གྲུབ་རྒྱལ་ཚེ་སྒྲུབ་ཟླ་བ་དྲུག་ཙམ་གཏོང་ན།
༈ གྲུབ་རྒྱལ་ཚེ་སྒྲུབ་ཟླ་བ་དྲུག་ཙམ་གཏོང་ན། སྐྱབས་འགྲོ་ཞག་ལྔ། ཡིག་བརྒྱ་ཞག་བཅུ་ལ་ཁྲི་བཞི་འགྲོ་བ་བྱུང་ན་ལེགས། བླ་མའི་རྣལ་འབྱོར་བདུན་གཉིས་ལ། བདུན་གཅིག་མཎྜལ། གཅིག་ལ་གསོལ་འདེབས་གཙོ་བོར་བྱ་སྟེ་སྔོན་འགྲོ་ཟླ་བ་གཅིག་གི་རིང་མཚམས་དམ་པར་མ་བྱུང་ཡང་ཆོག །དེ་ནས་མཚམས་དམ་པར་བཅད། མདུན་བསྐྱེད་དམིགས་རྐང་ཡོངས་རྫོགས་ཐུན་རེར་ཚང་བར་བསྒོམ་པ་ལ་བདུན་གཅིག །དམིགས་རྐང་བདུན་སོ་སོར་ཕྲལ་ཏེ་གཙོ་བོར་བསྒོམ་པ་ལ་བདུན་ཕྲག་བདུན། སླར་ཡང་དམིགས་རྐང་ཚང་བར་བསྒོམ་པ་ལ་བདུན་གཅིག་སྟེ་ཟླ་བ་གཉིས་ལྷག་ཙམ་རིང་
སྔགས་ཨ་མཱ་ར་ཎི་འབྲུ་འབུམ་ཁ་སྐོང་བཅས་འགྲོ་ངེས་བྱ། བདག་བསྐྱེད་ལ་བརྟེན་པའི་ཉམས་ལེན་ཞག་ལྔ་བཅུ་ཙམ་གྱི་རིང་། བསྐྱེད་རིམ་གྱི་སེམས་འཛིན་དང་། །གཟུངས་རིང་གཙོ་བོར་བཟླས། འབུམ་ཕྲག་བཞི་འགྲོ་བ་བྱུང་ན་ལེགས། མཐར་བདུན་ཕྲག་ཙམ་དུ་བཅུད་ལེན་གྱི་རིལ་བུ་བསྒྲུབ། དེ་ནས་འཇུག་གི་ཟླ་བ་གཅིག་ལ་རྫོགས་རིམ་གཙོ་བོར་བསྒོམ་ཞིང་བཅུད་ལེན་བསྟེན། །དེ་ཡང་སྟོང་ར་ལ་ཉིན་གསུམ། རྩའི་རྣལ་འབྱོར་ལ་ཉིན་དགུ། འདི་ཡང་གོང་འོག་གི་ཉིན་གཉིས་ལ་དམིགས་རྐང་ཐམས་ཅད་བྲེང་ཆགས་དང་། བར་གྱི་ཉིན་བདུན་ལ་དམིགས་རྐང་སོ་སོར་ཕྲལ་ཏེ་གཙོ་བོར་བྱ། རླུང་གི་རྣལ་འབྱོར་ལ། ཐོར་ཐུན་སྐབས་རྡོར་བཟླས་གཉིས་དང་། ཐུན་གཞུག་ལ་བུམ་ཅན་གཙོ་བོར་བསྒོམ་པ་བདུན་གཅིག །འཛིན་གཏོང་རེས་འཇོག་བདུན་གཅིག་བསྒོམ། །ཀུན་རྫོབ་བྱང་སེམས་ཀྱི་རྣལ་འབྱོར་འཛིན་གཏོང་གི་མཇུག་ཏ་མ་ཆགས་ཙམ་དང་། ཚེ་ཕུར་གདབ་སོགས་རྫོགས་རིམ་གྱི་སྐབས་ཐམས་ཅད་དུ་ཐུན་བསྡུ་བའི་ཚེ་བསྒོམ་པས་དོན་གྲུབ་ཅིང་། དོན་དམ་བྱང་སེམས་ཀྱི་རྣལ་འབྱོར་ནི་ཀུན་ལ་རྒྱས་བཏབ་པའི་ཚུལ་གྱིས་བསྒོམ། གྲོལ་ཁར་ཉིན་གསུམ་ཙམ་གྱི་རིང་ཚེ་དབང་གི་ཆོ་ག་ལྟར་སྒྲུབ་མཆོད་རྒྱས་པར་བྱ་ཞིང་། བདག་འཇུག་གི་ཚུལ་དུ་དབང་རྣམས་ལན་
གྲངས་བརྒྱ་རྩ་སོགས་ཇི་རིགས་པ་བླངས། དེས་མཚོན་ཏེ་མཚམས་ཡུན་རིང་ཐུང་ལ་དཔགས་པའི་ཉམས་ལེན་ཆ་བགོས་ལ་བྱ་ཞིང་། འོན་ཀྱང་ཡུན་ཐུང་ངུ་ཟླ་རེ་ཙམ་ལ་ནི་དམིགས་རྐང་ཐམས་ཅད་རྫོགས་པར་དཀའ་བས། སྔོན་འགྲོ་ཉིན་གསུམ་ཙམ་དང་། དངོས་གཞི་མདུན་བསྐྱེད་ཀྱི་དམིགས་བཟླས་ཁོ་ནར་གནད་དུ་བསྣུན་ཅིང་། ཐུན་སོ་སོའི་མཐར་བདག་བསྐྱེད་བཟླས་པ་དང་བཅས་པ་༧ དང་། རྫོགས་རིམ་རྣམས་ཀྱང་ཇི་ལྟར་རིགས་པ་མ་ཆགས་ཙམ་བསྒོམ། གྲོལ་ཁ་དབང་བླང་བ་བཅས་བྱའོ།།