རྨི་ལམ་ལུང་སྟོན་སྒྲོལ་མའི་སྒོམ་ལུང་དང་མན་ངག་གི་གསལ་བྱེད་ཉུང་དུ་ཟླ་བའི་མེ་ལོང་།
རྨི་ལམ་ལུང་སྟོན་སྒྲོལ་མའི་སྒོམ་ལུང་དང་མན་ངག་གི་གསལ་བྱེད་ཉུང་དུ་ཟླ་བའི་མེ་ལོང་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། རྨི་ལམ་ལུང་སྟོན་སྒྲོལ་མའི་སྒོམ་ལུང་འབོགས་པའི་སྐབས། མདུན་དུ་མཎྜལ་ཚོམ་བུ་གཅིག་པ་མཆོད་པ་དང་བཅས་པ་བཤམ། །འགྲོ་རྣམས་བསྒྲལ་འདོད་སོགས་དང་། ཤེས་རབ་སྙིང་བརྩེ་སོགས་སྐྱབས་སེམས་དང་། དཀོན་མཆོག་གསུམ་ལ་བདག་སྐྱབས་མཆི་སོགས་ཡན་ལག་བདུན་པ་སྔོན་དུ་འགྲོ་བས། ཨོཾ་ཨ་མྲྀ་ཏ་སོགས་བགེགས་བསལ་བ་ནས་བཟུང་བཟླས་པའི་བར་གོང་ལྟར་བྱ། དེ་ནས་སློབ་མ་ཁྲུས་བྱས་མདུན་དུ་འཁོད་པ་ལ། །ཆོས་བཤད་ཅི་རིགས་དང་། འདིར་ཡང་དག་པར་རྫོགས་པའི་སངས་རྒྱས་ཀྱིས་སྣ་ཚོགས་པའི་ལས་གྲུབ་པའི་རྒྱུད་ལས་གསུངས་ཤིང་། སློབ་དཔོན་ཟླ་བའི་བཤེས་གཉེན་གྱིས་ལེགས་པར་བཀྲལ་བ་ཁྲོ་
ཕུ་ལོ་ཙཱ་བ་བྱམས་པའི་དཔལ་ལ་བཀའ་བབས་པའི་རྨི་ལམ་ལུང་སྟོན་སྒྲོལ་མའི་སྒོམ་ལུང་བགྱི་བ་ལ། སློབ་དཔོན་གྱི་བྱ་བ་གྲུབ་ནས། ཁྱེད་རང་གི་ངོ་སྐལ་དུ་གྱུར་པ་ལ་ཐོག་མར་མཎྜལ་འབུལ་འཚལ། གསོལ་བ་འདེབས་པ་འདིའི་རྗེས་ཟློས་མཛོད། སློབ་དཔོན་གྱིས་བདག་ལ་རིག་སྔགས་དམ་པ་སྩལ་དུ་གསོལ། རྒྱུད་དག་པར་བྱ་བའི་སླད་དུ་སྐྱབས་འགྲོ་སེམས་བསྐྱེད་དང་བདུན་རྣམ་དག་འདི་གསུང་བར་ཞུ། འགྲོ་རྣམས་བསྒྲལ་འདོད་སོགས་གོང་ལྟར། ཨོཾ་ཨ་མྲྀ་ཏ་སོགས་ནས། ཕཊ་སྭཱ་ཧཱ་ཞེས་པས་བགེགས་བསལ་ནས། དེ་ནས་ཁྱེད་རང་རྣམས་མ་ཡེངས་པར་ལྷའི་རྣལ་འབྱོར་འདི་བཞིན་དུ་བསྒོམ་འཚལ། ནམ་མཁའ་སྔོན་པོའི་དབུས་སུ་སོགས་ནས། ཚོགས་འཕྲོ་བར་གྱུར་ཅེས་པའི་བར་གོང་ལྟར་ལ། རང་ཉིད་ཅེས་པར་ཁྱེད་རང་རྣམས་ཞེས་བསྒྱུར། ཨོཾ་བཛྲ་ཨརྒྷཾ་སོགས་ཀྱིས་མཆོད། ཡེ་ཤེས་སེམས་དཔའ་བཛྲ་ས་མཱ་ཛ༔ ཛ྄ཿཧཱུྃ་བཾ་ཧོཿ གཉིས་སུ་མེད་པར་ཐིམ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། སློབ་དཔོན་ལྷར་གསལ་བའི་ཐུགས་ཀར་ཟླ་བ་ལ་སྔགས་ཀྱི་ཕྲེང་བ། མོས་གུས་མཛད་པས་སྔགས་ཕྲེང་གཉིས་པ་ཆད། ཞལ་ནས་ཐོན། ཁྱེད་རང་རྣམས་ལྷར་གསལ་བའི་ཞལ་དུ་ཞུགས། ཐུགས་ཀར་ཟླ་བའི་སྟེང་དུ་འཁོད་པར་མོས་ལ་སྔགས་འདིའི་རྗེས་ཟློས་
ལན་གསུམ་མཛོད། རྗེས་ཟློས་གྲུབ་ནས། སློབ་མས་མེ་ཏོག་འཐོར་ཞིང་། །བཅོམ་ལྡན་བདག་ལ་སོགས་དང་། སློབ་དཔོན་གྱིས་བཅོམ་ལྡན་འདི་ལ་སོགས་སྤྱི་ལྟར་བརྗོད། དེས་རྨི་ལམ་ལུང་སྟོན་སྒྲོལ་མའི་སྒོམ་བཟླས་ཀྱི་ལུང་ལེགས་པར་ཕུལ་གྲུབ་པ་ཡིན་པས་གཏང་རག་ཏུ་མཎྜལ་དང་། དགེ་བ་བསྔོ། མདུན་གྱི་མཎྜལ་གྱི་དབུས་ན་བཞུགས་པའི་ལྷ་ལ་མཆོད་བསྟོད། ནོངས་བཤགས། རྟེན་ཡོད་ན་བརྟན་བཞུགས། ན་གཤེགས་གསོལ། བསྔོ་སྨོན་བཀྲ་ཤིས་སོགས་སྤྱི་ལྟར་བྱའོ། །མན་ངག་གི་ངེས་པ་ལ་གཉིས། བསྙེན་པ་དང་། ལས་སྦྱོར་རོ། །དང་པོ་ནི། གནས་དབེན་པར་ཁྲུས་དང་གཙང་སྦྲ་དང་བཅས་མཚམས་དམ་པར་བཅད། རང་གི་མདུན་དུ་འདིའི་བྲིས་འབུར་གྱི་སྐུ་གང་རུང་དང་། སྒྲུབ་པ་དང་། མཆོད་པའི་མཎྜལ། དཀར་གསུམ་མངར་གསུམ་གྱི་གཏོར་མ་ཉེར་སྤྱོད་དང་བཅས་པ་བཤམ། སྐྱབས་སེམས་ཡན་ལག་བདུན་པ་ནས་བཟུང་བདག་མདུན་གྱི་རྣལ་འབྱོར་གོང་བཞིན་ལ། །བདག་བསྐྱེད་ཀྱི་བཛྲ་ས་མཱ་ཛཿ ཞེས་པའི་རྗེས། ཨོཾ་བཛྲ་ཨརྒྷཾ་སོགས་ཀྱིས་མཆོད། ཛཿཧཱུྃ་བྃ་ཧོཿས་བསྟིམ་་མན་འདྲ། ཤེལ་དཀར་གྱི་ཕྲེང་བ་བཟུང་ནས་བཟླས་པ་ཅི་ནུས་བྱ། ཐུན་ལས་ལྡང་བ་ན། མཎྜལ་ཚོམ་བུ་བདུན་མའམ་སོ་བདུན་ལ་སོགས་ཅི་ནུས་
ཕུལ། གཏོར་མ་སྤྱི་ལྟར་བྱིན་གྱིས་བརླབས་ལ། ཨོཾ་ཨཱརྻ་ཏཱ་རཱ་ས་པ་རི་ཝཱ་ར་ཨ་ཀ་རོ་སོགས་ཀྱིས་ཕུལ། ཨརྒྷཾ་སོགས་ཀྱིས་མཆོད། སྤྲིན་བྲལ་མཁའ་དཀྱིལ་ཟླ་རྒྱས་གཟུགས། །རབ་དཀར་བསིལ་བའི་འོད་ལྡན་མ། །མ་ལུས་རྨི་ལྟས་གསལ་མཛད་པའི། །འཕགས་མ་སྒྲོལ་མར་ཕྱག་འཚལ་ལོ། །ཞེས་བསྟོད། མཆོད་སྦྱིན་གཏོར་མ་འདི་བཞེས་སོགས་ཀྱིས་འདོད་དོན་གསོལ། ནོངས་བཤགས། བརྟན