རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་བསྐྱེད་རྫོགས་མདོར་བསྡུས་པ་མཁའ་སྤྱོད་བགྲོད་པའི་གསང་ལམ།
༈ རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་བསྐྱེད་རྫོགས་མདོར་བསྡུས་པ་མཁའ་སྤྱོད་བགྲོད་པའི་གསང་
ལམ་ཞེས་བྱ་བ་བཞུགས་སོ། །བླ་མ་རྡོ་རྗེ་རྣལ་འབྱོར་མར། །བཏུད་ནས་དེ་ཡི་རིམ་གཉིས་ཚུལ། །མདོར་བསྡུས་མཁའ་སྤྱོད་རྡོ་རྗེའི་གྲོང་། །བགྲོད་པའི་གསང་ལམ་འདིར་གསལ་བྱ། །དེ་ལ་འཁོར་ལོ་བདེ་མཆོག་གི་དཀྱིལ་འཁོར་དུ་དབང་བསྐུར་བ་དང་། འདི་ཉིད་ཀྱི་བྱིན་རླབས་ཉམས་ཁྲིད་དང་བཅས་པ་ལེགས་པར་ཐོབ་ཅིང་། དམ་ཚིག་དང་སྡོམ་པར་ལྡན་པའི་གང་ཟག་གིས་ཉམས་སུ་བླང་བྱའི་ལམ་ནི། བསྐྱེད་པའི་རིམ་པ་ཕག་མོ་མཁའ་སྤྱོད། རྫོགས་པའི་རིམ་པ་རྩ་དབུ་མ། ལམ་གྱི་ཡན་ལག་པྲ་ས་ནཱ་དབབས་པ། སྨན་ཆེན་མོ་བཅུད་ལེན། གནོད་སྦྱིན་མོ་དབང་དུ་བྱ་བ་རྣམས་སུ་བཤད་པ་ལས། དང་པོ་ནི། རྗེ་ས་སྐྱ་པ་ཆེན་པོའི་ཞལ་ནས། ཉལ་དང་ལྡང་དང་བདུད་རྩི་མྱང་། །ཚད་མེད་བླ་མ་བདག་ལྷར་བསྐྱེད། །འགྲོ་བ་དག་པའི་རྣལ་འབྱོར་དང་། །དཔའ་བོ་དཔའ་མོས་བྱིན་གྱིས་རླབས། །ངག་བཟླས་ཡིད་བཟླས་གཉིས་གཅིག་ཡིན། །བསམ་མི་ཁྱབ་པའི་རྣལ་འབྱོར་དང་། །སྤྱོད་ལམ་གྱི་ནི་རྣལ་འབྱོར་ཏེ། །དེ་ལྟར་རྣལ་འབྱོར་བཅུ་གཅིག་གོ །ཅེས་གསུངས་པ་འདིར་འདུ་བ་ལས། དང་པོ་ཉལ་བའི་རྣལ་འབྱོར་ནི། ནུབ་མོ་བསམ་གྱིས་མི་ཁྱབ་པའི་རྣལ་འབྱོར་གྱིས་འོད་གསལ་སྟོང་པ་ཉིད་ཀྱི་ངང་དུ་ཉལ་པའམ། སྟོང་ཉིད་དེའི་ངང་ལས་ཐུན་མཚམས་ཀྱི་ལྷར་ལྡང་སྟེ། གནས་ཁང་ཆོས་འབྱུང་དམར་པོ་འོད་
ཀྱི་རང་བཞིན་ཅན་གྱི་ནང་དུ། རང་ཉིད་སེང་གེའི་ཁྲི་ལ་འཁོད་པའི་སྔས་མགོར་སེང་ཁྲི་པད་ཟླའི་སྟེང་དུ། རྩ་བའི་བླ་མ་རྡོ་རྗེ་ཆོས་ཀྱི་རྣམ་པར་བཞུགས་པ་ལ་མོས་གུས་དུང་ངེ་བ་དང་། ལྷ་ཡི་གསལ་སྣང་མ་བྲལ་བའི་ངང་ནས་གཉིད་ལོག །གཉིས་པ་ལྡང་བའི་རྣལ་འབྱོར་ནི། ཐོ་རངས་ནམ་གྱི་བརྒྱད་ཆ་ཙམ་ལོན་པ་ན། ནམ་མཁའ་ནས་མཁའ་སྤྱོད་ཀྱི་དཔའ་བོ་དང་རྣལ་འབྱོར་མས་ཌཱ་མ་རུའི་སྒྲ་ༀ་གསུམ་མའི་གདངས་སུ་བསྒྲགས་པས་བསྐུལ་ཏེ། འོད་གསལ་སྟོང་ཉིད་དེའི་ངང་ལས་ཆུ་ལས་ཉ་འཕར་བ་ལྟར་ཐུན་མཚམས་ཀྱི་ལྷར་ལྡང་བའམ། ཉལ་ལུགས་ཕྱི་མ་ལྟར་ན། རང་དང་བླ་མ་གནས་ཁང་སོགས་ཅིར་སྣང་ཐམས་ཅད་ལྷ་དང་གཞལ་ཡས་ཁང་དུ་གསལ་བཞིན་པའི་ངང་ནས་ལྡང་ལ། སྔས་མགོའི་བླ་མ་ལ་མོས་གུས་བྱས་པས་འོད་དུ་ཞུ་སྟེ་རང་ལ་ཐིམ་པས་རྒྱུད་བྱིན་གྱིས་བརླབ་པར་བསམ་མོ། །གསུམ་པ་བདུད་རྩི་མྱོང་བའི་རྣལ་འབྱོར་ནི། བདུད་རྩི་རིལ་བུ་དངོས་སུ་འབྱོར་ན་དང་། མ་འབྱོར་ན་བྱིན་གྱིས་བརླབ་པའི་ནང་མཆོད་སྲིན་ལག་གིས་བླངས་ཏེ། ཨོཾ་ཨཱཿཧཱུྃ་གིས་མྱོང་བས་སྙིང་གའི་པཾ་ཡིག་སངས་རྒྱས་ཐམས་ཅད་འདུས་པའི་ངོ་བོར་མཆོད་པར་བསམ། བཞི་པ་ཚད་མེད་པའི་རྣལ་འབྱོར་ནི། ཐོག་མར་ཐ་མལ་གྱི་སྣང་བ་ཐམས་ཅད་དབྱིངས་སུ་ཐིམ་པ་ལས་གནས་ཡུལ་དག་པའི་ཞིང་ཁམས་ཆེན་པོར་གསལ་བའི་ངང་།
རང་གི་སྨིན་མཚམས་ཀྱི་ཐད་ཁྲུ་གང་ཙམ་གྱིས་མཐོ་བའི་ནམ་མཁར་སེང་ཁྲི་པདྨ་ཉི་ཟླའི་གདན་ལ་རྩ་བའི་བླ་མ་སངས་རྒྱས་རྡོ་རྗེ་ཆོས། སྐུ་མདོག་དམར་པོ་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་འཛིན་པ། དར་དང་རིན་པོ་ཆེས་བརྒྱན་ཅིང་། ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས། ཡོན་ཏན་ནོར་ལྷ། ཕྲིན་ལས་མཁའ་འགྲོ་ཆོས་སྐྱོང་ཐམས་ཅད་འདུས་པའི་ངོ་བོར་གསལ་བཏབ། དེའི་མདུན་དུ་རང་ཉིད། རང་གི་གཡས་གཡོན་དུ་ཕ་མ། མདུན་དུ་གནོད་བྱེད། མཐར་སྐོར་ཀུན་ཏུ་རིགས་དྲུག་གི་སེམས་ཅན་ཐམས་ཅད་འཁོད་དེ། འདུན་པ་ཕྱོགས་གཅིག་པས་སྐྱབས་སུ་འགྲོ་བར་མོས་ལ། ངེས་འབྱུང་དང་སྙིང་རྗེ་ཆེན་པོའི་ཤུགས་དྲག་ཏུ་བསྐྱེད་བཞིན་པའི་ངང་། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ༴ །དམ་པའི་ཆོས་རྣམས །འཕགས་པའི་དགེ་འདུན་རྣམས༴ །ཞེས་ཅི་ནུས་དང་། མཐར། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། །
ཅེས་གསོལ་བ་བཏབ་པས། གདན་སེང་ཁྲི་ནས་ཡར་འོད་དུ་ཞུ། དབུའི་གཙུག་ཏོར་ནས་མར་འོད་དུ་ཞུ་སྟེ། ཐུགས་ཀའི་ཐད་དུ་འོད་དམར་པོའི་རྣམ་པར་གྱུར་པ་རང་གི་སྨིན་མཚམས་ནས་ཐིམ་པས། རང་གི་ལུས་ངག་ཡིད་གསུམ་དང་། བླ་མའི་སྐུ་གསུང་ཐུགས་དབྱེར་མེད་དུ་གྱུར་པར་བསམ་ལ་རིག་པ་འཛིན་མེད་ཀྱི་ངང་དུ་མཉམ་པར་བཞག །དེ་ནས་ཚད་མེད་དངོས་ནི། བདག་གིས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱས་ལ། སེམས་ཅན་ཐམས་ཅད་སྲིད་པའི་སྡུག་བསྔལ་གྱི་རྒྱ་མཚོ་ལས་བསྒྲལ་བར་བྱ། དེའི་ཆེད་དུ་རྡོ་རྗེ་རྣལ་འབྱོར་མའི་བསྒོམ་བཟླས་ཉམས་སུ་བླང་བར་བགྱིའོ། །ཞེས་པའི་དོན་དྲན་བཞིན་པས་ལན་གསུམ་བརྗོད། སྤྲོ་ཞིང་ནུས་ན་རྡོ་རྗེ་སེམས་དཔའི་བསྒོམ་བཟླས་ཀྱང་སྟོབས་བཞི་ཚང་བའི་དམིགས་གནད་དང་མ་བྲལ་བའི་སྒོ་ནས་མ་རྒྱུད་སྤྱི་ལྟར་བྱ། ལྔ་པ་བླ་མའི་རྣལ་འབྱོར་ལ། ཐུན་མོང་བ་ནི། རང་གི་མདུན་གྱི་ནམ་མཁར་སེང་ཁྲི་པད་ཟླའི་གདན་ལ། རྩ་བའི་བླ་མ་དཔའ་བོ་རྡོ་རྗེ་ཆོས་སྐུ་མདོག་དམར་པོ། །ཕྱག་གཡས་ཌ་མ་རུ་དང་། གཡོན་ཐོད་པ་བདུད་རྩིས་བཀང་བ་དང་། གྲུ་མོ་གཡོན་ན་ཁ་ཊཾ་ག་བསྣམས་པ། རུས་པའི་རྒྱན་དྲུག་གིས་བརྒྱན་ཅིང་། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ལང་ཚོ་དར་ལ་བབ་པའི་རྣམ་པ་ཅན། སྐྱབས་གནས་ཐམས་ཅད་འདུས་པའི་ངོ་བོར་གྱུར་
པར་བསམ་ལ་མོས་གུས་དྲག་པོས། གང་གི་དྲིན་གྱིས་སོགས་དང་། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་ཧེ་རུ་ཀར། །གསོལ་བ་འདེབས་སོ་བྱིན་གྱིས་རློབས། །ཞེས་གསོལ་བ་བཏབ་པས་འོད་དམར་པོ་བདེ་བ་ཆེན་པོའི་རྣམ་པས་རང་གི་སྤྱི་བོ་ནས་ཞུགས། སྙིང་གའི་པཾ་ཡིག་ལ་ཐིམ་པས། དེ་ཉིད་ཇེ་ཆེར་སོང་སྟེ་མཐར་ནམ་མཁའ་ལ་འཇའ་ཡལ་བ་ལྟར་གྱུར་པར་བསམ་ལ། གསལ་སྟོང་འཛིན་མེད་ཀྱི་ངང་དུ་ཅི་གནས་སུ་མཉམ་པར་བཞག །ཡང་ན་མན་ངག་ཐོབ་པས་ཐུན་མོང་མ་ཡིན་པའི་བླ་མའི་རྣལ་འབྱོར་ཉམས་སུ་བླངས་ཏེ། དེའི་ཚུལ་ནི་གཞན་དུ་ཤེས་པར་བྱའོ། །དྲུག་པ་བདག་གི་གཞི་སྦྱངས་བསྒྱུར་གྱིས་ལྷར་བསྐྱེད་པའི་རྣལ་འབྱོར་ནི། དེའི་ངང་ལས། རང་གི་སྙིང་གར་ཨེ་ཨེ་ལས་ཆོས་འབྱུང་ཉིས་བརྩེགས་ཀྱི་ནང་དུ་ཨ་ལས་ཟླ་བའི་དཀྱིལ་འཁོར་གྱི་དབུས་སུ་པཾ་ཡིག་དམར་པོའི་མཐར། ཨོཾ་ཨོཾ་ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝཎྞ་ནཱི་ཡེ། བཛྲ་བཻ་རོ་ཙ་ནཱི་ཡེ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ཞེས་པའི་སྔགས་ཕྲེང་གཡོན་སྐོར་དུ་གནས་པ་ལས་འོད་ཟེར་འཕྲོས། ལུས་ཀྱི་ཕྱི་ནང་ཐམས་ཅད་གང་བས་སྒོ་གསུམ་གྱི་སྡིག་སྒྲིབ་དག་སྟེ་ལུས་འོད་ཀྱི་གོང་བུར་གྱུར། དེ་ཡོངས་སུ་གྱུར་པ་ལས་ཆོས་འབྱུང་གྲུ་གསུམ་ཉིས་བརྩེགས་ཀྱི་གཞལ་ཡས་ཁང་གི་དབུས་སུ་སྣ་ཚོགས་པད་ཉིའི་
གདན་ལ། རང་ཉིད་རྣམ་སྣང་རིགས་བདག་དང་བཅས་པའི་རྡོ་རྗེ་རྣལ་འབྱོར་མ་ཞབས་གཡས་བརྐྱངས་པས་དུས་མཚན་མ་དམར་མོའི་ནུ་མ་བརྫིས་ཤིང་། གཡོན་བསྐུམ་པས་འཇིགས་བྱེད་ནག་པོའི་མགོ་བོ་རྒྱབ་ཏུ་བལྟས་པའི་གདོང་མནན་པ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་དག་པ་མཁའ་སྤྱོད་དུ་གཟིགས་པ། གཡས་རྡོ་རྗེས་མཚན་པའི་གྲི་གུག་ཐུར་དུ་བརྐྱང་ཞིང་། གཡོན་ཐོད་པ་ཁྲག་གིས་གང་བ་སྟེང་ཕྱོགས་སུ་བཟུང་ནས་ཞལ་གྱེན་དུ་ཕྱོགས་པས་གསོལ་བ། ཕྲག་པ་གཡོན་པར་རྡོ་རྗེས་མཚན་པའི་ཁ་ཊཾ་ག་ལ་ཌ་མ་རུ་དང་། དྲིལ་བུ་དང་། འཕེན་རྩེ་གསུམ་པ་འཕྱང་བཞིན་པ་བསྣམས་པ། བདེ་སྟོང་གི་ཉམས་མཆོག་ཏུ་རྒྱས་ཤིང་། དབུ་སྐྲ་ནག་པོ་སིལ་བུར་གྲོལ་བ། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་དོ་ཤལ་ཅན། ཕྱག་རྒྱ་སྤྱི་བོར་རུས་པའི་འཁོར་ལོ། སྙན་རྒྱན། མགུལ་རྒྱན། གདུ་བུ། སྐེ་རགས་རྣམས་སོ། །ལྔས་བརྒྱན་ཅིང་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གསལ་བཏབ། བདུན་པ་གཞན་གྱི་གཞི་སྦྱང་བསྒྱུར་འགྲོ་བ་དག་པའི་རྣལ་འབྱོར་ནི། སྙིང་གའི་པཾ་ཡིག་སྔགས་ཕྲེང་དང་བཅས་པ་ལས་འོད་ཟེར་ཁ་དོག་སྣ་ཚོགས་བ་སྤུའི་བུ་ག་ནས་ཕྱིར་འཕྲོས། རིགས་དྲུག་གི་བརྟན་གཡོ་ཐམས་ཅད་ལ་ཕོག་པས། མ་དག་པའི་སྣང་བ་སྡིག་སྒྲིབ་བག་ཆགས་དང་བཅས་པ་སྦྱངས་ཏེ། སྣོད་གཞལ་
