ཤེས་རབ་ཀྱིས་རོལ་ཏུ་ཕྱིན་མ་དཀར་མོའི་རྗེས་སུ་གནང་བའི་ཚུལ་བྱིན་རླབས་སྣང་བ།
༈ ཤེས་རབ་ཀྱིས་རོལ་ཏུ་ཕྱིན་མ་དཀར་མོའི་རྗེས་སུ་གནང་བའི་ཚུལ་བྱིན་རླབས་སྣང་བ་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། སྲས་བཅས་རྒྱལ་ཀུན་སྐྱེད་པའི་ཡུམ། །ཤེས་རབ་ཕ་རོལ་ཕྱིན་མ་ལ། །བཏུད་ནས་དེ་ཡི་རྗེས་གནང་ཚུལ། །བྱིན་རླབས་སྣང་བའི་དགའ་སྟོན་སྦྱིན། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་པར་སྟེགས་བུའི་ཁར་མེ་ཏོག་སིལ་མ་དགྲམ། དེའི་དབུས་སུ་མཉྫིའི་སྟེང་དུ་མཎྜ་ལར་དྲིའི་ཐིག་ལེ་དང་མེ་ཏོག་གི་ཚོམ་བུ་གཅིག་དགོད། མདུན་དུ་འབུལ་གཏོར། མཆོད་ཡོན་སྔོན་དུ་འགྲོ་བའི་ཉེར་སྤྱོད། ཉེ་ལོགས་ཅི་བདེ་བར་སློབ་མ་ལ་དགོས་པའི་མཎྜལ་དང་མེ་ཏོག །རང་གི་མདུན་དུ་རྡོ་རྗེ་དྲིལ་བུ་མེ་ཏོག་གི་སྣོད་སོགས་བཤམ། གཉིས་པ་དངོས་གཞི་ལ་གསུམ། བདག་གི་རྣལ་འབྱོར། མདུན་བསྐྱེད་བསྒྲུབ་པ། སློབ་མ་རྗེས་སུ་གཟུང་བའོ། །དང་པོ་ནི། མཆོད་པ་རྣམས་བསང་སྦྱངས་བྱིན་
བརླབ། བདག་དང་འགྲོ་བ་སོགས་སྐྱབས་འགྲོ་གསོལ་གདབ་བཅས་སྤྱི་ལྟར་དང་། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ཤེས་རབ་ཀྱི་ཕ་རོལ་ཏུ་ཕྱིན་མའི་བསྒོམ་བཟླས་ཉམས་སུ་བླང་བར་བགྱིའོ་ཞེས་ལན་གསུམ་གྱིས་སེམས་བསྐྱེད། རང་སྐད་ཅིག་གིས་ཞེས་སོགས་ནས་བཟླས་པའི་བར་རྡོ་རྗེ་འཆང་ཀུན་དགའ་བཟང་པོའི་གསུང་རབ་ལྟར་བྱ། བཟླས་པ་ཅི་ནུས་རྗེས་སུ་ཐལ་མོ་སྦྱར་ཏེ། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ལ་བདག་མེད་རྟོགས་པའི་ཤེས་རབ་ཀྱི་མཐུ་ཕུན་སུམ་ཚོགས་པ་སྩལ་དུ་གསོལ། ཞེས་གསོལ་བ་གདབ། རང་གི་ཐུགས་ཀ་ནས་འོད་ཟེར་འཕྲོས་པས་གདན་འོད་ཟེར་གྱི་རྣམ་པར་གྱུར་ཏེ་རང་ལ་ཐིམ་པར་བསམ། གཉིས་པ་ནི། ཚོམ་བུ་བསང་སྦྱངས། སྟོང་པའི་ངང་ལས་པཾ་ལས་པདྨ་དཀར་པོའི་སྡོང་བུ་སོགས་ནས། འོད་དཔག་ཏུ་མེད་པས་དབུར་བརྒྱན་ཞེས་པའི་བར་བདག་བསྐྱེད་ལྟར་ལ། བདག་ཉིད་ཅེས་པའི་ཚིག་དོར། བདག་ལ་མངོན་པར་དབང་བསྐུར་ཞེས་པར་འདི་ལ་ཞེས་བསྒྱུར། མཆོད་པ་བསང་སྦྱངས་བྱིན་བརླབ། ཨོཾ་ཤྲཱི་པྲཛྙཱ་པཱ་ར་མི་ཏཱ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་པུཊཾ་ནས་ཤཔྟའི་བར་སྦྱར་བ་དང་། གྷཎྜེར་ཎི་ཏས་མཆོད། བསྟོད་པ་རྒྱས་པར་རྡོ་