་བཞུགས། བསྔོ་སྨོན་བཀྲ་ཤིས་སྤྱི་ལྟར་བྱ། དེ་ལྟ་བུའི་རིམ་པས་ཐུན་བཞི་སོགས་སུ་བཅད་ལ་རྩ་སྔགས་ཡི་གེ་བརྒྱད་པ་འབུམ་ཕྲག་ཉི་ཤུ་རྩ་བཞི་བཟླའོ། །གཉིས་པ་ལ་གཉིས། སྦྱོར་བ་དང་། དངོས་གཞིའོ། དང་པོ་ནི། དེ་ལྟར་བསྙེན་པ་ལེགས་པར་གྲུབ་ནས། ཚེས་གྲངས་གཟའ་སྐར་ལེགས་པའི་སྔ་དྲོ། བུ་མོ་གཞོན་ནུ་གྲོང་པའི་ཆོས་ཀྱིས་མ་གོས་པ་བདུན་བོས་ལ། དཀར་གསུམ་གྱི་བཏུང་བ་དང་། བཟའ་བཅས་ཚིམ་པར་བྱ། དར་དཀར་པོ་དང་མགྲོན་བུ་བཅས་བྱིན་ལ་རང་གནས་སུགཏོང་། གཉིས་པ་ནི། གནས་ཁང་བྱི་དོར་བྱ་ཞིང་མཚམས་དམ་པར་བཅད། གོས་གཙང་མ་གོན་ཞིང་ཁྲུས་དང་གཙང་སྦྲ་ལ་གནས་པས་རང་གི་སྔས་མགོར་སྒྲུབ་པའི་མཎྜལ་དང་། གཏོར་མ། མཆོད་པ། ཁྱད་པར་གུ་གུལ་དཀར་པོའི་བདུག་སྤོས་རྒྱུན་མི་འཆད་པ་དང་། མར་
མེ་གསལ་བ་འབུལ། རང་གི་མདུན་དུ་བ་བྱུང་ལྔ་དང་འཇིམ་པ་གཙང་མ་བསྲེས་པའི་རིལ་བུ་སྲན་མ་ཙམ་དགོས་འདང་རིན་པོ་ཆེའི་སྣོད་དུ་བླུག །སྲོད་ཀྱི་དུས་སུ་བབ་པ་ན་བདག་མདུན་གོང་བཞིན་བསྒོམས་ནས་བཟླས་པ་ཅི་རིགས་རྗེས་མཎྜལ་དང་གཏོར་མ་དབུལ། ལས་སྔགས་ཀྱིས་བཏབ་པའི་འཇིམ་པའི་རིལ་བུ་ཉི་ཤུ་རྩ་གཅིག་ལས་སྔགས་བཟླ་བཞིན་ཕྱོགས་བཅུར་གཏོར་བས་གནས་དང་ཡོ་བྱད་ལ་བར་ཆད་ཀྱི་བགེགས་བསལ། ཡང་རིལ་བུ་ཉེར་གཅིག་རིན་པོ་ཆེའི་ཕུང་པོར་བསམས་ལ་མཆོད་པའི་སྤྲིན་གྱི་སྔགས་བཟླ་བཞིན་དུ་མཎྜལ་གྱི་སྟེང་དུ་ཕུལ་ལ་གསོལ་བ་གདབ། རིལ་བུ་ཉེར་གཅིག་རང་གིས་ཟ་བས་རྣལ་འབྱོར་གྱི་བགེགས་བསྲུང་། དེ་ནས་ཨོཾ་སྭཔྣ་ཏཱ་རེ་ཨོ་ཀྱེ་རྨི་ལམ་སྒྲོལ་མ། སཱཔྣ་ཨ་ཝ་ལོ་ཀེ་ནི་རྨི་ལམ་ཀུན་ཏུ་གཟིགས་མ་ཏྲཻ་ལོ་ཀྱཱ་ནི་དརྴ་ནཱི་འཇིག་རྟེན་གསུམ་གཟིགས་མ་ཏྲཻ་ལོ་ཀྱ་བི་ཛ་ར་ཎཱི་འཇིག་རྟེན་གསུམ་གྱི་རྡུལ་དང་བྲལ་མས། བྷཱུ་ཏཾ་བྷ་བཾ་བྷ་བིཥྱཾ་བྱུང་དང་འབྱུང་བ་འབྱུང་འགྱུར། ཤུ་བྷཱ་ཤུ་བྷཾ་ཏཾ་མི་དགེ་བ་དང་མི་དགེ་བ་དེ་དག སདྱ་ཀཱ་ཐཱ་ཡ་སྭཱ་ཧཱ། བདེན་པ་ཇི་ལྟ་བའི་གཞི་ཚུགས། ཞེས་པའི་སྔགས་ཀྱིས་གསོལ་བ་ལན་བརྒྱ་རྩ་སོགས་བཏབ་པས་མདུན་གྱི་འཕགས་མའི་ཐུགས་ཀ་ནས་འོད་ཟེར་དཀར་པོ་ཟླ་བ་ཤར་བ་ལྟར་འཕྲོས། རང་གི་སྙིང་གར་ཐིམ་པས་མ་རིག་པའི་མུན་པ་བསལ། ཕྱག་གཡས་མཆོག་སྦྱིན་