ཡས་ཁང་དང་། བཅུད་ཐམས་ཅད་རྡོ་རྗེ་རྣལ་འབྱོར་མའི་སྐུར་གྱུར་པར་བསམ། བརྒྱད་པ་དཔའ་བོ་དཔའ་མོས་བྱིན་གྱིས་བརླབས་ཏེ་དམ་ཡེ་དབྱེར་མེད་དུ་བྱ་བ་ནི། འབར་བའི་ཕྱག་རྒྱ་དཔྲལ་བར་གཡོན་དུ་ལན་གསུམ་བསྐོར་ཞིང་། ཕོ། རང་གི་སྙིང་གའི་པཾ་ཡིག་ལས་འོད་ཟེར་འཕྲོས་པས། འོག་མིན་ནས་རྡོ་རྗེ་རྣལ་འབྱོར་མ་ལ་ཕྱོགས་བཅུའི་སངས་རྒྱས་བྱང་སེམས་དཔའ་བོ་དང་རྣལ་འབྱོར་མའི་ཚོགས་ཀྱིས་བསྐོར་བ་དང་། འགྲོ་བ་རྣལ་འབྱོར་མར་གྱུར་པ་ཐམས་ཅད་ཀྱང་། ཛཧཱུྃ་བཾ་ཧོས་རང་ཉིད་ལ་གཉིས་སུ་མེད་པར་ཐིམ་པར་བསམ། སྐབས་འདིར་མན་ངག་ཐོབ་པ་ཡིན་ན་ལུས་དཀྱིལ་གསལ་བཏབ་པ་ནི། དེའི་རྐྱེན་གྱིས་སྙིང་གའི་པཾ་ཡིག་འོད་དུ་ཞུ་བ་ལས་དབུས་སུ་པཾ་ཡིག་གི་ངོ་བོ་རྡོ་རྗེ་རྣལ་འབྱོར་མ་དམར་མོ། ཤར་ནས་བརྩམས་ཏེ་གཡོན་སྐོར་གྱིས་བཻ་ཡིག་གི་ཆ་ཤས་ཡ་ར་ལ་ཝ་བཞིའི་ངོ་བོ་སྙིང་པོའི་རྣལ་འབྱོར་མ་དཀར་ལྗང་དམར་སེར་བཞི་དང་། མཐའ་སྐོར་སྔགས་ཀྱི་ཡིག་འབྲུ་སོ་གཉིས་ཀྱང་རེ་རེ་ནས། ཡུལ་ཉེར་བཞིའི་རྣལ་འབྱོར་མ་དང་། སྒོ་མཚམས་མ་བརྒྱད་ཀྱི་ངོ་བོ་རྣལ་འབྱོར་མ་དམར་མོ་རེ་རེ་སྟེ་ཐམས་ཅད་ཀྱང་རྒྱན་ཆ་ལུགས་ཕྱིའི་རྣལ་འབྱོར་མ་ཇི་ལྟ་བ་བཞིན་གསལ་བར་གྱུར་པར་བསམ་མོ། །གང་ལྟར་ཡང་། མཐར་པད་སྐོར་འཁྱུད་རྒྱ་དང་བཅས། ཨོ་ཡོ་ག་ཤུདྡྷསརྦ་དྷརྨཱཡོ་ག་ཤུདྡྷོཉ་ཧཾ། ཐབས་
ཤེས་གཉིས་སུ་མེད་པའི་བདེ་ཆེན་གྱི་ཡེ་ཤེས་སུ་བདག་ཉིད་རྣམ་པར་དག་ལ། དེ་བཞིན་དུ་ཆོས་ཐམས་ཅད་ཀྱང་རྣམ་པར་དག་གོ་སྙམ་དུ་ང་རྒྱལ་བཟུང་ཞིང་རིག་པ་འཛིན་མེད་དུ་བཞག །དེ་ནས་གོ་ཆ་བཅིངས་པ་ནི། རང་གི་ལུས་ཀྱི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ་ལྟེ་བར་ཨོ་བོ་དམར་མོ་རྡོ་རྗེ་ཕག་མོ། སྙིང་གར་ཧཾ་ཡཾ་སྔོན་མོ་གཤིན་རྗེ་མ། ཁར་ཧྲི་མཾ་དཀར་མོ་རྨོང་བྱེད་མ། དཔྲལ་བར་ཧཱུྃ་ཧཱུྃ་སེར་མོ་སྐྱོད་བྱེད་མ། སྤྱི་གཙུག་ཏུ་ཧཱུྃ་ཧཱུྃ་ལྗང་གུ་སྐྲག་བྱེད་མ། ཡན་ལག་ཐམས་ཅད་ལ་ཕཊ་ཕཊ་དུད་ཁ་ཙཎྜི་ཀའི་ངོ་བོར་གྱུར། ཅེས་བརྗོད་ཅིང་། དེ་ཡང་གནས་སོ་སོར་ཟླ་དཀྱིལ་ལ་རྒྱབ་ཡོལ་གྱི་ཚུལ་དུ་བྱས་པའི་ངོ་བོ་ལྷ་ལ་རྣམ་པ་ཡི་གེའི་གཟུགས་སུ་འདི་ལ་བཞེད་ཚུལ་འདྲ་མིན་གཞན་ཡང་སྣང་ངོ་། །མཆན། སྦྲེང་ཚར་དུ་གསལ་བཏབ། དགུ་པ་བཟླས་པའི་རྣལ་འབྱོར་ལ་གཉིས་ཏེ། དང་པོ་མཁའ་སྤྱོད་སྒྲུབ་པའི་ལམ་གྱི་གཙོ་བོ་ངག་བཟླས་ནི། ལུས་དཀྱིལ་གསལ་གདབ་ན། ལུས་དཀྱིལ་གྱི་གཙོ་མོའི་ཐུགས་ཀར་ཆོས་འབྱུང་གྲུ་གསུམ་དམར་པོ་ཉིས་བརྩེགས་ཀྱི་ནང་དུ་ཟླ་དཀྱིལ་བཻ་ཡིག་སྔགས་ཕྲེང་དང་བཅས་པ་གསལ་བ་དང་། མ་བཏབ་ན་སྔར་གསལ་བཞིན་པའི་སྔགས་ཕྲེང་ལ་ཡིད་གཏད་པས། དེ་ལས་འོད་ཟེར་དམར་པོ་དཔག་ཏུ་མེད་པ་འཕྲོས། འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་
དཔའ་ཕོ་ཉ་གསུམ་གྱི་བྱིན་རླབས་དང་ནུས་མཐུ་མཁའ་སྤྱོད་ཀྱི་དངོས་གྲུབ་ཐམས་ཅད་འོད་དམར་པོའི་རྣམ་པས་སྔགས་ཕྲེང་ལ་ཐིམ་པས་རྒྱུད་བྱིན་གྱིས་བརླབས་པར་བསམ་ལ། ཡིད་གཞན་དུ་མ་ཡེངས་པར་བྱིན་གྱིས་བརླབ་པའི་ཕྲེང་བ་བཟུང་སྟེ་ཨོ་གསུམ་མ་དམ་བཅས་པའི་གྲངས་ལས་མི་ཉུང་བར་བཟླས། གཉིས་པ་སྤྲོས་བཅས་ཀྱི་རྫོགས་རིམ་ཡིད་བཟླས་ནི། ལུས་གནད་དང་བཅས་རླུང་རོ་བསལ། འོག་རླུང་ཅུང་ཟད་འཐེན། སྟེང་རླུང་ཆིལ་གྱིས་མནན་པ་དང་མཉམ་དུ་མཆིལ་མ་སྒྲ་མེད་ཞིག་མིད་པས་སྙིང་གའི་ཆོས་འབྱུང་ཟླ་བ་ལུས་དཀྱིལ་བཅས། བདེ་བ་བསྐྱེད་པར་འདོད་ན་གསང་གནས་དང་། མི་རྟོག་པ་བསྐྱེད་པར་འདོད་ན་ལྟེ་བར་ཕབས་ལ་རླུང་ཁ་སྦྱོར་དུ་འཛིན་པ་དང་ལྷན་ཅིག་ཡིད་ཀྱིས་ལུས་དཀྱིལ་གྱི་ལྷ་རྣམས་ཡིག་འབྲུའི་གཟུགས་སུ་བསྒྱུར། ཡ་ར་ལ་ཝ་བཞི་པཾ་ཡིག་ལ་ཐིམ་པར་བསམ་ལ། སྔགས་ཕྲེང་ཡིད་ཀྱིས་ཀློག་པའི་ཚུལ་དང་བཅས་རླུང་བུམ་ཅན་ཅི་ཐུབ་འཛིན། མཐར་བཟླས་པ་བསྡུ་བ་ན། ཕྲེང་བ་ཐལ་མོའི་བར་དུ་བཅུག་ལ། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བྱིན་གྱིས་བརླབ་ཏུ་གསོལ། །མྱུར་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་རྗེ་བཙུན་རྡོ་རྗེ་རྣལ་འབྱོར་མའི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། །ཞེས་བརྗོད་ཅིང་ཕྲེང་བ་མགོ་ཐོག་ཏུ་
བཞག །ཞར་བྱུང་གི་རྫོགས་རིམ་གཉིས་བསྒོམ་པར་འདོད་ན། དང་པོ་ནི། ཆོས་འབྱུང་གི་མདུན་རྒྱབ་སྤངས་པའི་གྲྭ་བཞིར་དགའ་འཁྱིལ་དམར་པོ་གཡོན་དུ་ཤུགས་དྲག་ཏུ་འཁོར་བ་ལ་སེམས་གཏད་པས་བདེ་བའི་ཡེ་ཤེས་སྐྱེས་པར་བསམ་ལ་རླུང་ཁ་སྦྱར་དུ་འཛིན། གཉིས་པ་ནི། ཆོས་འབྱུང་སྔགས་ཕྲེང་སོགས་རེ་ཞིག་མི་དམིགས་པའི་ངང་། ལུས་ཀྱི་དབུས་དྲང་པོར་རྩ་དབུ་མ་ཕྱི་དཀར་ལ་ནང་དམར་བ། ཡར་སྣ་སྤྱི་བོ་ནས་སྨིན་མཚམས་སུ་གུག་པ། མར་སྣ་གསང་གནས་ཀྱི་པདྨར་ཟུག་པའི་ནང་དུ་དགའ་འཁྱིལ་དམར་པོ་དང་། སྨིན་མཚམས་སུ་དགའ་འཁྱིལ་དཀར་པོ་ཆུང་དུ་གཡོན་སྐོར་ཤུགས་དྲག་ཏུ་འཁོར་བ་ལ་སེམས་གཏད་པས། མས་ཡར་ནས་རིམ་གྱིས་བྱུང་སྟེ་བདེ་བ་དང་། སྟོང་པའི་ཡེ་ཤེས་སྐྱེས། མཐར་སྙིང་གར་འདྲེས་ཏེ་དབུ་མའི་སྟོང་པའི་ངང་དུ་མི་དམིགས་པར་བསམས་ལ་འཛིན་མེད་དུ་བཞག་གོ། །དེ་ནས་བསྐྱེད་རིམ་ལ་རིམ་གྱིས་བསླབ་པའི་ཚེ། ང་རྒྱལ་ལ་སེམས་འཛིན་པ། རྣམ་པ་སྤྱི་ལ་སེམས་འཛིན་པ། བྱེ་བྲག་རྒྱན་མེད་དང་། རྒྱན་ཅན་ལ་སེམས་འཛིན་པ། ལུས་དཀྱིལ་ལ་སེམས་འཛིན་པ་རྣམས་རེག་མཐོང་གི་མཚན་མ་བརྟན་པོ་མ་སྐྱེས་ཀྱི་བར་དུ་བསྒོམ་ཞིང་། དེ་ཐམས་ཅད་འཛིན་མེད་ཀྱི་ལྟ་བ་དང་ཟུང་འབྲེལ་དུ་ཉམས་སུ་བླང་ངོ་། །བཅུ་པ་བསམ་མི་ཁྱབ་པའི་རྣལ་འབྱོར་ལ། ཐུན་མོང་བ་ནི། རང་
གི་སྙིང་གའི་པཾ་ཡིག་སྔགས་ཕྲེང་དང་བཅས་པ་ལས་འོད་ཟེར་འཕྲོས་པས། ཁམས་གསུམ་སྣོད་བཅུད་ཐམས་ཅད་འོད་དུ་ཞུ་སྟེ། གཟུགས་མེད་ཁམས་འོད་སྔོན་པོའི་རྣམ་པས་ལུས་ཀྱི་སྟོད་ཀྱི་ཆ་ལ་ཐིམ། གཟུགས་ཁམས་འོད་དམར་པོའི་རྣམ་པས་ལུས་ཀྱི་བར་གྱི་ཆ་ལ་ཐིམ། འདོད་ཁམས་འོད་དཀར་པོའི་རྣམ་པས་ལུས་ཀྱི་སྨད་ཀྱི་ཆ་ལ་ཐིམ། རང་རྡོ་རྗེ་རྣལ་འབྱོར་མར་གསལ་བ་སྙིང་གའི་ཆོས་འབྱུང་ལ་ཐིམ། དེ་ཟླ་བ་ལ་ཐིམ། དེ་སྔགས་ཕྲེང་ལ་ཐིམ། དེ་བོ་ཡིག་ལ་ཐིམ། བཻ་ཡིག་གི་ཁོག་པ་མགོ་བོ་ལ་ཐིམ། མགོ་བོ་ཟླ་ཚེས་ལ་ཐིམ། ཟླ་ཚེས་ཐིག་ལེ་ལ་ཐིམ། ཐིག་ལེ་ནཱ་ད་ལ་ཐིམ། ནཱ་ད་ཡང་མི་དམིགས་པ་འོད་གསལ་སྟོང་པ་ཉིད་ཀྱི་ངང་དུ་གྱུར་པར་བསམ་ལ་མཉམ་པར་བཞག་པའམ། མན་ངག་ཐོབ་པ་ཡིན་ན་བསམ་མི་ཁྱབ་ཐུན་མོང་མ་ཡིན་པ་བསྒོམ་སྟེ། དེའི་ཚུལ་ནི་གཞན་དུ་ཤེས་པར་བྱའོ། །བཅུ་གཅིག་གོ པ་སྤྱོད་ལམ་གྱི་རྣལ་འབྱོར་ལ་དངོས་དང་། ཡན་ལག་གཉིས་ལས་དང་པོ་ནི། རྟོག་པ་ནམ་འཕྲོ་བ་ན། སླར་ཡང་རང་སྐད་ཅིག་གིས་རྡོ་རྗེ་རྣལ་འབྱོར་མ་རྒྱན་དང་ཕྱག་མཚན་སྤངས་པའི་སྐུར་གྱུར་པའི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ་སོགས། གོ་ཆ་བཀོད་པས་བདག་དང་རྣལ་འབྱོར་སྲུང་། གནས་སྲུང་བའི་སླད། ལག་པ་གཡོན་པའི་སྡིགས་མཛུབ་ཀྱིས་སེ་གོལ་ཕྱོགས་གཡོན་སྐོར་དང་།
མཚམས་གཡས་སྐོར་དུ་བརྡབ་ཅིང་སྔགས་བརྗོད་པ་ནི། ཨོཾ་སུམྦྷ་ནི་སོགས་བརྗོད་ཅིང་། ཤར་དང་སྟེང་དུ་ཁྲ་གདོང་མ་སྔོན་མོ། དེ་བཞིན་དུ། ཨོ་གྲོཏྟཱ་སོགས་བརྗོད་ཅིང་། བྱང་དུ་འུག་གདོང་མ་ལྗང་གུ། ཨོ་གྲོཏྟཱ་པ་ཡ་སོགས་བརྗོད་ཅིང་ནུབ་དང་འོག་ཏུ་ཁྱི་གདོང་མ་དམར་མོ། ཨོ་ཨཱ་ན་ཡ་སོགས་བརྗོད་ཅིང་། ལྷོར་ཕག་གདོང་མ་སེར་མོ་རྣམས་གྲུབ་པར་བསམ། ཡང་། ཨོཾ་སུམྦྷ་སོགས་ཚར་གཅིག་གིས། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་པ་མ་གཡས་ལྗང་གཡོན་སྔོ་བ་རྣམས་གྲུབ་པར་བསམ། དེ་ཐམས་ཅད་ཀྱང་ཞལ་གཅིག་ཕྱག་བཞི་མ་དང་པོ་གཉིས་ཌ་མ་རུ་དང་ཁ་ཊཾ་ག་འོག་མ་གཉིས་གྲི་ཐོད་ཐོགས་པ། སྤྱན་གསུམ་མ། མི་མགོ་སྐམ་པོ་ལྔའི་དབུ་རྒྱན་དང་། ལྔ་བཅུའི་དོ་ཤལ་ཅན། རུས་པའི་རྒྱན་ལྔས་བརྒྱན་པ། ཞབས་གཡས་བརྐྱང་གི་སྟབས་ཀྱིས་བཞུགས་པར་གསལ་བཏབ། སླར་ཡང་ཐུན་མོང་དུ་ཨོཾ་སུམྦྷ་ནི། ཚར་གཅིག་བརྗོད་པས། དེ་རྣམས་ལ་དེ་འདྲ་བའི་སྐུ་གྲངས་མེད་པ་དང་། རྡོ་རྗེའི་གུར། མདའི་དྲྭ་བ། ཡེ་ཤེས་ཀྱི་མེ་དཔུང་གི་ཕྲེང་བ་དཔག་ཏུ་མེད་པ་སྤྲོས་ཏེ་བགེགས་ཐམས་ཅད་ཚར་བཅད། དཔག་ཚད་བརྒྱ་ཡི་ཚད་ཙམ་ཚུན་ཆད་དུ་
སྲུང་བའི་གུར་ཁང་གསལ་ཞིང་བརྟན་པར་བསམ་ནས། དགེ་བ་འདི་ཡིས་སོགས་བསྔོ་སྨོན་བྱ། སྤྱོད་ལམ་ལ་འཇུག་པའི་ཚེ་སྣང་བ་ཐམས་ཅད་རྣལ་འབྱོར་མའི་སྐུ། སྒྲར་གྲགས་པ་ཐམས་ཅད་ཨོ་གསུམ་མའི་གདངས། ཡིད་ཀྱི་དྲན་རྟོག་གང་ཤར་ཐམས་ཅད་གསལ་སྟོང་འཛིན་མེད་དུ་འཇོག་པ་སྟེ་སྐུ་གསུང་ཐུགས་ཀྱི་དགའ་བ་གསུམ་དང་མ་བྲལ་བར་ལམ་དུ་ཁྱེར་ནས་ཐ་མལ་གྱི་སྣང་ཞེན་སྤང་། གཉིས་པ་ཡན་ལག་ལ། ཁ་ཟས། ཕྱི་རོལ་མཆོད་པ། སྦྱིན་སྲེག །ཚེས་བཅུའི་མཆོད་པ། གཏོར་མའི་རྣལ་འབྱོར་དང་ལྔ་ལས། དང་པོ་ནི། རྒྱས་པར་བྱེད་ན། བཟའ་བཏུང་རྣམས་མདུན་དུ་བདར་ལ། སུས་བསངས། སྭཱ་བྷཱ་ཝས་སྦྱངས། སྟོང་པའི་ངང་ལས་རླུང་མེ་དང་། །ཐོད་པའི་སྒྱེད་པུ་གསུམ་གྱི་ཁར། །ཨ་ཡིག་ལས་བྱུང་ཀ་པཱ་ལར། །བཟའ་བཅའ་བཏུང་པའི་དངོས་པོ་ཀུན། །ཤ་ལྔ་བདུད་རྩི་རྣམ་པ་ལྔ། །བསྐོལ་ཞིང་འོད་དུ་ཞུ་བ་ལས། །དམ་ཚིག་ཡེ་ཤེས་དབྱེར་མེད་པའི། །བདུད་རྩིའི་རྒྱ་མཚོ་ཆེན་པོར་གྱུར། །ཨོཾ་ཨཱ༔ཧཱུྃ་ཧ་ཧོ༔ཧཱི༔ རང་ཉིད་རྡོ་རྗེ་རྣལ་འབྱོར་མའི། །སྙིང་གར་བླ་མ་ཡི་དམ་དང་། །ལྟེ་བར་ཆོས་སྲུང་ནོར་ལྷའི་ཚོགས། །གཏུམ་མོའི་མེ་ལྕེའི་ཀློང་ན་བཞུགས། །ལག་གཉིས་རྡོ་རྗེའི་དགང་བླུགས་ཀྱིས། །ཁ་ཟས་ཡེ་ཤེས་བདུད་རྩིའི་རྒྱུན། །ཕུལ་བས་ཟག་མེད་བདེ་བ་ཆེས། །དགྱེས་ཤིང་
