གསང་འདུས་ལྷན་སྐྱེས་ཀྱི་རྗེས་གནང་གི་ཟིན་བྲིས་ཉུང་གསལ།
གསང་འདུས་ལྷན་སྐྱེས་ཀྱི་རྗེས་གནང་གི་ཟིན་བྲིས་ཉུང་གསལ་བཞུགས་སོ། །ཨོཾ་སྭ་སྟི། དཔལ་གསང་བ་འདུས་པ་ལྷན་ཅིག་སྐྱེས་པའི་རྗེས་གནང་ལ་
གསུམ། སྦྱོར་བ། དངོས་གཞི། རྗེས་སོ། །དང་པོ་ནི་སྟེགས་བུའི་ཁར་མཎྜལ་ཚོམ་བུ་གཅིག་པའི་མདུན་དུ་མཆོད་གཏོར་དང་། རང་གི་མདུན་དུ་རྡོ་རྗེ་དྲིལ་བུ། ནང་མཆོད་སོགས་བཤམ༑ འགྲོ་རྣམས་བསྒྲལ་འདོད་སོགས་ཀྱི་སྐྱབས་སེམས་དང་། སྤྲོ་ན་ཚོགས་བསགས་སྤྱི་ལྟར་བྱ། ཚད་མེད་བཞི་བསྒོམ། ཨོཾ་ཤུནྱ་ཏཱ་སོགས། སྟོང་པའི་ངང་ལས་སྲུང་འཁོར་ཆོས་འབྱུང་སོགས་པའི་ཐབས་རིན་ཆེན་འབྱུང་གནས་ལྟར་བདག་གི་རྣལ་འབྱོར་གསལ་བཏབ། བཟླས་དམིགས་ནི། རང་གི་སྙིང་གར་ཟླ་བ་ལ་ཧཱུཾ། དེ་ལས་སྔགས་ཀྱི་ཕྲེང་བ་འོད་ཟེར་དང་བཅས་པ་དཔག་ཏུ་མེད་པ་འཕྲོས་པས་སངས་རྒྱས་ཀྱི་མཛད་པ་བསྒྲུབས། སླར་འདུས་ས་བོན་ལ་ཐིམ་པས་རྒྱུད་བྱིན་གྱིས་བརླབས་པར་བསམས་ལ་བཟླས་པ་ཅི་ནུས་བྱ། མཐར་སྣོད་བཅུད་ཐམས་ཅད་འོད་གསལ་སྟོང་པ་ཉིད་ཀྱི་དབྱིངས་སུ་ཐིམ། དེ་ལས་སླར་ཡང་རང་སྐད་ཅིག་གིས་དཔལ་གསང་བ་འདུས་པའི་སྐུར་བསམས་ལ། ཚོམ་བུ་ཨོཾ་ཨཱབིགྷན་ཏ་ཀྲི་ཏ་ཧཱུྃ་གིས་བསང་། སྭ་བྷཱ་བས་སྦྱང་། སྟོང་པའི་ངང་ལས་སྲུང་འཁོར་སོགས་ནས་དབུར་བརྒྱན་ཞེས་པའི་བར་བདག་བསྐྱེད་ལྟར་གསལ་བཏབ། མཆོད་པ་བསང་སྦྱང་། བྱིན་གྱིས་བརླབས་ལ། ཨོཾ་སརྦ་ཏ་ཐཱ་ག་ཏ་ཨརྒྷཾ་
སོགས་ཀྱིས་ཕྱི་མཆོད་དང་། ཨོཾ་ཨཱཧཱུྃ་གིས་ནང་མཆོད་ཕུལ། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བའི་དབྱངས་ལ་ཕྱག་འཚལ་ལོ། །ཞེས་པས་བསྟོད། གཏོར་མ་བསང་སྦྱང་། སྟོང་པའི་ངང་ལས་རླུང་མེའི་སྟེང་དུ་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བར་གཏོར་མ་ཤ་ལྔ་བདུད་རྩི་ལྔ་འབྲུ་གསུམ་གྱིས་མཚན་པ་སྦྱངས་རྟོགས་སྦར་བས་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