ལས་བདུད་རྩིའི་རྒྱུན་བབས། རང་གི་སྤྱི་བོ་ནས་ཞུགས། སྙིང་གི་དབུས་དང་ལུས་ཀྱི་ནང་ཐམས་ཅད་གང་། ནད་གདོན་སྡིག་སྒྲིབ་བག་ཆགས་དང་བཅས་པ་དག་ཅིང་། ལུས་དྲི་མ་མེད་པའི་ཤེལ་ལྟར་གྱུར་པར་བསམས་ལ་མདུན་གྱི་ལྷ་མོ་ལ་དད་ཅིང་གུས་པས་རྩེ་གཅིག་ཏུ་སེམས་གཏད་དེ་སེང་གེའི་ཉལ་སྟབས་ཀྱིས་ཉལ་ལ་རྩ་སྔགས་ཡི་གེ་བརྒྱད་པ་བཟླ་བཞིན་དུ་གཉིད་ལོག་པས། རྨི་ལམ་དུ་དངོས་སམ་བརྡ་ཐབས་ཀྱི་སྒོ་ནས་གང་འདོད་པའི་དོན་གསལ་བར་ལུང་སྟོན་པར་འགྱུར་ལ། གཉིད་སང་མ་ཐག་མདུན་གྱི་ལྷ་མོ་ལ་མཆོད་བསྟོད། ནོངས་བཤགས་སོགས་ཆོ་གའི་འཕྲོས་རྣམས་གོང་བཞིན་དུ་བྱའོ། །དེའང་རབ་ཞག་གཅིག་ནས་བཟུང་། །ཐ་མའང་ཞག་བདུན་གྱི་ཁོངས་སུ་རྨི་ལྟས་གསལ་བོར་མཐོང་བར་གསུངས་སོ། །ཞེས་པའང་མཉྫུ་གྷོ་ཥས་རྒྱ་གཞུང་དང་ཟིན་བྲིས་ཀྱི་དགོངས་པ་ལྟར་ཉུང་གསལ་སྙིང་པོར་དྲིལ་ཏེ་སྦྱར་བ་དགེ །ཨོཾ་བུདྡྷ་ཙུ་རུ་མ་ཙུ་རུ་ཀེ་སྭཱ་ཧཱ། ཤཱཀྱ་ཐུབ་པ་ལུགས་མའམ། ཐང་ཀའམ། སྡེར་ཚོའི་མདུན་དུ་མཎྜལ་བྱ། པཱུ་ཛ་དབུལ་ཞིང་མོས་གུས་བྱས་ཏེ་བཟླས་པ་འབུམ་ཕྲག་གསུམ་བསྐྱལ་ནས། ཉའམ། གནམ་སྟོང་ངམ། དུས་ཁྱད་པར་ཅན་ལ་ཤཱཀྱ་ཐུབ་པའི་ཞལ་ཤར་དུ་བསྟན། དེའི་མདུན་ནམ་རྩར་མཎྜལ་བྱ། བཟླས་པ་ནུས་ཚད་གཅིག་བྱས་ཏེ་ཉལ་
ཁར་བདག་སྐྱེ་བ་སྔ་མ་གར་སྐྱེས། ད་གང་དུ་སྐྱེ་བསྟན་དུ་གསོལ་ཞེས་བྱ་བ་ལ་སོགས་པས་གསོལ་བ་བཏབ་ནས་མགོ་བྱང་དུ་བསྟན། ཁ་ནུབ་ཏུ་བསྟན། རྐང་པ་ལྷོར་བསྟན་ཏེ་སེང་གེའི་ཉལ་སྟབས་ཀྱིས་ཉལ་ན་གར་སྐྱེ་རྨི་ལམ་དུ་སྟོན་ཏོ། །དེ་མ་བྱུང་ན་ནུབ་གསུམ་དུ་བསྐྱར་རོ། །ཤཱཀྱ་རཀྵི་ཏ་ལས་བརྒྱུད་པའོ། །ཞེས་དཔལ་སྟག་ལུང་ཐང་པ་ཆེན་པོ་བཀྲ་ཤིས་དཔལ་གྱིས་བསྒྲིགས་པའི་མན་ངག་སྣ་ཚོགས་ཕན་བདེའི་དཔག་བསམ་ལས་བྱུང་བའོ། །གཉིས་པ་ནི། རྟེན་གྱི་གང་ཟག་སོ་སོར་ཐར་པ་ཚངས་སྤྱོད་དགེ་བསྙེན་ཡན་ཆད་ཀྱི་སྡོམ་པ་ལ་གནས་ཤིང་ཉེས་ལྟུང་མེད་པ། བྱང་ཆུབ་ཀྱི་སེམས་ཅུང་ཟད་འབྱོངས་པ། དབང་ཐོབ་ཅིང་དམ་ཚིག་དང་སྡོམ་པར་ལྡན་པ། ཁྱད་པར་ཐུབ་པའི་དབང་པོའི་བསྒོམ་བཟླས་ལ་བརྩོན་ཅིང་བསྙེན་པ་སྔོན་དུ་སོང་བ་ཞིག་གིས་ཉམས་སུ་བླང་བར་བྱ་སྟེ། དེ་ལ་གཉིས། བསྙེན་པ་དང་། ལས་སྦྱོར་རོ། །དང་པོ་ནི། གནས་ཤིན་ཏུ་དབེན་ཞིང་གཙང་ལ་སྡོམ་པ་དང་དམ་ཚིག་ཉམས་པ་སོགས་ཀྱི་སྐྱེ་བོའི་རྒྱུ་འགྲུལ་ཙམ་ཡང་མེད་པའི་སར། བསམ་གཏན་གྱི་ཁང་བུར་ཕྱག་དར་བྱ། སྤོས་ཆུས་ཆག་ཆག་གདབ། རང་ཉིད་ཁ་ནུབ་ཏུ་ཕྱོགས་པའི་མདུན་དུ་སྟེགས་མཐོ་བར་སངས་རྒྱས་ཀྱི་རིང་བསྲེལ་བཞུགས་ངེས་པའི་མཆོད་རྟེན་ནམ་སྐུ་
གཟུགས་མཚན་ཉིད་དང་ལྡན་པ་རབ་གནས་མ་ཉམས་པ་ཞིག་ཞལ་ཤར་དུ་ཕྱོགས་པས་བཞུགས་སུ་གསོལ། དེའི་མདུན་དུ་མར་དཀར་གྱི་མར་མེ་རྒྱུན་མི་འཆད་པ་གཙོ་བོར་གྱུར་པའི་མཆོད་པ་ཅི་འབྱོར་གཙང་ཞིང་བཀོད་མཛེས་སུ་བསྟར། ཙནྡན་དཀར་པོའི་བདུག་སྤོས་བཏུལ། རབ་ཁྲུས་བྱ། གོས་གསར་པ་གྱོན། ཀུ་ཤ་བཀྲམ་པའི་སྟན་ལ་འཁོད་དེ་མཚམས་དམ་པར་བཅད་ཐེག་པ་ཆེན་པོའི་གསོ་སྦྱོང་བླང་། ས་གཞི་བྱིན་རླབས་སོགས་གནས་བརྟན་ནམ་སྨན་བླའི་མདོ་ཆོག་ལས་འབྱུང་བ་ལྟར་རམ་བསྡུ་ན། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས། དེང་འདིར་ཁོར་ཡུག་གི་ས་གཞི་འདི་དག་བདེ་བ་ཅན་གྱི་ཞིང་གི་བཀོད་པ་ལྟ་བུ་ཕུན་སུམ་ཚོགས་པའི་རྒྱན་ཐམས་ཅད་ཀྱིས་རྣམ་པར་བརྒྱན་པས་མཛེས་ཤིང་ཡིད་དུ་འོང་བ་བསམ་གྱིས་མི་ཁྱབ་པར་གྱུར། ཐམས་ཅད་དུ་ཡང་ས་གཞི་དག །གསེག་མ་ལ་སོགས་མེད་པ་དང་། །ལག་མཐིལ་ལྟར་མཉམ་བཻཌཱ་རྻའི། །རང་བཞིན་འཇམ་པོར་གནས་གྱུར་ཅིག །ཕུན་སུམ་ཚོགས་པའི་ཞིང་འདི་དག་ཏུ་ལྷ་དང་མིའི་ཡོ་བྱད་དམ་པ་