བྱིན་གྱིས་བརླབ་པར་གྱུར། །ཅེས་བརྗོད་ཅིང་བསམས་ལ། ཞེན་པ་མེད་པར་ལོངས་སྤྱད། དེ་ཙམ་མི་ནུས་ན། ཨོཾ་ཨཱཿཧཱུྃ་ཧ་ཧོ༔ཧིས་བྱིན་གྱིས་བརླབས་ལ་སྙིང་གའི་པཾ་ཡིག་སངས་རྒྱས་ཐམས་ཅད་འདུས་པའི་ངོ་བོར་མཆོད་པར་མོས་པའམ། བསྡུ་ན། ལྷ་ལ་ལྷ་ཐིམ་པའི་ཚུལ་གྱིས་རོལ། གཉིས་པ་ནི། ཚར་ཆེན་རིན་པོ་ཆེའི་སྒྲུབ་དཀྱིལ་དང་། གནས་གསར་རྗེས་ནག་འགྲོས་སུ་མཛད་པ་སོགས་ལས་རྟོགས་པར་བྱ། གསུམ་པ་ལ། སྦྱིན་སྲེག་དངོས་དང་། མར་མེའི་སྦྱིན་སྲེག་གཉིས་ལས། དང་པོ་ལའང་རྒྱས་པ་དང་། མདོར་བསྡུས་ཏེ་བྱ་བའི་ཚུལ་གཉིས་ཀྱི། དང་པོ་ནི། རྡོ་རྗེ་འཆང་དབང་ཕྱུག་རབ་བརྟན་གྱི་གསུང་གནས་གསར་རིན་པོ་ཆེའི་ནག་འགྲོས་སུ་མཛད་པ་དང་། པཎ་ཆེན་ནམ་མཁའ་དཔལ་བཟང་སོགས་ཀྱིས་མཛད་པའི་ཡིག་ཆ་ཁུངས་ཐུབ་ལས་ཤེས་པར་བྱ་ལ། གཉིས་པ་མདོར་བསྡུས་པ་ནི། སྔགས་ཀྱི་ནུས་པ་དབྱུང་བ་དང་སྡིག་སྒྲིབ་ཞི་བ་སོགས་ཀྱི་སླད་དུ། རྒྱུན་གྱི་དུས་སམ་ཇི་ལྟར་རིགས་པའི་དུས་སུ། རྗེ་ས་སྐྱ་པ་ཆེན་པོས། སྤྲོས་པ་ལ་མི་དགའ་ན། རྗེ་བཙུན་མ་ཉིད་མཆོད་པ་ནས་བཟུང་སྟེ་ལྷ་མཉེས་པ་ཉིད་ཀྱིས་ཆོ་ག་མ་ཚང་བ་མེད་པ་ཡིན་ནོ། །ཞེས་གསུངས་པའི་དོན་ཀུན་མཁྱེན་རིན་པོ་ཆེ་བསོད་ནམས་སེང་གེས་ཇི་ལྟར་བཀྲལ་བ་བཞིན་བརྗོད་ན། ཐབས་སྟེགས་ཀྱི་ངོས་རེ་ཁཱ་ཟླུམ་པོ་གཉིས་སྐོར་གྱི་ནང་དུ་ཆོས་
འབྱུང་གྲུ་གསུམ་ཉིས་བརྩེགས་ཀྱི་ཐིག་གདབ། ཆོས་འབྱུང་གི་རི་མོ་རྡུལ་ཚོན་དཀར་པོས་བཅད། ནང་ཐམས་ཅད་རྡུལ་ཚོན་དམར་པོས་བཀང་། མདུན་རྒྱབ་སྤངས་པའི་གྲྭ་བཞིར་དགའ་འཁྱིལ་གཡོན་སྐོར་དང་། དབུས་སུ་ཉི་གདན་ལ་ཚོམ་བུ་དམར་པོ་བཀོད། རང་གི་གཡོན་ཐབ་ཀྱི་གཡས་སུ་མཆོད་པ་ལྔ་དང་གཏོར་མ། རང་གི་གཡས་ཐབ་ཀྱི་གཡོན་དུ་མར་ཁུ་དང་། བསྲེག་རྫས་ཏིལ་ནག་པོ་འབའ་ཞིག་བཤམས། བདག་བསྐྱེད་སྔོན་དུ་འགྲོ་བས། ཐབ་དང་ཡོ་བྱད་རྣམས། སུམྦྷས་བསང་། སྭ་བྷ་ཝས་སྦྱང་། སྟོང་པའི་ངང་ལས་ཧཱུྃ་ལས་བྱུང་བའི་རིན་པོ་ཆེ་ལས་གྲུབ་པའི་ཐབ་ཁུང་ཡངས་ཤིང་རྒྱ་ཆེ་བའི་ནང་དུ་བུད་ཤིང་བརྩེགས་པ་དང་བཅས་པ་དངས་ཤིང་ཐོགས་པ་མེད་པར་གྱུར། ཧཱུྃ། ཞེས་ཡང་ཡང་བརྗོད། མཆོད་རྫས་དང་བསྲེགས་རྫས་རྣམས་ཀྱང་། ཨོ་ཨཱཿཧཱུྃ་ལས་བྱུང་བའི་མཆོད་རྫས་དང་བསྲེག་རྫས་རྣམས་དྭངས་ཤིང་ཐོགས་པ་མེད་པ་སོ་སོའི་ལས་སྒྲུབ་པའི་ནུས་པ་དང་ལྡན་པར་གྱུར། ཨོཾ་ཨཱ༔ཧཱུྃ་ཞེས་པས་བྱིན་གྱིས་བརླབ། དེ་ནས། ཨོཾ་གསུམ་མའི་རྗེས་སུ། ཨོཾ་བཛྲ་ཛྭ་ལ་རཾ། ཞེས་པས་མེ་སྦར། བསང་སྦྱང་། སྟོང་པའི་ངང་ལས་མེ་འབར་བའི་དབུས་སུ་ཆོས་འབྱུང་གི་ནང་དུ་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་པཾ་ཡིག་དམར་པོའི་མཐར་གཡོན་སྐོར་གྱིས། ཨོ་ཨོ་ཨོ་ནས། སྭཱ་ཧཱ་ཞེས་
པའི་སྔགས་ཕྲེང་ཁ་དོག་དམར་པོས་བསྐོར་བ་དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡིག་འབྲུ་རྣམས་ལ་ཐིམ། དེ་ཡོངས་སུ་གྱུར་པ་ལས་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་པ་ནི། སྣ་ཚོགས་པདྨ་དང་ཉི་མའི་གདན་ལ་ཞབས་གཡས་བརྐྱང་པས་སོགས་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་སྟེང་འོག་ཕྱོགས་མཚམས་མཐའ་སྐོར་ཀུན་ཏུ་བླ་མ་ཡི་དམ་སངས་རྒྱས་བྱང་སེམས། དཔའ་བོ་དང་རྣལ་འབྱོར་མ་ཐམས་ཅད་ཀྱིས་བསྐོར་བར་གསལ་བཏབ། ཡེ་ཤེས་པ་གཞུག །གོ་ཆ་བཀོད། དབང་བསྐུར། རྒྱས་གདབ། ཨོཾ་སརྦ་ཏ་ཐཱ་ག་ཏ་བཛྲ་ཡོ་གི་ནི་ས་པ་རི་ཝཱ་ར་པུཉྫ་ནས། ཤབྡའི་བར་གྱིས་ཕྱི་མཆོད། ཨོཾ་གསུམ་མའི་མཐར་ཨོཾ་ཨཱ༔ཧཱུྃ་བཏགས་པས་ནང་མཆོད་ཕུལ། དཔལ་ལྡན་རྡོ་རྗེ་མཁའ་འགྲོ་མ་སོགས་ཀྱིས་བསྟོད། རང་གཞན་གྱི་སྡིག་སྒྲིབ་ཐམས་ཅད་ཏིལ་ལ་བསྟིམ་ཞིང་དེ་ཉིད་ཡེ་ཤེས་ཀྱི་བདུད་རྩིར་བསྒྱུར་ཏེ། ཐོག་མར་ༀ་གསུམ་མའི་རྗེས་སུ། ཨོཾ་སརྦ་པཱ་པཾ་ད་ཧ་ན་བཛྲ་ཡེ་བདག་གི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་གསང་སྔགས་ཀྱི་ལྷག་ཆད་ལ་སོགས་པའི་ཉེས་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ལན་གསུམ་སོགས་ཀྱི་རྗེས། ཨོཾ་གསུམ་མ་འབའ་ཞིག་གིས་ཕུལ་ལ་གྲངས་བཟུང་། དེའི་ཚེ་ནམ་མཁའི་ཁམས་ཐམས་ཅད་ཁྱབ་པའི་
སངས་རྒྱས་བྱང་སེམས་སྐུ་མདོག་དཀར་པོ་ཕྱག་ན་བུམ་པ་ཡེ་ཤེས་ཀྱི་བདུད་རྩིས་གང་བ་ཐོགས་པ་རྣམས་ཀྱིས་བདག་ལ་དབང་བསྐུར་བས་སྡིག་སྒྲིབ་ཐམས་ཅད་དག །ལུས་ཡེ་ཤེས་ཀྱི་བདུད་རྩིས་ཁེངས་ཏེ་རྡོ་རྗེ་རྣལ་འབྱོར་མའི་གོ་འཕང་ཐོབ། མདུན་བསྐྱེད་ལས་ཀྱང་འོད་ཟེར་དཀར་པོ་འཕྲོས་པས་བདག་གཞན་ཐམས་ཅད་ཀྱི་སྡིག་སྒྲིབ་སྦྱངས་བར་བསམ། སྐབས་སྐབས་སུ་མར་གྱིས་མེ་གསོ། མཐར་གོང་བཞིན་མཆོད་ཅིང་བསྟོད་ལ་གསོལ་བ་གདབ། གཏོར་མ་དང་པོ་རྗེ་བཙུན་མ་དང་། གཉིས་པ་མཁའ་འགྲོ་སྤྱི་གཏོར་ལྟར་ཕུལ། རྗེ་བཙུན་མའི་ཞབས་དྲུང་ནས་བླངས་པར་མོས་པས་འདི་ཡེ་ཤེས་པ་གཤེགས་པའི་རྗེས་སུ་བྱས་ཀྱང་རུང་། ཐབས་ཀྱི་ཐལ་བ་ཅུང་ཟད་བླངས་ཏེ་གནས་གསུམ་དུ་བྱུགས། ཡི་གེ་བརྒྱ་བས་ལྷག་ཆད་ཁ་བསྐང་། མ་འབྱོར་པ་སོགས་ཀྱིས་ནོངས་པ་བཟོད་པར་གསོལ། ཨོ་ཁྱེད་ཀྱི་སོགས་ཀྱིས་མཐར། བཛྲ་མུས་ཐབ་ཀྱི་ཡེ་ཤེས་པ་གཤེགས། ཛཧཱུྃ་བཾ་ཧོས་དམ་ཚིག་པ་རང་ལ་ཐིམ། རང་གི་གནས་རྣམས་སུ་སོགས་གོ་ཆ་བཀོད། བསྲུང་བ་བྱ། བསྔོ་སྨོན་བཀྲ་ཤིས་བརྗོད། ལས་ཀྱི་རྗེས་མི་མངོན་པར་བྱའོ། །གཉིས་པ་མར་མེའི་སྦྱིན་སྲེག་ནི། རང་གི་མདུན་དུ་སྟེགས་ཀྱི་ཁར་མར་མེའི་ཀོང་བུ་ཡངས་པར། རས་དམར་གྱིས་དཀྲིས་པའི་སྡོང་བུ་སྦོམ་པོ་བཙུགས། མར་དཀར་གྱི་ཁུ་བས་བཀང་ལ་བཞག །མ་འབྱོར་ན་
གཏོར་མ་དང་། མཆོད་པ་ལྔ་བཤམས། བསྲེག་རྫས་ཏིལ་ནག་པོ་དང་། གཞན་ཡང་རྡོར་དྲིལ་ནང་མཆོད་སོགས་འདུ་བྱས་ལ། བདག་བསྐྱེད་རྒྱས་པར་བྱ་བའམ། ཐུན་མཚམས་ཀྱི་རྗེ་བཙུན་མར་དྲན་པར་བྱས་ཏེ། མཆོད་རྫས་ནང་མཆོད་དང་། སུམྦྷས་བསང་། སྭ་བྷ་ཝས་སྦྱང་། སྟོང་པའི་ངང་ལས་ཨ་ལས་ཐོད་པའི་སྣོད་དུ་འབྲུ་གསུམ་ཞུ་བ་ལས་བྱུང་བའི་མཆོད་རྫས་དངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་བསམས་ལ། ཨོཾ་བཛྲ་པུཊྚེ་ནས། ཤབྡ་ཨཱཿཧཱུྃ་གི་བར་དང་། གྷནྡེར་ཎི་ཏས་བརླབས། དེ་ནས་ཨོ་གསུམ་མའི་རྗེས་སུ། ཨོཾ་བཛྲ་ཛྭ་ལ་རཾ། ཞེས་པས་མར་མེ་སྦར། བསང་སྦྱང་། སྟོང་པའི་ངང་ལས་ཨེ་ཨེ་ལས་ཆོས་འབྱུང་གྲུ་གསུམ་ཉིས་བརྩེགས་ཀྱི་ནང་དུ། པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་དབུས་སུ་བཾ་ཡིག་དམར་པོའི་མཐར། ཨོཾ་ཨོ་ཨོ་ནས། སྭཱ་ཧཱ། ཞེས་པའི་སྔགས་ཕྲེང་གཡོན་སྐོར་དུ་འཁོར་བ་ལས་འོད་ཟེར་འཕྲོས་འདུས་དོན་གཉིས་བྱས། དེ་ཡོངས་སུ་གྱུར་པ་ལས་རྣམ་སྣང་རིགས་བདག་དང་བཅས་པའི་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་པ་ནི། ཞབས་གཡས་བརྐྱངས་པས་སོགས་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པ། ཕོ། ཐུགས་ཀའི་བི་ཡིག་ལས་འོད་ཟེར་འཕྲོས་པས་འོག་མིན་ནས་རྗེ་བཙུན་རྡོ་རྗེ་རྣལ་འབྱོར་མ་ལ་སངས་རྒྱས་བྱང་སེམས་དཔའ་བོ་མཁའ་
འགྲོའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛ༔ ཛཧཱུྃ་བཾ་ཧོ༔ གཉིས་སུ་མེད་པར་ཐིམ། ཨོ་ཡོ་ག་ཤུདྡྷསོགས། དེའི་གནས་རྣམས་སུ་སོགས། གོ་ཆ་བཀོད། ཕྱི་མཆོད། ནང་མཆོད། བསྟོད་པ་རྣམས་བྱ། དེ་ནས་མདུན་དུ་ཏིལ་བཞག་ལ། བདག་དང་སེམས་ཅན་ཐམས་ཅད་ཀྱི་ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་ཐམས་ཅད་སྙིང་ག་ནས་ཀཾ་ནག་པོའི་རྣམ་པས་འཐོན་སྣ་སྒོར་སྡིག་པ་རྭ་ཅན་གྱི་རྣམ་པར་གྱུར་པ་ཏིལ་ལ་ཐིམ་པ་དེ་ཉིད་རྗེ་བཙུན་མའི་ཞལ་དུ་ཕུལ་བས་ལྟེ་བའི་གཏུམ་མོའི་ཡེ་ཤེས་ཀྱི་མེས་བསྲེག་ཅིང་སྦྱངས་པར་བསམ་ལ། གཡོན་པའི་མཐེབ་སྲིན་གྱིས་ཏིལ་བླངས་ཏེ་འབུལ་ཞིང་། ཨོཾ་བཛྲ་ཌཱ་ཀི་ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ད་ཧ་ན་སྭཱ་ཧཱ། ཞེས་པའམ། ཨོཾ་གསུམ་མའི་རྗེས་སུ། ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ཤཱིནཾ་ཀུ་རུ་སྭཱ་ཧཱ། གང་རུང་གིས་འབུལ། རྫས་རྫོགས་པ་ན། མཆོད་བསྟོད་གོང་ལྟར་དང་། གཏོར་མ་ཡོད་ན་གཏོར་ཆོག་ལྟར་ཕུལ་བའི་རྗེས། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། །ཅེས་གསོལ་བ་གདབ། ཡིག་བརྒྱའི་མཐར། མ་འབྱོར་པ་དང་། སོགས་ཀྱིས་ནོངས་པ་བཤགས། ཨོ་ཁྱེད་ཀྱི་སོགས་ཀྱི་མཐར། བཛྲ་མུས་ཡེ་ཤེས་པ་གཤེགས།
