ཚེ་དཔག་མེད་གྲུབ་རྒྱལ་ལུགས་ཀྱི་ཚེ་དབང་བརྒྱ་རྩ་སོགས་སྐུར་ཚུལ་གྱི་ཕྱག་ལེན་འཆི་མེད་མྱུར་ལམ།
ཚེ་དཔག་མེད་གྲུབ་རྒྱལ་ལུགས་ཀྱི་ཚེ་དབང་བརྒྱ་རྩ་སོགས་སྐུར་ཚུལ་གྱི་ཕྱག་ལེན་འཆི་མེད་མྱུར་ལམ་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། འདིར་ཐར་རྩེ་པཎྜི་ཏ་ཆེན་པོ་ནམ་མཁའ་དཔལ་བཟང་གིས་མཛད་པའི་ཚེ་དཔག་མེད་གྲུབ་རྒྱལ་ལུགས་ཀྱི་དབང་ཆོག་འཆི་མེད་འདོད་དགུའི་ཆར་འབེབས་དང་རྗེས་སུ་འབྲེལ་བར་ཚེ་དབང་བརྒྱ་རྩ་སོགས་གྲངས་གསོག་སྐབས། རྒྱས་པ་ཚར་གཅིག་གིས་སློབ་མ་ཐུན་མོང་བ་ལ་འཇིག་རྟེན་ལས་འདས་པའི་བཅུད་བསྡུ་བའམ། ཐུན་མོང་མ་ཡིན་པ་ལ་དབང་བཞི་བྱིན་རླབས་ཀྱི་ཚུལ་དུ་བསྐུར་བ་ཡན་དཀྱུས་ལྟར་སོང་ནས། སླར་ཡང་དམིགས་པ་འདི་བཞིན་མཛོད། ཚེ་ཟན་དང་། ཚེ་ཆང་ཚེ་དཔག་ཏུ་མེད་པར་གསལ་བ་དང་། ཁྱེད་རང་གི་སྤྱི་བོའི་སྟེང་ན་བཞུགས་པའི་ཚེ་དཔག་མེད་རྣམས་ལས་རང་འདྲ་གཉིས་པ་རེ་ཆད། དེ་ཐམས་ཅད་འཆི་མེད་ཚེའི་དངོས་གྲུབ་ཀྱི་རྣམ་པར་ཞུ་ནས། ཁྱེད་རང་གི་སྤྱི་བོར་ཐིམ་པས་ཁྱེད་རང་སྐད་ཅིག་གིས་བཅོམ་ལྡན་འདས་མགོན་པོ་ཚེ་དཔག་ཏུ་མེད་པ་སྐུ་མདོག་བྱེ་རུའི་ལྷུན་པོ་ལ་སོགས་ནས། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་སྐུ་ཅན་ཏུ་གསལ་ལམ་སྟེ་གྱུར་པའི་མོས་པ་མཛོད། ཚེ་བུམ་སྤྱི་བོར་བཞག་
ཅིང་སྙིང་པོ་དང་གཟུངས་རིང་བཟླ། སྤྲོ་ན་པཎ་ཆེན་རང་གིས་མཛད་པའི་འདིའི་དབང་ཆོག་ཚིག་བཅད་མ་ལས། བཀྲ་ཤིས་ཚེ་བརྟན་དཔལ་གྱི་ཟས། །སྙིང་པོ་བསྡུས་པའི་བཅུད་འདི་ནི། །དེ་རིང་བུ་ཡིས་བཟའ་བར་བྱ། །འདི་ཟོས་ཚེ་དཔག་མེད་མགོན་གྱི། །ཞལ་ཟས་བསྟེན་ན་ནད་ཀུན་ལས། །གྲོལ་འགྱུར་ཐེ་ཚོམ་བྱ་མི་དགོས། ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ། ཞེས་པས་ཚེ་རིལ་དང་། བཀྲ་ཤིས་ཚེ་བརྟན་དཔལ་གྱི་བཅུད། །སྙིང་པོ་བསྡུས་པའི་བཅུད་འདི་ནི། །དེ་རིང་བུ་ཡིས་བཏུང་བར་བྱ། །འདི་བཏུང་ཚེ་དཔག་མེད་མགོན་གྱི། །བཏུང་བ་བསྟེན་པས་ནད་ཀུན་ལས། །གྲོལ་འགྱུར་ཐེ་ཚོམ་བྱ་མི་དགོས། །ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ། ཞེས་པས་ཚེ་ཆང་སྦྱིན་པར་གསུངས་པ་ལྟར་བྱ། བསྡུ་ན་སྙིང་པོ་དང་གཟུངས་རིང་བཟླ་བཞིན་པས་སྦྱིན། མེ་ཏོག་འཐོར་ཞིང་། ཚེ་མི་འགྱུར་པའི་གཡུང་དྲུང་དུ་གྱུར་ཅིག་སོགས། ་དང་། འབྱུང་པོ་གང་དག་སོགས་བརྗོད། སླར་ཡང་དམིགས་པ་འདི་བཞིན་མཛོད། །སློབ་དཔོན་གྱི་ཐུགས་ཀའི་སོགས་ནས། ཉིན་མོ་བདེ་ལེགས་སོགས་ཀྱི་བར་དཀྱུས་ལྟར་བྱ་བ་ནི་ཚར་དང་པོ་ཡིན་ནོ། །ཚར་གཉིས་པ་མན་ལ། སླར་ཡང་གསོལ་བ་འདེབས་པ་འདིའི་རྗེས་ཟློས་མཛོད། །མགོན་པོ་ཚེ་དཔག་ཏུ་མེད་པས་བདག་ལ་འཆི་མེད་ཚེའི་
དངོས་གྲུབ་མ་ལུས་པ་སྩལ་དུ་གསོལ། །ཞེས་གསོལ་བ་བཏབ་པས་སྤྱི་བོའི་སྟེང་ན་བཞུགས་པའི་ཚེ་དཔག་མེད་ཀྱི་ཐུགས་ཀའི་ས་བོན་དང་། སློབ་དཔོན་གྱི་ཐུགས་ཀའི་ཧཱུྃལས་འོད་ཟེར་ལྕགས་ཀྱུ་དང་ཕོ་ཉ་ལྟ་བུ་བསམ་གྱིས་མི་ཁྱབ་པ་ཕྱོགས་བཅུར་འཕྲོས་པས། ཁྱེད་རང་གི་བླ་ཚེ་ཡར་བ་དང་། ཉམས་པ་དང་། གཞོམ་པ་དང་། གདོན་བགེགས་འབྱུང་པོས་ཁྱེར་བ་ཐམས་ཅད་འབ་ཀྱིས་བསྡུས་ཏེ་སྤྱི་ཐུབོའི་སྟེང་གི་མགོན་པོ་ཚེ་དཔག་མེད་ཀྱི་ཕྱག་གི་བུམ་པའི་ནང་དུ་བྱོན། ཡང་འོད་ཟེར་དེས་འབྱུང་བ་བཞིའི་ཁམས་ཐམས་ཅད་ལ་ཁྱབ་པས་དབང་ཆེན་གསེར་གྱི་ས་གཞི། དབུས་ཀྱི་རི་རྒྱལ་ལྷུན་པོ། །གསེར་གྱི་རི་བདུན་ལ་སོགས་པ་འབྱུང་བ་སའི་རོ་བཅུད་དྭངས་མ་ཐམས་ཅད་དང་། འོག་གཞི་ཆུའི་དཀྱིལ་འཁོར། ཕྱིའི་རྒྱ་མཚོ་ཆེན་པོ། རོལ་པའི་མཚོ་བདུན་ལ་སོགས་པ་འབྱུང་བ་ཆུའི་རོ་བཅུད་དྭངས་མ་ཐམས་ཅད་དང་། འོག་གཞི་མེའི་དཀྱིལ་འཁོར། རྟ་གདོང་གི་མེ། ཉི་མ། ནོར་བུ་སྒྲོན་མེའི་འོད་ལ་སོགས་པ་འབྱུང་བ་མེའི་རོ་བཅུད་དྭངས་མ་ཐམས་ཅད་དང་། འོག་གཞི་རླུང་གི་དཀྱིལ་འཁོར། འཐོར་བྱེད་དང་སྡུད་བྱེད་ཀྱི་རླུང་ལ་སོགས་པ་འབྱུང་བ་རླུང་གི་རོ་བཅུད་དྭངས་མ་ཐམས་ཅད་བསྡུས་ཏེ་ཕྱག་གི་བུམ་པའི་ནང་དུ་བྱོན། ཡང་འོད་ཟེར་དེས་འཇིག་རྟེན་གྱི་ཁམས་མཐའ་ཡས་པ་
དང་། དག་པའི་ཞིང་རབ་འབྱམས་རྣམས་སུ་ཁྱབ་པས། དེ་དག་ན་གནས་པའི་སེམས་ཅན་རྣམས་ཀྱི་ཚེ་དང་བསོད་ནམས་དབང་ཐང་ལ་སོགས་པ་ཐམས་ཅད་དང་། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་ཐམས་ཅད་བསྡུས་ཏེ་ཕྱག་གི་བུམ་པའི་ནང་དུ་བྱོན། དེ་ཐམས་ཅད་འཆི་མེད་ཚེའི་བདུད་རྩིར་གྱུར་པ་ཁོལ་ཞིང་ལུད་པས་བུམ་པའི་ཁ་ནས་མར་བྱུང་། ཁྱེད་རང་གི་སྤྱི་བོ་ཚངས་པའི་བུ་ག་ནས་ཞུགས། ལུས་ཀྱི་ནང་ཐམས་ཅད་གང་། ནད་གདོན་སྡིག་སྒྲིབ་དུས་མ་ཡིན་པའི་འཆི་བའི་འཇིགས་པ་བག་ཆགས་དང་བཅས་པ་ཐམས་ཅད་བྱང་ཞིང་དག །ཚེ་དང་བསོད་ནམས་ཉམས་པ་ཐམས་ཅད་སོར་ཆུད། འབྱུང་བ་བཞིའི་དྭངས་མ་སྟོབས་སུ་སྨིན་པས་ལུས་ཀྱི་ཟུངས་དང་སེམས་ཀྱི་རྟེན་དུ་གྱུར་ཅིང་། འཇིག་རྟེན་དང་འཇིག་རྟེན་ལས་འདས་པའི་འཆི་མེད་ཚེ་དང་ཡེ་ཤེས་ཀྱི་དངོས་གྲུབ་མ་ལུས་པ་ཐོབ། ཚེ་ཟན་དང་། ཚེ་ཆང་དང་། སྤྱི་བོའི་སྟེང་གི་ཚེ་དཔག་མེད་རྣམས་ལས་ཀྱང་རང་འདྲ་གཉིས་པ་རེ་ཆད་དེ་ཁྱེད་རང་ལྷར་ཀླུགསལ་བ་ལ་ཐིམ་པ་དང་ལྷན་ཅིག་ཏུ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མགོན་པོ་ཚེ་དཔག་མེད་ཀྱི་རྣམ་པར་སྤྱན་
དྲངས་ཏེ་ཁྱེད་རང་ལ་སིབ་སིབ་ཐིམ་པས་འཆི་མེད་ཚེ་དང་ཡེ་ཤེས་ཀྱི་དངོས་གྲུབ་མ་ལུས་པ་བརྟན་ཅིང་ནུས་ལྡན་དུ་བྱས་པའི་མོས་པ་མཛོད། །སྙིང་པོ་དང་གཟུངས་རིང་བཟླ་བཞིན་དུ་ཚེ་བུམ་སྤྱི་བོར་བཞག །ཚེ་རིལ་དང་ཚེ་ཆང་སྦྱིན། མེ་ཏོག་འཐོར་ཞིང་། ཚེ་མི་འགྱུར་བའི་གཡུང་དྲུང་དུ་གྱུར་ཅིག །ཚེ་མི་ནུབ་པའི་རྒྱལ་མཚན་དུ་གྱུར་ཅིག །ཚེ་མི་ཤིགས་པའི་རྡོ་རྗེར་གྱུར་ཅིག །འཆི་བ་མེད་པ་ཚེའི་དངོས་གྲུབ་ཐོབ་པར་གྱུར་ཅིག །ཨོཾ་བཛྲ་ཨཱ་ཡུ་ཥེ་སུ་པྲ་ཏིཥྛ་བཛྲ་ཡ་སྭཱ་ཧཱ། ཞེས་དང་། སྤྲོ་ན་བཀྲ་ཤིས་ཀྱི་ཚིགས་བཅད་གང་རུང་བརྗོད། དེ་ལས་ཀྱང་བསྡུ་ན། གོང་གི་བསམ་གྱིས་མི་ཁྱབ་པ་ཕྱོགས་བཅུར་འཕྲོས་པས་ཞེས་པའི་མཚམས། ཁྱེད་རང་གི་བླ་ཚེ་ཡར་བ། ཉམས་པ། །གཞོམ་པ། གདོན་བགེགས་འབྱུང་པོས་ཁྱེར་བ་ཐམས་ཅད་དང་། འབྱུང་བ་ཆེན་པོ་བཞིའི་རོ་བཅུད་དྭངས་་མ་སེམས་ཅན་ཐམས་ཅད་ཀྱི་ཚེ་བསོད་དབང་ཐང་། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་ཐམས་ཅད་བསྡུས་ཏེ་སྤྱི་བོའི་སྟེང་གི་མགོན་པོ་ཚེ་དཔག་མེད་ཀྱི་ཕྱག་གི་བུམ་པའི་ནང་དུ་བྱོན། དེ་ཐམས་ཅད་འཆི་མེད་ཚེའི་བདུད་རྩིར་གྱུར་པ་སོགས་མན་འདྲ། །གོང་ལྟར་ཡང་ཚར་རྗེས་མའི་སྐབས། ཚེ་ཟན་དང་། ཚེ་ཆང་དང་། སྤྱི་བོའི་སྟེང་
གི་ཚེ་དཔག་མེད་རྣམས་ཀྱང་འཆི་མེད་ཚེའི་དངོས་གྲུབ་ཀྱི་རྣམ་པར་འོད་དུ་ལྟེམ་གྱིས་ཞུ་ནས། ཁྱེད་རང་ལྷར་གསལ་བ་ལ་ཐིམ་སོགས་བརྗོད་པར་ཁྱད་པར་རོ། །དེ་ནས་མཐར་བཀྲ་ཤིས་ཀྱི་ཚིགས་བཅད་རྒྱས་པར་བརྗོད་པའི་མཇུག་ཏུ་དམ་ཚིག་ཁས་བླང་སོགས་དབང་ཆོག་གི་དཀྱུས་བཞིན་ནོ། །ཞེས་པའང་མཁན་ཆེན་ཐམས་ཅད་མཁྱེན་པ་ངག་དབང་ཆོས་གྲགས་སོགས་ཀྱིས་མཛད་པའི་ཚེ་དབང་བརྒྱ་རྩ་སྐར་ཚུལ་གྱི་ཟིན་བྲིས་ལ་བླ་མ་དམ་པ་རྣམས་ཀྱི་ཕྱག་བཞེས་ཀྱིས་བརྒྱན་ཏེ་རྩ་བའི་གཞུང་དང་མཐུན་པར་མང་དུ་ཐོས་པའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་འགྲོ་ཀུན་འཆི་མེད་ཚེ་དང་ཡེ་ཤེས་ཀྱི་དགའ་སྟོན་ལ་ལོངས་སུ་སྤྱོད་པའི་རྒྱུར་གྱུར་ཅིག། །།སརྦ་དཱ་མངྒ་ལཾ་བྷ་བ་ཏུ།།