་ནར་གྱིས་བབས། སྤྱི་བོ། མགྲིན་པ། སྙིང་ག །ལྟེ་བ། གསང་གནས་རྣམས་ཀྱི་དབུ་མའི་ནང་དུ་བབས་པ་ལ་སེམས་བཟུང་བས་ཡས་བབས་ཀྱི་དགའ་བཞིའི་ཡེ་ཤེས་སྐྱེས་པར་བསམ། དེ་ནས་གསང་གནས་ཀྱི་ཆོས་འབྱུང་གི་ནང་ནས་ཀྱང་ཕྱིར་སོར་ཕྱེད་དང་གསུམ་ཉུག་གེ་ཡོད་པ་ལ་
སེམས་གཏད། སླར་ཆོས་འབྱུང་གི་བུག་པ་ནས་གྱེན་དུ་བྱུང་སྟེ། ལྟེ་བ་ནས་སྤྱི་བོའི་གཞིར་གནས་ཀྱི་ཐིག་ལེ་ལ་ཐིམ་པའི་བར་གནས་སོ་སོར་སེམས་བཟུང་བས། མས་བརྟན་གྱི་དགའ་བཞི་སྐྱེས་པར་བསམ་ལ་རིག་པ་འཛིན་མེད་དུ་བཞག །གཉིས་པ་ནི། དབུ་མ་ཆོས་འབྱུང་བཅས་སྔར་བཞིན་གསལ་བའམ། ཡང་ན་ཆོས་འབྱུང་མི་དམིགས་པར་བཞག །དབུ་མའི་ཡར་སྣ་སྨིན་མཚམས་དང་། མར་སྣ་གསང་གནས་ཀྱི་མཚམས་སུ་ཐད་བཅད་དུ་ཡོད་པར་བསམ། དེ་ནས་སྨིན་མཚམས་ཀྱི་ཆོས་འབྱུང་གི་ནང་ངམ་དབུ་མའི་ཡར་སྣེར་ཐིག་ལེ་བསྒོམ་པ་དེ་ལ་སེམས་བཟུང་སྟེ་སྤྱི་གཙུག་ཏུ་སྤོ་པའི་བར་སྔར་བཞིན་ལ། སྤྲོ་ན་བདེ་ཆེན་གྱི་ཐིག་ལེ་འབེབས་བཟློག་གི་དམིགས་པ་ཡང་བྱ། གང་ལྟར་ཡང་སྤྱི་བོའི་ཐིག་ལེ་ལ་སེམས་ཞུགས་པ་བཞིན་ཆེར་གྱིས་གཏད་པས། དེ་ལས་འོད་ཟེར་ཁ་དོག་ལྔ་ལྡན་འཇའ་ཚོན་ལྟ་བུ་བུན་གྱིས་འཕྲོས། དབུ་མའི་ནང་བརྒྱུད་རྩ་ཁམས་གང་ལ་རེག་པ་ཐམས་ཅད་འཇའ་ཚོན་དུ་སོང་། དེ་ནས་ཆེར་འཕྲོས་པས་ལུས་རིལ་པོ། གནས་ཁང་། ལུང་པ། ཡུལ་ཕྱོགས། མཐར་ཁམས་གསུམ་ཐམས་ཅད་འོད་ཁ་དོག་ལྔ་འཇའ་ཚོན་ལྟ་བུ་ཁྲ་ཤིག་ཤིག ན་བུན་ལོང་ལོང་དུ་གྱུར་པར་བསམ་ལ་སེམས་བཟུང་། མཐར་དེ་ཐམས་ཅད་ནམ་མཁའ་ལ་དུ་བ་ཡལ་བ་བཞིན་བདེ་སྟོང་གི་ངང་དུ་མི་དམིགས་པར་བསམ་པའམ།
ཡང་ན་དེ་ཐམས་ཅད་རང་གི་ལུས་ལ་ཐིམ། ལུས་སྤྱི་བོའི་ཐིག་ལེ་ལ་ཐིམ། དེ་ནམ་མཁའ་ལ་འཇའ་ཡལ་བ་ལྟར་ཆོས་ཉིད་ཀྱི་ངང་དུ་ཐིམ་པར་བསམ། སྡུད་རིམ་སྔ་མ་ལྟར་ན། རང་ལུས་ལྷ་སྐུ་རྩ་ཐིག་དང་བཅས་སྐད་ཅིག་གིས་ལམ་གྱིས་གསལ་འདེབས། ཕྱི་མ་ལྟར་ན། ཐོག་མར་རང་གི་སྨིན་མཚམས་ཀྱི་ཐིག་ལེ་དེ་ཁྲ་ཆེམ་གྱིས་གྲུབ། དེ་ནས་རིམ་བཞིན་དུ་ལུས་རྩ་དང་བཅས་པ་གྲུབ་པར་བསམ་ལ་དམིགས་པ་བསྐྱར། དེ་ལྟར་ན་རླུང་ལུས་ལ་གནས་པས་ཁམས་སྙིགས་མ་དངས་མ་དང་། སེམས་ལ་ཞུགས་པས་དངས་མ་འཇའ་ལུས་སུ་བསྒྱུར་པར་བྱེད་པའི་ཐབས་དམ་པ་སྟེ། ཚུལ་འདི་ལ་གོམས་པས་ཅིར་སྣང་བདེ་ཆེན་ཡེ་ཤེས་སུ་འཆར་བ་ན། གསང་བའི་སྤྱོད་པས་བོགས་དབྱུང་ཞིང་། ཕྱོགས་ལས་རྣམ་རྒྱལ་གྱི་སྤྱོད་པ་དང་། ཕྱག་རྒྱའི་ཉེ་རྒྱུས་མཚམས་སྦྱར་ཏེ་ཚེ་གཅིག་གིས་མཆོག་གི་དངོས་གྲུབ་མངོན་དུ་བྱེད་པར་འགྱུར་རོ། །གསུམ་པ་ལམ་གྱི་ཡན་ལག་པྲ་སེ་ན་དབབས་པ་སོགས་ནི། དེང་སང་ལག་ལེན་འདེབས་པ་ཉུང་བས་འདིར་མ་བྲིས་ཏེ། རྗེ་བཙུན་ས་སྐྱ་པའི་གསུང་རབ་རྣམས་ལས་ཤེས་པར་བྱ་ཞིང་། འདིར་འཕྲོས་དོན་དུ་བསྙེན་པ་བྱེད་ཚུལ་གྱི་ལག་ལེན་ཅུང་ཟད་བཤད་ན། སྦྱོར་བ། དངོས་གཞི། རྗེས་སོ། །དང་པོ་ནི། རྟེན་གྱི་གང་ཟག་ངེས་འབྱུང་དང་སྙིང་རྗེ་ཆེན་པོས་རྒྱུད་སྦྱངས་ཏེ་དབང་ཐོབ་ཅིང་དམ་
ཚིག་ལ་གནས་པ། བྱིན་རླབས་ཀྱིས་སྨིན་ཞིང་ཉམས་ཁྲིད་ཟབ་མོ་ཐོབ་པ་ཆགས་མེད་ཀྱི་རྒྱུན་དང་ལྡན་ཞིང་བརྩོན་འགྲུས་ཡལ་བར་མི་འདོར་བས། གནས་དབེན་ཞིང་ཡིད་དང་མཐུན་ལ་རང་དབང་འདུས་པའི་གནས་སུ། མར་ངོའི་ཚེས་བཅུ་ལྟ་བུ་དུས་ཁྱད་པར་ཅན་གྱི་སྔ་དྲོ་གནས་ཁང་ཕྱག་དར་བྱ། རང་ཉིད་ཁ་ནུབ་ཏུ་ཕྱོགས་པའི་མདུན་རྣལ་འབྱོར་མའི་སྐུ་བྲིས་འབུར་གང་རིགས་ཀྱི་མདུན་དུ། གཏོར་མ་ལྔ་ཚར་སོགས་ཇི་ལྟར་རིགས་པ་མཆོད་པ་དང་བཅས་པ་བཤམས། བསྒུལ་བསྐྱོད་མི་དགོས་པའི་མལ་འོག་ཏུ་སྣ་ཚོགས་རྡོ་རྗེ་བྲིས་པའི་སྟེང་འབྲུ་དཀར་དང་ཀུ་ཤའི་ཆུན་པོ་དགྲམ། མདུན་དུ་ནང་མཆོད་རྡོར་དྲིལ། ཌཱ་མ་རུ་སོགས་ཉེར་མཁོའི་ཡོ་བྱད་དང་། མལ་ས་དེ་མིན་པ་ཞིག་ཏུ་རང་འཁོད་པའི་མདུན་གཏོར་མ་ཆ་གསུམ་སོགས་འོག་ཏུ་དགོས་པའི་ཡོ་བྱད་རྣམས་སྟ་གོན་བྱ། གཉིས་པ་ནི། ཕྱི་དྲོའི་ཆ་ལ་བབས་པ་ནས། གྲོགས་དམ་ཚིག་པ་དང་བཅས་ཏེ་ཆ་གསུམ་ཡིད་ཆེས་པ་བཏང་པའམ། སྔོན་འགྲོ་གཏོར་མ་དཀྱིལ་ཆོག་ནས་འབྱུང་བ་བཞིན་ལ། མི་འདྲ་བའི་ཁྱད་པར། རྗེ་བཙུན་རྡོ་རྗེ་རྣལ་འབྱོར་མའི་བསྙེན་སྒྲུབ་ཟབ་མོ་བགྱིད་པར་འཚལ་ན། ཞེས་དང་། བསྙེན་སྒྲུབ་ཀྱི་བྱ་བ་མཐར་མ་ཕྱིན་པར་ཞེས་བསྒྱུར། གཏོར་མ་ཕྱིར་དོར་བའི་ཚེ། མདུན་མཁར་བླ་མ་ཡི་དམ་འཁའ་འགྲོ་ཆོས་སྐྱོང་ཐམས་ཅད་མངོན་སུམ་བཞིན་དུ་
བཞུགས་པར་མོས་ཏེ། བདེན་སྟོབས་བརྗོད་པས་དེ་རྣམས་ཀྱི་སྐུ་ལས་རྡོ་རྗེ་ཁྲོ་བོ་དང་མེ་དཔུང་མཚོན་ཆའི་ཚོགས་དཔག་ཏུ་མེད་པ་སྤྲོས། ཡུངས་ཀར་ཀྱང་འབྲུ་རེ་རེ་ནས་སྤྲུལ་པའི་ཕོ་ཉ་སྲིན་པོ་ཁྲོས་པ་ལྟ་བུ་བསམ་གྱིས་མི་ཁྱབ་པར་གྱུར་ཏེ་བགེགས་ཐམས་ཅད་རྒྱང་རིང་དུ་བསྐྲད། བསད་བཅད་བཏུབ་ཅིང་ཆོས་དབྱིངས་སུ་ཐིམ། སྤྲུལ་པའི་ཁྲོ་བོའི་ཚོགས་རྣམས་ཚུར་འདུས་ཏེ་སྲུང་བའི་གུར་དུ་གྱུར་པར་བསམ་ལ། གུ་གུལ་གྱིས་བདུག །ཡུངས་ཀར་གྱིས་བྲབ། མཚམས་གཡོག་དང་སྨན་པ་སོགས་དམིགས་ཁོང་དུ་བཅུག་དགོས་པ་རྣམས་ཀྱང་འཇུག །སྤྲོ་ན་ཤེར་སྙིང་བདུད་བཟློག་དང་བཅས་པའང་བྱ། དེ་ནས་སྒོ་ཡི་ཕྱི་རོལ་དུ་ཐོ་དཀར་པོ་བཙུགས་ལ། རང་ཉིད་གྲོགས་དང་བཅས་རྡོར་དྲིལ་ཡུངས་ཀར་སྤོས་སོགས་ཐོགས་ལ། རྒྱས་པར་རྨོར་ཆེན་གྱིས་མཛད་པའི་ཐོ་འཛུགས་ལྟར་བྱ། ངོར་ལུགས་ལ་ཆ་གསུམ་ཙམ་ལས་གཞན་མི་མཛད། མཆན། དེ་ཙམ་མི་ནུས་ཀྱང་། ཐོ་འཇམ་མགོན་ཀུན་བློའི་གསུངས། མཆན། སུམྦྷ་ནི་སོགས་བརྗོད་ཅིང་ཡུངས་ཀར་གྱིས་བྲབས། གུ་གུལ་བདུག །མེ་ཏོག་དང་བཅས་ཐལ་མོ་སྦྱར་ཏེ། ཡེདྷརྨཱ་ཚར་གསུམ། ཕྱོགས་བཅུ་ན་བཞུགས་པའི་སོགས་བརྟན་བཞུགས་སྤྱི་ལྟར་ལ། བྱེ་བྲག་ཏུ་ཐོ་འདི་ལ་རྒྱལ་ཆེན་བཞི་འཁོར་དང་བཅས་པ་བརྟན་པར་བཞུགས་ནས་བདག་གི་བསྙེན་སྒྲུབ་མཐར་མ་ཕྱིན་གྱི་བར་དུ། ཕྱིའི་བར་
ཆད་ནང་དུ་མི་གཏོང་ཞིང་། ནང་གི་དངོས་གྲུབ་ཕྱིར་མི་ཡལ་བར་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པའི་སྟོང་གྲོགས་ཕྲིན་ལས་རྒྱ་ཆེན་པོ་མཛད་དུ་གསོལ། སུ་པྲ་ཏིཥྛ་དང་། ཡེ་དྷརྨཱ་བརྗོད་ཅིང་མེ་ཏོག་འཐོར། བཀྲ་ཤིས་བརྗོད། ནང་དུ་ལོག་ལ་རང་ཉིད་མལ་དུ་འཁོད། ངེས་འབྱུང་དང་བྱང་སེམས་གསལ་གདབ་ལ། བརྒྱུད་པའི་བླ་མ་དང་། རྩ་བའི་བླ་མའི་སྐུ་བསྟོད་མོས་གུས་ཤུག་དྲག་པོས་བྱས། དེ་ནས་གནས་ཡོ་བྱིན་རླབས་སྔོན་དུ་འགྲོ་བས། སྐྱབས་འགྲོ་ནས་བསམ་མི་ཁྱབ་པའི་བར་ཚར་ལུགས་ལྟར་ན་གནས་གསར་རྡོ་རྗེ་འཆང་དང་། ངོར་ལུགས་ལྟར་ན་རྗེ་དཀོན་མཆོག་ལྷུན་གྲུབ་ཀྱི་ཡིག་ཆའི་དཀྱུས་ནས་འབྱུང་བ་ལྟར་ཉམས་སུ་བླངས་རྗེས་ཐུན་མཚམས་ཀྱི་ལྷར་ལྡང་ཞིང་གཏོར་མ་འབུལ། གོ་ཆ་བཀོད་ཅིང་བསྲུང་བ་དང་བསྔོ་སྨོན་རྒྱས་པར་བྱ། གོང་གི་ཡིག་ཆ་དེ་གཉིས་མ་འབྱོར་ན་སྔོན་དུ་ཁོ་བོས་བཤད་པའི་སྒྲུབ་ཐབས་འདི་ཁོ་ན་ལྟར་ཉམས་སུ་བླངས་ཀྱང་རུང་ངོ་། །སླར་སྲོད་ཐུན་སྐྱབས་འགྲོ་ནས་བསྡུ་རིམ་པར་དཀྱུས་ལྟར་ལ། ཉལ་བའི་རྣལ་འབྱོར་གྱིས་ཉལ། སང་ནངས་པར་ལྡང་སྟེ་བདུད་རྩི་མྱོང་བ་དང་། སྐྱབས་འགྲོ་སོགས་དཀྱུས་ལྟར། ཉི་མ་ཤར་ཙམ་གྱི་ཚེ་ཐུན་གྲོལ། གཏོར་མ་བརྒྱ་རྩ་དང་ཚེ་སྒྲུབ་སོགས་བྱེད་ན་སྐབས་འདིར་བྱ། དེ་ནས་ཐུན་ཚུགས་ལ་ཉིན་ཕྱེད་མ་ཟིན་ཙམ་ལ་གྲོལ། ཁ་ཟས་ཀྱི་རྣལ་འབྱོར་
དང་། ཕྱག་བསྐོར་མདོ་འདོན་པ་སོགས་དགེ་བའི་བྱ་བ་ཅི་འགྲུབ་བྱ་ཞིང་ཅུང་ཟད་ངལ་གསོ། །དེ་ནས་གནས་ཡོ་བྱིན་རླབས་སྔོན་དུ་འགྲོ་བས་ཐུན་ལ་ཞུགས། ཉི་མ་ནུབ་ལ་ཉེ་བ་ན་གྲོལ་ནས་གཏོར་མའི་རྣལ་འབྱོར་རྒྱས་པར་བྱ། སྤྱིར་གྲུབ་ན་ཐུན་སྔ་མ་གཉིས་ཀྱི་མཇུག་ཏུའང་གཏོར་བསྔོ་བྱ་བར་གསུངས། བིར་སྲུང་དང་བྲག་རྫོང་མ་སོགས་སྲུང་འཁོར་གྱི་རིགས་ཡོད་ན་ཉམས་སུ་བླངས། དེ་ནས་སྲོད་ཐུན་ལ་འཇུག་ཅིང་། ནམ་གུང་མ་ཟིན་ཙམ་ལ་གྲོལ་ནས་ཉལ་བའི་རྣལ་འབྱོར་སོགས་སྔར་བཞིན་བྱ་སྟེ། དེ་ལྟར་ཐུན་བཞིའི་སྤྱིར་ཚར་ལུགས་ལ་ཐུན་བཞི་དང་། ངོར་ལུགས་ལ་ཐུན་གསུམ་མཛད་ཀྱང་། སྐབས་འདིར་རྗེ་རྡོ་རྗེ་འཆང་གིས་ཀྱང་། ཐུན་བཞི་བསྒོམ་ཞིང་གུས་པས་གསོལ་བཏབ་པས། ཞེས་གསུངས་པས་ཐུན་བཞི་ཁོ་ན་ལེགས་སོ། །མཆན། ཚུལ་གྱིས་ཐོག་མར་ཐུན་རྣམས་ལ་སྔོན་འགྲོ། སྐྱབས་འགྲོ། རྡོར་སེམས། མཎྜལ་རྣམས་རིམ་པ་གཙོ་བོར་བྱས་ཏེ། རབ་འབུམ་ཐེར་དང་། དེ་མིན་ཀྱང་མཚམས་ཀྱི་དངོས་གཞི་ཡུན་རིང་ཐུང་ལ་ལྟོས་ཏེ་ཞག་གསུམ། བདུན་སོགས་ཇི་ལྟར་འོས་པ་བྱ། དངོས་གཞིར་གཙོ་བོ་ངག་བཟླས་དང་། ཐུན་མཇུག་ཏུ་ཡིད་བཟླས། ཞར་བྱུང་གི་རྫོགས་རིམ་མཁའ་སྤྱོད་སྒྲུབ་པའི་ལམ་ཁྱད་པར་ཅན་བསམ་མི་ཁྱབ་ཐུན་མིན་རྣམས་མ་ཆགས་པར་བྱ། གཞན་འཕོ་བ་དང་། རྩ་དབུ་མའི་རྣལ་འབྱོར་སོགས་ཀྱང་ཇི་ལྟར་རིགས་པར་བསྒོམ། ལམ་
དུས་ནི་ཐོར་ཐུན་གྲོལ་ནས་སྔ་ཐུན་མཚུགས་པའི་བར་བྱ་ཞིང་། དེ་མིན་ཁ་འདོན་ཆུང་ངུའི་རིགས་རྣམས་ཐུན་མཚམས་གང་རུང་ལ་མ་ཆགས་ཙམ་བྱ། ཐུན་ལ་ཞུགས་ནས་མ་གྲོལ་བར་ཇ་སོགས་བཞེས་ཀྱང་ངག་མཚམས་དམ་པར་བཅད། ཐོག་མར་ཁོག་གྲིམ་ལ་སོས་དལ་བ། བར་དུ་སྒོ་གསུམ་འཇུག་པ་ཆིག་བསྒྲིལ། མཐར་ཇེ་ལྷོད་ལ་བཏང་ནས་མཚམས་དང་ཞེ་མ་འགྲས་པར་བསླབ། བཟླས་པ་འགྲོ་ཆེ་བ་དང་ཉམས་དང་རྨི་ལམ་གསལ་བ་སོགས་བཟང་རྟགས་དང་། བཟླས་པ་འགྲོ་བ་བུལ་ཞིང་ནད་གདོན་སོགས་རྐྱེན་ངན་གང་བྱུང་ཡང་རེ་དོགས་ཀྱི་རྣམ་རྟོག་ཚབ་ཚུབ་མི་བྱ་བར་བློ་བླ་མ་དང་དཀོན་མཆོག་ལ་གཏད་ནས་ལྷོད་ཀྱིས་གློད། དམ་བཅའ་ཡལ་བར་མི་འདོར་བའི་སྙིང་རུས་བསྐྱེད། རིག་པ་བརྗོད་མེད་དུ་ཆམ་མེར་བཞག་པས་གེགས་ཐམས་ཅད་རང་གྲོལ་དུ་འགྲོ། བཟླས་པའི་ཐོག་མར། ཐོད་པའམ་བ་དྷི་ཙིའི་ཕྲེང་བ་བརྒྱ་རྩ་བརྒྱད་ལ། ༀ་པ་དེ་པ་དེ་མ་ཧཱ་ཛྷཱ་ནཾ་སརྦ་བུདྡྷ་མ་ཡཾ་བྷ་བེ་ཏ་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨཱཋཁཾ་སྭཱ་ཧཱ། ལན་གསུམ་བཟླས་པའི་ཁ་རླངས་ཕྲེང་བར་ཕོག་པར་བྱས་ཏེ་བྱིན་གྱིས་བརླབས། དངོས་གཞིའི་བཟླས་དམིགས་ནི་གཙོ་བོ་སྔར་བཤད་པ་བཞིན་དང་། དམིགས་པ་གཅིག་ཁོ་ནས་སྐྱོ་ན། རེས་ལྷ་སྐུ་སྣང་ལ་རང་བཞིན་མེད་པར་གསལ་ལམ་མེ་བ་ལ་སེམས་གཏད། རེས་སྐུ་ཡི་ཆ་ཤས་རེ་རེ་ནས་སེམས་འཛིན།
རེས་སྔགས་ཀྱི་ཡིག་འབྲུ་དང་སྒྲ་ཙམ་ལ་སེམས་བཟུང་། རེས་གནས་ལུགས་བརྗོད་བྲལ་གྱི་ངང་དུ་ངལ་གསོ། རེས་འོད་ཟེར་གྱི་རྩེ་ལས་མཆོད་པའི་རྣམ་གྲངས་བསམ་གྱིས་མི་ཁྱབ་པ་སྤྲོས་ཏེ་སངས་རྒྱས་དང་བྱང་ཆུབ་སེམས་དཔའ་རྣམས་ལ་མཆོད་པ་དང་། རེས་སྣོད་བཅུད་ཐམས་ཅད་ལྷར་གསལ་བ་དང་། དེ་ཐམས་ཅད་ཀྱིས་ཀྱང་ཨོ་གསུམ་མའི་སྒྲ་འུར་དིར་གྱིས་སྒྲོགས་པར་བསམ་ལ་བཟླ་བ་སོགས་དམིགས་པའི་རྩལ་སྦྱང་བས་གཅིག་གྲོགས་གཅིག་གིས་བྱས་ཏེ་རྣལ་འབྱོར་ལ་བོགས་ཐོན་པར་འགྱུར་ཞིང་། མདོར་ན་སེམས་མ་ཡེངས་པའི་ངང་དུ་བཟླས་བ་བྱ་བ་ནི་ཤིན་ཏུ་གལ་ཆེའོ། །བཟླས་པའི་གྲངས་ནི། གཞིའི་བསྙེན་པར་འབུམ་ཕྲག་བཞི། ཁྲི་ཕྲག་བཞི། སྟོང་ཕྲག་བཞི། བརྒྱ་ཕྲག་བཞི་རྣམས་ཀྱིས་དོན་འགྲུབ་པར་གསུངས་ལ། འབྲུ་འབུམ་བྱེད་ན་འབུམ་ཕྲག་སོ་བདུན་མཛད་པ་ཕྱག་ལེན་ནོ། །དེ་ཡང་སྒྲུབ་པ་པོ་ནམ་འཆི་ཆ་མེད། འཁོར་བ་ལ་ངེས་འབྱུང་། སེམས་ཅན་ལ་སྙིང་རྗེ། བླ་མ་ལ་མོས་གུས་རྣམས་ལམ་གྱི་སྲོག་ཏུ་བཟུང་། ཁས་བླངས་པའི་དམ་ཚིག་དང་སྡོམ་པ་ལ་གཅེས་སྤྲས་སུ་བྱས་ནས་རྩེ་གཅིག་ཏུ་༈ བསྙེན་ན་དངོས་གྲུབ་རྣམ་གཉིས་མྱུར་དུ་འགྲུབ་པ་ནི། རྒྱུད་སྡེའི་བཞུགས་ཚུལ། བསྒོམ་བྱའི་ལྷ། བཟླ་བྱའི་སྔགས། ཟབ་མོའི་རྫོགས་རིམ་རྣམས་ཀྱི་སྒོ་ནས་གཞན་ལས་ཆེས་ཁྱད་དུ་འཕགས་པའི་དབང་གིས་
ཏེ། དེ་ཡང་རྒྱུད་སྡེའི་བཞུགས་ཚུལ་གྱི་དབང་དུ་བྱས་ན། རྒྱུད་སྡེ་ཐམས་ཅད་ཀྱི་མཐར་ཐུག་པ་ནི་རྣལ་འབྱོར་གསང་མཐའི་རྒྱུད་ཡིན་ལ། དེ་ལའང་ལཱུ་ནག་དྲིལ་གསུམ་རྣལ་འབྱོར་མ་དང་བཞི་ལས། ཕྱི་མ་འདི་ཁོ་ན་མཆོག་ཏུ་ཟབ་པའི་ཕྱིར་ཡང་རྩེ་ནཱ་རོ་མཁའ་སྤྱོད་ཅེས་གྲགས་སོ། །བསྒོམ་བྱའི་ལྷ་ཡི་དབང་དུ་བྱས་ན། རི་རབ་སུམ་ཅུ་རྩ་གཉིས་ཀྱི་རྡུལ་གྱི་གྲངས་དང་མཉམ་པས་མཚོན། མཁའ་འགྲོ་མ་བསམ་གྱིས་མི་ཁྱབ་པ་ནི། མཁའ་འགྲོ་མ་བྱེ་བ་ཕྲག་ཕྱེད་དང་བཞི་འདུས། དེ་སྟོང་ཕྲག་བདུན་ཅུ་རྩ་གཉིས་སུ། དེ་བདུན་ཅུ་རྩ་བདུན་དུ། དེ་སོ་བདུན་དུ། དེ་ཉི་ཤུ་རྩ་བཞིར། དེ་ཡང་བརྒྱད། དེའང་རྡོ་རྗེ་རྣལ་འབྱོར་མ་འདི་ཁོ་ན་ལ་འདུ་བའི་ཕྱིར། འདི་བསྒོམ་པས་དཔའ་བོ་མཁའ་འགྲོ་ཇི་སྙེད་ཐམས་ཅད་བསྒོམ་པར་འགྱུར་བ་ཉིད་དོ། །བཟླ་བྱའི་སྔགས་ཀྱི་དབང་དུ་བྱས་ན། གསང་སྔགས་ཨོ་གསུམ་མ་འདི་ཉིད་ཕག་མོ་སོ་བདུན་མའི་དཀྱིལ་འཁོར་གྱི་ལྷ་ཉིད་ཡི་གེའི་གཟུགས་སུ་ཤར་བ་ཡིན་ཅིང་། དེ་ལས་འཕྲོས་ཏེ་སྔར་སྨོས་པ་བཞིན་དཔའ་བོ་མཁའ་འགྲོ་བསམ་གྱིས་མི་ཁྱབ་པར་ཤར་བའི་ཕྱིར་ན། སངས་རྒྱས་བྱང་སེམས་དཔའ་བོ་མཁའ་འགྲོ་ཐམས་ཅད་ཀྱི་ངོ་བོ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་སྔགས་ཐམས་ཅད་འདུས་པར་བཤད་པས་དེ་ཐམས་ཅད་ཀྱི་བྱིན་རླབས་ཞུགས་པར་འགྱུར་བ་དང་། དམ་ཚིག་དང་
ལྡན་པའི་སྔགས་པས་བཀླགས་པ་ཙམ་གྱིས་དོན་ཐམས་ཅད་གྲུབ་པའི་ཕྱིར། བདེ་མཆོག་རྩ་རྒྱུད་ལས། འདི་ལས་ཤིན་ཏུ་མཆོག་གྱུར་པ། །འཇིག་རྟེན་གསུམ་ན་ཅི་ཡང་མེད། །སོགས་ནས། བཀླག་པས་འདི་དག་ཐམས་ཅད་འགྲུབ། །ཞེས་སོགས་རྡོ་རྗེ་འཆང་རང་ཉིད་ཀྱིས་རྒྱ་ཆེར་བསྔགས་པ་མཛད་དོ། །རྫོགས་རིམ་གྱི་དབང་དུ་བྱས་ན། རྩ་རླུང་ཐིག་ལེ་ཐམས་ཅད་དབུ་མ་ཡེ་ཤེས་ཀྱི་རླུང་ཐིག་ལེ་དང་བཅས་པ་འབའ་ཞིག་ལ་འདུས་པས། འདི་ཁོ་ནར་གནད་དུ་བསྣུན་པས་གཞན་ཐམས་ཅད་ཤུགས་ཀྱིས་འབྱོངས་ཞིང་དངོས་གྲུབ་མྱུར་བའི་ཟབ་གནད་ཁྱད་པར་ཅན་ཡིན་པའི་ཕྱིར་རོ། །དེ་ལྟ་བུའི་ལམ་ཟབ་མོ་འདི་ལ་བརྟེན་ནས་འཕགས་བོད་དུ་མཁས་གྲུབ་བསམ་གྱིས་མི་ཁྱབ་པ་ཞིག་འཇའ་ལུས་མཁའ་སྤྱོད་ཀྱི་གོ་འཕང་མངོན་དུ་མཛད་པའི་ཚུལ་ལ་དྲན་པས་ཉེ་བར་བཞག་སྟེ། བདག་ལེགས་སུ་འདོད་པའི་སྐལ་བཟང་རྣམས་ཀྱིས་ཚུལ་འདི་ཁོ་ནར་ཉམས་ལེན་གྱི་སྙིང་པོར་དྲིལ་བར་བྱའོ། །གསུམ་པ་ནི། བསྙེན་པའི་གྲངས་ཐེབས་བ་དང་གྲུབ་ན་ཞག་གསུམ་གྱི་བར་ཕྱི་རོལ་མཆོད་པ་བྱ། གནས་དེ་ཉིད་དམ་ཕྱི་རོལ་གཞན་གྱིས་མི་མཐོང་བའི་སར་ཁ་སྐོང་གི་སྦྱིན་སྲེག །ལྷ་སྔགས་ཨོཾ་གསུམ་མ་དང་རྫས་ཏིལ་འབའ་ཞིག་ལ་གྲངས་བཟུང་ནས་བསྙེན་པ་ཇི་ཙམ་སོང་བའི་བཅུ་ཆ་འབུལ། དེ་ནས་གཟའ་སྐར་བཟང་བའི་ཐོར་ཐུན་
གྱི་མཇུག་ཏུ་གཏོར་བསྔོ་རྒྱས་པར་བྱ་ཞིང་གཏོར་མ་འབུལ། སྒོ་དྲུང་གི་རྒྱལ་ཆེན་ལ་གཏང་རག་དང་། གཤེགས་གསོལ་བྱ། དེ་ནས་གྲོགས་དམ་ཚིག་དང་ལྡན་པ་རྣམས་དང་རིམ་གྱིས་འཕྲད་པ་སོགས་བྱའོ། །དེ་དག་གི་གནས་སྐབས་ཐམས་ཅད་དུ་རྒྱས་འདེབས་པར་བྱེད་པ་ཆོས་ཉིད་དངོས་སུ་སྟོན་པའི་ཉམས་ལེན་གྱི་གནད་ཅུང་ཟད་བཤད་ན། ཚར་ཆེན་རྡོ་རྗེ་འཆང་ཆེན་པོས། སྐྱེ་འགགས་གནས་གསུམ་བྲལ་བ་གདོད་མའི་གཤིས། །ཞེས་སོགས་གསུངས་པའི་དོན། འཁོར་འདས་སྣང་སྲིད་ཀྱིས་བསྡུས་པའི་ཆོས་ཐམས་ཅད་རང་སེམས་ཁོ་ནའི་རྣམ་འཕྲུལ་ལས་དོན་ལོགས་སུ་གྲུབ་པ་རྡུལ་ཙམ་ཡང་མེད་ཅིང་། སེམས་དེ་ལ་ཡང་ཁ་ནང་དུ་ལྡོག་ནས་ཆེར་གྱིས་བལྟས་པས། དང་པོར་སྐྱེ་བའི་རྒྱུས་སྟོང་། བར་དུ་གནས་པའི་ངོ་བོས་སྟོང་། མཐར་འགགས་པའི་འབྲས་བུས་སྟོང་པས་ན་གདོད་མ་ནས་རང་ཆས་སུ་གནས་པའི་གཤིས་ལུགས་ངོ་བོ་སྟོང་པ། མཚན་ཉིད་གསལ་བ་དེ་གཉིས་དབྱེར་མེད་པའི་ཟུང་འཇུག །ཉམས་སུ་མྱོང་བཞིན་དུ་བརྗོད་པའི་མཐའ་ཐམས་ཅད་དང་བྲལ་བའི་བློ་འདས་ཀྱི་རིག་པ་སྐད་ཅིག་མ་འདི་ཀ་དོན་དམ་ལྷན་ཅིག་སྐྱེས་པའི་རྡོ་རྗེ་རྣལ་འབྱོར་མར་རང་ངོ་འཕྲོད་ནས་ཐག་བཅད་ངེས་ཤེས་བསྐྱེད། འཛིན་པ་མ་ཞུགས་པར་བྱས་ཏེ་ཉམས་ལེན་གྱི་རྒྱུན་སྐྱོང་། རྣམ་རྟོག་གང་སྐྱེས་ཀྱང་དེ་ཀ་རང་གི་སྟེང་དུ་བཟོ་བཅོས་མ་བྱས་པར་ཀློད་
ནས་སེམས་ལ་སེམས་ཀྱིས་བལྟ་བའི་ཚུལ་གྱིས་མ་ཡེངས་ཙམ་དུ་བཞག་པས་རྟོག་པ་ཁོ་རང་གསལ་སྟོང་ཟུང་འཇུག་ཏུ་རྗེན་ལྷང་གིས་འཆར་བ་ཞིག་ཡོང་། དེས་མཚོན་ཏེ་བསྐྱེད་རྫོགས་བསྒོམ་པ་ལ་སོགས་མཉམ་བཞག་དང་རྗེས་ཐོབ་ཀྱི་གནས་སྐབས་ཐམས་ཅད་དུ་ལྟ་བ་འཁོར་འདས་དབྱེར་མེད་ཀྱི་ཉམས་ལེན་དང་མ་བྲལ་བ་གལ་ཆེ་སྟེ། དེའི་ཚུལ་ཡང་། བླ་མ་ས་སྐྱ་པ་ཆེན་པོས། བསྐྱེད་རིམ་རྟོག་པ་ཡིན་མོད་ཀྱང་། །རྟོག་པའི་ངོ་བོ་སེམས་ཡིན་ཏེ། །སེམས་ཀྱི་མཚན་ཉིད་གསལ་རིག་ཡིན། །གསལ་རིག་རང་བཞིན་སྟོང་པ་ཉིད། །སྟོང་པ་གདོད་ནས་ཆོས་ཀྱི་དབྱིངས། །འཁྲུལ་པ་ཆོས་ཀྱི་དབྱིངས་ཉིད་དུ། །ཤེས་པས་རྟོག་པ་ཐམས་ཅད་ཀྱང་། །ཇི་ལྟར་བསྒོམ་ཀྱང་མི་རྟོག་ཉིད། །བཙལ་ཡང་འཁྲུལ་བ་ག་ལ་སྲིད། །ཅེས་གསུངས་པ་ལྟར། སེམས་ཀྱི་གཤིས་ལུགས་བརྗོད་བྲལ་གྱི་ངང་ནས། གདངས་བདེ་ཆེན་དུ་མ་འགགས་པའི་རང་རྩལ་ལྷ་དང་གཞལ་ཡས་ཁང་སོགས་དྭངས་པའི་མཁའ་ལ་འཇའ་ཚོན་ཤར་བ་ལྟར་སྣང་སྟོང་ཟུང་འཇུག་ཆེན་པོའི་ལམ་ལ་བསླབས་པས་བསྐྱེད་རྫོགས་དབྱེར་མེད་དང་ཅིར་སྣང་ཡེ་ཤེས་སུ་འཆར་བའི་དོན་ལ་རིམ་གྱིས་དབང་འབྱོར་བར་འགྱུར་རོ། །དེ་ལྟར་རྗེ་བཙུན་རྡོ་རྗེ་རྣལ་འབྱོར་མའི་ལམ་གྱི་རིམ་པ་ཟབ་མོ་འདི་ལ། སྤྱིར་འཕགས་བོད་ཀྱི་མཁས་གྲུབ་དུ་མས་བཀྲལ་བའི་གཞུང་དང་། ཁྱད་
པར་རང་ལུགས་ཉམས་ལེན་སྙིང་པོར་དྲིལ་བའི་དབང་དུ་བྱས་ན། ངག་འདོན་ཐུན་མོང་ཙམ་དུ་ཚར་ཆེན་དང་། ངོར་ཆེན་དཀོན་མཆོག་ལྷུན་གྲུབ། ཐུན་མོང་མ་ཡིན་པར་གནས་གསར་རྡོ་རྗེ་འཆང་གི་སྒྲུབ་ཐབས་ནག་འགྲོས་མ་དང་། དེ་དག་གི་གོ་དོན་འཇམ་དབྱངས་མཁྱེན་བརྩེའི་ཁྲིད་ཡིག་ཆེན་མོ་ལ་གཞི་བྱས། འཇམ་མགོན་སངས་རྒྱས་ཕུན་ཚོགས་ཀྱི་རྣམ་བཤད་དང་། རྡོ་རྗེ་འཆང་དབང་ཕྱུག་རབ་བརྟན་པའི་བླ་མའི་རྣལ་འབྱོར་སོགས་ཡིག་ཆུང་། ཚར་ཆེན་རིན་པོ་ཆེས་མཛད་པའི་ལུས་དཀྱིལ། བསམ་མི་ཁྱབ་ཐུན་མིན། འཕོ་བ་རྣམས་ཀྱི་ཡིག་ཆུང་གིས་བརྒྱན་པ་དང་། ཞལ་ཤེས་ཀྱི་གནད་འགའ་ཞིག་ཞི་བཟང་འཕགས་པ་དགེ་ལེགས་རྒྱལ་མཚན་གྱིས་གནས་གསར་བའི་གསུང་ཇི་ལྟ་བ་བཞིན་ཟིན་བྲིས་སུ་མཛད་པ་རྣམས་སུ་མི་གསལ་བ་གང་ཡང་མ་མཆིས་ཤིང་། དེ་མཚུངས་ཚེས་བཅུའི་མཆོད་པ་དང་། ཞི་བའི་སྦྱིན་སྲེག་གནས་གསར་བ་དང་། བསྙེན་ཡིག་རྨོར་ཆེན་དང་། མཁས་གྲུབ་སངས་རྒྱས་རྒྱ་མཚོས་མཛད་པས་མཚོན་བྱིན་རླབས་དང་ལེགས་བཤད་རྨད་དུ་བྱུང་བ་གླེགས་བམ་དུ་ལོངས་པ་དུ་མ་ཡོད་བཞིན་དུ། འདི་ལྟ་བུ་འབྲི་བ་ལ་དགོས་པ་གང་ཡང་མ་མཆིས་མོད། འོད་ཀྱང་ཟབ་ཆོས་འདི་ཉིད་ཁྱབ་བརྡལ་དུ་དར་ཆེས་བས། གྲུབ་མཐའ་གཞན་གྱི་ཕྱོགས་སུ་གང་གི་དཔེ་དེ་རྣམས་ཐམས་ཅད་རྙེད་དཀའ་བ་དང་། རང་རེའི་
རྗེས་འབྲངས་འགའ་ཞིག་ཀྱང་དཔེ་མང་ཀློག་པའི་ངལ་བ་མི་ནུས་ཤིང་། བློ་གྲོས་དམན་པས་ཡིག་ཆ་ཕན་ཚུན་གུང་བསྒྲིགས་མི་ཤེས་པ་སོགས་དང་། སྤྲོས་པ་ཆུང་བས་ཚེས་བཅུའི་མཆོད་པ་སོགས་རྒྱས་པར་མི་ནུས་པ་རྣམས་ལ་ཕན་པའི་བསམ་པ་ཁོ་ནས་ངག་འདོན་དང་དམིགས་རིམ་མདོར་བསྡུས་དཀྱུས་གཅིག་ཏུ་བཀོད་པ་ལ་མཁས་པ་རྣམས་ཀྱིས་བཟོད་པར་མཛད་དུ་གསོལ། །རྗེ་བཙུན་རྡོ་རྗེ་རྣལ་འབྱོར་མའི། །བསྐྱེད་དང་རྫོགས་པའི་ཚུལ་འདི་ལ། །བརྟེན་ནས་འགྲོ་ཀུན་མཁའ་སྤྱོད་གྲོང་། །བགྲོད་པའི་གསང་ལམ་ཉིད་གྱུར་ཅིག །ཅེས་པའང་ལམ་འདི་ལ་མོས་པའི་དགེ་སློང་གུ་ཎ་ལཀྵིས་ཚེས་བཅུའི་མཆོད་པ་མདོར་བསྡུས་པ་ཞིག་དགོས་ཞེས་ཆེད་དུ་བསྐུལ་བས་མཚམས་སྦྱར་ཏེ། དོན་གཉེར་བློ་གྲོས་དམན་པ་གཞན་ལའང་ཕན་པའི་བསམ་པས་བསྐྱེད་རྫོགས་ཡན་ལག་དང་བཅས་པ་ཉུང་གསལ་སྙིང་པོར་དྲིལ་བ་འདི་ནི། ཁྱབ་བདག་རྡོ་རྗེ་སེམས་དཔའི་ངོ་བོར་གྱུར་པ་མཁན་ཆེན་ཐམས་ཅད་མཁྱེན་པ་བྱམས་པ་རྣལ་འབྱོར་འཇམ་དཔལ་བཟང་པོ་སོགས་ཡོངས་འཛིན་དམ་པ་ཆོས་བཞིན་དུ་སྤྱོད་པ་རྣམས་ཀྱི་བཀའ་དྲིན་ལས་ཚུལ་འདིའི་སྨིན་གྲོལ་གྱི་བདུད་རྩི་མང་དུ་ཐོས་པའི་རྒྱལ་ཁམས་ཀྱི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས། མཁས་ཤིང་དངོས་གྲུབ་བརྙེས་པ་རྣམས་ཀྱི་ཞལ་ལུང་དྲི་མ་མེད་པ་ལ་ཉེ་བར་བཏུས་ཏེ་སྦྱར་བའི་དགེ་ལེགས་ཀྱི་སྣང་བས་ཕན་བདེའི་པདྨོ་མཆོག་ཏུ་རྒྱས་པའི་རྒྱུར་གྱུར་ཅིག །སརྦ་དཱ་མངྒ་ལཾ།།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་བསྐྱེད་རྫོགས་མདོར་བསྡུས་དང་འབྲེལ་བའི་ཉམས་ལེན་མཁའ་སྤྱོད་གསང་ལམ་མཛེས་པར་བྱེད་པའི་རྒྱན།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་བསྐྱེད་རྫོགས་མདོར་བསྡུས་དང་འབྲེལ་བའི་ཉམས་ལེན་མཁའ་སྤྱོད་གསང་ལམ་མཛེས་པར་བྱེད་པའི་རྒྱན་ཅེས་བྱ་བ་བཞུགས་སོ། །ཨོཾ་སྭསྟི་སིདྡྷཾ། བདེ་སྟོང་ཟུང་འཇུག་ཡེ་ཤེས་སྐུ། །བླ་མ་རྣལ་འབྱོར་མ་དཔལ་ལ། །བཏུད་ནས་བསྐྱེད་རྫོགས་མདོར་བསྡུས་དང་། །འབྲེལ་བའི་གསང་ལམ་མཛེས་རྒྱན་བསྐྲུན། །འདི་ལ་གསུམ། རྡོར་སེམས་བསྒོམ་བཟླས། བླ་མའི་རྣལ་འབྱོར་ཐུན་མོང་མ་ཡིན་པ། བསམ་མི་ཁྱབ་ཐུན་མོང་མ་ཡིན་པ་ཇི་ལྟར་བསྒོམ་པའི་ཚུལ་ལོ། །དང་པོ་ལ་གསུམ། ལྷ་བསྒོམ་པ། སྔགས་བཟླ་བ། བཤགས་བསྡམ་བྱ་བའོ། །དང་པོ་ནི། སྐྱབས་སེམས་ཀྱི་རྗེས། རང་གི་སྤྱི་བོར་པདྨ་དང་པདྨ་དཀར་པོའི་སྡོང་བུ་ཚངས་བུག་ལ་ཟུག་པ། ཟླ་བའི་སྟེང་དུ་སྐད་ཅིག་གིས་བཅོམ་ལྡན་འདས་རྡོ་རྗེ་སེམས་དཔའ་དཔལ་ཧེ་རུ་ཀ་སྐུ་མདོག་དཀར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། རུས་པའི་རྒྱན་དྲུག་གིས་བརྒྱན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེའི་པང་ན་ཡུམ་རྡོ་རྗེ་སྙེམ་མ་སྐུ་མདོག་དཀར་མོ་གྲི་གུག་དང་ཐོད་པ་འཛིན་པ། ཕྱག་རྒྱ་ལྔས་བརྒྱན་པ་དང་མཉམ་པར་སྦྱོར་བ། གཉིས་པ་ནི།
ཡབ་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་དཀར་པོ། དེ་ལས་འོད་ཟེར་འཕྲོས་པས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་ཡེ་ཤེས་ཀྱི་བདུད་རྩིའི་རྣམ་པར་སྤྱན་དྲངས་ནས་ཧཱུྃ་ལ་ཐིམ། བཅོམ་ལྡན་འདས་བདག་དང་སེམས་ཅན་ཐམས་ཅད་ཀྱི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། །ཞེས་གསོལ་བ་བཏབ་པས་ཧཱུྃ་ལས་བདུད་རྩིའི་རྒྱུན་བབས། ཧེ་རུ་ཀའི་སྐུ་གང་། དེ་ནས་དབྱིབས་བརྒྱུད། ཡུམ་གྱི་སྐུ་གང་། ཡབ་ཡུམ་གཉིས་ཀྱི་སྦྱོར་མཚམས་ནས་བདུད་རྩི་བབས། བདག་གི་སྤྱི་གཙུག་ནས་ཞུགས་པས་ནད་གདོན་སྡིག་སྒྲིབ་ཐམས་ཅད་དུད་ཁུའམ་རྣག་ཁྲག་སྲོག་ཆགས་མི་སྡུག་པའི་རྣམ་པས་བཤང་གཅི་གཉིས་དང་། རྐང་མཐིལ་གཉིས་ནས་ཐོན། ཤུལ་ཐམས་ཅད་བདུད་རྩིས་གང་བར་གྱུར། ཞེས་བརྗོད་ཅིང་བསམས་ལ། ཨོཾ་ཤྲཱི་བཛྲ་ཧེ་རུ་ཀ་ས་མ་ཡ། མ་ནུ་པཱ་ལ་ཡ། ཧེ་རུ་ཀ་ཏེ་ནོ་པ་ཏིཥྛ། དྲི་དྷོ་མེ་བྷ་ཝ། སུཏོ་ཁྱོ་མེ་བྷ་ཝ། ཨ་ནུ་རཀྟ་མེ་བྷ་ཝ། སུ་པོ་བྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲཱི་ཡཀུ་རུ་ཧཱུཾ། ཧ་ཧ་ཧ་ཧ་ཧོ༔ བྷ་ག་ཝཱན། བཛྲ་ཧེ་རུ་ཀ མཱ་མེ་མུཉྩ། ཧེ་རུ་ཀོ་བྷ་ཝ་མ་ཧཱ་ས་མ་ཡ་ས་ཏཱ་ཨཱཿཧཱུྃ་ཕཊ། ཅེས་ཉེར་གཅིག་སོགས་ཅི་ནུས་བཟླ། གསུམ་པ་ནི། མཐར་ཐལ་མོ་སྦྱར་
ཏེ། མགོན་པོ་བདག་ནི་མི་ཤེས་རྨོངས་པ་སྟེ། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ། །སྡིག་པ་དང་སྒྲིབ་པ་ཉེས་པ་དང་ལྟུང་བ་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། །ཞེས་གསོལ་བ་བཏབ་པས་རྡོ་རྗེ་སེམས་དཔའ་ཡབ་ཡུམ་འོད་དུ་ཞུ། རང་གི་སྤྱི་བོ་ནས་ཐིམ་པས་ལུས་ཤེལ་གོང་གཡའ་དག་པ་ལྟ་བུར་གྱུར་པར་བསམ་མོ། །གཉིས་པ་བླ་མའི་རྣལ་འབྱོར་ཐུན་མོང་མ་ཡིན་པ་ལ་བཞི། ཚོགས་ཞིང་གསལ་གདབ་པ། གསོལ་བ་གདབ་པ། མཆོད་པ་འབུལ་བ། དབང་བླང་ཞིང་དེ་ཁོ་ན་ཉིད་ལ་མཉམ་པར་བཞག་པའོ། །དང་པོ་ནི། མདུན་གྱི་ནམ་མཁར་ཡེ་ཤེས་ཀྱི་རང་སྣང་ལས་གྲུབ་པའི་གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་ལྟེ་བར་སེང་ཁྲི་པད་ཟླ་ཉི་མའི་གདན་ལ་རྩ་བའི་བླ་མ་སངས་རྒྱས་རྡོ་རྗེ་ཆོས་ཀྱི་རྣམ་པ་ཅན། སྐུ་མདོག་དམར་པོ་རྡོ་རྗེ་དང་དྲིལ་བུ་ཐུགས་ཀར་བསྣོལ་ཏེ་འཛིན་པ། དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ། མཐའ་སྐོར་དུ་མདུན་ནས་བརྩམས་ཏེ་པད་ཟླའི་གདན་རེ་རེའི་སྟེང་དུ་བརྒྱུད་པའི་བླ་མ་རྣམས་དཔའ་བོ་
རྡོ་རྗེ་ཆོས་ཀྱི་རྣམ་པ་ཅན། སྐུ་མདོག་དམར་པོ་གཡས་ཌཱ་མ་རུ་དང་། གཡོན་ཐོད་པ་བདུད་རྩིས་བཀང་བ་དང་། གྲུ་མོ་གཡོན་ན་ཁ་ཊཾ་ག་བསྣམས་པ། རུས་པའི་རྒྱན་དྲུག་གིས་བརྒྱན་པ། གཙོ་འཁོར་ཐམས་ཅད་ཀྱང་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་། གཞོན་ནུ་ལང་ཚོ་དར་ལ་བབས་པའི་རྣམ་པ་ཅན། སྐྱབས་གནས་ཐམས་ཅད་འདུས་པའི་ངོ་བོར་གྱུར་པའི་སྤྱི་བོར་ཨོཾ། མགྲིན་པར་ཨཱ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་བླ་མ་ཡི་དམ་སངས་རྒྱས་བྱང་སེམས་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་ཨོཾ་བཛྲ་ས་མཱ་ཛ༔ ཛཧཱུྃ་བཾ་ཧོ༔ གཉིས་སུ་མེད་པར་ཐིམ། སྐྱབས་གནས་རེ་རེའང་སྐྱབས་གནས་ཀུན་འདུས་ཀྱི་ངོ་བོར་གྱུར་པར་བསམ་མོ། །གཉིས་པ་ནི། མོས་གུས་གདུང་ཤུགས་དྲག་པོས། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ཅེས་དང་། སྤྲོ་ན་བརྒྱུད་འདེབས་བྱ། གང་ལྟར་ཡང་། དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་གསོལ་བ་འདེབས་སོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། །ཞེས་ཅི་ནུས་ཀྱི་སྒོ་ནས་གསོལ་བ་ཕུར་ཚུགས་སུ་གདབ་བོ། །གསུམ་པ་ལ་གཉིས། ཞེན་པ་སྤང་བ་དང་། མཆོད་པ་དངོས་སོ། །
དང་པོ་ནི། རང་གི་མདུན་དུ་ལོངས་སྤྱོད། གཡས་སུ་གཉེན། གཡོན་དུ་དགྲ། མཐའ་བསྐོར་དུ་བར་མའི་སེམས་ཅན་ཐམས་ཅད་འཁོད་པ། དེ་ཐམས་ཅད་ལྟོས་མེད་དུ་ལིང་གིས་ཕུལ་བར་བསམ་ལ། བདག་གི་ལུས་ལོངས་སྤྱོད་དགྲ་གཉེར་བར་མའི་འགྲོ་བ་དང་བཅས་པ་ཐམས་ཅད་དཔལ་ལྡན་བླ་མ་དམ་པ་རྣམས་ལ་འབུལ་བར་བགྱིའོ། །བདག་ཆགས་སྡང་རྨོངས་གསུམ་དང་བྲལ་བར་བྱིན་གྱིས་བརླབ་ཏུ་གསོལ། །ཅེས་བརྗོད། གཉིས་པ་ལ་དྲུག་ལས། དང་པོ་ཕྱི་མཆོད་ནི། རང་གི་སྙིང་ག་ནས་མཆོད་པའི་ལྷ་མོ་ནམ་མཁའ་གང་བས་མེ་ཏོག་ལ་སོགས་པས་མཆོད་པར་བསམ་ལ། ཨོཾ་བཛྲ་པུཊྚེ་ཨཱཿཧཱུྃ་ནས། ཤབྡའི་བར་ཕྱག་རྒྱ་དང་བཅས་པས་མཆོད་ཅིང་། སླར་རང་ལ་བསྡུ། གཉིས་པ་ནང་མཆོད་ནི། ཡང་མཆོད་པའི་ལྷ་མོ་རྣམས་ཀྱིས་རང་བཞིན་གྱི་གནས་ནས་ཡེ་ཤེས་ཀྱི་བདུད་རྩི་ཐོད་པའི་ནང་དུ་སྤྱན་དྲངས་ཏེ་རྩ་བརྒྱུད་ཀྱི་ཚེ་བླ་མ་རྣམས་ལ་རེ་རེ་བཞིན་ཕུལ། ལྗགས་འོད་ཟེར་གྱི་སྤུ་གུས་དྲངས་ཤིང་གསོལ། ཟག་མེད་ཀྱི་བདེ་བས་མཉེས་པར་བསམ་ལ། ཨོཾ་ཨཱཿཧཱུྃ་ཞེས་བརྗོད་ཅིང་རང་ལ་བསྡུ། གསུམ་པ་གསང་མཆོད་ནི། སླར་ཡང་སྤྲོས་པའི་ལྷ་མོ་རྣམས་ཀྱིས་སྙན་པའི་གླུ་ལེན། བདེ་བའི་གར་བསྒྱུར། མཐར་གཅིག་ལ་གཅིག་ཐིམ་སྟེ་རྡོ་རྗེ་རྣལ་འབྱོར་མར་གྱུར་པས་བླ་མ་རྣམས་ཀྱི་སྐུ་ལ་འཁྲིལ་ནས་ཟག་མེད་ཀྱི་བདེ་བས་མཉེས་པར་
གྱུར་པའི་མོས་པ་བྱའོ། །བཞི་པ་དེ་ཁོ་ན་ཉིད་ཀྱི་མཆོད་པ་ནི། དེ་ལྟ་བུའི་འཁོར་གསུམ་རང་བཞིན་མ་གྲུབ་པར་ཤེས་པའི་ངང་དུ་འཛིན་མེད་ལ་བློ་བཞག །ལྔ་པ་ཀུ་སཱ་ལིའི་ཚོགས་བསག་གི་མཆོད་པ་ནི། རང་གི་སྙིང་ག་ནས་རང་སེམས་ཀྱི་ངོ་བོ་རྣལ་འབྱོར་མ་མཐེབ་སོར་གྱི་ཚད་ཙམ་པ་རྩ་དབུ་མའི་ལམ་བརྒྱུད། ཚངས་བུག་ནས་ཐོན། ཕྱག་གཡས་པའི་གྲི་གུག་གིས་ཕུང་པོའི་སྨིན་མཚམས་སུ་རེག་པ་ཙམ་གྱིས་ལིང་གིས་གོག །ཐོད་པའི་སྒྱེད་པུ་ཆེན་པོ་རི་རབ་ཙམ་གསུམ་གྲུབ་པའི་སྟེང་དུ་བཞག་པས་སྟོང་གསུམ་གྱི་ཚད་དང་མཉམ་པར་གྱུར་པའི་ནང་དུ། ལུས་ཀྱི་རྐང་པ་གཡས་ནས་བརྩམས་ཏེ་དུམ་བུར་གཏུབ་ཅིང་བསྒྱུར་བས་ཤ་ཁྲག་རུས་པའི་ཕུང་པོ་ཟད་མི་ཤེས་པར་གྱུར། དེ་ཉིད་ལ་དམིགས་ཏེ། ཨོ་ཨཱཿཧཱུྃ་ཧ་ཧོ་ཧྲི་ཞེས་བརྗོད་པས། ཡེ་ཤེས་ཀྱི་མེ་འབར་བས་ཐོད་པ་དྲོས། རྫས་ཞུ་ཞིང་ཁོལ་བས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ། རང་སེམས་རྣལ་འབྱོར་མའི་ཐུགས་ཀ་ནས་མཆོད་པའི་ལྷ་མོ་ཐོད་པ་ཐོགས་པ་དཔག་ཏུ་མེད་པ་འཕྲོས། བདུད་རྩིའི་ཕུད་ཀྱིས་རྩ་བའི་བླ་མ་ལ་མཆོད་པར་བསམ་ལ། དྲིན་ཅན་རྩ་བའི་བླ་མའི་ཞལ་དུ་ཨོཾ་ཨཱཧཱུཾ། ལན་བདུན། དེ་བཞིན་དུ། བརྒྱུད་པའི་བླ་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། གཞན་ཡང་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་
གནོད་སྦྱིན་ནོར་ལྷ་དམ་ཅན་གཏེར་བདག་རྣམས་ཀྱི་ཞལ་དུ་ཨོཾ་ཨཱཧཱུཾ། གནོད་བྱེད་གདོན་བགེགས་རིགས་དྲུག་བར་དོ་དང་བཅས་པའི་སེམས་ཅན་ཐམས་ཅད་ཟག་པ་མེད་པའི་བདུད་རྩིས་ཚིམ་སྟེ་མྱུར་དུ་བླ་ན་མེད་པའི་བྱང་ཆུབ་ཐོབ་པའི་སྐལ་བ་དང་ལྡན་པར་གྱུར་ཅིག །ཨོཾ་ཨཱཿཧཱུྃ་ཞེས་བྱིན་པས་ཐམས་ཅད་སེམས་རྟོག་མེད་ཆོས་སྐུ་དང་། ལུས་ཟག་མེད་རྣལ་འབྱོར་མའི་སྐུར་གྱུར། ལྷ་མོ་རྣམས་རང་ལ་ཐིམ། རང་གི་ལུས་སྔར་བཞིན་གྱུར་ཅིང་། ཐོད་པ་སོགས་མི་དམིགས་པར་བསམ། དྲུག་པ་མཎྜལ་གྱི་མཆོད་པ་ནི། ཁྲིད་དང་བསྙེན་པ་སོགས་ཀྱི་སྐབས་མཎྜལ་ཚོམ་བུ་བདུན་མ་སྤྱི་ལྟར་ཕུལ། སྤྲོ་ན་སོ་བདུན་མའང་བྱ། བཞི་པ་དབང་བླང་ཞིང་དེ་ཁོ་ན་ཉིད་ལ་མཉམ་པར་བཞག་པ་ནི། རྩ་བའི་བླ་མ་ལ་དམིགས་ནས། དུས་གསུམ་སངས་རྒྱས་ཐམས་ཅད་ཀྱི་ངོ་བོ་དཔལ་ལྡན་བླ་མ་དམ་པ་རྣམས་ལ་གསོལ་བ་འདེབས་སོ། ། བདག་ལ་དབང་བཞི་ཡོངས་སུ་རྫོགས་པར་བསྐུར་དུ་གསོལ། །ཞེས་ལན་གསུམ་གསོལ་བ་བཏབ་པས། རྩ་བའི་བླ་མས་བརྒྱུད་པའི་བླ་མ་རྣམས་ལ་སྤྱན་ཆེར་གཟིགས་ཏེ། དབང་བཞི་བསྐུར་མི་བསྐུར་གྱི་གནང་བ་ཞུས་པས། བརྒྱུད་པའི་བླ་མ་རྣམས་ཀྱིས་རྩ་བའི་བླ་མ་ལ་སྤྱན་ཆེར་གཟིགས་ནས་དེ་བཞིན་བགྱི། ཞེས་གནང་བ་སྦྱིན་པའི་ཚུལ་གྱིས་བླ་མ་བརྒྱུད་པ་རྣམས་གཡས་སྐོར་གྱི་མས་ཡས་རིམ་བཞིན་ཐིམ་
མཐར་རྡོ་རྗེ་འཆང་ཡང་རྩ་བའི་བླ་མ་ལ་ཐིམ། བླ་མའི་དཔྲལ་བའི་ཨོ་ལས་འོད་ཟེར་དཀར་པོ་འཕྲོས། རང་གི་དཔྲལ་བར་ཐིམ་པས་བུམ་པའི་དབང་ཐོབ། ལུས་ཀྱི་དྲི་མ་དག །ལམ་བསྐྱེད་རིམ་བསྒོམ་པ་ལ་དབང་། སྐུའི་བྱིན་རླབས་ཞུགས། འབྲས་བུ་སྤྲུལ་སྐུ་ཐོབ་པའི་སྐལ་པ་ཅན་དུ་བྱས། མགྲིན་པའི་ཨཱལས་འོད་ཟེར་དམར་པོ་འཕྲོས། རང་གི་མགྲིན་པར་ཐིམ་པས་གསང་བའི་དབང་ཐོབ། ངག་གི་དྲི་མ་དག །ལམ་ཙཎྜ་ལཱི་བསྒོམ་པ་ལ་དབང་། གསུང་གི་བྱིན་རླབས་ཞུགས། འབྲས་བུ་ལོངས་སྐུ་ཐོབ་པའི་སྐལ་པ་ཅན་དུ་བྱས། ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས། རང་གི་སྙིང་གར་ཐིམ་པས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག །ཕོ་ཉའི་ལམ་བསྒོམ་པ་ལ་དབང་། ཐུགས་ཀྱི་བྱིན་རླབས་ཞུགས། འབྲས་བུ་ཆོས་སྐུ་ཐོབ་པའི་སྐལ་བ་ཅན་དུ་བྱས། སླར་ཡང་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས། རང་གི་ལུས་ངག་ཡིད་གསུམ་ལ་ཐིམ་པས་དབང་བཞི་པ་ཐོབ། ལམ་ཕྱག་རྒྱ་ཆེན་པོ་བསྒོམ་པ་ལ་དབང་། སྐུ་གསུང་ཐུགས་ཀྱི་བྱིན་རླབས་ཞུགས། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་པར་བསམ་ལ་སོ་སོའི་མཐར་དབང་དོན་ལ་བློ་བཞག །དེ་ནས་ངག་ཏུ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་དཔལ་ལྡན་བླ་མ་དམ་པ་ལ་གསོལ་བ་འདེབས་སོ་
བདག་གི་རྒྱུད་བྱིན་གྱིས་བརླབ་ཏུ་གསོལ། །ཞེས་བརྗོད་ཅིང་གསོལ་བ་བཏབ་ལ་བླ་མ་དེ་ཉིད་དབུའི་གཙུག་ཏོར་ནས་མར་འོད་དུ་ཞུ། གདན་སེང་ཁྲི་ནས་ཡར་འོད་དུ་ཞུ་བ་ཐུགས་ཀའི་ཐད་དུ་འོད་དམར་སེར་ལི་ཁྲིའི་མདོག་ཅན་སྣུམ་ལ་འདྲིལ་བ་བདེ་བ་ཆེན་པོའི་རང་བཞིན་དུ་གྱུར་པ་དེ་ཉིད་བདེ་ཧྲིལ་གྱིས་བྱུང་ནས་རང་གི་སྤྱི་གཙུག་ནས་ཞུགས། སྙིང་གའི་པཾ་ཡིག་དམར་པོ་དེ་ཉིད་ལ་སིམ་སྟེ་ཐིམ་པས་བཾ་ཡིག་དེ་ཉིད་ཇེ་ཆེར་སོང་ནས་འཇའ་ཡལ་བ་ལྟ་བུར་གྱུར་པར་བསམ་ལ་རིག་པ་བརྗོད་མེད་ཀྱི་ངང་དུ་ཅི་གནས་སུ་མཉམ་པར་བཞག །དེ་ནས་རང་གི་སྙིང་གར་ཨེ་ཨེ་ལས་སོགས་བདག་ལྷར་བསྐྱེད་པའི་རྣལ་འབྱོར་ལ་འཇུག་གོ། །འདིའི་སྐབས་སུ་མཆོད་པ་བསྡུ་ན་ཀུ་སཱ་ལའི་ཚོགས་བསག་ཁོ་ནས་ཀྱང་རུང་གསུངས། གསུམ་པ་བསམ་མི་ཁྱབ་ཐུན་མོང་མ་ཡིན་པ་ལ་གཉིས། །སྔོན་འགྲོ་རྩ་ལམ་སྦྱང་བ་དང་། དངོས་གཞི་བསམ་མི་ཁྱབ་ཀྱི་འོད་གསལ་ལ་འཇུག་པའོ། །དང་པོ་ནི། ཞར་བྱུང་གི་རྫོགས་རིམ་གྱི་མཇུག་ཏུ་ལུས་གནད་བསྲང་། རླུང་རོ་བསལ། རང་གི་ལུས་ཀྱི་དབུས་དྲང་པོར་རྩ་དབུ་མ་ཕྱི་དཀར། ནང་དམར་སྦོམ་ཕྲ་སྲིན་མཛུབ་ཙམ། ཡར་སྣ་སྤྱི་གཙུག་ཏུ་ཐུག་པ། གཡས་སུ་རོ་མ་དམར་མོ། གཡོན་དུ་རྐྱང་མ་དཀར་མོ། གཉིས་ཀའང་དབུ་མ་ལས་སུམ་འགྱུར་གྱིས་ཕྲ་བ། ཡར་སྣ་སྤྱི་གཙུག་ནས་གུག་སྟེ་སྣ་བུག་གཉིས་
སུ་ཟུག་པ། གསུམ་ཀའི་མར་སྣ་ལྟེ་འོག་སོར་བཞིའི་ཐད་སྦུབས་གཅིག་ཏུ་གྱུར་པའི་དབུས་སུ་བཾ་ཡིག་དང་རང་སེམས་དབྱེར་མེད་པའི་ངོ་བོ་རྣལ་འབྱོར་མ་མཐེབ་སོར་གྱི་ཚད་ཙམ་གསལ་བཏབ། དེ་ལ་སེམས་གཏད་པས་ཐུགས་ཀ་ནས་སྐུ་ཆུང་ངུ་ཞིག་ནར་གྱིས་ཆད། རླུང་ཕྱིར་རྒྱུ་བ་དང་ལྷན་ཅིག་རྩ་གཡས་རོ་མའི་ནང་ནས་ཡར་དམར་ཁྱུག་གིས་བྱོན། སྣ་གཡས་པའི་སྒོར་སླེབས་པ་དང་། དེ་ལས་དེ་འདྲ་བ་བསམ་གྱིས་མི་ཁྱབ་པ་འཕྲོས། སྣོད་བཅུད་ཐམས་ཅད་ལ་ཁྱབ། འཕགས་པ་རྣམས་མཆོད་ཅིང་ཐུགས་དམ་བསྐུལ། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ཤིང་རྡོ་རྗེ་རྣལ་འབྱོར་མའི་སྐུར་གྱུར། རླུང་ནང་དུ་རྔུབས་པ་དང་སྣ་གཡོན་པའི་བུ་ག་ནས་ཞུགས། རྐྱང་མའི་ལམ་བརྒྱུད་ལྟེ་བའི་རྣལ་འབྱོར་མ་ལ་ཐིམ་པར་བསམ་ཞིང་རླུང་ཅི་ཐུབ་ཏུ་བཟུང་ངོ་། །དེ་ལྟ་བུ་ལན་བདུན་སོགས་ཅི་ནུས་སུ་བྱ། གཉིས་པ་ནི། ནང་གི་རྣལ་འབྱོར་མ་ལས་འོད་ཟེར་འཕྲོས། ལུས་ཀྱི་ནང་ཐམས་ཅད་ཁྱབ། ཡན་ལག་ཐམས་ཅད་འོད་དུ་ཞུ་ནས་ཁོག་པ་ལ་ཐིམ། དེ་ཉིད་ཀྱང་འོད་དམར་པོའི་ཕུང་པོར་གྱུར། ལྟེ་བའི་རྣལ་འབྱོར་མ་མཁའ་སྤྱོད་དུ་འབྱོན་པ་ལ་རིང་བས་ཡར་བྱོན། རིམ་བཞིན་དབུ་མ་དབུ་གཙུག་དང་རོ་རྐྱང་གཉིས་ཀྱང་ཞབས་མཐིལ་ལ་ཐིམ་པས་ཇེ་ཐུང་དུ་གྱུར་ཅིང་། ཕྱི་དབྱིབས་ཀྱི་ལུས་ཀྱང་རིམ་པར་ཐིམ། སྤྱི་གཙུག་
ཏུ་བྱོན་པ་དང་རྩ་དང་ལུས་ལྷག་མ་མ་ལུས་པར་ཐིམ། དེའི་རྐྱེན་གྱི་རང་སེམས་རྣལ་འབྱོར་མ་རྩལ་པོ་ཆེས་མདའ་ནམ་མཁའ་ལ་འཕང་བ་བཞིན་མཁའ་སྤྱོད་དུ་གཤེགས་ཏེ། འོད་གསལ་སྟོང་ཉིད་ཀྱི་ངང་དུ་ཐིམ་པར་བསམ་ལ། གསལ་སྟོང་ཟུང་འཇུག་གི་དབྱིངས་སུ་མཉམ་པར་བཞག །སླར་ནམ་མཁའ་ནས་རང་སེམས་རྣལ་འབྱོར་མར་གསལ་བ་དེ་ཉིད་ཐོལ་གྱིས་བྱུང་། རང་གནས་སུ་ཕེབས་པ་དང་ཕྱིའི་ལུས་དང་རྩ་སོགས་ཀྱང་སྔར་བཞིན་དུ་གྲུབ་པར་བསམ། དེ་ལྟ་བུ་ཚར་ཉེར་གཅིག་གམ། བདུན་ནམ། གསུམ་སོགས་སྐབས་དང་སྦྱར་ལ་བྱ། ཐུན་བསྡུ་བ་ན། རང་ཉིད་ཕྱི་དབྱིབས་ཀྱི་རྣལ་འབྱོར་མར་གསལ་བའི་སྐུ་ལ་གོ་ཆ་དགོད་པ་སོགས་སྒྲུབ་ཐབས་ཀྱི་དཀྱུས་བཞིན་བྱའོ། །དེ་ལྟར་བླ་མའི་རྣལ་འབྱོར་དང་། བསམ་མི་ཁྱབ་ཐུན་མོང་མ་ཡིན་པ་འདི་དག་སོ་སོའི་མན་ངག་ཐོབ་པས་ཉམས་སུ་བླང་བར་བྱ་བ་ཡིན་ནོ། །མཁའ་སྤྱོད་བགྲོད་པའི་གསང་བའི་ལམ། །མཛེས་བྱེད་མན་ངག་འདི་སྦྱར་བའི། །དགེ་བས་ཡིད་ཅན་ཐམས་ཅད་ཀུན། །བདེ་བ་ཆེ་ལ་རོལ་པར་ཤོག །ཅེས་པའང་རང་ཉིད་ཀྱིས་སྔར་བགྱིས་པའི་ནཱ་རོ་མཁའ་སྤྱོད་མའི་བསྐྱེད་རྫོགས་མདོར་བསྡུས་པ་མཁའ་སྤྱོད་བགྲོད་པའི་གསང་ལམ་གྱི་ལྷན་ཐབས་སུ། དོན་དུ་གཉེར་བ་འགའ་ལ་སྨན་པའི་བསམ་པས་མཁྱེན་བརྩེའི་དབང་པོས་ཉུང་གསལ་སྙིང་པོར་དྲིལ་ཏེ་བྲིས་པ་དགེ་ལེགས་སུ་གྱུར་ཅིག། །།
རྗེ་བཙུན་རྡོ་རྗེ་རྣལ་འབྱོར་མའི་སྒྲུབ་ཐབས་སྙིང་པོར་དྲིལ་བ་མཁའ་སྤྱོད་ལམ་བཟང་།
༈ རྗེ་བཙུན་རྡོ་རྗེ་རྣལ་འབྱོར་མའི་སྒྲུབ་ཐབས་སྙིང་པོར་དྲིལ་བ་མཁའ་སྤྱོད་ལམ་བཟང་ཞེས་བྱ་བ་བཞུགས་སོ། །བླ་མ་རྡོ་རྗེ་རྣལ་འབྱོར་མའི། །ཞབས་ཀྱི་པདྨོར་གུས་བཏུད་ནས། གང་དེའི་མྱུར་ལམ་ལ་བརྟེན་ཏེ། །མཁའ་སྤྱོད་གོ་འཕང་ཐོབ་འདོད་ན། །འཁོར་ལོ་སྡོམ་པ་ཡབ་ཡུམ་གྱི། །དབང་དང་བྱིན་རླབས་ཟབ་མོ་ཡིས། །རྒྱུད་སྨིན་དམ་ཚིག་སྡོམ་ལྡན་པས། ། བསྐྱེད་རིམ་རྣལ་འབྱོར་བཅུ་གཅིག་གི །དང་པོ་ཉལ་བའི་རྣལ་འབྱོར་ནི། །རང་དང་སྣང་བ་ཐམས་ཅད་ཀུན། །ལྷར་སྣང་སྒྱུ་མ་ལྟ་བུའི་ངང་། །གཉིད་ཀྱི་འོད་གསལ་དབྱིངས་སུ་འཇུག །གཉིས་པ་ལྡང་བའི་རྣལ་འབྱོར་ནི། །དཔའ་བོ་ཌཱ་ཀིའི་སྔགས་ཀྱི་སྒྲས། །བསྐུལ་ནས་གཉིད་ལས་སད་པར་མོས། །བསྐྱེད་རིམ་གསལ་བའི་ངང་ནས་ལྡང་། །གསུམ་པ་བདུད་རྩི་མྱོང་བ་ནི། །དངོས་སམ་ཡིད་ཀྱིས་བདུད་རྩིས་བཅུད། །ཨོཾ་ཨཱཿཧཱུྃ་གིས་མྱོང་བ་ལས། །ཟག་མེད་བདེ་བས་ཚིམ་པར་བསམ། །བཞི་པ་ཚད་མེད་རྣལ་འབྱོར་ལ། །ཐོག་མར་སྐྱབས་སུ་འགྲོ་བ་ནི། །ཐ་མལ་སྣང་བ་དབྱིངས་ཐིམ་པར། །སྣོད་བཅུད་དག་པའི་ཞིང་གི་དབུས། །མདུན་མཁར་བླ་མ་རྡོ་རྗེ་ཆོས། །སྐྱབས་ཀུན་འདུས་པའི་ངོ་བོར་གསལ། །ཕ་མས་ཐོག་དྲངས་བདག་གཞན་འགྲོ། །རྩེ་གཅིག་གུས་པས་སྐྱབས་འགྲོར་དམིགས། །བདག་དང་མཁའ་མཉམ་
འགྲོ་བ་མ་ལུས་ཀུན། །དུས་འདི་ནས་བཟུང་བྱང་ཆུབ་སྙིང་པོའི་བར། །བླ་མ་སངས་རྒྱས་ཆོས་དང་ཚོགས་མཆོག་ལ། །མི་ཕྱེད་གུས་པ་ཆེན་པོས་སྐྱབས་སུ་མཆི། །ཅི་ནུས་རྗེས་སུ་མོས་གུས་ཆེས། བླ་མ་མཆོག་དང་དཀོན་མཆོག་རིན་པོ་ཆེ། །རྣམ་པ་གསུམ་ལ་ཕྱག་འཚལ་སྐྱབས་སུ་མཆི། །ཁྱེད་ཀྱིས་བདག་དང་སེམས་ཅན་ཐམས་ཅད་ཀྱི། །ལུས་ངག་ཡིད་གསུམ་བྱིན་གྱིས་བརླབ་ཏུ་གསོལ། །ཞེས་པས་གསོལ་བཏབ་ཚོགས་ཞིང་གི། །འོད་ཀྱིས་བདག་སོགས་འགྲོ་བ་ཀུན། །སྒྲིབ་དག་སྐུ་བཞིའི་གོ་འཕང་བཀོད། །སྐྱབས་ཡུལ་རང་ལ་ཐིམ་པར་བསམ། །དེ་ནས་སེམས་བསྐྱེད་དངོས་གཞི་ནི། །བདག་གིས་རྫོགས་པའི་སངས་རྒྱས་ཐོབ་བྱས་ནས། །འགྲོ་ཀུན་སྲིད་པའི་མཚོ་ལས་བསྒྲལ་བར་བྱ། །དེ་ཡི་ཆེད་དུ་རྡོ་རྗེ་རྣལ་འབྱོར་མའི། །ལམ་གྱི་རིམ་པ་ཉམས་སུ་བླང་བར་བགྱི། །ལན་གསུམ་རྡོར་སེམས་བསྒོམ་བཟླས་ཀྱང་། ། སྤྲོ་ན་མ་རྒྱུད་སྤྱི་ལྟར་བྱ། །ལྔ་པ་བླ་མའི་རྣལ་འབྱོར་ནི། །མདུན་མཁར་སེང་ཁྲི་པད་ཟླའི་གདན་སྟེང་དུ། །རྩ་བའི་བླ་མ་དཔའ་བོ་རྡོ་རྗེ་ཆོས། །དམར་གསལ་ཕྱག་གཉིས་ཌཱ་རུ་ཐོད་པ་དང་། །གྲུ་མོ་གཡོན་ན་ཁ་ཊཾ་ག་ཡིས་མཚན། །རུས་པའི་རྒྱན་ལྡན་རྡོ་རྗེའི་སྐྱིལ་ཀྲུང་བཞུགས། །སྐྱབས་གནས་ཐམས་ཅད་འདུས་པའི་ངོ་བོར་གྱུར། །རིགས་ཀུན་ཁྱབ་བདག་དྲིན་ཆེན་བླ་མ་ལ། །གསོལ་བ་འདེབས་སོ་བདག་རྒྱུད་
བྱིན་གྱིས་རློབས། །ཞེས་པས་གསོལ་བཏབ་བདེ་ཆེན་ངོ་བོར་ཞུ། །སྙིང་དབུས་བོ་ལ་སིབ་ཀྱིས་ཐིམ་པ་ཡིས། །རྡོ་རྗེ་གསུམ་གྱི་བྱིན་རླབས་རྒྱུད་ལ་ཞུགས། །བཻ་ཡིག་ནམ་མཁའི་འཇའ་ཚོན་བཞིན་དུ་ཡལ། །དྲུག་པ་བདག་ལྷར་བསྐྱེད་པ་ནི། །དེ་ཡི་ངང་ལས་རང་གི་སྙིང་ག་རུ། །ཨེ་ཡིག་དམར་པོ་ཉིས་བརྩེགས་ཡོངས་གྱུར་ལས། །ཆོས་འབྱུང་དབུས་སུ་ཟླ་དཀྱིལ་བཻ་ཡིག་མཐར། །སྔགས་ཕྲེང་གཡོན་འཁོར་ཟེར་གྱིས་ལུས་ནང་གང་། །སྡིག་སྒྲིབ་ཀུན་བྱང་འོད་ཀྱི་ཕུང་པོར་གྱུར། །དེ་ཉིད་ཡོངས་གྱུར་ཆོས་འབྱུང་གཞལ་ཡས་དབུས། །སྣ་ཚོགས་པད་ཉིའི་གདན་ལ་སྐད་ཅིག་གིས། །རང་ཉིད་རྣམ་སྣང་རིགས་བདག་དང་བཅས་པའི། །རྣལ་འབྱོར་མ་དཔལ་ཞལ་གཅིག་ཕྱག་གཉིས་མ། །ཞབས་གཉིས་གཡས་བརྐྱང་དུས་མཚན་དམར་མོ་དང་། །གཡོན་བསྐུམ་འཇིགས་བྱེད་ནག་པོའི་གདོང་པ་མནན། །སྐུ་མདོག་དམར་མོ་བསྐལ་པའི་མེ་ལྟ་བུ། །སྤྱན་གསུམ་དག་པ་མཁའ་སྤྱོད་ཕྱོགས་སུ་གཟིགས། །ཕྱག་གཡས་རྡོ་རྗེའི་གྲི་གུག་ཐུར་དུ་བརྐྱང་། །གཡོན་པས་ཐོད་པ་ཁྲག་བསྐང་སྟེང་ཕྱོགས་བཟུང་། །ཕྲག་པ་གཡོན་པར་རྡོ་རྗེའི་ཁ་ཊཾ་བསྟེན། །བདེ་སྟོང་ཉམས་རྒྱས་ལང་ཚོའི་གཟི་འོད་འབར། །དབུ་སྐྲ་གནག་སྣུམ་སིལ་མས་སྐུ་སྟོད་ཁེབས། །ཐོད་སྐམ་དབུ་རྒྱན་དོ་ཤལ་རིང་དུ་འཕྱང་། །རུས་པའི་ཕྱག་རྒྱ་རྣམ་ལྔས་སྐུ་ལ་སྤྲས། །
ཡེ་ཤེས་མེ་དཔུང་འབར་བའི་ཀློང་ན་བཞུགས། །བདུན་པ་འགྲོ་བ་དག་པ་ནི། །སྙིང་གའི་པཾ་ཡིག་སྔགས་ཕྲེང་བཅས་པ་ལས། །འོད་འཕྲོས་རིགས་དྲུག་བརྟན་གཡོའི་སྣང་བ་སྦྱངས། །དེ་ལས་ཕྱི་སྣོད་རྡོ་རྗེ་བཙུན་མོའི་ཞིང་། །ནང་བཅུད་འགྲོ་ཀུན་ལྷ་ཡི་ངོ་བོར་གྱུར། །བརྒྱད་པ་དམ་ཡེ་བསྲེ་བ་ནི། །འབར་བའི་ཕྱག་རྒྱ་གཡོན་དུ་བསྐོར། ཕོ། སླར་ཡང་ཐུགས་ཀའི་ས་བོན་འོད་ཟེར་གྱིས། །རྣལ་འབྱོར་མ་དཔལ་འཁོར་བཅས་སྤྱན་དྲངས་ཤིང་། །འགྲོ་བ་རྣལ་འབྱོར་མར་གྱུར་ཐམས་ཅད་བཅས། །ཛཧཱུྃ་བཾ་ཧོརང་ལ་གཉིས་མེད་ཐིམ། །དེ་མཐར་པད་སྐོར་འཁྱུད་རྒྱ་བཅས། །ཨོ་ཡོ་ག་ཤུདྡྷསརྦ་དྷརྨཱ་ཡོ་ག་ཤུདྡྷོཉ་ཧཾ། ཐབས་ཤེས་གཉིས་མེད་བདེ་ཆེན་ཡེ་ཤེས་སུ། །བདག་དང་སྣང་བ་ཐམས་ཅད་རྣམ་དག་པའི། །ལུས་ཀྱི་གནས་སུ་ཟླ་བའི་དཀྱིལ་འཁོར་སྟེང་། །ལྟེ་བར་ཨོ་བོ་དམར་མོ་ཕག་མོ་དང་། །སྙིང་གར་ཧོ་ཡཾ་སྔོན་མོ་གཤིན་རྗེ་མ། །ཁ་ལ་ཧྲི་མཾ་དཀར་མོ་རྨོངས་བྱེད་མ། །དཔྲལ་བར་ཧྲི་ཧྲི་སེར་མོ་བསྐྱོད་བྱེད་མ། །སྤྱི་གཙུག་ཧཱུྃ་ཧཱུྃ་ལྗང་གུ་སྐྲག་བྱེད་མ། །ཚིག་བརྒྱད་ཕཊ་ཕཊ་དུད་ཁ་ཙཎྜི་ཀཱ། །ཀུན་ཀྱང་ལྷ་ཉིད་ཡི་གེའི་གཟུགས་སུ་ཤར། །དགུ་པ་བཟླས་པའི་རྣལ་འབྱོར་ལ། །ཐོག་མར་ངག་གི་བཟླས་པ་ནི། །ཐུགས་ཀའི་ས་བོན་སྔགས་ཕྲེང་བཅས་པ་ལས། །འོད་འཕྲོས་འཕགས་མཆོད་འགྲོ་ཀུན་སྒྲིབ་གཉིས་སྦྱངས། །ཕོ་
ཉ་གསུམ་གྱི་བྱིན་རླབས་ནུས་མཐུ་ཀུན། །རང་ཐིམ་བདག་རྒྱུད་བྱིན་གྱིས་བརླབས་པར་གྱུར། །ཨོ་ཨོ་ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞ་ནཱི་ཡེ། བཛྲ་བཻ་རོ་ཙ་ནཱི་ཡེ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ། དམ་བཅས་གྲངས་ལས་མི་ཉུང་བཟླས། །ཁྱད་པར་ལྷ་ཡི་ང་རྒྱལ་དང་། །རྣམ་པ་སྤྱི་དང་བྱེ་བྲག་ལ། །སེམས་འཛིན་བསམ་གཏན་དུག་དབྱུང་ཞིང་། །གསལ་སྣང་མཆོག་ཏུ་བརྟན་པར་བྱ། །དེ་ནས་ཡིད་ཀྱི་བཟླས་པ་ནི། །ཁ་སྦྱོར་རླུང་བཟུང་སྟེང་རླུང་གིས། །སྙིང་གའི་སྔགས་ཕྲེང་ལྟེ་བར་ཕབ། །ཡིད་ངོར་ཀློག་པའི་ཚུལ་གྱིས་བཟླ། །ཕྱོགས་བཅུ་དུས་གསུམ་རྒྱལ་བ་སྲས་བཅས་ཀྱི། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱིས། །བདག་སོགས་འགྲོ་ཀུན་བྱིན་གྱིས་བརླབས་ནས་ཀྱང་། །མཆོག་ཐུན་དངོས་གྲུབ་ཐོབ་པར་མཛད་དུ་གསོལ། །ཞེས་པས་འདོད་དོན་གསོལ་བ་གདབ། །ཞར་བྱུང་རྫོགས་རིམ་དང་པོ་ནི། ། ཆོས་འབྱུང་གྲྭ་བཞིར་དགའ་བ་འཁྱིལ། །གཡོན་དུ་འཁོར་ལ་སེམས་གཏད་པས། །བདེ་བའི་ཡེ་ཤེས་སྐྱེས་པར་བསམ། །གཉིས་པ་ལུས་དབུས་དྲང་པོ་རུ། །སྤྱི་བོ་ནས་བཟུང་གསང་གནས་བར། །ཨ་བ་དྷཱ་ཏིའི་ཡས་མར་སྣས། །དགའ་འཁྱིལ་དཀར་དམར་གསལ་བཏབ་ནས། །གསང་གནས་དང་ནི་སྤྱི་བོ་རུ། །སེམས་བཟུང་ཡས་མར་འཛེགས་བབས་ཀྱིས། །བདེ་སྟོང་ཡེ་ཤེས་བསྐྱེད་པའི་མཐར། །བརྗོད་བྲལ་
མི་རྟོག་ངང་དུ་བཞག །བཅུ་པ་བསམ་མི་ཁྱབ་པ་ནི། །སྙིང་གའི་ཐཾ་ལས་འོད་འཕྲོས་ཁམས་གསུམ་པོ། །འོད་ཀྱི་རྣམ་པར་གྱུར་ནས་རང་ལ་ཐིམ། །དེ་ཡང་རིམ་གྱིས་ཐུགས་སྲོག་ནཱ་དའི་བར། །འོད་ཞུ་སྤྲོས་བྲལ་སྟོང་པ་ཉིད་དུ་གྱུར། །བཅུ་གཅིག་སྤྱོད་ལམ་རྣལ་འབྱོར་ནི། །སླར་ཡང་གཟུགས་སྣང་རྡོ་རྗེ་རྣལ་འབྱོར་མར། །གསལ་བའི་གནས་རྣམས་གོ་ཆས་རྒྱས་བཏབ་ཅིང་། །སྒྲར་གྲགས་སྔགས་ལ་དྲན་རྟོག་འོད་གསལ་དང་། །སྣོད་བཅུད་དགའ་བ་གསུམ་གྱི་ངོ་བོར་ཤར། །དགེ་བའི་རྩ་བ་འདི་ཡིས་མྱུར་དུ་བདག །རྣལ་འབྱོར་མ་དཔལ་གོ་འཕང་འགྲུབ་གྱུར་ནས། །མཐའ་ཀླས་འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་མྱུར་དུ་འགོད་པར་ཤོག །འཆི་ཚེ་མགོན་དང་དཔའ་བོ་མ་ཚོགས་ཀྱིས། །མེ་ཏོག་གདུགས་དང་རྒྱལ་མཚན་ཐོགས་ནས་སུ། །རོལ་མོ་གླུ་དབྱངས་སིལ་སྙན་སོགས་མཆོད་ཅིང་། །མཁའ་ལ་སྤྱོད་པའི་གནས་སུ་ཁྲིད་པར་ཤོག །ལྷ་མོ་ཚད་མ་དམ་ཚིག་ཚད་མ་དང་། །དེས་གསུང་ཚིག་ཀྱང་ཚད་མའི་མཆོག་ཡིན་པས། །བདེན་པ་དེ་ཡིས་ལྷ་མོ་དེ་རྣམས་ཀྱིས། །བདག་ཅག་རྗེས་སུ་འཛིན་པའི་རྒྱུར་གྱུར་ཅིག ། རྩ་བརྒྱུད་བླ་མ་ཡི་དམ་རྣལ་འབྱོར་མ། །མཁའ་འགྲོ་ཆོས་སྐྱོང་སྲུང་མའི་བདེན་སྟོབས་ཀྱིས། །གནས་སྐབས་མཐར་ཐུག་རྒུད་པ་ཀུན་ཞི་ཞིང་། །ཕན་བདེའི་དཔལ་ལ་རོལ་པའི་བཀྲ་ཤིས་ཤོག །དེ་ལྟར་བརྩོན་
