འཇམ་དཔལ་དཀར་པོ་མ་ཏི་ལུགས་ཀྱི་བླ་མ་བརྒྱུད་པའི་གསོལ་འདེབས་བདུད་རྩིའི་སྤྲིན་ཕུང་།
འཇམ་དཔལ་དཀར་པོ་མ་ཏི་ལུགས་ཀྱི་བླ་མ་བརྒྱུད་པའི་གསོལ་འདེབས་བདུད་རྩིའི་སྤྲིན་ཕུང་ཞེས་བྱ་བ་བཞུགས་སོ། །དུས་གསུམ་རྒྱལ་བའི་ཡབ་གཅིག་འཇམ་དཔལ་དབྱངས། །གང་དེས་རྗེས་བཟུང་སློབ་དཔོན་ཛེ་ཏཱ་རི། །མཁས་ཤིང་གྲུབ་བརྙེས་པཎ་ཆེན་མ་ཏིའི་ཞབས། །གསོལ་བ་འདེབས་སོ་བློ་གྲོས་སྣང་བ་སྩོལ། །བདེ་བའི་རྡོ་རྗེ་འབྱུང་གནས་སྦས་པ་དང་། །གངས་ཅན་བསྟན་པའི་ཉི་མ་ཤཱཀྱ་
ཤྲཱི། །མཁན་ཆེན་བྱང་ཆུབ་དཔལ་དང་བདེ་བ་དཔལ། །གསོལ་བ་འདེབས་སོ༴ སངས་རྒྱས་གཞོན་ནུ་བསོད་ནམས་ཤེས་རབ་དང་། །ཤེས་རབ་མགོན་པོ་ཤར་ཆེན་ཐམས་ཅད་མཁྱེན། །རྒྱལ་བས་ལུང་བསྟན་ཀུན་མཁྱེན་ཨེ་ཝཾ་པར། །གསོལ་བ༴ རྒྱལ་ཚབ་དམ་པ་ཡོངས་འཛིན་དཀོན་མཆོག་འཕེལ། །དཀོན་མཆོག་ལྡན་གྲུབ་པཎ་ཆེན་ནམ་མཁའི་མཚན། །ནམ་མཁའ་སངས་རྒྱས་ནམ་མཁའ་དཔལ་བཟང་པོར། །གསོལ་བ༴ སངས་རྒྱས་ཕུན་ཚོགས་བསྟན་འཛིན་ལྷུན་གྲུབ་ཞབས། །དཔལ་ལྡན་ཆོས་སྐྱོང་རིན་ཆེན་མཆོག་གྲུབ་དང་། །འཇམ་མགོན་བླ་མ་ནམ་མཁའ་འཆི་མེད་ལ། །གསོལ་བ༴ བྱམས་པའི་ཐུགས་རྗེས་འཇམ་དཔལ་གཞོན་ནུ་ཉིད། །ཀུན་དགའ་བསྟན་འཛིན་རྒྱ་མཚོའི་གཙུག་རྒྱན་དུ། །ཡོངས་ཤར་བཀའ་དྲིན་མཉམ་མེད་བླ་མར་རྗེར། །གསོལ་བ་འདེབས་སོ་བློ་གྲོས་སྣང་བ་སྩོལ། །དེ་ལྟར་སྙིང་ནས་གུས་པས་གསོལ་བཏབ་མཐུས། །སྐྱེ་ཞིང་སྐྱེ་བར་ཐེག་མཆོག་བཤེས་གཉེན་གྱིས། །རྗེས་བཟུང་ཚུལ་གནས་ཐོས་བསམ་སྒོམ་པ་ལ། །གཡེལ་མེད་རྟག་ཏུ་བརྩོན་པར་བྱིན་གྱིས་རློབས། །ཁྱད་པར་བླ་མ་མཆོག་གསུམ་གཙུག་ཏུ་བསྙེན། །སྨོན་འཇུག་བྱང་ཆུབ་སེམས་ཀྱིས་རྒྱུད་སྦྱངས་ནས། །ཚོགས་གཉིས་ལས་འཁྲུངས་འཇམ་དཔལ་དཔའ་བོ་
ཡི། །ཟབ་གསལ་ཏིང་འཛིན་འགྲུབ་པར་བྱིན་གྱིས་རློབས། །ཐུགས་ཀར་ཟླ་བའི་འཁོར་ལོ་སྔགས་ཕྲེང་བཅས། །གཡས་གཡོན་ཤུགས་དྲག་འཁོར་བའི་སྣང་བ་ཡིས། །ཐོག་མེད་རྨོངས་པའི་མུན་པ་ཀུན་བསལ་ནས། །བློ་གྲོས་པདྨོ་རྒྱས་པར་བྱིན་གྱིས་རློབས། །ཚད་ལྡན་བྲིས་སྐུའི་ཆོ་གས་དངོས་གྲུབ་ཀྱི། །ཡེ་ཤེས་རང་དབང་ཉིད་དུ་སྒྲུབ་པ་དང་། །ཉེས་བྱས་འཇོམས་དང་ཡོན་ཏན་སྐྱེད་པ་སོགས། །ཕྲིན་ལས་འབད་མེད་འགྲུབ་པར་བྱིན་གྱིས་རློབས། །མདོར་ན་དེང་ནས་བྱང་ཆུབ་སྙིང་པོའི་བར། །འཇམ་མགོན་བླ་མ་མཆོག་གིས་རྗེས་བཟུང་ནས། །ཐམས་ཅད་གཟིགས་པའི་གོ་འཕང་མྱུར་ཐོབ་སྟེ། །རང་གཞན་དོན་གཉིས་འགྲུབ་པར་བྱིན་གྱིས་རློབས། །ཞེས་འཇམ་དཔལ་དཀར་པོ་མ་ཏི་ལུགས་ཀྱི་བླ་མ་བརྒྱུད་པའི་གསོལ་འདེབས་སྨོན་ལམ་དང་བཅས་པ་བདུད་རྩིའི་སྤྲིན་ཕུང་ཞེས་བྱ་བ། བྱིན་རླབས་ཀྱི་ཆར་ཆེན་འབེབས་ཤིང་བློ་གྲོས་ཀྱི་པདྨོ་རྒྱས་པར་བྱེད་པ་འདིའང་ཐར་ལམ་བླ་མ་ལ་རེ་བ་འཇམ་དབྱངས་མཁྱེན་བརྩེའི་དབང་པོས་གསོལ་བ་བཏབ་པ་སིདྡྷི་རསྟུ། སརྦ་དཱ་ཀ་ལྱཱ་ཎཾ་བྷ་བ་ཏུ།། །།