ཛཧཱུྃ་བཾ་ཧོས་དམ་ཚིག་པ་རང་ལ་ཐིམ། བདག་བསྐྱེད་རྒྱས་པ་དང་འབྲེལ་ན། གོ་ཆ་བཀོད་ཅིང་བསྲུང་བ་བྱ། གང་ལྟར་ཡང་བསྔོ་སྨོན་ཤིས་བརྗོད་རྒྱས་པར་བྱའོ། །དེ་ལྟར་འབད་པས་སྡིག་པ་ཐམས་ཅད་བྱང་ཞིང་། རྗེ་བཙུན་མའི་བྱིན་རླབས་མྱུར་དུ་འཇུག་པར་འགྱུར་རོ། །བཞི་པ་ཚེས་བཅུའི་མཆོད་པ་ལའང་རྒྱས་བསྡུས་གཉིས་ལས། དང་པོ་ནི། སྐུ་གསུང་ཐུགས་ཀྱི་དཀྱིལ་འཁོར་གསུམ་བཤམས་ཤིང་སྒྲུབ་ཅིང་མཆོད་པ་དང་། དབང་བླང་བ་དང་། ཚོགས་ཀྱི་མཆོད་པ་སོགས་གནས་གསར་བའི་ཡིག་ཆ་ལྟར་རོ། །གཉིས་པ་ནི། རྗེ་ས་སྐྱ་པ་ཆེན་པོའི་ཚེས་བཅུའི་མཆོད་པའི་ཡི་གེ་ལས་ཇི་ལྟར་འབྱུང་བ་ཀུན་མཁྱེན་རིན་པོ་ཆེས་གསལ་བར་མཛད་པ་བཞིན་བརྗོད་ན་སྦྱོར་བ་དང་། དངོས་གཞི། རྗེས་གསུམ་ལས། དང་པོ་ནི། གནས་དབེན་ཞིང་ཡིད་དང་མཐུན་པར་ཚོགས་གསག་པར་འདོད་ན་ཡར་ངོ་དང་། སྒྲིབ་པ་དག་པར་འདོད་ན་མར་ངོའི་ཚེས་བཅུར། གནས་ཁང་ཕྱག་དར་བྱ་ཞིང་དྲི་བཟང་པོའི་ཆུས་ཆག་ཆག་གདབ། བྲིས་སྐུ་སོགས་རྟེན་ཇི་ལྟར་རིགས་པའི་མདུན། རས་དམར་པོས་བཀབ་པའི་སྟེགས་ཀྱི་ཁར་མཉྫིའི་སྟེང་དུ། མཎྜ་ལར་ཙནྡན་དམར་མོའི་ཆུས་སྲིན་ལག་གཡོན་པས་ཆོས་འབྱུང་གྲུ་གསུམ་གཡོན་སྐོར་དུ་བྲིས་པའི་ནང་ཐམས་ཅད་ཙནྡན་དམར་པོའི་ཆུས་བྱུགས། ཙནྡན་དམར་པོའི་ཆུ་མ་འབྱོར་ན་ཆང་བདུད་རྩིར་བྱིན་
གྱིས་བརླབས་པས་དེ་ལྟར་བྱས་ལ། དབུས་སུ་མེ་ཏོག་གི་ཚོམ་བུ་གཅིག་བཀོད་ལ་བཞག །དེའི་གཡས་སུ། མེ་ཏོག་རྩ་བའི་ཡིག་རྙིང་སོགས་སུ་མཆོད་པ་ལྔ་ཁོ་ན་ལས་མ་བཤད་ཀྱང་། སྤྲོ་ན་ཆུ་གཉིས་སྔོན་འགྲོའི་ཉེར་སྤྱོད་ཀྱང་རུང་། བདུག་སྤོས། མར་མེ། གཡོན་དུ་དྲི་ཆབ། གཏོར་མ། ལྷ་བཤོས། མདུན་དུ་མ་ད་ནཱའི་ཕུད་དང་། བཱ་ལ་སོགས་ཚོགས་ཀྱི་ཡོ་བྱད། གཞན་ཡང་ནང་མཆོད། རྡོར་དྲིལ། ཌཱ་མ་རུ་སོགས་དགོས་པའི་ཡོ་བྱད་རྣམས་འདུ་བྱའོ། །གཉིས་པ་དངོས་གཞི་ལ། ཐོག་མར་བདག་བསྐྱེད་བརྒྱུད་འདེབས་དང་སྐྱབས་འགྲོ་ནས། ཐུན་མཚམས་ཀྱི་ལྷར་ལྡང་བའི་བར་བྱ། དེ་ནས་མདུན་བསྐྱེད་གསལ་གདབ་པ་ནི། ཚོམ་བུ་སུམྦྷས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་མཎྜལ་གྱི་དབུས་སུ་ཆོས་འབྱུང་ལ་གནས་པའི་པཾ་ལས་པདྨ་དང་། རཾ་ལས་ཉི་མའི་དཀྱིལ་འཁོར་གྱི་སྟེང་དུ། རང་གི་ལྟེ་བའི་པཾ་ཡིག་ལས་བཾ་ཡིག་གཉིས་པ་ཞིག་མར་མེ་གཅིག་ལས་གཉིས་མཆེད་ཀྱི་ཚུལ་དུ་ཆད་དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་པ་ནི། ཞབས་གཡས་བརྐྱང་པས་སོགས་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པ། ཞེས་པའི་བར་བདག་བསྐྱེད་བཞིན་བརྗོད། འབར་བའི་ཕྱག་རྒྱ་དང་། ཕཻཾ། རང་གི་ཐུགས་ཀའི་
བྃ་ཡིག་ལས་འོད་ཟེར་འཕྲོས་པས། འོག་མིན་ནས་རྗེ་བཙུན་རྡོ་རྗེ་རྣལ་འབྱོར་མ་ལ་སངས་རྒྱས་བྱང་སེམས་དཔའ་དཔའ་བོ་དང་རྣལ་འབྱོར་མའི་ཚོགས་བསམ་གྱིས་མི་ཁྱབ་པས་བསྐོར་བ་ཨོ་བཛྲ་ས་མཱ་ཛས་སྤྱན་དྲངས། ཛ༔ཧཱུྃ་བཾ་ཧོས་མདུན་བསྐྱེད་ལ་གཉིས་སུ་མེད་པར་ཐིམ་པར་བསམ། ཨོཾ་ཡོ་ག་ཤུདྡྷསོགས་ཀྱིས་བརྟན་པར་བྱ། དེའི་གནས་རྣམས་སུ་ནས། ཙཎྜི་ཀའི་ངོ་བོར་གྱུར། བར་གྱི་གོ་ཆ་བཀོད། སླར་ཡང་རང་གི་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་ལྷ་ཚོགས་མདུན་གྱི་ནམ་མཁར་ཨོཾ་བཛྲ་ས་མཱ་ཛ༔ དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བ་རྩལ་དུ་གསོལ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཨོཾ་སརྦ་ཏ་ཐཱ་ག་ཏ་ནས་ཤྲཱི་ཧཱུྃ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་རྣམ་པར་སྣང་མཛད་ཀྱིས་དབུར་བརྒྱན། སླར་ཡང་ཐུགས་ཀ་ནས་འོད་ཟེར་འཕྲོས་པས། རྩ་བའི་བླ་མ་རྗེ་བཙུན་རྡོ་རྗེ་ཆོས་ཀྱི་རྣམ་པ་ཅན་ལ་བརྒྱུད་པའི་བླ་མ་དཔའ་བོ་དང་རྣལ་འབྱོར་མའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛས་ཚོགས་ཞིང་སྤྱན་དྲང་། ནང་མཆོད། སུམྦྷས་བསང་། སྭ་བྷ་ཝས་སྦྱང་། སྟོང་པའི་ངང་ལས་ཡཾ་ལས་རླུང་། རཾ་ལས་མེ།
ཀཾ་ལས་མི་མགོའི་སྒྱེད་པུ་གསུམ་གྱི་སྟེང་དུ། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་དཔྲལ་བ་རང་ལ་བསྟན་པ། དེའི་ནང་དུ་གོ་ཀུ་ད་ཧ་ན་ལས་ཤ་ལྔ། བི་ར་ཤུ་མ་མུ་ལས་བདུད་རྩི་ལྔ་རྣམས་གསལ་བའི། འོག་གི་རླུང་གཡོས། མེ་སྦར། རྫས་ཐམས་ཅད་ཁོལ་བས་འོད་དུ་ཞུ་ནས་དམ་ཚིག་པ་དང་ཡེ་ཤེས་དབྱེར་མེད་པའི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ་ལ། གཡོན་པའི་མཐེབ་སྲིན་སྦྱར་བས་ཆོས་འབྱུང་གཡོན་སྐོར་དུ་བྲིས་ཏེ། ཨོཾ་ཨཱཿཧཱུྃ་ཧོ༔ ཞེས་བརྗོད་པས་བྱིན་གྱིས་བརླབས་པས་རྫས་ཐམས་ཅད་ལ་གཏོར་ཏེ། སུམྦྷས་བསང་། སྭ་བྷ་ཝས་སྦྱང་། སྟོང་པའི་ངང་ལས་ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། གཞན་ཡང་རོལ་མོ་ལ་སོགས་པ་མཆོད་རྫས་རྣམས་དངས་ཤིང་ཐོགས་པ་མེད་པར་གྱུར། ཨོཾ་བཛྲ་པུཧྥེ་ཨཱཿཧཱུྃ་ནས། ཤཔྟ་ཨཱཿཧཱུྃ་གི་བར་གྱིས་བརླབས་ལ། སོ་སོའི་ཕྱག་རྒྱ་དང་བཅས་ཏེ། ཨོཾ་སརྦ་ཏ་ཐཱ་ག་ཏ་བཛྲ་ཡོ་གི་ནི་ས་པ་རི་ཝཱ་ར་པུབྦེ་པྲ་ཏིཙྪ་སྭཱ་ཧཱ་ནས། ཤཔྟའི་བར་དང་། གྷནྡྷེ་ར་ཎི་ཏས་རོལ་མོ་བྱ། ༀ་གསུམ་མའི་རྗེས་སུ་འབྲུ་གསུམ་བཏགས་ལ་ནང་མཆོད་འབུལ། དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་སྒྱུར། །ཡེ་
ཤེས་ལྔ་དང་སྐུ་གསུམ་བརྙེས། །འགྲོ་བ་སྐྱོབ་ལ་ཕྱག་འཚལ་ལོ། །ཇི་སྙེད་རྡོ་རྗེ་མཁའ་འགྲོ་མ། །ཀུན་ཏུ་རྟོག་པའི་འཆིང་གཅོད་ཅིང་། །འཇིག་རྟེན་བྱ་བར་རབ་འཇུག་མ། །དེ་སྙེད་རྣམས་ལ་ཕྱག་འཚལ་ལོ། ། ཞེས་པས་བསྟོད། དེ་ནས་གཏོར་མ་ནང་མཆོད་ཆུ་ཆང་གིས་སྦྱངས་ལ། སུམྦྷས་བསང་། སྭ་བྷཱ་ཝས་སྦྱང་། ལག་པ་གཡས་གཡོན་གཉིས་ཀ་བསྟན་ལ། བྱ་ཁྱུང་གིས་ཕྱག་རྒྱ་བཅས། ཨོཾ་ཨཱཿཧཱུྃ་ཧ་ཧོ༔ཧཱིས་བརླབས། ཕོ། རང་གི་སྙིང་ག་ནས་འོད་ཟེར་འཕྲོས་པས་རང་བཞིན་གྱི་གནས་ནས་རྗེ་བཙུན་རྡོ་རྗེ་རྣལ་འབྱོར་མ་ལ་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མ་ཆོས་སྐྱོང་དང་འཇིག་རྟེན་སྐྱོང་བའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛ༔ པད་སྐོར་གྱི་རྗེས་རྡོ་རྗེ་ཐལ་མོ་ཁ་གྱེན་དུ་ཕྱེ་བའི་མཐར་སེ་གོལ་གཏོག་པ་དང་བཅས་ཏེ། ༀ་གསུམ་མའི་རྗེས་སུ། ཨོཾ་ཨ་ཀཱ་རོ་སོགས་བཏགས་པ་ལན་ལྔའམ་བདུན་གྱིས་ཕུལ། ༀ་བཛྲ་ཡོ་གི་ནི་ས་པ་རི་ཝཱ་ར་པུཊྚེ་ནས། ཤཔྟའི་བར་གྱིས་ཕྱི་མཆོད། ཨོཾ་བཛྲ་ཨཱ་རལླི་ཧོ༔ ཨོཾ་ཨཱཧཱུཾ། རྗེ་བཙུན་རྡོ་རྗེ་རྣལ་འབྱོར་མའི་ཞལ་དུ་མཆོད་པ་དམ་པ་འབུལ་ལོ། །ཞེས་པས་ནང་མཆོད་འབུལ། དཔལ་ལྡན་རྡོ་རྗེ་མཁའ་འགྲོ་མ། སོགས་ཀྱིས་བསྟོད། འཆི་ཚེ་མགོན་དང་དཔའ་བོ་མ་ཚོགས་ཀྱིས། །མེ་ཏོག་གདུགས་དང་རྒྱལ་མཚན་ཐོགས་ནས་སུ། །
རོལ་མོ་གླུ་དབྱངས་སིལ་སྙན་སོགས་མཆོད་ཅིང་། །མཁའ་ལ་སྤྱོད་པའི་གནས་སུ་ཁྲིད་པར་ཤོག །ཅེས་གསོལ་བ་གདབ། དེ་ནས་གཏོར་མ་གཞན་རྣམས་གུར་ཞལ་སོགས་ཆོས་སྲུང་རྣམས་དང་། དུར་ཁྲོད་བདག་པོ་ཡབ་ཡུམ་དང་། མཁའ་འགྲོ་སྤྱི་གཏོར་གྱི་བར་ཇི་ལྟར་རིགས་པས་བཏང་། དེ་ནས་མདུན་གྱི་ཚོགས་རྫས་རྣམས་ལ་ནང་མཆོད་འཐོར་ཞིང་བསང་སྦྱང་བྱིན་རླབས་བདུད་རྩི་ལྟར་བྱས་རྗེས། ཚོགས་ཕུད་སྣོད་གཅིག་ཏུ་བླུགས་པ་དང་། མ་དཱ་ན་སྣོད་གཅིག་ཏུ་བླུགས་པ་མཎྜལ་གྱི་མདུན་དུ་བཞག །གཏོར་མ་རྣམས་ལའང་ཕུལ། སླར་ཐམས་ཅད་ནང་མཆོད་ཆུ་ཆང་གིས་བྲན་ལ། ཐོག་མར། གང་གི་དྲིན་གྱིས་སོགས་ཀྱིས་བླ་མ་ལ་ཕྱག་བྱ་བ་སྔོན་དུ་འགྲོ་བས། དམན་པའི་ཡུལ་ལས་རབ་འདས་ཤིང་། །རྒྱལ་བ་ཀུན་གྱི་དམ་ཚིག་མཆོག །དངོས་གྲུབ་ཀུན་གྱི་གཞིར་གྱུར་པ། །བདུད་རྩི་མཆོག་གིས་མཆོད་འི པར་བགྱི། །སྒྲིབ་པའི་དྲི་མ་ཀུན་བསལ་ནས། །རྟོག་པ་ཀུན་ལས་རྣམ་གྲོལ་བ། །བླ་ན་མེད་པའི་བྱང་ཆུབ་སེམས། །བདེ་བ་ཆེན་པོས་མཉེས་གྱུར་ཅིག །ཅེས་པས་སྨན་ཕུད་འབུལ། དེ་ནས་ཚོགས་ཕུད་དང་པོ་ནི། ཞལ་ཟས་རོ་བརྒྱ་ལྡན་ཞིང་སོགས་ཀྱི་མཐར། ཨོཾ་གུ་རུ་བུདྡྷ་བོ་དྷི་ས་ཏཱ་ས་པཱ་རི་ཝཱ་ར་ཨོཾ་ཨ་ཀཱ་རོ་སོགས་ཀྱིས་བླ་མ་དང་དཀོན་མཆོག་ཡི་དམ་སྤྱི་ལ་ཕུལ། དེ་རྗེས། ཨོ་གསུམ་མའི་མཐར། ཨ་ཀཱ་
རོ་བཏགས་པས་རྗེ་བཙུན་མ་ལ་འབུལ་ཞིང་། གཞན་ཡང་གུར་ཞལ་སོགས་ཀྱི་གཏོར་མ་ཡོད་ན་སོ་སོའི་གཏོར་སྔགས་ཀྱིས་རྒྱས་པར་འབུལ་བའམ། དེ་ཙམ་མ་ནུས་ན། ཨོཾ་ཤྲཱི་མ་ཧཱ་ཀཱ་ལ་མ་ཧཱ་ཀཱ་ལི་དེ་བཱི་ས་པ་རི་ཝཱ་ར་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། ཅེས་དང་། ༀ་ཤྲཱི་དྷརྨ་པཱ་ལ་ཙ་ཏུ་རྨ་ཁ་ས་པ་རི་སོགས་དང་། ཨོཾ་ཤྲཱི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་སྭཱ་ཧཱ། ཤྲཱི་ཧྥ་ཤ་ནཱ་ཨདྷི་པ་ཏི་ས་པ་རི་ཝཱ་ར་སོགས་ཀྱིས་འབུལ་ཞིང་། མཐར་འཇིག་རྟེན་པ་ལ་མཁའ་འགྲོ་སྤྱི་གཏོར་གྱི་སྔགས་ཀྱིས་ཕུལ། ཐུན་མོང་དུ་ཕྱི་ནང་གི་མཆོད་པ་སྔར་བཞིན་མཆོད། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས། དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ཀྱི་ཞལ་དུ་མཆོད་པ་དམ་པ་འབུལ་ལོ། །སངས་རྒྱས་ཀྱི་བསྟན་པ་དར་ཞིང་འཇིག་རྟེན་དུ་དགེ་ལེགས་རྒྱ་ཆེན་པོ་འབྱུང་བ་དང་། བདག་ཅག་དཔོན་སློབ་འཁོར་དང་བཅས་པ་རྣམས་ཀྱི་ཆོས་སྒྲུབ་པའི་འགལ་རྐྱེན་བར་ཆད་ཐམས་ཅད་ཞི་ཞིང་མཐུན་རྐྱེན་ཐམས་ཅད་ཡིད་བཞིན་དུ་འགྲུབ་པར་མཛད་དུ་གསོལ། ཅེས་གསོལ་བ་གདབ། ཚོགས་ཀྱི་ཡོ་བྱད་ལ་གཙང་སྨེའི་རྣམ་རྟོག་སྤངས་ཏེ། སྙིང་གའི་པཾ་ཡིག་སངས་རྒྱས་ཐམས་ཅད་འདུས་པའི་ངོ་བོར་མཆོད་པར་བསམ་ལ། ཨ་ཧོ་མ་ཧཱ་སུ་ཁ་ཧོ། ཞེས་བརྗོད་ཅིང་ཚིམ་པར་