པས་ཚེ་འདིའམ། །བར་དོར་སྐྱེ་བ་བཅུ་དྲུག་ཚུན། །རྣལ་འབྱོར་མ་ཡིས་རྗེས་བཟུང་ནས། །ཁ་སྦྱོར་བདུན་ལྡན་གོ་འཕང་འགྲུབ། །ཚུལ་འདི་རིག་འཛིན་གྲུབ་པའི་ཕུལ། །གང་དེའི་བཀའ་སྩལ་ལྷུར་བླངས་ནས། །འཇམ་དབྱངས་མཁྱེན་བརྩེའི་དབང་པོ་ཡིས། །དཔལ་འཁོར་ཆོས་སྡེའི་ཆོས་གྲྭར་བྲིས། །དེ་ལས་བྱུང་བའི་དགེ་བ་དང་། །རིམ་གཉིས་ཟབ་མོའི་རྣལ་འབྱོར་གྱིས། །ཁམས་གསུམ་བརྟན་གཡོའི་དངོས་པོ་ཀུན། །བདེ་ཆེན་ཐིག་ལེར་རོ་གཅིག་ཤོག །སརྦ་དཱ་མངྒལཾ།།
ནཱ་རོ་མཁའ་སྤྱོད་མའི་སྒྲུབ་ཐབས་མཁའ་སྤྱོད་ལམ་བཟང་ལ་ཉེར་མཁོའི་ལྷན་ཐབས་མཁའ་སྤྱོད་གྲུབ་སྟེར།
ནཱ་རོ་མཁའ་སྤྱོད་མའི་སྒྲུབ་ཐབས་མཁའ་སྤྱོད་ལམ་བཟང་ལ་ཉེར་མཁོའི་ལྷན་ཐབས་མཁའ་སྤྱོད་གྲུབ་སྟེར་ཞེས་བྱ་བ་བཞུགས་སོ། །འཁོར་ལོའི་མགོན་པོ་རྣལ་འབྱོར་མར། །བཏུད་ནས་དེ་ཡི་སྒྲུབ་ཐབས་དང་། །རྗེས་འབྲེལ་ཉེར་མཁོའི་གདམས་པ་ལ། །དང་པོ་རྡོར་སེམས་བསྒོམ་བཟླས་ནི། །སྐྱབས་སོང་བྱང་ཆུབ་སེམས་བསྐྱེད་རྗེས། །རང་གི་སྤྱི་བོར་པད་ཟླར་རྡོ་རྗེ་སེམས། །རབ་དཀར་རྡོ་རྗེ་དྲིལ་འཛིན་སྙེམས་མ་དཀར། །གྲི་ཐོད་འཛིན་པའི་ཡུམ་དང་མཉམ་པར་སྦྱོར། །དར་དང་རུས་པའི་རྒྱན་རྫོགས་སྐྱིལ་ཀྲུང་བཞུགས། ། ཡབ་ཀྱི་ཐུགས་ཀར་ཟླ་སྟེང་ཧཱུྃ་དཀར་པོ། །དེ་ལས་འོད་འཕྲོས་དེ་བཞིན་གཤེགས་ཀུན་གྱི། །བྱིན་རླབས་ཡེ་ཤེས་བདུད་རྩི་སྤྱན་དྲངས་ཐིམ། །བླ་མ་བཅོམ་ལྡན་རྡོ་རྗེ་སེམས་དཔའ་ཡིས། །བདག་སོགས་འགྲོ་
ཀུན་སྡིག་ལྟུང་སྦྱང་མཛད་གསོལ། །ཧཱུྃ་ལས་བདུད་རྩིའི་རྒྱུན་བབས་རང་ཉིད་ཀྱི། །སྤྱི་གཙུག་ནས་ཞུགས་ནད་གདོན་སྡིག་སྒྲིབ་ཀུན། །ཡོངས་སུ་སྦྱངས་ཏེ་ལུས་ཀུན་གང་བར་གྱུར། །ཅེས་བརྗོད་སྟོབས་བཞིའི་གནད་དང་བཅས། །ཡི་གེ་བརྒྱ་པ་ཅི་ནུས་མཐར། མགོན་པོ་བདག་ནི་མི་ཤེས་རྨོངས་པ་སྟེ། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཆེ་ཆེན་པོའི་བངག་ཉིད་ཅན། འགོ་བའི་གཙོ་ལ་བདག་སྐྱབས་མཆི། །གསང་གསུམ་རྩ་བ་ཡན་ལག་གི །དམ་ཚིག་ཉམས་ཆགས་མཐོལ་ཞིང་བཤགས། །སྡིར་ལུས་བྱང་ཞིང་དག་མཛད་གསོལ། །རྡོར་སེམས་འོད་ཞུ་རང་ལ་ཐིམ། །རང་ལུས་དག་པའི་ཤེས་ལྟར་བསམ། །གཉིས་པ་ཐུན་མོང་མ་ཡིན་པའི། །བླ་མའི་རྣལ་འབྱོར་བསྒོམ་པ་ནི། །མདུན་གྱི་ནམ་མཁར་ཡེ་ཤེས་གཞལ་མེད་ཁང་། །དེ་དབུས་སེང་ཁྲི་པད་ཟླ་ཉི་མའི་སྟེང་། །རྩ་བའི་བླ་མ་སངས་རྒྱས་རྡོ་རྗེ་ཆོས། །དམར་གསལ་རྡོ་རྗེ་དྲིལ་འཛིན་ལོངས་སྐུའི་ཆས། །མཐའ་བསྐོར་པད་ཟླར་བརྒྱུད་པའི་བླ་མ་རྣམས། །དཔའ་བོ་རྡོ་རྗེ་ཆོས་ཀྱི་རྣམ་པར་བཞུགས། །གནས་གསུམ་ཨོཾ་ཨཱཿཧཱུྃ་གིས་མཚན་པ་ལས། །འོད་འཕྲོས་སྐྱབས་ཡུལ་ཐམས་ཅད་སྤྱན་དྲངས་ཐིམ། །སྐྱབས་གནས་མ་ལུས་འདུས་པའི་ངོ་བོར་གྱུར། །སྐྱབས་ཀུན་
འདུས་ཞལ་རྩ་བརྒྱུད་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །མོས་གུས་དྲག་པོས་གསོལ་བཏབ་ནས། །རང་གི་སྙིང་ག་ནས་འཕྲོས་པའི། །ལྷ་མོའི་ཚོགས་ཀྱིས་མཆོད་པར་བསམ། །ཕྱི་མཆོད་ཉེར་སྤྱོད་ནང་མཆོད་བདུད་རྩིའི་སྤྲིན། །གསང་བ་སྙོམས་འཇུག་བདེ་སྟོང་དེ་ཁོ་ན། །འཁོར་གསུམ་དམིགས་མེད་ཕྱག་རྒྱ་ཆེན་པོ་ཡིས། །རྩ་བརྒྱུད་བླ་མའི་ཚོགས་རྣམས་མཆོད་པར་བགྱི། །ཁྱད་པར་ནང་གི་ཚོགས་མཆོད་ནི། །རང་སེམས་རྣལ་འབྱོར་མ་དཔལ་མཁའ་ལ་ཐོན། །ཕྱག་གཡས་གྲི་གུག་ཕུང་པོའི་སྨིན་མཚམས་སུ། །རེག་པ་ཙམ་གྱིས་ཐོད་པ་ལིང་གིས་གོག །ཐོད་པའི་སྒྱེད་པུ་གསུམ་གྱི་ཁར་བཞག་པས། །སྟོང་གསུམ་དང་མཉམ་ཡངས་པའི་སྣོད་གྱུར་ནང་། །རྐང་གཡོན་ནས་བརྩམས་དུམ་བུར་གཏུབ་སྟེ་བླུགས། །ཨོཾ་ཨཱཿཧཱུྃ་དང་ཧ་ཧོ་ཧྲཱིཿཋབརྗོད་པས། །ཡེ་ཤེས་མེ་འབར་ཐོད་པའི་དམ་རྫས་ཀུན། །ཞུ་ཞིང་ཁོལ་བས་ཡེ་ཤེས་བདུད་རྩིར་གྱུར། །ཐུགས་ནས་སྤྲུལ་པའི་ལྷ་མོའི་ཚོགས་ཀྱིས་མཆོད། །རྩ་བའི་བླ་མའི་ཞལ་དུ་ཨོཾ་ཨཱཿཧཱུཾ། ལན་བདུན། །བརྒྱུད་པའི་བླ་མའི་ཞལ་དུ་ཨོཾ་ཨཱཧཱུཾ། གཞན་ཡང་༈ མཆོད་འོས་ཞལ་དུ་ཨོཾ་ཨཱཧཱུཾ། གདོན་བགེགས་རིགས་དྲུག་འགྲོ་བ་ཀུན་ལ་སྦྱིན། །ཚོགས་རྫོགས་སྒྲིབ་བྱང་རྣམ་མཁྱེན་མྱུར་ཐོབ་ཤོག །མཐར་ནི་ལྷ་མོ་རང་ལ་ཐིམ། །མཆོད་པའི་རྫས་སོགས་མི་དམིགས་
བཞག །སྤྲོ་ན་མཎྜལ་ཅི་ནུས་འབུལ། །མཇུག་ཏུ་དབང་བཞི་བླང་བ་ནི། །སངས་རྒྱས་ཀུན་དངོས་དཔལ་ལྡན་བླ་མ་ལ། །གསོལ་བ་འདེབས་སོ་དབང་བཞི་བསྐུར་དུ་གསོལ། །ཞེས་པས་གསོལ་བཏབ་བརྒྱུད་པའི་བླ་མ་རྣམས། །འཁོར་ལོའི་མགོན་པོའི་ཐུགས་ཀར་དབྱེར་མེད་ཐིམ། །དེ་ཡི་གནས་གསུམ་རྡོ་རྗེའི་འབྲུ་གསུམ་ལས། །དཀར་དམར་མཐིང་ཁའི་འོད་ཟེར་རྣམ་པ་གསུམ། །རིམ་དང་གཅིག་ཅར་བྱུང་ནས་ཨཱ རང་ཉིད་ཀྱི། །གནས་གསུམ་ཐིམ་པས་དབང་བཞི་རྫོགས་པར་ཐོབ། །སྒྲིབ་དག་ལམ་བཞི་བསྒོམ་པའི་སྣོད་དུ་གྱུར། །བྱིན་རླབས་སྐུ་བཞིའི་ས་བོན་རྒྱུད་ལ་བཞག །བླ་མ་འོད་ཞུ་སྙིང་དབུས་བོ་ཡིག་དང་། །དབྱེར་མེད་སྤྲོས་བྲལ་འོད་གསལ་གཉུག་མའི་ངང་། །མཐར་ནི་པཾ་ཡིག་འཇའ་ཚོན་བཞིན་དུ་ཡལ། །དེ་ཡི་ངང་ནས་བདག་གཞན་གཞི། །སྦྱང་བསྒྱུར་ལ་སོགས་གཞུང་ལྟར་བྱ། །གསུམ་པ་ལུས་དཀྱིལ་ཐུན་མིན་ནི། །ཡེ་ཤེས་གཞུག་པའི་རྐྱེན་གྱིས་སྙིང་གའི་བི། །འོད་ཞུ་དབུས་སུ་མཁའ་སྤྱོད་དམར་མོ་དང་། །བྱང་ནས་གཡོན་བསྐོར་ལྗང་དམར་སེར་དང་དཀར། །མཐའ་བསྐོར་སྔགས་ཀྱི་ཡིག་འབྲུ་སོ་གཉིས་ཀྱང་། །རྣལ་འབྱོར་མ་དཔལ་དམར་མོ་རེ་རེར་གྱུར། །དེ་ནས་ང་རྒྱལ་བཟུང་བ་དང་། །གོ་ཆ་གཞུང་ལྟར་བཀོད་པའི་རྗེས། །ལུས་དཀྱིལ་གཙོ་མོའི་ཐུགས་ཀར་ཆོས་འབྱུང་དབུས། །ཟླ་སྟེང་བཾ་མཐར་སྔགས་ཀྱི་ཕྲེང་
བས་བསྐོར། །འོད་འཕྲོས་ལ་སོགས་གཞུང་ལྟར་སྦྲེལ། །ཡིད་བཟླས་སྐབས་སུ་སྙིང་ག་ཡི། །ལུས་དཀྱིལ་ལྟེ་བར་དྲངས་པ་དང་། །ལྷན་ཅིག་ལྷ་རྣམས་སྔགས་སུ་བསྒྱུར། །བཞི་པ་ཐུན་མོང་མ་ཡིན་པའི། །བསམ་མི་ཁྱབ་པའི་རྣལ་འབྱོར་ནི། །ཞར་བྱུང་རྫོགས་རིམ་བསྒོམས་པའི་མཐར། །ལུས་གནད་བསྲང་ཞིང་རླུང་རོ་བསལ། །རང་གི་ལུས་དབུས་རྩ་དབུ་མ། །ཕྱི་དཀར་ནང་གཡས་གཡོན་རོ་རྐྱང་དཀར་དང་དམར། །ཡར་སྣ་སྣ་བུག་གཉིས་སུ་གུག །རྩ་གསུམ་མར་སྣ་ལྟེ་བའི་འོག །སྦུབས་སྟོང་གཅིག་ཏུ་གྱུར་པའི་དབུས། །པཾ་ཡིག་རང་སེམས་དབྱེར་མེད་པ། །རྣལ་འབྱོར་མ་དཔལ་མཐེབ་སོར་ཚད། །གསལ་བཏབ་དེ་ལ་སེམས་གཏད་པས། །རླུང་ཕྱིར་འགྲོ་དང་ལྷན་ཅིག་ཏུ། །ཐུགས་ལས་རང་འདྲ་ཆུང་ངུ་འཕྲོས། །རོ་མའི་ལམ་བརྒྱུད་སྣ་གཡས་སྒོར། །བྱོན་ནས་དེ་ལས་སྤྲུལ་པའི་ཚོགས། །དཔག་མེད་ཉི་ཟེར་རྡུལ་བཞིན་འཕྲོས། །འཕགས་མཆོད་འགྲོ་ཀུན་སྒྲིབ་གཉིས་སྦྱངས། །རྣལ་འབྱོར་མར་གྱུར་ཚུར་འདུས་པ། །སྤྲུལ་པའི་རྣལ་འབྱོར་མ་ལ་ཐིམ། །དེ་ཉིད་སྣ་བུག་གཡོན་ནས་རླུང་། །ནང་དུ་འཇུག་དང་ལྷན་ཅིག་པར། །རྐྱང་མའི་ལམ་བརྒྱུད་ལྟེ་བ་ཡི། །རྣལ་འབྱོར་མ་ལ་ཐིམ་པར་བསམ། །དེ་ལྟར་ལན་བདུན་ལ་སོགས་པས། །རྩ་ལམ་སྦྱངས་ནས་དངོས་གཞི་ནི། །ལྟེ་བའི་རང་
སེམས་རྣལ་འབྱོར་མའི། །ཐུགས་ལས་འོད་འཕྲོས་ལུས་ཀུན་གང་། །འོད་ཕུང་དམར་པོ་གཅིག་ཏུ་གྱུར། །རྣལ་འབྱོར་མ་ཡང་མཁའ་སྤྱོད་ལ། །འབྱོན་པར་རིང་པས་ཡར་བྱོན་ཏེ། །དབུ་མ་དབུ་གཙུག་རོ་རྐྱང་གཉིས། །ཞབས་མཐིལ་ལ་འབྱར་ཇེ་ཐུང་གྱུར། །སྤྱི་བོར་བྱོན་ཚེ་རྩ་གསུམ་དང་། །ལུས་ཀུན་ལྷག་མ་མེད་པར་ཐིམ། །རྣལ་འབྱོར་མ་དཔལ་མཁའ་སྤྱོད་གཤེགས། །འོད་གསལ་དབྱིངས་སུ་ཐིམ་པར་བསམ། །བསམ་གྱིས་མི་ཁྱབ་ངང་དུ་བཞག །སླར་ཡང་རང་སེམས་རྣལ་འབྱོར་མ། །མཁའ་ལས་སྤྲིན་ལྟར་བརྡོལ་ནས་ཀྱང་། །མར་བྱོན་གཞི་ལུས་སྔར་བཞིན་གྲུབ། །སླར་ཡང་འཕོ་སོགས་ཅི་ནུས་སྦྱངས། །མཐར་ནི་གོ་ཆ་དགོད་པ་སོགས། །གཞུང་ལྟར་ཉམས་སུ་བླང་བར་བྱ། །ཁྱད་པར་གདམས་པ་འདི་རྣམས་ནི། །མན་ངག་ཐོབ་པའི་རྣལ་འབྱོར་པས། །ཚུལ་བཞིན་ཉམས་སུ་བསྟར་བ་ན། །མཁའ་སྤྱོད་གོ་འཕང་ཚེ་འདིར་འགྲུབ། །དེ་ལྟར་རང་གིས་སྔོན་སྦྱར་བའི། །སྒྲུབ་ཐབས་མཁའ་སྤྱོད་ལམ་བཟང་དང་། །རྗེས་སུ་འབྲེལ་བའི་གདམས་པ་འདི། །མང་དུ་ཐོས་པའི་སྤོང་བ་པ། །འཇམ་དབྱངས་མཁྱེན་བརྩེའི་དབང་པོ་ཡིས། །དམ་པ་གོང་མའི་གསུང་བཞིན་དུ། །མདོར་བསྡུས་ཚིགས་བཅད་ཕྲེང་བར་བསྡེབས། །དགེ་བས་ཡིད་ཅན་རྒྱ་མཚོ་ཀུན། །མཁའ་སྤྱོད་ཆེན་པོ་མྱུར་འགྲུབ་ཤོག །སརྦ་དཱ་བ་ར་སྱ་སིདྡྷཾ་སིདྡྷི་རསྟུ།།
ནཱ་རོ་མཁའ་སྤྱོད་མའི་སྒྲུབ་ཐབས་ཤིན་ཏུ་བསྡུས་པ།
ནཱ་རོ་མཁའ་སྤྱོད་མའི་སྒྲུབ་ཐབས་ཤིན་ཏུ་བསྡུས་པ་བཞུགས་སོ། །ན་མོ་གུ་རུ་བཛྲ་ཡོ་གི་ནཱི་ཡེ། དེ་ལ་འདིར་དབང་ཐོབ་ཅིང་བྱིན་རླབས་ཟབ་མོས་རྒྱུད་སྨིན་པའི་གང་ཟག་གིས། བསྡུས་པའི་ཚུལ་གྱིས་རྡོ་རྗེ་རྣལ་འབྱོར་མ་བསྒོམ་པར་འདོད་པས། སྐྱབས་ཡུལ་གསལ་བཏབ་ནས། བདག་སོགས་འགྲོ་ཀུན་དེང་ནས་བྱང་ཆུབ་བར། །བླ་མ་དཀོན་མཆོག་གསུམ་ལ་སྐྱབས་སུ་མཆི། །རྫོགས་བྱང་གོ་འཕང་ལ་བརྟེན་སེམས་ཅན་ཀུན། །བསྒྲལ་ཕྱིར་ཟབ་མོའི་རྣལ་འབྱོར་བསྒོམ་པར་བགྱི། །ལན་གསུམ། མདུན་གྱི་ནམ་མཁར་སེང་ཁྲི་པད་ཟླའི་སྟེང་། །རྩ་བའི་བླ་མ་དཔའ་བོ་རྡོ་རྗེ་ཆོས། །དམར་གསལ་ཌཱ་རུ་ཐོད་པ་ཁ་ཊཾ་བསྣམས། །རུས་པའི་རྒྱན་མཛེས་རྡོ་རྗེའི་སྐྱིལ་ཀྲུང་བཞུགས། །སྐྱབས་གནས་ཀུན་འདུས་དྲིན་ཆེན་བླ་མ་ལ། །སྙིང་ནས་གདུང་ཤུགས་དྲག་པོས་གསོལ་བ་འདེབས། །བླ་མ་འོད་ཞུ་རང་ལ་ཐིམ་པ་ཡིས། །རང་སེམས་པཾ་ཡིག་སྤྲོས་བྲལ་དབྱིངས་སུ་ཡལ། །དེ་ཡི་ངང་ལས་སྙིང་གར་ཨེ་ཨེ་ལས། །ཆོས་འབྱུང་ཟླ་དཀྱིལ་དབུས་སུ་པཾ་ཡིག་མཐར། །སྔགས་ཕྲེང་འཁོར་བའི་ཟེར་གྱིས་གཞི་ལུས་སྦྱངས། །འོད་ཀྱི་ཕུང་པོར་གྱུར་ལས་སྐད་ཅིག་གིས། །རང་ཉིད་པད་ཉི་དུས་མཚན་འཇིགས་བྱེད་སྟེང་། །རྣམ་སྣང་རིགས་བདག་བཅས་པའི་རྣལ་འབྱོར་མ། །དམར་གསལ་སྤྱན་གསུམ་ནམ་མཁའི་དབྱིངས་སུ་གཟིགས། །
ཕྱག་གཡས་གྲི་གུག་ཐུར་དུ་བརྐྱང་ནས་འཛིན། གཡོན་པས་ཐོད་ཁྲག་སྟེང་ཕྱོགས་བཟུང་བས་གསོལ། །ཕྲག་པ་གཡོན་པར་རྡོ་རྗེའི་ཁ་ཊཾ་བསྟེན། །ཐོད་སྐམ་དབུ་རྒྱན་དོ་ཤལ་ཕྱག་རྒྱས་སྤྲས། །ཞབས་ཟུང་གཡས་བརྐྱང་གཡོན་བསྐུམ་དོར་ཐབས་བཞེང་། །བདེ་ཆེན་ཉམས་འབར་ཡེ་ཤེས་མེ་དབུས་རོལ། །ཐུགས་སྲོག་འོད་ཀྱིས་སྣོད་བཅུད་དངོས་འཛིན་སྦྱངས། །རྡོ་རྗེའི་བཙུན་མོའི་ཞིང་སྐུར་ལམ་གྱིས་གསལ། །འབར་བའི་རྒྱ་དང་བཅས། ཕོ། སླར་ཡང་ཐུགས་ཀའི་ཐཾ་ལས་འོད་འཕྲོས་པས། །ལྷན་སྐྱེས་ཞིང་སྔགས་རྣལ་འབྱོར་མ་དཔལ་ཀུན། །ཚུར་འདུས་ཛ༔ཧཱུྃ་བཾ་ཧོརང་ལ་ཐིམ། །དམ་ཚིག་ཡེ་ཤེས་གཉིས་སུ་མེད་པར་གྱུར། །ཨོ་ཡོ་ག་ཤུདྡྷསརྦ་དྷརྨཱ་ཡོ་ག་ཤུདྡྷོཉ་ཧཾ། ལུས་གནས་སོ་སོར་ཟླ་བའི་དཀྱིལ་འཁོར་སྟེང་། །ངོ་བོ་ལྷ་ལ་རྣམ་པ་ཡི་གེའི་གཟུགས། །ཨོ་བི་ཧཾ་ཡཾ་ཧཱུཾ་མཾ་ཧྲི་ཧྲི་དང་། །ཧཱུྃ་ཧཱུྃ་ཕཊ་ཕཊ་རྣམས་ཀྱིས་མཚན་པ་ཡི། །ཐུགས་ཀའི་ས་བོན་སྔགས་ཕྲེང་བཅས་པ་ལས། །འཕྲོས་པའི་འོད་ཀྱིས་འཕགས་མཆོད་འགྲོ་སྒྲིབ་སྦྱངས། །ཕོ་ཉ་གསུམ་གྱི་བྱིན་རླབས་ནུས་མཐུ་ཀུན། །བསྡུས་ཐིམ་མཁའ་སྤྱོད་དངོས་གྲུབ་ཐོབ་པར་གྱུར། །ཨོཾ་ཨོ་ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞ་ནཱི་ཡེ། བཛྲ་བཻ་རོ་ཙ་ནཱི་ཡེ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། དམ་བཅས་གྲངས་ལས་མི་ཉུང་བཟླ། །སྤྲོ་ན་ཡིད་བཟླས་སོགས་ཀྱི་མཐར། །བླ་མ་རྗེ་བཙུན་རྡོ་
རྗེ་རྣལ་འབྱོར་མས། །འགྲོ་ཀུན་མཁའ་སྤྱོད་འཁྲིད་པར་མཛད་དུ་གསོལ། །ཁམས་གསུམ་འོད་ཞུ་རང་དང་རང་ཉིད་ཀྱང་། །ནཱ་དའི་བར་ཐིམ་འོད་གསལ་དབྱིངས་སུ་ཡལ། །སླར་ཡང་རྒྱན་དང་ཕྱག་མཚན་སྤངས་པ་ཡི། །ལྷ་སྐུ་གོ་ཆས་མཚན་པར་གསལ་བའི་ངང་། །སྣང་གྲགས་རྟོག་ཚོགས་ལྷ་སྔགས་ཆོས་ཀྱི་སྐུ། །དགའ་བ་གསུམ་དང་དབྱེར་མེད་འདྲེས་པར་གྱུར། །དགེ་བའི་རྩ་བ་འདི་ཡིས་བདག་གཞན་ཀུན། །མཁའ་སྤྱོད་ཆེན་པོའི་གོ་འཕང་འགྲུབ་གྱུར་ནས། །སྲིད་དང་ཞི་བའི་རྒུད་པ་ཀུན་སེལ་ཞིང་། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་པའང་ལས་དང་པོ་པ་དང་བློ་གྲོས་དམན་པ་རྣམས་ལ་ཕན་པའི་ཆེད་དུ་འཇམ་དབྱངས་མཁྱེན་བརྩེའི་དབང་པོས་དཔལ་རྡོ་རྗེ་གདན་གྱི་ཆོས་གྲྭར་ལྷག་བསམ་དག་པས་བྲིས་པའི་དགེ་བས་འགྲོ་ཀུན་རྡོ་རྗེ་རྣལ་འབྱོར་མའི་གོ་འཕང་ཚེ་འདི་ཉིད་ལ་ཐོབ་པའི་རྒྱུར་གྱུར་ཅིག། །།
ནཱ་རོ་མཁའ་སྤྱོད་མའི་སྒོམ་བཟླས་ཤིན་ཏུ་བསྡུས་པ།
༈ ནཱ་རོ་མཁའ་སྤྱོད་མའི་སྒོམ་བཟླས་ཤིན་ཏུ་བསྡུས་པ་བཞུགས་སོ། །ན་མོ་གུ་རུ་བཛྲ་ཡོ་གི་ནྱ། དེ་ལ་དབང་དང་བྱིན་རླབས་ཟབ་མོས་རྒྱུད་སྨིན་པའི་གང་ཟག་གིས། རྡོ་རྗེ་རྣལ་འབྱོར་མའི་སྒོམ་བཟླས་མདོར་བསྡུས་ཏེ་ཉམས་སུ་བླང་བ་ནི། སྐྱབས་སེམས་རྒྱས་བསྡུས་གང་རིགས་སྔོན་དུ་འགྲོ་བས། མདུན་གྱི་ནམ་མཁར་སེང་ཁྲི་པད་ཟླའི་སྟེང་། །རྩ་བའི་བླ་མ་དཔའ་བོ་རྡོ་རྗེ་ཆོས། །དམར་གསལ་ཌཱ་
རུ་ཐོད་པ་ཁ་ཊཾ་བསྣམས། །རུས་པའི་རྒྱན་མཛེས་རྡོ་རྗེའི་སྐྱིལ་ཀྲུང་བཞུགས། །དུས་གསུམ་སངས་རྒྱས་འདུས་པའི་ངོ་བོ་ཉིད། །བླ་མ་མཆོག་དང་རྡོ་རྗེ་རྣལ་འབྱོར་མ། །གཉིས་སུ་མེད་ལ་ཕྱག་འཚལ་སྐྱབས་སུ་མཆི། །བདག་རྒྱུད་བྱིན་གྱིས་བརླབ་པར་མཛད་དུ་གསོལ། །བླ་མ་འོད་ཞུ་རང་ལ་གཉིས་མེད་ཐིམ། །རང་གི་སྙིང་གར་ཨེ་ཡིག་ཉིས་བརྩེགས་ལས། །ཆོས་འབྱུང་ཟླ་དཀྱིལ་དབུས་སུ་བོ་ཡིག་མཐར། སྔགས་ཕྲེང་འཁོར་བའི་ཟེར་གྱིས་སྡིག་སྒྲིབ་སྦྱངས། །རང་ལུས་འོད་ཕུང་གྱུར་ལས་སྐད་ཅིག་གིས། །པད་ཉི་འཇིགས་བྱེད་དུས་མཚན་གདན་གྱི་སྟེང་། །རྣལ་འབྱོར་མ་དཔལ་ཞལ་གཅིག་ཕྱག་གཉིས་མ། དམར་གསལ་སྤྱན་གསུམ་ནམ་མཁའི་དབྱིངས་སུ་གཟིགས། །ཕྱག་གཡས་རྡོ་རྗེའི་གྲི་གུག་ཐུར་དུ་བརྐྱང་། །གཡོན་པས་ཐོད་ཁྲག་སྟེང་ཕྱོགས་བཟུང་བས་གསོལ། །ཕྲག་པ་གཡོན་པར་རྡོ་རྗེའི་ཁ་ཊཾ་བསྟེན། ཐོད་སྐམ་དབུ་རྒྱན་དོ་ཤལ་ཕྱག་རྒྱས་སྤྲས། །ཞབས་ཟུང་གཡས་བརྐྱང་གཡོན་བསྐུམ་དོར་སྟབས་ཀྱིས། །བདེ་ཆེན་ཉམས་འབར་ཡེ་ཤེས་མེ་དབུས་རོལ། །ལུས་གནས་སོ་སོར་ཟླ་བའི་དཀྱིལ་འཁོར་སྟེང་། །ལྟེ་བར་ཨོཾ་བོ་དམར་མོ་ཕག་མོ་དང་། །སྙིང་གར་ཧཾ་ཡཾ་སྔོན་མོ་གཤིན་རྗེ་མ། །ཁ་ལ་ཧཱུཾ་མཾ་དཀར་མོ་རྨོངས་བྱེད་མ། དཔྲལ་བར་ཧྲི་ཧྲི་སེར་མོ་སྐྱོད་བྱེད་མ། །སྤྱི་གཙུག་ཧཱུྃ་ཧཱུྃ་ལྗང་གུ་སྐྲག་བྱེད་མ། །ཚིགས་
བརྒྱད་ཕཊ་ཕཊ་དུད་ཁ་ཙཎྜི་ཀཱ། །ཀུན་ཀྱང་ལྷ་ཉིད་ཡི་གེའི་གཟུགས་སུ་ཤར། །ཐུགས་སྲོག་འོད་ཀྱིས་སྣོད་བཅུད་དངོས་འཛིན་སྦྱངས། །རྡོ་རྗེ་བཙུན་མོའི་ཞིང་སྐུར་ལམ་གྱིས་གསལ། ཕོ། སླར་ཡང་ཐུགས་ཀའི་ཛཾ་ལས་འོད་འཕྲོས་པས། །ལྷན་སྐྱེས་ཞིང་སྔགས་རྣལ་འབྱོར་མ་དཔལ་ཀུན། །ཚུར་འདུས་ཛཧཱུྃ་བཾ་ཧོརང་ལ་ཐིམ། །དམ་ཚིག་ཡེ་ཤེས་གཉིས་སུ་མེད་པར་གྱུར། །ཨོ་ཡོ་ག་ཤུདྡྷསརྦ་དྷརྨཱཡོ་ག་ཤུདྡྷོཉ་ཧཾ། ཐུགས་ཀའི་ས་བོན་སྔགས་ཕྲེང་བཅས་པ་ལས། །འཕྲོས་པའི་འོད་ཀྱིས་འཕགས་མཆོད་འགྲོ་སྒྲིབ་སྦྱངས། །སྲས་བཅས་རྒྱལ་བའི་བྱིན་རླབས་ནུས་མཐུ་ཀུན། །བསྡུས་ཐིམ་བདག་རྒྱུད་བྱིན་གྱིས་བརླབས་པར་བྱས། །ཨོ་ཨོ་ཨོ་སངས་རྒྱས་ཐམས་ཅད་ཀྱི་མཁའ་འགྲོ་མ་གང་གི་ཆེད་དུ། སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞ་ནི་རྡོ་རྗེའི་ཁ་དོག་མ་གང་གི་ཆེད་དུ་ཡེ། བཛྲ་བཻ་རོ་ཙ་ནི་རྡོ་རྗེ་རྣམ་པར་སྣང་མཛད་མ་གང་གི་ཆེད་དུ་ཡེ། ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། ཞེས་དམ་བཅས་པའི་གྲངས་ལས་མི་ཉུང་བར་བཟླ། སྤྲོ་ན་ཡིད་བཟླས་སོགས་ཀྱང་བྱ། །ཐུན་བསྡུ་བ་ན། ཁམས་གསུམ་འོད་ཞུ་རང་ཐིམ་རང་ཉིད་ཀྱང་། །ནཱ་དའི་བར་ཐིམ་འོད་གསལ་དབྱིངས་སུ་ཡལ། །སླར་ཡང་རྒྱན་དང་ཕྱག་མཚན་སྤངས་པ་ཡི། །ལྷ་སྐུ་གོ་ཆས་མཚན་པར་གསལ་བར་གྱུར། །ཅེས་བརྗོད་ཅིང་བསམས་ལ། བསྔོ་སྨོན་གྱིས་མཚམས་སྦྱར་ཏེ། དགའ་བ་གསུམ་གྱི་རྣལ་
འབྱོར་དང་མ་བྲལ་བའི་ངང་སྤྱོད་ལམ་དགེ་བའི་བྱ་བ་ལ་འཇུག་པར་བྱའོ། །ཞེས་པའང་བློ་དམན་རྣམས་ལ་སྨན་པའི་སླད། འཇམ་པའི་དབྱངས་དཀོན་མཆོག་ལྷུན་གྲུབ་ཀྱི་གསུང་རབ་ཀྱི་དགོངས་པ་ཇི་ལྟ་བར་བྱ་བྲལ་བ་མཁྱེན་བརྩེའི་དབང་པོས་ཚིགས་བཅད་ཀྱི་ཕྲེང་བར་སྤེལ་བའི་དགེ་བས་འགྲོ་ཀུན་རྗེ་བཙུན་རྡོ་རྗེ་རྣལ་འབྱོར་མའི་གོ་འཕང་མཆོག་ལ་མྱུར་དུ་རེག་པའི་རྒྱུར་གྱུར་ཅིག །སརྦ་མངྒ་ལཾ།།
རྣལ་འབྱོར་མའི་བསྙེན་ཐབས་ཉུང་གསལ།
རྣལ་འབྱོར་མའི་བསྙེན་ཐབས་ཉུང་གསལ་བཞུགས་སོ། །ན་མོ་གུ་རུ་བཛྲ་ཡོ་གི་ནྱ། དབང་དང་བྱིན་རླབས་ཟབ་མོས་རྒྱུད་སྨིན་ཅིང་དམ་ཚིག་དང་སྡོམ་པར་ལྡན་པའི་རྣལ་འབྱོར་པས་མཆོག་དང་ཐུན་མོང་གི་དངོས་གྲུབ་མྱུར་དུ་འགྲུབ་པའི་སླད་རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་བསྙེན་པ་བྱེད་པའི་ཚུལ་ལ་གསུམ། །སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་ཅིང་ཡིད་དང་མཐུན་ལ་ང་དབང་འདུས་པའི་སར། ཡར་མར་གྱི་ཚེས་བཅུ་ལྟ་བུའི་དུས་ཁྱད་པར་ཅན་གྱི་སྔ་དྲོའི་ཆར་གནས་ཁང་ཕྱག་དར་བྱ། གོ་ཡུལ་གྱིས་བདེ་ན་རང་ཉིད་ཁ་ནུབ་ཏུ་ཕྱོགས་པའི་མལ་སྟན་བཤམས་པའི་འོག་ཏུ་སྣ་ཚོགས་རྡོ་རྗེ་བྲིས་པའི་ལྟེ་བར་འབྲུ་དཀར་དང་ཀུ་ཤའི་ཆུན་པོ་དགྲམ། མདུན་དུ་རྣལ་འབྱོར་མའི་བྲིས་སྐུ་ཡོད་ན་དགྲམ་པའི་སྤྱན་སྔར་གཏོར་མ་ལྔ་ཚར་སོགས་ཇི་ལྟར་རིགས་པ་མཆོད་པ་དང་བཅས་པ་དང་། །
རང་གི་མདུན་དུ་ནང་མཆོད། །རྡོར་དྲིལ། ཌ་མ་རུ་སོགས་ཉེར་མཁོའི་ཡོ་བྱད་དང་། གཞན་ཡང་སྔོན་འགྲོ་གཏོར་མ་སོགས་འོག་ཏུ་དགོས་པའི་ཡོ་བྱད་ཐམས་ཅད་འདུ་བྱའོ། །གཉིས་པ་ནི། ཕྱི་དྲོའི་ཆར་གཏོར་མ་ཆ་གསུམ་གཏང་བའམ། ཡང་ན་སྐབས་འདིར་འབྲེལ་ཆེ་བས་སྔོན་འགྲོ་གཏོར་མ་དཀྱིལ་ཆོག་ནས་འབྱུང་བ་བཞིན་ལ། མི་འདྲ་བའི་ཁྱད་པར། རྗེ་བཙུན་རྡོ་རྗེ་རྣལ་འབྱོར་མའི་བསྙེན་སྒྲུབ་ཟབ་མོ་བགྱིད་པར་འཚལ་ན་ཞེས་དང་བསྙེན་སྒྲུབ་ཀྱི་བྱ་བ་ཞེས་བསྒྱུར། གཏོར་མ་ཕྱིར་བསྐྱལ་བ་དང་མཉམ་དུ་སྔགས་གུལ་གྱིས་བདུག །ཡུངས་ཀར་གྱིས་བྲབ། བགེགས་རྣམས་ཀྱང་རྒྱང་རིང་དུ་བྱེར་བར་བསམས་ལ། ཕྱོགས་མཚམས་ཐམས་ཅད་རྡོ་རྗེའི་ས་གཞི་ར་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་འབར་བ་དང་བཅས་པའི་སྲུང་འཁོར་དུ་གྱུར་པར་མོས་ཏེ། ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་བརྗོད་པས་བརྟན་པར་བྱ། སྒོ་རྩར་མི་མང་སྲུང་ཐུབ་ངེས་ཀྱི་ཐོ་བརྩིགས་ལ་དཀར་རྩིས་བྲན། དེ་ནས་མཚམས་དམ་པར་བཅད་དེ་རྩ་བའི་བླ་མའི་སྐུ་བསྟོད་སོགས་ཆོས་སྤྱོད་རྒྱས་བསྡུས་གང་རིགས་ཀྱི་རྗེས། མཆོད་པ་བྱིན་རླབས་དང་། བྱིན་གྱིས་བརླབས་པའི་བདུད་རྩི་མྱོང་བ་སྔོན་ཏུ་འགྲོ་བས། སྐྱབས་འགྲོ་ནས་བསམ་མི་ཁྱབ་པའི་བར་རྗེ་དཀོན་མཆོག་ལྷུན་གྲུབ་ཀྱིས་མཛད་པའི་སྒྲུབ་ཐབས་སོགས་ཡིག་ཆ་ཁུངས་ཐུབ་ལྟར་
ཉམས་སུ་བླང་། ཐུན་མཚམས་ཀྱི་ལྷར་ལྡང་ཞིང་སྒྲུབ་ཐབས་ལྟར་གཏོར་མ་འབུལ། ཀྱེ་རྡོར་དང་གུར་ཞལ་སོགས་ཡི་དམ་ཆོས་སྐྱོང་གི་གཏོར་བསྔོ་གཞན་བྱེད་ན་ཕྱག་ལེན་ལྟར་ཤེས་པར་བྱ་ཞིང་། མི་ཤེས་ན། དུར་ཁྲོད་བདག་པོའི་གཏོར་བསྔོ་དང་། མཁའ་འགྲོ་སྤྱི་གཏོར་གཉིས་སམ་དེ་ཡང་མི་ནུས་ན་མཁའ་འགྲོ་སྤྱི་གཏོར་ཁོ་ནས་ཀྱང་འཐུས། གང་ལྟར་ཡང་མཐར་གོ་ཆ་དགོད་ཅིང་བསྔོ་སྨོན་སོགས་བྱས་ལ་ཐུན་གྲོལ་ནས་ཇ་སོགས་བཏུང་། སླར་སྲོད་ཐུན་ལ་སྐྱབས་འགྲོ་ནས་བསྡུ་རིམ་གྱི་བར་དཀྱུས་ལྟར་ལ། ཉལ་བའི་རྣལ་འབྱོར་གྱིས་ཉལ། སང་ཐོ་རངས་ལྡང་བའི་རྣལ་འབྱོར་གྱིས་ལྡངས་ཏེ་བདུད་རྩི་མྱོང་བ་ནས་བརྩམས་ཇི་སྐད་བཤད་པའི་ཉམས་ལེན་རྣམས་ཐུན་བཞིར་བཅད་ལ་ཉམས་སུ་བླང་། གུང་ཐུན་གྱི་མཚམས་ཟས་ཀྱི་རྣལ་འབྱོར་དང་། ཕྱི་ཐུན་གྱི་མཇུག་ཏུ་གཏོར་འབུལ་སོགས་སྤྱི་ལྟར་བྱ། དེ་ཡང་བསྙེན་པ་དངོས་གཞི་ཡུན་རིང་ཐུང་ལ་ལྟོས་ཏེ། ཐོག་མར་སྐྱབས་འགྲོ་དང་། རྡོར་སེམས་སྒོམ་བཟླས་གཙོ་བོར་བཏོན་ཏེ་སོ་སོར་ཞག་བདུན་གསུམ་སོགས་དང་། དེ་ནས་དངོས་གཞིར། གཞིའི་བསྙེན་པ་ནི་འབུམ་ཕྲག་བཞི་ཁ་སྐོང་དང་བཅས་པ་ཡིན་ལ། འབྲུ་འབུམ་བྱེད་ན། འབུམ་ཕྲག་སུམ་ཅུ་སོ་གཉིས་སམ། སོ་ལྔ་བཟླ་ཞེས་གསུངས་ཀྱང་། དེང་སང་ཕྱག་ལེན་ལ་འབུམ་ཕྲག་སུམ་ཅུ་སོ་བདུན་བཟླ་བར་མཛད་དོ། །བཟླས་
དམིགས་གཅིག་ཁོ་ནས་སེམས་དུབ་ན། སྐུའི་རྣམ་པ་སྤྱི་དང་། བྱེ་བྲག་དང་། སྔགས་ཀྱི་གཟུགས་དང་། སྒྲ་རྣམས་ལ་སོ་སོར་སེམས་འཛིན་པ་དང་། གནས་ལུགས་བརྗོད་བྲལ་གྱི་ངང་དུ་ངལ་གསོ་བ། སྣོད་ཆོས་འབྱུང་གི་ཞིང་། བཅུད་རྣལ་འབྱོར་མའི་སྐུ། སྒྲར་གྲགས་པ་ཐམས་ཅད་ཨོ་གསུམ་མའི་སྔགས་སུ་གསལ་བ་ལ་ཡིད་གཏད་པ་སོགས་མདོར་ན་ཐ་མལ་གྱི་རྣམ་པར་རྟོག་པའི་དབང་དུ་སྐད་ཅིག་ཀྱང་མི་གཏོང་བར་མཚན་བཅས་མཚན་མེད་ཀྱི་ཏིང་ངེ་འཛིན་གྱིས་དུས་འདའ་བར་བྱ་ཞིང་། གཞན་མཚམས་ཀྱི་སྤང་བླང་སོགས་བསྙེན་ཡིག་སྤྱི་ལྟར་ཤེས་པར་བྱས་ནས་ཉམས་སུ་བླང་ངོ་། །གསུམ་པ་རྗེས་ནི། བསྙེན་པའི་གྲངས་རྫོགས་པ་དང་། གྲུབ་ན་སྒྲུབ་པའི་མཚོན་བྱེད་དུ། ཞག་བདུན་ནམ་གསུམ་སོགས་ཇི་ལྟར་རིགས་པ་དཀྱིལ་འཁོར་གསུམ་ཚུལ་བཞིན་དུ་བཤམས་ཏེ་སྒྲུབ་མཆོད་ཐུན་གཉིས་སུ་བྱ། ཡིག་ཆ་པཎ་ཆེན་ནམ་མཁའ་དཔལ་བཟང་གིས་མཛད་པའི་བྱིན་རླབས་ཀྱི་ཆོ་ག་ལ་ཁོ་བོས་བགྱིས་པའི་ཟུར་འདེབས་དཀྱུས་ལྟར་སྦྱར། ཚོགས་ཀྱི་མཆོད་པའང་ཐུན་སོ་སོའམ་ཕྱི་ཐུན་གྱི་མཇུག་ཏུ་བགྱིས་ན་ལེགས། ཁ་སྐོང་གི་སྦྱིན་སྲེག་པཎ་ཆེན་ནམ་མཁའ་དཔལ་བཟང་གི་གསུང་རབ་ལྟར་ལ། སྔགས་ཨོཾ་གསུམ་མ་དང་། རྫས་ཏིལ་འབའ་ཞིག་ལ་གྲངས་བཟུང་བའི་བསྙེན་པའི་བཅུ་ཆ་འབུལ། དེ་ནས་གཟའ་སྐར་བཟང་བའི་
ཐོར་ཐུན་གྱི་མཇུག་ཏུ་གཏོར་བསྔོ་རྒྱས་པར་བྱ་ཞིང་གཏོར་མ་འབུལ། ཐོ་རངས་ལ་མཚམས་གྲོལ་ཏེ་གྲོགས་དམ་ཚིག་ལྡན་པ་རྣམས་དང་རིམ་གྱིས་འཕྲད་པ་སོགས་སྤྱི་ལྟར་བྱ་བ་ཉིད་དོ། །ཞེས་པའང་ཉེར་མཁོའི་ཡན་ལག་ཏུ་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག །སརྦ་མངྒ་ལཾ།། །།
རྗེ་བཙུན་རྡོ་རྗེ་རྣལ་འབྱོར་མ་ལ་བརྟེན་པའི་རྒྱུན་གྱི་ཚོགས་མཆོད་མདོར་བསྡུས་པ་བསོད་ནམས་རྟག་པ་དམ་པའི་སྤྲིན་ཆེན།
