མི་གཡོ་བ་དཀར་པོའི་བླ་མ་བརྒྱུད་པའི་གསོལ་འདེབས་ཡེ་ཤེས་རྒྱས་བྱེད།
མི་གཡོ་བ་དཀར་པོའི་བླ་མ་བརྒྱུད་པའི་གསོལ་འདེབས་ཡེ་ཤེས་རྒྱས་བྱེད་ཅེས་བྱ་བ་བཞུགས་སོ། །མི་བསྐྱོད་རྡོ་རྗེ་ཁྲོ་རྒྱལ་མི་གཡོ་མགོན། །འོད་བྱེད་འབྱུང་གནས་པཎ་ཆེན་ཤཱཀྱ་ཤྲཱི། །དཱ་ན་ཤཱི་ལ་འདུལ་འཛིན་བྱང་ཆུབ་སེམས། །ཆོས་ཀྱི་དབང་ཕྱུག་རྣམས་ལ་གསོལ་བ་འདེབས། །དངོས་གྲུབ་མཆོག་བརྙེས་མཁས་པ་ཡོན་ཏན་ཁྲི། །སེང་གེ་བཟང་པོ་སེང་གེ་རྒྱལ་མཚན་དང་། །བསོད་ནམས་རྒྱལ་མཆོག་འཇམ་དབྱངས་ནམ་མཁའི་མཚན། །བདག་ཆེན་ཆོས་རྗེ་རྣམས་ལ་གསོལ་བ་འདེབས། །ཀུན་སྤངས་ཆེན་པོ་ཚར་ཆེན་རྡོ་རྗེ་འཆང་། །འཇམ་དབྱངས་མཁྱེན་བརྩེ་དབང་ཕྱུག་རབ་བརྟན་ཞབས། །ངག་གི་དབང་པོ་ཀུན་དགའ་བསོད་ནམས་དང་། །བསོད་ནམས་དབང་ཕྱུག་རྣམས་ལ༴ བརྒྱུད་སྲོལ་ཀུན་འདུས་རྨོར་ཆེན་ཆོས་ཀྱི་རྗེ། །ལེགས་པའི་འབྱུང་གནས་ཀུན་དགའ་བློ་གྲོས་དང་། །ནམ་མཁའ་འཆི་མེད་ཀུན་དགའ་བསྟན་འཛིན་དཔལ། །རྩ་བའི་བླ་མ་རྣམས་ལ༴ དེ་ལྟར་གསོལ་བ་བཏབ་པའི་བྱིན་རླབས་དང་། །བསྙེན་སྒྲུབ་བོགས་འབྱིན་སྦྱོར་བ་ལ་བརྟེན་ནས། །ཁྲོ་རྒྱལ་དབང་པོས་མངོན་སུམ་རྗེས་བཟུང་མཐུས། །མཁྱེན་བརྩེ་ནུས་པའི་ཡེ་ཤེས་མཐར་སོན་ཤོག །ཅེས་པའང་འཇམ་དབྱངས་མཁྱེན་བརྩེའི་དབང་པོས་གསོལ་བ་བཏབ་པ་སིདྡྷི་རསྟུ།། །།