རོལ། ལྷག་མ་བསྡུས་ཏེ་ཆང་གི་ཁ་ཕྲུ་འབར་བའི་ཕྱག་རྒྱའི་བར་ནས་འཐོར་ཞིང་། ཕོ། ཨུཥྩི་ཊ་བ་ལིནྟ་བྷཀྵ་སྭ་སྭཱ་ཧཱ། འབྱུང་པོ་ལྷག་མ་ལ་དབང་བ་རྣམས་ལ་སྦྱིན་ནོ། །ངོམས་ཤིང་ཚིམ་པའི་སྐལ་བ་དང་ལྡན་པར་གྱུར་ཅིག་ཅེས་ཕྱི་རོལ་དུ་དོར། ཀོལླ་ཨི་རཊྛ་སོགས་རྡོ་རྗེའི་གླུ་དང་། བཀྲ་ཤིས་གང་ཞིག་ཆོས་ཀྱི་དབྱིངས་ལས་ལེགས་བྱུང་བ། །ཧེ་རུ་ཀ་དཔལ་འཇིགས་བྱེད་རྒྱལ་པོ་འབར་བའི་སྐུ། །ཤེས་རབ་ཕག་མོའི་པདྨར་རྡོ་རྗེས་རོལ་མཛད་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པར། །གང་གིས་ལམ་གྱིས་གྲོལ་འགྱུར་བ། །དེ་ཡིས་སངས་རྒྱས་མྱུར་ཐོབ་ཤོག །ཅེས་སོགས་བཀྲ་ཤིས་དང་སྨོན་ལམ་བྱའོ། །གསུམ་པ་རྗེས་ནི། མཆོད་པ་རྣམས་ཁ་གསོས་ཤིང་། བསང་སྦྱང་བྱིན་རླབས་བྱ། ཨོཾ་སརྦ་ཏ་ཐཱ་ག་ཏ་བཛྲ་ཡོ་གི་ནི་ས་པ་རི་ཝཱ་ར་པུཉྫ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་ཕུལ། དཔལ་ལྡན་རྡོ་རྗེ་སོགས་ཀྱིས་བསྟོད། རྗེ་བཙུན་རྡོ་རྗེ་རྣལ་འབྱོར་མས་བདག་དང་སེམས་ཅན་ཐམས་ཅད་༣ དག་པ་མཁའ་སྤྱོད་ཀྱི་གནས་སུ་འཁྲིད་པར་མཛད་དུ་གསོལ། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མ་ལུས་པ་སྩལ་དུ་གསོལ། །ཞེས་གསོལ་བ་གདབ། ཧེ་རུ་ཀའི་ཡིག་བརྒྱ་ལན་གསུམ་
གྱིས་ལྷག་ཆད་ཁ་བསྐང་། མ་འབྱོར་པ་དང་སོགས་ཀྱིས་ནོངས་པར་གསོལ། རྟེན་ཡོད་ན། འདིར་ནི་གཟུགས་དང་སོགས་བརྟན་བཞུགས་དང་། མེད་ན། ཨོ་ཁྱེད་ཀྱི་སོགས་ཀྱིས། ཚོམ་བུའི་ཡེ་ཤེས་པ་དང་། གཏོར་མགྲོན་གྱི་ཡེ་ཤེས་པ་རྣམས་གཤེགས། ཛཧཱུྃ་བཾ་ཧོས་དམ་ཚིག་པ་རྣམས་རང་ལ་གཉིས་སུ་མེད་པ་ཐིམ་པར་བསམ་ལ། རང་གི་གནས་རྣམས་སུ་སོགས་གོ་ཆ་བཀོད། བསྲུང་བ་བྱ། དགེ་བ་འདི་ཡིས་སོགས་བསྔོ་བ་དང་། མཁའ་སྤྱོད་ཞལ་བཟང་བལྟ་བའི་སྨོན་ལམ་གདབ། ཕུན་ཚོགས་དགེ་ལེགས་སོགས་ཀྱིས་ཤིས་པ་བརྗོད་ཅིང་མེ་ཏོག་གི་ཆར་སིལ་མ་དགྲམ། ལས་ཀྱི་རྗེས་མི་མངོན་པར་བྱའོ། །དེ་ལྟར་བཟླས་བསྒོམ་རྣམ་པ་གཉིས་དང་། ཚེས་བཅུའི་མཆོད་པ་མ་ཆགས་པར་ཉམས་སུ་བླངས་པ་ནི་ལས་དང་པོ་པས་མཁའ་སྤྱོད་སྒྲུབ་པའི་ལམ་གྱི་གཙོ་བོ་ཡིན་པས་ཤིན་ཏུ་གལ་ཆེའོ། །ལྔ་པ་གཏོར་མའི་རྣལ་འབྱོར་ནི། དཀུ་བག་སྟེ་ཤ་ཆང་གི་དམ་རྫས་ངེས་པར་ཚང་ཞིང་བསྒྲུབ་པའི་བདུད་རྩི་རིལ་བུ་དང་སྦྱར་བའི་གཏོར་མ་པདྨའི་སྙིང་པོ་ལྟར་ཟླུམ་པ། འཕྲལ་གཏོར་ལ་པད་འདབ་དང་། འཛིན་གཏོར་སོགས་ལ་མཐེབ་ཀྱུས་བསྐོར་བ་གཙང་སྦྲ་དང་ལྡན་པ་བཤམས། ཚེས་བཅུའི་མཆོད་པའི་སྐབས་སུ་བཤད་པ་ཇི་ལྟ་བ་བཞིན་ཕུལ་བ་ལས། མཆོད་པའི་སྐབས་སུ་ཆུ་གཉིས་སྔོན་འགྲོའི་ཉེར་སྤྱོད་ཀྱིས་མཆོད་པ་ཙམ་གྱི་
ཁྱད་པར་རོ། །འདིས་ནི་བར་ཆད་ཐམས་ཅད་ཞི་བ་དང་བསམ་པའི་དོན་འགྲུབ་པ་སོགས་དགོས་པ་ཁྱད་པར་ཅན་མང་ངོ་། །དེ་ལྟར་དབང་པོ་རབ་རྣལ་འབྱོར་བཅུ་གཅིག་པོ་འདི་མ་ཆགས་པར་ཉམས་སུ་བླངས་ཞིང་། ཚེས་བཅུའི་མཆོད་པ་ལ་བརྩོན་པ་ཙམ་གྱིས་ཚེ་འདིར་ལུས་མ་སྤངས་པར་མཁའ་སྤྱོད་ཀྱི་དངོས་གྲུབ་ཐོབ་པར་འགྱུར་ལ། འདི་ཉིད་བསྐྱེད་རིམ་ཕག་མོ་མཁའ་སྤྱོད་ཅེས་གཙོ་བོར་གསུངས་པ་མ་གཏོགས། དོན་གྱིས་བསྐྱེད་རྫོགས་ཟུང་འཇུག་ཡིན་ཏེ་མངོན་རྟོགས་ཀྱི་དཀྱུས་གཅིག་ལ་དབང་བཞིའི་ལམ་མཐའ་དག་ཚང་བའི་ཕྱིར་རོ། །དབང་པོ་འབྲིང་གིས་གཞིའི་བསྙེན་པ་མཐར་ཕྱིན་པ་ན། ལངྐ་ལིའི་ཤིང་ལ་བརྟེན་ནས་སིནྡྷ་རའི་བསྒྲུབ་པ་ཚུལ་བཞིན་དུ་བྱས་པས་རྡོ་རྗེ་རྣལ་འབྱོར་མ་མི་མོའི་རྣམ་པ་ཅན་གྱིས་རྗེས་སུ་བཟུང་ཞིང་མཁའ་སྤྱོད་ཀྱི་གྲོང་དུ་འཁྲིད་པ་སྟེ། དེའི་ཚུལ་ནི། དེང་དུས་ལག་ལེན་ལ་འདེབས་པ་ཉུང་བས་འདིར་མ་བྲིས་ལ། རྟོགས་པར་འདོད་ན་ཁྲིད་ཡིག་ཆེན་མོ་དང་། འཇམ་མགོན་ཀུན་དགའ་བསོད་ནམས་ཀྱི་ཡིག་ཆ་སོགས་ལས་ཤེས་པར་བྱའོ། །དབང་པོ་ཐ་མས་དེ་ལྟ་བུ་ལག་ཏུ་མ་བླངས་པའམ། བླངས་ཀྱང་མ་གྲུབ་ན་བཟླས་བསྒོམ་ལ་བརྩོན་པས། འཆི་ཁའམ་བར་དོར་བཟླས་བསྒོམ་བྱེད་པའི་སྣང་བ་ཤར་མ་ཐག་རྣལ་འབྱོར་མས་མདུན་བསུས་ཏེ་མཁའ་སྤྱོད་དུ་འཁྲིད་པར་ངེས་ནའང་། ཆེས་མྱུར་བར་
བྱེད་པའི་ཐབས་ལམ་གྱི་ཆད་མཐུད་འཕོ་བའི་རྣལ་འབྱོར་ཉམས་སུ་བླང་བའི་ཚུལ་ལ། སྦྱང་བ་དང་། ལས་ལ་སྦྱོར་བའོ། །དང་པོ་ལའང་རྗེ་བཙུན་ཡབ་ཡུམ་ཞལ་སྦྱོར་དང་། ཡུམ་རྐྱང་གི་འཕོ་བ་གཉིས་ལས། འདིར་ཕྱི་མ་ཅུང་ཟད་བཤད་ན། གསལ་གདབ་པ་དང་སྦྱང་བ་དངོས་གཉིས་ལས། དང་པོ་ནི། བདག་བསྐྱེད་དང་འབྲེལ་ན་ཐུན་མཚམས་ཀྱི་ལྷར་གསལ་བཞིན་པའི་ངང་དང་། མ་འབྲེལ་ན་སྐྱབས་སེམས་སྔོན་དུ་འགྲོ་བས་རང་སྐད་ཅིག་གིས་རྣལ་འབྱོར་མར་གསལ་གདབ་གང་ལྟར་ཡང་། རང་རྡོ་རྗེ་རྣལ་འབྱོར་མར་གསལ་བའི་ལུས་ཀྱི་དབུས་དྲང་པོར་རྩ་དབུ་མ་ཕྱི་དཀར་ལ་ནང་དམར་བ། རྩ་བ་ཕྲ་བ་མདའ་སྨྱུག་ཙམ་ལ། རྩེ་མོ་སྦོམ་པ་སྦ་ལྕག་ཙམ་པ། ཡར་སྣ་སྤྱི་གཙུག་ཚངས་བུག་ཏུ་ཟུག་ཅིང་རྒྱ་མཐོང་ལྟར་ཁ་བྱེ་བ། མར་སྣ་ལྟེ་བར་ཟླ་གདན་ལ་ཟུག་པ། ཆོས་འབྱུང་དམར་པོ་གྲུ་གསུམ་པའི་ནང་དུ་ཟུག་པར་བསྒོམ་ཀྱང་རུང་། དེའི་སྟེང་དུ་རང་གི་རླུང་སེམས་དབྱེར་མེད་པའི་ངོ་བོ་བཻ་ཡིག་གམ། ཐིག་ལེ་དམར་པོ་ཆེ་ཆུང་རིལ་མ་ཙམ་པ་འཕུར་ལ་ཁད་པ་ཞིག་གསལ་གདབ། རང་གི་སྤྱི་བོར་སེང་ཁྲི་པད་ཟླ་འཇིགས་བྱེད་དུས་མཚན་གྱི་གདན་ལ་རྩ་བའི་བླ་མ་རྡོ་རྗེ་རྣལ་འབྱོར་མའི་རྣམ་པར་བཞུགས་པ་ལ། བརྒྱུད་པའི་བླ་མ་གནས་གསུམ་གྱི་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་བ། དེ་དག་ཀྱང་འཇའ་གུར་གྱི་དབུས་ན་
བཞུགས་ཤིང་། མེ་ཏོག་གི་ཆར་ཆེན་པོ་རྒྱུན་མི་ཆད་པར་འབེབས་པ། འཇའ་མདུང་ཚུགས་སུ་ཟུག་ཅིང་སྤོས་ཀྱི་དྲི་ཞིམ་པོ་འཐུལ་པ་སོགས་མཁའ་སྤྱོད་དངོས་དང་མཚུངས་པར་གྱུར། ཅེས་བརྗོད་། ཅིང་བསམ། སླར་ཡང་རང་གི་ཐུགས་ཀ་ནས་འོད་ཟེར་འཕྲོས་པས་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་སོགས་སྐྱབས་ཡུལ་ཐམས་ཅད་ཨོཾ་བཛྲ་ས་མཱ་ཛ༔ ཛཧཱུྃ་བཾ་ཧོ༔ གཉིས་སུ་མེད་པར་ཐིམ་པས་སྐྱབས་གནས་ཐམས་ཅད་འདུས་པའི་ངོ་བོར་བསམ་མོ། །གཉིས་པ་སྦྱང་བ་དངོས་ནི། རང་གི་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་རྒྱུར་བྱས་པ་ལས་བྱུང་བའི་མཆོད་སྤྲིན་བསམ་གྱིས་མི་ཁྱབ་པས་མཆོད་པར་མོས་ཏེ། ཨོཾ་གུ་རུ་བཛྲ་ཡོ་གི་ནི་ས་པ་རི་ཝཱ་ར་ཨགྷཾ་ནས། ཤབྡའི་བར་གྱིས་མཆོད། དཔལ་ལྡན་རྡོ་རྗེ་མཁའ་འགྲོ་སོགས་ཀྱིས་བསྟོད། སྤྲོ་ན་བརྒྱུད་པའི་གསོལ་འདེབས་དང་། གང་ལྟར་ཡང་། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་མཁའ་སྤྱོད་རྡོ་རྗེ་རྣལ་འབྱོར་མ་ལ་གསོལ་བ་འདེབས་སོ། །བདག་འཛིན་བློ་ཡིས་ཐོངས་པར་བྱིན་གྱིས་རློབས་ཤིག །དགོས་མེད་རྒྱུད་ལ་སྐྱེ་བར་རྩྭ་བྱིན༴ །ལམ་མཆོག་འཕོ་བ་འབྱོངས་པར= །འཕྱུགས་མེད་མཁའ་སྤྱོད་འགྲུབ་པར= །ཞེས་ཚར་གྲངས་ཅི་ནུས་བརྗོད་ཅིང་གསོལ་བ་ཕུར་ཚུགས་སུ་བཏབ་ལ། འོག་རླུང་དྲག་ཏུ་འཐེན་པ་དང་མཉམ་དུ་གཤང་
སྒོའི་རླུང་གཡོས་ཟླ་དཀྱིལ་ལ་ཕོག །རང་སེམས་པཾ་ཡིག་གམ་ཐིག་ལེ་གསལ་བ་དེ་ཉིད་དབུ་མའི་ནང་ནས་སྐར་མདའ་འཕང་བ་ལྟར་སོང་། བླ་མ་རྗེ་བཙུན་མའི་གསང་བ་ནས་ཞུགས་ཏེ་ཐུགས་ཀའི་ཛཾ་ཡིག་ལ་སིབ་ཀྱིས་ཐིམ་པར་བསམ་ལ་སེམས་བཟུང་། ཡང་སྟེང་རླུང་རྔུབས་པས་བླ་མའི་ཐུགས་ཀ་ནས་བྱུང་སྟེ་སྔར་ལྟར་གདན་ལ་འཁོད་པར་བསམ་ལ་རླུང་བུམ་པ་ཅན་ཁ་སྦྱར་དུ་འཛིན། སླར་ཡང་མཆོད་བསྟོད་བྱ་བའམ། གསོལ་འདེབས་ཀྱི་མཐར་སྔར་བཞིན་དམིགས་པའི་རྟེན་གོམས་པ་ལ་བསླབས་པ་ནི་རླུང་གི་འཕོ་བ་དང་། སྐབས་སུ། ཨཱི་ཧི་ཀྲ །ཅེས་བརྗོད་པས་ཐིག་ལེ་སྤར་བ་དང་། ཀ་ཧི། ཞེས་པས་འབེབས་པ་སྟེ་སྒྲས་འཕོ་བའང་ཉམས་སུ་བླངས། འདི་གཉིས་ཀྱི་སྔ་མ་འབྱོངས་དཀའ་ཡང་འབྱོངས་ཕྱིན་བརྟན་པ་ཡིན་ལ། ཕྱི་མ་འབྱོངས་སླ་ཡང་བརྟན་དཀའ་བ་ཡིན་ཅེས་གསུངས། དེ་ལྟར་དུས་རྒྱུན་དུ་ལན་བདུན་སོགས་དང་། འདི་ཁོ་ན་སྦྱང་བའི་ཚེ་ཞག་བདུན་སོགས་ཐུན་བཞིར་བཅད་ལ་འབད་རྩོལ་དྲག་པོས་རྟགས་མ་བྱུང་བར་ཉམས་སུ་བླང་བར་བྱ་ཞིང་། རྟགས་ནི་སྤྱི་བོ་ཟ་བ་དང་། སྐྲངས་པ་དང་། ཆུ་སེར་འཛག་པ་དང་། སྒྲུབ་ཁང་ལ་འཇའ་ཟུག་པ་སོགས་འབྱུང་ངོ་། །ཐུན་ལས་ལྡང་བ། རླུང་སེམས་མར་ཕབས་པའི་རྗེས། མཐའ་སྐོར་གྱི་སྐྱབས་ཡུལ་རྣམས་བླ་མ་རྡོ་རྗེ་རྣལ་འབྱོར་མར་ཐིམ། དེ་ཉིད་རང་གི་ཚངས་