རྗེ་བཙུན་རྡོ་རྗེ་རྣལ་འབྱོར་མ་ལ་བརྟེན་པའི་རྒྱུན་གྱི་ཚོགས་མཆོད་མདོར་བསྡུས་པ་བསོད་ནམས་རྟག་པ་དམ་པའི་སྤྲིན་ཆེན་ཞེས་བྱ་བ་བཞུགས་སོ། །ན་མོ་གུ་རུ་བཛྲ་ཡོ་གི་ནྱ། གང་ཞིག་སྙིང་རྗེ་ཆེན་པོས་ཡིད་ལྷག་པར་དྲངས་ཏེ། དུས་མྱུར་བ་ཉིད་དུ་གཞན་དོན་རྫོགས་བྱང་གི་གོ་འཕང་ཐོབ་པར་འདོད་པའི་དོན་གཉེར་གྱི་རྡོ་རྗེ་ཐེག་པ་བླ་ན་མེད་པའི་ཐབས་ལ་བརྟེན་ནས་བདེ་སྟོང་དབྱེར་མེད་ཀྱི་རྩིས་ཟིན་པས་ཚོགས་ཟུང་རྒྱ་མཚོ་སྐད་ཅིག་གིས་རྫོགས་པའི་ཐབས་ལྷུར་ལེན་པ་དག་གིས། བཟའ་བཏུང་གི་དངོས་པོ་ལ་བརྟེན་རྒྱུན་གྱི་ཚོགས་མཆོད་མདོར་བསྡུས་ཏེ་བྱ་བའི་ཚུལ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། རྗེ་བཙུན་རྡོ་རྗེ་རྣལ་འབྱོར་མའི་སྐུ་བྲིས་འབུར་གང་རུང་བའི་སྤྱན་སྔར་རང་ཉིད་ཀྱི་བཟའ་བ་དང་བཏུང་བའི་ཕུད་གཙང་ཞིང་བཀོད་པས་མཛེས་པ་དང་། འབྱོར་ན་མཆོད་པའི་བྱེ་བྲག་གཞན་ཡང་ཇི་ལྟར་རིགས་པ་བཤམ། ནང་མཆོད་ཆུ་ཆང་གིས་བྲན་པའམ། ཆབ་གཙང་མས་བྲན། དངོས་གཞི་ནི།
བདག་གི་རྣལ་འབྱོར་སྔོན་དུ་འགྲོ་བའམ། ཐུན་མཚམས་ཀྱི་ལྷ་སྐུ་སྒྱུ་མ་ལྟ་བུའི་ཏིང་ངེ་འཛིན་གྱི་གསལ་སྣང་བརྟན་པོས་བཟའ་བཏུང་གི་དངོས་པོ་རྣམས། སུམྦྷས་བསང་། སྭ་བྷ་ཝས་སྦྱང་། སྟོང་པའི་ངང་ལས་ཡཾ་ལས་རླུང་། རཾ་ལས་མེའི་དཀྱིལ་འཁོར་གྱི་སྟེང་དུ། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བར་ཚོགས་རྫས་ཤ་ལྔ་བདུད་རྩི་ལྔ་བསྐོལ་ཞིང་འོད་དུ་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩི་འདོད་ཡོན་རྒྱ་མཚོའི་སྤྲིན་ཕུང་འཕྲོ་བར་གྱུར། ཨོཾ་ཨཱཿཧཱུྃ་ཧ་ཧོ༔ཧཱི༔ ལན་མང་དུ་བརྗོད་པས་བྱིན་གྱིས་བརླབ། འབར་བའི་ཕྱག་རྒྱ་དཔྲལ་བའི་དབྱིངས་སུ་གཡོན་དུ་བསྐོར་ཞིང་། ཕོ། ཞེས་བརྗོད་པ་དང་། རང་གི་སྙིང་ག་ནས་འོད་ཟེར་འཕྲོས་པས་རང་བཞིན་གྱི་གནས་ནས་བླ་མ་རྗེ་བཙུན་རྡོ་རྗེ་རྣལ་འབྱོར་མ་ལ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛ༔ ཞེས་པས་ཚོགས་ཞིང་མཁའ་ཁྱབ་ཏུ་སད་པའི་སྤྱན་སྔར། རང་ལས་སྤྲུལ་པའི་མཆོད་པའི་ལྷ་མོ་རྣམས་ཀྱིས་བདེ་སྟོང་གི་ཉམས་འགྱུར་ཕུན་སུམ་ཚོགས་པས་མཆོད་པའི་སྤྲིན་རྒྱ་མཚོས་མཆོད་པ་ལ་བརྟེན་སྐྱབས་ཡུལ་རྣམས་ཟག་མེད་ཀྱི་བདེ་བས་མཆོག་ཏུ་དགྱེས་པས་བདག་གཞན་ཡིད་ཅན་ཐམས་ཅད་ཀྱི་ཚོགས་ཟུང་མཐའ་དག་སྐད་ཅིག་གིས་རྫོགས་པར་མོས་ལ། ཨོཾ་ཨཱཧཱུཾ། གང་ཤར་བདེ་
སྟོང་རོལ་པ་ལས་བྱུང་བའི། །ཚོགས་མཆོད་འདོད་ཡོན་བདུད་རྩིའི་སྤྲིན་ཆེན་པོ། །རྩ་བརྒྱུད་བླ་མ་མཆོག་གསུམ་མཉེས་ཕྱིར་འབུལ། །བཞེས་ནས་ཐུགས་རྗེས་བྱིན་གྱིས་བརླབ་ཏུ་གསོལ། ཨོཾ་གུ་རུ་ཏཱི་རཏྟ་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ཀྱིས་བླ་མ་དང་དཀོན་མཆོག །ཨོཾ་ཨཱཧཱུཾ། གང་ཤར་བདེ་སྟོང་རོལ་པ་ལས་བྱུང་བའི། །ཚོགས་མཆོད་འདོད་ཡོན་བདུད་རྩིའི་སྤྲིན་ཆེན་པོ། །ཡི་དམ་དཀྱིལ་འཁོར་ལྷ་ཚོགས་མཉེས་ཕྱིར་འབུལ། །བཞེས་ནས་མཆོག་ཐུན་དངོས་གྲུབ་སྩལ་དུ་གསོལ། ཨོཾ་མཎྜལ་དེ་བ་ག་ཎ་ས་པ་རི་ཝཱ་ར་ཨོཾ་ཨཱ་ཀཱ་རོ་སོགས་ལན་གསུམ་གྱིས་བླ་མ་ཡི་དམ་གྱི་ལྷ་སྤྱི་དང་། ཨོཾ་ཨཱཿཧཱུྃ། གང་ཤར་བདེ་སྟོང་རོལ་པ་ལས་བྱུང་བའི། །ཚོགས་མཆོད་འདོད་ཡོན་བདུད་རྩིའི་སྤྲིན་ཆེན་པོ། །རྣལ་འབྱོར་མ་དཔལ་འཁོར་བཅས་མཉེས་ཕྱིར་འབུལ། །བཞེས་ནས་བདེ་སྟོང་ཡེ་ཤེས་སྐྱེད་དུ་གསོལ། ཨོཾ་ཨོཾ་ཨོཾ་སརྦ་བུདྡྷ་ཌཱ་ཀི་ནཱི་སོགས་ཀྱི་མཐར། ཨ་ཀཱ་རོ་བཏགས་པ་ལན་གསུམ་གྱིས་ཁྱད་པར་རྡོ་རྗེ་རྣལ་འབྱོར་མ། ཨོཾ་ཨཱཧཱུཾ། གང་ཤར་བདེ་སྟོང་རོལ་པ་ལས་བྱུང་བའི། །ཚོགས་མཆོད་འདོད་ཡོན་བདུད་རྩིའི་སྤྲིན་ཆེན་པོ། །རྡོ་རྗེ་ཆོས་སྲུང་རྒྱ་མཚོ་མཉེས་ཕྱིར་འབུལ། །བཞེས་ནས་བར་ཆད་ཀུན་སོལ་མཐུན་རྐྱེན་སྒྲུབས། ཨོཾ་ཤྲཱི་བཛྲ་དྷརྨཱ་པཱ་ལ་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་ཆོས་སྐྱོང་སྲུང་མ། ཨོ་ཨཱཧཱུཾ། གང་ཤར་
བདེ་སྟོང་རོལ་པ་ལས་བྱུང་བའི། །ཚོགས་མཆོད་འདོད་ཡོན་བདུད་རྩིའི་སྤྲིན་ཆེན་པོ། །གནས་གསུམ་དཔའ་བོ་མཁའ་འགྲོ་མཉེས་ཕྱིར་འབུལ། །བཞེས་ནས་ཟབ་མོའི་ལམ་གྱི་གྲོགས་མཛོད་ཅིག །མཁའ་འགྲོ་སྤྱི་གཏོར་གྱི་སྔགས་སམ། ཨོཾ་ཏྲི་སྠཱ་ན་ཌཱ་ཀ་ཌཱ་ཀི་ནི་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ཀྱིས་གནས་གསུམ་གྱི་དཔའ་བོ་མཁའ་འགྲོ་འཁོར་དང་བཅས་པར་ཕུལ། དེ་ནས་ཚོགས་ཀྱི་ཆ་བར་པ་རང་ཉིད་ཀྱིས་རོལ་པའི་སླད་དུ། བདག་ཉིད་རྡོ་རྗེ་རྣལ་འབྱོར་མའི། །སྙིང་གར་ཡི་དམ་ལྷ་ཚོགས་དང་། །ལྟེ་བར་གཏུམ་མོའི་མེ་ལྕེའི་ཁྲོད། །ཆོས་སྲུང་ནོར་ལྷའི་ཚོགས་བཅས་གསལ། །ཚོགས་མཆོད་ཡེ་ཤེས་བདུད་རྩིའི་རྒྱུན། །ལག་གཉིས་རྡོ་རྗེའི་དགང་བླུགས་ཀྱིས། །ཕུལ་བས་ཟག་མེད་བདེ་བས་མཉེས། །མཆོག་ཐུན་དངོས་གྲུབ་སྩོལ་བར་གྱུར། །ཅེས་བརྗོད་ཅིང་བསམ་ལ། ཨོཾ་ཨཱ༔ཧཱུྃ་གིས་ཆོས་ཉིད་གསལ་ཁྱབ་ཀྱི་ངང་དུ་རོལ། ལྷག་མ། ཨོཾ་ཨཱཿཧཱུྃ་ཧ་ཧོ་ཧྲིས་བརླབས། ཕོ། ཨུཎྜི་ཊ་བ་ལིཾ་ཏ་བྷཀྵ་སཱི། གང་ཤར་བདེ་སྟོང་རོལ་པ་ལས་བྱུང་བའི། །ལྷག་མའི་འདོད་ཡོན་བདུད་རྩིའི་སྤྲིན་ཆེན་པོ། །འབྱུང་པོ་ལྷག་མར་༈ དབང་བའི་ཚོགས་ལ་སྦྱིན། །ངོམས་ཤིང་ཚིམས་པའི་སྐལ་བ་ལྡན་གྱུར་ཅིག །ཅེས་བརྗོད་ཅིང་ཕྱིར་རོལ་གཙང་སར་བསྐྱལ། སྤྲོ་ན་རྡོ་རྗེའི་གླུའམ་དཔྱིད་ཀྱི་རྒྱལ་མོའི་གླུ་བླངས། །བཀྲ་ཤིས་གང་ཞིག་ཆོས་ཀྱི་
དབྱིངས་ནས་ལེགས་བྱུང་བའི། །ཧེ་རུ་ཀ་དཔལ་འཇིགས་བྱེད་རྒྱལ་པོ་འབར་བའི་སྐུ། །ཤེས་རབ་ཕག་མོའི་པདྨར་རྡོ་རྗེས་རོལ་མཛད་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །འཆི་ཚེ་མགོན་དང་དཔའ་བོ་མ་ཚོགས་ཀྱི། །ཞེས་སོགས་དང་། ལྷ་མོ་ཚད་མ་སོགས་སྨོན་ལམ་གདབ། མཐར། ཨོཾ་གུ་རུ་བཛྲ་ཡོ་གི་ནི་ས་པ་རི་ཝཱ་ར་ཨརྒྱུ་སོགས་ནས། ཤབྟ་པྲ་ཏི་ཙཱ་སཱ་ཧས་ཕྱི་མཆོད་དང་། ཨོ་ཨཱཿཧཱུྃ་གིས་ནང་མཆོད་ཕུལ། དཔལ་ལྡན་རྡོ་རྗེ་མཁའ་འགྲོ་སོགས་ཀྱིས་བསྟོད། ཡི་གེ་བརྒྱ་པའི་མཐར། མ་འབྱོར་པ་དང་སོགས་ཀྱིས་ནོངས་པ་བཤགས། རྟེན་ཡོད་པ་རྣམས། ཨོཾ་སུ་པྲ་ཏིཥྛ་བཛྲ་ཡ་སྭཱ་ཧཱས། མེ་ཏོག་འཐོར་ཞིང་བརྟན་བཞུགས་བྱ། རྟེན་མེད་པའི་གཏོར་མགྲོན། བཛྲ་མུས་གཤེགས། དགེ་བ་འདི་ཡིས་མྱུར་དུ་བདག །རྣལ་འབྱོར་མ་དཔལ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་བསྔོ་སྨོན་དང་། གནས་འདིར་ཉིན་མོ་བདེ་ལེགས་སོགས་ཤིས་བརྗོད་ཇི་ལྟར་རིགས་པས་མཚམས་སྦྱར་ཏེ་དེ་ལྟར་ཕུལ་བའི་ཚོགས་རྫས་རྒྱ་ཆེ་བ་ཡོད་ན་ཡོན་ཏན་གྱི་ཞིང་བླ་མ་དང་དགེ་འདུན་ལ་ཆོས་སྟོན་དུ་གསོལ་བའམ། ཕན་འདོགས་པའི་ཞིང་ནད་པ་དང་དབུལ་ཕོངས་སོགས་ལ་སྦྱིན་པས་མཚོན་སླར་ཡང་ཚོགས་ཟུང་སྤེལ་བའི་ཐབས་ལ་བརྩོན་པར་བྱའོ། །ཞེས་
པའང་ཡོངས་ཀྱི་དགེ་བའི་བཤེས་གཉེན་ཆེན་པོ་དཔལ་ལྡན་བླ་མ་དམ་པ་ངག་གི་དབང་ཕྱུག་བྱམས་པ་ཕུན་ཚོགས་ཀྱིས་འདི་ལྟར་བྲིས་ཞེས་ལྷ་རྫས་ཀྱི་མེ་ཏོག་དང་བཅས་བཀའ་སྩལ་ཕེབས་པ་གུས་པས་མཆོད་དེ་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བྲིས་པའི་དགེ་བས་འགྲོ་ཀུན་ཚོགས་ཟུང་རྒྱ་མཚོ་མྱུར་དུ་རྫོགས་ནས་མཁའ་སྤྱོད་རྡོ་རྗེ་བཙུན་མོའི་གོ་འཕང་ཚེ་གཅིག་ཁོ་ནས་རེག་པའི་རྒྱུར་གྱུར་ཅིག། །།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་ཚོགས་མཆོད་བྱ་ཚུལ་མདོར་བསྡུས་པ་བསོད་ནམས་སྤྲིན་གྱི་གྲུ་ཆར།
༈ རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་ཚོགས་མཆོད་བྱ་ཚུལ་མདོར་བསྡུས་པ་བསོད་ནམས་སྤྲིན་གྱི་གྲུ་ཆར་ཞེས་བྱ་བ་བཞུགས་སོ། །ན་མོ་གུ་ར་བེ། དྲན་པ་ཙམ་གྱིས་མཁའ་སྤྱོད་མཆོག་སྟེར་བ། །བླ་མ་རྡོ་རྗེ་བཙུན་མོ་ལ་བཏུད་ནས། །གང་དེ་ཚོགས་ཀྱི་མཆོད་པས་མཉེས་བྱེད་ཚུལ། །བསོད་ནམས་སྤྲིན་གྱི་གྲུ་ཆར་འདིར་འབེབས་སོ། །དེ་ལ་འདིར་རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་སིདྡྷཱ་རའི་དཀྱིལ་འཁོར་སྒྲུབ་མཆོད་སོགས་དང་འབྲེལ་བར་ཚོགས་ཀྱི་མཆོད་པ་མདོར་བསྡུས་བྱ་བའི་ཚུལ་ལ། སྦྱོར་འཇུག་གི་ཆོས་རྣམས་གཞན་དུ་ཤེས་པར་བྱས་ནས། དངོས་གཞིའི་ཆོ་ག་ལ། ཐོག་མར་བྱིན་གྱིས་བརླབས་པ་ནི། མ་དཱ་ན་དང་བཱ་ལ་སོགས་པའི་ཡོ་བྱད་རྣམས་ལ་རྡོ་རྗེའི་རྗེས་ནང་མཆོད་འཐོར་ཞིང་། སུམྦྷས་བསང་། སྭ་བྷཱ་ཝས་སྦྱང་། སྣོད་བཅུད་ཐམས་ཅད་མི་དམིགས་སྟོང་པར་གྱུར། །
སྟོང་པའི་ངང་ལས་ཨ་ཡིག་ཡོངས་གྱུར་ལས། །ཕྱི་སྣོད་བདེ་ཆེན་ཡེ་ཤེས་ཀ་པཱ་ལ། །ཡངས་ཤིང་རྒྱ་ཆེ་སྟོང་གསུམ་ཁྱོན་དང་མཉམ། །དེ་དབུས་ནང་བཅུད་ཤ་ལྔ་བདུད་རྩི་ལྔ། །འོད་དུ་ཞུ་ལས་ཡེ་ཤེས་བདུད་རྩིའི་སྤྲིན། །འདོད་པའི་ཡོན་ཏན་རྣམ་པ་ཐམས་ཅད་པ། །ཟག་མེད་འཆར་བ་ནམ་མཁའི་མཛོད་དུ་གྱུར། །ཨོཾ་ཨཱཿཧཱུྃ་ཧ་ཧོ་ཧི༔ ལན་གསུམ། ཚོགས་ཞིང་སྤྱན་དྲངས་པ་ནི། ཕོ་ཕོ། འོག་མིན་རྡོ་རྗེ་བཙུན་མོའི་ཞིང་ཁམས་དང་། །སྐུ་གསུང་ཐུགས་ཀྱི་འཁོར་ལོའི་དཀྱིལ་འཁོར་ནས། །རྒྱལ་ཀུན་ཡུམ་གྱུར་རྡོ་རྗེ་རྣལ་འབྱོར་མ། །རྩ་བརྒྱུད་བླ་མ་སངས་རྒྱས་བྱང་སེམས་དང་། །ཡི་དམ་ལྷ་ཚོགས་དཔའ་བོ་རྣལ་འབྱོར་མ། །ཆོས་སྐྱོང་སྲུང་མ་ནོར་ལྷའི་ཚོགས་དང་བཅས། །ལོངས་སྤྱོད་ཚོགས་ཀྱི་འདུ་བར་སྤྱན་འདྲེན་ན། །ཚད་མེད་ཐུགས་རྗེའི་དབང་གིས་གནས་འདིར་གཤེགས། །ༀ་གུ་རུ་བུདྡྷ་བོ་དྷི་ས་ཏཱ་བཛྲ་ཡོ་གི་ནི་ས་པ་རི་ཝཱ་ར་བཛྲ་ས་མཱ་ཛཞེས་པས་མཁའ་ཁྱབ་ཏུ་བྱོན་པར་བསམ། དེ་ནས་སྨན་ཕུད་འཐོར་ལ། ཨོཾ་ཨཱཿཧཱུྃ། དམན་པའི་སྤྱོད་ཡུལ་དག་ལས་རབ་འདས་ཤིང་། །རྒྱལ་བ་ཀུན་གྱི་བསྟེན་བྱའི་དམ་ཚིག་མཆོག །དངོས་གྲུབ་རྣམ་གཉིས་ཀུན་གྱི་གཞིར་གྱུར་པ། །ཟག་མེད་བདུད་རྩི་མཆོག་གི་མཆོད་པ་འདི། །ཕྱོགས་བཅུ་དུས་གསུམ་རྒྱལ་བ་སྲས་བཅས་ཀྱི། །མཁྱེན་བརྩེ་ནུས་གསུམ་གཅིག་ཏུ་འདུས་པའི་དངོས། །དྲན་པས་སྲིད་
ཞིའི་རྒུད་པ་ཀུན་སེལ་བའི། །རྩ་བའི་བླ་མའི་ཞལ་དུ་ཨོ་ཨཱཧཱུཾ། །རྡོ་རྗེ་འཆང་ཆེན་རྡོ་རྗེ་རྣལ་འབྱོར་མ། །གྲུབ་ཆེན་ནཱ་རོ་ཏ་པ་ཕམ་མཐིང་པ། །ཤེས་རབ་བརྩེགས་དང་མལ་གྱོ་ས་སྐྱ་པ། །རྗེ་བཙུན་སྐུ་མཆེད་ཞལ་དུ་ཨོཾ་ཨཱཧཱུཾ། །ས་སྐྱ་པཎ་ཆེན་འཕགས་པ་རིན་པོ་ཆེ། །དཀོན་མཆོག་དཔལ་དང་ཆོས་རྗེ་བསོད་ནམས་དཔལ། །བསོད་ནམས་རྒྱལ་མཚན་དཔལ་ལྡན་ཚུལ་ཁྲིམས་ཞབས། །ཡེ་ཤེས་རྒྱལ་མཚན་ཞལ་དུ་ཨོཾ་ཨཱཧཱུཾ། །ངོར་ཆེན་རྡོ་རྗེ་འཆང་དངོས་ཀུན་དགའ་བཟང་། །སེམས་དཔའ་ཆེན་པོ་བདག་ཆེན་རྡོ་རྗེ་འཆང་། །ཀུན་སྤངས་ཆོས་རྗེ་ཀུན་དགའ་ལེགས་པ་དང་། ཚར་ཆེན་ཆོས་རྗེའི་ཞལ་དུ་ཨོཾ་ཨཱཙྪཱཧཱུྃ། །མཁྱེན་བརྩེའི་དབང་ཕྱུག་བསླབ་གསུམ་རྒྱལ་མཚན་དང་། །དབང་ཕྱུག་རབ་བརྟན་བསོད་ནམས་མཆོག་ལྡན་ཞབས། །བསོད་ནམས་མཆོག་གྲུབ་མཁྱེན་རབ་བྱམས་པའི་དཔལ། །ཀུན་དགའ་ལྷུན་གྲུབ་ཞལ་དུ༴ །གནས་གསར་རྡོ་རྗེ་འཆང་དབང་ཀུན་བློའི་ཞབས། །ནམ་མཁའ་འཆི་མེད་བསྟན་པའི་ཉི་མ་དང་། །ངག་གི་དབང་པོ་ཁྱབ་བདག་ཀུན་དགའི་མཚན། །འཇམ་དཔལ་བཟང་པོའི་ཞལ་དུ༴ །གཞན་ཡང་ཚད་མེད་ཐུགས་རྗེའི་སྤྲིན་མཛེས་ལས། །དབང་བསྐུར་རྒྱུད་བཤད་མན་ངག་བདུད་རྩི་ཡིས། །བདག་བློའི་ཐར་པའི་མྱུ་གུ་འཕེལ་མཛད་པ། །དངོས་བརྒྱུད་བླ་མའི་ཞལ་དུ་ཨོཾ་ཨཱཿཧཱུཾ། ཨོཾ་ཨོ་ཨོཾ་སརྦ་བུདྡྷ་ཌཱ་ཀི་སོགས་ནས་
ཕཊ་སྭཱ་ཧཱ། ཁྱད་པར་དྲན་པ་ཙམ་གྱིས་ལྷན་སྐྱེས་ཀྱི། །ཡེ་ཤེས་རྨད་དུ་བྱུང་བ་སྦྱིན་མཛད་པ། །རྒྱལ་ཀུན་ཡུམ་གཅིག་རྡོ་རྗེ་རྣལ་འབྱོར་མ། །སྐྱབས་གནས་ཀུན་འདུས་ཞལ་དུ་ཨོཾ་ཨཱཧཱུཾ། གཞན་ཡང་བྱ་བ་སྤྱོད་པ་རྣལ་འབྱོར་དང་། །རྣལ་འབྱོར་བླ་མེད་རྒྱུད་དང་རྗེས་འབྲེལ་བའི། །གང་འདུལ་སྒྱུ་འཕྲུལ་དྲྭ་བའི་རྣམ་རོལ་ཅན། །ཡི་དམ་ལྷ་ཚོགས་ཞལ་དུ་ཨོཾ་ཨཱཧཱུཾ། ཨོཾ་ཨཱཧཱུཾ། རྡོ་རྗེའི་ཆོས་སྲུང་ནོར་ལྷ་རྒྱ་མཚོ་དང་། །གནས་གསུམ་བཞུགས་པའི་དཔའ་བོ་རྣལ་འབྱོར་མ། །ཡུལ་ལྷ་གཞི་བདག་རིགས་དྲུག་ཚོགས་བཅས་རྣམས། །ལྷ་རུ་གསལ་བའི་ཞལ་དུ་ཨོཾ་ཨཱཿཧཱུཾ། །སྒྲིབ་པ་གཉིས་ཀྱི་དྲི་མ་ཀུན་བསལ་ནས། །གཟུང་འཛིན་། རྟོགས་པ་ཀུན་ལས་རྣམ་གྲོལ་བ། །བླ་ན་མེད་པའི་བྱང་ཆུབ་སེམས་ཀྱི་དངོས། །བདེ་བ་ཆེན་པོའི་མཆོད་པས་མཉེས་གྱུར་ཅིག །ཨོཾ་ཨཱཿཧཱུྃ། ཞེས་བརྗོད། ཚོགས་ཕུད་ཆ་གསུམ་དུ་བསྒོས་ལ། ཕུད་དང་པོ་བླ་མ་དང་དཀོན་མཆོག་ལ་འབུལ་བ་ནི། ཨོཾ་ཨཱཿཧཱུྃ། ཕྱོགས་བཅུ་དུས་གསུམ་རྒྱལ་བ་སྲས་བཅས་ཀྱི། །ཡེ་ཤེས་སྒྱུ་འཕྲུལ་དྲྭ་བའི་རྣམ་རོལ་ཅན། །བཀའ་དྲིན་མཉམ་མེད་རྩ་བའི་བླ་མ་ལ། །ཟག་མེད་བདུད་རྩིའི་ཚོགས་ཀྱི་མཆོད་པ་འབུལ། །ཞེས་པའི་མཐར་སྤྲོ་ན། ཁྱབ་བདག་དང་པོའི་སངས་རྒྱས་རྡོ་རྗེ་ཆོས། །རྒྱལ་བའི་ཡུམ་གྱུར་རྡོ་རྗེ་རྣལ་འབྱོར་མ། །གྲུབ་པའི་དབང་པོ་རྡོ་རྗེ་དྲིལ་བུ་པར། ཟག་མེད་བདུད་རྩིའི་
ཚོགས་ཀྱི་མཆོད་པ་འབུལ། །ཞེས་སོགས་ཀྱིས་ཕུལ་བའམ། བསྡུ་ན། ཁྱབ་བདག་རྡོ་རྗེ་འཆང་དབང་ནས་བཟུང་སྟེ། །པཎ་གྲུབ་དབང་པོ་ནཱ་རོ་ཏ་པ་སོགས། །འཕགས་བོད་བརྒྱུད་པའི་བླ་མ་ཐམས་ཅད་ལ། །ཟག་མེད་བདུད་རྩིའི་ཚོགས་ཀྱི་མཆོད་པ་འབུལ། །ཞེས་པའི་མཐར། སྤངས་རྟོགས་མཐར་ཕྱིན་རྒྱལ་བ་སྲས་བཅས་དང་། །ཡི་དམ་དཀྱིལ་འཁོར་འཁོར་ལོ་རབ་འབྱམས་སོགས། །སྐྱབས་༣གནས་མཆོད་འོས་རྒྱ་མཚོ་ཐམས་ཅད་ལ། །ཟག་མེད་བདུད་རྩིའི་ཚོགས་ཀྱི་མཆོད་པ་འབུལ། །བཞེས་ནས་བདག་དང་མཐའ་ཡས་སེམས་ཅན་ཀུན། །བསོད་ནམས་ཡེ་ཤེས་ཚོགས་གཉིས་རབ་རྫོགས་ཤིང་། །མཆོག་དང་ཐུན་མོང་དངོས་གྲུབ་རྣམ་གཉིས་ཀྱིས། །ཕན་བདེའི་དགའ་སྟོན་རྒྱས་པར་བྱིན་གྱིས་རློབས། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་ཕུལ། ཕུད་བར་པ་ཡི་དམ་རྡོ་རྗེ་རྣལ་འབྱོར་མ་ལ་ཕུལ་ཏེ། ཨོཾ་ཨཱཧཱུཾ། ཨེ་དབྱིངས་རྡོ་རྗེ་བཙུན་མོའི་གྲོང་ཁྱེར་དུ། །ཁཾ་ཡིག་བདེ་བ་ཆེན་པོའི་རོལ་རྩེད་ལས། །ཟུང་འཇུག་མཚན་དཔེའི་གཟུགས་སུ་ཡོངས་ཤར་བ། །སྐྱབས་གནས་ཀུན་འདུས་རྡོ་རྗེ་རྣལ་འབྱོར་མ། །དྲན་པས་ལྷན་ཅིག་སྐྱེས་པའི་ཡེ་ཤེས་ཀྱི། །རྣམ་ཀུན་མཆོག་ལྡན་ལང་ཚོ་དར་བབས་ཤིང་། །ཡིད་འོང་སྤྱན་གྱི་ཟུར་མདས་རེག་པའི་མོད། །སྒྲུབ་པོ་མཁའ་སྤྱོད་གྲོང་དུ་འཁྲིད་
མཛད་པའི། །གནས་གསུམ་ཞིང་སྔགས་ལྷན་ཅིག་སྐྱེས་པ་ཡི། །གྲངས་མེད་ཌཱ་ཀི་རྒྱ་མཚོའི་འཁོར་དང་བཅས། །མཁའ་དབྱིངས་ཁྱབ་པར་བཞུགས་པའི་ཚོགས་རྣམས་ལ། །ཞལ་ཟས་བདུད་རྩིའི་ཚོགས་ཀྱི་མཆོད་པ་འབུལ། །བཞེས་ནས་བདག་དང་མཐའ་ཡས་སེམས་ཅན་ཀུན། །སྐུ་གསུང་ཐུགས་ཀྱི་གསང་བས་རྗེས་བཟུང་ནས། །གནས་སྐབས་མཁའ་སྤྱོད་གྲོང་དུ་དབུགས་དབྱུངས་ཤིང་། །མཐར་ཐུག་མཆོག་དངོས་འགྲུབ་པར་བྱིན་གྱིས་རློབས། །ཞེས་དང་། ༀ་གསུམ་མའི་མཐར་ཨ་ཀཱ་རོ་བཏགས་པས་ཕུལ། ཕུད་ཐ་མ་མཁའ་འགྲོ་ཆོས་སྐྱོང་སྲུང་མ་སོགས་ལ་འབུལ་ཏེ། ཨོཾ་ཨཱཿཧཱུཾ། །རྡོ་རྗེའི་ཡེ་ཤེས་འབར་བའི་མེ་བོ་ཆེ། །ལོག་འདྲེན་བགེགས་ཀྱི་བུད་ཤིང་ཀུན་བསྲེགས་ནས། །གྲུབ་གཉིས་སྣང་བ་རྟག་ཏུ་རྒྱས་མཛད་པའི། །ཆོས་སྐྱོང་སྲུང་མའི་ཚོགས་རྣམས་ཐམས་ཅད་དང་། སྒྲུབ་པ་པོ་ཡི་རྒྱུད་ལ་ལྷན་སྐྱེས་ཀྱི། །ཡེ་ཤེས་རྨད་དུ་བྱུང་བའི་དཔལ་སྟེར་བ། །གནས་ཡུལ་དུར་ཁྲོད་ཀུན་ན་བཞུགས་པ་ཡི། །སྤྲུལ་པའི་གར་མཛད་དཔའ་བོ་རྣལ་འབྱོར་མ། །བསོད་ནམས་ནོར་བུའི་སྤྲིན་ཆེན་རོལ་པ་ལས། །འདོད་དགུའི་གྲུ་ཆར་ལྷུག་པར་འབེབས་མཁས་པས། །སྲིད་ཞིའི་འབྱོར་པ་མཐའ་དག་སྦྱིན་མཛད་པའི། །གནོད་སྦྱིན་ནོར་ལྷ་རྒྱ་མཚོའི་ཚོགས་བཅས་དང་། །གཞན་ཡང་ཡུལ་ལྷ་གཞི་བདག་རིགས་དྲུག་མགྲོན། །ཐམས་ཅད་ཡེ་ཤེས་
གཅིག་གིས་བྱིན་རླབས་པས། །མཁའ་སྤྱོད་དགའ་མའི་གཟུགས་སུ་ཡོངས་ཤར་བར། །ཞལ་ཟས་བདུད་རྩིའི་ཚོགས་ཀྱི་མཆོད་པ་འབུལ། །བཞེས་ནས་བདག་དང་སེམས་ཅན་ཐམས་ཅད་ཀྱི། །ལམ་གྱི་འགལ་རྐྱེན་མཐའ་དག་ཉེར་ཞི་ཞིང་། །མཐུན་རྐྱེན་མ་ལུས་ཡིད་བཞིན་འགྲུབ་པ་དང་། །མཆོག་ཐུན་དངོས་གྲུབ་ཐོབ་པའི་ཕྲིན་ལས་མཛོད། །ཞེས་དང་། ཆོས་སྐྱོང་སོ་སོའི་གཏོར་སྔགས་དང་། མཁའ་འགྲོ་སྤྱི་གཏོར་གྱི་སྔགས་ཀྱིས་ཕུལ། ཡན་ལག་བརྒྱད་ལྡན་མཆོད་ཡོན་རྒྱ་མཚོ་དང་། །དྲི་མེད་གངྒའི་རྒྱུན་གྱི་ཞབས་བསིལ་སྒྲེང་། །རབ་མཛེས་མཚར་སྡུག་རྫོགས་པའི་མེ་ཏོག་དང་། །བདུག་སྤོས་སྤྲིན་གྱི་དུད་པས་ཕྱོགས་ཀུན་ཁྱབ། །ཉི་ཟླ་ནོར་བུའི་སྒྲོན་མེའི་སྣང་གསལ་དང་། །ག་བུར་ཙནྡན་བགོས་པའི་དྲི་ཆབ་གཡོ། །རོ་བརྒྱ་ལྡན་པའི་ཞལ་ཟས་སྣ་ཚོགས་དང་། །དབྱངས་བདུན་སྙན་འགྱུར་རྫོགས་པའི་རོལ་མོར་བཅས། །བླ་མ་ཡི་དམ་སངས་རྒྱས་བྱང་སེམས་དང་། །རྒྱལ་ཀུན་ཡུམ་གྱུར་རྡོ་རྗེ་རྣལ་འབྱོར་མའི། །དཀྱིལ་འཁོར་ལྷ་ཚོགས་འཁོར་དང་བཅས་ལ་འབུལ། །བཞེས་ནས་དབང་དང་དངོས་གྲུབ་སྩལ་དུ་གསོལ། །ༀ་གུ་རུ་བུདྡྷ་བོ་དྷི་ས་ཏཱ་བཛྲ་ཡོ་གི་ནི་ས་པ་རི་ཝཱ་ར་ཨགྷཾ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་འབུལ། བྱིན་རླབས་རྨད་བྱུང་རྩ་བརྒྱུད་བླ་མ་དང་། །དངོས་གྲུབ་མཆོག་སྩོལ་ཡི་
དམ་དཀྱིལ་འཁོར་ལྷ། །སྐྱབས་གནས་དཀོན་མཆོག་རྒྱ་མཚོའི་ཚོགས་བཅས་ལ། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཆོས་སྐུའི་ངང་ལས་ལྷན་སྐྱེས་ལོངས་སྤྱོད་རྫོགས། །ཞིང་སྐྱེས་སྤྲུལ་པའི་རྣམ་རོལ་མཐའ་ཡས་བདག །སྔགས་སྐྱེས་དཀྱིལ་འཁོར་འཁོར་ལོར་ཡོངས་ཤར་བའི། །རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །ཞི་དང་ཁྲོ་ཆགས་རྣམ་འཕྲུལ་སྣ་ཚོགས་ཀྱིས། །འགལ་རྐྱེན་སེལ་ཞིང་མཐུན་རྐྱེན་བསྒྲུབས་མཛད་པ། །ཆོས་སྐྱོང་སྲུང་མ་ནོར་ལྷ་རྒྱ་མཚོ་དང་། །གནས་གསུམ་མཁའ་འགྲོའི་ཚོགས་ལ་ཕྱག་འཚལ་ལོ། །ཞེས་པས་བསྟོད། །རྩ་བརྒྱུད་བླ་མ་ཡི་དམ་དཀྱིལ་འཁོར་ལྷ། །རྒྱལ་ཀུན་ཡུམ་གྱུར་རྡོ་རྗེ་རྣལ་འབྱོར་མ། །མཁའ་འགྲོ་ཆོས་སྐྱོང་སྲུང་མའི་ཚོགས་རྣམས་དང་། །གཞན་ཡང་ཡེ་ཤེས་གཅིག་གི་རྣམ་རོལ་ལ། །མཆོག་དང་དམན་པའི་རྟོག་པ་མ་དམིགས་ཕྱིར། །ཡུལ་ལྷ་གཞི་བདག་རིགས་དྲུག་ཚོགས་བཅས་ལ། །འདོད་པའི་ཡོན་ཏན་རྣམ་པ་ཐམས་ཅད་པ། །ཞལ་ཟས་ཚོགས་ཀྱི་མཆོད་པ་ཕུལ་བའི་མཐུས། །འགྲོ་ལ་ཕན་བདེ་མ་ལུས་འབྱུང་བའི་སྒོ། །རྒྱལ་བའི་བསྟན་པ་ཡུན་རིང་གནས་པ་དང་། ། བསྟན་འཛིན་སྐྱེས་བུ་ཐམས་ཅད་ཞབས་བརྟན་ཅིང་། །བཤད་སྒྲུབ་ཕྲིན་ལས་འཕེལ་བར་མཛད་དུ་གསོལ། །འཇིག་རྟེན་པ་ཀུན་ཡང་དག་ལྟ་བ་ལ། །གུས་ཤིང་རྣམ་དཀར་ལས་ལ་བརྩོན་པའི་མཐུས། །སྣོད་
བཅུད་ཕུན་སུམ་ཚོགས་པའི་ངོ་མཚར་གྱི། །དགེ་མཚན་ནུབ་པ་མེད་པར་མཛད་དུ་གསོལ། །གཞན་ཡང་རྣལ་འབྱོར་བདག་ཅག་འཁོར་བཅས་ལ། །གནས་སྐབས་འཇིགས་ཆེན་བརྒྱད་དང་བཅུ་དྲུག་སོགས། །དམ་ཆོས་བསྒྲུབ་ལ་འཚེ་བའི་འགལ་རྐྱེན་ཀུན། །ཞི་བའི་ཕྲིན་ལས་འགྲུབ་པར་མཛད་དུ་གསོལ། །ཚེ་བསོད་དཔལ་འབྱོར་ཐོས་བསམ་ཤེས་རབ་དང་། །ཁྱད་པར་རིམ་པ་གཉིས་ཀྱི་ཏིང་ངེ་འཛིན། ། གོང་ནས་གོང་དུ་འཕེལ་ཞིང་བརྟན་པ་ཡིས། །གྲུབ་གཉིས་དགའ་སྟོན་རྒྱས་པར་མཛད་དུ་གསོལ། །བརྟན་གཡོ་སྣོད་བཅུད་ཐམས་ཅད་སྐད་ཅིག་ཙམ། །དྲན་པའི་མོད་ནས་དབང་དུ་བགྱིད་ནུས་པའི། །བརྟུལ་ཞུགས་ཟླ་མེད་སྔགས་རིགས་གྲུབ་པ་ཡིས། །ཕུན་ཚོགས་མཐའ་དག་འདུ་བར་མཛད་དུ་གསོལ། །ཞི་བའི་ཐབས་ཀྱིས་འདུལ་དུ་མ་འཚལ་བའི། །ནག་པོའི་རྩ་ལག་སྡེར་བཅས་དཔུང་ཚོགས་ཀུན། །དྲག་པོའི་ཕྲིན་ལས་མཆོག་གིས་ཚར་བཅད་ནས། །མིང་གི་ལྷག་མར་བགྱིད་པར་མཛད་དུ་གསོལ། །ཚེ་ཡི་མཐར་ཡང་དཔལ་ལྡན་བླ་མ་དང་། །དབྱེར་མེད་རྗེ་བཙུན་རྡོ་རྗེ་རྣལ་འབྱོར་མ། །དཔའ་བོ་མཁའ་འགྲོའི་ཚོགས་ཀྱིས་མདུན་བདར་ནས། །མཁའ་སྤྱོད་གནས་སུ་འཁྲིད་པར་མཛད་དུ་གསོལ། །མདོར་ན་མྱུར་དུ་ཟུང་འཇུག་ཕྱག་རྒྱ་ཆེའི། །གོ་འཕང་མཆོག་དེ་མངོན་སུམ་བརྙེས་པ་དང་། །དེ་མ་ཐོབ་པའི་ཚེ་རབས་ཐམས་
ཅད་དུ། །དོན་གཉིས་ཡིད་བཞིན་འགྲུབ་པར་མཛད་དུ་གསོལ། །ཞེས་འདོད་པའི་དོན་ལ་གསོལ་བ་གདབ། དེ་ནས་ཚོགས་པ་མང་པོ་ཡོད་ན་ཞུ་འབུལ་སོགས་ཚུལ་བཞིན་བྱ། གང་ལྟར་ཡང་མཐར། འདོད་པའི་ཡོན་ཏན་སྣ་ཚོགས་སྤྲིན་འཕྲོ་བའི། །བཟའ་བཅའ་བཏུང་བའི་ཁྱད་པར་རྣམ་མང་པོ། །ཏིང་ངེ་འཛིན་གྱི་མིག་འཕྲུལ་ལས་བྱུང་བ། །ཡེ་ཤེས་བདུད་རྩིའི་རྒྱ་མཚོའི་མཆོད་སྤྲིན་འདིས། །རང་སེམས་བླ་མ་ཡི་དམ་རྣལ་འབྱོར་མ། །དབྱེར་མེད་སངས་རྒྱས་ཐམས་ཅད་འདུས་པའི་དངོས། །སྙིང་དབུས་ཁཾ་ཡིག་ཐིག་ལེར་རྟག་མཆོད་ན། །འདུ་འབྲལ་མེད་པའི་དངོས་གྲུབ་སྩལ་དུ་གསོལ། །ཞེས་བརྗོད་ཅིང་བསམ་ལ་ཚིམ་པར་རོལ། མཐར་ལྷག་མ་ཆུ་ཆང་གིས་བྲན་ལ། ཨོཾ་ཨཱཧཱུཾ། ལྷག་མའི་གཏོར་མ་ཞལ་ཟས་བདུད་རྩིའི་སྤྲིན། །འདོད་པའི་ཡོན་ཏན་རྣམ་པ་ཐམས་ཅད་པ། །ཟད་པ་མེད་པ་ནམ་མཁའི་མཛོད་ལྟ་བུ། ། དཔག་ཡས་སྲིད་ཞིའི་ཁམས་ཀུན་ཁྱབ་པར་གྱུར། །ཨོཾ་ཨཱཧཱུཾ། གསུམ་གྱིས་བརླབས། ཕོ། ཞེས་པས་མགྲོན་བཀུག་ནས། ཨོཾ་ཁ་ཁ་ཁཱ་ཧི་ཁཱ་ཧི་ཨུཏྟི་ཊ་བ་ལིཾ་ཏ་བྷཀྵ་སི་སྭཱ་ཧཱ། ཞེས་དང་། འབྱུང་པོ་ལྷག་མ་དབང་བའི་ཚོགས་རྣམས་ལ། །འདོད་ཡོན་ཚོགས་ཀྱི་ལྷག་མ་འདི་སྦྱིན་ན། །ཟག་མེད་བདེ་བ་མཆོག་གིས་ལུས་དང་སེམས། །ངོམས་ཤིང་ཚིམ་པའི་སྐལ་པ་ལྡན་གྱུར་ཅིག །ཅེས་པས་བསྔོས་ལ་ཕྱི་རོལ་དུ་
དོར། ཤིས་པ་བརྗོད་པ་དང་། སྨོན་ལམ་གྱིས་མཐའ་བསྡུས། འདི་ནི་རང་ཉིད་ཁོ་ན་ཙམ་གྱིས་བྱ་བའི་ཚུལ་ཡིན་ལ། ཚོགས་པ་མང་པོ་ཡོད་ན་བར་མཚམས་རྣམས་སུ་ཞུ་འབུལ་སོགས་གཞན་ནས་འབྱུང་བ་ལྟར་བྱའོ། །སྨྲས་པ། བསོད་ནམས་ཡེ་ཤེས་ཚོགས་གཉིས་རྫོགས་པ་དང་། །དམ་ཚིག་ཉམས་ཆགས་ཉེས་ལྟུང་ཀུན་བྱང་བའི། །ཐབས་ཚུལ་སྤྲིན་གྱི་གྲུ་ཆར་གཡོ་བ་འདིས། །ཕན་བདེའི་པདྨོ་རྟག་ཏུ་རྒྱས་གྱུར་ཅིག །ཞེས་པའང་སྒྲུབ་བརྩོན་དམ་པ་དགེ་སློང་འཇམ་དཔལ་བསྟན་འཛིན་གྱིས། རྗེ་བཙུན་རྡོ་རྗེ་རྣལ་འབྱོར་མའི་ཚོགས་ཀྱི་མཆོད་པ་བྱ་ཚུལ་ཚིགས་སུ་བཅད་པའི་དབྱངས་ཀྱིས་བསྡེབས་པ་རྒྱས་བསྡུས་འདི་ལྟ་བུ་ཞིག་སྦྱར་བར་འོས་སོ་ཞེས་ནན་ཏན་གྱིས་བསྐུལ་བའི་ངོ་མ་ལྡོག་པར། དམ་པ་སྔ་མ་རྣམས་ཀྱིས་མཛད་པ་དང་མཐུན་པར། དུས་གསུམ་སངས་རྒྱས་ཐམས་ཅད་ཀྱི་ངོ་བོ་མཁན་ཆེན་ཆོས་ཀྱི་རྒྱལ་པོ་བྱམས་པ་ཀུན་དགའ་བསྟན་འཛིན་སོགས་ཡོངས་འཛིན་དམ་པ་དུ་མའི་གསུང་གི་བདུད་རྩིས་རེག་པའི་རྨོངས་བརྟུལ་གྱི་ན་བ་གཞོན་ནུ་མཁྱེན་བརྩེའི་མིང་ཅན་གྱིས་དཔལ་ཨེ་ཝཾ་ཆོས་ལྡན་གྱི་བླ་བྲང་ཐར་པ་རྩེར་སྦྱར་བ་ལ། རང་བཟོའི་ནོངས་པའི་ཆ་ཤས་མཆིས་པ་ཐམས་ཅད་སྙིང་ནས་བཤགས་ཤིང་། དགེ་བས་འགྲོ་ཀུན་རྗེ་བཙུན་རྡོ་རྗེ་བཙུན་མོའི་གོ་འཕང་ཐོབ་པའི་རྒྱུར་གྱུར་ཅིག །སརྦ་དཱ་མངྒ་ལཾ།།
