པཎ་ཆེན་ཤཱཀྱ་ཤྲཱིའི་ལུགས་ཀྱི་སྒྲོལ་མ་དཀར་མོའི་སྒྲུབ་ཐབས་རྗེས་གནང་ལས་ཚོགས་དང་བཅས་པ་བདུད་རྩིའི་ཐིག་ལེ།
༄༅། པཎ་ཆེན་ཤཱཀྱ་ཤྲཱིའི་ལུགས་ཀྱི་སྒྲོལ་མ་དཀར་མོའི་སྒྲུབ་ཐབས་རྗེས་གནང་ལས་ཚོགས་དང་བཅས་པ་བདུད་རྩིའི་ཐིག་ལེ་ཞེས་བྱ་བ་བཞུགས་སོ།། །།
ཨོཾ་སྭསྟི། འཆི་མེད་གྲུབ་སྟེར་འཕགས་མ་ལ། །བཏུད་ནས་དེ་ཡི་སྒྲུབ་ཐབས་དང་། །རྗེས་གནང་ལས་ཚོགས་དང་བཅས་པ། །བདུད་རྩིའི་ཐིག་ལེ་ཅུང་ཟད་སྤྲོ། །འདི་ལ་གསུམ། སྒྲུབ་ཐབས། རྗེས་གནང་། ལས་ཚོགས་སོ། །དང་པོ་ནི། མདུན་གྱི་ནམ་མཁར་སྐྱབས་ཡུལ་རྣམས་མངོན་སུམ་བཞིན་དུ་བཞུགས་པའི་སྤྱན་སྔར། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཞེས་སྐྱབས་འགྲོ་དང་། ཤེས་རབ་སྙིང་བརྩེ་དང་བཅས་པའི། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བཅས་ཏེ། །
རྫོགས་པའི་བྱང་ཆུབ་སེམས་བསྐྱེད་བགྱི། །ཞེས་སེམས་བསྐྱེད། ཨོཾ་སྭ་བྷ་ཝ་བི་ཤུདྡྷཿསརྦ་དྷརྨཱཿསྭ་བྷ་ཝ་བི་ཤུདྡྷོཉཧཾ། སྟོང་པའི་ངང་ལས་འོ་མའི་རྒྱ་མཚོའི་དབུས་སུ་པཾ་ལས་པདྨའི་སྡོང་པོ། དེའི་དབུས་སུ་པད་དཀར་འདབ་བརྒྱད་རབ་ཏུ་རྒྱས་པའི་ལྟེ་བར། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཏཱྃ་ལས་རང་ཉིད་འཕགས་མ་སྒྲོལ་མ་སྐུ་མདོག་དཀར་མོ་ཞལ་གཅིག་ཕྱག་གཉིས་མ། འོད་དཔག་མེད་སྤྲུལ་སྐུའི་རྣམ་པའི་དབུ་རྒྱན་ཅན། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཕྱག་གཡས་མཆོག་སྦྱིན་གྱི་ཕྱག་རྒྱ་དང་། གཡོན་ཨུཏྤལ་དཀར་པོའི་ཡུ་བ་ཐུགས་ཀར་འཛིན་ཅིང་། འདབ་མ་སྙན་གྱི་ཐད་ཀར་ཁ་བྱེ་བ། བཅུ་དྲུག་ལོན་པའི་ན་
ཚོད་ཅན། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། འོད་ཟེར་དཔག་ཏུ་མེད་པ་འཕྲོ་བའི་སྐུ་ཅན་དུ་གྱུར། འདབ་མ་བརྒྱད་ལ་ལུས་དང་གྲིབ་མའི་ཚུལ་དུ་རང་འདྲ་བའི་སྒྲོལ་མ་དཀར་མོ་བརྒྱད་ཞལ་ནང་དུ་བསྟན་པ་འཁོར་གྱི་ཚུལ་ཅན། རང་གི་ཐུགས་ཀར་ཨ་ལས་ཟླ་བ་ལ་ཧཱུྃ་དཀར་པོ། དེ་ལས་འོད་ཟེར་འཕྲོས། ཡེ་ཤེས་སེམས་དཔའ་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོ༔ གཉིས་སུ་མེད་པར་ཐིམ། ཐུགས་ཀའི་ས་བོན་གྱི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། །འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་རྗེ་བྱིན་རླབས་ནུས་མཐུ་ཐམས་ཅད་དང་། ཁམས་གསུམ་གྱི་བརྟན་གཡོའི་དྭངས་བཅུད་མ་ལུས་པ་སྤྱན་དྲངས། སྤྱི་བོའི་རིགས་བདག་འོད་དཔག་མེད་པའི་ཕྱག་གི་ལྷུང་བཟེད་ཀྱི་ནང་དུ་སོང་། དེ་ལས་བདུད་རྩིའི་རྒྱུན་ལུད། རང་གི་ཚངས་པའི་བུ་ག་ནས་ཞུགས་པ་དང་ལྷན་ཅིག་ཏུ། སྙིང་གའི་སྔགས་ཕྲེང་ལས་ཀྱང་བདུད་རྩིའི་རྒྱུན་དཔག་ཏུ་མེད་པ་བབས་པས་ལུས་ཀྱི་ནང་གང་། དུས་མ་ཡིན་པའི་འཆི་བ་སྦྱངས། འཆི་མེད་ཚེའི་དངོས་གྲུབ་ཐོབ། འཁོར་གྱི་ལྷ་མོ་རྣམས་ཀྱིས་ཀྱང་སྔགས་ཀྱི་སྒྲ་དི་རི་རི་སྒྲོག་པར་གྱུར་པའི་མོས་པས། ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ། ཞེས་ཚེ་
འཛིན་ཅིང་གནས་པར་བྱེད་པའི་གསང་སྔགས་འདི་བཟླས་པའི་སྐྱོན་དང་བྲལ་བས་འབུམ་ཕྲག་བཅུ་གཅིག་སོགས་བཟླ་བ་ནི་བསྙེན་པ་ཡིན་ལ། ཐུན་བསྡུ་བའི་ཚེ། བཅོམ་ལྡན་འདས་མ་སྒྲོལ་མས་བདག་དང་སེམས་ཅན་ཐམས་ཅད་ཀྱི་ཚེའི་བར་ཆད་ཞི་བར་མཛད་དུ་གསོལ། ཚེ་དང་བསོད་ནམས་ཡེ་ཤེས་ཀྱི་ཚོགས་འཕེལ་བར་མཛད་དུ་གསོལ། ཞེས་གསོལ་བ་བཏབ། ལྷ་སྐུའི་གསལ་སྣང་འོད་གསལ་གྱི་དབྱིངས་སུ་ཐིམ་པར་བསམས་ལ་མཉམ་པར་བཞག །དེ་ལས་ལྡང་བ་ན། དགེ་བ་འདི་ཡིས་མྱུར་དུ་བདག །རྗེ་བཙུན་སྒྲོལ་མ་འགྲུབ་གྱུར་ནས། །ཞེས་སོགས་བསྔོ་སྨོན་བྱས་ཏེ་སྤྱོད་ལམ་ལ་འཇུག་གོ །གཉིས་པ་ནི། སྐྱབས་སེམས་ནས་བརྩམས་བདག་མདུན་བུམ་པ་སྒྲུབ་པའི་ཚུལ་དང་། རྗེས་གནང་གི་ཆིངས་རྣམས་ཁོ་བོས་བྱས་པའི་པཎ་ཆེན་ལུགས་ཀྱི་སྒྲོལ་མ་ལྗང་གུའི་ཡིག་ཆ་བདུད་རྩིའི་སྙེ་མ་གཞིར་བཞག་ལ། ལྷ་སྔགས་ཀྱི་འབྱིན་འཇུག་མ་འཁྲུལ་བར་སྦྱར། མཚམས་སྦྱོར་གྱི་ཁྱད་པར། དེ་ལ་འདིར་འཆི་མེད་ཚེ་དང་ཡེ་ཤེས་ཀྱི་དངོས་གྲུབ་སྟེར་བའི་ལྷག་པའི་ལྷ་ཁྱད་པར་ཅན་རྗེ་བཙུན་སྒྲོལ་མ་དཀར་མོའི་སྐོར་ལ་བཀའ་སྲོལ་གྱི་རིམ་པ་མང་དུ་བཞུགས་པ་ལས་སྐབས་སུ་བབས་པ་ནི། འཇམ་དཔལ་དཔའ་བོ་གྲུབ་པའི་རྒྱུད་ལས། སྔགས་ཀྱི་རྒྱལ་པོ་འདི་བཟླས་ན་ལས་
ཐམས་ཅད་བྱེད་པར་འགྱུར་རོ། །ཞེས་སོགས་དང་། རྟག་ཏུ་བཟླས་བརྗོད་བྱས་ན་ཚེ་ལོ་བརྒྱ་ཐུབ་པར་འགྱུར་རོ། །ཞེས་སོགས་རྒྱ་ཆེར་བསྔགས་པའི་འཆི་བ་མེད་པ་སྲོག་གི་གཞི་འཛིན་པར་བྱེད་པའི་གསང་སྔགས་ཀྱི་རྒྱལ་པོ་དང་། འཕགས་མའི་བསམ་གཏན་ལ་བརྟེན་ནས་ཚེ་སྒྲུབ་པའི་རིམ་པ་མ་བྱོན་སངས་རྒྱས་རབ་གསལ་གྱི་རྣམ་འཕྲུལ་ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲའི་ཐུགས་དམ་ཞལ་གཟིགས་ཀྱི་གདམས་པ་ཟབ་མོའི་རྗེས་སུ་གནང་བ་བསྒྲུབ་པ་ལ་སོགས་སྤྲེལ། ཡེ་ཤེས་པ་བསྟིམས་པའི་རྗེས། དེ་བརྟན་པར་བྱ་བའི་སླད་དུ་བུམ་པའི་ཆུས་ཀྱང་དབང་བསྐུར་བའི་མོས་པ་མཛོད། ཅེས་བརྡ་སྦྱར་ལ་སྔགས་ཀྱིས་དབང་བསྐུར་བ་ཙམ་ལས་རིགས་བདག་གི་རྒྱས་འདེབས་མི་དགོས། གཞན་འདྲའོ། །གསུམ་པ་ལ། བུམ་ཆོག་སྔགས་མདུད་འཁྲུལ་འཁོར་དང་། །སྦྱིན་སྲེག་བཅུད་ལེན་བསྒྲུབ་པའོ། །ཞེས་པ་ལྟར་ལྔ་ལས། དང་པོ་ནི། བུམ་རྫས་སྤྱི་དང་བཅུད་ལེན་གྱི་སྨན་ཅི་རིགས་པས་གཏམས་པའི་བུམ་པ་སྒྲུབ་ཚུལ་སྒྲོལ་མ་ལྗང་མོའི་སྐབས་སུ་སྨོས་པ་བཞིན་སྦྱར། དེ་ལྟ་བུའི་བུམ་ཆུ་ཁོང་དུ་བཏུང་བ་དང་། བཀྲུ་བྱབས་སོགས་བགྱིས་པས་ནད་ཞི་བ་དང་། ཚེ་བསྲིང་བ་དང་། སྲིའུ་གསོ་བ་སོགས་ལ་མཆོག་ཏུ་བསྔགས་ཤིང་། བུམ་པའི་ཆུས་རིལ་བུར་བགྱིས་པས་ཀྱང་རུང་ངོ་།
གཉིས་པ་ནི། གཞོན་ནུ་མས་བཀལ་བའི་སྐུད་པའམ། དར་དཀར་པོ་ལ་རྡོ་རྗེའི་མདུད་པ་བྱ་ཞིང་སྔགས་མཆིལ་གྱིས་བཏབ་པ་བཅིངས་པས་ནད་གདོན་སྲུང་ཞིང་ཞི་བར་བྱེད་དོ། །གསུམ་པ་ནི། གྲོ་ག་འམ་ཤོག་བུ་ལ་འཁོར་ལོ་རྩིབས་བརྒྱད་ལྟེ་བ་མུ་ཁྱུད་དང་བཅས་བྲིས་པའི་དབུས་སུ་ཏཱྃ། དེའི་མཐར། ཨོཾ་མ་མ་ཨཱ་ཡུར་པུཎྱེ་ཛྙཱ་ན་པུཥྟིཾ་ཀུ་རུ་སྭཱ་ཧཱ་ཞེས་པ་ལྟ་བུའི་སྤེལ་ཚིག་ཨོ་དང་སྭཱ་ཧཱའི་བར་དུ་ཆུད་པས་བསྐོར། རྩིབས་བརྒྱད་ལ་ཨ། མཱ། ར། ཎི། ཛཱི། བ། ནྟི། ཡེ། ཞེས་བྲི། མུ་