བུག་ནས་བརྒྱུད་སྙིང་གར་དབུ་མའི་ནང་དུ་ཞུགས། སྤྱི་གཙུག་སྣ་ཚོགས་རྡོ་རྗེ་སྲ་ཞིང་འཐས་པས་བཀག་པར་བསམ། རྟགས་བྱུང་བ་སོགས་ཀྱི་ཚེ་ཚེ་སྒྲུབ་བྱེད་པར་འདོད་ན། སྙིང་གའི་རྣལ་འབྱོར་མ་འཆི་མེད་ཚེའི་བདུད་རྩིའི་ཆུ་རྒྱུན་དུ་གྱུར་ནས་ལུས་ཀྱི་ནང་ཐམས་ཅད་གང་བས་འཆི་མེད་ཚེའི་དངོས་གྲུབ་ཐོབ། བ་སྤུའི་བུ་ག་ཚུན་ཆད་ཀྱང་བདུད་རྩིའི་ཟིལ་པ་ཕྲམ་མེར་ཡོད་པར་བསམ་ལ་རླུང་བུམ་ཅན་ཅི་ནུས་སུ་འཛིན། མཐར་བདག་བསྐྱེད་དང་འབྲེལ་ན་གོ་ཆ་བཀོད་པ་སོགས་དཀྱུས་ལྟར་དང་། མ་འབྲེལ་ན་བསྔོ་སྨོན་བཀྲ་ཤིས་སོགས་བྱའོ། །གཉིས་པ་ལས་ལ་སྦྱར་བ་ནི། ངེས་པའི་འཆི་ལྟས་བྱུང་ཞིང་དུས་ལ་བབས་པའི་ཚེ། སྔར་བཞིན་གསལ་གདབ། ཁྱད་པར་རང་གི་ལུས་ལོངས་སྤྱོད་དགྲ་གཉེན་བར་མའི་འགྲོ་བ་དང་བཅས་པ་བླ་མ་རྣལ་འབྱོར་མར་ཕུལ་ནས། ཆགས་སྡང་རྨོངས་གསུམ་གྱི་ཞེན་པ་བཙན་ཐབས་སུ་སྤངས། དམ་ཚིག་ཉམས་ཆགས་བཤགས་སྡོམ་གྱི་འདུན་པ་དྲག་པོ་བྱ། དམིགས་གནད་སྔར་བཞིན་ལ་རང་སེམས་བླ་མའི་ཐུགས་ཀར་ཐིམ། བླ་མ་རྗེ་བཙུན་མར་གསལ་བ་ཡང་མཁའ་སྤྱོད་དག་པའི་ཞིང་དུ་གཤེགས་པར་བསམ་ལ། དབྱིངས་སྟོང་ཉིད་དུ་རྗེན་ནེ། གདངས་གསལ་རིག་ཏུ་ལམ་མེ། དེ་གཉིས་དབྱེར་མེད་པ་བརྗོད་བྲལ་བློ་འདས་ཀྱི་ངང་དུ་མཉམ་པར་བཞག་པས། དེའི་ངང་དུ་དབུགས་ཆད་
ན་འཕོ་བ་ཐེབས་པ་ཡིན་ནོ། །གལ་ཏེ་གཟའ་གདོང་ཐུག་ལྟ་བུ་རྐྱེན་གློ་བུར་བས་དམིགས་པའི་གསལ་འདེབས་རྒྱས་པ་ལང་མ་བྱུང་ན། རང་སེམས་དང་བླ་མའི་ཐུགས་དབྱེར་མེད་དུ་བསྲེས་པའི་ངང་ལ་མཉམ་པར་བཞག །དེ་ལྟར་དྲན་པས་མ་ཟིན་པའམ། འཕོ་བ་མ་འབྱོངས་ནས་བར་དོའི་སྣང་བ་ཤར་ན། དེ་སྦྱང་བའི་ཚུལ་ནི། ད་ལྟ་ནས་གང་ཤར་གྱི་སྣང་བ་སྤྱི་དང་། ཁྱད་པར་འཇིགས་སྐྲག་སོགས་གློ་བུར་དུ་འཆར་བའི་ཚེ་བར་དོའི་སྣང་བ་ཤེས་པར་བྱས་ལ། རང་གཞན་གྱི་སྣང་བ་ཐམས་ཅད་སྦྱང་བསྒྱུར་གྱིས་ལྷ་དང་གཞལ་ཡས་ཁང་དུ་བསྒྱུར། རིག་པ་བརྗོད་མེད་དུ་ཆམ་མེར་འཇོག་པ་ལ་བསླབ་པས་བར་དོར་ཡང་དྲན་པས་ཟིན་ནས་ལམ་གྱི་འཕྲོ་མཐུད་དེ་གྲོལ་བར་འགྱུར་རོ། །དབང་པོ་ཤིན་ཏུ་ཐ་མས་འདའ་ཀ་མའམ། བར་དོའི་གདམས་ངག་མ་ཐེབ་ན། སྐྱེ་བ་ཕྱི་མར་ལམ་གྱི་འཕྲོ་མཐུད་ནས་མཁའ་སྤྱོད་ཀྱི་གོ་འཕང་དོན་དུ་གཉེར་བ་སྟེ། དེ་ཉིད་འགྲུབ་པའི་སླད་དུ་མཁའ་སྤྱོད་ཞལ་བཟང་བལྟ་བའི་སྨོན་ལམ་སོགས་གདབ་ཅིང་། བླ་མ་ལ་མོས་གུས་དང་མ་བྲལ་ན་ངེས་པར་འགྲུབ་པ་ཡིན་ནོ། །དེ་རྣམས་ཀྱིས་གཙོ་བོར་བསྐྱེད་རིམ་གྱི་རྣལ་འབྱོར་ཡན་ལག་དང་བཅས་པ་བསྟན་ནས། །གཉིས་པ་རྫོགས་པའི་རིམ་པ་ལ། སྤྱིར་ཆོས་ཉིད་དངོས་སུ་སྟོན་པ་དང་། བརྒྱུད་ནས་སྟོན་པ་གཉིས་ལས། འདིར་ཕྱི་མ་དཔེ་གསུམ་གྱིས་དོན་
གཅིག་གཏན་ལ་འབེབས་པར་བྱེད་པ་ལ། གཞི་ཆོས་ཅན་འཁོར་བའི་དུས་སུ་འཁྲུལ་སྣང་གི་གཙོ་བོ་རྩ་རླུང་ཐིག་ལེ་ཐམས་ཅད་ཀྱི་ཁྱབ་བྱེད་ནང་གི་ཕོ་ཉ་མཆོག་རྩ་དབུ་མ་ཁོ་ན་ལ་གནད་དུ་བསྣུན་པས། །གཉིས་མེད་ཀྱི་ཡེ་ཤེས་མྱུར་དུ་འཆར་བའི་གནད་ཤེས་པར་བྱས་ནས། དེ་ལ་གནད་དུ་བསྣན་པའི་ལམ་ཇི་ལྟར་བསྒོམས་པའི་གནད་རྗེ་བཙུན་ཡབ་དང་ཐུན་མོང་དང་། ཡུམ་རྐྱང་ཐུན་མོང་མ་ཡིན་པའི་རྩ་དབུ་མའི་རྣལ་འབྱོར་གཉིས་ལས། ཕྱི་མ་ལའང་ཆགས་ཅན་ཕོ་ཉའི་ལམ་ལ་དགའ་བ་དང་། ཆགས་བྲལ་རྣལ་འབྱོར་གྱི་ལམ་ལ་དགའ་བ་གཉིས་ཀྱི་ཕྱི་མ་ལྟར་བསྒོམ་པའི་ཚུལ་ལ། ཐོག་མ་སྦྱང་བའི་ཚུལ་སོགས་ཤཱི རྒྱས་པར་འཁྲིད་ཡིག་ཆེན་མོ་ལས་ཤེས་པར་བྱས་ནས། འདིར་རྒྱུན་དུ་ཉམས་སུ་བླངས་པའི་ཚུལ་ཅུང་ཟད་ཙམ་བཤད་ན། རྩ་དབུ་མ་ཁ་དབྱེ་བའི་རྣལ་འབྱོར་དང་། དབྱེ་ནས་བསྒོམ་པའི་མན་ངག་གཉིས་ལས། དང་པོ་ནི། རྒྱན་གྱི་ཉམས་ལེན་ལ་ཞར་བྱུང་གི་རྫོགས་རིམ་གྱི་མཇུག་ཏུ་ལུས་གནད་རྣམ་སྣང་ཆོས་བདུན་དང་ལྡན་པས། རང་རྣལ་འབྱོར་མའི་ལུས་དབུས་དྲང་པོར་རྩ་དབུ་མ་མར་སྣེ་ལྟེ་འོག་སོར་བཞིར་སླེབས་པ། ཡར་སྣེ་སྤྱི་བོར་ཟུག་པའི་ནང་དུ་བྱང་སེམས་ཧཾ་ཡིག་དཀར་པོ་མགོ་ཐུར་བསྟན་གྱིས་མཚན་པ། གཡས་སུ་རོ་མ་དམར་མོ། གཡོན་དུ་རྐྱང་མ་དཀར་མོ། གཉིས་ཀའང་གྲོ་སོག་འབྲིང་པོ་ཙམ་ཡར་སྣེ་སྤྱི་
གཙུག་ནས་གུག་སྟེ་སྣ་བུག་གཉིས་སུ་ཧ་རེ་ཟུག་པ། མར་སྣེ་ལྟེ་བའི་ཐད་དུ་དབུ་མ་དང་སྦུབས་གཅིག་ཏུ་གྱུར་པའི་ནང་དུ། ཙཎྜ་ལཱི་རཾ་དམར་པོ་མེའི་རང་བཞིན་ཅན་རིལ་མ་ཙམ་གྱིས་མཚན་པ། མེ་འབར་ལ་ཁད་པ་དེའི་འོག་ཏུ་རླུང་དཀྱིལ་ལྗང་ནག་སྲན་མ་བཀས་པ་ཙམ་གསལ་བཏབ། རླུང་རོ་དགུ་ཕྲུགས་སུ་ཕྱག་ལེན་ལྟར་བུས་ལ། འོག་རླུང་ཕྱེད་འཐེན་ཙམ་དང་། སྟེང་རླུང་རྫོགས་པར་རྔུབས། སླར་འོག་སྒོ་འབྱེད་འཛུམ་གསུམ་ཙམ་གྱིས་འོག་རླུང་རྫོགས་པར་དྲངས་པས་རླུང་དཀྱིལ་ལ་ཕོག །རླུང་གཡོས་རཾ་ཡིག་ལས་མེ་ལྕེ་དམར་ཉུག་ཉུག་འབར་བར་བསམ་ལ་བུམ་ཅན་འཛིན། མཐར་འཛིན་མེད་པའི་ལྟ་བས་རྒྱས་འདེབས། དེ་ནས་ལུས་ཁོལ་བུར་དྲོད་སྐྱེ་བ་སོགས་ཅུང་ཟད་གོམས་པ་ན། རིམ་གྱིས་རྩ་གསུམ་གྱི་ནང་ཐམས་ཅད་མེས་གང་། དེ་ནས་རྩ་ཕྲན་ཐམས་ཅད་ཀྱང་མེས་ཁེངས་ཏེ་སྡིག་སྒྲིབ་བག་ཆགས་དང་བཅས་པའི་ངོ་བོ་ཁམས་སྙིགས་མ་ཐམས་ཅད་ཆམ་ཆམ་བསྲེགས། དྭངས་མ་བདུད་རྩིར་ཞུ་བ་དང་། སྤྱི་བོའི་ཧཾ་ལ་རེག་པས་བདུད་རྩིའི་རྒྱུན་དངུལ་ཆུ་ལྟ་བུའི་དྭངས་མས་རྩ་ཐམས་ཅད་ཁེངས་ཏེ་བདེ་དྲོད་བསམ་གྱིས་མི་ཁྱབ་པ་སྐྱེས་པར་བསམ་ལ་རླུང་བུམ་ཅན་འཛིན། གཉིས་པ་བསྒོམ་པའི་མན་ངག་ལ། རླུང་ལུས་ལ་གནས་པས་བདེ་བ་དང་། སེམས་ལ་ཞུགས་པས་སྟོང་པར་བསྒྲུབ་པའི་རྣལ་འབྱོར་གཉིས་
ལས། དང་པོ་ནི། རོ་རྐྱང་གཉིས་མི་དམིགས་པར་བཞག །དབུ་མ་སྦ་ལྕག་འབྲིང་པོ་ཙམ་ཡར་སྣ་སྤྱི་གཙུག་ནས་སྨིན་མཚམས་སུ་གུག་པའི་ནང་དུ། ཆོས་འབྱུང་དམར་སེར་འོད་ཀྱི་རང་བཞིན་ཅན་གྱི་རྩ་བ་ཕྲ་བ་དབུ་མའི་ནང་དུ་ཟུག་པ་ལ་བུག་པ་ཐལ་ལེ་ཡོད་པ། མར་སྣེ་གསང་གནས་ཀྱི་པདྨའི་ནང་དུ་ཧ་རེ་ཡོད་པའི་ནང་ཆོས་འབྱུང་སྔ་མ་ལྟ་བུ་ཞིག་གསལ་གདབ། སྨིན་མཚམས་ཀྱི་ཆོས་འབྱུང་ནང་ཐིག་ལེ་དཀར་ལ་སྔོ་མདངས་ཆགས་པ། འོད་ཁ་དོག་ལྔ་འཕྲོ་བ་སྲན་མ་ཙམ་ཞིག་གསལ་ལ། འོག་རླུང་ཅུང་ཟད་འཐེན། སྟེང་རླུང་ཅུང་ཞིག་རྔུབས་པའི་རྐྱེན་གྱིས་དེ་ལས་འོད་ཁ་དོག་ལྔ་ལྡན་འཕྲོ་བར་བསམ་ལ་སེམས་བཟུང་བས་སྨིན་མཚམས་སུ་ན་ལྷང་ལྷང་བའམ་བདེ་བ་སྐྱེ་བ་སོགས་ཀྱི་རྟགས་བྱུང་ན། ཐིག་ལེ་དེ་བུག་པ་ནས་ཡར་སོང་། སྤྱི་གཙུག་གི་དབུ་མའི་ནང་དུ་རི་རྩེར་སྐར་མ་ཤར་བ་བཞིན་འོད་ཕྲམ་ཕྲམ་དུ་གནས་པར་བསམ་ལ་སེམས་བཟུང་། མཐར་དེ་ལས་བདེ་ཆེན་གྱི་ཐིག་ལེ་ཤེལ་དཀར་བཞུ་བ་ལྟ་བུ་པདྨའི་སྣལ་མ་ཙམ་པ་ཞིག་ནར་གྱིས་བབས། སྤྱི་བོ། མགྲིན་པ། སྙིང་ག །ལྟེ་བ། གསང་གནས་རྣམས་ཀྱི་དབུ་མའི་ནང་དུ་བབས་པ་ལ་སེམས་བཟུང་བས་ཡས་བབས་ཀྱི་དགའ་བཞིའི་ཡེ་ཤེས་སྐྱེས་པར་བསམ། དེ་ནས་གསང་གནས་ཀྱི་ཆོས་འབྱུང་གི་ནང་ནས་ཀྱང་ཕྱིར་སོར་ཕྱེད་དང་གསུམ་ཉུག་གེ་ཡོད་པ་ལ་
སེམས་གཏད། སླར་ཆོས་འབྱུང་གི་བུག་པ་ནས་གྱེན་དུ་བྱུང་སྟེ། ལྟེ་བ་ནས་སྤྱི་བོའི་གཞིར་གནས་ཀྱི་ཐིག་ལེ་ལ་ཐིམ་པའི་བར་གནས་སོ་སོར་སེམས་བཟུང་བས། མས་བརྟན་གྱི་དགའ་བཞི་སྐྱེས་པར་བསམ་ལ་རིག་པ་འཛིན་མེད་དུ་བཞག །གཉིས་པ་ནི། དབུ་མ་ཆོས་འབྱུང་བཅས་སྔར་བཞིན་གསལ་བའམ། ཡང་ན་ཆོས་འབྱུང་མི་དམིགས་པར་བཞག །དབུ་མའི་ཡར་སྣ་སྨིན་མཚམས་དང་། མར་སྣ་གསང་གནས་ཀྱི་མཚམས་སུ་ཐད་བཅད་དུ་ཡོད་པར་བསམ། དེ་ནས་སྨིན་མཚམས་ཀྱི་ཆོས་འབྱུང་གི་ནང་ངམ་དབུ་མའི་ཡར་སྣེར་ཐིག་ལེ་བསྒོམ་པ་དེ་ལ་སེམས་བཟུང་སྟེ་སྤྱི་གཙུག་ཏུ་སྤོ་པའི་བར་སྔར་བཞིན་ལ། སྤྲོ་ན་བདེ་ཆེན་གྱི་ཐིག་ལེ་འབེབས་བཟློག་གི་དམིགས་པ་ཡང་བྱ། གང་ལྟར་ཡང་སྤྱི་བོའི་ཐིག་ལེ་ལ་སེམས་ཞུགས་པ་བཞིན་ཆེར་གྱིས་གཏད་པས། དེ་ལས་འོད་ཟེར་ཁ་དོག་ལྔ་ལྡན་འཇའ་ཚོན་ལྟ་བུ་བུན་གྱིས་འཕྲོས། དབུ་མའི་ནང་བརྒྱུད་རྩ་ཁམས་གང་ལ་རེག་པ་ཐམས་ཅད་འཇའ་ཚོན་དུ་སོང་། དེ་ནས་ཆེར་འཕྲོས་པས་ལུས་རིལ་པོ། གནས་ཁང་། ལུང་པ། ཡུལ་ཕྱོགས། མཐར་ཁམས་གསུམ་ཐམས་ཅད་འོད་ཁ་དོག་ལྔ་འཇའ་ཚོན་ལྟ་བུ་ཁྲ་ཤིག་ཤིག ན་བུན་ལོང་ལོང་དུ་གྱུར་པར་བསམ་ལ་སེམས་བཟུང་། མཐར་དེ་ཐམས་ཅད་ནམ་མཁའ་ལ་དུ་བ་ཡལ་བ་བཞིན་བདེ་སྟོང་གི་ངང་དུ་མི་དམིགས་པར་བསམ་པའམ།