རྗེ་བཙུན་རྡོ་རྗེ་རྣལ་འབྱོར་མ་ལ་བསྟོད་ཅིང་གསོལ་བ་གདབ་པ་མཁའ་སྤྱོད་ཌཱཀྐི་དགྱེས་པའི་རོལ་མོ།
རྗེ་བཙུན་རྡོ་རྗེ་རྣལ་འབྱོར་མ་ལ་བསྟོད་ཅིང་གསོལ་བ་གདབ་པ་མཁའ་སྤྱོད་ཌཱཀྐི་དགྱེས་པའི་རོལ་མོ་ཅེས་བྱ་བ་བཞུགས་སོ། །ན་མོ་གུ་རུ་ཤུ་བྷེ་ད་བཛྲ་ཡོ་གི་ནྱ། རབ་དམར་རྣམ་ཐར་གསུམ་ལྡན་དཀྱིལ་འཁོར་དབུས། །རབ་སྒེག་པདྨ་བཻ་རོ་ཉི་མའི་སྟེང་། །རབ་མཛེས་བདེན་གཉིས་ཞལ་ཅན་རྣལ་འབྱོར་མ། །རབ་འབྱམས་རྒྱལ་བ་ཀུན་ཡུམ་བསྟོད་པར་བགྱི། །ཤིན་ཏུ་རྣམ་དག་རྣམ་ཀུན་མཆོག་ལྡན་ལས། །ཟུང་འཇུག་སྒྱུ་འཕྲུལ་དྲྭ་བའི་ཟློས་གར་ནི། །བཞིན་ལེགས་མཚན་དཔེའི་སྣང་ཆར་ཡོངས་ཤར་བའི། །ལོངས་སྤྱོད་ཡོངས་རྫོགས་འཁོར་ལོར་ཕྱག་འཚལ་བསྟོད། །ཐབས་མཆོག་ཧེ་རུ་ཀཿདཔལ་ལང་ཚོ་ལ། །ཤེས་རབ་དབྱིངས་ཀྱི་བཙུན་མོའི་སྒྱུ་མ་ཡིས། །ཨེ་ཝཾ་གཉིས་སུ་མེད་པར་ལེགས་འཁྱུད་པའི། །ཁ་སྦྱོར་རྡོ་རྗེའི་སྐུ་ལ་ཕྱག་འཚལ་བསྟོད། །གཟུང་འཛིན་སྲིད་པའི་འཕོ་ཆགས་རྒྱུ་དང་བཅས། །ཟག་བྲལ་དཔྱིད་ཀྱི་ཐིག་ལེར་འཆར་བ་ལས། །འབར་གཡོ་བརྟན་པའི་ཉམས་བརྒྱས་སྒེག་པ་པོ། །བདེ་ཆེན་ནཱ་དའི་གསུང་ལ་ཕྱག་འཚལ་བསྟོད། །རྡུལ་བྲལ་ཞི་བ་དམ་པའི་གྲོང་ཁྱེར་དུ། །རྣམ་མང་སྤྲོས་པའི་འཇུག་ལྡང་སིམ་གྱུར་པས། །གཉིས་སྣང་གློ་བུར་མཚན་མ་ལས་གྲོལ་བའི། །རང་བཞིན་མེད་པའི་ཐུགས་ལ་ཕྱག་འཚལ་བསྟོད། །གཞན་ཕྱིར་བརྩེ་བའི་བརླན་གྱིས་དྲངས་པ་ཡིས། །ཁྱོད་ཞབས་ནོར་བུའི་ཆུ་གཏེར་ལ་རེག་
པས། །གྲུབ་གཉིས་འདོད་དགུ་ལྷུག་པར་འཇོ་བའི་ཕྱིར། །ཡོན་ཏན་སྙིང་རྗེས་ཡོངས་གང་ཕྱག་འཚལ་བསྟོད། །བརྟན་གཡོ་ཀུན་ལ་ཁྱབ་པའི་བདག་ཉིད་ནི། །མཐའ་ཀླས་ཡིད་ཅན་ཁམས་དབང་བསམ་པ་དང་། །རྗེས་སུ་མཐུན་པར་སྣ་ཚོགས་གཟུགས་འཆང་བའི། །ཕྲིན་ལས་རྒྱུན་མི་ཆད་ལ་ཕྱག་འཚལ་བསྟོད། །མཆོག་ཏུ་མི་འགྱུར་ཆོས་དབྱིངས་སྙིང་པོ་ལས། །ཐབས་མཁས་ཡེ་ཤེས་སྐུ་ཡི་རོལ་མོ་ཡིས། །སྲིད་དང་ཞི་བའི་ཕ་མཐར་མི་གནས་པའི། །རྣམ་འཕྲུལ་འགོགས་པ་མེད་ལ་ཕྱག་འཚལ་བསྟོད། །དེ་ལྟར་བསྟོད་ཅིང་གསོལ་བ་བཏབ་པའི་མཐུས། །གནས་སྐབས་ལམ་མཆོག་སྒྲུབ་པའི་འགལ་རྐྱེན་གེགས། །མཐའ་དག་སྤངས་ཤིང་མཐུན་རྐྱེན་ཕུན་ཚོགས་པས། །རྣལ་འབྱོར་གསང་མཐའི་བདུད་རྩིས་སྨིན་པར་ཤོག །ཁྱད་པར་ཕྱི་སྣོད་ཐར་པ་ཆེན་པོའི་གྲོང་། །ནང་བཅུད་འགྲོ་ཀུན་རྗེ་བཙུན་ཌཱ་ཀིའི་སྐུར། །ཡོངས་ཤར་ཐ་མལ་སྣང་ཞེན་ཀུན་བཅོམ་པས། །བུམ་དབང་གྲུབ་མཐའ་རྙོགས་པར་བྱིན་གྱིས་རློབས། །ཤེས་རབ་རྡོ་རྗེ་རྣལ་འབྱོར་གཏུམ་མོའི་མེས། །ཐབས་མཆོག་བདེ་ཆེན་དམ་ཚིག་བསྲེགས་བཞུའི་ཕུལ། །ཟུང་འཇུག་དྷུ་ཏིའི་དབྱིངས་སུ་ཐིམ་པ་ལས། །གསང་དབང་གྲུབ་མཐའ་རྙོགས་པར་བྱིན་གྱིས་རློབས། །དངོས་ཡིད་ཕྱག་རྒྱ་མཛེས་མའི་སྙོམས་འཇུག་གིས། །ཆར་ཡང་ཨེ་ཝཾ་མཱ་ཡར་དྲངས་པའི་མོད། །ཞུ་བདེ་མི་
རྟོགས་དགའ་བཞིའི་ཏིང་འཛིན་རོས། །ཤེར་དབང་གྲུབ་མཐའ་རྙོགས་པར་བྱིན་གྱིས་རློབས། །ལྷན་སྐྱེས་བདེ་སྟོང་འབར་བའི་སྣང་བ་ཆེས། །མཁའ་ཁྱབ་མཁའ་ཡི་རྡོ་རྗེ་བཙུན་མོའི་ཞལ། །དུས་གསུམ་འདུ་འབྲལ་མེད་པར་མཇལ་བ་ཡིས། །ཚིག་དབང་གྲུབ་མཐའ་རྙོགས་པར་བྱིན་གྱིས་རློབས། །གལ་ཏེ་དུས་འདིར་གྲུབ་མཐའ་མ་རྙོགས་ན། །ནམ་ཞིག་འཕོས་ཚེ་དཔའ་བོ་རྣལ་འབྱོར་མས། །ཡིད་འོང་མཆོད་པའི་སྤྲིན་གྱིས་མདུན་བདར་ཏེ། །དག་པའི་ཞིང་དུ་འཁྲིད་པར་བྱིན་གྱིས་རློབས། །མཐར་ཐུག་གནས་དང་ཡུལ་གྱི་རླུང་སེམས་ཀུན། །འོད་གསལ་ཨ་བ་དྷུ་ཏིར་ཕྱག་བྱས་པས། །སྐུ་གསུམ་དབྱེར་མེད་བཛྲ་ཝཱ་ར་ཧཱིའི། །གོ་འཕང་མཆོག་ལ་འགྲོ་ཀུན་འདྲེན་གྱུར་ཅིག །དེ་ལྟར་ཨོཎྜི་ཡཱ་ནའི་ས་སྤྱོད་དབང་པོའི་བློས་ལེགས་པར་བཀྲལ་བའི་རྗེ་བཙུན་རྡོ་རྗེ་རྣལ་འབྱོར་མ་ལ་བསྟོད་ཅིང་གསོལ་བ་གདབ་པ་མཁའ་སྤྱོད་ཌཱ་ཀི་དགྱེས་པའི་རོལ་མོ་ཞེས་བྱ་བ་འདི་ཡང་གཙུག་ལག་དུ་མར་གཟིགས་པའི་སྤྱན་ཡངས་བླ་མ་དམ་པ་ཝཱ་གིནྡྲ་སུ་སིདྡྷིའི་བཀས་བསྐུལ་བ་ལས། ཀུན་རྨོངས་དཱ་རི་དྲ་པ་ཚངས་སྲས་དགྱེས་པའི་བློ་ལྡན་དུ་བོད་པས་ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ཨེ་ཝཾ་ཆོས་ལྡན་གྱི་བླ་བྲང་ཐར་པ་རྩེར་སྦྱར་བ་ཛ་ཡནྟ།།
རྗེ་བཙུན་རྡོ་རྗེ་རྣལ་འབྱོར་མའི་ཚོགས་ཀྱི་མཆོད་པའི་རྡོ་རྗེའི་གླུ་བདེ་ཆེན་རྟག་པ་དམ་པའི་སྤྲིན་གྱི་རོལ་མོ།
རྗེ་བཙུན་རྡོ་རྗེ་རྣལ་འབྱོར་མའི་ཚོགས་ཀྱི་མཆོད་པའི་རྡོ་རྗེའི་གླུ་བདེ་ཆེན་རྟག་པ་དམ་པའི་སྤྲིན་གྱི་རོལ་མོ་ཞེས་བྱ་བ། །འོད་གསལ་རྣམ་ཀུན་མཆོག་ལྡན་ཡེ་ཤེས་ཀྱི་རོལ་མོ། །ཟུང་འཇུག་དྭངས་མའི་གཟུགས་སྐུར་མངོན་སུམ་དུ་ཤར་བ། །དྲན་པས་སྙིང་གི་གདུང་སེལ་དཔལ་ལྡན་གྱི་བླ་མས། །བདེ་སྟོང་ཡེ་ཤེས་སྐྱེ་བར་བྱིན་གྱིས་རང་རློབས་ཤིག །ཨེ་དབྱིངས་ཤིན་ཏུ་རྣམ་དག་སྤྲོས་བྲལ་གྱི་གནས་ལུགས། །ཝཾ་ཡིག་བཅུ་དྲུག་དགའ་བའི་མཚན་དཔེ་རུ་བཞེངས་པའི། །ལྷན་སྐྱེས་མཁའ་ལ་སྤྱོད་པ་རྣལ་འབྱོར་ཀྱི་དབང་མོས། །རླུང་སེམས་དབུ་མར་ཐིམ་པའི་དངོས་གྲུབ་ཞིག་སྩོལ་དང་། །ཡུལ་ཆེན་ཉི་ཤུ་རྩ་བཞིར་རང་བཞིན་གྱིས་སྣང་བའི། །ཐབས་ཤེས་ཕྱག་རྒྱའི་གཟུགས་འཆང་དཔའ་བོ་དང་མཁའ་འགྲོས། །ཞིང་སྐྱེས་ཕོ་ཉའི་ཚོགས་ཀྱི་འདུ་བ་ལ་བརྟེན་ནས། །བདེ་ཆེན་ཉམས་བརྒྱས་སྒེག་བའི་སྐལ་བཟང་ལ་སྦྱོར་ཞིག །སྟོང་ཉིད་མཁའ་ལ་བྲིས་པའི་ཏིང་འཛིན་གྱི་ཉམས་འགྱུར། །ངོ་མཚར་དབང་པོའི་གཞུ་བཞིན་སྣ་ཚོགས་སུ་འཆར་བའི། །སྔགས་སྐྱེས་རྡོ་རྗེ་བཙུན་མོའི་བསམ་གཏན་གྱི་དགའ་མ། །ཅིར་སྣང་བདེ་ཆེན་འདྲེན་པའི་སྐྱོ་གྲོགས་ལ་ཕེབས་དང་། །རྨད་བྱུང་རྡོ་རྗེ་ཐེག་པའི་ལམ་བཟང་གི་མཐར་ཐུག །རྣལ་འབྱོར་གསང་མཐའི་བདུད་རྩིའི་དགའ་སྟོན་ལ་སྤྱོད་པས། །བརྟན་གཡོའི་ཚུལ་དུ་ཤར་བའི་ཐ་མལ་གྱི་དངོས་ཀུན། །ཧེ་རུ་ཀ་དཔལ་འགྲུབ་པའི་སྨོན་ལམ་ཞིག་ཞུའོ། །ཞེས་པའང་འཇམ་མགོན་བླ་མ་རིན་པོ་
ཆེ་ངག་གི་དབང་ཕྱུག་བྱམས་པ་ཕུན་ཚོགས་དཔལ་བཟང་པོས་འདི་ལྟར་བྲིས་ཞེས་རྡོ་རྗེའི་བཀའ་སྩལ་སྤྱི་བོར་མཆོད་དེ། བྱ་བྲལ་བ་ཀུན་ཏུ་རྒྱུ་མཉྫགྷོ་ཥས་གསོལ་བ་བཏབ་པ་སིདྡྷི་རསྟུ།།
ཚོགས་ཀྱི་འཁོར་ལོ་ཚིམ་པ་དྲག་ལྡན་གྱི་སྨོན་ལམ་དཔའ་བོ་དང་ཌ་ཀི་དགྱེས་པའི་གླུ་གར།
ཚོགས་ཀྱི་འཁོར་ལོ་ཚིམ་པ་དྲག་ལྡན་གྱི་སྨོན་ལམ་དཔའ་བོ་དང་ཌ་ཀི་དགྱེས་པའི་གླུ་གར་ཅེས་བྱ་བ་བཞུགས་སོ། །ཏིང་ངེ་འཛིན་གྱིས་སྤྲུལ་པའི་དཀྱིལ་འཁོར་ལྷ། །ཕྱི་ནང་མཆོད་པའི་སྤྲིན་གྱི་ཕུང་པོ་ཡིས། །ཟག་མེད་བདེ་ཆེན་ངང་དུ་ཚིམ་པའི་མཐུས། །བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག །སྙིང་དབུས་པདྨའི་གེ་སར་བཞད་པའི་རྩེར། །རང་སེམས་བླ་མ་ཡི་དམ་དབྱེར་མེད་པ། །ཡེ་ཤེས་བདུད་རྩིས་ཚིམ་པའི་བྱིན་རླབས་ཀྱིས། །གཉིས་འཛིན་འཁྲུལ་པའི་ཀུན་རྟོག་འཆིང་གྱུར་ཅིག །ཆོས་སྐྱོང་འབྱུང་པོའི་ཚོགས་རྣམས་ཇི་སྙེད་པ། །རྣམ་མང་འདོད་ཡོན་རྒྱ་མཚོར་འཁྱིལ་བའི་དཔྱིད། །བཟའ་བཅའ་བཏུང་བའི་གཏོར་མས་ཚིམ་པ་ལས། །བར་ཆད་ཀུན་སེལ་ཕྲིན་ལས་འགྲུབ་པར་ཤོག །སྨིན་བྱེད་དབང་ཐོབ་སྡོམ་གསུམ་ལ་གནས་པའི། །རྣལ་འབྱོར་པ་རྣམས་ཁྱད་པར་བཟའ་བ་ཡི། །དམ་ཚིག་ཚོགས་ཀྱི་འཁོར་ལོས་ཚིམ་པ་དང་། །ཏིང་འཛིན་ཟས་ལ་རྟག་ཏུ་སྤྱོད་གྱུར་ཅིག །སྐྱེ་མཆེད་ལུས་དཀྱིལ་ལྷ། ལྷ་རྣམས་རྡོ་རྗེའི་གླུ་གར་དང་། །བདེ་སྟོང་རོལ་མོའི་སྒྲ་ཡིས་ཉེར་ཚིམ་ནས། །གང་ཤར་སྣང་བ་ལྷ་དང་ཡེ་ཤེས་ཀྱི། །དག་པའི་
སྣང་བ་གཅིག་ཏུ་འཆར་བར་ཤོག །དངོས་ཀུན་བདེ་ཆེན་ལྷན་ཅིག་སྐྱེས་པ་ཡི། །ཡེ་ཤེས་མཆོག་གིས་རྟག་ཏུ་ཚིམ་པ་ལས། །འཁོར་འདས་དབྱེར་མི་ཕྱེད་པའི་ཐིག་ལེ་རུ། །ཕྱག་རྒྱ་ཆེན་པོའི་དངོས་གྲུབ་བརྙེས་གྱུར་ཅིག །མདོར་ན་ཕྱི་ནང་དཀྱིལ་འཁོར་འཁོར་ལོ་ཀུན། །ཟག་མེད་ཚོགས་ཀྱི་འདུ་བས་མཉེས་པའི་མཐུས། །འཇིག་རྟེན་འཇིག་རྟེན་འདས་པའི་དགེ་ལེགས་ཀྱི། །བཀྲ་ཤིས་སྣང་བས་ས་གསུམ་ཁྱབ་པར་ཤོག །ཞེས་པའང་གཞོན་ནུ་མཁྱེན་བརྩེའི་མིང་ཅན་གྱིས་བློ་མཚོ་ལས་བྱུང་བའོ།།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བཀྲ་ཤིས་དགེ་ལེགས་མཆོག་སྦྱིན།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བཀྲ་ཤིས་དགེ་ལེགས་མཆོག་སྦྱིན་ཅེས་བྱ་བ་བཞུགས་སོ། །རྡོ་རྗེ་འཆང་ཆེན་ཁ་སྦྱོར་བདུན་གྱི་གོ་འཕང་བརྙེས། །རྣལ་འབྱོར་མ་དཔལ་ཤེས་རབ་ཟག་མེད་བདེ་བས་མྱོས། །ནཱ་རོ་ཏ་པ་པཎ་གྲུབ་རྒྱ་མཚོའི་གཙུག་གི་ནོར། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཕམ་མཐིང་སྐུ་མཆེད་འཁོར་ལོ་སྡོམ་པའི་སྔགས་རིག་གྲུབ། །ཤེས་རབ་བརྩེགས་ནི་སྐད་གཉིས་སྨྲ་བའི་ཕ་རོལ་སོན། །བློ་གྲོས་གྲགས་པ་བར་དོར་མཆོག་གི་དངོས་གྲུབ་བརྙེས། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཀུན་དགའ་སྙིང་པོ་པད་དཀར་འཆང་བ་མི་ཡི་ཟོལ། །བསོད་ནམས་རྩེ་མོ་མཁའ་སྤྱོད་གྲོང་དུ་ཡུད་ཀྱིས་གཤེགས། །གྲགས་པ་རྒྱལ་མཚན་གསང་སྔགས་རྒྱ་མཚོའི་
མཛོད་དུ་གྱུར། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ས་སྐྱ་པཎ་ཆེན་འཛམ་གླིང་འདི་ན་མཁས་པའི་ཕུལ། །འཕགས་པའི་མཚན་ཅན་ཁམས་གསུམ་འགྲོ་བའི་བླ་མར་གྱུར། །ཞང་སྟོན་ཆོས་རྗེ་ཟབ་རྒྱས་གདམས་པའི་དཔལ་ལ་རོལ། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །པུཎྱ་ཤི་རྩེ་གཅིག་སྒྲུབ་པའི་སྲོག་ཤིང་འཛིན། །བསོད་ནམས་རྒྱལ་མཚན་ཐམས་ཅད་མཁྱེན་པར་ཡོངས་སུ་གྲགས། །སེང་གེའི་མཚན་ཅན་སྙན་བརྒྱུད་རྒྱ་མཚོའི་བཀའ་བབས་ཆེ། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །རྒྱལ་བ་མཆོག་དབྱངས་ལུང་རྟོགས་ཡོན་ཏན་དཔལ་གྱིས་ཕྱུག །ནམ་མཁའི་མཚན་ཅན་མཁྱེན་རབ་མཐུ་སྟོབས་ཕ་མཐའ་ཡས། །བློ་གྲོས་རྒྱལ་མཚན་བརྩེ་བ་ཆེན་པོའི་རྣམ་འཕྲུལ་དངོས། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །རྡོ་རིང་པ་ནི་གྲུབ་རིག་བྱེ་བའི་གཙུག་ན་མཛེས། །ཚར་པ་ཆོས་རྗེ་རྩོད་པའི་དུས་ཀྱི་རྡོ་རྗེ་འཆང་། །མཁྱེན་བརྩེའི་དབང་ཕྱུག་འཇམ་དབྱངས་ངུར་སྨྲིག་བླ་གོས་ཅན། །བདེན་པ་དེས་ཀྱང་བདེ་མཆོག །བསླབ་གསུམ་རྒྱལ་མཚན་སྙན་བརྒྱུད་བསྟན་པའི་སྲོག་ཤིང་ཆེ། །དབང་ཕྱུག་རབ་བརྟན་རྡོ་རྗེ་འཛིན་པའི་འཁོར་ལོས་སྒྱུར། །བསོད་ནམས་མཆོག་ལྡན་ཟབ་རྒྱས་ཆོས་ཀྱི་མཛོད་གཅིག་པུ། །བདེན་པ་དེས་ཀྱང་བདེ་མཆོག༴ །བསོད་
ནམས་མཆོག་གྲུབ་རྒྱུད་སྡེ་རྒྱ་མཚོའི་ཕ་མཐར་སོན། །མཁྱེན་རབ་བྱམས་པ་གྲུབ་གཉིས་དཔལ་ལ་བདག་གིར་སྤྱོད། །ཀུན་དགའ་ལྷུན་གྲུབ་སྙིགས་དུས་བསྟན་པའི་གསལ་བྱེད་ཆེ། །བདེན་པ་དེས་ཀྱང་བདེ་མཆོག །གནས་གསར་ཆོས་རྗེ་སྨྲ་བའི་སེང་གེར་ཡོངས་སུ་གྲགས། །ཀུན་དགའ་བློ་གྲོས་མཁས་དང་གྲུབ་པའི་ཕ་རོལ་སོན། །ནམ་མཁའ་འཆི་མེད་ཡོངས་རྫོགས་བསྟན་པ་རྒྱ་མཚོའི་བདག །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །བསྟན་པའི་ཉི་མ་རྡོ་རྗེ་བཙུན་མོ་མི་ཡི་ཟོལ། །ངག་གི་དབང་པོ་ཟབ་རྒྱས་སྙན་བརྒྱུད་རྒྱ་མཚོའི་བདག །ཀུན་དགའི་མཚན་ཅན་སྲས་བཅས་རྒྱལ་བའི་ཡེ་ཤེས་སྐུ། །བདེན་པ་དེས་ཀྱང་བདེ་མཆོག །རྩ་བའི་བླ་མ་རིགས་ཀུན་བདག་པོའི་རྣམ་རོལ་གྱིས། །དྲན་པ་ཙམ་གྱིས་མཁའ་སྤྱོད་དངོས་གྲུབ་སྟེར་བ་ལ། །རྣལ་འབྱོར་མ་དང་གཉིས་སུ་མེད་པར་ངེས་རྙེད་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཆོས་སྐུའི་ངང་ལས་ལྷན་སྐྱེས་ལོངས་སྤྱོད་རྫོགས་སྐུའི་གཟུགས། །ཞིང་སྐྱེས་སྤྲུལ་པས་འགྲོ་བ་འདུལ་བའི་རྣམ་རོལ་ཅན། །སྔགས་སྐྱེས་མཁའ་སྤྱོད་དགའ་མའི་མཚན་བཟང་བསྒོམས་པ་ཡི། །བདེན་པ་དེས་ཀྱང་བདེ་མཆོག །གྲུབ་བརྙེས་རྣལ་འབྱོར་དབང་ཕྱུག་བྱེ་བ་གཤེགས་པའི་ཤུལ། །ཧེ་རུ་ཀདཔལ་ཉུང་ངུའི་རྒྱུད་ཀྱི་སྙིང་པོའི་ཕུལ། །
བཀླགས་པ་ཙམ་གྱིས་གྲུབ་པའི་གསང་སྔགས་རབ་བཟླས་པའི། །བདེན་པ་དེས་ཀྱང་བདེ་མཆོག །ཁ་སྦྱོར་ཚོགས་གཉིས་རླུང་སེམས་དབུ་མར་འཆིང་བ་དང་། །བདེ་ཆེན་འབར་དང་འཛག་པའི་ཟློས་གར་ཅི་ཡང་རྩེན། །གསལ་སྟོང་བརྗོད་བྲལ་གཉུག་མའི་ངང་དུ་མཉམ་བཞག་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཐབས་ཤེས་ཕྱོགས་ཀྱི་ཊཱ་ཀི་འདུ་བའི་དུས་བཟང་པོར། །རྣལ་འབྱོར་སྤྱི མ་དཔལ་དཀྱིལ་འཁོར་སྒྲུབ་ཅིང་མཆོད་པ་དང་། །ཟག་མེད་བདུད་རྩི་ཚོགས་ཀྱི་འདུ་བས་མཉེས་བྱས་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །གནས་སྐབས་རྣམ་བཞིའི་ཕྲིན་ལས་ཀུན་ལ་དབང་འབྱོར་ཞིང་། །འཆི་ཚེ་མཁའ་སྤྱོད་གྲུབ་པའི་གྲོང་དུ་རོལ་པ་ལས། །མཐར་ཐུག་རྩ་རླུང་ཐིག་ལེ་ཨེ་ཝཾ་དབྱིངས་ཐིམ་ནས། །སྐུ་གསུམ་དབྱེར་མེད་གོ་འཕང་བརྙེས་པའི་བཀྲ་ཤིས་ཤོག །ཅེས་པའང་གཞོན་ནུ་མཁྱེན་བརྩེའི་མིང་ཅན་གྱི་བློ་མཚོ་ལས་བྱུང་བ་མངྒལཾ།།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བརྒྱུད་པའི་བླ་མ་ལ་ཕྱག་འཚལ་ཞིང་གསོལ་བ་འདེབས་པའི་ཚིགས་སུ་བཅད་པ།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བརྒྱུད་པའི་བླ་མ་ལ་ཕྱག་འཚལ་ཞིང་གསོལ་བ་འདེབས་པའི་ཚིགས་སུ་བཅད་པ་བཞུགས་སོ། །གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །གང་གིས་སྐྱེ་དང་འཇིག་པ་དག །རིང་དུ་ཡོངས་སུ་སྤངས་
གྱུར་པ། །སེམས་ཅན་ཀུན་ལ་ཐམས་ཅད་དུ། །ཕན་དགོངས་ཁྱོད་ལ་ཕྱག་འཚལ་ལོ། །རྒྱུད་རྣམས་ཀུན་གྱི་དོན་འཛིན་ཅིང་། །སེམས་ཅན་ཀུན་ལ་ཕན་བརྩོན་པའི། །ཀུན་མཆོག་རྡོ་རྗེ་འཆང་དབང་ལ། ། རྟག་ཏུ་ཕྱག་འཚལ་གསོལ་བ་འདེབས། །རྫོགས་སངས་རྒྱས་ལས་མངོན་སུམ་དུ། །ཁྱོད་ཀྱིས་ཆོས་རྣམས་ཐུགས་ཆུད་ཅིང་། །མདའ་འཛིན་སྤྱོད་པ་མཛད་པ་ལས། །རྟག་ཏུ་ཐུབ་པས་ལུང་བསྟན་ཅིང་། ། ཆོས་རྣམས་དོན་སྟོན་ཀླུ་སྒྲུབ་མཆོག །བདེ་བ་ཅན་དུ་གཤེགས་པ་ལ། །རྟག་ཏུ་ཕྱག་འཚལ་གསོལ་བ་འདེབས། །ཉིད་ཀྱི་དེ་ཉིད་མཆོག་བརྙེས་ནས། །དམན་མོས་སེམས་ཅན་དོན་གྱི་ཕྱིར། །རྔོན་པའི་ཆ་ལུགས་འཛིན་པ་ལ། །རྟག་ཏུ་ཕྱག་འཚལ་གསོལ་བ་འདེབས། །ཡི་གེའི་སྦྱོར་བ་སྤངས་ནས་སུ། །བརྩོན་པས་ཉ་རྒྱུ་གསོལ་མཛད་དེ། །བརྩེ་བས་གཞན་དོན་མཛད་པ་ལ། །རྟག་ཏུ༴ །རྒྱལ་པོའི་བྱ་བ་རབ་སྤངས་ནས། །སྤྲུལ་ཚོང་རྗེས་སུ་བསྒྲུབ་མཛད་དེ། །ཀཉྩའི་གྲོང་དུ་གྲུབ་པ་ལ། །རྟག་ཏུ༴ །ཡེ་ཤེས་མཁའ་འགྲོས་རྗེས་གནང་ཞིང་། །གཞན་དོན་སྤྱོད་པ་མངོན་སུམ་མཛད། །རྡོ་རྗེ་དྲིལ་བུ་འཛིན་པ་ལ། །རྟག་ཏུ༴ །དམ་པའི་དེ་ཉིད་དོན་རྟོགས་ཏེ། །བརྩེ་བས་རུ་སྦལ་ཞབས་ལྡན་པ། །སེམས་ཅན་སྨིན་པར་མཛད་པ་ལ། །རྟག་ཏུ༴ །ཁྱོད་ནི་བརྩེ་བས་གྲུབ་བརྙེས་ཏེ། །འབར་བས་འབར་བའི་སྤྱོད་པ་འཛིན། །
ཀུན་ལས་ཕན་པར་མཛད་པ་ལ། །རྟག་ཏུ༴ །ནུས་པ་ལ་ནི་མངའ་མཉེས་ཤིང་། །སྤྱོད་པ་ཀུན་གྱི་རྨད་བྱུང་བ། །འཇིག་རྟེན་འདྲེན་པ་མཛད་པ་ལ། །རྟག་ཏུ་ཕྱག་འཚལ་གསོལ་བ་འདེབས། །རྣལ་འབྱོར་དབང་ཕྱུག་གུ་བྱ་བ། །བརྩེ་བས་ལོག་འདྲེན་རྣལ་འབྱོར་མ། །བཏུལ་ནས་འགྲོ་བ་སྐྱོང་བ་ལ། །རྟག་ཏུ༴ །མི་མཐུན་ཕྱོགས་རྣམས་རབ་སྤངས་ཏེ། །དཀར་པོ་རྣམ་པར་འཕེལ་མཛད་པ། །རྣམ་པར་རྒྱལ་བའི་ཞབས་པད་ལ། །རྟག་ཏུ་ཕྱག་འཚལ་གསོལ་བ་འདེབས། །གྲུབ་ནས་གྲུབ་པའི་ལམ་སྟོན་ཅིང་། །གྲོལ་ནས་རྣམ་པར་ཕན་མཛད་པ། །བར་མའི་སློབ་དཔོན་དམ་པ་ལ། །རྟག་ཏུཌ །ཏིལ་རྡུང་པས་ནི་རབ་གྲུབ་པ། །སྐལ་ལྡན་གཞན་ལ་བརྩེ་བ་ཅན། །མུ་སྟེགས་རྣམ་པར་སུན་འབྱིན་ཅིང་། །རྟག་ཏུ །བྲམ་ཟེ་ལས་ནི་རབ་བྱུང་ཞིང་། །གནས་ལྔ་ལ་ནི་རབ་སྦྱངས་པས། །དཀའ་བས་དམ་པ་བསྟེན་པ་ལ། །རྟག་ཏུ༴ །ཤེས་བྱ་ལ་ནི་རབ་སྦྱངས་ཤིང་། །ནུས་པ་ཀུན་ལས་ཐོགས་མེད་ལྡན། །ཕ་ན་ཕིང་གུར་གྲགས་པ་ལ། །རྟག་ཏུ །སྐད་གཉིས་སྨྲ་བའི་མཆོག་གྱུར་ཅིང་། །ཤེས་རབ་ལྡན་པས་ཕན་མཛད་པ། །བརྩེགས་པའི་མཐའ་དང་ལྡན་པ་ལ། །རྟག་ཏུཎ །བརྩོན་པས་དཀའ་བ་ཆེར་མཛད་དེ། །རྒྱུད་ཀུན་འཛིན་མཛད་སྐད་གཉིས་སྨྲ། །རྗེ་བཙུན་བློ་གྲོས་གྲགས་པ་ལ། །རྟག་ཏུ༴ །འཇམ་པའི་དབྱངས་ཀྱིས་མངོན་སུམ་དུ། །
ཁྱོད་ལ་བྱིན་གྱིས་བརླབས་པ་ཡིས། །ཤེས་བྱ་ཀུན་ལ་ཐོགས་མེད་ལྡན། །རྒྱུད་རྣམས་ཀུན་གྱི་བདག་པོར་གྱུར། །ཀུན་དགའ་སྙིང་པོར་གྲགས་པ་ཡི། །དཔལ་ལྡན་ས་སྐྱར་བཞུགས་གྱུར་ཅིང་། །བདེ་བ་ཅན་དུ་གཤེགས་པ་ལ། །རྟག་ཏུ །གང་གི་སྲས་ཀྱི་ཐུ་བོ་པ། །འཇམ་པའི་དབྱངས་ཀྱིས་བྱིན་རླབས་པས། །གནས་ལྔ་ལ་ནི་རབ་མཁས་ཤིང་། །བསོད་ནམས་ཡེ་ཤེས་རྩེར་གྱུར་པ། །ཉིད་ཀྱིས་གཞན་དོན་རྫོགས་མཛད་ནས། །འཇིག་རྟེན་རྣམས་ནི་གཞུག་པའི་ཕྱིར། །བདེ་བ་ཅན་དུ་མངོན་སུམ་གཤེགས། །རྟག་ཏུ་ཕྱག་འཚལ་གསོལ་བ་འདེབས། །ཁྱོད་ཀྱི་ཐུགས་ནི་འཇམ་དབྱངས་ལྟར། །ཤེས་བྱ་ཀུན་ལ་མ་རྨོངས་ཤིང་། །འཇིག་རྟེན་ཀུན་ལ་རྩ་ལག་ལྟར། །དགོངས་པ་ཁྱོད་ཀྱི་གྲགས་པ་ཡི། །རྒྱལ་མཚན་དྲི་མ་མེད་པ་ཐོབ། །ངོ་མཚར་དུ་མའི་སྤྱོད་པ་འཛིན། །ཀུན་ནས་ཡོན་ཏན་ལྡན་ཁྱོད་ལ། །རྟག་ཏུ ། བརྩེ་བས་སེམས་ཅན་ཐམས་ཅད་ལ། །དཔལ་འབྱོར་ཆེན་པོའི་འོད་ཟེར་གྱིས། །རྟག་ཏུ་སྐྱོང་བར་མཛད་ཁྱོད་ལ། །རྟག་ཏུ་ཕྱག་འཚལ་གསོལ་བ༴ །འཇམ་པའི་དབྱངས་ཉིད་ངུར་སྨྲིག་གི །ཆོས་གོས་འཛིན་པར་ལེགས་སྤྲུལ་པའི། །ས་སྐྱ་པཎ་ཆེན་ཞབས་པད་ལ། །རྟག་ཏུ༴ །འཁོར་ལོས་སྒྱུར་བའི་དཔལ་འབྱོར་དག །མཁས་ཤིང་གྲུབ་པའི་བློ་གྲོས་ཅན། །ཆོས་ཀྱི་རྒྱལ་པོ་འཕགས་པ་ལ། །རྟག་ཏུ༴ །སྦྱངས་
པའི་ཡོན་ཏན་ལྷུར་མཛད་པས། །རིམ་པ་གཉིས་ལ་ཐུགས་བརྟེན་པ། །ཞང་སྟོན་དཀོན་མཆོག་དཔལ་བ་ལ། །རྟག་ཏུ༴ །བླ་མའི་ཞབས་ཏོག་དཀའ་བ་སྤྱད། །རྩེ་གཅིག་སྒྲུབ་པའི་རྒྱལ་མཚན་འཛིན། །གྲུབ་ཆེན་བསོད་ནམས་དཔལ་བ་ལ། །རྟག་ཏུ༴ །འཇམ་པའི་དབྱངས་ཀྱིས་རྗེས་བཟུང་སྟེ། །འཆད་རྩོད་རྩོམ་པའི་ཁྲིར་འཁོད་པའི། །འགྲོ་མགོན་བསོད་ནམས་རྒྱལ་མཚན་ལ། །རྟག་ཏུ་ཕྱག་འཚལ་གསོལ་བ་འདེབས། །སྙན་བརྒྱུད་གདམས་པའི་དཔལ་ལྡན་ཞིང་། །རྣམ་དག་ཚུལ་ཁྲིམས་གོས་བཟང་ཅན། །རྒྱལ་སྲས་རྡོ་རྗེ་འཛིན་པ་ལ། །རྟག་ཏུ་།གཉིས་མེད་ཡེ་ཤེས་ལེགས་གཟིགས་ཤིང་། །གཞན་ཕན་ལྷག་བསམ་ཆེར་བསྐྱེད་པའི། །ཆོས་རྗེ་ཡེ་ཤེས་རྒྱལ་མཚན་ལ། །རྟག་ཏུ །ཨེ་ཝཾ་རྡོ་རྗེའི་གནས་མཆོག་ཏུ། །ཟུང་འཇུག་ཆོས་ཀྱི་སྐུ་བརྙེས་པ། །ཀུན་བཟང་རྡོ་རྗེ་འཆང་ཆེན་ལ། །རྟག་ཏུ༴ །གཅིག་ཏུ་བསྒྲུབ་ལ་བརྩོན་མཛད་ཅིང་། །རྡོ་རྗེའི་རྣལ་འབྱོར་མཐར་ཕྱིན་པའི། །མུས་ཆེན་འཁོར་ལོ་སྡོམ་པ་ལ། །རྟག་ཏུ༴ །བསོད་ནམས་གངས་རིའི་སྤོར་གནས་ཤིང་། །ལུང་དང་རིག་པའི་མཆེ་སྡེར་ཅན། །ཀུན་མཁྱེན་སྨྲ་བའི་སེང་གེ་ལ། །རྟག་ཏུ༴ །རིག་པའི་གནས་ཀུན་རབ་སྦྱངས་ཏེ། །གྲུབ་པའི་ས་བརྙེས་ཆོས་ཀྱི་རྗེ། །གྲགས་པའི་རྒྱལ་མཚན་འཛིན་པ་ལ། །རྟག་ཏུ༴ །དཀོན་མཆོག་གསུམ་དང་དབྱེར་མེད་ཅིང་། །
ལྷག་པའི་ལྷ་ཡི་ངོ་བོ་ཉིད། །ངེས་དོན་གདམས་པ་འཕེལ་མཛད་ལ། །རྟག་ཏུ༴ །མཁྱེན་པས་ཤེས་བྱའི་དེ་ཉིད་གཟིགས། །བརྩེ་དང་ནུས་པ་རྨད་བྱུང་བ། །རྗེ་བཙུན་ལེགས་པའི་འབྱུང་གནས་ལ། །རྟག་ཏུ༴ །སངས་རྒྱས་ཀུན་གྱི་ངོ་བོ་ཉིད། །དམ་ཆོས་རིན་ཆེན་ཀུན་གྱི་གཏེར། །དགེ་འདུན་འདུས་པའི་གཙུག་རྒྱན་ལ། །རིག་པའི་གནས་ལྔ་ལ་སྦྱངས་ཤིང་། །གྲུབ་པའི་བྱིན་རླབས་བཀའ་བབ་པ། །འཇམ་དབྱངས་ཀུན་དགའ་བསོད་ནམས་ལ། །རྟག་ཏུ་ཕྱག་འཚལ་གསོལ་བ་འདེབས། །ཤེས་བྱ་ཐམས་ཅད་མངོན་སུམ་དུ། །གཟིགས་ནས་གཞན་ལ་འདོམས་མཁས་པ། །རྗེ་བཙུན་དཀོན་མཆོག་ལྷུན་གྲུབ་ལ། །རྟག་ཏུཌ༴ །ཕྱི་ནང་རིག་གཞུང་རྒྱ་མཚོ་གཟིགས། །གྲུབ་པའི་གོ་འཕང་མཆོག་བརྙེས་པ། །པཎ་ཆེན་ནམ་མཁའ་དཔལ་བཟང་ལ། །རྟག་ཏུ་ཕྱགཟ །འཇམ་དཔལ་གཞོན་ནུར་གྱུར་པ་ཉིད། །ངུར་སྨྲིག་འཛིན་པའི་རྣམ་རོལ་ཅན། །ཀུན་དགའ་བསོད་ནམས་ལྷུན་གྲུབ་ལ། །རྟག་ཏུ༴ །གསན་བསམ་སྒོམ་པའི་མཐར་སོན་ནས། །འཆད་རྩོད་རྩོམ་པས་གཞན་དོན་མཛད། །མཁས་གྲུབ་དཔལ་མཆོག་རྒྱལ་མཚན་ལ། །རྟག་ཏུ །བླ་མ་རྣམས་དང་ལྷག་པའི་ལྷས། །རྗེས་བཟུང་ཕྲིན་ལས་མཐའ་ཡས་པ། །འཇམ་མགོན་སངས་རྒྱས་ཕུན་ཚོགས་ལ། །རྟག་ཏུ༴ །རིམ་གཉིས་ཟབ་མོའི་རྣལ་འབྱོར་གྱིས། །གྲུབ་པ་གཉིས་
ཀྱི་མཐར་ཕྱིན་པ། །མཚུངས་མེད་བསོད་ནམས་དཔལ་ལྡན་ལ། །རྟག་ཏུ༴ །རྨད་བྱུང་དམ་པའི་རིགས་འཁྲུངས་ཤིང་། །མཁྱེན་བརྩེ་ནུས་པའི་མཛོད་དུ་གྱུར། །འདྲེན་མཆོག་ནམ་མཁའ་བསམ་འགྲུབ་ལ། །རྟག་ཏུ༴ །སྲས་བཅས་རྒྱལ་བའི་ཡེ་ཤེས་སྐུ། །སྙིགས་དུས་བསྟན་པའི་ཉི་མ་མཆོག །ས་ཆེན་ཀུན་དགའ་བློ་གྲོས་ལ། །རྟག་ཏུ༴ །མཁས་ཤིང་གྲུབ་པའི་གཙུག་རྒྱན་ཆེ། །ཡོངས་རྫོགས་བསྟན་པ་རྒྱ་མཚོའི་བདག །རྗེ་བཙུན་ནམ་མཁའ་འཆི་མེད་ལ། །རྟག་ཏུ་ཕྱག་འཚལ་གསོལ་བ་འདེབས། །རྣལ་འབྱོར་དབང་ཕྱུག་བརྩེ་བ་ཆེའི། །ཟབ་གསང་སྙན་བརྒྱུད་རྒྱ་མཚོའི་བདག །མཁན་ཆེན་འཇམ་དཔལ་བཟང་པོ་ལ། །རྟག་ཏུ༴ །རིགས་དང་དཀྱིལ་འཁོར་རྒྱ་མཚོའི་དངོས། །དྲན་པས་སྲིད་ཞིའི་གདུང་སེལ་བ། །དཔལ་ལྡན་རྩ་བའི་བླ་མ་ལ། །རྟག་ཏུ་ཕྱག་འཚལ་གསོལ་བ་འདེབས། །དངོས་ཀུན་ཁྱབ་བདག་བདེ་བའི་མཆོག །གསང་གསུམ་འཁོར་ལོའི་ཧེ་རུ་ཀ །ཤེས་རབ་སྒྱུ་མའི་བཙུན་མོ་དང་། །རོལ་མཛད་བདེ་བ་ཆེན་པོར་འདུད། །ཟུང་འཇུག་དེ་ཉིད་མ་ཐོབ་བར། །རྗེ་བཙུན་བླ་མས་རྗེས་བཟུངས་ཏེ། ། མངལ་སྒོང་རྫུས་སྐྱེས་དཀྱིལ་འཁོར་དུ། །སྦྱིན་བྱ་དབང་བཞིས་སྨིན་པར་ཤོག །ཟབ་མོའི་ལམ་གྱི་རྩ་བ་མཆོག །ཐུན་མོང་ཐུན་མོང་མ་ཡིན་པའི། །འཁོར་ལོ་སྡོམ་པའི་དམ་ཚིག་རྣམས། །མ་ཉམས་ཚུལ་
