བཅུ་གཅིག་ཞལ་གྱི་བསྙེན་སྒྲུབ་ཀྱི་ཡི་གེ་མཁན་ཆེན་སངས་རྒྱས་ཕུན་ཚོགས་པའི་གསུང་རབ་སོར་བཞག
༈ སྭ་སྟི། བཅུ་གཅིག་ཞལ་གྱི་བསྙེན་སྒྲུབ་ཀྱི་ཡི་གེ་མཁན་ཆེན་སངས་རྒྱས་ཕུན་ཚོགས་པའི་གསུང་རབ་སོར་བཞག་ལ། དེང་སང་ཕལ་ཆེར་ཟླ་བ་དྲུག་ཙམ་རེ་ཕྱག་ལེན་དུ་མཛད་པས། ཐོག་མར་སྐྱབས་འགྲོ་ཞག་གསུམ་དང་བདུན་སོགས་ཅི་རིགས། དངོས་གཞིར་གཟུངས་ཕྲེང་སྐོར་རེ་རེའི་མཚམས། ན་མོ་རཏྣ་ཏྲ་ཡཱ་ཡ་སོགས་རྒྱས་པ་ཚར་རེ་དང་། གསོག་རྒྱུ། ཏདྱ་ཐཱ། ཨོཾ་དྷ་ར་དྷ་ར་མན་ཆད་ལ་གྲངས་བཟུང་ནས་འབུམ་ཕྲག་ཁ་སྐོང་བཅས་འགྲོ་ངེས། དེ་ནས་སྒྲུབ་བསྙེན་གྱི་ཚུལ་དུ་སྨྱུང་གནས་ཀྱི་ཆོ་ག་
རྐྱང་། ཁུག །རྗེས་གསུམ་ལ་ཉིན་གསུམ་རེའི་རྩིས་ཀྱིས། སྨྱུང་གནས་ཚར་བདུན་ལ་ཉིན་ཉེར་གཅིག །དེ་རྗེས་ལས་སྦྱོར་གྱི་ཚུལ་དུ། བསམ་པའི་དོན་ཐམས་ཅད་ཡོངས་སུ་གྲུབ་པར་བྱེད་པ་ཐུགས་རྗེ་ཆེན་པོ་ཡིད་བཞིན་འཁོར་ལོའི་རྩ་སྔགས་སྟོང་ཕྲག་གཅིག །སྙིང་པོ། ཉེ་སྙིང་། གསང་བའི་སྙིང་པོ་རྣམས་ཅི་འགྲུབ། ཕ་རོལ་ཏུ་ཕྱིན་པ་དྲུག་དང་། ས་བཅུ་ཡོངས་སུ་རྫོགས་པའི་ཕྱིར་སོ་སོའི་གཟུངས་དང་། སངས་རྒྱས་ཀྱི་ཞིང་ཡོངས་སུ་སྦྱོང་ཞིང་། སེམས་ཅན་རྣམས་ཡོངས་སུ་སྨིན་པ་དང་། སྒོ་གསུམ་སྐྱེ་བ་དང་བཅས་པ་ཡིད་དུ་འོང་བ་དང་། གཟུངས་ཀྱི་སྒོ་ཟབ་མོ་ལ་འཇུག་པ་དང་། ཁྱད་པར་འཕགས་པའི་ཞིང་ཁམས་གྲུ་འཛིན་གྱི་གཞལ་མེད་ཁང་ཆེན་པོར་འཇུག་པ་ན་སྒོ་སྟོང་ཕྲག་ཡོངས་སུ་བྱེ་ཞིང་། དེ་སྙེད་ཀྱི་ཏིང་ངེ་འཛིན་ཐོབ་པ་སོགས་ཀྱི་ཆེད་སྒོ་མཐའ་ཡས་པའི་གཟུངས་བཅས་སྟོང་ཕྲག་སོགས་ཇི་ཙམ་ནུས་པ་བཟླ་སྟེ། དེའང་སྨྱུང་གནས་གྲུབ་རྗེས་ཉིན་གསུམ་སོགས་སུ་བདག་བསྐྱེད་དང་། བཅུ་གཅིག་ཞལ་གྱི་གཟུངས་ཕྲེང་སྐོར་ཙམ་སྔོན་དུ་འགྲོ་བས། གོང་དུ་སྨོས་པའི་གཟུངས་རྣམས་སོ་སོའམ། ཐམས་ཅད་སྦྲེལ་ནས་བཟླ་བ་གང་རུང་དང་། ཐུན་གྱི་མཇུག་ཏུ་གཏོར་འབུལ་སོགས་དཀྱུས་ལྟར་བྱ། དེ་ནས་གྲུབ་ན་རིགས་གསུམ་སྤྱིའམ། ཚེ་དཔག་མེད་ལྟ་བུ་
བྱ་རྒྱུད་ལུགས་ཀྱི་སྦྱིན་སྲེག་གང་རུང་ལ་ལྷ་སྔགས་ཁ་བསྒྱུར་པས་ཞི་བའི་སྦྱིན་སྲེག་ཀྱང་ཉིན་གསུམ་ཙམ་གྲུབ་ན་ལེགས། དེ་ལྟ་བུའི་བསྙེན་སྒྲུབ་མཐར་ཕྱིན་པས་ཇི་སྐད་གསུངས་པའི་ཕན་ཡོན་ཐམས་ཅད་འབྱུང་བར་འགྱུར་བ་དང་། གཟུངས་ལས་གསུངས་པའི་ལས་ཚོགས། རིམས་དང་། དུག་དང་། རྨའི་རིགས་སོགས་ནད་དང་། གདོན་གྱི་གནོད་པ་ལ་འཇིམ་པ་གཙང་མ་དང་། བྱིས་པ་གདོན་གྱིས་ཟིན་པ་ལ་འབྲུ་མར་དང་། རྣ་བ་ན་བ་ལ་རུ་རྟ་དང་བཅས་པའི་འབྲུ་མར་ལ་བཏབ་ནས་བྱུགས་ན་ཕན་པ་དང་། སྣ་ན་བ་ལ་གྲོ་ག་ལ་བསྔགས་ཏེ་བདུག་པས་མཚོན་ཕྱག་སྟོང་སྤྱན་སྟོང་གི་གཟུངས་སོགས་ལས་ཇི་སྐད་གསུངས་པའི་ལས་ཀྱི་ཚོགས་རྣམས་ཐོགས་པ་མེད་པར་འགྲུབ་པ་དང་། གཟུངས་སྒྲུབ་བགྱིས་པའི་བུམ་ཆུའམ། བུམ་ཆུ་རིལ་བུར་བྱས་པ་མྱང་བ་དང་། གཟུངས་སྔགས་ཀྱིས་བཏབ་པའི་བྱེ་མས་རེག་པས་ཀྱང་འཁོར་བ་དང་ངན་སོང་གི་སྡུག་བསྔལ་ལས་གྲོལ་བ་དང་། གཟུངས་སྒྲུབ་ཀྱི་བུམ་ཆུས་སྦགས་པའི་རྡེའུ་རི་མཐོན་པོའི་རྩེར་བསྐྱལ་བས་ཀྱང་། རི་དེ་མཐོང་བ་ཐམས་ཅད་ངན་སོང་ལས་ཐར་བ་སོགས་ཕན་ཡོན་དཔག་ཏུ་མེད་པར་གསུངས་སོ། །ཞེས་པའང་མཉྫགྷོ་ཥས་བྲིས་པ་དགེ། །།