རྗེ་འཆང་གིས་མཛད་པའམ་བསྡུ་ན། སྨྲ་བསམ་བརྗོད་མེད་སོགས་ཀྱིས་བསྟོད། གཏོར་མ་བསང་སྦྱངས་བྱིན་རླབས་འབུལ་བ་རྣམས་སྒྲུབ་ཐབས་ལྟར་དང་། གོང་ལྟར་མཆོད་ཅིང་བསྟོད། །བཅོམ་ལྡན་འདས་མས་བདག་དང་སོགས་འདོད་དོན་གསོལ། མདུན་བསྐྱེད་ཀྱི་ཐུགས་རྒྱུད་བསྐུལ་བར་མོས་ཏེ་བཟླས་པ་ཅུང་ཟད་བྱའོ། །གསུམ་པ་ནི། སློབ་མ་རྣམས་ཕྱི་རོལ་ཏུ་ཁྲུས་བྱ། ནང་དུ་འོངས་ཏེ་དུལ་བར་འཁོད་པ་ལ་མེ་ཏོག་བཀྲམ་བསྡུ་གྲུབ་རྗེས་སློབ་དཔོན་གྱིས་སེམས་བསྐྱེད་གསོལ་འདེབས་སོགས་ཆོས་བཤད་ཇི་ལྟར་རིགས་པས་ཐོག་དྲངས་ཏེ། དེ་ལ་འདིར་གང་གསན་པར་བྱ་བའིཆོས་ནི། གནས་སྐབས་དང་མཐར་ཐུག་གི་ཡོན་ཏན་རིན་པོ་ཆེ་ཀུན་གྱི་རྩ་བ་དྲི་མ་མེད་པའི་ཤེས་རབ་ཕུན་སུམ་ཚོགས་པར་བྱེད་པ་ལ། གསང་སྔགས་རྡོ་རྗེ་ཐེག་པ་ལས་གཟུངས་ཀྱི་སྒོ་བསྒྲུབ་ཚུལ་བསམ་གྱིས་མི་ཁྱབ་པ་ཞིག་གསུངས་པ་རྣམས་ཀྱི་ནང་ནས་ཁྱད་པར་དུ་གྱུར་པ། གཉིས་སུ་མེད་པའི་རྒྱུད་ཀྱི་རྒྱལ་པོ་དཔལ་ཀྱེ་རྡོ་རྗེའི་བཤད་པའི་རྒྱུད་འཕགས་པ་མཁའ་འགྲོ་མ་རྡོ་རྗེ་གུར་གྱི་ལེའུ་བརྒྱད་པ་ལས་གསུངས་ཤིང་ལས་རྒྱས་པའི་ལྷ་གསུམ་དུ་གྲགས་པའི་ཡ་གྱལ་ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས་མན་ངག་དང་བཅས་པ་བླ་མ་རྡོ་རྗེ་གདན་པ་དང་། མཐུ་སྟོབས་ཀྱི་དབང་ཕྱུག་
དཔལ་བིརླ་པ་སོགས་ནས་ལེགས་པར་བརྒྱུད་ཅིང་རྗེ་བཙུན་ས་སྐྱ་པ་ཡབ་སྲས་ལ་བཀའ་བབས་པ་སྟེ། ཤར་ཆེན་ཐམས་ཅད་མཁྱེན་པ་ཡེ་ཤེས་རྒྱལ་མཚན་ཀྱང་ལམ་འདི་ལ་བརྟེན་ནས་སྤོབས་པའི་གཏེར་མཛོད་ཆེན་པོ་ལ་དབང་བསྒྱུར་བ་སོགས་བྱིན་རླབས་ཀྱི་ཚན་ཁ་རྨད་དུ་བྱུང་བའི་རྗེས་སུ་གནང་བ་ཟབ་མོ་འབུལ་བ་ལ་སློབ་དཔོན་གྱི་བྱ་བ་རྣམས་གྲུབ་ནས། ཁྱེད་རང་རྣམས་ཀྱི་སྐུའི་ངོ་སྐལ་དུ་གྱུར་པ་ཐོག་མར་རྗེས་སུ་གནང་བ་ཞུ་བའི་ཡོན་དུ་མཎྜལ་ཞིག་འབུལ་བར་ཞུ། ཞེས་མཚམས་སྦྱར་ལ། མཎྜལ་གསོལ་གདབ་ནས་བཟུང་དགེ་བསྔོ་བར་སྒྲུབ་ཐབས་བརྒྱ་རྩའི་རྗེས་གནང་གི་ཆིངས་ཇི་ལྟ་བ་བཞིན་བྱའོ། །གསུམ་པ་རྗེས་ནི། མཆོད་པ་བསང་སྦྱངས་བྱིན་བརླབ། མཆོད་བསྟོད། ནོངས་བཤགས། ཚོམ་བུའི་ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། གནས་གསུམ་བསྲུང་། བསྔོ་སྨོན་བཀྲ་ཤིས་རྣམས་སྤྱི་ལྟར་བྱའོ། །འཕགས་མ་ཤེས་རབ་ཕ་རོལ་ཕྱིན། །རབ་དཀར་སྟོན་ཟླའི་མདངས་འཕྲོག་མའི། །བྱིན་རླབས་སྣང་བས་ས་གསུམ་གྱི། །བློ་གྲོས་ཆུ་གཏེར་རྒྱས་གྱུར་ཅིག །ཅེས་ཐར་རྩེ་མཧཱ་པཎྜི་ཏ་ནམ་མཁའ་དཔལ་བཟང་པོའི་གསུང་རབ་ལས་ཅུང་ཟད་གསལ་བར་ཕྱེ་བ་འདིའང་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ། །།