བཞིན་བསྲུང་བར་ཤོག །མ་དག་སྐྱེ་གནས་བཞི་སྦྱངས་པའི། །གསལ་དག་བསྐྱེད་རིམ་ལེགས་བསྒོམས་ཏེ། །སྣང་བ་ལྷ་རུ་འཆར་བ་དང་། །ཞི་སོགས་ཕྲིན་ལས་དབང་བསྒྱུར་ཤོག །བརྒྱུད་རིམ་གནས་ལུགས་ཤེས་བྱས་ནས། །སྔགས་རིམ་གཏུམ་མོའི་རྣལ་འབྱོར་གྱིས། །ཡེ་ཤེས་དགའ་བཞིའི་རིམ་པ་བསྐྱེད། །གསང་བའི་རིམ་པ་འགྲུབ་པར་ཤོག །དེ་ལྟར་རིམ་གཉིས་ལ་བརྩོན་པས། །དྲོད་ཐོབ་སྤྱོད་པས་མཚམས་སྦྱར་ཏེ། །རབ་དགའ་ལ་སོགས་ས་བགྲོད་ནས། །རྩེ་གཅིག་ཕྱག་ཆེན་འགྲུབ་པར་ཤོག །ཁྱད་པར་སྐྱེ་བ་འདི་ཉིད་ལ། །མཚན་འཛིན་ཀུན་རྟོགས་རབ་སྤངས་ནས། །ཌ་གི་དྷ་རི་ཀ་པ་བཞིན། །གསང་ཆེན་སྤྱོད་པ་མཐར་ཕྱིན་ཤོག །འཁོར་ལོ་སྡོམ་པའི་རྣལ་འབྱོར་དང་། །ནམ་ཡང་མི་འབྲལ་གནས་གསུམ་གྱི། །མཁའ་འགྲོའི་ཚོགས་དང་ལྷན་ཅིག་གནས། །རིག་འཛིན་དབང་པོ་ཉིད་གྱུར་ཅིག །བླ་མ་རྣམས་ཀྱི་བྱིན་རླབས་དང་། །ཡི་དམ་མཁའ་འགྲོའི་ནུས་མཐུ་ཡིས། །བདག་དང་མཁའ་མཉམ་སེམས་ཅན་ཀུན། །ཟུང་འཇུག་རྡོ་རྗེའི་ས་ཐོབ་ཤོག །ཅེས་པའང་རྗེ་བཙུན་ས་སྐྱ་པཎྜི་ཏས་མཛད་པའི་འཁོར་ལོ་བདེ་མཆོག་གི་བླ་བརྒྱུད་གསོལ་འདེབས་ཀྱི་བརྒྱུད་པ་ཕྱི་མ་རྣམས་རིམ་པར་བསྣན་པ་འཇམ་མགོན་ཀུན་དགའ་བསོད་ནམས་ཀྱིས་མཛད་པའི་ནཱ་རོ་མཁའ་སྤྱོད་ཀྱི་དཀྱིལ་ཆོག་ལས་འབྱུང་བ་ལྟར་
ལ། དཀོན་མཆོག་ལྷུན་གྲུབ་མན་ཆད་ཀྱི་ཁ་སྐོང་རྣམས་ངོར་ཨེ་ཝཾ་པ་ཆེན་པོ་ནས་བརྒྱུད་པའི་རྣལ་འབྱོར་མའི་བྱིན་རླབས་ཀྱི་བརྒྱུད་རིམ་དང་མཐུན་པར་འཇམ་དབྱངས་མཁྱེན་བརྩེའི་དབང་པོས་བྲིས་པའོ། །སརྦ་མངྒ་ལཾ་བྷ་ཝ་ཏུ།།
ནཱ་རོ་མཁའ་སྤྱོད་མའི་བརྒྱུད་འདེབས་བསྡུས་པ།
ནཱ་རོ་མཁའ་སྤྱོད་མའི་བརྒྱུད་འདེབས་བསྡུས་པ་བཞུགས་སོ། །རྡོ་རྗེ་འཆང་ཆེན་རྡོ་རྗེ་རྣལ་འབྱོར་མ། །གྲུབ་ཆེན་ནཱ་རོ་ཏ་པ་ཕམ་མཐིང་པ། །ཤེས་རབ་བརྩེགས་དང་མལ་གྱོ་ས་སྐྱ་པ། །རྗེ་བཙུན་སྐུ་མཆེད་རྣམས་ལ་གསོལ་བ་འདེབས། །ས་སྐྱ་པཎ་ཆེན་འཕགས་པ་རིན་པོ་ཆེ། །དཀོན་མཆོག་དཔལ་དང་ཆོས་རྗེ་བྲག་ཕུག་པ། བསོད་ནམས་རྒྱལ་མཚན་དཔལ་ལྡན་ཚུལ་ཁྲིམས་དང་། །ཡེ་ཤེས་རྒྱལ་མཚན་རྣམས་ལ་གསོལ་བ་འདེབས། །ངོར་ཆེན་རྡོ་རྗེ་འཆང་དབང་སེམས་དཔའ་ཆེ། །བདག་ཆེན་ཆོས་རྗེ་ཀུན་སྤང་རྡོ་རིང་པ། །ཚར་ཆེན་རྗེ་དང་འཇམ་དབྱངས་མཁྱེན་བརྩེའི་དབང་། །བསླབ་གསུམ་རྒྱལ་མཚན་རྣམས་ལ་གསོལ་བ་འདེབས། །དབང་ཕྱུག་རབ་བརྟན་བསོད་ནམས་མཆོག་ལྡན་དང་། །བསོད་ནམས་མཆོག་གྲུབ་མཁྱེན་རབ་བྱམས་པའི་དཔལ། །རྨོར་ཆེན་རྗེ་དང་ཁྱབ་བདག་གནས་གསར་པ། །ཀུན་དགའ་བློ་གྲོས་རྣམས་ལ་གསོལ་བ་འདེབས། །ནམ་མཁའ་འཆི་མེད་བསྟན་པའི་ཉི་མ་དང་། །ངག་དབང་རིན་ཆེན་རིགས་རྣམས་ཀུན་གྱི་བདག །ཀུན་དགའ་བསྟན་འཛིན་འཇམ་དཔལ་
བཟང་པོ་དང་། །རྩ་བའི་བླ་མ་རྣམས་ལ་གསོལ་བ་འདེབས། །བསྐྱེད་རིམ་ཟབ་མོ་མཁའ་སྤྱོད་རྣལ་འབྱོར་དང་། །རྫོགས་རིམ་དབུ་མའི་རྣལ་འབྱོར་བསྒོམ་པའི་མཐུས། །བདེ་ཆེན་ལྷན་སྐྱེས་ཡེ་ཤེས་སྐྱེ་བ་དང་། །མཁའ་སྤྱོད་གོ་འཕང་ཐོབ་པར་བྱིན་གྱིས་རློབས། །ཡང་ཡར་ཀླུང་པ་ནས་བརྒྱུད་པ་ལྟར་ན། བྲག་ཕུག་པ་ཡན་ཆད་འདྲ་དེ་ནས། བསོད་ནམས་རྒྱལ་མཚན་གྲུབ་མཆོག་ཡར་ཀླུང་པ། །བསོད་ནམས་རྒྱལ་མཆོག་རྣམས་ལ་གསོལ་བ་འདེབས། །འཇམ་དབྱངས་ཆེན་པོ་ནམ་མཁའ་རྒྱལ་མཚན་དང་། །བདག་ཆེན་ཆོས་རྗེ་སོགས་མན་འདྲའོ། །ཞེས་པའང་རྡོ་རྗེ་འཆང་ཀུན་དགའ་བཟང་པོས་མཛད་པའི་བརྒྱུད་འདེབས་ལ། བླ་མ་ཕྱི་མ་རྣམས་ཀྱི་ཞལ་སྐོང་མཁྱེན་བརྩེའི་དབང་པོས་བྲིས་པ་དགེ། །།
བླ་མ་རྡོ་རྗེ་རྣལ་འབྱོར་མའི་ཐུགས་དམ་གནད་ནས་བསྐུལ་བའི་གསོལ་འདེབས་ལམ་རིམ་དང་འབྲེལ་བ་མཁའ་སྤྱོད་བགྲོད་པའི་ཐེམ་སྐས།
༈ བླ་མ་རྡོ་རྗེ་རྣལ་འབྱོར་མའི་ཐུགས་དམ་གནད་ནས་བསྐུལ་བའི་གསོལ་འདེབས་ལམ་རིམ་དང་འབྲེལ་བ་མཁའ་སྤྱོད་བགྲོད་པའི་ཐེམ་སྐས་ཅེས་བྱ་བ་བཞུགས་སོ། །སྲས་བཅས་རྒྱལ་བ་ཀུན་གྱི་ཡུམ་གཅིག་པུ། །དཔལ་ལྡན་བླ་མ་མཁའ་སྤྱོད་དབང་མོའི་ཞབས། །སྙིང་ནས་དྲན་པའི་གདུང་བས་གསོལ་འདེབས་ན། །བྱིན་རླབས་ཆར་ཆེན་ཕོབ་ཅིག་རྣལ་འབྱོར་མ། །བདག་ཅག་དེང་ནས་བྱང་ཆུབ་སྙིང་པོའི་བར། །རྡོ་རྗེའི་ལུས་ཐོབ་ཐེག་ཆེན་རིག་སད་ནས། །མཚན་ལྡན་བླ་མ་ཚུལ་བཞིན་བསྟེན་ནུས་པའི། །སྐལ་པ་བཟང་
པོར་སྦྱོར་ཅིག་རྣལ་འབྱོར་མ། །ཁམས་གསུམ་འཁོར་བ་སྡུག་བསྔལ་ཕུང་པོར་རིག །དལ་འབྱོར་རྙེད་དཀའ་ནམ་འཆི་ངེས་མེད་དྲན། །ལས་འབྲས་བླང་དོར་བརྩོན་སོགས་ཐུན་མོང་གི། །ལམ་རིམ་རྒྱུད་ལ་སྐྱེས་ཅིག་རྣལ་འབྱོར་མ། །ཁྱད་པར་རྣམ་དག་དབང་དང་བྱིན་རླབས་ཀྱིས། །རྒྱུད་སྨིན་དམ་ཚིག་སྡོམ་པར་ལྡན་པ་ལས། །སྨིན་གྲོལ་ལམ་བཟང་འཇུག་ཅིང་བསྒོམ་རུང་བའི། །ཟབ་མོའི་རྟེན་འབྲེལ་བསྒྲིགས་ཤིག་རྣལ་འབྱོར་མ། །དེ་ཚེ་དབེན་ཞིང་བསམ་གཏན་འཕེལ་བའི་སར། །ནང་གི་རྣལ་འབྱོར་རྩེ་གཅིག་གཞོལ་བ་ན། །ཕྱི་ནང་གསང་བའི་འགལ་རྐྱེན་ཀུན་ཞི་ཞིང་། །མཐུན་རྐྱེན་རྒྱས་པར་མཛོད་ཅིག་རྣལ་འབྱོར་མ། །ཉལ་དུས་འོད་གསལ་ངང་དུ་མཉམ་གཞག་ཅིང་། །ལྡང་ཚེ་ཟུང་འཇུག་སྒྱུ་མའི་སྐུར་གསལ་བས། །དགའ་བ་གསུམ་ལྡན་བདུད་རྩི་མྱང་བའི་མཐུས། །སྒོ་གསུམ་དག་པར་མཛོད་ཅིག་རྣལ་འབྱོར་མ། །བླ་མ་མཆོག་གསུམ་སྐྱབས་ཀྱི་སྙིང་པོར་བཟུང་། །བྱམས་དང་སྙིང་རྗེ་བྱང་སེམས་གཏིང་ནས་འབྱོང་། །སྟོབས་བཞི་ཚང་བའི་རྡོར་སེམས་བསྒོམ་བཟླས་ཀྱིས། །སྡིག་ལྟུང་བྱང་བར་མཛོད་ཅིག་རྣལ་འབྱོར་མ། །དངོས་གྲུབ་འབྱུང་གནས་ཁྱབ་བདག་རྡོ་རྗེ་ཆོས། །དད་པས་བསྒོམ་ཞིང་མཆོད་ཅིང་གསོལ་བཏབ་མཐུས། །བྱིན་རླབས་བདུད་རྩིས་དབང་བཞིའི་ཡེ་ཤེས་ཀྱི། །པདྨོ་ལྷག་པར་རྒྱས་མཛོད་རྣལ་འབྱོར་མ། །
བདག་གཞན་སྦྱངས་ཤིང་བསྒྱུར་བའི་བསྐྱེད་རིམ་གྱིས། །ལྟར་སྣང་གཅིག་ཏུ་ཤར་བའི་དམ་ཚིག་པར། །ཡེ་ཤེས་ཕོ་ཉ་གསུམ་གྱི་བྱིན་རླབས་རྒྱུན། །འཇུག་ཅིང་བརྟན་པར་མཛོད་ཅིག་རྣལ་འབྱོར་མ། །ང་རྒྱལ་རྣམ་པའི་སེམས་འཛིན་ལ་བརྟེན་ནས། །རིམ་པར་དང་པོའི་གསལ་སྣང་མཐར་ཕྱིན་ཅིང་། །ངག་དང་ཡིད་ཀྱི་བཟླས་པས་མཁའ་སྤྱོད་ཀྱི། །དངོས་གྲུབ་འགྲུབ་པར་མཛོད་ཅིག་རྣལ་འབྱོར་མ། །ཕྱི་ནང་། ཁམས་གསུམ་བསམ་གྱིས་མི་ཁྱབ་པའི། །འོད་གསལ་ངང་དུ་ཐིམ་པའི་སྐད་ཅིག་ལས། །ལྷ་སྔགས་ཆོས་སྐུར་འཆར་བའི་སྤྱོད་ལམ་གྱིས། །ཚོགས་གཉིས་རྫོགས་པར་མཛོད་ཅིག་རྣལ་འབྱོར་མ། །རྩ་རླུང་ཐིག་ལེ་སྨིན་ཅིང་སྦྱང་བའི་ཕྱིར། །གཏུམ་མོའི་མེ་ལྕེས་དབུ་མའི་སྒོ་དབྱེ་ཞིང་། །རླུང་གི་སྦྱོར་བས་ལུས་སེམས་སིམ་པ་ལས། བདེ་སྟོང་ཡེ་ཤེས་འགྲུབ་མཛོད་རྣལ་འབྱོར་མ། །དེ་ལྟར་བསྒོམ་བཟླས་བསྒྲུབ་ལ་བརྩོན་པའི་མཐུས། །གྲུབ་པའི་དབང་པོ་ཀུ་སཱ་ལི་པ་བཞིན། །མངོན་སུམ་ལག་པའི་མཁྲིག་མ་ནས་བཟུང་ནས། །མཁའ་སྤྱོད་གྲོང་དུ་འཁྲིད་ཅིག་རྣལ་འབྱོར་མ། །དེར་ནི་ཞིང་སྐྱེས་ཕོ་ཉའི་ཚོགས་རྣམས་ཀྱིས། རྡོ་རྗེའི་ཉམས་འགྱུར་རྫོགས་པའི་ཡན་ལག་གིས། །ཀུན་ཏུ་འཁྱུད་ཅིང་ཙུམྤ་སྔོན་འགྲོ་བས། །སྙོམས་འཇུག་བདེ་ཆེན་བསྐྱེད་མཛོད་རྣལ་འབྱོར་མ། །དེ་ཚེ་བདེ་བས་དྲངས་པའི་སྟོང་པ་ཉིད། །མཐོང་བའི་ལམ་
གྱི་འོད་གསལ་མངོན་གྱུར་ནས། །སློབ་དང་མི་སློབ་ཁ་སྦྱོར་བདུན་ལྡན་གྱི། །ཟུང་འཇུག་ཐོབ་པར་མཛོད་ཅིག་རྣལ་འབྱོར་མ། །གལ་ཏེ་ཚེ་འདིར་བརྟན་པ་མ་ཐོབ་ན། །འཆི་ཚེ་མགོན་དང་དཔའ་བོ་མ་ཚོགས་ཀྱིས། །ཡིད་འཕྲོག་མཆོད་པའི་སྤྲིན་གྱི་མདུན་བསུས་ཏེ། །དག་པའི་ཞིང་དུ་དྲོངས་ཤིག་རྣལ་འབྱོར་མ། །དེར་ཡང་འཁྲུལ་ནས་བར་དོར་འཁྱམས་སྲིད་ན། །བླ་མ་མཆོག་དང་རྡོ་རྗེ་བཙུན་མོ་ཡིས། །མིང་ནས་ལུང་སྟོན་དགའ་བ་རྣམ་གསུམ་གྱི། །དབུགས་དབྱུང་ལྷག་པར་སྩོལ་ཅིག་རྣལ་འབྱོར་མ། །མདོར་ན་སྐྱེ་ཞིང་སྐྱེ་བ་ཐམས་ཅད་དུ། །དཔལ་ལྡན་བླ་མ་རྡོ་རྗེ་རྣལ་འབྱོར་མས། །འབྲལ་བ་མེད་པར་རྟག་ཏུ་རྗེས་བཟུང་ཞིང་། །ཕན་བདེའི་དགེ་མཚན་རྒྱས་པའི་བཀྲ་ཤིས་སྩོལ། །ཅེས་པའང་འདི་ཕྱིའི་འདུན་མ་བླ་མ་དང་མཆོག་གསུམ་གྱི་བཀའ་དྲིན་ཁོ་ན་ལ་རེ་བ་རྒྱལ་ཁམས་ཀྱི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས། ཁྱབ་བདག་འཁོར་ལོ་སྡོམ་པའི་ཕོ་བྲང་དྲང་སྲོང་སྲིན་པོ་རིར་དཔལ་འཁོར་ལོ་བདེ་མཆོག་ཡབ་ཡུམ་གྱི་སྣང་བརྙན་ཡེ་ཤེས་པ་མངོན་སུམ་དུ་བཞུགས་པའི་སྤྱན་སྔར་ཇི་ལྟར་གསོལ་བ་བཏབ་པ་བཞིན། །སླད་ནས་ཀྱང་ཡང་ཡང་གསོལ་བ་བཏབ་པའི་དགེ་བས་བདག་དང་འགྲོ་ཀུན་བླ་མ་རྗེ་བཙུན་མས་དུས་རྟག་ཏུ་རྗེས་སུ་འཛིན་པའི་རྒྱུར་གྱུར་ཅིག །སརྦ་དཱ་ཤེ་ཡོ་བྷ་བ་ཏུ།།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བླ་མ་མཆོད་པའི་ཆོ་ག་བསོད་ནམས་སྤྲིན་གྱི་རོལ་མོ།
རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་ཀྱི་བླ་མ་མཆོད་པའི་ཆོ་ག་བསོད་ནམས་སྤྲིན་གྱི་རོལ་མོ་ཞེས་བྱ་བ་བཞུགས་སོ། །ན་མོ་གུ་རུ་བྷྱ༔ རྒྱལ་ཀུན་ཡུམ་གྱུར་རྡོ་རྗེ་བཙུན་མོ་དང་། །དབྱེར་མེད་དཔལ་ལྡན་བླ་མོར་གུས་བཏུད་ནས། །གང་དེ་མཆོད་པའི་ཐབས་ཚུལ་རྨད་བྱུང་བ། །བསོད་ནམས་སྤྲིན་གྱི་རོལ་མོ་འདིར་འཁྲོལ་ལོ། །དེ་ཡང་འཁོར་ལོ་བདེ་མཆོག་གི་དཀྱིལ་འཁོར་དུ་དབང་བསྐུར་བ་དང་། རྣལ་འབྱོར་མའི་བྱིན་རླབས་ཀྱིས་རྒྱུད་སྨིན་ཅིང་དམ་ཚིག་ལ་གནས་པའི་གང་ཟག་གིས་དཔལ་ལྡན་བླ་མ་རིགས་ཐམས་ཅད་ཀྱི་བདག་པོར་བལྟས་ནས་ཚོགས་གཉིས་རླབས་པོ་ཆེ་མྱུར་དུ་འདུམས་པར་འདོད་པས་མཆོད་པའི་ཆོ་ག་འདི་བརྩམས་པར་བྱ་སྟེ། །དེ་ལའང་སྦྱོར་དངོས་རྗེས་གསུམ་ལས། དང་པོ་ནི། གནས་དབེན་ཞིང་ཡིད་དང་མཐུན་པར་དཀོན་མཆོག་གི་རྟེན་སྤྱི་དང་། ཁྱད་པར་རྩ་བརྒྱུད་བླ་མའི་སྣང་བརྙན་བྲིས་འབུར་ཇི་ལྟར་རིགས་པའི་མདུན། ཆུ་གཉིས་སྔོན་འགྲོའི་ཉེར་སྤྱོད་སོགས་ཅི་འབྱོར་པའི་བྱེ་བྲག་གཙང་ཞིང་བཀོད་པས་མཛེས་པ་ཕྱག་ལེན་ལྟར་བཤམས། །རང་གི་མདུན་དུ་གོས་ཟུང་། མཎྜལ་དྲི་བཟང་གི་ཆུ་དང་བཅས་པ། མེ་ཏོག་གི་སྣོད། ནང་མཆོད། རྡོར་དྲིལ་སོགས་རོལ་མོའི་བྱེ་བྲག་ཇི་ལྟར་རིགས་པས་མཚོན་དགོས་པའི་ཡོ་བྱད་རྣམས་འདུ་བྱ། །རང་ཉིད་སྟན་བདེ་བ་ལ་འཁོད་ནས་ངེས་འབྱུང་དང་བྱང་ཆུབ་
སེམས་གཉིས་ཀྱི་བློ་ཁྱད་པར་ཅན་གྱི་ངང་། གནས་དང་མཆོད་པའི་ཡོ་བྱད་བྱིན་གྱིས་བརླབས་པ་ནི། ཨོཾ་སུམྦྷ་ནི་སུམྦྷ་ཧཱུྃ་ཧཱུྃ་ཕཊ། ཨོ་གྲཏྣ་གྲིཉྩ་ཧཱུྃ་ཧཱུྃ་ཕཊ། ༀ་གྲིདྡྷཱ་པ་ཡ་གྲིཏྟཱ་པ་ཡ་ཧཱུྃ་ཧཱུྃ་ཕཊ། ཨོཾ་ཨ་ན་ཡ་ཧོ་། བྷ་ག་ཝཱན་བཛྲ་རཱ་ཛ་ཧཱུྃ་ཧཱུྃ་ཕཊ་ཀྱིས་བསང་། ཨོཾ་སྭ་བྷ་ཝ་ཤུདྡྷསརྦ་དྷསྭ་བྷ་ཝ་ཤུདྡྷོཉ་ཧཾ་གིས་སྦྱངས། སྟོང་པའི་ངང་ལས་ཧཱུཾ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ་གྲུ་བཞི་སྒོ་བཞི། རྟ་བབ་བཞིས་མཛེས་པ། རྒྱན་ཐམས་ཅད་ཀྱིས་བརྒྱན་པ། མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་བཟང་ཞིང་རྒྱ་ཆེ་བ་དྭངས་ཤིང་ཐོགས་པ་མེད་པ་ས་དང་བར་སྣང་ནམ་མཁའ་གང་བ། འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། རྗེ་བཙུན་རྡོ་རྗེ་རྣལ་འབྱོར་མའི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཨོཾ་ཨགྷཾ་ཨཱ༔ཧཱུྃ་ནས། ཤཔྟ་ཨཱཿཧཱུྃ་གི་བར་ཕྱག་རྒྱ་དང་བཅས་པས་བྱིན་གྱིས་བརླབས།
ནམ་མཁའ་མཛོད་ཀྱི་ཕྱག་རྒྱ་དཔྲལ་བར་བཅས་ལ། ཨོཾ་བཛྲ་སྤ་ར་ཎ་ཁཾ་ཞེས་པས་མང་པོར་སྤེལ། ཨོཾ་བཛྲ་གྷནྡྷེ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ་པྲ་ཙ་ལི་ཏེ། པྲ་ཛྙཱ་པ་ར་མི་ཏ། ནཱ་ད་སཾ་བྷ་ཝེ་ཏ། བཛྲ་དྷརྨ་ཧྲི་ད་ཡ་ནི། སནྟོ་ཥ་ཎི་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨཱ་ཁཾ་སྭཱ་ཧཱ། ལན་གསུམ་གྱིས་བྱིན་དབབ། སྐྱབས་ཡུལ་གསལ་བཏབ་ལ། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་སྐྱབས་འགྲོ་ཅི་ནུས་ཀྱི་མཐར། ཐལ་མོ་སྦྱར་ལ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། །ཞེས་གསོལ་
བ་གདབ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་ལམ་ཟབ་མོ་ཉམས་སུ་བླང་བར་བགྱིའོ། །ཞེས་ལན་གསུམ་གྱིས་སེམས་བསྐྱེད། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ་པ་རྣམས་བྱའོ། །གཉིས་པ་དངོས་གཞིའི་ཆོ་ག་ལ་དྲུག་ལས། དང་པོ་ཚོགས་ཞིང་བསྐྱེད་པ་ནི། རང་སེམས་ལྷན་སྐྱེས་ཡེ་ཤེས་གཅིག་པུའི་འཕྲུལ། །སྲིད་ཞིའི་ཉམས་འགྱུར་དུ་མར་འཆར་བ་ལས། །མ་དག་སྣང་བ་རྟེན་དང་བརྟེན་པར་བཅས། །བརྗོད་བྲལ་བདེ་ཆེན་དབྱིངས་སུ་ཐིམ་པའི་རྩལ། །ཕྱི་སྣོད་མཁའ་སྤྱོད་རྡོ་རྗེ་བཙུན་མོའི་ཞིང་། །མེ་ཏོག་ཆར་འབེབས་རོལ་མོ་སྣ་ཚོགས་སྒྲོགས། །རྣམ་བཀྲའི་འཇའ་འོད་འཁྲིགས་པའི་བར་བར་ན། །ངོ་མཚར་མཆོད་སྤྲིན་རྒྱ་མཚོས་རབ་མཛེས་པའི། །མདུན་གྱི་ནམ་མཁར་ཡིད་འཕྲོག་རིན་ཆེན་ཁྲིར། །མི་འཇིགས་སེང་གེ་བརྒྱད་ཀྱིས་བཏེགས་པའི་སྟེང་། །སྣ་ཚོགས་ཆུ་སྐྱེས་ཉི་ཟླའི་གདན་གྱི་དབུས། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །མཐའ་ཀླས་དཀྱིལ་འཁོར་སྤྲོ་དང་བསྡུ་བའི་བདག །སྨིན་གྲོལ་ལམ་གྱི་སྟོན་པ་རྡོ་རྗེ་འཆང་། །བཀའ་དྲིན་མཉམ་མེད་རྩ་བའི་བླ་མ་ནི། །ཚུར་མཐོང་མོས་ངོར་དཔའ་བོ་རྡོ་རྗེ་ཆོས། །སྐུ་མདོག་པདྨ་རཱ་གའི་ལྷུན་པོ་ལ། །ཉིན་བྱེད་བྱེ་བས་འཁྱུད་པའི་གཟི་འབར་ཞིང་། །བརྒྱད་
གཉིས་ལང་ཚོར་མཚན་དཔེར་མཚར་སྡུག་རྫོགས། །ཕྱག་གཡས་བདེ་སྟོང་སྒྲ་སྒྲོགས་ཌཱ་མ་རུ། །གཅིག་ཤོས་བདུད་རྩིས་གང་བའི་ཐོད་པ་དང་། །གཡོན་པའི་གྲུ་མོར་རྡོ་རྗེའི་ཁ་ཊཾ་བསྣམས། །ཕྱིན་དྲུག་རྣམ་དག་རུས་པའི་ཕྱག་རྒྱས་མཛེས། །ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་རོལ། །མཐའ་བསྐོར་རྩ་བརྒྱུད་བླ་མ་ཡི་དམ་ལྷ། །མཆོག་གསུམ་ཆོས་སྲུང་ནོར་ལྷའི་ཚོགས་བཅས་རྣམས། །བདག་ལ་དགྱེས་ཤིང་འཛུམ་པས་བཞུགས་པ་ཡི། །སོ་སོའི་ཐུགས་ལས་འཕྲོས་པའི་འོད་ཟེར་གྱིས། །ཡེ་ཤེས་སྤྱན་དྲངས་གཉིས་སུ་མེད་པར་གྱུར། །ཞེས་པས་གསལ་བཏབ། གཉིས་པ་ཕྱག་འཚལ་བ་ནི། རྒྱས་པར་བརྒྱུད་པའི་ཕྱག་འཚལ་ལོགས་ནས་འབྱུང་བ་ལྟར་བྱ་ཞིང་། བསྡུ་ན། གང་གི་དྲིན་གྱིས་ལྷན་སྐྱེས་བདེ་ཆེན་ཉིད། སྐད་ཅིག་ཉིད་ལ་འཆར་བའི་བཀའ་དྲིན་ཅན། །རྗེ་བཙུན་བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པདྨོར་ཕྱག་འཚལ་ལོ། །རྒྱལ་བ་རྒྱ་མཚོའི་རིགས་བདག་རྡོ་རྗེ་ཆོས། །མཁའ་སྤྱོད་དབང་མོ་རྡོ་རྗེ་རྣལ་འབྱོར་མ། །གྲུབ་པའི་སར་བཞུགས་པཎ་ཆེན་ནཱ་རོ་པ། །ཕམ་མཐིང་སྐུ་མཆེད་རྣམས་ལ་ཕྱག་འཚལ་ལོ། ། ཟབ་ཡངས་ཆོས་ཀྱི་གཏེར་གྱུར་ཤེས་རབ་བརྩེགས། །གསང་སྔགས་རྒྱ་མཚོའི་མངའ་བདག་མལ་ལོའི་ཞབས། །རྡོ་རྗེ་འཆང་དངོས་བླ་ཆེན་ས་སྐྱ་པ། །རྗེ་བཙུན་སྐུ་མཆེད་རྣམས་ལ་ཕྱག་འཚལ་ལོ། །གནས་།
ལྔ་རིག་པ་ས་སྐྱ་པཎ་ཆེན་དང་། །འཛམ་གླིང་བསྟན་པའི་མངའ་བདག་འཕགས་པའི་ཞབས། །རིམ་གཉིས་ཐུགས་གཞོལ་དཀོན་མཆོག་དཔལ་བ་དང་། །བྲག་ཕུག་ཆོས་རྗེ་རྣམས་ལ་ཕྱག་འཚལ་ལོ། །འགྲོ་བའི་མགོན་པོ་བསོད་ནམས་རྒྱལ་མཚན་ཞབས། །གདམས་པ་རྒྱ་མཚོའི་མངའ་བདག་དཔལ་ལྡན་པ། །ཤར་ཆེན་ཡེ་རྒྱལ་ངོར་ཆེན་རྡོ་རྗེ་འཆང་། །ཀུན་དགའ་བཟང་པོ་རྣམས་ལ་ཕྱག་འཚལ་ལོ། །རྒྱལ་བ་གཉིས་པ་དཀོན་མཆོག་རྒྱལ་མཚན་དང་། །ཀུན་མཁྱེན་མཁས་པའི་དབང་པོ་སེང་གེའི་མཚན། །ས་བཅུའི་དབང་ཕྱུག་སངས་རྒྱས་རིན་ཆེན་དང་། །ས་སྐྱ་ལོ་ཙཱ་རྣམས་ལ་ཕྱག་འཚལ་ལོ། །ཤེས་བྱ་ཀུན་མཁྱེན་དཀོན་མཆོག་ལྷུན་གྲུབ་དང་། །པཎ་ཆེན་མཁས་པའི་དབང་པོ་ནམ་མཁའི་མཚན། །འཇམ་དཔལ་དབྱངས་དངོས་ཀུན་དགའ་བསོད་ནམས་དང་། །དཔལ་མཆོག་རྒྱལ་མཚན་རྣམས་ལ་ཕྱག་འཚལ་ལོ། །མཁས་ཤིང་གྲུབ་བརྙེས་སངས་རྒྱས་ཕུན་ཚོགས་དང་། །རྡོ་རྗེ་འཆང་དབང་བསོད་ནམས་དཔལ་ལྡན་ཞབས། །བསྟན་པའི་ཉི་མ་ནམ་མཁའ་བསམ་འགྲུབ་དང་། །ཀུན་དགའ་བློ་གྲོས་རྣམས་ལ་ཕྱག་འཚལ་ལོ། །རིགས་ཀུན་ཁྱབ་བདག་ནམ་མཁའ་འཆི་མེད་དང་། །སྐྱབས་གནས་ཀུན་འདུས་རྣལ་འབྱོར་འཇམ་དཔལ་བཟང་། །བཀའ་དྲིན་མཉམ་མེད་རྩ་བའི་བླ་མ་སོགས། །དངོས་བརྒྱུད་བླ་མ་རྣམས་ལ་ཕྱག་འཚལ་ལོ། །
གསུམ་པ་མཆོད་པ་ལ་བརྒྱད་ལས། དང་པོ་ཉེར་སྤྱོད་ཀྱི་མཆོད་པ་ནི། སྟོང་གསུམ་འདིའམ་སྟོང་གསུམ་གཞན་དག་ན། །ལྷ་རྫས་མཆོད་ཡོན་ཇི་སྙེད་ཡོད་པ་རྣམས། །དཔལ་ལྡན་བླ་མ་རྡོ་རྗེ་འཆང་ལ་འབུལ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨགྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་མཆོད་ཡོན་གྱི་ཚབ་ཏུ། ཞབས་བསིལ། མེ་ཏོག །བདུག་སྤོས། སྣང་གསལ། དྲི་མཆོག །ཞལ་ཟས། རོལ་མོ་རྣམས་དང་། སྔགས་ཀྱི་ཨགྷཾ་ཚབ་ཏུ། པཱ་ཏྱཾ་ནས། ཤཔྟའི་བར་རྣམས་སྦྱར། གཉིས་པ་གོས་ཟུང་གི་མཆོད་པ་ནི། གོས་ཟུང་། སུམྦྷས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ལྷ་རྫས་ལས་གྲུབ་ན་བཟའ་སྲབ་ལ་འཇམ་པ་ཡང་བ་ཟུང་དུ་སྦྱར་བ་དང་ལྡན་པར་བསམས་ལ། ཁ་དོག་འཇམ་ཞིང་དྲི་ཞིམ་རེག་ན་བདེ། །སྲབ་འཇམ་ཡང་མཛེས་ལྷ་ལས་བྱུང་བ་ཡི། ། ན་བཟའི་མཆོག་འདི་རྡོ་རྗེའི་སྐུ་ལ་འབུལ། །བསྒྲེས་པ་མེད་པ་རྡོ་རྗེའི་སྐུ་ཐོབ་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་བཛྲ་ཝ་ས་མྱ་ཨཱཧཱུཾ། གསུམ་པ་རིག་མ་བཅུ་དྲུག་གི་མཆོད་པ་ནི། རང་གི་སྙིང་ག་ནས་མཆོད་པའི་ལྷ་མོ་དཔག་ཏུ་མེད་པ་སྤྲོས་ནས་མཆོད་པར་བསམས་ལ། །དབང་སྔོན་མདོག་མཚུངས་རྡོ་རྗེ་པི་ཝཾ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་
སྤྲུལ་ནས། །དཔལ་ལྡན་བླ་མ་པི་ཝཾ་སྒྲ་ཡིས་མཆོད། །ཨོ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་ཝཱི་ཎི་ཧུ་ཧཱུྃ་ཕཊ། །གསེར་བཟང་མདོག་མཚུངས་རྡོ་རྗེ་གླིང་བུ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་གླིང་བུའི་སྒྲ་ཡིས་མཆོད། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་ཝཾ་སེ་ཧཱུྃ་ཧཱུྃ་ཕཊ། པདྨ་རཱ་གའི་མདོག་མཚུངས་རྫ་རྔ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་རྫ་རྔའི་སྒྲ་ཡིས་མཆོད། །ༀ་གུ་རུ་བུདྡྷ་བོ་དྷི་ས་ཏ་ས་པ་རི་ཝཱ་ར་ཨོཾ་བཛྲ་མྲི་ཏཾ་གེ་ཧུཾ་ཧཱུྃ་ཕཊ། མརྒད་མདོག་མཚུངས་རྡོ་རྗེ་རྔ་ཟླུམ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་རྔ་ཟླུམ་སྒྲ་ཡིས་མཆོད། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་མུ་རྫི་ཧཱུྃ་ཧཱུྃ་ཕཊ། ལི་ཁྲིའི་མདོག་མཚུངས་རྡོ་རྗེ་བཞད་པ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། ། དཔལ་ལྡན་བླ་མ་བཞད་པའི་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་ཧཱ་སྱེ་ཧུཾ་ཧཱུྃ་ཕཊ། །ནམ་མཁའི་མདོག་མཚུངས་རྡོ་རྗེ་སྒེག་མོ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །
ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་སྒེག་མཛེས་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་ལཱ་སྱེ་ཧུཾ་ཧཱུྃ་ཕཊ། གུར་གུམ་མདོག་མཚུངས་རྡོ་རྗེ་གླུ་ལེན་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་སྙན་པའི་གླུ་ཡིས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་གཱི་ཏཱི་ཧུཾ་ཧཱུྃ་ཕཊ། པྲི་ཡང་ཀུ་མཚུངས་རྡོ་རྗེ་གར་མཁན་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་མཛེས་མའི་གར་གྱིས་མཆོད། ཨོ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་ཀྲྀ་ཏེ་ཧཱུཾ་ཧཱུཾ་ཕཊ། ཟླ་བའི་མདོག་མཚུངས་རྡོ་རྗེ་མེ་ཏོག་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་མེ་ཏོག་སིལ་མས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་པུཔྤེ་ཧཱུྃ་ཧཱུྃ་ཕཊ། ཨིནྡྲ་ནཱི་ལིའི་མདོག་མཚུངས་བདུག་སྤོས་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་བདུག་སྤོས་སྤྲིན་གྱིས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་དྷཔྤེ་ཧཱུྃ་ཧཱུྃ་ཕཊ། །ཉི་མའི་མདོག་མཚུངས་རྡོ་རྗེ་མར་མེ་མ། །སྣ་
ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་མར་མེའི་ཕྲེང་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་བཛྲ་དཱི་པེ་ཧུཾ་ཧཱུྃ་ཕཊ། སིནྡྷའི་མདོག་མཚུངས་རྡོ་རྗེ་དྲི་ཆབ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་དྲི་བཟང་བྱུགས་པས་མཆོད། །ༀ་གུ་རུ་བུདྡྷ་བོ་ཚ དྷི་ས་ཏ་ས་པ་རི་ཝཱ་ར་ཨོཾ་བཛྲ་གནྡྷེ་ཧཱུྃ་ཧཱུྃ་ཕཊ། ཆུ་ཤེལ་མདོག་མཚུངས་གཟུགས་ཀྱི་རྡོ་རྗེ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་གཟུགས་ཀྱི་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོ་རཱུ་པ་བཛཱི་ཧུཾ་ཧཱུྃ་ཕཊ། བཙོད་ཀྱི་མདོག་མཚུངས་རོ་ཡི་རྡོ་རྗེ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་རོ་ཡི་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོ་རཱ་ས་བཛཱི་ཧུཾ་ཧཱུྃ་ཕཊ། སྣ་ཚོགས་མདོག་མཚུངས་རེག་བྱ་རྡོ་རྗེ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་རེག་བྱའི་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོ་སྤརེ་བཛྲ་ཧཱུྃ་ཧཱུྃ་ཕཊ། སྟོན་ཟླའི་མདོག་