གཟུགས་དང་། སྒྲ་དང་། དྲི་དང་། རོ་དང་། རེག་བྱ་ལ་སོགས་པ་རྣམ་པར་དག་ཅིང་ཡིད་དུ་འོང་བའི་མཆོད་པའི་སྤྲིན་རྒྱ་མཚོ་བསམ་གྱིས་མི་ཁྱབ་པས་ནམ་མཁའི་ཁམས་ཐམས་ཅད་གང་བར་གྱུར། དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་སྡུག་བསྔལ་སིམ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །ཅེས་དང་སྤྲོ་ན་མཆོད་པའི་སྤྲིན་གྱི་གཟུངས་ཀྱང་བརྗོད། སྐྱབས་སེམས་རྒྱས་པར་བྱ་བའམ། སངས་རྒྱས་ཆོས་ཚོགས་ཚར་གྲངས་བསག་ཅིང་བློ་རྒྱུད་དང་འགྲེ་ངེས་པར་བྱ། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། དེ་ནས་སྤོས་བཏུལ་ཐལ་མོ་སྦྱར་ལ་འདུན་པ་རྩེ་གཅིག་པས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཞེས་སམ་སྤྲོ་ན་ཚིགས་བཅད་ཚང་བས་སྤྱན་དྲངས་ཏེ། བཅོམ་ལྡན་འདས་དཔལ་རྒྱལ་བ་ཤཱཀྱ་ཐུབ་པ་སངས་རྒྱས་དང་བྱང་ཆུབ་སེམས་དཔའ་ཉན་ཐོས་ཀྱི་དགེ་འདུན་དང་བཅས་པའི་ཚོགས་རྣམས་སངས་རྒྱས་ཀྱི་རྫུ་འཕྲུལ་ཆེན་པོས་གཤེགས་ཏེ་མདུན་གྱི་རྟེན་དང་དབྱེར་མེད་དུ་བཞུགས་པ་ནི། སེང་
གེས་བཏེག་པའི་རིན་པོ་ཆེའི་ཁྲི་པདྨ་དང་ཟླ་བའི་གདན་བཀོད་པ་ཕུལ་དུ་བྱུང་བའི་དབུས་སུ་སྟོན་པ་བཅོམ་ལྡན་འདས་སྐུ་མདོག་གསེར་བཙོ་མ་ལྟར་འབར་བ། ཞལ་གཅིག་ཕྱག་གཉིས་གཡས་ས་གནོན་དང་གཡོན་མཉམ་གཞག་གི་ཕྱག་རྒྱ་མཛད་པ། ན་བཟའ་ཆོས་གོས་རྣམ་གསུམ་ངུར་སྨིག་ཏུ་གསོལ་བ་སྐུ་མཚན་དང་དཔེ་བྱད་འབར་བ། གསུང་དབྱངས་ཡན་ལག་དྲུག་ཅུ་དང་ལྡན་པ། ཐུགས་ཏིང་ངེ་འཛིན་སྒོ་དུ་མ་ལ་སྙོམས་པར་འཇུག་ཅིང་ལྡང་བ། འཁོར་སངས་རྒྱས་དང་བྱང་ཆུབ་སེམས་དཔའ་ཉན་ཐོས་དགྲ་བཅོམ་པའི་ཚོགས་ཀྱིས་བསྐོར་ཏེ་འོད་ཀྱི་ཕུང་པོའི་ཀློང་ན་མངོན་སུམ་བཞིན་དུ་བཞུགས་པར་གྱུར་ཅེས་བརྗོད་ཅིང་གསལ་གདབ། ཡན་ལག་བདུན་པའི་ཆོ་ག་རྒྱས་པ་གཞན་ནས་འབྱུང་བ་ལྟར་རམ། བཟང་སྤྱོད་ནས་འབྱུང་བའི་ཚིགས་སུ་བཅད་པ་ཙམ་གྱིས་ཀྱང་རུང་སྟེ་ཕྱག་མང་དུ་བཙལ། སྤྱོད་འཇུག་ལྟར་སེམས་བསྐྱེད་ཀྱི་སྡོམ་པ་བླང་། དེ་ནས