ཁྱུད་ལ་སྒྲོལ་མའི་སྔགས་རིང་དང་དབྱངས་གསལ་རྟེན་སྙིང་གིས་བསྐོར། དེའི་རྒྱབ་ཏུ་རྡོ་ར་མེ་རི་སོགས་བྲིས་ཀྱང་རུང་། དྲི་ཞིམ་པའི་སྨན་གྱིས་བྱུགས་ལ་རབ་ཏུ་གནས་ཏེ་མགུལ་དུ་འཆང་བས་མ་བསྒྲུབས་ཀྱང་ལས་ཐམས་ཅད་འགྲུབ་པར་འགྱུར་རོ། །བཞི་པ་ནི། འཇམ་དཔལ་རྩ་རྒྱུད་ལས། རྩྭ་དཱུརྱའི་འཇག་མ་ལ་ཞོ་དང་སྦྲང་རྩི་མར་གྱིས་ངར་བཏགས་པ་སྟོང་རྩ་བརྒྱད་ཀྱིས་ནུབ་བཅུའི་བར་དུ་སྦྱིན་སྲེག་བྱས་ན་དུས་མ་ཡིན་པའི་འཆི་བ་རབ་ཏུ་ཞི་ཞིང་ཚེ་རིང་བར་འགྱུར་རོ། །ཞེས་གསུངས་པ་ལྟར་རྒྱས་པའི་སྦྱིན་སྲེག་གི་ཆིངས་རྒྱས་བསྡུས་གང་རུང་དང་སྦྱར་ནས། བསྲེག་རྫས་ཀྱི་གཙོ་བོ་གོང་དུ་སྨོས་པ་ལྟར་ཕུལ་བས་ཚེ་བསྲིང་བའི་མཆོག་ཏུ་གསུངས་སོ། །ལྔ་པ་ནི། བཅུད་ལེན་ཐམས་ཅད་
ལའང་སྔགས་འདིས་གདབ་པར་གསུངས་པས། ཚུལ་བཞིན་བསྒྲུབས་པའི་བུམ་ཆུ་དང་། བཅུད་ལེན་གྱི་སྨན་གང་ཡང་རུང་བའམ། སྤྱིར་བཏང་དུ། འབྲས་བུ་གསུམ་དང་། ར་མོ་ཤག་བཅས་སྦྱར་བའི་རིལ་བུ་རིན་པོ་ཆེའི་སྣོད་དུ་བླུགས། བདག་བསྐྱེད་སྔོན་དུ་འགྲོ་བས། རིལ་བུའི་སྟེང་དུ་ཟླ་བ་ལ་སྔགས་ཀྱི་ཕྲེང་བས་མཚན་པ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་རྗེ་བྱིན་རླབས་ནུས་མཐུ་ཐམས་ཅད་དང་། ཁམས་གསུམ་གྱི་བརྟན་གཡོའི་དྭངས་བཅུད་མ་ལུས་པ་བསྡུས་ཏེ་སྔགས་ཕྲེང་ལ་ཐིམ། །དེ་ལས་བདུད་རྩིའི་རྒྱུན་བབས་པས་རིལ་བུ་ལ་ཐིམ་པར་གྱུར་པའི་མོས་པས་སྔགས་བཟླ། མཐར་སྔགས་ཕྲེང་གདན་དང་བཅས་པ་འོད་དུ་ཞུ་ནས་རིལ་བུ་ལ་ཐིམ་པས་བཅུད་ལེན་གྱི་རིལ་བུ་འོད་འབར་བའི་རྣམ་པར་བསམས་ལ་རྟེན་སྙིང་དང་ཤིས་བརྗོད་བཅས་མེ་ཏོག་འཐོར། དེ་ཉིད་ཚུལ་བཞིན་བསྟེན་པས་ཚེ་དང་ལུས་ཀྱི་བཅུད་ལེན་མཆོག་ཏུ་གྲུབ་པར་འགྱུར་རོ། །མན་ངག་ཆུ་གཏེར་བསྲུབས་པའི་ཕུལ། །གདམས་ཟབ་བདུད་རྩིའི་ཐིག་ལེ་ཡིས། །འགྲོ་ཀུན་ཚེ་དང་ཡེ་ཤེས་ཀྱི། །སྣང་བས་རྟག་ཏུ་མཛེས་གྱུར་ཅིག །ཅེས་པའང་གཞུང་རྙིང་པའི་དོན་སྙིང་པོར་དྲིལ་ཏེ་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག། །།