མཚུངས་ཆོས་དབྱིངས་རྡོ་རྗེ་མ། །སྣ་ཚོགས་གོས་དང་རྒྱན་གྱིས་རབ་མཛེས་མ། །ནམ་མཁའ་གང་བར་སེམས་ཀྱིས་རབ་སྤྲུལ་ནས། །དཔལ་ལྡན་བླ་མ་ཆོས་ཁམས་བདེ་བས་མཆོད། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨོཾ་དྷརྨ་དྷ་ཏུ་བཛཱི་ཧུཾ་ཧཱུཾ་ཕཊ། བཞི་པ་རིན་ཆེན་སྣ་བདུན་གྱི་མཆོད་པ་ནི། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨ་ཝརྟ་ཡ་ཨ་ཝརྟ་ཡ་ཧོ༔ བླ་མ་རྒྱལ་བ་སྲས་བཅས་ལ། །འཁོར་ལོ་རིན་ཆེན་འདི་ཕུལ་བས། །སྲིད་པའི་འཁོར་ལོ་རྒྱུན་བཅད་དེ། །ཆོས་ཀྱི་འཁོར་ལོ་བསྐོར་བར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཙཀྲ་རཏྣ་པཱུ་ཛི་ཏེ་ཨཱཿཧཱུྃ། བླ་མ་རྒྱལ་བ་སྲས་བཅས་ལ། །ནོར་བུ་རིན་ཆེན་འདི་ཕུལ་བས། །བཀྲེན་ཅིང་ཕོངས་པ་རྒྱུན་བཅད་དེ། །འབྱོར་པ་ཕུན་སུམ་ཚོགས་པར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་མ་ཎི་རཏྣ་པཱུ་ཛི་ཏེ་ཨཱཿཧཱུྃ། བཙུན་མོ་རིན་ཆེན་འདི་ཕུལ་བས། ། མ་རིག་མུན་པ་རྒྱུན་བཅད་དེ། །ཤེས་རབ་དབྱིངས་ཀྱི་དོན་རྟོགས་ནས། ཐབས་དང་ཤེས་རབ་འབྲེལ་པར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཝསྟི་རཏྣ་པཱུ་ཛི་ཏེ་ཨཱཿཧཱུྃ། བློན་པོ་རིན་ཆེན་འདི་ཕུལ་བས། །ཕྱི་ནང་གསང་གསུམ་ཐེག་གསུམ་ལྡན། །བསམ་ཡས་བསྟན་པ་རབ་འཛིན་ཅིང་། །ཡོན་ཏན་ཐམས་ཅད་ལྡན་པར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་མ་ཧཱ་ཏ་རཏྣ་པཱུ་ཛི་ཏེ་ཨཱཧཱུཾ། གླང་པོ་
རིན་ཆེན་འདི་ཕུལ་བས། །ལྟ་ངན་རྣམས་ནི་རབ་བསལ་ནས། །བླ་མེད་ཐེག་པར་རབ་ཞོན་ཏེ། །ཐམས་ཅད་མཁྱེན་གྲོང་བགྲོད་པར་ཤོག །ཨོ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཧསྟི་རཏྣ་པཱུ་ཛི་ཏེ་ཨཱཧཱུཾ། རྟ་མཆོག་རིན་ཆེན་འདི་ཕུལ་བས། །སྲིད་པའི་གཟེབ་ལས་ངེས་གྲོལ་ནས། །རྫུ་འཕྲུལ་མཆོག་གི་ཤུགས་ཐོབ་སྟེ། །སངས་རྒྱས་ཞིང་དུ་བགྲོད་པར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨ་ཤྭ་རཏྣ་པཱུ་ཛི་ཏེ་ཨཱཿཧཱུྃ། དམག་དཔོན་རིན་ཆེན་འདི་ཕུལ་བས། །ཉོན་མོངས་དགྲ་ལས་རྒྱལ་གྱུར་ནས། །ཕས་ཀྱི་རྒོལ་བ་ཚར་བཅད་དེ། །བསྙེངས་བྲལ་མཆོག་ནི་ཐོབ་པར་ཤོག །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་བློ ར་ཁང་རཏྣ་པཱུ་ཛི་ཏེ་ཨཱཧཱུྃ། ལྔ་པ་འདོད་ཡོན་གྱིས་མཆོད་པ་ནི། །ཁ་དོག་དབྱིབས་ལེགས་ཡིད་འོང་རྒྱན་ཕྲེང་ལྡན། །ཕྱོགས་དུས་ཀུན་ན་གཟུགས་མཆོག་ཅི་མཆིས་རྣམས། །མོས་བློས་བླ་མ་མཆོག་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ༀ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་རུ་པ་ཀཱ་མ་གུ་ཎ་པཱུ་ཛི་ཏེ་ཧཱུྃ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཚིག་མཆོག་སྒྲ་སྙན་ཅི་མཆིས་རྣམས། །མོས་བློས་བླ་མ་མཆོག་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ༀ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཤསྡེ་ཀཱ་མ་གུ་ཎ་པཱུ་ཛི་ཏེ་ཧཱུྃ། ཕྱོགས་དུས་ཀུན་ན་ཙནྡན་
སྦྲུལ་སྙིང་དང་། །ཨ་གར་ནག་སོགས་དབང་པོ་ཚིམ་བྱེད་རྣམས། །མོས་བློས་བླ་མ་མཆོག་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་གནྡྷེ་ཀཱ་མ་གུ་ཎ་པཱུ་ཛི་ཏེ་ཧཱུྃ། ཕྱོགས་དུས་ཀུན་ན་རོ་དང་བཅུད་ལྡན་པའི། །ལུས་སེམས་བརྟན་བྱེད་རོ་མཆོག་ཅི་མཆིས་རྣམས། །མོས་བློས་བླ་མ་མཆོག་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་རྭ་ས་ཀཱ་མ་གུ་ཎ་པཱུ་ཛི་ཏེ་ཧཱུྃ་ཕཊ། ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །རེག་བྱའི་ཁྱད་པར་ལུས་སེམས་ཚིམ་བྱེད་རྣམས། །མོས་བློས་བླ་མ་མཆོག་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་སྤརེ་ཀཱ་མ་གུ་ཎ་པཱུ་ཛི་ཏེ་ཧཱུཾ། དྲུག་པ་མཎྜལ་གྱི་མཆོད་པ་ནི། ཨོཾ་བཛྲ་བྷུ་མི་ཨཱཧཱུྃ། གཞི་ཡོངས་སུ་དག་པ་དབང་ཆེན་གསེར་གྱི་ས་གཞི། ཨོཾ་བཛྲ་རེ་ཁེ་ཨཱཎཱཧཱུྃ། ཕྱི་ལྕགས་རི་ཁོར་ཡུག་གིས་བསྐོར་བའི་དབུས་སུ་ཧཱུྃ། རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་ཛ་བུ་གླིང་། ནུབ་བ་ལང་སྤྱོད། བྱང་སྒྲ་མི་སྙན། ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། རིན་པོ་ཆེའི་རི་བོ། དཔག་བསམ་གྱི་ཤིང་།
འདོད་འཇོའི་བ། མ་རྨོས་པའི་ལོ་ཐོག །འཁོར་ལོ་རིན་པོ་ཆེ། ནོར་བུ་རིན་པོ་ཆེ། བཙུན་མོ་རིན་པོ་ཆེ། བློན་པོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ། གཏེར་ཆེན་པོའི་བུམ་པ། སྒེག་པ་མ། ཕྲེང་བ་མ། གླུ་མ། གར་མ། བདུག་སྤོས་མ། མེ་ཏོག་མ། མར་མེ་མ། དྲི་ཆབ་མ། ཉི་མ། ཟླ་བ། རིན་པོ་ཆེའི་གདུགས། ཕྱོགས་ལས་རྣམ་པར་རྒྱལ་བའི་རྒྱལ་མཚན། ལྷ་དང་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་འདི་ཉིད་དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་ཡི་དམ་དཀྱིལ་འཁོར་གྱི་ལྷ་ཚོགས། སངས་རྒྱས་དང་བྱང་ཆུབ་སེམས་དཔའ། དམ་པ་ཆོས་སྐྱོང་བའི་སྲུང་མ། གནོད་སྦྱིན་ནོར་ལྷའི་ཚོགས་དང་བཅས་པ་རྣམས་ལ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བདག་གི་རྒྱུད་ལ་བསོད་ནམས་དང་ཡེ་ཤེས་ཀྱི་ཚོགས་གཉིས་ཡོངས་སུ་རྫོགས་པར་བྱིན་གྱིས་བརླབ་ཏུ་གསོལ། །སྒྲིབ་གཉིས་བག་ཆགས་དང་བཅས་པ་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ། རིམ་པ་གཉིས་ཀྱི་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། སྐུ་གཉིས་ཀྱི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། །སྐྱབས་གནས་ཀུན་འདུས་བླ་མ་རིན་པོ་ཆེ། །དྲིན་ཅན་ཆོས་ཀྱི་རྗེ་ལ་
གསོལ་བ་འདེབས། །མཉམ་མེད་བཀའ་དྲིན་ཅན་གྱི་ཐུགས་རྗེས་གཟིགས། །འདི་ཕྱི་བར་དོ་ཀུན་ཏུ་བྱིན་གྱིས་རློབས། །འདྲེན་པ་ཀུན་འདུས་བླ་མ་རིན་པོ་ཆེ། །དྲིན་ཅན་ཆོས་ཀྱི་རྗེ་ལ་གསོལ་བ་འདེབས། །མཉམ་མེད་བཀའ་དྲིན་ཅན་གྱི་ཐུགས་རྗེས་གཟིགས། །འདི་ཕྱི་བར་དོ་ཀུན་ཏུ་བྱིན་གྱིས་རློབས། །ཡི་དམ་ཀུན་འདུས་བླ་མ་རིན་པོ་ཆེ། །དྲིན་ཅན་ཆོས་ཀྱི་རྗེ་ལ་གསོལ་བ་འདེབས། །མཉམ་མེད་བཀའ་དྲིན་ཅན་གྱི་ཐུགས་རྗེས་གཟིགས། །འདི་ཕྱིར་བར་དོ་ཀུན་ཏུ་བྱིན་གྱིས་རློབས། །སངས་རྒྱས་ཀུན་འདུས་བླ་མ་རིན་པོ་ཆེ། དྲིན་ཅན་ཆོས་ཀྱི་རྗེ་ལ་གསོལ་བ་འདེབས། །མཉམ་མེད་བཀའ་དྲིན་ཅན་གྱི་ཐུགས་རྗེས་གཟིགས། །འདི་ཕྱི་བར་དོ་ཀུན་ཏུ་བྱིན་གྱིས་རློབས། །དམ་ཆོས་ཀུན་འདུས་བླ་མ༴ །དྲིན་ཅན་ཆོས་ཀྱི་རྗེ་ལ༴ །མཉམ་མེད་བཀའ་དྲིན་ཅན་གྱི༴ །འདི་ཕྱི་བར་དོ་ཀུན་ཏུ༴ །དགེ་འདུན་ཀུན་འདུས་བླ་མ །དྲིན་ཅན་ཆོས་ཀྱི་རྗེ་ལ༴ །མཉམ་མེད་བཀའ་དྲིན་ཅན་གྱི་།འདི་ཕྱི་བར་དོ་ཀུན་ཏུ= །བྱང་སེམས་ཀུན་འདུས་བླ་མ །དྲིན་ཅན་ཆོས་ཀྱི་རྗེ་ལ༴ །མཉམ་མེད་བཀའ་དྲིན་ཅན་གྱི༴ །འདི་ཕྱི་བར་དོ་ཀུན་ཏུ །ཉན་རང་ཀུན་འདུས་བླ་མ= །དྲིན་ཅན་ཆོས་ཀྱི་རྗེ་ལ༴ །མཉམ་མེད་བཀའ་དྲིན་ཅན་གྱི= །འདི་ཕྱི་བར་དོ་ཀུན་ཏུ༴ །ཆོས་སྐྱོང་ཀུན་འདུས་བླ་མ༴ །དྲིན་ཅན་ཆོས་ཀྱི་རྗེ་ལ༴ །མཉམ་མེད་
བཀའ་དྲིན་ཅན་གྱི༴ །འདི་ཕྱི་བར་དོ་ཀུན་ཏུ༴ །ནོར་ལྷ་ཀུན་འདུས་བླ་མ་རིན་པོ་ཆེ། །དྲིན་ཅན་ཆོས་ཀྱི་རྗེ་ལ་གསོལ་བ་འདེབས། །མཉམ་མེད་བཀའ་དྲིན་ཅན་གྱི་ཐུགས་རྗེས་གཟིགས། །འདི་ཕྱི་བར་དོ་ཀུན་ཏུ་བྱིན་གྱིས་རློབས། །དེ་ནས་རྩ་བའི་བླ་མའི་གསོལ་འདེབས་བརྒྱ་རྩ་སོགས་ཅི་ནུས་དང་། མཎྜལ་ཚོམ་བུ་བདུན་མ་བརྒྱ་རྩ་དང་། སོ་བདུན་མ་གསོལ་གདབ་བཅས་སྤེལ་མར་ཅི་ནུས་ཕུལ་བའི་མཐར། གང་གི་མཆོད་རྫས་ཞིང་ཁམས་རྒྱ་མཚོ་རྒྱ་མཚོའི་རྡུལ་སྙེད་སྣ་ཚོགས་མཆོད་པའི་སྤྲིན་ཕུང་གིས། །རྣམ་པར་བརྒྱན་པའི་རྒྱན་གྱི་འོད་ཟེར་ཕྱོགས་བཅུར་འཕྲོ་བའི་འོད་ཀྱི་རྩེ་མོར་རྒྱ་མཚོ་ཡི། །རྡུལ་གྱི་གྲངས་སྙེད་རིན་ཆེན་པདྨོ་རིན་ཆེན་འོད་འབྱིན་ཀུན་ནས་རྒྱས་པའི་སྙིང་པོ་ལ། །ལྷ་དང་མི་ཡི་འདོད་ཡོན་རྨད་འདི་འདོད་དགུའི་དཔལ་འབྱུང་བྱེ་བ་ཕྲག་བརྒྱར་ལེགས་གནས་པ། །ཀུན་ཏུ་བཟང་པོའི་རྣམ་འཕྲུལ་ཇི་བཞིན་ཀུན་ནས་དགེ་བའི་སེམས་ཀྱིས་སྤྲུལ་པའི་མཆོད་སྤྲིན་འདི། །ཆོས་དབྱིངས་ཇི་བཞིན་ནམ་མཁའི་ཁམས་ཀུན་ཀུན་ལ་ཁྱབ་ཅིང་སེམས་ཅན་དབྱིངས་མཐའ་ཇི་སྲིད་པར། །རྣམ་པར་གནས་ནས་ཆོས་ཀྱི་རྒྱལ་པོ་རྒྱལ་བ་རྒྱལ་སྲས་རང་རྒྱལ་དགྲ་ལས་རྣམ་རྒྱལ་བས། །ཀུན་ནས་བསྐོར་བའི་དཀྱིལ་འཁོར་ཀུན་ཏུ་རྣམ་པར་མཆོད་པའི་མཆོད་པ་ཀུན་གྱིས་མཉེས་གྱུར་ཅིག །དེང་ནས་བྱང་ཆུབ་སྙིང་པོའི་བར། །བདག་གི་ལུས་དང་ལོངས་
སྤྱོད་དང་། །དུས་གསུམ་དགེ་བའི་དངོས་པོ་རྣམས། །སེམས་ཅན་ཀུན་གྱི་དོན་བགྱིད་ཕྱིར། །གུས་པས་ཁྱེད་ལ་འབུལ་བར་བགྱི། །ཀུན་ནས་གཟིགས་པའི་སྤྱན་ལྡན་པའི། །ཡོན་གནས་དམ་པ་ཁྱེད་རྣམས་ཀྱིས། །བདག་ལ་བརྩེ་བར་ཉེར་དགོངས་ཏེ། །བདག་གི་འདི་དག་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །ཨོ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་རཏྣ་མཎྜ་ལ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཨཱཧཱུྃ། ཞེས་བརྗོད། བདུན་པ་ནང་མཆོད་ནི། ཨོཾ་ཨཱཧཱུཾ། བར་མ་དབུགས་དབྱུང་མཆོག་དག་དང་། །དྲི་ཡི་ཆུ་དང་དག་པ་ཡི། །ཟག་མེད་བདུད་རྩིའི་རྒྱ་མཚོ་ཆེས། །ཧེ་རུ་ཀ་དཔལ་བླ་མ་མཆོད། །ཨོཾ་སརྦ་བཛྲ་ཀ་མི་ནི། སརྦ་བྷཀྵ་ཤོ་དྷ་ཡ། གུ་གྱ་བདྲི་ཎཱི་ཧཱུྃ། ཞེས་དང་། སྤྲོ་ན། རྡོ་རྗེ་འཆང་ཆེན་རྡོ་རྗེ་རྣལ་འབྱོར་མ། །གྲུབ་ཆེན་ནཱ་རོ་ཏ་པ་ཕམ་མཐིང་པ། །ཤེས་རབ་བརྩེགས་དང་མལ་གྱོ་ས་སྐྱ་པ། །རྗེ་བཙུན་སྐུ་མཆེད་ཞལ་དུ་ཨོཾ་ཨཱཧཱུྃ། ས་སྐྱ་པཎ་ཆེན་འཕགས་པ་རིན་པོ་ཆེ། །དཀོན་མཆོག་དཔལ་དང་ཆོས་རྗེ་བསོད་ནམས་དཔལ། །བསོད་ནམས་རྒྱལ་མཚན་དཔལ་ལྡན་ཚུལ་ཁྲིམས་དང་། །ཡེ་ཤེས་རྒྱལ་མཚན་ཞལ་དུ་ཨོཾ་ཨཱཿཧཱུྃ། ཀུན་དགའ་བཟང་པོ་དཀོན་མཆོག་རྒྱལ་མཚན་ཞབས། །གཞན་ཡང་དཔལ་ལྡན་བླ་མའི་ཐུགས་ཀྱི་སྲས། །སེང་གེ་རྒྱལ་མཚན་རྒྱལ་བ་མཆོག་དབྱངས་དང་། །
ནམ་མཁའ་རྒྱལ་མཚན་ཞལ་དུ་ཨོཾ་ཨཱཧཱུཾ། བརྒྱུད་སྲོལ་ཀུན་འདུས་བདག་ཆེན་རྡོ་རྗེ་འཆང་། །ཀུན་སྤང་ཆོས་རྗེ་ཚར་ཆེན་མཁྱེན་བརྩེའི་དབང་། །བསླབ་གསུམ་རྒྱལ་མཚན་དབང་ཕྱུག་རབ་བརྟན་དཔལ། །བསོད་ནམས་མཆོག་ལྡན་ཞལ་དུ་ཨོཾ་ཨཱཿཧཱུྃ། བསོད་ནམས་མཆོག་གྲུབ་མཁྱེན་རབ་བྱམས་པའི་དཔལ། །རྨོར་ཆེན་རྗེ་དང་ཁྱབ་བདག་གནས་གསར་པ། ཀུན་དགའ་བློ་གྲོས་ནམ་མཁའ་འཆི་མེད་དང་། །རྩ་བའི་བླ་མའི་ཞལ་དུ་ཨོཾ་ཨཱཿཧཱུྃ། གཞན་ཡང་རྩ་བརྒྱུད་བླ་མ་ཡི་དམ་ལྷ། །སངས་རྒྱས་བྱང་སེམས་དཔའ་བོ་རྣལ་འབྱོར་མ། །རྡོ་རྗེའི་ཆོས་སྲུང་ནོར་ལྷའི་ཚོགས་དང་བཅས། །མཆོད་འོས་རྒྱ་མཚོའི་ཞལ་དུ་ཨོ་ཨཱཧཱུྃ། ཞེས་འབུལ། བརྒྱད་པ་ཡིད་བྱུང་གི་མཆོད་པ་ནི། ནམ་མཁའ་མཛོད་ཀྱི་ཕྱག་རྒྱ་དཔྲལ་བར་བཅས་ཏེ། ན་མོ། ཆོས་ཀྱི་དབྱིངས་ཀྱི་བྱིན་རླབས་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་རྣམ་པར་དག་པའི་བྱིན་རླབས་དང་། སྔགས་དང་ཕྱག་རྒྱའི་མཐུ་དང་། བདག་གི་མོས་པ་དང་། ཏིང་ངེ་འཛིན་དང་། སྨོན་ལམ་གྱི་དབང་གིས་འཇིག་རྟེན་གྱི་ཁམས་ན་བདག་པོས་ཡོངས་སུ་མ་བཟུང་བའི་མཆོད་པའི་བྱེ་བྲག་ཇི་སྙེད་ཡོད་པ་དང་། གཞན་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་པའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ་ཞིག །བླ་
མ་དང་རྗེ་བཙུན་རྡོ་རྗེ་རྣལ་འབྱོར་མའི་ལྷ་ཚོགས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཞེས་བརྗོད་ལ་སེ་གོལ་བརྡབ། ཡང་ཕྱག་རྒྱ་བཅས་ལ། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨཱ་ཝརྟ་ཡ་ཨཱ་ཝརྟ་ཡ་ཧོ༔ ན་མས་མནྟ་བུདྡྷ་ནཱཾ། ཨ་བྷི་སྨ་ར་ཎ་ཨི་མཾ་ག་ག་ན་ཁཾ། དྷརྨ་དྷཱ་ཏུ་ཨཱ་ཀཱ་ཤ་ས་མནྟ་ནཱཾ། སརྦ་ཏ་ཐཱ་ག་ཏ་ཨ་པ་རི་ཤོ་དྷ་ཡེ། མཎྜལ་མ་མ་པྲ་ཎི་དྷི། པུཎྱ་ཛྙཱ་ན་བ་ལེ་ན་སརྦ་ཏ་ཐཱ་ག་ཏ་བ་ལེན། བཛྲ་སྭསྦྱན་བ་ལེ་ན་ཙ་ཡ་སྭཱ་ཧཱ། ཞེས་བརྗོད་དེ་སེ་གོལ་བརྡབ། ཡང་ཕྱག་རྒྱ་བཅས་ཏེ་སེ་གོལ་བརྡབ་པའི་མཐར་རོལ་མོའི་སྒྲ་དང་བཅས་པས། ལྷ་མའི་ལོངས་སྤྱོད་ཕུན་ཚོགས་ཐམས་ཅད་དང་། །ཀུན་ཏུ་བཟང་པོའི་མཆོད་སྤྲིན་ཆེན་པོ་དང་། །གསང་དང་རབ་གསང་གསང་ཆེན་བླ་མེད་ཀྱི། །མཆོད་པའི་སྤྲིན་ཆེན་རྒྱ་མཚོ་དག་གིས་མཆོད། ། ཅེས་བརྗོད་ལ་ཅི་ནུས་པའི་མཆོད་པ་དབུལ་བར་བྱའོ། །བཞི་པ་སྡིག་པ་བཤགས་པ་ལ་སོགས་པའི་ཡན་ལག་ལྷག་མ་རྣམས་བྱ་བ་ནི། བདག་གི་ལུས་དང་ངག་དང་ཡིད་ཀྱིས་ཀྱང་། །ཆགས་དང་ཞེ་སྡང་རྣམ་པར་རྨོངས་སེམས་ཀྱིས། །སྲིད་པ་ཉམ་ངར་སྡིག་པ་ཅི་བགྱིས་པ། །དེ་རྣམས་བསྡམས་ཏེ་ཐམས་ཅད་སོ་སོར་བཤགས། །རྫོགས་སངས་རྒྱས་མགོན་བྱང་ཆུབ་སེམས་དཔའ་དང་། །འཕགས་པ་གཞན་གྱི་དགེ་
བ་གང་བགྱིས་པ། །དེ་ཡང་བླ་མེད་བྱང་ཆུབ་འབྲས་ཐོབ་པར། །མ་ལུས་པ་ལ་རྟག་ཏུ་རྗེས་ཡི་རང་། །རྫོགས་སངས་རིན་ཆེན་རང་གི་སེམས་གནས་དང་། །རྟོག་པའི་དྲྭ་བ་རབ་དྲལ་དམ་པའི་ཆོས། །ས་དབང་ཚོགས་དང་བརྟུལ་ཞུགས་དབང་དགེ་འདུན། །རབ་ཏུ་དད་པས་རྟག་ཏུ་སྐྱབས་སུ་མཆི། །རྒྱལ་དང་བདག་ཉིད་ལེགས་སྐྱོབ་དེ་དག་ལ། །ཀུན་ནས་ཀུན་ཏུ་བདག་གིས་ལུས་འདི་འབུལ། །སེམས་དཔའ་མཆོག་གིས་བདག་ཉིད་ཡོངས་བཞེས་ཤིག །དད་པས་ཁྱེད་ཀྱི་འབངས་སུ་མཆི་བར་བགྱི། །གློ་བུར་ཉོན་མོངས་ཚད་པས་གདུང་བ་ཡི། །སྐྱོབ་པ་སྐྱེ་བོ་མཐའ་དག་གྲོལ་བའི་ཕྱིར། །དམ་ཆོས་བདུད་རྩིའི་ཆོས་ཟློ| རྣམས་བཤད་པ་རུ། །སྨན་མཆོག་མགོན་པོ་ལ་ནི་བདག་བསྐུལ་ལོ། །མཆོག་ཏུ་མི་དགེ་ལ་སོགས་རབ་བཅོམ་པའི། །བདུད་རྩི་སྐྱེ་རྒ་ན་དང་འཆི་བ་ལས། །མྱ་ངན་འདའ་བཞེད་གྱུར་པ་སྤང་བར་ནི། །སྨན་མཆོག་མགོན་པོ་ལ་ནི་བདག་གསོལ་འདེབས། །ལུས་ངག་ཡིད་ཀྱིས་བསོད་ནམས་ནི། །བགྱིས་སམ་བགྱིད་དུ་སྩལ་བའམ། །རྗེས་སུ་ཡི་རང་གང་ཅིའང་རུང་། །དེས་ནི་འཇིག་རྟེན་ཀུན་མཁྱེན་ཤོག །སངས་རྒྱས་འཇིག་རྟེན་གང་བྱུང་ལ། །སྐལ་ལྡན་བྱང་ཆུབ་སེམས་དཔའ་ཡིས། །བྱང་ཆུབ་ཏུ་ནི་སེམས་བསྐྱེད་ལྟར། །དེ་རིང་ཉིད་དུ་སེམས་བསྐྱེད་དོ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་
སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །དེ་བཞིན་བརྟན་པོར་བཟུང་བར་བགྱི། །ཇི་ལྟར་ཕྱོགས་བཅུའི་རྒྱལ་བ་ཡིས། །སྔོན་གྱི་བདེ་གཤེགས་གྲངས་མེད་ལ། །ཐུགས་བསྐྱེད་དམ་ཚིག་དཔག་མེད་དག །འཚང་རྒྱའི་བར་མི་བཏང་བ་ལྟར། །བདག་ནི་དེང་ནས་བྱང་ཆུབ་བར། །ལུས་སྲོག་ལྟོས་པ་མེད་པར་ཡང་། །བསླབ་འདི་མིག་བཞིན་བསྲུང་ལ་གནས། །ཡེ་ཤེས་ཐུགས་ཀྱིས་དགོངས་སུ་གསོལ། །རྣམ་དག་ཡེ་ཤེས་ལྔར་གྱུར་ལྔ། །རྟག་ཏུ་བསྟེན་ཅིང་སྤྱད་པར་བགྱི། །རྒྱལ་བ་རིགས་ལྔའི་བརྟུལ་ཞུགས་དག །སྲོག་གི་ཕྱིར་ཡང་མི་གཏོང་ངོ་། །སྐུ་གསུང་ཐུགས་ཀྱི་རྡོ་རྗེ་དག ། རྟག་ཏུ་མི་ཕྱེད་བརྟུལ་ཞུགས་བཟུང་། །རྒྱལ་བས་དགོངས་ཏེ་གསུངས་པ་ཡི། །དམ་ཚིག་བཞི་པོ་སྲུང་བར་བགྱི། །རྩ་བའི་ལྟུང་བ་བཅུ་གཅིག་སོགས། །རིགས་སྔགས་འཆང་ཀུན་མི་འདའ་ལྟར། །དེང་ནས་། བླ་མེད་བྱང་ཆུབ་བར། །བདག་གིས་ཚུལ་བཞིན་སྲུང་བར་བགྱི། །ཉིན་དང་མཚན་མོ་ལན་གསུམ་བཟླ། །ཟླ་རེ་བཅུ་ཕྲག་གཉིས་པ་དང་། །བཅོ་ལྔ་ལ་ནི་རབ་ཏུ་མཆོད། །ཐེག་པ་དམན་ལ་འདོད་མི་བྱ། །འཁོར་བ་དག་ཀྱང་མི་སྤང་ཞིང་། །མྱ་ངན་འདས་པ་དགར་མི་འགྲོ། །དཔའ་བོ་རྣལ་འབྱོར་མ་ཀུན་ལ། །གུས་པས་བསྙེན་བཀུར་མཆོད་པར་བྱ། །བདག་གིས་སེམས་ཅན་ཐམས་ཅད་ལ། །བརྙས་པ་ཉིད་དུ་མི་
བྱའོ། །ཕྱག་རྒྱ་གཞོན་པ་མཚོན་ཆ་དང་། །མཚན་མ་འགོམ་པར་མི་བྱའོ། །ཞེས་དམ་བཅས་པ་ལ་བརྟེན་ནས་ལྔ་པ་གནང་བ་ནོད་པ་ནི། བླ་མ་ལ་སོགས་པའི་ཚོགས་ཞིང་རྣམས་ཐུགས་དགྱེས་པ་ཆེན་པོས་ཞལ་འཛུམ་མདངས་སུ་བཞད་ཅིང་། རིགས་ཀྱི་བུ་ཁྱོད་གནས་པ་འདི་ལ་གནས་ན་ལེགས་པ་ཡིན་གྱི། གནས་པ་འདིས་གནས་ན་མཆོག་གི་དངོས་གྲུབ་འགྲུབ་པར་འགྱུར་རོ། །ཞེས་གསུང་གིས་དངོས་སུ་གནང་བ་བྱིན་པར་བསམ། དྲུག་པ་སྨོན་ལམ་གདབ་པ་ནི། དེ་ལྟར་བསགས་པའི་དགེ་བའི་རྩ་བ་ལ་བརྟེན་ནས་སྨོན་པའི་གནས་འདི་དག་མྱུར་དུ་འགྲུབ་པར་གྱུར་ཅིག་སྙམ་དུ་བསམ་པ་རྩེ་གཅིག་པས། སྐྱབས་གནས་ཀུན་འདུས་གདན་གསུམ་ཚང་བའི་སྐུ། །ཉོན་མོངས་གདུང་སེལ་ཆོས་སྒྲ་སྒྲོགས་པའི་གསུང་། །ཡེ་ཤེས་ལྔ་ལྡན་བདེ་གསལ་མི་རྟོག་ཐུགས། །དཔལ་ལྡན་བླ་མ་དྲན་ཅིང་གསོལ་བ་འདེབས། །མཐའ་ཡས་རྒྱལ་བའི་བདེ་སྟོང་ཟློས་གར་ནི། །སོགས་མཁའ་སྤྱོད་ཞལ་བཟང་བལྟ་བའི་སྨོན་ལམ་གདབ། གསུམ་པ་རྗེས་ཀྱི་ཆོ་ག་ལ་དྲུག་ལས། དང་པོ་འདོད་པའི་དོན་ལ་གསོལ་བ་གདབ་པ་ནི། གོང་ལྟར་མཆོད་པ་བསང་སྦྱང་། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན་སོགས་ནས། རོལ་མོ་རྣམས་དྭངས་ཞིང་ཐོགས་པ་མེད་པ་
ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨགྷཾ་ཨཱཿཧཱུྃ་ནས། ཤཔྟ་ཨཱཿཧཱུྃ་གི་བར་གྱིས་བྱིན་བརླབས། ཨོཾ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་ར་ཨགྷཾ་པྲ་ཏཱི་ཙྪ་སྭཱ་ཧཱ་ཞེས་སོགས་ཆུ་གཉིས་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པས་མཆོད། ཐལ་མོ་སྦྱར་བས། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོར་གྱུར་བ། ཆོས་ཀྱི་རྗེ། ཆོས་ཀྱི་རྒྱལ་པོ། ཆོས་ཀྱི་དབང་ཕྱུག །ཆོས་དམ་པའི་འབྱོར་པ་ཐམས་ཅད་ཀྱིས་ཕུན་སུམ་ཚོགས་ཤིང་འཁོར་བ་དང་མྱ་ངན་ལས་འདས་པའི་དཔལ་དམ་པར་གྱུར་པ་བླ་མ་དམ་པའི་ཞབས་ཀྱི་པདྨོ་དྲི་མ་མེད་པ་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། །བདག་གི་སྔོན་གྱི་ལས་ལས་གྱུར་པ་གི དང་། གནས་སྐབས་ཀྱི་རྐྱེན་ལས་གྱུར་པའི་མི་དང་མི་མ་ཡིན་པ་དང་། འབྱུང་པོའི་གནོད་པ་དང་། ཉེ་བར་འཚེ་བ་དང་། བྱུར་དང་སྐལ་པ་ངན་པ་དང་། ཕྱི་དང་ནང་གི་བར་དུ་གཅོད་པ་ཐམས་ཅད་ཉེ་བར་ཞི་བར་བྱིན་གྱིས་བརླབ་ཏུ་གསོལ། །ཚེ་དང་དཔལ་དང་འབྱོར་པ་དང་དབང་ཕྱུག་ཕུན་སུམ་ཚོགས་པར་བྱིན་གྱིས་བརླབ་ཏུ་གསོལ། །འཇིག་རྟེན་གྱི་ཆོས་བརྒྱད་དང་མཚན་མའི་རྣམ་པར་གཡེང་བ་ལ་སོགས་པ་
སྲིད་པར་འཁོར་བར་འགྱུར་བའི་རྣམ་པར་རྟོག་པ་དང་། གཞན་གྱི་དོན་ལ་སྐྱོ་བ་དང་། རང་ཉིད་ཞི་བར་འདུན་པ་ལ་སོགས་པ་མྱ་ངན་ལས་འདའ་བར་གྱུར་པའི་རྣམ་པར་རྟོག་པ་གང་ལགས་པ་ཐམས་ཅད་མི་འབྱུང་བར་བྱིན་གྱིས་བརླབ་ཏུ་གསོལ། །བདག་གི་སེམས་ལས་སུ་རུང་བ་དང་། བག་ཡོད་པ་དང་། དྲན་པ་དང་ཤེས་བཞིན་ཡང་དག་པ་དང་ལྡན་པར་བྱིན་གྱིས་བརླབ་ཏུ་གསོལ། །བདག་གི་ཚུལ་ཁྲིམས་ཀྱི་ཕུང་པོ་དང་། དམ་ཚིག་དང་སྡོམ་པའི་ཚོགས་རྣམ་པར་དག་ཅིང་། སྡིག་པ་དང་། སྒྲིབ་པ་དང་། ལྟུང་བ་དང་། ཉེས་པའི་དྲི་མས་མ་གོས་པར་བྱིན་གྱིས་བརླབ་ཏུ་གསོལ། །དད་པ་དང་སྙིང་རྗེ་དང་ཤེས་རབ་ཕུན་སུམ་ཚོགས་པ་དང་ལྡན་ཞིང་བྱང་ཆུབ་ཀྱི་སེམས་གཉིས་ཟུང་དུ་ཆུད་ནས་ལུང་དང་མངོན་པར་རྟོགས་པས་བསྡུས་པའི་ཆོས་ཀྱི་སྣང་བ་དམ་པ་དང་རྟོགས་པ་དགེ་བར་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། །གང་གི་ཚེ་བདག་འཆི་བར་གྱུར་པ་དེའི་ཚེ་ཚེ་འདི་དང་འཇིག་རྟེན་འདི་ལ་མངོན་པར་ཞེན་པ་དང་བྲལ་ཞིང་། ལུས་དང་སེམས་ལ་ཟུག་རྔུ་དང་སྡུག་བསྔལ་ཅུང་ཟད་ཙམ་ཡང་མི་འབྱུང་བར་དགའ་བ་དང་སྤྲོ་བ་དང་ཡིད་གསལ་བ་མཆོག་དང་ལྡན་ཞིང་། ཏིང་ངེ་འཛིན་དམ་པ་རྒྱུད་ལ་སྐྱེས་ནས། བླ་མ་དང་དཀྱིལ་འཁོར་གྱི་ལྷ་ཚོགས་རྣམས་དང་། དཔའ་བོ་དང་རྣལ་འབྱོར་མའི་ཚོགས་ཡང་དག་པར་
མཐོང་ཞིང་། དེ་དག་གི་རྣམ་པར་འཕྲུལ་པ་བསམ་གྱིས་མི་ཁྱབ་པ་དང་བཅས་པས་མདུན་བསུས་ཏེ། བར་དོའི་འཇིགས་པ་ཐམས་ཅད་དང་བྲལ་ཞིང་། བདུད་དང་གཤིན་རྗེའི་སྤྱོད་ཡུལ་ཐམས་ཅད་ལས་ཤིན་ཏུ་འདས་ནས་རིག་པ་འཛིན་པ་དང་མཁའ་ལ་སྤྱོད་པ་ལ་སོགས་པའི་གོ་འཕང་མཆོག་ཏུ་སྐྱེ་བར་བྱིན་གྱིས་བརླབ་ཏུ་གསོལ། །སྐྱེ་བ་དང་སྲིད་པ་ཐམས་ཅད་དུ་འཇིག་རྟེན་དང་འཇིག་རྟེན་ལས་འདས་པའི་རྒུད་པ་ཐམས་ཅད་དང་བྲལ་ཞིང་སྲིད་པ་དང་། ཞི་བའི་འབྱོར་པ་ཕུན་སུམ་ཚོགས་པ་ཐོབ་སྟེ། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་གསུང་རབ་རྒྱ་མཚོའི་ཚོགས་ཡང་དག་པར་བཟུང་ནས། ཆོས་ཀྱིས་ཕོངས་པའི་སེམས་ཅན་ཐམས་ཅད་ལ་ཆོས་ཀྱི་སྦྱིན་པ་རྒྱ་ཆེན་པོ་གཏོང་ཞིང་། སངས་རྒྱས་ཀྱི་ཞིང་ཡོངས་སུ་དག་པ་དང་། སེམས་ཅན་ཡོངས་སུ་སྨིན་པར་བྱས་ནས། དངོས་པོ་ཐམས་ཅད་ཀྱིས་བླ་མ་དམ་པ་མཉེས་པར་བྱས་ཏེ་ས་དང་ལམ་ཐམས་ཅད་བདེ་བླག་ཏུ་བགྲོད་ནས། སྐུ་བཞི་ཡེ་ཤེས་ལྔ་དང་ལྡན་པའི་རྡོ་རྗེ་འཆང་ཆེན་པོའི་གོ་འཕང་མྱུར་དུ་ཐོབ་པར་བྱིན་གྱིས་བརླབ་ཏུ་གསོལ། །ཞེས་མོས་གུས་ཤུགས་དྲག་པོས་གསོལ་བ་གདབ། གཉིས་པ་ཚོགས་ཞིང་བསྡུ་བ་ནི། དེ་ལྟར་གུས་པས་མཆོད་ཅིང་གསོལ་བཏབ་མཐུས། །མཆོད་ཡུལ་མགྲོན་རྣམས་མཐའ་ནས་རིམ་པ་བཞིན། །འོད་དུ་ཞུ་སྟེ་རྩ་བའི་བླ་
མར་ཐིམ། །དེ་ཡང་རང་གི་ཚངས་པའི་བུ་ག་ནས། །ཞུགས་ཏེ་སྙིང་དབུས་པད་དཀར་བཞད་པའི་རྩེར། །བདེ་སྟོང་ཉི་ཟླའི་དཀྱིལ་འཁོར་རྒྱས་པའི་དབུས། །དགྱེས་པ་ཆེན་པོའི་ངོ་བོར་རྟག་བཞུགས་ནས། ། དབང་དང་དངོས་གྲུབ་ཐམས་ཅད་སྩོལ་བར་གྱུར། །ཞེས་བརྗོད་ཅིང་བསམ་ལ། དད་མོས་རྩེ་གཅིག་པའི་ངང་ནས། བླ་མའི་མཚན་དཔེའི་སྣང་ཆ་གསལ་ལམ་མེ་བ་ལ་སེམས་ཞུགས་པ་བཞིན་ཆེར་གྱིས་གཏད་དེ་ཅུང་ཟད་མཉམ་པར་བཞག་གོ། །གསུམ་པ་ཐུན་ལས་ལྡང་བ་ནི། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པདྨའི་གདན་བཞུགས་ནས། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཐོས་པ་རྒྱ་མཚོའི་མཆོད་ཡོན་ཀུན་ནས་འཁྱིལ། །ཡོན་ཏན་མེ་ཏོག་ཚུལ་ཁྲིམས་བདུག་སྤོས་སྤྲིན། །ཤེས་རབ་སྒྲོན་མེ་དད་པ་སྤོས་ཆུའི་མཚོ། ། ཏིང་འཛིན་བདུད་རྩིའི་ཞལ་ཟས་དམ་པ་དང་། །བསྟོད་དབྱངས་སྙན་པའི་སིལ་སྙན་སྒྲ་འབྱིན་ཅིང་། །ཀུན་ནས་སྙིང་བརྩེ་རྣམ་དཔྱོད་སྤོབས་པ་ཡི། །གདུགས་དང་རྒྱལ་མཚན་བ་དན་བསྒྲེང་བ་ཡིས། ། བདག་ལུས་གཞལ་མེད་ཁང་བརྩེགས་རབ་བརྒྱན་ནས། །སྙིང་གི་ཆུ་སྐྱེས་ཐིག་ལེ་ཟླ་རྒྱས་ལ། །བརྟན་པར་བཞུགས་པའི་ཆོས་རྗེ་མཆོད་བགྱིད་ཅིང་། །ངེས་པར་འདུན་པའི་ཡིད་ཀྱིས་གསོལ་བཏབ་ནས། །
