མི་གཡོ་བ་དཀར་པོའི་སྒྲུབ་ཐབས་ཉུང་གསལ་སྙིང་པོར་དྲིལ་བ་བློ་གྲོས་གྲུབ་སྟེར།
མི་གཡོ་བ་དཀར་པོའི་སྒྲུབ་ཐབས་ཉུང་གསལ་སྙིང་པོར་དྲིལ་བ་བློ་གྲོས་གྲུབ་སྟེར་ཅེས་བྱ་བ་བཞུགས་སོ། །ན་མོ་གུ་རུ་ཙཎྜ་མ་ཧཱ་རོ་ཥ་ཎ་ཡ། ངེས་པར་འབྱུང་བ་དང་བྱང་ཆུབ་སེམས་གཉིས་ཀྱིས་རྒྱུད་སྦྱངས་ཤིང་དབང་དང་རྗེས་སུ་གནང་བ་ལེགས་པར་ཐོབ་པ་དམ་ཚིག་དང་སྡོམ་པར་ལྡན་པའི་རྣལ་འབྱོར་པས་བློ གྲོས་ཀྱི་མཐུ་ཕུན་སུམ་ཚོགས་པར་བྱ་བའི་སླད་དུ་དཔལ་གཏུམ་པོ་དཀར་པོའི་སྒོམ་བཟླས་ཉམས་སུ་བླང་བ་ནི། སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་པ་སྔོན་དུ་འགྲོ་བས། ཨོཾ་སྭ་བྷ་ཝ་ཤུདྡྷ་སརྦ་དྷརྨཱཿསྭ་བྷ་བ་ཤུདྡྷོཉཧཾ། སྐད་ཅིག་ཙམ་གྱིས་སྟོང་པར་གྱུར་པའི་ངང་། །བྷྲཱུྃ་ཞེས་བརྗོད་པའི་སྔགས་ཀྱི་སྒྲ་གདངས་ལས། །ས་ཕྱོགས་ཐམས་ཅད་མངོན་པར་དགའ་བའི་ཞིང་། །ཡིད་འཕྲོག་ངོ་མཚར་བཀོད་པ་འབྱམས་ཀླས་དབུས། །པཾ་ལས་པད་དཀར་རཾ་ལས་ཉི་མའི་སྟེང་། །སེམས་ཉིད་ཧཱུཾ་ཡིག་
དཀར་པོའི་འོད་ཟེར་གྱིས། །སྣོད་བཅུད་དངོས་འཛིན་སྦྱངས་ཏེ་རང་ལ་ཐིམ། །དེ་ལས་རང་ཉིད་བཅོམ་ལྡན་མི་གཡོ་མགོན། །རབ་དཀར་སྟོན་ཟླ་གསར་བའི་ལང་ཚོ་ལ། ཁྲོ་ཞིང་འཛུམ་ལ་སྒེག་པའི་ཉམས་འགྱུར་ཅན། །ཞལ་གཅིག་ཕྱག་གཉིས་སྤྱན་གསུམ་ཕྱག་གཡས་ཀྱིས། །ཡེ་ཤེས་རལ་གྲི་འབར་བ་མཁའ་ལ་འཕྱར། །གཡོན་པས་སྡིག་མཛུབ་དང་བཅས་རྡོ་རྗེའི་ཞགས། །ཐུགས་ཀར་འཆང་བའི་སྣེ་མོ་ཕྲག་གོང་ལྡིང་། །ཞབས་གཡས་རྟིང་དང་གཡོན་པའི་པུས་མོ་དག །གདན་ལ་བཙུགས་ཏེ་བཞེངས་པའི་སྟབས་སུ་བཞུགས། རིན་ཆེན་སྦྲུལ་རྒྱན་དར་གྱི་ན་བཟས་བཀླུབས། །མི་བསྐྱོད་རིགས་ཀྱི་བདག་པོ་དང་བཅས་ཏེ། །སྣང་སྣང་དབང་པོའི་གཞུ་བཞིན་གསལ་བ་ཡི། །ཐུགས་སྲོག་ཧཱུྃ་ཡིག་ལས་བྱུང་འོད་ཟེར་གྱིས། །རང་ཉིད་ཇི་ལྟའི་བཅོམ་ལྡན་མི་གཡོ་བ། །སྤྱན་དྲངས་མདུན་དུ་པད་ཉིའི་གདན་ལ་བཞུགས། །བདག་མདུན་ཐུགས་ཀར་པདྨ་དམར་པོ་ནི། །ཅུང་ཟད་ཁ་བྱེ་གེ་སར་རྒྱས་པའི་དབུས། །འཁོར་ལོ་དཀར་པོ་རྩིབས་བཅུའི་ལྟེ་བ་རུ། །རང་འདྲའི་ཡེ་ཤེས་སེམས་དཔའ་ཚོན་གང་བ། །དེ་ཡི་ཐུགས་ཀར་ཏིང་འཛིན་སེམས་དཔའ་ཧཱུྃ། །རབ་འབར་སྣང་བས་རྨོངས་པའི་མུན་པ་འཇོམས། །རྩིབས་བཅུར་རིག་པའི་རྒྱལ་པོ་འབྲུ་རེས་མཚན། །བཟླས་པའི་རྐྱེན་གྱིས་འཁོར་