་གསུམ་གྱིས་བརླབ། སྙིང་པོའི་མཐར་འབྲུ་གསུམ་བཏགས་པ་ལན་གསུམ་སོགས་ཀྱིས་ཕུལ། གོང་ལྟར་མཆོད་བསྟོད་དང་འདོད་དོན་གསོལ། མདུན་བསྐྱེད་ལ་དམིགས་པའི་བཟླས་པ་ཅུང་ཟད་བྱའོ། །གཉིས་པ་ནི། སློབ་མ་རྣམས་ཁྲུས་བྱས་གྲལ་དུ་འཁོད་པར་སེམས་བསྐྱེད་གསལ་བཏབ། དེ་ལ་འདིར་རྣལ་འབྱོར་༧ ཆེན་པོ་བླ་ན་མེད་པ་ཐབས་ཀྱི་རྒྱུད་གདུལ་བྱ་འདོད་ཆགས་ཅན་གཙོ་བོར་འདུལ་བ་དཔལ་གསང་བ་འདུས་པ་ལ། འཕགས་ཡུལ་དུ་འདུས་པ་འཕགས་ཞབས་ཀྱི་ལུགས་གཉིས་གཙོ་བོར་གྱུར་པའི་བཀའ་སྲོལ་མི་འདྲ་བ་ཉི་ཤུ་རྩ་བཞི་ཙམ་བྱུང་བར་གྲགས་ཤིང་། གངས་ཅན་གྱི་ལྗོངས་འདིར་འཕགས་སྐོར་དང་། ཡེ་ཤེས་ཞབས་ལུགས་གཉིས་གྲགས་ཆེ་ལ། གཞན་ཡང་ཤཱནྟི་པ། རྡོ་རྗེ་བཞད་པ། པདྨ་།
བཛྲ། ཀུན་དགའ་སྙིང་པོ་རྣམས་ཀྱི་ལུགས་ཀྱང་ཅི་རིགས་པར་འགྱུར་པ་ལས། འདིར་སངས་རྒྱས་གཉིས་པ་ཀླུ་སྒྲུབ་ཞབས་ཀྱི་དགོངས་པ་དང་མཐུན་པར། གྲུབ་པའི་སློབ་དཔོན་ཆེན་པོ་སྒེག་པའི་རྡོ་རྗེས་ལེགས་པར་བཀྲལ་བའི་དཔལ་གསང་བ་འདུས་པ་ལྷན་ཅིག་སྐྱེས་པའི་རྗེས་སུ་གནང་བ་ཟབ་མོ་སྒྲུབ་པ་ལ། སློབ་དཔོན་གྱི་བྱ་བ་རྣམས་གྲུབ་ནས། ཁྱོད་རང་རྣམས་ཀྱི་ངོ་སྐལ་དུ་གྱུར་པ་ཐོག་མར་མཎྜལ་ཕུལ། གསོལ་འདེབས་ནས་བརྩམས་ཏེ་རྗེས་གནང་གི་དངོས་གཞི་སྤྱི་དང་འདྲ་བ་ལ། ཐུགས་ཀྱི་རྗེས་གནང་ཕྱག་མཚན་བསྟིམ་པ་ཉིད་ཡིན་ཏེ། ཁོ་བོས་བྱས་པའི་ནི་རི་ཏི་པའི་ལུགས་ཀྱི་བྱམས་པའི་རྗེས་གནང་ལ་ལྷའི་མཚན་དང་། མངོན་རྟོགས། སྔགས་རྣམས་ཁ་སྤོས་པ་ཙམ་གྱིས་ཀྱང་ལེགས་པར་འགྲུབ་བོ། །གསུམ་པ་ནི། ཚོམ་བུའི་ལྷ་ལ་མཆོད་བསྟོད། ནོངས་པ་བཤགས། ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། བསྔོ་སྨོན་ཤིས་བརྗོད་སྤྱི་ལྟར་བྱའོ། །ཞེས་པའང་རང་འདྲའི་བློ་གྲོས་ཤིན་ཏུ་དམན་པ་རྣམས་ལ་ཕན་པའི་བསམ་པ་ཁོ་ནས་བྱ་བྲལ་བ་མཁྱེན་བརྩེའི་དབང་པོས་བྲིས་པ་སརྦ་སུ་ཤི་ཡོ་བྷ་བ་ཏུ།།