་སྐུ་གཟུགས་ཀྱི་ཐུགས་ཀར་ཙནྡན་དཀར་པོའི་ཆབ་གཙང་མས་དྲིའི་ཐིག་ལེ་གསུམ་བཀོད་ལ་སྨྲ་བ་བཅད་དེ། ཨོཾ་བུདྡྷ་ཙུ་རུ་མ་ཙུ་རུ་ཀེ་སྭཱ་ཧཱ། ཞེས་པའི་སྔགས་ཡི་གེ་བཅུ་གཅིག་པ་ཁོ་ན་བཟླ། བརྒྱ་ཕྲག་གམ་སྟོང་ཕྲག་རེའི་མཚམས་སུ། བཅོམ་ལྡན་འདས་དཔལ་རྒྱལ་བ་ཤཱཀྱ་ཐུབ་པས་བདག་གང་ནས་སྐྱེས་པར་གྱུར་པ་དང་། གང་དུ་སྐྱེ་བར་
འགྱུར་བ་རྨི་ལམ་དུ་གསལ་བར་ལུང་བསྟན་དུ་གསོལ་ཞེས་ལན་གསུམ་ལ་སོགས་པ་ངག་གམ་ཡིད་ཀྱིས་གསོལ་བ་གདབ་ཅིང་མེ་ཏོག་འཐོར་བ་རེ་བྱ། དེའི་ཚེ་དམིགས་པ་ནི། སངས་རྒྱས་འཁོར་དང་བཅས་པས་རྗེས་སུ་དགོངས་ཏེ་ཐུགས་ཀ་དང་སྨིན་མཚམས་ནས་འོད་ཟེར་འཕྲོས། རང་གི་སྤྱི་བོ་ནས་ཞུགས་ལུས་ཀྱི་ནང་ཐམས་ཅད་གང་པས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་སྦྱངས། ལུས་དག་པའི་ཤེལ་ལྟར་བྱས། སེམས་དུག་གསུམ་གྱི་དྲི་མ་དང་བྲལ་ཏེ་ལུང་བསྟན་པའི་སྣོད་དུ་གྱུར་པར་བསམ། ཐུན་འཇོག་པ་ན་སླར་ཡང་ཡན་ལག་བདུན་པ་ཕུལ་ཏེ་གསོལ་བ་གདབ། ཐུན་མཚམས་སུའང་རྣམ་གཡེང་གི་བྱ་བ་དང་། རྣམ་པར་རྟོག་པ་མང་པོ་སྤངས་ཏེ་ལྟུང་བ་བཤགས་པ་སོགས་དང་བཅས་ཏེ་ཕྱག་མང་དུ་བཙལ། དེ་ལྟ་བུའི་རིམ་པས་འབུམ་ཕྲག་བཞི་བཟླ་བར་བྱའོ། །གཉིས་པ་ནི། བསྙེན་པ་གྲུབ་ནས་ཆོ་ག་གཞན་སྔར་བཞིན་ལ། ཉལ་ཁར་རུ་རྟའི་ཕྱེ་མ་ལ། ཨོཾ་མུ་ཙི་ལི་སྭཱ་ཧཱ། ཨོཾ་མོ་ཧ་ནི་སྭཱ་ཧཱ། ཨོཾ་དནྟ་ལི་སྭཱ་ཧཱ། ཞེས་བཟླས་པས་བདུགས་ལ་ལག་གཡོན་པའི་སོར་མོ་རྣམས་ལའང་སྔགས་ཉི་ཤུ་རྩ་གཅིག་བཟླས་པས་བཏབ་སྟེ། སྐུ་དང་འདོམ་གང་ལས་མི་རིང་བའི་སར་མགོ་བྱང་། ཁ་ནུབ། རྐང་པ་ལྷོར་བསྟན། གློ་
གཡས་པ་འོག་ཏུ་ཕབ་སྟེ་སེང་གེའི་ཉལ་སྟབས་དང་། དགེ་བའི་སེམས་ཀྱིས་སྣང་བའི་འདུ་ཤེས་དང་བཅས་ཏེ་ཉལ་བས་ཞག་གསུམ་མམ་བདུན་གྱི་ཐོ་རངས་ཚུན་ཆད་དུ་ལུང་སྟོན་པའི་རྨི་ལམ་རྣམས་འབྱུང་བར་འགྱུར་རོ། །དེས་མ་གྲུབ་ན་བསྙེན་པ་དང་ལས་སྦྱོར་ཇི་སྐད་བཤད་པ་བཞིན་ལན་གསུམ་དུ་བྱས་པས་མཚམས་མེད་ལྔ་བྱས་པ་མ་གཏོགས་མི་འགྲུབ་པ་མི་སྲིད་པར་གསུངས་སོ། །གསུམ་པ་ནི། ཐོ་རངས་ཀྱི་དུས་སུ་སངས་རྒྱས་ཀྱིས་དངོས་སུ་གསུངས་པའམ། དགེ་སློང་ལ་སོགས་པའི་གཟུགས་གཞན་གྱིས་བཤད་པའམ། གང་ནས་སྐྱེས་པ་དང་། གང་དུ་སྐྱེ་བར་འགྱུར་བའི་ཡུལ་ལམ། །གཟུགས་སམ། མིང་ལ་སོགས་པས་མཚོན་པའམ། རྨི་ལམ་དུ་སྔོན་དང་། མ་འོངས་པའི་སྐྱེ་བ་རྗེས་སུ་དྲན་པ་སོགས་གསལ་པོར་བྱུང་ན་ནམ་དུའང་བསླུ་བ་མེད་ཅིང་ངེས་པ་ཡིན་ལ། བརྡ་རྟགས་ཀྱི་སྒོ་ནས་བྱུང་ན་དཔྱད་ཤེས་པར་བྱ། ངན་སོང་དུ་སྐྱེ་བའི་མཚན་མ་བྱུང་ན་སྡིག་ལྟུང་ལ་བཤགས་སྡོམ་དང་བཅས་སླར་ཡང་བརྟགས་པས་མཐོ་རིས་སུ་སྐྱེ་བའི་མཚན་མ་འབྱུང་བ་དང་།་མཐོ་རིས་སུ་སྐྱེ་བའི་མཚན་མ་བྱུང་ན་བསག་སྦྱོང་སྤྱི་དང་། ཁྱད་པར་དག་པའི་ཞིང་སྦྱོང་བའི་ཏིང་ངེ་འཛིན་ལ་གོམས་པ་ལྷུར་ལེན་པ་དང་། རྟེན་བྱིན་ཅན་གྱི་མདུན་དུ་སྨོན་ལམ་རྒྱ་ཆེར་གདབ་ཅིང་། བླ་མ་དང་དགེ་
འདུན་གྱི་སྡེ་ལའང་མཐུན་འགྱུར་ཞུ་བ་སོགས་ཡིད་ཆེས་པར་བགྱིས་ཏེ་ཕྱིས་བརྟགས་པས་དག་པའི་ཞིང་དུ་སྐྱེ་བའི་མཚན་མ་འབྱུང་བ་སོགས་རིག་པས་དཔྱད་ལ་ཤེས་པར་བྱ་ཞིང་། གཞན་ཡང་རང་གཞན་གྱི་ལེགས་ཉེས་བདེ་སྡུག་ཀྱང་རྨི་ལམ་གྱི་སྐབས་སུ་ལུང་བསྟན་པའི་བརྡ་རྟགས་ཅི་རིགས་པ་འབྱུང་སྲིད་པས། རྨི་ལམ་བརྟག་པའི་ཐབས་དང་གཏམ་རྒྱུད་སོགས་ལས་ཇི་ལྟར་འབྱུང་བ་བཞིན་ཞིབ་མོར་གཏན་ལ་འབེབས་པ་དང་། བླང་དོར་གྱི་གནས་ཚུལ་བཞིན་དུ་བགྱིས་ན་ཕན་བདེའི་དགེ་ལེགས་ཀྱི་འབྲས་བུ་འབྱིན་པར་གདོན་མི་ཟའོ། །དྲི་བྲལ་ནོར་བུའི་མེ་ལོང་གིས། །རྣམ་མང་གཟུགས་བརྒྱ་མཚོན་པ་ལྟར། །རྨི་ལམ་མཚན་མས་ལུང་བསྟན་ཚུལ། །འདིས་ཀྱང་གཞན་ལ་ཕན་པར་ཤོག །ཅེས་པའང་ཡིག་རྙིང་གསལ་བྱེད་ཞལ་ཤེས་དང་བཅས་པའི་ཚོགས་རྣམས་ཕྱོགས་གཅིག་ཏུ་བསྡེབས་ཏེ། ལག་ཏུ་བླང་བདེ་བར་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག། །།སརྦ་དཱ་མངྒལཾ་སུ་ཤྲེ་ཡནྟུ།། །།