ལོ་གཡས་འཁོར་ཞིང་། །ས་བོན་འཁོར་ལོའི་ཡི་གེ་ལས་བྱུང་བའི། །སྔགས་ཕྲེང་བདག་གི་ཞལ་ནས་མདུན་བསྐྱེད་ཀྱི། །ཞལ་དུ་ཞུགས་ནས་ཐུགས་སྲོག་ནཱ་དར་ཐིམ། །དེ་ལས་སྔགས་ཀྱི་ཕྲེང་བ་རབ་འཕྲོས་པ། །འཁོར་ལོའི་ཡི་གེ་སོ་སོར་ཐིམ་པ་ལས། །སོ་སོའི་སྔགས་ཀྱི་གཟུགས་བྱུང་ལྟེ་བ་ནས། །རང་གི་ལྟེ་བའི་ལམ་བརྒྱུད་ཧཱུཾ་ཡིག་ལ། །ཐིམ་སྟེ་གཟི་བྱིན་མཆོག་ཏུ་འབར་བ་ཡིས། །འཇིག་རྟེན་འཇིག་རྟེན་འདས་པའི་དངོས་གྲུབ་ཀུན། །བསྡུས་ནས་སྙིང་གའི་ས་བོན་གསོས་བཏབ་པས། །ཕྱོགས་ལས་རྣམ་པར་རྒྱལ་བའི་ཤེས་རབ་དང་། །ཕུན་སུམ་ཚོགས་པའི་མཐུ་སྟོབས་རྒྱས་པར་གྱུར། །ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཅེས་པའི་དམིགས་པ་རྩེ་གཅིག་པས་ཇི་ལྟར་ནུས་པ་བཟླས་མཐར་ཐུན་བསྡུ་བ་ན། མདུན་གྱི་ལྷ་ཧཱུྃ་གི་རྣམ་པར་གྱུར་ནས་རང་གི་ཐུགས་ཀར་ཐིམ་པས་རྒྱུད་བྱིན་གྱིས་བརླབས་པར་བསམས་ལ། དགེ་བ་འདི་ཡིས་བདག་སོགས་སེམས་ཅན་ཀུན། །བཅོམ་ལྡན་མི་གཡོ་མགོན་པོས་རྗེས་བཟུང་ནས། །རིག་དང་བརྩེ་བ་ནུས་པ་རྨད་བྱུང་བའི། །ཐམས་ཅད་གཟིགས་པའི་གོ་འཕང་མྱུར་ཐོབ་ཤོག །ཅེས་སོགས་བསྔོ་སྨོན་གྱིས་མཚམས་སྦྱར་ཏེ་ལྷར་སྣང་སྒྱུ་མ་ལྟ་བུའི་ངང་ནས་སྤྱོད་ལམ་ལ་འཇུག །བསྙེན་པ་བྱེད་ན། ཁྲུས་དང་གཙང་སྦྲ་ལ་གནས་
པས་གྲངས་འབུམ་ཕྲག་བཅུ་ཁ་སྐོང་དང་བཅས་པ་དང་། །དུས་ཞག་ཉེར་གཅིག་གི་བར་དུ་ཐུན་གསུམ་གྱི་རིམ་པས་ཉམས་སུ་བླངས་བ་ན་ལྷའི་གསལ་སྣང་སོགས་རྟགས་ཁྱད་པར་ཅན་བྱུང་བའི་ཚེ་བོགས་འབྱིན་སྡིགས་མཛུབ་ཀྱི་སྦྱོར་བ་དང་། ལེབ་རྒན་དར་གྱི་སྦྱོར་བས་ལྷ་མངོན་སུམ་དུ་བསྙེན་པ་ནི་ཡིག་རྙིང་ལྟར་ཤེས་པར་བྱའོ། །དེ་ལྟར་ཉམས་སུ་བླངས་པས་གནས་སྐབས་སུ་ཤེས་བྱ་ཀུན་ལ་འཇིགས་པ་མེད་པའི་འཆད་པ་དང་། སྙན་ངག་སྨྲ་བ་ལ་ཐོགས་པ་མེད་པའི་རྩོམ་པ་དང་། ཕྱོགས་ཐམས་ཅད་ལས་རྣམ་པར་རྒྱལ་བའི་རྩོད་པའི་མཐུ་ཕུན་སུམ་ཚོགས་པ་ཐོབ་ཅིང་། ཁྱད་པར་ཤེས་རབ་འཆལ་བའི་གེགས་ཐམས་ཅད་སྲུང་བ་དང་། མཐར་ཐུགས་ལམ་རིམ་གྱིས་བགྲོད་ནས་བཅོམ་ལྡན་འདས་ཀྱི་གོ་འཕང་ཐོབ་པ་ནི་ངེས་པའོ། །ཞེས་པའང་དཔལ་ལྡན་བླ་མ་དམ་པ་མཆོག་གི་སྤྲུལ་པའི་སྐུ་ཀརྨ་ངེས་དོན་དབང་པོས་བཀའ་སྩལ་རིན་པོ་ཆེའི་ཕྲེང་བས་བསྐུལ་བ་ལྟར་མང་དུ་ཐོས་པའི་བཙུན་པ་འཇམ་དབྱངས་མཁྱེན་བརྩེའི་དབང་པོས་པཎྜི་ཏ་དཱ་ན་ཤཱི་ལའི་རྒྱ་གཞུང་དང་། ཚུལ་འདིའི་སྒོ་ནས་དངོས་གྲུབ་བརྙེས་པ་མཁས་པ་ཡོན་ཏན་ཁྲིའི་གསུང་རབ་ལས་སྙིང་པོར་དྲིལ་ཏེ་སྦྱར་བའི་དགེ་བས་འགྲོ་ཀུན་ཐམས་ཅད་གཟིགས་པའི་གོ་འཕང་ལ་འདོད་རྒུར་རྩེན་པའི་རྒྱུར་གྱུར་ཅིག། །།