ཡང་ན་དེ་ཐམས་ཅད་རང་གི་ལུས་ལ་ཐིམ། ལུས་སྤྱི་བོའི་ཐིག་ལེ་ལ་ཐིམ། དེ་ནམ་མཁའ་ལ་འཇའ་ཡལ་བ་ལྟར་ཆོས་ཉིད་ཀྱི་ངང་དུ་ཐིམ་པར་བསམ། སྡུད་རིམ་སྔ་མ་ལྟར་ན། རང་ལུས་ལྷ་སྐུ་རྩ་ཐིག་དང་བཅས་སྐད་ཅིག་གིས་ལམ་གྱིས་གསལ་འདེབས། ཕྱི་མ་ལྟར་ན། ཐོག་མར་རང་གི་སྨིན་མཚམས་ཀྱི་ཐིག་ལེ་དེ་ཁྲ་ཆེམ་གྱིས་གྲུབ། དེ་ནས་རིམ་བཞིན་དུ་ལུས་རྩ་དང་བཅས་པ་གྲུབ་པར་བསམ་ལ་དམིགས་པ་བསྐྱར། དེ་ལྟར་ན་རླུང་ལུས་ལ་གནས་པས་ཁམས་སྙིགས་མ་དངས་མ་དང་། སེམས་ལ་ཞུགས་པས་དངས་མ་འཇའ་ལུས་སུ་བསྒྱུར་པར་བྱེད་པའི་ཐབས་དམ་པ་སྟེ། ཚུལ་འདི་ལ་གོམས་པས་ཅིར་སྣང་བདེ་ཆེན་ཡེ་ཤེས་སུ་འཆར་བ་ན། གསང་བའི་སྤྱོད་པས་བོགས་དབྱུང་ཞིང་། ཕྱོགས་ལས་རྣམ་རྒྱལ་གྱི་སྤྱོད་པ་དང་། ཕྱག་རྒྱའི་ཉེ་རྒྱུས་མཚམས་སྦྱར་ཏེ་ཚེ་གཅིག་གིས་མཆོག་གི་དངོས་གྲུབ་མངོན་དུ་བྱེད་པར་འགྱུར་རོ། །གསུམ་པ་ལམ་གྱི་ཡན་ལག་པྲ་སེ་ན་དབབས་པ་སོགས་ནི། དེང་སང་ལག་ལེན་འདེབས་པ་ཉུང་བས་འདིར་མ་བྲིས་ཏེ། རྗེ་བཙུན་ས་སྐྱ་པའི་གསུང་རབ་རྣམས་ལས་ཤེས་པར་བྱ་ཞིང་། འདིར་འཕྲོས་དོན་དུ་བསྙེན་པ་བྱེད་ཚུལ་གྱི་ལག་ལེན་ཅུང་ཟད་བཤད་ན། སྦྱོར་བ། དངོས་གཞི། རྗེས་སོ། །དང་པོ་ནི། རྟེན་གྱི་གང་ཟག་ངེས་འབྱུང་དང་སྙིང་རྗེ་ཆེན་པོས་རྒྱུད་སྦྱངས་ཏེ་དབང་ཐོབ་ཅིང་དམ་
ཚིག་ལ་གནས་པ། བྱིན་རླབས་ཀྱིས་སྨིན་ཞིང་ཉམས་ཁྲིད་ཟབ་མོ་ཐོབ་པ་ཆགས་མེད་ཀྱི་རྒྱུན་དང་ལྡན་ཞིང་བརྩོན་འགྲུས་ཡལ་བར་མི་འདོར་བས། གནས་དབེན་ཞིང་ཡིད་དང་མཐུན་ལ་རང་དབང་འདུས་པའི་གནས་སུ། མར་ངོའི་ཚེས་བཅུ་ལྟ་བུ་དུས་ཁྱད་པར་ཅན་གྱི་སྔ་དྲོ་གནས་ཁང་ཕྱག་དར་བྱ། རང་ཉིད་ཁ་ནུབ་ཏུ་ཕྱོགས་པའི་མདུན་རྣལ་འབྱོར་མའི་སྐུ་བྲིས་འབུར་གང་རིགས་ཀྱི་མདུན་དུ། གཏོར་མ་ལྔ་ཚར་སོགས་ཇི་ལྟར་རིགས་པ་མཆོད་པ་དང་བཅས་པ་བཤམས། བསྒུལ་བསྐྱོད་མི་དགོས་པའི་མལ་འོག་ཏུ་སྣ་ཚོགས་རྡོ་རྗེ་བྲིས་པའི་སྟེང་འབྲུ་དཀར་དང་ཀུ་ཤའི་ཆུན་པོ་དགྲམ། མདུན་དུ་ནང་མཆོད་རྡོར་དྲིལ། ཌཱ་མ་རུ་སོགས་ཉེར་མཁོའི་ཡོ་བྱད་དང་། མལ་ས་དེ་མིན་པ་ཞིག་ཏུ་རང་འཁོད་པའི་མདུན་གཏོར་མ་ཆ་གསུམ་སོགས་འོག་ཏུ་དགོས་པའི་ཡོ་བྱད་རྣམས་སྟ་གོན་བྱ། གཉིས་པ་ནི། ཕྱི་དྲོའི་ཆ་ལ་བབས་པ་ནས། གྲོགས་དམ་ཚིག་པ་དང་བཅས་ཏེ་ཆ་གསུམ་ཡིད་ཆེས་པ་བཏང་པའམ། སྔོན་འགྲོ་གཏོར་མ་དཀྱིལ་ཆོག་ནས་འབྱུང་བ་བཞིན་ལ། མི་འདྲ་བའི་ཁྱད་པར། རྗེ་བཙུན་རྡོ་རྗེ་རྣལ་འབྱོར་མའི་བསྙེན་སྒྲུབ་ཟབ་མོ་བགྱིད་པར་འཚལ་ན། ཞེས་དང་། བསྙེན་སྒྲུབ་ཀྱི་བྱ་བ་མཐར་མ་ཕྱིན་པར་ཞེས་བསྒྱུར། གཏོར་མ་ཕྱིར་དོར་བའི་ཚེ། མདུན་མཁར་བླ་མ་ཡི་དམ་འཁའ་འགྲོ་ཆོས་སྐྱོང་ཐམས་ཅད་མངོན་སུམ་བཞིན་དུ་
བཞུགས་པར་མོས་ཏེ། བདེན་སྟོབས་བརྗོད་པས་དེ་རྣམས་ཀྱི་སྐུ་ལས་རྡོ་རྗེ་ཁྲོ་བོ་དང་མེ་དཔུང་མཚོན་ཆའི་ཚོགས་དཔག་ཏུ་མེད་པ་སྤྲོས། ཡུངས་ཀར་ཀྱང་འབྲུ་རེ་རེ་ནས་སྤྲུལ་པའི་ཕོ་ཉ་སྲིན་པོ་ཁྲོས་པ་ལྟ་བུ་བསམ་གྱིས་མི་ཁྱབ་པར་གྱུར་ཏེ་བགེགས་ཐམས་ཅད་རྒྱང་རིང་དུ་བསྐྲད། བསད་བཅད་བཏུབ་ཅིང་ཆོས་དབྱིངས་སུ་ཐིམ། སྤྲུལ་པའི་ཁྲོ་བོའི་ཚོགས་རྣམས་ཚུར་འདུས་ཏེ་སྲུང་བའི་གུར་དུ་གྱུར་པར་བསམ་ལ། གུ་གུལ་གྱིས་བདུག །ཡུངས་ཀར་གྱིས་བྲབ། མཚམས་གཡོག་དང་སྨན་པ་སོགས་དམིགས་ཁོང་དུ་བཅུག་དགོས་པ་རྣམས་ཀྱང་འཇུག །སྤྲོ་ན་ཤེར་སྙིང་བདུད་བཟློག་དང་བཅས་པའང་བྱ། དེ་ནས་སྒོ་ཡི་ཕྱི་རོལ་དུ་ཐོ་དཀར་པོ་བཙུགས་ལ། རང་ཉིད་གྲོགས་དང་བཅས་རྡོར་དྲིལ་ཡུངས་ཀར་སྤོས་སོགས་ཐོགས་ལ། རྒྱས་པར་རྨོར་ཆེན་གྱིས་མཛད་པའི་ཐོ་འཛུགས་ལྟར་བྱ། ངོར་ལུགས་ལ་ཆ་གསུམ་ཙམ་ལས་གཞན་མི་མཛད། མཆན། དེ་ཙམ་མི་ནུས་ཀྱང་། ཐོ་འཇམ་མགོན་ཀུན་བློའི་གསུངས། མཆན། སུམྦྷ་ནི་སོགས་བརྗོད་ཅིང་ཡུངས་ཀར་གྱིས་བྲབས། གུ་གུལ་བདུག །མེ་ཏོག་དང་བཅས་ཐལ་མོ་སྦྱར་ཏེ། ཡེདྷརྨཱ་ཚར་གསུམ། ཕྱོགས་བཅུ་ན་བཞུགས་པའི་སོགས་བརྟན་བཞུགས་སྤྱི་ལྟར་ལ། བྱེ་བྲག་ཏུ་ཐོ་འདི་ལ་རྒྱལ་ཆེན་བཞི་འཁོར་དང་བཅས་པ་བརྟན་པར་བཞུགས་ནས་བདག་གི་བསྙེན་སྒྲུབ་མཐར་མ་ཕྱིན་གྱི་བར་དུ། ཕྱིའི་བར་
ཆད་ནང་དུ་མི་གཏོང་ཞིང་། ནང་གི་དངོས་གྲུབ་ཕྱིར་མི་ཡལ་བར་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པའི་སྟོང་གྲོགས་ཕྲིན་ལས་རྒྱ་ཆེན་པོ་མཛད་དུ་གསོལ། སུ་པྲ་ཏིཥྛ་དང་། ཡེ་དྷརྨཱ་བརྗོད་ཅིང་མེ་ཏོག་འཐོར། བཀྲ་ཤིས་བརྗོད། ནང་དུ་ལོག་ལ་རང་ཉིད་མལ་དུ་འཁོད། ངེས་འབྱུང་དང་བྱང་སེམས་གསལ་གདབ་ལ། བརྒྱུད་པའི་བླ་མ་དང་། རྩ་བའི་བླ་མའི་སྐུ་བསྟོད་མོས་གུས་ཤུག་དྲག་པོས་བྱས། དེ་ནས་གནས་ཡོ་བྱིན་རླབས་སྔོན་དུ་འགྲོ་བས། སྐྱབས་འགྲོ་ནས་བསམ་མི་ཁྱབ་པའི་བར་ཚར་ལུགས་ལྟར་ན་གནས་གསར་རྡོ་རྗེ་འཆང་དང་། ངོར་ལུགས་ལྟར་ན་རྗེ་དཀོན་མཆོག་ལྷུན་གྲུབ་ཀྱི་ཡིག་ཆའི་དཀྱུས་ནས་འབྱུང་བ་ལྟར་ཉམས་སུ་བླངས་རྗེས་ཐུན་མཚམས་ཀྱི་ལྷར་ལྡང་ཞིང་གཏོར་མ་འབུལ། གོ་ཆ་བཀོད་ཅིང་བསྲུང་བ་དང་བསྔོ་སྨོན་རྒྱས་པར་བྱ། གོང་གི་ཡིག་ཆ་དེ་གཉིས་མ་འབྱོར་ན་སྔོན་དུ་ཁོ་བོས་བཤད་པའི་སྒྲུབ་ཐབས་འདི་ཁོ་ན་ལྟར་ཉམས་སུ་བླངས་ཀྱང་རུང་ངོ་། །སླར་སྲོད་ཐུན་སྐྱབས་འགྲོ་ནས་བསྡུ་རིམ་པར་དཀྱུས་ལྟར་ལ། ཉལ་བའི་རྣལ་འབྱོར་གྱིས་ཉལ། སང་ནངས་པར་ལྡང་སྟེ་བདུད་རྩི་མྱོང་བ་དང་། སྐྱབས་འགྲོ་སོགས་དཀྱུས་ལྟར། ཉི་མ་ཤར་ཙམ་གྱི་ཚེ་ཐུན་གྲོལ། གཏོར་མ་བརྒྱ་རྩ་དང་ཚེ་སྒྲུབ་སོགས་བྱེད་ན་སྐབས་འདིར་བྱ། དེ་ནས་ཐུན་ཚུགས་ལ་ཉིན་ཕྱེད་མ་ཟིན་ཙམ་ལ་གྲོལ། ཁ་ཟས་ཀྱི་རྣལ་འབྱོར་
དང་། ཕྱག་བསྐོར་མདོ་འདོན་པ་སོགས་དགེ་བའི་བྱ་བ་ཅི་འགྲུབ་བྱ་ཞིང་ཅུང་ཟད་ངལ་གསོ། །དེ་ནས་གནས་ཡོ་བྱིན་རླབས་སྔོན་དུ་འགྲོ་བས་ཐུན་ལ་ཞུགས། ཉི་མ་ནུབ་ལ་ཉེ་བ་ན་གྲོལ་ནས་གཏོར་མའི་རྣལ་འབྱོར་རྒྱས་པར་བྱ། སྤྱིར་གྲུབ་ན་ཐུན་སྔ་མ་གཉིས་ཀྱི་མཇུག་ཏུའང་གཏོར་བསྔོ་བྱ་བར་གསུངས། བིར་སྲུང་དང་བྲག་རྫོང་མ་སོགས་སྲུང་འཁོར་གྱི་རིགས་ཡོད་ན་ཉམས་སུ་བླངས། དེ་ནས་སྲོད་ཐུན་ལ་འཇུག་ཅིང་། ནམ་གུང་མ་ཟིན་ཙམ་ལ་གྲོལ་ནས་ཉལ་བའི་རྣལ་འབྱོར་སོགས་སྔར་བཞིན་བྱ་སྟེ། དེ་ལྟར་ཐུན་བཞིའི་སྤྱིར་ཚར་ལུགས་ལ་ཐུན་བཞི་དང་། ངོར་ལུགས་ལ་ཐུན་གསུམ་མཛད་ཀྱང་། སྐབས་འདིར་རྗེ་རྡོ་རྗེ་འཆང་གིས་ཀྱང་། ཐུན་བཞི་བསྒོམ་ཞིང་གུས་པས་གསོལ་བཏབ་པས། ཞེས་གསུངས་པས་ཐུན་བཞི་ཁོ་ན་ལེགས་སོ། །མཆན། ཚུལ་གྱིས་ཐོག་མར་ཐུན་རྣམས་ལ་སྔོན་འགྲོ། སྐྱབས་འགྲོ། རྡོར་སེམས། མཎྜལ་རྣམས་རིམ་པ་གཙོ་བོར་བྱས་ཏེ། རབ་འབུམ་ཐེར་དང་། དེ་མིན་ཀྱང་མཚམས་ཀྱི་དངོས་གཞི་ཡུན་རིང་ཐུང་ལ་ལྟོས་ཏེ་ཞག་གསུམ། བདུན་སོགས་ཇི་ལྟར་འོས་པ་བྱ། དངོས་གཞིར་གཙོ་བོ་ངག་བཟླས་དང་། ཐུན་མཇུག་ཏུ་ཡིད་བཟླས། ཞར་བྱུང་གི་རྫོགས་རིམ་མཁའ་སྤྱོད་སྒྲུབ་པའི་ལམ་ཁྱད་པར་ཅན་བསམ་མི་ཁྱབ་ཐུན་མིན་རྣམས་མ་ཆགས་པར་བྱ། གཞན་འཕོ་བ་དང་། རྩ་དབུ་མའི་རྣལ་འབྱོར་སོགས་ཀྱང་ཇི་ལྟར་རིགས་པར་བསྒོམ། ལམ་
དུས་ནི་ཐོར་ཐུན་གྲོལ་ནས་སྔ་ཐུན་མཚུགས་པའི་བར་བྱ་ཞིང་། དེ་མིན་ཁ་འདོན་ཆུང་ངུའི་རིགས་རྣམས་ཐུན་མཚམས་གང་རུང་ལ་མ་ཆགས་ཙམ་བྱ། ཐུན་ལ་ཞུགས་ནས་མ་གྲོལ་བར་ཇ་སོགས་བཞེས་ཀྱང་ངག་མཚམས་དམ་པར་བཅད། ཐོག་མར་ཁོག་གྲིམ་ལ་སོས་དལ་བ། བར་དུ་སྒོ་གསུམ་འཇུག་པ་ཆིག་བསྒྲིལ། མཐར་ཇེ་ལྷོད་ལ་བཏང་ནས་མཚམས་དང་ཞེ་མ་འགྲས་པར་བསླབ། བཟླས་པ་འགྲོ་ཆེ་བ་དང་ཉམས་དང་རྨི་ལམ་གསལ་བ་སོགས་བཟང་རྟགས་དང་། བཟླས་པ་འགྲོ་བ་བུལ་ཞིང་ནད་གདོན་སོགས་རྐྱེན་ངན་གང་བྱུང་ཡང་རེ་དོགས་ཀྱི་རྣམ་རྟོག་ཚབ་ཚུབ་མི་བྱ་བར་བློ་བླ་མ་དང་དཀོན་མཆོག་ལ་གཏད་ནས་ལྷོད་ཀྱིས་གློད། དམ་བཅའ་ཡལ་བར་མི་འདོར་བའི་སྙིང་རུས་བསྐྱེད། རིག་པ་བརྗོད་མེད་དུ་ཆམ་མེར་བཞག་པས་གེགས་ཐམས་ཅད་རང་གྲོལ་དུ་འགྲོ། བཟླས་པའི་ཐོག་མར། ཐོད་པའམ་བ་དྷི་ཙིའི་ཕྲེང་བ་བརྒྱ་རྩ་བརྒྱད་ལ། ༀ་པ་དེ་པ་དེ་མ་ཧཱ་ཛྷཱ་ནཾ་སརྦ་བུདྡྷ་མ་ཡཾ་བྷ་བེ་ཏ་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨཱཋཁཾ་སྭཱ་ཧཱ། ལན་གསུམ་བཟླས་པའི་ཁ་རླངས་ཕྲེང་བར་ཕོག་པར་བྱས་ཏེ་བྱིན་གྱིས་བརླབས། དངོས་གཞིའི་བཟླས་དམིགས་ནི་གཙོ་བོ་སྔར་བཤད་པ་བཞིན་དང་། དམིགས་པ་གཅིག་ཁོ་ནས་སྐྱོ་ན། རེས་ལྷ་སྐུ་སྣང་ལ་རང་བཞིན་མེད་པར་གསལ་ལམ་མེ་བ་ལ་སེམས་གཏད། རེས་སྐུ་ཡི་ཆ་ཤས་རེ་རེ་ནས་སེམས་འཛིན།
རེས་སྔགས་ཀྱི་ཡིག་འབྲུ་དང་སྒྲ་ཙམ་ལ་སེམས་བཟུང་། རེས་གནས་ལུགས་བརྗོད་བྲལ་གྱི་ངང་དུ་ངལ་གསོ། རེས་འོད་ཟེར་གྱི་རྩེ་ལས་མཆོད་པའི་རྣམ་གྲངས་བསམ་གྱིས་མི་ཁྱབ་པ་སྤྲོས་ཏེ་སངས་རྒྱས་དང་བྱང་ཆུབ་སེམས་དཔའ་རྣམས་ལ་མཆོད་པ་དང་། རེས་སྣོད་བཅུད་ཐམས་ཅད་ལྷར་གསལ་བ་དང་། དེ་ཐམས་ཅད་ཀྱིས་ཀྱང་ཨོ་གསུམ་མའི་སྒྲ་འུར་དིར་གྱིས་སྒྲོགས་པར་བསམ་ལ་བཟླ་བ་སོགས་དམིགས་པའི་རྩལ་སྦྱང་བས་གཅིག་གྲོགས་གཅིག་གིས་བྱས་ཏེ་རྣལ་འབྱོར་ལ་བོགས་ཐོན་པར་འགྱུར་ཞིང་། མདོར་ན་སེམས་མ་ཡེངས་པའི་ངང་དུ་བཟླས་བ་བྱ་བ་ནི་ཤིན་ཏུ་གལ་ཆེའོ། །བཟླས་པའི་གྲངས་ནི། གཞིའི་བསྙེན་པར་འབུམ་ཕྲག་བཞི། ཁྲི་ཕྲག་བཞི། སྟོང་ཕྲག་བཞི། བརྒྱ་ཕྲག་བཞི་རྣམས་ཀྱིས་དོན་འགྲུབ་པར་གསུངས་ལ། འབྲུ་འབུམ་བྱེད་ན་འབུམ་ཕྲག་སོ་བདུན་མཛད་པ་ཕྱག་ལེན་ནོ། །དེ་ཡང་སྒྲུབ་པ་པོ་ནམ་འཆི་ཆ་མེད། འཁོར་བ་ལ་ངེས་འབྱུང་། སེམས་ཅན་ལ་སྙིང་རྗེ། བླ་མ་ལ་མོས་གུས་རྣམས་ལམ་གྱི་སྲོག་ཏུ་བཟུང་། ཁས་བླངས་པའི་དམ་ཚིག་དང་སྡོམ་པ་ལ་གཅེས་སྤྲས་སུ་བྱས་ནས་རྩེ་གཅིག་ཏུ་༈ བསྙེན་ན་དངོས་གྲུབ་རྣམ་གཉིས་མྱུར་དུ་འགྲུབ་པ་ནི། རྒྱུད་སྡེའི་བཞུགས་ཚུལ། བསྒོམ་བྱའི་ལྷ། བཟླ་བྱའི་སྔགས། ཟབ་མོའི་རྫོགས་རིམ་རྣམས་ཀྱི་སྒོ་ནས་གཞན་ལས་ཆེས་ཁྱད་དུ་འཕགས་པའི་དབང་གིས་