འགྲོ་བའི་བླ་མ་རྟག་ཏུ་མཉེས་གྱུར་ཅིག །བཞི་པ་དགེ་བ་བསྔོ་བ་ནི། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོར་སྤྱོད་ཕྱིར་རབ་ཏུ་བསྔོ་བར་བགྱི། །ལྔ་པ་སྨོན་ལམ་གདབ་པ་ནི། སྐྱེ་བ་ཀུན་ཏུ་ཡང་དག་བླ་མ་དང་། འབྲལ་མེད་ཆོས་ཀྱི་དཔལ་ལ་ལོངས་སྤྱོད་དེ། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །སྐྱེ་ཞིང་སྐྱེ་བ་དག་ནི་ཐམས་ཅད་དུ། །རིགས་བཟང་བློ་གསལ་ང་རྒྱལ་མེད་པ་དང་། །སྙིང་རྗེ་ཆེ་ཞིང་བླ་མ་ལ་གུས་ནས། །དཔལ་ལྡན་བླ་མའི་དམ་ཚིག་ལ་གནས་ཤོག །བདག་སོགས་གདུལ་བྱར་གྱུར་པ་ཐམས་ཅད་ཀྱང་། །ལས་འབྲས་ལྷུར་ལེན་གསུང་རབ་དོན་ལ་མཁས། །ཚུལ་ཁྲིམས་དག་ཅིང་ཐོས་ལ་མངོན་བརྩོན་ཏེ། །ཐུབ་བསྟན་ཕྱོགས་བཅུར་རྒྱས་པར་མཛད་དུ་གསོལ། །དྲུག་པ་ཤིས་པ་བརྗོད་པ་ནི། སྤྲོ་ན་རྣལ་འབྱོར་མའི་བླ་མ་བརྒྱུད་པའི་བཀྲ་ཤིས་ལོགས་ནས་འབྱུང་བ་ལྟར་རམ། དེ་ཙམ་མི་ནུས་ན། རྒྱལ་མཚན་རྩེ་མོ་དབང་གི་རྒྱལ་པོ་ལྟར་ཞེས་
སོགས་ཤིས་པ་བརྗོད་པ་ཇི་ལྟར་རིགས་པས་མཐའ་བརྒྱན་ཅིང་མེ་ཏོག་གི་ཆར་སིལ་མར་དགྲམ་པར་བྱའོ།། ༈ །།གལ་ཏེ་རྣལ་འབྱོར་མའི་འཁྲིད་རིམ་ཟབ་མོས་རྒྱུད་སྨིན་པའི་གང་ཟག་གིས་བླ་མའི་རྣལ་། འབྱོར་ཐུན་མོང་མ་ཡིན་པ་ལ་བརྟེན་ནས་བླ་མ་མཆོད་པའི་ཆོ་ག་ཉམས་སུ་བླངས་བར་འདོད་ན། སྦྱོར་བ་སྔར་བཞིན་དང་། དངོས་གཞི་ལ། དང་པོ་ཚོགས་ཞིང་གསལ་གདབ་པ་ནི། ཕུན་ཚོགས་སྲིད་ཞིའི་དངོས་པོ་མཐའ་དག་རང་སེམས་ལྷན་ཅིག་སྐྱེས་པ་ཡི། །ཡེ་ཤེས་ཆེན་པོའི་རྣམ་འཕྲུལ་ལས་བྱུང་བརྗོད་བྲལ་མཁའ་དབྱིངས་དག་པའི་ཀློང་། །ཕུལ་བྱུང་སྣ་ཚོགས་མཆོད་པའི་སྤྲིན་ཕུང་དུ་མས་མངོན་པར་མཛེས་པའི་དབུས། །མི་འཇིགས་སེང་གེ་བརྒྱད་ཀྱིས་རབ་བཏེགས་ནོར་བུའི་ཁྲི་འཕང་མཐོན་པོའི་རྩེར། །པད་དཀར་འདབ་བརྒྱ་བཞད་པའི་ལྟེ་བར་ཟླ་ཤེལ་གསར་པའི་གདན་སྟེང་དུ། །དུས་གསུམ་རྒྱལ་ཀུན་འདུས་པའི་ངོ་བོར་རྩ་བའི་བླ་མ་རྡོ་རྗེ་ཆོས། །པདྨ་རཱ་གའི་རྡུལ་མང་བརྩེགས་པར་ཉིན་བྱེད་བྱེ་བས་འཁྱུད་པ་ཡི། །བརྒྱད་གཉིས་ལང་ཚོའི་མཚན་དཔེའི་མཚར་སྡུག་བདེ་སྟོང་ཉམས་བརྒྱས་རབ་ཏུ་སྒེག །ཕྱག་གཉིས་ཐབས་ཤེས་རྡོ་རྗེ་དྲིལ་བུ་ཐུགས་ཀར་བསྣོལ་བའི་ཚུལ་གྱིས་འཛིན། །གནག་སྣུམ་མཐོན་མཐིང་རལ་པའི་ཅོད་པན་ཡིད་འཕྲོག་ནོར་བུའི་ཟུར་ཕུད་ཅན། །དར་དང་རུས་པའི་རྒྱན་གྱིས་
རབ་མཛེས་ཞབས་ཟུང་རྡོ་རྗེའི་སྐྱིལ་ཀྲུང་གིས། །འོད་དང་འོད་ཟེར་དུ་མ་འཕྲོ་བཞིན་བདག་ལ་དགེས་པའི་ཚུལ་གྱིས་བཞུགས། །དེ་མཐར་མདུན་གྱི་ཆ་ནས་བརྩམས་ཏེ་སངས་རྒྱས་རྡོ་རྗེ་འཆང་ཆེན་སོགས། །ཚད་མེད་མཁྱེན་དང་བརྩེ་བའི་བདག་ཉིད་བརྒྱུད་པའི་བླ་མ་ཐམས་ཅད་ཀྱང་། །དཔའ་བོ་རྡོ་རྗེ་ཆོས་ཀྱི་རྣམ་པས་མངོན་སུམ་ལྟ་བུར་བསྐོར་བ་རྣམས། །མཁའ་དབྱིངས་མཛེས་མར་དབང་པོའི་གཞུ་བཞིན་སྣང་སྟོང་ཟུང་འཇུག་ཆེན་པོའི་སྐུར། །ཡོངས་ཤར་གནས་གསུམ་ཡི་གེས་མཚན་ལས་འོད་ཟེར་དཔག་ཡས་རབ་འཕྲོས་པས། །བརྒྱུད་པའི་བླ་མ་ཡི་དམ་ལྷ་ཚོགས་རྫོགས་པའི་སངས་རྒྱས་བྱང་ཆུབ་སེམས། །ཉན་ཐོས་རང་རྒྱལ་དཔའ་བོ་མཁའ་འགྲོ་ཆོས་སྐྱོང་སྲུང་མ་ནོར་ལྷར་བཅས། །སྐྱབས་གནས་དཀོན་མཆོག་རྒྱ་མཚོའི་ཚོགས་རྣམས་སྤྱན་དྲངས་གཉིས་སུ་མེད་པར་གྱུར། །ཞེས་གསལ་བཏབ། གཉིས་པ་ཕྱག་འཚལ་བ་ནི། གང་གི་དྲིན་གྱིས་ལྷན་སྐྱེས་བདེ་ཆེན་ཉིད། །སྐད་ཅིག་ཉིད་ལ་འཆར་བའི་བཀའ་དྲིན་ཅན། །རྗེ་བཙུན་བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པདྨོར་ཕྱག་འཚལ་ལོ། །རྒྱལ་བ་རྒྱ་མཚོའི་རིགས་བདག་རྡོ་རྗེ་འཆང་། །རྒྱལ་བའི་ཡུམ་མཆོག་རྡོ་རྗེ་རྣལ་འབྱོར་མ། །རྒྱལ་སྲས་ཐུ་བོ་ནཱ་རོ་ཏ་པའི་ཞབས། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །
གསང་ཆེན་སློབ་བཤད་འཛིན་པའི་ཕམ་མཐིང་པ། །གསང་མཛོད་ཀུན་གྱི་གཏེར་གྱུར་ཤེས་རབ་བརྩེགས། །གསང་སྔགས་རྒྱ་མཚོའི་མངའ་བདག་མལ་ལོའི་ཞབས། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །རྡོ་རྗེ་འཆང་ཆེན་བླ་ཆེན་ས་སྐྱ་པ། །རྡོ་རྗེའི་སྲས་མཆོག་རྗེ་བཙུན་བསོད་ནམས་རྩེ། །རྡོ་རྗེ་འཛིན་པའི་གཙུག་རྒྱན་གྲགས་པའི་ཞབས། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །ས་སྐྱ་པཎ་ཆེན་གངས་ཅན་མཁས་པའི་རྗེ། །ས་གསུམ་སྐྱེ་རྒུའི་གཙུག་རྒྱན་འཕགས་པའི་མཆོག །ས་སྐྱའི་བསྟན་འཛིན་ཞང་སྟོན་དཀོན་མཆོག་དཔལ། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །གྲུབ་པའི་དབང་པོ་ན་བཟའ་བྲག་ཕུག་པ། །གྲུབ་མཆོག་མཁས་པའི་དེད་དཔོན་ཆོས་ཀྱི་རྗེ། །གྲུབ་རིགས་སྙན་བརྒྱུད་མངའ་བདག་ཡར་ཀླུང་པར། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །བདག་གཞན་འགྲོ་བའི་སྐྱབས་མགོན་རྒྱལ་བ་མཆོག །བདག་ཉིད་ཆེན་པོ་འཇམ་དབྱངས་ནམ་མཁའི་མཚན། །བདག་ཆེན་ཆོས་རྗེ་བློ་གྲོས་རྒྱལ་མཚན་ཞབས། །གུས་པས༴ བཀའ་དྲིན་མཉམ་མེད་རྗེ་བཙུན་རྡོ་རིང་པ། །བཀའ་བཞིན་སྒྲུབ་པའི་བསྟན་འཛིན་བློ་གསལ་དབང་། །བཀའ་བརྒྱུད་གསང་ཆེན་སྨྲ་བ་མཁྱེན་བརྩེའི་ཞབས། །གུས་པས་ཕྱག་འཚལ །རིག་སྔགས་འཆང་བ་བསླབ་གསུམ་རྒྱལ་
མཚན་དང་། །རིགས་བརྒྱའི་ཁྱབ་བདག་དབང་ཕྱུག་རབ་བརྟན་དཔལ། །རིག་གྲོལ་མཐར་ཕྱིན་རྗེ་བཙུན་བཀའ་འགྱུར་བར། །གུས་པས་ཕྱག་འཚལ །དཀྱིལ་འཁོར་རྒྱ་མཚོའི་ཁྱབ་བདག་ཞྭ་ལུ་པ། །དཀྱིལ་འཁོར་ཀུན་གྱི་གཙོ་བོ་མཁྱེན་རབ་རྗེ། །དཀྱིལ་འཁོར་འཁོར་ལོའི་བདག་པོ་རྣམ་གཉིས་ལ། །གུས་པས་ཕྱག་འཚལ༴ །སྙན་བརྒྱུད་གདམས་པའི་གཏེར་མཛོད་རྨོར་ཆེན་རྗེ། །སྙན་བརྒྱུད་མངའ་བདག་ཀུན་དགའ་ལེགས་འབྱུང་ཞབས། །སྙན་བརྒྱུད་སྤེལ་མཁས་ཀུན་དགའ་བློ་གྲོས་ལ། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །ས་གསུམ་སྐྱེ་རྒུའི་གཉེན་གཅིག་ཐར་རྩེ་རྗེ། །ས་བསྟན་ཉིན་མོར་བྱེད་པའི་ནམ་མཁའ་ལེགས། །ས་བཅུའི་དབང་ཕྱུག་བསྟན་པའི་ཉི་མ་ལ། །གུས་པས་ཕྱག་འཚལ༴ །གྲུབ་པའི་སར་བཞུགས་ངག་དབང་རིན་ཆེན་དང་། །གྲུབ་པ་མཆོག་བརྙེས་ཀུན་དགའ་བསྟན་འཛིན་ཞབས། །གྲུབ་གཉིས་དཔལ་སྟེར་འཇམ་དཔལ་བཟང་པོ་ལ། །གུས་པས་ཕྱག་འཚལ༴ །རིགས་དང་དཀྱིལ་འཁོར་རྒྱ་མཚོའི་ཁྱབ་བདག་མཆོག །དྲན་པས་སྲིད་ཞིའི་གདུང་བ་སེལ་མཛད་པ། །བཀའ་དྲིན་མཉམ་མེད་རྩ་བའི་བླ་མ་ལ། །གུས་པས་ཕྱག་འཚལ་བརྩེ་བས་བྱིན་གྱིས་རློབས། །ཞེས་པས་ཕྱག་འཚལ། གསུམ་པ་མཆོད་པ་ལ། ཉེར་སྤྱོད། གོས་ཟུང་། རིག་མ་བཅུ་
དྲུག །རིན་ཆེན་བདུན། འདོད་ཡོན་ལྔ། མཎྜལ། ནང་མཆོད་རྣམས་ཐུན་མོང་ལྟར་བྱས་པའི་མཐར། ནང་གི་ཚོགས་ཀྱི་མཆོད་པ་ལ། ཐོག་མར་ཞེན་པ་སྤང་བ་ནི། གང་ལ་ཆགས་ན་ཉེས་ཀུན་འབྱུང་བའི་གཞི། །ཉོན་མོངས་ཀྱིས་བསགས་ཟས་ནོར་ལོངས་སྤྱོད་ཀུན། །རྗེ་བཙུན་བླ་མ་མཆོག་ལ་དབུལ་བར་བགྱི། །རྒྱགས་དང་སེར་སྣ་ཞི་བར་བྱིན་གྱིས་རློབས། །རང་གི་ཞེ་སྡང་རང་གཟུགས་ཤར་བ་ཡི། གནོད་བྱེད་དགྲ་འདྲེར་སྣང་བ་ཅི་མཆིས་པ། །རྗེ་བཙུན་བླ་མའི་འཁོར་དུ་དབུལ་བར་བགྱི། །ཞེ་སྡང་དབྱིངས་སུ་ཞི་བར་བྱིན་གྱིས་རློབས། །ལྟར་སྣང་ཕན་པས་འཁོར་བར་འཆིང་བའི་གྲོགས། །གཉེན་དང་མཛའ་བཤེས་འཁོར་གཡོག་ལ་སོགས་པ། །དེ་ཀུན་བླ་མ་མཆོག་ལ་དབུལ་བར་བགྱི། །འདོད་ཆགས་རྣམ་རྟོག་ཞི་བར་བྱིན་གྱིས་རློབས། །ཚེ་རབས་དུ་མར་གྲངས་མེད་མར་བྱས་ཀྱང་། །ལས་ཉོན་དབང་གིས་གཉེན་ངོ་མ་ཤེས་པའི། །བར་མའི་འགྲོ་རྣམས་ཁྱེད་ལ་དབུལ་བར་བགྱི། །རྨོངས་དང་ཕྲག་དོག་ཞི་བར་བྱིན་གྱིས་རློབས། །མཆོད་པ་དངོས་ནི། སྙིང་གའི་པཾ་ཡིག་རྡོ་རྗེ་རྣལ་འབྱོར་མ། ། དབུ་མའི་ལམ་བརྒྱུད་ཚངས་པའི་སྒོ་ནས་ཐོན། །རྩ་བའི་བླ་མར་འཁྱུད་ཅིང་ཙུམྥ་ཡིས། །ཟག་མེད་བདེ་ཆེན་མཆོད་པས་རབ་ཏུ་མཉེས། །སླར་ཡང་རང་གི་ཕུང་པོ་རྙིང་པ་ལ། །གཟིགས་པས་ཆེ་ཞིང་ཚོ་
ལ་སྣུམ་མཐོང་ནས། །སྔོན་ཆད་འདི་འདྲའི་ལུས་ཀུན་དོན་མེད་སོང་། །ད་ལན་དོན་ཆེན་བྱའོ་སྙམ་དུ་དགོངས། །ཕུང་པོའི་རྩར་བྱོན་ཕྱག་གཡས་གྲི་གུག་གིས། །ཐ་མལ་ལུས་སུ་སྣང་བའི་མགོ་བོ་ཡི། །ཡ་ཐོད་བཅད་དེ་ཐོད་པའི་སྒྱེད་པུའི་ཁར། །བཞག་པས་ཕྱི་དཀར་ནང་དམར་ཀ་པཱ་ལ། །སྟོང་གསུམ་དང་མཉམ་སྣོད་དུ་གྱུར་པའི་ནང་། །རྐང་གཡོན་གཡས་པ་ཁོག་སྨད་ནང་ཁྲོལ་དང་། ། ཁོག་སྟོད་ལག་གཉིས་མགོ་བོ་ལྷག་མར་བཅས། །རིམ་པར་བསྒྱུར་པས་ཤ་ཁྲག་ཕུང་པོར་གྱུར། །འོག་ནས་ཡེ་ཤེས་མེ་སྦར་ཐོད་པའི་རྫས། །བཀོལ་ཞིང་འོད་དུ་མེར་གྱིས་ཞུ་བ་ལས། །རྣམ་མང་འདོད་པའི་ཡོན་ཏན་འཕྲོ་བའི་སྤྲིན། །ཟག་མེད་བདུད་རྩིའི་རྒྱ་མཚོར་ཨོཾ་ཨཱཧཱུྃ། སངས་རྒྱས་ཀུན་དངོས་བླ་མ་རིན་པོ་ཆེ། །བདག་གིས་མངོན་པར་བཤམས་པའི་མཆོད་པ་འདི། །བདག་ལ་བརྩེ་བའི་ཐུགས་ཀྱིས་ལེགས་དགོངས་ལ། །དགྱེས་པ་ཆེན་པོས་བཞེས་པར་མཛད་དུ་གསོལ། །རང་ལུས་ལྷ་སྐུར་གསལ་བའི་ཐུགས་ཀ་ནས། །ཡིད་འཕྲོག་མཆོད་པའི་ལྷ་མོ་མང་སྤྲོས་པས། །ཕྱག་གི་ཐོད་པས་བདུད་རྩི་ལེགས་བླངས་ནས། །མཆོད་ཡུལ་རྣམས་ལ་འཕུལ་ཏེ་མཆོད་པར་གྱུར། །དྲིན་ཅན་རྩ་བའི་བླ་མ་བཀའ་དྲིན་ཅན། །འཁོར་ལོའི་མགོན་པོའི་ཞལ་དུ་ཨོཾ་ཨཱཿཧཱུཾ། །སྐྱབས་གནས་ཀུན་འདུས་ཞལ་དུ་ཨོཾ་ཨཱཿཧཱུྃ།
ཞེས་རྩ་བའི་བླ་མ་ལ་ལན་བདུན་ཕུལ། དེ་ནས་བརྒྱུད་པའི་བླ་མའི་ཞལ་དུ་ཨོཾ་ཨཱཧཱུཾ། །ཡི་དམ་ལྷ་ཚོགས་ཞལ་དུ༴ །སངས་རྒྱས་བྱང་སེམས་ཞལ་དུ༴ །ཉན་ཐོས་རང་རྒྱལ་ཞལ་དུ༴ །ཆོས་སྲུང་ནོར་ལྷའི་ཞལ་དུ་ཨོཾ་ཨཱཧཱུཾ། །ཡེ་ཤེས་བདུད་རྩིའི་རྒྱ་མཚོ་ཆེན་པོ་འདི། །བཞེས་ནས་བདག་དང་སེམས་ཅན་ཐམས་ཅད་ལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །མཆོད་པའི་ལྷ་རྣམས་རྩ་བའི་བླ་མ་ཡི། །ཐུགས་ཀར་ཐིམ་པས་ཐུགས་རྒྱུད་ཟག་མེད་ཀྱི། །བདེ་བ་ཆེན་པོས་ཡོངས་སུ་མཉེས་གྱུར་ཏེ། །མཆོག་ཏུ་དགེས་པའི་ཉམས་དང་ལྡན་པར་གྱུར། །བདུད་རྩིའི་ལྷག་མ་རིགས་དྲུག་སེམས་ཅན་རྣམས། །ལྷ་རུ་གསལ་བའི་ཞལ་དུ་ཨོཾ་ཨཱཧཱུཾ། །ཆགས་སྡང་རྨོངས་གསུམ་རྣམ་རྟོག་ཞི་བ་དང་། །བྱང་ཆུབ་སེམས་འབྱོངས་སངས་རྒྱས་ཐོབ་གྱུར་ཅིག །གསང་བའི་མཆོད་པ་ནི། རང་གི་སྙིང་ག་ནས་མཆོད་པའི་ལྷ་མོ་པདྨ་ཅན་ལ་སོགས་པ་ཕྱག་རྒྱའི་མཚན་ཉིད་ཡོངས་སུ་ཚང་བ་རྣམས་ཀྱིས་མཆོད་ཡུལ་རྣམས་ཀྱི་སྐུ་ལ་འཁྲིལ་བས་ཐུགས་རྒྱུད་ཟག་མེད་ཀྱི་བདེ་བས་མཉེས་པར་བསམ་ལ། རྣམ་མང་འདོད་ཡོན་སྒྱུ་མའི་མིག་འཕྲུལ་ཅིར་ཡང་བརྩེ་བའི་འཇོ་སྒེག་ཅན། །ཡེ་ཤེས་མཆོག་གི་བྱེད་པོས་ཡོངས་བསྐྲུན་ཕྱག་རྒྱའི་རེག་བྱ་ལས་བྱུང་བའི། །བདེ་ཆེན་བཅུ་དྲུག་དགའ་བའི་བདུད་རྩིས་རྟག་པ་རྒྱུན་དུ་མཆོད་
བགྱིད་ན། །ལྷན་སྐྱེས་རྣམ་ཀུན་མཆོག་ལྡན་རོལ་མོས་བདག་རྒྱུད་ཚིམ་པར་མཛད་དུ་གསོལ། །ཞེས་བསྟོད། མཐར་མཆོད་པའི་ལྷ་མོ་རྣམས་རང་ལ་ཐིམ་པས་བདེ་བ་ཆེན་པོའི་ཡེ་ཤེས་རྒྱུད་ལ་སྐྱེས་པར་བསམ། དེ་ནས་ཡིད་བྱུང་གི་མཆོད་པ་སྔར་ལྟར་གྱི་མཐར། དེ་ཁོ་ན་ཉིད་ཀྱི་མཆོད་པ་ནི། རང་སེམས་བླ་མ་ཡི་དམ་དབྱེར་མེད་ཕྱིར། །མཆོད་བྱ་མཆོད་བྱེད་སྤྲོས་ཀུན་ལས་འདས་པའི། ། གསལ་སྟོང་ཟུང་འཇུག་བརྗོད་བྲལ་གཉུག་མའི་གཤིས། །གནས་ལུགས་སེམས་ཀྱི་རྡོ་རྗེའི་རང་ཞལ་བལྟ། །ཞེས་བརྗོད་ལ་ཅུང་ཟད་ཅིག་མཉམ་པར་བཞག །བཞི་པ་སྡིག་པ་བཤགས་པ་ལ་སོགས་པའི་ཡན་ལག་ལྷག་མ་རྣམས་དང་། ལྔ་པ་གནང་བ་ནོད་པ། དྲུག་པ་སྨོན་ལམ་གདབ་པ་རྣམས་སྔར་ལྟར་བྱའོ། །གསུམ་པ་རྗེས་ལ་དྲུག་ལས། དང་པོ་ཚོགས་ཞིང་བསྟིམ་པ་ནི། མཆོད་པ་བསང་སྦྱང་བྱིན་གྱིས་བརླབས་ནས་འབུལ། འདོད་པའི་དོན་ལ་གསོལ་བ་གདབ་ཅིང་ཁྱད་པར། དུས་གསུམ་སངས་རྒྱས་ཐམས་ཅད་འདུས་པའི་དངོས། །དཔལ་ལྡན་རྩ་བརྒྱུད་བླ་མའི་ཚོགས་རྣམས་ལ། །མི་ཕྱེད་སྙིང་ནས་གུས་པས་གསོལ་བ་འདེབས། །བདག་ལ་དབང་བཞི་རྫོགས་པར་བསྐུར་དུ་གསོལ། །ལན་གསུམ། ཞེས་པས་གསོལ་བཏབ་རྩ་བའི་བླ་མ་ཡིས། །བརྒྱུད་པའི་བླ་མར་གནང་བ་ཞུ་བའི་སླད། །ཡེ་
ཤེས་སྤྱན་གྱིས་གཟིགས་དང་ལྷན་ཅིག་པར། །བརྒྱུད་པའི་བླ་མ་རྣམས་ཀྱིས་ཐུགས་རྗེའི་སྤྱན། །འཁོར་ལོའི་མགོན་པོའི་ཐུགས་ཀར་གཏད་ནས་ཀྱང་། །གནང་བ་སྦྱིན་པའི་ཚུལ་གྱིས་གཡས་བསྐོར་དུ། །རིམ་གྱིས་འོད་ཞུ་གཅིག་ལ་གཅིག་ཐིམ་མཐར། །དབྱིངས་ཀྱི་རོལ་པ་བླ་མའི་ཐུགས་ཀར་ཐིམ། །གཉིས་པ་དེ་ལ་ཕུར་ཚུགས་སུ་གསོལ་བ་གདབ་པ་ནི། སྐབས་གནས་བླ་མ་འདུས་པའི་བདག་ཉིད་ཡི་དམ་ཞི་ཁྲོའི་ངོ་བོ་ཉིད། །མཁའ་འགྲོ་ཆོས་སྐྱོང་རྒྱ་མཚོའི་དེད་དཔོན་དཔལ་ལྡན་རྡོ་རྗེ་སེམས་དཔའི་གཟུགས། །བཀའ་དྲིན་མཉམ་མེད་ཁྱབ་བདག་བླ་མར་སྙིང་ནས་གུས་པས་གསོལ་འདེབས་ན། །དབང་དང་བྱིན་རླབས་དངོས་གྲུབ་མ་ལུས་དེང་འདིར་བདག་ལ་སྩལ་དུ་གསོལ། །ཞེས་པ་ཙམ་མམ། སྤྲོ་ན། གདན་གསུམ་སྒྱུ་འཕྲུལ་དྲྭ་བའི་རྣམ་རོལ་མཚན་དཔེའི་སྣང་ཆར་ཡོངས་ཤར་བ། །དཔལ་ལྡན་བླ་མ་སྐུ་ཡི་རྡོ་རྗེར་སྙིང་ནས་གུས་པས་གསོལ་བ་འདེབས། །ཕུང་ཁམས་སྐྱེ་མཆེན་འཁྲུལ་པའི་དྲི་མ་སྣང་སྟོང་ཆེན་པོར་ཐིམ་པ་ལས། །སྣ་ཚོགས་སྤྲུལ་པའི་རྣམ་རོལ་འཆང་བ་བུམ་པའི་དབང་མཆོག་དེང་འདིར་སྩོལ། །མི་ཤིགས་ནཱ་དའི་རོལ་མོ་ལས་བྱུང་ལུང་རྟོགས་ཆོས་ཕུང་རྒྱ་མཚོའི་བདག །དཔལ་ལྡན་བླ་མ་གསུང་གི་རྡོ་རྗེར་སྙིང་ནས་གུས་པས་གསོལ་བ་འདེབས། །འགྲོ་འོང་སྲོག་དང་རྩོལ་བའི་རྒྱུ་བ་དབུ་
མའི་དབྱིངས་སུ་བཅིངས་པ་ལས། །ཁ་སྦྱོར་རྡོ་རྗེའི་ཉམས་བརྒྱས་རབ་སྒེག་གསང་བའི་དབང་མཆོག་དེང་འདིར་སྩོལ། །རྣམ་ཀུན་མཆོག་ལྡན་ཡེ་ཤེས་མངོན་གྱུར་འཕོ་མེད་གྲུབ་པའི་ཧེ་རུ་ཀ དཔལ་ལྡན་བླ་མ་ཐུགས་ཀྱི་རྡོ་རྗེར་སྙིང་ནས་གུས་པས་གསོལ་བ་འདེབས། །དངོས་ཡིད་ཕྱག་རྒྱའི་རེག་བྱ་ལས་བྱུང་བདེ་ཆེན་བཅུ་དྲུག་དགའ་བའི་རོས། །རྡུལ་བྲལ་ཆོས་སྐུའི་གོ་འཕང་ལ་སྦྱོར་གསུམ་པའི་དབང་མཆོག་དེང་འདིར་སྩོལ། །གཅིག་དང་དུ་མའི་སྤྲོས་པ་ལས་འདས་སེམས་ཉིད་འོད་གསལ་གཉུག་མའི་གཤིས། །དཔལ་ལྡན་བླ་མ་ཡེ་ཤེས་རྡོ་རྗེར་སྙིང་ནས་གུས་པས་གསོལ་བ་འདེབས། །གཟུང་དང་འཛིན་པའི་རྟོག་པ་མ་ལུས་ལྷན་ཅིག་སྐྱེས་པར་ཉེར་སིམ་པས། །ངོ་བོ་ཉིད་སྐུའི་ཡེ་ཤེས་མངོན་གྱུར་བཞི་པའི་དབང་མཆོག་དེང་འདིར་སྩོལ། །མདོར་ན་སྨིན་བྱེད་བདུད་རྩིས་རབ་བརླན་དམ་ཚིག་སྡོམ་པ་རྣམ་པར་དག །བསྐྱེད་རྫོགས་ཟུང་འཇུག་མྱུར་ལམ་ལ་བརྟེན་གནས་སྐབས་ཐུན་མོང་དངོས་གྲུབ་དང་། །མཐར་ཐུག་མཁའ་སྤྱོད་རྡོ་རྗེ་བཙུན་མོའི་གྲོང་ཁྱེར་མཆོག་ཏུ་ཉམས་དགའ་བར། །སྐུ་གསུམ་དབྱེར་མི་ཕྱེད་པའི་གོ་འཕང་མཆོག་གི་དངོས་གྲུབ་སྩལ་དུ་གསོལ། །ཞེས་གསོལ་བ་དྲག་ཏུ་བཏབ། གསུམ་པ་དབང་བླང་བ་ནི། དེ་ལྟར་སྐྱབས་གནས་ཐམས་ཅད་འདུས་པའི་དངོས། །དཔལ་ལྡན་རྡོ་རྗེ་འཆང་
ཆེན་ངོ་བོ་ཉིད། །རིགས་ཀུན་ཁྱབ་བདག་རྩ་བའི་བླ་མ་ལ། །སྙིང་ནས་གུས་པས་གསོལ་བ་བཏབ་པའི་མཐུས། །བླ་མའི་དཔྲལ་བའི་ཨོ་ལས་འོད་དཀར་པོ། །དཔག་མེད་བྱུང་ནས་རང་གི་དཔྲལ་བར་ཐིམ། །བུམ་པའི་དབང་ཐོབ་ལུས་ཀྱི་དྲི་མ་དག །སྐུ་ཡི་བྱིན་རླབས་སྤྲུལ་སྐུའི་ས་བོན་བཞག །བླ་མའི་མགྲིན་པའི་ཨཱལས་འོད་དམར་པོ། །དཔག་མེད་བྱུང་ནས་རང་གི་མགྲིན་པར་ཐིམ། །གསང་བའི་དབང་ཐོབ་ངག་གི་དྲི་མ་དག །གསུང་གི་བྱིན་རླབས་ལོངས་སྐུའི་ས་བོན་བཞག །བླ་མའི་ཐུགས་ཀའི་ཧཱུྃ་ལས་འོད་སྔོན་པོ། །དཔག་མེད་བྱུང་ནས་རང་གི་སྙིང་གར་ཐིམ། །གསུམ་པའི་དབང་ཐོབ་སེམས་ཀྱི་དྲི་མ་དག །ཐུགས་ཀྱི་བྱིན་རླབས་ཆོས་སྐུའི་ས་བོན་བཞག །བླ་མའི་ཡི་གེ་གསུམ་ལས་འོད་སྣ་ཚོགས། །དཔག་མེད་བྱུང་ནས་རང་གི་གནས་གསུམ་ཐིམ། །བཞི་པའི་དབང་ཐོབ་སྒྲིབ་པའི་བག་ཆགས་དག །ཀུན་གྱི་བྱིན་རླབས་ངོ་བོ་ཉིད་སྐུར་གྱུར། །བཞི་པ་དེ་ཁོ་ན་ཉིད་ལ་བློ་བཞག་པ་ནི། སླར་ཡང་དཔལ་ལྡན་བླ་མ་དགྱེས་བཞིན་དུ། །བདེ་བ་ཆེན་པོའི་ངོ་བོར་འོད་དུ་ཞུ། །རང་ལ་ཐིམ་པས་རང་གི་སྒོ་གསུམ་དང་། །ཁྱབ་བདག་བླ་མའི་གསང་གསུམ་དབྱེར་མེད་འདྲེས། །དེ་ཚེ་ཆོས་ཀུན་འགྲོ་འོང་མ་དམིགས་ཤིང་། །བསམ་བརྗོད་སྤྲོས་པའི་ཕ་རོལ་ལས་འདས་བཞིན། །སྣ་ཚོགས་རྟེན་འབྲེལ་སྣང་
བ་འགགས་མེད་པའི། །གནས་ལུགས་འོད་གསལ་བླ་མའི་རང་ཞལ་བལྟ། །ཞེས་བརྗོད་ཅིང་བསམ་ལ་རྣམ་རྟོག་གཞན་གྱིས་བར་མ་ཆོད་པར་ཇི་ཙམ་གནས་ཀྱི་བར་དུ་མཉམ་པར་བཞག །དེ་ལས་ལྡང་བར་བརྩམས་པ་ན། །ཐོས་པ་རྒྱ་མཚོའི་མཆོད་ཡོན་ཀུན་ནས་འཁྱིལ། །ཡོན་ཏན་མེ་ཏོག་ཚུལ་ཁྲིམས་བདུག་སྤོས་སྤྲིན། །ཤེས་རབ་སྒྲོན་མེ་དད་པ་སྤོས་ཆུའི་མཚོ། །ཏིང་འཛིན་བདུད་རྩིའི་ཞལ་ཟས་དམ་པ་དང་། །བསྟོད་དབྱངས་སྙན་པའི་སིལ་སྙན་སྒྲ་འབྱིན་ཅིང་། །ཀུན་ནས་སྙིང་བརྩེ་རྣམ་དཔྱོད་སྤོབས་པ་ཡི། །གདུགས་དང་རྒྱལ་མཚན་བ་དན་བསྒྲེང་བ་ཡིས། །བདག་ལུས་གཞལ་མེད་ཁང་བརྩེགས་རབ་བརྒྱན་ནས། །སྙིང་གི་ཆུ་སྐྱེས་ཐིག་ལེ་ཟླ་རྒྱས་ལ། །བརྟན་པར་བཞུགས་པའི་ཆོས་རྗེ་མཆོད་བགྱིད་ཅིང་། །ངེས་པར་འདུན་པའི་ཡིད་ཀྱིས་གསོལ་བཏབ་ནས། །འགྲོ་བའི་བླ་མ་རྟག་ཏུ་མཉེས་གྱུར་ཅིག །ལྔ་པ་དགེ་བ་བསྔོ་ཞིང་སྨོན་ལམ་གདབ་པ་ནི། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། ། དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོར་
སྤྱོད་ཕྱིར་རབ་ཏུ་བསྔོ་བར་བགྱི། །སངས་རྒྱས་ཀུན་འདུས་ཕྱི་ཡི་བླ་མ་དང་། །སེམས་ཉིད་འོད་གསལ་ནང་གི་བླ་མ་དང་། །རང་བཞིན་སྤྲོས་བྲལ་དོན་གྱི་བླ་མ་གསུམ། །དབྱེར་མེད་སྙིང་པོའི་བླ་མར་རྟོགས་པར་ཤོག །དགེ་བ་འདི་ཡིས་བདག་སོགས་སེམས་ཅན་རྣམས། །དངོས་གྲུབ་འབྱུང་གནས་དཔལ་ལྡན་བླ་མ་ལ། །ལྷག་པའི་ལྷ་རུ་ཤེས་པའི་མོས་གུས་ཀྱིས། །དབང་དང་དངོས་གྲུབ་རྟག་ཏུ་ལེན་པར་ཤོག །ལུས་ངག་ཡིད་གསུམ་ལོངས་སྤྱོད་དང་བཅས་པས། །དོན་ཡོད་རྣམ་བཞིས་བླ་མ་མཉེས་བྱས་ནས། །ཅི་མཛད་རྒྱལ་བའི་མཛད་པ་ལེགས་རྟོགས་ཏེ། །རྨད་བྱུང་ཕྲིན་ལས་བསྒྲུབ་ལ་བརྩོན་པར་ཤོག །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱད་ནས། །ས་དང་ལམ་གྱི་ཡོན་ཏན་རབ་རྫོགས་ཏེ། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཅེས་པ་དང་། གཞན་ཡང་སྨོན་ལམ་རྒྱས་བསྡུས་ཇི་ལྟར་རིགས་པ་གདབ་བོ། །དྲུག་པ་ཤིས་པ་བརྗོད་པ་ནི་སྔར་ལྟར་བྱའོ། །སྨྲས་པ། གང་གིས་བརྩོན་པས་དངོས་གྲུབ་ཀུན་ཐོབ་པ། །དཔལ་ལྡན་བླ་མ་མཆོད་པའི་ཆོ་གའི་ཚུལ། ། བསོད་ནམས་སྤྲིན་གྱི་རོལ་མོ་འདི་སྦྱར་བའི། །དགེ་བས་འགྲོ་ཀུན་རྡོ་རྗེའི་ས་བརྙེས་ཤོག །ཞེས་པའང་དགེ་སློང་སྤོང་བ་པ་མཉྫཤཱི་ཤཱ་ས་ན་དྷཱ་རས་ནན་ཏན་ཆེན་པོས་བསྐུལ་བ་ལས། སྔོན་ཆད་འདི་ལྟ་བུ་
དམིགས་བསལ་དུ་སྦྱར་བ་མ་མཐོང་བས་རང་བཟོའི་ཉེས་པས་འགྱུར་ཉན་ཆེ་ཡང་། དོན་གཉེར་ཅན་གྱི་འདུན་པ་ལྡོག་ཏུ་མ་བཏུབ་པར། ནཱ་རོ་མཁའ་སྤྱོད་ཀྱི་བླ་མའི་རྣལ་འབྱོར་ཐུན་མོང་དང་། །ཐུན་མོང་མ་ཡིན་པ་རྣམས་དང་། ལམ་འབྲས་བླ་མ་མཆོད་པའི་ཆོ་ག་ཚོགས་གཉིས་རབ་རྒྱས། ལམ་ཟབ་བླ་མཆོད་བྱིན་རླབས་ཆར་རྒྱུན་སོགས་ལ་གཞི་བྱས། དམིགས་བསལ་གྱི་ཁྱད་ཆོས་འགའ་ཞིག་རྡོ་རྗེ་འཆང་ཀུན་དགའ་བཟང་པོའི་བདེ་མཆོག་བླ་མཆོད་བསོད་ནམས་རབ་རྒྱས་ལས་ཁ་བསྐང་སྟེ་ཉམས་སུ་བླངས་བདེ་བར་རྒྱལ་ཁམས་ཉུལ་བའི་དཱ་རི་དྲ་བྱ་བྲལ་བ་མཁྱེན་བརྩེའི་དབང་པོས་རབ་ཡིད་ཆུ་ཡོས་ལོའི་ས་ག་ཟླ་བའི་དམར་ཕྱོགས་ཀྱི་རྒྱལ་བ་གཉིས་པར་དཔལ་ཨེ་ཝཾ་ཆོས་ལྡན་གྱི་བླ་བྲང་ཐར་པ་རྩེར་སྦྱར་བ་ལས། སླར་ཡང་སྒྲུབ་བརྩོན་གུ་ཎ་ལཀྵིའི་བཞེད་སྐོང་དུ་ནག་འགྲོས་བཀླགས་ཆོག་ཏུ་བགྱིས་པ་འདི་ལ་ནོངས་པའི་ཆ་ཤས་མཆིས་པ་ཐམས་ཅད་སྙིང་ནས་བཤགས་ཤིང་། དགེ་བས་མཐའ་ཡས་པའི་སེམས་ཅན་ཐམས་ཅད་དཔལ་ལྡན་བླ་མའི་གོ་འཕང་ཐོབ་པའི་རྒྱུར་གྱུར་ཅིག །སརྦ་དཱ་ཤེ་ཡོ་བྷ་བ་ཏུ།། ༈ །།ཨོཾ་སྭ་སྟི། རྣལ་འབྱོར་གསང་མཐའི་རྒྱུད་ཀྱི་ཡང་སྙིང་བཟླས་པ་ཙམ་གྱིས་གྲུབ་པ་སྟེར། །དྲན་པའི་མོད་ལ་སྲིད་ཞིའི་འཇིགས་འཕྲོག་ཡེ་ཤེས་ཆེན་པོའི་གསང་མཛོད་འཆང་། །ནཱ་རོ་ཏ་པའི་
ཐུགས་ཀྱི་ཉིང་ཁུ་རྗེ་བཙུན་རྡོ་རྗེ་རྣལ་འབྱོར་མའི། །སྒྲུབ་ཐབས་བྱེ་བའི་ཡོངས་བཅུད་དྲིལ་འདི་འཇམ་དབྱངས་བླ་མའི་ལེགས་གསུངས་དབྱིག །མི་ཟད་སྤར་དུ་བཞེངས་པ་ཡི། །ལེགས་བྱས་བྱང་ཆུབ་སྙིང་པོར་བསྔོ། །པྲ་ཛྙཱ་བྷ་དྲ་འཇིགས་མེད་ཟུང་། །རྣལ་འབྱོར་མ་དཔལ་མྱུར་ཐོབ་ཤོག །ཅེས་པའང་སྤར་བྱང་སྨོན་ཚིག་འདི་འཇམ་དབྱངས་ཆོས་ཀྱི་བློ་གྲོས་པས་བྲིས་པ་དགེ་ལེགས་སུ་གྱུར་ཅིག །སརྦ་ཛ་ག་ཏཾ།། །།
མཁའ་སྤྱོད་བརྒྱུད་འདེབས་ཞལ་སྐོང་།
མཁའ་སྤྱོད་བརྒྱུད་འདེབས་ཞལ་སྐོང་ནི། དཀྱིལ་འཁོར་འཁོར་ལོའི་བདག་པོ་རྣམ་གཉིས་ལ། །གསོལ་བ༴ །ཞེས་པའི་མཚམས། སྙན་བརྒྱུད་གདམས་པའི་གཏེར་མཛོད་རྨོར་ཆེན་རྗེ། །སྙན་བརྒྱུད་མངའ་བདག་ཀུན་དགའ་ལེགས་འབྱུང་ཞབས། །སྙན་བརྒྱུད་སྤེལ་མཁས་ཀུན་དགའ་བློ་གྲོས་ལ། །གསོལ་བ༴ །ས་གསུམ་སྐྱེ་རྒུའི་གཉེན་གཅིག་ཐར་རྩེ་རྗེ། །ས་བསྟན་ཉིན་མོར་བྱེད་པའི་ནམ་མཁའ་ལེགས། །ས་བཅུའི་དབང་ཕྱུག་བསྟན་པའི་ཉི་མ་ལ། །གསོལ་བ༴ །གྲུབ་པའི་སར་བཞུགས་ངག་དབང་རིན་ཆེན་དང་། །གྲུབ་པ་མཆོག་བརྙེས་ཀུན་དགའ་བསྟན་འཛིན་ཞབས། །གྲུབ་གཉིས་དཔལ་སྟེར་རྩ་བའི་བླ་མ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །དལ་འབྱོར་གྲུ་ཆེན་སོགས་སྦྲེལ་ལོ།། །།
མཁའ་སྤྱོད་སྒྲུབ་དཀྱིལ་ནག་འགྲོས་གནས་གསར་བས་མཛད་པའི་བདུད་རྩི་ལག་མཆོད་ཀྱི་བླ་བརྒྱུད་ཞལ་སྐོང་།
༈ མཁའ་སྤྱོད་སྒྲུབ་དཀྱིལ་ནག་འགྲོས་གནས་གསར་བས་མཛད་པའི་བདུད་རྩི་ལག་མཆོད་ཀྱི་བླ་བརྒྱུད་ཞལ་སྐོང་ནི། རིགས་ཀུན་ཁྱབ་བདག་མངྒའི་མཚན་ཅན་ལ། །རྣམ་དགཟ །ཨོྃ་ཨཱ༔ཧཱུྃ། ཞེས་པའི་མཚམས། མཁྱེན་རབ་བྱམས་པ་ངག་དབང་ལྷུན་གྲུབ་རྗེ། །ཐམས་ཅད་མཁྱེན་པ་ཀུན་དགའ་ལྷུན་གྲུབ་ཞབས། །ངག་གི་དབང་ཕྱུག་ལེགས་པའི་འབྱུང་གནས་ལ། །རྣམ་དག །ཨོ་ཨཱ་ཧཱུཾ། འཇམ་པའི་དབྱངས་རྩྭ དངོས་ཀུན་དགའ་བློ་གྲོས་དང་། །མཁས་ཤིང་གྲུབ་བརྙེས་ནམ་མཁའ་འཆི་མེད་ཞབས། །སྐྱབས་ཀུན་འདུས་ཞལ་རྩ་བའི་བླ་མ་ལ། །རྣམ་དག༴ །ཨོཾ་ཨཱ་ཧཱུྃ། གཞན་ཡང་སྨིན་བྱེད་དབང་དང་སོགས་སྦྲེལ་ལོ།། །།