ཏེ། དེ་ཡང་རྒྱུད་སྡེའི་བཞུགས་ཚུལ་གྱི་དབང་དུ་བྱས་ན། རྒྱུད་སྡེ་ཐམས་ཅད་ཀྱི་མཐར་ཐུག་པ་ནི་རྣལ་འབྱོར་གསང་མཐའི་རྒྱུད་ཡིན་ལ། དེ་ལའང་ལཱུ་ནག་དྲིལ་གསུམ་རྣལ་འབྱོར་མ་དང་བཞི་ལས། ཕྱི་མ་འདི་ཁོ་ན་མཆོག་ཏུ་ཟབ་པའི་ཕྱིར་ཡང་རྩེ་ནཱ་རོ་མཁའ་སྤྱོད་ཅེས་གྲགས་སོ། །བསྒོམ་བྱའི་ལྷ་ཡི་དབང་དུ་བྱས་ན། རི་རབ་སུམ་ཅུ་རྩ་གཉིས་ཀྱི་རྡུལ་གྱི་གྲངས་དང་མཉམ་པས་མཚོན། མཁའ་འགྲོ་མ་བསམ་གྱིས་མི་ཁྱབ་པ་ནི། མཁའ་འགྲོ་མ་བྱེ་བ་ཕྲག་ཕྱེད་དང་བཞི་འདུས། དེ་སྟོང་ཕྲག་བདུན་ཅུ་རྩ་གཉིས་སུ། དེ་བདུན་ཅུ་རྩ་བདུན་དུ། དེ་སོ་བདུན་དུ། དེ་ཉི་ཤུ་རྩ་བཞིར། དེ་ཡང་བརྒྱད། དེའང་རྡོ་རྗེ་རྣལ་འབྱོར་མ་འདི་ཁོ་ན་ལ་འདུ་བའི་ཕྱིར། འདི་བསྒོམ་པས་དཔའ་བོ་མཁའ་འགྲོ་ཇི་སྙེད་ཐམས་ཅད་བསྒོམ་པར་འགྱུར་བ་ཉིད་དོ། །བཟླ་བྱའི་སྔགས་ཀྱི་དབང་དུ་བྱས་ན། གསང་སྔགས་ཨོ་གསུམ་མ་འདི་ཉིད་ཕག་མོ་སོ་བདུན་མའི་དཀྱིལ་འཁོར་གྱི་ལྷ་ཉིད་ཡི་གེའི་གཟུགས་སུ་ཤར་བ་ཡིན་ཅིང་། དེ་ལས་འཕྲོས་ཏེ་སྔར་སྨོས་པ་བཞིན་དཔའ་བོ་མཁའ་འགྲོ་བསམ་གྱིས་མི་ཁྱབ་པར་ཤར་བའི་ཕྱིར་ན། སངས་རྒྱས་བྱང་སེམས་དཔའ་བོ་མཁའ་འགྲོ་ཐམས་ཅད་ཀྱི་ངོ་བོ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་སྔགས་ཐམས་ཅད་འདུས་པར་བཤད་པས་དེ་ཐམས་ཅད་ཀྱི་བྱིན་རླབས་ཞུགས་པར་འགྱུར་བ་དང་། དམ་ཚིག་དང་
ལྡན་པའི་སྔགས་པས་བཀླགས་པ་ཙམ་གྱིས་དོན་ཐམས་ཅད་གྲུབ་པའི་ཕྱིར། བདེ་མཆོག་རྩ་རྒྱུད་ལས། འདི་ལས་ཤིན་ཏུ་མཆོག་གྱུར་པ། །འཇིག་རྟེན་གསུམ་ན་ཅི་ཡང་མེད། །སོགས་ནས། བཀླག་པས་འདི་དག་ཐམས་ཅད་འགྲུབ། །ཞེས་སོགས་རྡོ་རྗེ་འཆང་རང་ཉིད་ཀྱིས་རྒྱ་ཆེར་བསྔགས་པ་མཛད་དོ། །རྫོགས་རིམ་གྱི་དབང་དུ་བྱས་ན། རྩ་རླུང་ཐིག་ལེ་ཐམས་ཅད་དབུ་མ་ཡེ་ཤེས་ཀྱི་རླུང་ཐིག་ལེ་དང་བཅས་པ་འབའ་ཞིག་ལ་འདུས་པས། འདི་ཁོ་ནར་གནད་དུ་བསྣུན་པས་གཞན་ཐམས་ཅད་ཤུགས་ཀྱིས་འབྱོངས་ཞིང་དངོས་གྲུབ་མྱུར་བའི་ཟབ་གནད་ཁྱད་པར་ཅན་ཡིན་པའི་ཕྱིར་རོ། །དེ་ལྟ་བུའི་ལམ་ཟབ་མོ་འདི་ལ་བརྟེན་ནས་འཕགས་བོད་དུ་མཁས་གྲུབ་བསམ་གྱིས་མི་ཁྱབ་པ་ཞིག་འཇའ་ལུས་མཁའ་སྤྱོད་ཀྱི་གོ་འཕང་མངོན་དུ་མཛད་པའི་ཚུལ་ལ་དྲན་པས་ཉེ་བར་བཞག་སྟེ། བདག་ལེགས་སུ་འདོད་པའི་སྐལ་བཟང་རྣམས་ཀྱིས་ཚུལ་འདི་ཁོ་ནར་ཉམས་ལེན་གྱི་སྙིང་པོར་དྲིལ་བར་བྱའོ། །གསུམ་པ་ནི། བསྙེན་པའི་གྲངས་ཐེབས་བ་དང་གྲུབ་ན་ཞག་གསུམ་གྱི་བར་ཕྱི་རོལ་མཆོད་པ་བྱ། གནས་དེ་ཉིད་དམ་ཕྱི་རོལ་གཞན་གྱིས་མི་མཐོང་བའི་སར་ཁ་སྐོང་གི་སྦྱིན་སྲེག །ལྷ་སྔགས་ཨོཾ་གསུམ་མ་དང་རྫས་ཏིལ་འབའ་ཞིག་ལ་གྲངས་བཟུང་ནས་བསྙེན་པ་ཇི་ཙམ་སོང་བའི་བཅུ་ཆ་འབུལ། དེ་ནས་གཟའ་སྐར་བཟང་བའི་ཐོར་ཐུན་
གྱི་མཇུག་ཏུ་གཏོར་བསྔོ་རྒྱས་པར་བྱ་ཞིང་གཏོར་མ་འབུལ། སྒོ་དྲུང་གི་རྒྱལ་ཆེན་ལ་གཏང་རག་དང་། གཤེགས་གསོལ་བྱ། དེ་ནས་གྲོགས་དམ་ཚིག་དང་ལྡན་པ་རྣམས་དང་རིམ་གྱིས་འཕྲད་པ་སོགས་བྱའོ། །དེ་དག་གི་གནས་སྐབས་ཐམས་ཅད་དུ་རྒྱས་འདེབས་པར་བྱེད་པ་ཆོས་ཉིད་དངོས་སུ་སྟོན་པའི་ཉམས་ལེན་གྱི་གནད་ཅུང་ཟད་བཤད་ན། ཚར་ཆེན་རྡོ་རྗེ་འཆང་ཆེན་པོས། སྐྱེ་འགགས་གནས་གསུམ་བྲལ་བ་གདོད་མའི་གཤིས། །ཞེས་སོགས་གསུངས་པའི་དོན། འཁོར་འདས་སྣང་སྲིད་ཀྱིས་བསྡུས་པའི་ཆོས་ཐམས་ཅད་རང་སེམས་ཁོ་ནའི་རྣམ་འཕྲུལ་ལས་དོན་ལོགས་སུ་གྲུབ་པ་རྡུལ་ཙམ་ཡང་མེད་ཅིང་། སེམས་དེ་ལ་ཡང་ཁ་ནང་དུ་ལྡོག་ནས་ཆེར་གྱིས་བལྟས་པས། དང་པོར་སྐྱེ་བའི་རྒྱུས་སྟོང་། བར་དུ་གནས་པའི་ངོ་བོས་སྟོང་། མཐར་འགགས་པའི་འབྲས་བུས་སྟོང་པས་ན་གདོད་མ་ནས་རང་ཆས་སུ་གནས་པའི་གཤིས་ལུགས་ངོ་བོ་སྟོང་པ། མཚན་ཉིད་གསལ་བ་དེ་གཉིས་དབྱེར་མེད་པའི་ཟུང་འཇུག །ཉམས་སུ་མྱོང་བཞིན་དུ་བརྗོད་པའི་མཐའ་ཐམས་ཅད་དང་བྲལ་བའི་བློ་འདས་ཀྱི་རིག་པ་སྐད་ཅིག་མ་འདི་ཀ་དོན་དམ་ལྷན་ཅིག་སྐྱེས་པའི་རྡོ་རྗེ་རྣལ་འབྱོར་མར་རང་ངོ་འཕྲོད་ནས་ཐག་བཅད་ངེས་ཤེས་བསྐྱེད། འཛིན་པ་མ་ཞུགས་པར་བྱས་ཏེ་ཉམས་ལེན་གྱི་རྒྱུན་སྐྱོང་། རྣམ་རྟོག་གང་སྐྱེས་ཀྱང་དེ་ཀ་རང་གི་སྟེང་དུ་བཟོ་བཅོས་མ་བྱས་པར་ཀློད་
ནས་སེམས་ལ་སེམས་ཀྱིས་བལྟ་བའི་ཚུལ་གྱིས་མ་ཡེངས་ཙམ་དུ་བཞག་པས་རྟོག་པ་ཁོ་རང་གསལ་སྟོང་ཟུང་འཇུག་ཏུ་རྗེན་ལྷང་གིས་འཆར་བ་ཞིག་ཡོང་། དེས་མཚོན་ཏེ་བསྐྱེད་རྫོགས་བསྒོམ་པ་ལ་སོགས་མཉམ་བཞག་དང་རྗེས་ཐོབ་ཀྱི་གནས་སྐབས་ཐམས་ཅད་དུ་ལྟ་བ་འཁོར་འདས་དབྱེར་མེད་ཀྱི་ཉམས་ལེན་དང་མ་བྲལ་བ་གལ་ཆེ་སྟེ། དེའི་ཚུལ་ཡང་། བླ་མ་ས་སྐྱ་པ་ཆེན་པོས། བསྐྱེད་རིམ་རྟོག་པ་ཡིན་མོད་ཀྱང་། །རྟོག་པའི་ངོ་བོ་སེམས་ཡིན་ཏེ། །སེམས་ཀྱི་མཚན་ཉིད་གསལ་རིག་ཡིན། །གསལ་རིག་རང་བཞིན་སྟོང་པ་ཉིད། །སྟོང་པ་གདོད་ནས་ཆོས་ཀྱི་དབྱིངས། །འཁྲུལ་པ་ཆོས་ཀྱི་དབྱིངས་ཉིད་དུ། །ཤེས་པས་རྟོག་པ་ཐམས་ཅད་ཀྱང་། །ཇི་ལྟར་བསྒོམ་ཀྱང་མི་རྟོག་ཉིད། །བཙལ་ཡང་འཁྲུལ་བ་ག་ལ་སྲིད། །ཅེས་གསུངས་པ་ལྟར། སེམས་ཀྱི་གཤིས་ལུགས་བརྗོད་བྲལ་གྱི་ངང་ནས། གདངས་བདེ་ཆེན་དུ་མ་འགགས་པའི་རང་རྩལ་ལྷ་དང་གཞལ་ཡས་ཁང་སོགས་དྭངས་པའི་མཁའ་ལ་འཇའ་ཚོན་ཤར་བ་ལྟར་སྣང་སྟོང་ཟུང་འཇུག་ཆེན་པོའི་ལམ་ལ་བསླབས་པས་བསྐྱེད་རྫོགས་དབྱེར་མེད་དང་ཅིར་སྣང་ཡེ་ཤེས་སུ་འཆར་བའི་དོན་ལ་རིམ་གྱིས་དབང་འབྱོར་བར་འགྱུར་རོ། །དེ་ལྟར་རྗེ་བཙུན་རྡོ་རྗེ་རྣལ་འབྱོར་མའི་ལམ་གྱི་རིམ་པ་ཟབ་མོ་འདི་ལ། སྤྱིར་འཕགས་བོད་ཀྱི་མཁས་གྲུབ་དུ་མས་བཀྲལ་བའི་གཞུང་དང་། ཁྱད་
པར་རང་ལུགས་ཉམས་ལེན་སྙིང་པོར་དྲིལ་བའི་དབང་དུ་བྱས་ན། ངག་འདོན་ཐུན་མོང་ཙམ་དུ་ཚར་ཆེན་དང་། ངོར་ཆེན་དཀོན་མཆོག་ལྷུན་གྲུབ། ཐུན་མོང་མ་ཡིན་པར་གནས་གསར་རྡོ་རྗེ་འཆང་གི་སྒྲུབ་ཐབས་ནག་འགྲོས་མ་དང་། དེ་དག་གི་གོ་དོན་འཇམ་དབྱངས་མཁྱེན་བརྩེའི་ཁྲིད་ཡིག་ཆེན་མོ་ལ་གཞི་བྱས། འཇམ་མགོན་སངས་རྒྱས་ཕུན་ཚོགས་ཀྱི་རྣམ་བཤད་དང་། རྡོ་རྗེ་འཆང་དབང་ཕྱུག་རབ་བརྟན་པའི་བླ་མའི་རྣལ་འབྱོར་སོགས་ཡིག་ཆུང་། ཚར་ཆེན་རིན་པོ་ཆེས་མཛད་པའི་ལུས་དཀྱིལ། བསམ་མི་ཁྱབ་ཐུན་མིན། འཕོ་བ་རྣམས་ཀྱི་ཡིག་ཆུང་གིས་བརྒྱན་པ་དང་། ཞལ་ཤེས་ཀྱི་གནད་འགའ་ཞིག་ཞི་བཟང་འཕགས་པ་དགེ་ལེགས་རྒྱལ་མཚན་གྱིས་གནས་གསར་བའི་གསུང་ཇི་ལྟ་བ་བཞིན་ཟིན་བྲིས་སུ་མཛད་པ་རྣམས་སུ་མི་གསལ་བ་གང་ཡང་མ་མཆིས་ཤིང་། དེ་མཚུངས་ཚེས་བཅུའི་མཆོད་པ་དང་། ཞི་བའི་སྦྱིན་སྲེག་གནས་གསར་བ་དང་། བསྙེན་ཡིག་རྨོར་ཆེན་དང་། མཁས་གྲུབ་སངས་རྒྱས་རྒྱ་མཚོས་མཛད་པས་མཚོན་བྱིན་རླབས་དང་ལེགས་བཤད་རྨད་དུ་བྱུང་བ་གླེགས་བམ་དུ་ལོངས་པ་དུ་མ་ཡོད་བཞིན་དུ། འདི་ལྟ་བུ་འབྲི་བ་ལ་དགོས་པ་གང་ཡང་མ་མཆིས་མོད། འོད་ཀྱང་ཟབ་ཆོས་འདི་ཉིད་ཁྱབ་བརྡལ་དུ་དར་ཆེས་བས། གྲུབ་མཐའ་གཞན་གྱི་ཕྱོགས་སུ་གང་གི་དཔེ་དེ་རྣམས་ཐམས་ཅད་རྙེད་དཀའ་བ་དང་། རང་རེའི་
རྗེས་འབྲངས་འགའ་ཞིག་ཀྱང་དཔེ་མང་ཀློག་པའི་ངལ་བ་མི་ནུས་ཤིང་། བློ་གྲོས་དམན་པས་ཡིག་ཆ་ཕན་ཚུན་གུང་བསྒྲིགས་མི་ཤེས་པ་སོགས་དང་། སྤྲོས་པ་ཆུང་བས་ཚེས་བཅུའི་མཆོད་པ་སོགས་རྒྱས་པར་མི་ནུས་པ་རྣམས་ལ་ཕན་པའི་བསམ་པ་ཁོ་ནས་ངག་འདོན་དང་དམིགས་རིམ་མདོར་བསྡུས་དཀྱུས་གཅིག་ཏུ་བཀོད་པ་ལ་མཁས་པ་རྣམས་ཀྱིས་བཟོད་པར་མཛད་དུ་གསོལ། །རྗེ་བཙུན་རྡོ་རྗེ་རྣལ་འབྱོར་མའི། །བསྐྱེད་དང་རྫོགས་པའི་ཚུལ་འདི་ལ། །བརྟེན་ནས་འགྲོ་ཀུན་མཁའ་སྤྱོད་གྲོང་། །བགྲོད་པའི་གསང་ལམ་ཉིད་གྱུར་ཅིག །ཅེས་པའང་ལམ་འདི་ལ་མོས་པའི་དགེ་སློང་གུ་ཎ་ལཀྵིས་ཚེས་བཅུའི་མཆོད་པ་མདོར་བསྡུས་པ་ཞིག་དགོས་ཞེས་ཆེད་དུ་བསྐུལ་བས་མཚམས་སྦྱར་ཏེ། དོན་གཉེར་བློ་གྲོས་དམན་པ་གཞན་ལའང་ཕན་པའི་བསམ་པས་བསྐྱེད་རྫོགས་ཡན་ལག་དང་བཅས་པ་ཉུང་གསལ་སྙིང་པོར་དྲིལ་བ་འདི་ནི། ཁྱབ་བདག་རྡོ་རྗེ་སེམས་དཔའི་ངོ་བོར་གྱུར་པ་མཁན་ཆེན་ཐམས་ཅད་མཁྱེན་པ་བྱམས་པ་རྣལ་འབྱོར་འཇམ་དཔལ་བཟང་པོ་སོགས་ཡོངས་འཛིན་དམ་པ་ཆོས་བཞིན་དུ་སྤྱོད་པ་རྣམས་ཀྱི་བཀའ་དྲིན་ལས་ཚུལ་འདིའི་སྨིན་གྲོལ་གྱི་བདུད་རྩི་མང་དུ་ཐོས་པའི་རྒྱལ་ཁམས་ཀྱི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས། མཁས་ཤིང་དངོས་གྲུབ་བརྙེས་པ་རྣམས་ཀྱི་ཞལ་ལུང་དྲི་མ་མེད་པ་ལ་ཉེ་བར་བཏུས་ཏེ་སྦྱར་བའི་དགེ་ལེགས་ཀྱི་སྣང་བས་ཕན་བདེའི་པདྨོ་མཆོག་ཏུ་རྒྱས་པའི་རྒྱུར་གྱུར་ཅིག །སརྦ་དཱ་མངྒ་ལཾ།།